Rapport Speċjali
Assistenza mill-UE lill-Myanmar/Burma
Dwar ir-rapportAħna eżaminajna l-appoġġ għall-iżvilupp li l-UE tat lill-Myanmar/Burma u kkonkludejna li dan kien parzjalment effettiv. L-UE kellha rwol ewlieni fl-għoti ta’ appoġġ għal prijoritajiet għall-iżvilupp, u allokat finanzjament sinifikanti lill-pajjiż. Madankollu, aħna rrappurtajna xi nuqqasijiet fil-valutazzjoni tal-ħtiġijiet li saret mill-Kummissjoni, u fl-implimentazzjoni tal-assistenza li ngħatat mill-UE.
Fuq il-bażi tal-osservazzjonijiet f’dan ir-rapport, il-Qorti tagħmel għadd ta’ rakkomandazzjonijiet bl-għan li jsir titjib fil-ġestjoni tal-għajnuna għall-iżvilupp.
 |
Sommarju eżekuttiv
IMatul il-perjodu awditjat, il-Myanmar/Burma kien qed jesperjenza tranżizzjoni politika u ekonomika kbira u diffiċli. Fatturi bħal diżastri naturali, kunflitti etniċi u l-kapaċità limitata ta’ atturi u awtoritajiet lokali kienu qed ixekklu l-isforzi għall-iżvilupp.
IIAħna eżaminajna jekk l-appoġġ li l-UE tat lill-Myanmar/Burma kienx effettiv. Għal din il-fini, l-awditu indirizza jekk is-Servizz Ewropew għall-Azzjoni Esterna (SEAE) u l-Kummissjoni appoġġawx prijoritajiet stabbiliti sew fil-qasam tal-iżvilupp. Huwa eżamina wkoll kif il-Kummissjoni kienet immaniġġjat l-għajnuna għall-iżvilupp li ngħatat mill-UE u jekk l-appoġġ tal-UE għall-iżvilupp kienx laħaq l-objettivi tiegħu. L-awditu ffoka fuq l-infiq li kien ġie impenjat mill-2012 sal-2016 taħt l-Istrument tal-Kooperazzjoni għall-Iżvilupp (DCI), b’segwitu għall-istabbiliment ta’ gvern ċivili fl-2011. B’kollox, l-UE allokat kważi EUR 1 biljun għall-perjodu 2012-2020.
IIIAħna kkonkludejna li l-appoġġ għall-iżvilupp li l-UE tat lill-pajjiż kien parzjalment effettiv. L-UE kellha rwol ewlieni importanti fl-għoti ta’ appoġġ għal prijoritajiet għall-iżvilupp, u allokat finanzjament sinifikanti lill-pajjiż. F’kuntest diffiċli, fejn l-istruttura istituzzjonali, il-progress fil-proċess ta’ paċi u l-pass tar-riformi kienu inċerti, l-UE rreaġiet b’mod attiv għall-ħtiġijiet tal-pajjiż. Madankollu, aħna rrappurtajna xi nuqqasijiet fil-valutazzjoni tal-ħtiġijiet li saret mill-Kummissjoni, u fl-implimentazzjoni tal-assistenza li ngħatat mill-UE.
IVId-deċiżjoni tal-Kummissjoni li tiffoka fuq erba’ setturi ma kinitx konformi mal-Aġenda għall-Bidla tal-2011, u l-kapaċità tad-Delegazzjoni tal-UE li tlaħħaq mal-volum kbir ta’ xogħol ma ġietx ivvalutata. Il-Kummissjoni ma vvalutatx biżżejjed il-prijoritajiet ġeografiċi fi ħdan il-pajjiż. Il-mobilizzazzjoni tad-dħul domestiku ma kinitx inkluża fil-kunsiderazzjoni tal-prijoritajiet, minkejja li din hija fattur ewlieni għall-iżvilupp tal-Myanmar. Il-programmazzjoni konġunta tal-UE u l-Istati Membri individwali taħt l-Istrateġija ta’ Programmazzjoni Konġunta 2014-2016 kienet pass pożittiv.
VIl-ġestjoni tal-għajnuna għall-żvilupp li ngħatat mill-UE kienet ġeneralment sodisfaċenti. L-azzjonijiet indirizzaw il-prijoritajiet tal-pajjiż fil-qasam tal-iżvilupp, iżda kien hemm dewmien. L-għażla tal-Kummissjoni rigward il-modalità tal-għajnuna kienet raġonevoli. Madankollu, il-ġustifikazzjoni għall-ammont ta’ finanzjament li ġie allokat għal kull settur u għal kull azzjoni ma ġietx iddokumentata. L-implimentazzjoni ddewmet ukoll minħabba li l-Programm ta' Azzjoni Annwali (PAA) 2016 qatt ma kien ġie adottat.
VIL-implimentazzjoni tal-programmi tal-Fondi Fiduċjarji mmaniġġjati min-Nazzjonijiet Uniti kienet affettwata minn dewmien u minn assorbiment bil-mod tal-baġit għall-attivitajiet tal-programmi. Dawn il-Fondi akkumulaw bilanċi kbar ta’ flus iżda l-Kummissjoni ma żguratx li l-imgħax gwadanjat fuq il-kontribuzzjoni mill-UE jinżamm għall-azzjonijiet li kienu qed jiġu ffinanzjati. Id-dispożizzjonijiet relatati mal-kontroll tal-ispejjeż fil-kuntratti bejn l-UE u n-Nazzjonijiet Uniti ftit li xejn kellhom impatt.
VIIMatul il-perjodu 2012-2016, il-Kummissjoni ta’ spiss użat id-dipożizzjonijiet relatati mad-dikjarazzjoni tal-kriżi biex tagħmel kuntratti direttament mas-sħab inkarigati mill-implimentazzjoni. It-tneħħija tar-rekwiżit għal sejħiet għal proposti naqqset it-trasparenza tal-proċedura tal-għażla u rriżultat fir-riskju li jkollha effett negattiv fuq il-kosteffettività tal-proġetti.
VIIIIl-livell tal-kisba ta’ riżultati kien ivarja skont il-proġetti li ġew awditjati. Nofs biss ta’ dawn il-proġetti wasslu l-outputs ippjanati, prinċipalment minħabba dewmien fl-implimentazzjoni. L-eżiti u s-sostenibbiltà tar-riżultati ma setgħux jiġu vvalutati għal kważi nofs il-proġetti awditjati minħabba d-dewmien fl-implimentazzjoni tal-attivitajiet tal-programmi. Ġew osservati wkoll dgħufijiet fir-rigward tal-kwalità tal-indikaturi tal-proġetti u l-monitoraġġ tagħhom.
IXFuq il-bażi tal-osservazzjonijiet f’dan ir-rapport, il-Qorti tagħmel għadd ta’ rakkomandazzjonijiet bl-għan li jsir titjib fil-ġestjoni tal-għajnuna għall-iżvilupp mogħtija lill-Myanmar/Burma. Is-SEAE/il-Kummissjoni huma mitluba biex:
- jimmiraw aħjar fuq l-oqsma ta’ appoġġ sabiex iżidu l-impatt tal-għajnuna;
- isaħħu l-koordinazzjoni mad-DĠ ECHO;
- jiġġustifkaw u jiddokumentaw l-allokazzjoni ta’ finanzjament għas-setturi u għall-azzjonijiet;
- itejbu l-kosteffettività ta’ azzjonijiet b’multidonaturi;
- itejbu l-mod kif jimmaniġġjaw il-proġetti u jiżguraw li l-azzjonijiet tal-UE jkollhom aktar viżibbiltà.
Introduzzjoni
01Wara bosta deċennji ta’ tmexxija awtoritarja, il-Myanmar/Burma għaddej minn tranżizzjoni politika u ekonomika taħt gvern ċivili li tela fil-poter f’Marzu tal-2011. Il-gvern nieda sensiela ta’ riformi maħsuba biex isir tibdil fis-sitwazzjoni politika, demokratika u soċjoekonomika tal-pajjiż.
02F’dak li jirrigwarda s-sitwazzjoni ekonomika tal-pajjiż, il-PDG tiegħu kiber b’rata annwali medja ta’ 7.5 %1. Il-forza tax-xogħol hija żagħżugħa u l-pajjiż għandu ħafna riżorsi naturali, bħal gass, injam, deheb u ħaġar prezzjuż. Peress li l-fruntiera tiegħu tmiss mas-swieq taż-żewġ pajjiżi l-aktar ippopolati fid-dinja, iċ-Ċina u l-Indja, il-pajjiż qed jibbenefika minn żieda sinifikanti fl-investiment dirett.
03Il-popolazzjoni tinkludi għadd kbir ta’ gruppi etniċi, li xi wħud minnhom huma involuti fi gwerer ċivili li ilhom għaddejjin żmien twil. Għad hemm tensjonijiet bejn gruppi etniċi u bejn dawk b’reliġjonijiet differenti. Il-gvern iffirma Ftehim ta' Waqfien mill-Ġlied fil-Pajjiż Kollu ma’ xi armati etniċi, iżda l-proċess ta’ paċi qed jipprogressa bil-mod. Tensjonijiet etniċi huma prevalenti fi stati fejn hemm gruppi etniċi li mhumiex Bamar, partikolarment fir-reġjuni fuq il-fruntiera fl-Istati ta’ Shan, Kachin u Rakhine (ara l-mappa fl-Anness I).
04Fl-2016 u l-2017, reġgħet faqqgħet mill-ġdid il-vjolenza kontra l-minoranza Musulmana ta’ Rohingya fl-Istat ta’ Rakhine (ara l-mappa fl-Anness I), poplu li effettivament safa mingħajr Stat meta l-Liġi dwar iċ-Ċittadinanza Burmiża daħlet fis-seħħ fl-1982. Vjolenza rikorrenti taggrava l-kunflitt u tostakola l-isforzi umanitarji u ta’ żvilupp fir-reġjun.
05Sabiex tħeġġeġ il-proċess tar-riformi, f’April tal-2012 l-UE ssospendiet is-sanzjonijiet imposti fuq il-gvern u sal-2013 kienet neħħiethom kollha minbarra l-embargo fuq l-armi. L-UE fetħet ukoll uffiċċju f’Yangon, li fl-2013 sar Delegazzjoni kompluta tal-UE.
06Il-Konklużjonijiet tal-Kunsill tat-22 ta’ Lulju 2013 dwar il-Qafas Komprensiv għall-politika tal-UE u l-appoġġ tagħha lill-Myanmar/Burma jistabbilixxu l-qafas tar-relazzjonijiet bilaterali. L-objettivi strateġiċi ta’ dan il-Qafas huma li (1) jiġu appoġġati l-paċi u r-rikonċiljazzjoni nazzjonali, (2) tingħata assistenza għall-bini ta’ demokrazija li tiffunzjona, (3) jistimulaw l-iżvilupp u l-kummerċ (4) jingħata appoġġ għar-riintegrazzjoni tal-Myanmar fil-komunità internazzjonali.
07F’Novembru tal-2013, saret laqgħa tat-Task Force UE-Myanmar/Burma biex jiġu ppreżentati lill-gvern l-għodod u l-istrumenti li l-UE għandha għad-dispożizzjoni tagħha biex tappoġġa d-demokratizzazzjoni. Saru sensiela ta’ forums, ippreseduti mir-Rappreżentant Għoli preċedenti tal-UE Catherine Ashton u minn wieħed mill-Ministri tal-Uffiċċju tal-President tal-pajjiż U Soe Thane, biex jissaħħu r-relazzjoni bilaterali f’għadd ta’ oqsma, inklużi l-assistenza għall-iżvilupp, is-soċjetà ċivili, il-proċess ta’ paċi, kif ukoll il-kummerċ u l-investiment.
