Il-kontrolli tas-sajd tal-UE: jenħtieġu sforzi addizzjonali

Sommarju eżekuttiv

I

Il-Politika Komuni tas-Sajd (PKS) għandha l-għan li tiżgura li l-istokkijiet ta’ ħut u s-settur tas-sajd ikunu sostenibbli fuq terminu twil. Ħafna stokkijiet għadhom mistada b’mod eċċessiv, allura sforzi kontinwi huma meħtieġa għall-ġestjoni effettiva tas-sajd. Għalhekk, il-PKS tinkludi miżuri biex il-kapaċità tal-flotta tas-sajd tiġi ristretta u biex s-sajd jiġi mmaniġġjat, billi jiġu imposti limiti fuq il-qabdiet (bħal kwoti) u l-attività tas-sajd (bħal restrizzjonijiet fuq l-isforz tas-sajd jew regoli tekniċi għal ċertu sajd). Is-suċċess tal-PKS jirrikjedi t-tfassil u l-implimentazzjoni ta’ sistema effettiva ta’ kontroll. Is-sistema ta’ kontroll tal-PKS ġiet irriformata l-aħħar fl-2009, biex tikkoreġi d-dgħufijiet serji li kienu preżenti f’dak iż-żmien u li ġew identifikati bir-Rapport Speċjali Nru 7/2007 tal-Qorti.

II

L-objettiv tal-awditu tagħna kien li titwieġeb il-mistoqsija “L-UE għandha sistema effettiva ta’ kontroll tas-sajd stabbilita?”

III

Minn meta wettaqna l-awditu tagħna fl-2007, u minn meta saret ir-riforma tar-Regolament dwar il-Kontroll, l-Istati Membri u l-Kummissjoni għamlu progress f’bosta oqsma. Madankollu, aħna sibna li minħabba dgħufijiet sinifikanti fil-biċċa l-kbira mill-oqsma awditjati, l-Unjoni Ewropea għad ma kellhiex sistema effettiva biżżejjed stabbilita għall-kontrolli tas-sajd, biex tappoġġa s-suċċess tal-PKS. L-Istati Membri kienu għadhom ma implimentawx bis-sħiħ ir-regolament tal-UE dwar il-kontroll tas-sajd, u ċerti dispożizzjonijiet tar-regolament ikunu jeħtieġu modifikazzjoni biex l-Istati Membri jkunu jistgħu jikkontrollaw l-attivitajiet tas-sajd b’mod effettiv.

IV

L-Istati Membri li żorna ma vverifikawx biżżejjed il-preċiżjoni tal-kapaċità tal-flotot tagħhom u l-preċiżjoni tal-informazzjoni dwar il-bastimenti fir-reġistru tal-flotta. Filwaqt li r-Regolament dwar il-Kontroll jipprovdi, b’mod speċifiku, regoli għall-verifikazzjonijiet dokumentarji u fiżiċi tal-qawwa tal-magna, huwa ma jagħmilx dan għall-verifikazzjonijiet tat-tunnellaġġ gross. Aħna osservajna l-fatt li l-erba’ Stati Membri li żorna ma vverifikawx it-tunnellaġġ tal-bastimenti tas-sajd tagħhom, u li tnejn minnhom kienu għadhom ma wettqux il-verifikazzjonijiet meħtieġa tal-qawwa tal-magna. Barra minn hekk, sibna għadd sinifikanti ta’ diskrepanzi bejn id-dettalji, tal-bastimenti, li ġew irreġistrati fir-reġistru tal-flotta u dawk li kienu jinsabu fid-dokumenti ta’ sostenn.

V

Aħna sibna li, b’mod ġenerali, l-Istati Membri eżaminati kienu qed jimplimentaw il-miżuri ta’ ġestjoni tas-sajd b’mod adegwat. Is-sistemi ta’ monitoraġġ tal-bastimenti (VMS), tal-Istati Membri, li kienu qed jużaw teknoloġija ta’ traċċar abbażi ta’ satellita pprovdew informazzjoni utli għall-monitoraġġ u l-kontroll tal-attivitajiet tas-sajd. Madankollu, b’riżultat tal-applikazzjoni tar-regoli tar-Regolament dwar il-Kontroll, 89 % tal-flotta tal-UE ma kinux immonitorjati mill-VMS, u dan fixkel il-ġestjoni effettiva tas-sajd f’xi sajdiet u għal xi speċijiet.

VI

L-Istati Membri li żorna mmaniġġjaw tajjeb l-użu tal-kwoti tas-sajd li ġew allokati lilhom. Madankollu, meta l-awtoritajiet tal-Istati Membri ppermettew lill-organizzazzjonijiet tal-produtturi jimmaniġġjaw id-distribuzzjoni tal-kwoti, mhux dejjem kienu jafu liema kriterji kienu ntużaw biex il-kwoti jiġu ddistribwiti lil kull wieħed mill-benefiċjarji. Dan in-nuqqas ta’ trasparenza jagħmilha diffiċli għall-Istati Membri biex ikunu jafu l-benefiċjarji reali tal-opportunitajiet tas-sajd, u għalhekk biex jivvalutaw kwalunkwe impatt avvers potenzjali fuq l-ambjent u fuq l-ekonomiji lokali, kif ukoll biex jieħdu l-miżuri korrettivi meħtieġa fejn ikun xieraq. Barra minn hekk, dan in-nuqqas ta’ trasparenza jżid ir-riskju li l-interessi speċifiċi ta’ ċerti operaturi ekonomiċi jiġu ffavoriti bi ħsara ta’ oħrajn. Kien diffiċli li tiġi mmonitorjata l-konformità mal-miżuri ta’ ġestjoni tas-sajd, speċjalment għal bastimenti li ma kinux konnessi ma’ sistemi ta’ monitoraġġ tal-bastimenti abbażi ta’ satellita. Madankollu, aħna fil-fatt rajna eżempji ta’ prattika tajba fejn organizzazzjonijiet professjonali tas-sajd kienu jirrikjedu mill-membri tagħhom li dawn jikkonformaw mal-miżuri addizzjonali, iżda aktar iffukati, ta’ konservazzjoni minbarra dawk meħtieġa bil-Politika Komuni tas-Sajd.

VII

Id-data dwar l-attivitajiet tas-sajd li nġabret fil-qafas tar-Regolament dwar il-Kontroll ma kinitx kompleta u affidabbli biżżejjed. Id-data dwar il-qabdiet għal bastimenti li jagħmlu dikjarazzjonijiet bil-miktub, li jirrappreżentaw porzjon sinifikanti tal-flotta tal-UE, kienet inkompleta, u ta’ spiss ġiet irreġistrata b’mod skorrett fid-databases tal-Istati Membri. Kien hemm diskrepanzi sinifikanti bejn il-ħatt l-art iddikjarat u r-reġistri sussegwenti tal-ewwel bejgħ. Tnejn mill-erba’ Stati Membri li saritilhom żjara ma kkondividewx u ma traċċawx b’mod suffiċjenti l-informazzjoni li tikkonċerna l-attivitajiet tal-bastimenti minn Stat Membru wieħed tal-bandiera f’ieħor. Il-proċessi ta’ validazzjoni tad-data tal-Istati Membri kienu insuffiċjenti. Minbarra dan, kien hemm differenzi sinifikanti bejn id-data kumplessiva dwar il-qabdiet li ġiet irreġistrata mill-Istati Membri, u dik disponibbli għall-Kummissjoni. Ir-Regolament dwar il-Kontroll jirrikjedi mill-Istati Membri li dawn jibagħtu data aggregata dwar il-qabdiet, skont l-istokk. Madankollu, il-fatt li huwa ma jirrikjedix rappurtar b’dettalji dwar iż-żoni tas-sajd, id-daqs tal-bastimenti, u t-tagħmir tas-sajd, jillimita l-possibbiltà li ssir analiżi dettaljata tal-attività tal-flotta Ewropea.

VIII

Inġenerali, l-Istati Membri li żorna ppjanaw u wettqu tajjeb l-ispezzjonijiet tas-sajd. Madankollu, il-fatt li l-ispetturi ma kellhomx aċċess f’ħin reali għall-informazzjoni dwar il-bastimenti naqqas l-effettività tal-ispezzjonijiet. L-Istati Membri kienu stabbilew proċeduri standardizzati ta’ spezzjoni, iżda aħna sibna każijiet fejn il-mudelli disponibbli tar-rapporti ma kinux intużaw mill-ispetturi. Ir-riżultati tal-ispezzjonijiet mhux dejjem ġew irrappurtati b’mod korrett fid-databases nazzjonali. Aħna sibna wkoll li s-sanzjonijiet li ġew applikati mhux dejjem kienu dissważivi. Is-sistema ta’ punti, li hija waħda mill-innovazzjonijiet prinċipali tar-regolament attwali dwar il-kontroll li l-intenzjoni tiegħu hija li jiżgura trattament indaqs tal-operaturi tas-sajd, ġiet applikata f’livelli differenti ħafna fl-Istati Membri kollha li żorna u saħansitra fl-istess Stat Membru. Fl-aħħar nett, attwalment ma hemm l-ebda reġistru Ewropew tal-infrazzjonijiet u s-sanzjoniiet, li jkun jippermetti segwitu aħjar tal-punti applikati, analiżi tar-riskju aktar effettiva u trasparenza akbar fost l-Istati Membri.

IX

Aħna nagħmlu għadd ta’ rakkomandazzjonijiet lill-Kummissjoni u lill-Istati Membri, li għandhom l-għan li jittejbu l-affidabbiltà tal-informazzjoni dwar il-flotot tas-sajd, il-monitoraġġ tal-miżuri ta’ ġestjoni tas-sajd, l-affidabbiltà tad-data dwar is-sajd, kif ukoll l-ispezzjonijiet u s-sanzjonijiet.

Introduzzjoni

Il-Politika Komuni tas-Sajd

01

L-għan primarju tal-Politika Komuni tas-Sajd (PKS), kif riveduta dan l-aħħar fl-2013, huwa li tiżgura li s-setturi tas-sajd u tal-akkwakultura jkunu sostenibbli ambjentalment, ekonomikament u soċjalment fuq terminu twil. Din kienet ta’ sfida billi storikament naqsu xi stokkijiet ta’ ħut fl-ilmijiet tal-Unjoni Ewropea minħabba sajd eċċessiv. Għalhekk, il-PKS għandha l-għan li tnaqqas il-pressjoni fuq l-istokkijiet ta’ ħut billi tieħu approċċ prekawzjonarju² u billi tissettja limiti ta’ qbid ibbażati fuq l-aħjar informazzjoni xjentifika li hemm disponibbli dwar ir-riżorsi; hija għandha wkoll l-għan li tibbilanċja l-kapaċità tal-flotta mar-riżorsi disponibbli tas-sajd. Għal din ir-raġuni, l-UE stabbiliet limitu massimu għall-kapaċità tal-flotta Ewropea li jenħtieġ li tiġi bbilanċjata mal-opportunitajiet disponibbli tas-sajd matul iż-żmien (ara l-Kaxxa 1) kif ukoll mal-miżuri ta’ ġestjoni tas-sajd, biex tiżgura li s-settur tas-sajd ikun sostenibbli.

02

Minkejja dan, il-parir xjentifiku l-aktar reċenti juri li, minkejja xi titjib, ħafna stokkijiet ikomplu jiġu mistada b’mod eċċessiv, partikolarment dawk fil-Mediterran u fil-Baħar l-Iswed. Il-Figura 1 turi s-sitwazzjoni tal-istokkijiet differenti ta’ ħut skont il-baċiri tal-baħar.

03

Il-miżuri ta’ ġestjoni adottati mill-Unjoni Ewropea jistgħu jinqasmu f’żewġ kategoriji prinċipali (ara l-Kaxxa 2):

• Miżuri ta’ kontroll tal-output, li prinċipalment jikkonsistu fil-limitar tal-ammont ta’ qabdiet minn sajda partikolari, partikolarment permezz tal-qabdiet totali permissibbli (TACs) u l-kwoti.
• Miżuri ta’ kontroll tal-input, li jikkonċernaw il-mezzi tas-sajd li jintużaw u jinkludu regoli dwar l-attività tal-flotta, bħal restrizzjonijiet fuq l-aċċess tal-bastimenti tas-sajd għal ċerti ilmijiet; kontrolli fuq l-isforz tas-sajd biex tiġi rregolata l-kapaċità tas-sajd u l-użu tal-bastimenti; u miżuri tekniċi li jirregolaw l-użu tat-tagħmir tas-sajd kif ukoll il-perjodi ta’ żmien u ż-żoni ġeografiċi li fihom huwa permess is-sajd.

Is-sistema ta’ kontroll tal-PKS

04

Jekk il-PKS trid li l-istokkijiet ta’ ħut u s-settur tas-sajd ikunu sostenibbli, huwa essenzjali li jkun hemm sistema effettiva ta’ kontroll fuq il-flotta tal-PKS u fuq il-miżuri tagħha ta’ ġestjoni tas-sajd. Din tinkludi kontrolli fuq il-kapaċità u l-attività tal-flotta, fuq il-konformità mal-miżuri ta’ ġestjoni, u miżuri ta’ infurzar fejn jinqabdu infrazzjonijiet, u meta jkunu meħtieġa, sanzjonijiet. Barra minn hekk, huwa meħtieġ li jkun hemm qafas biex jiżgura li d-data dwar il-flotot u l-qabdiet tkun affidabbli, kemm biex miżuri xierqa ta’ ġestjoni tas-sajd ikunu jistgħu jittieħdu kif ukoll biex ir-rapporti xjentifiċi jiġu sostnuti.

05

Filwaqt li l-PKS ilha topera mis-snin 70, l-ewwel sistemi ta’ kontroll ilhom jeżistu mis-snin 90. Madankollu, huma ma kinux biżżejjed biex jiżguraw il-konformità mal-PKS. Il-Qorti rrappurtat dwar dawn il-problemi fl-2007³. Wara r-rapport tagħna, riformi kbar għas-sistema ta’ kontroll tal-PKS ġew adottati fl-2009⁴ permezz tar-Regolament tal-Kunsill dwar il-Kontroll, u fl-2011 permezz tar-Regoli ta’ Implimentazzjoni tal-Kummissjoni.

06

Skont ir-Regolament tal-Kunsill, l-Istati Membri huma responsabbli għall-kontrolli u jridu jallokaw riżorsi xierqa u jistabbilixxu l-istrutturi meħtieġa biex iwettqu l-kontrolli tagħhom matul il-katina tal-produzzjoni. Hemm rekwiżiti speċifiċi għall-kontroll tal-flotot tas-sajd, konformità mal-miżuri ta’ ġestjoni, rekwiżiti ta’ rappurtar, spezzjonijiet u sanzjonijiet. Għodod ewlenin għall-ġestjoni tal-flotot jinkludu r-reġistru tal-flotta (li fih il-karatteristiċi kollha tal-bastimenti tas-sajd, il-liċenzji tas-sajd, l-awtorizzazzjonijiet tas-sajd, eċċ.) u sistemi abbażi ta’ satellita biex jimmonitorjaw il-pożizzjoni tal-bastimenti.

