L-iżgurar tal-ktajjen tal-provvista tal-prodotti agrikoli matul il-COVID-19 Ir-rispons tal-UE kien rapidu, iżda ma kienx immirat biżżejjed mill-Istati Membri

Sommarju eżekuttiv

I Il-pandemija tal-COVID-19 kellha impatt fuq il-ktajjen tal-provvista tal-prodotti agrikoli mill-għalqa sal-platt u affettwat diversi swieq agrikoli. L-UE adottat sensiela ta' miżuri ta' appoġġ eċċezzjonali b'rispons għaliha.

II L-għan ta' dan l-awditu kien li jivvaluta jekk ir-rispons tal-UE għat-theddida li nħolqot għall-ktajjen tal-provvista tal-prodotti agrikoli mill-pandemija kienx xieraq. Aħna vvalutajna jekk l-UE rreaġixxietx malajr għat-tfixkil fis-settur agroalimentari kkawżat mill-pandemija u eżaminajna jekk l-appoġġ tal-UE kienx immirat kemm għas-setturi kif ukoll għall-benefiċjarji l-aktar fil-bżonn. Il-miżuri tal-Kummissjoni ġew adottati fl-2020 u aħna koprejna l-implimentazzjoni tagħhom sal-aħħar tal-2021. Aħna nistennew li l-awditu tagħna jgħin fit-titjib tat-tfassil tal-miżuri fi kwalunkwe kriżi futura li taffettwa l-ktajjen tal-provvista tal-prodotti agrikoli.

III Ikkonkludejna li r-rispons tal-Kummissjoni għat-theddida li nħolqot lill-ktajjen tal-provvista tal-prodotti agrikoli mill-pandemija tal-COVID-19 kien xieraq fil-biċċa l-kbira tal-aspetti iżda ma kienx immirat biżżejjed.

IV Aħna sibna li l-Kummissjoni rreaġixxiet malajr għall-pandemija. Hija ħarġet linji gwida utli dwar il-moviment tal-oġġetti u l-ħaddiema kritiċi li taffew it-tfixfil fis-settur agroalimentari. L-appoġġ dirett, b'baġit ta' EUR 712-il miljun, ġie implimentat malajr permezz tar-riallokazzjoni ta' fondi mhux użati tal-Fond Agrikolu Ewropew għall-Iżvilupp Rurali (FAEŻR). Aħna sibna li din il-miżura ttieħdet l-aktar minn Stati Membri b'baġit sinifikanti tal-FAEŻR mhux użat fi tmiem l-2019.

V Ir-rispons fiskali prinċipali għall-pandemija ġie mill-baġits nazzjonali u l-Kummissjoni daħħlet fis-seħħ proċeduri biex tiffaċilita l-għajnuna mill-Istat. Aħna identifikajna riskju ta' distorsjoni tal-kompetizzjoni bejn l-Istati Membri, kif ukoll ir-riskju ta' kumpens żejjed meta l-għajnuna mill-Istat appoġġat settur li wkoll irċieva fondi tal-UE.

VI L-appoġġ dirett ma kienx immirat biżżejjed mill-Istati Membri. 5 mill-14-il Stat Membru li użaw din il-miżura għamlu l-finanzjament tal-UE disponibbli għall-bdiewa kollha li ġarrbu telf, filwaqt li d-disa' setturi magħżula l-oħra mmiraw u appoġġaw lill-benefiċjarji irrispettivament minn jekk kinux ġarrbu telf.

VII L-UE adottat ukoll miżuri fil-forma ta' ħżin privat u distillazzjoni tal-inbid fi kriżi, sabiex tistabbilizza s-suq billi tnaqqas il-provvista żejda. L-użu tal-ħżin privat kien baxx, b'mod partikolari fis-settur tal-laħam. Id-distillazzjoni fi kriżi, b'baġit ta' EUR 293 miljun, ġiet implimentata b'differenzi sinifikanti fost l-Istati Membri li awditjajna. Ir-regoli għall-ammont ta' appoġġ miżmum mid-distillaturi ma kinux ċari.

VIII Ibbażat fuq dawn is-sejbiet, nirrakkomandaw li l-Kummissjoni tikkondividi prattika tajba biex ittejjeb l-immirar tal-miżuri tal-PAK u, f’każ ta’ kriżijiet futuri, tipproponi regoli ċari.

