Rapport Speċjali: Min Iniġġes Iħallas

Sommarju eżekuttiv

I

Il-Prinċipju ta’ Min Iniġġes Iħallas huwa wieħed mill-prinċipji ewlenin li fuqhom hija bbażata l-politika ambjentali tal-Unjoni Ewropea (UE). L-applikazzjoni tal-prinċipju tfisser li min iniġġes iġarrab l-ispejjeż tat-tniġġis ikkawżat minnu, inkluż l-ispiża tal-miżuri meħuda għall-prevenzjoni, għall-kontroll u għar-rimedjazzjoni tat-tniġġis kif ukoll l-ispejjeż li dan jimponi fuq is-soċjetà. Bl-applikazzjoni tal-prinċipju, min iniġġes jingħata inċentiv biex jevita d-dannu ambjentali u jinżamm responsabbli għat-tniġġis li jikkawża. Huwa wkoll min iniġġes, u mhux il-kontribwent, li jkopri l-ispiża tar-rimedjazzjoni.

II

Dan ir-rapport jiffoka fuq jekk il-prinċipju kienx ġie applikat tajjeb f’erba’ oqsma ta’ politika ambjentali tal-UE: it-tniġġis industrijali, l-iskart, l-ilma u l-ħamrija. Aħna vvalutajna jekk l-azzjonijiet tal-Kummissjoni relatati mad-Direttiva dwar ir-Responsabbiltà Ambjentali li tirregola d-dannu ambjentali kkawżat minn attività ekonomika kinux wasslu għal riżultati. Fl-aħħar nett, aħna vvalutajna jekk il-Kummissjoni u l-Istati Membri kinux ipproteġew il-baġit tal-UE milli jintuża biex jiġġarrbu l-ispejjeż li kellhom jitħallsu minn min iniġġes. Matul il-perjodu 2014-2020, il-baġit tal-UE ppjanat għall-politika ta’ koeżjoni u għall-Programm LIFE kien jammonta għal madwar EUR 29 biljun fuq proġetti mmirati speċifikament lejn il-protezzjoni tal-ambjent. Aħna eżaminajna l-infiq u l-azzjoni tal-UE matul il-Qafas Finanzjarju Pluriennali 2014-2020.

III

Aħna ddeċidejna li nawditjaw dan is-suġġett minħabba li:

It-tniġġis jirrappreżenta spiża sinifikanti għas-soċjetà u huwa tħassib ewlieni għaċ-ċittadini tal-UE;
Il-Prinċipju ta’ Min Iniġġes Iħallas huwa għodda ewlenija għat-twassil tal-objettivi ambjentali tal-Ewropa b’mod effiċjenti u ġust;
Dan ir-rapport jidentifika opportunitajiet għal titjib fl-integrazzjoni tal-prinċipju fil-leġiżlazzjoni ambjentali futura u fil-finanzjament mill-UE ta’ proġetti ta’ rimedjazzjoni ambjentali; u
Il-konklużjonijiet u r-rakkomandazzjonijiet tiegħu huma rilevanti wkoll għall-iskrutinju, min-naħa tal-Parlament u tal-Kunsill, tal-leġiżlazzjonijiet ambjentali kollha u tal-evalwazzjoni tal-Kummissjoni tad-Direttiva dwar ir-Responsabbiltà Ambjentali, li mistennija tiġi ffinalizzata fl-2023.

IV

B’mod ġenerali, aħna sibna li l-Prinċipju ta’ Min Iniġġes Iħallas huwa rifless u jiġi applikat f’diversi livelli fil-politiki ambjentali differenti tal-UE, u l-kopertura u l-applikazzjoni tiegħu ma kinux kompleti. F’dak li jirrigwarda r-responsabbiltà ambjentali, l-azzjonijiet tal-Kummissjoni biex tappoġġa l-implimentazzjoni tad-Direttiva dwar ir-Responsabbiltà Ambjentali mill-Istati Membri ma kinux solvew id-dgħufijiet ewlenin, bħall-kunċetti u d-definizzjonijiet ewlenin mhux ċari u n-nuqqas ta’ sigurtà finanzjarja f’każijiet ta’ insolvenza. Xi drabi, il-baġit tal-UE jintuża biex jiffinanzja azzjonijiet ta’ tindif li, skont il-Prinċipju ta’ Min Iniġġes Iħallas, kellhom jiġġarrbu minn min iniġġes.

V

Aħna nirrakkomandaw lill-Kummissjoni biex:

tivvaluta l-ambitu għat-tisħiħ tal-integrazzjoni tal-Prinċipju ta’ Min Iniġġes Iħallas fil-leġiżlazzjoni ambjentali;
tqis li tirrinforza l-applikazzjoni tad-Direttiva dwar ir-Responsabbiltà Ambjentali; u
tipproteġi l-fondi tal-UE milli jintużaw għal finanzjament ta’ proġetti li jenħtieġ li jiġu ffinanzjati minn min iniġġes.

Introduzzjoni

01

Il-politika ambjentali tal-Unjoni Ewropea (UE) għandha l-għan li tiżgura li ċ-ċittadini kollha tal-UE jgħixu f’ambjent b’saħħtu fejn ir-riżorsi naturali jiġu mmaniġġjati b’mod sostenibbli, u l-bijodiversità tiġi protetta¹. F’dawn l-aħħar deċennji, l-emissjonijiet ta’ sustanzi niġġiesa fl-arja, fl-ilma u fil-ħamrija naqsu b’mod sinifikanti², madankollu t-tniġġis u d-dannu ambjentali għadhom sfida sinifikanti.

02

Madwar l-UE, 26 % tal-korpi ta’ ilma ta’ taħt l-art għad iridu jiksbu “status kimiku tajjeb”, u madwar 60 % tal-ilmijiet tal-wiċċ (xmajjar, lagi, u ilmijiet ta’ tranżizzjoni u dawk kostali) mhumiex fi status kimiku u ekoloġiku tajjeb³. Hemm madwar 2.8 miljun sit fl-UE li huma potenzjalment ikkontaminati, primarjament mill-attività industrijali u r-rimi tal-iskart⁴. It-tniġġis tal-arja, l-akbar riskju għas-saħħa ambjentali fl-UE, jagħmel ħsara wkoll lill-veġetazzjoni u lill-ekosistemi⁵.

L-oriġini tal-Prinċipju ta’ Min Iniġġes Iħallas

03

L-Organizzazzjoni għall-Kooperazzjoni u l-Iżvilupp Ekonomiċi (OECD) introduċiet għall-ewwel darba l-Prinċipju ta’ Min Iniġġes Iħallas (PPP) fl-1972⁶. Huwa ddikjara li jenħtieġ li min iniġġes iġarrab l-ispejjeż tat-twettiq tal-miżuri ta’ prevenzjoni u ta’ kontroll tat-tniġġis introdotti mill-awtoritajiet pubbliċi, biex jiġi żgurat li l-ambjent ikun fi stat aċċettabbli. Dawk li jfasslu l-politika jistgħu jużaw dan il-prinċipju biex irażżnu t-tniġġis u jirrestawraw l-ambjent. Bl-applikazzjoni tiegħu, min iniġġes jingħata inċentiv biex jevita d-dannu ambjentali u jinżamm responsabbli għat-tniġġis li jikkawża. Huwa wkoll min iniġġes, u mhux il-kontribwent, li jkopri l-ispejjeż li jinħolqu mit-tniġġis. F’termini ekonomiċi, dan jikkostitwixxi l-“internalizzazzjoni” ta’ “esternalitajiet ambjentali negattivi”. Meta l-ispejjeż tat-tniġġis jiġu imposti fuq min iniġġes, il-prezz tal-oġġetti u s-servizzi jiżdied biex jinkludi dawn l-ispejjeż. Għaldaqstant, il-preferenza tal-konsumatur għal prezzijiet aktar baxxi se tkun inċentiv għall-produtturi biex jikkummerċjalizzaw prodotti li jniġġsu inqas⁷.

04

Mill-1972 ’il hawn, l-ambitu tal-PPP kiber gradwalment (il-Figura 1)⁸. Inizjalment, il-prinċipju ffoka biss fuq l-ispejjeż għall-prevenzjoni u għall-kontroll tat-tniġġis, iżda aktar tard ġie estiż biex jinkludi l-ispejjeż għall-miżuri li l-awtoritajiet ħadu biex jindirizzaw l-emissjonijiet ta’ sustanzi niġġiesa. Estensjoni oħra tal-prinċipju kopriet ir-responsabbiltà ambjentali: jenħtieġ li min iniġġes iħallas għad-dannu ambjentali li kkawża, irrispettivament minn jekk it-tniġġis li wassal għad-dannu kienx taħt il-limiti legali (imsejjaħ “tniġġis residwu permissibbli”) jew kienx aċċidentali⁹.

05

Fl-1992, id-Dikjarazzjoni tan-Nazzjonijiet Uniti dwar l-Ambjent u l-Iżvilupp (komunement magħrufa bħala d-“Dikjarazzjoni ta’ Rio”¹⁰) inkludiet il-PPP bħala wieħed mis-27 prinċipju gwida għall-iżvilupp sostenibbli futur.

Il-PPP fl-UE

Qafas ta’ politika

06

Il-PPP huwa l-bażi tal-politika ambjentali tal-UE. L-Artikolu 191(2) tat-Trattat dwar il-Funzjonament tal-Unjoni Ewropea (TFUE)¹¹ tal-2007 jiddikjara li: “Il-politika tal-Unjoni dwar l-ambjent [...] għandha tkun ibbażata fuq il-prinċipju ta' prekawzjoni u fuq il-prinċipji li azzjoni preventiva għandha tittieħed, li l-ħsara lill-ambjent għandha, bħala prijorità tissewwa f'ras il-għajn u li min iniġġes għandu jħallas”. Il-leġiżlaturi tal-UE mhumiex marbuta bil-prinċipju meta jippromulgaw il-politika tal-UE f’oqsma differenti minn dak tal-ambjent, anke meta jista’ jkollhom impatt ambjentali sinifikanti, eż. it-trasport, is-sajd, jew il-politika agrikola.

07

Il-Kummissjoni Ewropea hija responsabbli għall-abbozzar ta’ proposti għal leġiżlazzjoni ambjentali li għandhom ikunu bbażati fuq il-PPP, filwaqt li l-Istati Membri huma responsabbli għat-traspożizzjoni, għall-applikazzjoni u għall-infurzar tad-direttivi u r-regolamenti ambjentali tal-UE. Il-leġiżlaturi tal-UE u dawk nazzjonali għandhom diversi strumenti biex japplikaw il-PPP, kif jidher fil-Figura 2.

Figura 2

Strumenti għall-implimentazzjoni tal-PPP

08

Matul l-aħħar deċennji, l-UE adottat firxa wiesgħa ta’ leġiżlazzjoni fil-qasam ambjentali. Il-politiki jkopru kwistjonijiet ambjentali, bħall-bijodiversità, il-forestrija, l-użu tal-ħamrija u tal-art, l-ilma u l-arja. Politiki oħra jimmiraw speċifikament sorsi ta’ tniġġis, bħas-sustanzi kimiċi, it-tniġġis industrijali, u l-iskart. L-aktar partijiet rilevanti tal-leġiżlazzjoni ambjentali għall-applikazzjoni tal-PPP jinkludu:

Id-Direttiva 2010/75/UE dwar l-Emissjonijiet Industrijali (IED) tistabbilixxi limiti tal-emissjonijiet ibbażati fuq sistema ta’ permessi għal madwar 52 000 installazzjoni industrijali kbira fl-UE. L-IED hija bbażata fuq approċċ integrat sabiex il-permessi jkollhom jieħdu inkunsiderazzjoni l-prestazzjoni ambjentali kollha tal-impjant, li tkopri, eż. l-emissjonijiet ta’ sustanzi niġġiesa, l-użu ta’ materja prima, l-effiċjenza fl-enerġija u r-restawr tas-sit mal-għeluq.
Id-Direttiva Qafas 2008/98/KE dwar l-Iskart tkopri l-immaniġġjar tal-iskart. Strumenti legali oħra jindirizzaw kwistjonijiet u tipi speċifiċi ta’ skart, bħall-iskart mill-imballaġġ, il-plastik li jintuża darba biss, it-tagħmir elettriku u elettroniku, il-batteriji u l-akkumulaturi, il-vetturi li ma għadhomx jintużaw, l-iskart mill-minjieri, il-landfills u l-vjeġġi ta’ skart.
Id-Direttiva Qafas 2000/60/KE dwar l-Ilma (WFD) tkopri l-politika tal-ilma, flimkien mad-Direttivi assoċjati, inklużi d-Direttiva 91/271/KEE dwar it-Trattament tal-Ilma Urban Mormi u d-Direttiva (EU) 2020/2184 dwar l-Ilma tajjeb għax-xorb kif ukoll id-Direttiva 2007/60/KE dwar l-Għargħar. Leġiżlazzjoni oħra speċifika għas-settur tkopri t-tniġġis li jaffettwa l-ilma, bħad-Direttiva 2009/128/KE dwar il-Pestiċidi jew id-Direttiva 91/676/KEE dwar in-Nitrati.
Id-Direttiva dwar ir-Responsabbiltà Ambjentali 2004/35/KE (ELD) tistabbilixxi l-qafas tal-UE għar-responsabbiltà ambjentali. Ir-responsabbiltà ambjentali tfisser li l-operaturi ekonomiċi li jikkawżaw dannu lill-ambjent huma responsabbli biex iħallsu għar-rimedjazzjoni tiegħu, u b’hekk jingħataw inċentiv biex jevitaw id-dannu. Skont l-ELD, meta dannu ambjentali sinifikanti lill-art, lill-ilma u lill-bijodiversità jirriżulta minn attività ekonomika li titqies bħala riskjuża (kif spjegat fid-dettall fl-Anness III tal-ELD), l-operatur responsabbli huwa meħtieġ li jieħu l-miżuri ta’ rimedjazzjoni kollha meħtieġa bi spejjeż tiegħu stess. Għal attivitajiet ekonomiċi li mhumiex meqjusa bħala ambjentalment riskjużi, inkluża l-biedja, l-ELD tirrikjedi li l-operaturi jirrimedjaw id-dannu lill-bijodiversità meta jkollhom tort jew ikunu negliġenti biss.
Il-kumpaniji li jaħżnu sustanzi kimiċi perikolużi huma wkoll suġġetti għad-Direttiva 2012/18/UE Seveso, li l-għan tagħha huwa l-prevenzjoni ta’ inċidenti kbar li jinvolvu sustanzi perikolużi.
Id-Direttiva 2009/147/KE dwar l-Għasafar u d-Direttiva 92/43/KEE dwar il-Ħabitats, imsejħa d-“Direttivi dwar in-Natura”, jiffurmaw is-sinsla tal-politika tal-UE dwar il-bijodiversità. Id-Direttivi dwar in-Natura jirrikjedu li l-Istati Membri jipproteġu l-ħabitats naturali. L-Istati Membri jistgħu jużaw il-finanzjament mill-UE biex jagħmlu dan. Id-Direttiva dwar il-Ħabitats tiddikjara b’mod espliċitu li l-PPP għandu applikazzjoni limitata għall-konservazzjoni tan-natura. L-ELD tkopri d-dannu sinifikanti kkawżat lil speċijiet u ħabitats protetti.

09

Ma hemm ebda leġiżlazzjoni qafas unika tal-UE li tindirizza t-tniġġis tal-ħamrija. Madankollu, madwar 35 strument leġiżlattiv, strateġiku, politiku u finanzjarju ġew identifikati bħala potenzjalment rilevanti għall-protezzjoni tal-ħamrija¹².

