Lean an tAontas den dul chun cinn i dtreo geilleagar ciorclach in 2024, agus é d’aidhm aige an brú ar acmhainní nádúrtha a laghdú, an dramhaíl a laghdú agus fás agus poist inbhuanaithe a chruthú.
Le reachtaíocht nua a glacadh, cuideofar le táirgiúlacht acmhainní a mhéadú agus borradh a chur faoi iomaíochas agus athléimneacht fhadtéarmach gheilleagar an Aontais.

Féachaint leis gur táirgí inbhuanaithe an gnás

Is féidir tionchar suntasach ar an gcomhshaol a bheith ag táirgí agus ag an gcaoi a n-úsáidimid iad, ach a bhuí le rialacha nua de chuid an Aontais, beidh táirgí inbhuanaithe ina ngnás de réir a chéile. Tagann an méid sin i ndiaidh theacht i bhfeidhm rialacha nua - oscail i dtáb nua. lena gcinnteofar gur sia a mhairfidh earraí laethúla tí agus táirgí tionsclaíocha, go n-úsáidfidh siad fuinneamh agus acmhainní ar bhealach níos éifeachtúla, gur fusa a bheidh sé iad a dheisiú agus a athchúrsáil, agus go mbeidh níos mó ábhar athchúrsáilte iontu. Beidh siopadóirí in ann roghanna níos inbhuanaithe a dhéanamh freisin, a bhuí le Pasanna Digiteacha Táirgí - oscail i dtáb nua. ar clibeanna inscanta iad ar tháirgí lena dtugtar rochtain éasca ar eolas inbhuanaitheachta. Faoi na rialacha nua, cuirfear toirmeasc ar dhíothú éadaí agus coisbhirt nár díoladh.

FÍSEÁN: Faigh amach faoin Rialachán nua maidir le hÉicidhearthóireacht le haghaidh Táirgí Inbhuanaithe.

Tháinig rialacha nua - oscail i dtáb nua. de chuid an Aontais i bhfeidhm i mí an Mhárta chun tomhaltóirí a chumhachtú le haghaidh an aistrithe ghlais. Fágann sé sin go bhfaighidh tomhaltóirí eolas níos fearr sula gceannóidh siad táirge faoina mharthanacht agus faoina indeisitheacht, agus faoi na cearta ráthaíochta dlíthiúla atá acu. Ní bheidh cuideachtaí in ann a dhearbhú a thuilleadh go bhfuil táirgí ‘glas’ mura féidir leo feidhmíocht chomhshaoil aitheanta den scoth a léiriú. Ina theannta sin, beidh toirmeasc ar chleachtais tráchtála éagóracha, amhail na cleachtais sin a bhaineann le dífheidhmeacht luath nó le maímh bhréagacha a dhéanamh faoi inbhuanaitheacht táirge. Beidh feidhm ag na rialacha nua i mí Mheán Fómhair 2026.

Má chuirtear deisiú earraí chun cinn is amhlaidh a chuireann sé le tomhaltas inbhuanaithe. Tháinig rialacha nua - oscail i dtáb nua. i bhfeidhm i mí Iúil lena mbunaítear bearta chun cur le líon na n-earraí a dhéantar a dheisiú laistigh agus lasmuigh den ráthaíocht dhlíthiúil. Beidh ar mhonaróirí táirgí atá faoi réir ceanglais indeisitheachta i ndlí an Aontais (e.g. cuisneoirí agus gutháin chliste) táirgí a dheisiú laistigh de thréimhse ama réasúnta agus ar phraghas réasúnta. Laistigh de thréimhse na ráthaíochta dlíthiúla, beidh sé de cheangal ar dhíoltóirí deisiúchán a thairiscint ach amháin i gcás ina mbeidh sé níos costasaí ná an táirge a athsholáthar. Tar éis don ráthaíocht dhlíthiúil a bheith imithe in éag, beidh tacar nua ceart agus uirlisí ar fáil do thomhaltóirí ionas go mbeidh an deisiú ina rogha éasca inrochtana. Beidh sé de cheart ag tomhaltóirí bliain bhreise den ráthaíocht dhlíthiúil a fháil freisin má roghnaíonn siad an táirge a dheisiú seachas ceann nua a cheannach. Beidh feidhm ag na rialacha nua ó mhí Iúil 2026 ar aghaidh.

Ní hamháin go sábháiltear fuinneamh agus airgead leis an athchúrsáil, ach féadfaidh sí foinse mhaith amhábhar criticiúil a chur ar fáil freisin. Táthar ag éirí níos imníche nach mbeidh rochtain iontaofa gan chosc ann ar amhábhair áirithe amach anseo. Leis an nGníomh um Amhábhair Chriticiúla, rud a tháinig i bhfeidhm - oscail i dtáb nua. i mí na Bealtaine, socraítear tagarmharc chun 25 % ar a laghad de thomhaltas bliantúil an Aontais d’ábhair den sórt sin a fhoinsiú ón athchúrsáil. San áireamh leis freisin tá rialacha chun feabhas a chur ar inbhuanaitheacht agus ciorclaíocht amhábhar criticiúil ar mhargadh an Aontais.

