L-Unjoni Ewropea tibqa’ soda fl-appoġġ tagħha għall-Ukrajna fid-dawl tal-gwerra ta’ aggressjoni mhux provokata u mhux ġustifikata tar-Russja kontra l-pajjiż u tat-tentattivi illegali tagħha biex tgħaqqad magħha territorju Ukren. Il-libertà tal-Ukrajna hija l-libertà tal-Ewropa, u huwa għalhekk li l-UE ser tkompli tipprovdi, f’koordinazzjoni ma’ sħab u alleati tal-istess fehma, appoġġ politiku, finanzjarju, ekonomiku, umanitarju, militari u diplomatiku komprensiv lill-Ukrajna u lill-poplu tagħha.

L-UE pprovdiet appoġġ militari bla preċedent lill-forzi armati tal-Ukrajna u laqgħet aktar minn erba’ miljun Ukren li qed ifittxu rifuġju fl-Istati Membri. Hija involuta wkoll fl-appoġġ tar-riformi tal-Ukrajna fi triqitha lejn is-sħubija fl-UE, inkluż l-avvanzar tal-integrazzjoni gradwali tal-Ukrajna fis-Suq Uniku. L-UE kkontribwiet ukoll appoġġ finanzjarju sostanzjali biex tagħti spinta lir-reżiljenza, l-irkupru u r-rikostruzzjoni tal-pajjiż. Barra minn hekk, il-Kummissjoni Ewropea se tkompli tinsisti għal paċi ġusta u dejjiema skont il-liġi internazzjonali, inkluż il-prinċipji tal-Karta tan-NU, li tippreserva s-sovranità, l-indipendenza u l-integrità territorjali tal-Ukrajna.

Għaddew kważi 4 snin minn meta r-Russja nediet il-gwerra ta’ aggressjoni fuq skala sħiħa tagħha kontra l-Ukrajna. L-UE tibqa’ impenjata li tappoġġa lill-Ukrajna u lill-poplu tagħha sakemm ikun hemm bżonn. Dan l-isforz kompla fl-2025, appoġġat mill-konvinzjoni tal-UE li l-Ukrajna dalwaqt se tkun pajjiż fis-sliem, prosperu għaċ-ċittadini kollha tiegħu, u f’daru b’mod sħiħ fl-UE. Sa tmiem l-2025, l-appoġġ ipprovdut mill-UE - iftaħ tab ġdida. u l-Istati Membri tagħha mill-bidu tal-gwerra ammonta għal €193.3 biljun. Fl-2025 biss, l-UE kopriet 84 % tal-ħtiġijiet ta’ finanzjament estern tal-Ukrajna. Il-Kummissjoni kompliet tikkoordina l-assistenza tagħha ma’ sostenituri ewlenin oħra permezz tal-Pjattaforma tad-Donaturi tal-Ukrajna. Fil-Kunsill Ewropew tat-18 u d-19 ta’ Diċembru, il-mexxejja tal-UE ddeċidew li jimmobilizzaw €90 biljun addizzjonali f’finanzjament għall-2026–2027 permezz ta’ self komuni appoġġat mill-baġit tal-UE.

L-UE kompliet issostni l-għajnuna umanitarja vitali kemm fl-Ukrajna kif ukoll fil-Moldova, b’finanzjament dirett lejn l-assistenza ta’ emerġenza. Dan jinkludi €40 miljun - iftaħ tab ġdida. allokati f’Settembru biex jgħinu lill-Ukreni waqt li jgħaddu mir-raba’ xitwa tal-gwerra ta’ aggressjoni tar-Russja, jgħinu lis-sħab tal-għajnuna umanitarja tal-UE jipprovdu materjali ta’ kenn, isewwu djar u ċentri għall-persuni spostati li tkun saritilhom xi ħsara, u jtejbu l-aċċess għall-ilma, għas-sanitazzjoni u għat-tisħin.

Mill-invażjoni fuq skala sħiħa tar-Russja fi Frar 2022, il-Kummissjoni allokat aktar minn €1 biljun għal programmi ta’ għajnuna umanitarja fl-Ukrajna, inklużi €220 miljun fl-2025.

Biex tipprovdi assistenza ta’ emerġenza lill-Ukreni, l-UE qed tikkoordina l-akbar attivazzjoni li qatt saret taħt il-Mekkaniżmu tal-UE għall-Protezzjoni Ċivili - iftaħ tab ġdida.. S’issa, is-27 Stat Membru kollha, flimkien ma’ sitt pajjiżi parteċipanti (l-Iżlanda, il-Moldova, il-Maċedonja ta’ Fuq, in-Norveġja, is-Serbja u t-Turkija), offrew assistenza in natura li tvarja minn provvisti mediċi u oġġetti ta’ kenn għal vetturi u tagħmir tal-enerġija. B’kollox, aktar minn 156 000 tunnellata ta’ assistenza ġew diretti lejn l-Ukrajna. Barra minn hekk, mill-2022, iktar minn 4 700 pazjent ġew ittrasferiti għall-kura fl-isptarijiet madwar l-Ewropa.

