Bord Uniku ta’ Riżoluzzjoni: Bdiet il-ħidma fuq kompitu diffikultuż relatat mal-Unjoni Bankarja, iżda għad hemm ħafna xi jsir

Sommarju eżekuttiv

I

Biex tiġi evitata rikorrenza tal-kriżi finanzjarja tal-2008 fl-Ewropa, l-UE żviluppat strutturi istituzzjonali ġodda biex tiżgura settur finanzjarju aktar sikur għas-suq uniku. Dawn jinkludu l-Mekkaniżmu Superviżorju Uniku (MSU) u l-Mekkaniżmu Uniku ta’ Riżoluzzjoni (SRM). Dan ir-rapport jiffoka fuq il-Bord Uniku ta’ Riżoluzzjoni (SRB) li, flimkien mal-awtoritajiet ta’ riżoluzzjoni nazzjonali (ARN) fi ħdan iż-żona tal-euro, jifforma l-SRM.

II

Ġiet stabbilita “Ġabra Unika tar-Regoli” ta’ leġiżlazzjoni u linji gwida armonizzati dwar ir-riżoluzzjoni u s-superviżjoni tal-banek. Fir-rigward tar-riżoluzzjoni, il-Ġabra Unika tar-Regoli tinkludi numru ta’ elementi li flimkien jiggwidaw il-ħidma tal-SRB. Fid-dawl tal-fatt li twaqqaf biss fl-2015, l-SRB għadu essenzjalment fil-fażi “tal-bidu”, u kien meħtieġ jieħu responsabbiltajiet konsiderevoli ħafna f’medda qasir ħafna ta’ żmien.

III

Jenħtieġ li l-ħidma tal-SRB titqies bħala parti minn sistema li tinvolvi wkoll superviżuri (eż. il-BĊE) u korpi regolatorji (bħall-Awtorità Bankarja Ewropea). Is-superviżuri huma inkarigati mis-superviżjoni prudenzjali permanenti tal-banek li jaqgħu fi ħdan il-mandat tagħhom. Jekk il-miżuri ta’ rkupru jew ta’ intervent ma jkunux effettivi, bank jiġi vvalutat bħala li “qed ifalli jew probabbilment ser ifalli”, u l-awtoritajiet ta’ riżoluzzjoni jintervienu. L-SRB, bl-assistenza tal-awtoritajiet ta’ riżoluzzjoni nazzjonali, huwa responsabbli għall-ippjanar ta’ kontinġenza għar-riżoluzzjoni tal-banek li jaqgħu fi ħdan il-mandat tiegħu, u għall-ġestjoni tal-proċeduri ta’ riżoluzzjoni tal-banek kif meħtieġ u kif xieraq. Il-mandat tiegħu jestendi għall-banek sinifikanti kollha u għall-banek transfruntiera kollha li jkunu inqas sinifikanti, fiż-żona tal-euro.

IV

It-TFUE jippermetti li l-Qorti Ewropea tal-Awdituri jkollha aċċess sħiħ għat-tali dokumentazzjoni tal-parti awditjata kif meħtieġ għall-awditu. Matul dan l-awditu, aħna ksibna dokumentazzjoni estensiva mill-maniġment u l-persunal tal-SRB, li ppermettitilna nisiltu l-konklużjonijiet f’dan ir-rapport b’ċerta kunfidenza. Madankollu ma ġietx ipprovduta d-dokumentazzjoni kollha mitluba.

V

Aħna sibna li l-kompitu tat-twaqqif tal-SRB mix-xejn f’perjodu ta’ żmien qasir ħafna ħoloq sfida sinifikanti ħafna. Aħna identifikajna nuqqasijiet fil-mod kif l-SRB ipprepara l-pjanijiet ta’ riżoluzzjoni. Minkejja li jeħtieġ li dawn id-dgħufijiet jiġu indirizzati, kemm fi ħdan l-SRB kif ukoll fl-arranġamenti leġiżlattivi u ta’ kooperazzjoni li japplikaw għalih, irid jitqies il-kuntest ta’ ħidma li għadha fil-bidu tagħha.

VI

L-SRB għadu ma kkompletax l-ippjanar tar-riżoluzzjonijiet għall-banek li jaqgħu fi ħdan il-mandat tiegħu. Minkejja li huwa ħadem u stinka ħafna biex jiżgura li jiġu stabbiliti verżjonijiet preliminari mill-inqas tal-pjanijiet ta’ riżoluzzjoni għall-biċċa l-kbira mill-banek, il-pjanijiet li ġew adottati fl-2016 ma ssodisfawx għadd sostanzjali ta’ rekwiżiti stabbiliti fil-Ġabra Unika tar-Regoli. Filwaqt li din il-problema hija kemxejn mitigata mid-disponibbiltà ta’ informazzjoni addizzjonali ta’ sfond, għad hemm defiċjenzi sinifikanti relatati mar-rekwiżiti leġiżlattivi.

VII

Jenħtieġ li l-SRB l-ewwel jiddetermina meta l-ewwel pjan ta’ riżoluzzjoni li jkun konformi bis-sħiħ mal-Ġabra Unika tar-Regoli għandu jitfassal għal kull bank li jaqa’ taħt il-mandat tiegħu. Imbagħad, dan għandu jaħdem għall-preparazzjoni ta’ dawk il-pjanijiet billi jagħtihom prijorità fir-rigward il-livell ta’ riskju tagħhom. Jenħtieġ li kull pjan jindirizza r-riżolvibbiltà tal-bank ikkonċernat, kif ukoll il-fattibbiltà u l-kredibbiltà tal-istrateġiji ta’ riżoluzzjoni li jkunu ntgħażlu.

VIII

Biex jiġi żgurat li s-settur bankarju jkollu biżżejjed kapaċità ta’ assorbiment tat-telf, l-SRB jeħtieġ ukoll li jiffinalizza sistema ta’ regoli u gwida għall-ippjanar tar-riżoluzzjonijiet, inkluża politika għad-determinazzjoni ta’ rekwiżiti minimi għal fondi proprji u għal obbligazzjonijiet eliġibbli. In-noti ta’ gwida u l-manwal tal-SRB għall-ippjanar tar-riżoluzzjoni jeħtieġ li jiġu żviluppati jew aġġornati kif xieraq.

IX

Sa mill-bidu, l-SRB iffaċċja diffikultajiet fir-reklutaġġ ta’ persunal suffiċjenti bil-ħiliet xierqa. Id-dewmien fl-ingaġġ tal-persunal kellu impatt negattiv fuq l-oqsma kollha tal-attivitajiet tal-SRB, minkejja l-impenn u l-motivazzjoni tal-persunal tiegħu. L-SRB jeħtieġ li jaċċellera l-isforzi ta’ reklutaġġ tiegħu u jagħti riżorsi xierqa lill-funzjoni tal-HR biex din tkampa bid-domandi tar-reklutaġġ, b’mod partikolari fir-rigward ta’ pożizzjonijiet aktar speċjalizzati jew ta’ livell għoli. Jekk il-miri ta’ ingaġġ tal-persunal ma jistgħux jintlaħqu, jew jekk miżuri interim ikunu meħtieġa, jenħtieġ li l-SRB iqis soluzzjonijiet alternattivi.

X

Id-distribuzzjoni ta’ kompiti operazzjonali bejn l-awtoritajiet nazzjonali u l-SRB, inkluż it-tqassim tar-responsabbiltajiet, għadha mhijiex ċara, u t-timijiet interni ta’ riżoluzzjoni ma għandhomx biżżejjed persunal. Jeħtieġ li l-SRB jindirizza dawn il-problemi b’mod urġenti.

XI

L-SRB akkumula esperjenza sinifikanti fit-tqegħid tal-qafas leġiżlattiv fi prattika. Fid-dawl ta’ din l-esperjenza, jenħtieġ li l-SRB jistieden lil-leġiżlatur jagħmel aġġustamenti li ser itejbu l-effettività tal-ħidma u l-kontribut sistemiku tiegħu. Jenħtieġ li dawn l-aġġustamenti jinkludu bidliet li jaffettwaw il-mandat tiegħu kif ukoll id-disponibbiltà u l-fluss ta’ informazzjoni mal-BĊE (b’mod partikolari fil-kuntest tal-memorandum ta’ qbil). Jenħtieġ ukoll li għodda ta’ moratorju ssir disponibbli għall-SRB.

Introduzzjoni

L-Unjoni Bankarja

01

Biex tiġi evitata rikorrenza tal-kriżi finanzjarja tal-2008 fl-Ewropa, l-UE segwiet ġabra ta’ politiki biex tiżgura settur finanzjarju aktar sikur għas-suq uniku. Dawn jinkludu regoli aktar b’saħħtihom dwar il-kapital u l-likwidità għall-banek, regoli armonizzati għall-ġestjoni tal-banek li jkunu qed ifallu u protezzjoni aħjar għad-depożitanti. Flimkien, din il-bażi leġiżlattiva ġdida kif ukoll il-korpi u l-awtoritajiet ta’ akkumpanjament, jifformaw dik li hija magħrufa bħala l-Unjoni Bankarja tal-UE.

02

L-Unjoni Bankarja għandha żewġ pilastri istituzzjonali. L-ewwel wieħed huwa s-superviżjoni komuni tal-banek permezz tal-Mekkaniżmu Superviżorju Uniku (MSU). It-tieni wieħed huwa proċedura għall-istralċ ordnat tal-banek¹, il-Mekkaniżmu Uniku ta’ Riżoluzzjoni (SRM). Ġie propost it-tielet pilastru fil-forma ta’ skema Ewropea ta’ assigurazzjoni tad-depożiti. Dan ir-rapport jiffoka fuq il-Bord Uniku ta’ Riżoluzzjoni (SRB) li, flimkien mal-awtoritajiet ta’ riżoluzzjoni nazzjonali (ARN) fi ħdan iż-żona tal-euro, jinkorpora s-“setgħa ċentralizzata ta’ riżoluzzjoni” permezz tal-SRM biex jittratta banek li jkunu qed ifallu.

03

L-SRB u l-ARN huma responsabbli għall-ġestjoni tal-proċessi ta’ riżoluzzjoni tal-banek b’mod kooperattiv. Ir-riżoluzzjoni għandha l-għan li tippermetti li l-funzjonijiet kritiċi tal-bank ikomplu joperaw. Jekk bank ma jkollux funzjonijiet kritiċi u l-falliment tiegħu ma jkunx jirriżulta f’riskju għall-istabbiltà finanzjarja, huwa jiġi stralċat permezz ta’ proċeduri normali ta’ insolvenza. Il-prinċipju wara l-qafas regolatorju l-ġdid huwa li tiġi minimizzata l-okkorrenza ta’ fallimenti bankarji li joħolqu destabbilizzazzjoni u tfixkil, filwaqt li jiġu pprovduti protezzjonijiet xierqa lill-kredituri, fi ħdan ġabra ta’ regoli tal-UE u dawk nazzjonali. Jekk jiġi implimentat b’mod korrett, dan ser iservi biex jillimita l-ispejjeż fiskali kif ukoll biex iżid l-istabbiltà finanzjarja li tappoġġa t-tkabbir ekonomiku.

04

L-UE ilha mill-2013 tiżviluppa ġabra ta’ regoli armonizzati għas-superviżjoni u r-riżoluzzjoni tal-banek. Dawn huma magħrufa kunċettwalment bħala l-“Ġabra Unika tar-Regoli”. Fir-rigward tar-riżoluzzjoni (ara d-dettalji fl-Anness I), il-Ġabra Unika tar-Regoli prinċipalment tinkludi r-Regolament dwar il-Mekkaniżmu Uniku ta’ Riżoluzzjoni (ir-Regolament dwar l-SRM), id-Direttiva dwar l-Irkupru u r-Riżoluzzjoni tal-Banek (id-Direttiva dwar il-BRR), regolament delegati tal-Kummissjoni kif ukoll standards u linji gwida tal-Awtorità Bankarja Ewropea (EBA).

Rwol tal-Bord Uniku ta’ Riżoluzzjoni

05

L-SRB huwa responsabbli għar-riżoluzzjoni, meta meħtieġ, tal-banek sinifikanti kollha fiż-żona tal-euro, kif ukoll il-banek inqas sinifikanti li joperaw bejn il-fruntieri². Bank transfruntier li jkun inqas sinifikanti jikkonsisti minn kumpanija omm li tinsab fiż-żona tal-euro u mill-inqas sussidjarja waħda li tinsab fi Stat Membru differenti taż-żona tal-euro. Sa Jannar 2017, l-SRB kopra 141 bank, li jirrappreżentaw aktar minn 80 % tat-total tal-assi bankarji fiż-żona tal-euro. L-ARN huma responsabbli għar-riżoluzzjoni tal-banek l-oħra kollha fil-livell nazzjonali, madwar 3 250 entità legali³.

06

Il-kompiti prinċipali tal-SRB huma:

1. it-tfassil ta’ pjanijiet ta’ riżoluzzjoni għall-banek kollha li jaqgħu taħt il-mandat tiegħu u l-istabbiliment tal-livell ta’ obbligazzjonijiet u fondi proprji tat-tipi li jista’ jkun li jiġu soġġetti għal rikapitalizzazzjoni interna f’riżoluzzjoni (buffer ta’ sikurezza magħruf bħala r-rekwiżit minimu għal fondi proprji u obbligazzjonijiet eliġibbli (MREL));
2. l-adozzjoni ta’ deċiżjonijiet ta’ riżoluzzjoni dwar l-azzjoni li għandha tittieħed fil-kuntest ta’ riżoluzzjoni ta’ bank;
3. l-iżgurar ta’ armonizzazzjoni u konsistenza fi ħdan l-SRM;
4. l-amministrazzjoni tal-Fond Uniku ta’ Riżoluzzjoni (SRF), li jappoġġa finanzjarjament il-proċessi ta’ riżoluzzjoni f’ċerti ċirkustanzi⁴.

07

F’konformità mar-Regolament dwar l-SRM, l-SRB twaqqaf f’Awwissu 2014 u sar aġenzija indipendenti minn Jannar 2015. Dan kien immaniġġjat b’mod proviżorju mill-Kummissjoni (għal ftit xhur) qabel ma ħadu l-kariga l-membri tal-bord eżekuttiv tiegħu. Huwa għandu l-kwartieri ġenerali tiegħu fi Brussell u kellu persunal ta’170 persuna, bejn wieħed u ieħor, sa tmiem l-2016. Essenzjalment għadu entità li għadha fil-bidu tagħha.

08

L-SRB jieħu d-deċiżjonijiet tiegħu f’Seduti Eżekuttivi u f’Seduti Plenarji. Għal dawk tal-ewwel jattendu l-President, il-Viċi President, u erba’ membri permanenti (li mhumiex rappreżentanti ta’ ARN). Il-President (jew il-Viċi President) u l-erba’ membri permanenti jivvutaw f’Seduti Eżekuttivi. Għal dawk li jittrattaw bank speċifiku, jattendi wkoll rappreżentant tal-ARN mill-Istat Membru partikolari (Seduta Eżekuttiva “estiża”). Għas-Seduti Plenarji jattendi rappreżentant minn kull ARN u jridu jiġu involuti f’deċiżjonijiet ta’ riżoluzzjoni jekk l-SRF ikun ipprovda appoġġ li jaqbeż it-total ta’ EUR 5 biljun (jew fil-każ ta’ appoġġ ta’ likwidità li jaqbeż l-EUR 10 biljun) għar-riżoluzzjoni inkwistjoni.

L-interazzjoni tal-SRB ma’ awtoritajiet oħra

09

Il-proċedura għall-indirizzar ta’ bank f’diffikultà finanzjarja potenzjalment għandha tliet fażijiet operattivi (ara l-Figura 1) wara l-preparazzjoni u l-ippjanar. L-ewwel waħda hija l-fażi ta’ rkupru, fejn il-bank ikun meħtieġ jimplimenta azzjonijiet ippreżentati fil-pjan ta’ rkupru tiegħu stess. Il-pjan ta’ rkupru jiġi vvalutat mis-superviżur, li huwa l-BĊE għall-banek ta’ importanza sinifikanti fiż-żona tal-euro.

10

Il-fażi (aktar serja) li jmiss hija intervent bikri, fejn is-superviżur jingħata s-setgħa biex jinforza miżuri speċifiċi. L-SRB ma jiħux deċiżjonijiet fl-ewwel żewġ fażijiet iżda għandu responsabbiltà kondiviża għall-monitoraġġ tal-kundizzjonijiet tal-bank u jipprepara azzjonijiet potenzjali ta’ riżoluzzjoni kif imsemmi fil-fażi li jmiss.