08Il-laqgħa tat-Task Force kienet segwita minn Djalogi bejn l-UE u l-Myanmar dwar id-Drittijiet tal-Bniedem, fejn ġie esplorat kif l-assistenza li tingħata mill-UE tista’ tappoġġa l-isforzi biex jiġu stimulati d-drittijiet tal-bniedem, il-governanza demokratika u l-istat tad-dritt fuq il-post. L-UE offriet li tappoġġa lill-Gvern tal-Myanmar biex jirratifika l-konvenzjonijiet u l-istrumenti internazzjonali dwar id-drittijiet tal-bniedem. L-UE skjerat ukoll Missjoni ta' Osservazzjoni Elettorali biex tosserva l-elezzjoni ġenerali tat-8 ta’ Novembru 2015.
09L-UE allokat aktar minn EUR 1 biljun għall-perjodu 2007-2020 (ara t-Tabella 1), prinċipalment taħt strumenti bilaterali, reġjonali u tematiċi2.
| (EUR miljun) | ||||||
|---|---|---|---|---|---|---|
| Sors | 2007-2011 | 2012-2013 | Pakkett Speċjali 2012-2013 | Total 2007-2013 | 2014-2020 | Total 2007-2020 |
| Strument tal-Kooperazzjoni għall-Iżvilupp | ||||||
| Pakkett bilaterali | 32.0 | 93.0 | 125.0 | 688.0 | 813.0 | |
| Programmi tematiċi | 43.9 | 7.7 | 34.0 | 85.6 | 20.6* | 106.2 |
| Programmi reġjonali | 17.0 | 3.8 | 20.0 | 40.8 | 35.9* | 76.7 |
| Strumenti oħra (IfS, EIDHR, ICI+) | 2.2 | 28.9 | 3.7 | 34.8 | 1.8 | 36.6 |
| Total | 95.1 | 40.4 | 150.7 | 286.2 | 746.3 | 1,032.5 |
* Allokazzjoni ta’ finanzjament sal-2017.
Sors: Il-Programmi Indikattivi Pluriennali (MIPs) 2007-2013 u 2014-2020 u l-Programmi ta' Azzjoni Annwali (PAA) 2007-2015.
10Taħt il-Programm Indikattiv Pluriennali (MIP) 2007-2013, l-UE pprovdiet finanzjament bilaterali għal żewġ setturi fokali, jiġifieri l-edukazzjoni u s-saħħa. Strumenti tematiċi u finanzjament reġjonali ffukaw prinċipalment fuq il-programmi relatati mas-Sigurtà tal-Ikel u tal-Għajnuna lil Persuni Spostjati.
11Fl-2012, sabiex iżżomm il-momentum tar-riformi, l-UE pprovdiet appoġġ ulterjuri lill-pajjiż taħt “Pakkett Speċjali” li ammonta għal EUR 150 miljun. Minħabba dan il-fnanzjament, l-appoġġ bilaterali ġie estiż biex ikopri żewġ setturi fokali oħra, jiġifieri l-bini tal-paċi u l-kummerċ.
12Taħt il-MIP 2014-2020, il-finanzjament bilaterali li jammonta għal total ta’ EUR 688 miljun ġie allokat għal erba’ setturi fokali: l-iżvilupp rurali, l-edukazzjoni, il-governanza u l-bini tal-paċi. Flimkien mal-assistenza mogħtija lill-pajjiż taħt programmi u strumenti tematiċi u reġjonali, il-finanzjament mill-UE għall-pajjiż matul il-perjodu ta’ seba’ snin jilħaq is-EUR 746.3 miljun. Il-finanzjament li ġie allokat għal kull settur għall-perjodu 2007-2020 huwa ppreżentat fil-Figura 1.
Figura 1
Allokazzjoni ta’ finanzjament bilaterali, reġjonali u tematiku għal kull settur taħt id-DCI (f’miljun EUR)
Sorsi: Il-MIP 2007-2013, il-MIP 2014-2020, il-PAA 2007-2015.
Il-fondi ġew implimentati bl-użu ta’ modi ta’ ġestjoni diretta u indiretta3. Fl-2016, l-UE għaddiet 63 %4 tal-finanzjament lill-pajjiż taħt ġestjoni indiretta, fil-biċċa l-kbira permezz ta’ aġenziji tan-Nazzjonijiet Uniti. Kienu involuti l-Fondi Fiduċjarji li ġejjin: il-Fond Fiduċjarju għas-Sigurtà tal-Għajxien u tal-Ikel (LIFT), il-Programm għal Edukazzjoni Bażika ta’ Kwalità (QBEP), il-Fond għat-Tliet Għanijiet ta' Żvilupp tal-Millennju (3MDG) u l-Fond Konġunt għall-Paċi (JPF). Il-perċentwal tal-kontribuzzjonijiet mill-UE għall-Fondi kien ivarja bejn 11 % u 37 % (ara d-dettalji fl-Anness II). L-infiq taħt ġestjoni diretta, li kien jikkonsisti primarjament f’għotjiet, kien jirrappreżenta 37 % tal-portafoll kumplessiv.
14Il-pajjiż irċieva appoġġ minn bosta donaturi. Matul il-perjodu 2012-2016, l-impenji tad-donaturi mis-sorsi kollha ammontaw għal total ta’ USD 8 biljun. Minbarra l-għajnuna mill-UE, il-pajjiż irċieva impenji mill-Ġappun (USD 3.3 biljun), mill-Bank Dinji (USD 1 biljun), mir-Renju Unit (USD 593 miljun) u mill-Istati Uniti (USD 477 miljun)5.
Ambitu u approċċ tal-awditjar
15L-awditu eżamina jekk l-appoġġ li l-UE tat lill-Myanmar/Burma kienx effettiv billi indirizza t-tliet mistoqsijiet li ġejjin:
- Is-Servizz Ewropew għall-Azzjoni Esterna (SEAE) u l-Kummissjoni appoġġaw prijoritajiet stabbiliti sew fil-qasam tal-iżvilupp?
- Il-Kummissjoni mmaniġġjat tajjeb l-għajnuna għall-żvilupp li ngħatat mill-UE?
- L-appoġġ għall-iżvilupp li ngħata mill-UE laħaq l-objettivi tiegħu?
L-awditu kopra l-infiq li ġie impenjat matul il-perjodu 2012-2016 u ffinanzjat taħt id-DCI. Aħna eżaminajna 20 proġett - 11-il proġett taħt il-mod ta’ ġestjoni indiretta (li minnhom 10 kienu mmaniġġjati mill-Fondi Fiduċjarji6 u wieħed kien ġie implimentat minn Aġenzija tal-Istati Membri7), u 9 proġetti taħt ġestjoni diretta8. Id-dettalji tal-proġetti awditjati jingħataw fl-Anness III.
17Ix-xogħol tal-awditjar kien jinvolvi analiżi fl-uffiċċju ta’ evidenza dokumentarja, bħal dokumenti ta’ programmazzjoni u rapporti ta’ monitoraġġ u evalwazzjoni. Kien jinkludi missjoni fuq il-post u intervisti ma’ persunal mid-Direttorat Ġenerali għall-Kooperazzjoni Internazzjonali u l-Iżvilupp (DĠ DEVCO), mis-SEAE, mid-Delegazzjoni tal-UE u mid-Direttorat Ġenerali għall-Protezzjoni Ċivili u l-Operazzjonijiet tal-Għajnuna Umanitarja Ewropej (DĠ ECHO), kif ukoll ma’ rappreżentanti tal-Istati Membri tal-UE għall-Myanmar/Burma, donaturi oħra, u sħab inkarigati mill-implimentazzjoni. Rapporti oħra tal-awditjar, ta’ verifikazzjoni9 u ta’ Monitoraġġ Orjentat lejn ir-Riżultati (MOR) li nħarġu minn korpi oħra ttieħdu inkunsiderazzjoni wkoll.
Osservazzjonijiet
Minkejja ċerti dgħufijiet, l-UE kellha rwol ewlieni fl-għoti ta’ appoġġ għal prijoritajiet stabbiliti fil-qasam tal-iżvilupp
18Sabiex inwieġbu għall-ewwel mistoqsija tal-awditjar (ara l-paragrafu 15), aħna eżaminajna jekk is-SEAE u l-Kummissjoni kinux indirizzaw il-ħtiġijiet tal-pajjiż. Aħna eżaminajna wkoll jekk il-prijoritajiet tal-Kummissjoni fil-qasam tal-iżvilupp kinux iffukati biżżejjed u jekk hija kinitx ikkoordinathom ma’ donaturi oħra.
Is-SEAE u l-Kummissjoni indirizzaw il-ħtiġijiet tal-pajjiż
19Is-SEAE u l-Kummissjoni rreaġew malajr għall-bidliet politiċi fil-pajjiż. Huma bdew djalogu dwar id-drittijiet tal-bniedem, skjeraw Missjoni ta' Osservazzjoni Elettorali u kienu involuti fil-proċess ta’ paċi. Id-Delagazzjoni tal-UE għall-Myanmar/Burma ġiet stabbilita fl-2013. Minkejja l-istruttura l-ġdida tad-Delegazzjoni tal-UE u l-isfidi lokali li ffaċċjaw, is-SEAE u l-Kummissjoni stabbilew djalogu ta' politika bikri u attiv mal-awtoritajiet nazzjonali u żguraw li nġabar għarfien estensiv.
20Il-Gvern tal-Myanmar/Burma ma qabilx dwar pjan nazzjonali għall-iżvilupp tal-pajjiż. Il-ħtiġijiet tal-pajjiż kienu estensivi u koprew bosta oqsma, inklużi l-paċi, l-edukazzjoni, is-saħħa, l-iżvilupp agrikolu, il-governanza u l-kapaċità istituzzjonali. L-għażla tas-setturi li kellhom jingħataw appoġġ ġiet iddeterminata f’konsultazzjoni mal-partijiet interessati, u l-gvern qies li dan kien jikkorrispondi mal-prijoritajiet ġenerali tiegħu fil-qasam tal-iżvilupp. L-UE allokat finanzjament sinifikanti lill-pajjiż biex jingħata appoġġ għall-prijoritajiet għall-iżvilupp (ara l-paragrafu 9).
L-għażla tal-prijoritajiet għall-iżvilupp ma kinitx iffukata biżżejjed
21Fi ħdan il-qafas tal-MIPs għall-Myanmar/Burma, is-SEAE u l-Kummissjoni speċifikaw il-prijoritajiet għall-iżvilupp u l-allokazzjonijiet ta’ finanzjament. Il-programmazzjoni kellha tkun konformi mal-prijoritajiet globali tal-UE għall-politika għall-iżvilupp u timplimenta l-Aġenda għall-Bidla tal-201110. Kellha wkoll tiżgura l-koerenza u l-kumplementarjetà bejn id-diversi donaturi, kif ukoll l-allinjament mal-prijoritajiet tal-gvern.
22L-objettiv primarju tal-Aġenda għall-Bidla tal-2011 kien li jkun hemm żieda sinifikanti fl-impatt u fl-effettività tal-politika tal-UE għall-iżvilupp. Hija rrikjediet l-involviment tal-UE f’massimu ta’ tliet setturi fokali, sabiex jiżdiedu l-impatt u l-effettività tal-assistenza tagħha. Id-deċiżjoni tal-Kummissjoni li żżid l-għadd ta’ setturi fokali minn tnejn għal erbgħa (ara l-paragrafi 10 sa 12) ma kinitx iġġustifikata b’mod ċar skont il-linji gwida operattivi tagħha stess, u ma ħaditx inkunsiderazzjoni l-kapaċità tad-Delegazzjoni tal-UE li tlaħħaq ma’ portafoll għall-iżvilupp daqstant kbir f’ambjent tax-xogħol kumpless.
