Il-ġlieda kontra l-faqar fost it-tfal - Jinħtieġ immirar aħjar tal-appoġġ tal-Kummissjoni

Sommarju eżekuttiv

I

Il-ġlieda kontra l-faqar u l-esklużjoni soċjali tinsab fil-qalba tal-istrateġija Ewropa 2020. L-identifikazzjoni ta’ gruppi b’riskju akbar ta’ faqar jew esklużjoni soċjali, u d-determinazzjoni tar-raġunijiet wara din il-vulnerabbiltà, jirrappreżentaw il-qofol għas-suċċess f’dan il-kuntest. L-istatistika fuq perjodu ta’ 10 snin turi li t-tfal huma f’riskju akbar tal-faqar jew tal-esklużjoni soċjali mill-bqija tal-popolazzjoni fl-UE.

II

L-iffukar fuq it-tfal u l-indirizzar tar-rata għolja eżistenti ta’ tfal fil-faqar huma vitali għal ekonomija bbażata fuq l-għarfien sostenibbli, effiċjenti u kompetittiva u soċjetà li hija ġusta minn ġenerazzjoni għal oħra. Il-benefiċċji ekonomiċi tal-investiment fit-tfal jegħlbu b’mod sinifikanti l-ispejjeż ta’ finanzjament tal-investiment.

III

Hija primarjament ir-responsabbiltà tal-Istati Membri u tal-gvernijiet nazzjonali li jieħdu miżuri xierqa biex inaqqsu l-faqar fost it-tfal. Madankollu, il-Kummissjoni wkoll għandha rwol x’taqdi. Jenħtieġ li tappoġġa u tikkomplementa l-attivitajiet tal-Istati Membri fil-ġlieda kontra l-esklużjoni soċjali u l-indirizzar tal-faqar fost it-tfal. Għal dan il-għan, għandha kemm strumenti legali kif ukoll finanzjarji għad-dispożizzjoni tagħha.

IV

Il-qasam tal-faqar fost it-tfal ma ġiex awditjat preċedentement mill-Qorti. Dan ir-rapport għandu l-potenzjal li jikkontribwixxi għall-inizjattivi futuri tal-Kummissjoni biex jiġu appoġġati l-isforzi tal-Istati Membri fil-ġlieda kontra l-faqar fost it-tfal.

V

L-objettiv ta’ dan l-awditu tal-prestazzjoni kien li jiġi ddeterminat jekk il-Kummissjoni kinitx tat kontribut effettiv għall-isforzi tal-Istati Membri biex inaqqsu l-faqar fost it-tfal. Biex inwieġbu għal din il-mistoqsija prinċipali tal-awditjar, aħna eżaminajna jekk l-istrumenti legali tal-Kummissjoni, jiġifieri r-Rakkomandazzjoni tal-Kummissjoni 2013/11/UE tal-20 ta’ Frar 2013 intitolata – “L-investiment fit-tfal: niksru ċ-ċiklu tal-iżvantaġġ” (ir-Rakkomandazzjoni), il-Pilastru Ewropew tad-Drittijiet Soċjali u l-proċess tas-Semestru Ewropew, tawx kontribut fl-indirizzar tal-faqar fost it-tfal. Aħna eżaminajna wkoll kif l-użu min-naħa tal-Istati Membri tal-fondi tal-UE kkontribwixxa għal dan l-għan.

VI

Filwaqt li r-Rakkomandazzjoni mhijiex strument legalment vinkolanti, kienet inizjattiva pożittiva biex jiġi indirizzat il-faqar fost it-tfal b’mod integrat. Minkejja dan, il-progress tal-implimentazzjoni u l-impatt tagħha fuq il-politiki nazzjonali diffiċli biex jiġi vvalutat billi ma ġewx stabbiliti miri li jistgħu jitkejlu jew stadji importanti.

VII

Il-Pilastru Ewropew tad-Drittijiet Soċjali żied is-sensibilizzazzjoni dwar il-politiki soċjali fl-UE, inkluż il-faqar fost it-tfal u għandu l-potenzjal li jiffoka fuq miżuri u finanzjament għall-indirizzar tal-faqar fost it-tfal għall-perjodu ta’ programmazzjoni 2021-2027. Madankollu, hemm nuqqas ta’ ikkompletar ta’ pjan ta’ azzjoni biex jiġu implimentati bis-sħiħ il-prinċipji differenti tiegħu. L-istabbiliment ta’ pjan ta’ azzjoni huwa kritiku biex jipprovdi ħarsa ġenerali tal-progress tiegħu.

VIII

Il-proċess tas-Semestru Ewropew jinvolvi l-ħruġ ta’ Rakkomandazzjonijiet Speċifiċi għall-Pajjiż lill-Istati Membri f’oqsma ta’ politika differenti. Aħna sibna li l-Istati Membri rċevew Rakkomandazzjonijiet Speċifiċi għall-Pajjiż f’oqsma li jikkonċernaw politiki tal-familja u tat-tfal, li jistgħu jgħinu fit-tnaqqis tal-faqar fost it-tfal. Madankollu, il-faqar fost it-tfal rari jiġi indirizzat b’mod espliċitu u l-metodoloġija speċifika li tistabbilixxi meta jenħtieġ li jiġi pprijoritizzat il-faqar fost it-tfal għall-kunsiderazzjoni ta’ Rakkomandazzjoni Speċifika għall-Pajjiż potenzjali għadha ma ġietx definita b’mod ċar.

IX

Il-leġiżlazzjoni tal-UE ma għandhiex fil-mira l-finanzjament dirett tal-ġlieda kontra l-faqar fost it-tfal. Kemm il-Kummissjoni kif ukoll l-Istati Membri li saritilhom żjara ma setgħux jikkwantifikaw l-ammont ta’ fondi allokati għal proġetti li jindirizzaw direttament il-faqar fost it-tfal u għalhekk ma setgħux jivvalutaw l-effettività tagħhom.

X

Fil-konklużjoni kumplessiva tagħna, nirrikonoxxu li l-faqar fost it-tfal għadu kwistjoni serja fl-UE bi kważi wieħed minn kull erbat itfal għadhom f’riskju tal-faqar jew tal-esklużjoni soċjali. Għalkemm il-Kummissjoni għandha rwol limitat x’taqdi, huwa diffiċli, jekk mhux impossibbli, li jiġi vvalutat jekk l-inizjattivi tagħha biex jonqos l-faqar fost it-tfal, permezz tal-użu ta’ strumenti legali u ta’ fondi tal-UE, kinux effettivi biżżejjed.

XI

Aħna nirrakkomandaw li jenħtieġ li l-Kummissjoni:

• tinkludi azzjonijiet u objettivi biex jiġi indirizzat il-faqar fost it-tfal fil-Pjan ta’ Azzjoni tagħha għall-Pilastru Ewropew tad-Drittijiet Soċjali;
• ikollha gwida interna ċara biex tidentifika sitwazzjonijiet li jistgħu jwasslu għal Rakkomandazzjoni Speċifika għall-Pajjiż potenzjali direttament relatata mal-faqar fost it-tfal bħala parti mill-analiżi tagħha fi ħdan il-proċess tas-Semestru Ewropew;
• timmira u timmonitorja l-investimenti biex jiġi indirizzat il-faqar fost it-tfal fil-perjodu ta’ programmazzjoni 2021-2027; u
• tiżgura li jkun ġew ikkompletati l-passi meħtieġa u ġbir suffiċjenti ta’ informazzjoni għat-tħejjija tal-inizjattiva ta’ politika li ġejja dwar Garanzija Ewropea għat-Tfal.

Introduzzjoni

01

Il-ġlieda kontra l-faqar u l-esklużjoni soċjali tinsab fil-qalba tal-istrateġija Ewropa 2020. L-identifikazzjoni ta’ gruppi b’riskju akbar tal-faqar jew tal-esklużjoni soċjali, u d-determinazzjoni tar-raġunijiet wara din il-vulnerabbiltà, jirrappreżentaw il-qofol għas-suċċess f’dan il-kuntest. Persuna titqies li qiegħda f’riskju tal-faqar jew tal-esklużjoni soċjali jekk tinsab f’tal-inqas waħda mis-sitwazzjonijiet li ġejjin; fir-riskju tal-faqar, f’sitwazzjoni ta’ deprivazzjoni materjali estrema jew tgħix b’intensità baxxa ta’ xogħol (il-paragrafu 77).

02

It-tqabbil skont il-grupp ta’ età fuq perjodu ta’ 10 snin juri li t-Tfal (0-18) huma f’riskju akbar tal-faqar jew tal-esklużjoni soċjali mill-bqija tal-popolazzjoni fl-UE (ara l-Figura 1).

03

Fl-2018, 23 miljun tifel u tifla fl-UE kienu fir-riskju tal-faqar jew tal-esklużjoni soċjali, jiġifieri, wieħed minn kull erbat itfal¹. Madankollu, il-livelli ta’ faqar fost it-tfal ivarjaw b’mod sinifikanti bejn Stat Membru u ieħor. Erba’ Stati Membri (ir-Rumanija, il-Bulgarija, il-Greċja u l-Italja), irreġistraw perċentwal ta’ tfal fir-riskju tal-faqar jew tal-esklużjoni soċjali ogħla minn 30 %, li jfisser li wieħed minn kull tlett tfal kienu firriskju tal-faqar jew tal-esklużjoni soċjali. Fl-Istati Membri (id-Danimarka, in-Netherlands, ir-Repubblika Ċeka u s-Slovenja) li rrappurtaw ir-rati l-aktar baxxi wieħed minn kull sitt itfal jinsab fir-riskju tal-faqar jew tal-esklużjoni soċjali (ara l-Figura 2).

04

Skont it-Tbassir Ekonomiku ta-Kummissjoni għall-2021, il-pandemija tal-COVID-19 wasslet għal tfixkil sinifikanti u biddlet il-prospetti tas-swieq tax-xogħol Ewropej. Ir-rata tal-qgħad fiż-żona tal-euro hija mistennija tiżdied minn 7.5 % fl-2019 għal madwar 9.5 % fl-2020 u 8.6 % fl-2021. B’riżultat ta’ dan, gruppi tas-soċjetà vulnerabbli huma fir-riskju tal-faqar jew tal-esklużjoni soċjali. Huwa imperattiv li l-Istati Membri jikkoordinaw l-attivitajiet tagħhom fi ħdan pajjiżhom u madwar l-UE biex jipproteġu lil dawk li huma l-aktar f'riskju.

05

L-iffukar fuq it-tfal u l-indirizzar tar-rata għolja eżistenti ta’ tfal fil-faqar huma vitali għal ekonomija bbażata fuq l-għarfien sostenibbli, effiċjenti u kompetittiva u soċjetà li hija ġusta minn ġenerazzjoni għal oħra². Diversi studji enfasizzaw ripetutament li l-investiment bi spiża finanzjarja relattivament baxxa matul it-tfulija jista’ jwassal għal kisbiet tul il-ħajja, mhux biss għall-individwi, iżda wkoll għas-soċjetajiet u għall-ekonomiji³. Il-benefiċċji ekonomiċi tal-investiment fit-tfal jegħlbu b’mod sinifikanti l-ispejjeż ta’ finanzjament tal-investiment⁴.

06

Il-ġlieda kontra l-faqar fost it-tfal tiġi primarjament eżegwita fil-livell tal-Istati Membri. Il-gvernijiet u l-parteċipanti l-oħra fl-Istati Membri għandhom għadd ta’ inizjattivi ta’ politika soċjali u ta’ benessri li jistgħu jużaw biex jappoġġaw lit-tfal u l-familji żvantaġġati, bħal pereżempju programmi ta’ trasferiment soċjali ta’ rutina; għoti dirett ta’ servizzi u riżorsi jew programmi ta’ intervent immirati.

07

Madankollu, l-UE u b’mod partikolari l-Kummissjoni wkoll għandhom rwol x’jaqdu. Hija għandha tappoġġa u tikkomplementa l-attivitajiet tal-Istati Membri fl-qasam tal-ġlieda kontra l-esklużjoni soċjali. Jenħtieġ li l-Kummissjoni tiffaċilita wkoll il-koordinazzjoni tal-azzjoni tal-Istati Membri fl-oqsma kollha tal-politika soċjali taħt it-Titolu X – il-Politika Soċjali tat-TFUE. Għal dan l-iskop, għandha kemm strumenti legali kif ukoll finanzjarji għad-dispożizzjoni tagħha.

Ambitu u approċċ tal-awditjar

08

Aħna ddeċidejna li nwettqu dan l-awditu billi t-tfal jinsabu f’riskju akbar tal-faqar jew tal-esklużjoni soċjali mill-bqija tal-popolazzjoni. Il-faqar fost it-tfal huwa sfida f’ħafna Stati Membri u jista’ jkollu impatti sinifikanti fuq l-opportunitajiet fi stadju aktar tard fil-ħajja, bħall-qgħad bħala adult. Il-kwistjoni attwalment tidher ħafna fuq l-aġenda politika wara l-proposta tal-Parlament Ewropew għal Garanzija għat-Tfal għall-perjodu 2021-2027 (il-paragrafi 85 sa 90).

09

L-objettiv ta’ dan l-awditu tal-prestazzjoni kien li jiġi ddeterminat jekk il-Kummissjoni kinitx tat kontribut effettiv għall-isforzi tal-Istati Membri biex inaqqsu l-faqar fost it-tfal. Biex inwieġbu għal din il-mistoqsija prinċipali tal-awditjar, aħna eżaminajna jekk l-istrumenti legali tal-Kummissjoni u l-użu mill-Istati Membri tal-fondi tal-UE kkontribwewx b’mod effettiv għall-isforzi biex jiġi indirizzat il-faqar fost it-tfal.

10

L-awditu tagħna eżamina l-użu u l-implimentazzjoni ta’:

• ir-Rakkomandazzjoni tal-Kummissjoni 2013/112/UE tal-20 ta’ Frar 2013 –
  L-investiment fit-tfal: niksru ċ-ċiklu tal-iżvantaġġ” (ir-Rakkomandazzjoni), li tippromwovi approċċ integrat li jiġbor flimkien spettru wiesa’ ta’ azzjonijiet li għandhom inaqqsu l-faqar fost it-tfal;
• il-Pilastru Ewropew tad-Drittijiet Soċjali (l-EPSR), mill-2017, li jinkludi 20 prinċipju, li wħud minnhom għandhom l-għan dirett jew indirett li jindirizzaw il-faqar fost it-tfal;
• il-proċess tas-Semestru Ewropew li fih il-Kummissjoni tanalizza l-politiki soċjali tal-Istati Membri u tista’ tagħmel Rakkomandazzjonijiet Speċifiċi għall-Pajjiż li jindirizzaw il-faqar fost it-tfal, fejn jitqies meħtieġ;
• il-kontribuzzjonijiet finanzjarji tal-UE disponibbli taħt il-Fondi Soċjali Ewropej (FSE) fil-perjodu ta’ programmazzjoni 2014-2020 biex jiġi indirizzat il-faqar fost it-tfal;
• Indikaturi dwar il-faqar fost it-tfal madwar l-UE.