Introduzzjoni

Il-pandemija tal-COVID-19 u l-ktajjen tal-provvista tal-prodotti agrikoli

01 Il-politika agrikola komuni (PAK) tal-UE għandha l-għan li tiżgura provvista stabbli ta' ikel bi prezz raġonevoli u tippermetti lill-bdiewa tagħha jaqilgħu għajxien raġonevoli¹. Il-pandemija tal-COVID-19 kellha impatt fuq il-ktajjen tal-provvista tal-prodotti agrikoli mill-għalqa sal-platt, u kkawżat tfixkil u ħsara ekonomika għall-ħsad, il-loġistika, l-ipproċessar u l-akkwist.

02 Fil-bidu tal-pandemija, għadd ta' Stati Membri unilateralment għalqu l-fruntieri tagħhom għal raġunijiet ta' saħħa pubblika, minkejja r-rakkomandazzjoni tal-Kummissjoni² għal approċċ ikkoordinat għal kwalunkwe restrizzjoni fil-moviment liberu tal-persuni u tal-merkanzija. It-trasport tal-prodotti, partikolarment bejn il-fruntieri, kien ta' sfida għall-istess raġunijiet. Ħafna impjanti tal-ipproċessar tal-ikel għalqu minħabba miżuri ta' emerġenza jew nuqqas ta' persunal. Is-settur tal-ospitalità ingħalaq, filwaqt li s-supermarkets ma kellhomx biżżejjed persunal u kellhom jiffaċċjaw kwistjonijiet ta' provvista³.

Azzjonijiet tal-UE biex jappoġġaw is-settur agroalimentari matul il-pandemija tal-COVID-19

03 Ir-responsabbiltà għall-miżuri relatati mas-settur agroalimentari hija primarjament tal-Istati Membri. Il-Kummissjoni toħroġ linji gwida u tipproponi miżuri finanzjarji biex tappoġġa s-settur⁴. Il-Kummissjoni u l-Istati Membri jaqsmu l-ġestjoni ta' dawn il-miżuri. L-Istati Membri jagħżlu l-benefiċjarji u jimplimentaw il-miżuri proposti mill-Kummissjoni. Il-Kummissjoni hija responsabbli wkoll għall-approvazzjoni ta' skemi ta' għajnuna mill-Istat li l-Istati Membri jistgħu jkunu jridu jimplimentaw. Figura 1 tippreżenta l-iskeda ta' żmien tal-miżuri adottati mill-UE.

04 B'mod partikolari, l-UE introduċiet il-miżuri li ġejjin (ara t-Tabella 1 u l-Anness I għal aktar dettalji):

• Linji gwida tal-Kummissjoni li għandhom l-għan li jiżguraw katina tal-provvista tal-ikel effiċjenti fl-UE, li jikkwalifikaw lill-ħaddiema staġjonali bħala "kritiċi" biex jappoġġjaw is-settur tal-ikel;
• appoġġ dirett għall-bdiewa u SMEs fil-forma ta' pagamenti ta' somom f'daqqa ("miżura 21" għall-iżvilupp rurali), self u garanziji, żieda fil-pagamenti bil-quddiem u għajnuna mill-Istat ogħla taħt il-qafas temporanju għall-bdiewa u l-kumpaniji tal-ipproċessar tal-ikel;
• miżuri eċċezzjonali tas-suq fil-forma ta' għajnuna għall-ħżin privat, distillazzjoni ta' nbid f’każijiet ta’ kriżi u flessibbiltà fl-implimentazzjoni ta' programmi ta' appoġġ għas-suq;
• miżuri ta' flessibbiltà tal-PAK, li jestendu l-iskadenzi għall-applikazzjonijiet għall-pagamenti tal-PAK u li jissostitwixxu temporanjament il-kontrolli tal-irziezet fuq il-post b'sorsi alternattivi ta' evidenza bħall-immaġni bis-satellita jew ritratti ġeottaggjati, biex jimminimizzaw il-kuntatt fiżiku bejn il-bdiewa u l-ispetturi.

05 Il-pandemija tal-COVID-19 mhijiex l-uniku avveniment estern li kellu impatt fuq is-settur agroalimentari tal-UE. L-invażjoni Russa tal-Ukrajna fl-24 ta' Frar 2022 kellha impatt sinifikanti fuq is-sigurtà fl-Ewropa, inkluża s-sigurtà tal-provvista tal-ikel. Dawn iż-żewġ avvenimenti mhux relatati ġew indirizzati permezz ta' miżuri simili. Għall-informazzjoni, l-Anness II jippreżenta l-miżuri tas-sigurtà tal-ikel introdotti b’riżultat tal-gwerra fl-Ukrajna flimkien ma' dawk introdotti bħala riżultat tal-kriżi tal-COVID-19.