Finanzjament mill-UE

10

It-tniġġis jiġġenera spejjeż sinifikanti għaċ-ċittadini tal-UE. Ma hemm ebda valutazzjoni komprensiva tal-ispiża sħiħa tat-tniġġis għas-soċjetà. Studju reċenti li twettaq għall-Kummissjoni stma li n-nuqqas li jiġu ssodisfati r-rekwiżiti tal-leġiżlazzjoni ambjentali tal-UE jammonta għal madwar EUR 55 biljun fis-sena fi spejjeż u benefiċċji mitlufa¹³.

11

Sehem sinifikanti tal-baġit tal-UE huwa ddedikat għall-kisba tal-objettivi tal-UE relatati mat-tibdil fil-klima u mal-ambjent. Matul il-perjodu 2014-2020, l-UE impenjat lilha nfisha li tonfoq mill-inqas 20 % tal-baġit totali tagħha fuq l-azzjoni dwar il-klima. L-UE tintegra l-objettivi ambjentali f’ħafna mill-programmi ta’ finanzjament tagħha. Pereżempju, matul il-perjodu 2014-2020, il-Kummissjoni kklassifikat infiq ta’ EUR 66 biljun taħt il-politika agrikola komuni u ta’ EUR 1 000 000 000 fuq is-sajd bħala li huwa ta' benefiċċju għall-bijodiversità, għalkemm rapport reċenti juri li dawn iċ-ċifri ġew stmati b’mod eċċessiv¹⁴.

12

Il-baġit tal-UE jappoġġa proġetti għat-tindif ta’ siti mniġġsa u għall-protezzjoni ambjentali prinċipalment permezz tal-fondi taħt il-politika ta’ koeżjoni (jiġifieri l-Fond Ewropew għall-Iżvilupp Reġjonali u l-Fond ta’ Koeżjoni), taħt it-tema wiesgħa ta’ “Ambjent u Effiċjenza fir-Riżorsi”, u l-programm LIFE (LIFE). Dawn jappoġġaw l-ispiża tal-infrastruttura meħtieġa għat-trattament tal-ilma mormi u l-immaniġġjar tal-iskart f’ċerti Stati Membri, u miżuri li jimmonitorjaw l-istat tal-ambjent u l-iżvilupp ta’ infrastruttura favur l-ambjent¹⁵.

13

LIFE¹⁶ huwa programm tal-UE li jindirizza l-ambjent u t-tibdil fil-klima. Għall-perjodu 2014-2020, il-Qafas Finanzjarju Pluriennali għamel EUR 2.6 biljun disponibbli għas-sottoprogramm ambjentali taħt LIFE.

14

Matul il-perjodu 2014-2020, il-baġit tal-UE ppjanat għall-politika ta’ koeżjoni u LIFE jammonta għal madwar EUR 29 biljun għal proġetti mmirati speċifikament lejn il-protezzjoni tal-ambjent (il-Figura 3).

Figura 3

Stampa ġenerali tal-fondi tal-UE taħt il-politika ta’ Koeżjoni u s-sottoprogramm ambjentali LIFE riżervati għal proġetti ambjentali (il-perjodu 2014-2020, f’EUR biljun)

Ambitu u approċċ tal-awditjar

15

It-tniġġis jirrappreżenta spiża sinifikanti għas-soċjetà u huwa tħassib ewlieni għaċ-ċittadini tal-UE. Il-Prinċipju ta’ Min Iniġġes Iħallas huwa għodda ewlenija għat-twassil tal-objettivi ambjentali tal-Ewropa b’mod effiċjenti u ġust. F’rapporti preċedenti, aħna sibna każijiet fejn il-PPP ma ġiex applikat¹⁷. Madankollu, preċedentement aħna ma eżaminajniex il-PPP per se. Dan ir-rapport jidentifika opportunitajiet għal titjib fl-integrazzjoni tal-PPP fil-leġiżlazzjoni ambjentali futura u fil-finanzjament mill-UE ta’ proġetti ta’ rimedjazzjoni ambjentali. Il-konklużjonijiet u r-rakkomandazzjonijiet tiegħu huma rilevanti għall-Parlament u għall-Kunsill għall-iskrutinju tal-leġiżlazzjonijiet ambjentali kollha u tal-evalwazzjoni tal-Kummissjoni tal-ELD, li mistennija tiġi ffinalizzata fl-2023.

16

Aħna eżaminajna l-qafas ta’ politika tal-UE għall-PPP. Iffukajna fuq jekk:

il-prinċipju kienx ġie applikat tajjeb f’erba’ oqsma ta’ politika ambjentali tal-UE: it-tniġġis industrijali, l-iskart, l-ilma u l-ħamrija;
l-azzjonijiet tal-Kummissjoni relatati mal-ELD kinux wasslu għal riżultati;
il-Kummissjoni u l-Istati Membri kinux ipproteġew il-baġit tal-UE milli jintuża biex jiġġarrbu l-ispejjeż li kellhom jitħallsu minn min iniġġes.

17

Aħna eżaminajna l-infiq u l-azzjoni tal-UE matul il-Qafas Finanzjarju Pluriennali 2014-2020. Ma ffukajniex l-awditu fuq is-settur tal-enerġija u dak tal-klima, u fuq it-tniġġis tal-arja, billi aħna koprejna dawn is-suġġetti f’bosta rapporti oħra¹⁸. Eskludejna t-taxxi ambjentali tal-Istati Membri mill-ambitu tagħna.

18

Fix-xogħol tal-awditjar tagħna, aħna:

eżaminajna r-rapporti tal-Kummissjoni u dawk tal-aġenziji rilevanti u azzjonijiet oħra relatati mal-applikazzjoni tal-PPP fil-politiki tal-UE;
ksibna spjegazzjonijiet mill-awtoritajiet nazzjonali responsabbli għall-implimentazzjoni tal-ELD fl-Italja, fil-Polonja u fil-Portugall. Aħna għażilna dawn l-Istati Membri abbażi tal-għadd ta’ każijiet irrappurtati taħt l-ELD u b’kont meħud tal-bilanċ ġeografiku;
skrutinizzajna 42 proġett ta’ rimedjazzjoni ambjentali. Għamilna dan billi għażilna proġetti ddedikati għar-restawr tal-ambjent b’valur ta’ EUR 180 miljun mill-Fondi taħt il-Politika ta’ Koeżjoni u LIFE, fl-Italja, fil-Polonja u fil-Portugall, matul il-perjodu 2014-2020. Aħna għażilna dawn il-proġetti billi kienu qed jiffinanzjaw xogħol ta’ dekontaminazzjoni kkawżat minn tniġġis magħmul mill-bniedem.

Osservazzjonijiet

Il-PPP huwa l-bażi tal-leġiżlazzjoni ambjentali tal-UE

19

Aħna eżaminajna kif l-UE integrat il-PPP f’oqsma leġiżlattivi ewlenin, bħall-IED għat-tniġġis industrijali, id-Direttiva Qafas dwar l-Iskart għall-iskart, id-Direttiva Qafas dwar l-Ilma għat-tniġġis tal-ilma, u diversi direttivi u regolamenti relatati mat-tniġġis tal-ħamrija. Aħna vverifikajna jekk dawn kienx fihom dispożizzjonijiet għall-applikazzjoni tal-PPP u sa liema punt min iniġġes kien responsabbli biex iħallas għat-tniġġis ikkawżat minnu.

Il-PPP japplika għall-installazzjonijiet li jniġġsu l-aktar iżda l-ispiża tat-tniġġis residwu għas-soċjetà għadha għolja

Figura 4

It-tniġġis industrijali fil-qosor

20

L-IED tkopri 33 settur industrijali (l-Anness I). F’xi setturi industrijali, din tkopri l-installazzjonijiet kollha. F’oħrajn, hija tkopri installazzjonijiet akbar (pereżempju, impjanti tal-enerġija b’input termiku nominali totali ta’ aktar minn 50 megawatt).

21

L-installazzjonijiet koperti jeħtieġu permess biex joperaw, li jistabbilixxi regoli speċifiċi u limiti tal-emissjonijiet ibbażati fuq konklużjonijiet dwar l-“Aqwa Tekniki Disponibbli” (BAT, Best Available Techniques). Id-dokumenti ta’ referenza dwar il-BAT huma dokumenti assoċjati li jipprovdu soluzzjonijiet tekniċi biex jillimitaw it-tniġġis filwaqt li jżommu l-installazzjonijiet industrijali ekonomikament vijabbli. Il-Kummissjoni tirrieżamina u taġġorna l-konklużjonijiet tal-BAT regolarment, l-installazzjonijiet kollha eżistenti kkonċernati jridu jikkonformaw magħhom wara perjodu ta’ tranżizzjoni ta’ erba’ snin, u installazzjonijiet ġodda jridu jkunu konformi immedjatament. L-awtoritajiet tal-Istati Membri jispezzjonaw l-installazzjonijiet li jkunu koperti mill-IED, jippenalizzaw f’każ li dawn ma jkunux konformi u jagħlquhom fl-aktar każijiet serji.

22

Fl-2020, il-Kummissjoni ppubblikat evalwazzjoni tal-IED¹⁹, li wriet li l-ispiża tad-dannu kkawżat mill-emissjonijiet fl-arja tal-installazzjonijiet kollha tal-IED kienet naqset b’madwar 50 % bejn l-2010 u l-2017. Il-Kummissjoni stmat l-ispejjeż u l-benefiċċji tal-IED għal ċerti setturi: pereżempju, fis-settur tal-ħadid u tal-azzar, il-konformità mal-IED tiswa madwar EUR 90 miljun fis-sena, filwaqt li l-prevenzjoni tat-tniġġis tiffranka EUR 932 miljun fis-sena²⁰. Fil-Komunikazzjoni tagħha dwar il-Patt Ekoloġiku Ewropew²¹, il-Kummissjoni ħabbret li se tipproponi reviżjoni tal-miżuri tal-UE li jindirizzaw it-tniġġis ikkawżat minn installazzjonijiet industrijali kbar.

23

Is-sidien tal-installazzjonijiet iridu jġarrbu l-ispiża tal-konformità mal-kundizzjonijiet tal-permessi tal-IED tagħhom. Dan jinkludi t-teħid ta’ miżuri biex l-emissjonijiet jinżammu fi ħdan limiti legali, li jfisser li dawn jinternalizzaw l-ispiża tal-prevenzjoni u tal-kontroll tat-tniġġis. Madankollu, il-fondi pubbliċi jistgħu jappoġġaw azzjonijiet li jmorru lil hinn mill-istandards eżistenti²². Jekk l-installazzjonijiet jikkawżaw dannu ambjentali sinifikanti, huma jkunu suġġetti għall-ELD (il-paragrafi 42-62), li jfisser li jridu jħallsu għar-rimedjazzjoni. Il-maġġoranza (17) tal-Istati Membri ma jżommux l-installazzjonijiet responsabbli meta d-dannu ambjentali jkun irriżulta minn emissjonijiet li kienu fil-limiti tal-permess tagħhom²³, u l-installazzjoni ma kellhiex tort jew ma kinitx negliġenti.

24

L-IED tkopri l-installazzjonijiet industrijali li jniġġsu l-aktar, kif spjegat fid-dettall fil-paragrafu 20. L-IED ma tirrikjedix li l-installazzjonijiet ikopru l-ispiża tal-impatt mit-tniġġis residwu għas-soċjetà. Fl-2014, l-Aġenzija Ewropea għall-Ambjent (EEA) stmat li l-ispiża tad-dannu mit-tniġġis residwu tal-arja għas-soċjetà kkawżat minn 14 000 faċilità industrijali kbira matul il-perjodu 2008-2012 kienet bejn EUR 329 biljun u EUR 1 053 biljun²⁴.

25

Fost it-42 proġett ta’ rimedjazzjoni ambjentali li eżaminajna, aħna sibna proġett li kellu l-għan li jindirizza t-tniġġis iġġenerat minn impjant kbir tal-azzar u tal-ħadid, li ma kienx konformi mal-IED (il-Kaxxa 1).

Kaxxa 1

In-nuqqas ta’ konformità mal-IED wassal għal tniġġis sinifikanti: il-każ ta’ impjant kbir tal-azzar fl-Italja

Fl-2005, il-Qorti Suprema tal-Italja ddeċidiet li kumpanija li kellha s-sjieda ta’ impjant kbir tal-azzar u tal-ħadid kienet responsabbli għat-tniġġis tal-arja, ir-rimi ta’ materjali perikolużi, u l-emissjoni ta’ partikoli. Fl-2010, il-muniċipalità fejn jinsab l-impjant sostniet li t-tindif tad-dannu ambjentali kien se jiswa EUR 2 biljun u ħadet azzjoni legali biex tikseb kumpens. Fl-2011, il-Qorti tal-Ġustizzja tal-Unjoni Ewropea (QĠUE) sabet li l-Italja ma kinitx konformi mal-IED. Fl-2015, il-kumpanija ttieħdet mill-Istat. Fl-2017, proċedimenti kriminali li ngħataw bidu mill-ġudikatura kontra s-sidien preċedenti tal-impjant irriżultaw f’soluzzjoni alternattiva għat-tilwim li taqbeż il-EUR 1 000 000 000. Il-flus li ġew irkuprati qed jintużaw mill-Istat Taljan għal attivitajiet ta’ dekontaminazzjoni. Fl-2019, qorti tal-appell fl-Italja tat kumpens lill-muniċipalità iżda l-kumpanija ma setgħetx tħallas għad-dannu.

Proġett ta’ EUR 375 000 li ġie ffinanzjat mill-UE kellu l-għan li jidentifika u jindirizza t-tniġġis u kien jikkonċerna muniċipalità oħra li kienet tinsab qrib l-impjant tal-azzar u tal-ħadid. Il-proġett kien jikkonsisti f’analiżi ambjentali u valutazzjoni tar-riskju ta’ erja agrikola ta’ kważi 6 000 ettaru. Il-proġett identifika kontaminazzjoni industrijali serja li kienet tippreżenta riskji sinifikanti għas-saħħa.

Il-leġiżlazzjoni dwar l-iskart tirrifletti l-PPP, iżda ma tiżgurax li min iniġġes ikopri l-ispiża sħiħa tat-tniġġis

26

L-iskart huwa sors ta’ tniġġis fl-arja, fl-ilma u fil-ħamrija. Il-qafas leġiżlattiv tal-UE dwar l-iskart ifittex li japplika “ġerarkija tal-iskart” (il-Figura 6) biex jitnaqqas l-iskart u jintuża skart inevitabbli bħala riżorsa.

27

Id-Direttiva tirrikjedi li l-Istati Membri jilħqu miri vinkolanti²⁵. Pereżempju, jenħtieġ li 55 % tal-iskart muniċipali jitħejja għall-użu mill-ġdid jew għar-riċiklaġġ sal-2025 (jiżdied għal 60 % sal-2030 u għal 65 % sal-2035, b’mhux aktar minn 10 % li jintbagħat f’landfill).

28

Id-Direttiva Qafas dwar l-Iskart tirrikjedi li, “skont il-prinċipju ta’ min iniġġes iħallas, il-kostijiet tal-immaniġġjar tal-iskart inkluż għall-infrastruttura neċessarja u l-operat tagħha, għandhom jinġarru mill-produttur oriġinali tal-iskart jew mid-detentur attwali jew preċedenti tal-iskart”. L-Istati Membri jiddeċiedu jekk l-ispejjeż tal-immaniġġjar tal-iskart għandhomx jiġġarrbu mill-utent aħħari (eż. il-konsumatur li jarmi l-iskart) jew inkella parzjalment jew kompletament mill-produttur tal-prodott li jkun sar skart. Din tissejjaħ “Responsabbiltà Estiża tal-Produttur” (EPR). L-EPR mhijiex l-uniku mod biex jiġi implimentat il-PPP. Pereżempju, id-Direttiva dwar il-Boroż tal-Plastik tirrikjedi li l-Istati Membri jieħdu miżuri, bħal miri ta’ tnaqqis nazzjonali u/jew strumenti ekonomiċi (eż. tariffi, taxxi).

