Awditu tal-Proċedura ta' Żbilanċ Makroekonomiku (MIP)
Dwar ir-rapport Aħna eżaminajna l-implimentazzjoni, li saret mill-Kummissjoni Ewropea, tal-Proċedura ta’ Żbilanċ Makroekonomiku li għandha l-għan li tidentifika, tipprevieni u tindirizza żbilanċi makroekonomiċi li jistgħu jaffettwaw b’mod negattiv l-istabbiltà ekonomika f’pajjiż partikolari tal-UE, fiż-żona tal-euro, jew fl-UE kollha kemm hi. Aħna sibna li, għalkemm b’mod ġenerali l-MIP hija mfassla tajjeb, il-Kummissjoni mhijiex qed timplimentaha b’mod li jkun jiżgura l-prevenzjoni u l-korrezzjoni effettivi tal-iżbilanċi. Il-klassifikazzjoni tal-Istati Membri li għandhom żbilanċi mhijiex trasparenti, l-analiżi approfondita li twettqet mill-Kummissjoni, minkejja l-istandard tajjeb tagħha, saret inqas viżibbli, u hemm nuqqas ta’ sensibilizzazzjoni pubblika rigward il-proċedura u l-implikazzjonijiet tagħha. Għalhekk, aħna nagħmlu għadd ta’ rakkomandazzjonijiet lill-Kummissjoni bil-għan li din ittejjeb sostanzjalment ċerti aspetti tal-ġestjoni tagħha u li tagħti prominenza akbar lill-MIP.
Sommarju eżekuttiv
Dwar il-Proċedura ta' Żbilanċ Makroekonomiku
IIl-Proċedura ta' Żbilanċ Makroekonomiku (MIP) tfasslet biex tindirizza l-iżbilanċi makroekonomiċi fl-UE, bħala rispons għan-nuqqas ta’ għodod ta’ politika għall-prevenzjoni tal-akkumulazzjoni ta’ dawn l-iżbilanċi qabel il-kriżi tal-2008.
IIIl-MIP topera b’ċiklu annwali. Hija tibda bil-pubblikazzjoni, mill-Kummissjoni, ta’ valutazzjoni ekonomika u finanzjarja, magħrufa bħala r-Rapport dwar il-Mekkaniżmu ta' Twissija (AMR), li jidentifika l-Istati Membri li jinsabu f’riskju ta’ żbilanċi li jkunu jirrikjedu analiżi ulterjuri fil-forma ta’ analiżi fil-fond (IDR). L-iskop tal-IDRs huwa li tintlaħaq konklużjoni dwar jekk jeżistux żbilanċi fl-Istati Membri magħżula, u jekk jenħtieġx li dawn jitqiesu bħala eċċessivi. Fl-aħħar nett, fuq il-bażi tal-analiżi IDR, jenħtieġ li l-Kummissjoni tipproponi rakkomandazzjonijiet speċifiċi għall-pajjiż (CSRs), li eventwalment jiġu adottati mill-Kunsill u jinħarġu għall-Istati Membri biex dawn jindirizzaw l-iżbilanċi tagħhom.
IIIJekk l-iżbilanċi jitqiesu bħala “eċċessivi”, ir-Regolament dwar il-MIP ippreveda li l-Kummissjoni tipproponi li l-Kunsill jattiva “proċedura ta’ żbilanċ eċċessiv” (EIP). Dan huwa mekkaniżmu ta’ sorveljanza mtejjeb li jinkludi l-possibbiltà ta’ sanzjonijiet għall-Istati Membri taż-żona tal-euro.
X’awditjajna
IVIl-mistoqsija prinċipali tal-awditjar kienet: “Il-MIP għandha bażi soda u hija implimentata b’mod adegwat?” Aħna vvalutajna l-effettività tal-implimentazzjoni, mill-Kummissjoni, tal-MIP matul il-perjodu mill-2012 sal-2017.
X'sibna
VGħalkemm, b’mod ġenerali, il-MIP hija mfassla tajjeb, il-Kummissjoni mhijiex qed timplimentaha b’mod li tiżgura l-prevenzjoni u l-korrezzjoni effettivi tal-iżbilanċi.
VIIl-Kummissjoni tuża s-CSRs rilevanti għall-MIP bħala għodda ewlenija biex tindirizza l-iżbilanċi makroekonomiċi. Madankollu, il-livell ta’ implimentazzjoni kien baxx. Għalkemm l-implimentazzjoni tagħhom hija r-responsabbiltà tal-Istati Membri, hemm ukoll bosta dgħufijiet fil-mod kif dawn jitfasslu mill-Kummissjoni. Ma teżisti l-ebda rabta sistematika bejn l-iżbilanċi speċifiċi li jiġu identifikati fl-IDR u r-rakkomandazzjonijiet li jiġu proposti. F’xi każijiet, is-CSRs jitqiesu bħala li huma rilevanti għall-MIP, għalkemm dawn huma marbuta biss remotament mal-iżbilanċi makroekonomiċi, jekk xejn, u għaldaqstant jagħmluha aktar diffiċli għall-Istati Membri biex jieħdu azzjoni ta’ rimedju xierqa. Barra minn hekk, is-CSRs rilevanti għall-MIP ma jqisux b’mod suffiċjenti l-politika fiskali, anke meta din tkun rilevanti għall-iżbilanċi mhux fiskali. Hemm xi inkonsistenza bejn is-CSRs għall-Istati Membri individwali u r-rakkomandazzjonijiet li jsiru għaż-żona tal-euro kollha kemm hi. Fl-aħħar nett, xi kultant il-Kummissjoni tissettja skeda ta’ żmien diffikultuża ħafna għall-implimentazzjoni tar-rakkomandazzjonijiet.
VIIAħna naqblu mal-partijiet interessati li stħarriġna, li min-naħa tagħhom jiġġudikaw li l-analiżi fl-IDRs hija ta’ kwalità tajba u li l-iżbilanċi jiġu identifikati b’mod korrett. Madankollu, f’dawn l-aħħar snin, l-IDRs saru dejjem inqas viżibbli fir-rappurtar li jsir mill-Kummissjoni, fejn l-analiżi rilevanti għall-MIP u l-parir dwar il-politiki huma inqas prominenti issa wara l-integrazzjoni tagħhom fir-rapporti għall-pajjiżi, li primarjament jittrattaw iil-koordinazzjoni ekonomika ġenerali tal-politiki strutturali. Il-MIP kompliet tiddgħajjef minħabba l-proċess deċiżjonali tal-Kummissjoni rigward il-klassifikazzjoni tal-iżbilanċi, skont is-severità. Filwaqt li l-iżbilanċi jiġu identifikati fil-livell dipartimentali fuq il-bażi ta’ kriterji tekniċi ċari, l-IDRs ma fihomx valutazzjoni ċara tas-severità tagħhom. Il-kriterji li fuqhom huma bbażati d-deċiżjonijiet finali li jittieħdu mill-Kulleġġ tal-Kummissarji huma nieqsa mit-tasparenza.
VIIITa’ min josserva li l-Kummissjoni qatt ma rrakkomandat l-attivazzjoni tal-proċedura ta' żbilanċ eċċessiv, minkejja l-fatt li, sa mill-bidu tal-MIP fl-2012, bosta Stati Membri ġew identifikati bħala li kellhom żbilanċi eċċessivi matul perjodu ta’ żmien twil.
IXL-ewwel dokument fil-proċess, l-AMR, ma jiffaċilitax b’mod adegwat l-identifikazzjoni bikrija tal-iżbilanċi, peress li juża indikaturi bbażati fuq data skaduta u medji mobbli li, minħabba fihom, l-avvenimenti reċenti ma jkunux jidhru. Barra minn hekk, it-test tal-AMR huwa deskrittiv aktar milli analitiku. Riperkussjonijiet fuq Stati Membri oħra u d-dimensjoni taż-żona tal-euro ma jitqisux fil-fond ħafna, għalkemm sar xi titjib f’dan ir-rigward.
X’nirrakkomandaw
- Jenħtieġ li l-Kummissjoni torbot b’mod sistematiku s-CSRs rilevanti għall-MIP mal-iżbilanċi makroekonomiċi. Jenħtieġ li l-miżuri li jiġu proposti jkunu dettaljati biżżejjed, u jenħtieġ li dawn jiffokaw fuq azzjonijiet politiċi biex inaqqsu l-iżbilanċi fit-terminu qasir sa medju. Kull meta jkun possibbli, jenħtieġ li l-Kummissjoni tagħmel valutazzjonijiet ex ante u ex post tal-impatt tal-azzjonijiet politiċi fuq l-iżbilanċi.
- Jenħtieġ li l-IDRs jipprovdu karatterizzazzjoni ċara tas-severità tal-iżbilanċi li Stat Membru jkun qed jiffaċċja. Jenħtieġ li l-Kummissjoni ttejjeb it-trasparenza billi tadotta, tippubblika u tapplika kriterji ċari għall-klassifikar ta’ żbilanċi. Jenħtieġ li din, dment li ma jkunx hemm ċirkustanzi speċifiċi, tirrakkomanda l-attivazzjoni ta’ EIP meta jkun hemm evidenza li Stat Membru jkun qed jiffaċċja żbilanċi eċċessivi. Jekk, f’ċirkustanzi speċifiċi, il-Kummissjoni tuża s-setgħat diskrezzjonali tagħha biex toqgħod lura milli tieħu dan il-pass, jenħtieġ li din tispjega r-raġunijiet tagħha b’mod ċar u pubblikament.
- Jenħtieġ li l-Kummissjoni tipprovdi IDR komprensiva u ppreżentata separatament b’tul u livell ta’ dettall li jkunu jirriflettu s-severità tas-sitwazzjoni u l-isfidi dwar il-politiki. Jenħtieġ li, minflok it-tabella ta' valutazzjoni, l-IDR tipprovdi aċċess għall-varjabbli speċifiċi għall-pajjiż li tassew ikunu ntużaw fl-analiżi.
- Jenħtieġ li l-Kummissjoni tanalizza b’mod sistematiku l-impatt tal-politika fiskali fuq l-iżbilanċi esterni u fuq il-kompetittività, u jenħtieġ li hija tuża l-MIP biex tagħmel rakkomandazzjonijiet lill-Istati Membri meta l-problemi fiskali jkunu jaffettwaw l-iżbilanċi esterni direttament.
- Jenħtieġ li l-proċess tal-MIP jieħu sistematikament inkunsiderazzjoni l-politiki b’impatti transnazzjonali li jistgħu jirriżultaw f’titjib tar-riekwilibriju simetriku fiż-żona tal-euro. Jenħtieġ li s-CSRs rilevanti għall-MIP ikunu konsistenti mar-rakkomandazzjonijiet għaż-żona tal-euro li jkunu rilevanti għall-iżbilanċi, inklużi dawk dwar il-pożizzjoni fiskali kumplessiva, meta jkun xieraq.
- Jenħtieġ li l-Kummissjoni tagħti prominenza akbar lill-MIP fil-komunikazzjoni tagħha mal-pubbliku. Fil-kuntest ta’ komunikazzjoni effettiva, jenħtieġ li l-Kummissarji rilevanti jkunu jinsabu għad-dispożizzjoni tal-parlamenti tal-Istati Membri, kull meta l-Kummissjoni tkun ivvalutat li l-iżbilanċi huma eċċessivi, biex b’hekk ikunu jistgħu jispjegaw il-loġika għad-deċiżjonijiet tagħha u għar-rakkomandazzjonijiet korrispondenti tal-politika.
Introduzzjoni
Loġika ekonomika u qafas legali
01Qabel il-kriżi tal-perjodu 2008-2009, il-qafas ta’ governanza ekonomika tal-UE (il-korp ta’ regoli li jirregola l-politiki ekonomiċi tal-Istati Membri) iffoka fuq is-sostenibbiltà tal-politiki fiskali. Huwa kien essenzjalment limitat biex id-defiċit u d-dejn pubbliċi jibqgħu taħt kontroll. Il-governanza tal-UE għall-politiki mhux fiskali kienet limitata għad-dispożizzjonijiet tat-Trattat dwar il-koordinazzjoni mhux vinkolanti tal-politiki ekonomiċi1.
02Il-kriżi u l-konsegwenzi tagħha wrew li l-qafas ma kienx qabad jew ippreviena l-akkumulazzjoni ta’ żbilanċi makroekonomiċi. F’bosta Stati Membri, influssi kbar ta’ kapital u l-espansjoni ta’ kreditu insostenibbli fis-settur privat kienu rriżultaw f’deterjorament fl-iżbilanċi esterni u fil-kompetittività, investiment eċċessiv f’ċerti oqsma tal-ekonomija u akkumulazzjoni ta’ dejn eċċessiv fis-settur privat. Barra minn hekk, qabel il-kriżi, boom ekonomiku insostenibbli fixkel il-valutazzjoni tal-pożizzjoni fiskali sottostanti, u b’hekk ta’ spiss is-sitwazzjoni kienet tidher aħjar milli fil-fatt kienet. Meta l-iżbilanċi eventwalment skattaw aġġustament diffiċli, dan kellu riperkussjonijiet fuq Stati Membri oħra, u għaldaqstant ipperikola l-istabbiltà finanzjarja u l-prestazzjoni ekonomika tal-UE kollha kemm hi.
03Bl-għan li jiġu pprevenuti żviluppi simili fil-futur u jiġu appoġġati politiki ta’ sostenn għat-tnaqqis ta’ żbilanċi li jirriżultaw mill-boom ta’ qabel il-kriżi, mekkaniżmu ġdid magħruf bħala l-Proċedura ta' Żbilanċ Makroekonomiku (MIP) ġie introdott fl-2011 bħala parti mis-"six-pack"2 leġiżlattiv ta’ dik is-sena.
04Il-bażi legali prinċipali għall-MIP hija r-Regolament (UE) Nru 1176/2011 dwar il-prevenzjoni u l-korrezzjoni tal-iżbilanċi makroekonomiċi (f’dan ir-rapport, dan jissejjaħ "ir-Regolament dwar l-MIP")3.
05Il-MIP tapplika għall-Istati Membri kollha tal-UE (ħlief dawk li jirċievu assistenza finanzjarja mill-UE taħt il-programmi ta' aġġustament ekonomiku) u ilha tiġi applikata mill-2012 bħala parti miċ-ċiklu annwali ta’ koordinazzjoni u sorveljanza tal-politiki ekonomiċi.
06B’mod speċifiku, il-MIP timmira lejn id-detezzjoni, il-prevenzjoni u l-korrezzjoni ta’ "żbilanċi” u "żbilanċi eċċessivi". Dawn it-termini huma ddefiniti fl-Artikolu 2 tar-Regolament dwar il-MIP:
- ““żbilanċi” tfisser kwalunkwe xejra li tagħti bidu għal żviluppi makroekonomiċi li qed jaffettwaw negattivament jew għandhom il-potenzjali li jaffettwaw negattivament, il-funzjonament korrett tal-ekonomija ta’ Stat Membru jew tal-unjoni ekonomika u monetarja, jew tal-Unjoni b’mod ġenerali;
- “żbilanċi eċċessivi” tfisser żbilanċi severi, inklużi żbilanċi li jxekklu jew li jistgħu jxekklu l-funzjonament korrett tal-unjoni ekonomika u monetarja.”
Imbagħad, l-Artikolu 4(3) tar-Regolament dwar il-MIP jiddefinixxi n-natura tal-iżbilanċi:
- “żbilanċi interni, inklużi dawk li jistgħu jinħolqu mid-dejn pubbliku u privat; l-iżviluppi tas-swieq finanzjarji u tal-assi, inklużi s-settur tad-djar; l-evoluzzjoni tal-flussi ta’ kreditu fis-settur privat; u l-evoluzzjoni tal-qgħad;
- żbilanċi esterni, inklużi dawk li jistgħu jinħolqu mill-evoluzzjoni tal-kont kurrenti u l-pożizzjonijiet ta’ investimenti netti tal-Istati Membri; tar-rati tal-kambju effettivi reali; tal-ishma mis-suq tal-esportazzjoni; u tal-bidliet fl-iżviluppi tal-prezzijiet u l-ispejjeż; u l-kompetittività mhux marbuta mal-prezzijiet, filwaqt li jitqiesu l-komponenti differenti tal-produttività.”
Għaldaqstant, ir-Regolament dwar il-MIP jipprevedi l-objettiv doppju li jiġu indirizzati l-iżbilanċi li jaffettwaw lill-ekonomiji individwali tal-Istati Membri, filwaqt li jiġu indirizzati wkoll ir-riperkussjonijiet4 fuq Stati Membri oħra taż-żona tal-euro u tal-UE.
09Il-MIP hija inkorporata fis-Semestru Ewropew, li huwa l-qafas li ġie introdott fl-2010 għall-koordinazzjoni ġenerali ta’ politiki ekeonomiċi fl-UE kollha. Minbarra l-MIP, is-Semestru Ewropew jinkludi miżuri li jimplimentaw il-Patt ta' Stabbiltà u Tkabbir (PST), u politiki strutturali li għandhom l-għan li jistimulaw it-tkabbir fuq terminu twil fil-kuntest tal-istrateġija Ewropa 2020, billi jilħqu l-miri, jirrispettaw il-linji gwida ġenerali għall-politiki ekonomiċi u l-linji gwida għall-politiki dwar l-impjiegi. Il-proċess annwali tas-Semestru Ewropew jilħaq il-quċċata tiegħu permezz tal-proposta, li l-Kummissjoni tagħmel lill-Kunsill, ta’ rakkomandazzjonijiet speċifiċi għall-pajjiż (CSRs) f’dawn l-oqsma kollha. Wara li dawn jiġu approvati mill-Kunsill, l-Istati Membri huma mistennija jimplimentaw ir-rakkomandazzjonijiet.
10B’mod ġenerali, id-distinzjoni bejn il-MIP u l-PST hija din: il-MIP tittratta l-iżbilanċi makroekonomiċi inġenerali, filwaqt li l-PST ma jmurx lil hinn mis-sostenibbiltà fiskali. Barra minn hekk, ladarba Stat Membru jkun issodisfa r-rekwiżiti relatati mad-dejn u mad-defiċit, il-PST ma jibqax jipprovdi gwida dwar il-politika fiskali. Min-naħa tiegħu, ir-Regolament dwar il-MIP jipprevedi li r-reazzjonijiet tal-politika għall-iżbilanċi li jiġu identifikati taħt il-MIP jistgħu jinkludu miżuri ta’ politika fiskali u tal-pagi5. Iż-żewġ strumenti ta’ politika huma simili fis-sens illi jagħtu lill-Kummissjoni rwol ta’ infurzar, u għalhekk għandhom element preventiv kif ukoll element korrettiv. Madankollu, il-Kummissjoni ma għandhiex rwol simili ta’ infurzar fl-implimentazzjoni tal-istrateġija Ewropa 2020.
11Il-proċess annwali tal-MIP li jidentifika l-iżbilanċi, jivvaluta s-severità tagħhom u jagħti bidu għall-korrezzjonijiet jiġi ripartit fi stadji. Il-proċess spjegat fir-Regolament dwar il-MIP jingħata fil-qosor fil-Figura 1 (għal aktar dettall ara l-Anness I), u d-dokumenti korrispondenti huma elenkati fl-Anness II.
