L-istampatur tagħna għarrafna li fil-fuljetti tagħna L-Ewropa + flimkien! sar xi taħżiż. Fil-fatt, jidher li tifel bl-isem ta’ Gordon daħal inkiss inkiss fl-istamperija u ħażżeż fuq xi paġni.
Nisperaw li dan ma jfixkilx b’xi mod il-qari tagħkom.
Ħudu gost!
It-tim tal-Unità Servizz Editorjali u Komunikazzjoni Mmirata, il-Kummissjoni Ewropea
L-EWROPA + flimkien! tippermettilek titkellem dwar l-Ewropa fil-klassi. Il-kit tat-tagħlim jinkludi tliet fuljetti u mappa tal-Unjoni Ewropea.
Kif tuża l-Kit tat-Tagħlim L-EWROPA + flimkien! fil-klassi
Skont l-interessi tiegħek u l-mistoqsijiet tal-istudenti tiegħek, tista’ tagħżel li tħares lejn l-Unjoni Ewropea bi tliet modi differenti. Il-fuljetti mhumiex f’xi ordni partikolari. Huma jikkomplementaw lil xulxin iżda kull wieħed jista’ jintuża bħala riżorsa individwali wkoll.
Ix-xewqa tagħna kienet li noħolqu ambjent ta’ tagħlim b’kontenut għani u mimli gost biex niftħu għajnejn iż-żgħażagħ dwar il-futur Ewropew tagħhom.
L-għan ewlieni huwa li nagħmlu lill-istudenti konxji li huma parti mill-Unjoni Ewropea u li jistgħu jsawru l-Ewropa ta’ għada. Biex nenfasizzaw ir-rwol tagħhom, użajna, għal kull tema, verb ta’ azzjoni (ngħixu, norganizzaw ruħna, niftakru, nipproteġu, eċċ.).
Il-vokabularju, il-logħob u l-għajnuniet għal-logħob jippermettu lill-istudenti jżidu l-għarfien tagħhom huma stess billi jsegwu lil Gordon, il-karattru immaġinarju li ħażżeż fuq il-fuljetti. Il-preżenza ta’ karattru tal-istess età tagħhom tagħmel il-kontenut aktar aċċessibbli. Fil-fuljetti, mistoqsijiet miftuħa jistiednu wkoll lill-istudenti jipparteċipaw b’mod attiv. Ħudu gost!