29

L-iskemi ta’ EPR jagħmlu lill-produtturi responsabbli għall-immaniġġjar tal-prodotti tagħhom ladarba dawn isiru skart. Għaldaqstant, il-prezz li jitħallas mill-produtturi u mill-konsumaturi jirrifletti l-ispiża tal-immaniġġjar tal-iskart, u b’hekk titnaqqas l-ispiża għall-awtoritajiet pubbliċi u l-kontribwenti. Huma jagħtu wkoll inċentiv lill-produtturi biex jiżviluppaw prodotti aktar ekoloġiċi li jevitaw skart mhux meħtieġ. L-iskemi ta’ EPR huma obbligatorji għal ċerti flussi ta’ skart, bħall-iskart elettriku u elettroniku, il-batteriji, l-akkumulaturi u l-vetturi, u se jkunu meħtieġa għall-iskart kollu mill-imballaġġ, għall-plastik li jintuża darba biss u għall-irkaptu tas-sajd sal-2024.

30

Jenħtieġ li t-tariffi imposti fuq iċ-ċittadini jew fuq in-negozji jkunu proporzjonali għall-iskart iġġenerat u jieħdu kont tad-dannu ambjentali kkawżat. Studju wieħed dwar il-finanzjament tal-immaniġġjar tal-iskart²⁶ iddikjara li l-evidenza tissuġġerixxi li l-esternalitajiet ambjentali huma sa ċertu punt biss internalizzati fit-tariffi tal-utenti mħallsa mill-unitajiet domestiċi.

31

Matul il-perjodu 2014-2020, il-baġit tal-UE ppjana li jikkontribwixxi, prinċipalment permezz tal-politika ta’ koeżjoni, EUR 4.3 biljun għall-finanzjament tal-infrastruttura għall-immaniġġjar tal-iskart għall-ġbir, is-separazzjoni u t-trattament tal-iskart.

Min iniġġes ma jġarrabx l-ispejjeż sħaħ relatati mat-tniġġis tal-ilma

32

Id-Direttiva Qafas dwar l-Ilma tistabbilixxi qafas komuni għall-protezzjoni tat-tipi kollha tal-ilma fl-UE u għall-prevenzjoni ta’ deterjorament ulterjuri tal-kwalità tal-ilma. Hija tistabbilixxi objettivi għall-korpi tal-wiċċ u l-korpi ta’ ilma ta’ taħt l-art.

33

L-OECD stmat²⁷ li l-Istati Membri diġà jonfqu madwar EUR 100 biljun fis-sena fuq il-provvista tal-ilma u s-sanità, u li se jkunu jeħtieġu (ħlief il-Ġermanja) li jżidu dak l-ammont b’aktar minn 25 % biex jilħqu l-objettivi tal-leġiżlazzjoni tal-UE dwar it-trattament tal-ilma mormi u l-ilma tajjeb għax-xorb. Dan ma jinkludix l-investimenti meħtieġa għat-tiġdid tal-infrastruttura eżistenti jew għall-ilħuq tal-objettivi tad-Direttiva Qafas dwar l-Ilma u tad-Direttiva dwar l-Għargħar.

34

L-Artikolu 9 tad-Direttiva Qafas dwar l-Ilma jirrikjedi li l-Istati Membri “jikkunsidraw il-prinċipju ta’ rkuprar tal-ispejjeż tas-servizzi tal-ilma, inklużi l-ispejjeż tal-ambjent u tar-riżorsi, [...], u bi qbil partikolarment mal-prinċipju ta’ min iniġġes iħallas”. L-Istati Membri huma meħtieġa jiżguraw li l-kontribuzzjoni mis-settur industrijali, is-settur agrikolu u dak tal-unitajiet domestiċi għall-irkupru tal-ispejjeż tas-servizzi tal-ilma tkun adegwata meta mqabbla mal-użu li huma jagħmlu mill-ilma. Il-Figura 8 ta’ hawn taħt turi l-użu tal-ilma skont is-settur ekonomiku.

Figura 8

Użu tal-ilma skont is-settur ekonomiku fl-Ewropa, fl-2017

35

Meta jistabbilixxu l-politika tal-ipprezzar tal-ilma tagħhom, l-Istati Membri jistgħu jieħdu inkunsiderazzjoni l-effetti soċjali, ambjentali u ekonomiċi tal-irkupru tal-ispejjeż. Għalhekk, huma għandhom id-diskrezzjoni biex jiddeċiedu min huwa mistenni li jħallas, kemm, u għal liema servizz. Id-Deċiżjoni C-525/12 tal-QĠUE kkonfermat li l-Istati Membri mhux neċessarjament iridu japplikaw il-kunċett tal-irkupru tal-ispejjeż għall-użu kollu tal-ilma.

36

Fl-UE, l-utenti jħallsu bħala medja għal madwar 70 % tal-ispiża tal-provvista tas-servizzi tal-ilma (permezz tat-tariffi fuq l-ilma), filwaqt li l-fondi pubbliċi jiffinanzjaw it-30 % li jifdal, għalkemm hemm differenzi konsiderevoli bejn ir-reġjuni u l-Istati Membri²⁸. Normalment, l-unitajiet domestiċi tal-UE jħallsu għall-biċċa l-kbira mill-ispiża relatata mas-servizzi tal-provvista tal-ilma u tas-sanità²⁹, minkejja li jikkunsmaw biss 10 % tal-ilma, kif jidher fil-Figura 8. L-agrikoltura, is-settur li jeżerċita l-aktar pressjonijiet fuq ir-riżorsi rinnovabbli tal-ilma ħelu³⁰, tikkontribwixxi l-inqas. Studju tal-2011 stma li fi Franza l-ispejjeż addizzjonali mħallsa minn unitajiet domestiċi minħabba tniġġis agrikolu żdiedu b’EUR 494 għal kull unità domestika fis-sena għal-lokalitajiet l-aktar milquta³¹.

37

Fl-2019, il-Kummissjoni identifikat³² li l-Istati Membri kellhom jagħmlu aktar progress biex jintegraw l-ispejjeż ambjentali u tar-riżorsi fl-ipprezzar tal-ilma. Filwaqt li kien sar progress fl-indirizzar ta’ sustanzi niġġiesa speċifiċi, għal ħafna intrapriżi l-prezz tal-ilma ma jkoprix l-ispejjeż sħaħ imposti minħabba s-sustanzi niġġiesa li huma jirrilaxxaw fl-ilma.

38

Il-prinċipju tal-irkupru tal-ispejjeż huwa diffiċli biex jiġi applikat għal tniġġis li joriġina minn sorsi diffużi, pereżempju mill-agrikoltura, fejn huwa diffiċli li min iniġġes jiġi identifikat. Ħafna drabi s-settur agrikolu ma jħallasx għat-trattament tal-ilma mormi, minħabba li l-parti l-kbira mill-ilma li dan is-settur juża ma jiġix mormi fid-drenaġġ (u għalhekk l-ilma ma jiġix trattat). Fl-UE, it-tniġġis agrikolu diffuż permezz tan-nitrati u tal-pestiċidi huwa l-kawża prinċipali tan-nuqqas tal-ilma ta’ taħt l-art milli jikseb status kimiku tajjeb. It-tniġġis ikkawżat min-nitrati jippreżenta riskju kbir għall-futur tal-korpi ta’ ilma ta’ taħt l-art, hekk kif l-esperti urew³³ li kwantitajiet vasti ta’ nitrati huma attwalment maħżuna fis-saffi tal-blat bejn il-ħamrija u l-korp ta’ ilma ta’ taħt l-art. Billi n-nitrati jgħaddu bil-mod minn bejn il-blat, jista’ jgħaddi seklu jew aktar biex is-sustanzi niġġiesa jilħqu l-korp ta’ ilma ta’ taħt l-art, u dan idewwem l-impatt tal-bidliet fil-prattiki agrikoli fuq il-kwalità tal-ilma ta’ taħt l-art.

Ebda qafas leġiżlattiv kumplessiv tal-UE għall-protezzjoni kontra t-tniġġis tal-ħamrija

Figura 9

It-tniġġis tal-ħamrija fil-qosor

39

Diversi direttivi u regolamenti tal-UE jikkontribwixxu għall-prevenzjoni u l-mitigazzjoni tat-tniġġis tal-ħamrija, u jkopru s-setturi li l-aktar li jagħmlu pressjoni fuq il-ħamrija, bħall-industrija u l-agrikoltura (pereżempju l-paragrafi 20-25 u 38). Fl-2006, il-Kummissjoni pproponiet “Direttiva Qafas dwar il-Ħamrija” li kopriet il-prevenzjoni tal-kontaminazzjoni u d-degradazzjoni tal-ħamrija kif ukoll l-identifikazzjoni, ir-reġistrazzjoni u r-rimedjazzjoni ta’ siti kontaminati. Il-Parlament Ewropew adotta opinjoni pożittiva dwar il-proposta, iżda mhux il-Kunsill. Il-Kummissjoni rtirat il-proposta f’Mejju 2014.

40

Ma hemm ebda objettiv komuni għall-UE kollha li huwa relatat mat-tniġġis tal-ħamrija u mar-rimedju ta’ siti kontaminati. Studju³⁴ ffinanzjat mill-Kummissjoni wera li xi wħud mill-Istati Membri kellhom fis-seħħ leġiżlazzjoni nazzjonali komprensiva ħafna, filwaqt li oħrajn ma kellhomx azzjoni koordinata dwar il-protezzjoni tal-ħamrija.

41

Id-dekontaminazzjoni tal-ħamrija mniġġsa tiswa ħafna flus: fl-2006, il-Kummissjoni stmat li l-ispiża totali tat-tindif tal-ħamrija kkontaminata fl-UE kienet tammonta għal EUR 119-il biljun³⁵. Il-baġits pubbliċi, inklużi l-fondi tal-UE, jiffinanzjaw aktar minn 42 % tal-attivitajiet ta’ rimedjazzjoni³⁶: ħafna attivitajiet li jniġġsu seħħew żmien twil ilu, li jżid ir-riskju li min iniġġes jew ma għadux jeżisti, jew ma jistax jiġi identifikat jew inkella huwa insolventi. Barra minn hekk, huwa diffiċli li l-PPP jiġi applikat f’każijiet ta’ kontaminazzjoni diffuża tal-ħamrija minħabba d-diffikultà inerenti li r-responsabbiltà tiġi attribwita lil entitajiet speċifiċi li jniġġsu.

Il-pjan ta’ azzjoni tal-Kummissjoni biex ittejjeb l-operat tal-ELD ma kisibx ir-riżultati mistennija

42

Aħna rrieżaminajna l-evalwazzjoni tal-ELD imwettqa fl-2016 u vvalutajna jekk l-azzjonijiet li l-Kummissjoni ħadet b’rispons għaliha minn dak iż-żmien ’il hawn kinux indirizzaw il-lakuni identifikati.

B’segwitu għall-evalwazzjoni tal-ELD, il-Kummissjoni adottat pjan ta’ azzjoni biex tindirizza l-lakuni identifikati

43

Id-Direttiva kienet tirrikjedi li:

Sa April 2013, l-Istati Membri jippreżentaw lill-Kummissjoni data dwar il-każijiet kollha ta’ dannu ambjentali li ġew irrimedjati skont l-ELD matul il-perjodu 2007-2013, imbagħad fl-2022 u minn dak iż-żmien ’il quddiem kull ħames snin; u
Il-Kummissjoni tirrapporta lill-Parlament Ewropew u lill-Kunsill fl-2014 imbagħad fl-2023 u minn dak iż-żmien ’il quddiem fuq ċiklu ta’ ħames snin.

44

L-Istati Membri rrappurtaw 1 230 każ li ġew ittrattati skont l-ELD matul il-perjodu 2007-2013³⁷. Kif jidher fil-Figura 10, l-għadd ta’ każijiet kien ivarja b’mod sinifikanti fost l-Istati Membri, b’żewġ pajjiżi, l-Ungerija u l-Polonja, li rrappurtaw aktar minn 85 % tal-għadd totali ta’ każijiet. Dokument ta’ Ħidma tal-Persunal tal-Kummissjoni kkonkluda li r-raġuni prinċipali għal dawn id-differenzi kbar kienet l-applikazzjoni mhux uniformi tal-ELD fl-Istati Membri kollha³⁸.

Figura 10

Każijiet relatati mal-ELD irrappurtati mill-Istati Membri tal-EU għall-perjodu 2007-2013

45

L-evalwazzjoni tal-ELD imwettqa mill-Kummissjoni fl-2016 ikkonkludiet li d-Direttiva baqgħet rilevanti u li l-Istati Membri għamlu progress fl-ilħuq tal-objettivi tagħha. Madankollu, din sabet li xi kwistjonijiet, jew minn perspettiva tat-tfassil tal-politika jew minn dik tal-implimentazzjoni, fixklu l-effiċjenza u l-effettività tar-reġim ta’ responsabbiltà:

nuqqas ta’ data konsistenti u komparabbli dwar l-implimentazzjoni tal-ELD;
nuqqas ta’ sensibilizzazzjoni mill-partijiet ikkonċernati dwar ir-reġim;
kunċetti u definizzjonijiet ewlenin mhux ċari;
limitazzjonijiet tal-kamp ta’ applikazzjoni minħabba eċċezzjonijiet u difiżi; u
nuqqas ta’ sigurtà finanzjarja f’każijiet ta’ insolvenza.

46

Ibbażat fuq din l-evalwazzjoni, il-Kummissjoni, f’konsultazzjoni ma’ esperti mill-Istati Membri, adottat Programm ta’ Ħidma Pluriennali tal-ELD (MAWP) għall-perjodu 2017-2020³⁹ biex tindirizza l-lakuni identifikati. Fl-2020, il-Kummissjoni approvat programm ta’ ħidma ġdid b’azzjonijiet għall-perjodu 2021-2024⁴⁰.

47

Waħda mill-azzjonijiet indirizzat ir-rappurtar tad-data. L-evalwazzjoni kkonkludiet li l-kwalità tad-data rrappurtata kienet fqira u ppreveniet lill-Kummissjoni milli tasal għal konklużjonijiet sodi rigward l-implimentazzjoni tal-ELD. L-evalwazzjoni ddikjarat li, filwaqt li xi wħud mill-Istati Membri ppreżentaw data dettaljata u strutturata tajjeb, oħrajn ma pprovdewx l-informazzjoni kollha meħtieġa għal valutazzjoni kompleta.

48

Biex ittejjeb il-koerenza u l-kwalità tad-data, fl-2017 il-Kummissjoni żviluppat Sistema ta’ Informazzjoni għall-ELD. Madankollu, is-sistema mhijiex operazzjonali. Il-Kummissjoni qed tippjana li tinkoraġġixxi l-użu tas-sistema ta’ informazzjoni, billi torganizza diskussjonijiet mal-Istati Membri dwar il-mod kif għandu jiġi organizzat il-ġbir tad-data fil-livell nazzjonali. Minħabba d-differenzi fis-sistemi legali ma hemm ebda aċċertament li din is-sistema l-ġdida se tappoġġa analiżi konsistenti madwar l-UE.

Il-kunċetti ewlenin tal-ELD għadhom mhux definiti

49

L-ELD tiddefinixxi tliet tipi ta’ dannu ambjentali li jaqgħu fil-kamp ta’ applikazzjoni tagħha, jiġifieri għall-ispeċijiet u l-ħabitats naturali protetti, l-ilma u l-art⁴¹. Id-Direttiva tapplika meta tali “dannu ambjentali” jitqies “sinifikattiv”. Id-Direttiva ma tispeċifikax il-kriterji għall-valutazzjoni tad-dannu jew għad-determinazzjoni tas-soll tas-sinifikanza għad-dannu li jaffettwa l-ilmijiet u l-art.