L-ewwel stadju: Ir-Rapport dwar il-Mekkaniżmu ta' Twissija
12L-ewwel stadju fil-proċess huwa l-pubblikazzjoni ta’ Rapport dwar il-Mekkaniżmu ta' Twissija (AMR). L-iskop prinċipali għal dan huwa li jiġu identifikati l-Istati Membri li l-Kummissjoni tqis li jinsabu f’riskju li jiġu affettwati mill-iżbilanċi u li għalhekk jirrikjedu analiżi ulterjuri fil-forma ta’ analiżi fil-fond (l-IDR: ara t-tieni stadju). L-AMR juża tabella ta’ valutazzjoni tal-indikaturi magħżula biex jindika l-iżbilanċi interni u esterni (ara l-Anness III)6. Madankollu, l-Artikolu 3(2) tar-Regolament dwar il-MIP jagħmilha ċara li d-deċiżjoni li titnieda IDR ma għandhiex tirriżulta “mill-qari mekkaniku tal-indikaturi tat-tabella ta’ valutazzjoni”.
It-tieni stadju: Analiżijiet fil-fond
13L-IDRs jikkonsistu f’analiżi dettaljata taċ-ċirkustanzi speċifiċi għall-pajjiż bl-użu ta’ firxa wiesgħa ta’ għodod analitiċi (bħal miżuri ta’ konnessjonijiet u esponimenti kummerċjali bejn l-Istati Membri), f’informazzjoni kwalitattiva speċifika għall-pajjiż (bħal speċjalizzazzjoni f’ċerti prodotti, kif ukoll mekkaniżmi ta’ negozjar tal-pagi) u, f’ħafna każijiet, f’varjabbli li jkunu differenti minn dawk li hemm fit-tabella ta' valutazzjoni tal-AMR.
14Il-Kummissjoni tiġbor informazzjoni matul iż-żjarat tagħha lill-Istati Membri. Hija għandha wkoll l-obbligu li tqis kwalunkwe informazzjoni oħra li, skont dak li jkun ġie kkomunikat mill-Istati Membri, titqies rilevanti. Fl-aħħar nett, il-Kummissjoni trid tieħu kont tal-intenzjonijiet ta’ politika tal-Istati Membri u ta’ kwalunkwe rakkomandazzjoni preċedenti mill-Kunsill jew mill-Bord Ewropew dwar ir-Riskju Sistemiku.
15Ir-Regolament dwar il-MIP jirrikjedi speċifikament li l-IDRs jevalwaw jekk l-Istat Membru inkwistjoni huwiex affettwat mill-iżbilanċi u, jekk ikun il-każ, jekk dawn humiex eċċessivi. Ir-riperkussjonijiet tal-politiki ekonomiċi nazzjonali jridu jitqiesu wkoll. Jekk il-Kummissjoni ma tidentifika l-ebda żbilanċ, il-proċess tal-MIP jintemm għal dak l-Istat Membru f’dik is-sena. Jekk l-iżbilanċi jiġu identifikati, skont xi tkun is-severità tagħhom, il-Kummissjoni tqiegħed lill-Istat Membru jew fil-fergħa preventiva jew inkella f’dik korrettiva tal-MIP.
16Mill-2015 'il hawn, l-IDRs saru parti mir-rapporti annwali għall-pajjiżi, imwettqa mill-Kummissjoni, tal-proċess annwali tas-Semestru Ewropew. Dawn jinkludu valutazzjonijiet analitiċi, b’firxa wiesgħa, tal-problemi strutturali prinċipali li jaffettwaw Stat Membru f’oqsma bħat-tassazzjoni u l-infiq, l-impjiegi, l-amministrazzjoni pubblika u l-ambjent kummerċjali, kif ukoll tal-progress li l-Istat Membru jkun għamel fl-implimentazzjoni tas-CSRs u lejn il-miri ta’ Ewropa 2020.
It-tielet stadju: Prevenzjoni u korrezzjoni
L-azzjoni preventiva
17Jekk il-Kummissjoni tqis li Stat Membru għandu żbilanċi makroekonomiċi, din trid tinforma lill-Kunsill u lill-Parlament Ewropew. Fuq proposta mill-Kummissjoni, il-Kunsill jista’ mbagħad jindirizza s-CSRs lill-Istat Membru biex jikkoreġi l-iżbilanċi u bħala prevenzjoni biex dawn ma jsirux “eċċessivi” (f’dan ir-rapport, dawn jissejħu “CSRs rilevanti għall-MIP”). Is-CSRs jiġu adottati f’Lulju u jridu jiġu analizzati kif ukoll, fejn xieraq, aġġustati kull sena. Għal din il-fini, teżisti valutazzjoni sistematika u pubblika tal-progress li sar fl-implimentazzjoni tas-CSRs, ippubblikata fi Frar f’forma ta’ anness korrispondenti għar-rapport għall-pajjiż. Biex timmonitorja l-implimentazzjoni tas-CSRs rilevanti għall-MIP, il-Kummissjoni hija meħtieġa żżomm djalogu permanenti mal-awtoritajiet tal-Istati Membri u mas-sħab soċjali, u twettaq żjarat ta’ informazzjoni, normalment darba fis-sena.
L-azzjoni korrettiva: il-proċedura ta’ żbilanċ eċċessiv
18Jekk il-Kummissjoni tqis li l-iżbilanċ huwa eċċessiv, ikun jerġa’ jeħtieġ, skont l-Artikolu 7 tar-Regolament dwar il-MIP, li din tinforma lill-Parlament Ewropew u lill-Kunsill. Fuq proposta mill-Kummissjoni, il-Kunsill jista’ mbagħad jiddeċiedi li jattiva “proċedura ta’ żbilanċ eċċessiv” (EIP), li tkun tesponi l-Istat Membru għal rekwiżiti u monitoraġġ aktar stretti u, fl-aħħar mill-aħħar, fil-każ tal-Istati Membri taż-żona tal-euro, għall-possibbiltà ta’ sanzjonijiet finanzjarji7.
Ambitu, objettivi u approċċ tal-awditjar
Ambitu u objettivi tal-awditjar
19Il-mistoqsija prinċipali tal-awditjar kienet “Il-MIP għandha bażi soda u hija implimentata b’mod adegwat?” Għalhekk, f’dan l-awditu aħna vvalutajna l-effettività tal-implimentazzjoni, mill-Kummissjoni, tal-MIP matul il-perjodu mill-2012 sal-20178 kif ukoll, fejn rilevanti, ċerti elementi tat-tfassil tal-proċedura. Aħna eżaminajna l-MIP fid-dettall għal kampjun ta’ erba’ Stati Membri (il-Bulgarija, Spanja, Franza u s-Slovenja), filwaqt li koprejna Stati Membri oħra, fejn kien xieraq, sa livell inqas9.
20B'mod aktar speċifiku, aħna eżaminajna:
- l-effettività tal-implimentazzjoni tal-proċedura abbażi tal-mod kif il-klassifikazzjoni tal-iżbilanċi tal-Istati Membri evolviet u r-raġunijiet sottostanti għall-implimentazzjoni baxxa tas-CSRs rilevanti għall-MIP;
- il-proċess ta’ klassifikar tal-iżbilanċi makroekonomiċi fl-Istati Membri;
- l-użu, mill-Kummissjoni, ta’ għodod analitiċi u ta’ analiżi ekonomika għall-identifikazzjoni u l-valutazzjoni tal-iżbilanċi, u l-preżentazzjoni tar-riżultati li kienet qed tevolvi;
- ix-xerqien tat-tabella ta' valutazzjoni u l-AMR kollu kemm hu fil-MIP.
Aħna ma vvalutajniex ix-xerqien tas-sollijiet issettjati għall-indikaturi tat-tabella ta' valutazzjoni, u lanqas il-kwalità tad-data tal-istatistika li fuqha huma bbażati. Lanqas ma eżaminajna l-proċedura għall-evalwazzjoni tal-progress fl-implimentazzjoni tas-CSRs rilevanti għall-MIP10.
22Il-kriterji tal-awditjar tagħna ġew minn:
- rekwiżiti regolatorji (b’mod partikolari r-Regolament dwar il-MIP);
- ir-regoli u l-proċeduri interni tal-Kummissjoni (eż. struzzjonijiet u linji gwida);
- dokumenti maħruġa minn għadd ta’ istituzzjonijiet tal-UE u organizzazzjonijiet internazzjonali oħra (b’mod partikolari l-FMI u l-OECD) jew li rriżultaw minn riċerka għall-identifikazzjoni tal-aħjar prattika.
Dan ir-rapport tal-awditjar huwa t-tieni wieħed f’sensiela ta’ rapporti li kienet ippjanata biex tiżgura kopertura sostanzjali tal-qafas ta’ governanza ekonomika tal-UE. L-ewwel rapport f’din is-sensiela, dwar il-proċedura ta' defiċit eċċessiv (EDP)11, ġie ppubbikat fl-2016.
Approċċ
24F’Marzu 2016, aħna bgħattna stħarriġ online lill-membri tal-Kumitat tal-Politika Ekonomika (KPE) mill-Istati Membri li kienu suġġetti għall-MIP. L-istħarriġ kopra l-perjodu mill-AMR tal-2012 sal-IDRs tal-2016. Huwa kien jinkludi 46 mistoqsija, kemm kwalitattivi kif ukoll kwantitattivi, dwar il-fehmiet tal-membri tal-KPE rigward il-MIP. L-istħarriġ għalaq f’Diċembru 2016, sa liema data kienu wieġbu 19 minn 20 membru tal-KPE. Ir-riżultati tal-istħarriġ iggwidaw ix-xogħol tal-awditjar tagħna, u ssir referenza għalihom f’ċerti osservazzjonijiet. It-tweġibiet miġbura għall-mistoqsijiet kwantitattivi jistgħu jinstabu fl-Anness VI.
25Aħna intervistajna membri tal-persunal minn tliet dipartimenti tal-Kummissjoni (id-DĠ ECFIN, id-DĠ EMPL u s-Segretarjat Ġenerali) u l-kabinetti tal-Kummissarju għall-Affarijiet Ekonomiċi u Finanzjarji, it-Tassazzjoni u d-Dwana u l-Viċi President għall-Euro u d-Djalogu Soċjali. Aħna eżaminajna firxa ta’ dokumentazzjoni tal-Kummissjoni, kemm fid-dominju pubbliku kif ukoll rekords interni. Iltqajna wkoll ma’ rappreżentanti tal-istituzzjonijiet involuti fl-implimentazzjoni u l-monitoraġġ tal-MIP fl-Istati Membri magħżula (ara l-lista tal-istituzzjonijiet fl-Anness VII).
26Aħna ddiskutejna l-MIP ma’ rappreżentanti ta’ bosta organizzazzjonijiet li fehmiethom kienu rilevanti għall-awditu (inklużi l-Bank Ċentrali Ewropew (BĊE), l-FMI, l-OECD, il-Bank Dinji, il-Parlament Ewropew u, fil-Ġermanja, il-Ministeru Federali tal-Affarijiet Ekonomiċi u l-Enerġija kif ukoll il-Ministeru Federali tal-Finanzi). Organizzajna wkoll panel konsultattiv u fittixna l-parir ta’ esperti indipendenti.
Osservazzjonijiet
Xi Stati Membri ġew identifikati bħala li kellhom żbilanċi matul bosta snin, u l-politiki korrettivi qed jiġu implimentati b’mod insuffiċjenti
27Din it-taqsima tħares lejn l-evoluzzjoni tal-għadd ta’ Stati Membri fejn l-iżbilanċi ilhom jiġu identifikati sa mill-introduzzjoni tal-MIP. Imbagħad hija turi l-livell ta’ implimentazzjoni tas-CSRs rilevanti għall-MIP, skont kif ġie vvalutat mill-Kummissjoni, u tqis ir-raġunijiet sottostanti.
B’mod ġenerali, l-Istati Membri jibqgħu fi żbilanċ għal bosta snin
28L-għadd ta’ Stati Membri li ġew identifikati, permezz tal-MIP, bħala li kellhom żbilanċi makroekonomiċi żdied gradwalment bejn l-2012 u l-2015 (minn 12 għal 16). Minkejja dan, aħna nirrikonoxxu l-fatt li dan l-għadd żdied ukoll minħabba l-ħruġ ta’ bosta pajjiżi mill-programmi ta' aġġustament ekonomiku, u minħabba l-adeżjoni tal-Kroazja mal-UE. Aktar reċentement, ix-xejra kumplessiva nqelbet, u possibbilment tirrifletti l-irkupru ċikliku tal-ekonomiji tal-UE. Madankollu, l-għadd ta’ Stati Membri bi żbilanċi eċċessivi ma naqasx (ara l-Figura 2 u l-Anness VIII).
Il-Figura 3 turi li, b’mod ġenerali, il-klassifikazzjoni tal-Istati Membri indvidwali baqgħet l-istess minn sena għal oħra. It-titjib kien relattivament rari. Matul l-ewwel ħames snin tal-MIP (l-2012 sal-2016), total kumulattiv ta’ 67 Stat Membru ġew identifikati bħala li kellhom żbilanċi (51) jew żbilanċi eċċessivi (16). F’39 mill-51 każ li juru żbilanċi ma kien hemm l-ebda bidla fis-sena ta’ wara, filwaqt li l-livell ta’ 5 Stati Membri ttella’ sa “żbilanċi eċċessivi”, u 7 Stati Membri rnexxielhom jikkoreġu l-iżbilanċi tagħhom. Mis-16-il Stat Membru bi żbilanċi eċċessivi, 2 biss irnexxielhom joħorġu mill-kategorija s-sena ta’ wara.
Din l-inerzja hija wkoll evidenti jekk wieħed iħares lejn it-12-il Stat Membru li għalihom l-iżbilanċi ġew identifikati fl-2012, l-ewwel sena tal-MIP. Minn dak iż-żmien 'il hawn, f’ċertu punt, 6 mit-12-il Stat Membru spiċċaw bi “żbilanċi eċċessivi” (il-Bulgarija, Ċipru, Franza, l-Italja, is-Slovenja u Spanja). Tnejn biss minn dawk is-sitta rnexxielhom jirritornaw għal żbilanċ “regolari” (is-Slovenja u Spanja), filwaqt li ħallew l-erbgħa l-oħra għad fil-kategorija ta’ “żbilanċ eċċessiv” (erba’ snin wara xulxin għall-Italja, tliet snin għal Franza u l-Bulgarija, u sentejn għal Ċipru12). L-ebda Stat Membru li kellu żbilanċi “eċċessivi” ma seta’ qatt jagħmel biżżejjed titjib biex jispiċċa fil-kategorija ta’ “l-ebda żbilanċ”. L-Anness VIII jittraċċa bis-sħiħ il-klassifikazzjoni ta’ kull Stat Membru mill-2012 'il hawn.
Minkejja l-monitoraġġ frekwenti u intensiv, il-livell ta’ implimentazzjoni tas-CSRs rilevanti għall-MIP, mill-Istati Membri, kien baxx
Standard tajjeb ta’ monitoraġġ mill-Kummissjoni
31Ir-Regolament dwar il-MIP13 jirrikjedi li l-Kummissjoni timmonitorja l-implimentazzjoni tas-CSRs rilevanti għall-MIP billi, fost affarijiet oħra, tiġbor informazzjoni fl-Istati Membri u żżomm djalogu permanenti mal-awtoritajiet u mas-sħab soċjali. Aħna sibna li, matul iż-żjarat frekwenti ta’ informazzjoni lill-Istati Membri, il-Kummissjoni kellha djalogu sħiħ u ċar ma’ firxa wiesgħa biżżejjed ta’ partijiet interessati fil-livell nazzjonali.
32Fl-2013, il-Kummissjoni introduċiet il-proċedura ta’ “monitoraġġ speċifiku” għall-Istati Membri bi żbilanċi eċċessivi. Din il-proċedura ġiet estiża fl-2014 għall-Istati Membri magħżula, taż-żona tal-euro, li kellhom żbilanċi ta’ rilevanza sistemika u, fl-2016, għall-Istati Membri kollha bi żbilanċi. Attwalment, il-monitoraġġ speċifiku jikkonsisti fi żjara annwali ta’ informazzjoni lil kull Stat Membru, segwita mill-pubblikazzjoni ta’ rapport ta' progress.
Madankollu, il-livell ta’ implimentazzjoni tas-CSRs rilevanti għall-MIP, mill-Istati Membri, kien baxx
33Il-Kummissjoni tivvaluta l-livell ta’ implimentazzjoni tas-CSRs bl-użu ta’ klassifikazzjoni kwalitattiva (ara l-Anness V). Fl-2017, il-Parlament Ewropew ibbaża fuq dawn il-valutazzjonijiet biex jevalwa l-implimentazzjoni kumplessiva tas-CSRs rilevanti għall-MIP għall-perjodu 2012-201614. Il-Figura 4 tagħti fil-qosor din l-evalwazzjoni. Aħna nikkonkludu li l-implimentazzjoni tas-CSRs rilevanti għall-MIP kienet ilha persistentement dgħajfa mill-2012, billi l-proporzjon tas-CSRs rilevanti għall-MIP li ġew implimentati bis-sħiħ jew b’mod sostanzjali huwa baxx ħafna15.
Hemm bosta dgħufijiet li jaffettwaw l-implimentazzjoni tas-CSRs rilevanti għall-MIP
34Id-dgħufijiet li ġejjin fil-ġestjoni tal-proċess tal-MIP affettwaw b’mod negattiv l-implimentazzjoni tas-CSRs rilevanti għall-MIP: (i) l-ebda rabta sistematika bejn is-CSRs rilevanti għall-MIP u l-iżbilanċi; (ii) l-ebda stima sistematika tal-impatt li s-CSRs rilevanti għall-MIP ikollhom fuq l-iżbilanċi; (iii) inkonsistenza bejn ir-rakkomandazzjonijiet għaż-żona tal-euro kollha kemm hi u s-CSRs rilevanti għall-MIP; (iv) skeda ta’ żmien diffikultuża ħafna għall-implimentazzjoni tas-CSRs rilevanti għall-MIP.
L-ebda rabta sistematika bejn is-CSRs rilevanti għall-MIP u l-iżbilanċi
35Biex tiġi promossa s-sjieda nazzjonali, u għaldaqstant l-Istati Membri jitħeġġu biex jimplimentaw is-CSRs rilevanti għall-MIP b’mod aktar diliġenti, huwa essenzjali li jiġi ċċarat il-mod kif l-analiżi ekonomika u l-valutazzjoni tal-iżbilanċi wasslu għal rakkomandazzjonijiet speċifiċi tal-politika. Il-gwida proprja tal-Kummissjoni tiddikjara li jenħtieġ li l-IDRs jipprovdu l-bażi analitika għall-formulazzjoni ta’ rakkomandazzjonijiet16, iżda fil-prattika r-rabta mhux ta’ spiss tkun ovvja17. L-istħarriġ tagħna għall-KPE kkonferma din l-impressjoni: meta staqsejna “Huwa ċar liema CSRs huma relatati mal-MIP?”, kwart biss mill-membri tal-KPE wieġbu “dejjem ċar” (ara l-Figura g fl-Anness VI). Fi snin reċenti, ir-rabta hija wisq inqas evidenti minħabba s-simplifikazzjoni kemm tas-CSRs rilevanti għall-MIP (ara l-paragrafi 40 sa 42) kif ukoll tal-IDRs (ara l-paragrafi 67 sa 73).