Táirgeann cónaitheoirí an Aontais thart ar leathchileagram de dhramhaíl ó phacáistíocht gach lá ar an meán. Glacadh rialacha nua - oscail i dtáb nua. i mí na Nollag a dhéanfaidh pacáistíocht níos inbhuanaithe trí phacáistíocht nach bhfuil gá léi a laghdú, róphacáistíocht a theorannú agus méadú a dhéanamh ar líon na scéimeanna aisíoctha éarlaise le haghaidh buidéil phlaisteacha agus cannaí miotail. D’fhéadfadh gach duine suas le €100 sa bhliain a shábháil má chuireann gnólachtaí an coigilteas ar aghaidh.

Tá méadú 88 % tagtha ar easpórtálacha dramhaíola ón Aontas chuig tíortha nach den Aontas iad ó 2004 i leith, agus bhain siad 35 mhilliún tona amach in 2023. Tháinig rialacha nua isteach i mí na Bealtaine chun a chinntiú go nglacfaidh an tAontas níos mó freagrachta as a chuid dramhaíola. Is é is aidhm don rialachán nua - oscail i dtáb nua. a chinntiú nach n-easpórtálfaidh an tAontas a chuid dramhaíola chuig tíortha lasmuigh den Aontas agus go gcuireann sé le bainistiú dramhaíola atá neamhdhíobhálach don chomhshaol.

Le linn Fhéile Bauhaus Eorpach Nua i mí Aibreáin, tugadh cuireadh do chuairteoirí chuig lá speisialta a bhí dírithe ar an bhfaisean inbhuanaithe, inar reáchtáladh seó faisin chiorclaigh chuimsithigh ar thaispeáin 16 dhearthóir idirnáisiúnta as ocht dtír a gcuid éadaí éiceabhácha lena linn. Cuireadh béim leis an imeacht ní hamháin ar an tarraingt aeistéitiúil a bhaineann leis an bhfaisean inbhuanaithe, ach ar a ról maidir le stíl mhaireachtála a réitíonn go maith lenár gcomhshaol a chur chun cinn freisin.

An comhshaol agus an dúlra

Deimhnítear in athbhreithniú meántéarma ar an Ochtú Clár Gníomhaíochta Comhshaoil - oscail i dtáb nua., rud a bheidh ina threoir do bheartas comhshaoil an Aontais go 2030, gur féidir cuspóirí an Aontais faoin gComhaontú Glas don Eoraip a bhaint amach má chuirtear na bearta uile atá beartaithe i bhfeidhm ina n-iomláine. Cuireann sí i dtreis freisin an tionchar dearfach eacnamaíoch sóisialta a bhaineann le cuspóirí aeráide agus comhshaoil a bhaint amach, ó thaobh folláine, sláinte, athléimneachta, iomaíochais agus slándáil soláthair na n-ábhar uile a chinntiú ina measc sin.

Tháinig Dlí um Athbhunú Dúlra - oscail i dtáb nua., dlí ceannródaíoch de chuid an Aontais, i bhfeidhm i mí Lúnasa agus is é is aidhm dó an meath tromchúiseach ar an mbithéagsúlacht a aisiompú agus cur leis an gcomhrac i gcoinne an athraithe aeráide. Cuireann sé le straitéis bhithéagsúlachta an Aontais - oscail i dtáb nua. agus leagann sé síos spriocanna chun éiceachórais dhíghrádaithe a athbhunú, go háirithe na héiceachórais sin is mó atá in ann carbón a ghabháil agus a stóráil agus tionchar tubaistí nádúrtha a chosc agus a laghdú. Leis an dlí nua, cuirtear bearta i bhfeidhm chun 20 % ar a laghad de limistéir talún agus mhara an Aontais a athchóiriú faoi 2030. Faoi 2050, ba cheart bearta a bheith i bhfeidhm le haghaidh na n-éiceachóras ar fad a bhfuil athbhunú ag teastáil ina leith. Táthar ag súil go gcuirfidh na Ballstáit pleananna náisiúnta um athchóiriú isteach faoi lár 2026, ina léireoidh siad an dóigh a mbainfidh siad na spriocanna amach. Leis an Dlí um Athbhunú Dúlra, an chéad dlí dá leithéid ar domhan, cuideofar leis an Aontas agus lena Bhallstáit a ngealltanais idirnáisiúnta bhithéagsúlachta faoi Chreat Domhanda Bithéagsúlachta Kunming-Montreal - oscail i dtáb nua. a chomhlíonadh.

Tionscadal - oscail i dtáb nua. chun an abhainn Isar sa Ghearmáin agus na tuilemhánna a athchóiriú, trí chomhoibriú ar leith idir údaráis na Baváire um an uisce agus um an dúlra, bhuaigh sé Gradam LIFE 2024 don Dúlra. Beagnach deich mbliana tar éis an tionscadal a thosú, tá an abhainn ag sreabhadh gan bhac arís, agus tá speicis atá i mbaol tar éis filleadh.

Le tionscadal atá á mhaoiniú ag an Aontas Eorpach - oscail i dtáb nua., táthar ag cabhrú leis an Danmhairg, leis an nGearmáin agus leis an Ísiltír monatóireacht a dhéanamh ar éin uisce imirceacha ar fud Bhealach Eitilte an Atlantaigh Thoir agus iad a chosaint.