Ambitu u approċċ tal-awditjar

06 Dan l-awditu vvaluta jekk ir-rispons tal-UE għat-theddida li nħolqot għall-ktajjen tal-provvista tal-prodotti agrikoli mill-pandemija tal-COVID-19 kienx xieraq. Aħna eżaminajna dan is-suġġett minħabba l-isfidi bla preċedent għall-ktajjen tal-provvista agroalimentari madwar l-UE u s-swieq tal-prodotti agrikoli mħarbta. Il-Parlament Ewropew esprima interess fil-valutazzjoni tagħna dwar il-funzjonament tal-miżuri tas-suq fir-rigward tal-ktajjen tal-provvista tal-ikel wara l-pandemija tal-COVID-19.

07 Bħala tweġiba għall-mistoqsija prinċipali tal-awditjar tagħna, aħna vvalutajna jekk ir-rispons tal-UE lejn il-prevenzjoni tat-tfixkil tal-ktajjen tal-provvista tal-prodotti agrikoli kienx immedjat, u jekk l-appoġġ tal-UE kienx immirat sew u indirizzax il-ħtiġijiet tal-bdiewa. Bħala parti mill-valutazzjoni tagħna, eżaminajna l-linji gwida tal-UE, l-appoġġ eċċezzjonali, il-miżuri tas-suq u l-għajnuna mill-Istat.

08 Aħna vverifikajna l-implimentazzjoni tal-miżuri tal-UE f'ħames Stati Membri (il-Greċja, Spanja, Franza, il-Polonja u r-Rumanija), li ammontaw għal 69 % u 87 % tal-ammonti allokati bħala għajnuna eċċezzjonali taħt il-miżura 21 u d-distillazzjoni f'każ ta' kriżi, rispettivament (ara l-Figura 2).

09 L-awditu tagħna kopra l-2020 u l-2021 li matulhom ġew implimentati l-maġġoranza tal-miżuri introdotti. Aħna ġbarna evidenza għall-awditjar permezz ta':

• rieżami tal-leġiżlazzjoni u tal-istatistika nazzjonali/reġjonali;
• kwestjonarju li mtela mill-awtoritajiet nazzjonali fil-ħames Stati Membri magħżula dwar l-użu tagħhom tal-miżuri ta' appoġġ tal-UE mnedija matul il-pandemija tal-COVID-19;
• segwitu mal-awtoritajiet nazzjonali jew reġjonali fil-ħames Stati Membri magħżula;
• intervisti mal-uffiċjali tal-Kummissjoni u rieżami tad-dokumentazzjoni tal-Kummissjoni.

L-awditu tagħna ma jkoprix l-azzjonijiet tal-Kummissjoni b'rispons għall-gwerra fl-Ukrajna.

10 Nistennew li l-ħidma tagħna tgħin lill-Kummissjoni ttejjeb it-tfassil u l-immirar ta' miżuri futuri ta' reazzjoni għall-kriżijiet maħsuba biex jappoġġjaw is-settur agroalimentari u jassiguraw il-ktajjen tal-provvista tal-prodotti agrikoli.

Osservazzjonijiet

Ir-rispons tal-UE għall-pandemija kien rapidu

11 Aħna vvalutajna:

1. jekk il-Kummissjoni u l-Istati Membri assigurawx fil-pront il-fluss tal-merkanzija madwar l-UE. Aħna vvalutajna r-rwol tal-Kummissjoni fit-tfassil tal-linji gwida tal-korsija l-Ħadra u kif hija mmonitorjat l-applikazzjoni tal-linji gwida.
2. jekk il-Kummissjoni stabbilixxietx malajr appoġġ dirett lill-bdiewa fl-ewwel xhur mill-bidu tal-pandemija;
3. jekk il-Kummissjoni u l-Istati Membri introduċewx malajr miżuri ta' għajnuna mill-Istat biex jappoġġjaw lill-bdiewa u kinux ħadu passi biex jiżguraw li dawn ma wasslux għal distorsjoni tal-kompetizzjoni u kumpens żejjed.