36L-ewwel nett, ir-rabta mhux ta’ spiss tkun ovvja, jew inkella tkun dgħajfa ħafna. Dan għaliex il-Kummissjoni ma tifformulax il-proposti tagħha għas-CSRs bil-ħsieb li tindirizza żbilanċi speċifiċi, kif meħtieġ bl-Artikolu 6(1) tar-Regolament dwar il-MIP. Minflok, ir-riformi strutturali jiġu diskussi ma’ Stat Membru fil-kuntest ta’ Ewropa 2020 qabel ma jiġu inklużi fil-proposti li jsiru mill-Kummissjoni, u jistgħu jitqiesu bħala li huma rilevanti għall-MIP anke jekk ikunu marbuta biss remotament mal-iżbilanċi.
37Barra minn hekk, fl-analiżi li wettaqna tal-erba’ Stati Membri magħżula, aħna sibna ħafna CSRs li tqiesu ħażin bħala li huma rilevanti għall-MIP, peress li l-ebda waħda mill-miżuri rrakkomandati ma kienet tindirizza l-żbilanċi li ġew identifikati fl-IDR. Ara l-Kaxxa 1 għal eżempji.
Kaxxa 1
Eżempji ta’ rabta nieqsa bejn is-CSRs rilevanti għall-MIP u l-IDRs
- Is-CSR Nru 3/2016 għal Franza indirizzat suġġetti (ir-riformi tal-apprendistat, tat-taħriġ vokazzjonali u tal-benefiċċji tal-qgħad) li ma kinux rilevanti għall-MIP: dawn ma ġewx ittrattati fit-taqsima tal-IDR tar-rapport għall-pajjiż, lanqas ma ssemmew fil-matriċi għall-valutazzjoni tal-MIP (ara l-paragrafu 68), u lanqas ma ssemmew bħala sfida dwar il-politiki, relatata mal-IDR, fis-sommarju eżekuttiv tar-rapport mill-pajjiż. B’mod simili, is-suġġetti li tqajmu fis-CSR Nru 5/2015 u fis-CSR Nru 5/2016 (ir-riforma tas-sistema fiskali Franċiża) ma ġewx ittrattati fit-taqsima tal-IDR tar-rapport għall-pajjiż.
- Is-CSR Nru 2/2013 għas-Slovenja indirizzat suġġetti (is-sostenibbiltà fuq terminu twil tas-sistema tal-pensjonijiet; il-kura tas-saħħa) li għalihom ma kien hemm l-ebda referenza fl-IDR.
- Is-CSR Nru 1/2016 għall-Bulgarija qajmet kwistjonijiet (il-miri tal-PST; il-miżuri biex jitjieb il-ġbir tat-taxxi u titnaqqas l-ekonomija informali) li ma ġewx ittrattati fit-taqsima tal-IDR tar-rapport għall-pajjiż u ma ġewx inklużi fil-matriċi għall-valutazzjoni tal-MIP u lanqas ma ġew enfasizzati fis-sommarju eżekuttiv. Is-suġġetti li tqajmu fis-CSR Nru 1/2015 (il-miri tal-PST; il-ġbir tat-taxxi; l-ekonomija moħbija; il-kosteffettività tas-sistema tal-kura tas-saħħa) ġew diskussi fit-taqsima “Problemi strutturali oħra” tar-rapport għall-pajjiż u għalhekk ma kinux konnessi mal-IDR.
- Is-CSR Nru 9/2013 għal Spanja indirizzat suġġetti (ir-riforma tal-amministrazzjoni pubblika; l-effiċjenza tal-ġudikatura) li ma kinux ittrattati fl-IDR. Is-CSR Nru 2/2015 kienet tirrigwarda r-riformi tal-banek ta’ tfaddil, kwistjoni li għaliha ma kien hemm referenza mkien fir-rapport għall-pajjiż.
It-Tabella 1 tindika l-punt sa fejn is-CSRs jitqiesu bħala li huma rilevanti għall-MIP. Fl-2016, aktar minn 80 % tas-CSRs kienu indirizzati għall-Istati Membri li kienu affettwati mill-iżbilanċi, u s-CSRs kollha li kienu indirizzati għall-Istati Membri bi żbilanċi eċċessivi tqiesu bħala li huma rilevanti għall-MIP. Din il-klassifikazzjoni eċċessiva tas-CSRs bħala li huma rilevanti għall-MIP dgħajfet l-effettività u l-kredibbiltà tal-MIP. Dan fil-fatt ġie kkorroborat minn ħafna mill-partijiet interessati li ltqajna magħhom matul iż-żjarat ta’ informazzjoni.
Żbilanċi | Żbilanċi eċċessivi | Total | |
---|---|---|---|
2012 | 52.0 % | 52.0 % | |
2013 | 63.3 % | 94.4 % | 70.5 % |
2014 | 67.2 % | 100.0 % | 76.1 % |
2015 | 87.2 % | 92.9 % | 89.6 % |
2016 | 81.0 % | 100.0 % | 92.0 % |
Sors: Il-QEA.
39It-tieni problema hija l-fatt li s-simplifikazzjoni tas-CSRs rilevanti għall-MIP u tal-IDRs kompliet toskura r-rabta bejn is-CSRs rilevanti għall-MIP u l-iżbilanċi identifikati.
40Is-simplifikazzjoni tal-proċess tas-CSRs tmur lura għall-2015, wara li l-Istati Membri għamlu kumment li l-għadd u t-tul eċċessivi tas-CSRs kienu naqqsu mis-sens tagħhom ta’ sjieda u mill-effettività tal-implimentazzjoni. Minn dak iż-żmien 'il hawn, il-Kummissjoni naqqset l-għadd annwali ta’ CSRs rilevanti għall-MIP. Hija naqqset ukoll it-tul medju tagħhom b’madwar 50 % (ara l-Figura 5).
41B’mod ġenerali, is-simplifikazzjoni tqieset b’mod pożittiv mill-membri tal-KPE (ara l-Figura k fl-Anness VI) u minn ħafna mill-partijiet interessati li ltqajna magħhom matul iż-żjarat ta’ informazzjoni. Madankollu, issa li s-CSRs rilevanti għall-MIP huma iqsar u fformulati f’termini aktar ġenerali, huma ma jindirizzawx speċifikament l-iżbilanċi li jkunu ġew identifikati f’IDR. In-natura ġenerali tagħhom tagħmilha wkoll aktar diffiċli biex titwettaq valutazzjoni ta’ kemm dawn ġew implimentati tajjeb u kemm setgħu kkontribwew għall-eliminazzjoni tal-iżbilanċi. Il-Kaxxa 2 turi l-impatt tas-simplifikazzjoni fuq is-CSRs rilevanti għall-MIP li ntgħażlu għal Franza u Spanja.
Kaxxa 2
L-impatt tas-simplifikazzjoni fuq is-CSRs rilevanti għall-MIP għal Franza u Spanja
Is-simplifikazzjoni wasslet għal tnaqqis fl-għadd u t-tul tas-CSRs rilevanti għall-MIP.
2014 | 2016 | |||
---|---|---|---|---|
Franza | Spanja | Franza | Spanja | |
Għadd ta' CSRs | ||||
Għadd totali ta’ CSRs | 7 | 8 | 5 | 4 |
Għadd totali ta’ CSRs rilevanti għall-MIP | 6 | 7 | 5 | 4 |
Għadd ta’ kliem fis-CSRs rilevanti għall-MIP | ||||
Total | 803 | 978 | 280 | 227 |
Medja | 134 | 140 | 56 | 57 |
Peress li tnaqqsilhom it-tul, is-CSRs rilevanti għall-MIP issa jipprovdu wkoll gwida ta’ politika inqas dettaljata.
2014 | 2016 |
---|---|
Franza | |
3.Ir-regoli amministrattivi, fiskali u kontabilistiċi tal-kumpaniji jiġu simplifikati u jittieħdu miżuri konkreti għall-implimentazzjoni tal-“pjan ta’ simplifikazzjoni” kontinwu tal-Gvern sa Diċembru 2014. Impedimenti regolatorji għat-tkabbir tal-kumpaniji jiġu eliminati, b’mod partikolari permezz ta’ analiżi tal-kriterji relatati mad-daqs, fir-regolamenti, biex l-effetti ta’ limitu jiġu evitati. Jittieħdu passi għas-simplifikazzjoni u t-titjib fl-effiċjenza tal-politika dwar l-innovazzjoni, notevolment permezz ta’ evalwazzjoni u, jekk meħtieġ, l-adattament tal-“crédit d’impôt recherche”. Jiġi żgurat li r-riżorsi jkunu ffukati fuq il-pilastri l-aktar effettivi tal-kompetittività, u l-impatt ekonomiku tal-innovazzjoni li ġiet żviluppata fil-pilastri jkompli jiġi promoss. 4.Jitneħħew ir-restrizzjonijiet mhux ġustifikati fuq l-aċċess għal u l-eżerċizzju tal-professjonijiet regolati, u jitnaqqsu l-ispejjeż tad-dħul, u l-kompetizzjoni fis-servizzi tiġi promossa. Tittieħed azzjoni ulterjuri biex jitnaqqas il-piż regolatorju li jaffettwa l-funzjonament tas-settur tal-bejgħ bl-imnut, b’mod partikolari permezz ta’ simplifikazzjoni tal-awtorizzazzjonijiet għall-ftuħ ta’ ħwienet kummerċjali u permezz tat-tneħħija tal-projbizzjoni fuq il-bejgħ b’telf. Filwaqt li jinżammu kundizzjonijiet affordabbli għall-gruppi vulnerabbli, jiġi żgurat li t-tariffi regolati tal-gass u tal-elettriku għall-klijenti domestiċi jiġu ssettjati f’livell xieraq li ma jkunx jirrappreżenta ostaklu għall-kompetizzjoni. Tissaħħaħ il-kapaċità ta’ interkonnessjonijiet tal-elettriku u tal-gass ma’ Spanja; b’mod partikolari, titkabbar il-kapaċità ta’ interkonnessjonijiet tal-gass biex is-suq tal-gass Iberiku jiġi integrat bis-sħiħ mas-suq Ewropew. Fis-settur ferrovjarju, tiġi żgurata l-indipendenza tal-maniġer tal-infrastruttura unifikat ġdid mill-operatur preeżistenti u jittieħdu passi għall-ftuħ ta’ trasport domestiku tal-passiġġieri qabel l-2019. |
4.Jitneħħew l-ostakli għall-attività fis-settur tas-servizzi, b’mod partikolari fis-servizzi kummerċjali u l-professjonijiet regolati. Jittieħdu passi għas-simplifikazzjoni u t-titjib fl-effiċjenza tal-iskemi tal-politika dwar l-innovazzjoni. Sa tmiem l-2016, tkompli r-riforma tal-kriterji relatati mad-daqs fir-regolamenti li jimpedixxu t-tkabbir tal-kumpaniji u titkompla s-simplifikazzjoni tar-regoli amministrattivi, fiskali u kontabilistiċi tal-kumpaniji billi jitwettaq il-programm ta’ simplifikazzjoni. |
Spanja | |
6.Tiġi żgurata l-implimentazzjoni ambizzjuża u rapida tal-Liġi Nru 20/1013 dwar l-Unità tas-Suq fil-livelli kollha tal-amministrazzjoni. Tiġi adottata riforma ambizzjuża tas-servizzi professjonali u tal-assoċjazzjonijiet professjonali sa tmiem l-2014, li tiddefinixxi l-professjonijiet li jirrikjedu reġistrazzjoni f'organizzazzjoni professjonali, u t-trasparenza u l-obbligu ta’ rendikont tal-korpi professjonali, jinfetħu attivitajiet li jkunu riżervati mingħajr ġustifikazzjon,i u tiġi salvagwardjata l-unità tas-suq fl-aċċess għal u l-implimentazzjoni tas-servizzi professjonali fi Spanja. Jtnaqqsu aktar iż-żmien, l-ispiża u l-għadd ta' proċeduri meħtieġa għat-twaqqif ta' negozju operattiv. Jiġu indirizzati restrizzjonijiet mhux ġustifikati għall-istabbiliment ta’ postijiet tal-bejgħ bl-imnut fuq skala kbira, notevolment permezz ta’ reviżjoni tar-regolamenti ta’ ppjanar reġjonali eżistenti. Jiġu identifikati sorsi ta’ finanzjament għall-istrateġija nazzjonali ġdida għax-xjenza, it-teknoloġija u l-innovazzjoni, u tal-Aġenzija ta’ Riċerka tal-Istat il-ġdida. |
4.Titħaffef l-implimentazzjoni tal-liġi dwar l-unità tas-suq fil-livell reġjonali. Tiġi żgurata l-implimentazzjoni, mir-reġjuni awtonomi, tal-miżuri ta’ riforma adottati għas-settur tal-bejgħ bl-imnut. Ir-riforma ppjanata dwar is-servizzi u l-assoċjazzjonijiet professjonali tiġi adottata. |
Sors: Il-QEA.
Problema oħra hija li, maż-żmien id-diskussjoni dwar il-possibbiltajiet ta’ politika biex l-iżbilanċi jiġu indirizzati (it-taqsima “Sfidi dwar il-politiki”) għebet mill-IDR minn mindu dan id-dokument ingħaqad mar-rapport għall-pajjiż. Flimkien mas-simplifikazzjoni tas-CSRs rilevanti għall-MIP, dan għamilha ħafna aktar diffiċli għall-qarrej biex jifhem il-loġika wara r-rakkomandazzjonijiet. It-Tabella 2 tqabbel ir-rabta bejn l-IDR u s-CSR Nru 3, rilevanti għall-MIP għall-Bulgarija fl-2014 u fl-2015, jiġifieri qabel u wara s-simplifikazzjoni.
CSR Nru 3, rilevanti għall-MIP għall-Bulgarija fl-2014 u fl-2015 | ||
---|---|---|
Parir dwar il-politiki tal-IDR | Proposti mill-Kummissjoni għal rakkomandazzjonijiet speċifiċi għall-pajjiż | |
2014 | “Sfidi dwar il-politiki”
•Jittejbu l-effiċjenza u l-effettività ta’ politiki attivi tas-suq tax-xogħol •Jiġi vvalutat l-impatt ta’ politiki attivi eżistenti tas-suq tax-xogħol, minbarra li jiġu introdotti miżuri ġodda •Jintrabtu l-eżiti tal-evalwazzjoni mal-politika futura •Jiġu mmirati miżuri għal dawk li huma l-akbar ħtieġa ta’ attivazzjoni u li għandhom l-ogħla impjegabbiltà. F’dan ir-rigward, iż-żgħażagħ mhux attivi u l-persuni b’livell baxx ta’ ħiliet u b’esperjenza professjonali li ilhom qiegħda għal żmien twil, kif ukoll gruppi soċjali vulnerabbli oħra li jkunu ġew identifikati. |
Tittejjeb l-effiċjenza tal-Aġenzija tal-Impjiegi billi tiġi żviluppata sistema ta’ monitoraġġ tal-prestazzjoni u billi jiġu mmirati aħjar il-persuni l-aktar vulnerabbli, bħal ħaddiema b’livell baxx ta’ ħiliet u dawk anzjani, il-persuni li ilhom qiegħda għal żmien twil u r-Roma. |
•It-titjib fil-Prattiki edukattivi u ta’ taħriġ jidher importanti għas-suq tax-xogħol; jistgħu jiġu eżaminati politiki relatati mal-ksib ta’ parteċipazzjoni suffiċjenti, ikkonkretizzata fl-ilħuq ta’ livelli edukattivi ogħla. Jiġu żviluppati prattiki ta’ taħriġ u ta’ tagħlim tul il-ħajja mmirati lejn ħiliet speċifiċi, li għalihom hemm jew jista’ jkun hemm domanda fis-suq tax-xogħol •Miżuri speċifiċi għaż-żgħażagħ jistgħu jinkludu programmi li jkollhom l-għan li jżidu l-livelli edukattivi milħuqa u li jtejbu l-kwalifiki tagħhom permezz ta’ taħriġ immirat. Miżuri ta’ riintegrazzjoni għall-persuni b’esperjenza professjonali li ilhom qiegħda għal żmien twil jistgħu jinkludu azzjonijiet li b’mod effettiv jorbtu l-benefiċċji soċjali mal-parteċipazzjoni fit-taħriġ u l-impjiegi ssussidjati. Programmi li jserrħu fuq ir-responsabbiltà soċjali tan-negozji jistgħu wkoll jiġu eżaminati. |
Tiġi estiża l-kopertura u l-effettività tal-politiki attivi tas-suq tax-xogħol biex dawn ikunu jaqblu mal-profili ta’ persuni li jkunu qed ifittxu xogħol, u jitwettaq xogħol ta’ sensibilizzazzjoni għaż-żgħażagħ mhux irreġistrati li jkunu barra mill-impjieg, edukazzjoni jew taħriġ, f’konformità mal-objettivi ta’ garanzija għaż-żgħażagħ. |
|
•Jinstab il-bilanċ it-tajjeb bejn il-miżuri attivi u dawk passivi •Titqawwa l-effettività tat-trasferimenti soċjali biex jiġu żgurati standards adegwati tal-għajxien għal min jirċevihom |
Sabiex jittaffa l-faqar, jittejbu aktar l-aċċessibbiltà u l-effettività tas-servizzi soċjali u tat-trasferimenti għat-tfal u għall-persuni aktar imdaħħlin fiż-żmien. |
|
2015 | “Sommarju eżekuttiv”
•Il-politiki dgħajfin tas-suq tax-xogħol għadhom jistgħu jeskludu lill-ħaddiema mis-suq tax-xogħol fuq il-bażi ta’ prezzijiet. •In-nuqqas kemm ta’ prattiki edukattivi u ta’ taħriġ immirati kif ukoll ta’ politiki attivi tas-suq tax-xogħol jista’ jxekkel il-parteċipazzjoni fis-suq tax-xogħol u l-impjegabbiltà tal-forza tax-xogħol. |
Jiġi żviluppat approċċ integrat għal gruppi fil-marġni tas-suq tax-xogħol, b’mod partikolari ħaddiema aktar imdaħħlin fiż-żmien u żgħażagħ li jkunu barra mill-impjieg, edukazzjoni jew taħriġ. |
“IDR” It-titjib fl-impjegabbiltà ta’ żgħażagħ li jkunu barra mill-impjieg, edukazzjoni jew taħriġ (NEETs) għadu diffikultuż ħafna. |
Sors: Il-QEA.