FÍSEÁN: Monatóireacht a dhéanamh ar ghluaiseachtaí éan uisce ar Bhealach Eitilte an Atlantaigh Thoir.

Is é líonra Natura 2000 de limistéir faoi chosaint cnámh droma bheartais caomhnaithe dúlra an Aontais le 30 bliain anuas. In 2024 dhírigh Gradaim Natura 2000 - oscail i dtáb nua. aird ar raon leathan tionscnaimh nua, ó chaomhnú agus bainistiú an stoirc dhuibh sa Pholainn go caomhnú muirí ‘foraoisí gorma’ sa Phortaingéil.

Leanadh in 2024 de thacaíocht a chur ar fáil chun borradh a chur faoi thionscnaimh atá ann cheana féin, mar shampla trí threoir nua - oscail i dtáb nua. a fhoilsiú maidir le beartais úsáide talún níos fearr a cheapadh. Ba cheart go gcabhródh sé sin leis na páirtithe leasmhara ábhartha uile eolas níos fearr a chur ar reachtaíocht maidir le húsáid talún, athrú ar úsáid talún agus foraoiseacht, agus ar dhea⁠-⁠chleachtas. Tá an earnáil ríthábhachtach chun an dúlra a chaomhnú agus chun dul i ngleic leis an athrú aeráide trí charbón a bhaint ar mhórscála. Roimh Lá Idirnáisiúnta na bhForaoisí i mí an Mhárta, d’óstáil an Coimisiún comhdháil - oscail i dtáb nua. chun borradh a chur faoi iarrachtaí 3 bhilliún crann - oscail i dtáb nua. a phlandú faoi 2030 le haghaidh níos mó athléimneachta in aghaidh bagairtí aeráide agus comhshaoil.

Ábhar imní méadaitheach atá sa choireacht chomhshaoil, rud a dhéanann díobháil shuntasach don chomhshaol, do shláinte na saoránach agus don gheilleagar laistigh agus lasmuigh den Aontas araon. Tabharfaidh reachtaíocht athbhreithnithe - oscail i dtáb nua., rud a tháinig i bhfeidhm i mí na Bealtaine, aghaidh ar na sáruithe is tromchúisí ar oibleagáidí comhshaoil an Aontais. Tugadh isteach roinnt catagóirí nua ciona, amhail athchúrsáil neamhdhleathach long agus astarraingt uisce. Leis na rialacha nua, neartófar an slabhra forfheidhmiúcháin agus tacófar le cosantóirí agus cleachtóirí comhshaoil agus iad ag dul i ngleic leis an gcoireacht chomhshaoil. Tá dhá bhliain ag na Ballstáit chun a gcuid reachtaíochta náisiúnta a oiriúnú.

An choireacht chomhshaoil:

• is í  an ceathrú gníomhaíocht coireachta eagraithe is mó ar domhan í
• tá sí ag fás ag ráta 5-7 % in aghaidh na bliana
• tá caillteanas domhanda bliantúil €80-230 billiún ag baint léi

Foinse: Clár Comhshaoil na Náisiún Aontaithe, The Rise of Environmental Crime – A growing threat to natural resources, peace, development and security - oscail i dtáb nua. [Méadú na Coireachta Comhshaoil – Bagairt mhéadaitheach ar acmhainní nádúrtha, ar an tsíocháin, ar an bhforbairt agus ar an tslándáil], 2016.

Tacaíocht a thabhairt d’fheirmeoirí na hEorpa

Le roinnt blianta anuas, tá feirmeoirí na hEorpa ag tabhairt aghaidh ar réimse dúshlán agus éiginnteachtaí as cuimse – ó phaindéim agus méadú géar ar phraghsanna fuinnimh a chuaigh in olcas mar gheall ar chogadh foghach na Rúise gan údar i gcoinne na hÚcráine go teagmhais adhaimsire atá ag éirí níos minice. In 2024, lean an tAontas de ghníomhaíocht a dhéanamh chun tacú leo agus chun cuidiú leo dul i ngleic leis na dúshláin a tháinig chun cinn ó rinneadh an t-athchóiriú ar an gComhbheartas Talmhaíochta - oscail i dtáb nua..

I mí an Mhárta mhol an Coimisiún athruithe a dhéanamh ar fhorálacha áirithe den Chomhbheartas Talmhaíochta, agus ag an am céanna a ról a choinneáil maidir le tacú le haistriú thalmhaíocht na hEorpa chuig an bhfeirmeoireacht inbhuanaithe. Bhí bearta breise ag gabháil leis sin chun an t-ualach riaracháin ar fheirmeoirí a laghdú mar chuid de bheartas níos leithne chun oibleagáidí tuairiscithe a chuíchóiriú, rud a seoladh in 2023. Lorgaíodh tuairimí fheirmeoirí an Aontais maidir le hualaí riaracháin a bhaineann leis an gComhbheartas Talmhaíochta, oibleagáidí tuairiscithe ina measc, i gcomhairliúchán ar líne a fuair 27,000 freagra.

