Fl-2024 intemm perjodu istituzzjonali ta’ 5 snin u beda ieħor. Wara l-elezzjonijiet Ewropej f’Ġunju, l-istituzzjonijiet tal-Unjoni Ewropea nedew iċ-ċiklu politiku 2024–2029 b’impenn li jaħdmu flimkien għal UE sikura, kompetittiva u prospera li tirrappreżenta d-drittijiet tal-bniedem, id-demokrazija u l-istat tad-dritt. Dan il-kapitlu jħares lejn it-tranżizzjoni minn perjodu għall-ieħor u jiddeskrivi l-prijoritajiet ewlenin għaċ-ċiklu l-ġdid. Il-bqija tal-pubblikazzjoni (il-Kapitli 1–9) turi kif l-UE wettqet il-prijoritajiet tagħha fl-aħħar sena tal-mandat 2019–2024.

Fl-2024 intemm iċ-ċiklu politiku preċedenti ta’ 5 snin, u minkejja l-pressjonijiet ta’ diversi kriżijiet, l-UE laħqet l-objettivi ambizzjużi tagħha fl-oqsma ta’ politika kollha (ara l-Kapitli 1–9). Matul il-mandat, sar progress lejn mudell ġdid ta’ tkabbir li jipproteġi lin-nies u lill-pjaneta; mudell ekonomikament b’saħħtu u soċjalment ġust li jiżgura li t-teknoloġija tkompli ġġib il-benefiċċji għaċ-ċittadini mingħajr ma tpoġġihom fir-riskju. L-istituzzjonijiet tal-UE ħejjew ukoll it-triq għall-bidu taċ-ċiklu li jmiss permezz tad-definizzjoni tal-prijoritajiet politiċi l-ġodda għall-2024–2029 skont it-tħassib ewlieni taċ-ċittadini msejsin fuq dak li jħasseb liċ-ċittadini.

L-elezzjonijiet Ewropej, li jsiru kull 5 snin, huma l-ikbar eżerċizzju demokratiku transnazzjonali fid-dinja. Fl-elezzjonijiet ta’ Ġunju kien hemm l-akbar rata ta’ parteċipazzjoni elettorali fl-aħħar 30 sena (50.74 %). Il-votazzjoni fl-elezzjonijiet Ewropej saret att demokratiku importanti għal ħafna ċittadini: 46 % ta’ dawk mistħarrġa semmew li dejjem jivvutaw u 42 % qalu li jqisu li l-votazzjoni hija dmir ċiviku.

Iċ-ċittadini għadhom ottimisti dwar il-futur tal-UE u għad għandhom impressjoni pożittiva tal-UE u tal-istituzzjonijiet tagħha. Il-fiduċja fl-UE laħqet l-ogħla livell mill-2007 - iftaħ tab ġdida. (ara l-Kapitlu 9). L-istħarriġ postelettorali - iftaħ tab ġdida. tal-UE juri li 7 minn kull 10 Ewropej jidhirilhom li pajjiżhom ibbenefika mis-sħubija fl-UE, rata li baqgħet stabbli fl-aħħar snin. Fost l-iktar raġunijiet imsemmija għaliex is-sħubija fl-UE titqies ta’ benefiċċju hemm iż-żieda fil-kooperazzjoni bejn l-Istati Membri, il-protezzjoni tal-paċi u t-tisħiħ tas-sigurtà, il-kontribut tal-UE għat-tkabbir ekonomiku u l-ħolqien tal-opportunitajiet ġodda tax-xogħol.

It-tmexxija tal-UE fl-2024–2029

F’Lulju, il-Parlament li kien għadu kif ġie kkostitwit - iftaħ tab ġdida. reġa’ vvota u għażel lil Roberta Metsola - iftaħ tab ġdida. bħala l-President tiegħu. Wara l-proposta tal-Kunsill Ewropew, il-Parlament reġa’ għażel ukoll lil Ursula von der Leyen - iftaħ tab ġdida. bħala l-President tal-Kummissjoni Ewropea għat-tieni mandat. Wara s-suċċess tas-seduti tas-smigħ ta’ konferma quddiem il-kumitati kkonċernati tal-Parlament, fl-aħħar ta’ Novembru l-Parlament approva l-kompożizzjoni l-ġdida tal-Kummissjoni Ewropea - iftaħ tab ġdida., inkluż ir-Rappreżentant Għoli l-ġdid għall-Affarijiet Barranin u l-Politika tas-Sigurtà, Kaja Kallas. Il-Kulleġġ il-ġdid tal-Kummissarji ħa l-kariga fl-1 ta’ Diċembru, kif inħatar mill-Kunsill Ewropew. Fl-istess żmien, António Costa - iftaħ tab ġdida. ħa post Charles Michel bħala l-President tal-Kunsill Ewropew.

FILMAT: Il-Parlament japprova l-Kummissjoni l-ġdida, Strasburgu, Franza, id-29 ta’ Novembru 2024.
Immaġni wieqfa: Ursula von der Leyen, il-President tal-Kummissjoni Ewropea (xellug), u Roberta Metsola, il-President tal-Parlament Ewropew (lemin), jilqgħu d-deċiżjoni tal-Parlament li japprova l-Kummissjoni Ewropea 2024–2029.