Il-linji gwida tal-Kummissjoni dwar il-miżuri ta' ġestjoni tal-fruntieri taffew it-tfixkil fis-settur agroalimentari

12 Il-Kummissjoni ħarġet il-linji gwida tal-Korsija Ħadra dwar il-moviment tal-merkanzija⁶ u dwar il-ħaddiema staġjonali⁷ fil-bidu tal-pandemija. Fit-23 ta' Marzu 2020, ħolqot is-sistema tal-"Korsiji Ħodor"⁸ u stiednet lill-Istati Membri biex jistabbilixxu l-miżuri operattivi u organizzattivi meħtieġa biex jiżguraw il-funzjonament tas-suq uniku għall-prodotti kollha, inklużi l-prodotti agroalimentari.

13 L-għan tal-linji gwida tal-Korsija Ħadra kien li jiġi żgurat il-fluss kontinwu tal-oġġetti fi ħdan l-UE u l-moviment liberu tal-ħaddiema tat-trasport. Il-Korsiji Ħodor ġew deżinjati bħala punti ewlenin ta' qsim tal-fruntieri fejn il-kontrolli ma għandhomx jaqbżu 15-il minuta.

14 Il-Kummissjoni ħadmet mal-Aġenzija tal-UE għall-Programm Spazjali biex tiżviluppa applikazzjoni għall-apparati mobbli. L-applikazzjoni tal-“Korsiji Ħodor Galileo" tipprovdi data dwar il-konformità mal-Komunikazzjoni tal-Kummissjoni dwar l-implimentazzjoni tal-Korsiji Ħodor. Il-persunal tal-kontroll tal-fruntieri u l-utenti tat-trasport tal-merkanzija jirreġistraw ħinijiet ta' qsim f'178 punt ta' qsim tal-fruntiera tan- Network trans-Ewropew tat-trasport (TEN-T). Dan jgħin lill-utenti tal-applikazzjoni jippjanaw aħjar il-vjaġġi tagħhom. F'Novembru 2022, l-applikazzjoni tibqa' operattiva u tintuża biex tiffaċilita t-trasport fil-kriżi li għaddejja wara l-invażjoni Russa tal-Ukrajna.

15 Id-data mill-Kummissjoni kkonfermat li l-ħin medju għall-qsim tal-fruntieri fil-punti ta' kontroll kien inqas minn minuta⁹ fuq il-massimu ta' 15-il minuta bejn it-3 ta' Ġunju 2020 u l-31 ta' Diċembru 2021. L-ebda data strutturata ma hija disponibbli għall-perjodu ta' qabel Ġunju 2020. Figura 3 turi l-ħin medju ta' qsim ta' kull ġimgħa. Is-soll tal-Korsija Ħadra nqabeż prinċipalment bejn Ġunju u Awwissu 2020, u bejn Mejju u Awwissu 2021. Dawn il-perjodi ħabtu mar-restrizzjonijiet tal-ivvjaġġar fl-Istati Membri matul il-mewġiet varji tal-COVID-19.

16 Mill-bidu tal-pandemija, il-Kummissjoni stabbiliet Network Nazzjonali tal-Punti ta' Kuntatt għat-Trasport (NTCPN), li jipprovdi pjattaforma informali għall-Istati Membri biex jenfasizzaw u jiddiskutu kwistjonijiet ta' trasport, jidentifikaw soluzzjonijiet komuni u jaqsmu l-aħjar prattiki. L-Istati Membri li kkonsultajna waqt l-awditu tagħna kienu tal-opinjoni li dawn il-laqgħat għenu biex tiġi ssimplifikata l-kooperazzjoni tal-UE fit-trasport tal-merkanzija.

17 Ir-rwol tal-Kummissjoni involva wkoll il-monitoraġġ mill-qrib tal-ħinijiet tal-qsim tal-fruntieri u l-użu tal-laqgħat tal-NTCPN biex issolvi kwistjonijiet li jikkawżaw dewmien b'kollaborazzjoni mal-Istati Membri rilevanti. F'Novembru 2022, l-NTCPN jibqa' forum għall-iskambju ta' informazzjoni bejn l-Istati Membri u l-Kummissjoni.