43Fl-aħħar nett, in-nuqqas ta’ rabta jew ġustifikazzjoni bejn l-IDRs u s-CSRs rilevanti għall-MIP mill-2016 'il quddiem mhuwiex konsistenti ma’ dak li l-Kummissjoni ddikjarat fil-komunikazzjoni tagħha ta’ Ottubru 2015 lill-Parlament Ewropew, lill-Kunsill u lill-Bank Ċentrali Ewropew. Biex ittejjeb it-trasparenza u twettaq segwitu fi ħdan il-MIP, f’dak iż-żmien il-Kummissjoni ddikjarat li hija kienet “[…] se tippreżenta wkoll ġustifikazzjoni espliċita ta’ deċiżjonijiet meħuda, inkluż dwar ir-rakkomandazzjonijiet speċifiċi għall-pajjiżi marbuta mal-Proċedura ta' Żbilanċ Makroekonomiku […]” u “[…] tispjega aħjar ir-rabta bejn in-natura tal-iżbilanċi u kif dawn jiġu indirizzati f’rakkomandazzjonijiet speċifiċi għall-pajjiż”18.
L-ebda stima sistematika tal-impatt li s-CSRs rilevanti għall-MIP ikollhom fuq l-iżbilanċi
44B’mod ġenerali, il-Kummissjoni ma tipprovdix stimi ex ante jew ex post tal-impatt ekonomiku li s-CSRs rilevanti għall-MIP ikollhom fuq l-iżbilanċi. Dan huwa komprensibbli biss f’każijiet fejn ikun hemm diffikultajiet inerenti biex jiġu kkwantifikat b’mod kredibbli xi wħud mill-impatti minħabba n-natura tal-miżuri ta’ politika rrakkomandati (eż. analiżi tal-kwalità tal-assi jew testijiet tal-istress għas-settur bankarju, titjib fil-koordinazzjoni u fl-effiċjenza tas-servizzi pubbliċi), jew il-fatt li kwalunkwe impatt se jkun fuq terminu twil (riformi edukattivi u tas-suq tax-xogħol).
45Il-ftit eċċezzjonijiet huma r-referenzi għal studji esterni li jivvalutaw l-effetti tar-riformi strutturali fuq il-prodott domestiku gross (PDG)19 20, u l-eżerċizzju ta’ darba fid-dokumenti ta' ħidma tal-persunal dwar il-programmi nazzjonali ta’ riforma 2014 (PNR) tal-Istati Membri21. Stimar tal-impatt ekonomiku fuq l-iżbilanċi jkun jindika aħjar liema rakkomandazzjonijiet huma l-aktar rilevanti u għandhom il-probabbiltà li jkunu effettivi.
46Barra minn hekk, ċerti rakkomandazzjonijiet jistgħu jinnewtralizzaw l-impatt ta’ rakkomandazzjonijiet oħra, u hawnhekk jista’ jkun possibbli li tiġi pprovduta stima raġonevoli. Dan huwa l-każ ta’ rakkomandazzjonijiet baġitarji u ta’ CSRs oħra li jkollhom impatt fiskali. Pereżempju, is-CSR Nru 1/2013 rilevanti għall-MIP għal Spanja, Stat Membru taħt l-EDP, kienet tirrigwarda t-twettiq tal-aġġustament fiskali rrakkomandat mill-Kunsill biex il-korrezzjoni tad-defiċit eċċessiv tal-pajjiż tiġi żgurata. Fl-istess waqt, is-CSR Nru 4/2013 rilevanti għall-MIP indirizzat il-ħtieġa li s-servizzi pubbliċi tal-impjiegi jiġu rinfurzati u modernizzati biex tiġi żgurata l-effettività tal-assistenza individwalizzata għall-persuni qiegħda. Il-Kummissjoni ma stmatx jekk l-ispiża għar-reklutaġġ tal-persunal meħtieġ biex jipprovdi appoġġ individwalizzat li aktar minn 6 000 000 persuna li kienu qed ifittxu xogħol kinitx konsistenti mar-restrizzjonijiet fiskali li hija kienet appellat għalihom fl-ewwel rakkomandazzjoni tagħha.
Inkonsistenza fir-rakkomandazzjonijiet għaż-żona tal-euro
47Mill-2012 ’il hawn, il-Kummissjoni pproponiet ukoll rakkomandazzjonijiet għaż-żona tal-euro kollha kemm hi. Wara l-adozzjoni mill-Kunsill, dawn jiġu indirizzati lill-Grupp tal-Euro tal-ministri tal-finanzi; kif meħtieġ, l-ebda korp tal-UE ma jerfa’ responsabbiltà formali għall-implimentazzjoni tagħhom.
48Ma hemm l-ebda sistema fil-Kummissjoni biex tiżgura l-konsistenza bejn ir-rakkomandazzjonijiet għaż-żona tal-euro u s-CSRs għall-Istati Membri taż-żona tal-euro.
49Eżempju wieħed tal-problema jirrigwarda r-rakkomandazzjonijiet mill-Kummissjoni dwar il-pożizzjoni fiskali taż-żona tal-euro22. Meta l-politika monetarja tkun qed tiffaċċja diffikultajiet fit-tnaqqis tar-rati tal-imgħax, il-ġestjoni tal-pożizzjoni fiskali hija importanti biex it-tkabbir sostenibbli fid-domanda aggregata jiġi żgurat. Madankollu, mhuwiex il-kompitu tal-PST li jinfluwenza l-pożizzjoni fiskali ta’ Stat Membru ladarba dan ikun laħaq il-konformità mal-kriterji ta’ stabbiltà. Għalhekk, il-MIP tipprovdi qafas li fih jiġu indirizzati r-rakkomandazzjonijiet fiskali li jkunu rilevanti għaż-żona tal-euro kollha kemm hi.
50F’Novembru 2016, il-Kummissjoni rrakkomandat pożizzjoni fiskali pożittiva sabiex tistimula l-irkupru bħala appoġġ għall-politika monetarja tal-BĊE23. Din ir-rakkomandazzjoni ma kinitx konsistenti mar-rekwiżiti fiskali ssettjati fis-CSRs li nħarġu għall-Istati Membri taż-żona tal-euro xi sitt xhur qabel, li implika pożizzjoni fiskali moderatament restrittiva għaż-żona tal-euro kollha kemm hi għall-2017 u l-2018. Billi l-prospettiva għat-tkabbir tal-PDG ma kinitx marret għall-agħar matul dawk is-sitt xhur, ma kien hemm l-ebda raġuni għall-inkonsistenza. Ma jsir l-ebda mekkaniżmu effettiv biex jiġu ffaċilitati t-tensjonijiet li jistgħu jinqalgħu bejn dak li huwa fiskalment mixtieq għaż-żona tal-euro u s-somma tas-CSRs fiskali għall-Istati Membri.
Skeda ta’ żmien diffikultuża ħafna għall-implimentazzjoni tas-CSRs rilevanti għall-MIP
51Il-Kummissjoni ddikjarat li hija tistenna li s-CSRs rilevanti għall-MIP jiġu implimentati fi żmien 12 sa 18-il xahar. Billi dan it-tbassir ta’ spiss ikun ottimist wisq, huwa jaffettwa l-istatistika tal-implimentazzjoni. Ħafna CSRs rilevanti għall-MIP huma kumplessi u jirrikjedu rispons minn għadd kbir ta’ partijiet interessati. Għadd kbir ta’ CSRs rilevanti għall-MIP jiġu ripetuti sena wara sena, u għaldaqstant jiġu rreġistrati bħala mhux implimentati. Il-prattika tal-Kummissjoni tikkuntrasta ma’ dik tal-FMI u tal-OECD, li t-tnejn li huma jistrutturaw il-parir tagħhom dwar il-politiki tul linji aktar tematiċi. B’konnessjoni ma’ dan, ara l-paragrafu 78.
52Din id-diffikultà ġiet, sa ċertu punt, ikkorroborata mir-risposti għall-mistoqsija tal-istħarriġ għall-KPE “Is-CSRs għall-Istat Membru tiegħek huma realistiċi?” Madwar 53 % tal-wiġġieba qisuhom “realistiċi”, 26 % “kemxejn mhux realistiċi” u 11 % “assolutament mhux realistiċi” (ara l-Figura j fl-Anness VI). Ir-raġuni prinċipali li ngħatat għalfejn is-CSRs tqiesu li mhumiex realistiċi kienet l-iskeda ta’ żmien diffikultuża ħafna għall-implimentazzjoni.
Il-klassifikazzjoni tal-iżbilanċi hija nieqsa mit-trasparenza, u l-EIP qatt ma ġiet attivata
53Din it-taqsima tħares lejn il-loġika u l-proċess wara l-valutazzjoni, imwettqa mill-Kummissjoni, tas-severità tal-iżbilanċi.
Is-sistema tal-kategoriji kienet tipikament kumplessa u suġġetta għal bidla
54Ir-Regolament dwar il-MIP ippreveda li l-Istati Membri se jkunu evalwati bħala li ma għandhom l-ebda żbilanċ, għandhom żbilanċi, jew għandhom żbilanċi eċċessivi.
55Madankollu, fl-2012, il-Kummissjoni stabbiliet ħames kategoriji. Dawn espandew għal sitta fl-2013. Fl-2014 intuża sett differenti ta’ sitta n. Il-kategoriji ġew iddifferenzjati skont is-severità tal-iżbilanċi u l-livell ta’ monitoraġġ meħtieġ. Fl-aħħar nett, il-kategoriji tnaqqsu għal erbgħa biss fl-2016 (ara t-Tabella 3). Il-biċċa l-kbira mill-partijiet interessati li tkellimna magħhom laqgħu b’sodisfazzjon it-tnaqqis fuq il-bażi li dan kien issimplifika l-proċedura.
2012 | 2013 | 2014 | 2015 | 2016 | 2017 |
---|---|---|---|---|---|
L-ebda żbilanċ | L-ebda żbilanċ | L-ebda żbilanċ | L-ebda żbilanċ | ||
DK, LU, MT | AT, BE, EE, HU, RO, UK | FI | |||
Żbilanċi, li mhumiex eċċessivi iżda jeħtieġ li jiġu indirizzati | Żbilanċi, li jistħoqqilhom monitoraġġ u azzjoni politika | Żbilanċi, li jirrikjedu monitoraġġ u azzjoni politika | Żbilanċi | ||
BE, BG, DK, FI, SE, UK | BE, BG, DK, FI, MT, NL, SE, UK | BE, BG, DE, FI, NL, SE, UK | BE, FI, NL, RO, SE, UK | ||
Żbilanċi serji, li mhumiex eċċessivi iżda jeħtieġ li jiġu indirizzati | Żbilanċi, li jirrikjedu monitoraġġ u azzjoni politika deċiżiva | Żbilanċi, li jirrikjedu monitoraġġ u azzjoni politika deċiżiva | |||
FR, HU, IT, SI | FR, HU, IT | HU | DE, HU | ||
Żbilanċi serji ħafna, li mhumiex eċċessivi iżda jeħtieġ li jiġu indirizzati urġentement | Żbilanċi, li jirrikjedu monitoraġġ speċifiku u azzjoni politika deċiżiva | ||||
CY, ES | ES, FR, IE | ES, IE, SI | DE, ES, FI, IE, NL, SE, SI | DE, ES, IE, NL, SE, SI | |
Żbilanċi eċċessivi, li jirrikjedu azzjoni politika b’saħħitha (monitoraġġ speċifiku) | Żbilanċi eċċessivi, li jirrikjedu monitoraġġ speċifiku u azzjoni politika deċiżiva | Żbilanċi eċċessivi | |||
ES | |||||
Żbilanċi eċċessivi, li jirrikjedu azzjoni politika urġenti (monitoraġġ speċifiku) | |||||
SI | HR, IT, SI | BG, FR, HR, IT, PT | BG, CY, FR, HR, IT, PT | BG, CY, FR, HR, IT, PT | |
Proċedura ta’ Żbilanċ Eċċessiv | Proċedura ta’ Żbilanċ Eċċessiv | Żbilanċi eċċessivi, li jirrikjedu azzjoni politika deċiżiva u l-attivazzjoni tal-Proċedura ta’ Żbilanċ Eċċessiv | Żbilanċ eċċessiv bi pjan ta’ azzjoni korrettiva (Proċedura ta’ Żbilanċ Eċċessiv) |
Sors: Il-QEA.
56Mill-2013 'il hawn, il-klassifikazzjonijiet differenti għandhom inkomuni l-preżenza ta’ kategorijafejn jiġu identifikati żbilanċi eċċessivi iżda, f’dawn il-każijiet, il-Kummissjoni qatt ma pproponiet l-attivazzjoni ta’ EIP. Din il-possibbiltà mhijiex espliċitament prevista fir-Regolament dwar il-MIP (ara l-Kaxxa 3). Mid-dokumentazzjoni tal-Kummissjoni, mhuwiex ċar minn fejn ġiet il-prattika li jiġu identifikati żbilanċi eċċessivi iżda li ma tiġix irrakkomandata l-attivazzjoni ta’ EIP, u jidher li din ġiet deċiża fil-livell politiku. Sa issa, il-Kummissjoni dejjem evitat milli tirrakkomanda l-attivazzjoni tal-EIP iżda mingħajr l-ebda loġika ċara (ara l-paragrafu 63).
Kaxxa 3
Meta jenħtieġ li tiġi attivata l-EIP?
L-Artikolu 2 tar-Regolament dwar il-MIP jiddefinixxi biss “żbilanċi” u “żbilanċi eċċessivi”.
Mill-Artikolu 7(1), dwar il-ftuħ tal-EIP: “Jekk, fuq il-bażi tar-reviżjoni fil-fond imsemmija fl-Artikolu 5, il-Kummissjoni tqis li l-Istat Membru kkonċernat huwa affettwat bi żbilanċi eċċessivi, din għandha tinforma b’dan lill-Parlament Ewropew, lill-Kunsill u lill-grupp tal-Euro kif meħtieġ.” L-Artikolu 7(2) imbagħad jiddikjara li l-Kunsill “jista’” jattiva l-proċedura, filwaqt li jindika li dan huwa suġġett għad-diskrezzjoni tal-Kunsill.
Madankollu, il-Kummissjoni tqis li hija tgawdi s-setgħa ta’ diskrezzjoni dwar jekk għandhiex tirrakkomanda l-EIP anke jekk hija tkun tqis li Stat Membru jkun affettwat minn żbilanċi eċċessivi. Skont rapporti li saru, hija tibbaża din l-interpretazzjoni fuq l-Artikolu 121(4) tat-Trattat dwar il-Funzjonament tal-Unjoni Ewropea, li jinqara hekk:
“Meta jiġi stabbilit, taħt il-proċedura prevista fil-paragrafu 3, li l-politika ekonomika ta' Stat Membru mhijiex konformi mal-linji direttivi ġenerali previsti fil-paragrafu 2 jew li hemm ir-riskju li tipperikola l-funzjonament xieraq tal-Unjoni ekonomika u monetarja, il-Kummissjoni tista' tindirizza twissija lill-Istat Membru kkonċernat.”
Ir-rabta bejn l-analiżi u l-kategorija ta’ żbilanċi mhijiex dejjem ċara
57L-Artikolu 5(2) tar-Regolament dwar il-MIP jiddikjara li jenħtieġ li l-IDR “tinkludi stima ta’ jekk l-Istat Membru […] hux milqut mill-iżbilanċi, u jekk dawn l-iżbilanċi humiex żbilanċi eċċessivi”. Dan jimplika li l-Kummissjoni trid tipproduċi rabta ċara bejn l-analiżi ekonomika u l-kategorija magħżula ta’ żbilanċi.
58Fil-prattika, l-IDRs ma jinkludux xi konklużjoni dwar il-klassifikazzjoni tal-iżbilanċi għall-Istati Membri. Minflok, din tinsab fil-komunikazzjoni ta’ akkumpanjament, mill-Kummissjoni. Barra minn hekk, aħna sibna li l-konklużjonijiet irrakkomandati dwar l-iżbilanċi mhux dejjem ikunu bbażati b’mod ċar fuq l-analiżi li tkun twettqet fl-IDR korrispondenti. Pereżempju:
- Fl-2015, wara rakkomandazzjoni li saret mid-DĠ ECFIN, l-istatus tal-Bulgarija ttella’ tliet livelli, minn “żbilanċi li jirrikjedu monitoraġġ u azzjoni politika” għal “żbilanċi eċċessivi li jirrikjedu monitoraġġ speċifiku u azzjoni politika deċiżiva”. Id-deċiżjoni biex isir dan kienet fil-biċċa l-kbira bbażata fuq falliment bankarju uniku li seħħ fl-2014 u t-tħassib riżultanti tal-Kummissjoni dwar l-istabbiltà finanzjarja. Il-klassifikazzjoni nżammet fl-2016, għalkemm l-IDR ta’ dik is-sena wriet li l-ebda wieħed mir-riskji finanzjarji li ġew identifikati fl-2015 ma kien immaterjalizza.
- Fl-2015, wara rakkomandazzjoni li saret mid-DĠ ECFIN biex il-proċedura tiġi skalata, Franza ttellgħet livell wieħed għal “żbilanċi eċċessivi li jirrikjedu monitoraġġ speċifiku u azzjoni politika deċiżiva”. Madankollu, fil-fehma tagħna, l-IDR ma kinitx identifikat bidliet sinifikanti minn sena għal sena fil-fatturi li fuqhom kienet ibbażata l-valutazzjoni. Fl-istess waqt, għalkemm Franza wkoll kienet taħt l-EDP (il-fergħa korrettiva tal-PST), din il-proċedura ma ġietx skalata minkejja li l-kelma “eċċessiv” dehret biss fl-IDR fir-rigward ta’ defiċits fiskali.
- L-IDR tal-2016 għar-Renju Unit (taħt l-EDP mill-2008 'l hawn) ikkonkludiet li ma kien hemm l-ebda żbilanċ, u l-AMR tal-2017 għar-Renju Unit lanqas biss ma kien jirrikjedi IDR. Dan ġara minkejja referenza li saret fl-IDR tal-2016 għal defiċit persistentement kbir (l-akbar wieħed dik is-sena fl-UE) fil-kont kurrenti, u tkabbir kontinwu fil-prezzijiet tad-djar, mill-2013 'il hawn, minn livelli li diġà kienu għoljin b’mod esaġerat.
Is-sitwazzjoni ġiet aggravata fl-2017, meta l-IDRs kompluti ġew sostitwiti minn “ommarji” fir-rapporti għall-pajjiżi (ara l-paragrafu 69).
60It-twaqqit tal-pubblikazzjoni jagħti x’tifhem li l-kompiti tal-analiżi u tal-klassifikazzjoni huma wkoll separati funzjonalment. Fl-2012, fl-2014 u fl-2017, l-IDRs u l-komunkazzjoni li kienu jħabbru l-klassifikazzjoni ġew ippubblikati fl-istess jum, filwaqt li fl-2013 u fl-2016 l-IDRs ġew ippubblikati l-ewwel u l-klassifikazzjoni tal-iżbilanċi ġiet ippubblikata ġimagħtejn wara. Fl-2015, il-klassifikazzjoni tal-iżbilanċi ġiet ippubblikata jum qabel l-IDRs.