07

Ir-rekwiżiti ta’ rappurtar dwar il-bastimenti jiddependu mid-daqs tal-bastimenti, b’medda minn l-ebda rekwiżit ta’ rappurtar għal bastimenti li jkunu inqas minn 10 metri twal, sa rekwiżiti ta’ rappurtar elettroniku għal bastimenti akbar (ara l-Anness I għal aktar informazzjoni). Il-Figura 2 turi l-kompożizzjoni tal-flotta tal-UE.

• Bastimenti li huma inqas minn 10 metri twal mhumiex meħtieġa jirreġistraw l-attivitajiet tas-sajd tagħhom;
• Bastimenti li huma bejn 10 metri u 12-il metru twal huma meħtieġa jippreżentaw informazzjoni bil-miktub dwar il-qabdiet u l-ħatt l-art;
• Bastimenti li huma itwal minn 12-il metru huma meħtieġa jippreżentaw informazzjoni elettronika dwar il-qabdiet u l-ħatt l-art tagħhom. Madankollu, bastimenti li huma bejn 12 u 15-il metru twal jistgħu jiġu eżentati mir-rappurtar elettroniku.

08

Jenħtieġ li s-sistema ta’ kontroll tiġi infurzata permezz ta’ attivitajiet ta’ sorveljanza u spezzjoni. F’każ ta’ nuqqas ta’ konformità, ir-Regolament dwar il-Kontroll jipprovdi li l-Istati Membri għandhom japplikaw penali effettivi, proporzjonali u dissważivi. Kull Stat Membru jiddeċiedi liema penali għandu japplika, skont il-prinċipju tas-sussidjarjetà. Mill-2012 ‘il hawn, sabiex jiżguraw li l-penali jiġu applikati b’mod ġust, l-Istati Membri kienu meħtieġa jimplimentaw sistema tal-punti ta’ penalità għad-detenturi ta’ liċenzji tas-sajd u għall-kaptani ta’ bastimenti tas-sajd. Dawn il-punti jiġu applikati f’każ ta’ infrazzjonijiet serji fis-seħħ għall-applikazzjoni tal-PKS. Fejn jiġu osservati bosta reati serji, il-punti akkumulati jistgħu jwasslu għas-sospenzjoni u, fl-aħħar mill-aħħar, l-irtirar tal-liċenzja tas-sajd, kif ukoll għall-ineliġibbiltà għal finanzjament mill-Fond Ewropew għall-Affarijiet Marittimi u s-Sajd.

Ir-rwol tal-Kummissjoni u tal-Aġenzija Ewropea għall-Kontroll tas-Sajd

09

Il-Kummissjoni timmonitorja l-implimentazzjoni kumplessiva tal-PKS mill-Istati Membri. Hija tirċievi data rilevanti mingħand l-Istati Membri, notevolment dwar il-qabdiet, l-użu tal-kwoti, l-isforz tas-sajd u l-kapaċità tal-flotta tas-sajd. Il-Kummissjoni tista’ twettaq ukoll awditi u spezzjonijiet, u tista’ tipparteċipa fi spezzjonijiet nazzjonali.

10

Meta l-Kummissjoni tosserva li l-awtoritajiet nazzjonali ma jkunux qed jinfurzaw ir-regoli tas-sajd b’mod xieraq, hija l-ewwel tipprova ssib tarf tal-problemi permezz ta’ konsultazzjoni. Hija tista’ tagħlaq sajda sakemm il-problema jinstabilha tarfha. Il-Kummissjoni tista’ tistabbilixxi wkoll pjan ta’ azzjoni, li jsir qbil dwaru mal-awtoritajiet nazzjonali, biex is-sitwazzjoni tittejjeb. Meta l-Istat Membru ma jiħux azzjoni adegwata, il-Kummissjoni tista’ tniedi proċedura ta’ infrazzjoni kontra l-Istat Membru kkonċernat.

11

L-Aġenzija Ewropea għall-Kontroll tas-Sajd (EFCA) tgħin biex jiġi żgurat li r-regoli tal-PKS jiġu applikati b’mod effettiv u uniformi permezz tal-koordinazzjoni operazzjonali tal-attivitajiet ta’ kontroll u spezzjoni tal-Istati Membri. L-EFCA hija wkoll responsabbli għall-koordinazzjoni ta’ kontrolli u spezzjonijiet konġunti mwettqa mill-Istati Membri⁵. Madankollu, dawn l-aspetti speċifiċi ma ġewx analizzati matul l-awditu.

Ambitu u approċċ tal-awditjar

12

Aħna ffukajna fuq l-adegwatezza tar-rekwiżiti prinċipali tar-regolament dwar il-kontroll tas-sajd u l-implimentazzjoni tagħhom mill-Istati Membri li żorna. Aħna fittixna li nwieġbu l-mistoqsija kumplessiva tal-awditjar: “L-UE għandha sistema effettiva ta’ kontroll tas-sajd stabbilita?” Il-mistoqsija prinċipali tal-awditjar kompliet tinqasam fis-sottomistoqsijiet li ġejjin:

1. L-Istati Membri għandhom informazzjoni affidabbli dwar il-karatteristiċi tal-flotot tagħhom? Sabiex inwieġbu din il-mistoqsija, aħna eżaminajna kif l-Istati Membri ċċekkjaw il-komponenti tal-kapaċità tal-flotta (f’termini ta’ kW u ta’ TG), u jekk żammewx aġġornat ir-reġistru tal-flotta.
2. Il-miżuri ta’ ġestjoni tas-sajd jiġu implimentati tajjeb? Taħt din is-sottomistoqsija, aħna analizzajna kif l-Istati Membri użaw is-sistemi ta’ monitoraġġ tal-bastimenti u kif immaniġġjaw il-kwoti tas-sajd, ir-reġimi tal-isforzi tas-sajd u l-miżuri tekniċi. L-analiżi tagħna eżaminat kwistjonijiet ġenerali milli ffukat fuq sajd speċifiku.
3. Id-data meħtieġa għall-ġestjoni tas-sajd hija kompleta u affidabbli? Sabiex inwieġbu din is-sottomistoqsija, aħna eżaminajna kif l-Istati Membri żguraw li d-data dwar il-qabdiet u d-dikjarazzjonijiet tal-ħatt l-art kienu komprensivi, konsistenti u vvalidati. Aħna analizzajna kif l-informazzjoni dwar il-ġestjoni kondiviża tal-Istati Membri, b’mod partikolari meta l-bastimenti minn Stat Membru wieħed tal-bandiera⁶ jkunu stadu fl-ilmijiet ta’ Stat Membru ieħor. Aħna eżaminajna wkoll kif il-Kummissjoni kkonsolidat id-data tal-Istati Membri.
4. L-ispezzjonijiet u s-sanzjonijiet jiġu ppjanati, imwettqa u applikati b’mod xieraq? Aħna eżaminajna kif l-Istati Membri ppjanaw, wettqu u rrappurtaw dwar l-ispezzjonijiet tas-sajd tagħhom. Aħna eżaminajna wkoll jekk l-Istati Membri wettqux, jew le, segwitu tal-ispezzjonijiet b’sanzjonijiet effettivi. Biex għamilna dan, aħna qiesna b’mod partikolari jekk is-sanzjonijiet kinux dissważivi jew le, u kif is-sistema tal-punti ta’ penalità ġiet implimentata fil-prattika.

13

Aħna wettaqna l-awditu bejn April u Ottubru 2016. Dan kien jinkludi żjarat lill-Kummissjoni Ewropea u lil erba’ Stati Membri (Spanja, Franza, l-Italja u r-Renju Unit (b’fokus fuq l-Iskozja⁷)). Dawn l-Istati Membri ntgħażlu billi kienu jirrappreżentaw aktar minn nofs il-kapaċità tal-flotta tal-UE u kważi nofs il-qabdiet tal-ħut tal-UE, u billi l-flotot tagħhom kienu attivi fl-Atlantiku u fil-Mediterran, żewġ żoni ġeografiċi li kellhom differenzi sinifikanti fir-rigward tal-miżuri tas-sajd u l-miżuri ta’ ġestjoni tal-flotot.

Osservazzjonijiet

L-informazzjoni li kienet isponibbli fir-reġistru, dwar il-karattersitiċi tal-flotta, mhux dejjem kienet preċiża u vverifikata

14

Biex tnaqqas il-pressjoni fuq l-istokkijiet, il-PKS tissettja limiti massimi obbligatorji għall-kapaċità tal-flotta tal-Istati Membri, u miżuri ta’ ġestjoni għal stokkijiet speċifiċi tas-sajd jew sajd speċifiku. Biex jiżguraw li jkun hemm konformità kemm mal-limitu massimu tagħhom fuq il-kapaċità kif ukoll mal-miżuri ta’ ġestjoni applikabbli, l-Istati Membri jirrikjedu informazzjoni affidabbli u aġġornata dwar il-karatteristiċi tal-kapaċità u tekniċi tal-bastimenti tas-sajd tagħhom. Għalhekk, aħna eżaminajna kif l-Istati Membri vverifikaw il-kilowatts (kW) u t-tunnellaġġ gross (TG) tal-bastimenti tagħhom, u mmonitorjajna l-affidabbiltà tar-reġistri tal-flotot tagħhom.

Il-kontrolli fuq il-kapaċità tas-sajd kienu inkompleti

15

Skont ir-Regolament dwar il-Kontroll, l-Istati Membri jridu jivverifikaw il-konformità mal-limitu massimu tagħhom fuq il-kapaċità awtorizzata f’kilowatts (kW) u f’tunnellaġġ gross (TG), żewġ unitajiet użati mill-PKS bħala indikaturi tal-abbiltà ta’ bastiment biex jaqbad il-ħut. Il-kapaċità awtorizzata tal-bastimenti tiġi rreġistrata fir-reġistru tal-flotta.

16

Madankollu, għalkemm previst fir-Regolament dwar il-Kontroll, sa issa għadhom ma ġewx adottati regoli dettaljati għat-tunnellaġġ gross tal-flotot. B’riżultat ta’ dan, l-Istati Membri ma wettqux kejl sħiħ tal-bastimenti tagħhom. B’kuntrast ma’ dan, ir-Regolament dwar il-Kontroll jipprovdi proċeduri għall-iċċekkjar tal-qawwa tal-magna. Huwa jirrikjedi mill-Istati Membri li dawn iwettqu, minn Jannar 2012 ‘il quddiem, analiżi tar-riskju u jagħżlu kampjun rappreżentattiv, li fuqu mbagħad iridu jwettqu kontroll dokumentarju approfondit; għalkemm huwa ma jistabbilix il-frekwenza meħtieġa tal-kontrolli. Jekk il-kontroll jindika li jista’ jkun li d-dettalji ta’ bastiment huma impreċiżi, il-qawwa tal-magna trid tiġi ċċekkjata fiżikament⁸. Għalkemm il-kontrolli fiżiċi jirrikjedu riżorsi sinfikanti, huma jagħtu l-possibbiltà li tiġi identifikata kwalunkwe bidla fil-qawwa tal-magna wara li bastiment u l-magna tiegħu jiġu kkummissjonati. Skont ir-Rapport 2016 tal-Kummissjoni lill-Parlament Ewropew u lill-Kunsill dwar l-isforzi tal-Istati Membri matul l-2014 biex jinkiseb bilanċ sostenibbli bejn il-kapaċità tas-sajd u l-opportunitajiet tas-sajd⁹, 17 mit-23 pajjiż kostali Ewropew kienu adottaw pjanijiet tal-kampjunar biex jiċċekkjaw il-qawwa tal-magna sa tmiem l-2015.

17

Fl-erba’ pajjiżi li żorna, Spanja u r-Renju Unit (l-Iskozja) biss kienu wettqu dan il-kontroll ibbażat fuq pjan tal-kampjunar kif meħtieġ. Id-dettalji huma ppreżentati fil-Kaxxa 3.

18

Franza kienet ikkompletat l-analiżi tar-riskju u kienet bdiet il-kontrolli dokumentarji fuq il-qawwa tal-magna. Ir-riżultati ma kinux disponibbli fiż-żmien meta twettaq l-awditu. Skont l-informazzjoni li waslet matul l-awditu, l-Italja kienet għadha ma bdietx il-proċess.

19

Skont ir-Rapport 2016 tal-Kummissjoni dwar il-kapaċità tal-flotta, l-Istati Membri kostali kollha kkonformaw mal-limiti massimi għall-kapaċità tal-flotta tagħhom (ara l-Figura 3). Madankollu, sitt Stati (il-Bulgarija, il-Greċja, il-Kroazja, l-Italja, ir-Rumanija u s-Slovenja) kienu qed joperaw bi kważi 95 % tal-limitu massimu fuq il-kapaċità tagħhom f’termini ta’ kW, u għalhekk kellhom riskju ogħla li jaqbżu l-limiti massimi. Fi tmiem l-2015, il-Kroazja u l-Bulgarija biss kienu adottaw pjanijiet tal-kampjunar biex jiċċekkjaw il-qawwa tal-magna.

20

Filwaqt li l-kontrolli mwettqa mill-awtoritajiet Spanjoli (ara l-Kaxxa 3) ma jistgħux jiġu estrapolati għall-bqija tal-flotta, huma juru l-importanza ta’ approċċ sistematiku għall-verifikazzjoni fiżika tal-qawwa tal-magna, b’mod partikolari għall-Istati Membri li jkunu qed joqorbu l-limiti massimi tagħhom għall-kapaċità tal-flotta.

L-informazzjoni tar-reġistri nazzjonali tal-flotot mhux dejjem kienet preċiża

21

Kull Stat Membru jżomm reġistru nazzjonali, jiġifieri database li fiha l-bastimenti tas-sajd kollha li jtajru l-bandiera ta’ dak l-Istat Membru għandhom ikunu rreġistrati skont il-leġiżlazzjoni tal-UE. Il-Kummissjoni Ewropea żżomm reġistru tal-flotta tal-UE li jkun fih l-informazzjoni rilevanti dwar il-bastimenti, li l-Istati Membri jipprovdu regolarment mir-reġistri nazzjonali tagħhom. Din tinkludi informazzjoni bħall-isem u n-numru tar-reġistrazzjoni tal-bastimenti, it-tagħmir prinċipali u sussidjarju tas-sajd, it-tul totali kumplessiv, it-tunnellaġġ gross (TG) u l-qawwa tal-magna (kW).

22

Ir-reġistru tal-flotta tas-sajd huwa għodda essenzjali għall-PKS. Huwa jippermetti li l-limiti massimi għall-kapaċità tal-flotta tas-sajd jiġu mmonitorjati għall-konformita u jipprovdi data bażika għall-miżuri ta’ ġestjoni bħal restrizzjonijiet fuq it-tagħmir tas-sajd, obbligi ta’ rappurtar tal-bastimenti u s-sistema ta’ monitoraġġ tal-bastimenti.

23

Aħna ċċekkjajna l-preċiżjoni tar-reġistri nazzjonali u identifikajna għadd sinifikanti ta’ diskrepanzi bejn ir-reġistru u d-dokumenti sors għal kampjun¹⁰ ta’ bastimenti fi tlieta mill-erba’ Stati Membri (ara l-Kaxxa 4). Informazzjoni inaffidabbli fir-reġistri tnaqqas id-dipendenza li jista’ jkun hemm fir-reġistru tal-UE bħala għodda essenzjali għall-ġestjoni tal-PKS.