18 L-awtoritajiet fil-ħames Stati Membri awditjati kollha kkummentaw b'mod pożittiv dwar il-linji gwida dwar it-trasport, fejn qiesuhom bħala gwida effettiva għall-ġestjoni tal-qsim tal-fruntieri matul il-COVID-19. Pereżempju, l-awtoritajiet Rumeni enfasizzaw li l-Korsiji Ħodor kkontribwew għaż-żamma tal-fluss tal-mediċini u prodotti essenzjali oħra, bħal prodotti agrikoli.

Il-qafas ta' appoġġ dirett ġie stabbilit malajr

19 Fit-22 ta' April 2020, xahar biss wara li ġiet iddikjarata l-pandemija¹⁰, il-Kummissjoni pproponiet regolament¹¹ b'miżuri speċifiċi biex jingħata appoġġ temporanju eċċezzjonali fil-kuntest tal-FAEŻR taħt il-miżura l-ġdida 21 b'rispons għat-tifqigħa tal-COVID-19. Ir-Regolament¹² ġie adottat fl-24 ta' Ġunju 2020. Dan l-appoġġ kien jikkonsisti minn ħlas ta' darba ta' ammont f'daqqa sa EUR 5 000 għal kull bidwi (f'Ġunju 2020 il-koleġiżlaturi ddeċidew li jemendaw il-proposta tal-Kummissjoni billi jżidu l-ammont massimu ta' appoġġ għall-bdiewa għal EUR 7 000) u EUR 50 000 għal kull SME. L-Istati Membri kienu meħtieġa juru li l-appoġġ kien immirat lejn dawk l-aktar milquta, abbażi ta' kriterji oġġettivi u mhux diskriminatorji¹³.

20 Il-miżura 21, b'baġit ta' EUR 712-il miljun, ma kinitx iffinanzjata minn żieda fil-baġit tal-UE għall-agrikoltura. L-Istati Membri allokaw mill-ġdid fondi mhux minfuqa minn miżuri oħra tal-FAEŻR. Il-kontribuzzjoni tal-FAEŻR lejn il-miżura ma setgħetx taqbeż 2 % tal-kontribuzzjoni totali tal-FAEŻR lill-programm tal-iżvilupp rurali għas-snin 2014-2020.

21 Il-miżura 21 intużat l-aktar mill-Istati Membri b'baġits kbar tal-FAEŻR li ma ntefqux fi tmiem l-2019. Il-Polonja, pereżempju, kienet impenjat 57 % tal-baġit tagħha tal-FAEŻR f'dak il-punt (l-aktar wieħed baxx mill-EU-27 kollha) u kellha l-ogħla baġit tal-miżura 21. 13 mill-14-il Stat Membru li għażlu l-miżura 21 kienu impenjaw inqas minn 90 % tal-baġit tagħhom tal-FAEŻR sa tmiem l-2019.

L-UE malajr introduċiet miżuri ta' għajnuna mill-Istat, iżda dawn wasslu għal riskju ta' distorsjoni tal-kompetizzjoni u kumpens żejjed

22 Il-Kummissjoni adottat il-Qafas Temporanju għal Miżuri ta' Għajnuna mill-Istat¹⁴ fil-pront fid-19 ta' Marzu 2020 li ppermetta lill-Istati Membri jużaw il-flessibbiltà pprovduta skont ir-regoli tal-għajnuna mill-Istat biex jappoġġjaw lill-ekonomija matul il-pandemija tal-COVID-19.

23 Il-Ġermanja, Spanja, l-Awstrija u s-Slovakkja approvaw skemi qafas li inkludew l-għajnuna iżda ma żvelawx l-ammont għall-agrikoltura separatament. Għall-bqija tal-Istati Membri, l-għajnuna mill-Istat ibbaġitjata għas-setturi tal-forestrija, l-akkwakultura u l-agrikoltura ammontat għal aktar minn EUR 9 biljun. L-għajnuna mill-Istat setgħet tieħu l-forma ta' għotjiet, avvanzi li jitħallsu lura, vantaġġi tat-taxxa, self jew garanziji ssussidjati. L-appoġġ għall-għajnuna mill-Istat ipprovdut mill-Istati Membri lil setturi magħżula kien ferm aktar sinifikanti f'termini monetarji mill-appoġġ dirett tal-UE (ara l-paragrafu 20).

24 Sa Mejju 2022, l-għajnuna mill-Istat fil-fatt mogħtija lill-agrikoltura kienet tammonta għal mill-inqas EUR 1.5 biljun. Skont il-Kummissjoni, 10 Stati Membri ma rrappurtawx b'mod speċifiku ċ-ċifri għas-settur agrikolu, u għalhekk ma għandhiex idea ġenerali tal-għajnuna mill-Istat għall-agrikoltura.