23Barra minn hekk, il-Kummissjoni ma vvalutatx biżżejjed il-prijoritajiet ġeografiċi f’termini ta’ reġjuni. Pereżempju, l-ewwel studju dwar il-ħtiġijiet speċifiċi tal-Istat ta’ Rakhine (ara l-paragrafu 4) ma twettaqx qabel l-2017. Prijoritizzazzjoni ta’ dan it-tip setgħet żiedet l-impatt tal-appoġġ mill-UE.
24Il-ġenerazzjoni ta’ dħul tal-gvern minn sorsi fiskali u mhux fiskali hija fattur kruċjali fl-iżvilupp sostenibbli, partikolarment f’pajjiż li għandu ħafna riżorsi naturali (ara l-paragrafu 2). Madankollu, il-mobilizzazzjoni tad-dħul domestiku ma ttiħdietx inkunsiderazzjoni biżżejjed meta kienu qed jiġu ddeterminati l-prijoritajiet, minkejja li hija l-qofol għall-iżvilupp tal-Myanmar.
Il-livell ta’ koordinazzjoni kien ivarja
25Minn meta l-gvern ċivili tela’ fil-poter fil-Myanmar/Burma, kien hemm influss rapidu ta’ donaturi li kkontribwew fondi għall-iżvilupp (ara l-paragrafu 14). Il-gvern tal-pajjiż u s-sħab fil-qasam tal-iżvilupp kellhom laqgħat regolari u skambjaw informazzjoni biex jiżguraw li jkun hemm koordinazzjoni fost id-donaturi. Il-laqgħat tagħhom servew biex isir titjib fil-koerenza u fl-effettività tal-għajnuna għall-iżvilupp. L-UE pparteċipat b’mod attiv fil-forums ta’ kooperazzjoni.
26L-UE u l-Istati Membri tagħha waqqfu l-Istrateġija ta’ Programmazzjoni Konġunta 2014-2016 biex jippromwovu l-effettività tal-għajnuna. il-Programmazzjoni Konġunta nksibet minkejja n-nuqqas ta’ pjan ta’ żvilupp nazzjonali, u kienet wieħed mill-ewwel eżempji ta’ dan it-tip fid-dinja kollha. Minkejja li ż-żieda fl-effettività tal-għajnuna kienet modesta f’termini ta’ kemm tnaqqset il-frammentazzjoni tal-għajnuna, il-proċess ta’ programmazzjoni konġunta rriżulta f’titjib fit-trasparenza, il-prevedibbiltà u l-viżibbiltà.
27Madankollu, il-koordinazzjoni bejn id-DĠ ECHO u d-DĠ DEVCO ma kinitx adegwata. L-għajnuna umanitarja hija tassew meħtieġa f’ċerti reġjuni tal-Myanmar/Burma, partikolarment fl-Istati ta’ Rakhine u Kachin. Bejn l-2012 u l-2016 il-Kummissjoni Ewropea, permezz tad-DĠ ECHO, ipprovdiet madwar EUR 95 miljun għal programmi ta’ għajnuna favur is-sigurtà tal-ikel u biex tassisti lil vittmi tal-kunflitti. Minkejja li ż-żewġ Direttorati Ġenerali tal-Kummissjoni kienu attivi fil-pajjiż, l-interventi umanitarji tal-UE ma ttiħdux biżżejjed inkunsiderazzjoni meta l-programmi ġew ifformulati. Minbarra dan, ma kien hemm l-ebda pjan ta’ implimentazzjoni konġunta li ħoloq kollegament bejn l-għajnuna, ir-riabilitazzjoni u l-iżvilupp (LRRD). Kien hemm eżempji ta’ kooperazzjoni fl-isferi tal-għajnuna umanitarja u l-għajnuna għall-iżvilupp, iżda dawn kienu aktar l-eċċezzjoni milli r-regola.
28Barra minn hekk, id-DĠ ECHO ma kienx inkluż fl-Istrateġija ta’ Programmazzjoni Konġunta 2014-2016 iddefinita mill-Kummissjoni u mill-Istati Membri (il-paragrafu 26). Din kienet opportunità mitlufa biex isir titjib l-koordinazzjoni, peress li l-assistenza umanitarja hija mistennija f’żoni ta’ kriżi fit-tul, li huwa l-każ għal xi wħud mir-reġjuni tal-pajjiż. Proċedura għall-iskambju ta’ informazzjoni bejn id-DĠ DEVCO u d-DĠ ECHO ma ġietx formalizzata qabel Settembru tal-2016.
Il-mod kif il-Kummissjoni mmaniġġjat l-għajnuna għall-żvilupp li ngħatat mill-UE kien ġeneralment sodisfaċenti iżda kien affettwat minn dewmien u nuqqasijiet
29Sabiex inwieġbu għat-tieni mistoqsija tal-awditjar (ara l-paragrafu 15), aħna eżaminajna jekk il-Kummissjoni kinitx identifikat u implimentat sew l-azzjonijiet u kinitx għażlet il-modalità xierqa ta’ għajnuna. Aħna eżaminajna wkoll jekk il-Kummissjoni kinitx ikkoordinat l-azzjonijiet ma’ donaturi oħra, u jekk l-azzjonijiet kinux ġew immonitorjati b’mod xieraq.
L-azzjonijiet kienu rilevanti iżda kien hemm xi xkiel
30Taħt kull MIP il-Kummissjoni tadotta deċiżjonijiet ta’ finanzjament, jiġifieri Programmi ta' Azzjoni Annwali (PAA), li jiddefinixxu l-azzjonijiet, il-modalità tal-għajnuna u l-ammont totali ta’ finanzjament għal kull azzjoni. L-azzjonijiet magħżula kienu konformi mal-prijoritajiet determinati. Madankollu, għalkemm is-setturi fokali u l-azzjonijiet appoġġati kienu jikkonformaw mal-prijoritajiet tal-gvern (ara l-paragrafu 20), il-Kummissjoni ma ddokumentatx l-ammont ta’ finanzjament kif kien ġie ddeterminat, la għal kull wieħed mis-setturi taħt il-MIP u lanqas għal kull waħda mill-azzjonijiet taħt il-PAA.
31Il-PAA 2016 ma ġiex adottat, peress li xi Stati Membri ma kinux favur l-approċċ propost qabel laqgħa li saret mill-Kumitat tal-Istrument tal-Kooperazzjoni għall-Iżvilupp (DCI). Il-Kummissjoni ddeċidiet li tirtira l-proposta. Il-fatt li l-PAA 2016 ma ġiex adottat irriżulta f’dewmien konsiderevoli fl-implimentazzjoni tal-azzjonijiet ippjanati, peress li l-implimentazzjoni ta’ EUR 163 miljun taħt il-MIP għall-2016 ġiet posposta. Mill-allokazzjoni totali ta’ kważi EUR 1 biljun għall-perjodu 2012-2020 (ara t-Tabella 1), l-ammonti li ġew impenjati sa April tal-2017 kienu jlaħħqu t-EUR 380.7 miljun.
32Il-kriterji operazzjonali li tqiesu meta ntgħażlu l-modalitajiet ta’ għajnuna u meta ġie żviluppat il-Pjan ta’ Implimentazzjoni kienu l-“volum ta’ xogħol futur tad-Delegazzjoni” u l-iżgurar ta’ “kombinament ta’ modalitajiet ta’ għajnuna”. L-ebda wieħed mill-PAA li ġew eżaminati ma kien jinkludi l-kriterju ta’ kosteffettività tal-attivitajiet iffinanzjati. Minkejja dan, fid-dawl tal-possibbiltajiet li kienu disponibbli, l-għażla tal-Kummissjoni fir-rigward tal-modalitajiet ta’ għajnuna kienet raġonevoli.
33Aktar minn nofs l-ammonti impenjati ġew allokati taħt il-mod ta’ ġestjoni indiretta, u ngħaddew fil-biċċa l-kbira permezz tal-Fondi Fiduċjarji mmaniġġjati min-Nazzjonijiet Uniti (ara l-paragrafu 13). Dan ippermetta lill-Kummissjoni taħdem f’kooperazzjoni mill-qrib ma’ donaturi oħra u li tkun involuta f’azzjonijiet għall-iżvilupp fuq skala kbira. Din il-modalità tal-għajnuna taffiet il-piż li kellu l-persunal tal-Kummissjoni, peress lil-ġestjoni tal-Fondi kienet primarjament ir-responsabbiltà tan-Nazzjonijiet Uniti.
L-Implimentazzjoni mill-Fondi Fiduċjarji kienet affettwata minn dewmien fl-impenn u l-żborżament tal-fondi
34Il-Kummissjoni impenjat u żborżat il-fondi għall-Fondi Fiduċjarji b’mod rapidu, iżda l-implimentazzjoni tal-programmi tal-Fondi Fiduċjarji mmaniġġjati min-Nazzjonijiet Unit kienet affettwata minn dewmien u minn assorbiment bil-mod tal-baġit għall-attivitajiet tal-programmi. L-ammonti żborżati għall-attivitajiet tal-programmi taħt il-LIFT kienu jirrappreżentaw 53 % biss tal-kontribuzzjonijiet għall-Fond (b’durata mill-2012 sal-2018), u fil-każ tat-3MDG kenu jirrappreżentaw 68 % biss (b’durata mill-2012 sal-2017). Minkejja li l-JPF ġie stabbilit f’Diċembru 2015, 3 % biss tal-finanzjament ikkontribwit kien tħallas f’attivitajiet tal-programmi11.
35Minħabba l-implimentazzjoni bil-mod tal-attivitajiet tal-programmi, il-bilanċi ta’ flus tal-Fondi Fiduċjarji mmaniġġjati min-Nazzjonijiet Uniti kienu mdaqqsin. Fil-każ tal-LIFT, tat-3MDG u tal-JPF, dawn ammontaw għal USD 74 miljun, USD 54 miljun u USD 18-il miljun12, rispettivament13.
36Id-dispożizzjonijiet kuntrattwali li ġew iffirmati bejn l-UE u l-UNOPS, l-aġenzija tan-Nazzjonijiet Uniti li timmaniġġja tlieta mill-erba’ Fondi Fiduċjarji fil-Myanmar/Burma, jippermettu lil dan tal-aħħar iżomm l-imgħax gwadanjat fuq il-fondi mogħtija bil-quddiem mill-Kummissjoni. Il-Kummissjoni ma tirrikjedix li l-UNOPS talloka l-imgħax gwadanjat għall-attivitajiet tal-programmi.
Id-dispożizzjonijiet relatati mal-kontroll tal-ispejjeż fil-kuntratti bejn l-UE u n-Nazzjonijiet Uniti ftit li xejn kellhom impatt
37Id-dispożizzjonijiet kuntrattwali li jirregolaw il-finanzjament li l-UE tħallas għall-Fondi Fiduċjarji Multidonaturi tan-Nazzjonijiet Uniti huma stipulati fil-ftehimiet ta’ kontribuzzjoni. Dawn jiddeskrivu fil-qosor l-impenji finanzjarji taż-żewġ partijiet. Klawsola speċifika f’dawn il-ftehimiet ta’ kontribuzzjoni tiddikjara li l-ispejjeż indiretti jridu jkunu limitati għal 7 % tal-ispejjeż eliġibbli diretti mġarrba mill-Fondi. Billi l-Fondi huma mmaniġġjati min-Nazzjonijiet Uniti, il-kontroll tal-ispejjeż huwa primarjament ir-responsabbiltà tagħhom. Madankollu, il-Kummissjoni għandha wkoll obbligu li tiżgura li l-kontribuzzjonijiet tal-UE jkunu kosteffettivi. Biex tiżgura dan hija twettaq, fost oħrajn, kontrolli ta’ verifikazzjoni fuq il-Fondi.