11

Il-Kummissjoni Ewropea kienet l-entità prinċipali li awditjajna. Barra minn hekk, żorna l-awtoritajiet Nazzjonali rilevanti fil-Ġermanja, fl-Italja, fil-Polonja u fir-Rumanija, kif ukoll organizzazzjonijiet internazzjonali u mhux governattivi li huma attivi fil-qasam tal-indirizzar tal-faqar fost it-tfal, biex niksbu aktar informazzjoni u l-perspettiva tagħhom dwar is-suġġett. Il-kriterji għall-għażla tal-Istati Membri kienu jinkludu, fost
l-oħrajn, ir-rati tal-faqar fost it-tfal u l-allokazzjoni potenzjali tal-Istati Membri tal-FSE fil-ġlieda kontra l-faqar fost it-tfal. Il-pajjiżi li saritilhom żjara kienu jirrappreżentaw għażla bbilanċjata biex ikunu inklużi kemm rati għolja kif ukoll rati baxxi ta’ faqar fost it-tfal u l-allokazzjonijiet tal-FSE.

12

Ix-xogħol tal-awditjar kien jinkludi analiżijiet dokumentarji ta’ regolamenti, strateġiji, dokumenti ta’ politika, linji gwida, evalwazzjonijiet, rapporti ta’ monitoraġġ u dokumenti interni, kif ukoll dokumenti ppubblikati minn awtoritajiet nazzjonali, korpi ta’ riċerka, akkademiċi u organizzazzjonijiet nongovernattivi.

13

Ix-xogħol li wettaqna kien jinkludi wkoll elementi li jħarsu ’l quddiem, u b’hekk nikkontribwixxu għad-diskussjoni li għaddejja dwar garanzija għat-tfal. Aħna nosservaw ukoll li x-xogħol tal-awditjar tagħna ġie kkompletat qabel it-tifqigħa tal-Covid-19, u għalhekk dan ir-rapport ma ħax inkunsiderazzjoni żviluppi ta’ politika jew bidliet oħra li seħħew b’rispons għall-pandemija attwali.

Osservazzjonijiet

Ir-Rakkomandazzjoni hija inizjattiva pożittiva iżda l-impatt tagħha huwa diffiċli, jekk mhux impossibbli, li jiġi vvalutat

Ir-Rakkomandazzjoni kienet tentattiv pożittiv biex jiġi indirizzat b’mod olistiku l-faqar fost it-tfal

14

Il-Kummissjoni adottat ir-Rakkomandazzjoni fl-2013 wara inizjattiva tal-Kunsill Ewropew u konsultazzjonijiet mal-awtoritajiet tal-Istati Membri u l-organizzazzjonijiet esperti. Id-dokument ġie adottat bħala parti mill-Pakkett ta’ Investiment Soċjali (SIP)⁵, ir-rispons tal-Kummissjoni biex tgħin lill-Istati Membri jindirizzaw ir-riskju dejjem jikber tal-faqar jew tal-esklużjoni soċjali wara l-kriżi tal-2008. L-għan tar-Rakkomandazzjoni huwa li tippromwovi approċċ integrat ta’ tliet pilastri li jikkonċerna l-aċċess għal riżorsi adegwati, aċċess għal servizzi ta’ kwalità għall-but ta' kulħadd u d-dritt tat-tfal li jipparteċipaw, b’fokus fuq it-tfal u l-familji tagħhom (ara l-Figura 3).

15

Filwaqt li r-Rakkomandazzjoni mhijiex legalment vinkolanti, kienet inizjattiva pożittiva biex jiġi indirizzat il-faqar fost it-tfal b’mod integrat. Hija għandha l-għan li tinkoraġġixxi lill-Istati Membri biex jorganizzaw u jimplimentaw politiki li jindirizzaw il-faqar fost it-tfal u l-esklużjoni soċjali permezz ta’ strateġiji multidimensjonali billi jsegwu lista ta’ prinċipji orizzontali. Hija tappella wkoll lill-Istati Membri biex jiżviluppaw l-arranġamenti meħtieġa għall-governanza, l-implimentazzjoni u l-monitoraġġ biex jiżguraw li l-politiki jindirizzaw b’mod effettiv il-faqar fost it-tfal u l-esklużjoni soċjali, kif ukoll biex jagħmlu użu sħiħ mill-istrumenti rilevanti tal-UE, inkluż il-finanzjament tal-UE.

16

In-natura mhux vinkolanti tar-Rakkomandazzjoni tfisser li l-Kummissjoni ma tistax tinforza l-implimentazzjoni tagħha fuq l-Istati Membri, iżda tista’ tippromwovi r-rilevanza u l-progress tagħha billi:

• tassisti lill-Istati Membri fl-implimentazzjoni tagħha permezz tal-iżvilupp ta’ pjan ta’ azzjoni u l-kondiviżjoni ta’ prattiki tajba fil-ġlieda kontra l-faqar fost it-tfal;
• timmonitorja u tirrapporta l-progress li jirriżulta fl-Istati Membri li jkun jipprevedi għat-trasparenza u t-tqabbil.

Il-Kummissjoni ma ħejjietx pjan direzzjonali

17

Il-prinċipji tar-Rakkomandazzjoni u l-miżuri differenti previsti taħt it-tliet pilastri tagħha huma ta’ ambitu ġenerali u jeħtieġu aktar gwida għal implimentazzjoni effettiva. F’dan ir-rigward, il-Parlament Ewropew kien irrakkomanda li l-Kummissjoni tistabbilixxi pjan direzzjonali mal-Istati Membri għall-implimentazzjoni tal-approċċ tar-Regolament imsejjes fuq tliet pilastri.

18

Il-partijiet ikkonċernati rilevanti, inklużi l-NGOs soċjali, l-awtoritajiet pubbliċi u l-organizzazzjonijiet tad-drittijiet, li pparteċipaw fil-“Grupp ad hoc dwar il-Faqar u l-Benessri tat-Tfal”, kienu esprimew l-istess ħtieġa għall-Kummissjoni. Huma kienu rrakkomandaw l-istabbiliment ta’ pjan direzzjonali tal-UE li jistabbilixxi pjan viżibbli u komunikabbli, li jistabbilixxi objettivi speċifiċi, stadji ewlenin bi skedi ta’ żmien u allokazzjoni konkreta ta’ riżorsi, li jenfasizza r-rwol ta’ atturi u livelli governattivi differenti⁶.

19

Madankollu, il-Kummissjoni ma ħejjietx tali pjan direzzjonali jew ekwivalenti u tilfet opportunità biex tipprovdi assistenza speċifika lill-Istati Membri dwar kif u sa meta jenħtieġ li jimplimentaw ir-Rakkomandazzjoni.

Il-pjattaforma online għall-kondiviżjoni ta’ prattiki tajba hija inizjattiva tajba, iżda jinħtieġu aktar sforzi biex jiġu identifikati l-aħjar prattiki

20

L-isforzi tal-Istati Membri għall-ġlieda kontra l-faqar fost it-tfal kieku jibbenefikaw mill-kondiviżjoni ta’ prattiki tajba li Stati Membri oħra jkunu użaw u identifikaw. Il-Kummissjoni waqqfet Pjattaforma Ewropea għall-Investiment fit-Tfal (EPIC), li għandha l-potenzjal li twettaq dan ir-rwol.

21

Il-Kummissjoni żviluppat din il-pjattaforma online bil-għan li tikkondividi l-aqwa tfassil ta’ politika għat-tfal u l-familji u biex trawwem il-kooperazzjoni u t-tagħlim reċiproku fil-qasam. Il-pjattaforma tinsab fis-seħħ mill-adozzjoni tar-Rakkomandazzjoni ’l hawn. L-EPIC tiġbor u xxerred prattiki innovattivi bbażati fuq l-evidenza li jista’ jkollhom impatt pożittiv fuq it-tfal u l-familji fl-Istati Membri. Il-prattiki huma allokati għal wieħed mit-tliet pilastri tar-Rakkomandazzjoni u jiġu kklassifikati bħala “prattiki emerġenti”, “prattiki promettenti” jew “l-aħjar prattiki”.

22

Sal-bidu ta’ Marzu 2020, kien hemm total ta’ 130 prattika bbażati fuq l-evidenza li kienu disponibbli fuq is-sit tal-EPIC. Madankollu, tlieta minnhom biss ġew ikklassifikati bħala “l-aħjar prattiki”, fejn kollha hemm huma jappartjenu għat-tieni pilastru tar-Rakkomandazzjoni (Aċċess għal servizzi ta’ kwalità għall-but ta' kulħadd). Il-Kaxxa 1 turi dawn l-aħjar prattiki. Għall-ewwel u t-tielet pilastru tar-Rakkomandazzjoni, ma kinux ġew imtella’ u identifikati l-aħjar prattiki li kienu relatati mal-aċċess għal riżorsi adegwati u d-dritt tat-tfal li jipparteċipaw.

23

L-għadd żgħir ta’ “l-aħjar prattiki”, l-aktar reċenti bdew fl-2001, u n-nuqqas ta’ tali prattiki għall-ewwel u għat-tielet pilastru jillimita l-effettività tal-pjattaforma EPIC biex tgħin fl-implimentazzjoni tar-Rakkomandazzjoni. Barra minn hekk, il-Kummissjoni għandha informazzjoni limitata dwar l-adozzjoni u l-implimentazzjoni ta’ prattiki bbażati fuq l-evidenza tal-EPIC fl-Istati Membri.

24

Xi Stati Membri li saritilhom żjara infurmawna li l-inizjattivi nazzjonali effettivi huma fil-forma ta’ programmi ta’ trasferiment soċjali li permezz tagħhom il-familji jirċievu kontribuzzjoni monetarja diretta. Matul iż-żmien, tali inizjattivi jistgħu jkunu piż konsiderevoli fuq il-baġit nazzjonali. Aħna wrejna eżempju wieħed fil-Kaxxa 2.

Il-monitoraġġ u r-rappurtar huma affettwati minn informazzjoni limitata

25

Monitoraġġ effettiv tal-implimentazzjoni tar-Rakkomandazzjoni huwa għodda oħra li l-Kummissjoni tista’ tuża biex tippromwovi r-rilevanza tagħha għall-Istati Membri. B’mod partikolari, rappurtar regolari tal-progress li jkun sar fi Stati Membri differenti jiżgura t-trasparenza u jipprovdi bażi għal tqabbil u inkoraġġiment. Madankollu, dan jeħtieġ indikaturi li jistgħu jitkejlu u miri realistiċi, kif ukoll mekkaniżmu ta’ rappurtar xieraq.

26

Ir-Rakkomandazzjoni, f’dan ir-rigward, appellat lill-Istati Membri biex isaħħu l-użu ta’ approċċi bbażati fuq l-evidenza billi jagħmlu użu sħiħ mill-istatistika eżistenti, mid-data amministrattiva u mill-qafas ta’ monitoraġġ propost, li jikkonsisti fi 32 indikatur⁸.

27

Madankollu, aħna sibna li l-indikaturi proposti ma jkoprux il-miżuri kollha proposti mir-Rakkomandazzjoni. Għat-tielet pilastru, ma ġew stabbiliti l-ebda indikaturi għal kwalunkwe waħda mill-miżuri li jaqgħu taħtu.

28

Il-progress tal-implimentazzjoni tar-Rakkomandazzjoni huwa diffiċli biex jiġi vvalutat billi ma ġewx stabbiliti miri li jistgħu jitkejlu u lanqas stadji importanti f’dan il-kuntest. Il-Kummissjoni u l-Istati Membri kienu esploraw il-possibbiltà li jistabbilixxu dawn il-miri, iżda fl-aħħar nett l-Istati Membri ma appoġġawhomx.

29

Minkejja dawn il-limitazzjonijiet, hemm tal-inqas xi informazzjoni disponibbli permezz tal-Kumitat għall-Protezzjoni Soċjali (KPS), li fih il-Kummissjoni hija membru. Il-KPS huwa kumitat konsultattiv ta’ politika għall-Ministri fil-Kunsill Impjiegi, Politika Soċjali, Saħħa u Affarijiet tal-Konsumatur (EPSCO). Filwaqt li jibbenefika mill-għarfien espert fil-politika, u mill-appoġġ analitiku u segretarjali tal-Kummissjoni, il-kompiti tal-KPS jinkludu l-monitoraġġ tas-sitwazzjoni soċjali u l-iżvilupp ta’ politiki ta’ protezzjoni soċjali fl-Istati Membri u fl-Unjoni. Huwa jipprovdi aġġornament annwali permezz ta’ “Il-portafoll tematiku ta’ ninvestu fit-tfal” għall-maġġoranza tal-indikaturi elenkati fil-qafas ta’ monitoraġġ tar-Rakkomandazzjoni.

Huwa diffiċli, jekk mhux impossibbli, li jitkejjel l-impatt dirett u kwantitattiv tar-Rakkomandazzjoni

30

Jenħtieġ li l-implimentazzjoni effettiva tar-Rakkomandazzjoni ssegwi strateġija/politika nazzjonali għall-ġlieda kontra l-faqar fost it-tfal, li tidentifika l-oqsma fejn Stat Membru jemmen li jeħtieġ li primarjament jinvolvi ruħu fil-ġlieda kontra l-faqar fost it-tfal u kif dan jenħtieġ li jseħħ. L-eżistenza u l-kontenut ta’ din l-istrateġija jkunu wkoll indikazzjoni tal-impatt tar-Rakkomandazzjoni.

31

Wara t-talba tal-Kummissjoni, in-Netwerk Ewropew dwar il-Politika Soċjali (ESPN) ħejja studju tal-politiki nazzjonali sabiex ikejjel il-progress tal-Istati Membri fl-implimentazzjoni tar-Rakkomandazzjoni⁹. Dan l-istudju pprovda informazzjoni konkreta u komparabbli għal kull Stat Membru kif ukoll għal seba’ pajjiżi oħra.

32

Is-sejba kumplessiva tal-analiżi tal-ESPN hija li l-progress modest li sar fid-direzzjoni deskritta fir-Rakkomandazzjoni huwa insuffiċjenti, f'dak li jirrigwarda l-iskala tal-problema, f’ħafna pajjiżi. L-esperti enfasizzaw li ħafna mill-pajjiżi b’livelli għoljin jew għoljin ħafna ta’ faqar fost it-tfal jew ta' esklużjoni soċjali għamlu progress limitat f’ħafna oqsma u xi wħud minnhom fil-fatt dgħajfu l-approċċ tagħhom f’diversi oqsma. Il-pajjiżi li diġà kellhom politiki u programmi b’saħħithom u livelli baxxi ta’ faqar fost it-tfal jew esklużjoni soċjali fil-biċċa l-kbira tagħhom żammewhom fis-seħħ.