Fl-aħħar fażijiet, il-proċess huwa politiku aktar milli tekniku
61Attwalment, il-Kummissjoni għandha proċess b’bosta stadji għall-klassifikar tal-iżbilanċi. L-ewwel nett, il-persunal tal-Kummissjoni jibgħat parir bil-miktub lill-Kummissarju għall-Affarijiet Ekonomiċi u Finanzjarji rigward il-klassifikazzjoni ta’ kull Stat Membru li kien suġġett għal IDR. Aħna sibna li dawn is-suġġerimenti jipprovdu parir tekniku ċar u huma konsistenti bejn il-pajjiżi u matul iż-żmien.
62Wara li dan il-parir jitqies mill-kabinett tal-Kummissarju u, mill-2014 'il hawn, mill-Viċi President għall-Euro u d-Djalogu Soċjali (li għandu responsabbiltà konġunta għall-MIP) abbozz ta’ komunikazzjoni jintbagħat għal skrutinju lill-kabinetti kollha tal-Kummissarji u, fl-aħħar nett, lill-Kulleġġ tal-Kummissarji nnifsu għall-adozzjoni.
63Bejn l-2012 u l-2016, ċerti Stati Membri ġew identifikati bħala li kellhom żbilanċi eċċessivi f’16-il okkażjoni. Madankollu, il-Kulleġġ qatt ma bagħat proposta għal EIP lill-Kunsill. Matul l-awditu tagħna, il-Kummissjoni pproduċiet ftit li xejn evidenza li tkun tispjega għalfejn il-Kulleġġ ma pproponiex l-EIP.
64In-nuqqas ta’ attivazzjoni sistematiku tal-EIP naqqas il-kredibbiltà u l-effettività tal-MIP. Din hija wkoll il-fehma ta’ għadd ta’ partijiet interessati, li jirrappurtaw li n-nuqqas ta’ attivazzjoni dgħajjef il-proċedura f’termini kemm tal-abbiltà tagħha li tindirizza l-iżbilanċi kif ukoll tal-valur ta’ deterrent tagħha. Ir-Rapport tal-Ħames Presidenti24 jissuġġerixxi wkoll l-użu sħiħ tal-MIP, inkluża l-attivazzjoni tal-EIP. Barra dan, il-BĊE ddikjara li l-użu sħiħ u effettiv tal-istrumenti kollha disponibbli taħt il-MIP – inkluża l-fergħa korrettiva tagħha – huwa meħtieġ, u huwa tenna dan il-messaġġ f’diversi okkażjonijiet25.
65Partijiet interessati oħra jissuġġerixxu li l-użu tal-EIP f’ċirkustanzi li ma jkunux ċari jkun jaffettwa wkoll il-kredibbiltà tagħha, u li jenħtieġ li din tintuża biss f’ċirkustanzi ovvji ħafna.
66Ir-Regolament dwar il-MIP jafda bis-sħiħ lill-Kummissjoni bil-klassifikar tal-iżbilanċi. Madankollu, aħna qbadna bosta nuqqasijiet fil-mod kif dan isir:
- L-ewwel nett, ma ntweritilna l-ebda evidenza li l-Kulleġġ u l-kabinetti għandhom proċedura formali biex iqisu l-parir li jingħata mid-DĠ ECFIN u biex jiddokumentaw l-iskambji tagħhom.
- It-tieni nett, qabel l-2017, l-abbozz ta’ komunikazzjoni dwar l-iżbilanċi ġie ċċirkolat tard ħafna lill-Kulleġġ. Dan kiser ir-regoli interni tal-Kummissjoni, li suppost jiżguraw li l-Kulleġġ ikun ta kunsiderazzjoni xierqa lid-deċiżjonijiet tagħha.
- It-tielet nett, bħalissa ma hemm l-ebda gwida ċara bil-miktub dwar iċ-ċirkustanzi li fihom il-Kummissjoni tkun trid tiddeċiedi li tipproponi attivazzjoni tal-EIP.
Il-prominenza tal-IDRs naqset konsiderevolment matul iż-żmien. Il-kwalità analitika tibqa’ tajba, iżda jeħtieġ li jsir xi titjib f’xi aspetti ewlenin tal-IDRs
67Din it-taqsima tħares lejn il-preżentazzjoni tal-IDRs li qed tevolvi u lejn il-kwalità tal-għodod analitiċi u tal-analiżi ekonomika li l-Kummissjoni tuża għall-identifikazzjoni u l-valutazzjoni tal-iżbilanċi.
Il-prominenza tal-IDRs naqset konsiderevolment matul iż-żmien
68Il-konfini bejn l-IDRs u r-rapporti annwali għall-pajjiżi saru dejjem aktar imċajpra. Il-Kummissjoni kellha l-għan li tissimplifika l-analiżi u l-parir tagħha dwar il-politiki għall-Istati Membri fi ħdan il-qafas wiesa’ tas-Semestru Ewropew li tkopri l-koordinazzjoni ta’ politika. Madakollu, il-fużjoni tal-IDRs mar-rapporti għall-pajjiżi naqqset il-fokus fuq il-MIP u l-objettiv distint tagħha li taqbad u tipprevieni l-iżbilanċi.
69Għall-ewwel tliet snin, l-IDR kienet dokument awtonomu ipprovdut prinċipalment mid-DĠ ECFIN, b’kontribuzzjonijiet mid-DĠ EMPL u minn direttorati ġenerali oħra. Fl-2015, din saret it-Taqsima 2 tar-rapport għall-pajjiż, li l-bqija minnu huwa r-riżultat ta’ analiżi li preċedentement kienet inkluża f'dokument ta' ħidma tal-persunal (li issa ma għadux jinħareġ), li kien jivvaluta l-PNR tal-Istat Membru fil-kuntest tas-Semestru Ewropew. B'riżultat tal-fużjoni tneħħiet it-taqsima “sfidi dwar il-politiki” tal-IDR (sommarju ta’ sfidi makroekonomiċi ewlenin u risposti possibbli) tneħħiet. Barra minn hekk, it-titli użati fir-rapporti għall-pajjiżi huma standardizzati issa u għalhekk ma jirriflettux is-severità tal-iżbilanċi fl-Istat Membru kkonċernat.
70Fl-2016, it-tneħħija tat-taqsima “sfidi dwar il-politiki” ġiet indirizzata parzjalment miż-żieda ta’ “matriċi għall-valutazzjoni tal-MIP”, tabella utli li tagħti sommarju tas-sejbiet prinċipali tal-IDR. Madankollu, it-tabella ma tipprovdix xi indikazzjoni tal-miżuri possibbli biex l-isfidi identifikati fl-IDR jiġu indirizzati.
71Il-format tar-rapporti għall-pajjiżi ġie modifikat aktar fl-2017: minbarra li qassrithom b’mod ġenerali, il-Kummissjoni rrestrinġiet l-IDR għall-matriċi għall-valutazzjoni tal-MIP u għal dikjarazzjoni qasira tas-sejbiet prinċipali (it-Taqsima 3). Dettalji tal-problemi prinċipali kollha, inklużi l-iżbilanċi makroekonomiċi, li jaffettwaw l-Istat Membru jinstabu skont it-tema fit-Taqsima 4 “Prijoritajiet ta’ riforma”. Asterisk fit-titlu jindika suġġetti li huma rilevanti għall-MIP u li jikkontribwixxu għas-sommarju fit-Taqsima 3.
72Dawn il-bidliet fil-format kienu mmotivati mis-Segretarjat Ġenerali tal-Kummissjoni, li l-importanza tiegħu fil-proċess kibret matul iż-żmien. Issa, is-Segretarjat Ġenerali jiggwida wkoll il-ħruġ tar-rapporti għall-pajjiżi permezz ta’ timijiet tal-pajjiżi, organizzati fid-dipartimenti kollha tal-Kummissjoni. Id-DĠ EMPL issa jipprovdi proporzjon akbar tal-input analitiku26, b’mod partikolari dwar l-impjiegi u l-iżviluppi soċjali, u l-IDR/ir-rapport għall-pajjiż ma baqax jinħareġ daqstant mid-DĠ ECFIN. Il-partijiet interessati jirrappurtaw li dawn l-iżviluppi naqqsu l-viżibbiltà tal-MIP.
73Minn meta twettqet il-fużjoni, il-komunikazzjoni dwar l-IDRs ġiet sostitwita minn komunikazzjoni ferm aktar ġenerali dwar ir-rapporti għall-pajjiżi. Biex jiġġieled kontra din il-problema, f’Ġunju 2015 id-DĠ ECFIN ippubblika stampa ġenerali tas-sejbiet tal-IDR27 ta’ dik is-sena biex jindika l-iżviluppi li kienu komuni fil-pajjiżi kollha u li kienu marbuta max-xenarju ekonomiku li kien qed jinbidel. Madankollu, l-ebda stampa ġenerali ma ġiet ippubblikata fl-2016 jew, sa issa, fl-2017.
74Issa, l-analiżi tal-iżbilanċi makroekonomiċi hija parti mill-analiżi kumplessiva tal-problemi strutturali fi Stat Membru. Għaldaqstant, l-iżbilanċi tnaqqsitilhom il-prominenza li kellhom meta l-IDR kienet dokument separat. Dan jagħmilha diffiċli biex il-problemi fuq terminu qasir (żbilanċi) jintgħarfu minn dawk fuq terminu twil (tkabbir).
75Fil-qosor, l-isforzi li saru biex għas-simplifikazzjoni tas-Semestru Ewropew naqqsu l-viżibbiltà tal-MIP. Madankollu, il-komunikazzjoni effettiva hija ta’ importanza ċentrali biex il-pubbliku jkun jista’ jifhem il-proċedura u l-isfidi li l-iżbilanċi makroekonomiċi joħolqu għall-Istati Membri. Jeħtieġ ukoll li l-komunikazzjoni tissaħħaħ sabiex ikun hemm titjib fis-sjieda nazzjonali. Din il-fehma ġiet ripetutament enfasizzata mill-partijiet interessati matul iż-żjarat ta’ informazzjoni li wettaqna.
Minkejja standard tajjeb ta’ analiżi, jeħtieġ li jsir titjib f’xi aspetti tal-IDRs
76F’Novembru 2016, ħames snin wara l-introduzzjoni tal-MIP, id-DĠ ECFIN ippubblika dokument bit-titlu “The Macroeconomic Imbalance Procedure – Rationale, Process, Application: a Compendium” (Il-Proċedura ta' Żbilanċ Makroekonomiku – Prinċipji ġustifikattivi, Proċess, Applikazzjoni: Kompendju). Fil-biċċa l-kbira, il-Kompendju jibbaża fuq materjal analitiku li ġie ppreżentat lill-kumitati tal-Kunsill jew li ġie ppubblikat qabel f’diversi formats. Il-konsolidazzjoni tal-qafas kollu kemm hu f’din il-pubblikazzjoni, għalkemm tard, hija milqugħa tajjeb billi għenet lill-Istati Membri u lil partijiet interessati oħra jifhmu l-MIP u, b’mod partikolari, il-loġika għal ċerti deċiżjonijiet.
77Il-Kompendju jiddeskrivi xi għodod analitiċi li d-DĠ ECFIN juża fil-valutazzjoni tal-iżbilanċi makroekonomiċi. Madankollu, dan jista’ jittejjeb aktar billi tiġi inkluża informazzjoni dwar l-għodod li jintużaw mill-Kummissjoni f’analiżijiet rikorrenti oħra ta’, pereżempju, l-istabbiltà tas-sistema bankarja, l-iżviluppi rilevanti għall-MIP fis-suq tax-xogħol u l-kwalità tal-politiki tas-suq tax-xogħol.
78Skont partijiet interessati u esperti li kkonsultajna, l-istandard ta’ analiżi fl-IDRs kien b’mod ġenerali tajjeb. Il-Kummissjoni tieħu inkunsiderazzjoni ċ-ċirkustanzi kollha speċifiċi għall-pajjiż kif ukoll informazzjoni rilevanti oħra li tiġi pprovduta mill-Istati Membri. Xi Stati Membri raw il-ħtieġa li jtejbu l-kondiviżjoni tal-informazzjoni, u l-Kummissjoni reċentement għamlet sforzi f’dan ir-rigward.
79L-istħarriġ tagħna għall-KPE kkonferma dawn is-sejbiet. Il-maġġoranza l-kbira tal-wiġġieba (89 %) iddeskrivew il-kwalità tal-IDR tal-Istat Membru tagħhom bħala “tajba”, filwaqt li 11 % għażlu “medja”. Ħadd minnhom ma ddeskriva l-kwalità bħala “tajba ħafna”, “ħażina” jew “ħażina ħafna” (ara l-Figura d fl-Anness VI). Meta mqabbel ma’ rapporti simili mill-istituzzjonijiet pari, 68 % tal-membri tal-KPE għażlu “l-ebda differenza”, 26 % qalu “aħjar”, u 5 % qalu li l-IDRs kienu “agħar” (ara l-Figura u fl-Anness VI). Il-wiġġieba kollha qablu li l-IDRs ħadu kont ta’ informazzjoni speċifika għall-pajjiż li kienet rilevanti (53 % “sa livell għoli” u 47 % “sa ċertu livell”, ara l-Figura e fl-Anness VI).
80Meta mqabbel mar-rapporti ta’ organizzazzjonijiet internazzjonali oħra (l-FMI, l-OECD), li jużaw approċċ “tematiku”, l-IDRs ta’ spiss isemmu l-istess problemi sena wara sena. Anke meta jitqies il-fatt li xi żbilanċi huma persistenti u ma jistgħux jiġu injorati, dan ta’ spiss jirriżulta f’analiżi repetittiva bi ftit li xejn valur miżjud u messaġġ li jibqa’ b'mod ġenerali l-istess minn sena għal oħra.
81Ir-Regolament dwar il-MIP jirrikjedi li l-Kummissjoni tieħu inkunsiderazzjoni l-“interkonnessjonijiet kummerċjali u finanzjarji qawwija bejn l-Istati Membri u l-effett laterali tal-linji ta’ politika ekonomika nazzjonali”28. Il-Kummissjoni żviluppat għadd ta’ għodod ekonomiċi29 biex tindirizza dawn l-aspetti.
82Madankollu, ta’ spiss l-analiżi tar-riperkussjonijiet30 tkun dgħajfa. Fl-erba’ Stati Membri magħżula din ġiet applikata kemxejn b’mod inkonsistenti. Pereżempju, sal-2014 kienet tingħata biss kunsiderazzjoni każwali għall-kontaġju31 sovran (riperkussjoni minn barra) fis-Slovenja. Fil-Bulgarija, ma ngħatat l-ebda kunsiderazzjoni għall-kundizzjonijiet ġenerali tas-suq għall-pajjiż bħala Stat Membru żgħir barra mit-territorju taż-żona tal-euro. Il-fatt li r-riperkussjonijiet jiġu injorati jwassal lill-Kummissjoni biex tiffoka żżejjed fuq żviluppi li jkunu intrinsiċi għal Stat Membru partikolari.
83Mill-2015 'il hawn, kien hemm politika li jissemmew ukoll ir-riperkussjonijiet 'il barra fl-IDRs tal-ħames l-akbar Stati Membri taż-żona tal-euro. Dan huwa żvilupp pożittiv.
84Ir-riperkussjonijiet 'il ġewwa ssemmew fl-IDRs fil-kampjun għas-snin kollha, għalkemm il-kopertura u l-profondità kienu jvarjaw. Pereżempju l-kontaġju sovran ma tqiesx f’ħafna dettall, lanqas fl-2012 u fl-2013 meta d-differenzi fir-rendimenti tad-dejn sovran32 kienu partikolarment għoljin.
85Biex nikkonkludu rigward ir-riperkussjonijiet, l-għodod analitiċi li jintużaw mhumiex konsistentement parti mill-analiżi mwettqa mill-pajjiżi. Madankollu, sar xi titjib speċifikament permezz tal-pubblikazzjoni tal-matriċi għall-valutazzjoni tal-MIP mill-2016 'il quddiem.
86B’mod ġenerali, l-IDRs ma jivvalutawx il-mod kif il-politika fiskali taffettwa l-iżbilanċi esterni. L-uniku Stat Membru li twettqitlu valutazzjoni komprensiva sa issa huwa l-Ġermanja, li tgawdi minn bilanċ pożittiv kbir fil-kont kurrenti. Madankollu, ma saretl-ebda analiżi simili għall-pajjiżi li għandom defiċit strutturali fil-kont kurrenti, pożizzjoni ta' investiment internazzjonali netta negattiva kbira jew problemi ta’ kompetittività (ara l-Kaxxa 4). Fuq il-front fiskali, l-IDRs huma prinċipalment limitati għal diskussjoni qasira dwar l-iżviluppi tad-dejn fis-settur pubbliku.
Kaxxa 4
Żbilanċi esterni u politika fiskali
Il-Kummissjoni wettqet analiżi bir-reqqa tal-bilanċi pożittivi fil-kontijiet kurrenti tal-Ġermanja fl-IDRs tal-2015 u 2016 tagħha, u kkonkludiet li jenħtieġ li l-pajjiż juża l-ispazju fiskali tiegħu (il-kapaċità tiegħu li jonfoq aktar mingħajr ma jmur kontra l-kriterji tal-PST) biex itejjeb id-domanda domestika u jżid l-investiment pubbliku. Fl-2016, il-Kunsill dgħajjef il-proposta li saret mill-Kummissjoni billi ħassar il-parti tar-rakkomandazzjoni dwar l-ispazju fiskali.
Fl-2017, it-taqsima tal-IDR tar-rapport mill-pajjiż dwar il-Ġermanja kien fiha wkoll analiżi33 tar-riperkussjonijiet pożittivi li politika fiskali espansjonarja jkollha fuq iż-żona tal-euro. Il-Kummissjoni reġgħet ħeġġet lill-Ġermanja biex tuża għodod fiskali, kemm biex tibbilanċja mill-ġdid il-kont kurrenti tagħha kif ukoll biex tgħin lil pajjiżi oħra jibbilanċjaw mill-ġdid id-defiċit estern tagħhom. Ir-referenza għall-impatt tal-politiki fiskali fuq l-iżbilanċi esterni u fuq il-kompetittività kienet żvilupp importanti.
Minkejja dan ta’ hawn fuq, il-Kummissjoni ma analizzatx il-konnessjoni bejn il-politika fiskali u l-iżbilanċi esterni dgħajfin fi Stati Membri sistemiċi oħra (notevolment Spanja u Franza), u lanqas ma rrakkomandat li dawn jissikkaw il-politika fiskali tagħhom biex jiffavorixxu r-riekwilibriju estern.
L-IDR tal-2015 għal Spanja vvalutat li t-titjib fil-kont kurrenti ewlieni kien permanenti. Billi għamlet dan, hija ttraskurat komponenti ċikliċi importanti, bħad-deprezzament tal-euro, miżuri tal-BĊE li kienu għenu biex ir-rati tal-imgħax fuq id-dejn estern jitbaxxew, u spejjeż tal-importazzjoni li kienu tnaqqsu minħabba prezz taż-żejt ħafna aktar baxx. Fl-IDR tal-2016 tagħha, il-Kummissjoni ħadet vantaġġ mit-titjib li kien sar fil-bilanċ estern ewlieni biex tevita diskussjoni dwar l-evoluzzjoni tal-kont kurrenti strutturali. Il-pożizzjoni ta' investiment internazzjonali netta negattiva kbira ssemmiet ripetutament bħala problema, iżda ma saret l-ebda rabta mal-politika fiskali ta’ Spanja, li kienet diġà espansjonarja minkejja r-ritorn reċenti għal tkabbir b’ritmu li kien aktar mgħaġġel mir-rata potenzjali ta’ tkabbir tal-output.