24

L-Istati Membri huma meħtieġa jaġġornaw ir-reġistru tal-UE kull tliet xhur, b’aġġornamenti addizzjonali kull meta jkun hemm bidla sinifikanti. Abbażi tat-tqabbil ta’ data minn reġistri nazzjonali mar-reġistru tal-UE fi tmiem l-2015, aħna sibna li r-reġistru tal-UE kien b’mod ġenerali aġġornat u kien jirrifletti l-informazzjoni fir-reġistri nazzjonali, fejn l-Italja kienet l-unika eċċezzjoni mill-Istati Membri li saritilhom żjara.

Il-miżuri ta’ ġestjoni tas-sajd ġew implimentati b’mod korrett, iżda kien hemm lakuni sinifikanti fir-rekwiżiti ta’ kontroll għal bastimenti żgħar

25

Il-monitoraġġ tal-attivitajiet tas-sajd huwa parti essenzjali tal-politika dwar is-sostenibbiltà ta’ kwalunkwe sajda, u jippermetti l-ġbir ta’ informazzjoni li tintuża biex tassisti fl-iżvilupp u fil-valutazzjoni ta’ miżuri xierqa ta’ ġestjoni tas-sajd¹¹. Il-kwalità ta’ dan il-monitoraġġ se jkollha impatt fuq l-effettività tal-miżuri ta’ ġestjoni.

26

Il-PKS fiha pakkett ta’ miżuri ta’ ġestjoni tas-sajd (ara l-paragrafu 3 u l-Kaxxa 2) li jinkludu kwoti, restrizzjonijiet fuq l-isforz tas-sajd, u miżuri tekniċi għal sajd speċifiku. L-Istati Membri huma wkoll meħtieġa jimplimentaw u jimmonitorjaw il-miżuri ta’ ġestjoni tas-sajd li huma stipulati fil-liġi nazzjonali u internazzjonali (inklużi riżoluzzjonijiet tal-organizzazzjonijiet reġjonali tal-ġestjoni tas-sajd), kif ukoll jiżguraw li kemm il-bastimenti tal-UE kif ukoll dawk barranin li jistadu fl-ilmijiet tal-UE jkunu jikkonformaw mar-regoli u r-restrizzjonijiet stabbiliti.

Is-sistemi ta’ monitoraġġ tal-bastimenti jipprovdu informazjoni effettiva għall-monitoraġġ, iżda jeskludu parti kbira mill-flotta tas-sajd

27

Ir-Regolament dwar il-Kontroll jirrikjedi mill-Istati Membri li dawn ikollhom ċentru tal-monitoraġġ tas-sajd (ĊMS) għall-ipproċessar awtomatiku tad-data tas-Sistema ta’ Monitoraġġ tal-Bastimenti (VMS) li tintbagħat mill-bastimenti tas-sajd li jtajru l-nbandiera tagħhom. Dettalji dwar l-identifikazzjoni, il-pożizzjoni, id-data, il-ħin, ir-rotta u l-veloċità tal-bastimenti jiġu trażmessi permezz ta’ apparati ta’ lokalizzazzjoni bis-satellita li jitwaħħlu abbord il-bastimenti (ara l-Figura 4). B’dan il-mod, tiġi pprovduta informazzjoni utli ħafna u f’ħin reali għall-monitoraġġ tal-attivitajiet tas-sajd u l-ippjanar ta’ spezzjonijiet. Pereżempju, bl-użu tal-informazzjoni li tiġi trażmessa minn bastiment dwar il-veloċità u l-pożizzjoni, iċ-ĊMS jista’ jinduna jekk bastiment tas-sajd ikun qed jistad f’żona ristretta. Imbagħad, ikun jista’ jiċċekkja jekk il-bastiment għandux, jew le, l-awtorizzazzjoni meħtieġa jew il-karatterstiċi permessi għal attivitajiet tas-sajd f’dik iż-żona.

28

B’mod ġenerali, fl-Istati Membri li saritilhom żjara, is-sistemi tal-VMS kienu qed jintużaw b’mod korrett għall-ippjanar ta’ spezzjonijiet u għall-monitoraġġ tal-attivitajiet tas-sajd ta’ bastimenti konnessi mas-sistemi. Madankollu fl-Italja, għall-kuntrarju tal-pajjiżi l-oħra li saritilhom żjara, is-sistema ma pproduċietx twissijiet awtomatiċi meta l-bastimenti tas-sajd daħlu f’żoni ristretti tas-sajd, biex l-awtoritajiet ikunu jistgħu jiċċekkjaw jekk il-bastiment kienx awtorizzat jistad. Xi drabi, l-Istati Membri ssettjaw kundizzjonijiet aktar stretti minn dawk meħtieġa bir-Regolament dwar il-Kontroll. Pereżempju, sabiex tiċċekkja aħjar l-attività tal-bastimenti skont il-pjan nazzjonali ta’ ġestjoni għall-Mediterran¹², Spanja kienet tirrikjedi li l-bastimenti tas-sajd kollha bit-tartarun tal-borża¹³ u l-bastimenti tat-tkarkir¹⁴ kollha, irrispettivament mid-daqs tagħhom, ikunu konnessi mal-VMS. Barra minn hekk, xi wħud mill-awtoritajiet reġjonali fi Spanja kienu jirrikjedu mill-bastimenti kollha li jistadu f’ċerti żoni protetti li dawn ikunu mgħammra b’sistemi aktar sempliċi ta’ lokalizzazzjoni (mhux tal-VMS).

29

Ir-Regolament dwar il-Kontroll jirrikjedi li t-tagħmir tal-VMS jitwaħħal fuq il-bastimenti tas-sajd kollha li għandhom tul ta’ mill-inqas 12-il metru. L-Istati Membri jistgħu jeżentaw bastimenti li jkunu inqas minn 15-il metru twal jekk jistadu biss fl-ilmijiet tal-Istat Membru tal-bandiera tagħhom, jew jekk qatt ma jqattgħu aktar minn 24 siegħa fuq il-baħar minn meta jitilqu sa ma jirritornaw fil-port.

30

Meta analizzajna l-informazzjoni fir-reġistru tal-flotta tal-UE, aħna sibna li, għall-kuntrarju tar-rekwiżiti tar-Regolament dwar il-Kontroll, 2 % tal-bastimenti li kienu aktar minn 15-il metru twal u li kienu awtorizzati biex jistadu ma kellhom l-ebda VMS. Il-Kummissjoni kienet qabdet din l-irregolarità iżda din ma kinitx ġiet ikkoreġuta fiż-żmien meta sar l-awditu.

31

Minħabba r-rekwiżiti limitati tar-Regolament dwar il-Kontroll, fil-31 ta’ Diċembru 2015, 89 % tal-bastimenti tas-sajd tal-UE inklużi fir-reġistru tal-UE ma kellhomx tagħmir tal-VMS abbord (ara l-Figura 5). Minn dawn, 95 % tal-bastimenti kienu inqas minn 12-il metru twal, li mhumiex meħtieġa jkollhom VMS skont ir-Regolament dwar il-Kontroll. L-Istati Membri eżentaw il-biċċa l-kbira mill-bastimenti li kienu bejn 12 u 15-il metru twal (79 %) mill-obbligu tal-VMS. Aħna nirrikonoxxu l-ħtieġa li jiġi evitat it-tfigħ ta’ piż eċċessiv fuq l-operaturi ta’ bastimenti żgħar ikkawżat minn sistemi għaljin u kumplessi ta’ lokalizzazzjoni. Madankollu, il-fatt li parti importanti mill-flotta tas-sajd mhijiex mgħammra b’VMS jirrappreżenta lakuna sinifikanti fis-sistema ta’ ġestjoni tas-sajd, bħal:

• meta ma jkunux mgħammra b’VMS, (jew sistemi mbiegħda oħra għad-detezzjoni tal-lok, ir-rotta u l-veloċità tal-bastimenti), bastimenti li jidħlu f’żoni li fihom is-sajd huwa ristrett, jew li jkunu qed jistadu f’perjodi ta’ żmien mhux awtorizzati, jistgħu jinqabdu biss permezz ta’ sorveljanza mill-ajru jew minn fuq il-baħar (bastimenti tal-pattulji). Żoni ristretti u staġuni magħluqa huma miżuri tekniċi importanti għall-irkupru tal-istokkijiet;
• bastimenti li jkunu bejn 12 u 15-il metru twal jistgħu jiġu eżentati mir-rekwiżit biex tiġi installata VMS, u mill-preżentazzjoni ta’ dikjarazzjonijiet elettroniċi, jekk iqattgħu inqas minn 24 siegħa fuq il-baħar jew jistadu biss fl-ilmijiet territorjali. Madankollu, mingħajr l-ebda VMS, huwa biss b’ċerta diffikultà li dawn il-kundizzjonijiet jistgħu jiġu ċċekkjati, dment li l-awtoritajiet tal-portijiet ma jkunux jirrikjedu mill-bastimenti li dawn jinfurmawhom meta jkunu deħlin u ħirġin mill-port, bħalma huwa l-każ fl-Italja;
• bastimenti li jkunu awtorizzati jistadu taħt reġim tal-isforz tas-sajd jistgħu jiġu ċċekkjati biss b’mod effettiv jekk ikunu mgħammra b’VMS, dment li ma jipproduċux informazzjoni oħra (ġurnali ta’ abbord elettroniċi jew bil-miktub dwar is-sajd¹⁵ jew noti tal-bejgħ b’referenza għall-ħin u ż-żona) malajr biżżejjed, li madankollu ta’ spiss ma jkunx il-każ (ara l-Kaxxa 5);
• id-data dwar l-attivitajiet ma tistax tiġi kontroverifikata (l-ispeċijiet u l-kwantitajiet li jinqabdu bi tqabbil maż-żona tal-qbid li jiġu kkomunikati permezz tal-VMS). Dan ifixkel ukoll il-kontroll awtomatiku tal-użu tal-kwoti.

32

Ġeneralment, il-bastimenti mingħajr VMS ikunu inqas minn 15-il metru twal. Għalkemm individwalment għandhom mnejn ma jaqbdux ammonti kbar ta’ ħut, il-volum totali ta’ qabdiet tagħhom f’xi sajdiet u b’mod partikolari l-impatt tagħhom fuq xi speċijiet jistgħu jkunu sinifikanti. Dan huwa b’mod partikolari l-każ fil-baċir tal-Mediterran, fejn il-maġġoranza tal-bastimenti kienu inqas minn 15-il metru twal u ħafna stokkijiet kienu f’kundizzjoni serja (ara l-Figura 1).

B’mod ġenerali, il-Qabdiet Totali Permissibbli, il-kwoti u r-reġimi tal-isforzi tas-sajd kienu mmaniġġjati tajjeb, iżda xi drabi kien diffiċli biex il-miżuri tekniċi ta’ konservazzjoni jiġu mmonitorjati

33

Kif deskritt fl-introduzzjoni (il-paragrafu 3 u l-Kaxxa 2), il-ġestjoni tal-UE ta’ riżorsi tas-sajd hija prinċipalment ibbażata fuq il-qabdiet totali permissibbli (TAC) jew l-opportunitajiet tas-sajd issettjati għall-istess stokkijiet, li mbagħad jiġu kondiviżi fost il-pajjiżi tal-UE fil-forma ta’ kwoti nazzjonali, reġimi tal-isforzi tas-sajd u miżuri tekniċi. L-Anness II jipprovdi aktar informazzjoni dwar kif l-Istati Membri li żorna implimentaw il-kwoti u r-reġimi tal-isforzi. Il-PKS tirrikjedi li l-kwota nazzjonali tiġi ddistribwita mill-Istati Membri abbażi ta’ kriterji trasparenti u oġġettivi. Dawn il-kriterji jistgħu jieħdu inkunsiderazzjoni l-impatt tas-sajd fuq l-ambjent (eż. it-tip ta’ tagħmir tas-sajd jew it-teknika użata mill-bastimenti), l-istorja tal-konformità, il-kontribut għall-ekonomija lokali u l-livelli ta’ qbid storiku.

34

L-Istati Membri użaw prattiki differenti li ma ġewx ikkomunikati bis-sħiħ lill-Kummissjoni. Xi wħud allokaw kwoti direttament lilll-bastimenti tas-sajd, u xi wħud ippermettew lill-organizzazzjonijiet tal-produtturi jimmaniġġjaw il-kwoti. F’dan il-każ tal-aħħar, l-Istat Membru mhux dejjem kien jaf liema kriterji kienu ntużaw biex jiġu ddistribwiti l-kwoti jew l-ammonti allokati lil kull wieħed mill-benefiċjarji. Dan kien il-każ fl-Iskozja u fi Franza għall-biċċa l-kbira mill-ispeċijiet. Dan in-nuqqas ta’ trasparenza jagħmilha diffiċli għall-Istati Membri biex ikunu jafu l-benefiċjarji veri tal-opportunitajiet tas-sajd, it-tagħmir tas-sajd tagħhom u l-karatteristiċi tagħhom, u għalhekk biex jivvalutaw kwalunkwe impatt avvers potenzjali fuq l-ambjent u fuq l-ekonomiji lokali, pereżempju, kif ukoll biex jieħdu l-miżuri korrettivi meħtieġa fejn ikun xieraq. In-nuqqas ta’ distribuzzjoni trasparenti tal-kwoti jżid ir-riskju li interessi speċifiċi ta’ ċerti operaturi ekonomiċi jiġu ffavoriti bi ħsara ta’ oħrajn.

35

L-Istati Membri huma responsabbli biex jiżguraw li l-kwoti ma jinqabżux. Meta l-kwota disponibbli għal speċijiet partikolari tiġi eżawrita, l-Istat Membru jrid jagħlaq is-sajda u jinforma lill-Kummissjoni. Il-Kummissjoni tipprovdi sistema ta’ skambju ta’ informazzjoni biex tintuża mill-Istati Membri, li tippermettilhom ukoll jimmaniġġjaw il-kwoti u jittrasferixxu l-limiti fosthom stess. Fi tmiem is-sena, il-Kummissjoni tqabbel l-allokazzjoni (inklużi t-trasferimenti riċevuti migħand Stati Membri oħra) u l-konsum tal-kwoti skont l-Istat Membru. Jekk il-konsum għal speċi waħda jew aktar kienet ogħla mill-allokazzjoni, il-kwota għal dawn l-ispeċijiet titnaqqas mill-allokazzjoni tas-sena ta’ wara għall-Istat Membru kkonċernat.

36

Aħna eżaminajna s-sistema stabbilita għall-monitoraġġ tal-użu tal-kwoti fl-erba’ Stati Membri li saritilhom żjara. Aħna sibna li l-użu ġie mmonitorjat mill-qrib permezz ta’ proċeduri speċifiċi li kienu jirrikjedu sforz amministrattiv sinifikanti mill-Istati Membri (ara l-Anness II). Għall-ispeċijiet li kienu suġġetti għal kwoti, dawn il-proċeduri jkunu jpattu għad-dgħufijiet misjuba fil-ġestjoni ġenerali tad-data dwar il-qabdiet (ara l-paragrafi 42 sa 71). Aħna qabbilna d-dikjarazzjonijiet tal-Istati Membri li saru lill-Kummissjoni rigward l-użu tal-kwoti għall-2005, mad-data dwar il-qabdiet ipprovduta mill-Istati Membri (għal Spanja, l-Italja u r-Renju Unit minn data relatata ma’ bastimenti individwali). Aħna ma identifikajniex differenzi sinifikanti.