33

L-istudju osserva wkoll li huwa diffiċli, jekk mhux impossibbli, li jiġi vvalutat sa liema punt it-titjib individwali jista’ jiġi attribwit għar-Rakkomandazzjoni nfisha, iżda indika li ftit li xejn kien hemm tibdil fil-politiki nazzjonali f’ħafna pajjiżi. Filwaqt li din mhijiex sorpriża għall-Istati Membri fejn il-proporzjonijiet tal-faqar fost it-tfal huma baxxi jew medji, huma esprimew tħassib partikolari li ħafna mill-Istati Membri bi proporzjonijiet għoljin u għoljin ħafna ma mxewx lejn approċċ aktar integrat u multidimensjonali. Din il-konklużjoni tikkorrobora dak li konna sibna fl-erba’ Stati Membri li saritilhom żjara (il-Ġermanja, l-Italja, il-Polonja, ir-Rumanija).

34

L-istudju kien ressaq rakkomandazzjonijiet mhux vinkolanti¹⁰, li kellhom l-għan li jġibu aktar urġenza u effettività fl-implimentazzjoni tar-Rakkomandazzjoni. Madankollu, il-Kummissjoni ma wettqitx segwitu fir-rigward tagħhom.

Il-Pilastru Ewropew tad-Drittijiet Soċjali: inizjattiva soċjali progressiva u globali, bi prinċipji ta’ natura ġenerali dwar it-tfal

35

Fis-17 ta’ Novembru 2017, il-Parlament Ewropew, il-Kunsill u l-Kummissjoni, fis-Summit Soċjali ta’ Gothenburg għall-Impjiegi Ġusti u t-Tkabbir, ipproklamaw b’mod konġunt il-Pilastru Ewropew tad-Drittijiet Soċjali (l-EPSR)¹¹. Il-Kummissjoni u l-Istati Membri jaqsmu r-responsabbiltà għall-implimentazzjoni tiegħu. L-EPSR jirrappreżenta strument mhux legalment vinkolanti ieħor disponibbli għall-ġlieda kontra l-faqar fost it-tfal, fejn il-Kummissjoni ma tistax tinforza l-implimentazzjoni tiegħu fuq l-Istati Membri.

36

L-EPSR huwa mfassal bħala qafas biex iwassal Ewropa aktar ġusta għaċ-ċittadini b’dimensjoni soċjali b’saħħitha. Dan jinkludi 20 prinċipju fformulati, fil-maġġoranza tagħhom, bħala drittijiet li għandhom l-għan li jwasslu għal attività leġiżlattiva u mhux leġiżlattiva fil-livell tal-Istati Membri.

37

L-20 prinċipju huma maqsuma fi tliet kategoriji, biex jappoġġaw swieq tax-xogħol inklużivi u li jiffunzjonaw tajjeb u sistemi ta’ protezzjoni soċjali, (i) Opportunitajiet indaqs u aċċess għas-suq tax-xogħol, (ii) Kundizzjonijiet tax-xogħol ġusti, (iii) Protezzjoni u inklużjoni soċjali.

38

L-EPSR huwa akkumpanjat minn “tabella ta’ valutazzjoni soċjali” biex tiġi mmonitorjata l-implimentazzjoni tiegħu billi jiġu rintraċċati x-xejriet u l-prestazzjonijiet fl-Istati Membri fi12-il qasam u jiġi inkluż fil-proċess tas-Semestru Ewropew.

Id-drittijiet tat-tfal huma koperti minn Prinċipju speċifiku fl-EPSR

39

Mill-20 prinċipju tal-EPSR, wieħed minnhom, il-Prinċipju 11 (Kura tat-tfal u l-appoġġ għat-tfal) taħt il-kategorija Protezzjoni u inklużjoni soċjali, isemmi b’mod espliċitu l-ħtieġa li jsir investiment fit-tfal billi jindika li:

• it-tfal għandhom id-dritt għal edukazzjoni bikrija tat-tfal affordabbli u kura ta’ kwalità tajba;
• it-tfal għandhom id-dritt għall-protezzjoni mill-faqar. it-tfal li ġejjin minn ambjent żvantaġġat għandhom id-dritt għal miżuri speċifiċi biex jissaħħu l-opportunitajiet indaqs.

40

Għadd ta’ prinċipji oħra huma rilevanti għat-tfal u jistgħu jaffettwaw kemm direttament kif ukoll indirettament il-faqar fost it-tfal (eż. prinċipji relatati mal-edukazzjoni, il-bilanċ bejn ix-xogħol u l-ħajja privata, il-protezzjoni soċjali u s-saħħa), madankollu, dawn ma jirreferux speċifikament għat-tfal.

41

L-EPSR żied l-għarfien tal-politiki soċjali fl-UE, inkluż il-faqar fost it-tfal. Mod wieħed ta’ kif seħħ dan kien permezz tal-aġġornament tal-Linji Gwida dwar l-Impjieg. Il-linji gwida dwar l-impjieg huma prijoritajiet u miri komuni għall-politiki tal-impjieg proposti mill-Kummissjoni Ewropea, maqbula mill-gvernijiet nazzjonali u adottati mill-Kunsill tal-UE. Fl-2018, il-Linji Gwida dwar l-Impjieg ġew aġġornati biex jieħdu inkunsiderazzjoni l-prinċipji tal-Pilastru. Dawn il-Linji Gwida jiddeterminaw l-ambitu u d-direzzjoni tal-koordinazzjoni tal-politika tal-Istati Membri u jikkontribwixxu għall-proċess tas-Semestru Ewropew.

42

Madankollu, aħna nosservaw li l-EPSR ipprovda biss prinċipji ġenerali diġà koperti mir-Rakkomandazzjoni f’aktar dettall fil-forma ta’ miżuri speċifiċi.

• Għall-ewwel parti tal-Prinċipju 11 dwar ECEC affordabbli, diġà kienu jeżistu miżuri qabel l-adozzjoni tal-EPSR. Ir-Rakkomandazzjoni tappella għal strateġiji integrati biex jiġi indirizzat il-faqar fost it-tfal, li jinkludi l-ECEC.
• It-tieni parti tal-Prinċipju 11 tirrigwarda d-dritt tat-tfal għall-protezzjoni mill-faqar. Ir-Rakkomandazzjoni tipprovdi li t-tfal ikollhom aċċess għal riżorsi u servizzi komprensivi u integrati, li jkunu jindirizzaw dan id-dritt.

L-EPSR jista’ jibbenefika minn pjan ta’ azzjoni

43

Meta approva l-EPSR, il-Kunsill Ewropew¹² ikkjarifika li dan jenħtieġ li jiġi implimentat kemm fil-livell tal-Unjoni kif ukoll fil-livell tal-Istati Membri, li għalih il-Kummissjoni u l-Istati Membri jikkondividu r-responsabbiltà. Filwaqt li ħafna mill-għodda biex jitwettaq il-Pilastru huma f’idejn l-Istati Membri, kif ukoll is-sħab soċjali u s-soċjetà ċivili, l-istituzzjonijiet tal-UE – u l-Kummissjoni Ewropea b’mod partikolari – jistgħu jgħinu billi jistabbilixxu l-qafas strateġiku u jagħtu direzzjoni.

44

Il-Linji Gwida Politiċi għall-Kummissjoni Ewropea 2019-2024 innotaw l-intenzjoni li “tressaq pjan ta’ azzjoni għall-implimentazzjoni sħiħa tal-Pilastru Ewropew tad-Drittijiet Soċjali”¹³. F’Jannar 2020, il-Kummissjoni ppreżentat komunikazzjoni¹⁴ li tistabbilixxi t-triq lejn tali Pjan ta’ Azzjoni u nediet diskussjoni wiesgħa mal-pajjiżi kollha tal-UE, mar-reġjuni, u mas-sħab rilevanti kollha. Huwa previst li l-Pjan ta’ Azzjoni se jiġi ppreżentat fil-bidu tal-2021, kważi erba’ snin wara l-adozzjoni tiegħu; huwa se jappella għal azzjoni mill-atturi fil-livelli kollha: il-livell Ewropew, nazzjonali, reġjonali u lokali. Filwaqt li dan il-pjan ta’ azzjoni previst huwa żvilupp pożittiv, ir-realizzazzjoni tiegħu hija importanti biex tingħata ħarsa ġenerali lejn il-progress fl-implimentazzjoni tal-prinċipji differenti, inkluż il-Prinċipju 11 dwar id-drittijiet tat-tfal.

L-EPSR x’aktarx se jkollu rwol prominenti fil-perjodu ta’ programmazzjoni 2021-2027.

45

Ir-Regolament propost għall-Fond Soċjali Ewropew Plus (FSE +), għall-perjodu 2021-2027, jiffoka fuq l-investiment fin-nies u jappoġġa t-twettiq tal-EPSR. Barra minn hekk, Ewropa aktar soċjali li timplimenta l-EPSR hija inkluża f’wieħed mill-ħames objettivi ta’ politika identifikati mir-Regolament dwar Dispożizzjonijiet Komuni propost (RDK) għall-perjodu 2021-2027¹⁵.

46

Skont il-proposta, sabiex jiġi żgurat li tiġi ppreżentata kif xieraq id-dimensjoni soċjali tal-Ewropa kif stabbilita fl-EPSR, jenħtieġ li l-Istati Membri jallokaw mill-inqas 25 % tar-riżorsi nazzjonali tal-FSE+ tagħhom taħt ġestjoni kondiviża biex irawmu l-inklużjoni soċjali¹⁶. Il-qasam ta’ politika tal-inklużjoni soċjali jinkludi referenza għat-tfal, madankollu l-ebda mira jew livell speċifiku ta’ appoġġ għadu ma ġie propost biex jiġi allokat għal dan l-għan.

47

Jenħtieġ li l-Proposta għar-Regolament tal-FSE+ tispeċifika li l-Istati Membri jieħdu inkunsiderazzjoni l-prinċipji u d-drittijiet stabbiliti fl-EPSR. Din l-enfasi l-ġdida proposta fuq l-EPSR rigward il-perjodu ta’ programmazzjoni 2021-2027, għandha l-potenzjal li tiffoka l-miżuri u l-finanzjament fuq l-indirizzar tal-faqar fost it-tfal.

Is-CSRs tas-Semestru Ewropew rari jindirizzaw il-faqar fost it-tfal b’mod espliċitu

Progress limitat lejn il-miri għat-tnaqqis tal-faqar fl-2020

48

Introdott fl-2010, is-Semestru Ewropew huwa ċiklu annwali ta’ koordinazzjoni tal-politika ekonomika u fiskali, imfassal speċifikament biex jikkoordina l-isforzi nazzjonali biex jintlaħqu l-miri tal-istrateġija Ewropa 2020 għal tkabbir intelliġenti, sostenibbli u inklużiv. Għalhekk, huwa għandu jikkontribwixxi biex tintlaħaq il-mira ewlenija dwar il-faqar u l-esklużjoni soċjali biex mill-inqas 20 miljun persuna joħorġu mir-riskju tal-faqar jew l-esklużjoni soċjali sal-2020, meta mqabbla mal-2008.

49

Sa liema punt se tinkiseb din il-mira jiddependi fil-biċċa l-kbira mill-Istati Membri. Huma stabbilixxew il-miri nazzjonali tal-faqar proprji tagħhom fil-Programmi Nazzjonali ta’ Riformi tagħhom (PNR). Aħna nosservaw li anke jekk jintlaħqu l-miri nazzjonali kollha sal-2020, l-għadd totali ta’ persuni li jinħarġu mill-faqar mhux se jilħaq il-mira ta’ 20 miljun li hija prevista mill-Istrateġija Ewropa 2020 (ara l-Anness I bid-dettalji għal kull Stat Membru).

50

Id-data tal-Eurostat¹⁷ tindika li fl-2018 kien għad hemm 109.2 miljun persuna fir-riskju tal-faqar jew tal-esklużjoni soċjali. It-tnaqqis kumplessiv għall-UE-28 huwa 7.15 miljun persuna li jinħarġu mill-faqar meta mqabbel mal-2008, li jfisser li l-progress sa issa kien limitat u għalhekk huwa improbabbli li jintlaħqu l-miri tal-2020.

Ir-rakkomandazzjonijiet speċifiċi għall-pajjiż jinkludu kwistjonijiet relatati mal-faqar fost it-tfal, iżda l-proċess sottostanti jeħtieġ iktar kjarifika

51

Il-faqar fost it-tfal jaqa’ taħt l-element tal-faqar u l-esklużjoni soċjali tal-istrateġija Ewropa 2020 u għalhekk huwa parti mill-proċess annwali tas-Semestru Ewropew tal-Kummissjoni li jinvolvi l-ħames fażijiet prinċipali li ġejjin:

1. il-Kummissjoni tħejji Rapporti tal-Pajjiż għal kull Stat Membru,
2. l-Istati Membri jippreżentaw il-PNR tagħhom (politiki ekonomiċi) u l-Programmi ta’ Stabbiltà jew Konverġenza (dwar il-politiki baġitarji), u
3. il-Kummissjoni tipproponi r-Rakkomandazzjonijiet Speċifiċi għall-Pajjiż (minn hawn ’il quddiem imsejħa s-CSR),
4. il-Kunsill jadotta s-CSRs, li huma indirizzati lill-Istati Membri u li mistennija jiġu implimentati permezz tat-tfassil tal-politika nazzjonali,
5. il-Kummissjoni timmonitorja l-implimentazzjoni sussegwenti tas-CSR.

52

Ir-Rapporti tal-Pajjiżi huma l-punt tat-tluq tal-proċess tas-Semestru Ewropew. Huma fihom valutazzjoni tas-sitwazzjoni ekonomika ta’ kull Stat Membru u tal-progress li sar lejn l-ilħuq tal-miri ta’ Ewropa 2020. Is-CSRs jindirizzaw b’mod ġenerali kwistjonijiet identifikati fir-Rapporti tal-Pajjiżi.

53

Aħna rrieżaminajna r-Rapporti tal-Pajjiżi tal-2019 għal sitt Stati Membri, fejn tlieta minnhom kellhom l-ogħla rata ta’ riskju tal-faqar jew tal-esklużjoni soċjali għat-tfal fl-2018¹⁸. Aħna sibna li l-Kummissjoni vvalutat il-faqar fost it-tfal b’mod koerenti f’dawn ir-rapporti u identifikatu bħala kwistjoni problematika, fejn xieraq.

54

Kriterju importanti fil-pass sussegwenti għal meta l-Kummissjoni tqis abbozz ta’ CSR dwar il-faqar fost it-tfal, huwa li tivvaluta jekk ir-rata ta’ riskju tal-faqar jew tal-esklużjoni soċjali tal-UE għat-tfal hijiex “għolja” jew “għolja ħafna”. Aħna nosservaw li l-livelli tas-sollijiet interni użati għall-klassifikazzjoni ta’ rati ta’ faqar fost it-tfal bħala “għolja” jvarjaw minn 28 % sa 31 % għas-snin eżaminati (2015-2017). Dawn is-sollijiet huma stabbiliti ’l fuq mil-livelli medji tal-UE ta’ 24.3 % sa 27.1 % għall-perjodu korrispondenti u l-impatti fuq liema Stati Membri qed jiġu meqjusa għal CSR possibbli relatat direttament mal-faqar fost it-tfal.