L-UE tkompli wkoll tilqa’ lil dawk li qed jaħarbu mill-gwerra. Fl-2025 l-Istati Membri qablu li jestendu l-istatus ta’ protezzjoni temporanja - iftaħ tab ġdida. attwali, li jippermetti lill-Ukreni li jgħixu, jaħdmu u jistudjaw fl-UE, sal-4 ta’ Marzu 2027. Mill-2022, l-Istati Membri laqgħu aktar minn 4 miljun persuna. f’Ġunju, il-Kummissjoni pproponiet ukoll li l-Istati Membri jibdew iħejju għal tranżizzjoni mis-sistema ta’ protezzjoni temporanja lejn għażliet ta’ status legali oħrajn u li jiffaċilitaw ir-ritorn u r-riintegrazzjoni ta’ dawk li jixtiequ jirritornaw lura lejn djarhom fl-Ukrajna.

F’Lulju, il-Kummissjoni ħabbret ukoll l-impenn tagħha li tipprovdi lill-Ukrajna sħubija assoċjata tal-programm Erasmus+, filwaqt li tespandi l-opportunitajiet edukattivi u ta’ mobbiltà għall-istudenti u l-għalliema Ukreni. Barra minn hekk, Erasmus+ se jappoġġa d-distribuzzjoni ta’ żewġ miljun ktieb ġdid lill-istudenti Ukreni fis-sena skolastika 2025/2026.

Is-sigurtà tal-Ukrajna hija marbuta b’mod inseparabbli ma’ dik tal-Ewropa. Din hija r-raġuni għaliex il-prijorità ewlenija tal-UE hija li ttemm il-gwerra ta’ aggressjoni tar-Russja u t-tentattivi illegali tagħha biex tgħaqqad magħha territorju Ukren, u li tiżgura paċi ġusta u dejjiema. Matul l-2025, l-UE ħadet diversi passi sinifikanti lejn dan l-objettiv kumpless u ta’ sfida kbira, inkluż l-għoti ta’ appoġġ militari kontinwu u t-tnedija ta’ pakketti suċċessivi ta’ sanzjonijiet li imponew spejjeż reali fuq l-ekonomija tar-Russja.

Bis-sanzjonijiet il-ġodda, l-UE kompliet tnaqqas l-aċċess tar-Russja għat-teknoloġiji tal-kamp tal-battalja, dgħajfet il-kumpless militari-industrijali tagħha u żiedet il-ġlieda kontra l-flotta mistura tagħha. L-UE ssikkat ukoll ir-restrizzjonijiet fuq id-dħul tar-Russja mill-enerġija u introduċiet projbizzjoni fuq l-importazzjonijiet tal-gass naturali likwifikat Russu mill-1 ta’ Jannar 2027.

L-UE u l-Istati Membri tagħha pprovdew madwar €66 biljun f’appoġġ militari mill-bidu tal-aggressjoni militari fuq skala sħiħa tar-Russja kontra l-Ukrajna, li €6.4 biljun minnhom ġew diretti permezz tal-Faċilità Ewropea għall-Paċi - iftaħ tab ġdida.. L-UE pprovdiet ukoll €3.4 biljun mir-rikavati tal-assi immobilizzati Russi, filwaqt li hija fornitur essenzjali ta’ taħriġ lill-Forzi Armati Ukreni permezz tal-Missjoni ta’ Assistenza Militari tal-UE b’appoġġ għall-Ukrajna - iftaħ tab ġdida., li s’issa ħarrġet madwar 85 000 membru tal-persunal militari Ukren. Dawn il-forom kollha ta’ appoġġ militari jgħinu biex tissaħħaħ l-Ukrajna fil-kamp tal-battalja u fuq il-mejda tan-negozjati, filwaqt li jissalvagwardjaw il-ħajjiet tal-Ukreni.