11

It-tielet fażi hija riżoluzzjoni, u huwa hawnhekk li r-rwol tal-SRB isir kruċjali. Riżoluzzjoni tiġi skattata jekk il-BĊE jinforma lill-SRB li bank taħt is-superviżjoni tiegħu jitqies li “qed ifalli jew probabbilment ser ifalli” (FOLTF), jew jekk l-SRB indipendentement jagħmel l-istess valutazzjoni. L-SRB jista’ jiddeċiedi li jpoġġi entità taħt riżoluzzjoni biss jekk jiġu ssodisfati wkoll il-kundizzjonijiet li ġejjin, jiġifieri ma jkunx hemm miżuri alternattivi oħra disponibbli u r-riżoluzzjoni titqies li (aktar milli l-applikazzjoni tar-regoli dwar l-insolvenza) tkun fl-interess pubbliku. Minħabba li s-sistema tinvolvi lill-BĊE, lill-SRB u lil diversi awtoritajiet nazzjonali u Ewropej oħra, il-komunikazzjoni ta’ kwalità għolja u l-fehim reċiproku huma essenzjali għas-suċċess.

12

L-SRB jista’ jadotta biss skema ta’ riżoluzzjoni li tinvolvi l-użu tal-SRF jekk il-Kummissjoni tkun iddeċidiet li dan huwa permissibbli skont ir-regoli dwar l-għajnuna mill-Istat. Sussegwentement, il-Kummissjoni tapprova l-ammont tal-Fond previst fl-iskema ta’ riżoluzzjoni.

Ambitu u approċċ tal-awditjar

Ambitu u metodoloġija tal-awditjar

13

Aħna eżaminajna jekk l-SRB għandux il-mezzi biex iwettaq ir-riżoluzzjonijiet tal-banek b’mod effettiv. B’mod partikolari aħna analizzajna:

1. il-kwalità tal-ippjanar tar-riżoluzzjonijiet tal-SRB għal banek individwali (ara l-paragrafi 24 sa 83);
2. jekk l-SRB huwiex imwaqqaf b’mod adegwat biex jikkonforma mal-qafas statutorju tiegħu għall-ippjanar tar-riżoluzzjonijiet (ara l-paragrafi 84 sa 102); u
3. jekk l-SRB għandux riżorsi umani adegwati biex iwettaq il-kompiti fdati lilu u jekk il-qafas ta’ kooperazzjoni huwiex adegwat (ara l-paragrafi 103 sa 142).

14

Dan ir-rapport ser jipprovdi konklużjonijiet u rakkomandazzjonijiet (ara l-paragrafi 143 sa 158) ibbażati fuq din l-istruttura.

15

Fir-rigward tal-punt (a), aħna eżaminajna jekk il-pjanijiet ta’ riżoluzzjoni tal-SRB humiex xierqa u sistematiċi u jinkludux valutazzjonijiet tar-riżolvibbiltà u d-determinazzjoni ta’ MREL.

16

Għal dan l-għan, il-popolazzjoni tal-awditjar kienet tikkonsisti mit-58 pjan ta’ riżoluzzjoni kompleti li l-SRB kien ipprepara għall-banek sa tmiem Jannar 2017. Minn dawn il-pjanijiet, l-SRB kien lest li jipprovdi ħames kapitoli ewlenin (ara l-paragrafu 26), li aħna eżaminajna, b’ħarsa lejn tmien eżempji ta’ kull kapitolu li nsiltu b’mod aleatorju minn din il-popolazzjoni, b’mhux aktar minn żewġ kapitoli minn kwalunkwe pjan wieħed, li jfisser total ta’ 40 kapitolu (li jkopru 31 bank differenti). Mill-kapitoli magħżula, l-SRB neħħa d-data kollha speċifika għall-banek kif ukoll id-data li toriġina mill-BĊE. Dan l-approċċ ippermetta lit-tim tal-awditjar biex iħares b’ċertu dettall lejn aspetti kritiċi tal-pjanijiet u biex jislet konklużjonijiet importanti, iżda ma ppermettiex fehim sħiħ tal-kompletezza u l-konsistenza interna tagħhom, u b’hekk kellna nfittxu informazzjoni addizzjonali (ara l-paragrafu 36), li ġiet ipprovduta għal tliet banek.

17

Fir-rigward tal-punt (b), aħna vvalutajna jekk l-SRB japplikax sistema xierqa ta’ regoli, inklużi manwali, linji gwida u oqfsa għall-ippjanar tar-riżoluzzjonijiet.

18

Fir-rigward tal-punt (c), aħna vvalutajna jekk l-SRB ingaġġax in-numru t-tajjeb ta’ persunal b’ħiliet xierqa u offrilhomx aktar taħriġ. Aħna eżaminajna wkoll l-effettività tal-kooperazzjoni tal-SRB mal-ARN u mal-BĊE.

19

Fit-twettiq tal-awditu tagħna, aħna użajna kriterji dderivati mis-sorsi li ġejjin:

1. rekwiżiti legali fir-Regolament dwar l-SRM u d-Direttiva dwar il-BRR;
2. ir-Regolament Delegat tal-Kummissjoni li jispeċifika l-kontenut tal-pjanijiet ta’ riżoluzzjoni;
3. Il-lista, stabbilita mill-Bord għall-Istabbiltà Finanzjarja, tal-attributi ewlenin tar-reġimi ta’ riżoluzzjoni effettivi għall-istituzzjonijiet finanzjarji; u
4. il-mudell tal-erba’ linji ta’ difiża, stabbilit mill-Istitut għall-Istabbiltà Finanzjarja⁵.

20

Aħna wettaqna l-biċċa l-kbira mix-xogħol tal-awditjar fuq il-post minn Ottubru 2016 sa Lulju 2017, fir-rigward tal-pjanijiet ta’ riżoluzzjoni li ġew adottati mhux aktar tard minn Jannar 2017.

21

L-evidenza għall-awditjar tikkonsisti minn informazzjoni miġbura permezz ta’ laqgħat u intervisti mal-persunal tal-SRB, kif ukoll l-analiżi tad-dokumentazzjoni interna tal-SRB, data disponibbli għall-pubbliku, rappreżentazzjonijiet mill-SRB⁶ (fejn xieraq) u stħarriġ ta’ 20 ARN⁷.

Aċċess għall-evidenza u problemi ta’ kunfidenzjalità

22

Id-drittijiet tal-awditjar u l-mandat għal dan l-awditu tal-prestazzjoni ġejjin mid-dispożizzjonijiet ġenerali tal-Artikolu 287 TFUE, li jagħti lill-Qorti Ewropea tal-Awdituri aċċess sħiħ għad-dokumentazzjoni kollha li tkun neċessarja għall-kompitu tal-awditjar. Matul l-awditu, l-SRB ġab l-argument li problemi speċjali ta’ kunfidenzjalità, li jirriżultaw minn tħassib rigward l-istabbiltà finanzjarja, japplikaw għad-data tal-SRB speċifika għall-banek, u għall-prattiki tiegħu (ara wkoll il-paragrafu 16). It-Trattat ma jipprovdi l-ebda eżenzjoni partikolari f’dan ir-rigward, iżda aħna stajna nilħqu arranġament speċjali rigward it-trattament u l-protezzjoni ta’ dan it-tip ta’ data, u ħdimna mal-maniġment tal-SRB biex innaqqsu kull riskju reali jew apparenti filwaqt li niżguraw aċċess għad-data neċessarja għall-awditu, inkluż bil-ħidma estensiva b’data anonimizzata, b’kunsiderazzjoni għall-ħtiġijiet tal-awditu.

23

Tabilħaqq, il-kooperazzjoni u l-assistenza tal-SRB ippermettewlna li nwettqu xogħol estensiv tal-awditjar u li nisiltu b’kunfidenza l-konklużjonijiet spjegati f’dan l-ewwel rapport speċjali dwar l-operazzjonijiet tiegħu. Id-dokumentazzjoni kienet disponibbli b’mod estensiv, iżda b’xi eċċezzjonijiet sinifikanti. B’mod partikolari, fost implikazzjonijiet oħra, in-nuqqas ta’ ċerti dokumenti ta’ politika (li l-SRB irrappreżenta bħala li jeżistu biss f’forma ta’ abbozz) fisser li aħna ma eżaminajniex bis-sħiħ jekk il-politiki tal-SRB humiex konformi għalkollox mal-Ġabra Unika tar-Regoli, u l-aċċess prinċipalment għal data anonimizzata fir-rigward tal-pjanijiet ta’ riżoluzzjoni fisser li aħna ma vvalutajniex il-kompletezza u l-konsistenza interna tagħhom. Madankollu, aħna stajna nifformaw xi konklużjonijiet evidenzjati sew dwar il-pjanijiet ta’ riżoluzzjoni, kif ser joħroġ ċar minn dan ir-rapport (ara l-Anness II).

Osservazzjonijiet

Pjanijiet ta’ riżoluzzjoni: għadhom pjuttost fl-istadju ta’ xogħol fl-idejn

24

Din it-taqsima teżamina l-elementi ewlenin fil-pjanijiet ta’ riżoluzzjoni ppreparati mill-SRB, u tirrapporta s-sejbiet relatati mal-konformità mal-Ġabra Unika tar-Regoli.

Ippjanar li għadu għaddej

25

L-ippjanar tar-riżoluzzjonijiet, il-kompitu operazzjonali permanenti tal-SRB, japplika għall-banek kollha li jaqgħu taħt il-mandat tiegħu, mhux biss għal dawk meqjusa li jkunu f’diffikultà. Il-proċess tal-ippjanar ta’ riżoluzzjoni jibda bl-abbozzar ta’ pjan ta’ riżoluzzjoni. F’dan il-kuntest l-SRB jeħtieġ li jiddetermina l-funzjonijiet kritiċi u l-linji operatorji ewlenin tal-bank. Bħala l-pass li jmiss, l-SRB jivvaluta jekk il-bank jistax jiġi likwidat skont il-proċedimenti nazzjonali ta’ insolvenza; dan huwa l-approċċ awtomatiku sakemm l-SRB ma jqisx li riżoluzzjoni tkun fl-interess pubbliku. Jekk tittieħed deċiżjoni fl-interess pubbliku, l-SRB ikun meħtieġ li jfassal strateġija ta’ riżoluzzjoni mfassla apposta skont iċ-ċirkustanzi speċifiċi tal-bank. Ladarba din tkun saret, huwa mbagħad iqis l-impedimenti probabbli għal riżoluzzjoni effettiva tal-bank⁸, billi jenħtieġ li l-pjan ta’ riżoluzzjoni jindirizza kif kwalunkwe tali impediment għandu jiġi mitigat. Il-Figura 2 turi l-proċess tal-ippjanar tar-riżoluzzjoni.

26

Pjan ta’ riżoluzzjoni jkun fih il-kapitoli ewlenin li ġejjin¹⁰:

1. Analiżi operatorja strateġika: id-determinazzjoni tal-funzjonijiet kritiċi u l-linji operatorji ewlenin tal-bank;
2. Strateġija ta’ riżoluzzjoni ppreferuta: dan il-kapitolu jippreżenta valutazzjoni tal-fattibbiltà u tal-kredibbiltà tal-istrateġija ta’ riżoluzzjoni;
3. Kontinwità finanzjarja u operazzjonali: valutazzjoni tal-prerekwiżiti finanzjarji u operazzjonali għall-iżgurar tal-kontinwità fir-riżoluzzjoni;
4. Sommarju tal-valutazzjoni tar-riżolvibbiltà: valutazzjoni tal-eżistenza ta’ impedimenti sostantivi għar-riżolvibbiltà u kif dawn jistgħu jitneħħew. F’dan il-kapitolu l-SRB jiddetermina wkoll l-MREL;
5. Sommarju tal-ġestjoni.

Approċċ tal-SRB għall-ippjanar tar-riżoluzzjonijiet

27

L-SRB jipprepara pjanijiet ta’ riżoluzzjoni f’erba’ fażijiet. Dan jibda bi pjan ta’ riżoluzzjoni tranżizzjonali (PRT), li huwa sussegwentement jaġġorna u jespandi.

1. II-PRT (jew il-pjanijiet tal-ewwel fażi) jiffokaw fuq aspetti tal-analiżi operatorja strateġika. Dawn mhumiex soġġetti għal approvazzjoni mil-laqgħa tal-SRB f’Seduta Eżekuttiva estiża (ara l-paragrafu 8), u huma prinċipalment għal użu intern.
2. Il-pjanijiet tat-tieni fażi huma aktar komprensivi mill-PRT u huma soġġetti għal adozzjoni minn Seduta Eżekuttiva estiża (ara l-paragrafu 8). Dawn jintbagħtu lil kulleġġi ta’ riżoluzzjoni għal deċiżjoni iżda ma jinkludux determinazzjoni tal-impedimenti sostantivi jew tal-MREL.
3. Il-pjanijiet tat-tielet fażi jinkludu determinazzjoni tal-buffer li jirriżulta mill-MREL fil-livell konsolidat.
4. Il-pjanijiet tar-raba’ fażi jinkludu determinazzjoni tal-impedimenti sostantivi u l-MREL fil-livell konsolidat u f’dak tal-entitajiet uniċi.

28

Sa Jannar 2017, l-SRB ingħata l-kompitu mil-leġiżlatur biex jadotta 130 pjan ta’ riżoluzzjoni¹¹, mingħajr l-ebda dispożizzjoni fil-leġiżlazzjoni għal xi pass intermedjarju. Sa issa dan għadu ma laħaqx din il-mira, minħabba nuqqas ta’ riżorsi (ara l-paragrafi 103 sa 124). Sa tmiem Jannar 2017 huwa kien ipprepara 65 pjan tat-tieni fażi, li minnhom 64 kienu ġew adottati¹², u pprepara PRT għal 32 bank ieħor (ara l-Figura 3).

29

Il-leġiżlazzjoni¹³ tirrikjedi li l-SRB jiddetermina data speċifika sa meta għandhom jitfasslu l-ewwel pjanijiet ta’ riżoluzzjoni li jkunu konformi mal-Ġabra Unika tar-Regoli, iżda l-SRB ma għamilx dan.

30

Fl-2016, it-timijiet interni ta’ riżoluzzjoni tal-SRB kienu bdew jippreparaw pjanijiet komprensivi tat-tieni fażi. Skont ir-rappreżentazzjonijiet mill-SRB, dawn kienu dettaljati u kienu bejn 150 u 300 paġna twal. Fit-tieni nofs tal-2016, f’Seduta Eżekuttiva, l-SRB ħa deċiżjoni ta’ politika biex jipprepara pjanijiet ta’ riżoluzzjoni iqsar ta’, bejn wieħed u ieħor, 40 paġna. Id-deċiżjoni ttieħdet sabiex il-proċess tat-teħid ta’ deċiżjonijiet jiġi ffaċilitat u biex dan isir aktar maniġġabbli.

31

Minkejja li l-banek ivarjaw ħafna fil-kumplessità, dan il-limitu indikattiv fuq it-tul japplika għall-pjanijiet kollha. Dan ifisser li ħafna informazzjoni neċessarja u/jew obbligatorja mhijiex inkluża, kif diskuss fit-taqsima li jmiss.

32

Il-Figura 4 tagħti fil-qosor l-istruttura tal-SRB għall-pjanijiet ta’ riżoluzzjoni mill-2017 ’il quddiem, u turi lil liema partijiet interessati tintbagħat kull parti ta’ pjan. Mhux il-partijet interessati kollha jirċievu l-istess ġabra ta’ informazzjoni mill-SRB. B’mod sinifikanti, la l-kulleġġi ta’ riżoluzzjoni u lanqas l-SRB f’Seduta Eżekuttiva ma jirċievu n-noti tekniċi ta’ sfond, li jinkludu informazzjoni importanti bħal strateġiji ta’ riżoluzzjoni alternattivi. Fil-leġiżlazzjoni ma hemm l-ebda dispożizzjoni għal limitazzjoni fil-kondiviżjoni ta’ informazzjoni rilevanti mal-membri tal-kulleġġ ta’ riżoluzzjoni¹⁴.