37

L-Istati Membri mmaniġġjaw il-limiti stabbilti għar-reġimi tal-isforzi tas-sajd (ara l-Kaxxa 2) billi taw awtorizzazzjonijiet tas-sajd lill-bastimenti li kienu jikkonformaw mal-kundizzjonijiet meħtieġa (eż. għal karatteristiċi tal-bastimenti jew tagħmir tas-sajd). L-għadd massimu ta’ ġranet tal-attivitajiet tas-sajd ġie ssettjat billi tqieset il-kapaċità totali tal-bastimenti awtorizzati. Biex jimmonitorjaw l-użu ta’ dan l-isforz tas-sajd, ġeneralment l-Istati Membri ikkalkulaw manwalment l-għadd ta’ ġranet li l-bastimenti kienu qattgħu fuq il-baħar. Xi drabi, kien diffiċli biex din l-informazzjoni terġa’ tiġi rkuprata jekk il-bastimenti ma kinux mgħammra b’VMS, u mbagħad l-Istati Membri kellhom jirreferu għal informazzjoni oħra li kienet tippermettilhom jidentifikaw jew jistmaw din id-durata (ġurnali ta’ abbord, noti tal-bejgħ). L-Istati Membri użaw approċċi differenti biex jikkalkulaw il-ġranet fuq il-baħar¹⁶. Meta r-reġim japplika għal Stati Membri differenti, dan jista’ jwassal għal disparitajiet fiż-żmien reali li jkun ġie allokat minn kull Stat Membru lill-bastimenti għas-sajd, kif ukoll għal impreċiżjonijiet fil-kalkolu tal-użu konsolidat tal-isforz.

38

Attwalment, hemm aktar minn 30 regolament li fihom miżuri tekniċi tas-sajd (ara l-Kaxxa 2) li huma applikabbli kemm għall-ilmijiet tal-UE kif ukoll għal dawk mhux tal-UE li fihom joperaw il-bastimenti tal-UE. F’Marzu 2016, il-Kummissjoni ppreżentat proposta għal regolament dwar il-miżuri tekniċi b’enfasi fuq ir-reġjonalizzazzjoni u s-simplifikazzjoni¹⁷.

39

Il-miżuri tekniċi huma partikolarment importanti fil-Mediterran fejn, għall-kuntrarju tal-Atlantiku, is-sistema ta’ ġestjoni tas-sajd mhijiex ibbażata fuq il-kwoti u l-istokkijiet tal-ħut mhumiex fi status ambjentali tajjeb (ara l-Figura 1). Skont il-Kummissjoni¹⁸, ammont stmat ta’ 95 % tal-istokkijiet tal-ħut tal-Mediterran li ġew ivvalutati, jinstadu b’mod eċċessiv.

40

Aħna sibna li dan kien ikkumplikat għas-sajjieda biex japplikaw il-miżuri tekniċi, u kkumplikat għall-ispetturi biex jikkontrollawhom, billi tant minnhom kienu applikabbli fil-Mediterran¹⁹. Dan ġie appoġġat mill-partijiet interessati²⁰ li tkellimna magħhom. Barra minn hekk, il-biċċa l-kbira mill-bastimenti tas-sajd li joperaw fil-Mediterran kienu żgħar²¹ u konsegwentement eżenti mis-sistema ta’ monitoraġġ tal-bastimenti u mis-sistemi elettroniċi ta’ komunikazzjoni. Dan huwa fattur ieħor li jfixkel il-ġestjoni tas-sajd billi jillimita l-possibbiltajiet li l-attivitajiet u l-qabdiet mill-flotot jiġu kkontrollati.

41

Aħna osservajna li, b’mod partikolari fi Spanja u fi Franza, l-organizzazzjonijiet professjonali tas-sajd kienu jirrikjedu mill-membri tagħhom li dawn jikkonformaw mal-miżuri addizzjonali tekniċi u ta’ kontroll minbarra dawk meħtieġa bil-qafas regolatorju tal-UE (eż. perjodi addizzjonali ta’ waqfien li jsir barra ż-żminijiet li jkunu ġew imposti mill-awtoritajiet, daqsijiet minimi akbar ta’ qabdiet, obbligi tal-VMS għal bastimenti iżgħar, kontrolli addizzjonali bejn il-pari). Dawn il-miżuri kienu aktar adattati għall-ispeċifiċitajiet tar-reġjuni kkonċernati u għalhekk aktar faċli għas-sajjieda biex jifhmuhom u japplikawhom. Hemm lok biex isir kapital minn din is-sensibilizzazzjoni u dan l-impenn fil-livell reġjonali, b’mod partikolari fil-qafas tal-proċess deċiżjonali reġjonali futur (ara l-paragrafu 38).

Id-data dwar is-sajd miġbura skont ir-Regolament dwar il-Kontroll kienet inkompleta u inaffidabbli

42

Biex jintlaħaq l-objettiv tal-isfruttament sostenibbli tar-riżorsi tas-sajd, irid jinstab bilanċ bejn il-livelli eżistenti tal-istokkijiet u l-intensità tas-sajd. Data affidabbli u komprensiva dwar il-qabdiet tal-ħut hija importanti ħafna kemm sabiex l-istokkijiet jiġu vvalutati b’mod xjentifiku, kif ukoll sabiex jittieħdu miżuri xierqa ta’ ġestjoni għall-konservazzjoni jew l-irkupru tal-istokkijiet. Ladarba l-miżuri jkunu ġew approvati, dawn iridu jiġu applikati b’mod korrett u l-attivita tal-flotot trid tiġi kkontrollata.

43

Ir-Regolament dwar il-Kontroll jirrikjedi li l-bastimenti kollha b’tul kumplessiv ta’ 10 metri jew aktar jippreżentaw sett ta’ dokumenti, elettronikament (permezz tas-Sistema Elettronika ta’ Rappurtar (ERS²²)) jew bil-miktub. Dan jinkludi ġurnali ta’ abbord, dikjarazzjonijiet tal-ħatt l-art, u noti tal-bejgħ għal kwantitajiet li jkunu jaqbżu s-soll issettjat. Id-dispożizzjonijiet tar-Regolament dwar il-Kontroll u l-proċeduri użati minn kull wieħed mill-Istati Membri awditjati huma stipulati fl-Anness I.

44

Ir-Regolament dwar il-Kontroll jirrikjedi mill-Istati Membri li dawn iwettqu kontroverifiki biex jiżguraw li d-data tagħhom tkun ta’ kwalità suffiċjenti. Il-kontroverifiki jkopru data tal-VMS, data dwar l-attivitajiet tas-sajd, informazzjoni dwar il-bejgħ, dettalji tal-awtorizzazzjonijiet u l-liċenzji tas-sajd, u data dwar ir-rapporti ta’ spezzjoni.

45

L-informazzjoni pprovduta mill-Istati Membri dwar l-attivitajiet tas-sajd f’konformità mar-Regolament dwar il-Kontroll (il-ħatt l-art, il-qabdiet u l-isforzi) tintuża wkoll għal skopijiet oħra. Hija s-sors prinċipali ta’ informazzjoni għall-issodisfar tal-obbligi tal-Istati Membri biex jipprovdu data statistika dwar il-ħatt l-art f’konformità mal-leġiżlazzjoni²³. Hija tikkostitwixxi wkoll sors skont il-Qafas għall-Ġbir ta’ Data (ara l-Anness III), li ġie stabbilit biex jappoġġa l-parir xjentifiku fil-kuntest tal-PKS.

46

Aħna analizzajna l-affidabbiltà tad-data rilevanti dwar il-qabdiet li kient disponibbli għall-Kummissjoni, li nkisbet mis-sorsi li ġejjin:

• ġurnali ta’ abbord dwar is-sajd jew dokumenti ekwivalenti li jintużaw għar-reġistrazzjoni tal-qabdiet;
• dikjarazzjonijiet tal-ħatt l-art li jirreġistraw il-kwantitajiet reali li nħattu l-art; u
• noti tal-bejgħ li jirreġistraw il-kwantitajiet li nbiegħu lill-ewwel xerrej.

Id-data tal-Istati Membri dwar il-qabdiet għal bastimenti żgħar mingħajr dikjarazzjonijiet elettroniċi kienet inkompleta u xi drabi skorretta

47

Data affidabbli u komprensiva dwar l-attivitajiet tas-sajd hija essenzjali biex is-sajd jiġi mmaniġġjat b’mod effettiv. Biex id-data tkun tista’ tiġi kkonsolidata u użata fil-livell tal-UE, jeħtieġ li din tkun kumparabbli fl-Istati Membri kollha u tiġi pprovduta fuq bażi f’waqtha.

48

Ir-Regolament dwar il-Kontroll ma jobbligax lill-bastimenti li jkunu inqas minn 10 metri twal jirrappurtaw il-qabdiet u l-ħatt l-art. L-Istati Membri jridu jimmonitorjaw l-attivitajiet ta’ dawn il-bastimenti sabiex jiżguraw il-konformità tagħhom mar-regoli tal-PKS fuq il-bażi ta’ pjanijiet tal-kampjunar jew fuq il-bażi ta’ rekwiżit li dawn il-bastimenti jippreżentaw noti tal-bejgħ jew dikjarazzjoni ta’ kull xahar tal-qabdiet tagħhom. Barra minn hekk, l-Istati Membri jistgħu jobbligaw lill-kaptani ta’ dawn il-bastimenti li jżommu ġurnal ta’ abbord.

49

Aħna osservajna li Franza u l-Iskozja kienu jirrikjedu li, għall-bastimenti li jkunu inqas minn 10 metri twal, tiġi kkompletata forma ssimplifikata tal-ġurnal ta’ abbord dwar is-sajd. Fi Spanja l-bejgħ kollu kellu jsir permezz ta’ ċentru tal-irkant, u n-noti tal-bejgħ kienu disponibbli.

50

L-Italja ma ġabritx data dwar il-qabdiet jew dwar il-ħatt l-art, għal bastimenti li kienu inqas minn 10 metri twal. Barra minn hekk, dawn il-bastimenti kellhom il-permess, skont ir-Regolament dwar il-Kontroll (ara l-Anness I), ibigħu direttament lill-konsumatur mingħajr l-ebda obbligu biex jiddikjaraw il-bejgħ. Madankollu, għall-kuntrarju tar-Regolament dwar il-Kontroll, l-Italja ma kinitx implimentat pjan tal-kampjunar biex tiġbor data dwar l-attività tas-sajd għal din il-kategorija ta’ bastimenti. Minflok, l-Italja użat l-informazzjoni li kienet inġabret għal skopijiet oħra²⁴, b’metodu ta’ ġbir u objettivi differenti minn dawk tar-Regolament dwar il-Kontroll, li ma kinitx ibbażata fuq analiżi tar-riskju u li nkisbet bosta xhur wara li kienet twettqet l-attività tas-sajd.

51

Il-proporzjon tal-bastimenti fl-Istati Membri li saritilhom żjara²⁵ li jużaw dikjarazzjonijiet bil-miktub u elettroniċi tad-data jintwera fil-Figura 6. Din turi li relattivament ftit li xejn bastimenti użaw dikjarazzjonijiet elettroniċi. Fi Spanja u fl-Italja, il-biċċa l-kbira mill-bastimenti li kienu bejn 12 u 15-il metru twal (85 % u 90 % tal-bastimenti rispettivament) ġew eżentati milli jippreżentaw dikjarazzjoni elettronika.

52

Min-natura tagħhom, id-dikjarazzjonijiet bil-miktub iżidu r-riskju li jiġu rreġistrati żbalji fid-databases dwar il-qabdiet tal-Istati Membri. Għalhekk, aħna ċċekkjajna kampjun ta’ dikjarazzjonijiet bil-miktub tal-qabdiet u l-ħatt l-art bi tqabbil mal-entrati fid-databases dwar il-qabdiet tal-Istati Membri. Aħna ċċekkjajna wkoll li l-bastimenti kienu jidhru bħala attivi fir-reġistru tal-flotta.

53

Ix-xogħol tal-awditjar żvela li l-informazzjoni kienet inkompleta, kien hemm żbalji fit-traskrizzjoni tad-data, u f’xi każijiet il-qabdiet kienu qed jiġu rreġistrati għal bastimenti li kienu jidhru bħala inattivi fir-reġistri tal-flotot. Il-Kaxxa 5 turi d-dgħufijiet prinċipali li sibna.

54

Id-data dwar il-qabdiet hija sors importanti ta’ informazzjoni għall-analiżijiet xjentifiċi u għall-parir xjentifiku²⁷, kif ukoll biex il-pressjoni fuq l-istokkijiet tal-ħut tiġi stmata. L-affidabbiltà ta’ din l-informazzjoni hija mminata mil-lakuni fid-data dwar il-qabdiet għal bastimenti li jkunu inqas minn 10 metri twal u mid-dgħufijiet identifikati fit-trattament ta’ dikjarazzjonijiet bil-miktub tal-qabdiet. Il-Kummissjoni nfisha ssottolinjat²⁸ il-ħtieġa għal data preċiża dwar il-qabdiet u enfasizzat l-importanza tan-nuqqas ta’ informazzjoni bħal din mingħand bastimenti żgħar li mhumiex suġġetti għal rekwiżiti ta’ rappurtar tad-data dwar il-qabdiet.

Id-data dwar il-bejgħ ma kinitx komprensiva jew konsistenti biżżejjed mad-dikjarazzjonijiet tal-ħatt l-art

55

Ir-Regolament dwar il-Kontroll jobbliga lill-Istati Membri jwettqu kontroverifiki tal-informazzjoni rigward l-attivitajiet tas-sajd (bħal informazzjoni dwar il-qabdiet, il-ħatt l-art u n-noti tal-bejgħ). Huwa mistenni li dawn il-miżuri jtejbu l-affidabbiltà tad-data dwar il-qabdiet.

56

Aħna wettaqna kontroverifiki tad-dikjarazzjonijiet tal-ħatt l-art u tan-noti tal-bejgħ għal kampjun ta’ bastimenti (ara n-nota 11 f’qiegħ il-paġna). Aħna sibna li n-noti tal-bejgħ mhux dejjem kienu disponibbli, u li kien hemm differenzi sinifikanti li ma kinux spjegati bejn id-dikjarazzjonijiet tal-ħatt l-art u l-kwantitajiet irreġistrati bħala mibjugħin. Meta jitqies il-fatt li l-Istati Membri sussegwentement jużaw dawn is-sorsi ta’ informazzjoni għall-validazzjoni tad-data, il-kobor tad-differenzi li sibna fil-kampjun tagħna wera li kien hemm lok sostanzjali għal titjib. Id-dettalji huma ppreżentati fil-Kaxxa 6.

Is-sistema ta’ kondiviżjoni tal-informazzjoni fost l-Istati Membri kienet ineffettiva

57

Ir-Regolament dwar il-Kontroll jipprevedi l-kondiviżjoni tal-informazzjoni fost l-Istati Membri, li hija importanti sabiex jiġu ttrattati l-każijiet frekwenti fejn il-bastimenti jaqbdu, iħottu l-art jew ibigħu l-qabdiet tagħhom fi Stati Membri li ma jkunux tagħhom stess. Il-Kummissjoni għamlet disponibbli, għall-Istati Membri, pjattaforma online għal dawn l-iskambji iżda ma timmonitorjax dan it-tip ta’ skambju tal-informazzjoni fost l-Istati Membri.