Matul l-2025, l-UE kompliet tiżgura li t-tmexxija tar-Russja tinżamm responsabbli għad-delitti atroċi mwettqa fl-Ukrajna u kontriha. Fi Frar, il-Kummissjoni, ir-Rappreżentant Għoli għall-Affarijiet Barranin u l-Politika ta’ Sigurtà, il-Kunsill tal-Ewropa u l-Ukrajna, flimkien ma’ 37 pajjiż ieħor, stabbilew il-pedamenti għall-istabbiliment tat-Tribunal Speċjali għad-Delitt ta’ Aggressjoni kontra l-Ukrajna. Il-Ftehim bejn il-Kunsill tal-Ewropa u l-Ukrajna dwar l-istabbiliment tat-tribunal ġie ffirmat f’Ġunju. It-tribunal se jkollu s-setgħa li jżomm responsabbli lill-mexxejja politiċi u militari tar-Russja, li jġorru l-akbar responsabbiltà għall-atroċitajiet imwettqa fl-Ukrajna. F’Diċembru, il-Kummissjoni ffirmat il-Konvenzjoni li tistabbilixxi l-Kummissjoni Internazzjonali għat-Talbiet għall-Ukrajna f’isem l-UE. L-iffirmar immarka mument ewlieni fl-isforzi kollettivi tal-Ewropa biex jiġu żgurati l-obbligu ta’ rendikont u l-ġustizzja għall-Ukrajna u l-poplu Ukren, filwaqt li jiġi żgurat li l-vittmi tal-gwerra brutali ta’ aggressjoni tar-Russja jiġu kkumpensati kif xieraq.

Biex jiġi żgurat li s-sanzjonijiet tal-UE jiġu implimentati bis-sħiħ, id-dritt tal-UE ssaħħaħ biex jippermetti lill-Istati Membri jikkonfiskaw assi marbuta ma’ reati kriminali. Grazzi għat-Task Force “Iffriżar u Sekwestru” - iftaħ tab ġdida., sa tmiem l-2025 l-Istati Membri kienu ffriżaw aktar minn €27 biljun f’assi privati li jappartjenu għall-oligarki u l-assoċjati tagħhom Russi u Belarussi.

L-UE stabbiliet il-Faċilità għall-Ukrajna - iftaħ tab ġdida., strument ta’ finanzjament iddedikat sa €50 biljun, biex tipprovdi appoġġ prevedibbli u flessibbli lill-Ukrajna għall-2024–2027 biex tappoġġa l-irkupru, ir-rikostruzzjoni u l-modernizzazzjoni tagħha, f’konformità mal-perkors tagħha lejn l-UE.

Fi Frar 2025, l-UE offriet pakkett ta’ sostenn - iftaħ tab ġdida. ġdid lill-Ukrajna biex tippermetti l-integrazzjoni sħiħa tagħha fis-suq Ewropew tal-enerġija sal-bidu tal-2027, flimkien mal-Moldova, flimkien ma’ aktar integrazzjoni fis-settur tal-gass tal-UE, dment li l-Ukrajna taċċellera b’mod sinifikanti r-riformi meħtieġa tas-suq.

B’mod parallel, l-UE kompliet tavvanza l-integrazzjoni gradwali tal-Ukrajna fis-Suq Uniku, b’mod partikolari permezz tal-opportunitajiet offruti miż-Żona ta’ Kummerċ Ħieles Approfondita u Komprensiva bejn l-UE u l-Ukrajna. B’riżultat ta’ dan, l-Ukrajna ngħaqdet maż-żona tar-Roaming Daqslikieku f’Pajjiżek - iftaħ tab ġdida. mill-1 ta’ Jannar 2026. Barra minn hekk, l-UE u l-Ukrajna ġeddew il-ftehim dwar it-trasport bit-triq - iftaħ tab ġdida. tagħhom sa Marzu 2027, li jippermetti tranżitu transfruntier tal-merkanzija b’inqas xkiel għall-benefiċċju taż-żewġ ekonomiji. Il-Kummissjoni lestiet ukoll it-trasport ta’ impjant tal-enerġija termali sħiħ mil-Litwanja lejn l-Ukrajna biex tappoġġa l-ħtiġijiet tal-enerġija tal-popolazzjoni — l-akbar operazzjoni unika sal-lum taħt il-Mekkaniżmu tal-UE għall-Protezzjoni Ċivili.

Il-Korsiji ta’ Solidarjetà - iftaħ tab ġdida., stabbiliti f’Mejju 2022, ikomplu jiżguraw li l-Ukrajna tkun tista’ timporta l-oġġetti li teħtieġ u tesporta xi prodotti agrikoli u prodotti oħra. Filwaqt li l-Korsiji ta’ Solidarjetà kienu essenzjali għall-esportazzjonijiet agrikoli tal-Ukrajna sa nofs l-2023, l-Ukrajna minn dak iż-żmien ’l hawn iġġieldet b’suċċess kontra r-Russja biex tiżgura l-kuritur tagħha tal-Baħar l-Iswed. L-UE tappoġġa l-kummerċ tal-Ukrajna marbut mal-Baħar l-Iswed billi tappoġġa dan il-kuritur, li jippermetti lill-bastimenti Ukreni jkomplu jesportaw. B’mod parallel, l-UE investiet fl-infrastruttura u l-koordinazzjoni biex tiżgura li din ir-rotta marittima tibqa’ vijabbli u sigura.