55

Mill-2015 sal-2017 aħna sibna 28 istanza fejn l-Istati Membri kellhom rata ta’ f’riskju tal-faqar jew tal-esklużjoni soċjali li kieku tikklassifikahom fil-kategorija “għolja” jew "għolja ħafna” għas-snin rilevanti (ara l-Figura 4). Barra minn hekk, għall-14-il Stat Membru li ġew osservati fl-2015, din ir-rata kienet marret għall-agħar għal tnejn minnhom meta mqabbla mal-2016 (il-Bulgarija, ir-Rumanija).

56

Aħna sibna li l-Istati Membri kollha b’rata ta’ riskju tal-faqar jew tal-esklużjoni soċjali vvalutata bħala “għolja” jew “għolja ħafna” mill-Kummissjoni¹⁹, irċevew CSRs f’oqsma oħra li jikkonċernaw politiki tal-familja u tat-tfal, pereżempju fil-qasam ta’ introjtu li jappoġġa l-adegwatezza tal-protezzjoni soċjali. Dawn is-CSRs jistgħu jgħinu fit-tnaqqis tal-faqar fost it-tfal. Aħna nosservaw li Stat Membru wieħed, l-Irlanda, irċieva CSR espliċitament dwar il-faqar fost it-tfal matul il-perjodu 2016 sa 2019 (ara l-Kaxxa 3).

57

Is-servizzi tal-Kummissjoni f’dan il-kuntest spjegaw li d-definizzjoni u l-proposta ta’ CSRs ma tiddependix biss fuq ir-rata ta’ riskju tal-faqar jew tal-esklużjoni soċjali għat-tfal, iżda wkoll fuq:

1. jekk l-isfida (il-kwistjoni) kinitx ġiet indirizzata qabel fis-Semestru Ewropew;
2. jekk kinitx bdiet l-implimentazzjoni tar-rakkomandazzjonijiet diġà adottati;
3. jekk inbidlux iċ-ċirkustanzi fl-Istat Membru u f’dan ir-rigward l-indikaturi relatati b’mod indirett mal-faqar fost it-tfal;
4. sfidi urġenti oħrajn li l-Istat Membru jista’ jkun qed jiffaċċja minħabba limitu fuq l-għadd ta’ CSRs li jistgħu jiġu proposti lil Stat Membru f’sena waħda.

58

Għalkemm il-Kummissjoni tanalizza l-faqar fost it-tfal meta tkun qed tħejji r-Rapporti tal-Pajjiżi fi ħdan il-proċess tas-Semestru Ewropew, il-metodoloġija speċifika stabbilita meta jkun jenħtieġ li l-Faqar fost it-Tfal jingħata prijorità għall-kunsiderazzjoni ta’ CSR potenzjali ma ġietx definita b’mod ċar.

L-effettività tal-finanzjament tal-UE għall-2014-2020 biex jiġi indirizzat il-faqar fost it-tfal ma tistax tiġi vvalutata.

59

Il-proċess biex jiġi stabbilit kif l-Istati Membri jużaw u jallokaw il-fondi tal-UE huwa mod ieħor kif il-Kummissjoni tista’ tikkontribwixxi għall-ġlieda kontra l-faqar fost it-tfal. Il-Kummissjoni jista’ jkollha impatt fi tliet stadji fi ħdan dan il-proċess. L-ewwel pass huwa t-tfassil ta’ RDK, it-tieni wieħed huwa permezz ta’ Ftehimiet ta’ Sħubija (FS) u t-tielet wieħed huwa permezz tal-Programmi Operazzjonali (PO), l-aħħar tnejn fil-livell tal-Istati Membri. Aħna niddeskrivu dan il-proċess għall-perjodu ta’ programmazzjoni attwali fil-Figura 5.

Ir-RDK għall-fondi SIE ma għandux fil-mira l-faqar fost it-tfal direttament

60

Ir-RDK²¹ jistabbilixxi dispożizzjonijiet komuni għal seba’ fondi ta’ ġestjoni kondiviża. Huwa jistabbilixxi r-regoli ewlenin li jirregolaw il-fondi għall-perjodu 2014-2020. Ir-RDK fih id-dispożizzjonijiet ewlenin li jikkonċernaw il-programmazzjoni tal-objettivi tal-politika ta' Koeżjoni u l-infiq korrispondenti għall-perjodu 2014-2020.

61

Permezz tar-rwol tagħha fit-tfassil tal-proposta għar-RDK, il-Kummissjoni tista’ tinfluwenza l-allokazzjoni u l-użu sussegwenti tal-Fondi Strutturali u ta’ Investiment Ewropej (Fondi SIE) biex tikkontribwixxi għall-ġlieda kontra l-faqar fost it-tfal. Wieħed mill-istrumenti ewlenin tar-RDK għal dan l-iskop huwa t-twaqqif ta’ Objettivi Tematiċi (OT) u ta’ Prijoritajiet ta’ Investiment (PI) rilevanti.

62

L-OT huma ddefiniti fir-RDK u jippreżentaw objettivi li jenħtieġ li jkunu sostnuti mill-Fondi SIE. Ir-RDK jidentifika 11-il Objettiv Tematiku (OT), li jiddefinixxu setturi u oqsma ta’ intervent fejn l-appoġġ tal-UE permezz tal-Fondi SIE jista’ jagħti l-akbar valur miżjud. L-Objettivi Tematiċi (OT)²² huma maqsuma fi Prijoritajiet ta’ Investiment (PIs)²³.

63

Ir-RDK huwa kkomplimentat mir-regolamenti speċifiċi għall-Fond Soċjali Ewropew (FSE) u l-Fond Ewropew għall-Iżvilupp Reġjonali (FEŻR). B’kollox, taħt ir-Regolamenti speċifiċi għall-FSE u l-FEŻR hemm 57 PI. L-ebda wieħed mill-PI ma huwa speċifikament iddedikat biex jindirizza l-faqar fost it-tfal.

64

Għall-perjodu 2014-2020 ir-RDK introduċa wkoll strument ġdid li għandu l-għan li jżid l-effettività tal-interventi tal-FSIE, il-“kundizzjonalitajiet ex ante” (EACs). L-EACs jistabbilixxu rekwiżiti minimi fil-bidu tal-implimentazzjoni tal-programmi u jinkludu rekwiżiti strateġiċi u regolatorji li l-Istati Membri jridu jilħqu qabel ma jirċievu l-fondi tal-UE. Għall-EACs relatati mal-faqar (ara l-Kaxxa 4).

65

L-EAC relatata mal-OT 9 dwar il-faqar “Promozzjoni tal-inklużjoni soċjali, ġlieda kontra l-faqar u kwalunkwe diskriminazzjoni” titqies issodisfata jekk Stat Membru jkollu fis-seħħ “Qafas ta’ politika strateġika nazzjonali għat-tnaqqis tal-faqar, bil-għan ta’ inklużjoni attiva”. L-Istati Membri kollha li saritilhom żjara adottaw strateġiji ta’ kontra l-faqar b’reazzjoni għall-kundizzjonalità ex ante 9.1 u l-Kummissjoni osservat li fl-erba’ Stati Membri kollha li saritilhom żjara l-EAC 9.1 ġiet issodisfata.

66

Madankollu, il-kriterji biex tiġi ssodisfata l-EAC tal-inklużjoni soċjali ma tirrikjedix li l-Istati Membri jistabbilixxu miri għat-tnaqqis tal-faqar u lanqas ma tispeċifika gruppi vulnerabbli li jinkludu t-tfal li għandhom jiġu mmirati. Il-leġiżlazzjoni tal-UE ma għandha l-ebda finanzjament immirat direttament għall-ġlieda kontra l-faqar fost it-tfal.

L-ammont ta’ fondi SIE li jindirizzaw direttament il-faqar fost it-tfal mhuwiex magħruf.

67

Il-FS huma pjanijiet ta' investiment strateġiku għall-Istati Membri tal-UE, li jindikaw liema huma l-prijoritajiet nazzjonali ta' nfiq tagħhom għall-fondi SIE matul perjodu ta' seba' snin. Il-FS jinkludu l-għanijiet u l-OT li jridu jinkisbu minn Stat Membru li għandhom x’jaqsmu mal-ħtiġijiet ta’ investiment u żvilupp speċifiċi tagħhom. Dawn l-għanijiet huma elaborati f’aktar dettall fil-PO individwali relatati. Jenħtieġ li l-kundizzjonijiet li magħhom tista’ titkejjel il-prestazzjoni ta’ dawn il-programmi jkunu adegwati u jistabbilixxu indikaturi rilevanti, li jippermettu valutazzjoni tal-effettività tagħhom.

68

Il-FS jkopru l-perjodu ta' programmazzjoni kollu kemm hu u jinkludu l-ħames fondi SIE kollha. Hemm FS wieħed għal kull Stat Membru li huwa mħejji fuq il-bażi tal-PNR li jippreżentaw il-politiki u l-miżuri tal-pajjiż għas-sostenn tat-tkabbir u tal-impjiegi, u għall-ilħuq tal-miri ta' Ewropa 2020, is-CSRs li huma rilevanti u l-aktar reċenti u r-rakkomandazzjonijiet rilevanti tal-Kunsill.

69

Il-FS huwa suġġett għall-approvazzjoni mill-Kummissjoni u jinkludi informazzjoni dwar il-ħtiġijiet ta’ żvilupp tal-Istati Membri; l-OT magħżula; il-lista ta’ PO għal kull Stat Membru; sommarju tal-evalwazzjonijiet ex ante u sommarju tal-valutazzjoni tal-kundizzjonalitajiet ex ante, fost oħrajn.

70

Filwaqt li l-FS għall-erba’ Stati Membri li saritilhom żjara stabbilixxew miri għat-tnaqqis tal-faqar inġenerali, l-ebda wieħed minnhom ma kien stabbilihom biex inaqqas il-faqar fost it-tfal b’mod espliċitu.

71

Aħna analizzajna ħames PO u ppruvajna nidentifikaw il-fondi allokati biex jiġi indirizzat il-faqar fost it-tfal. Madankollu, it-tfal fil-faqar mhumiex grupp fil-mira espliċitu għall-interventi mill-fondi SIE u ma hemm l-ebda kriterji ta’ għażla orizzontali/kundizzjonijiet ta’ eliġibbiltà mmirati lejn l-appoġġ finanzjarju għal tfal fir-riskju tal-faqar jew tal-esklużjoni soċjali. Fih innifsu, mhuwiex possibbli li jiġi stabbilit jekk dawn l-interventi kinux ta’ benefiċċju dirett għat-tfal fir-riskju tal-faqar jew tal-esklużjoni soċjali²⁴. Il-Figura 6 turi l-finanzjament massimu tal-UE kif indikat mill-awtoritajiet nazzjonali li huwa potenzjalment disponibbli biex jindirizza, fost l-oħrajn, il-faqar fost it-tfal fil-ħames PO inklużi fil-kampjun.

72

Madankollu, l-informazzjoni dwar kemm minn dawn il-fondi SIE kienu qed jindirizzaw direttament il-faqar fost it-tfal ma kinitx disponibbli. Kull PO eżaminat jinkludi miżuri li indirettament huwa mistenni li jikkontribwixxu b’mod pożittiv għall-ġlieda kontra l-faqar fost it-tfal. Tali miżuri jinkludu fondi li għandhom il-mira ta’ inklużjoni ta’ persuni f’riskju tal-faqar bil-għan li jtejbu l-parteċipazzjoni tagħhom fis-suq tax-xogħol jew li jippromwovu l-impjieg.

73

Barra minn hekk, miżuri relatati mal-kura tas-saħħa u l-edukazzjoni, għalkemm mhux immirati speċifikament lejn tfal fir-riskju tal-faqar jew tal-esklużjoni soċjali, dawn jistgħu potenzjalment jibbenefikaw minnhom indirettament. Tali taħlita ta’ miżuri indiretti bħal din tidher fil-Kaxxa 5.

74

Minħabba l-limitazzjonijiet ta’ hawn fuq, il-Kummissjoni ma tistax tikkwantifika l-ammont ta’ fondi allokati għal proġetti li jindirizzaw direttament il-faqar fost it-tfal u konsegwentement tivvaluta l-effettività tagħhom. Din is-sitwazzjoni hija aktar aggravata min-nuqqas ta’ objettivi u miri fil-FS u l-PO magħżula li jistgħu jindikaw x’hemm ippjanat biex jinkiseb fil-qasam. Barra minn hekk, kull meta jiġu adottati indikaturi tar-riżultati, dawn huma speċifiċi għall-programm u ma jurux b’mod ċar kif l-investimenti ffinanzjati huma ta’ benefiċċju għal tfal fir-riskju tal-faqar jew tal-esklużjoni soċjali.

L-indikaturi jirriflettu s-sitwazzjoni tal-faqar fost it-tfal b’mod differenti

75

Indikaturi ta’ sinifikat jipprovdu informazzjoni rilevanti lil dawk li jfasslu l-politika u lil min qiegħed jimplimentahom. L-indikaturi jinfurmawhom dwar kemm politika hija effettiva fil-prattika u tippermettilhom jieħdu azzjonijiet korrettivi, fejn meħtieġ.

L-AROPE jippermetti tqabbil tar-riskju tal-faqar jew tal-esklużjoni soċjali fl-Istati Membri kollha

76

L-indikatur li jkejjel il-faqar fl-UE u huwa l-indikatur ewlieni għall-monitoraġġ tal-mira dwar il-faqar tal-Istrateġija UE 2020 huwa l-AROPE – li hija l-abbrevjazzjoni ta’ “fir-riskju tal-faqar jew tal-esklużjoni soċjali”.

77

L-AROPE huwa indikatur multidimensjonali magħmul minn tliet subindikaturi. It-tliet subindikaturi jingħataw l-istess importanza u jistgħu jikkoinċidu parzjalment ma’ xulxin. L-AROPE juri l-ammont totali ta’ persuni li jinsabu f’tal-inqas waħda minn dawn is-sitwazzjonijiet li ġejjin (persuni f’aktar minn sitwazzjoni waħda jingħaddu darba biss):

• F’riskju tal-faqar – Is-sehem ta’ nies b’introjtu disponibbli (wara trasferiment soċjali) taħt is-soll ta’ dawk f’riskju tal-faqar, li huwa stabbilit għal 60 % tal-introjtu medju disponibbli ta’ Stat Membru wara trasferimenti soċjali.
• F’sitwazzjoni ta’ deprivazzjoni materjali estrema – L-inabbiltà li jixtru xi oġġetti meqjusa bħala mixtieqa jew meħtieġa biex imexxu ħajja adegwata, tindika r-rata ta’ deprivazzjoni materjali. L-indikatur ikejjel il-perċentwal tal-popolazzjoni li ma tistax taffordja tal-anqas 40 minn 9 affarijiet f’lista ta’ ċerti oġġetti jew servizzi għad-dar. Id-deprivazzjoni materjali estrema hija ddefinita bħala l-inabbiltà forzata li wieħed iħallas għal mill-inqas erba’ mill-affarijiet fuq il-lista.
• Jgħixu f’unitajiet domestiċi b’intensità baxxa ħafna ta’ xogħol – Dan huwa ddefinit bħala l-għadd ta’ persuni li jgħixu f’unità domestika fejn il-membri ta’ età lavorattiva ħadmu inqas minn 20 % tal-potenzjal totali tagħhom matul it-12-il xahar ta’ qabel. Unitajiet domestiċi magħmula biss minn tfal, ta’ studenti inqas minn 25-il sena u/jew minn persuni li għandhom 60 sena jew aktar huma kompletament esklużi mill-kalkolu tal-indikatur.