Figura 4

Struttura u riċevituri tal-pjanijiet ta’ riżoluzzjoni, mill-2017 ’il quddiem

	Pjan	Annessi	Noti tekniċi ta’ sfond	Slajds ta’ preżentazzjoni
Kontenut	Riżultati u sommarju ta’ livell għoli tal-analiżi meħtieġa	Annessi standardizzati bħal listi (persuni ta’ kuntatt, sistemi tal-IT, eċċ.), mudelli tad-data dwar l-obbligazzjonijiet/tal-EBA, valutazzjoni tar-riżolvibbiltà, proposta motivata għal MREL, pjanijiet ta’ punti ta’ dħul multipli, proposti tal-banek dwar kif għandhom jitneħħew l-impedimenti.	Analiżijiet tekniċi/suppożizzjonijiet sottostanti li fuqhom ikunu bbażati l-komponenti prinċipali tal-pjan ta’ riżoluzzjoni (pereżempju funzjonijiet kritiċi, aċċess għall-infrastruttura tas-swieq finanzjarji, għodod ta’ riżoluzzjoni/strateġiji alternattivi, aċċess għal likwidità fuq terminu qasir, aggravar ta’ assijiet, kontinwità operazzjonali)	Għall-preżentazzjoni tal-pjan lill-kulleġġi ta’ riżoluzzjoni (KR)
Kondiviżi ma’15:	SRM, Seduta Eżekuttiva estiża, membri tal-KR	SRM, Seduta Eżekuttiva estiża, membri tal-KR	SRM, BĊE	Membri tal-KR, osservaturi tal-KR

Sors: Adattat mill-SRB.

33

Il-pjan ta’ ħidma tal-SRB għall-2017 ippreveda l-preparazzjoni ta’ 27 PRT mit-33 pjan li, sa tmiem Jannar 2017, ma kinux bdew. It-32 PRT diġà eżistenti kellhom jittieħdu għat-tieni fażi, u l-65 pjan eżistenti tat-tieni fażi kellhom jimxu għat-tielet fażi. Id-data ta’ skadenza kienet l-ewwel trimestru tal-2018.

34

Meta jitqies il-progress li kien sar sa tmiem Lulju 2017, l-ammont ta’ xogħol mistenni u n-numru tal-persunal attwali tal-SRB, dan il-pjan jidher ottimist iżżejjed (ara wkoll il-paragrafi 114, 124 u 125).

Ħarsa ġenerali lejn il-kontenut tal-pjan ta’ riżoluzzjoni

35

Il-Ġabra Unika tar-Regoli tipprovdi gwida dwar il-kontenut tal-pjanijiet ta’ riżoluzzjoni. Biex nivvalutaw il-konformità tal-SRB, aħna żviluppajna ġabra wiesgħa ta’ kriterji bbażati fuq ir-rekwiżiti tal-Ġabra Unika tar-Regoli għall-pjanijiet ta’ riżoluzzjoni, u eżaminajna l-pjanijiet ta’ riżoluzzjoni kkampjunati. Kif ser jintwera fil-paragrafi li ġejjin, il-pjanijiet ta’ riżoluzzjoni nfushom ma ssodisfawx aktar minn minoranza tal-kriterji applikati.

36

L-SRB qalilna li, għalkemm fil-pjanijiet ta’ riżoluzzjoni nfushom jista’ jkun hemm nuqqas ta’ dettall, huwa kellu ammont konsiderevoli ta’ informazzjoni addizzjonali ta’ sfond biex jissupplimenta kważi nofs it-total mistenni tal-pjanijiet. Filwaqt li, formalment, din l-informazzjoni ma kinitx parti mill-pjanijiet ta’ riżoluzzjoni, hija madankollu fformat parti importanti mill-bażi informattiva li fuqha huma bbażati l-fehim tal-SRB rigward il-banek li jaqgħu fi ħdan il-mandat tiegħu kif ukoll it-teħid ta’ deċiżjonijiet minnu fir-rigward tagħhom. L-eżaminar ta’ dan il-materjal għal tliet banek serrħilna rasna li, fid-data tal-SRB, kien hemm inqas lakuni minn kif jista’ jiġi dedott permezz ta’ qarja tal-pjanijiet ta’ riżoluzzjoni waħedhom. Madankollu, għad hemm defiċjenzi importanti fir-rigward tar-rekwiżiti tal-Ġabra Unika tar-Regoli.

Elementi ewlenin tal-pjanijiet ta’ riżoluzzjoni għadhom neqsin

37

Il-paragrafi li ġejjin jippreżentaw oqsma fejn il-valutazzjoni tagħna wriet li l-pjanijiet ta’ riżoluzzjoni tal-SRB ma kinux jissodisfaw ir-rekwiżiti tal-Ġabra Unika tar-Regoli.

Analiżi operatorja strateġika

38

F’dan il-qasam, il-pjanijiet ta’ riżoluzzjoni ma ssodisfawx ir-rekwiżi f’numru ta’ modi. Pereżempju, dawn ma ddeskrivewx b’mod adegwat l-istruttura tal-gruppi bankarji kkonċernati u lanqas ma vvalutaw il-mudelli ekonomiċi, il-governanza jew is-sjieda għal skopijiet tal-ippjanar tar-riżoluzzjonijiet, filwaqt li l-unika informazzjoni finanzjarja disponibbli kienet ġenerali u konsolidata aktar milli speċifika għal kull entità materjali kif mitlub mill-manwal għall-ippjanar tar-riżoluzzjoni. Dawn in-nuqqasijiet kienu mitigati parzjalment, iżda mhux bis-sħiħ, mid-disponibbiltà ta’ aktar data fl-informazzjoni u n-noti ta’ sfond.

39

B’mod importanti, il-pjanijiet ikkampjunati kienu inkompleti fir-rigward tal-interdipendenzi interni u esterni kritiċi fil-livell organizzazzjonali¹⁶. Filwaqt li l-SRB għandu informazzjoni dwar il-kontropartijiet materjali, aħna ma stajniex insibu xi analiżi dwarha li tkun tidentifika riskju potenzjali ta’ kontaġju.

Funzjonijiet kritiċi

40

Jenħtieġ li l-analiżi operatorja strateġika tivvaluta liema funzjonijiet huma tant kritiċi li l-waqfien tagħhom ikollu impatt fuq l-istabbiltà finanzjarja jew fuq l-ekonomija reali. Jenħtieġ ukoll li l-valutazzjoni tqis sa liema livell il-funzjonijiet ta’ bank jistgħu jiġi ssostitwiti b’dawk ta’ bank ieħor jew banek oħrajn fis-suq. Ir-bażi loġika li l-SRB uża biex jagħmel il-valutazzjonijiet tiegħu ma kinitx dejjem ċara fil-kapitoli kkampjunati.

41

Madankollu, l-SRB għamel progress sinifikanti billi pprovda gwida lit-timijiet interni ta’ riżoluzzjoni permezz ta’ mudell għall-ġbir ta’ data dwar il-funzjonijiet kritiċi, li għandu jiġi applikat mill-2017 ’il quddiem.

42

L-SRB ma setax jipprovdi ħarsa ġenerali lejn il-funzjonijiet kritiċi għal kull bank li jaqa’ taħt il-mandat tiegħu. Il-biċċa l-kbira mill-kapitoli kkampjunati ttrattaw it-teħid ta’ depożiti bħala funzjoni kritika. Xi pjanijiet ta’ riżoluzzjoni għamlu differenza bejn id-depożiti fil-livell ta’ konsumatur u dawk korporattivi, iżda mhux kollha.

43

Il-ħtieġa potenzjali għall-eżenzjoni ta’ ċerti obbligazzjonijiet mir-rikapitalizzazzjoni interna, bħalma huma d-depożiti ppreferuti u mhux koperti, li tirriżulta mill-istatus tagħhom bħala parti minn "funzjoni kritika", tnaqqas l-ammont ta’ obbligazzjonijiet disponibbli għal rikapitalizzazzjoni interna u tagħmilha ferm aktar importanti li jiġi pprovdut buffer adegwat permezz tal-MREL. Madankollu, il-pjanijiet ta’ riżoluzzjoni żviluppati sa issa ma ddeterminawx ammont tal-MREL, fatt li jżid il-probabbiltà li l-banek ser jitqiesu mhux riżolvibbli.

Strateġija ta’ riżoluzzjoni ppreferuta

Valutazzjoni tal-kredibbiltà u l-fattibbiltà tal-likwidazzjoni

44

Qabel ma l-SRB jiddetermina strateġija ta’ riżoluzzjoni, dan irid jivvaluta jekk il-likwidazzjoni skont proċedimenti normali ta’ insolvenza tkunx kredibbli u, jekk iva, jekk din tkunx fattibbli wkoll.

45

Meta jivvaluta l-kredibbiltà ta’ likwidazzjoni, l-SRB iqis l-impatt probabbli fuq is-sistema finanzjarja. B’mod speċifiku, dan jeħtieġ li jivvaluta jekk il-likwidazzjoni tkunx tilħaq l-objettivi tar-riżoluzzjoni¹⁷, li jinkludu l-protezzjoni ta’ depożiti garantiti¹⁸.

46

Fil-valutazzjoni tiegħu tal-kredibbiltà, l-SRB iddikjara f’bosta każijiet li l-iskema ta’ garanzija tad-depożiti (SGD) applikabbli ma setgħetx tilħaq ir-rekwiżiti tad-Direttiva dwar l-SGD, u lanqas ma kellha fondi suffiċjenti għad-dispożizzjoni tagħha biex timmaniġġja l-likwidazzjoni ta’ bank sinifikanti. B’hekk huwa aktar diffiċli li jintlaħaq l-objettiv ta’ protezzjoni tad-depożiti koperti permezz ta’ likwidazzjoni.

47

Biex jivvaluta l-fattibbiltà tal-likwidazzjoni, l-SRB irid jeżamina jekk is-sistemi ta’ informazzjoni dwar il-ġestjoni tal-bank jistgħux jirrapportaw l-informazzjoni meħtieġa mid-Direttiva dwar l-SGD. Pereżempju, jinħtieġ it-total tal-valur tad-depożiti koperti għal kull depożitant minħabba li l-SGD huwa meħtieġ li jħallas l-ammont garantit ta’ EUR 100 000 għal kull depożitant fi ħdan perjodu ta’ żmien speċifiku¹⁹.

48

Aħna ma sibniex informazzjoni fil-pjanijiet ta’ riżoluzzjoni kkampjunati rigward l-ammont ta’ finanzjament disponibbli tal-SGD biex tiġi ffaċilitata valutazzjoni ta’ dan it-tip.

49

Ma hemmx obbligu legali fuq l-SGD nazzjonali biex jikkooperaw mal-SRB. Minkejja dan, ir-Regolament Delegat jissuġġerixxi li l-SRB għandu jikkonsulta lill-SGD nazzjonali²⁰ għalkemm l-SRB dan ma għamlux.

50

Filwaqt li l-biċċa l-kbira mill-pjanijiet ta’ riżoluzzjoni kkonkludew li l-likwidazzjoni ma kinitx kredibbli, aħna sibna biss raġunijiet mhux fid-dettall għal dawn il-konklużjonijiet – pereżempju li jkun hemm impatti avversi sostanzjali fuq is-settur bankarju nazzjonali. Id-dettalji aktar speċifiċi meħtieġa mill-Ġabra Unika tar-Regoli²¹ ma ġewx ipprovduti.

51

Azzjoni ta’ riżoluzzjoni tista’ tittieħed, fl-interess pubbliku, jekk tkun neċessarja għall-ilħuq tal-objettivi tar-riżoluzzjoni u tkun proporzjonata għalihom. Irid ikun ġie ddeterminat ukoll li l-likwidazzjoni ma tkunx tissodisfa l-objettivi tar-riżoluzzjoni daqstant. L-uniċi dikjarazzjonijiet ta’ dan it-tip fil-pjanijiet ta’ riżoluzzjoni kienu ġenerali ħafna u ma kellhomx aktar dettall.

52

Id-dikjarazzjoni obbligatorja rigward kif il-likwidazzjoni tkun taffettwa d-dipendenza tal-bank fuq appoġġ pubbliku straordinarju kienet nieqsa wkoll²².

Identifikazzjoni ta’ strateġija ta’ riżoluzzjoni ppreferuta

53

Sa tmiem Jannar 2017, l-SRB żviluppa strateġiji ta’ riżoluzzjoni fuq il-bażi li l-impedimenti potenzjali (li jistgħu jkunu sostantivi) ser jiġu indirizzati f’xi punt fil-futur, meta l-kwoti għall-MREL ikunu ġew stabbiliti wkoll.

54

Aħna ma sibna l-ebda strateġija ta’ riżoluzzjoni ppreferuta li kienet tittratta wkoll żviluppi mhux antiċipati fuq terminu qasir. Għalhekk, f’każ li d-deċiżjonijiet ta’ riżoluzzjoni jsiru neċessarji fil-futur qarib, dawn x’aktarx li jiddevjaw mill-pjanijiet.

55

Il-Ġabra Unika tar-Regoli tirrikjedi deskrizzjoni ta’ kwalunkwe alternattiva meqjusa għall-istrateġija ta’ riżoluzzjoni ppreferuta f’każ li din ma tkunx tista’ tiġi implimentata²³. Aħna sibna li l-maġġoranza l-kbira tal-kapitoli kkampjunati ma kinux jittrattaw alternattivi għall-istrateġija ppreferuta.

56

Il-Ġabra Unika tar-Regoli tirrikjedi li l-kapitolu tal-istrateġija ta’ riżoluzzjoni jipprovdi stima tal-limitu (perjodu) ta’ żmien għall-eżekuzzjoni tal-aspetti materjali kollha tal-pjan²⁴. Madankollu, l-ebda wieħed mill-kapitoli kkampjunati ma inkluda dan il-perjodu ta’ żmien.

Determinazzjoni tal-għodod ta’ riżoluzzjoni u tas-setgħat ta’ riżoluzzjoni

57

Fil-maġġoranza l-kbira tal-pjanijiet, l-għodda ta’ riżoluzzjoni magħżula hija r-rikapitalizzazzjoni interna tal-bank miftuħ. F’dan ix-xenarju, il-bank idealment jagħlaq nhar ta’ Ġimgħa u jerġa’ jiftaħ bħas-soltu t-Tnejn, wara li l-azzjoni ta’ riżoluzzjoni permezz ta’ rikapitalizzazzjoni interna tkun seħħet fi tmiem il-ġimgħa.

58

Xi pjanijiet ta’ riżoluzzjoni jindikaw li s-sistemi tal-IT tal-banek ikollhom problemi biex iwasslu d-data neċessarja fil-ħin għar-rikapitalizzazzjoni interna.

59

Analiżi interna tal-SRB eżaminat firxa ta’ problemi operazzjonali relatati mal-għodda tar-rikapitalizzazzjoni interna. L-analiżi tikkonkludi li jeħtieġ li jsir aktar xogħol, b’mod partikolari fuq il-perjodu ta’ żmien mistenni u fuq il-prattikalitajiet tal-valwazzjonijiet negattivi u l-konverżjonijiet b’effett ta’ kaskata. Mhuwiex skedat li l-SRB jipprovdi gwida interna dwar l-implimentazzjoni tar-rikapitalizzazzjoni interna qabel ir-raba’ trimestru tal-2017, għalkemm il-maġġoranza l-kbira tal-pjanijiet ta’ riżoluzzjoni diġà jipprevedu l-użu ta’ din l-għodda.

60

Ir-rikapitalizzazzjoni interna tad-depożiti u tal-bonds f’temp ta’ 48 siegħa tkun sfida teknika immensa għall-biċċa l-kbira mill-banek minħabba l-kumplessità tal-ġestjoni u tas-sistemi tal-IT tagħhom. Qabel ma jkun jista’ jiġi esegwit pjan ta’ rikapitalizzazzjoni interna, is-sistemi ta’ ġestjoni jridu jkunu jistgħu jikkalkolaw l-ammont disponibbli għar-rikapitalizzazzjoni interna. Il-prattika attwali tal-SRB mhijiex li tirrikjedi li l-banek jittestjaw l-użu potenzjali tal-għodda tar-rikapitalizzazzjoni interna sabiex juru l-fattibbiltà tagħha.

61

Fil-fehma tagħna, il-kapaċità ta’ assorbiment tat-telf ta’ bank tiġi stmata b’mod eċċessiv jekk din tkun tinkludi obbligazzjonijiet li ma jistgħux ikunu soġġetti għal rikapitalizzazzjoni interna fi ħdan il-perjodu ta’ żmien previst mill-istrateġija ta’ riżoluzzjoni.

62

Reċentement, il-Kummissjoni pproponiet l-introduzzjoni ta’ għodda ta’ moratorju madwar l-UE li tista’ tintuża, pereżempju, biex tissospendi l-obbligi ta’ pagament ta’ bank sa massimu ta’ ħamest ijiem ta’ xogħol. Skont il-proposta, għalkemm is-superviżur ikun meħtieġ li jikkonsulta lill-awtorità ta’ riżoluzzjoni, din tal-aħħar ma jkollhiex is-setgħa hija stess biex tattiva l-għodda²⁵. Il-possibbiltà ta’ għodda ta’ moratorju biex tintuża mill-awtoritajiet ta’ riżoluzzjoni nfushom tista’ tipprovdi flessibbiltà (mhux b’inqas għall-bank ikkonċernat) fil-preparazzjoni għal rikapitalizzazzjoni interna.