Le linn 2024 deonaíodh tacaíocht dar luach €233 mhilliún d’fheirmeoirí dá ndearna tubaistí nádúrtha agus teagmhais adhaimsire difear sa Bhulgáir, sa tSeicia, sa Ghearmáin, san Eastóin, sa Ghréig, san Iodáil, san Ostair, sa Pholainn, sa Rómáin agus sa tSlóivéin. Tugadh isteach bearta tacaíochta freisin chun aghaidh a thabhairt ar shuaitheadh an mhargaidh in earnáil an fhíona sa Phortaingéil, mar aon leis an tionchar diúltach ar mhargaí na héanlaithe agus na n-uibheacha arb é fliú na n-éan san Iodáil is cúis leo.

Seoladh an tIdirphlé Straitéiseach faoi Thodhchaí na Talmhaíochta an Aontais - oscail i dtáb nua. i mí Eanáir, inar tugadh le chéile 29 bpríomhpháirtí leasmhara agraibhia chun fís chomhroinnte a fhorbairt maidir le todhchaí chóras feirmeoireachta agus bia an Aontais.

I mí Mheán Fómhair, cuireadh i láthair an tuarascáil deiridh maidir leis an idirphlé. A shared prospect for farming and food in Europe - oscail i dtáb nua. [‘Dearcadh comhroinnte le haghaidh na feirmeoireachta agus an bhia san Eoraip’] is teideal don tuarascáil, ina gcuirtear i láthair measúnú ar na dúshláin agus ar na deiseanna, agus 14 mholadh ag gabháil leis. Treoróidh na moltaí sin obair an Choimisiúin agus an Fhís don Talmhaíocht agus don Bhia á múnlú aige, fís atá le cur ar fáil sna chéad 100 lá den sainordú polaitíochta nua.

Tháinig an Rialachán nua maidir le tásca geografacha le haghaidh fíona, deochanna biotáilleacha agus táirgí talmhaíochta - oscail i dtáb nua. i bhfeidhm i mí na Bealtaine. Cruthaítear leis sraith aonair rialacha agus nósanna imeachta cosanta do gach tásc geografach talmhaíochta. Neartaíonn sé a gcosaint freisin, go háirithe ar líne agus in ainmneacha fearainn idirlín.

In 2024 rinne an tAontas caibidlíocht chun deireadh a chur le bacainní trádála ar easpórtálacha mairteola na hÉireann agus na Fraince chuig an gCóiré Theas, rud a thug rochtain do tháirgeoirí ó na Ballstáit sin ar cheann de na margaí iompórtála mairteola is mó ar domhan.

Iascaigh agus dobharshaothrú inbhuanaithe

Cuireann an t-athrú aeráide, cailleadh na bithéagsúlachta agus truailliú na n⁠-⁠aigéan agus fionnuisce inbhuanaitheacht na n⁠-⁠acmhainní iascaigh agus dobharshaothraithe i mbaol. Le pacáiste iascaigh agus aigéan - oscail i dtáb nua. 2023, chuir an Coimisiún sraith beart chun cinn chun dul i ngleic leis na dúshláin sin tríd an gComhbheartas Iascaigh - oscail i dtáb nua. a chur chun feidhme. Seoladh comhairliúchán - oscail i dtáb nua. chun meastóireacht a dhéanamh ar an Rialachán maidir leis an gComhbheartas Iascaigh, agus táthar ag súil le tuarascáil faoi dheireadh 2025.

Tá ríthábhacht le rialacha rialaithe chun an Comhbheartas Iascaigh a chur i bhfeidhm, go háirithe chun monatóireacht a dhéanamh ar úsáid cuótaí iascaireachta agus chun a chinntiú nach gcaitear gabhálacha de thaisme ar ais go neamhdhleathach. Tháinig rialacha nua - oscail i dtáb nua. i bhfeidhm i mí Eanáir chun nuachóiriú a dhéanamh ar an dóigh a rialaítear gníomhaíochtaí iascaireachta, i gcás soithí den Aontas agus soithí nach den Aontas iad a bhíonn ag iascaireacht in uiscí an Aontais. Cuideoidh siad chun an ró-iascaireacht a chosc, córas rialaithe iascaigh níos éifeachtaí agus níos comhchuibhithe a chruthú, agus cothroime iomaíochta a chinntiú idir imchuacha farraige agus cabhlaigh éagsúla. Leis na rialacha nua, laghdófar an t-ualach riaracháin freisin tríd an digitiú, agus cuirfear úsáid teicneolaíochtaí chun cinn.

I mí na Nollag, tháinig airí iascaigh an Aontais ar chomhaontú - oscail i dtáb nua. maidir le deiseanna iascaireachta do 2025. Tá 12 bheart inbhuanaitheachta - oscail i dtáb nua. sa chomhaontú a chuirfidh go leor laethanta breise iascaireachta ar fáil, má chuirtear na bearta i bhfeidhm.

Thug an Coimisiún freagra freisin ar ghlaonna chun laghdú a dhéanamh ar an ualach riaracháin a bhaineann le láithreáin dobharshaothraithe a bhunú agus a oibriú san Aontas. Rinne sé amhlaidh trí thacaíocht a thabhairt do na Ballstáit na treoirlínte straitéiseacha a chur i bhfeidhm chun an dobharshaothrú a dhéanamh níos inbhuanaithe agus níos iomaíche.