25 Il-Kummissjoni hija meħtieġa tiżgura li s-suq intern tal-UE ma jkunx frammentat bl-għajnuna mill-Istat u li l-kundizzjonijiet ekwi jibqgħu intatti¹⁵. L-Artikolu 107 tat-TFUE¹⁶ ma jirrikjedix li l-Kummissjoni tqabbel il-baġit għall-miżura ta' għajnuna mill-Istat ma' dak ta' Stati Membri oħra. L-għoti ta' għajnuna lil settur partikolari fi Stat Membru wieħed meta Stat Membru ieħor ma jagħtix l-istess tip ta' għajnuna, jew meta s-sussidju jkun ħafna ogħla fi Stat Membru wieħed, jista' joħloq distorsjoni tal-kompetizzjoni.

26 Skont il-Kummissjoni, il-kontrolli li wettqu fuq l-iskemi tal-għajnuna mill-Istat u l-limiti massimi kumplessivi għall-appoġġ jipprovdu xi livell ta' assigurazzjoni li ma sseħħ l-ebda tellieqa ta' sussidji li jagħmlu l-ħsara bejn l-Istati Membri¹⁷ billi l-Qafas Temporanju jsegwi l-mudell tar-regoli dwar l-għajnuna mill-Istat tat-TFUE. Madankollu, in-nuqqas ta' koordinazzjoni fl-Istati Membri kollha jirriskja li joħloq distorsjoni tal-kompetizzjoni¹⁸.

27 Is-settur tal-ortikultura kien affettwat b'mod partikolari waqt il-lockdown billi l-ħwienet tal-pjanti u tal-fjuri kienu magħluqin u d-domanda naqset bi 80 %¹⁹. It-Tabella 2 hawn taħt turi l-għajnuna mill-Istat għal dan is-settur għall-akbar żewġ produtturi ta' pjanti u fjuri skont il-valur (in-Netherlands u Spanja). Filwaqt li l-għajnuna mill-Istat fin-Netherlands laħqet kważi 9 % tal-valur tal-produzzjoni għal dan is-settur, kienet ferm inqas fi Spanja. Din id-differenza fl-appoġġ għal settur għandha l-potenzjal li toħloq kompetizzjoni inġusta.

28 Fi Spanja, il-Programm ta' Żvilupp Rurali Andalusjan stima t-telf tas-settur tan-nagħaġ u l-mogħoż għal EUR 8.6 miljun. Il-miżura 21 ipprovdiet lil dan is-settur b'EUR 8.7 miljun f'appoġġ. Barra minn hekk, is-settur irċieva EUR 10 miljun f'għajnuna nazzjonali²⁰. Konsegwentement hemm riskju ta' kumpens żejjed għal xi benefiċjarji, kif muri minn dan l-eżempju, fejn l-għajnuna mill-Istat u l-appoġġ tal-UE permezz tal-miżura 21 kienu jikkoinċidu.

29 Il-Kaxxa 1 turi każijiet addizzjonali ta' kumpens żejjed potenzjali fir-rigward tad-distillazzjoni f'każ ta' kriżi.

Sors: SA.56985 (2020/N)- Franza - SA.59520 (2020/N) – ir-Rumanija.

L-Istati Membri ma mmirawx biżżejjed lill-benefiċjarji fil-bżonn meta pprovdew appoġġ dirett tal-UE b'rispons għall-pandemija

30 It-tfixkil ekonomiku fis-settur agrikolu u l-komunitajiet rurali wassal għal problemi ta' likwidità u ta' fluss tal-flus għall-bdiewa u l-SMEs li jipproċessaw prodotti agrikoli, li, skont il-Kummissjoni, kienu jeħtieġu l-appoġġ b'mod urġenti.

31 B'rispons għat-theddida li ħolqot il-pandemija tal-COVID-19 għall-ktajjen tal-provvista tal-prodotti agrikoli, il-Kummissjoni u l-Istati Membri introduċew appoġġ dirett, ħżin privat u miżuri oħra biex jgħinu lill-bdiewa jifilħu għall-impatt ekonomiku. Aħna vvalutajna jekk:

• il-miżura 21 immiratx kemm is-setturi kif ukoll il-benefiċjarji li l-aktar kellhom bżonn ta' appoġġ, u għalhekk ma tappoġġax lill-bdiewa li ma kinux affettwati mill-kriżi;
• il-miżuri eċċezzjonali tas-suq proposti mill-Kummissjoni kinux xierqa għall-ħtiġijiet tas-suq; u
• l-appoġġ għas-settur tal-inbid ġiex implimentat b'mod konsistenti.