38Matul dawn il-kontrolli, il-verifikaturi jeżaminaw l-eliġibbiltà tal-ispejjeż li jiġu ppreżentati mill-Fondi Fiduċjarji. Skont il-ftehim li jkun intlaħaq bejn il-partijiet, jekk l-infiq jinstab li ma jkunx eliġibbli għal finanzjament mill-UE, ma jiġix rifjutat iżda jiġġarrab minn donaturi oħra, meta jkun hemm biżżejjed fondi. Dan huwa l-hekk imsejjaħ "approċċ nozzjonali". Aħna ltqajna ma’ każijiet fejn il-verifikazzjonijiet li twettqu f’isem il-Kummissjoni ppermettew li jinqabdu spejjeż ineliġibbli u fejn ġie applikat l-approċċ nozzjonali (ara l-Kaxxa 1).
Kaxxa 1
Eżempji tal-applikazzjoni tal-approċċ nozzjonali
LIFT
Fl-2012, kontroll ta’ veriifkazzjoni li twettaq mill-Kummissjoni ppermetta li jinqabdu spejjeż ineliġibbli ta’ EUR 7.35 miljun, li kienu prinċipalment ikkostitwiti minn pagamenti bil-quddiem u self, u li kienu ġew irrappurtati b’mod skorrett bħala nfiq. Bl-applikazzjoni tal-approċċ nozzjonali l-infiq ineliġibbli totali tnaqqas għal EUR 2.44 miljun, peress li l-maniġment tal-Fondi Fiduċjarji rrapporta li kien hemm biżżejjed fondi disponibbli minn donaturi oħra biex ikopru EUR 4.91 miljun tal-ispejjeż li ġew iddeterminati mill-Kummissjoni bħala ineliġibbli. Sussegwentement, il-biċċa l-kbira mill-EUR 2.44 miljun li kien jifdal ġew ikkumpensati mill-Kummissjoni permezz ta’ pagamenti oħra favur il-LIFT, u eventwalment il-bilanċ ta’ EUR 0.35 miljun ġie rkuprat mill-UNOPS.
3MDG / 3DF
Fl-2012, il-Fond għat-Tliet Mardiet (3DF) temm l-attivitajiet tiegħu, li mbagħad waqgħu taħt ir-responsabbiltà tat-3MDG. Eżerċizzju ta’ verifikazzjoni, li twettaq fl-2015, fuq il-Fond għat-Tliet Mardiet (3DF) irrapporta spejjeż indiretti ineliġibbli ta’ USD 640 000. Il-limitu massimu speċifikat għall-ispejjeż indiretti, li ammontaw għal 7 % tal-ispejjeż eliġibbli diretti speċifikati fil-ftehim ta’ kontribuzzjoni, kien inqabeż b’dan l-ammont. Meta l-maniġment tal-Fondi ġie nnotifikat dwar dan, huwa informa lill-Kummissjoni li s-somma kienet ġiet koperta mill-fondi mogħtija minn donaturi oħra.
L-eżempji ta’ hawn fuq juru l-limiti tal-kontroll li l-Kummissjoni tista’ teżerċita fuq il-kosteffettività tal-Fondi. Fil-biċċa l-kbira tal-każijiet, l-ispejjeż li jinstabu li jkunu ineliġibbli mill-Kummissjoni eventwalment jitħallsu minn donaturi oħra. Għaldaqstant, is-sejbiet tal-kontrolli ta’ verifikazzjoni jkollhom ftit jew l-ebda impatt fuq il-kosteffettività tal-Fondi. Din hija wkoll is-sitwazzjoni għall-ispejjeż indiretti, fejn ma jkunx hemm qbil fost id-donaturi dwar l-applikazzjoni ta’ rata perċentwali xierqa.
40F’każijiet fejn donatur ikun ukoll sieħeb inkarigat mill-implimentazzjoni f’azzjoni b’multidonaturi, bħal fil-QBEP (ara l-Anness II u l-Kaxxa 2), hemm riskju sinifikanti li l-ispejjeż indiretti li jaqbżu r-rata ta’ 7 % maqbula mal-UE jiġu allokati lis-sieħeb inkarigat mill-implimentazzjoni nnifsu jew lil donaturi oħra.
Kaxxa 2
Eżempju ta’ spejjeż indiretti għoljin
Fil-każ tal-QBEP, l-ispejjeż indiretti kienu darbtejn ogħla minn dawk previsti fil-kuntratti bejn l-UE u n-Nazzjonijiet Uniti: minbarra s-7 % tal-ispejjeż indiretti inklużi fil-baġit ġenerali tal-QBEP, 7 % oħra ġew inklużi fil-baġit tas-subgħotjiet għal proġetti implimentati permezz ta’ Organizzazzjonijiet Nongovernattivi (NGOs) Internazzjonali. L-ispejjeż imħallsin taħt dawn is-subgħotjiet jiġu allokati għal sorsi ta’ finanzjament li mhumiex fl-UE. Minkejja dan, il-kosteffettività kumplessiva ta’ azzjoni titnaqqas meta l-ispejjeż indiretti jiġu ddebitati darbtejn, irrispettivament mis-sors ta’ finanzjament li għalih jiġu assenjati l-ispejjeż.
Il-proċeduri kuntrattwali f’każ ta’ kriżi ġew applikati b’mod ġenerali wisq
41Il-Kummissjoni ħadet deċiżjonijiet dwar il-proġetti kollha mmaniġġjati b’mod dirett, inkluż dwar l-ambitu u l-baġit tagħhom, u setgħet timmonitorja mill-qrib il-progress li sar matul il-ħajja ta’ proġett. Għodod bħall-eżerċizzju tal-MOR intużaw biex jassistu lill-Kummissjoni fl-immaniġġjar tagħha. Il-Kummissjoni kienet ukoll f’pożizzjoni li tieħu azzjoni matul l-andament ta’ proġett. Madankollu, kemm l-istabbiliment ta’ proġetti kif ukoll il-monitoraġġ tagħhom huma attivitajiet impenjattivi u li jieħdu ħafna ħin, speċjalment meta jkunu numerużi u mifruxin f’żoni mbegħdin b’aċċess diffiċli Għalhekk, il-Kummissjoni mmirat li tiffinanzja proġetti kbar.
42Matul il-perjodu 2012-2016, il-Kummissjoni użat id-dispożizzjonijiet relatati mad-dikjarazzjoni tal-kriżi14 biex tagħmel kuntratti direttament mas-sħab inkarigati mill-implimentazzjoni mingħajr il-ħtieġa li toħroġ sejħiet għal proposti. L-użu tad-dikjarazzjoni tal-kriżi kien ifisser li kien hemm “periklu imminenti jew immedjat li jhedded li jiddeġenera f'kunflitt armat”, u l-għotjiet u l-kuntratti ta’ akkwist setgħu jiġu negozjati mingħajr ma jkun hemm il-ħtieġa ta’ sejħa għal proposti jew sejħa għall-offerti15. Inizjalment, id-dkjarazzjoni tal-kriżi kienet tapplika biss għall-Istati etniċi ta’ Chin, Kachin, Kayah, Kayin, Mon, Shan u Rakhine u fid-Diviżjoni ta’ Tanintharyi (ara l-mappa fl-Anness I). Fl-2014, il-Kummissjoni estendiet id-dikjarazzjoni tal-kriżi għall-kuntratti kollha li kienu jappoġġaw l-għanijiet għall-bini tal-paċi u tal-Istati fil-Myanmar u ġedditha kull sena. Id-dikjarazzjoni tal-kriżi kienet komprensibbli għaż-żoni affettwati direttament minn kunflitti iżda mhux daqstant għal żoni paċifiċi. It-tneħħija tar-rekwiżit għal sejħiet għal proposti naqqset it-trasparenza tal-proċedura tal-għażla u rriżultat fir-riskju li jkollha effett negattiv fuq il-kosteffettività tal-proġetti.
43Għalkemm il-Kummissjoni nfisha ilha li invokat id-dikjarazzjoni tal-kriżi mill-2012, hija ma infurmatx lis-sħab inkarigati mill-implimentazzjoni dwar il-possibbiltà li jiġu applikati proċeduri flessibbli qabel l-2015 u l-2016, u mhux fl-2013 u l-2014. Filwaqt li l-Kummissjoni tat għotjiet b’mod dirett, hija talbet lis-sħab inkarigati mill-implimentazzjoni biex japplikaw proċeduri ta' akkwist kuntrattwali fl-2013 u l-2014, anke fl-Istati etniċi.
Ir-riskju ta’ finanzjament doppju ma ġiex mitigat biżżejjed
44Meta konna qed nivvalutaw kif il-Kummissjoni mmaniġġjat l-assistenza għall-iżvilupp, aħna sibna li r-riskju ta’ finanzjament doppju kien sinifikanti f’xi każijiet iżda ma ġiex mitigat (ara l-Kaxxa 3).
Kaxxa 3
Eżempji ta’ riskji ta’ finanzjament doppju
Il-Fond 3MDG jkopri tliet komponenti: (1) is-Saħħa tal-Ommijiet, tat-Trabi tat-Twelid u tat-Tfal; (2) it-Tuberkulożi, il-Malarja u l-HIV/AIDS; (3) l-Appoġġ għas-Sistemi. Il-Komponent Nru 2 huwa kopert ukoll mill-Fond Globali, li huwa bbażat f’Ġinevra, l-Iżvizzera, jopera fid-dinja kollha, inkluż fil-Myanmar/Burma, huwa kofinanzjat mill-UE, u mmaniġġjat mill-UNOPS. Il-finanzjament mit-3MDG għall-Komponent Nru 2 huwa intenzjonat speċifikament biex jikkomplementa dak li jiġi pprovdut mill-Fond Globali fil-Myanmar/Burma, u biex jimla xi lakuni li jista’ jkun hemm. Madankollu, ma kienx hemm valutazzjoni komprensiva tal-lakuni u d-duplikazzjonijiet bejn iż-żewġ Fondi16. L-ebda dettall rigward l-oqsma ta’ intervent taż-żewġ Fondi u l-baġits tagħhom ma ġie ppreżentat, la lill-Bord tal-Fond 3MDG u lanqas lill-Kummissjoni. Lanqas ma ttieħdu miżuri ta’ mitigazzjoni biex jiġi indirizzat ir-riskju ta’ finanzjament doppju.
F’każ ieħor, NGO lokali partikolari rċeviet appoġġ mill-UE għat-tisħiħ tal-kapaċitajiet minn erba’ sorsi differenti ffinanzjati mill-UE, minħabba li ma saritx valutazzjoni tal-possibbiltà ta’ duplikazzjonijiet tal-finanzjament.
Barra minn hekk, tnejn mill-proġetti awditjati żvelaw koordinazzjoni dgħajfa ma’ donaturi oħra fil-livell tal-implimentazzjoni (ara l-Kaxxa 4).