63

Il-Ġabra Unika tar-Regoli tirrikjedi valutazzjoni tal-infurzabbiltà tal-għodod ta’ riżoluzzjoni²⁶. Aħna ma sibna din l-informazzjoni fl-ebda wieħed mill-pjanijiet ta’ riżoluzzjoni kkampjunati.

64

Il-Ġabra Unika tar-Regoli tirrikjedi li l-SRB isemmi s-setgħat ta’ riżoluzzjoni li jkun beħsiebu jagħmel użu minnhom fil-pjanijiet ta’ riżoluzzjoni²⁷. Madankollu, aħna ma sibna l-ebda tismija ta’ dan it-tip f’xi wieħed mill-kampjuni. Dawn is-setgħat jistgħu jinkludu, pereżempju, is-setgħa li jestendi maturitajiet jew itemm kuntratti speċifiċi, aktar milli li jaġixxi globalment bħal fil-każ ta’ moratorji. Is-setgħat huma msemmija fil-mudell tal-iskema ta’ riżoluzzjoni. Madankollu, biex jiġi ddeterminat liema jenħtieġ li jintużaw, jeħtieġ li jiġi analizzat u mifhum it-tip ta’ obbligazzjonijiet li għalihom is-setgħat ikunu applikati, u l-pjanijiet ta’ riżoluzzjoni kkampjunati ma kienx fihom informazzjoni dettaljata ta’ dan it-tip.

Valutazzjoni tal-fattibbiltà u l-kredibbiltà tal-istrateġija ta’ riżoluzzjoni ppreferuta

65

Aħna ma sibna l-ebda valutazzjoni tal-fattibbiltà tal-istrateġiji ta’ riżoluzzjoni magħżula f’xi wieħed mill-kapitoli kkampjunati. Konsegwentement, il-pjanijiet ma kkonkludewx dwar jekk l-istrateġija ta’ riżoluzzjoni ppreferuta setgħetx tiġi applikata b’mod effettiv u f’waqtu, kif meħtieġ mill-Ġabra Unika tar-Regoli²⁸.

66

L-awtoritajiet ta’ riżoluzzjoni huma meħtieġa wkoll li jivvalutaw il-kredibbiltà ta’ strateġija, li jfisser it-teħid inkunsiderazzjoni tal-impatt probabbli tar-riżoluzzjoni fuq is-sistemi finanzjarji u fuq l-ekonomija reali. Madankollu, din il-valutazzjoni wkoll kienet nieqsa fil-pjanijiet ikkampjunati. L-SRB ma kienx ivvaluta l-impatt potenzjali tal-għodod ta’ riżoluzzjoni magħżula (b’mod partikolari l-għodda tar-rikapitalizzazzjoni interna). Lanqas ma kien qies l-impatt fuq istituzzjonijiet finanzjarji oħrajn, fuq l-SMEs u fuq l-investitur fil-livell tal-konsumatur²⁹.

Valwazzjoni fil-kuntest ta’ riżoluzzjoni

67

Il-Ġabra Unika tar-Regoli tirrikjedi deskrizzjoni tal-informazzjoni li tkun neċessarja għall-implimentazzjoni tal-istrateġija ta’ riżoluzzjoni³⁰. Parti importanti minn dan hija l-għoti ta’ informazzjoni dwar il-valwazzjoni tal-bank għall-għanijiet ta’ riżoluzzjoni, li hija proċedura kumplessa ħafna u li tieħu ħafna ħin. Aħna ma sibna l-ebda dikjarazzjoni f’dan ir-rigward f’xi wieħed mill-kapitoli kkampjunati. Jirriżulta li l-SRB ma setax jivvaluta, kif meħtieġ, il-fattibbiltà tat-twassil ta’ din l-informazzjoni³¹.

Kontinwità finanzjarja u operazzjonali

68

Il-Ġabra Unika tar-Regoli tiddikjara li l-pjanijiet ta’ riżoluzzjoni jridu jinkludu analiżi tar-rekwiżiti ta’ finanzjament li l-istrateġija ta’ riżoluzzjoni timplika. Il-pjanijiet li eżaminajna, madankollu, ma kinux jestendu lil hinn minn dikjarazzjonijiet ġenerali dwar il-finanzjament fil-kapitolu dwar il-kontinwità finanzjarja. L-informazzjoni kienet nieqsa dwar il-mezzi ta’ finanzjament ta’ fergħat u sussidjarji li jinsabu fi Stati Membri mhux parteċipanti matul ir-riżoluzzjoni³².

69

Il-pjanijiet kienu wkoll nieqsa minn informazzjoni dwar l-infurzabbiltà tal-ftehimiet dwar il-livell ta’ servizz f’każ ta’ riżoluzzjoni. Meta l-funzjonijiet kritiċi jkunu separati, ma jkunx ċar jekk il-ftehimiet dwar il-livell ta’ servizz jibqgħux infurzabbli. Ħafna mill-pjanijiet ma semmewx xi arranġament ta’ kontinġenza, b’mod partikolari fir-rigward tas-sistemi ta’ pagament u saldu.

Valutazzjoni tar-riżolvibbiltà

70

Jenħtieġ li bank jitqies riżolvibbli jekk ikun fattibbli u kredibbli li dan jiġi likwidat skont proċedimenti normali ta’ insolvenza jew li jiġi riżolt bl-applikazzjoni ta’ azzjonijiet ta’ riżoluzzjoni.

71

L-SRB fl-ebda wieħed mid-dokumenti kkampjunati ma kkonkluda b’mod kategoriku jekk il-bank effettivament setax jiġi riżolt. Filwaqt li xi kapitoli kien fihom sommarju qasir tal-valutazzjoni tar-riżolvibbiltà, fil-biċċa l-kbira minnhom is-sommarju kien limitat għal ftit mill-impedimenti potenzjali identifikati.

72

Ir-Regolament dwar l-MSU jirrikjedi li l-SRB jinnotifika lill-EBA fil-ħin meta bank ikun jitqies mhux riżolvibbli. Sa Lulju 2017, l-SRB ma kien bagħat l-ebda notifika ta’ dan it-tip lill-EBA.

Impedimenti sostantivi

73

Il-Ġabra Unika tar-Regoli tirrikjedi li l-SRB jidentifika u jindirizza l-impedimenti sostantivi għar-riżoluzzjonijiet, billi jikklassifikahom f’mill-inqas il-kategoriji li ġejjin: (a) struttura u operazzjonijiet; (b) riżorsi finanzjarji; (c) informazzjoni; (d) problemi transfruntiera; (e) problemi legali. Minkejja dan l-obbligu legali, il-proċess tal-indirizzar tal-impedimenti sostantivi għadu ma bediex. Fil-pjanijiet tiegħu tat-tieni fażi, l-SRB ma marx lil hinn milli jidentifika l-impedimenti potenzjali.

74

Skont l-SRB, il-proċess sħiħ tad-determinazzjoni tal-impedimenti sostantivi, inklużi l-konsultazzjoni tal-awtoritajiet kompetenti u d-deċiżjonijiet konġuti mill-kulleġġi ta’ riżoluzzjoni, ser jieħu madwar sena, u issa mhuwiex mistenni li jibda qabel l-2018.

75

Il-Figura 5 ġejja mill-manwal għall-ippjanar tar-riżoluzzjoni u tindika l-medda ta’ żmien mistennija għar-riżoluzzjoni tal-impedimenti, skont il-fattibbiltà tal-implimentazzjoni u l-importanza tal-miżura.

76

Kif ġie rrapportat fil-paragrafu 28, hemm biss 65 pjan tat-tielet fażi li huma mistennija li jkunu disponibbli sa tmiem l-ewwel trimestru tal-2018. Bis-suppożizzjoni li l-pjanijiet ta’ riżoluzzjoni se jimxu għar-raba’ fażi sa nofs l-2019, il-banek ikollhom iż-żmien biex isolvu l-impedimenti sostantivi kollha sa nofs l-2022.

Rekwiżit minimu għal fondi proprji u obbligazzjonijiet eliġibbli (MREL)

77

Waħda mill-partijiet ewlenin ta’ pjan ta’ riżoluzzjoni hija d-determinazzjoni tar-rekwiżit minimu għal fondi proprji u obbligazzjonijiet eliġibbli (MREL). Dan huwa kalkolu tal-ammont minimu ta’ fondi proprji u obbligazzjonijiet (inklużi depożiti) li bank jeħtieġ li jżomm għal konverżjoni jew valwazzjoni negattiva f’każ ta’ rikapitalizzazzjoni interna. L-SRB għadu ma stabbiliex miri għall-MREL, la fil-livell konsolidat u lanqas f’dak tal-entitajiet uniċi.

78

Kwoti għall-MREL indikattivi u mhux vinkolanti kkalkolati fil-livell konsolidat ġew diskussi informalment mal-banek matul sessjonijiet ta’ ħidma li saru fl-2016, iżda dawn ma ġewx kondiviżi mal-kulleġġi ta’ riżoluzzjoni. Sa issa għadhom ma tqisux fatturi speċifiċi għall-banek, bħall-esklużjoni ta’ ċerti obbligazzjonijiet mir-rikapitalizzazzjoni interna, impedimenti sostantivi u rekwiżiti b'riżultat tal-proċess ta’ reviżjoni u evalwazzjoni superviżorji (SREP).

79

Peress li għadu ma ġie ddefinit l-ebda rekwiżit MREL, ma jsir l-ebda monitoraġġ tal-kwoti reali għall-MREL.

Sommarji tal-ġestjoni

80

L-SRB irid jinkludi sommarju tal-ġestjoni fil-pjanijiet kollha ta’ riżoluzzjoni, li jkun ikopri sommarju tal-elementi imsemmijin fil-qafas legali³³. L-informazzjoni fis-sommarji li eżaminajna għadha lura ħafna milli tissodisfa dan ir-rekwiżit. L-elementi neqsin huma elenkati fl-Anness III.

Divulgazzjoni tal-pjanijiet ta’ riżoluzzjoni

81

L-SRB huwa meħtieġ li jiddivulga l-partijiet sinifikanti kollha tal-pjanijiet ta’ riżoluzzjoni lill-banek ikkonċernati. Sa issa l-banek irċevew biss informazzjoni indikattiva limitata, bħal kalkoli tal-MREL fil-livell tal-grupp jew impedimenti possibbli. Ir-Regolament dwar l-SRM jirrikjedi wkoll li l-SRB jieħu kont tal-feedback li jingħata mill-banek. Madankollu, il-pjanijiet ta’ riżoluzzjoni li eżaminajna ma kien fihom l-ebda kumment mill-banek ikkonċernati.

82

L-SRB iġib l-argument li, b’mod mhux intenzjonat, id-diversi komponenti tal-Ġabra Unika tar-Regoli jittrattaw il-kwistjoni tad-divulgazzjoni b’modi differenti. Filwaqt li r-Regolament dwar l-SRM³⁴ jirreferi għal elementi sinifikanti ta’ pjan ta’ riżoluzzjoni, id-Direttiva dwar il-BRR³⁵ u r-Regolament Delegat tal-Kummissjoni³⁶ jirrikjedu biss divulgazzjoni tas-sommarju tal-ġestjoni.

Konformità limitata mal-ġabra tar-regoli

83

Biex nagħtu fil-qosor l-osservazzjonijiet tagħna ppreżentati fil-paragrafi 37 sa 82, il-pjanijiet ikkampjunati ma jikkonformawx mal-Ġabra Unika tar-Regoli. Il-livell ta’ konformità jitjieb jekk tingħata kunsiderazzjoni lill-informazzjoni ta’ sfond imsemmija fil-paragrafu 36, għalkemm aħna nosservaw li din l-informazzjoni ta’ sfond ma tinġabarx għall-banek kollha.

Jeħtieġ li jsir titjib fil-gwida għall-ippjanar tar-riżoluzzjoni

84

Aħna awditjajna s-sistema proprja tal-SRB ta’ manwali u proċeduri għall-ippjanar tar-riżoluzzjoni, u sibna li teżisti gwida bażika iżda li tinħtieġ aktar ħidma.

Jinħtieġu aġġornamenti u titjib għall-manwali u l-mudelli

85

Proċeduri, manwali u linji gwida xierqa huma neċessarji biex jiġi żgurat approċċ tajjeb u konsistenti għall-ippjanar tar-riżoluzzjonijiet fost il-ħafna atturi fil-proċess. L-SRB għamel arranġamenti xierqa biex imexxi dan il-proċess billi pprepara manwal għall-ippjanar tar-riżoluzzjoni, li jiġi abbozzat bl-għajnuna tal-ARN. L-SRB bħalissa qed jiżviluppa wkoll numru ta’ dokumenti ta’ politika interni u esterni.

86

L-għan tal-manwal għall-ippjanar tar-riżoluzzjoni huwa li jippromwovi approċċ konsistenti għall-ippjanar tar-riżoluzzjoni fl-SRB u l-ARN. L-SRB adottah bħala abbozz ta’ dokument intern f’Marzu 2016. Minn dak iż-żmien ’il hawn, it-timijiet interni ta’ riżoluzzjoni kienu meħtieġa jużawh meta jippreparaw pjanijiet ta’ riżoluzzjoni. Il-manwal għall-ippjanar tar-riżoluzzjoni ġie ffriżat (mhux soġġett għal aġġornamenti) għal sena sabiex tinġabar feedback dwar l-ewwel esperjenzi ta’ ħidma bih mit-timijiet interni ta’ riżoluzzjoni.

87

Minbarra dan li ssemma hawn fuq, l-SRB żviluppa jew biħsiebu jiżviluppa mudelli ta’ rapportar³⁷, bl-objettiv li jiżgura li l-informazzjoni kollha neċessarja li jirċievi mill-banek tkun f’format standard għall-ippjanar tar-riżoluzzjonijiet u t-teħid ta’ deċiżjonijiet tiegħu. Dawn il-mudelli jissupplimentaw l-informazzjoni li l-BĊE u l-mudelli tal-EBA diġà jfornu³⁸. F’każijiet speċifiċi, l-SRB jista’ jitlob informazzjoni ukoll direttament lil bank.

88

Għar-raġunijiet stipulati hawn taħt, il-manwal għall-ippjanar tar-riżoluzzjoni jeħtieġ li jiġi żviluppat aktar. Madankollu, l-SRB diġà ppospona aġġornament ippjanat darbtejn, l-ewwel għal tmiem l-2017 u mbagħad għat-tieni trimestru tal-2018.

89

L-ewwel raġuni għall-aġġornament tal-manwal għall-ippjanar tar-riżoluzzjoni hija l-inklużjoni ta’ gwida ta’ politika dwar numru ta’ problemi speċifiċi. Pereżempju, kif meħtieġ mill-Ġabra Unika tar-Regoli, il-manwal għall-ippjanar tar-riżoluzzjoni jittratta d-determinazzjoni ta’ impedimenti sostantivi, iżda ma jirrikjedix li dan jiġi indirizzat fil-pjanijiet ta’ riżoluzzjoni tat-tieni fażi.

90

It-tieni nett, il-manwal għall-ippjanar tar-riżoluzzjoni ma jqisx ċerti dispożizzjonijiet leġiżlattivi importanti. Pereżempju, għalkemm ir-Regolament Delegat tal-Kummissjoni³⁹ jirrikjedi li l-pjanijiet ta’ riżoluzzjoni jinkludu sommarju tal-ġestjoni, il-manwal għall-ippjanar tar-riżoluzzjoni ma jirreferix għal dan ir-rekwiżit. Bl-istess mod, għalkemm il-manwal għall-ippjanar tar-riżoluzzjoni jirrikjedi valutazzjoni tar-riżolvibbiltà, il-mudell li huwa jagħti għas-sommarju tal-ġestjoni ma jipprevedix dikjarazzjoni ta’ dan it-tip. Barra minn hekk, la l-kapitolu dwar is-sommarju tal-ġestjoni u lanqas il-kapitolu dwar il-valutazzjoni tar-riżolvibbiltà ma jiddikjara r-rekwiżit biex tiġi nnotifikata l-EBA jekk bank jitqies li ma jkunx riżolvibbli⁴⁰.