50

L-evalwazzjoni mwettqa mill-Kummissjoni fl-2016 issuġġeriet li n-nuqqas ta’ ċarezza u l-applikazzjoni uniformi ta’ kunċetti ewlenin tal-ELD (“dannu ambjentali” u “sinifikanza”) kienu fixklu l-objettiv tad-Direttiva li jinkiseb livell għoli ta’ protezzjoni tal-ambjent fl-UE⁴².

51

L-interpretazzjoni ta’ dak li jikkostitwixxi dannu ambjentali sinifikattiv u għalhekk dak li huwa suġġett għall-PPP skont id-Direttiva, tvarja b’mod sinifikanti fost l-Istati Membri. Avveniment li jiskatta l-applikazzjoni tal-ELD fi Stat Membru wieħed mhux neċessarjament jiskattaha fi Stat Membru ieħor. Fil-każ speċifiku tad-definizzjoni ta’ dak li jikkostitwixxi “dannu lill-art”, l-ELD tirreferi biss għad-dannu li joħloq riskju sinifikattiv għas-saħħa tal-bniedem, iżda mhux għall-ambjent.

52

Skont il-MAWP għall-perjodu 2017-2020, il-Kummissjoni impjegat kuntrattur biex ifassal dokument ta’ “Fehim Komuni” biex jipprovdi kjarifika ulterjuri dwar kunċetti ewlenin tal-ELD. La l-Kummissjoni u lanqas l-Istati Membri ma approvawh⁴³.

53

Fl-2017, il-Parlament Ewropew iddikjara li “l-interpretazzjoni u l-applikazzjoni differenti “tal-limitu minimu ta’ materjalità” għad-dannu ambjentali jikkostitwixxu wieħed mill-ostakoli ewlenin għall-applikazzjoni uniformi u effikaċi tal-ELD”⁴⁴. Il-Parlament Ewropew appella lill-Kummissjoni biex tirrevedi d-definizzjoni ta’ “dannu ambjentali” u tiċċara l-kunċett ta’ “limitu minimu ta’ materjalità”.

54

Fl-2019, emenda għall-ELD⁴⁵ kienet tirrikjedi li l-Kummissjoni tiżviluppa linji gwida dwar it-terminu “dannu ambjentali” sa tmiem l-2020. Wara konsultazzjonijiet mal-Istati Membri, il-Kummissjoni ħarġet avviż f’Marzu 2021⁴⁶ dwar l-interpretazzjoni legali tagħha tad-definizzjoni ta’ “dannu ambjentali”. L-interpretazzjoni tal-Kummissjoni mhijiex vinkolanti u ma fihiex kriterji jew limiti minimi speċifiċi li skonthom jenħtieġ li tiġi applikata l-ELD, billi dan ikun jirrikjedi bidla leġiżlattiva.

55

In-Network tal-Unjoni Ewropea għall-Implimentazzjoni u l-Infurzar tal-Liġi Ambjentali (IMPEL) identifika l-ħtieġa li l-prattikanti nazzjonali jikkondividu l-esperjenzi għad-detezzjoni, l-identifikazzjoni u d-determinazzjoni tad-dannu ambjentali. Biex jissodisfa din il-ħtieġa, l-IMPEL qed jiżviluppa manwal għall-partijiet ikkonċernati li jagħti dettalji rigward il-kriterji għall-valutazzjoni tad-“dannu ambjentali”, li qed jippjana li jippubblika fl-2021⁴⁷. Fil-programm ta’ ħidma tagħha għall-perjodu 2021-2024, il-Kummissjoni ddikjarat li qed tippjana li tikkoopera mal-proġett IMPEL, u li tuża l-outputs tal-proġett bħala parti mill-bini tal-kapaċitajiet. Il-Kummissjoni ma ppjanat ebda azzjoni speċifika dwar dan fil-programm ta’ ħidma tagħha għall-perjodu 2021-2024.

Xi wħud mill-Istati Membri jirrikjedu li l-kumpaniji industrijali jassiguraw lilhom infushom kontra r-riskji ambjentali

56

Meta l-ispejjeż tar-rimedjazzjoni relatati mad-dannu ambjentali jaqbżu l-assi tal-operatur, f’każ ta’ insolvenza, huwa ma jkunx jista’ jikkompleta l-azzjoni ta’ rimedjazzjoni, u b’hekk l-ispejjeż jiġġarrbu mill-fondi pubbliċi.

57

L-Istati Membri ma kinux obbligati jipprovdu informazzjoni dwar l-ispejjeż tar-rimedjazzjoni għaċ-ċiklu ta’ rappurtar tal-perjodu 2007-2013. L-Istati Membri li pprovdew informazzjoni dwar tali spejjeż kienu 12, u 96 % tal-proġetti ta’ rimedjazzjoni kienu jiswew inqas minn EUR 1 000 000⁴⁸. L-analiżi li wettaqna tal-proġetti ta’ rimedjazzjoni li l-ispejjeż tagħhom iġġarrbu mill-baġit tal-UE wriet li dawn ta’ spiss kienu jikkonċernaw każijiet fejn l-ispejjeż tar-rimedjazzjoni kienu konsiderevoli meta mqabbla mal-kapaċità finanzjarja tal-operatur, u fejn is-sigurtà finanzjarja ma kinitx fis-seħħ (il-paragrafu 68).

58

L-ELD tirrikjedi li l-Istati Membri “iħajjru l-iżvilupp ta’ strumenti u suq ta’ sigurtà finanzjarja [...] bl-iskop li jiffaċilitaw l-użu ta’ garanziji finanzjarji mill-operaturi biex ikopru r-responsabbiltajiet tagħhom”⁴⁹. Is-sigurtà finanzjarja tista’ tieħu l-forma, fost l-oħrajn, ta’ polza tal-assigurazzjoni, kontribuzzjoni għal fond ambjentali, garanzija bankarja, bond, jew riżerva proprja. L-Istati Membri mhumiex obbligati li jagħmlu din is-sigurtà finanzjarja obbligatorja.

59

Kif jidher fil-Figura 11, seba’ Stati Membri (iċ-Ċekja, l-Irlanda, Spanja, l-Italja, il-Polonja, il-Portugall u s-Slovakkja) jeħtieġu sigurtà finanzjarja għal xi responsabbiltajiet ambjentali jew għal kollha kemm huma.

Figura 11

Sigurtà finanzjarja għar-responsabbiltajiet tal-ELD fl-UE

60

Studju mħejji għall-Parlament Ewropew ikkonkluda li l-problema tal-insolvenza tista’ tiġi indirizzata permezz ta’ sigurtà finanzjarja obbligatorja. Pereżempju, il-Portugall jimponi sigurtà finanzjarja obbligatorja għall-attivitajiet kollha ambjentalment riskjużi identifikati fl-ELD. Il-Portugall jaċċetta firxa wiesgħa ta’ strumenti ta’ sigurtà finanzjarja, inklużi poloz tal-assigurazzjoni, garanziji bankarji, fondi ambjentali u fondi proprji. Il-Portugall ma rrapporta ebda każ ta’ insolvenza li ppreviena l-applikazzjoni tar-responsabbiltà ambjentali⁵⁰.

61

Bħala parti mill-MAWP għall-perjodu 2017-2020, il-Kummissjoni ffinanzjat studju dwar id-disponibbiltà ta’ poloz tal-assigurazzjoni u d-domanda għalihom fl-Istati Membri⁵¹. Dan l-istudju sab li l-poloz tal-assigurazzjoni għar-responsabbiltajiet tal-ELD, jiġifieri l-aktar strument popolari għas-sigurtà finanzjarja, ma kinux disponibbli b’mod wiesa’ madwar l-UE, u f’xi wħud mill-Istati Membri ma kinux jeżistu. Huwa sab ukoll li d-disponibbiltà mhux neċessarjament kienet tikkorrispondi mad-domanda, u li kien hemm pajjiżi fejn id-disponibbiltà kienet għolja, iżda d-domanda kienet baxxa. Madankollu, l-istudju wera wkoll li fl-Istati Membri fejn is-sigurtà finanzjarja għar-responsabbiltajiet tal-ELD kienet obbligatorja, l-obbligu ta spinta lill-iżvilupp tas-suq tal-assigurazzjoni.

62

Fil-programm ta’ ħidma tagħha għall-perjodu 2021-2024, il-Kummissjoni qed tippjana li twettaq studju ta’ segwitu biex teżamina t-trikkib bejn il-leġiżlazzjoni nazzjonali preeżistenti dwar ir-responsabbiltà ambjentali u l-applikazzjoni tal-ELD f’kull Stat Membru. Hija tippjana wkoll li tinkoraġġixxi lill-Istati Membri li ma introduċewx sigurtà finanzjarja obbligatorja għar-responsabbiltajiet tal-ELD biex iqisu l-estensjoni tar-rekwiżiti ta’ sigurtà finanzjarja obbligatorji eżistenti biex jinkludu rekwiżiti għal responsabbiltajiet taħt l-ELD u biex iqisu l-impożizzjoni ta’ responsabbiltà sekondarja fuq persuni oħra bħal diretturi u uffiċjali, kif ukoll kumpaniji omm⁵².

L-UE ffinanzjat proġetti ta’ rimedjazzjoni ambjentali

63

Jenħtieġ li l-awtoritajiet tal-Istati Membri jiżguraw li kull meta jkun possibbli, min iniġġes iġarrab l-ispejjeż relatati mat-tniġġis ikkawżat minnu. Il-linji gwida tal-UE dwar l-użu tal-fondi pubbliċi għall-protezzjoni ambjentali⁵³ jispeċifikaw il-kundizzjonijiet li taħthom tali investiment huwa possibbli fir-rigward tal-PPP:

Għat-tnaqqis tat-tniġġis mill-emissjonijiet industrijali, il-finanzjament pubbliku huwa permess meta l-investiment ikun intenzjonat biex jaqbeż l-istandards tal-UE jew iżid il-protezzjoni ambjentali fin-nuqqas ta’ kwalunkwe standard bħal dan (il-paragrafu 23). Il-finanzjament pubbliku huwa permess ukoll għat-tħejjija ta’ standards futuri tal-UE;
Għat-tindif ta’ siti kontaminati, il-finanzjament pubbliku huwa permess meta min iniġġes ma jkunx ġie identifikat jew ma jkunx jista’ jinżamm legalment responsabbli għall-finanzjament tar-rimedjazzjoni;
Għall-proġetti tal-immaniġġjar tal-iskart, il-finanzjament pubbliku ma jistax jintuża biex operatur li jiġġenera l-iskart jiġi permess li jinħeles mill-ispiża tat-trattament tiegħu.

64

Biex nivverifikaw l-applikazzjoni tal-PPP meta proġetti jiġu kofinanzjati minn fondi tal-UE, aħna analizzajna 42 proġett (il-Figura 12) b’valur ta’ EUR 180 miljun mill-Fondi Strutturali u ta’ Investiment Ewropej (SIE) u mill-programm LIFE. Il-proġetti kienu jinsabu fi 8 reġjuni fi 3 Stati Membri - 19 fl-Italja, 10 fil-Polonja u 13 fil-Portugall. Aħna rrieżaminajna jekk, meta ffinanzjat dawn il-proġetti, l-awtorità responsabbli kinitx qieset l-applikazzjoni tal-PPP, notevolment billi fittxet li tidentifika lil min iniġġes, billi talbet il-konteniment tat-tniġġis u d-dekontaminazzjoni taż-żona kkonċernata, u billi tat bidu għal proċeduri biex tirkupra l-fondi pubbliċi li ntefqu.

Il-fondi tal-UE ntużaw biex jitnaddaf it-tniġġis orfni

65

It-tniġġis orfni huwa tniġġis li seħħ fil-passat u fejn il-PPP ma jistax jiġi applikat minħabba li min iniġġes jew mhuwiex magħruf, jew ma għadux jeżisti jew inkella ma jistax jinżamm responsabbli. L-ELD tirrikonoxxi dan u tapplika biss għat-tniġġis li seħħ wara l-2007. L-aktar sorsi sinifikanti ta’ tniġġis orfni huma attivitajiet industrijali preċedenti, li kkontaminaw il-ħamrija b’metalli, qatran u sustanzi perikolużi oħra⁵⁴.

66

Mit-42 proġett li eżaminajna, 20 huma relatati ma’ tniġġis orfni (b’baġit ta’ EUR 62.1 miljun). F’dawn il-każijiet, il-PPP ma setax jiġi applikat u kienu ntużaw fondi pubbliċi, kif jidher fil-Kaxxa 2.

Kaxxa 2

It-tniġġis orfni fil-Portugall u fl-Italja fejn il-PPP ma japplikax

Fl-2011, il-Portugall elenka 175 minjiera abbandunata li kienu jirrikjedu dekontaminazzjoni estensiva minħabba li kien fihom sulfur metalliku jew minerali radjuattivi. Aħna eżaminajna tliet proġetti ffinanzjati mill-FSIE relatati ma’ minjieri abbandunati, u li kienu joperaw bejn is-seklu 19 u s-seklu 20. Bejn l-2015 u l-2021, il-kontribuzzjoni ppjanata mill-UE tammonta għal EUR 9.1 miljun. Il-proġetti jinvolvu r-riabilitazzjoni tal-minjieri u taż-żoni tal-madwar. Peress li l-attivitajiet ta’ estrazzjoni seħħew għexieren ta’ snin ilu, ebda operatur ma jista’ jinżamm responsabbli, billi dawn jew ma għadhomx jeżistu u ma għadhomx responsabbli, jew inkella ma kellhom ebda obbligu legali li jiddekontaminaw l-art meta kienu joperaw.

Aħna eżaminajna proġett li ġie ffinanzjat mill-ESI, b’valur ta’ EUR 1.9 miljun, biex tiġi ddekontaminata biċċa art fil-Puglia (l-Italja) li preċedentement kienet okkupata minn impjant tal-enerġija tal-gass li kien jopera bejn nofs is-seklu 19 u s-snin 60. L-impjant ikkontamina madwar 20 000 m² ta’ art u ilma ta’ taħt l-art b’metalli, idrokarburi, asbestos u sustanzi oħra perikolużi. Il-muniċipalità għandha s-sjieda tal-art u kellha parti mill-kumpanija li kienet topera l-impjant. L-awtoritajiet Taljani wettqu analiżi ambjentali bejn l-1999 u l-2004; wara, huma naddfu l-ħamrija u attwalment qed inaddfu l-akwifer. Ebda leġiżlazzjoni ambjentali ma ppreveniet lill-impjant milli jniġġes waqt li kien qed jopera.

Il-fondi tal-UE ntużaw ukoll meta l-awtoritajiet nazzjonali naqsu milli jinfurzaw il-leġiżlazzjoni ambjentali u jġiegħlu lil min iniġġes iħallas

67

Aħna identifikajna 8 proġetti f’Campania fl-Italja li rċevew EUR 27.2 miljun f’fondi tal-UE biex inaddfu t-tniġġis li seħħ meta l-leġiżlazzjoni ambjentali tal-UE kienet diġà fis-seħħ. L-operaturi responsabbli għal-landfills għall-iskart muniċipali ma kinux konformi mal-leġiżlazzjoni ambjentali fis-seħħ. L-awtoritajiet pubbliċi responsabbli għas-sorveljanza ta’ dawn is-siti ma obbligawx lil dawn l-operaturi biex inaddfu t-tniġġis li kkawżaw. Dan l-użu tal-finanzjament mill-UE ma jirrispettax il-PPP, kif jidher fil-Kaxxa 3.

Kaxxa 3

Nuqqas ta’ infurzar tal-leġiżlazzjoni ambjentali li jwassal għan-nuqqas ta’ applikazzjoni tal-PPP f’reġjun Taljan

Fl-2007, il-QĠUE⁵⁵ ddeċidiet li, għal għadd ta’ landfills, l-Italja ma kinitx ikkonformat mar-regoli tal-UE dwar l-iskart tal-landfills fuq perjodu ta’ żmien twil, u kkawżat dannu sinifikanti lill-ambjent.