Kaxxa 4
Eżempji ta’ opportunitajiet mitlufa f’termini ta’ koordinazzjoni
Fl-2012, il-Bank Dinji għamel impenn ta’ aktar minn USD 80 miljun għal “Programm Nazzjonali ta’ Żvilupp Immexxi mill-Komunitajiet (CDD)”. Dan il-programm ġie implimentat permezz ta’ diversi strutturi tal-gvern għall-iżvilupp, inklużi l-awtoritajiet muniċipali.
F’reġjun wieħed, l-UE ffinanzjat proġett għal EUR 5 miljun li kien jinkludi komponent tas-CDD. Fir-rapport ta’ monitoraġġ ġie osservat li l-inizjattivi kienu ġew implimentati permezz tal-istess partijiet interessati fil-livell muniċipali. Dan ħoloq strutturi paralleli u duplikazzjonijiet serji, għad li l-komunitajiet ibbenefikaw minn investiment addizzjonali fl-infrastruttura tagħhom.
F’reġjun ieħor, l-UE ffinanzjat proġett għal EUR 7 miljun li wkoll kien jinkludi komponent tas-CDD. Ir-rapport ta’ monitoraġġ indika li kien hemm nuqqas ta’ koordinazzjoni settorjali u r-riskju ta’ duplikazzjonijiet f’dan il-każ ukoll.
Kien hemm xi dgħufijiet fil-monitoraġġ tal-azzjonijiet iffinanzjati mill-UE u l-viżibbiltà kienet baxxa
46L-azzjonijiet li twettqu mill-Kummissjoni ġew immonitorjati, irrappurtati u evalwati permezz ta’ rappurtar dwar il-proġetti, żjarat fuq il-post, rapporti dwar il-MOR, evalwazzjonijiet u awditi. Sar titjib fil-monitoraġġ fis-snin ta’ wara l-istabbiliment tad-Delegazzjoni tal-UE, iżda kien għad baqa’ xi dgħufijiet.
47Ma kienx possibbli li jiġi vvalutat jekk kinux inkisbu l-outputs u l-eżiti stabbiliti fil-livell ta’ PAA, għal żewġ raġunijiet: xi wħud mill-PAA eżaminati ma kellhomx indikaturi tal-output jew tal-eżitu li setgħu jintużaw għall-valutazzjoni tal-azzjonijiet; anke fejn kien hemm indikaturi, ma kinitx teżisti data aggregata dwar l-outputs u l-eżiti tad-diversi azzjonijiet imwettqa f’kull settur ta’ intervent taħt il-PAA.
48Xi wħud mill-PAA jitolbu l-istabbiliment ta’ kumitat ta’ monitoraġġ tal-prestazzjoni għall-azzjonijiet iffinanzjati. Fil-każijiet awditjati, dan il-kumitat jew ma kienx ġie stabbilit jew inkella kien ġie stabbilit tard. Barra minn hekk, aħna osservajna xi dgħufijiet fil-monitoraġġ f’50 % tal-proġetti awditjati (ara l-Anness IV), li nofshom kienu jinkludu proġetti tal-Fondi Fiduċjarji.
Il-Kummissjoni rreaġiet bil-mod għar-rapporti tal-missjonijiet ta’ verifikazzjoni
49Il-Kummissjoni hija membru tal-bords tal-Fondi LIFT, 3MDG u JPF u tal-kumitat ta’ tmexxija tal-QBEP. Hija twettaq ukoll missjonijiet ta’ verifikazzjoni fl-aġenziji tan-Nazzjonijiet Uniti. Il-Kummissjoni damet biex inizjat ir-rapporti tal-missjonijiet ta’ verifikazzjoni u rreaġiet bil-mod għalihom (ara l-Kaxxa 5).
Kaxxa 5
Missjonijiet ta’ verifikazzjoni
LIFT
Fl-2012, il-Kummissjoni wettqet missjoni ta’ veriifkazzjoni fejn inqabdu spejjeż ineliġibbli li ammontaw għal EUR 7.35 miljun. L-ammont finali pendenti li kien baqa’ ma ġiex irkuprat qabel ma għaddew ħames snin oħra, f’Jannar tal-2017.
3MDG/3DF
Minkejja l-fatt li l-Fond 3DF intemm gradwalment fl-2012, l-ebda missjoni ta’ verifikazzjoni ma twettqet qabel l-2015, u r-riżultati ġew ippubblikati fl-2016, jiġifieri erba’ snin wara. L-ebda missjoni ta’ verifikazzjoni ma twettqet fir-rigward tat-3MDG.
Il-viżibbiltà tal-UE kienet baxxa.
50Ir-rapporti tal-missjonijiet ta’ veriifkazzjoni u r-rapporti ta’ monitoraġġ indikaw li l-livell ta’ viżibbiltà tal-azzjonijiet iffinanzjati mill-UE huwa baxx. Il-livell seta’ jiġi vvalutat f’10 mill-proġetti awditjati, u fi 8 każijiet ma kienx kompletament konformi mad-dispożizzjonijiet kuntrattwali (ara l-Anness IV).
51Wieħed mill-vantaġġi tal-Fondi Fiduċjarji tal-UE huwa ż-żieda fil-viżibbiltà. Bħala inizjatur tal-Fond Konġunt għall-Paċi, il-Kummissjoni kellha rwol importanti fit-tfassil u fl-istabbiliment tiegħu. Inizjalment hija kienet qieset il-possibbiltà li jinħoloq Fond Fiduċjarju tal-UE, iżda sussegwentement eskludietha formalment mill-istudju tat-tfassil tal-Fond, minħabba li ma setgħetx tikkonvinċi lil kontributuri potenzjali oħra dwar il-merti ta’ din il-possibbiltà.
L-ilħuq tal-objettivi kien affettwat minn dewmien fl-implimentazzjoni
52Sabiex inwieġbu għat-tielet mistoqsija tal-awditjar (ara l-paragrafu 15), aħna eżaminajna jekk l-azzjonijiet wasslux l-outputs ippjanati u jekk kisbux l-eżiti mistennija. Id-dettalji tal-proġetti awditjati jingħataw fl-Anness III u stampa ġenerali tal-valutazzjoni tal-proġetti individwali hija ppreżentata fl-Anness IV.
Kien hemm xi riżultati tajbin, minkejja li l-kuntest kien diffiċli
53L-objettivi tal-proġetti ffinanzjati mill-UE kienu li jkun hemm reazzjoni rapida u flessibbli fuq firxa ta’ oqsma rilevanti għat-tranżizzjoni politika tal-Myanmar, u li jingħata appoġġ għall-iżvilupp ta’ politika dwar kwistjonijiet ekonomiċi u soċjali. Kemm il-fatturi esterni kif ukoll dawk interni kellhom impatt negattiv fuq it-twassil ta’ riżultati, u dgħajfu l-effettività tal-proġetti ffinanzjati. Minkejja l-kuntest diffiċli, xi wħud mill-proġetti li awditjajna kisbu riżultati tajbin (ara l-Kaxxa 6).
Kaxxa 6
Eżempji ta’ proġetti li kisbu riżultati tajbin
LIFT – Proġett relatat mal-mikrofinanzjament
L-iskop tal-proġett kien li jiżdied l-aċċess għas-self u għal servizzi finanzjarji oħra lil aktar minn 100 000 klijent bi dħul baxx fil-pajjiż, li mill-inqas nofshom huma jew nisa jew inkella joqogħdu f’żoni rurali. Il-LIFT ipprovda appoġġ lill-istituzzjonijiet mikrofinanzjarji, li ppermettielhom joperaw u jkomplu jipprovdu servizzi. Il-proġett irnexxa peress li ħafna għamlu użu mill-finanzjament biex jibdew negozju jew biex jespandu l-attivitajiet tagħhom.
3MDG – Proġett biex jingħata appoġġ għas-Saħħa tal-Ommijiet u tat-Tfal
Is-settur tas-saħħa tal-pajjiż isofri minn inadegwatezza tan-nefqa pubblika, u r-rati ta’ mortalità tal-ommijiet u tat-tfal huma għoljin ħafna. Il-proġett iffinanzjat mit-3MDG ipprovda appoġġ għar-riferiment ta’ emerġenza kemm għal nisa tqal kif ukoll għal tfal taħt il-ħames snin. Il-pazjenti rċevew pagamenti biex ikopru l-ispejjeż għat-trasport, għall-ikel u għat-trattament. Il-proġett huwa mistenni li jikkontribwixxi b’mod sinifikanti għat-tnaqqis fir-rati ta’ mortalità tal-ommijiet u tat-tfal.
Proġett Nru 20
Dan il-proġett kien jinvolvi l-kostruzzjoni u t-titjib ta’ faċilitajiet edukattivi f’diversi postijiet fl-Istat ta’ Rakhine għal tfal mill-komunitajiet ta’ Rakhine u ta’ Rohingya, kemm dawk spostati f’pajjiżhom kif ukoll dawk le. Fi żmien iż-żjara tal-Qorti, għalkemm kien kmieni biex jiġu vvalutati l-eżiti mistennija, il-proġett kien qed iwassal l-outputs kif kien ippjanat.
Dewmien u dgħufijiet affettwaw l-implimentazzjoni tal-proġetti
54Filwaqt li xi wħud mill-outputs ippjanati tal-proġetti awditjati twasslu fil-ħin, dan ma kienx il-każ għal ħafna minnhom. B’kollox, 75 % tal-proġetti awditjati kellhom dewmien fl-implimentazzjoni (ara l-Anness IV).
55Fil-każ kemm ta’ proġetti tal-Fondi Fiduċjarji tan-Nazzjonijiet Uniti kif ukoll ta’ proġetti taħt ġestjoni diretta, il-biċċa l-kbira kienu rilevanti għall-objettivi ddefiniti. Madankollu, kien hemm nuqqasijiet f’dan ir-rigward fi kwart tal-proġetti awditjati (ara l-Kaxxa 7).
Kaxxa 7
Eżempju ta’ proġett li kien biss parzjalment rilevanti għall-objettivi ddefiniti
L-objettiv ta’ proġett importanti għat-tisħiħ tal-kapaċitajiet fil-livell istituzzjonali kien biex l-istituzzjonijiet pubbliċi u l-atturi mhux statali jissaħħu aktar. Madankollu, l-ambitu u r-riżultati tanġibbli tal-proġett kienu ġenerali wisq u ma kinux kompletament konformi mas-setturi fokali, peress li kienu wkoll relatati ma’ oqsma bħal “l-ambjent” u l-programm “Erasmus”.
L-objettivi tal-biċċa l-kbira mill-proġetti awditjati ssodisfaw il-kriterji SMART (speċifiċi, li jistgħu jitkejlu, li jistgħu jintlaħqu, rilevanti, marbuta mal-ħin), iżda l-indikaturi għal nofs il-proġetti li awditjajna ma kinux adegwati. B’mod ġenerali, l-ebda linja bażi jew valur fil-mira ma kienu ġew stabbiliti għal dawn il-proġetti, u dan xekkel il-monitoraġġ tar-rata ta’ implimentazzjoni, imwettaq mill-Kummissjoni, kif ukoll il-valutazzjoni tal-punt sa fejn l-objettivi kienu ntlaħqu.
57Il-biċċa l-kbira mill-proġetti awditjati kisbu xi wħud mill-outputs ippjanati jew l-outputs ippjanati kollha. Madankollu, aħna ma stajniex nivvalutaw l-eżiti u s-sostenibbiltà tar-riżultati għal kważi nofs il-proġetti awditjati minħabba d-dewmien fl-implimentazzjoni tal-attivitajiet tal-programmi. Kien probabbli li l-eżiti mistennija kienu se jinkisbu f’terz biss tal-proġetti awditjati x’aktarx kienu se jinkisbu l-eżiti mistennija.