58

Għall-Istati Membri li awditjana, aħna wettaqna kontroverifiki tad-data dwar il-ħatt l-art għall-bastimenti ta’ Stat Membru wieħed bi tqabbil mad-data fl-Istati Membri l-oħra li kienu involuti fl-awditu. Aħna sibna li Franza kienet iddikjarat bi żball li qabdiet minn bastimenti Spanjoli li kienu nħattu l-art fir-Renju Unit u nbiegħu fi Franza kienu “nħattu l-art fi Franza”. Osservajna wkoll li l-Italja ma kienet iddikjarat l-ebda qabda li nħattet mill-bastimenti Spanjoli fil-portijiet tagħha fl-2015 bħala li “nħattet l-art fl-Italja”. Madankollu, Spanja kienet għaddiet in-notifiki dwar il-ħatt l-art rigward il-bastimenti tas-sajd tagħha lill-awtoritajiet Taljani, li għalhekk kien imisshom kienu jafu bil-qabdiet li nħattu l-art mill-bastimenti Spanjoli.

59

Il-Kummissjoni hija konxja tal-fatt li s-sistemi ta’ skambju tal-Istati Membri mhumiex affidabbli u jirriżultaw f’dan it-tip ta’ żbalji ta’ trażmissjoni. Hija osservat li l-organizzazzjoni interna tal-Istati Membri fir-rigward tas-sistemi ta’ ħżin u trażmissjoni tad-data hija ta’ spiss kumplessa wisq, u is-sistemi tal-IT huma ta’ spiss inkompatibbli fost u fi ħdan l-Istati Membri.

60

L-ispetturi Skoċċiżi użaw sistema online oħra ta’ kondiviżjoni tad-dokumenti biex jagħmlu disponibbli d-dokumenti tat-trasport għall-qabdiet li kienu nħattu l-art fil-portijiet tagħhom minn bastimenti li jtajru l-bandiera ta’ Stati Membri oħra. Meta l-qabdiet jiġu ttrasportati barra mill-Iskozja, dan kien jippermetti lill-Istat Membru tad-destinazzjoni jispezzjona t-trakkijiet li qed jittrasportaw il-merkanzija, jekk huwa jkun qies li dan kien meħtieġ, u jwettaq kontroverifiki tal-informazzjoni bi tqabbil ma’ data oħra. Minkejja li dan kien eżempju pożittiv ta’ kooperazzjoni, kien jindika wkoll li l-iskambju ta’ data u ta’ informazzjoni fuq il-pjattaformi eżistenti seta’ jaħdem b’mod aktar effettiv.

Kien hemm dgħufijiet fis-sistemi u l-proċessi ta’ validazzjoni tad-data

61

Wara li jiżguraw li d-data meħtieġa tkun ġiet irreġistrata f’konformità mar-Regolament dwar il-Kontroll, kull Stat Membru jrid iwaqqaf is-sistema proprja tiegħ ta’ validazzjoni tad-data, biex jaqbad l-inkonsistenzi, l-iżbalji u d-data nieqsa.

62

Aħna eżaminajna jekk l-Istati Membri li saritilhom żjara kinux implimentaw, jew le, sistemi xierqa ta’ validazzjoni. Id-dgħufijiet prinċipali tal-validazzjoni kienu jikkonċernaw algoritmi inaffidabbli tal-validazzjoni u nuqqas ta’ kontroverifiki bejn is-sorsi ta’ informazzjoni u d-databases differenti. Dawn jintwerew fil-Kaxxa 7.

63

Barra mir-rekwiżiti tar-Regolament dwar il-Kontroll, xi wħud mill-Istati Membri li saritilhom żjara kienu wettqu kontrolli addizzjonali fuq id-data biex itejbu aktar il-kwalità tagħha. Huma:

1. wettqu kontroverifika tal-identità tal-bastiment bi tqabbil mar-reġistru biex jiġi żgurat li l-bastiment kien attiv. Fl-Italja, l-uniku pajjiż fejn aħna identifikajna li dan il-kontroll ma kienx twettaq, il-bastimenti li ma baqgħux fir-reġistru tal-flotta kienu qed jiddikjaraw qabdiet (ara l-Kaxxa 5).
2. iċċekkjaw li d-dikjarazzjonijiet tal-qabdiet u tal-ħatt l-art kienu jispeċifikaw il-postijiet għas-sajd. Fl-Italja, l-uniku pajjiż fejn aħna identifkajna n-nuqqas ta’ dan il-kontroll sibna li fl-2015 total ta’ 50 576 tunnellata ta’ ħut ġew iddikjarati bħala li nħattu l-art mingħajr ma ġie speċifikat il-post għas-sajd, filwaqt li 2 774 tunnellata ta’ ħut ġew iddikjarati bħala qabdiet mingħajr ma ġie speċifikat il-post għas-sajd.
3. iċċekkjaw li t-tolleranza ta’ 10 %²⁹ għal kull speċi bejn id-dikjarazzjoni tal-qabdiet u d-dikjarazzjoni tal-ħatt l-art ġiet osservata. Mill-erba’ pajjiżi li saritilhom żjara matul l-awditu, l-Iskozja biss kienet waqqfet din is-sistema awtomatika ta’ tqabbil.

64

Minkejja l-isforzi li saru mill-Istati Membri, fiż-żmien meta sar l-awditu tlieta mill-erba’ Stati Membri li saritilhom żjara ma kinux jikkonformaw mar-rekwiżiti kollha. Franza u l-Italja, b’mod partikolari, għad kellhom progress sinifikanti x’jiksbu.

Il-Kummissjoni ma rċevietx settijiet komprensivi ta’ data vvalidata mngħand l-Istati Membri

65

Ir-Regolament dwar il-Kontroll jirrkjedi li kull Stat Membru tal-bandiera jinnotifika d-data aggregata dwar il-qabdiet fir-rigward tal-istokkijiet kollha jew il-gruppi kollha tal-istokkijiet li jkunu suġġetti għal TAC jew kwoti lill-Kummissjoni elettronikament qabel il-15 tax-xahar ta’ wara. L-Istati Membri jridu jinfurmaw ukoll lill-Kummissjoni, fuq bażi ta’ kull tliet xhur, dwar il-kwantitajiet aggregati tal-istokkijiet li ma jkunux dawk li ntbagħtu fuq bażi ta’ kull xahar. Din l-informazzjoni tikkostitwixxi s-sors prinċipali tad-data tal-Kummissjoni għal dak li jikkonċerna l-użu tal-kwoti u l-attività tas-sajd tal-flotta tal-UE. Il-Kummissjoni tgħaddi din id-data lill-organizzazzjonijiet reġjonali tal-ġestjoni tas-sajd. Għalhekk, huwa importanti li d-data tkun affidabbli biex b’hekk id-deċiżjoni t-tajba dwar il-ġestjoni tas-sajd tkun tista’ tittieħed.

66

L-Istati Membri jikkomunikaw ukoll l-informazzjoni dwar il-qabdiet lill-Eurostat, li jiġbor flimkien l-istatistika tas-sajd għall-UE.

67

Aħna wettaqna kontroverifiki tad-data aggregata dwar il-qabdiet li kienet disponibbli għall-Kummissjoni (id-DĠ MARE u l-Eurostat) għall-erba’ pajjiżi li saritilhom żjara, bi tqabbil mad-data pprovduta direttament mill-awtoritajiet nazzjonali. Aħna identifikajna diskrepanzi sinifikanti li huma deskritti fid-dettall fit-Tabella 1.

Tabella 1

Differenzi bejn id-data tal-Istati Membri, tad-DĠ MARE u tal-Eurostat

Qabdiet skont l-Istat Membru (1000 tunnellata)	Sors tad-data	2013	2014	2015
Spanja	Data tal-Istat Membru	878	910	870
	Id-DĠ MARE	483	942	926
	L-Eurostat	904	1 237	902
	MARE meta mqabbel mal-Istat Membru	-45 %	3 %	6 %
	MARE meta mqabbel mal-Eurostat	-47 %	-24 %	3 %
Franza	Data tal-Istat Membru	542	537	477
	Id-DĠ MARE	574	536	436
	L-Eurostat	529	544	497
	MARE meta mqabbel mal-Istat Membru	6 %	0 %	-8 %
	MARE meta mqabbel mal-Eurostat	9 %	-1 %	-12 %
L-Italja	Data tal-Istat Membru	76	76	80
	Id-DĠ MARE	38	28	23
	L-Eurostat	173	177	191
	MARE meta mqabbel mal-Istat Membru	-50 %	-63 %	-72 %
	MARE meta mqabbel mal-Eurostat	-78 %	-84 %	-88 %
Ir-Renju Unit	Data tal-Istat Membru	628	759	708
	Id-DĠ MARE	911	752	707
	L-Eurostat	618	752	702
	MARE meta mqabbel mal-Istat Membru	45 %	-1 %	0 %
	MARE meta mqabbel mal-Eurostat	47 %	0 %	1 %

Sors: L-Istati Membri, id-DĠ MARE u l-Eurostat.

68

Kien hemm diversi spjegazzjonijiet għal dawn id-differenzi: informazzjoni nieqsa rigward ċerti segmenti tal-flotta jew rigward ċerti stokkijiet, reviżjoni tad-data mill-Istati Membri, jew duplikazzjoni tad-data (ara l-Kaxxa 8).

69

Filwaqt li d-differenzi bejn iċ-ċifri aggregati tad-DĠ MARE u dawk tal-Eurostat kienu naqsu kemxejn, testijiet li d-DĠ MARE wettaq fuq kampjun ta’ speċijiet urew li kien għad hemm diskrepanzi sostanzjali għal ċerti speċijiet. Billi ċ-ċifri jistgħu jkunu ogħla jew aktar baxxi għal speċijiet differenti, dan jista’ jagħti impressjoni skorretta ta’ titjib fit-data aggregata. Iż-żewġ servizzi kienu waqqfu grupp ta’ ħidma biex itejbu l-kwalità tad-data u jsibu tarf tad-diskrepanzi.

70

L-estent tad-differenzi kumplessivi jqajmu dubji dwar l-affidabbiltà, il-komprensività u l-kumparabbiltà tad-data dwar il-qabdiet li kienet disponibbli għall-Kummissjoni. Din id-data tintuża wkoll fil-Qafas għall-Ġbir ta’ Data, fejn tipprovdi informazzjoni li tikkontribwixxi għal opinjonijiet xjentifiċi u deċiżjonijiet dwar il-ġestjoni tas-sajd. Għalhekk, l-inaffidabbiltà tad-data tagħmel il-ġestjoni tas-sajd diffiċli u toħloq riskju li l-għażliet it-tajbin (eż. dwar it-TACs, il-kwoti, l-isforz tas-sajd jew il-miżuri tekniċi) għandhom mnejn mhux dejjem isiru.

71

Barra minn hekk, ir-Regolament dwar il-Kontroll jirrikjedi mill-Istati Membri li dawn jibagħtu data aggregata dwar il-qabdiet, skont l-istokk. Madankollu, il-fatt li huwa ma jirrikjedix rappurtar b’dettalji dwar iż-żoni tas-sajd, id-daqs tal-bastimenti, u t-tagħmir tas-sajd, jillimita l-possibbiltà li ssir analiżi approfondita tad-data dwar il-qabdiet (eż. l-impatt li s-segment tal-flotta jħalli fuq stokk speċifiku).

Is-sistema ta’ spezzjoni kienet funzjonali, iżda dgħufijiet fl-applikazzjoni ta’ sanzjonijiet għamlu l-infurzar inqas effettiv

72

Sistema effettiva ta’ spezzjoni hija waħda mill-fatturi ewlenin biex jiġi żgurat li l-attivitajiet tas-sajd jibqgħu sostenibbli u li jiġi aċċertat il-futur, fuq terminu twil, tas-settur. Is-sistema trid tivverifika l-konformità mar-regoli dwar il-ġestjoni tas-sajd (pereżempju l-funzjonament tal-VMS, il-preżentazzjoni ta’ dikjarazzjonijiet, il-konformità mal-ispeċifikazzjonijiet tat-tagħmir, id-daqs tal-ħut, eċċ.) li jkunu applikabbli għall-operaturi kollha fis-settur tas-sajd u tistabbilixxi sanzjonijiet f’każ ta’ nuqqas ta’ konformità. L-Istati Membri huma responsabbli għat-twaqqif tal-istrutturi meħtieġa u għall-provvediment tal-finanzjament, it-tagħmir u l-persunal meħtieġ għall-ispezzjonijiet u għas-sanzjonijiet. Meta jkunu qed jitwettqu dawn il-kompiti, irid jittieħed kont tal-prinċipji ta’ nondiskriminazzjoni u nondistorsjoni tal-kompetizzjoni bejn is-setturi, il-bastimenti u n-nies, kif rikonoxxut bir-Regolament dwar il-Kontroll. Dawn il-prinċipji huma partikolarment importanti minħabba n-natura transkonfinali inerenti tal-attivitajiet tas-sajd, fejn il-bastimenti jistgħu jkunu attivi fl-ilmijiet ta’ Stati Membri oħra.

B’mod ġenerali, l-Istati Membri ppjanaw l-ispezzjonijiet tajjeb, iżda kien jeħtieġ li r-rapporti ta’ spezzjoni jkomplu jiġu standardizzati u li jiġu rreġistrati aħjar

73

Biex is-sistema ta’ spezzjoni tiffunzjona tajjeb³⁰, l-Istati Membri jrid ikollhom strutturi xierqa stabbiliti, u jwettqu analiżijiet tar-riskju biex jidentifikaw il-livelli ta’ riskju għal flotot, attivitajiet u operaturi differenti. Abbażi tar-riskju identifikat, jenħtieġ li huma jfasslu pjan annwali ta’ spezzjoni u jallokaw il-finanzjament, it-tagħmir u l-persunal meħtieġ. Jenħtieġ li l-Istati Membri joħolqu database elettronika biex ikunu jistgħu jimmonitorjaw l-implimentazzjoni tal-pjanijiet, imbagħad janalizzaw u jużaw ir-riżultati tal-ispezzjonijiet. Id-database għandha tinżamm aġġornata u għandu jkun fiha r-rapporti kollha ta’ spezzjoni u sorveljanza li jkunu nħolqu mill-persunal tagħhom. Meta l-bastiment tas-sajd spezzjonat ikun qed itajjar il-bandiera ta’ Stat Membru ieħor, kopja tar-rapport ta’ spezzjoni trid tintbagħat immedjatament lill-pajjiż ikkonċernat jekk kwalunkwe infrazzjoni tiġi osservata matul l-ispezzjoni.

B’mod ġenerali, l-attivitajiet ta’ spezzjoni ġew ippjanati tajjeb

74

Aħna analizzajna l-organizzazzjoni tal-attivitajiet ta’ spezzjoni fl-Istati Membri awditjati³¹, u l-proċeduri stabbiliti għat-twettiq ta’ analiżijiet tar-riskju u għat-tfassil u l-implimentazzjoni ta’ pjanijiet ta’ spezzjoni. L-Anness IV jispjega kif l-ispezzjonijiet jiġu organizzati fl-Istati Membri li saritilhom żjara.