Il-muniċipalitajiet jew il-kumpaniji tal-utilitajiet bi sjieda pubblika kienu joperaw it-tmien landfills li eżaminajna, li minnhom erbgħa kienu koperti mid-deċiżjoni msemmija hawn fuq, għall-ġbir ta’ skart solidu urban bejn is-snin 70 u l-bidu tas-snin 2000. Madankollu, huma ma rrispettawx ir-rekwiżiti ambjentali tal-UE li kienu fis-seħħ, u dan ikkawża dannu ambjentali serju. Il-kontribuzzjoni mill-Fond SIE ppjanata għat-8 proġetti ta’ rimedjazzjoni tal-landfills f’Campania fil-perjodu ta’ programmazzjoni 2014-2020 kienet tammonta għal EUR 27.2 miljun.

Pereżempju, waħda mil-landfills ma kinitx mgħammra biex tipproteġi l-ħamrija, il-wiċċ tal-ilma ta’ taħt l-art jew l-arja mit-tniġġis. L-operatur ma pproteġiex is-sit kontra r-rimi illegali ta’ skart, inkluż dak perikoluż, la matul l-operat u lanqas wara l-għeluq. L-awtoritajiet Taljani użaw EUR 2.2 miljun f’fondi tal-UE biex jiddekontaminaw is-sit fl-2017 u fl-2018, u wara dan il-Kummissjoni qieset is-sit tal-landfill preċedenti bħala konformi mal-leġiżlazzjoni ambjentali tal-UE.

In-nuqqas ta’ sigurtà finanzjarja biex tkopri r-responsabbiltà ambjentali jżid ir-riskju li l-ispejjeż jiġġarrbu mill-kontribwenti

68

Meta l-operaturi ma jkollhomx sigurtà finanzjarja suffiċjenti, jista’ jkun li ma jkunux jistgħu jkopru l-ispiża tar-rimedjazzjoni tat-tniġġis li jkunu kkawżaw (il-paragrafi 56-62). Aħna sibna 4 proġetti ta’ rimedjazzjoni bħal dawn, b’valur ta’ EUR 33 miljun, fejn operatur, identifikat bħala l-parti responsabbli għat-tniġġis, kien falla. B’riżultat ta’ dan, kellhom jintużaw fondi pubbliċi biex il-ħamrija u l-ilma jiġu ddekontaminati. Dan ma jirrispettax il-PPP, kif jidher fil-Kaxxa 4.

Kaxxa 4

Eżempji ta’ nuqqas ta’ sigurtà finanzjarja li wassal għal nuqqas ta’ applikazzjoni tal-PPP

Fl-1995, ftit snin wara li waqqfet il-produzzjoni, kumpanija li tipproduċi prodotti tal-asbestos fl-Italja ddikjarat stat ta’ falliment. Qabel ma bdiet il-proċedura ta’ likwidazzjoni, il-kumpanija kienet bdiet azzjoni ta’ tindif għad-dannu ambjentali kkawżat mill-produzzjoni tagħha, fuq talba tal-Ministeru Taljan tal-Ambjent. Madankollu, hekk kif bdew il-proċedimenti ta’ falliment, l-amministratur tal-falliment waqqaf il-finanzjament għar-rimedjazzjoni. B’riżultat ta’ dan, l-awtoritajiet pubbliċi reġjonali komplew id-dekontaminazzjoni. Il-proġett li awditjajna rċieva EUR 7.1 miljun f’appoġġ mill-UE. Dan kien jinvolvi t-twaqqigħ ta’ bini ’l fuq mil-livell tal-pjan terran u l-iżgurar li l-materjali li kien fihom l-asbestos u li kienu maħżuna taħt l-art ikunu sikuri. L-awtoritajiet ikkompletaw ix-xogħol fl-2019. Huma nedew proċedimenti legali biex jirkupraw il-fondi użati għall-operazzjoni ta’ tindif iżda jqisu li jista' jkun li ma jirnexxilhomx jirkupraw il-flus minn kumpanija li għaddejja minn proċedimenti ta’ falliment.

Fil-Polonja, l-awtoritajiet ambjentali sabu sustanzi tossiċi fl-ilma ta’ taħt l-art u fil-ħamrija fejn kien jinsab impjant kimiku. It-tniġġis tal-ilma ta’ taħt l-art joħloq riskju għas-saħħa tar-residenti fil-qrib u jista’ jinfirex għal żona Natura 2000. Fl-2000, l-awtoritajiet reġjonali bdew proċedura ta’ azzjoni ta’ rimedjazzjoni kontra l-kumpanija tal-kimika li naqset milli tiddekontamina s-sit. Fl-2014, il-kumpanija ddikjarat falliment u bdiet proċedimenti ta’ likwidazzjoni. L-awtoritajiet ippreżentaw talba matul il-proċedimenti ta’ insolvenza fl-2016, iżda l-amministratur tal-falliment ma ħa ebda azzjoni ta’ rimedjazzjoni u biegħ partijiet tal-installazzjonijiet li kienu qed jipprevienu r-rilaxx ta’ sustanzi kimiċi.

Skont l-awtoritajiet, l-infrastruttura qed tkompli tiddeterjora u t-tniġġis qed ikompli jinfirex, u d-deċiżjoni legali li timponi miżuri preventivi jew ta’ rimedju tista’ tkun impossibbli li tiġi infurzata minħabba l-falliment. B’riżultat ta’ dan, l-awtoritajiet użaw fondi pubbliċi, inklużi EUR 17.3 miljun mill-FSIE, biex jirrimedjaw id-dannu ambjentali fl-ewwel żona ta’ 27 ettaru. L-awtoritajiet jistmaw li t-tniġġis ikopri ftit eluf ta’ ettari u li l-ispiża totali tar-rimedjazzjoni tista’ taqbeż il-EUR 540 miljun.

Konklużjonijiet u rakkomandazzjonijiet

69

Il-Prinċipju ta’ Min Iniġġes Iħallas (PPP) huwa l-bażi tal-politika ambjentali tal-UE u jirrikjedi li jenħtieġ li min iniġġes iġarrab l-ispejjeż relatati mat-tniġġis ikkawżat minnu, inkluż l-ispiża tal-miżuri meħuda għall-prevenzjoni, għall-kontroll u għar-rimedjazzjoni tat-tniġġis kif ukoll l-ispejjeż li dan jimponi fuq is-soċjetà.

70

Aħna eżaminajna l-qafas ta’ politika tal-UE għall-PPP, billi ffukajna fuq l-applikazzjoni tiegħu għall-oqsma ta’ politika ambjentali tal-UE, l-azzjonijiet tal-Kummissjoni relatati mad-Direttiva dwar ir-Responsabbiltà Ambjentali (ELD), u jekk il-baġit tal-UE kienx protett milli jġarrab spejjeż li kellhom jitħallsu minn min iniġġes.

71

B’mod ġenerali, aħna sibna li l-PPP huwa rifless f’diversi livelli fil-politiki ambjentali differenti tal-UE u li l-kopertura u l-applikazzjoni tiegħu ma kinux kompleti. L-azzjonijiet tal-Kummissjoni biex tappoġġa l-implimentazzjoni tal-ELD min-naħa tal-Istati Membri ma kinux solvew id-dgħufijiet ewlenin. Xi drabi, il-baġit tal-UE jintuża biex jiffinanzja azzjonijiet ta’ tindif li, skont il-PPP, kellhom jiġġarrbu minn min iniġġes.

72

Il-PPP jiġi applikat b’mod differenti fil-politiki ambjentali differenti tal-UE. Fir-rigward tal-emissjonijiet industrijali, aħna kkonkludejna li l-PPP jiġi applikat għall-installazzjonijiet industrijali li jniġġsu l-aktar, li huma koperti mid-Direttiva dwar l-Emissjonijiet Industrijali (IED). Is-sidien tal-installazzjonijiet iridu jġarrbu l-ispiża tal-konformità mal-kundizzjonijiet tal-permessi tagħhom, inkluż billi jieħdu miżuri biex jillimitaw l-emissjonijiet taħt il-limiti tal-emissjonijiet. L-IED ma tapplikax għal installazzjonijiet iżgħar u ma tirrikjedix li l-installazzjonijiet ikopru l-ispiża tat-tniġġis residwu għas-soċjetà (il-paragrafi 20-25). Għalkemm il-leġiżlazzjoni tal-UE dwar l-iskart tirrikjedi li l-Istati Membri japplikaw il-PPP bis-sħiħ, id-diskrepanza fil-finanzjament għadha wiesgħa u huma meħtieġa investimenti pubbliċi sinifikanti biex jintlaħqu l-miri għar-riċiklaġġ (il-paragrafi 26-31). Filwaqt li kien sar progress fl-indirizzar ta’ sustanzi niġġiesa speċifiċi, għal ħafna intrapriżi l-prezz tal-ilma ma jkoprix l-ispejjeż imposti minħabba s-sustanzi niġġiesa li dawn jirrilaxxaw fl-ilma. L-irkupru tal-ispiża tas-servizzi tal-ilma huwa diffiċli biex jiġi applikat għal tniġġis li joriġina minn sorsi diffużi, pereżempju mill-agrikoltura (il-paragrafi 32-38). Ma hemm l-ebda qafas ġenerali tal-UE għall-protezzjoni tal-ħamrija, għalkemm ħafna partijiet tal-leġiżlazzjoni jikkontribwixxu indirettament għat-tnaqqis tal-pressjonijiet ambjentali (il-paragrafi 39-41).

Rakkomandazzjoni 1 – Jiġi vvalutat l-ambitu għat-tisħiħ tal-integrazzjoni tal-Prinċipju ta’ Min Iniġġes Iħallas fil-leġiżlazzjoni ambjentali

Jenħtieġ li l-Kummissjoni tivvaluta l-bidliet regolatorji u amministrattivi kif ukoll l-ispejjeż imqabbla mal-benefiċċji kumplessivi fir-rigward tal-applikazzjoni aħjar tal-Prinċipju ta’ Min Iniġġes Iħallas, b’mod partikolari:

it-tnaqqis tal-limiti tal-emissjonijiet biex it-tniġġis residwu jkompli jitnaqqas;
l-indirizzar tat-tniġġis tal-ilma diffuż mis-sorsi kollha, inkluż mill-agrikoltura.

Data mmirata għall-implimentazzjoni: tmiem l-2024

73

L-ELD tistabbilixxi l-qafas tal-UE għar-responsabbiltà ambjentali, ibbażat fuq il-PPP. Aħna sibna li l-ELD tipprevedi applikazzjoni parzjali tal-PPP f’każ ta’ dannu ambjentali. L-aktar data reċenti disponibbli dwar l-implimentazzjoni tal-ELD, għalkemm mhux kompleta, tindika lakuni fl-implimentazzjoni tal-ELD fl-Istati Membri kollha (il-paragrafi 44-48). L-ELD ma tiddefinixxix xi kunċetti ewlenin b’mod ċar, li jirriżultaw f’interpretazzjonijiet u applikazzjonijiet differenti fil-livell tal-Istati Membri (il-paragrafi 49-55). In-nuqqas ta’ sigurtà finanzjarja obbligatorja fil-livell tal-UE jfisser li fil-prattika l-kontribwenti jħallsu għall-ispejjeż tar-rimedjazzjoni meta operatur li jikkawża dannu ambjentali jsir insolventi (il-paragrafi 56-62). Aħna kkonkludejna li l-azzjonijiet tal-Kummissjoni sa issa ma rnexxielhomx jindirizzaw in-nuqqasijiet tal-ELD.

Rakkomandazzjoni 2 – Jitqies li tiġi rinforzata l-applikazzjoni tad-Direttiva dwar ir-Responsabbiltà Ambjentali

Aħna nirrakkomandaw li, permezz tal-evalwazzjoni tad-Direttiva dwar ir-Responsabbiltà Ambjentali li mistennija ssir sa April 2023, il-Kummissjoni teżamina l-ambitu biex:

ittejjeb il-kriterji għad-definizzjoni tad-dannu ambjentali li għalih jenħtieġ li tapplika d-Direttiva;
tagħmel aktar użu minn strumenti li jipprovdu sigurtà finanzjarja.

Data mmirata għall-implimentazzjoni: tmiem l-2023

74

Aħna sibna li l-UE tiffinanzja proġetti li kellhom jitħallsu minn min iniġġes (il-paragrafi 63-68). F’każijiet ta’ tniġġis orfni, meta l-entità responsabbli ma setgħetx tiġi identifikata jew tinżamm responsabbli, l-użu tal-finanzjament pubbliku kien ġustifikabbli u meħtieġ biex tiġi rimedjata s-sitwazzjoni (il-paragrafi 65-66). Il-finanzjament jintuża wkoll meta l-awtoritajiet responsabbli jkunu naqsu milli jinfurzaw il-leġiżlazzjoni ambjentali fi żmien debitu (il-paragrafu 67). In-nuqqas ta’ sigurtà finanzjarja biex tiġi koperta r-responsabbiltà ambjentali ġiegħel ukoll lill-awtoritajiet biex jużaw fondi pubbliċi biex jirrestawraw żoni mniġġsa, meta min iniġġes kien insolventi (il-paragrafu 68).

Rakkomandazzjoni 3 – Jiġu protetti l-fondi tal-UE milli jintużaw għal finanzjament ta’ proġetti li jenħtieġ li jiġu ffinanzjati minn min iniġġes

Jenħtieġ li l-Kummissjoni:

fil-kapaċità superviżorja tagħha, tagħmel l-użu mill-fondi tal-UE għal azzjonijiet ta’ tindif tat-tniġġis kundizzjonali fuq kontrolli, f’kollaborazzjoni mal-Istati Membri, li jivverifikaw li l-awtoritajiet rilevanti ħadu l-passi kollha meħtieġa biex min iniġġes iħallas għat-tniġġis li huwa jkun responsabbli għalih;
teżamina l-ambitu għal bidliet leġiżlattivi li jirrikjedu l-użu ta’ sigurtà finanzjarja għal riskji ambjentali għall-operaturi.

Data mmirata għall-implimentazzjoni: 2025

Dan ir-Rapport ġie adottat mill-Awla I, immexxija mis-Sur Samo Jereb, Membru tal-Qorti tal-Awdituri, fil-Lussemburgu fil-laqgħa tagħha tad-19 ta’ Mejju 2021.

Għall-Qorti tal-Awdituri

Klaus-Heiner Lehne
Il-President

Anness

Anness I – Setturi koperti mid-Direttiva dwar l-Emissjonijiet Industrijali

Id-Direttiva dwar l-Emissjonijiet Industrijali tapplika għas-setturi li ġejjin. F’xi wħud mis-setturi, hija tkopri biss installazzjonijiet li jaqbżu ċertu daqs.