58Skont rapporti dwar il-MOR tal-Kummissjoni, l-effettività tal-proġetti mmaniġġjati direttament fis-setturi vvalutati kienet ġeneralment “tajba”, iżda l-valutazzjoni tas-sostenibbiltà medja kienet “problematika”.
L-appoġġ li ngħata lill-Istat ta’ Rakhine ma kisibx riżultati sinifikanti
59Minn impenn finanzjarju totali ta’ EUR 380.7 miljun favur il-pajjiż (ara l-paragrafu 31), EUR 38.8 miljun ġew allokati għall-Istat ta’ Rakhine. L-allokazzjoni finanzjarja mmirata għal dan l-Istat hija bbażata fuq it-tagħlimiet meħuda minn għadd żgħir ta’ sħab inkarigati mill-implimentazzjoni. Ir-riżultati mistennija għall-biċċa l-kbira mill-proġetti fil-kampjun tagħna li ġew implimentati fl-Istat ta’ Rakhine inkisbu parzjalment biss (ara l-Kaxxa 8).
Kaxxa 8
Proġett relatat mas-Sigurtà tal-Ikel fl-Istat ta’ Rakhine
Il-LIFT ta appoġġ lil proġett relatat mas-sigurtà tal-ikel fl-Istat ta’ Rakhine. Ir-riżultati li nkisbu meta nbeda fl-2013 ma kinux tajbin wisq għaż-żewġ raġunijiet li ġejjin
- sfidi esterni, bħal attakki vjolenti fuq NGOs internazzjonali, u
- defiċjenzi interni, bħal kapaċità baxxa ta’ implimentazzjoni fuq il-post u kooperazzjoni dgħajfa bejn is-sħab inkarigati mill-implimentazzjoni.
Minkejja li l-maniġment tal-LIFT kien jaf bis-sitwazzjoni, wara li l-proġett skada, huwa kkuntratta l-istess sħab biex ikomplu jimplimentaw il-proġett, u ma nediex sejħa għal proposti.
L-objettiv tal-JPF li għadu kemm ġie stabbilit huwa li jipprovdi appoġġ lill-proċess ta’ paċi nazzjonali u inklużiv fil-Myanmar/Burma (ara l-Anness II). Madankollu, l-akbar komponent tal-Fond mhuwiex immirat lejn Rakhine. Din hija opportunità mitlufa għal dan ir-reġjun tassew vulnerabbli.
Konklużjonjiet u rakkomandazzjonijiet
61Matul il-perjodu 2012-2016, il-Myanmar/Burma kien għaddej minn tranżizzjoni politika u ekonomika. Fatturi bħal diżastri naturali, kunflitti etniċi u l-kapaċità limitata ta’ atturi u awtoritajiet lokali kienu qed ixekklu l-isforzi għall-iżvilupp.
62L-awditu eżamina jekk l-appoġġ li l-UE tat lill-Myanmar/Burma kienx effettiv. Aħna kkonkludejna li l-appoġġ għall-iżvilupp li l-UE tat lill-pajjiż kien parzjalment effettiv. F’kuntest diffiċli, l-UE kellha rwol importanti u ewlieni fl-għoti ta’ appoġġ għal prijoritajiet għall-iżvilupp, u allokat finanzjament sinifikanti lill-pajjiż. Madankollu, aħna rrappurtajna xi nuqqasijiet fil-valutazzjoni tal-ħtiġijiet li saret mill-Kummissjoni, u fl-implimentazzjoni tal-assistenza li ngħatat mill-UE.
63Id-deċiżjoni tal-Kummissjoni li tiffoka fuq erba’ setturi ma kinitx konformi mal-Aġenda għall-Bidla tal-2011 u mal-linji gwida operattivi proprji tal-Kummissjoni, u ma ħaditx inkunsiderazzjoni l-kapaċità tad-Delegazzjoni tal-UE li tlaħħaq mal-volum kbir ta’ xogħol. Ma saret l-ebda valutazzjoni tal-prijoritajiet ġeografiċi fi ħdan il-pajjiż. Il-ġenerazzjoni tad-dħul domestiku ma tqisitx meta kienu qed jiġu ddeterminati l-prijoritajiet għall-iżvilupp (ara l-paragrafi 22 sa 24).
Rakkomandazzjoni 1 – Il-ħtieġa li l-appoġġ ikun immirat biex jiżdied l-impatt
Jenħtieġ li l-Kummissjoni u s-SEAE:
- jiffukaw fuq mhux aktar minn tliet oqsma speċifiċi ta’ intervent, jew jiġġustifikaw setturi ulterjuri;
- jistimulaw il-mobilizzazzjoni tad-dħul domestiku;
- jikklassifikaw il-prijoritajiet skont il-ħtiġijiet reġjonali l-aktar urġenti u l-livell ta’ appoġġ ipprovdut minn donaturi oħra fuq bażi ġeografika għall-pajjiż.
Skeda ta’ żmien: sal-perjodu ta’ programmazzjoni li jmiss, li jibda fl-2020.
64Il-programmazzjoni konġunta tal-UE u l-Istati Membri individwali taħt l-Istrateġija ta’ Programmazzjoni Konġunta 2014-2016 kienet pass pożittiv (ara l-paragrafu 26). Il-koordinazzjoni bejn id-Direttorati Ġenerali li jimmaniġġjaw l-iżvilupp u l-assistenza umanitarja f’żoni ta’ kriżi fit-tul ma ħadmitx sew. Il-Kummissjoni ma fasslitx pjan ta’ implimentazzjoni konġunta għal-LRRD (ara l-paragrafu 27).
Rakkomandazzjoni 2 – Koordinazzjoni tal-interventi
Jenħtieġ li l-Kummissjoni:
- tiżviluppa pjan ta’ implimentazzjoni mad-DĠ ECHO li joħloq kollegament bejn l-għajnuna, ir-riabilitazzjoni u l-iżvilupp partikolarment f’żoni ta’ kriżi fit-tul;
- tinkludi l-għajnuna umanitarja fid-dokument il-ġdid ta’ programmazzjoni imfassal mal-Istati Membri tal-UE (Strateġija ta’ Programmazzjoni Konġunta).
Skeda ta’ żmien: sa tmiem l-2018.
65Il-ġestjoni tal-għajnuna għall-żvilupp li ngħatat mill-UE kienet ġeneralment sodisfaċenti. L-azzjonijiet indirizzaw il-prijoritajiet tal-pajjiż fil-qasam tal-iżvilupp, iżda kien hemm dewmien. L-għażla tal-Kummissjoni rigward il-modalità tal-għajnuna kienet raġonevoli. Madankollu, il-ġustifikazzjoni ta’ kif ġie ddeterminat l-ammont ta’ finanzjament li kellu jiġi allokat għal kull settur u għal kull azzjoni ma ġietx iddokumentata. L-implimentazzjoni ddewmet ukoll, peress li l-PAA 2016 qatt ma ġie adottat (ara l-paragrafi 30 sa 33).
Rakkomandazzjoni 3 – Implimentazzjoni tal-azzjonijiet
Jenħtieġ li l-Kummissjoni:
- tiġġustifika u tiddokumenta l-allokazzjoni ta’ finanzjament għal kull settur fokali u għal kull azzjoni.
Skeda ta’ żmien: sal-fażi ta’ programmazzjoni tal-MIP il-ġdid (2019/2020).
66L-implimentazzjoni tal-programmi tal-Fondi Fiduċjarji mmaniġġjati min-Nazzjonijiet Uniti kienet affettwata minn dewmien u minn assorbiment bil-mod tal-baġit għall-attivitajiet tal-programmi (il-paragrafu 34). Il-Fondi Fiduċjarji mmaniġġjati min-Nazzjonijiet Uniti akkumulaw bilanċi kbar ta’ flus iżda l-Kummissjoni ma żguratx li l-imgħax gwadanjat fuq il-kontribuzzjoni mill-UE jinżamm għall-azzjonijiet li kienu qed jiġu ffinanzjati (ara l-paragrafu 36). Id-dispożizzjonijiet relatati mal-kontroll tal-ispejjeż fil-kuntratti bejn l-UE u n-Nazzjonijiet Uniti kellhom impatt limitat (ara l-paragrafi 37 sa 40). Il-Kummissjoni rreaġiet bil-mod għar-rapporti tal-missjonijiet ta’ verifikazzjoni (ara l-paragrafu 49).
Rakkomandazzjoni 4 – Kosteffettività tal-azzjonijiet b’multidonaturi
Jenħtieġ li l-Kummissjoni:
- tagħmel ħilitha biex tilħaq qbil ma’ donaturi oħra dwar il-livell xieraq ta’ spejjeż indiretti.
Skeda ta’ żmien: sa tmiem l-2018.
67Matul il-perjodu 2012-2016, il-Kummissjoni użat id-dipożizzjonijiet relatati mad-dikjarazzjoni tal-kriżi biex tagħmel kuntratti direttament mas-sħab inkarigati mill-implimentazzjoni. It-tneħħija ġenerali tar-rekwiżit għal sejħiet għal proposti naqqset it-trasparenza tal-proċedura tal-għażla u rriżultat fir-riskju li jkollha effett negattiv fuq il-kosteffettività tal-proġetti (ara l-paragrafi 41 sa 43).
68Sar titjib fil-monitoraġġ matul is-snin, iżda kien hemm xi dgħufijiet. Ma kienx hemm indikaturi suffiċjenti tal-output u tal-eżitu għall-valutazzjoni tal-azzjonijiet. Il-Kummissjoni ma żguratx li l-kumitati ta’ monitoraġġ tal-prestazzjoni ġew stabbiliti skont id-Deċiżjonijiet tal-Kummissjoni (ara l-paragrafu 48). B’mod ġenerali, l-appoġġ tal-UE ma kienx viżibbli biżżejjed (ara l-paragrafu 50).
Rakkomandazzjoni 5 – Monitoraġġ tal-azzjonijiet
Jenħtieġ li l-Kummissjoni:
- tikkonsolida l-informazzjoni disponibbli sabiex l-outputs u l-eżiti stabbiliti fil-livell tal-PAA jkunu jistgħu jiġu vvalutati aħjar;
Skeda ta’ żmien: sal-2019.
- tinsisti li jkunu applikati d-dispożizzjonijiet dwar il-viżibbiltà tal-azzjonijiet tal-UE.
Skeda ta’ żmien: sa tmiem l-2018.
69Il-livell tal-kisba ta’ riżultati kien ivarja b’mod sinifikanti skont il-proġetti li ġew awditjati. Nofs biss tal-proġetti awditjati wasslu l-outputs ippjanati, prinċipalment minħabba dewmien fl-implimentazzjoni (ara l-paragrafu 54). Il-proġetti fil-kampjun tal-Qorti li ġew implimentati fl-Istat ta’ Rakhine ma kisbux riżultati sinifikanti (ara l-paragrafu 59). Il-fatt li l-Fond Konġunt għall-Paċi li għadu kemm ġie stabbilit mhuwiex immirat lejn ir-reġjun tassew vulnerabbli tal-Istat ta’ Rakhine, huwa opportunità mitlufa (ara l-paragrafu 60).
Rakkomandazzjoni 6 – Kisba ta’ riżultati
Jenħtieġ li l-Kummissjoni:
- ittejjeb il-mod kif timmaniġġja l-proġetti biex jiġi evitat dewmien fl-implimentazzjoni tagħhom;
- terġa’ tesplora l-possibbiltà li l-isfera ta’ kompetenza tal-Fond Konġunt għall-Paċi tkun tinkludi l-Istat ta’ Rakhine.