91

It-tielet nett, il-manwal għall-ippjanar tar-riżoluzzjoni jeħtieġ li jiġi aġġornat biex jieħu kont tad-deċiżjoni ta’ politika li ttieħdet f’Settembru 2016 biex il-pjanijiet ta’ riżoluzzjoni komprensivi ma jibqħux jiġu abbozzati, u minflok biex jiġu ppreparati verżjonijiet ridotti ta’ 40 paġna bejn wieħed u ieħor (ara l-paragrafu 30). Madankollu, għadha ma ġiet ipprovduta l-ebda gwida dwar il-kontenut tal-pjanijiet ta’ riżoluzzjoni ridotti. Din il-bidla fl-approċċ għall-ippjanar tar-riżoluzzjonijiet seħħet fi żmien fejn ħafna PRT u pjanijiet tat-tieni fażi kienu diġà ġew żviluppati jew kienu qegħdin jiġu żviluppati fuq il-bażi ta’ analiżi fil-fond. Fi stħarriġ li wettaqna, xi ARN irrispondew li huma kienu ġew obbligati jonfqu riżorsi siewja fuq l-abbozzar mill-ġdid tal-pjanjiet ta’ riżoluzzjoni.

92

Il-Ġabra Unika tar-Regoli⁴¹ tagħti lok għall-applikazzjoni ta’ obbligi ssemplifikati għal ċerti banek⁴² fil-kuntest tal-ippjanar tar-riżoluzzjonijiet. Sa Mejju 2017, l-SRB ma kienx għamel użu minn din il-possibbiltà għal xi bank li jaqa’ taħt il-mandat tiegħu⁴³, u l-manwal għall-ippjanar tar-riżoluzzjoni ma jittrattax il-kontenut tal-pjanijiet ta’ riżoluzzjoni ssemplifikati u l-kriterji ta’ eliġibbiltà relatati⁴⁴. Nofs l-ARN fl-istħarriġ tagħna kkonfermaw in-nuqqas ta’ gwida tal-SRB f’dan ir-rigward. Matul l-awditu, l-SRB ma pprovdilniex nota ta’ politika dwar dan is-suġġett.

93

Minbarra titjib għall-manwal għall-ippjanar tar-riżoluzzjoni, hemm ċertu lok ukoll għal titjib għall-mudelli ta’ rapportar żviluppati mill-SRB. Wieħed mill-għanijiet tagħhom kien li tinkiseb informazzjoni li ma tkunx disponibbli minn sorsi oħra, u b’hekk jiġi evitat xogħol doppju tax-xogħol li jsir mill-banek. Ma hemm l-ebda rabta bejn il-mudelli tal-SRB u tal-EBA, madankollu dawn jitolbu xi informazzjoni parallela. Pereżempju, fil-maġġoranza l-kbira tal-każijiet, il-mudell tad-data dwar l-obbligazzjonijiet tal-SRB (LDT) u l-mudell tal-istruttura tal-obbligazzjonijiet⁴⁵ tal-EBA jitolbu informazzjoni simili dwar id-derivattivi. Għall-2017, biex jiġi evitat piż żejjed fuq il-banek b’talbiet għal data fejn ikun hemm duplikazzjoni, l-SRB ippermetta lill-banek biex jipprovdu biss data fil-mudell tal-SRB. Dan juri l-kumplessità tas-sistema kif ġiet imwaqqfa.

Noti ta’ politika

94

Biex tiġi żgurata applikazzjoni konsistenti tal-leġiżlazzjoni eżistenti u metodoloġija armonizzata fil-pjanijiet ta’ riżoluzzjoni kollha, l-SRB stabbilixxa programm ta’ ħidma dettaljat, b’numru ta’ noti ta’ politika li għandhom jiġu żviluppati fl-2017 u fl-ewwel nofs tal-2018. Peress li dan l-għoti ta’ gwida ta’ politika dwar suġġetti ewlenin għadu għaddej, ser ikun diffiċli li din tiġi inkluża fil-pjanijiet ta’ riżoluzzjoni tal-2017.

95

L-iskeda ta’ żmien interna tal-SRB għall-preparazzjoni ta’ noti ta’ politika fl-2017 ġiet riveduta f’Lulju 2017, u dan irriżulta f’dewmien għall-ikkompletar ta’ bosta noti. Peress li l-unità responsabbli għal dan il-kompitu bħalissa għandha nuqqas kbir ta’ persunal (ara l-paragrafu 109), id-dati fil-mira attwali tal-ikkompletar jidhru wkoll diffikultużi.

96

F’bosta punti fl-istħarriġ, l-ARN qalu jenħtieġ li l-SRB jagħti aktar enfażi lill-identifikazzjoni tal-aħjar prattiki u lill-għoti ta’ gwida uniformi għall-ippjanar tar-riżoluzzjoni.

97

Il-Ġabra Unika tar-Regoli⁴⁶ tirrikjedi li l-pjanijiet ta’ riżoluzzjoni jieħdu inkunsiderazzjoni x-xenarji rilevanti, inkluż dak ta’ falliment idjosinkratiku (speċifiku għal bank), jew falliment fi żmien ta’ instabbiltà finanzjarja usa’ jew avvenimenti sistemiċi oħrajn. Madankollu, nota ta’ politika waħda tal-SRB titlob li l-pjanijiet ta’ riżoluzzjoni jkunu bbażati biss fuq xenarju idjosinkratiku, b’xenarji oħrajn użati għall-ittestjar tal-kredibbiltà u l-fattibbiltà tal-istrateġija ta’ riżoluzzjoni ppreferuta. Fil-pjanijiet ta’ riżoluzzjoni kkampjunati, aħna ma sibna l-ebda evidenza li twettqu xi testijiet ta’ dan it-tip, u lanqas xi deskrizzjoni tax-xenarji preżunti għall-pjanijiet ikkampjunati.

98

L-analiżi interna proprja mwettqa mill-SRB rigward il-pjanijiet ta’ riżoluzzjoni turi li dawn ma jqisux xenarji rilevanti suffiċjenti. L-SRB iddikjara li huma meħtieġa linji gwida ulterjuri biex jiġi ddeterminat b’mod konsistenti liema xenarju għandu jintuża.

99

Ġie żvelat nuqqas ulterjuri ta’ metodoloġija konsistenti fl-analiżi trażversali proprja tal-SRB dwar l-ewwel ġabra ta’ pjanijiet ta’ riżoluzzjoni (dawk abbozzati fl-2016). L-analiżi sabet li interpretazzjonijiet differenti tal-leġiżlazzjoni eżistenti u n-nuqqas ta’ metodoloġija armonizzata kienu wasslu għal inkonsistenzi bejn il-pjanijiet u għal livell insuffiċjenti ta’ dettall. Pereżempju, xi timijiet interni ta’ riżoluzzjoni wettqu valutazzjonijiet skont il-linji operatorji u mhux skont l-entitajiet legali. Bosta pjanijiet qiesu li s-servizzi bankarji privati jew is-servizzi ta’ mmaniġġjar tal-assi kienu kritiċi filwaqt li oħrajn, f’ċirkustanzi analogi, qiesu li dawn il-funzjonijiet ma kinux kritiċi.

Politika dwar impedimenti sostantivi u MREL

100

Żewġ deċiżjonijiet oħra ta’ politika tal-SRB għandhom impatt fuq il-konformità tal-pjanijiet ta’ riżoluzzjoni mal-qafas leġiżlattiv. L-ewwel nett, il-Ġabra Unika tar-Regoli tirrikjedi li l-pjanijiet ta’ riżoluzzjoni jinkludu determinazzjoni tal-impedimenti sostantivi⁴⁷. Dan huwa proċess konsultattiv li jirrikjedi riżorsi, jieħu madwar sena u jenħtieġ li jwassal għal azzjonijiet ta’ segwitu mill-SRB biex jissolvew l-impedimenti identifikati. L-SRB ħa deċiżjoni ta’ politika interna biex jibda dan il-proċess fl-2018. Sa dak iż-żmien (ara l-paragrafi 73 u 74) l-SRB mhu ser jagħmel xejn aktar milli jidentifika impedimenti potenzjali li, minħabba li mhumiex meqjusa “sostantivi”, mhux ser jieħu azzjoni formali dwarhom. Fil-fehma tagħna, din il-politika interim ma tissodisfax ir-rekwiżiti legali.

101

It-tieni nett, ma hemm l-ebda politika definittiva tal-SRB dwar il-kalkolu tal-MREL. L-SRB ippubblika l-approċċ preliminari li uża fl-2016⁴⁸, li kien iserraħ fuq miri “informattivi” tal-MREL (ara l-paragrafu 78). Nota ta’ politika finali dwar l-MREL, bil-ħsieb li jiġu stabbiliti miri vinkolanti, mhijiex skedata qabel tmiem l-2017. L-istħarriġ tagħna wera li l-ARN jinsabu partikolarment ħerqana biex l-SRB jimxi ’l quddiem fir-rigward ta’ din in-nota ta’ politika u dik dwar l-impedimenti sostantivi. Azzjoni dwar dawn il-punti hija importanti biex jiġi żgurat li l-pjanijiet ikunu konformi mal-Ġabra Unika tar-Regoli u li l-banek ikollhom kapaċità suffiċjenti ta’ assorbiment tat-telf.

Kontrolli tal-ġestjoni u aċċertament tal-kwalità

102

L-SRB ipprovdielna biss deskrizzjoni ġenerali tal-oqfsa tiegħu ta’ kontroll intern u ta’ aċċertament tal-kwalità. Il-bilanċ tas-sejbiet f’dan ir-rapport (ara l-paragrafi 37 sa 82) jiżvela dgħufijiet f’dawn il-kontrolli tal-ġestjoni. Dan huwa kkonfermat mill-eżerċizzju trażversali proprju tal-SRB, li sab bosta nuqqasijiet kwalitattivi fil-pjanijiet ta’ riżoluzzjoni.

L-SRB għandu nuqqas serju ta’ persunal

103

L-awditu ta ħarsa lejn il-kwistjonijiet relatati mar-riżorsi umani minn meta twaqqaf l-SRB, u sab nuqqas ta’ prijoritizzazzjoni tar-reklutaġġ li huwa neċessarju fil-fażi tal-bidu.

Nuqqas konsistenti ta’ lħuq tal-miri tal-ingaġġ ta’ persunal

104

Il-Kummissjoni oriġinarjament stmat li r-rekwiżit tal-persunal tal-SRB ikun ta’ 309 ekwivalenti għall-full-time (FTEs)⁴⁹. Din iċ-ċifra kienet ġejja parzjalment minn valutazzjoni komparattiva mal-Korporazzjoni Federali tal-Assigurazzjoni tad-Depożiti, li għandha firxa simili ta’ kompiti fil-qasam tar-riżoluzzjoni. Il-pjan inizjali kien li l-SRB jilħaq dan in-numru sa tmiem l-2015. F’Settembru 2016, l-SRB analizza l-ħtiġijiet tiegħu ta’ persunal u żied l-istima oriġinali għal 350 FTE, li għandha tintlaħaq sal-2017. L-abbozz ta’ baġit pluriennali għall-2018-2020 jipprevedi żieda ulterjuri għal 410 FTEs sa tmiem l-2019, żieda ta’ 33 % meta mqabbla mal-istima oriġinali.

105

Sa mill-bidu nett, in-numri reali tal-persunal ilhom konsistentement ma jintlaħqu bħala mira. Il-kampanji ta’ reklutaġġ inizjali kienu organizzati mill-Kummissjoni. Meta f’Marzu 2015 l-SRB ħa r-responsabbiltà sħiħa f’idejh għar-reklutaġġ, huwa kellu 35 membru tal-persunal. Dan in-numru żdied għal 101 membru tal-persunal sa tmiem l-2015 u għal 171 sa tmiem l-2016.

106

Is-sitwazzjoni hija l-aktar serja fir-reklutaġġ ta’ esperti fir-riżoluzzjoni u l-politika, li l-ħtieġa għalihom ġiet stmata b’mod insuffiċjenti fl-2015 u l-2016. Hemm ukoll nuqqas kritiku fil-persunal tal-IT u dak segretarjali.

107

In-nuqqasijiet fil-persunal fid-direttorati tal-ippjanar tar-riżoluzzjoni affettwaw sinifikattivament il-proċess tal-ippjanar tar-riżoluzzjonijiet. Dawn kellhom impatt partikolari fuq l-ammont ta’ xogħol tal-koordinaturi tat-timijiet interni ta’ riżoluzzjoni, li l-biċċa l-kbira minnhom huma responsabbli għal aktar minn 10 banek. Id-dmirijiet tal-SRB skont il-leġiżlazzjoni, bħar-responsabbiltà tiegħu ta’ ppjanar tar-riżoluzzjonijiet għall-banek transfruntiera li jkunu inqas sinifikanti, tefgħu pressjoni addizzjonali fuq riżorsi diġà skarsi.

108

It-tabelli tal-persunal tal-SRB jindirizzaw ir-rekwiżit tal-persunal tiegħu f’termini ta’ numri kumplessivi kif ukoll ta’ status u gradi mixtieqa. L-SRB iddetermina kemm-il membru tal-persunal huwa jeħtieġ biex ikopri l-ħidma skont id-daqs ta’ grupp bankarju. Madankollu, huwa ma vvalutax il-kompetenza u ħiliet oħra neċessarji fid-direttorati u l-unitajiet individwali tal-ippjanar tar-riżoluzzjoni. Ċerti direttorati huma nieqsa minn jew għandhom nuqqas ta’ esperti speċifiċi (pereżempju esperti fil-valwazzjoni) u persunal b’ħiliet fil-lingwa rilevanti. Xi unitajiet għandhom proporzjon għoli ta’ persunal subaltern.

109

Minħabba n-nuqqas ta’ persunal, ħidma importanti fuq politiki u linji gwida ma ġietx ikkompletata. Sa tmiem Marzu 2017, id-direttorat reponsabbli għall-istrateġija, il-proċessi u l-metodoloġija ta’ riżoluzzjoni kellu biss terz tan-numru tal-persunal fil-mira. Biex jikkumpensaw parzjalment għal dan in-nuqqas, id-direttorati tal-ippjanar tar-riżoluzzjoni kienu qed jiddedikaw parti sinifikanti minn ħinhom għal ħidma fuq il-politika u għal suġġetti oħra mhux marbuta mar-riżoluzzjonijiet (25 % fl-2016) minflok ma ffokaw fuq il-ħidma ewlenija tagħhom.

110

Dawran għoli fisser nuqqas fil-persunal fl-unità tal-IT, li lanqas ma għandha sistema adegwata tal-IT u għalhekk ma tistax tappoġġa b’mod effiċjenti l-proċess tal-ippjanar tar-riżoluzzjonijiet. Jenħtieġ li l-introduzzjoni ta’ sistema mtejba tal-IT għall-ippjanar tar-riżoluzzjonijiet tkun parti mill-istrateġija tal-IT li qed tiġi żviluppata bħalissa.

111

In-nuqqas fil-persunal tal-SRB rriżulta f’rati għolja ta’ sahra, li rrappreżentaw madwar 15 000 siegħa jew 6 % tat-total tal-ħin tax-xogħol fl-ewwel 10 xhur tal-2016.

112

Fl-Ewropa, ir-riżoluzzjoni bankarja hija qasam li qed jiżviluppa u l-professjoni ta’ espert fir-riżoluzzjoni għadha pjuttost ġdida. Minħabba f’hekk, il-biċċa l-kbira mill-persunal irreklutat f’pożizzjonijiet ta’ ppjanar tar-riżoluzzjonijiet jeħtieġ li jiksbu għarfien dwar l-impjieg. Barra minn hekk, fl-aħħar sentejn sa tliet snin, l-SRB kellu jikkompeti bil-qawwa ma’ korpi oħra tal-UE (il-Kummissjoni u l-BĊE) u mas-settur bankarju biex jiġbed persunal ikkwalifikat⁵⁰. Kważi 75 % tal-ARN fl-istħarriġ tagħna ddikjaraw li kien diffiċli wkoll li jirreklutaw persunal speċjalizzat fir-riżoluzzjoni biex jimlew pożizzjonijiet ta’ impjieg nazzjonali.

113

L-SRB ikkonferma li r-reklutaġġ huwa diffikultuż, minħabba proċessi twal ta’ reklutaġġ, in-numru limitat ta’ kandidati xierqa f’suq tax-xogħol kompetittiv ħafna, u nuqqas ta’ applikanti li jkunu lesti li jingħaqdu mal-SRB fuq kuntratti temporanji.

114

L-SRB informana wkoll li mhux ser jilħaq il-miri tiegħu tal-persunal għall-2017, u dan jagħmilha diffiċli biex iwettaq bis-sħiħ il-mandat legali tiegħu. Barra minn hekk, huwa jistenna li anki fl-2020 it-total tan-numru ta’ persunal disponibbli għall-SRB mhux ser ikun proporzjonat man-numru meqjus neċessarju biex ikun jista’ jwettaq l-obbligi tiegħu bis-sħiħ.