L-industriji tal-enerġija: kombustjoni ta’ karburanti f’installazzjonijiet, raffinar taż-żejt minerali u l-gass, produzzjoni tal-kokk, u gassifikazzjoni jew tidwib ta’ faħam u karburanti oħrajn
Il-produzzjoni u l-ipproċessar tal-metalli: xiwi jew tagħqid bis-sħana tal-minerali tal-metall, produzzjoni ta’ ħadid mill-forġa jew azzar, u pproċessar tal-metalli tal-ħadid u mhux tal-ħadid
L-industrija minerarja: produzzjoni ta’ siment, ġir u ossidu tal-manjesju, u asbestos, manifattura ta’ prodotti bbażati fuq l-asbestos, u ħġieġ, tidwib ta’ sustanzi minerali, u manifattura bin-nar ta’ prodotti taċ-ċeramika
L-industrija tal-kimika: produzzjoni ta’ kimiċi organiċi u inorganiċi, fertilizzanti, prodotti għall-protezzjoni tal-pjanti jew bijoċidi, prodotti farmaċewtiċi, u splussivi
L-immaniġġjar tal-iskart: rimi jew irkupru ta’ skart perikoluż, skart f’impjanti tal-inċinerazzjoni jew tal-koinċinerazzjoni, u skart mhux perikoluż, u mmaniġġjar ta’ landfills
Il-produzzjoni ta’ polpa minn injam jew materjali fibrużi oħra, kif ukoll karta u kartun, u pannelli tal-injam
It-trattament minn qabel jew it-tiżbigħ ta’ fibri/tessuti
L-ikkunzar tal-ġlud
L-iskarnar tal-annimali, u t-trattament u l-ipproċessar ta’ prodotti tal-ikel minn materja prima tal-annimali u veġetali
It-tneħħija jew ir-riċiklaġġ ta’ karkassi u skart tal-annimali
It-trobbija intensiva tat-tjur jew tal-ħnieżer
It-trattament fil-wiċċ ta’ sustanzi, oġġetti jew prodotti bl-użu ta’ solventi organiċi
Il-produzzjoni ta’ faħam jew elettrografit permezz ta’ ħruq jew grafitizzazzjoni
Il-qbid ta’ nixxigħat tad-diossidu tal-karbonju għall-finijiet ta’ ħżin ġeoloġiku
Il-preservazzjoni ta’ injam u prodotti tal-injam b’kimiċi
It-trattament indipendenti tal-ilma mormi f’ċirkustanzi speċifiċi

Akronimi u abbrevjazzjonijiet

BAT: L-Aqwa Tekniki Disponibbli

EEA: L-Aġenzija Ewropea għall-Ambjent

ELD: Id-Direttiva dwar ir-Responsabbiltà Ambjentali

EPR: Responsabbiltà Estiża tal-Produttur

FSIE: Il-Fondi Strutturali u ta’ Investiment Ewropej

IED: Id-Direttiva dwar l-Emissjonijiet Industrijali

IMPEL: Implimentazzjoni u Infurzar tal-Liġi Ambjentali

MAWP: Programm ta’ Ħidma Pluriennali

OECD: L-Organizzazzjoni għall-Kooperazzjoni u l-Iżvilupp Ekonomiċi

PPP: Il-Prinċipju ta’ Min Iniġġes Iħallas

WFD: Id-Direttiva Qafas dwar l-Ilma

Glossarju

Azzjoni klimatika: Azzjoni biex jiġi indirizzat it-tibdil fil-klima u l-impatt tiegħu.

Fertilizzant: Kwalunkwe sustanza (sintetika jew organika) li fiha nutrijent wieħed jew aktar tal-pjanti u li tiġi applikata fil-ħamrija biex iżżomm jew ittejjeb il-fertilità.

Fond ta’ Koeżjoni: Fond tal-UE għat-tnaqqis tad-disparitajiet ekonomiċi u soċjali fl-UE bil-finanzjament ta’ investimenti fl-Istati Membri fejn l-introjtu nazzjonali gross għal kull abitant ikun inqas minn 90 % tal-medja tal-UE.

Il-Fond Ewropew għall-Iżvilupp Reġjonali (FEŻR): Fond tal-UE li jsaħħaħ il-koeżjoni ekonomika u soċjali fl-UE billi jiffinanzja investimenti li jnaqqsu l-iżbilanċi bejn ir-reġjuni.

Il-Prinċipju ta’ Min Iniġġes Iħallas: Il-prinċipju li jirrikjedi li jenħtieġ li min iniġġes iġarrab l-ispejjeż tat-tniġġis ikkawżat minnu, inkluż l-ispiża tal-miżuri meħuda għall-prevenzjoni, għall-kontroll u għar-rimedjazzjoni tat-tniġġis kif ukoll l-ispejjeż li dan jimponi fuq is-soċjetà.

Internalizzazzjoni: Miżuri meħuda biex il-benefiċċji jew l-ispejjeż mhux imħallsa jittieħdu inkunsiderazzjoni fil-kompożizzjoni tal-prezzijiet tal-oġġetti u s-servizzi.

L-Aqwa Tekniki Disponibbli (BAT): Teknoloġija industrijali, tfassil ta’ installazzjoni u miżuri operazzjonali bl-aħjar prestazzjoni ambjentali, kif determinati permezz ta’ evalwazzjoni tal-aħjar prattiki hekk kif jevolvu matul iż-żmien. Użati biex jistabbilixxu valuri ta’ limitu tal-emissjonijiet u kundizzjonijiet tal-permessi.

LIFE: L-istrument finanzjarju li jappoġġa l-implimentazzjoni tal-politika ambjentali u klimatika tal-UE permezz tal-kofinanzjament ta’ proġetti fl-Istati Membri.

Limitu tal-emissjonijiet: Il-massa, espressa f’termini ta’ ċerti parametri speċifiċi, konċentrazzjoni u/jew livell ta’ emissjoni, li ma jistgħux jinqabżu matul perjodu wieħed jew aktar ta’ żmien.

Politika Agrikola Komuni: Il-politika unika u unifikata tal-UE dwar l-agrikoltura, li tinkludi sussidji u firxa ta’ miżuri oħra maħsuba biex jiggarantixxu s-sigurtà alimentari, jiżguraw standard tal-għajxien ġust għall-bdiewa tal-UE, jippromwovu l-iżvilupp rurali u jipproteġu l-ambjent.

Responsabbiltà Estiża tal-Produttur (EPR): Approċċ li jżid l-istadju ta’ wara l-użu mill-konsumatur ta’ ċiklu tal-ħajja ta’ prodott, inkluż ir-riċiklaġġ u r-rimi, mar-responsabbiltajiet ambjentali tal-produttur.

Responsabbiltà għad-dannu ambjentali: L-operaturi ekonomiċi li jagħmlu ħsara lill-ambjent huma responsabbli li jħallsu għar-rimedjazzjoni tagħha.

Sigurtà finanzjarja: Kwalunkwe strument finanzjarju, bħal polza tal-assigurazzjoni, kontribuzzjoni għal fond ambjentali, garanzija bankarja, bond, jew riżerva proprja, li jiżgura li kumpanija tkun tista’ tissodisfa l-obbligu finanzjarju tagħha fil-każ ta’ responsabbiltà.

Risposti tal-Kummissjoni

Sommarju eżekuttiv

I

Il-Kummissjoni tfakkar li l-Patt Ekoloġiku Ewropew jenfasizza li huwa biss bl-użu sħiħ tal-ipprezzar u ta’ riformi tat-taxxa mfassla tajjeb li l-Ewropa tista’ tilħaq l-objettivi ambjentali tagħha b’mod effiċjenti u ġust. Ispirata mill-Patt Ekoloġiku Ewropew, il-Kummissjoni se taħdem biex issaħħaħ l-implimentazzjoni tal-Prinċipju ta’ Niġġes Iħallas (PPP) fil-liġi tal-Unjoni Ewropea u fil-politiki nazzjonali korrispondenti sabiex tgħin biex tintlaħaq l-ambizzjoni tal-UE ta’ tniġġis żero għal ambjent mingħajr tossiċità u biex tappoġġa l-politiki dwar il-klima, l-enerġija u l-ekonomija ċirkolari.

III

Ir-raba’ inċiż - Il-Kummissjoni tqis li l-konklużjonijiet u r-rakkmandazzjonijiet huma rilevanti għall-Parlament Ewropew u għall-Kunsill peress li għandhom kompetenza sinifikanti fl-applikazzjoni tal-PPP u fl-implimentazzjoni tar-Riforma tat-Taxxa Ambjentali (ETR, Environmental Tax Reform).

IV

Il-Kummissjoni tfakkar li filwaqt li qed tagħmel sforzi biex tapplika l-PPP fil-politika ambjentali, wieħed mill-istrumenti ewlenin biex jinkiseb dan, jiġifieri t-taxxi, normalment huwa soġġett għall-unanimità fil-kodeċiżjoni. Għalhekk, l-applikazzjoni sħiħa teħtieġ l-involviment tal-Istati Membri.

Fir-rigward tad-Direttiva dwar ir-Responsabbiltà Ambjentali (ELD, Environmental Liability Directive), azzjoni ewlenija tal-Kummissjoni, l-adozzjoni tal-Linji Gwida dwar fehim komuni tal-ħsara ambjentali, ġiet kompluta biss f’Marzu 2021 wara konsultazzjonijiet estensivi. Għalhekk, huwa prematur li wieħed jikkonkludi li ma rnexxilux isolvi dgħufija ewlenija. Rigward in-nuqqas ta’ sigurtà finanzjarja mandatorja, il-Kummissjoni taqbel li l-kwistjoni tas-sigurtà finanzjarja għadha tħassib leġittimu u se tħares lejn dan mill-qrib fil-kuntest tal-evalwazzjoni mistennija sa April 2023.

Il-baġit tal-UE xi drabi huwa ġġustifikat fl-użu tiegħu biex jiffinanzja azzjonijiet ta’ tindif.

V

L-ewwel inċiż - Il-Kummissjoni taċċetta l-ħtieġa li teżamina kif il-PPP jiġi applikat fit-twettiq tal-impenji tal-Patt Ekoloġiku Ewropew. Il-Kummissjoni taċċetta r-rakkomandazzjoni 1.a, u parzjalment taċċetta r-rakkomandazzjoni 1.b fir-rigward tal-kompetenzi li jaqgħu taħt ir-responsabbiltà tagħha.

It-tieni inċiż - Il-Kumissjoni taċċetta din ir-rakkomandazzjoni.

L-evalwazzjoni tal-ELD se teżamina l-ambitu biex il-PPP jiġi applikat aħjar.

It-tielet inċiż - Il-Kumissjoni taċċetta din ir-rakkomandazzjoni.

Il-Kummissjoni se tiżgura li d-dritt applikabbli tal-UE jiġi rispettat fir-rigward tal-passi li huma meħtieġa sabiex min iniġġes ikollu jħallas għat-tniġġis li hu responsabbli għalih u se tiżgura li l-Istati Membri jkunu konxji mill-obbligi tagħhom f’dan ir-rigward.

Introduzzjoni

03

L-Organizzazzjoni għall-Kooperazzjoni u l-Iżvilupp Ekonomiċi (OECD) tqis l-istrumenti tal-ipprezzar inklużi t-taxxi ambjentali bħala għodda importanti għat-twettiq tal-PPP. Dan jinkludi l-imposti, l-intaxxar tat-tniġġis li huwa permess, ir-responsabbiltà ambjentali u l-eliminazzjoni gradwali ta’ sussidji li jagħmlu ħsara lill-ambjent.

04

Il-PPP jkopri wkoll l-impatti fuq is-soċjetà u fuq il-benesseri.

06

Il-Kummissjoni tqis l-applikazzjoni tal-Prinċipju Min Iniġġes Iħallas f’oqsma oħra li jaffettwaw l-ambjent, eż. it-trasport, is-sajd u l-politika agrikola.

Il-Kummissjoni tqis li l-PPP huwa implimentat fil-Politika Agrikola Komuni (PAK) permezz ta’, fost l-oħrajn, is-sistema ta’ sanzjonijiet tal-kundizzjonalità 1 fejn it-tnaqqis tal-pagamenti tal-PAK huwa applikat meta l-bdiewa ma jirrispettawx il-liġi rilevanti applikabbli tal-UE dwar l-ambjent u l-klima inklużi ċerti regoli statutorji (eż. id-Direttiva dwar in-Nitrati).

Barra minn hekk, il-PAK jista’ jappoġġa direttament prattiki, investimenti, eċċ. għall-ambjent u l-klima, li jikkumpensaw biss l-azzjonijiet li jmorru lil hinn mill-obbligi legali rilevanti.

07

L-Istati Membri għandhom kompetenza sinifikanti biex jiddeċiedu jekk u kif għandhom japplikaw il-PPP f’konformità mal-prinċipju tas-sussidjarjetà, jiġifieri li l-miżuri ta’ politika jiġu deċiżi f’livell kemm jista’ jkun qrib iċ-ċittadin u għalhekk fil-livell tal-Unjoni biss fejn meħtieġ. Il-Kummissjoni qed tappoġġa lill-Istati Membri fir-riforma tat-taxxa u fl-eliminazzjoni gradwali ta’ sussidji li jagħmlu ħsara lill-ambjent.

08

Ir-raba’ inċiż - Il-Kummissjoni tfakkar li d-dannu ambjentali jinkludi mhux biss id-dannu lir-riżorsa naturali nnifisha (jiġifieri l-ispeċijiet protetti u l-ħabitats naturali; l-ilma; u l-art) iżda wkoll l-indeboliment ta’ servizzi tar-riżorsi naturali pprovduti mir-riżorsa.

10

Ir-Rieżami tal-Implimentazzjoni Ambjentali (EIR, Environmental Implementation Review) huwa għodda bil-għan li ttejjeb l-implimentazzjoni tal-liġi u l-politika ambjentali tal-UE. Għandu l-għan li jindirizza l-kawżi tan-nuqqasijiet fl-implimentazzjoni u jipprova jsib soluzzjonijiet qabel il-problemi jsiru urġenti.

11

Il-ħtiġijiet ta’ investiment biex titwettaq it-tranżizzjoni ekoloġika jeħtieġu investiment addizzjonali biex jintlaħqu l-miri attwali tal-politika tal-UE dwar il-klima u l-ambjent għall-2030 ta’ madwar EUR 470 biljun fis-sena⁵⁶.

12

L-implimentazzjoni tal-Fondi Strutturali u ta’ Investiment Ewropej (FSIE) issegwi l-prinċipju ta’ kofinanzjament, sabiex tkun żgurata r-responsabbiltà tal-politiki fuq il-post. Il-Fond Ewropew għall-Iżvilupp Reġjonali (FEŻR) u l-Fond ta’ Koeżjoni jikkofinanzjaw, fost l-oħrajn, attivitajiet kemm fis-setturi tal-iskart kif ukoll tal-ilma biex jissodisfaw ir-rekwiżiti tal-acquis ambjentali u rekwiżiti li jmorru lil hinn minn dawk previsti, tali fondi jikkofinanzjaw ukoll investimenti fil-protezzjoni u r-restawr tal-bijodiversità u tal-ħamrija kif ukoll fl-infrastruttura, u investimenti fir-riġenerazzjoni u d-dekontaminazzjoni ta’ siti abbandunati. Barra minn hekk, l-ambitu tal-appoġġ tal-FEŻR jinkludi investimenti f’teknoloġiji innovattivi biex tittejjeb il-protezzjoni ambjentali fis-settur tal-iskart, tal-ilma u fir-rigward tal-ħamrija.

Osservazzjonijiet

21

Id-Direttiva dwar l-Emissjonijiet Industrijali (IED) tippermetti lill-awtoritajiet kompetenti ċerta flessibbiltà biex jistabbilixxu valuri limitu tal-emissjonijiet anqas stretti (l-Artikolu 15(4)). Dan huwa possibbli biss f’każijiet speċifiċi fejn il-valutazzjoni turi li l-kisba ta’ livelli ta’ emissjonijiet assoċjati mal-Aħjar Metodi Tekniċi Disponibbli (BAT) kif deskritti fil-konklużjonijiet tal-BAT twassal għal spejjeż sproporzjonalment ogħla meta mqabbla mal-benefiċċji ambjentali minħabba l-pożizzjoni ġeografika jew il-kundizzjonijiet ambjentali lokali jew il-karatteristiċi tekniċi tal-installazzjoni. L-awtorità kompetenti għandha dejjem tiddokumenta l-ġustifikazzjoni tagħha għall-għoti ta’ tali derogi.