Miżura 21: L-Istati Membri ma mmirawx biżżejjed l-appoġġ fuq is-setturi u l-benefiċjarji l-aktar milquta mill-kriżi

32 F’konformità mal-qafas legali u r-responsabbilitajiet rispettivi (ara l-paragrafu 03), il-Kummissjoni qagħdet fuq l-Istati Membri biex jimmiraw l-appoġġ lejn dawk is-setturi jew benefiċjarji l-aktar milquta mill-kriżi tal-COVID-19, billi ddeterminaw il-kundizzjonijiet tal-eliġibbiltà u l-kriterji tal-għażla²¹. Il-miżuri kollha ġew approvati mill-Kummissjoni permezz ta' reviżjonijiet tal-PŻR. B'kollox, 14-il Stat Membru għażlu li jinkludu l-miżura 21 fil-PŻR tagħhom, b'baġit totali ta' EUR 712-il miljun.

33 Ħamsa minn dawn l-Istati Membri, l-Estonja, Franza (fil-Guadeloupe, il-Guyana Franċiża u l-Mayotte), il-Kroazja, il-Litwanja u s-Slovenja, għamlu appoġġ disponibbli għall-bdiewa kollha, u adottaw rati differenti ta' appoġġ sal-limitu massimu. Dawn il-ħames Stati Membri kellhom klawżoli speċifiċi li rabtu l-appoġġ mat-telf finanzjarju meta mqabbel mas-sena ta' qabel il-pandemija. Id-disa' Stati Membri l-oħra appoġġaw setturi agrikoli speċifiċi, iżda ma rabtux l-appoġġ mat-telf finanzjarju (ara l-Figura 4). Madankollu, il-qafas legali ma kienx jeħtieġ li l-livell ta’ appoġġ ikun marbut ma’ telf finanzjarju vvalutat fuq livell ta’ benefiċjarju individwali.

34 Aħna analizzajna l-implimentazzjoni tal-miżura 21 f'ħames Stati Membri: il-Greċja, Spanja (l-Andalusija), Franza (il-Guadeloupe u l-Guyana Franċiża), il-Polonja u r-Rumanija. Il-Guadeloupe u l-Guyana Franċiża taw appoġġ lis-setturi kollha, immirati lejn dawk fil-bżonn. L-erba' Stati Membri awditjati l-oħra pprovdew appoġġ lil setturi milquta magħżula iżda ma pprovdewx appoġġ ibbażat fuq valutazzjoni individwali tat-telf tal-bdiewa.

35 F'settur agrikolu affettwat, jista' jkun il-każ li mhux il-bdiewa kollha jbatu finanzjarjament. L-għoti ta' appoġġ lil settur affettwat fl-intier tiegħu mingħajr ma jiġu mmirati l-benefiċjarji l-aktar fil-bżonn kien permess mil-qafas legali. Madankollu, dan jirriskja li jiġu appoġġati bdiewa li ma kienux ġew milquta mill-kriżi.

36 L-Andalusija ddeċidiet li tappoġġa l-produtturi tal-għeneb u tal-inbid tagħha skont il-miżura 21. L-Andalusija kkalkulat it-telf li ġarrbu l-produtturi tal-għeneb abbażi ta' rata fissa ta' EUR 336/ettaru (Denominazzjoni ta' Oriġini Protetta jew vinji tad-DOP) jew EUR 198/ettaru (vinji mhux tad-DOP) għall-produtturi li għandhom sa 10 ettari ta' vinji²². Madankollu, il-produtturi b'aktar minn 10 ettari rċevew ammont fiss ta' EUR 7 000. Dan seta' wassal għal kumpens żejjed għat-telf għall-produtturi li għandhom bejn 11 u 20 ettaru ta' vinji (ara t-Tabella 3).