Skeda ta’ żmien: sa tmiem l-2018.
Dan ir-Rapport ġie adottat mill-Awla III, immexxija mis-Sur Karel PINXTEN, Membru tal-Qorti tal-Awdituri, fil-Lussemburgu, fil-laqgħa tagħha tat-12 ta’ Diċembru 2017.
Għall-Qorti tal-Awdituri
Klaus-Heiner LEHNE
President
Annessi
Anness I
Mappa tal-Myanmar/Burma
Anness II
Fondi Fiduċjarji mmaniġġjati min-Nazzjonijiet Uniti
Il-Fond Fiduċjarju għas-Sigurtà tal-Għajxien u tal-Ikel (LIFT) huwa fond fiduċjarju multidonatur li għandu l-objettivi li jgħin lill-persuni fqar u żvantaġġati tal-Myanmar/Burma joħorġu mill-faqar, u li jassistihom biex jegħlbu l-malnutrizzjoni u jtejbu l-għajxien tagħhom. Il-Fond huwa mmaniġġjat mill-Uffiċċju tas-Servizzi tal-Proġetti tan-Nazzjonijiet Uniti (UNOPS).
Il-Fond għat-Tliet Għanijiet ta' Żvilupp tal-Millennju (3MDG) għandu l-objettivi li jnaqqas il-piż tat-tliet mardiet li jittieħdu (l-HIV/AIDS, it-tuberkulożi u l-malarja) u li jtejjeb is-saħħa tal-ommijiet u tat-tfal fil-Myanmar/Burma. Fl-2012, il-Fond għat-Tliet Mardiet (3DF) waqa’ taħt ir-responsabbiltà tal-Fond 3MDG, meta l-attivitajiet tiegħu ntemmu. Il-Fond 3MDG huwa mmaniġġjat mill-UNOPS.
Il-Programm għal Edukazzjoni Bażika ta’ Kwalità (QBEP) twaqqaf bl-objettiv li jiżdied l-aċċess ekwu għall-edukazzjoni bażika u l-iżvilupp bikri ta’ tfal żgħar, speċjalment f’komunitajiet żvantaġġati u li ma jintlaħqux faċilment Huwa mmaniġġjat mill-Fond tan-Nazzjonijiet Uniti għat-Tfal (UNICEF).
Il-Fond Konġunt għall-Paċi (JPF) huwa intenzjonat li jappoġġa proċess ta’ paċi nazzjonali u inklużiv fil-Myanmar/Burma. Huwa ġie stabbilit fl-2015 u huwa mmaniġġjat mill-UNOPS.
| (USD miljun) | ||||||
|---|---|---|---|---|---|---|
| Settur ta’ intervent | Fond | Perjodu | Kontribuzzjonijiet mill-Fondi tad-Donaturi | Kontribuzzjonijiet mill-UE impenjati | % tal-impenji tal-UE mqabbel mal-kontribuzzjonijiet totali tad-donaturi | Fi |
| Sigurtà tal-Ikel/ Għajxien/ Żvilupp Rurali |
LIFT | 2009-2017 | 439.7 | 130.2 | 30% | 31.1.2017 |
| Saħħa | 3MDG | 2012-2017 | 279.6 | 31.5 | 11% | 1.11.2016 |
| Edukazzjoni | QBEP | 2012-2017 | 76.6 | 28.5 | 37% | 31.12.2016 |
| Bini tal-paċi | JPF | 2015-2017 | 105.2 | 20.8 | 20% | 28.2.2017 |
Sors: Il-QEA.
Anness III
Kampjun ta’ proġetti awditjati
| (miljun) | ||||||
|---|---|---|---|---|---|---|
| Nru tal-Kuntratt | Settur ta’ intervent | Kuntrattur | Ikkuntrattati | Imħallsa | Data tal-bidu | Data ta’ tmiem l-operazzjonijiet |
| Fond Fiduċjarju għas-Sigurtà tal-Għajxien u tal-Ikel (LIFT) | UNOPS | EUR 81.8 | EUR 47.5 | 1.1.2012 | 31.12.2018 | |
| 1 | Proġett relatat man-negozju agrikolu | Kumpanija Privata | USD 18.1 | USD 11 | 18.12.2015 | 31.12.2018 |
| 2 | Proġett relatat mas-Sigurtà tal-Ikel | NGO | USD 22.1 | USD 15 | 1.3.2013 | 31.12.2015 |
| 3 | Proġett relatat mas-Sigurtà tal-Ikel | NGO | USD 10.5 | USD 4.3 | 1.1.2016 | 31.12.2018 |
| 4 | Proġett relatat mal-mikrofinanzjament | Aġenzija tan-Nazzjonijiet Uniti | USD 7.0 | USD 6.7 | 1.11.2012 | 31.12.2018 |
| 5 | Proġett relatat mal-Aċċess għas-Suq | NGO | USD 4.0 | USD 3.4 | 11.6.2014 | 10.6.2017 |
| 6 | Proġett relatat mas-Sigurtà tal-Ikel | NGO | USD 2.1 | USD 0.8 | 10.6.2016 | 31.5.2019 |
| Fond għat-Tliet Għanijiet ta' Żvilupp tal-Millennju (3MDG) | UNOPS | EUR 27.5 | EUR 22.4 | 1.1.2013 | 31.12.2017 | |
| 7 | Proġett relatat mat-tuberkulożi | UNOPS | USD 13.0 | USD 4.5 | 1.10.2014 | 31.12.2017 |
| 8 | Saħħa tal-Ommijiet u tat-Tfal | NGO | USD 6.8 | USD 5.6 | 1.7.2014 | 31.12.2017 |
| Programm għal Edukazzjoni Bażika ta’ Kwalità (QBEP) | UNICEF | EUR 22.0 | EUR 21.7 | 1.1.2013 | 30.6.2017 | |
| 9 | Kura Bikrija tat-Tfal | Assoċjazzjoni Klerikali | USD 4.0 | USD 3.1 | 23.10.2014 | 30.6.2016 |
| 10 | Rispons għall-Edukazzjoni Bikrija | NGO | USD 2.4 | USD 1.3 | 15.10.2013 | 20.6.2017 |
| (EUR miljun) | ||||||
| 11 | Governanza | Aġenzija tal-Istati Membri | 20.0 | 9.4 | 1.8.2015 | 31.7.2019 |
| 12 | Governanza | Kumpanija privata | 12.2 | 2.4 | 1.10.2015 | 30.9.2018 |
| 13 | Għajnuna lil Persuni Spostjati | NGO | 8.0 | 5.5 | 10.7.2012 | 9.4.2017 |
| 14 | Bini tal-paċi | Aġenzija tan-Nazzjonijiet Uniti | 7.0 | 3.8 | 15.3.2015 | 14.3.2019 |
| 15 | Bini tal-paċi | NGO | 7.0 | 4.4 | 1.2.2015 | 31.7.2018 |
| 16 | Għajnuna lil Persuni Spostjati | NGO | 5.6 | 5.0 | 29.12.2012 | 14.8.2017 |
| 17 | Bini tal-paċi | NGO | 5.0 | 2.8 | 1.3.2015 | 31.8.2018 |
| 18 | Bini tal-paċi | NGO | 5.0 | 1.0 | 1.10.2016 | 30.9.2020 |
| 19 | Għajnuna lil Persuni Spostjati | NGO | 3.2 | 2.9 | 1.2.2013 | 30.4.2017 |
| 20 | Bini tal-paċi | Assoċjazzjoni Klerikali | 2.0 | 1.6 | 1.1.2015 | 31.12.2017 |
Anness IV
Valutazzjoni tal-proġetti individwali - stampa ġenerali
| Nru | Magħżul tajjeb | Rilevanti | QAFAS LOĠIKU | Immonitorjat tajjeb | Skont l-iskeda/ assorbiment tal-baġit |
Outputs imwassla | X’aktarx li jikseb l-eżiti mistennija | Sostenibbiltà tal-azzjoni/strateġija ta' ħruġ | Viżibbiltà tal-UE | ||
|---|---|---|---|---|---|---|---|---|---|---|---|
| Objettivi SMART | Indikaturi RACER | Linja bażi/ valuri fil-mira |
|||||||||
| 1 | Parzjalment | Iva | Parzjalment | Parzjalment | Le | Iva | Iva | Iva | Kmieni wisq | Kmieni wisq | Parzjalment |
| 2 | Iva | Iva | Parzjalment | Parzjalment | Parzjalment | Le | Le | Le | Le | Parzjalment | Le |
| 3 | Parzjalment | Iva | Iva | Iva | Iva | Parzjalment | Parzjalment | Parzjalment | Kmieni wisq | Kmieni wisq | Parzjalment |
| 4 | Le | Iva | Iva | Iva | Iva | Iva | Iva | Iva | Parzjalment | Parzjalment | Le |
| 5 | Iva | Iva | Iva | Iva | Iva | Le | Le | Le | Le | Parzjalment | Le |
| 6 | Iva | Iva | Le | Parzjalment | Parzjalment | Parzjalment | Parzjalment | Parzjalment | Kmieni wisq | Kmieni wisq | Parzjalment |
| 7 | Le | Iva | Iva | Iva | Iva | Parzjalment | Le | Parzjalment | Kmieni wisq | Kmieni wisq | Mhux ivvalutata |
| 8 | Iva | Iva | Iva | Iva | Iva | Iva | Parzjalment | Iva | Iva | Parzjalment | Mhux ivvalutata |
| 9 | Parzjalment | Parzjalment | Iva | Iva | Iva | Iva | Iva | Iva | Iva | Iva | Mhux ivvalutata |
| 10 | Parzjalment | Parzjalment | Iva | Iva | Iva | Iva | Iva | Iva | Iva | Kmieni wisq | Le |
| 11 | Iva | Iva | Iva | Le | Le | Le | Parzjalment | Parzjalment | Kmieni wisq | Kmieni wisq | Mhux ivvalutata |
| 12 | Iva | Parzjalment | Iva | Le | Le | Le | Iva | Parzjalment | Kmieni wisq | Kmieni wisq | Mhux ivvalutata |
| 13 | Iva | Iva | Iva | Parzjalment | Le | Parzjalment | Le | Parzjalment | Parzjalment | Le | Mhux ivvalutata |
| 14 | Parzjalment | Parzjalment | Iva | Parzjalment | Parzjalment | Iva | Parzjalment | Parzjalment | Le | Parzjalment | Mhux ivvalutata |
| 15 | Iva | Iva | Iva | Iva | Iva | Parzjalment | Parzjalment | Iva | Kmieni wisq | Kmieni wisq | Iva |
| 16 | Parzjalment | Iva | Iva | Parzjalment | Le | Iva | Le | Parzjalment | Parzjalment | Iva | Mhux ivvalutata |
| 17 | Iva | Iva | Iva | Parzjalment | Parzjalment | Parzjalment | Parzjalment | Iva | Iva | Iva | Parzjalment |
| 18 | Parzjalment | Iva | Iva | Parzjalment | M/A | Kmieni wisq | Le | Kmieni wisq | Kmieni wisq | Kmieni wisq | Kmieni wisq |
| 19 | Parzjalment | Parzjalment | Iva | Iva | Le | Iva | Parzjalment | Iva | Parzjalment | Parzjalment | Mhux ivvalutata |
| 20 | Iva | Iva | Iva | Iva | Parzjalment | Iva | Parzjalment | Iva | Kmieni wisq | Kmieni wisq | Iva |
Akronimi u abbrevjazzjonijiet
CDD: Żvilupp Immexxi mill-Komunitajiet
DCI: Strument tal-Kooperazzjoni għall-Iżvilupp
DĠ DEVCO: Direttorat Ġenerali għall-Kooperazzjoni Internazzjonali u l-Iżvilupp
DĠ ECHO: Direttorat Ġenerali għall-Protezzjoni Ċivili u l-Operazzjonijiet tal-Għajnuna Umanitarja Ewropej
EIDHR: Strument Ewropew għad-Demokrazija u għad-Drittijiet tal-Bniedem
ICI+: Strument għall-Kooperazzjoni ma' Pajjiżi Industrijalizzati
IcSP: Strument li jikkontribwixxi għall-Istabbiltà u l-Paċi (dak li qabel kien l-Istrument għall-Istabbiltà (IfS))
IDP: Persuna Spostata f'Pajjiżha
JPF: Fond Konġunt għall-Paċi
LIFT: Fond Fiduċjarju għas-Sigurtà tal-Għajxien u tal-Ikel
LRRD: Kollegament bejn l-Għajnuna, ir-Riabilitazzjoni u l-Iżvilupp
MIP: Programm Indikattiv Pluriennali
MOR: Monitoraġġ Orjentat lejn ir-Riżultati
NGO: Organizzazzjoni Nongovernattiva
PAA: Programm ta' Azzjoni Annwali
QBEP: Programm għal Edukazzjoni Bażika ta’ Kwalità
RACER: Rilevanti, Aċċettati, Kredibbli, Faċli u Robusti
SEAE: Servizz Ewropew għall-Azzjoni Esterna
SMART: Speċifiċi, Li jistgħu jitkejlu, Li jistgħu jintlaħqu, Rilevanti, Marbuta mal-ħin
SWITCH-Asia: Programm iffinanzjat mill-UE biex jgħin lill-konsumaturi u lin-negozji jibdlu għal mezzi ta’ konsum u produzzjoni sostenibbli