75

Matul l-awditu, aħna osservajna li l-analiżi tar-riskju twettqet fl-erba’ Stati Membri li żorna u, bl-eċċezzjoni ta’ Franza, ġiet ikkoordinata fil-livell nazzjonali filwaqt li kemm ir-riskji nazzjonali kif ukoll dawk lokali ttieħdu inkunsiderazzjoni. Wara dawn l-analiżijiet tar-riskju, tfasslu pjanijiet ta’ segwitu. Fi Franza, il-koordinazzjoni bejn il-livelli nazzjonali, reġjonali u lokali kienet imminata mill-kumplessità tal-organizzazzjoni amministrattiva.

76

Aħna sibna li l-implimentazzjoni, mill-Istati Membri, tal-pjanijiet ta’ spezzjoni tagħhom kienet xi drabi mxekkla. Fi Franza u fi Spanja, il-prijoritajiet ta’ spezzjoni ma ġewx iddeterminati mill-awtorità li kienet tipprovdi r-riżorsi. Fi Franza, xi drabi kien hemm diskrepanza bejn il-kompiti assenjati u r-riżorsi allokati, allura konsegwentement it-timijiet ta’ kontroll ma setgħux ikopru l-ħatt l-art immirat kollu u kien naqas l-għadd ta’ spezzjonijiet fis-snin reċenti. Skont l-awtoritajiet tal-Istati Membri, fatturi esterni jistgħu jnaqqsu l-livell ta’ prijorità tal-ispezzjonijiet tas-sajd (eż. il-kriżi tal-migranti fil-Mediterran kienet tirrikjedi l-użu ta’ riżorsi navali).

77

L-Istati Membri pprovdew l-ispetturi b’firxa ta’ għodod tal-IT u databases biex jgħinuhom iwettqu u jirrappurtaw dwar xogħolhom. Madankollu, bl-eċċezzjoni ta’ Spanja u ta’ Dipartiment wieħed Franċiż, l-ispetturi ma kellhomx aċċess għall-informazzjoni meta kienu fuq il-post (eż. permezz ta’ terminals mobbli). Minflok, huma kellhom jikkuntattjaw liċ-ĊMS għall-informazzjoni. Dan jirrappreżenta problema speċjalment f’dawk il-każijiet fejn l-ispezzjoni ma tistax tiġi ppjanata minn qabel, iżda jeħtieġ li titwettaq fuq bażi ad hoc mal-wasla fil-port. F’dawn il-każijiet, aċċess rapidu għall-informazzjoni jkun jagħmilha possibbli li l-bastimenti jiġu mmirati għal spezzjoni b’mod aktar effettiv. Barra minn hekk, fin-nuqqas ta’ aċċess f’ħin reali matul l-ispezzjonijiet, l-ispetturi ma jistgħux iwettqu kontroverifiki fuq l-identità, il-permessi u l-karatteristiċi tal-bastiment bi tqabbil mad-dokumenti abbord. Dan jagħmilha aktar diffiċli biex jinqabdu żbalji fid-databases bħal dawk li nqabdu matul l-awditu (ara l-Kaxxa 4), u bidliet mhux awtorizzati fil-karatteristiċi tal-bastiment. F’xi wħud mill-uffiċċji tal-portijiet fi Franza, kien saħansitra diffiċli ħafna għall-ispetturi biex jaċċessaww l-applikazzjonijiet tal-IT mill-uffiċċju tagħhom, u dan għamilha impossibbli li jsiru tħejjijiet effiċjenti għall-ispezzjonijiet.

Il-prattiki ta’ spezzjoni kienu jeħtieġu standardizzazzjoni ulterjuri

78

Sabiex l-ispezzjonijiet tas-sajd jiċċekkjaw il-konformità b’mod effiċjenti u jittrattaw lill-operaturi tas-sajd b’mod ġust, jenħtieġ li l-awtoritajiet tal-Istati Membri jwettqu spezzjonijiet simili b’mod standardizzat, u jiżviluppaw protokolli u manwali xierqa ta’ spezzjoni. Aħna eżaminajna kif l-ispezzjonijiet fuq il-ħatt l-art twettqu fl-Istati Membri li saritilhom żjara. L-ispezzjonijiet użaw mudell uniku nazzjonali ta’ rapport (l-Italja u Franza) jew manwali u mudelli ta’ spezzjoni (Spanja u l-Iskozja), minbarra ż-żona Mediterranja ta’ Franza, fejn l-ispetturi użaw listi ta’ kontroll differenti jew l-ebda lista ta’ kontroll matul l-ispezzjoni. L-għodod ta’ standardizzazzjoni li nħolqu pprovdew qafas tajjeb għall-iżgurar tal-konformità mal-prinċipju nondiskriminatorju għall-attivitajiet ta’ kontroll, iżda mhux dejjem intużaw.

79

L-Aġenzija Ewropea għall-Kontroll tas-Sajd (EFCA) hija responsabbli għall-organizzazzjoni tal-koordinazzjoni operazzjonali tal-attivitajiet ta’ kontroll fost l-Istati Membri. Hija tipprovdi assistenza lill-Istati Membri u lill-Kummissjoni, prinċipalment permezz ta’ Pjanijiet ta’ Użu Konġunt (JDPs)³². Aħna osservajna li fil-kuntest tal-JDP tal-Mediterran għat-tonn u l-pixxispad, listi ta’ kontroll komprensivi ħafna kienu disponibbli għall-ispezzjonijiet tal-ħatt l-art. Madankollu, dawn mhumiex obbligatorji u jirrappreżentaw appoġġ pedagoġiku biss, u fil-prattika ma jintużawx għall-ispezzjonijiet nazzjonali fl-Italja u fi Franza minkejja li kienu għodda tajba għall-istandardizzazzjoni tal-approċċi għall-ispezzjonijiet.

Mhux l-attivitajiet kollha ta’ spezzjoni ġew irrappurtati fid-database nazzjonali

80

Ir-Regolament dwar il-Kontroll jirrikjedi mill-Istati Membri li jżommu database elettronika tal-attivitajiet kollha ta’ spezzjoni u sorveljanza relatati mas-sajd (inklużi l-ispezzjonijiet tat-trasport u l-kummerċjalizzazzjoni)³³. Meta miżmuma tajjeb, dawn id-databases huma għodda effettiva biex tingħata għajnuna fl-ippjanar, it-twettiq u r-rappurtar aħjar tal-ispezzjonijiet. Aħna sibna li d-databases tal-ispezzjonijiet mhux dejjem kienu operazzjonali bis-sħiħ u ma kinux jinkludu b’mod sistematiku r-rapporti dwar l-ispezzjonijiet imwettqa mill-awtoritajiet kollha involuti fl-attivitajiet tas-sajd (eż. it-trasport, l-operaturi tal-ewwel bejgħ, fil-livell nazzjonali jew reġjonali) kif jintwera fil-Kaxxa 9.

Is-sanzjonijiet applikati mhux dejjem kienu dissważivi, proporzjonali u effettivi

81

Sabiex l-ispezzjonijiet ikunu effettivi u jnaqqsu l-infrazzjonijiet tal-PKS, jeħtieġ li jiġu segwiti minn sanzjonijiet fejn ikun meħtieġ. Dawn is-sanzjonijiet issettjati mill-Istati Membri jridu jkunu dissważivi, proporzjonali u effettivi³⁴. Huma għandhom jieħdu inkunsiderazzjoni s-serjetà u l-benefiċċju ekonomiku potenzjali tal-infrazzjoni.

82

Sabiex jiżgurat it-trattament indaqs tal-operaturi irrispettivament mill-ilmijiet li fihom tkun twettqet l-infrazzjoni, filwaqt li jinżamm id-dritt tal-Istati Membri li jistabbilixxu s-sistema ta’ sanzjonijiet proprja tagħhom f’konformità mal-prinċipju tas-sussidjarjetà, ir-Regolament dwar il-Kontroll stabbilixxa sistema ta’ punti għal infrazzjonijiet serji rigward il-liċenzja jew il-kaptan ta’ bastiment. Is-sistema ta’ punti bdiet tapplika mill-1 ta’ Jannar 2012. Jekk l-għadd totali ta’ punti jkun ekwivalenti għal jew jaqbeż ċertu livell, il-liċenzja tas-sajd trid tiġi sospiża jew irtirata b’mod permanenti.

Is-sanzjonijiet li ġew applikati mhux dejjem ipprevienu l-infrazzjonijiet milli jerġgħu jseħħu

83

L-Istati Membri użaw diversi sistemi ta’ sanzjonijiet għall-infrazzjonijiet tal-PKS, kif jintwera fit-Tabella 2.

Tabella 2

Proċeduri ta’ sanzjonijiet tal-Istati Membri

Stat Membru	Tip ta’ sanzjoni
Spanja	Intużat il-proċedura amministrattiva. L-ammont tal-multa imposta kien jikkorrispondi għal kategorija ta’ infrazzjonijiet u kien jiddependi mill-impatt ambjentali, mir-rikorrenza u mis-serjetà tal-infrazzjoni. Il-valur tal-qabda seta’ jinżdied mal-ammont totali tas-sanzjoni. Is-sistema ta’ punti ntużat parzjalment biss.
Franza	Intużaw proċeduri amministrattivi u kriminali, għad-diskrezzjoni tal-awtorità tal-ispezzjoni. L-ebda informazzjoni dwar is-sanzjonijiet kriminali applikati ma kienet disponibbli fil-livell nazzjonali. Għalkemm il-leġiżlazzjoni nazzjonali pprevediet ammonti fissi jew sanzjonijiet li kienu proporzjonali għall-benefiċċji ekonomiċi, fil-prattika kull awtorità pubblika ddeterminat is-sanzjonijiet mingħajr ma qieset dawn il-kunsiderazzjonijiet. Ma ntużat l-ebda sistema ta’ punti.
L-Italja	L-awtoritajiet ta’ spezzjoni użaw proċeduri amministrattivi u kriminali. L-ammont tal-multa ġie deċiż mill-awtorità pubblika fi ħdan l-intervall issettjat bil-leġiżlazzjoni. Ma kien hemm l-ebda korrelazzjoni bejn is-sanzjonijiet u l-benefiċċju ekonomiku ħlief fi ftit każijiet. Għal raġunijiet ta’ veloċità, l-awtoritajiet offrew għażla bejn ħlas id-doppju tal-ammont minimu tal-multa, jew terz tal-multa massima li tkun tikkorrispondi għal kategorija partikolari ta’ infrazzjonijiet u ammont li jiġi deċiż mill-imħallef. Intużat sistema ta’ punti għall-infrazzjonijiet.
Ir-Renju Unit (l-Iskozja)	Intużaw proċeduri amministrattivi u kriminali. Rarament ġew applikati multi, u miżuri preventivi ġew implimentati aktar ta’ spiss milli sanzjonijiet reali. Meta penali finanzjarji ġew applikati, l-awtoritajiet pubbliċi ddeċidew dwarhom fi ħdan l-intervall isettjat fil-leġiżlazzjoni nazzjonali, filwaqt li ħadu l-benefiċċju ekonomiku inkunsiderazzjoni. Użu limitat tas-sistema ta’ punti (mhux applikata b’mod konsistenti, u mhux fil-każijiet kollha ta’ infrazzjonijiet).

Sors: Il-leġiżlazzjoni, informazzjoni fuq il-post, kif ukoll databases tal-infrazzjonijiet u s-sanzjonijiet.

84

Aħna sibna li r-rekwiżit li s-sanzjoni tintrabat mal-benefiċċju ekonomiku relatat mal-infrazzjoni ġie applikat b’mod sistematiku fi Spanja. Fl-Iskozja, dan ġie applikat b’mod sistematiku fil-ftit każijiet fejn ġew deċiżi multi. Filwaqt li dan ġie previst f’ċerti każijiet bil-leġiżlazzjoni fl-Italja³⁵ u fi Franza, ġeneralment ma ġiex applikat fil-prattika.

85

Sabiex nistmaw l-effett dissważiv tas-sanzjoni, aħna analizzajna l-lista ta’ sanzjonijiet fl-Istati Membri li saritilhom żjara, biex nidentifikaw il-bastimenti li kienu ġew sanzjonati bosta drabi. L-għadd ta’ bastimenti b’aktar minn ħames infrazzjonijiet jidher fit-Tabella 3.

Tabella 3

Flotta, spezzjonijiet, infrazzjonijiet u rikorrenza ta’ infrazzjonijiet fl-Istati Membri li saritilhom żjara fil-perjodu 2013-2015

Stat Membru	Total tal-flotta fil-31.12.2015	Total tal-ispezzjonijiet fuq il-baħar u fuq il-ħatt l-art	Total tal-ispezzjonijiet li rriżultaw f'infrazzjonijiet	% tal-infrazzjonijiet tal-ispezzjonijiet	Total tal-bastimenti b'aktar minn ħames infrazzjonijiet fit-tliet snin	% tal-flotta b'aktar minn ħames infrazzjonijiet
Spanja	9 396	23 146	4 703	20 %	25	0 %
Franza1	6 910	39 515	1 585	4 %	43	1 %
L-Italja2	12 316	18 038	3 536	20 %	72	1 %
Ir-Renju Unit (l-Iskozja)3	2 015	16 990	5 150	30 %	169	8 %

1 Id-data ta' Franza tinkludi l-ispezzjonijiet imwettqa mill-għadd kbir ta' awtoritajiet involuti u l-katina tal-kummerċjalizzazzjoni. Għall-2014-2015 aħna kellna data parzjali biss (ara l Kaxxa  9).

2 L-awtoritajiet responsabbli għall-ispezzjonijiet fl-Italja huma wkoll responsabbli għall-ispezzjonijiet wara l-ewwel bejgħ, u kellhom ukoll responsabbiltajiet oħra barra mill-kamp ta' applikazzjoni tar-Regolament dwar il-Kontroll.

3 It-total tal-flotta tar-Renju Unit kien ta' 6 232 bastiment; skont l-istatistika ta' Marine Scotland, 2 015 kien l-għadd ta' bastimenti fl-Iskozja fi tmiem l-2015.

Sors: Data riċevuta mill-Istati Membri.

86

Fi Spanja, l-għadd ta’ bastimenti b’aktar minn ħames infrazzjonijiet bejn l-2013 u l-2015 kien negliġibbli bħala proporzjon tat-total tal-flotta. Dan jista’ jiġi spjegat mill-fatt li l-multi jistgħu legalment jirdoppjaw jekk il-kaptan ikun wettaq l-istess infrazzjoni fi żmien 18-il xahar, jew jekk kwalunkwe infrazzjoni tkun twettqet fi żmien 3 snin minn meta tkun twettqet l-infrazzjoni preċedenti.

87

L-Iskozja kellha, bil-bosta, l-ogħla proporzjon ta’ bastimenti b’aktar minn 5 infrazzjonijiet, b’169 operatur uniku li wettqu aktar minn 5 infrazzjonijiet bejn l-2013 u l-2015. Għalkemm il-multa tirdoppja fejn tiġi ripetuta infrazzjoni li tkun ġiet sanzjonata qabel permezz ta’ multa, l-għadd ta’ multi li ġew applikati kien żgħir ħafna. Fil-prattika, il-biċċa l-kbira mill-azzjoni li ttieħdet wara l-infrazzjonijiet kienet tinvolvi ittri ta’ konsulenza u twissijiet bil-fomm u bil-miktub. Dawn il-miżuri mhux vinkolanti ġew applikati saħansitra f’każijiet ta’ infrazzjonijiet serji (eż. qbid tal-ħut wara l-għeluq tas-sajda rispettiva), u l-miżuri ma kinux dehru li qed jipprevienu r-rikorrenza. Għalkemm l-isforzi u l-kopertura tal-ispezzjonijiet kienu ogħla minn dawk fi Stati Membri oħra, ir-rikorrenza kienet akbar, u dan jindika li s-sanzjonijiet huma inqas dissważivi.