L-Indikatur tad-Deprivazzjoni tat-Tfal jiffoka speċifikament fuq is-sitwazzjoni tat-tfal

78

Bħala parti mill-inizjattiva tal-UE biex jiġi indirizzat il-faqar fost it-tfal, fl-2013 il-Kummissjoni ħabbret il-bidu ta’ xogħol ta’ tħejjija għal indikatur ta’ deprivazzjoni materjali speċifiku għat-tfal. B’mod simili għal indikatur ta’ deprivazzjoni materjali (bħas-subindikatur ta’ AROPE), l-indikatur tad-deprivazzjoni tat-tfal jirrappreżenta l-proporzjon ta’ tfal minn 1 sa 15-il sena li huma nieqsa minn, għal raġunijiet ta’ affordabbiltà, oġġetti ta’ kuljum. Il-lista ta’ 17-il oġġett fiha oġġetti speċifiċi għat-tfal filwaqt li żżomm ukoll xi oġġetti tad-dar mill-indikatur ta’ deprivazzjoni materjali għall-popolazzjoni kollha. It-tfal se jiġu kklassifikati bħala mċaħħda jekk ma jkollhomx mill-inqas tliet oġġetti minn din il-lista ta’ 17-il oġġett (ara l-Anness II).

79

F’Marzu 2018, ħames snin wara li tħabbar, l-indikatur ta’ deprivazzjoni materjali speċifiku għat-tfal kien ġie eventwalment adottat mill-Kumitat tal-Protezzjoni Soċjali. F’Lulju 2019, ġiet ippubblikata l-ewwel (u sa issa l-unika) data dwar id-deprivazzjoni tat-tfal (miġbura abbażi ta’ stħarriġ). Hija kienet tikkonċerna biss id-data għall-2014 peress li l-ebda data oħra ma kienet disponibbli. L-indikatur tad-deprivazzjoni tat-tfal mhux se jkun disponibbli kull sena, iżda kull tliet snin u mill-2021 ’il quddiem²⁵.

80

Meta l-indikatur tad-deprivazzjoni materjali speċifiku għat-tfal jitqabbel mas-subindikatur tad-deprivazzjoni materjali fl-AROPE (l-indikatur ta’ deprivazzjoni materjali serja) (ara l-Anness II) għall-istess grupp ta’ età, l-indikatur ta’ deprivazzjoni tat-tfal fl-Istati Membri kollha juri valuri ogħla mill-indikatur ta’ deprivazzjoni materjali (ara l-Figura 7).

81

Kemm il-ħtiġijiet kif ukoll l-istandards tal-għajxien tat-tfal jistgħu jkunu differenti minn dawk ta’ adulti, anke fl-istess unitajiet domestiċi. Billi l-indikatur ta’ deprivazzjoni materjali speċifiku għat-tfal huwa aktar iffukat fuq il-qagħda tat-tfal, huwa jagħti stampa differenti u aktar speċifika tal-livell reali tal-faqar fost it-tfal.

Il-kejl tal-faqar fost it-tfal ivarja fost l-Istati Membri

82

Indikatur huwa r-rappreżentanza ta’ xejra li ssegwi l-bidla li tista’ titkejjel f’qasam ta’ politika matul iż-żmien. L-AROPE hija l-indikatur ewlieni biex jitkejjel il-faqar fl-Istrateġija UE 2020. Il-vantaġġ prinċipali tal-AROPE huwa li jippermetti tqabbil bejn
l-Istati Membri u tul iż-żmien, minħabba l-ġbir standardizzat tiegħu fis-Sistema Statistika Ewropea.

83

Madankollu, fl-Istati Membri kollha li saritilhom żjara, l-awtoritajiet nazzjonali għandhom għadd ta’ indikaturi proprji tagħhom, li huma jqisu rilevanti għas-sitwazzjoni nazzjonali tagħhom u li huma jużaw fl-istrateġiji u fil-politiki tagħhom u għal skopijiet ta’ monitoraġġ. B’riżultat ta’ dan, teżisti informazzjoni differenti dwar il-livell ta’ faqar u l-faqar fost it-tfal fl-Istati Membri (ara l-Kaxxa 6).

84

Indikaturi u informazzjoni li jvarjaw dwar il-faqar fost it-tfal fl-Istati Membri, ibbażati fuq data nazzjonali mhux armonizzata, jagħmluha diffiċli għall-partijiet ikkonċernati biex jivvalutaw is-sitwazzjoni tal-faqar fost it-tfal.

L-informazzjoni għall-inizjattiva ta’ politika dwar Garanzija Ewropea għat-tfal jeħtieġ li tkun suffiċjenti

Garanzija għat-Tfal proposta mill-Parlament Ewropew

85

F’April 2019, il-Parlament Ewropew emenda r-Regolament propost dwar l-FSE+ għall-perjodu ta’ programmazzjoni 2021-2027²⁶ u ppropona li tiġi introdotta skema ta’ Garanzija Ewropea għat-Tfal²⁷ biex jindirizza l-faqar fost it-tfal. Il-proposta emendata għall-FSE+ tinkludi rekwiżit li kull Stat Membru jenħtieġ li jalloka 5 % tar-riżorsi mill-FSE+ tiegħu għal miżuri sabiex jiġi indirizzat il-faqar fost it-tfal. Dawn ir-riżorsi jistgħu jikkontribwixxu wkoll direttament għall-implimentazzjoni tal-inizjattiva futura ta’ Garanzija għat-Tfal.

86

Fl-2018, il-Kummissjoni bdiet l-implimentazzjoni tal-Fażi I tal-Azzjoni Preparatorja għal Garanzija għat-Tfal mitluba mill-Parlament Ewropew.

• L-ewwel fażi tal-Azzjoni Preparatorja, li hija studju ta' fattibbiltà, ġie iffinalizzat f’April 2020. Huwa fittex li jesplora l-fattibbiltà ta’ Garanzija għat-Tfal billi analizza l-kundizzjonijiet għall-implimentazzjoni ta’ tali skema, u biex jivvaluta jekk kinitx se tagħti valur miżjud lill-oqfsa eżistenti tal-UE u dawk nazzjonali u b’hekk tkun strument addizzjonali utli.
• It-tieni fażi tal-Azzjoni Preparatorja hija studju ekonomiku u ta' fattibbiltà li jħares lejn l-ispejjeż u l-benefiċċji ta’ garanzija għat-tfal fir-riskju tal-faqar jew tal-esklużjoni soċjali fl-UE. Dan għandu jiġi kkompletat f’Mejju 2021.
• Waqt it-tielet fażi se titwettaq l-implimentazzjoni ta’ tlieta sa ħames proġetti pilota, fuq livell lokali, fl-Istati Membri mill-UNICEF. Din se tieħu sal-2022. Il-Fażi III se tikkonsisti minn sensiela ta’ proġetti pilota li għandhom jiġu implimentati f’erba’ Stati Membri. Se tinkludi wkoll sensiela ta’ segwiti programmatiċi u tal-politika nazzjonali fil-fond u l-iżvilupp ta’ Pjanijiet ta’ Azzjoni Nazzjonali għall-Faqar fost it-Tfal u l-Esklużjoni Soċjali f’għadd ta’ Stati Membri.

87

L-Azzjoni Preparatorja għall-Garanzija għat-Tfal, partikolarment l-istudju ta’ fattibbiltà taħt il-Fażi I u l-istudju ta’ fattibbiltà ekonomika taħt il-Fażi II, se tittieħed inkunsiderazzjoni fl-iżvilupp tal-inizjattiva ta’ politika. Iż-żewġ fażijiet jeħtieġu l-ġbir u l-kollazzjoni ta’ informazzjoni li hija komprensiva, f'waqtha u ta’ kwalità adegwata. Inkella, hemm ir-riskju li l-azzjonijiet xierqa ma jkunux jistgħu jittieħdu u jistgħu ma jkunux disponibbli fondi adegwati.

88

L-ewwel fażi tal-istudju ma tipprovdix ħarsa ġenerali komprensiva, u lanqas eżempji ta’ azzjonijiet iffinanzjati mill-FSE, li kienu effettivi fl-indirizzar tal-Faqar fost it-Tfal. Filwaqt li hemm ħarsa ġenerali tal-finanzjament disponibbli permezz tal-fondi SIE, iċ-ċifri ppreżentati huma biss stimi billi l-istudju jikkonkludi li l-investimenti fit-tfal ma jidhirx b’mod ċar fil-qafas strateġiku u ta’ monitoraġġ tal-biċċa l-kbira mill-fondi tal-UE.

89

L-informazzjoni attwalment disponibbli mill-ewwel fażi tal-Azzjoni Preparatorja għal Garanzija għat-Tfal (studju ta' fattibbiltà) għalhekk tagħmilha diffiċli biex tittieħed deċiżjoni infurmata tajjeb dwar kif jenħtieġ li tiġi mfassla garanzija għat-tfal, inklużi l-miżuri u l-finanzjament meħtieġa biex ikun hemm impatt pożittiv fuq il-livell tal-faqar fost it-tfal fl-UE u biex jiġi żgurat l-impenn tal-Istati Membri.

90

Barra minn hekk, aħna nosservaw li l-finalizzazzjoni tat-tielet fażi (pilota) se ssir l-aktar kmieni fl-2022, jiġifieri fiż-żmien li fih, f’ċirkostanzi normali, ikun diġà beda l-perjodu ta' programmazzjoni u jkunu ġew adottati l-programmi operazzjonali rilevanti tal-FSE.

Konklużjonijiet u rakkomandazzjonijiet

91

Il-faqar fost it-tfal jibqa’ kwistjoni serja fl-UE bi kważi wieħed minn kull erbat itfal għadhom fir-riskju tal-faqar jew tal-esklużjoni soċjali.

92

Il-ġlieda kontra l-faqar fost it-tfal taqa’ primarjament taħt il-kompetenza tal-Istat Membru, iżda l-Kummissjoni għandha rwol x’taqdi wkoll. Filwaqt li r-rilevanza tal-istrumenti mhux legalment vinkolanti tagħha hija limitata min-natura tagħha, hija għandha għodod ħafna aktar b’saħħithom għad-dispożizzjoni tagħha bħalma huma l-proċess tas-semestru u l-immirar tal-fondi tal-UE permezz tal-FS u l-PO. Madankollu, in-nuqqas ta’ informazzjoni disponibbli direttament relatata mal-faqar fost it-tfal ifisser li l-kontribut effettiv ta’ dawn l-għodda għall-isforzi tal-Istati Membri biex jitnaqqas il-faqar fost it-tfal huwa diffiċli, jekk mhux impossibbli, li jiġi vvalutat.

Ir-Rakkomandazzjoni hija inizjattiva pożittiva iżda l-impatt tagħha huwa diffiċli, jekk mhux impossibbli, li jiġi vvalutat

93

Ir-Rakkomandazzjoni, għalkemm mhux legalment vinkolanti, tirrappreżenta inizjattiva pożittiva biex jiġi indirizzat il-faqar fost it-tfal b’mod olistiku, permezz ta’ approċċ integrat (il-paragrafi 14 u 15). Il-Kummissjoni pprovdiet xi għajnuna speċifika lill-Istati Membri fl-implimentazzjoni tagħha, madankollu r-Rakkomandazzjoni ma kinitx akkumpanjata minn pjan direzzjonali tal-UE li stabbilixxa pjan ta’ implimentazzjoni viżibbli u komunikabbli għall-Istati Membri (il-paragrafi 18 u 19). Il-pjattaforma ta’ EPIC ftit għandha informazzjoni dwar l-aħjar prattiki li bihom l-Istati Membri jindirizzaw il-faqar fost it-tfal (il-paragrafu 22).

94

Il-progress tal-implimentazzjoni tar-Rakkomandazzjoni ma jistax jiġi vvalutat billi ma ġewx stabbiliti miri li jistgħu jitkejlu u lanqas stadji importanti (il-paragrafu 28). L-istudju tal-ESPN tal-2017 fuq talba tal-Kummissjoni kkorrobora li huwa diffiċli, jekk mhux impossibbli, li jiġi vvalutat sa liema punt it-titjib fil-politiki nazzjonali tal-Istati Membri jista’ jiġi attribwit għar-Rakkomandazzjoni nfisha, iżda indika li ftit li xejn kien hemm bidla f’ħafna pajjiżi (il-paragrafu 33).

Il-Pilastru Ewropew tad-Drittijiet Soċjali: inizjattiva soċjali progressiva u globali, bi prinċipji ta’ natura ġenerali dwar it-tfal

95

L-EPSR żied l-għarfien tal-politiki soċjali fl-UE, inkluż il-faqar fost it-tfal. Madankollu, il-Prinċipju 11 huwa ta’ natura ġenerali u diġà jinsab kopert mir-Rakkomandazzjoni f’aktar dettall, fil-forma ta’ miżuri speċifiċi (il-paragrafi 40 sa 42).

96

Se jiġi ppreżentat pjan ta’ azzjoni biex jiġi implimentat bis-sħiħ l-EPSR kmieni fl-2021. Filwaqt li dan il-pjan ta’ azzjoni previst huwa żvilupp pożittiv, ir-realizzazzjoni tiegħu hija kritika biex tingħata ħarsa ġenerali lejn il-progress li sar fl-implimentazzjoni tal-prinċipji (il-paragrafu 44).

97

L-implimentazzjoni tal-EPSR hija inkluża f’wieħed mill-ħames objettivi ta’ politika identifikati mir-RDK propost għall-perjodu 2021-2027. Din l-enfasi l-ġdida proposta fuq l-EPSR rigward il-perjodu ta’ programmazzjoni 2021-2027, għandha l-potenzjal li tiffoka l-miżuri u l-finanzjament fuq l-indirizzar tal-faqar fost it-tfal (il-paragrafi 45 sa 47).