I dtreo aigéan inbhuanaithe

D’athdhearbhaigh an tAontas a thiomantas do rialachas idirnáisiúnta na n-aigéan trí 40 gealltanas gníomhaíochta a fhógairt le haghaidh 2024 - oscail i dtáb nua. ag an gcomhdháil ‘Our Ocean’ - oscail i dtáb nua. sa Ghréig, agus tacaíocht €3.5 billiún lena n-aghaidh ó chistí an Aontais. Dírítear sna gealltanais ar réimsí amhail an t-iascach inbhuanaithe, limistéir mhuirí faoi chosaint, an t-athrú aeráide agus aigéin, geilleagair ghorma inbhuanaithe agus truailliú muirí.

Tá an iascaireacht neamhdhleathach neamhthuairiscithe neamhrialáilte ar cheann de na bagairtí is tromchúisí ar shaothrú inbhuanaithe acmhainní bitheolaíocha na mara, rud a chuireann na hiarrachtaí domhanda chun rialachas aigéan níos fearr agus Comhbheartas Iascaigh an Aontais araon a chur chun cinn i mbaol. I mí na Bealtaine d’eisigh an tAontas ‘cárta buí - oscail i dtáb nua.’ don tSeineagáil – fógra maidir leis an ngá atá le dlús a chur le gníomhaíocht sa chomhrac i gcoinne an chineáil sin iascaireachta. Meastar gurb é €10-20 billiún in aghaidh na bliana luach domhanda na hiascaireachta neamhdhleathaí neamhthuairiscithe neamhrialáilte. Déantar idir 11 mhilliún agus 26 mhilliún tona éisc a ghabháil go neamhdhleathach gach bliain, sin é 15 % ar a laghad de ghabhálacha an domhain.

Cuideoidh cinntí tábhachtacha - oscail i dtáb nua., ina measc sin cinntí maidir le bainistiú gléasanna ar snámh a úsáidtear chun tuinníní agus éisc eile a ghabháil, chun iascaigh san Aigéan Indiach a dhéanamh níos inbhuanaithe. Bunaithe ar thogra ón Aontas, glacadh rún le linn an 28ú cruinniú bliantúil den Choimisiún um Thuinníní an Aigéin Indiaigh i mí na Bealtaine lena gcuirtear i bhfeidhm de réir a chéile in-bhithdhíghrádaitheacht iomlán sruthfheiste comhthiomsaithe éisc faoi 2030. Cuireadh feabhas freisin ar an gcreat rialála le haghaidh feistí den sórt sin chun inrianaitheacht agus comhlíonadh a mhéadú.

Tá an tAontas réidh chun an Conradh maidir leis an Mórmhuir - oscail i dtáb nua. a dhaingniú, ar a dtugtar an Comhaontú maidir leis an mBithéagsúlacht i Limistéir Lasmuigh den Dlínse Náisiúnta chomh maith. Déanfaidh sé amhlaidh i gcomhpháirt le roinnt Ballstát roimh an tríú ceann de Chomhdháil na Náisiún Aontaithe maidir leis na hAigéin i mí an Mheithimh 2025. Is é is aidhm don chonradh an t-aigéan a chosaint, cothromas agus cothroime a chur chun cinn, dul i ngleic le díghrádú an chomhshaoil, an t⁠-⁠athrú aeráide a chomhrac agus cailleadh na bithéagsúlachta ar an mórmhuir a chosc. Tiocfaidh sé i bhfeidhm nuair a bheidh sé daingnithe ag 60 páirtí. Tá an tAontas ag ullmhú go gníomhach dá chur chun feidhme agus tá sé ag tacú le tíortha eile ina n⁠-⁠iarrachtaí an conradh a dhaingniú agus a chur i bhfeidhm.

Is é an t-iompar is cúis le beagnach an ceathrú cuid d’astaíochtaí gás ceaptha teasa an Aontais. Faoin gComhaontú Glas don Eoraip, tá sé d’aidhm ag an Aontas astaíochtaí a bhaineann le hiompar a laghdú 90 % faoi 2050. Leis an Straitéis um an tSoghluaisteacht Inbhuanaithe agus Chliste - oscail i dtáb nua., cuirtear treochlár ar fáil chun na laghduithe uaillmhianacha sin ar astaíochtaí a bhaint amach. Le cúig bliana anuas, tá dul chun cinn suntasach déanta chun earnáil iompair an Aontais a dhéanamh níos inbhuanaithe.

Leis an Rialachán ‘ReFuelEU Aviation’ - oscail i dtáb nua., cuirtear úsáid breoslaí eitlíochta inbhuanaithe chun cinn agus tiocfaidh laghdú suntasach os cionn 60 % dá bharr ar astaíochtaí dé-ocsaíde carbóin faoi 2050, i gcomparáid le leibhéil 1990. Tháinig sé i bhfeidhm i mí Eanáir 2024.