UNICEF: Fond tan-Nazzjonijiet Uniti għat-Tfal
UNOPS: Uffiċċju tas-Servizzi tal-Proġetti tan-Nazzjonijiet Uniti
3DF: Fond għat-Tliet Mardiet
3MDG: Fond għat-Tliet Għanijiet ta' Żvilupp tal-Millennju
Noti finali
1 Data tal-Bank Dinji, 2012-2016.
2 L-istrumenti ta’ finanzjament jistgħu jkunu bbażati fil-pajjiż (bilaterali), reġjonali jew ikollhom fokus tematiku speċifiku.
3 Taħt ġestjoni diretta, il-Kummissjoni Ewropea hija inkarigata mill-kompiti kollha relatati mal-mplimentazzjoni tal-baġit tal-UE, li jitwettqu direttament mid-dipartimenti tagħha fis-sede tagħha jew fid-Delegazzjonijiet tal-UE. Taħt ġestjoni indiretta, il-Kummissjoni tafda l-kompiti ta’ implimentazzjoni tal-baġit lil organizzazzjonijiet internazzjonali, l-aġenziji tal-iżvilupp tal-Istati Membri tal-UE, pajjiżi sħab jew korpi oħra.
4 Minn EUR 438 miljun għall-kuntratti kollha (Sors: Ir-Rapport 2016 dwar il-Ġestjoni tal-Assistenza Esterna).
5 Il-Ministeru tal-Ippjanar u l-Finanzi, id-Dipartiment tar-Relazzjonijiet Ekonomiċi Esterni, https://mohinga.info/en/dashboard/location/.
6 Il-Proġetti 1 sa 10.
7 Il-Proġett 11.
8 Il-Proġetti 12 sa 20.
9 L-awditu tal-aġenziji tan-Nazzjonijiet Uniti li twettaq mill-Kummissjoni.
10 L-objettiv primarju tal-Aġenda għall-Bidla, li ġiet adottata fl-2011, huwa li jkun hemm żieda sinifikanti fl-impatt u fl-effettività tal-politika tal-UE għall-iżvilupp. Ara https://ec.europa.eu/europeaid/policies/european-development-policy/agenda-change_en.
11 Fil-31 ta’ Jannar 2017 għal-LIFT, fl-1 ta’ Novembru 2016 għat-3MDG u fit-28 ta’ Frar 2017 għall-JPF. Id-dati jvarjaw minħabba ċ-ċikli differenti ta’ rappurtar.
12 Ara hawn fuq.
13 L-UNICEF ma setax jipprovdi rapporti ċċertifikati tal-flussi tal-flus għall-QBEP.
14 L-Artikolu 190(2) of tar-Regolament Delegat tal-Kummissjoni (UE) Nru 1268/2012 tad-29 ta’ Ottubru 2012 dwar ir-regoli tal-applikazzjoni tar-Regolament (UE, Euratom) Nru 966/2012 tal-Parlament Ewropew u tal-Kunsill dwar ir-regoli finanzjarji applikabbli għall-baġit ġenerali tal-Unjoni (ĠU L 362, 31.12.2012, p. 1).
15 Kif iddefinit fl-Artikolu 128 tar-Regolament Finanzjarju Nru 966/2012, l-Artikolu 190(2) tar-Regolament ta’ Delega tal-Kummissjoni Nru 1268/2012 tad-29 ta’ Ottubru 2012 dwar l-għotjiet, l-Artikolu 190 tar-Regolament Finanzjarju Nru 966/2012, l-Artikolu 266(1)(a) tar-Regolament tal-Kummissjoni Nru 1268/2012 dwar is-servizzi, l-Artikolu 190 tar-Regolament Finanzjarju Nru 966/2012, l-Artikolu 268(1)(a) tar-Regolament tal-Kummissjoni Nru 1268/2012 dwar il-provvisti, l-Artikolu 190 tar-Regolament Finanzjarju Nru 966/2012, l-Artikolu 270(1)(a) tar-Regolament tal-Kummissjoni Nru 1268/2012 dwar ix-xogħlijiet.
16 Għall-akbar proġett taħt dan il-komponent, l-analiżi inizjali li twettqet fl-2013 indikat li din l-azzjoni kienet se tkun tirrikjedi baġit ta’ USD 0.7 miljun, filwaqt li ttieħed inkunsiderazzjoni l-fatt li l-Fond Globali kien diġà qed jagħtiha appoġġ ta’ bejn wieħed u ieħor USD 12.7 miljun. Minkejja dan, fl-2014 l-azzjoni ngħatat USD 11.4 miljun, ċifra li telgħet għal USD 13-il miljun fl-2015, iżda ma kienx hemm spjegazzjoni tar-raġuni għalfejn il-ħtiġijiet kienu żdiedu b’mod daqstant sinifikanti.
| Avveniment | Data |
|---|---|
| Adozzjoni tal-APM / Bidu tal-awditu | 22.11.2016 |
| L-abbozz tar-rapport jintbagħat uffiċjalment lill-Kummissjoni (jew lil parti awditjata oħra) | 11.10.2017 |
| Adozzjoni tar-rapport finali wara l-proċedura kontradittorja | 12.12.2017 |
| Ir-risposti uffiċjali tal-Kummissjoni u tas-SEAE riċevuti bil-lingwi kollha | 20.12.2017 |
Tim tal-awditjar
Ir-rapporti speċjali tal-QEA jippreżentaw ir-riżultati tal-awditi tal-prestazzjoni u tal-konformità tagħha f'dak li jirrigwarda oqsma baġitarji jew suġġetti ta' ġestjoni speċifiċi. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta' introjtu jew ta' nfiq involut, l-iżviluppi li jkunu għad iridu jseħħu u l-interess politiku u pubbliku.
Dan l-awditu tal-prestazzjoni twettaq mill-Awla III tal-QEA, li hija responsabbli għall-awditjar tal-infiq fuq azzjoni esterna, sigurtà u ġustizzja. Fit-tħejjija tar-rapport, il-Membru Relatur, is-Sur Karel Pinxten, Dekan tal-Awla, ingħata appoġġ minn Gerard Madden, il-Kap tal-Kabinett tiegħu, Mila Strahilova, Attaché u Kap tal-Kompitu, Beatrix Lesiewicz, Maniġer Prinċipali, Roberto Ruiz Ruiz u Francesco Zoia Bolzonello, Awdituri. Cathryn Lindsay ipprovdiet appoġġ lingwistiku.
Kuntatt
IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG
Tel. +352 4398-1
Mistoqsijiet: eca.europa.eu/mt/Pages/ContactForm.aspx
Sit web: eca.europa.eu
Twitter: @EUAuditors
Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).
Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2018
| ISBN 978-92-872-8943-8 | ISSN 1977-5741 | doi:10.2865/985246 | QJ-AB-17-025-MT-N | |
| HTML | ISBN 978-92-872-8979-7 | ISSN 1977-5741 | doi:10.2865/44539 | QJ-AB-17-025-MT-Q |
© L-Unjoni Ewropea, 2018
Għal kull użu jew riproduzzjoni ta’ ritratti jew materjal ieħor li ma jaqax taħt id-drittijiet tal-awtur tal-Unjoni Ewropea, irid jintalab il-permess direttament mingħand id-detenturi tad-drittijiet tal-awtur.
KIF TIKKUNTATTJA LILL-UE
Personalment
Madwar l-Unjoni Ewropea kollha hemm mijiet ta’ ċentri ta’ informazzjoni tal-Europe Direct. Tista’ ssib l-indirizz tal-eqreb ċentru għalik f’dan is-sit: https://europa.eu/european-union/contact_mt
Bit-telefown jew bil-posta elettronika
Europe Direct huwa servizz li jwieġeb il-mistoqsijiet tiegħek dwar l-Unjoni Ewropea. Tista’ tikkuntattja dan is-servizz:
- bit-telefown bla ħlas: 00 800 6 7 8 9 10 11 (ċerti operaturi jafu jimponu ħlas għal dawn it-telefonati),
- fuq dan in-numru standard: +32 22999696, jew
- bil-posta elettronika permezz: https://europa.eu/european-union/contact_mt
KIF ISSIB TAGĦRIF DWAR L-UE
Onlajn
L-informazzjoni dwar l-Unjoni Ewropea bil-lingwi uffiċjali kollha tal-UE hija disponibbli fuq is-sit web Europa fuq: http://europa.eu
Pubblikazzjonijiet tal-UE
Tista’ tniżżel mill-internet jew tordna l-pubblikazzjonijiet tal-UE, li xi wħud minnhom huma bla ħlas u xi oħrajn bil-ħlas, mill-EU Bookshop fl-indirizz li ġej: https://publications.europa.eu/mt/web/general-publications/publications. Kopji multipli ta’ pubblikazzjonijiet bla ħlas tista’ tiksibhom billi tikkuntattja lil Europe Direct jew liċ-ċentru tal-informazzjoni lokali tiegħek (ara http://europa.eu/contact).
Il-liġi tal-UE u dokumenti relatati
Għal aċċess għall-informazzjoni legali tal-UE, inkluż il-liġijiet kollha tal-UE mill-1951 ’l hawn, fil-verżjonijiet lingwistiċi uffiċjali kollha, żur is-sit EUR-Lex hawnhekk: http://eur-lex.europa.eu
Dejta Miftuħa mill-UE
Il-portal tad-Dejta Miftuħa mill-UE (http://data.europa.eu/euodp) jipprovdi aċċess għal settijiet tad-dejta mill-UE. Id-dejta tista’ titniżżel mill-internet u tintuża mill-ġdid bla ħlas, kemm għal skopijiet kummerċjali kif ukoll mhux kummerċjali.