Rakkomandazzjoni 1 – Jenħtieġ li l-Pjan ta’ Azzjoni għall-EPSR jinkludi l-faqar fost it-tfal

Jenħtieġ li l-Kummissjoni tinkludi azzjonijiet u objettivi biex jiġi indirizzat il-faqar fost it-tfal fil-pjan ta’ azzjoni tagħha għall-Pilastru Ewropew tad-Drittijiet Soċjali.

Data mmirata għall-implimentazzjoni: bidu tal-perjodu 2021-2027 tal-QFP.

Is-CSRs tas-Semestru Ewropew rari jindirizzaw il-faqar fost it-tfal b’mod espliċitu

98

Is-Semestru Ewropew huwa mfassal biex jikkoordina l-isforzi nazzjonali biex jintlaħqu l-miri tal-istrateġija Ewropa 2020 għal tkabbir intelliġenti, sostenibbli u inklużiv. Il-progress li sar sa issa lejn il-mira li 20 miljun persuna joħorġu mill-faqar sal-2020 jindika li x’aktarx li tali mira ma tintlaħaqx (il-paragrafi 48 sa 50).

99

Kriterju importanti waqt li jkunu qegħdin jiġu kkunsidrati abbozzi ta’ CSRs dwar il-faqar fost it-tfal għal Stat Membru huwa l-valutazzjoni tal-Kummissjoni tar-rata tal-UE ta’ tfal fir-riskju tal-faqar jew tal-esklużjoni soċjali bħala “għolja” jew “għolja ħafna”. Is-soll intern użat għal dan l-iskop huwa aktar għoli mil-livelli medji tal-UE għall-faqar fost it-tfal għall-perjodu kkonċernat (il-paragrafu 54).

100

Mill-2016 sal-2019, inħarġu Rakkomandazzjonijiet Speċifiċi għall-Pajjiż lill-Istati Membri f’oqsma li jaffettwaw il-politiki tal-familja u tat-tfal, iżda Stat Membru wieħed biss irċieva CSR speċifikament dwar il-faqar fost it-tfal (il-paragrafu 56). Is-servizzi tal-Kummissjoni f’dan il-kuntest spjegaw li l-proċess biex jiddefinixxu u jipproponu Rakkomandazzjonijiet Speċifiċi għall-Pajjiż ma jiddependix biss mir-rata tar-riskju tal-faqar jew tal-esklużjoni soċjali tat-tfal, iżda wkoll minn valutazzjoni ta’ fatturi addizzjonali (il-paragrafu 57). Madankollu, il-metodoloġija speċifika li tistabbilixxi meta jkun jenħtieġ li l-faqar fost it-tfal jingħata prijorità għall-kunsiderazzjoni ta’ CSR potenzjali għadha ma ġietx iddefinita b’mod ċar (il-paragrafu 58).

Rakkomandazzjoni 2 – Analiżi u valutazzjoni tal-faqar fost it-tfal ibbażat fuq gwida interna ċara

Jenħtieġ li l-Kummissjoni jkollha gwida interna ċara biex tidentifika sitwazzjonijiet li jistgħu jwasslu għal CSR potenzjali direttament relatata mal-faqar fost it-tfal bħala parti mill-analiżi tagħha fi ħdan il-proċess tas-Semestru Ewropew.

Data mmirata għall-implimentazzjoni: Bidu tal-proċess tas-Semestru Ewropew 2021.

L-effettività tal-finanzjament tal-UE għall-2014-2020 biex jiġi indirizzat il-faqar fost it-tfal ma tistax tiġi vvalutata

101

Il-Kummissjoni tista’ tinfluwenza l-allokazzjoni tal-fondi tal-UE użati biex jiġi indirizzat il-faqar fost it-tfal permezz tat-tfassil tal-proposta tar-RDK u l-approvazzjoni tal-FS u tal-PO fil-livell tal-Istati Membri (il-paragrafu 59).

102

Ir-RDK jiddefinixxi s-setturi u l-oqsma ta’ intervent fejn l-appoġġ tal-UE permezz ta’ fondi jista’ jagħti l-akbar valur miżjud. Madankollu, l-investimenti tagħha mhumiex immirati direttament lejn il-faqar fost it-tfal (il-paragrafi 61 sa 63).

103

Aħna nosservaw li l-PO kollha eżaminati jinkludu miżuri li indirettament jistgħu jikkontribwixxu b’mod pożittiv għall-ġlieda kontra l-faqar fost it-tfal. Madankollu, minħabba li ma hemmx prijorità ta’ investiment speċifika jew indikatur rilevanti dwar il-faqar fost it-tfal, la l-Kummissjoni u lanqas l-Istati Membri ma għandhom informazzjoni dwar kemm intużaw fondi SIE biex jiġi indirizzat il-faqar fost it-tfal direttament u x’kien inkiseb f’dan il-qasam (il-paragrafi 71 sa 74).

Rakkomandazzjoni 3 - Immirar u monitoraġġ tal-investimenti biex jiġi indirizzat il-faqar fost it-tfal fil-perjodu ta’ programmazzjoni 2021-2027

Jenħtieġ li Il-Kummissjoni tiżgura li l-Programmi u l-FS għall-2021-2027 jieħdu inkunsiderazzjoni b’mod adegwat il-faqar fost it-tfal. B’mod partikolari, jenħtieġ li l-Kummissjoni tiżgura li meta jkun hemm finanzjament assenjat għall-ġlieda diretta kontra l-faqar fost it-tfal, dan jiġi rifless b’mod ċar fil-loġika ta’ intervent tal-FS u tal-Programmi.

Jenħtieġ li Il-Kummissjoni tistabbilixxi qafas ta’ monitoraġġ li jippermetti li jinġabru l-outputs u r-riżultati tal-investimenti SIE tal-2021-2027 li saru biex jiġi indirizzat il-faqar tal-gruppi kollha ta' età kollha, inklużi t-tfal.

Data mmirata għall-implimentazzjoni: bidu tal-perjodu 2021-2027 tal-QFP.

L-indikaturi jirriflettu s-sitwazzjoni tal-faqar fost it-tfal b’mod differenti

104

L-AROPE, l-indikatur li jkejjel il-faqar fl-UE huwa l-indikatur ewlieni għall-monitoraġġ tal-mira tal-istrateġija tal-UE għall-2020 dwar il-faqar. Huwa indikatur multidimensjonali magħmul minn tliet subindikaturi (il-paragrafi 76 u 77).

105

Fl-2013, il-Kummissjoni ħabbret il-bidu ta’ xogħol ta’ tħejjija għal indikatur ta’ deprivazzjoni materjali speċifiku għat-tfal, li eventwalment ġie adottat fl-2018. L-indikatur ta’ deprivazzjoni materjali speċifiku għat-tfal huwa aktar iffukat fuq il-qagħda tat-tfal. Għalhekk, huwa jagħti stampa differenti u aktar speċifika tal-livelli reali ta’ faqar fost it-tfal. Madankollu, dan se jkun disponibbli kull tliet snin u mill-2021 ’il quddiem (il-paragrafi 78 sa 81).

106

Il-vantaġġ prinċipali tal-AROPE huwa li jippermetti tqabbil bejn l-Istati Membri u matul iż-żmien. Madankollu, fl-Istati Membri kollha li saritilhom żjara, l-awtoritajiet nazzjonali għandhom għadd ta’ indikaturi proprja tagħhom, li huma jqisu rilevanti għas-sitwazzjoni nazzjonali tagħhom. Dan jirriżulta f'diversi indikaturi nazzjonali u informazzjoni dwar il-faqar fost it-tfal madwar l-UE, li jagħmilha diffiċli għall-partijiet ikkonċernati biex jivvalutaw is-sitwazzjoni meta jużaw sorsi ta’ data nazzjonali mhux armonizzata (il-paragrafi 82 sa 84).

L-informazzjoni għall-implimentazzjoni tal-inizjattiva ta’ politika dwar Garanzija Ewropea għat-tfal jeħtieġ li tkun suffiċjenti

107

F’April 2019, il-Parlament Ewropew emenda r-Regolament propost dwar l-FSE+ għall-perjodu ta’ programmazzjoni 2021-2027 u ppropona li tiġi introdotta skema ta’ Garanzija Ewropea għat-Tfal biex jindirizza l-faqar fost it-tfal (il-paragrafu 85).

108

Fl-2018, il-Kummissjoni nediet azzjoni preparatorja għal Garanzija Ewropea għat-Tfal. Il-Fażi I, studju ta' fattibbiltà, kellha l-għan li tivvaluta l-fattibbiltà, l-għażliet ta’ implimentazzjoni u l-valur miżjud ta’ tali inizjattiva. L-istudju preparatorju qed jitwettaq fi tliet fażijiet distinti. L-iskeda tal-azzjoni se tagħmilha diffiċli li jkun hemm informazzjoni kompleta u f’waqtha għall-proċess ta’ teħid ta’ deċiżjonijiet (il-paragrafi 85 sa 86).

Rakkomandazzjoni 4 – Jiġi żgurat li l-passi meħtieġa u ġbir suffiċjenti ta’ informazzjoni jkunu ġew ikkompletati għat-tħejjija tal-inizjattiva ta’ politika li ġejja dwar Garanzija Ewropea għat-Tfal

Jenħtieġ li l-Kummissjoni tiżgura li nġabret u ġiet analizzata informazzjoni suffiċjenti u affidabbli dwar il-miżuri u l-finanzjament meħtieġa biex ikun hemm impatt pożittiv fuq il-livell tal-faqar tat-tfal fl-UE, għall-iżvilupp ta’ Garanzija għat-Tfal.

Data mmirata għall-implimentazzjoni: bidu tal-perjodu 2021-2027 tal-QFP.

Dan ir-Rapport ġie adottat mill-Awla II, immexxija mis-Sinjura Iliana Ivanova, Membru tal-Qorti tal-Awdituri, fil-Lussemburgu fil-laqgħa tagħha tal-15 ta’ Lulju 2020.

Annessi

Anness I – Miri nazzjonali tal-faqar Ewropa 2020

UE/Stat Membru	Faqar u esklużjoni soċjali
EU-28	Jiġu megħjuna mill-inqas 20 miljun persuna biex joħorġu mir-riskju tal-faqar jew tal-esklużjoni soċjali (meta mqabbel mas-sena 2008)*
Il-Belġju	− 380 000 persuna
Il-Bulgarija	Tnaqqis b’260 000 tal-għadd ta’ persuni li jgħixu fil-faqar monetarju
Ir-Repubblika Ċeka	− 100 000 persuna
Id-Danimarka	Tnaqqis ta' 22 000 tal-għadd ta’ nies li jgħixu f’unitajiet domestiċi b’intensità baxxa ħafna ta’ xogħol
Il-Ġermanja	Tnaqqis b’20 % tal-għadd ta’ persuni qiegħda fit-tul (qiegħda għal aktar minn sena) meta mqabbel mal-2008 (li jfisser tnaqqis ta’ 320 000 persuna qiegħda fit-tul)
L-Estonja	Tnaqqis għal rata ta’ 15 % tal-għadd ta’ persuni li jgħixu fir-riskju tal-faqar wara trasferimenti soċjali (meta mqabbla ma’ 17.5 % fl-2010)
L-Irlanda	Tnaqqis b’għadd minimu ta’ 200 000 il-persuni li jgħixu f’faqar kumbinat (jew faqar konsistenti, f'riskju tal-faqar jew inkella deprivazzjoni bażika)
Il-Greċja	− 450 000 persuna
Spanja	− 1 400 000 sa − 1 500 000 persuna
Franza	− 1 900 000 persuna (imqabbla mal-2007)
Il-Kroazja	Tnaqqis għal 1 220 000 l-għadd ta' persuni li jgħixu fir-riskju tal-faqar jew tal-esklużjoni soċjali
L-Italja	− 2 200 000 persuna
Ċipru	− 27 000 persuna jew tnaqqis tar-rata tal-popolazzjoni għal 19.3 % (meta mqabbla ma’ 23.3 % fl-2008)
Il-Latvja	Tnaqqis b’121 000 tal-għadd ta’ persuni li jgħixu fir-riskju tal-faqar wara trasferimenti soċjali u/jew f’unitajiet domestiċi b’intensità baxxa ħafna ta’ xogħol
Il-Litwanja	− 170 000 persuna u limitu ta’ 814 000 persuna fl-2020
Il-Lussemburgu	− 6 000 persuna
L-Ungerija	− 450 000 persuna
Malta	− 6 560 persuna
In-Netherlands	Tnaqqis b'100 000 tal-għadd ta’ persuni (fl-età ta' 0-64) li jgħixu f’unità domestika mingħajr impjieg (meta mqabbla mal-2008)
L-Awstrija	− 235 000 persuna
Il-Polonja	− 1 500 000 persuna
Il-Portugall	− 200 000 persuna
Ir-Rumanija	− 580 000 persuna
Is-Slovenja	− 40 000 persuna
Is-Slovakkja	Tnaqqis għal rata ta’ 17.2 % tal-għadd ta’ persuni li jgħixu fir-riskju tal-faqar jew tal-esklużjoni soċjali (meta mqabbla ma’ 20.6 % fl-2008)
Il-Finlandja	Tnaqqis għal 770 000 l-għadd ta' persuni li jgħixu f'riskju tal-faqar jew tal-esklużjoni soċjali
L-Iżvezja	Tnaqqis għal sew taħt l-14% il-perċentwal ta' nisa u irġiel (fl-età ta' 20-64) li mhumiex fil-forza tax-xogħol (apparti studenti full-time), dawk qiegħda fit-tul jew dawk fuq liv fit-tul minħabba mard
Ir-Renju Unit	L-ebda mira fil-programm Nazzjonali ta’ Riforma, iżda jeżistu miri numeriċi taħt il-kappa tal-Att tal-2010 dwar il-Faqar Fost it-Tfal u l-Istrateġija dwar il-Faqar fost it-Tfal 2011-2014
Sors ta’ informazzjoni u kummenti	Il-mira tal-UE kif stabbilita miIl-Komunikazzjoni tal-Kummissjoni, “Evalwazzjoni tal-istrateġija tal-Ewropa 2020 għal tkabbir intelliġenti, sostenibbli u inklużiv” – COM(2014) 130 final, Brussell, 2014 (p. 14). Fir-riskju tal-faqar jew tal-esklużjoni soċjali, imqassar għal AROPE, jirreferi għas-sitwazzjoni ta’ persuni jew f’riskju tal-faqar monetarju jew inkella fi stat ta’ deprivazzjoni materjali estrema jew li jgħixu f’unità domestika b’intensità ta’ xogħol baxxa ħafna. L-għadd totali ta’ persuni fir-riskju tal-faqar jew tal-esklużjoni soċjali huwa inqas mis-somma tal-għadd ta’ persuni f’kull waħda mit-tliet forom ta’ faqar jew esklużjoni soċjali billi xi persuni huma affettwati simultanjament minn aktar minn waħda minn dawn is-sitwazzjonijiet. * 2008 tittieħed bħala sena bażi minħabba li parti kbira mill-indikaturi soċjali biex jitkejlu t-tliet dimensjonijiet tal-faqar huma disponibbli biss mill-2008 ’il quddiem. Il-monitoraġġ jirreferi għall-UE-27 billi l-Kroazja ssieħbet fl-UE fl-2013 u d-data hija disponibbli biss mill-2010 ’il quddiem. Il-miri nazzjonali kif stabbiliti fil-Programmi Nazzjonali ta’ Riforma l-aktar reċenti. Id-definizzjonijiet tal-miri nazzjonali huma komparabbli mal-mira tal-UE ħlief għall-Bulgarija, id-Danimarka, il-Ġermanja, l-Estonja, l-Irlanda, il-Latvja, in-Netherlands u l-Iżvezja (ara r-rimarki speċifiċi għall-pajjiż). Il-kalkolu tal-valuri fil-mira huwa differenti mill-kalkolu tal-valur fil-mira tal-UE għall-Estonja, Franza, il-Kroazja, is-Slovakkja, il-Finlandja u l-Iżvezja (ara r-rimarki speċifiċi għall-pajjiż).