Le scéim dheonach lipéadaithe - oscail i dtáb nua. chun astaíochtaí eitilte a ríomh, rud a cruthaíodh faoin rialachán, beidh paisinéirí in ann roghanna eolasacha a dhéanamh agus iad ag déanamh comparáide idir roghanna éagsúla eitilte.

Cuideoidh an Rialachán ‘FuelEU Maritime’ - oscail i dtáb nua. le hastaíochtaí ón loingseoireacht a laghdú trí úsáid breoslaí in-athnuaite ísealcharbóin agus teicneolaíochtaí fuinnimh ghlain do longa a chur chun cinn. Beidh feidhm aige amhail ó mhí Eanáir 2025.

Leis an Rialachán maidir le Bonneagar Breoslaí Malartacha - oscail i dtáb nua., cuirfear borradh faoi líon na stáisiún athluchtaithe leictrigh agus líon na stáisiún athbhreoslaithe hidrigine. Tá feidhm aige ó bhí mí Aibreáin ann.

Roghnaíodh 42 thionscadal nua le linn na bliana chun breis agus €424 mhilliún de chistiú ón Aontas - oscail i dtáb nua. a fháil chun bonneagar breoslaí malartacha a chur in úsáid (pointí athluchtaithe leictrigh agus stáisiúin athbhreoslaithe hidrigine a shuiteáil; oibríochtaí talún in aerfoirt a leictriú).

Tháinig spriocanna athbhreithnithe laghdaithe astaíochtaí dé-ocsaíde carbóin d’fheithiclí tromshaothair (leoraithe, busanna agus cóistí) i bhfeidhm i mí Iúil, agus laghdóidh siad astaíochtaí 45 % faoi 2030, 65 % faoi 2035 agus 90 % faoi 2040.

Le rialacha nua - oscail i dtáb nua. a leagann síos teorainneacha astaíochtaí le haghaidh feithiclí bóthair agus ceanglais le haghaidh marthanacht ceallraí, déanfar rialú ar cháithníní ó choscáin agus boinn le haghaidh gach feithicle, rud a laghdóidh astaíochtaí agus micreaphlaistigh.

Tá an t-iompar ar uiscebhealaí intíre fuinneamhéifeachtúil agus nach mór saor ó phlódú. Le togra nua - oscail i dtáb nua. chun feabhas a chur ar bhainistiú tráchta ar aibhneacha agus ar chanálacha an Aontais, cuirfear borradh faoi éifeachtúlacht agus iontaofacht na loingseoireachta intíre agus cuirfear le haidhm an Aontais níos mó lasta a aistriú chuig aibhneacha agus canálacha na hEorpa.

Tá dul chun cinn suntasach déanta ag an Aontas maidir le hastaíochtaí iompair a laghdú chomh maith tríd an Dearbhú Eorpach maidir leis an rothaíocht - oscail i dtáb nua. a ghlacadh, rud a aithníonn gur modh iompair inbhuanaithe inrochtana inacmhainne í an rothaíocht.

Chuir comhaltaí na Comhghuaillíochta um Eitlíocht Astaíochtaí Nialasacha - oscail i dtáb nua. cuspóir uaillmhianach i láthair chun idir 36 % agus 68 % d’eitiltí a oibriú laistigh den Aontas ina n-úsáidtear aerárthaí faoi thiomáint hidrigine agus leictreachais faoi 2050. D’fhéadfadh sé sin astaíochtaí dé-ocsaíde carbóin ar na bealaí sin a laghdú idir 12 % agus 31 %. Sheol an tAontas an chomhghuaillíocht mar thionscnamh deonach chun cur ar a gcumas do chomhpháirtithe príobháideacha agus poiblí oibriú le chéile chun cineálacha nua iompair inbhuanaithe a chur i gcrích do thaistealaithe san Eoraip.

Gréasán iompair inbhuanaithe athléimneach

Chun feabhas a chur ar naisc iompair ar fud na hEorpa, tá an tAontas ag infheistiú €7 mbilliún - oscail i dtáb nua., an méid is mó riamh, i mbonneagar iompair inbhuanaithe sábháilte cliste. Úsáidfear níos mó ná 80 % den mhaoiniú chun tacú le tionscadail a chomhlíonann cuspóirí aeráide an Aontais, rud a fheabhsóidh agus a nuachóireoidh gréasán iarnróid, uiscebhealaí intíre agus bealaí muirí an Aontais. Tabharfar maoiniú do mhórthionscadail chun naisc iarnróid trasteorann a fheabhsú. Ina measc sin tá an tionscadal ‘Rail Baltica’, lena nascfar stáit Bhaltacha na hEastóine, na Laitvia agus na Liotuáine - oscail i dtáb nua., agus tionscadal thollán Fehmarnbelt - oscail i dtáb nua., lena nascfar an Ghearmáin leis an Danmhairg.

Tá luasanna iarnróid níos tapúla ar an mbealach, a bhuí le rialacha nua - oscail i dtáb nua. lena leagtar síos spriocanna uaillmhianacha do bhonneagar iompair na hEorpa. Faoi 2040, ní mór do línte iarnróid paisinéirí ar phríomhnaisc iarnróid paisinéirí an Aontais tacú le traenacha a bhíonn ag taisteal ar luasanna 160 ciliméadar in aghaidh na huaire nó níos tapúla.