Funzjoni tal-HR b’riżorsi insuffiċjenti għandha impatt fuq ir-reklutaġġ

115

Bħalissa, ir-reklutaġġ huwa b’mod speċjali kritiku għall-SRB, fis-snin bikrija tiegħu, minħabba d-durata tal-proċeduri ta’ reklutaġġ u l-volumi kbar ta’ persunal meħtieġa. Fir-Rapport Annwali 2015, l-SRB identifika l-istabbiliment ta’ funzjoni effettiva tal-HR bħala waħda mill-prijoritajiet ewlenin għall-fażi tal-bidu tiegħu.

116

F’Marzu 2015, meta l-SRB ħa r-reklutaġġ f’idejh mill-Kummissjoni, it-tim tal-HR tiegħu kien magħmul minn żewġ persuni, li waħda minnhom ħadmet fuq ir-reklutaġġ. Fi tmiem l-2015, it-total tan-numru ta’ persunal tal-HR kien żdied għal sebgħa, inklużi tnejn biss b’responsabbiltà għar-reklutaġġ. F’Diċembru 2016, it-tim tal-HR kien għad kellu kapaċità limitata – it-tim kien magħmul biss minn seba’ membri tal-persunal, li tlieta minnhom biss ħadmu fuq ir-reklutaġġ.

117

Biex jippubblika l-pożizzjonijiet battala, it-tim tal-HR uża biss mezzi ta’ reklutaġġ limitati, bħas-siti web tar-reklutaġġ tiegħu stess u tal-UE, kif ukoll il-midja soċjali, iżda mhux l-istampa finanzjarja speċjalizzata. Barra minn hekk, dan ma għandux għodod tal-IT magħmula apposta għar-reklutaġġ u għall-ġestjoni tal-persunal. Dan irriżulta fi żball fil-verifikazzjoni tal-applikazzjonijiet għal impjiegi u f’ineffiċjenzi fl-inventarju tal-fajls tal-persunal.

118

Il-programm ta’ taħriġ tal-SRB, li parti minnu hija miftuħa għall-persunal tal-ARN, jiffoka fuq it-tisħiħ tal-għarfien tal-persunal dwar l-elementi bażiċi tar-riżoluzzjoni u fuq is-sensibilizzazzjoni dwar każijiet ta’ riżoluzzjoni fil-ħajja reali. Avvenimenti ta’ taħriġ magħżula huma eżempji ta’ prattika tajba. Dawn jinkludu preżentazzjonijiet ta’ studji tal-każijiet, immirati lejn, fost oħrajn, l-iżvilupp ta’ kultura ta’ riżoluzzjoni komuni, u seminars fil-ħin ta’ nofsinhar.

Jeħtieġ li jsir titjib fil-qafas ta’ kooperazzjoni mal-ARN u mal-BĊE

119

L-awditu eżamina r-relazzjoni bejn l-SRB u l-ARN, kif ukoll bejn l-SRB u l-BĊE, rispettivament, u sab li jeħtieġ li jsir titjib fil-kondiviżjoni tal-informazzjoni u fil-kooperazzjoni.

Nuqqas ta’ ċarezza fil-kooperazzjoni mal-ARN

120

L-SRB huwa meħtieġ jikkoordina u jikkoopera mal-ARN fi ħdan l-SRM.

121

L-SRB iddeċieda li jwaqqaf timijiet interni ta’ riżoluzzjoni għar-riżoluzzjoni tal-gruppi bankarji kollha li jaqgħu taħt il-mandat tiegħu, li jinvolvu kombinament ta’ persunal tal-SRB u tal-ARN. It-timijiet interni ta’ riżoluzzjoni dejjem jitmexxew minn persunal tal-SRB. L-SRB stabbilixxa total ta’ 75 tim intern ta’ riżoluzzjoni, xi wħud b’responsabbiltà għal aktar minn grupp wieħed.

122

It-tqassim tal-kompiti bejn l-SRB u l-ARN għadu mhuwiex ċar. Fi tmiem l-2016, l-SRB stabbilixxa task force biex jilħaq qbil dwar id-distribuzzjoni operazzjonali tax-xogħol. Fil-fehma tagħna, huwa diffiċli li ssir stima tal-ħtiġijiet tal-persunal u tal-baġit mingħajr distribuzzjoni ċara tal-kompiti.

123

Ir-Regolament dwar l-MSU ma jispeċifikax il-firxa preċiża tal-involviment rispettiv tal-SRB u tal-ARN fit-timijiet interni ta’ riżoluzzjoni. Konsegwentement, l-SRB ma għandux kontroll fuq il-kompożizzjoni, l-anzjanità, il-kompetenza jew l-evalwazzjoni tal-prestazzjoni tal-persunal assenjat mill-ARN biex jaħdem f’timijiet interni ta’ riżoluzzjoni. Huwa jista’ biss jesprimi l-fehmiet tiegħu dwar in-numru minimu tal-persunal meħtieġ għal tim intern ta’ riżoluzzjoni u l-livell tal-kontribut tal-ARN. Iċ-ċifri ppjanati għall-2017 jagħtu proporzjon ta’ ħames membri tal-persunal tal-SRB għal sitt membri tal-persunal tal-ARN. Bi tqabbil ma’ dan, il-proporzjon medju ta’ persunal tal-BĊE għall-persunal tal-awtoritajiet nazzjonali kompetenti (ANK) f’timijiet superviżorji konġunti huwa ta’ 1:3⁵¹.

124

Il-livell attwali ta’ ingaġġ tal-persunal għat-timijiet interni ta’ riżoluzzjoni mhuwiex biżżejjed għax-xogħol assenjat lilhom. L-SRB kien alloka madwar 60 FTE, bejn wieħed u ieħor, għal timijiet interni ta’ riżoluzzjoni sa tmiem l-2016. Dan in-numru huwa ppjanat li jiżdied għal 170 sa tmiem l-2017, għalkemm huwa ċar li, sakemm ma tinbidilx l-allokazzjoni tal-kompiti attwali, proporzjon sinifikanti ta’ dan il-persunal ser jibqa’ jiġi assenjat għall-ħidma fuq il-politika u fuq suġġetti oħra mhux marbuta mar-riżoluzzjoni.

125

Il-miri tal-persunal għall-2017 ma kinux realistiċi, minħabba diffikultajiet fir-reklutaġġ. Fl-2017, l-ARN kienu qed jippjanaw li jassenjaw 155 FTE biex jaħdmu f’timijiet interni ta’ riżoluzzjoni. B’hekk, sa tmiem l-2017, l-allokazzjoni medja tal-persunal tal-SRB għal kull bank tkun ta’ 0.9 FTEs, u dik tal-ARN ta’ 1.1 FTEs, b’total ta’ 2.0 FTEs biss għal kull bank. Meta jitqiesu d-daqs u l-kumplessità ta’ ħafna banek u l-livell meħtieġ ta’ ppjanar fil-fond, din iċ-ċifra tidher baxxa.

126

Bħala koordinatur ewlieni fi ħdan l-SRM, l-SRB ma joħroġx biss gwida għall-ARN iżda huwa responsabbli wkoll għall-applikazzjoni konsistenti tal-qafas leġiżlattiv. Għal din il-fini, l-SRB għandu s-setgħa jitlob informazzjoni mill-ARN dwar it-twettiq tal-kompiti tagħhom. Il-monitoraġġ tal-ħidma tal-ARN fuq banek li jkunu inqas sinifikanti huwa importanti wkoll peress li, f’ċerti ċirkustanzi, l-SRB jista’ jieħu f’idejh ir-responsabbiltà diretta għall-banek li jkunu inqas sinifikanti. Sa Mejju 2017, l-SRB ma kienx uża l-possibbiltà tiegħu li jeżerċita setgħa diretta rigward banek li jkunu inqas sinifikanti. Lanqas ma kien għadu stabbilixxa funzjoni għas-sorveljanza tal-ARN. Għalhekk, dan ma għandux informazzjoni dwar il-ħidma li għadha għaddejja fi ħdan l-ARN.

127

Madankollu, l-SRB stabbilixxa sistema ta’ twissija bikrija li skontha l-ARN huma meħtieġa jinnotifikawh dwar banek li jkunu inqas sinifikanti li juru sinjali ta’ deterjorament serju. Barra minn hekk, il-BĊE jipprovdi lill-SRB lista ta’ banek prijoritarji li jkunu inqas sinifikanti, u sa Mejju 2017 dan kien identifika 93 bank b’dan il-mod⁵².

128

Biex jiżgura applikazzjoni konsistenti tal-qafas leġiżlattiv, l-SRB jista’ janalizza l-abbozzi ta’ deċiżjonijiet tal-ARN dwar, pereżempju, pjanijiet ta’ riżoluzzjoni, u jikkummenta kif iħoss li jkun neċessarju. Fl-2016, l-ARN iffokaw fuq banek sinifikanti u għalhekk ippreparaw ftit li xejn pjanijiet ta’ riżoluzzjoni għal banek li jkunu inqas sinifikanti. Madankollu, matul l-awditu, l-SRB informana li l-ARN fil-futur ser ikunu qegħdin jagħmlu aktar enfasi fuq l-ippjanar għal banek li jkunu inqas sinifikanti. Fil-programm ta’ ħidma tiegħu għall-2017, l-SRB ħabbar li ser ikompli jiżviluppa r-rwol tiegħu fl-SRM permezz ta’ monitoraġġ u valutazzjoni tal-abbozzi ta’ deċiżjonijiet ta’ riżoluzzjoni meħuda mill-ARN dwar banek li jaqgħu taħt il-mandat tagħhom li jkunu inqas sinifikanti. Dan ikun iżid sinifikattivament l-ammont ta’ xogħol tal-SRB.

129

Ftit wara li ġie stabbilit, l-SRB organizza bosta sessjonijiet ta’ prattika dwar simulazzjoni ta’ falliment ta’ bank, li involvew lill-BĊE, lill-Kummissjoni, lill-Kunsill u lill-awtoritajiet rilevanti tar-Renju Unit u tal-Istati Uniti. Madankollu, l-ebda ARN ma ħadet sehem f’dawn l-eżerċizzji, li koprew it-teħid ta’ deċiżjonijiet iżda mhux il-proċess sħiħ ta’ riżoluzzjoni. Barra minn hekk, minkejja li l-organizzazzjoni tal-SRB, inklużi l-persunal u r-riżorsi tal-IT tiegħu, inbidlet sinifikattivament minn dak iż-żmien ’il hawn, ma twettqet l-ebda sessjoni ta’ prattika ulterjuri.

Nuqqasijiet fil-qafas ta’ kooperazzjoni mal-BĊE

130

Bħala s-superviżur dirett għall-biċċa l-kbira mill-banek li jaqgħu taħt il-mandat tal-SRB, jenħtieġ li l-BĊE jipprovdi lill-SRB firxa wiesgħa ta’ informazzjoni dwar dawn il-banek.

131

L-SRB u l-BĊE kkonkludew memorandum ta’ qbil (MtQ) biex jiffaċilitaw il-kooperazzjoni bejniethom. L-MtQ jibni fuq l-obbligu legali għall-partijiet li jikkooperaw. Kif meħtieġ mir-Regolament dwar l-SRM⁵³, l-SRB u l-BĊE ppubblikaw l-MtQ fuq is-siti web tagħhom, iżda hemm erba’ annessi li sa issa għadhom ma ġewx ippubblikati.

132

Aħna nqisu li l-MtQ u l-annessi tiegħu mhumiex komprensivi biżżejjed biex jiżguraw li l-SRB ikollu l-informazzjoni kollha li jeħtieġ mill-BĊE biex iwettaq il-kompiti tiegħu f’waqthom u b’mod effiċjenti. Fil-kuntest tal-preparazzjoni ta’ riżoluzzjonijiet, ċerta informazzjoni dwar il-likwidità u l-kapital li tkun utli għall-SRB ma tiġix kondiviża awtomatikament mill-BĊE⁵⁴. Minflok, l-SRB huwa obbligat jagħmel talbiet speċjali lill-BĊE għal din l-informazzjoni, u dan jieħu l-ħin u r-riżorsi. L-evidenza għall-awditjar issuġġeriet li informazzjoni oħra, bħal riżultati ta’ spezzjonijiet fuq il-post, tiġi kondiviża parzjalment biss u mhux dejjem fil-pront mill-BĊE. Il-valutazzjonijiet tal-SREP ma jiġux kondiviżi daqskemm meħtieġ mill-Ġabra Unika tar-Regoli⁵⁵.

133

Barra minn hekk, l-MtQ ma jiżgurax li l-SRB ser jirċievi informazzjoni mit-taqsima tal-ġestjoni tal-kriżijiet tal-BĊE, li tkun utli wkoll għall-ippjanar tar-riżoluzzjonijiet. Anki informazzjoni ġenerali, bħal lista ta’ banek attwalment immonitorjati minn din id-diviżjoni, sa issa għadha ma ġietx kondiviża b’mod formali.

134

L-MtQ jipprovdi li l-BĊE u l-SRB jistgħu jaqblu li jipparteċipaw fl-ispezzjonijiet fuq il-post ta’ xulxin. Sa issa l-SRB la wettaq xi spezzjoni fuq il-post u lanqas ma pparteċipa f’dawk tal-BĊE.

135

L-SRB huwa responsabbli għal 15-il bank transfruntier li huma inqas sinifikanti u li huma sorveljati direttament minn ANK u indirettament biss mill-BĊE. Din l-inkongruwenza bejn il-mandati taż-żewġ awtoritajiet toħloq sfidi għall-SRB. Pereżempju, il-BĊE għandu xi informazzjoni superviżorja dwar il-banek kollha fiż-żona tal-euro, li parti minnha jirċeviha mill-ANK. Madankollu, il-BĊE ma tax aċċess lill-SRB għall-informazzjoni rilevanti dwar il-15-il bank transfruntier li huma inqas sinifikanti. Għalhekk, l-SRB huwa obbligat li jistabbilixxi oqfsa ta’ kooperazzjoni addizzjonali li jinvolvu sistemi ta’ kondiviżjoni ta’ informazzjoni ma’ 17-il superviżur nazzjonali⁵⁶, u li jorganizza t-trasferiment ta’ data separatament ma’ kull wieħed minnhom. Dan l-isforz doppju jikkonsma r-riżorsi tal-SRB u huwa ineffiċjenti.

136

L-aktar parti importanti tal-kooperazzjoni bejn l-SRB u l-BĊE hija l-ġestjoni tal-kriżijiet. Kif spjegat fil-paragrafi 9-11, hemm tliet fażijiet fil-proċedura għall-indirizzar ta’ bank fi kriżi, li waħda minnhom hija intervent bikri.

137

Il-Ġabra Unika tar-Regoli tirrikjedi li tiġi ddeterminata ġabra ta’ skattaturi għall-attivazzjoni ta’ miżuri ta’ intervent bikri⁵⁷. L-EBA ħarġet linja gwida biex tippromwovi l-użu konsistenti ta’ dawn l-iskattaturi. L-ewwel nett, il-linja gwida tidentifika skattaturi bbażati fuq il-punteġġ tal-SREP, li jiġi aġġornat mill-inqas kull sena. Il-BĊE juża dan l-iskattatur. It-tieni nett, il-linja gwida tindika li miżuri ta’ intervent bikri jistgħu jiġu skattati minn avvenimenti ta’ importanza sinifikanti. Il-BĊE jiddikjara li huwa wkoll juża dan l-iskattatur, u dan huwa approċċ diskrezzjonali. It-tielet approċċ li jista’ jintuża huwa li jiġu identifikati skattaturi abbażi ta’ indikaturi ewlenin. Dan ikun jipprevedi approċċ kwantitattiv, iżda attwalment dan ma jintużax mill-BĊE. Jekk kundizzjoni tal-iskattatur ma tiġix rispettata, ikun meħtieġ li titwettaq valutazzjoni mis-superviżur ta’ jekk jenħtieġx li tiġi attivata fażi ta’ intervent bikri. Skont il-linja gwida tal-EBA, l-intervent bikri ma jiġix attivat awtomatikament, iżda jenħtieġ li s-superviżur jiddokumenta b’mod ċar kull każ fejn il-kundizzjonijiet tal-iskattaturi ma jiġux rispettati, inklużi r-raġunijiet għalfejn ma titteħditx miżura. Ladarba l-BĊE jkun iddeċieda li japplika miżuri ta’ intervent bikri, dan ikun meħtieġ li jinnotifika lill-SRB bid-deċiżjoni tiegħu⁵⁸.