Anness II – Tqabbil ta’ punti fil-lista ta’ indikaturi ta’ deprivazzjoni materjali estrema u ta' deprivazzjoni materjali speċifika għat-tfal

Deprivazzjoni materjali estrema	Deprivazzjoni materjali speċifika għat-tfal
Ħlas tal-kera jew kontijiet tal-utilitajiet	Minuri: Ħwejjeġ ġodda
Id-dar tinżamm sħuna b’mod adegwat	Minuri: Żewġ pari żraben
Jintlaħqu l-ispejjeż mhux mistennija	Minuri: Frott frisk u ħxejjex ta’ kuljum
Jiġi kkunsmat laħam, ħut jew proteina ekwivalenti kull jumejn	Minuri: Laħam, tiġieġ, ħut kuljum
Ġimgħa btala l-bogħod mid-dar	Minuri: Kotba adatti
Karozza	Minuri: Tagħmir ta’ divertiment għal barra
Magna tal-ħasil	Minuri: Logħob ta’ ġewwa
TV tal-kulur	Minuri: Attivitajiet ta’ divertiment
Telefown	Minuri: Ċelebrazzjonijiet
	Minuri: Jiġu mistednin il-ħbieb
	Minuri: Ħarġiet tal-iskola
	Minuri: Btala
	Unità domestika: Tinbidel għamara antika
	Unità domestika: Arretrati
	Unità domestika: Internet
	Unità domestika: Id-dar tinżamm sħuna b’mod adegwat
	Unità domestika: Karozza

Anness III – Perċentwal tal-popolazzjoni (fl-età ta’ 0-17) fir-riskju tal-faqar jew tal-esklużjoni soċjali (AROPE) fl-UE (2008-2018)

N	POST/ŻMIEN	2008	2009	2010	2011	2012	2013	2014	2015	2016	2017	2018
1	L-Unjoni Ewropea	26.5	26.5	27.6	27.3	28.1	27.9	27.8	27.1	26.4	24.9	24.3
2	Żona tal-euro	23.6	24.1	25.2	25.3	25.5	25.0	25.7	25.4	25.3	24.3	23.5
3	Il-Belġju	21.3	20.5	23.2	23.3	22.8	21.9	23.2	23.3	21.6	22.0	23.2
4	Il-Bulgarija	44.2	47.3	49.8	51.8	52.3	51.5	45.2	43.7	45.6	41.6	33.7
5	Ir-Repubblika Ċeka	18.6	17.2	18.9	20.0	18.8	16.4	19.5	18.5	17.4	14.2	13.2
6	Id-Danimarka	12.7	14.0	15.1	15.7	14.9	15.4	14.5	15.7	13.9	14.5	15.2
7	Il-Ġermanja	20.1	20.4	21.7	19.9	18.4	19.4	19.6	18.5	19.3	18.0	17.3
8	L-Estonja	19.4	24.5	24.0	24.8	22.4	22.3	23.8	22.5	21.2	18.8	17.9
9	L-Irlanda	26.6	31.4	34.1	34.1	33.2	34.4	30.4	29.0	27.3	25.2	23.9
10	Il-Greċja	28.7	30.0	28.7	30.4	35.4	38.1	36.7	37.8	37.5	36.2	33.3
11	Spanja	30.1	32.0	33.3	32.2	32.4	32.6	35.8	34.4	32.9	31.3	29.5
12	Franza	21.2	21.2	22.9	23.0	23.2	20.8	21.6	21.2	22.6	22.1	22.9
13	Il-Kroazja	Mhux applikabbli	Mhux applikabbli	29.4	31.1	34.8	29.3	29.0	28.2	26.6	25.8	23.7
14	L-Italja	28.4	28.7	29.5	31.5	34.1	32.0	32.1	33.5	33.2	32.1	30.6
15	Ċipru	21.5	20.2	21.8	23.4	27.5	27.7	24.7	28.9	29.6	25.5	25.5
16	Il-Latvja	32.4	38.4	42.2	44.1	40.0	38.4	35.3	31.3	24.7	23.9	22.5
17	Il-Litwanja	29.1	30.8	35.8	34.6	31.9	35.4	28.9	32.7	32.4	31.6	28.0
18	Il-Lussemburgu	20.9	23.7	22.3	21.7	24.6	26.0	26.4	23.0	22.7	23.6	23.5
19	L-Ungerija	33.4	37.2	38.7	40.4	41.9	43.9	41.8	36.1	33.6	31.6	23.8
20	Malta	25.0	26.5	26.7	27.8	31.0	33.0	31.8	28.4	24.0	23.0	22.8
21	In-Netherlands	15.5	17.5	16.9	18.0	16.9	17.0	17.1	16.8	17.6	16.6	15.2
22	L-Awstrija	22.9	20.8	22.4	22.1	20.9	22.9	23.3	22.3	20.0	23.0	21.6
23	Il-Polonja	32.9	31.0	30.8	29.8	29.3	29.8	28.2	26.6	24.2	17.9	17.2
24	Il-Portugall	29.5	28.7	28.7	28.6	27.8	31.7	31.4	29.6	27.0	24.2	21.9
25	Ir-Rumanija	50.9	50.6	48.1	49.2	52.5	51.4	50.7	46.8	49.2	41.7	38.1
26	Is-Slovenja	15.3	15.1	15.2	17.3	16.4	17.5	17.7	16.6	14.9	15.1	13.1
27	Is-Slovakkja	24.3	23.7	25.3	26.0	26.6	25.5	23.6	24.9	24.4	22.5	23.8
28	Il-Finlandja	15.1	14.0	14.2	16.1	14.9	13.0	15.6	14.9	14.7	15.1	16.0
29	L-Iżvezja	17.3	18.8	19.2	20.3	19.4	20.2	20.5	19.8	19.9	19.4	20.6
30	Ir-Renju Unit	29.6	27.4	29.7	26.9	31.2	32.6	31.2	30.3	27.2	27.4	29.9

 

Nota: Mhux applikabbli: Mhux disponibbli.

Sors: l-Eurostat, data estratta fl-20.12.2019.

Akronimi u abbrevjazzjonijiet

AROP: Fir-riskju tal-faqar

AROPE: Fir-riskju tal-faqar jew tal-esklużjoni soċjali

CSR: Rakkomandazzjonijiet speċifiċi għall-pajjiż

EPSR: Pilastru Ewropew tad-Drittijiet Soċjali

ESPN: Netwerk Ewropew dwar il-Politika Soċjali

ESS: Is-Sistema Ewropea tal-Istatistika

FS: Ftehim ta’ sħubija

FSIE: Fondi Strutturali u ta' Investiment Ewropej

KPS: Kumitat tal-Protezzjoni Soċjali

OT: Objettiv Tematiku

PNR: Programmi Nazzjonali ta’ Riforma

PO: Programm Operazzjonali

RDK: Regolament dwar Dispożizzjonijiet Komuni

Glossarju

Il-Faqar fost it-Tfal: jindika l-perċentwal ta’ tfal (fl-età ta’ 0-17) fl-Unjoni Ewropea (UE) li jinsabu fir-riskju tal-faqar jew tal-esklużjoni soċjali (AROPE). It-tfal huma fir-riskju tal-faqar jew tal-esklużjoni soċjali jekk jgħixu f’unitajiet domestiċi b’tal-inqas waħda minn dawn it-tliet kundizzjonijiet li ġejjin: fir-riskju tal-faqar wara t-trasferimenti soċjali (faqar ta’ introjtu), deprivazzjoni materjali estrema jew b’intensità ta’ xogħol baxxa ħafna.

Fir-riskju tal-faqar jew tal-esklużjoni soċjali (AROPE): Ir-rata ta’ persuni fir-riskju tal-faqar jew tal-esklużjoni soċjali tikkorrispondi għas-somma totali ta’ persuni li huma f’riskju tal-faqar (AROP), jew f’sitwazzjoni ta’ deprivazzjoni materjali estrema jew li jgħixu f’unitajiet domestiċi b’intensità baxxa ħafna ta’ xogħol. Il-persuni jingħaddu darba biss anke jekk ikunu preżenti f’bosta subindikaturi. Ir-rata AROPE, is-sehem tal-popolazzjoni totali li hija fir-riskju tal-faqar jew tal-esklużjoni soċjali, hija l-indikatur ewlieni biex tiġi mmonitorjata l-mira tal-Istrateġija UE 2020 dwar il-faqar.

Il-Fondi Strutturali u ta' Investiment Ewropej (FSIE): jinkludu l-Fond Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni, il-Fond Agrikolu Ewropew għall-Iżvilupp Rurali u l-Fond Ewropew għall-Affarijiet Marittimi u s-Sajd. Dawn huma mmaniġġjati b’mod konġunt mill-Kummissjoni Ewropea u mill-pajjiżi tal-UE.

Ftehim ta’ sħubija (FS): Ftehimiet li jsiru bejn il-Kummissjoni Ewropea u kull wieħed mill-Istati Membri għall-perjodu ta’ programmazzjoni 2014-2020. Huma jippreżentaw il-pjanijiet tal-awtoritajiet nazzjonali dwar kif għandu jintuża l-finanzjament mill-Fondi Strutturali u ta’ Investiment Ewropej, u jiddeskrivu fil-qosor l-għanijiet strateġiċi u l-prijoritajiet ta’ investiment ta’ kull pajjiż, filwaqt li jorbtuhom mal-għanijiet kumplessivi tal-istrateġija Ewropa 2020 għal tkabbir intelliġenti, sostenibbli u inklużiv. Huma jinkludu wkoll, fost l-oħrajn, sommarju tal-valutazzjoni ta’ kemm il-kundizzjonalitajiet ex ante applikabbli jkunu ġew issodisfati, u jekk dawn ma jkunux ġew issodisfati - tal-azzjonijiet li għandhom jittieħdu, il-korpi responsabbli u l-iskeda ta’ żmien għall-implimentazzjoni ta’ dawk l-azzjonijiet, kif ukoll id-deskrizzjoni tal-metodoloġija u l-mekkaniżmi biex tiġi żgurata l-konsistenza fil-funzjonament tal-oqfsa ta’ prestazzjoni. Huma jitħejjew mill-Istat Membru fi djalogu mal-Kummissjoni u jridu jiġu adottati mill-Kummissjoni.

Il-Kumitat tal-Protezzjoni Soċjali (KPS): huwa kumitat konsultattiv ta’ politika għall-Ministri fil-Kunsill Impjiegi, Politika Soċjali, Saħħa u Affarijiet tal-Konsumatur (EPSCO).

Kundizzjonalitajiet ex ante huma kundizzjonijiet ibbażati fuq kriterji ddefiniti minn qabel u stabbiliti fir-RDK, li jitqiesu bħala prerekwiżiti meħtieġa għall-użu effettiv u effiċjenti tal-finanzjament mill-UE għall-fondi SIE kollha. Meta jkunu qed iħejju l-PO taħt il-FEŻR, l-FK u l-FSE għall-perjodu ta' programmazzjoni 2014-2020, l-Istati Membri jridu jivvalutaw jekk dawn il-kundizzjonijiet ikunux ġew issodisfati. Jekk dan ma jkunx il-każ, ikun jeħtieġ li jitħejjew pjanijiet ta’ azzjoni biex jiġi żgurat li l-kundizzjonijiet ikunu ġew issodisfati sal-31 ta’ Diċembru 2016.

Objettiv Tematiku (OT): huwa element strutturanti tal-Ftehimiet ta' Sħubija. Huwa predeterminat mil-leġiżlazzjoni u jippreżenta objettivi li jenħtieġ li jkunu appoġġati mill-Fondi Strutturali u ta' Investiment Ewropej. L-objettivi tematiċi jistabbilixxu rabta mal-objettivi strateġiċi fil-livell tal-UE.

Pilastru Ewropew tad-Drittijiet Soċjali (EPSR): Il-Pilastru tad-Drittijiet Soċjali jindirizza t-twassil ta’ drittijiet ġodda u aktar effettivi għaċ-ċittadini, u huwa mibni fuq 20 prinċipju ewlieni. Ipproklamat mill-Parlament Ewropew, il-Kunsill u l-Kummissjoni Ewropea fis-Summit Soċjali għall-Impjiegi Ġusti u t-Tkabbir f’Gothenburg fis-17 ta’ Novembru 2017. It-twettiq tal-prinċipji u tad-drittijiet iddefiniti taħt il-Pilastru Ewropew tad-Drittijiet Soċjali huwa responsabbiltà konġunta tal-istituzzjonijiet tal-Unjoni Ewropea, l-Istati Membri, is-sħab soċjali u partijiet ikkonċernati oħra.

Programm Operazzjonali (PO): PO jistipula l-prijoritajiet u l-objettivi speċifiċi ta’ Stat Membru u jiddeskrivi kif il-finanzjament (kofinanzjament mill-UE u kofinanzjament nazzjonali pubbliku u privat) se jintuża matul perjodu partikolari (ġeneralment ta’ seba’ snin) għall-finanzjament ta' proġetti. Il-finanzjament tal-PO jista’ jiġi mill-FEŻR, mill-FK u/jew mill-FSE.

Rakkomandazzjonijiet Speċifiċi għall-Pajjiż (CSR): huma dokumenti mħejjija mill-Kummissjoni Ewropea għal kull pajjiż, li janalizzaw is-sitwazzjoni ekonomika tiegħu u li jipprovdu rakkomandazzjonijiet dwar miżuri li huwa għandu jadotta matul perjodu ta’ bejn 12 u 18-il xahar.

Ir-rata ta’ riskju ta’ faqar (AROP) hija subkomponent ta’ AROPE: Ir-rata ta’ riskju ta’ faqar hija s-sehem ta’ persuni b’introjtu disponibbli ekwivalizzat (wara t-trasferiment soċjali) taħt il-soll tar-riskju ta’ faqar, li huwa stabbilit għal 60 % tal-introjtu disponibbli ekwivalizzat medjan nazzjonali wara t-trasferimenti soċjali.