88

Fl-Italja l-ogħla proporzjon ta’ rikorrenzi kien għall-Kodiċi tan-Navigazzjoni (l-immarkar ta’ bastimenti, regoli li jikkonċernaw l-ekwipaġġ), li mhijiex parti mill-PKS. Fi Franza, l-awdituri ma setgħux jiksbu stampa ġenerali tas-sanzjonijiet kollha billi l-uffiċċji tal-affarijiet marittimi (id-Direttorat Dipartimentali tal-Art u l-Baħar, id-Direttorat Interreġjonali tal-Baħar u d-Direttorat tas-Sajd fil-Baħar u l-Akkwakultura) ma rċevew l-ebda informazzjoni li kienet tikkonċerna s-sanzjonijiet li ġew applikati fil-qorti permezz tal-proċedura kriminali. Għalhekk, l-analiżi hija inkompleta.

Is-sistema ta’ punti ma ġietx applikata b’mod konsistenti

89

Aħna sibna li s-sistema ta’ punti għal infrazzjonijiet serji, meħtieġa bir-Regolament dwar il-Kontroll³⁶, kienet stabbilita fl-Italja u kienet qed tiffunzjona tajjeb. Hija ġiet applikata parzjalment fi Spanja, ġiet applikata b’mod inkonsistenti fl-Iskozja u ma ġietx implimentata fi Franza. Aktar dettalji jingħataw fil-Kaxxa 10.

90

Ma kienx hemm kundizzjonijiet ekwivalenti ta’ kompetizzjoni għall-operaturi tas-sajd billi l-Istati Membri ma applikawx is-sistema ta’ punti b’mod konsistenti. Operaturi tal-UE li kienu impenjaw infrazzjoni serja partikolari fi Stati Membri differenti jew f’reġjuni differenti fi ħdan l-istess Stat Membru għandhom mnejn ma rċevewx punti.

91

Fejn l-infrazzjoni sseħħ fl-ilmijiet ta’ Stat Membru ieħor, l-Istat Membru tal-bandiera huwa responsabbli għall-applikazzjoni tal-punti. L-Istati Membri jiskambjaw data fir-rigward tal-infrazzjoni. Madankollu, attwalment ma hemm l-ebda reġistru Ewropew tal-infrazzjonijiet u s-sanzjonijiet, li jkun jippermetti segwitu aħjar tal-punti applikati, analiżi tar-riskju aktar effettiva u trasparenza akbar fost l-Istati Membri.

92

L-EFCA żviluppat Sistema Elettronika tar-Rapporti ta’ Spezzjoni (EIR) li ġiet offruta lill-Istati Membri biex tintuża bħala d-database nazzjonali tagħhom għar-rapporti ta’ spezzjoni. Din l-għodda tista’ tintuża mill-Istati Membri biex jikkondividu l-informazzjoni dwar l-ispezzjonijiet u l-punti.

Knklużjonijiet

93

Il-Politika Komuni tas-Sajd tirrikjedi sistema effettiva ta’ kontroll stabbilita sabiex jirnexxilha tiżgura li l-istokkijiet ta’ ħut u s-settur tas-sajd ikunu sostenibbli fuq terminu twil. Il-qafas tal-kontrolli tas-sajd, tal-UE, ġie rivedut l-aħħar fl-2009 b’regolament tal-Kunsill, biex jiġu indirizzati dgħufijiet magħrufa f’dak iż-żmien u li ġew identifikati bir-Rapport Speċjali Nru 7/2007 tal-Qorti. Huwa jipprovdi l-prinċipji u r-regoli għall-kontroll tal-attivitajiet tas-sajd, miżuri ta’ ġestjoni tas-sajd, rekwiżiti tad-data, kif ukoll spezzjonijiet u sanzjonijiet.

94

Aħna vvalutajna jekk l-UE kellhiex, jew le, sistema effettiva stabbilita għall-kontrolli tas-sajd, billi eżaminajna r-rekwiżiti prinċipali tar-regolament tal-UE dwar il-kontroll tas-sajd u l-implimentazzjoni tagħhom mill-Istati Membri. Aħna analizzajna kif l-Istati Membri ċċekkjaw il-komponenti tal-kapaċità tal-flotta (tunnellaġġ gross u qawwa tal-magna) u jekk żammewx aġġornat, jew le, ir-reġistru tal-flotta; jekk il-miżuri ta’ ġestjoni tas-sajd ġewx implimentati tajjeb; jekk id-data meħtieġa għall-ġestjoni tas-sajd kinitx kompleta u affidabbli; u jekk l-ispezzjonijiet u s-sanzjonijiet ġewx ippjanati, imwettqa u applikati b’mod xieraq jew le.

95

Minn meta wettaqna l-awditu tagħna fl-2007, u minn meta saret ir-riforma tar-Regolament dwar il-Kontroll, l-Istati Membri u l-Kummissjoni għamlu progress f’bosta oqsma. Madankollu, aħna sibna li minħabba dgħufijiet sinifikanti fil-biċċa l-kbira mill-oqsma awditjati, l-UE għad ma għandhiex sistema effettiva biżżejjed stabbilita għall-kontrolli tas-sajd, biex tappoġġa s-suċċess tal-PKS. L-Istati Membri kienu għadhom ma implimentawx bis-sħiħ ir-regolament tal-UE dwar il-kontroll tas-sajd, u ċerti dispożizzjonijiet tar-regolament ikunu jeħtieġu modifikazzjoni biex l-Istati Membri jkunu jistgħu jikkontrollaw l-attivitajiet tas-sajd b’mod effettiv.

96

L-Istati Membri li żorna ma vverifikawx biżżejjed il-preċiżjoni tal-kapaċità tal-flotta tagħhom f’termini ta’ tunnellaġġ gross u qawwa tal-magna. Filwaqt li r-Regolament dwar il-Kontroll jipprovdi, b’mod speċifiku, proċedura għall-verifikazzjonijiet dokumentarji u fiżiċi tal-qawwa tal-magna, huwa ma jagħmilx dan għall-verifikazzjonijiet tat-tunnellaġġ gross. Aħna osservajna l-fatt li l-Istati Membri li żorna ma vverifikawx it-tunnellaġġ tal-bastimenti tas-sajd tagħhom, u li tnejn minnhom kienu għadhom ma wettqux il-verifikazzjonijiet meħtieġa tal-qawwa tal-magna. Fejn kontrolli bħal dawn kienu twettqu, dawn fil-fatt identifikaw differenzi bejn il-qawwa reali tal-magna u dik iddokumentata. Dan juri l-ħtieġa li jitwettqu kontrolli bħal dawn, b’mod partikolari billi xi Stati Membri huma qrib il-limiti massimi tagħhom għall-kapaċità tal-flotta (il-paragrafi 14 sa 20). Matul l-awditu, aħna identifikajna wkoll għadd sinifikanti ta’ diskrepanzi bejn id-dettalji, tal-bastimenti, li ġew irreġistrati fir-reġistru tal-flotta u dawk li kienu jinsabu fid-dokumenti ta’ sostenn (il-paragrafi 21 sa 24).

Rakkomandazzjoni 1 – Titjib tal-affidabbiltà tal-informazzjoni dwar il-flotot tas-sajd

Sabiex itejbu l-preċiżjoni tal-informazzjoni tal-kapaċità tas-sajd, jenħtieġ li l-Istati Membri, sal-2018

1. (a) jistabbilixxu proċeduri biex jivverifikaw il-preċiżjoni tal-informazzjoni rreġistrata fir-reġistri nazzjonali tal-flotot tagħhom;

Fil-kuntest ta’ kwalunkwe emenda futura għar-Regolament dwar il-Kontroll, u sabiex intejbu l-preċiżjoni tal-informazzjoni tal-kapaċità tas-sajd, aħna nirrakkomandaw li jenħtieġ li l-Kummissjoni tinkludi fil-proposta leġiżlattiva tagħha

1. regoli dettaljati għall-verifikazzjonijiet regolari dokumentarji u dawk fuq il-post, kemm tal-indikaturi tat-tunnelleġġ gross (TG) kif ukoll dawk tal-qawwa tal-magna (kW) li jintużaw għall-kalkolu tal-kapaċità tas-sajd.

97

L-Istati Membri huma meħtieġa jimplimentaw il-miżuri ta’ ġestjoni tas-sajd li huma stipulati fil-leġiżlazzjoni nazzjonali, Ewropea u internazzjonali (il-paragrafi 25 u 26). Il-monitoraġġ u l-kontroll tal-attivitajiet tas-sajd huma essenzjali biex is-sostenibbiltà tas-sajd tiġi żgurata. Aħna sibna li s-sistemi ta’ monitoraġġ tal-bastimenti (VMS), tal-Istati Membri, li kienu qed jużaw teknoloġija ta’ traċċar abbażi ta’ satellita pprovdew informazzjoni utli għal attivitajiet bħal dawn, u li kumplessivament l-Istati Membri kienu qed jimplimentaw il-miżuri ta’ ġestjoni tas-sajd b’mod adegwat. Madankollu, b’riżultat tal-applikazzjoni tar-regoli tar-Regolament dwar il-Kontroll, 89 % tal-flotta tal-UE ma kinux immonitorjati mill-VMS. Dan fixkel il-ġestjoni effettiva tas-sajd (il-paragrafi 25 sa 32).

98

L-Istati Membri li żorna investew riżorsi konsiderevoli flil-ġestjoni tal-użu tal-kwoti li ġew allokati lilhom, u dan għamluh tajjeb. Madankollu, meta l-awtoritajiet tal-Istati Membri ppermettew lill-organizzazzjonijiet tal-produtturi jimmaniġġjaw id-distribuzzjoni tal-kwoti, mhux dejjem kienu jafu liema kriterji kienu ntużaw biex il-kwoti jiġu ddistribwiti lil kull wieħed mill-benefiċjarji. Dan in-nuqqas ta’ trasparenza jagħmilha diffiċli għall-Istati Membri biex ikunu jafu l-benefiċjarji reali tal-opportunitajiet tas-sajd, u għalhekk biex jivvalutaw l-impatt avvers potenzjali tagħhom fuq l-ambjent u fuq l-ekonomiji lokali, kif ukoll biex jieħdu l-miżuri korrettivi meħtieġa fejn ikun xieraq. Barra minn hekk, dan in-nuqqas ta’ trasparenza jżid ir-riskju li l-interessi speċifiċi ta’ ċerti operaturi ekonomiċi jiġu ffavoriti bi ħsara ta’ oħrajn (il-paragrafi 33 sa 36). Ir-reġimi tal-isforzi tas-sajd kienu diffiċli li jiġu mmonitorjati, speċjalment għal bastimenti li ma kinux konnessi mal-VMS, u l-Istati Membri użaw approċċi differenti meta kkalkulaw il-ġranet fuq il-baħar, li huwa wieħed mill-elementi prinċipali ta’ dawn ir-reġimi (il-paragrafu 37). Kien hemm wisq miżuri tekniċi, li xi drabi kienu kkumplikati wisq biex jiġu applikati mis-sajjieda u kkontrollati mill-ispetturi. Madankollu, aħna fil-fatt rajna eżempji ta’ prattika tajba fejn organizzazzjonijiet professjonali tas-sajd kienu jirrikjedu mill-membri tagħhom li dawn jikkonformaw mal-miżuri addizzjonali, iżda aktar iffukati, ta’ konservazzjoni minbarra dawk meħtieġa bil-Politika Komuni tas-Sajd (il-paragrafi 38 sa 41).

Rakkomandazzjoni 2 – Titjib tal-monitoraġġ tal-miżuri ta’ ġestjoni tas-sajd

Fil-kuntest ta’ kwalunkwe emenda futura għar-Regolament dwar il-Kontroll, u sabiex intejbu l-monitoraġġ tal-attivitajiet ta’ bastimenti tas-sajd żgħar, aħna nirrakkomandaw li jenħtieġ li l-Kummissjoni tinkludi fil-proposta leġiżlattiva tagħha

1. (a) it-tneħħija tal-eżenzjonijiet tal-VMS għal bastimenti li jkunu bejn 12 u 15-il metru twal;
2. (b) ir-rekwiżit għall-installazzjoni ta’ sistemi iżgħar u orħos ta’ lokalizzazjoni għal bastimenti li jkunu inqas minn 12-il metru twal.

Sabiex jiżguraw it-trasparenza tad-distribuzzjoni tal-kwoti tas-sajd, jenħtieġ li l-Istati Membri, sal-2019

2. jinfurmaw lill-Kummissjoni dwar is-sistema ta’ allokazzjoni tal-kwoti tagħhom f’konformità mal-Artikolu 16 tar-Regolament dwar il-PKS, inkluż il-mod kif il-kriterji trasparenti u oġġettivi jkunu ġew inkorporati fid-distribuzzjoni tal-kwoti tas-sajd fost il-partijiet interessati.

99

Id-data dwar l-attivitajiet tas-sajd li nġabret fil-qafas tar-Regolament dwar il-Kontroll ma kinitx kompleta u affidabbli biżżejjed. Id-data dwar il-qabdiet għal bastimenti li jagħmlu dikjarazzjonijiet bil-miktub, li jirrappreżentaw porzjon sinifikanti tal-flotta tal-UE, kienet inkompleta. Barra minn hekk, aħna sibna livell sinifikanti ta’ żball u dgħufijiet fis-sistemi meta kienu qed jiġu rreġistrati dikjarazzjonijiet bil-miktub fid-databases tal-Istati Membri (il-paragrafi 47 sa 54). Aħna identifikajna diskrepanzi sinifikanti bejn il-ħatt l-art iddikjarat u r-reġistri sussegwenti tal-ewwel bejgħ (il-paragrafi 55 sa 56). Tnejn mill-erba’ Stati Membri li saritilhom żjara ma kkondividewx u ma traċċawx b’mod suffiċjenti l-informazzjoni li tikkonċerna l-attivitajiet tal-bastimenti minn Stat Membru wieħed tal-bandiera f’ieħor (il-paragrafi 57 sa 60). Aħna qbadna dgħufijiet fil-proċessi ta’ validazzjoni u ta’ kontroverifikazzjoni tad-data, tal-Istati Membri, li jipprevienu d-detezzjoni ta’ inkonsistenzi, żbalji u informazzjoni nieqsa (il-paragrafi 61 sa 64). Barra minn hekk, kien hemm differenzi sinifikanti bejn id-data kumplessiva dwar il-qabdiet li ġiet irreġistrata mill-Istati Membri, u dik disponibbli għad-diversi servizzi tal-Kummissjoni (il-paragrafi 65 sa 70). Fl-aħħar nett, ir-Regolament dwar il-Kontroll ma jirrikjedix li l-Istati Membri jibagħtu d-data dwar il-qabdiet b’dettalji taż-żona tas-sajd, id-daqs tal-bastimenti u t-tagħmir tas-sajd, u dan jillimita l-possibbiltà li ssir analiżi dettaljata tal-attività tal-flotta Ewropea (il-paragrafu 71).