Barra minn hekk, il-Kapitolu III tal-IED dwar impjanti kbar tal-kombustjoni jinkludi ċerti strumenti ta’ flessibbiltà (Pjan Nazzjonali Tranżizzjonali, deroga għal tul ta’ ħajja limitat, eċċ.).

23

Id-Direttiva dwar ir-Responsabbiltà Ambjentali (ELD) tapplika għad-“dannu ambjentali” li d-definizzjoni tiegħu tinkludi referenzi differenti għas-sinifikat.

24

Il-Kummissjoni tqis li l-PPP huwa inkorporat fl-approċċ kollu tal-IED u jkopri wkoll it-tniġġis fil-limiti legali, peress li dawn il-limiti legali jsiru aktar stretti maż-żmien. L-operaturi għandhom jinvestu, jiġifieri jħallsu sabiex jibqgħu fil-limiti. Il-fatt li l-kundizzjonijiet tal-permess għandhom ikunu bbażati fuq l-Aħjar Metodi Tekniċi Disponibbli (BAT), u li dawn il-BATs jiġu rieżaminati, imsaħħa u aġġornati perjodikament; iwassal lis-setturi industrijali biex jinvestu b’mod kostanti f’tagħmir bi prestazzjoni aħjar u li jniġġes anqas, sabiex jikkonformaw ma’ limiti ta’ emissjonijiet aktar stretti.

L-IED ma teħtieġx li l-installazzjonijiet iħallsu l-impatt fuq is-soċjetà ta’ tniġġis li jkun fil-limiti tal-permess tagħhom.

35

L-Istati Membri għandhom jistabbilixxu politiki tal-ipprezzar tal-ilma li jkollhom inċentivi adegwati biex l-ilma jintuża b’mod effiċjenti u li jinkludu, skont il-PPP, kontribuzzjonijiet adegwati għall-ikrupru tal-ispejjeż tas-servizzi tal-ilma tad-diversi setturi li jużaw l-ilma (hemm ċerta marġni ta’ diskrezzjoni li tippermetti li jitqiesu l-elementi soċjali, ekonomiċi jew ambjentali, eż. tariffi soċjali, tariffi li jqisu l-iskarsezza tal-ilma).

36

Il-Kummissjoni tqis li l-unitajiet domestiċi jġarrbu l-biċċa l-kbira tal-ispiża tal-purifikazzjoni tal-ilma (relatati mal-kontaminazzjoni minn attivitajiet oħra, inkluża l-agrikoltura), filwaqt li l-agrikoltura tuża kwantità kbira ta’ ilma li ma jiġix purifikat. L-applikazzjoni tal-ipprezzar tal-ilma għall-irkupru tal-ispejjeż tas-servizzi (inklużi l-ispejjeż ambjentali) hija “erga omnes”, filwaqt li għall-fini tas-sanzjonar tal-ksur, il-prinċipju ta’ min iniġġes iħallas huwa applikabbli fil-livell ta’ min iniġġes.

38

L-applikazzjoni tal-prinċipju ta’ min iniġġes iħallas hija prinċipalment f’idejn l-Istati Membri, li jridu jintegraw dan il-prinċipju fil-leġiżlazzjonijiet nazzjonali. L-applikazzjoni ta’ multi hija dejjem fil-livell individwali wara l-ksur tar-regoli nazzjonali jew tal-UE.

39

Il-Kummissjoni qed taġġorna l-Istrateġija Tematika tal-UE dwar il-Ħamrija fl-2021 biex tindirizza d-degradazzjoni tal-ħamrija u tal-art b’mod komprensiv u biex tgħin biex tinkiseb in-newtralità fir-rigward tad-degradazzjoni tal-art sal-2030. Il-Pjan ta’ Azzjoni ġdid għal Tniġġis Żero għall-Arja, l-Ilma u l-Ħamrija jagħti ħarsa lejn it-tniġġis tal-ħamrija u r-rimedjazzjoni ta’ siti kontaminati, b’mod partikolari.

Hemm għadd ta’ strumenti u miżuri fil-PAK attwali li jikkontribwixxu għall-implimentazzjoni ta’ attivitajiet li jillimitaw it-tniġġis tal-ħamrija.

40

Għall-installazzjonijiet industrijali li jniġġsu l-aktar, l-IED tipprevedi approċċ integrat għall-prevenzjoni u l-kontroll tal-emissjonijiet fl-arja, fl-ilma u fil-ħamrija, għall-ġestjoni tal-iskart, għall-effiċjenza enerġetika u għall-prevenzjoni tal-aċċidenti.

41

Għal attivitajiet li jniġġsu li seħħew żmien ilu, ir-riskju huwa ogħla li min iniġġes ma jkunx għadu jeżisti, ma jistax jiġi identifikat jew li jkun insolventi. Madankollu, huwa possibbli li jiġi applikat il-prinċipju ta’ min iniġġes iħallas anki f’uħud minn dawn il-każijiet, ċertament meta jkun hemm fis-seħħ liġijiet tal-ħamrija u skemi ta’ responsabbiltà fil-livell nazzjonali. Fir-rigward tad-Direttiva dwar ir-Responsabbiltà Ambjentali, jekk id-dannu ambjentali jirriżulta minn attivitajiet li seħħew “iżda li ma ntemmux qabel” it-30 ta’ April 2007, id-Direttiva għandha tapplika skont il-paragrafu 34 tas-sentenza fil-Kawżi Magħquda C-379/08 u C-380/08.

54

L-Avviż jippreżenta analiżi dettaljata ħafna biex jispjega kif id-dispożizzjonijiet eżistenti għandhom jiġu applikati fil-prattika.

Fir-rigward tal-validità legali tal-avviż, il-Kummissjoni tenfasizza li l-Qorti tal-Ġustizzja biss tista’ tipprovdi interpretazzjoni definittiva tal-ELD u tenfasizza li dan l-avviż jirrappreżenta l-fehim tal-Kummissjoni tal-interpretazzjoni legali korretta tal-ELD.

56

Il-Kummissjoni tqis is-sitwazzjoni deskritta mill-Qorti Ewropea tal-Awdituri bħala riskju serju.

57

Il-Kummissjoni tqis, b’mod simili għall-Qorti Ewropea tal-Awdituri, li aktar ma jkunu kbar l-ispejjeż tar-rimedjazzjoni, aktar ikun kbir ir-riskju li l-operatur ma jkollux ir-riżorsi biex jagħmel tajjeb għal dawn l-ispejjeż mingħajr sigurtà finanzjarja.

60

Il-Kummissjoni tqis, b’mod simili għall-Qorti Ewropea tal-Awdituri, li s-sigurtà finanzjarja obbligatorja għandha tnaqqas ir-riskju li l-ispejjeż jiġu ttrasferiti lejn il-fondi pubbliċi minħabba insolvenza.

63

It-tieni inċiż - Skont l-IED, ir-rapport ta’ bażi huwa l-bażi biex jiġu vvalutati l-attivitajiet ta’ rimedjazzjoni li għandhom jitwettqu mill-operatur mal-waqfien definittiv tal-attività. Skont il-“Gwida tal-Kummissjoni dwar rapporti ta’ bażi skont l-Artikolu 22(2) tad-Direttiva 2010/75/UE dwar emissjonijiet industrijali” (2014/C 136/03), fejn rilevanti, l-istorja tas-sit u t-tniġġis storiku għandhom jiġu inklużi wkoll fir-rapport ta’ bażi; u b’hekk l-attivitajiet ta’ rimedjazzjoni jenħtieġ li jsiru permezz ta’ finanzjament privat.

Konklużjonijiet u rakkomandazzjonijiet

71

Il-Kummissjoni qed taġixxi wkoll biex tappoġġa l-implimentazzjoni tal-PPP mill-Istati Membri, iżda minkejja dan, dan il-prinċipju għadu mhuwiex qed jiġi applikat bis-sħiħ.

72

Huwa f’idejn l-Istati Membri li jiżguraw li t-tniġġis fil-limiti tal-permess tagħhom jiġi pprezzat.

Għall-ilma, hemm spiża tar-riżorsi u spiża tat-tniġġis assoċjati mal-estrazzjoni (żejda).

L-emissjonijiet fil-limiti legali jeħtieġu wkoll investimenti, peress li dawn ir-rekwiżiti legali jsiru aktar stretti maż-żmien.

Ċerti installazzjonijiet iżgħar huma koperti mid-Direttiva dwar l-Impjanti tal-Kombustjoni Medji (MCPD, Medium Combustion Plant Directive) (UE) 2015/2193 dwar il-limitazzjoni tal-emissjonijiet ta’ ċerti sustanzi niġġiesa fl-arja minn impjanti tal-kombustjoni medji. Din id-Direttiva tapplika għal impjanti tal-kombustjoni b’input termali kklassifikat daqs jew akbar minn Megawatt 1 u anqas minn 50 Megawatt irrispettivament mit-tip ta’ karburant li jużaw. Avolja l-PPP mhuwiex imsemmi b’mod espliċitu hemmhekk, l-installazzjonijiet ikkonċernati jiffaċċjaw ukoll prezz fuq it-tniġġis meta jġarrbu l-ispejjeż tal-konformità mar-rekwiżiti tal-MCPD.

Rakkomandazzjoni 1 – Jiġi vvalutat l-ambitu għat-tisħiħ tal-integrazzjoni tal-Prinċipju ta’ Min Iniġġes Iħallas fil-leġiżlazzjoni ambjentali

Il-Kummissjoni taċċetta l-ħtieġa li teżamina kif il-PPP jiġi applikat fit-twettiq tal-impenji tal-Patt Ekoloġiku Ewropew billi twettaq evalwazzjoni tal-applikazzjoni tal-applikazzjoni tiegħu u taħdem mal-Istati Membri dwar l-implimentazzjoni tal-PPP inkluż l-ipprezzar u l-eliminazzjoni gradwali ta’ sussidji li jagħmlu ħsara għall-ambjent.

Il-Kummissjoni taċċetta r-rakkomandazzjoni 1.a.

Il-Kummissjoni se tipproponi reviżjoni tal-miżuri tal-UE li jindirizzaw it-tniġġis minn installazzjonijiet industrijali kbar fil-bidu tal-2022, kif imħabbar fil-Patt Ekoloġiku Ewropew. L-għan tar-reviżjoni huma li jsir progress lejn l-ambizzjoni tal-UE ta’ tniġġis żero għal ambjent ħieles mis-sustanzi tossiċi u li jiġu appoġġati l-politiki dwar il-klima, l-enerġija u l-ekonomija ċirkolari.

Il-Kummissjoni taċċetta r-rakkomandazzjoni 1b parzjalment.

Fil-qafas tal-Patt Ekoloġiku Ewropew, l-Istrateġija mill-Għalqa sal-Platt, l-Istrateġija għall-Bijodiversità u l-Pjan ta’ Azzjoni ġdid għal Tniġġis Żero jistabbilixxu l-azzjonijiet li l-Kummissjoni se tieħu biex tindirizza t-tniġġis tal-ilma. Fil-proposta tagħha għall-PAK il-ġdida l-Kummissjoni rrinforzat il-kundizzjonalità, u dan jippermetti li t-tniġġis diffuż jiġi indirizzat aħjar; dan l-aspett din qed jiġi suġġett għal proċedura ta’ kodeċiżjoni. Il-Kummissjoni taċċetta li jenħtieġ li tqis l-ispejjeż u l-benefiċċji tal-applikazzjoni tal-prinċipju ta’ min iniġġes iħallas fil-politiki regolatorji tagħha, skont il-Linji Gwida tagħha għal Regolamentazzjoni Aħjar. Madankollu, il-Kummissjoni ma tistax taċċetta r-rakkomandazzjoni biex tqis l-ispejjeż imqabbla mal-benefiċċji u l-bidliet regolatorji u amministrattivi ta’ miżuri speċifiċi li jkunu fil-kompetenza tal-Istati Membri.

73

L-ELD tiddefinixxi l-kunċetti ewlenin u l-kunċetti relatati huma definiti f’direttivi oħra (bħad-Direttiva Qafas dwar l-Ilma) li huma marbuta mill-qrib mal-ELD. Irriżulta diffiċli li jiġi żviluppat fehim komuni tal-implikazzjonijiet sħaħ tad-definizzjonijiet ta’ dawn il-kunċetti. Il-Linji Gwida tal-Kummissjoni adottati f’Marzu 2021 jindirizzaw il-ħtieġa għal fehim bħal dan.

Rakkomandazzjoni 2 – Jitqies li tiġi rinforzata l-applikazzjoni tad-Direttiva dwar ir-Responsabbiltà Ambjentali

Il-Kummissjoni taċċetta r-Rakkomandazzjoni 2 (a).

Il-Kummissjoni taċċetta li fil-fatt hemm nuqqas fl-ELD ta’ kriterji espliċiti għall-valutazzjoni tad-dannu lill-ilma u lill-art tat-tip li l-Anness I tal-ELD jipprevedi għall-valutazzjoni tad-dannu lill-ispeċijiet protetti u lill-ħabitats naturali. Il-fatt li jkun hemm kriterji legalment vinkolanti għad-dannu tal-ilma u tal-art jista’ jkun utli tabilħaqq u l-Kummissjoni se tqis dan fil-kuntest tal-evalwazzjoni.

Il-Kummissjoni taċċetta r-Rakkomandazzjoni 2 (b).

Rakkomandazzjoni 3 – Jiġu protetti l-fondi tal-UE milli jintużaw għal finanzjament ta’ proġetti li jenħtieġ li jiġu ffinanzjati minn min iniġġes

Il-Kummissjoni taċċetta r-rakkomandazzjoni.

Fl-ambitu tal-ġestjoni kondiviża, hija r-responsabbiltà tal-Istati Membri li jagħżlu operazzjonijiet li fihom jenħtieġ li jiġu applikati l-kundizzjonijiet rakkomandati mill-Qorti Ewropea tal-Awdituri.

Permezz ta’ mekkaniżmi stabbiliti fil-qafas legali għall-politika ta’ koeżjoni, il-Kummissjoni se tiżgura li d-dritt applikabbli tal-UE jkun rispettat fir-rigward tal-passi meħtieġa biex min iniġġes iħallas għat-tniġġis li huwa jkun responsabbli għalih u se tiżgura li l-Istati Membri jkunu konxji mill-obbligi tagħhom f’dan ir-rigward.
Il-Kummissjoni se teżamina dan l-aspett fir-rigward tal-kuntest tar-Rakkomandazzjoni 2.

Tim tal-awditjar

Ir-rapporti speċjali tal-QEA jippreżentaw ir-riżultati tal-awditi li twettaq ta’ politiki u programmi tal-UE, jew ta’ suġġetti relatati mal-ġestjoni minn oqsma baġitarji speċifiċi. Il-QEA tagħżel u tfassal dawn il-kompiti tal-awditjar biex ikollhom impatt massimu billi tqis ir-riskji għall-prestazzjoni jew għall-konformità, il-livell ta’ introjtu jew ta’ nfiq involut, l-iżviluppi li jkunu għad iridu jseħħu u l-interess politiku u pubbliku.

Dan l-awditu tal-prestazzjoni twettaq mill-Awla I tal-Awditjar, Użu sostenibbli tar-riżorsi naturali, li hija mmexxija minn Samo Jereb, Membru tal-QEA. L-awditu tmexxa minn Viorel Ştefan, Membru tal-QEA, li ngħata appoġġ minn Roxana Banica, Kap tal-Kabinett u Olivier Prigent, Attaché tal-Kabinett; Colm Friel, Maniġer Prinċipali; Frédéric Soblet, Kap tal-Kompitu; Roberto Resegotti, Deputat Kap tal-Kompitu, Georgios Karakatsanis, Katarzyna Radecka-Moroz, u Anna Sfiligoi, Awdituri. Disinn grafiku minn Marika Meisenzahl. Cathryn Lindsay ipprovdiet appoġġ lingwistiku.