Ár mbóithre a dhéanamh níos sábháilte

Tá feabhas suntasach tagtha ar an tsábháilteacht ar bhóithre san Aontas le blianta beaga anuas, agus tá laghdú tagtha ar líon na mbásanna ar bhóithre an Aontais ó thart ar 50,000 fiche bliain ó shin go dtí thart ar 20,400 sa lá atá inniu ann. Mar sin féin, tá gá le tuilleadh gníomhaíochta - oscail i dtáb nua. ar leibhéal an Aontais, ar an leibhéal náisiúnta agus ar an leibhéal áitiúil chun aidhm an Aontais a bhaint amach nach mbeidh bás ar bith ann faoi 2050.

Tháinig rialacha nua - oscail i dtáb nua. i bhfeidhm chun feabhas a chur ar shábháilteacht ghinearálta feithiclí i gcás gach mótarfheithicle a dhíoltar san Aontas. Sainordaítear leis na rialacha raon teicneolaíochtaí nua agus ardchórais cúnaimh tiománaí i ngach feithicil nua. Ó thosaigh feidhm a bheith acu den chéad uair maidir le samhlacha nua feithiclí in 2022, bhí ról lárnach ag na bearta maidir le feabhas a chur ar chosaint do phaisinéirí, do choisithe agus do rothaithe ar fud an Aontais. Faoi 2038, meastar gur breis agus 25,000 beatha duine a bheidh sábháilte i ngeall ar na rialacha, agus gur ar a laghad 140,000 gortú tromchúiseach a bheidh coiscthe.

Tá an tsoghluaisteacht chomhoibríoch, nasctha agus uathoibrithe - oscail i dtáb nua. riachtanach chun gur glaise, gur sábháilte agus gur iomaíche a bheidh iompar na hEorpa. Tá an tAontas, i gcomhar le páirtithe príobháideacha, ag infheistiú €500 milliún tríd an gclár Fís Eorpach chun an taighde a chur chun cinn i leith na teicneolaíochta sin.

Leanadh in 2024 d’obair an Aontais le príomh-chomhpháirtithe idirnáisiúnta chun aghaidh a thabhairt ar ghéarchéim thriarach an athraithe aeráide, chailleadh na bithéagsúlachta agus an truaillithe. Rinneadh trí mhórchaibidlíocht iltaobhacha – Comhdháil na Náisiún Aontaithe maidir leis an Athrú Aeráide san Asarbaiseáin, Comhdháil na Náisiún Aontaithe maidir leis an mBithéagsúlacht sa Cholóim, agus Comhdháil na Náisiún Aontaithe maidir leis an nGaineamhlú san Araib Shádach.

Comhdháil na Náisiún Aontaithe maidir leis an Athrú Aeráide

Bhí an 29ú ceann de Chomhdháil na Náisiún Aontaithe maidir leis an Athrú Aeráide (COP29) ar siúl in Baki na hAsarbaiseáine ón 11 go dtí an 24 Samhain. Thug an cruinniú mullaigh páirtithe le chéile chun dlús a chur leis an ngníomhaíocht chun sprioc Chomhaontú Pháras a bhaint amach, is é sin an méadú ar an meánteocht dhomhanda a theorannú go 1.5°C os cionn na leibhéal réamhthionsclaíoch.

Dhírigh an chomhdháil ar na hinfheistíochtaí suntasacha airgeadais is gá a chinntiú chun astaíochtaí a laghdú agus chun pobail leochaileacha a chosaint. Bhí ról ríthábhachtach ag an Aontas - oscail i dtáb nua. chun teacht ar chomhaontú i ndáil le sprioc nua maidir le maoiniú don troid i gcoinne an athraithe aeráide chun tacú le gníomhaíocht tíortha i mbéal forbartha ar son na haeráide.

Leag na páirtithe síos sprioc nua chainníochtaithe chomhchoiteann uaillmhianach maidir le foinsí uile an mhaoinithe don troid i gcoinne an athraithe aeráide a mhéadú go $1.3 trilliún in aghaidh na bliana faoi 2035. Laistigh den sprioc níos leithne sin, gheall na tíortha forbartha a bheith ina gceannródaí maidir le $300 billiún ar a laghad a shlógadh in aghaidh na bliana faoi 2035. D’éirigh leis an sprioc bonn rannchuiditheoirí domhanda a leathnú freisin, agus spreagadh níos mó tíortha chun rannchuidiú, rud a léiríonn a n-astaíochtaí agus a meáchan eacnamaíoch atá ag dul i méid. Leag an méid sin béim freisin ar an ról claochlaitheach atá ag bainc iltaobhacha maidir leis an ngníomhú ar son na haeráide a mhéadú.

Ina theannta sin, bhí ról tábhachtach ag an Aontas maidir le leabhar rialacha Chomhaontú Pháras do mhargaí carbóin a thabhairt chun críche. Bhí an comhaontú á chur faoi chaibidil ar feadh naoi mbliana, agus déanfaidh sé margaí carbóin idirnáisiúnta - oscail i dtáb nua. a oibríochtú agus cinnteoidh sé creat láidir le haghaidh trédhearcachta, cuntasachta agus sláine comhshaoil níos fearr. Éacht tábhachtach eile ab ea síneadh a chur le Clár Oibre feabhsaithe Líoma maidir le hInscne, ina leagtar béim ar a thábhachtaí atá gníomhaíocht aeráide atá freagrúil ó thaobh inscne de i measc na bpáirtithe.