138

Fażi ta’ intervent bikri adegwata kif prevista mill-qafas leġiżlattiv hija essenzjali jekk l-SRB irid li jkun lest f’każ ta’ kriżi. Permezz tan-notifika ta’ intervent bikri, l-SRB jista’ jaġġorna l-pjan ta’ riżoluzzjoni tiegħu u jabbozza skema ta’ riżoluzzjoni bbażata fuq l-aktar informazzjoni aġġornata. Ir-regoli dwar intervent bikri jagħtu wkoll lill-SRB ċerti drittijiet speċifiċi, bħas-setgħa li jirrikjedi li l-bank jikkuntattja lil xerrejja potenzjali⁵⁹. Madankollu, bank jista’ jiġi ddikjarat “FOLTF” anki jekk ma kien hemm l-ebda intervent bikri, u dan seħħ fl-2017.

139

Matul il-fażi ta’ intervent bikri, jeħtieġ li l-BĊE u l-SRB jikkooperaw mill-qrib dwar il-monitoraġġ tal-bank u jikkondividu l-informazzjoni kollha neċessarja biex jaġġornaw il-pjan ta’ riżoluzzjoni u jippreparaw għar-riżoluzzjoni.

140

Il-BĊE u l-SRB huma mistennija li jiżguraw konsistenza fl-azzjoni kollha matul il-fażi ta’ intervent bikri⁶⁰. Għal din il-fini, l-SRB abbozza, iżda (sa Lulju 2017) għadu ma adottax, ġabra ta’ passi proċedurali. Bħalissa ma hemm l-ebda qafas formali jew gwida ex ante għall-indirizzar tal-banek fil-perjodu ta’ żmien li jwassal għal riżoluzzjoni.

141

Kif imsemmi fil-paragrafu 11, l-SRB jista’ jwettaq il-valutazzjoni tal-FOLTF tiegħu stess f’ċerti ċirkustanzi⁶¹. L-SRB għadu ma stabbiliex qafas għall-valutazzjoni ta’ jekk bank hux qed ifalli jew probabbilment hux ser ifalli. Bħala punt ta’ informazzjoni, sa tmiem ix-xogħol tal-awditjar fuq il-post, l-SRB kien għadu ma wettaqx valutazzjoni tal-FOLTF.

142

Il-qafas leġiżlattiv attwali jagħti lill-BĊE status ta’ osservatur permanenti fis-seduti kollha tal-SRB. Dan l-istatus jagħtih id-dritt biex jaċċessa informazzjoni importanti dwar firxa wiesgħa ta’ oqsma ta’ politika. Madankollu, l-SRB ma għandux l-istess status fil-laqgħat tal-Bord Superviżorju tal-BĊE. Il-BĊE jista’ jistieden lill-President tal-SRB biex jipparteċipa bħala osservatur f’ċerti laqgħat, iżda mhuwiex obbligat li jagħmel dan. Għalkemm il-BĊE ddikjaralna li l-President tal-SRB jiġi, fil-prattika, mistieden għal-laqgħat fejn jiġu diskussi kwistjonijiet li jaqgħu taħt il-mandat tal-SRB, mhuwiex obbligat li jagħmel dan. Dan jagħmel lill-SRB dipendenti fuq ir-rieda tajba tal-BĊE għall-fluss ta’ ċerta informazzjoni li hija tkun teħtieġ għall-preparazzjoni ta’ riżoluzzjonijiet.

Konklużjonijiet u rakkomandazzjonijiet

143

It-tfassil u l-istabbiliment ta’ qafas ta’ riżoluzzjoni għall-banek fl-Ewropa kienu kompitu kumpless, peress li l-banek ma jistgħux jiġu stralċati faċilment b’mod ordnat. Kien meħtieġ approċċ ġdid peress li, qabel il-kriżi, ir-riżoluzzjoni bankarja ma kinitx parti mix-xogħol ta’ kuljum tar-regolaturi u s-superviżuri tal-banek. L-SRB għadu fl-iżvilupp bikri tiegħu. L-istabbiliment tiegħu mix-xejn, f’perjodu ta’ żmien qasir ħafna ħoloq sfida sinifikanti ħafna għall-maniġment tiegħu, u l-leġiżlazzjoni rilevanti ftit li xejn ipprevediet approċċ maqsum f’fażijiet għall-implimentazzjoni, filwaqt li stipulat aġenda enormi ta’ kompiti li kellhom jitwettqu. Id-dgħufijiet kollha li identifikajna jridu jitqiesu f’dan il-kuntest.

144

Għal diversi raġunijiet, l-SRB iffaċċja diffikultajiet fir-reklutaġġ ta’ persunal suffiċjenti bil-ħiliet xierqa. Fil-bidu nett tiegħu fl-2015, l-SRB kien diġà ma laħaqx il-mira tiegħu relatat mal-persunal. Proċessi ta’ reklutaġġ ineffiċjenti għal kompitu diffikultuż, flimkien ma’ suq tax-xogħol kompetittiv ħafna, imbagħad żiedu mal-pass kajman tar-reklutaġġ. Dan id-dewmien fl-ingaġġ tal-persunal kellu impatt negattiv fuq l-oqsma kollha tal-attivitajiet tal-SRB (b’mod partikolari l-ippjanar tar-riżoluzzjonijiet u l-ħidma fuq il-politika) minkejja l-impenn u l-motivazzjoni tal-persunal tiegħu.

145

Il-konklużjoni kumplessiva tagħna hija li, f’dan l-istadju relattivament bikri, hemm nuqqasijiet fil-preparazzjoni tal-SRB għall-kompiti tiegħu, u huma meħtieġa numru ta’ azzjonijiet (ara hawn taħt) biex tittejjeb is-sistema.

L-ippjanar tar-riżoluzzjonijiet għadu xogħol fl-idejn

146

L-SRB għadu ma kkompletax l-ippjanar tar-riżoluzzjonijiet għall-banek li jaqgħu fi ħdan il-mandat tiegħu. Filwaqt li l-approċċ tal-SRB huwa li jabbozza pjanijiet f’bosta fażijiet, l-ebda wieħed għadu ma laħaq il-fażi finali, u hemm wisq nuqqas ta’ konformità mal-Ġabra Unika tar-Regoli (ara l-paragrafi 27 u 83).

147

Oqsma problematiċi jinkludu d-determinazzjoni ta’ impedimenti sostantivi u l-kwota għall-MREL. L-SRB ma ssodisfax l-obbligu tiegħu li jistabbilixxi data sa meta għandu jitfassal l-ewwel pjan ta’ riżoluzzjoni għal kull bank (ara l-paragrafu 29).

148

Minkejja li l-SRB stinka ħafna u wera impenn kbir biex jiżgura li, mill-inqas, jiġu stabbiliti verżjonijiet preliminari tal-pjanijiet ta’ riżoluzzjoni għall-biċċa l-kbira mill-banek, il-pjanijiet li huwa adotta sa issa ma jistgħux jitqiesu li huma konformi mal-Ġabra Unika tar-Regoli. Filwaqt li din il-problema hija kemxejn mitigata mid-disponibbiltà ta’ informazzjoni ta’ sfond dwar ħafna mill-banek li għalihom ġew ippreparati pjanijiet, għad hemm defiċjenzi sinifikanti relatati mar-rekwiżiti leġiżlattivi.

149

Ir-Regolament dwar l-MSU jirrikjedi li l-SRB jinnotifika lill-EBA f’waqtu meta dan iqis li bank ma jkunx riżolvibbli (ara l-paragrafu 72). Aħna ma sibna l-ebda dikjarazzjoni espliċita mill-SRB f’xi wieħed mill-pjanijiet ta’ riżoluzzjoni kkampjunati li l-bank seta’ effettivament jiġi riżolt (ara l-paragrafu 71).

150

Il-pjanijiet ta’ riżoluzzjoni ma fihomx valutazzjoni tal-fattibbiltà tal-istrateġiji ta’ riżoluzzjoni magħżula (ara l-paragrafu 65). Konsegwentement, il-pjanijiet li aħna eżaminajna ma kkonkludewx dwar jekk l-istrateġija ppreferuta setgħetx tiġi applikata b’mod effettiv u f’waqtu, kif meħtieġ mill-Ġabra Unika tar-Regoli. Lanqas ma kien hemm xi valutazzjonijiet tal-kredibbiltà tal-istrateġija magħżula (ara l-paragrafu 66). Fl-aħħar nett, l-SRB ma jirrikjedix li l-banek jittestjaw l-applikazzjoni tal-għodda tar-rikapitalizzazzjoni interna (ara l-paragrafu 60).

Rakkomandazzjoni 1

Jenħtieġ li l-SRB jikkompleta l-ippjanar tar-riżoluzzjonijiet tiegħu għall-banek li jaqgħu taħt il-mandat tiegħu kif ġej:

1. jiddetermina data għall-ikkompletar ta’ pjan ta’ riżoluzzjoni konformi bis-sħiħ għal kull bank li jaqa’ taħt il-mandat tiegħu, bl-użu ta’ approċċ prijoritizzat biex jiżgura stat ta’ preparazzjoni ta’ livell għoli għal banek aktar riskjużi, kif ukoll pjan ta’ azzjoni għal implimentazzjoni f’waqtha;
2. jinkludi dikjarazzjoni speċifika dwar ir-riżolvibbiltà fil-pjanijiet kollha ta’ riżoluzzjoni u jinforma lill-EBA immedjatament jekk iqis li bank ma jkunx riżolvibbli;
3. jivvaluta, f’kull pjan ta’ riżoluzzjoni, il-fattibbiltà u l-kredibbiltà tal-istrateġija ta’ riżoluzzjoni magħżula, filwaqt li jieħu inkunsiderazzjoni jekk din tistax tiġi applikata b’mod effettiv u f’waqtu. Biex jivvaluta l-kredibbiltà, jenħtieġ li l-SRB jeżamina l-impatt li l-għodod ta’ riżoluzzjoni magħżula jista’ jkollhom fuq istituzzjonijiet finanzjarji oħrajn, fuq l-SMEs u fuq il-kredituri fil-livell ta’ konsumatur. Jenħtieġ li l-SRB jirrikjedi li l-banek iwettqu testijiet biex juru li l-obbligazzjonijiet jistgħu jkunu soġġetti għal rikapitalizzazzjoni interna b’mod effettiv fi ħdan il-perjodu ta’ żmien previst mill-pjan ta’ riżoluzzjoni.

Data mmirata għall-implimentazzjoni għar-Rakkomandazzjoni (a): mill-aktar fis possibbli iżda mhux aktar tard minn Ġunju 2018.

Data mmirata għall-implimentazzjoni għar-Rakkomandazzjonijiet (b) u (c): Mill-aktar fis possibbli, iżda mhux aktar tard minn tmiem l-2018.

Is-sistema ta’ regoli għall-ippjanar tar-riżoluzzjonijiet għadha mhijiex kompleta

151

L-SRB għadu ma stabbiliex sistema kompleta ta’ regoli għall-indirizzar tal-ippjanar tar-riżoluzzjonijiet. B’mod speċifiku, għad hemm gwida insuffiċjenti jew inadegwata fl-oqsma li ġejjin:

1. Minkejja l-importanza li jiġu ddeterminati l-MREL u l-impedimenti sostantivi, il-persunal tal-SRB u tal-ARN ingħata gwida inkompleta, jew l-ebda gwida ta’ xejn, dwar kif għandu jagħmel dan għall-banek li jaqgħu taħt il-mandat tiegħu (ara l-paragrafu 100).
2. Il-manwal għall-ippjanar tar-riżoluzzjoni ma ġiex aġġornat biex jirrifletti bidliet fil-politika u żviluppi legali ewlenin; fl-iterazzjoni attwali tiegħu dan jipprovdi biss gwida limitata u mhux vinkolanti għall-ARN (ara l-paragrafu 88).
3. In-nota ta’ politika dwar xenarji applikati ma tissodisfax ir-rekwiżiti tad-Direttiva dwar il-BRR (ara l-paragrafu 97).

Rakkomandazzjoni 2

Jenħtieġ li l-SRB jiffinalizza s-sistema tiegħu ta’ regoli għall-ippjanar tar-riżoluzzjonijiet. B’mod speċifiku, jenħtieġ li dan:

1. jipprepara politiki ċari u konsistenti dwar l-MREL u l-impedimenti sostantivi, filwaqt li jieħu inkunsiderazzjoni l-qafas regolatorju attwali tal-UE. Jenħtieġ li l-politiki jiġu applikati fil-pjanijiet kollha ta’ riżoluzzjoni bħala mezz li jiżgura li l-banek li jaqgħu taħt il-mandat tal-SRB ikollhom biżżejjed kapaċità ta’ assorbiment tat-telf.
2. jaġġorna l-manwal għall-ippjanar tar-riżoluzzjoni mill-inqas kull sena biex jirrifletti l-bidliet kbar fil-politika, l-iżviluppi fil-qafas leġiżlattiv u l-esperjenza miskuba, u jiddikjara dan il-manwal bħala vinkolanti.
3. jinkludi, fil-manwal għall-ippjanar tar-riżoluzzjoni, gwida fir-rigward tax-xenarji ta’ riżoluzzjoni kollha meħtieġa taħt id-Direttiva dwar il-BRR.

Data mmirata għall-implimentazzjoni: Ġunju 2018.

Riżorsi insuffiċjenti tal-HR

152

L-SRB ilu b’nuqqas ta’ persunal minn meta sar operazzjonalment indipendenti (ara l-paragrafi 105 sa 110). Minkejja xi titjib reċenti, il-maniġment tal-SRB ma żgurax li l-funzjoni tal-HR ikollha persunal suffiċjenti, u ma tax prijorità suffiċjenti lir-reklutaġġ (ara l-paragrafu 116). Sakemm l-SRB joqrob lejn l-issodisfar tar-rekwiżiti tal-persunal tiegħu, l-ingaġġ ta’ persunal fl-unità tal-HR stess, biex jiġu inklużi esperti fir-reklutaġġ bi kwalifiki għolja, jeħtieġ li jkun prijorità kontinwa.

153

Minħabba n-nuqqas ta’ persunal, l-SRB ma setax iwettaq bis-sħiħ il-mandat statutorju tiegħu li jfassal pjanijiet ta’ riżoluzzjoni, jadotta deċiżjonijiet ta’ riżoluzzjoni u jiżgura armonizzazzjoni u konsistenza fi ħdan l-SRM (ara l-paragrafu 114).

Rakkomandazzjoni 3

Jenħtieġ li l-SRB jaċċellera l-isforzi ta’ reklutaġġ tiegħu u jingaġġa persunal għall-funzjoni tal-HR b’mod xieraq biex din tkampa bid-domandi tar-reklutaġġ. Jenħtieġ li tingħata attenzjoni partikolari lill-ingaġġar ta’ esperti fir-riżoluzzjoni u fil-politika, inkluż f’livell ogħla. Jekk il-miri ta’ ingaġġ tal-persunal ma jistgħux jintlaħqu, jew jekk miżuri interim ikunu meħtieġa, jenħtieġ li l-SRB iqis soluzzjonijiet alternattivi, bħal żieda fis-sekondar jew fl-esternalizzazzjoni.

Data mmirata għall-implimentazzjoni: Ġunju 2018.

Il-qafas ta’ kooperazzjoni mal-ARN jeħtieġ titjib

154

Id-distribuzzjoni ta’ kompiti operazzjonali bejn l-ARN u l-SRB, inkluż it-tqassim tar-responsabbiltajiet, għadha mhijiex ċara (ara l-paragrafu 122). Il-livell attwali ta’ ingaġġ tal-persunal għat-timijiet interni ta’ riżoluzzjoni mhuwiex biżżejjed (ara l-paragrafi 124 u 125). L-ingaġġ tal-persunal għat-timijiet interni ta’ riżoluzzjoni huwa r-responsabbiltà kemm tal-SRB kif ukoll tal-ARN, u l-SRB ma għandux setgħat formali biex jinfluwenza l-forniment ta’ persunal tal-ARN għat-timijiet interni ta’ riżoluzzjoni (ara l-paragrafu 123). Ma jsirux sessjonijiet ta’ prattika regolari li jinvolvu lill-ARN għall-ittestjar tal-funzjonament tal-proċess ta’ riżoluzzjoni (ara l-paragrafu 129).

Rakkomandazzjoni 4

Jenħtieġ li l-SRB:

1. jikkjarifika d-distribuzzjoni operazzjonali tal-kompiti u tar-responsabbiltajiet mal-ARN;
2. jiżgura li t-timijiet interni ta’ riżoluzzjoni jkollhom numru adegwat ta’ persunal, inkluż bit-tħeġġiġ tal-ARN biex jassenjaw persunal addizzjonali fejn xieraq;
3. iwettqu sessjonijiet ta’ prattika b’mod regolari, u jenħtieġ li jiżguraw li l-ARN ikunu involuti bis-sħiħ fihom.