Noti finali

¹ Ibbażat fuq il-viżjoni ppreżentata fid-dokument intitolat General Union Environment Action Programme to 2020.

² General Union Environment Action Programme to 2020, “Living well, within the limits of our planet”, p. 14.

³ EEA, EEA 2018 water assessment.

⁴ EEA, Contamination from local sources, 2020.

⁵ EEA, Air quality in Europe, 2019.

⁶ OECD, Recommendation of the Council on Guiding Principles concerning International Economic Aspects of Environmental Policies, 2020.

⁷ Jans, Jan H. u Vedder, Hans H. B., European Environmental Law, 2008.

⁸ OECD, The Polluter-Pays Principle, Analyses and Recommendations, 1992.

⁹ OECD, Recommendation of the Council concerning the Application of the Polluter-Pays Principle to Accidental Pollution, 1989.

¹⁰ UNCED, Rio Declaration on Environment and Development, 1992.

¹¹ It-Trattat dwar il-Funzjonament tal-Unjoni Ewropea.

¹² Ecologic Institute, Updated Inventory and Assessment of Soil Protection Policy Instruments in EU Member States, 2017.

¹³ The costs of not implementing EU environmental law, Rapport Finali, 2019.

¹⁴ Ir-Rapport Speċjali Nru 13/2020 - Bijodiversità agrikola: il-kontribuzzjoni mill-PAK ma waqqfitx it-tnaqqis.

¹⁵ Informazzjoni tal-Kummissjoni dwar l-Ambjent u l-Effiċjenza fir-Riżorsi taħt il-Politika ta’ Koeżjoni.

¹⁶ Ir-Regolament (UE) 1293/2013.

¹⁷ Ara, pereżempju, ir-Rapporti Speċjali Nru 19/2018, Nru 22/2016, Nru 23/2015, Nru 02/2015, Nru 04/2014, Nru 23/2012, Nru 20/2012 tal-QEA.

¹⁸ Ara pereżempju r-Rapport Speċjali Nru 23/2018 - It-tniġġis tal-arja: Saħħitna għadha mhix qed tiġi protetta biżżejjed, ir-Rapport Speċjali Nru 18/2020 - Is-Sistema tal-UE għan-Negozjar ta’ Emissjonijiet: l-allokazzjoni bla ħlas tal-kwoti kienet teħtieġ immirar aħjar, u r-Rapport Speċjali Nru XX/2021 dwar il-PAK u l-Klima.

¹⁹ Il-Kummissjoni Ewropea, Evaluation of the Industrial Emissions Directive (IED), SWD(2020) 181 final.

²⁰ Ricardo Energy & Environment, Ex-post assessment of costs and benefits from implementing BAT under the IED, 2018.

²¹ Il-Patt Ekoloġiku Ewropew.

²² Il-Kummissjoni Ewropea, Linji Gwida dwar l-għajnuna mill-Istat għall-protezzjoni ambjentali u l-enerġija 2014-2020, ĠU C 200, 2014.

²³ L-Artikolu 8.4(a) u (b) tad-Direttiva 2004/35/KE.

²⁴ EEA, Costs of air pollution from European industrial facilities 2008–2012, 2014.

²⁵ Il-miri vinkolanti prinċipali għal diversi flussi ta’ skart huma miġbura fil-qosor fir-Rapport Analitiku Nru 04 tal-QEA: Azzjoni tal-UE biex tiġi indirizzata l-problema tal-iskart tal-plastik.

²⁶ Study on investment needs in the waste sector and on the financing of municipal waste management in Member States, 2019.

²⁷ OECD, Financing Water Supply, Sanitation and Flood Protection, 2020.

²⁸ OECD, Financing Water Supply, Sanitation and Flood Protection, 2020.

²⁹ Fitness Check of the WFD, SWD(2019) 439 final, p. 64.

³⁰ EEA, Use of freshwater resources in Europe, 2020.

³¹ Assessing water pollution costs of farming in France, République Française, Ministère de l'écologie, id-Dipartiment għall-Ekonomija, għall-Valutazzjoni u għall-Integrazzjoni tal-Iżvilupp Sostenibbli, Studji u dokumenti, Nru 52, 2011.

³² Fitness Check of the WFD, SWD(2019) 439 final.

³³ Ascott, M.J., Gooddy, D.C., Wang, L. et al., Global patterns of nitrate storage in the vadose zone, 2017.

³⁴ Ecologic Institute, Updated Inventory and Assessment of Soil Protection Policy Instruments in EU Member States, 2017.

³⁵ Stima għall-EU-25 (inkluż ir-Renju Unit, bl-esklużjoni tal-Bulgarija, il-Kroazja, u r-Rumanija), Impact Assessment of the Thematic Strategy on Soil Protection, SEC(2006) 620.

³⁶ JRC, Status of local soil contamination in Europe, 2018.

³⁷ SWD/2016/0121 final, p. 21.

³⁸ SWD/2016/0121 final, p. 37 u 70.

³⁹ Multi-Annual ELD Work Programme (MAWP) for the period 2017-2020.

⁴⁰ Multi-Annual ELD Rolling Work Programme (MARWP) for the period 2021-2024.

⁴¹ L-Artikolu 2 tad-Direttiva 2004/35/KE.

⁴² SWD/2016/0121 final, p. 60.

⁴³ Ir-rapporti tat-18 sat-22 laqgħa tal-grupp ta’ esperti tal-gvernijiet dwar l-ELD .

⁴⁴ Il-Premessa 9 tar-Riżoluzzjoni tal-Parlament Ewropew tas-26 ta’ Ottubru 2017.

⁴⁵ Ir-Regolament (UE) 2019/1010.

⁴⁶ Avviż tal-Kummissjoni 2021/C 118/01.

⁴⁷ It-termini ta’ referenza tal-proġett IMPEL.

⁴⁸ SWD/2016/0121 final, p. 35.

⁴⁹ L-Artikolu 14 tad-Direttiva 2004/35/KE.

⁵⁰ Fogleman, V., Improving financial security in the context of the Environmental Liability Directive, 2020, pp. 127-128.

⁵¹ Fogleman, V., Improving financial security in the context of the Environmental Liability Directive, 2020.

⁵² Multi-Annual ELD Rolling Work Programme (MARWP) for the period 2021-2024, pp. 8-9.

⁵³ Komunikazzjoni tal-Kummissjoni Ewropea, Linji Gwida dwar l-għajnuna mill-Istat għall-protezzjoni ambjentali u l-enerġija 2014-2020, 2014/C 200.

⁵⁴ EEA, Soil contamination: the unsettling legacy of industrialisation, 2019.

⁵⁵ Sentenza tal-Qorti tas-26 ta’ April 2007 fil-Kawża C-135/05.

⁵⁶ Identifying Europe’s recovery needs (Nidentifikaw il-ħtiġijiet ta’ rkupru tal-Ewropa), COM(2020) 456

Kronoloġija

Avveniment	Data
Il-Memorandum ta’ Ppjanar tal-Awditjar (APM) jiġi adottat / L-awditu jinbeda	11.3.2020
L-abbozz ta’ rapport jintbagħat uffiċjalment lill-Kummissjoni (jew lill-entità l-oħra awditjata)	26.3.2021
Ir-rapport finali jiġi adottat wara l-proċedura kontradittorja	19.5.2021
Ir-risposti uffiċjali tal-Kummissjoni (jew tal-entità l-oħra awditjata) jaslu bil-lingwi kollha	14.6.2021

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Tel. +352 4398-1
Mistoqsijiet: eca.europa.eu/mt/Pages/ContactForm.aspx
Sit web: eca.europa.eu
Twitter: @EUAuditors

Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2021

PDF	ISBN 978-92-847-6288-0	ISSN 1977-5741	doi:10.2865/840024	QJ-AB-21-014-MT-N
HTML	ISBN 978-92-847-6294-1	ISSN 1977-5741	doi:10.2865/436791	QJ-AB-21-014-MT-Q

DRITTIJIET TAL-AWTUR

Il-politika tal-Qorti Ewropea tal-Awdituri (QEA) dwar l-użu mill-ġdid hija implimentata bid-Deċiżjoni Nru 6-2019 tal-Qorti Ewropea tal-Awdituri dwar il-politika tad-data miftuħa u l-użu mill-ġdid ta’ dokumenti.

Sakemm ma jkunx indikat mod ieħor (eż. f’avviżi individwali dwar id-drittijiet tal-awtur), il-kontenut tad-dokumenti tal-QEA, li huwa proprjetà tal-UE, huwa liċenzjat taħt il-liċenzja Creative Commons Attribution 4.0 International (CC BY 4.0). Dan ifisser li l-użu mill-ġdid huwa awtorizzat, dment li l-awturi jingħataw kreditu xieraq u li l-bidliet jiġu indikati. Il-persuni li jużaw mill-ġdid dan il-kontenut ma jistgħux ibiddlu s-sinifikat jew il-messaġġ oriġinali tad-dokumenti. Il-QEA ma għandhiex tkun responsabbli għal kwalunkwe konsegwenza relatata mal-użu mill-ġdid.

Inti meħtieġ tikseb drittijiet addizzjonali ċari jekk kontenut speċifiku juri individwi privati identifikabbli, eż. f’ritratti li jkun fihom il-membri tal-persunal tal-QEA, jew jekk ikun jinkludi xogħlijiet ta’ parti terza. Fejn ikun inkiseb permess, tali permess għandu jikkanċella u jissostitwixxi l-permess ġenerali msemmi hawn fuq u għandu jindika b’mod ċar kwalunkwe restrizzjoni dwar l-użu.

Biex tuża jew tirriproduċi kontenut li ma jkunx proprjetà tal-UE, inti jista’ jkun li jkollok titlob il-permess direttament mingħand id-detenturi tad-drittijiet tal-awtur.

Software jew dokumenti li jkunu koperti mid-drittijiet ta’ proprjetà industrijali, bħal privattivi, trademarks, disinji rreġistrati, logos u ismijiet, huma esklużi mill-politika tal-QEA dwar l-użu mill-ġdid u inti ma għandekx il-liċenzja biex tużahom.

Il-familja ta’ Siti Web istituzzjonali tal-Unjoni Ewropea, fi ħdan id-dominju europa.eu, tipprovdi links għal siti ta’ partijiet terzi. Peress li l-QEA ma għandha l-ebda kontroll fuqhom, inti mħeġġeġ biex tirrieżamina l-politiki tagħhom dwar il-privatezza u dwar id-drittijiet tal-awtur.

Użu tal-logo tal-Qorti Ewropea tal-Awdituri

Ma jistax isir użu mil-logo tal-Qorti Ewropea tal-Awdituri mingħajr ma jinkiseb il-kunsens tagħha minn qabel.

Kif tikkuntattja lill-UE

Personalment
Madwar l-Unjoni Ewropea kollha hemm mijiet ta’ ċentri ta’ informazzjoni tal-Europe Direct. Tista’ ssib l-indirizz tal-eqreb ċentru għalik f'dan is-sit: https://europa.eu/european-union/contact_mt

Bit-telefown jew bil-posta elettronika
Europe Direct huwa servizz li jwieġeb il-mistoqsijiet tiegħek dwar l-Unjoni Ewropea. Tista’ tikkuntattja dan is-servizz:

bit-telefown bla ħlas: 00 800 6 7 8 9 10 11 (ċerti operaturi jafu jimponu ħlas għal dawn it-telefonati),
fuq dan in-numru standard: +32 22999696, jew
bil-posta elettronika permezz: https://europa.eu/european-union/contact_mt

Kif issib tagħrif dwar l-UE

Onlajn
L-informazzjoni dwar l-Unjoni Ewropea bil-lingwi uffiċjali kollha tal-UE hija disponibbli fuq is-sit web Europa fuq: https://europa.eu/european-union/index_mt

Pubblikazzjonijiet tal-UE
Tista’ tniżżel mill-internet jew tordna l-pubblikazzjonijiet tal-UE, li xi wħud minnhom huma bla ħlas u xi oħrajn bil-ħlas, minn: https://op.europa.eu/mt/publications. Kopji multipli ta’ pubblikazzjonijiet bla ħlas tista’ tiksibhom billi tikkuntattja lil Europe Direct jew liċ-ċentru tal-informazzjoni lokali tiegħek (ara https://europa.eu/european-union/contact_mt).

Il-liġi tal-UE u dokumenti relatati
Għal aċċess għall-informazzjoni legali tal-UE, inkluż il-liġijiet kollha tal-UE mill-1952 ’l hawn, fil-verżjonijiet lingwistiċi uffiċjali kollha, żur is-sit EUR-Lex hawnhekk: http://eur-lex.europa.eu

Dejta Miftuħa mill-UE
Il-portal tad-Dejta Miftuħa mill-UE (https://copenhagenizeindex.eu/) jipprovdi aċċess għal settijiet tad-dejta mill-UE. Id-dejta tista’ titniżżel mill-internet u tintuża mill-ġdid bla ħlas, kemm għal skopijiet kummerċjali kif ukoll mhux kummerċjali.

Il-Prinċipju ta’ Min Iniġġes Iħallas: Applikazzjoni inkonsistenti fil-politiki u fl-azzjonijiet ambjentali tal-UE

Sommarju eżekuttiv

Introduzzjoni

L-oriġini tal-Prinċipju ta’ Min Iniġġes Iħallas

Il-PPP fl-UE

Qafas ta’ politika

Finanzjament mill-UE

Ambitu u approċċ tal-awditjar

Osservazzjonijiet

Il-PPP huwa l-bażi tal-leġiżlazzjoni ambjentali tal-UE

Il-PPP japplika għall-installazzjonijiet li jniġġsu l-aktar iżda l-ispiża tat-tniġġis residwu għas-soċjetà għadha għolja

Il-leġiżlazzjoni dwar l-iskart tirrifletti l-PPP, iżda ma tiżgurax li min iniġġes ikopri l-ispiża sħiħa tat-tniġġis

Min iniġġes ma jġarrabx l-ispejjeż sħaħ relatati mat-tniġġis tal-ilma

Ebda qafas leġiżlattiv kumplessiv tal-UE għall-protezzjoni kontra t-tniġġis tal-ħamrija

Il-pjan ta’ azzjoni tal-Kummissjoni biex ittejjeb l-operat tal-ELD ma kisibx ir-riżultati mistennija

B’segwitu għall-evalwazzjoni tal-ELD, il-Kummissjoni adottat pjan ta’ azzjoni biex tindirizza l-lakuni identifikati

Il-kunċetti ewlenin tal-ELD għadhom mhux definiti

Xi wħud mill-Istati Membri jirrikjedu li l-kumpaniji industrijali jassiguraw lilhom infushom kontra r-riskji ambjentali

L-UE ffinanzjat proġetti ta’ rimedjazzjoni ambjentali

Il-fondi tal-UE ntużaw biex jitnaddaf it-tniġġis orfni

Il-fondi tal-UE ntużaw ukoll meta l-awtoritajiet nazzjonali naqsu milli jinfurzaw il-leġiżlazzjoni ambjentali u jġiegħlu lil min iniġġes iħallas

In-nuqqas ta’ sigurtà finanzjarja biex tkopri r-responsabbiltà ambjentali jżid ir-riskju li l-ispejjeż jiġġarrbu mill-kontribwenti

Konklużjonijiet u rakkomandazzjonijiet

Anness

Anness I – Setturi koperti mid-Direttiva dwar l-Emissjonijiet Industrijali

Akronimi u abbrevjazzjonijiet

Glossarju

Risposti tal-Kummissjoni

Sommarju eżekuttiv

Introduzzjoni

Osservazzjonijiet

Konklużjonijiet u rakkomandazzjonijiet

Tim tal-awditjar

Noti finali

Kronoloġija

Kuntatt

DRITTIJIET TAL-AWTUR

Kif tikkuntattja lill-UE

Kif issib tagħrif dwar l-UE