Le linn COP29, d’fhoilsigh an tAontas a chéad tuarascáil dhébhliantúil trédhearcachta riamh, roimh an spriocdháta deireadh bliana. Is cloch mhíle shuntasach é sin i gcur chun feidhme Chomhaontú Pháras, rud a chuireann tús le ré nua cuntasachta agus comhair sa chomhrac domhanda in aghaidh an athraithe aeráide.

Comhdháil na Náisiún Aontaithe maidir leis an mBithéagsúlacht

Ag an 16ú ceann de Chomhdháil na bPáirtithe sa Choinbhinsiún maidir leis an mBithéagsúlacht in Cali na Colóime i mí Dheireadh Fómhair, údar mór misnigh a bhí ann go bhfuil ag éirí le cur chun feidhme an Chreata Domhanda Bithéagsúlachta - oscail i dtáb nua. chun cailleadh na bithéagsúlachta a stopadh agus a aisiompú faoi 2030. Tugadh ‘COP na ndaoine’ air agus rinneadh roinnt cinntí tábhachtacha - oscail i dtáb nua., ina measc sin comhaontú chun ról na bpobal dúchasach agus na bpobal áitiúil a leathnú maidir leis an mbithéagsúlacht a shábháil agus comhaontú ceannródaíoch maidir le conas buntáistí na faisnéise géinití digití a chomhroinnt. Chuir an tAontas pacáiste tionscnamh nua i láthair dar luach beagnach €160 milliún chun tacú le tíortha comhpháirtíochta agus chun an bhithéagsúlacht a chosaint ar fud an domhain, rud a léiríonn tiomantas soiléir spriocanna maoiniúcháin domhanda a bhaint amach chun an dúlra a chosaint.

Comhdháil na Náisiún Aontaithe maidir leis an nGaineamhlú

Ag an 16ú ceann de Chomhdháil na Páirtithe i gCoinbhinsiún na Náisiún Aontaithe chun an gaineamhlú a chomhrac, d’oibrigh an tAontas i ndlúthchomhar le comhpháirtithe idirnáisiúnta chun gealltanais dhomhanda a chomhlíonadh chun dul i ngleic leis an ngaineamhlú, leis an díghrádú talún agus leis an triomach. Cuireadh an chéad Atlas Domhanda um Thriomach - oscail i dtáb nua., rud a d’fhorbair Airmheán Comhpháirteach Taighde an Choimisiúin agus an coinbhinsiún, i láthair ag an gcomhdháil. Is é is aidhm don atlas gach gné den triomach agus na rioscaí domhanda méadaithe a bhaineann leis a léiriú. Chomh maith leis na dúshláin a leagan amach, cuireann sé freagraí ar fáil freisin chun cur ar chumas lucht ceaptha beartas gníomhú chun neartú a dhéanamh ar an athléimneacht in aghaidh triomach.

Mórtheagmhais triomaigh ina bhfuil samplaí de chórais ar cuireadh isteach orthu (2022–2024)

In 2022, cuireadh isteach ar éiceachórais, talmhaíocht, hidreachumhacht agus soláthar uisce in iarthar na Stát Aontaithe. San Áis láir, cuireadh isteach ar thalmhaíocht agus soláthar uisce, agus san Áis Thoir cuireadh isteach ar thalmhaíocht, loingseoireacht intíre, tionscal agus monaraíocht. Sa bhliain chéanna, cuireadh isteach ar thalmhaíocht freisin san Áise Thoir Theas. Idir 2022 agus 2023, cuireadh isteach ar loingseoireacht intíre, hidreachumhacht, talmhaíocht, soláthar uisce, éiceachórais agus sláinte san Eoraip. San Afraic Thiar, bhí fadhbanna le talmhaíocht agus slándáil bia, agus san Afraic Thoir, bhí fadhbanna móra le talmhaíocht, slándáil bia agus easáitiú daoine. Sna hAindéis lasmuigh den teochrios agus in abhantrach La Plata, bhí ganntanas uisce, cur isteach ar loingseoireacht intíre agus tionchair ar thalmhaíocht. Idir 2023 agus 2024, cuireadh isteach ar thalmhaíocht agus soláthar uisce i Meiriceá Láir agus i dtuaisceart Mheiriceá Theas. Imríodh tionchair ar abhantrach Amasóin na Brasaíle ar éiceachórais, loingseoireacht intíre agus hidreachumhacht. Faoi 2024, bhí réigiún na Meánmhara i ngleic le ganntanas uisce agus dúshláin talmhaíochta, cuireadh isteach ar thalmhaíocht, slándáil bia, hidreachumhacht agus éiceachórais i ndeisceart na hAfraice agus in abhantrach an Zambezi. San Afganastáin, cuireadh isteach ar thalmhaíocht agus soláthar uisce