Fl-IDR tagħha tal-2017 għal Franza, il-Kummissjoni identifikat dgħufijiet fil-kompetittività kif ukoll is-sehem mis-suq, li dejjem qed jonqos, tal-esportazzjonijiet għal sħab kummerċjali ewlenin iżda ma analizzatx il-possibbiltà li tuża politika fiskali biex tippromwovi riekwilibriju estern u tittrasferixxi r-riżorsi lejn is-settur kummerċjabbli.
Fil-każ tas-Slovenja u l-Bulgarija, aħna sibna dgħufijiet fl-analiżi tal-iżbilanċi u fir-rakkomandazzjonijiet riżultanti tal-politika (ara l-Kaxxa 5).
Kaxxa 5
Eżempji ta' dgħufijiet fl-analiżijiet tal-iżbilanċi
➢ Dwar is-suġġett tar-riforma tas-suq tax-xogħol, l-IDR tal-2013 għas-Slovenja wissiet li ż-żieda fil-paga minima jkollha impatt negattiv sinifikanti fuq l-impjiegi, u b’hekk possibbilment idewwem l-irkupru tal-impjiegi, filwaqt li żżid il-pressjoni fuq il-pagi ladarba jerġa’ jibda t-tkabbir ekonomiku, u għaldaqstant ikun hemm riskju ta’ tnaqqis ulterjuri fil-kompetittività. Fil-Komunkazzjoni tal-2013 li ħabbret il-klassifikazzjoni, iż-żieda fil-paga minima ngħatat bħala waħda mir-raġunijiet għalfejn ingħatat il-klassifikazzjoni aktar ħarxa tal-MIP fis-Slovenja, biex din spiċċat fil-livell ta’ “żbilanċi eċċessivi”.
Għadd ta’ fatti jagħtu x’jifhmu li jeħtieġ li l-Kummissjoni toqgħod aktar attenta fil-valutazzjoni tagħha:
- Il-kobor tal-impatt kien ibbażat fuq dokument34 li uża data mill-2008 biex jistma biss l-elastiċità kostanti tad-domanda għall-ħaddiema. Riċerka35 oħra li kienet disponibbli fl-istess żmien issuġġeriet li l-impatt taż-żieda fil-paga minima jkun ħafna iżgħar.
- Il-Kummissjoni ma ħaditx inkunsiderazzjoni r-ripartizzjoni, skont is-settur, tal-impjegati li bbenefikaw mill-paga minima biex tifhem l-impatt fuq l-impjiegi u l-kompetittività kumplessiva.
- Il-valutazzjoni tal-impatt għas-Slovenja kienet differenti ħafna minn dik għal Stati Membri kumparabbli oħra li kienu qed jersperjenzaw żidiet ogħla fil-paga minima, kopertura usa’ tal-impjegati u proporżjon simili tal-paga minima/paga medja (eż. il-Bulgarija).
It-tbassir negattiv tal-impjieg għas-Slovenja fl-aħħar mill-aħħar ma mmaterjalizzax, u dan wassal lill-OECD biex tikkonkludi36: l-eżiti baqgħu konsistenti mat-tbassir ta’ impatt (modest) negattiv.
➢ L-IDR tal-2013 għas-Slovenja ddikjarat li l-banek tal-Istat iġarrbu governanza korporattiva li ta’ spiss tkun tal-aħjar livell u kkonkludiet li l-privatizzazzjoni tkun tgħin biex jiġu indirizzati defiċjenzi ċari ta’ governanza korporattiva, iżda mingħajr ma tat xi eżempju konkret ta’ dawn il-problemi ta’ governanza.
➢ Fl-IDR tagħha tal-2015 għall-Bulgarija, il-Kummissjoni osservat li l-banek tal-Istat iddebitaw, bħala medja, mgħax ogħla fuq is-self korporattiv li kienu qed jagħtu, u rraġunaw li dan il-profil jindika differenzi meta mqabbla mal-bqija tas-sistema bankarja, mhux biss fil-kwalità medja tal-kreditu tal-mutwatarji iżda wkoll fl-istandards ta’ ġestjoni, fil-prattiki ta’ sottoskrizzjoni tal-kreditu, fit-tip ta’ kollateral u fir-riskju sottostanti tal-portafoll. Għal darb’oħra, ma ngħatat l-ebda analiżi jew evidenza ulterjuri biex issostni din l-inferenza.
Il-Kummissjoni ssuktat billi osservat li l-banek tal-Istat kienu rrappurtaw kwalità tal-assi li kienet aħjar mill-pari tagħhom li kellhom sidien barranin, u esprimiet tħassib dwar l-effettività tas-superviżjoni bankarja. Filwaqt li dan il-fatt jista’ jirrifletti prattiki ħżiena ta’ rappurtar kif ukoll ir-riskju ta’ telf moħbi, xorta waħda ma jsostnix il-konklużjoni rigward id-dfferenzi fl-istandards ta’ ġestjoni, fis-sottoskrizzjoni u fil-kollateral.
L-AMR u t-tabella ta' valutazzjoni għandhom rwol limitat fil-MIP
88Din it-taqsima tħares lejn il-valur miżjud tal-AMR fil-MIP kif ukoll il-karatteristiċi tat-tabella ta' valutazzjoni biex tiffaċilita identifikazzjoni bikrija tal-iżbilanċi.
89Sa mill-bidu tal-MIP, lit-tul tal-AMR irdoppja u aktar (ara l-Figura 6).
Madankollu, ma sarx titjib korrispondenti fil-kwalità tal-valutazzjoni, billi d-dokument għadu fil-biċċa l-kbira deskrittiv37:
- l-ewwel parti tal-AMR prinċipalment tiddeskrivi xejriet komuni fl-ekonomiji kollha u l-mod kif id-diversi indikaturi tat-tabella ta’ valutazzjoni evolvew. Hija tagħmel dan mingħajr ma tqis l-implikazzjonijiet ta’ dawn l-iżviluppi (riperkussjonijiet jew fatturi kawżali) f’aktar fond, u mingħajr ma tfittex li tidentifika l-motivaturi ta’ xi xejriet;
- it-tieni parti tal-AMR sempliċiment tikkonsisti f’deskrizzjoni tat-tabella ta' valutazzjoni u f’valutazzjoni qasira, pajjiż b’pajjiż, tar-riskji u l-aġġustamenti tal-iżbilanċi.
L-utilità immedjata tal-AMR biex jiġu identifikati dawk l-Istati Membri f’riskju li jiġu affettwati mill-iżbilanċi, li jeħtieġu IDR, ġiet newtralizzata mill-prattika tal-Kummissjoni li permezz tagħha l-IDRs isiru obbligatorji għal dawk l-Istati Membri li ġew identifikati bħala li kellhom żbilanċi fis-sena preċedenti (ara l-Anness IX). L-inerzja li dan iġib għall-proċess tintwera fil-Figura 7.
It-tabella ta’ valutazzjoni tal-AMR mhumiex imfasslin tajjeb biex jiffaċilitaw l-identifikazzjoni bikrija tal-iżbilanċi makroekonomiċi (li jkunu sejrin għall-agħar):
- hija retrospettiva, peress li hija bbażata fuq data ta’ sentejn ilu;
- ħafna indikaturi huma jew medji mobbli jew inkella varjabbli tal-istokk (ara t-Tabella 4), u b’hekk idumu aktar biex jaġġustaw jew jirriflettu żviluppi reċenti.
Karatteristika | Indikatur |
---|---|
Medja mobbli fuq tliet snin | Bilanċ tal-kont kurrenti (% tal-PDG) Rata tal-kambju effettiva reali (42 sħab kummerċjali, deflatur tal-HICP) Indiċi tal-kostijiet nominali ta’ unità lavorattiva (2010=100) Rata tal-qgħad Rata tal-attività (% tal-popolazzjoni totali ta’ bejn 15-il sena u 64 sena, punti perċentwali) Rata tal-qgħad fit-tul (% tal-popolazzjoni totali ta’ bejn 15-il sena u 74 sena, punti perċentwali Rata tal-qgħad fost iż-żgħażagħ - % tal-popolazzjoni attiva ta’ bejn 15-il sena u 24 sena, punti perċentwali) |
Medja mobbli fuq ħames snin | Sehem mis-suq tal-esportazzjoni (% tal-esportazzjonijiet dinjija) |
Varjabbli tal-istokk | Pożizzjoni ta' Investiment Internazzjonali Netta (% tal-PDG) Dejn tas-settur privat, konsolidat (% tal-PDG) Dejn gross tal-amministrazzjoni pubblika (% tal-PDG) |
Sors: Il-QEA.
93Xi indikaturi importanti rilevanti għad-detezzjoni tal-iżbilanċi mhumiex espliċitament inklużi fit-tabella ta' valutazzjoni. Eżempji jinkludu l-inflazzjoni, il-profittabbiltà korporattiva u self improduttiv.
94It-tabella ta' valutazzjoni ġiet riveduta f’bosta okkażjonijiet, u saru bidliet fl-għadd, fit-tip u fil-preżentazzjoni tal-indikaturi. Hija ġiet riveduta l-aħħar fl-2016, meta tliet indikaturi soċjali38 ġew promossi mill-istatus “awżiljarju” għat-tabella ta' valutazzjoni ewlenija. Madankollu, dawn it-tliet indikaturi huma reċiprokament korrelatati ħafna, u ftit li xejn huma ta’ użu fl-identifikazzjoni bikrija tal-iżbilanċi peress li jirriflettu l-konsegwenzi tat-tfixkil ekonomiku. Kemm il-wiġġieba għall-istħarriġ li sar għall-KPE (ara l-Figura c fl-Anness VI) kif ukoll il-maġġoranza l-kbira tal-partijiet interessati esprimew il-fehma li dawn l-indikaturi ma tejbux it-tabella ta' valutazzjoni.
95It-tabella ta' valutazzjoni hija ta’ siwi limitat fl-istadju tal-AMR u ma għandha l-ebda siwi wara dan. Bħalma jkun mistenni, aħna sibna rabta diretta bejn l-għadd ta’ indikaturi “li jaqbżu l-valur ta’ limitu” u kemm id-deċiżjoni biex tinħareġ IDR kif ukoll il-klassifikazzjoni tal-iżbilanċi. Madankollu, fiż-żewġ każijiet ir-relazzjoni f’termini ta’ statistika hija dgħajfa ħafna (ara l-Figura 8), u dan jikkonferma li id-deċiżjoni dwar il-ħruġ ta’ IDR ma tirriżultax b’mod mekkaniku mit-tabella ta' valutazzjoni. Barra minn hekk, għall-analiżi li hija twettaq fl-IDRs, il-Kummissjoni ma tużax indikaturi tat-tabella ta' valutazzjoni, iżda sserraħ fuq sett usa’ ta’ għodod analitiċi kif ukoll fuq data aktar aġġornata39.
Minkejja r-rwol limitat tagħha fit-teħid ta’ deċiżjonijiet, id-diskussjonijiet mal-partijiet interessati żvelaw li t-tabella ta' valutazzjoni tirċievi ammont sostanzjali ta’ attenzjoni minħabba li l-għadd ta’ indikaturi li jaqbżu l-valur ta’ limitu jista’ jiġi kkomunikat faċilment. Madankollu, jista’ jkun li qarrejja li ma jkunux esperti ma jiksbux stampa kompleta tan-natura u d-dettall tal-iżbilanċi fi Stat Membru partikolari jekk iserrħu fuq l-għadd ta’ indikaturi li jaqbżu l-valur ta’ limitu minflok jaqraw l-IDR kollha kemm hi. L-inklużjoni tat-tabella ta' valutazzjoni bħala anness għar-rapport għall-pajjiż mill-2016 'il hawn tista’ ssaħħaħ l-impressjoni żbaljata li din hija ta’ importanza ċentrali fil-valutazzjoni tas-severità tal-iżbilanċi.
Konklużjonjiet u rakkomandazzjonijiet
97Il-konklużjoni kumplessiva tagħna hija li, għalkemm b’mod ġenerali l-MIP hija mfassla tajjeb, il-Kummissjoni mhijiex qed timplimentaha b’mod li jiżgura l-prevenzjoni u l-korrezzjoni effettivi tal-iżbilanċi. Għalhekk, jeħtieġ li l-Kummissjoni ttejjeb sostanzjalment ċerti aspetti tal-ġestjoni tagħha relatata mal-MIP. Pass reċenti ’l quddiem kien l-indirizzar tal-problema tar-riperkussjonijiet ta’ politika fiskali dejqa li xi Stati Membri jkollhom fi żminijiet ta’ outputs batuti fiż-żona tal-euro.
Implimentazzjoni tas-CSRs rilevanti għall-MIP
98Il-livell ta’ implimentazzjoni tas-CSRs rilevanti għall-MIP, mill-Istati Membri, kien baxx (ara l-paragrafu 33).
99Huwa biss wara l-abbozzar tas-CSRs li l-Kummissjoni tiddeċiedi liema huma rilevanti għall-MIP. Anke hawn, f’xi każijiet, din il-klassifikazzjoni mhijiex xierqa minħabba li r-rabta mal-analiżi IDR tkun l-aktar l-aktar parzjali jew remota. Ir-rakkomandazzjonijiet li tqiesu bħala li huma rilevanti għall-MIP huma ta’ spiss taħlita ta’ miżuri li jindirizzaw problemi strutturali rigward it-tkabbir potenzjali u dawk li jindirizzaw l-iżbilanċi makroekonomiċi fit-terminu qasir sa medju. Xi kultant, is-CSRs rilevanti għall-MIP lanqas biss ma jkunu relatati mal-iżbilanċi makroekonomiċi (ara l-paragrafi 35 sa 38; 43).
100Wara s-simplifikazzjoni li twettqet fl-2015, issa s-CSRs rilevanti għall-MIP huma issa iqsar u fformulati f’termini aktar ġenerali minn qabel. Dan għamilha aktar diffiċli biex jiġu vvalutati l-implimentazzjoni tagħhom u l-kontribut tagħhom għall-eliminazzjoni tal-iżbilanċi. L-iskeda ta’ żmien għall-implimentazzjoni tagħhom hija diffikultuża ħafna (ara l-paragrafi 39 sa 42; 51 sa 52).
101Fl-aħħar nett, ma hemm l-ebda valutazzjoni ex ante jew ex post sistematika tal-impatt ekonomiku tas-CSRs rilevanti għall-MIP (ara l-paragrafi 44 sa 46).
Rakkomandazzjoni 1
- Jenħtieġ li l-Kummissjoni torbot b’mod sistematikuis-CSRs rilevanti għall-MIP mal-iżbilanċi makroekonomiċi li jiġu identifikati fl-IDR. Jenħtieġ li l-miżuri inklużi fis-CSRs rilevanti għall-MIP ikunu dettaljati biżżejjed biex l-implimentazzjoni tagħhom twassal għal tnaqqis sostantiv u evidenti fl-iżbilanċi.
- Jenħtieġ li l-Kummissjoni tiddistingwi b’mod ċar bejn l-azzjonijiet politiċi tal-MIP li jkunu maħsuba biex inaqqsu l-iżbilanċi fit-terminu qasir sa medju bil-ħsieb li jiġu evitati kriżijiet, u r-riformi li għandhom l-għan li jipprevienu l-akkumulazzjoni ta’ żbilanċi billi tistimula t-tkabbir potenzjali fit-terminu twil.
- Kull fejn possibbli, jenħtieġ li l-Kummissjoni tagħmel valutazzjonijiet ex ante u ex post tal-impatt, fuq l-iżbilanċi, tal-azzjonijiet politiċi ppreżentati fis-CSRs rilevanti għall-MIP.
- Jenħtieġ li l-Kummissjoni tipprovdi skeda ta’ żmien realistika biex tiffaċilita l-implimentazzjoni tas-CSRs rilevanti għall-MIP.
Jenħtieġ li dawn il-miżuri jkunu fis-seħħ għaċ-ċiklu tal-MIP tal-2019 (li jibda fil-ħarifa tal-2018).
Klassifikazzjoni tal-iżbilanċi
102L-IDRs infushom ma jinkludux xi lkonklużjoni dwar il-klassifikazzjoni tal-iżbilanċi għall-Istati Membri. Barra minn hekk, ta’ spiss ir-rabta bejn l-analiżi ekonomika fl-IDR u l-klassifikazzjoni tal-iżbilanċi mhijiex dejjem ċara. Il-problema marret għall-agħar minn mindu l-IDRs kompluti ġew sostitwiti minn “sommarji” fir-rapporti għall-pajjiżi (ara l-paragrafi 57 sa 60).
103Id-dipartimenti tal-Kummissjoni jużaw sett ċar ta’ kriterji biex jipproponu lill-Kulleġġ il-mod kif jenħtieġ li jiġu kklassifikati l-iżbilanċi. Madankollu, l-evidenza għall-awditjar tagħti x’tifhem li hemm nuqqas ta’ proċess formali għat-teħid ta’ deċiżjonijiet fil-livell politiku, u li l-Kummissjoni xi kultant tikser ir-regoli interni proprji tagħha (ara l-paragrafi 61 sa 62; 66).
104Il-Kummissjoni qatt ma pproponiet l-attivazzjoni tal-EIP, għalkemm b’bosta okkażjonijiet hija qieset il-possibbiltà li tagħmel dan. L-interpretazzjoni mill-Kummissjoni tar-Regolament dwar il-MIP hija li dijanjożi tal-iżbilanċi eċċessivi mhux neċessarjament tirrikjedi li hija tipproponi l-attivazzjoni tal-EIP (ara l-paragrafi 63 sa 65).
Rakkomandazzjoni 2
- Kif meħtieġ bir-Regolament dwar il-MIP, fl-IDRs, jenħtieġ li l-Kummissjoni tipprovdi karatterizzazzjoni ċara tas-severità tal-iżbilanċi li Stat Membru jkun qed jiffaċċja.
- Jenħtieġ li l-Kummissjoni tadotta, tippubblika u tapplika kriterji u proċessi ċari għall-klassifikazzjoni tal-iżbilanċi.
- Dment li ma jkunx hemm cirkustanzi speċifiċi, jenħtieġ li l-Kummissjoni tirrakkomanda l-attivazzjoni ta’ EIP meta jkun hemm evidenza li Stat Membru jkun qed jiffaċċja żbilanċi eċċessivi, partikolarment fejn ikun hemm riskju għoli ta’ instabbiltà, fejn l-iżbilanċi jkunu persistenti jew kellhom riperkussjonijiet, jew fejn l-azzjonijiet korrettivi ma kinux sodisfaċenti. Jekk, f’ċirkustanzi speċifiċi, il-Kummissjoni tuża s-setgħat diskrezzjonali tagħha biex toqgħod lura milli tieħu dan il-pass, jenħtieġ li din tispjega r-raġunijiet tagħha b’mod ċar u pubblikament.