Rakkomandazzjoni 3 – Titjib tal-affidabbiltà tad-data dwar is-sajd

1. Sabiex itejbu l-kompletezza u l-affidabbiltà tad-data dwar is-sajd,

Jenħtieġ li l-Istati Membri, sal-2019

1. janalizzaw u jtejbu l-proċess għar-reġistrazzjoni u l-verifikazzjoni tad-data bil-miktub tal-attivitajiet tas-sajd;;
2. jiżguraw li jkollhom data affidabbli dwar l-attività tal-bastimenti li jkunu inqas minn 10 metri twal, u li huma japplikaw ir-regoli stabbiliti bir-Regolament dwar il-Kontroll biex jiġbruha;
3. jikkompletaw il-validazzjoni u l-kontroverifikar tad-data dwar l-attivitajiet tas-sajd.

Jenħtieġ li l-Kummissjoni, sal-2020

3. tistabbilixxi pjattaforma għall-iskambju tal-informazzjoni li għandha tintuża mill-Istati Membri biex jibagħtu d-data vvalidata f’formats u f’kontenuti standard, biex b’hekk l-informazzjoni disponibbli għas-servizzi differenti tal-Kummissjoni tkun taqbel mad-data tal-Istati Membri;
4. tippromwovi l-iżvilupp ta’ sistema orħos, aktar sempliċi u li hija faċli għall-utent biex tiffaċilita l-komunikazzjoni elettronika tal-attivitajiet tas-sajd għal bastimenti li jkunu inqas minn 12-il metru twal;
5. tanalizza l-problemi li jkun fadal fil-kompletezza u l-affidabbiltà tad-data fil-livell tal-Istati Membri, u tiddeċiedi dwar azzjonijiet xierqa mal-Istati Membri fejn ikun meħtieġ.

2. Fil-kuntest ta’ kwalunkwe emenda futura għar-Regolament dwar il-Kontroll, u sabiex intejbu l-kompletezza tal-affidabbiltà tad-data dwar is-sajd, aħna nirrakkomandaw li jenħtieġ li l-Kummissjoni tinkludi fil-proposta leġiżlattiva tagħha

6. it-tneħħija tal-eżenzjonijiet tas-Sistema Elettronika ta’ Rappurtar u tad-dikjarazzjonijiet elettroniċi għal bastimenti li jkunu bejn 12 u 15-il metru twal, jew il-kunsiderazzjoni ta’ soluzzjonijiet alternattivi;
7. analiżi tal-obbligi ta’ rappurtar tad-data dwar il-qabdiet tal-Istati Membri, taħt ir-Regolament dwar il-Kontroll, sabiex jiġu inklużi d-dettalji taż-żona tas-sajd, tad-daqs tal-bastimenti, u tat-tagħmir tas-sajd.

100

Sistema effettiva ta’ spezzjoni tas-sajd hija essenzjali biex tiżgura li r-regoli tal-Politika Komuni tas-Sajd jiġu osservati u li l-attivitajiet tas-sajd jibqgħu sostenibbli (ara l-paragrafu 72). Aħna sibna li, inġenerali, l-ispezzjonijiet ġew ippjanati tajjeb. Madankollu, il-fatt li l-ispetturi ma kellhomx aċċess f’ħin reali għall-informazzjoni dwar il-bastimenti naqqas l-effettività tal-ispezzjonijiet (il-paragrafi 73 sa 77). L-Istati Membri li saritilhom żjara kienu stabbilew proċeduri standardizzati ta’ spezzjoni, iżda aħna sibna każijiet fejn il-mudelli disponibbli tar-rapporti ma kinux intużaw mill-ispetturi (il-paragrafi 78 sa 79). Barra minn hekk, ir-riżultati tal-ispezzjonijiet mhux dejjem ġew irrappurtati b’mod korrett fid-databases nazzjonali (il-paragrafu 80).

101

Sabiex l-ispezzjonijiet ikunu effettivi, iridu jkunu appoġġati minn sanzjonijiet dissważivi, proporzjonali u effettivi, inkluża sistema ta’ punti għal każijiet serji biex jiġi żgurat li l-operazzjonijiet tas-sajd jiġu ttrattati b’mod indaqs (il-paragrafi 81 sa 82). Aħna sibna li s-sanzjonijiet li ġew applikati mhux dejjem kienu dissważivi (il-paragrafi 83 sa 88). Is-sistema ta’ punti ġiet applikata sa livelli differenti ħafna fl-Istati Membri kollha li żorna u saħansitra fi ħdan l-istess Stat Membru, u għalhekk it-trattament indaqs tal-operaturi ma kienx garantit. Fl-aħħar nett, attwalment ma hemm l-ebda reġistru Ewropew tal-infrazzjonijiet u s-sanzjoniiet, li jkun jippermetti segwitu aħjar tal-punti applikati, analiżi tar-riskju aktar effettiva u trasparenza akbar fost l-Istati Membri (il-paragrafi 89 sa 92).

Rakkomandazzjoni 4 – Titjib tal-ispezzjonijiet u tas-sanzjonijiet

1. Sabiex itejbu l-ispezzjonijiet

Jenħtieġ li l-Istati Membri, sal-2019

1. (a) meta r-Regolament il-ġdid dwar il-miżuri tekniċi jidħol fis-seħħ, jiżviluppaw, f’konsultazzjoni mal-Aġenzija Ewropea għall-Kontroll tas-Sajd (EFCA), u jużaw protokolli u rapporti standard ta’ spezzjoni li jkunu aktar adattati għall-kundizzjonijiet reġjonali u tekniċi speċifiċi tas-sajd milli dawk ipprovduti skont l-Anness XXVII tar-Regolament Nru 404/2011;

Fil-kuntest ta’ kwalunkwe emenda futura għar-Regolament dwar il-Kontroll, aħna nirrakkomandaw li jenħtieġ li l-Kummissjoni tinkludi fil-proposta leġiżlattiva tagħha

1. l-użu obbligatorju mill-Istati Membri tas-Sistema Elettronika tar-Rapporti ta’ Spezzjoni sabiex jiżguraw l-eżawrjenza u l-aġġornar tar-riżultati tal-ispezzjonijiet nazzjonali tagħhom u sabiex jikkondividu r-riżultati tal-ispezzjonijiet mal-Istati Membri l-oħra kkonċernati.

2. Sabiex jiżguraw l-effettività tas-sistema tas-sanzjonijiet, jenħtieġ li l-Istati Membri, sal-2019

2. (c) jieħdu kont dovut tal-infrazzjonijiet rikorrenti jew ta’ trasgressuri persistenti meta jissettjaw is-sanzjonijiet;
3. (d) sabiex jiżguraw kundizzjonijiet ekwivalenti ta’ kompetizzjoni għall-operaturi, jimplimentaw bis-sħiħ is-sistemi ta’ punti u jiżguraw l-applikazzjoni konsistenti tagħhom fit-territorji rispettivi tagħhom.

Fil-kuntest ta’ kwalunkwe emenda futura għar-Regolament dwar il-Kontroll, aħna nirrakkomandaw li jenħtieġ li l-Kummissjoni tinkludi fil-proposta leġiżlattiva tagħha

4. dispożizzjoni li tipprevedi sistema għall-iskambju ta’ data dwar l-infrazzjoniiet u s-sanzjonijiet f’kooperazzzjoni mal-EFCA u mal-Istati Membri.

Dan ir-Rapport ġie adottat mill-Awla I, immexxija mis-Sur Phil WYNN OWEN, Membru tal-Qorti tal-Awdituri, fil-Lussemburgu fil-laqgħa tagħha tal-5 ta’ April 2017.

Abbrevjazzjonijiet

ĊMS: Ċentru tal-Monitoraġġ tas-Sajd

EFCA: Aġenzija Ewropea għall-Kontroll tas-Sajd

ERS: Sistema Elettronika ta’ Rappurtar għall-attivitajiet tas-sajd

FAO: Organizzazzjoni tal-Ikel u l-Agrikoltura tan-Nazzjonijiet Uniti

FIDES: Sistema ta’ Skambju ta’ Data rigward l-Informazzjoni dwar is-Sajd

GFCM: Kummissjoni Ġenerali għas-Sajd fil-Mediterran

kW: Kilowatts tal-qawwa tal-magna

PKS: Politika Komuni tas-Sajd

RFMO: Organizzazzjoni Reġjonali tal-Ġestjoni tas-Sajd

TAC: Qabda Totali Permissibbli

TG: Tunnellaġġ Gross

UE: Unjoni Ewropea

VMS: Sistema ta’ Monitoraġġ tal-Bastimenti

Glossarju

Awtorizzazzjoni tas-sajd: Dokument uffiċjali flimkien mal-liċenzja tas-sajd, li jintitola bastiment tas-sajd tal-Unjoni jwettaq attivitajiet speċifiċi tas-sajd matul perjodu speċifikat, f’żona partikolari jew għal sajda partikolari taħt kundizzjonijiet speċifiċi.

Bastimenti żgħar: Għall-iskop uniku ta’ dan ir-rapport, dawn huma bastimenti inqas minn 15-il metru twal.

Ċentru tal-Monitoraġġ tas-Sajd: Ċentru operattiv stabbilit minn Stat Membru tal-bandiera u mgħammar b’ħardwer u softwer tal-kompjuter li jippermetti reċezzjoni awtomatika ta’ data, ipproċessar u trażmissjoni elettronika ta’ data;

DĠ MARE: Direttorat Ġenerali għall-Affarijiet Marittimi u s-Sajd.

Eurostat: Uffiċċju tal-Istatistika tal-Unjoni Ewropea.

Kapaċità tas-Sajd: Kapaċità tas-sajd hija l-ammont ta’ ħut li jista’ jinqabad matul perjodu ta’ żmien minn bastiment jew flotta jekk dawn jintużaw kompletament u għal kundizzjoni partikolari relatata mar-riżorsi. Fil-qafas tal-PKS din titkejjel bħala t-tunnellaġġ ta’ bastiment f’TG (tunnellaġġ gross) u l-qawwa tiegħu f’kW (kilowatt) kif iddefinit fl-Artikoli 4 u 5 tar-Regolament tal-Kunsill (KEE) Nru 2930/86¹.

Liċenzja tas-sajd: Dokument uffiċjali li jikkonferixxi lid-detentur tiegħu d-dritt, kif determinat mir-regoli nazzjonali, li juża ċerta kapaċità tas-sajd għall-isfruttament kummerċjali tar-riżorsi akkwatiċi ħajjin. Din fiha rekwiżiti minimi dwar l-identifikazzjoni, il-karatteristiċi tekniċi u l-armar ta’ bastiment tas-sajd tal-Unjoni.

Organizzazzjoni Reġjonali tal-Ġestjoni tas-Sajd: Organizzazzjoni subreġjonali, reġjonali jew simili b’kompetenza, skont il-liġi internazzjonali, li tistabbilixxi miżuri ta’ konservazzjoni u ġestjoni għar-riżorsi marittimi ħajjin imqiegħda taħt ir-responsabbiltà tagħha permezz tal-konvenzjoni jew il-ftehim li bihom kienet stabbilita.

Reġistru nazzjonali tal-flotta: Ir-reġistru li kull Stat Membru jżomm tal-bastimenti tas-sajd kollha li jtajru l-bandiera tiegħu.

Reġistru tal-flotta tal-UE: Reġistru miżmum mill-Kummissjoni, li fih informazzjoni dwar il-bastimenti tas-sajd kollha tal-Unjoni.

Sforz tas-sajd: Prodott tal-kapaċità u l-attività ta’ bastiment tas-sajd; għal grupp ta’ bastimenti tas-sajd huwa t-total tal-isforz tas-sajd tal-bastimenti kollha fil-grupp.

Sistema Elettronika tar-Rapporti ta’ Spezzjoni: Sistema żviluppata mill-EFCA biex l-Istati Membri jkunu jistgħu jikkondividu data dwar ir-rapporti ta’ spezzjoni.

Sistema ta’ Monitoraġġ tal-Bastimenti: Sistema ta’ monitoraġġ tal-bastimenti tas-sajd abbażi ta’ satellita, li tipprovdi data f’intervalli regolari lill-awtoritajiet tas-sajd (Ċentru tal-Monitoraġġ tas-Sajd) dwar il-lok, ir-rotta u l-veloċità tal-bastimenti.

Stat tal-Bandiera: Stat li fih jiġi rreġistrat bastiment partikolari.

Tim tal-awditjar

Ir-rapporti speċjali tal-QEA jippreżentaw ir-riżultati tal-awditi tal-prestazzjoni u tal-konformità tagħha f’dak li jirrigwarda oqsma baġitarji jew suġġetti ta’ ġestjoni speċifiċi. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta’ introjtu jew ta’ nfiq involut, l-iżviluppi li jkunu għad iridu jseħħu u l-interess politiku u pubbliku.

Dan ir-rapport ġie adottat mill-Awla I tal-Awditjar — immexxija minn Phil Wynn Owen, Membru tal-QEA — li tispeċjalizza fl-użu sostenibbli tar-riżorsi naturali. L-awditu tmexxa mill-Membru tal-QEA Janusz Wojciechowski; b’appoġġ minn Kinga Wiśniewska-Danek, Kap tal-kabinett; Katarzyna Radecka-Moroz, Attaché tal-kabinett; Colm Friel, Maniġer Prinċipali; Maria Luisa Gómez-Valcárcel, Kap tal-kompitu. It-tim tal-awditjar kien magħmul minn Oana Dumitrescu, Armando do Jogo, Aris Konstantinidis, Bernard Moya, Mihaela Pavel u Frédéric Soblet.

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).

Il-kontrolli tas-sajd tal-UE: jenħtieġu sforzi addizzjonali
(skont l-Artikolu 287(4), it-tieni subparagrafu, TFUE)

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2017

PDF	978-92-872-7406-9	1977-5741	10.2865/29538	QJAB17008MTN
HTML	978-92-872-7412-0	1977-5741	10.2865/674767	QJAB17008MTQ

© L-Unjoni Ewropea, 2017

KIF GĦANDEK TAGĦMEL BIEX TIKSEB IL-PUBBLIKAZZJONIJIET TAL-UE

Pubblikazzjonijiet bla ħlas:

• kopja waħda:
  • permezz tal-EU Bookshop (http://bookshop.europa.eu);
• iżjed minn kopja waħda jew posters/mapep:
  • mir-rappreżentanzi tal-Unjoni Ewropea (http://ec.europa.eu/represent_mt.htm),
  • mid-delegazzjonijiet f'pajjiżi li mhumiex fl-UE (http://eeas.europa.eu/delegations/index_mt.htm),
  • billi tikkuntatja s-servizz Europe Direct (http://europa.eu/europedirect/index_mt.htm)
  • jew ċempel 00 800 6 7 8 9 10 11 (numru tat-telefown bla ħlas minn kullimkien fl-UE) (*).

(*) L-informazzjoni mogħtija hija b’xejn, kif ukoll it-telefonati ġeneralment huma b’xejn (għalkemm xi operaturi, kabini tat-telefown jew lukandi jistgħu jitolbu ħlas).

Pubblikazzjonijiet bi ħlas:

• permezz tal-EU Bookshop (http://bookshop.europa.eu).