Data mmirata għall-implimentazzjoni għal (a): mill-aktar fis possibbli.

Data mmirata għall-implimentazzjoni għal (b): mhux aktar tard minn tmiem l-2018.

Data mmirata għall-implimentazzjoni għal (c): mill-aktar fis possibbli u mbagħad fuq bażi regolari.

Jeħtieġ li jsir titjib fl-MtQ li sar mal-BĊE

155

Fil-fehma tagħna, l-MtQ attwali li sar mal-BĊE ma jiżgurax li l-SRB jirċievi l-informazzjoni kollha mill-BĊE fuq bażi konsistenti u f’waqtha (ara l-paragrafi 132 u 133). Barra minn hekk, mhux il-partijiet kollha tal-MtQ jinsabu fid-dominju pubbliku, u dan mhuwiex konsistenti mal-qafas leġiżlattiv (ara l-paragrafu 131). In-negozjati li għaddejjin bħalissa bejn l-SRB u l-BĊE jipprovdu opportunità biex dawn il-problemi jiġu indirizzati bis-sħiħ.

Rakkomandazzjoni 5

Jenħtieġ li l-SRB jikkomunika mal-BĊE bil-ħsieb li l-MtQ jiġi aġġustat, biex jiġi żgurat li huwa jirċievi l-informazzjoni kollha neċessarja biex jeżerċita l-funzjoni ta’ riżoluzzjoni tiegħu. Jekk jiġi emendat, jenħtieġ li l-MtQ jiġi ppubblikat kif meħtieġ mill-qafas leġiżlattiv.

Data mmirata għall-implimentazzjoni: Bħala parti mid-diskussjonijiet li għadhom għaddejjin mal-BĊE, iżda mhux aktar tard minn Marzu 2018.

Il-qafas leġiżlattiv joħloq sfidi għall-SRB

156

Kif qiegħed il-qafas leġiżlattiv bħalissa, ifisser li hemm inkongruwenza bejn il-mandati tal-SRB u tal-BĊE rispettivament. Filwaqt li l-SRB huwa direttament responsabbli għall-ippjanar tar-riżoluzzjonijiet ta’ banek transfruntiera li jkunu inqas sinifikanti, il-BĊE jissorveljahom indirettament biss. Dan iqiegħed piż amministrattiv addizzjonali fuq l-SRB billi dan irid jikkomunika direttament u separatament ma’ ħafna ANK (ara l-paragrafu 135).

157

Minħabba s-sitwazzjoni attwali, fejn il-BĊE għandu status ta’ osservatur permanenti fis-seduti kollha tal-SRB, iżda mhux viċi versa, l-SRB jserraħ bis-sħiħ fuq ir-rieda tajba tal-BĊE għall-fluss ta’ informazzjoni (ara l-paragrafu 142).

158

Bħalissa l-qafas legali ma jippermettix li l-SRB jimponi moratorju operazzjonali fuq bank li jkun għaddej minn riżoluzzjoni, u l-proposta attwali tal-Kummissjoni biex id-Direttiva dwar il-BRR tiġi emendata ma tipprevedix għodda ta’ dan it-tip fil-futur (ara l-paragrafu 62).

Rakkomandazzjoni 6

Fid-dawl tal-esperjenza tiegħu sa issa fit-tqegħid tal-qafas attwali fil-prattika, jenħtieġ li l-SRB:

1. jistieden lil-leġiżlatur jaġġusta r-regolamenti rilevanti sabiex jallinja l-mandati tal-awtoritajiet ta’ superviżjoni u ta’ riżoluzzjoni rigward banek transfruntiera li jkunu inqas sinifikanti, jew inkella jiżgura li l-SRB jirċievi fluss ta’ informazzjoni sħiħa;
2. jistieden lil-leġiżlatur jagħmel il-fluss ta’ informazzjoni mis-superviżur, dwar banek f’riskju u żviluppi oħrajn li jkunu għadhom għaddejjin u li jaffettwaw il-mandat tal-SRB, aktar awtomatiku minn kif inhu bħalissa;
3. jistieden lil-leġiżlatur iqis ukoll il-possibbiltà li jagħmel l-għodda ta’ moratorju disponibbli għall-SRB.

Data mmirata għall-implimentazzjoni: Marzu 2018.

Dan ir-Rapport ġie adottat mill-Awla IV, immexxija mis-Sur Baudilio TOMÉ MUGURUZA, Membru tal-Qorti tal-Awdituri, fil-Lussemburgu fil-laqgħa tagħha tat-28 ta’ Novembru 2017.

Abbrevjazzjonijiet

ANK: Awtorità nazzjonali kompetenti

ARN: Awtorità ta’ riżoluzzjoni nazzjonali

BĊE: Il-Bank Ċentrali Ewropew

Direttiva dwar il-BRR: Id-Direttiva dwar l-Irkupru u r-Riżoluzzjoni tal-Banek (id-Direttiva 2014/59/UE tal-Parlament Ewropew u tal-Kunsill tal-15 ta’ Mejju 2014 li tistabbilixxi qafas għall-irkupru u r-riżoluzzjoni ta’ istituzzjonijiet ta’ kreditu u ditti ta’ investiment u li temenda d-Direttiva tal-Kunsill 82/891/KEE, u d-Direttivi 2001/24/KE, 2002/47/KE, 2004/25/KE, 2005/56/KE, 2007/36/KE, 2011/35/UE, 2012/30/UE u 2013/36/UE, u r-Regolamenti (UE) Nru 1093/2010 u (UE) Nru 648/2012, tal-Parlament Ewropew u tal-Kunsill (ĠU L 173, 12.6.2014, p. 190))

Direttiva dwar l-SGD: Id-Direttiva 2014/49/UE tal-Parlament Ewropew u tal-Kunsill tas-16 ta’ April 2014 dwar skemi ta’ garanzija tad-depożiti (ĠU L 173, 12.6.2014, p. 149)

EBA: L-Awtorità Bankarja Ewropea

FOLTF: Qed ifalli jew probabbilment ser ifalli

FTE: Ekwivalenti għall-full-time

KR: Kulleġġ ta’ riżoluzzjoni

MREL: Rekwiżit minimu għal fondi proprji u obbligazzjonijiet eliġibbli

MSU: Mekkaniżmu Superviżorju Uniku

MtQ: Memorandum ta’ qbil

PRT: Pjan ta’ riżoluzzjoni tranżizzjonali

QEA: Il-Qorti Ewropea tal-Awdituri

Regolament dwar l-SRM: Ir-Regolament (UE) Nru 806/2014 tal-Parlament Ewropew u tal-Kunsill tal-15 ta’ Lulju 2014 li jistabbilixxi regoli uniformi u proċedura uniformi għar-riżoluzzjoni tal-istituzzjonijiet ta’ kreditu u ċerti ditti tal-investiment fil-qafas ta’ Mekkaniżmu Uniku ta’ Riżoluzzjoni u Fond Uniku għar-Riżoluzzjoni u li jemenda r-Regolament (UE) Nru 1093/2010 (ĠU L 225, 30.7.2014, p. 1)

SGD: Skema ta’ garanzija tad-depożiti

SRB: Bord Uniku ta’ Riżoluzzjoni

SREP: Proċess ta’ reviżjoni u evalwazzjoni superviżorji

SRF: Fond Uniku ta' Riżoluzzjoni

SRM: Mekkaniżmu Uniku ta’ Riżoluzzjoni

TFUE: Trattat dwar il-Funzjonament tal-Unjoni Ewropea

Glossarju

Funzjonijiet kritiċi: Attivitajiet, servizzi jew operazzjonijiet bankarji li d-diskontinwità tagħhom x’aktarx li twassal għat-tfixkil tal-istabbiltà finanzjarja jew ta’ servizzi li huma essenzjali għall-ekonomija reali.

Għodda tar-rikapitalizzazzjoni interna: Għodda ta’ riżoluzzjoni li tinvolvi t-tnaqqis tal-obbligazzjonijiet ta’ bank, li jirriżulta fit-tnaqqis, bil-forza, tal-valur nominali tad-depożiti u l-bonds tal-klijenti. Obbligazzjonijiet li jistgħu jkunu soġġetti għall-għodda tar-rikapitalizzazzjoni interna jissejħu “bail-inable” (b’kapaċità ta’ rikapitalizzazzjoni interna).

Impedimenti sostantivi: Ostakli serji li jistgħu jxekklu l-istralċ jew ir-riżoluzzjoni ta’ bank, identifikati minn awtoritajiet ta’ riżoluzzjoni matul il-valutazzjoni tar-riżolvibbiltà tal-banek. L-awtoritajiet ta’ riżoluzzjoni għandhom setgħat mifruxa biex jirrikjedu lill-banek jindirizzaw jew ineħħu kull impediment ta’ dan it-tip fi ħdan perjodu ta’ żmien speċifiku. Pereżempju, l-SRB jista’ jirrikjedi li bank jeħles minn assi speċifiċi, jillimita l-attivitajiet tiegħu jew jibdel l-istrutturi ġuridiċi jew operazzjonali tiegħu.

Kulleġġi ta’ riżoluzzjoni: Korpi magħmula minn membri ta’ bosta awtoritajiet ta’ riżoluzzjoni nazzjonali u li jkunu twaqqfu biex jiżguraw il-kooperazzjoni tal-awtoritajiet rilevanti kollha fl-istadji kollha tar-riżoluzzjoni ta’ grupp bankarju transfruntier.

Linja operatorja ewlenija: Sorsi materjali ewlenin ta’ dħul jew profitt ta’ bank.

Rekwiżit minimu għal fondi proprji u obbligazzjonijiet eliġibbli: Rekwiżit li l-banek huma meħtieġa li jikkonformaw miegħu f’kull ħin billi jżommu strumenti li jkunu faċilment “bail-inable” sabiex jiġi żgurat li t-telf ikun jista’ jiġi assorbit u l-banek jiġu rikapitalizzati jekk jidħlu f’diffikultà finanzjarja u sussegwentement jitqiegħdu f’riżoluzzjoni.

Riżoluzzjoni: Riżoluzzjoni hija l-istralċ ordnat ta’ bank li jkun qed ifalli, biex tiġi żgurata l-kontinwazzjoni tal-funzjonijiet essenzjali tiegħu u biex tiġi preżervata l-istabbiltà finanzjarja. Hija għandha l-għan ukoll li tipproteġi l-fondi pubbliċi billi timminimizza d-dipendenza fuq l-għajnuna finanzjarja pubblika straordinarja.

Skema ta’ garanzija tad-depożiti: Skema ta’ garanzija tad-depożiti hija skema għall-protezzjoni tad-depożitanti biex jiġi żgurat li dawn ikunu protetti sa ċertu limitu massimu, u fi ħdan ċerti limiti, mit-telf fil-każ ta’ falliment ta’ bank.

Superviżjoni: Is-superviżjoni bankarja hija l-att ta’ monitoraġġ tal-prestazzjoni u l-operazzjonijiet finanzjarji tal-banek mill-awtoritajiet pubbliċi sabiex jiġi żgurat li dawn ikunu qed joperaw b’mod sikur u sod skont ir-regoli u r-regolamenti.

Timijiet interni ta’ riżoluzzjoni: Skont l-Artikolu 83 tar-Regolament dwar l-SRM, il-Bord Uniku ta’ Riżoluzzjoni jista’ jistabbilixxi timijiet interni ta’ riżoluzzjoni magħmula mill-persunal tiegħu stess u minn persunal ta’ awtoritajiet ta’ riżoluzzjoni nazzjonali, inklużi, fejn xieraq, osservaturi minn Stati Membri li mhumiex fiż-żona tal-euro. It-timijiet interni ta’ riżoluzzjoni huma essenzjali għall-kooperazzjoni u l-komunikazzjoni bejn l-SRB u l-ARN dwar il-preparazzjoni ta’ pjanijiet ta’ riżoluzzjoni. Dawn it-timijiet jitwaqqfu għall-banek kollha li jaqgħu taħt il-mandat tal-SRB u jitmexxew minn koordinaturi maħtura mill-persunal għoli tal-SRB.

Tim tal-awditjar

Ir-rapporti speċjali tal-QEA jippreżentaw ir-riżultati tal-awditi tal-prestazzjoni u tal-konformità tagħha f'dak li jirrigwarda oqsma baġitarji jew suġġetti ta' ġestjoni speċifiċi. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta' introjtu jew ta' nfiq involut, l-iżviluppi li jkunu għad iridu jseħħu u l-interess politiku u pubbliku.

Dan ir-rapport ġie prodott mill-Awla IV tal-Awditjar, li hija mmexxija minn Baudilio Tomé Muguruza, Membru tal-QEA, u li tiffoka fuq l-oqsma ta’ regolamentazzjoni tas-swieq u ekonomija kompetittiva. L-awditu tmexxa mill-Membru tal-QEA Kevin Cardiff. Fit-tħejjija tar-rapport, huwa ngħata appoġġ minn Gediminas Mačys, Kap tal-kabinett u Shane Enright, Attaché; Zacharias Kolias, Direttur u Maniġer prinċipali; Helmut Kern, Kap tal-kompitu. It-tim tal-awditjar kien magħmul minn Matthias Blaas, Helmut Frank, Vasileia Kalafati, Anna Ludwikowska, Radek Majer, Heikki Kivisto u Natalie Hagmayer.

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Tel. +352 4398-1
Mistoqsijiet: eca.europa.eu/mt/Pages/ContactForm.aspx
Sit web: eca.europa.eu
Twitter: @EUAuditors

Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2017

PDF	ISBN 978-92-872-9052-6	ISSN 1977-574	doi:10.2865/729376	QJ-AB-17-026-MT-N
HTML	ISBN 978-92-872-9022-9	ISSN 1977-574	doi:10.2865/40942	QJ-AB-17-026-MT-Q

© L-Unjoni Ewropea, 2017

Għal kull użu jew riproduzzjoni ta’ ritratti jew materjal ieħor li ma jaqax taħt id-drittijiet tal-awtur tal-Unjoni Ewropea, irid jintalab il-permess direttament mingħand id-detenturi tad-drittijiet tal-awtur.

KIF TIKKUNTATTJA LILL-UE

Personalment
Madwar l-Unjoni Ewropea kollha hemm mijiet ta’ ċentri ta’ informazzjoni tal-Europe Direct. Tista’ ssib l-indirizz tal-eqreb ċentru għalik f’dan is-sit: https://europa.eu/european-union/contact_mt

Bit-telefown jew bil-posta elettronika
Europe Direct huwa servizz li jwieġeb il-mistoqsijiet tiegħek dwar l-Unjoni Ewropea. Tista’ tikkuntattja dan is-servizz:

• bit-telefown bla ħlas: 00 800 6 7 8 9 10 11 (ċerti operaturi jafu jimponu ħlas għal dawn it-telefonati),
• fuq dan in-numru standard: +32 22999696, jew
• bil-posta elettronika permezz: https://europa.eu/european-union/contact_mt

KIF ISSIB TAGĦRIF DWAR L-UE

Onlajn
L-informazzjoni dwar l-Unjoni Ewropea bil-lingwi uffiċjali kollha tal-UE hija disponibbli fuq is-sit web Europa fuq: http://europa.eu

Pubblikazzjonijiet tal-UE
Tista’ tniżżel mill-internet jew tordna l-pubblikazzjonijiet tal-UE, li xi wħud minnhom huma bla ħlas u xi oħrajn bil-ħlas, mill-EU Bookshop fl-indirizz li ġej: http://op.europa.eu/eubookshop. Kopji multipli ta’ pubblikazzjonijiet bla ħlas tista’ tiksibhom billi tikkuntattja lil Europe Direct jew liċ-ċentru tal-informazzjoni lokali tiegħek (ara https://europa.eu/european-union/contact_mt).

Il-liġi tal-UE u dokumenti relatati
Għal aċċess għall-informazzjoni legali tal-UE, inkluż il-liġijiet kollha tal-UE mill-1951 ’l hawn, fil-verżjonijiet lingwistiċi uffiċjali kollha, żur is-sit EUR-Lex hawnhekk: http://eur-lex.europa.eu

Dejta Miftuħa mill-UE
Il-portal tad-Dejta Miftuħa mill-UE (http://data.europa.eu/euodp) jipprovdi aċċess għal settijiet tad-dejta mill-UE. Id-dejta tista’ titniżżel mill-internet u tintuża mill-ġdid bla ħlas, kemm għal skopijiet kummerċjali kif ukoll mhux kummerċjali.