Jenħtieġ li dawn il-miżuri jkunu fis-seħħ għaċ-ċiklu tal-MIP tal-2019 (li jibda fil-ħarifa tal-2018).
- Fil-kuntest tal-analiżi tal-MIP tal-2019, jenħtieġ li l-Kummissjoni tipproponi emendi għar-Regolament dwar il-MIP biex jiġu kkodifikati ċ-ċirkustanzi li fihom il-Kummissjoni ma tkunx tirrakkomanda l-attivazzjoni ta’ EIP anke meta hija tkun ikkonkludiet li Stat Membru jkun qed jiffaċċja żbilanċi eċċessivi.
Karatteristiċi tal-IDRs
105Mill-2015 'il hawn, l-IDRs ġew inkorporati gradwalment fir-rapporti għall-pajjiżi, li primarjament jittrattaw il-koordinazzjoni ekonomika ġenerali tal-politiki strutturali, u l-konfini bejn iż-żewġ dokumenti saru dejjem aktar imċajpra. Fl-2017, l-analiżijiet dettaljati tal-problemi prinċipali kollha rigward Stat Membru nġiebu flimkien f’taqsima unika tar-rapport għall-pajjiż, fejn dawn jinqasmu skont it-tema u tingħata indikazzjoni tas-suġġetti li jkunu rilevanti għall-MIP (ara l-paragrapfi 68 sa 72).
106Dawn l-iżviluppi naqqsu l-viżibbiltà tal-MIP u għamluha dejjem aktar diffiċli biex jiġu identifikati l-isfidi rilevanti għall-MIP. It-tqassir tal-IDRs kompla dgħajjef aktar ir-rabta bejn l-analiżi ekonomika u kemm il-klassifikazzjoni tal-iżbilanċi kif ukoll is-CSRs rilevanti għall-MIP li rriżultaw (ara l-paragrafi 59; 73 sa 75).
107Barra minn hekk, it-tabella ta' valutazzjoni mhijiex kruċjali għall-IDR iżda l-inklużjoni tagħha, mill-2016 'il hawn, bħala anness għar-rapport għall-pajjiż tagħti l-impressjoni li hija tabilħaqq kruċjali (ara l-paragrafi 95 sa 96).
Rakkomandazzjoni 3
- Sabiex tipprovdi valutazzjoni ċara tas-severità tal-iżbilanċi makroekonomiċi li Stat Membru jkun qed jiffaċċja u sabiex tiffaċilita l-identifikazzjoni tar-rispons l-aktar adatt, jenħtieġ li l-Kummissjoni tipprovdi IDR komprensiva u ppreżentata separatament b’tul u livell ta’ dettall li jkunu jirriflettu s-severità tas-sitwazzjoni u l-isfidi dwar il-politiki.
- Jenħtieġ li l-Kummissjoni ma tippubblikax it-tabella ta' valutazzjoni flimkien mal-IDR, iżda jenħtieġ li hija tipprovdi aċċess għad-database bil-varjabbli speċifiċi għall-pajjiż li tassew ikunu ntużaw fl-analiżi tagħha.
Jenħtieġ li dawn il-miżuri jkunu fis-seħħ għaċ-ċiklu tal-MIP tal-2019 (li jibda fil-ħarifa tal-2018).
Rikonoxximent tal-impatt tal-politika fiskali fuq l-iżbilanċi esterni u fuq il-kompetittività
108Minkejja xi ripetizzjoni minn sena għal sena, ġeneralment l-IDRs ikun fihom standard tajjeb ta’ analiżi. Madankollu, l-impatt tal-politiki fiskali fuq l-iżbilanċi esterni ma jkunx dejjem parti mill-analiżi jew ma jitteħidx inkunsiderazzjoni fil-formulazzjoni tas-CSRs rilevanti għall-MIP, anke meta IDR tkun identifikat żbilanċi fil-pożizzjonijiet esterni li jkunu marbutin ferm mal-politika fiskali. Il-Kummissjoni hija konxja ta’ dawn il-konnessjonijiet iżda b’mod ġenerali hija tqis li l-problemi fiskali huma koperti mill-PST. Madankollu, il-PST huwa limitat għas-sostenibbiltà fiskali, ma jqisx l-effetti tal-politika fiskali fuq l-iżbilanċi esterni u ma jsemmi xejn dwar il-politika fiskali tal-Istati Membri li jissodisfaw il-kriterji ta’ sostenibbiltà tagħhom (ara l-paragrafi 78 sa 80; 86 sa 87).
Rakkomandazzjoni 4
Fejn xieraq, jenħtieġ li l-Kummissjoni tanalizza b’mod sistematiku l-impatt tal-politika fiskali fuq l-iżbilanċi esterni u fuq il-kompetittività fl-IDRs, u jenħtieġ li hija tuża l-MIP biex tagħmel rakkomandazzjonijiet lill-Istati Membri meta l-problemi fiskali jkunu jaffettwaw l-iżbilanċi esterni direttament. Jenħtieġ li dan japplika kemm għall-Istati Membri li jkollhom bilanċi pożittivi kbar fil-kontijiet kurrenti kif ukoll għal dawk li jkollhom defiċits kbar.
Jenħtieġ li din il-miżura tkunu fis-seħħ għaċ-ċiklu tal-MIP tal-2019 (li jibda fil-ħarifa tal-2018).
Dimensjoni taż-żona tal-euro
109Il-MIP hija ffukata wisq fuq l-ekonomiji individwali u mhijiex iffukata biżżejjed fuq ir-riperkussjonijiet. B’riżultat ta’ dan, is-CSRs rilevanti għall-MIP ma jippromwovux biżżejjed l-azzjonijiet politiċi li jkollhom impatt ta’ benefiċċju fuq l-Istati Membri u lanqas ma jħeġġu r-riekwilibriju simetriku fi ħdan iż-żona tal-euro (ara l-paragrafi 81 sa 85).
110Is-CSRs mhux dejjem ikunu konsistenti mar-rakkomandazzjonijiet li jsiru mill-Kummissjoni għaż-żona tal-euro kollha kemm hi (ara l-paragrafi 47 sa 50).
Rakkomandazzjoni 5
- Jenħtieġ li l-Kummissjoni, permezz tal-proċess tal-MIP, tieħu sistematikament inkunsiderazzjoni l-politiki b’impatti transnazzjonali li jistgħu jirriżultaw f’titjib tar-riekwilibriju simetriku fiż-żona tal-euro.
- Jenħtieġ li l-Kummissjoni tagħmel is-CSRs, rilevanti għall-MIP, konsistenti mar-rakkomandazzjonijiet għaż-żona tal-euro li jkunu rilevanti għall-iżbilanċi, inklużi dawk dwar il-pożizzjoni fiskali kumplessiva, meta jkun xieraq.
Jenħtieġ li dawn il-miżuri jkunu fis-seħħ għaċ-ċiklu tal-MIP tal-2019 (li jibda fil-ħarifa tal-2018).
Viżibbiltà u komunikazzjoni tal-MIP
111Komunikazzjoni effettiva hija kruċjali sabiex jissaħħu kemm is-sensibilizzazzjoni tal-pubbliku dwar il-MIP kif ukoll l-objettiv distint tagħha li taqbad, ittaffi u tipprevieni l-iżbilanċi makroekonomiċi, flimkien mal-isfidi li l-iżbilanċi joħolqu għall-Istati Membri. Jeħtieġ ukoll li l-komunikazzjoni tissaħħaħ sabiex ikun hemm titjib fis-sjieda nazzjonali (ara l-paragrafi 1 sa 6; 54 sa 56; 68 sa 72; 88 sa 91; 94 sa 96).
Rakkomandazzjoni 6
Jenħtieġ li l-Kummissjoni tagħti prominenza akbar lill-MIP billi:
- iżżid ir-referenzi tagħha għall-proċedura fil-komunikazzjoni li jkollha mal-Istati Membri;
- tqiegħed lill-Kummissarji rilevanti għad-dispożizzjoni tal-parlamenti tal-Istati Membri, kull meta l-Kummissjoni tkun ivvalutat li l-iżbilanċi huma eċċessivi, biex b’hekk ikunu jistgħu jispjegaw il-loġika għad-deċiżjonijiet tagħha u għar-rakkomandazzjonijiet korrispondenti tal-politika.
Jenħtieġ li dawn il-miżuri jkunu fis-seħħ għaċ-ċiklu tal-MIP tal-2019 (li jibda fil-ħarifa tal-2018).
Dan ir-Rapport ġie adottat mill-Awla IV, immexxija mis-Sur Baudilio TOMÉ MUGURUZA, Membru tal-Qorti tal-Awdituri, fil-Lussemburgu fil-laqgħa tagħha tat-28 ta’ Novembru 2017.
Għall-Qorti tal-Awdituri
Klaus-Heiner LEHNE
President
Annessi
Anness I
Flowchart dettaljata tal-Proċedura ta' Żbilanċ Makroekonomiku
Sors: Il-QEA.
Anness II
Lista ta’ dokumenti ppubblikati li huma rilevanti għall-MIP
Sors: Il-QEA.
Anness III
Sett attwali ta’ indikaturi ewlenin
Indikaturi | Sollijiet indikattivi |
---|---|
Bilanċ tal-kont kurrenti, % tal-PDG (medja fuq tliet snin) |
-4/6 % |
Pożizzjoni ta' investiment internazzjonali netta (% tal-PDG) | -35 % |
Rata tal-kambju effettiva reali, 42 sħab kummerċjali, deflatur tal-HICP (% tal-bidla fuq tliet snin) |
±5 % (żona tal-euro) ±11 % (żona mhux tal-euro) |
Sehem mis-suq tal-esportazzjoni, % tal-esportazzjonijiet dinjija (% tal-bidla fuq ħames snin) |
-6 % |
Indiċi tal-kostijiet nominali ta’ unità lavorattiva (2010 = 100) (% tal-bidla fuq tliet snin) |
9 % (żona tal-euro) 12 % (żona mhux tal-euro) |
Indiċi tal-prezzijiet tad-djar (2010 = 100), imnaqqas (% tal-bidla fuq sena) |
6 % |
Fluss ta’ kreditu fis-settur privat, konsolidat (% tal-PDG) |
14 % |
Dejn tas-settur privat, konsolidat (% tal-PDG) |
133 % |
Dejn gross tal-amministrazzjoni pubblika (% tal-PDG) |
60 % |
Rata tal-qgħad (medja fuq tliet snin) | 10 % |
Total tal-obbligazzjonijiet tas-settur finanzjarju, mhux konsolidat (% tal-bidla fuq sena waħda) |
16.5 % |
Rata tal-attività - % tal-popolazzjoni totali ta’ bejn 15-il sena u 64 sena (bidla tal-punti perċentwali fuq tliet snin) |
-0.2 pp |
Rata tal-qgħad fit-tul - % tal-popolazzjoni attiva ta’ bejn 15-il sena u 74 sena (bidla tal-punti perċentwali fuq tliet snin) |
0.5 pp |
Rata tal-qgħad fost iż-żgħażagħ - % tal-popolazzjoni attiva ta’ bejn 15-il sena u 24 sena (bidla tal-punti perċentwali fuq tliet snin) |
2 pp |
Sors: Il-QEA.
Anness IV
Għażla tal-Istati Membri għall-kampjun tal-awditjar
Il-kampjun kien ibbażat fuq l-ewwel erba’ snin tal-MIP u fuq lista qasira tal-Istati Membri li kienet teskludi:
- Stati Membri li għalihom ma nħarġet l-ebda IDR fl-ewwel erba’ snin:
- Stati Membri taħt programm ta' aġġustament ekonomiku, li ma tqisux għall-MIP matul il-perjodu ta’ programmazzjoni: l-Irlanda, il-Greċja, Ċipru, il-Portugall, ir-Rumanija;
- Stati Membri li għalihom l-AMR ikkonkluda, f’mill-inqas sena waħda, li huma ma kinux affettwati minn, jew f’riskju li jkunu affettwati minn żbilanċi: ir-Repubblika Ċeka, id-Danimarka, il-Ġermanja, l-Estonja, il-Latvja, il-Litwanja, il-Lussemburgu, Malta, in-Netherlands, l-Awstrija, il-Polonja, is-Slovakkja;
- Stati Membri li għalihom il-valutazzjoni kienet stabbli: il-Belġju, l-Ungerija, il-Finlandja, l-Iżvezja, ir-Renju Unit;
- il-Kroazja, li ssieħbet mal-Unjoni Ewropea reċentement biss.
B’hekk kien jifdal il-Bulgarija, Spanja, Franza, l-Italja u s-Slovenja.
Peress li Franza u l-Italja ntgħażlu għall-awditu tal-EDP u jikkondividu għadd ta’ karatteristiċi (Stati Membri akbar u li ilhom stabbiliti fiż-żona tal-euro), aħna ddeċidejna li neskludu wieħed minnhom. Franza ntgħażlet minħabba varjazzjoni akbar fil-valutazzjoni tagħha għall-iżbilanċi.
Il-lista finali kienet kampjun rappreżentattiv ta’ Stati Membri kbar u żgħar, kemm fiż-żona tal-euro kif ukoll barra minnhom.
Għalkemm żgħir, il-kampjun ta’ erba’ Stati Membri kien jirrappreżenta bejn wieħed u ieħor kwart tal-popolazzjoni u tal-PDG tal-UE.
Anness V
Klassifikazzjoni kwalitattiva għall-valutazzjoni tal-implimentazzjoni tas-CSRs
Il-Kummissjoni tuża l-kategoriji li ġejjin biex tivvaluta l-implimentazzjoni tas-CSRs:
- Implimentazzjoni sħiħa: L-Istat Membru jkun adotta u implimenta miżuri li jindirizzaw is-CSR b’mod xieraq.
- Progress sostanzjali: L-Istat Membru jkun adotta miżuri, li l-biċċa l-kbira minnhom kunu ġew implimentati.
- Xi progress: L-Istat Membru jkun ħabbar jew adotta miżuri biex jindirizza s-CSR. Dawn il-miżuri jkunu promettenti, iżda mhux kollha kemm jkunu ġew implimentati għad u l-implimentazzjoni ma tkunx ċerta fil-każijiet kollha.
- Progress limitat: L-Istat Membru jkun ħabbar xi miżuri biex jindirizza s-CSR, iżda dawn ikunu jidhru insuffiċjenti u/jew l-adozzjoni/l-implimentazzjoni tagħhom tkun f’riskju.
- L-ebda progress: L-Istat Membru la jkun ħabbar u lanqas ma jkun adotta xi miżura biex jindirizza s-CSR.
Anness VI
Stħarriġ tal-membri tal-KPE
Sors: Il-QEA.
Anness VII
Żjarat lill-awtoritajiet u lil entitajiet oħra tal-Istati Membri
Istituzzjoni Suprema tal-Awditjar |
Rappreżentanza tal-Unjoni Ewropea | Ministeru tal-Finanzi | Kunsill Fiskali | Bank Ċentrali | Ministeru tax-Xogħol | Kamra tal-Kummerċ u Industrija | Oħrajn | |
---|---|---|---|---|---|---|---|---|
Il-Bulgarija | √ | √ | √ | √ | √ | √ | √ | Ministeru tal-Edukazzjoni u x-Xjenza, IME, ABB |
Franza | √ | √ | √ | √ | √ | √ | Segretarjat Ġenerali għall-Affarijiet Ewropej, MEDEF, CFDT, France Strategie, Conseil d’Analyse Economique, OFCE, Coe-Rexecode | |
Is-Slovenja | √ | √ | √ | √ | √ | √ | IMAD, Holdings ta’ Dejn sovran tas-Slovenja | |
Spanja | √ | √ | √ | √ | √ | Kabinett Ekonomiku tal-Presidenza, Ministeru tal-Ekonomija, CEOE, Cepyme, FEDEA, FROB |
Sors: Il-QEA.
Anness VIII
Evoluzzjoni tal-klassifikazzjoni tal-Istati Membri, 2012-2017
Sors: Il-QEA.
Anness IX
Għadd u tip ta’ analiżijiet fil-fond
2012-2017 | % | |
---|---|---|
IDRs konklużi meta kien hemm l-iżbilanċi | 80 | 88.9 |
IDRs konklużi meta ma kienx hemm l-iżbilanċi | 10 | 11.1 |
Total | 90 | 100 |
Sena 2 | |||||||
---|---|---|---|---|---|---|---|
2013-2017 | IDR | L-ebda IDR | |||||
Żbilanċi | Żbilanċi eċċessivi | L-ebda żbilanċ | L-ebda IDR | Programm ta' aġġustament ekonomiku | |||
Sena 1 | IDR | Żbilanċi | 39 | 5 | 7 | 0 | 1 |
Żbilanċi eċċessivi | 2 | 14 | 0 | 0 | 0 | ||
L-ebda żbilanċ | 0 | 0 | 0 | 9 | 0 | ||
L-ebda IDR | L-ebda IDR | 3 | 0 | 3 | 39 | 0 | |
Programm ta' aġġustament makroekonomiku | 2 | 2 | 0 | 0 | 12 | ||
Pajjiż ġdid fl-UE | 0 | 1 | 0 | 0 | 0 | ||
Total | 46 | 22 | 10 | 48 | 13 |
Sors: Il-QEA.
Abbrevjazzjonijiet u akronimi
AMR: Rapport dwar il-Mekkaniżmu ta' Twissija
BĊE: Bank Ċentrali Ewropew
CSR: Rakkomandazzjoni speċifika għall-pajjiż
DĠ ECFIN: Direttorat Ġenerali għall-Affarijiet Ekonomiċi u Finanzjarji tal-Kummissjoni
DĠ EMPL: Direttorat Ġenerali tal-Impjiegi, l-Affarijiet Soċjali u l-Inklużjoni tal-Kummissjoni
EDP: Proċedura ta’ defiċit eċċessiv
EIP: Proċedura ta’ żbilanċ eċċessiv
FMI: Fond Monetarju Internazzjonali
IDR: Analiżi fil-fond
KPE: Kumitat tal-Politika Ekonomika tal-Kunsill tal-UE
MIP: Proċedura ta’ Żbilanċ Makroekonomiku
OECD: Organizzazzjoni għall-Kooperazzjoni u l-Iżvilupp Ekonomiċi
PNR: Programm nazzjonali ta' riforma
PST: Patt ta' Stabbiltà u Tkabbir
Glossarju
Kumitat tal-Politika Ekonomika (KPE): Korp konsultattiv għall-Kummissjoni u l-Kunsill, li ġie stabbilit bid-Deċiżjoni tal-Kunsill 74/122/KEE tat-18 ta’ Frar 1974. Il-KPE jikkontribwixxi għall-ħidma tal-Kunsill dwar il-koordinazzjoni tal-politiki ekonomiċi tal-Istati Membri u tal-UE. Huwa jinkludi żewġ delegati minn kull Stat Membru, tnejn mill-Kummissjoni u tnejn mill-BĊE.
Patt ta' Stabbiltà u Tkabbir (PST): Ftehim li jorbot lill-Istati Membri kollha tal-UE u li ilu fis-seħħ mill-1997 (b’riformi fl-2005 u fl-2011) rigward l-implimentazzjoni tad-dispożizzjonijiet tat-Trattat ta’ Maastricht li jindirizza is-sostenibbiltà tal-politiki fiskali tal-Istati Membri, essenzjalment billi jżomm id-defiċit u d-dejn pubbliċi f’livelli aċċettabbli.