Semestru Ewropew: Ċiklu ta’ koordinazzjoni tal-politika ekonomika u fiskali fi ħdan l-UE. Huwa parti mill-qafas ta’ governanza ekonomika tal-Unjoni Ewropea. Il-fokus tiegħu huwa fuq il-perjodu tal-ewwel sitt xhur ta’ kull sena, b’hekk jissejjaħ – is-“semestru”. Matul is-Semestru Ewropew, l-Istati Membri jallinjaw il-politiki baġitarji u ekonomiċi tagħhom mal-objettivi u r-regoli li dwarhom ikun intlaħaq qbil fil-livell tal-UE.

Sistema Statistika Ewropea (ESS): Is-sħubija bejn l-awtorità tal-istatistika Komunitarja, li hija l-Kummissjoni (l-Eurostat), u l-istituti nazzjonali tal-istatistika (NSIs) u awtoritajiet nazzjonali oħra responsabbli f’kull Stat Membru għall-iżvilupp, il-produzzjoni u d-disseminazzjoni tal-istatistika Ewropea. Din is-Sħubija tinkludi wkoll il-pajjiżi taż-ŻEE u tal-EFTA. L-Istati Membri jiġbru data u jikkumpilaw statistika għall-iskopijiet nazzjonali u tal-UE. L-ESS tiffunzjona bħala netwerk li fih ir-rwol tal-Eurostat huwa li tmexxi l-proċess ta’ armonizzazzjoni tal-istatistika b’kooperazzjoni mill-qrib mal-awtoritajiet nazzjonali tal-istatistika.

Strateġija Ewropa 2020: hija l-istrateġija tal-UE għat-tkabbir biex ikun hemm irkupru mill-kriżi għall-10 snin li jmiss, u hija maqsuma f'5 miri ewlenin li jkopru: l-impjieg; ir-riċerka u l-iżvilupp; il-klima/l-enerġija; l-edukazzjoni; l-inklużjoni soċjali u t-tnaqqis tal-faqar.

Tim tal-awditjar

Ir-rapporti speċjali tal-QEA jippreżentaw ir-riżultati tal-awditi li twettaq ta’ politiki u programmi tal-UE, jew ta’ suġġetti relatati mal-ġestjoni minn oqsma speċifiċi tal-baġit. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta’ introjtu jew ta’ nfiq involut, l-iżviluppi li għad iridu jseħħu u l-interess politiku u pubbliku.

Dan l-awditu tal-prestazzjoni twettaq mill-Awla II tal-Awditjar li tispeċjalizza fl-oqsma ta’ nfiq ta’ Investiment għall-koeżjoni, it-tkabbir u l-inklużjoni, u li hija mmexxija mis-Sinjura Iliana Ivanova, Membru tal-QEA. L-awditu tmexxa minn Tony Murphy, Membru tal-QEA, li ngħata appoġġ minn Wolfgang Stolz, Kap tal-Kabinett u Brian Murphy, Attaché tal-Kabinett; Pietro Puricella, Maniġer Prinċipali; Michele Zagordo, Kap tal-Kompitu; Marija Grguric, Cristina-Ioana Jianu, Agota Krenusz, Annekatrin Langer u Bernard Witkos, Awdituri; Peter Borsos, Assistent tal-Kabinett; Niamh Mahon, Segretarju tal-Kabinett; Eve Ryan, Trainee tal-Kabinett; Hannah Critoph u Zuzanna Filipski pprovdew appoġġ lingwistiku.

B’konsegwenza tal-pandemija tal-COVID-19 u l-kundizzjonijiet stretti ta’ konfinament, ma seta’ jittieħed l-ebda ritratt tat-tim tal-awditjar.

Noti finali

¹ L-Eurostat, sett tad-data “People at risk of poverty or social exclusion”.

² Pakkett ta’ Investiment Soċjali, Komunikazzjoni tal-Kummissjoni “Lejn Investiment Soċjali għat-Tkabbir u l-Koeżjoni - inkluża l-implimentazzjoni tal-Fond Soċjali Ewropew 2014-2020”, COM(2013) 83 final, l-20 ta’ Frar 2013, p. 13.

³ L-UNICEF, A brief review of the social and economic returns to investing in children, Ġunju 2012, disponibbli minn: https://www.unicef.org/socialpolicy/files/Investing_in_Children.pdf.

⁴ L-UNICEF, Right in Principle and in Practice: A Review of the Social and Economic Returns to Investing in Children, Social and Economic Working Paper, 2012, p. 33. Disponibbli minn: https://www.unicef.org/socialpolicy/files/Investing_in_Children.pdf.

⁵ Komunikazzjoni tal-Kummissjoni, “Lejn Investiment Soċjali għat-Tkabbir u l-Koeżjoni – inkluża l-implimentazzjoni tal-Fond Soċjali Ewropew 2014-2020”, COM(2013) 83 final, l-20 ta’ Frar 2013, p. 13.

⁶ Communication to Commissioner László Andor, DG EMPL, “Common Proposals for Implementing the Recommendation on Child Poverty and Well-being through a partnership approach”, l-1 ta' Frar 2013.

⁷ Il-PDG skont data tal-Eurostat fl-2018 kien ta’ 2.120 biljun zloty.

⁸ Anness tar-Rakkomandazzjoni tal-Kummissjoni 112/2013 dwar "L-investiment fit-tfal: niksru ċ-ċiklu tal-iżvantaġġ".

⁹ Hugh Frazer u Eric Marlier, “Progress across Europe in the implementation of the 2013 EU Recommendation on 'Investing in children: Breaking the cycle of disadvantage', A study of national policies”, 2017.

¹⁰ Idem, pp. 33-35.

¹¹ https://www.socialsummit17.se/.

¹² Laqgħa tal-Kunsill Ewropew (l-14 ta' Diċembru 2017) – Konklużjonijiet.

¹³ Ara “Unjoni li Tirsisti għal Aktar - L-Aġenda tiegħi għall-Ewropa” mill-kandidat għal President tal-Kummissjoni Ewropea Ursula von der Leyen – Linji Gwida Politiċi għall-Kummissjoni Ewropea li jmiss 2019-2024.

¹⁴ COM(2020) 14 final, “Ewropa Soċjali B’Saħħitha għal Tranżizzjonijiet Ġusti”, l-14 ta’ Jannar 2020.

¹⁵ COM(2018) 375 final, 2018/0196 (COD), l-Artikolu 4.

¹⁶ 2018/0206 (COD), il-Preambolu 22.

¹⁷ Ara l-Eurostat, data, estratta fis-7.1.2020.

¹⁸ It-tliet rati l-aktar għolja – ir-Rumanija (38.1 %), il-Bulgarija (33.7 %) u l-Greċja (33.3 %).
Tliet Stati Membri miżjura, iżda mhux fost l-ogħla rati– l-Italja, il-Ġermanja u l-Polonja.

¹⁹ Ħlief għall-Greċja, billi ma kinitx suġġetta għall-proċessi tas-Semestru Ewropew qabel
l-2019.

²⁰ COM(2016) 328 final.

²¹ Ir-Regolament (UE) Nru 1303/2013 tal-Parlament Ewropew u tal-Kunsill tas-17 ta’ Diċembru 2013.

²² Ir-Regolament (UE) Nru 1303/2013, l-Artikolu 9.

²³ Ir-Regolament (UE) Nru 1304/2013, l-Artikolu 3; ir-Regolament (UE) Nru 1301/2013, l-Artikolu 5.

²⁴ IT: Programmi Operazzjonali Nazzjonali għall-Inklużjoni – CCI 2014IT05SFOP001; RO OP Kapital Uman – CCI 2014RO05M9OP001; PL: PO Għarfien Edukazzjoni Tkabbir – CCI 2014PL05M9OP001; PO Reġjonali għar-reġjun ta’ Warmińsko-Mazurskie 2014PL16M2OP014; DE: PO Stat Ħieles tas-Sassonja għall-FSE – CCI 2014DE05SFOP012.

²⁵ Ir-Regolament (UE) 2019/1700.

²⁶ Riżoluzzjoni leġiżlattiva tal-Parlament Ewropew tal-4 ta’ April 2019 dwar il-proposta għal regolament tal-Parlament Ewropew u tal-Kunsill dwar il-Fond Soċjali Ewropew Plus (FSE+)(COM(2018)0382 - C8-0232/2018 - 2018/0206(COD)).

²⁷ L-emenda 39, il-Premessa 22 b (ġdida) tar-riżoluzzjoni leġiżlattiva tal-Parlament Ewropew tal-4 ta’ April 2019 dwar il-proposta għal regolament tal-Parlament Ewropew u tal-Kunsill dwar il-Fond Soċjali Ewropew Plus (FSE+) (COM (2018) 0382 – C8–0232/2018 -2018/0206 (COD)).

Kronoloġija

Avveniment	Data
Il-Memorandum ta’ Ppjanar tal-Awditjar (APM) jiġi adottat / L-awditu jinbeda	10.4.2019
L-abbozz ta’ rapport jintbagħat uffiċjalment lill-Kummissjoni (jew lill-entità l-oħra awditjata)	4.6.2020
Ir-rapport finali jiġi adottat wara l-proċedura kontradittorja	15.7.2020
Ir-risposti uffiċjali tal-Kummissjoni (jew tal-entità l-oħra awditjata) jaslu bil-lingwi kollha	12.8.2020

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Tel. +352 4398-1
Mistoqsijiet: eca.europa.eu/mt/Pages/ContactForm.aspx
Sit web: eca.europa.eu
Twitter: @EUAuditors

Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2020

PDF	ISBN 978-92-847-5094-8	ISSN 1977-5741	doi:10.2865/139721	QJ-AB-20-017-MT-N
HTML	ISBN 978-92-847-5081-8	ISSN 1977-5741	doi:10.2865/503645	QJ-AB-20-017-MT-Q

DRITTIJIET TAL-AWTUR

© L-Unjoni Ewropea, 2020.

Il-politika tal-Qorti Ewropea tal-Awdituri (QEA) dwar l-użu mill-ġdid hija implimentata bid-Deċiżjoni Nru 6-2019 tal-Qorti Ewropea tal-Awdituri dwar il-politika tad-data miftuħa u l-użu mill-ġdid ta’ dokumenti.

Sakemm ma jkunx indikat mod ieħor (eż. f’avviżi individwali dwar id-drittijiet tal-awtur), il-kontenut tad-dokumenti tal-QEA, li huwa proprjetà tal-UE, huwa liċenzjat taħt il-liċenzja Creative Commons Attribution 4.0 International (CC BY 4.0). Dan ifisser li l-użu mill-ġdid huwa awtorizzat, dment li l-awturi jingħataw kreditu xieraq u li l-bidliet jiġu indikati. Il-persuni li jużaw mill-ġdid dan il-kontenut ma jistgħux ibiddlu s-sinifikat jew il-messaġġ oriġinali tad-dokumenti. Il-QEA ma għandhiex tkun responsabbli għal kwalunkwe konsegwenza relatata mal-użu mill-ġdid.

Inti meħtieġ tikseb drittijiet addizzjonali ċari jekk kontenut speċifiku juri individwi privati identifikabbli, pereżempju f’ritratti li jkun fihom il-membri tal-persunal tal-QEA, jew jekk ikun jinkludi xogħlijiet ta’ parti terza. Fejn ikun inkiseb permess, tali permess għandu jikkanċella l-permess ġenerali msemmi hawn fuq u għandu jindika b’mod ċar kwalunkwe restrizzjoni dwar l-użu.

Biex tuża jew tirriproduċi kontenut li ma jkunx proprjetà tal-UE, inti jista’ jkun li jkollok titlob il-permess direttament mingħand id-detenturi tad-drittijiet tal-awtur.

Software jew dokumenti li jkunu koperti mid-drittijiet ta’ proprjetà industrijali, bħal privattivi, trademarks, disinji rreġistrati, logos u ismijiet, huma esklużi mill-politika tal-QEA dwar l-użu mill-ġdid u inti ma għandekx il-liċenzja biex tużahom.

Il-familja ta’ Siti Web istituzzjonali tal-Unjoni Ewropea, fi ħdan id-dominju europa.eu, tipprovdi links għal siti ta’ partijiet terzi. Peress li dawn ma jaqgħux taħt il-kontroll tal-QEA, inti mħeġġeġ biex teżamina l-politiki tagħhom dwar il-privatezza u dwar id-drittijiet tal-awtur.

Użu tal-logo tal-Qorti Ewropea tal-Awdituri

Ma jistax isir użu mil-logo tal-Qorti Ewropea tal-Awdituri mingħajr ma jinkiseb il-kunsens tagħha minn qabel.

Kif tikkuntattja lill-UE

Personalment
Madwar l-Unjoni Ewropea kollha hemm mijiet ta’ ċentri ta’ informazzjoni tal-Europe Direct. Tista’ ssib l-indirizz tal-eqreb ċentru għalik f'dan is-sit: https://europa.eu/european-union/contact_mt

Bit-telefown jew bil-posta elettronika
Europe Direct huwa servizz li jwieġeb il-mistoqsijiet tiegħek dwar l-Unjoni Ewropea. Tista’ tikkuntattja dan is-servizz:

• bit-telefown bla ħlas: 00 800 6 7 8 9 10 11 (ċerti operaturi jafu jimponu ħlas għal dawn it-telefonati),
• fuq dan in-numru standard: +32 22999696, jew
• bil-posta elettronika permezz: https://europa.eu/european-union/contact_mt

Kif issib tagħrif dwar l-UE

Onlajn
L-informazzjoni dwar l-Unjoni Ewropea bil-lingwi uffiċjali kollha tal-UE hija disponibbli fuq is-sit web Europa fuq: https://europa.eu/european-union/index_mt

Pubblikazzjonijiet tal-UE
Tista’ tniżżel mill-internet jew tordna l-pubblikazzjonijiet tal-UE, li xi wħud minnhom huma bla ħlas u xi oħrajn bil-ħlas, minn: https://op.europa.eu/mt/publications. Kopji multipli ta’ pubblikazzjonijiet bla ħlas tista’ tiksibhom billi tikkuntattja lil Europe Direct jew liċ-ċentru tal-informazzjoni lokali tiegħek (ara https://europa.eu/european-union/contact_mt).

Il-liġi tal-UE u dokumenti relatati
Għal aċċess għall-informazzjoni legali tal-UE, inkluż il-liġijiet kollha tal-UE mill-1952 ’l hawn, fil-verżjonijiet lingwistiċi uffiċjali kollha, żur is-sit EUR-Lex hawnhekk: http://eur-lex.europa.eu

Dejta Miftuħa mill-UE
Il-portal tad-Dejta Miftuħa mill-UE (http://data.europa.eu/euodp/mt) jipprovdi aċċess għal settijiet tad-dejta mill-UE. Id-dejta tista’ titniżżel mill-internet u tintuża mill-ġdid bla ħlas, kemm għal skopijiet kummerċjali kif ukoll mhux kummerċjali.