L-UE kompliet tuża strumenti ta’ garanzija ta’ kreditu għall-esportazzjoni matul is-sena biex tappoġġa l-kummerċ. Pereżempju, f’Ġunju, intlaħaq l-ewwel ftehim - iftaħ tab ġdida. taħt il-Faċilità ta’ Garanzija ta’ Kreditu għall-Esportazzjoni tal-Ukrajna tal-UE, li pprovda €20 miljun f’garanziji għall-esportazzjonijiet tal-UE lejn l-Ukrajna permezz tal-Uffiċċju tal-Esportazzjoni u l-Importazzjoni tad-Danimarka.

L-impenn kontinwu tal-UE għar-rikostruzzjoni tal-Ukrajna fl-2025 għaqqad l-istrumenti finanzjarji, il-garanziji, l-għotjiet u l-appoġġ kundizzjonali għar-riforma biex tingħata spinta lir-reżiljenza u l-istabbiltà ekonomika tal-pajjiż u biex jiġi appoġġat l-irkupru sostenibbli fit-tul tiegħu. Ċentrali għal dawn l-isforzi hija l-Faċilità għall-Ukrajna 2024–2027. Il-qafas ta’ Investiment għall-Ukrajna, il-fergħa tal-investiment tal-Faċilità għall-Ukrajna, ġie pprovdut b’total ta’ €9.5 biljun f’appoġġ tal-UE u huwa mfassal biex jimmobilizza sa €40 biljun f’investiment pubbliku u privat għall-irkupru u r-rikostruzzjoni tal-Ukrajna. S’issa, ġew allokati €6.9 biljun biex jiffinanzjaw programmi ta’ investiment li huma ta’ benefiċċju dirett għall-poplu tal-Ukrajna — il-ħolqien ta’ impjiegi ġodda, il-provvista tal-elettriku, tas-sħana u tal-ilma nadif, l-appoġġ għal akkomodazzjoni affordabbli, il-bini ta’ postijiet ta’ kenn mill-attakki bil-bombi, ir-riabilitazzjoni ta’ infrastruttura li saritilha ħsara fil-gwerra u aktar.

F’Marzu tnediet sejħa għal proposti - iftaħ tab ġdida. biex jiġu appoġġati n-negozji ż-żgħar, il-komunitajiet affettwati mill-gwerra u l-investimenti ta’ rkupru. Dan kellu l-għan li jespandi l-aċċess għall-appoġġ finanzjarju għall-intrapriżi mikro, żgħar u ta’ daqs medju permezz tal-banek biex tissaħħaħ il-koeżjoni soċjoekonomika tal-Ukrajna. Dan kien segwit minn sejħa ġdida għal espressjonijiet ta’ interess li ntemmet f’Ottubru.

Biex ittejjeb il-konnessjonijiet tat-trasport bejn l-UE, l-Ukrajna u l-Moldova, sal-lum l-UE mmobilizzat aktar minn €2.3 biljun, inklużi €1.55 biljun f’appoġġ ta’ għotja mhux rimborżabbli mill-Faċilità Nikkollegaw l-Ewropa. Pereżempju, f’Settembru, l-Ukrajna fetħet l-ewwel linja ferrovjarja tagħha b’gauge standard tal-UE - iftaħ tab ġdida., li tippermetti l-ivvjaġġar dirett bil-ferrovija mill-Ukrajna lejn bliet bħal Budapest fl-Ungerija u Vjenna fl-Awstrija. F’Lulju, intgħażel proġett ġdid ta’ €73.5 miljun taħt il-faċilità biex tinbena konnessjoni ferrovjarja b’gauge standard tal-UE mill-Polonja sa Sknyliv (qrib Lviv) fl-Ukrajna. Dan se jikkontribwixxi għall-integrazzjoni ulterjuri tal-Ukrajna fin-network ferrovjarju tal-UE.

Lil hinn mill-finanzjament dirett, l-UE qed tiffoka fuq riformi strutturali u istituzzjonali bħala parti mill-proċess ta’ rikostruzzjoni. L-Ukrajna għandha r-responsabbilità li timplimenta pjan ta’ rkupru u riforma; ir-rispett tal-mekkaniżmi demokratiċi, l-istat tad-dritt u d-drittijiet tal-bniedem; u ż-żamma ta’ governanza trasparenti u responsabbli.