Programm nazzjonali ta' riforma: Dokument li jinħareġ kull sena u li jippreżenta l-politiki u l-miżuri, tal-Istat Membru, għas-sostenn tat-tkabbir u tal-impjiegi u għall-ilħuq tal-miri ta' Ewropa 2020.
Semestru Ewropew: Iċ-ċiklu annwali ta’ koordinazzjoni ta’ politika ekonomika tal-UE. Is-Semestru jkopri politiki fiskali, kif iddeterminat mill-Patt ta' Stabbiltà u Tkabbir, il-prevenzjoni ta’ bilanċi makroekonomiċi eċċessivi (taħt il-MIP) u riformi strutturali fil-kuntest tal-istrateġija Ewropa 2020. Dan jirriżulta f’rakkomandazzjonijiet speċifiċi għall-pajjiż li jingħataw lill-Istati Membri.
Strateġija Ewropa 2020: L-aġenda tal-UE għat-tkabbir u l-impjiegi għad-deċennju attwali. L-istrateġija tidentifika ħames miri ewlenin, li huma espressi permezz ta’ seba’ inizjattivi emblematiċi. Il-gvernijiet tal-UE ssettjaw miri nazzjonali biex jgħinu fl-ilħuq tal-miri kumplessivi tal-UE, u jirrappurtaw dwarhom fil-programmi nazzjonali ta’ riforma (PNR) tagħhom.
Noti finali
1 L-Artikoli 121 u 148 tat-TFUE.
2 Sett ta’ ħames regolamenti tal-UE u direttiva li daħlu fis-seħħ fit-13 ta’ Diċembru 2011. Tliet regolamenti jirrigwardaw is-sorveljanza baġitarja u fiskali mtejba, filwaqt li d-direttiva għandha l-għan li tarmonizza l-oqfsa fiskali fl-Istati Membri. L-aħħar żewġ regolamenti jirrigwardaw proċeduri għall-MIP u l-infurzar ta’ azzjonijiet korrettivi.
3 Ir-Regolament (UE) Nru 1176/2011 tal-Parlament Ewropew u tal-Kunsill tas-16 ta’ Novembru 2011 dwar il-prevenzjoni u l-korrezzjoni tal-iżbilanċi makroekonomiċi (ĠU L 306, 23.11.2011, p. 25).
4 Għal definizzjoni ta’ riperkussjoni, ara n-Nota 30 f’qiegħ il-paġna.
5 Il-Premessa 20 tar-Regolament dwar il-MIP.
6 Il-Kummissjoni tieħu kont ukoll ta’ 28 indikatur awżiljarju bħala sors ta’ informazzjoni komplementari (http://ec.europa.eu/eurostat/cache/Imbalance_Scoreboard/MIPs_AUX_EN_banner.html).
7 Ara r-Regolament (UE) Nru 1176/2011 tal-Parlament Ewropew u tal-Kunsill tas-16 ta’ Novembru 2011 dwar miżuri ta’ infurzar biex jikkoreġu żbilanċi makroekonomiċi eċċessivi fiż-żona tal-euro (ĠU L 306, 23.11.2011, p. 8).
8 L-analiżi li wettaqna ntemmet bil-pubblikazzjoni tal-IDRs fi Frar 2017, u għalhekk ma koprietx is-CSRs għall-2017.
9 Ara l-Anness IV għal spjegazzjoni tal-metodoloġija ta’ kampjunar tagħna.
10 Il-klassifikazzjoni għall-valutazzjoni tal-implimentazzjoni tas-CSRs hija ppreżentata fl-Anness V. L-istħarriġ li wettaqna tal-Membri tal-KPE (ara l-paragrafu 24) wera li huma qiesu l-valutazzjonijiet mill-Kummissjoni bħala li kienu b’mod ġenerali preċiżi (ara l-Figura o fl-Anness VI).
11 Ir-Rapport Speċjali Nru 10/2016 “Jeħtieġ li jsir aktar titjib biex tiġi żgurata l-implimentazzjoni effettiva tal-proċedura ta’ defiċit eċċessiv” (http://eca.europa.eu).
12 Minn Mejju 2013 sa Marzu 2016, Ċipru kien suġġett għal programm ta' aġġustament ekonomiku.
13 L-Artikolu 13(1) u (2).
14 L-analiżi fil-fond “Implementation of the Macroeconomic Imbalance Procedure – state-of-play (June 2017)” (Implimentazzjoni tal-Proċedura ta' Żbilanċ Makroekonomiku – is-sitwazzjoni attwali (Ġunju 2017)) - PE 497.739.
15 Il-Kummissjoni tiddefinixxi l-kategorija “xi progress” fil-klassifikazzjoni għall-valutazzjoni tal-implimentazzjoni tas-CSRs bħala “l-Istat Membru jkun ħabbar jew adotta miżuri biex jindirizza s-CSR. Dawn il-miżuri jkunu promettenti, iżda mhux kollha kemm jkunu ġew implimentati għad u l-implimentazzjoni ma tkunx ċerta fil-każijiet kollha.” Dan il-livell ta’ implimentazzjoni mhux dejjem jista’ jitqies bħala tnaqqis ta’ żbilanċi bi probabbiltà raġonevoli.
16 Id-Dokument Istituzzjonali 039 tal-Kummissjoni Ewropea, Novembru 2016, “The Macroeconomic Imbalance Procedure – Rationale, Process, Application: A Compendium” (Il-Proċedura ta' Żbilanċ Makroekonomiku – Prinċipji ġustifikattivi, Proċess, Applikazzjoni: Kompendju), p. 50.
17 Il-QEA hija tal-fehma li l-proċess loġiku jkun jibda mill-identifikazzjoni tal-iżbilanċi u mbagħad jgħaddi għall-kunsiderazzjoni tal-possibbiltajiet ta’ politika (inklużi l-istimi tal-effetti) u jibqa’ sejjer sal-ispeċifikazzjoni tas-CSRs.
18 COM(2015) 600 final tal-21 ta’ Ottubru 2015 “Komunikazzjoni tal-Kummissjoni lill-Parlament Ewropew, lill-Kunsill, u lill-Bank Ċentrali Ewropew dwar passi lejn l-Ikkompletar tal-Unjoni Ekonomika u Monetarja”, p. 9.
19 Ir-rapport għall-pajjiż li sar fl-2015 għal Spanja (p. 59) josserva li, peress li l-effetti ta’ konnessjonijiet ’il quddiem kienu relattivament kbar, l-effett ta’ moderazzjoni tal-prezzijiet permezz ta’ kompressjoni tal-marġni tal-profitt, ta’ riforma għat-titjib tal-kompetizzjoni fis-servizzi professjonali, x’aktarx li jkun ta’ benefiċċju għall-bqija tal-ekonomija, u r-rapport jirreferi għal studju mwettaq mill-Kummissjoni (“The Economic Impact of Professional Services Liberalisation” (L-Impatt Ekonomiku tal-Liberalizzazzjoni tas-Servizzi Professjonali), European Economy, Economic Papers 533, Settembru 2014) dwar l-effetti ta’ ostakli regolatorji f’erba’ professjonijiet fl-UE mill-2008 sal-2011.
20 Fl-ewwel “Review of progress on policy measures relevant for the correction of macroeconomic imbalances” (Analiżi tal-progress fir-rigward tal-miżuri ta’ politika rilevanti għall-korrezzjoni ta’ żbilanċi makroekonomiċi) tagħha għal Franza fl-2014, il-Kummissjoni tirrakkonta s-sejbiet ta’ studju tal-2014 imwettaq mill-OECD dwar l-effetti ta’ riformi mwettqa u mħabbra mill-Gvern Franċiż mill-2012 'il hawn.
21 Il-Kummissjoni użat mudell makroekonomiku (Quest) biex tistma kif ir-riformi strutturali fi Stat Membru partikolari jkunu jaffettwaw it-tkabbir jekk l-Istat Membru jċekken in-nuqqas bil-medja tat-tliet l-aħjar prestaturi tal-UE fir-rigward tal-indikaturi ekonomiċi ewlenin.
22 Il-pożizzjoni fiskali hija stima tal-impuls volontarju kkawżat mill-politika fiskali.
23 COM(2016) 727 tas-6 ta’ Novembru 2016.
24 “Nikkompletaw l-Unjoni Ekonomika u Monetarja tal-Ewropa”, rapport minn Jean-Claude Juncker f'kooperazzjoni mill-qrib ma’ Donald Tusk, Jeroen Dijsselbloem, Mario Draghi u Martin Schulz, Ġunju 2015, p. 8: “Il-fergħa korrettiva [tal-MIP] għandha tintuża b’mod deċiżiv. Għandha tiskatta hekk malli jiġu identifikati żbilanċi eċċessivi u tintuża biex tiġi mmonitorjata l-implimentazzjoni (tar-riformi).”
25 Il-BĊE, Bulletin Ekonomiku, il-Ħarġa Nru 2, Marzu 2017, il-Kaxxa 7, p. 63. Għal dikjarazzjonijiet oħra ara l-Bulletin Ekonomiku, il-Ħarġa Nru 2, Marzu 2015, il-Kaxxa 5, p. 48 u l-Bulletin Ekonomiku, il-Ħarġa Nru 2, Marzu 2016, il-Kaxxa 8, p. 57.
26 The Macroeconomic Imbalance Procedure – Rationale, Process, Application: a Compendium (Il-Proċedura ta' Żbilanċ Makroekonomiku – Prinċipji ġustifikattivi, Proċess, Applikazzjoni: Kompendju), il-Kaxxa 3.1, p. 34.
27 Id-Dokument Okkażjonali Nru 228, Macroeconomic Imbalances - Main findings of the in-depth reviews 2015 (Żbilanċi makroekonomiċi - Sejbiet prinċipali tal-analiżijiet fil-fond għall-2015).
28 L-Artikolu 5(2) tar-Regolament dwar il-MIP.
29 Il-Kummissjoni żviluppat għadd ta’ tekniki ta’ valutazzjoni ekonomika li huma rilevanti. Pereżempju, dawn jinkludu valutazzjonijiet tal-iżviluppi tal-pagi transnazzjonali kif ukoll valutazzjonijiet tal-flussi finanzjarji.
30 Riperkussjoni hija żvilupp fi Stat Membru wieħed li għandu impatt fuq l-ekonomiji ta’ Stat Membru ieħor jew aktar. Riperkussjoni 'l ġewwa tirreferi għall-impatt fuq Stat Membru partikolari minn Stat Membru ieħor jew oħrajn. Riperkussjoni 'l barra tirreferi għall-impatt minn Stat Membru partikolari fuq Stat Membru ieħor jew oħrajn.
31 Kontaġju sovran huwa meta movimenti negattivi, fl-ispejjeż tas-self ta’ pajjiż, iseħħu b’mod korrelatat ma’ dawk ta’ pajjiż ieħor.
32 Firxa tad-dejn sovran hija d-differenza fil-punti perċentwali li pajjiż jiffaċċja fl-ispejjeż tas-self tiegħu meta mqabbel ma’ punt ta’ riferiment. Fiż-żona tal-euro, normalment il-punt ta’ riferiment huwa r-rata tal-imgħax fuq is-self li tintuża mill-Gvern Ġermaniż.
33 SWD(2017) 71 final “Country report - Germany 2017 - including an in-depth review on the prevention and correction of macroeconomic imbalances” (Rapport għall-pajjiż - Il-Ġermanja 2017 - inkluża analiżi fil-fond dwar il-prevenzjoni u l-korrezzjoni tal-iżbilanċi makroekonomiċi), il-Kaxxa 3.1, p. 18.
34 Id-Dokument ta’ Ħidma Nru 3/2010 tal-IMAD “Estimation of the Impact of the Minimum Wage Rise in Slovenia” (Stima tal-impatt taż-Żieda fil-Paga Minima fis-Slovenja).
35 Il-Bank tas-Slovenja, “Price Stability Report” (Rapport dwar l-Istabbiltà tal-Prezzijiet), April 2010, il-Kaxxa 2.2.
36 L-OECD, “Connecting people with jobs: The labour market, activation policies and disadvantaged workers in Slovenia” (Nikkollegaw lin-nies mal-impjiegi: Is-suq tax-xogħol, politiki ta’ attivazzjoni u ħaddiema żvantaġġati fis-Slovenja), 2016, p. 52.
37 Madankollu, aħna nilqgħu b’interess iż-żieda ta’ kaxxa li ġġib it-titlu “Id-dimensjoni taż-żona tal-euro ta’ żbilanċi makroekonomiċi” fl-AMRs 2016 u 2017.
38 Ir-rata tal-attività, ir-rata tal-qgħad fit-tul u r-rata tal-qgħad fost iż-żgħażagħ.
39 Għall-qgħad, l-IDRs jirreferu għat-tabelli “Indikaturi ekonomiċi, finanzjarji u soċjali ewlenin” (li ilhom preżenti fl-IDR mill-2014) u “Indikaturi tas-suq tax-xogħol u dawk soċjali” (mill-2015 'il hawn); għall-kont kurrenti huma jirreferu għal dettalji speċifiċi għas-sena preċedenti. L-analiżi IDR tas-settur finanzjarju tuża firxa wiesgħa ta’ varjabbli addizzjonali (eż. rati tad-depożiti, xejra u differenzjal tal-kundizzjonijiet ta’ self, marġni tal-imgħax nett, profittabbiltà tal-banek).
1 COM(2015) 600 finali tal-21 ta’ Ottubru 2015 ‘KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, U LILL-BANK ĊENTRALI EWROPEW ‘Dwar passi lejn l-Ikkompletar tal-Unjoni Ekonomika u Monetarja’.
2 ‘Il-Proċedura ta’ Żbilanċ Makroekonomiku. Ir-Raġunament, il-Proċess, l-Applikazzjoni: Kompendju” (il-Kummissjoni Ewropea, 2016).
3 COM(2015) 600 finali tal-21 ta’ Ottubru 2015 ‘KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, U LILL-BANK ĊENTRALI EWROPEW Dwar passi lejn l-Ikkompletar tal-Unjoni Ekonomika u Monetarja’.
Avveniment | Data |
---|---|
Adozzjoni tal-APM / Bidu tal-awditu | 31.5.2016 |
L-abbozz tar-rapport jintbagħat uffiċjalment lill-Kummissjoni (jew lil parti awditjata oħra) | 28.9.2017 |
Adozzjoni tar-rapport finali wara l-proċedura kontradittorja | 28.11.2017 |
Ir-risposti uffiċjali tal-Kummissjoni (jew ta’ parti awditjata oħra) riċevuti bil-lingwi kollha | 15.12.2017 |
Tim tal-awditjar
Ir-rapporti speċjali tal-QEA jippreżentaw ir-riżultati tal-awditi tal-prestazzjoni u tal-konformità tagħha f'dak li jirrigwarda oqsma baġitarji jew suġġetti ta' ġestjoni speċifiċi. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta' introjtu jew ta' nfiq involut, l-iżviluppi li jkunu għad iridu jseħħu u l-interess politiku u pubbliku.
Dan ir-rapport twettaq mill-Awla IV tal-Awditjar, li hija mmexxija minn Baudilio Tomé Muguruza, Membru tal-QEA, u li tiffoka fuq l-oqsma ta’ regolamentazzjoni tas-swieq u ekonomija kompetittiva. L-awditu tmexxa mill-Membru tal-QEA Neven Mates. Fit-tħejjija tar-rapport, huwa ngħata appoġġ minn Georgios Karakatsanis, Kap tal-kabinett u Marko Mrkalj, Attaché; Zacharias Kolias, Direttur; u Giuseppe Diana, Kap tal-kompitu. It-tim tal-awditjar kien magħmul minn Stefano Sturaro, Shane Enright, Maëlle Bourque u Katia Mesonero-Herrera.
Kuntatt
IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG
Tel. +352 4398-1
Mistoqsijiet: eca.europa.eu/mt/Pages/ContactForm.aspx
Sit web: eca.europa.eu
Twitter: @EUAuditors
Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).
Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2018
ISBN 978-92-872-8846-2 | ISSN 1977-5741 | doi:10.2865/320184 | QJ-AB-17-023-MT-N | |
HTML | ISBN 978-92-872-8839-4 | ISSN 1977-5741 | doi:10.2865/729849 | QJ-AB-17-023-MT-Q |
© L-Unjoni Ewropea, 2018
Għal kull użu jew riproduzzjoni ta’ ritratti jew materjal ieħor li ma jaqax taħt id-drittijiet tal-awtur tal-Unjoni Ewropea, irid jintalab il-permess direttament mingħand id-detenturi tad-drittijiet tal-awtur.
KIF TIKKUNTATTJA LILL-UE
Personalment
Madwar l-Unjoni Ewropea kollha hemm mijiet ta’ ċentri ta’ informazzjoni tal-Europe Direct. Tista’ ssib l-indirizz tal-eqreb ċentru għalik f’dan is-sit: https://europa.eu/european-union/contact_mt
Bit-telefown jew bil-posta elettronika
Europe Direct huwa servizz li jwieġeb il-mistoqsijiet tiegħek dwar l-Unjoni Ewropea. Tista’ tikkuntattja dan is-servizz:
- bit-telefown bla ħlas: 00 800 6 7 8 9 10 11 (ċerti operaturi jafu jimponu ħlas għal dawn it-telefonati),
- fuq dan in-numru standard: +32 22999696, jew
- bil-posta elettronika permezz: https://europa.eu/european-union/contact_mt
KIF ISSIB TAGĦRIF DWAR L-UE
Onlajn
L-informazzjoni dwar l-Unjoni Ewropea bil-lingwi uffiċjali kollha tal-UE hija disponibbli fuq is-sit web Europa fuq: http://europa.eu
Pubblikazzjonijiet tal-UE
Tista’ tniżżel mill-internet jew tordna l-pubblikazzjonijiet tal-UE, li xi wħud minnhom huma bla ħlas u xi oħrajn bil-ħlas, mill-EU Bookshop fl-indirizz li ġej: http://bookshop.europa.eu. Kopji multipli ta’ pubblikazzjonijiet bla ħlas tista’ tiksibhom billi tikkuntattja lil Europe Direct jew liċ-ċentru tal-informazzjoni lokali tiegħek (ara http://europa.eu/contact).
Il-liġi tal-UE u dokumenti relatati
Għal aċċess għall-informazzjoni legali tal-UE, inkluż il-liġijiet kollha tal-UE mill-1951 ’l hawn, fil-verżjonijiet lingwistiċi uffiċjali kollha, żur is-sit EUR-Lex hawnhekk: http://eur-lex.europa.eu
Dejta Miftuħa mill-UE
Il-portal tad-Dejta Miftuħa mill-UE (http://data.europa.eu/euodp/mt/data) jipprovdi aċċess għal settijiet tad-dejta mill-UE. Id-dejta tista’ titniżżel mill-internet u tintuża mill-ġdid bla ħlas, kemm għal skopijiet kummerċjali kif ukoll mhux kummerċjali.