Il-Kummissjoni allokat fondi għall-ħżin privat iżda l-użu kien baxx

37 Il-Kummissjoni u l-Istati Membri identifikaw dawk is-setturi tas-suq l-aktar milquta mill-kriżi tal-COVID-19 u l-ħtieġa għall-ħżin privat, li għalihom ipprovdew għajnuna. Il-Kummissjoni antiċipat li s-swieq tal-laħam u tal-prodotti tal-ħalib kienu se jintlaqtu l-aktar u introduċiet miżura biex tappoġġa l-ħżin privat f'dawk is-swieq. Din il-miżura ppermettiet l-irtirar temporanju ta' prodotti mis-suq għal bejn xahrejn u sitt xhur.

38 L-għajnuna għall-ħżin privat fis-setturi tal-ħalib, taċ-ċanga, tan-nagħaġ u tal-mogħoż kienet inqas minn EUR 10 miljun (kważi nofsha għall-butir). L-iskemi għall-ħżin privat tal-butir u l-ġobon ittieħdu minn 16 u 15-il Stat Membru rispettivament, filwaqt li inqas minn nofs l-Istati Membri applikaw għall-iskemi għal-laħam u t-trab tal-ħalib xkumat (ara t-Tabella 4).

39 Spanja biss użat l-iskema ta' ħżin privat għas-settur tan-nagħaġ u l-mogħoż (140 tunnellata). Dan l-appoġġ ma tqiesx attraenti mill-produtturi billi l-għajnuna ma setgħetx tiġi applikata retroattivament għal-laħam li kien diġà maħżun. Il-ħtieġa għall-ħżin f'dan is-settur kienet teżisti qabel il-pubblikazzjoni tar-Regolament tal-Kummissjoni²³. Min-naħa l-oħra, għall-ġobon, l-awtoritajiet Franċiżi ddikjaraw li l-implimentazzjoni tal-miżura tal-ħżin privat kienet limitata għal prodotti li diġà kienu maħżuna²⁴, u għalhekk użaw biss 37 % tal-allokazzjoni. Dawn l-eżempji jindikaw difetti possibbli fit-tfassil tal-miżuri, pereżempju minħabba nuqqas ta' valutazzjoni tal-ħtiġijiet qabel ġew introdotti l-miżuri.

Differenzi sinifikanti fl-implimentazzjoni mill-Istati Membri tal-appoġġ għas-settur tal-inbid wasslu għal trattament inkonsistenti tal-produtturi tal-inbid

40 Il-Kummissjoni vvalutat li l-pandemija tal-COVID-19 ikkawżat tfixkil konsiderevoli għas-suq tal-inbid²⁵. Il-lockdowns, speċjalment is-sospensjoni tal-attivitajiet fis-settur tal-ospitalità, illimitaw id-distribuzzjoni u l-bejgħ tal-inbid. Is-settur tal-inbid kien affettwat ukoll minn tariffi addizzjonali fuq l-importazzjoni imposti mill-Istati Uniti, is-suq prinċipali tal-UE għall-esportazzjoni tal-inbid, u ħażniet għoljin tal-inbid tal-UE, li fl-2019 kienu fl-ogħla livell tagħhom mill-2009²⁶.

41 Il-Kummissjoni ddeċidiet li tniedi miżuri biex tirtira l-inbid mis-suq b'mod definittiv (distillazzjoni f'każ ta' kriżi) jew temporanjament (ħżin f'każ ta' kriżi) sabiex tindirizza t-tfixkil. Hija introduċiet dawn il-miżuri taħt il-programmi nazzjonali ta' appoġġ għas-settur tal-inbid.

42 Id-distillazzjoni tal-inbid hija l-ipproċessar tal-inbid f'alkoħol żnaturat għal użi oħra minbarra l-konsum uman, li tirtira l-inbid definittivament mis-suq (ara l-Figura 5).

43 Il-Kummissjoni tat appoġġ għall-irtirar tal-inbid mis-suq għad-distillazzjoni f'każ ta'kriżi f'10 Stati Membri. In-nefqa tal-UE għal din il-miżura laħqet EUR 293 miljun. It-Tabella 5 turi l-fondi tal-UE u dawk nazzjonali li ntefqu fuq din il-miżura, flimkien mal-volum ta' nbid distillat f'erbgħa mill-Istati Membri li awditjajna, li ammontaw għal kważi 90 % tan-nefqa totali tal-UE. Il-finanzjament tal-UE għal dawn l-Istati Membri varja minn EUR 33 sa EUR 92 għal kull ettolitru ta' nbid distillat.

Regoli mhux ċari dwar l-ammont ta' appoġġ li d-distillaturi setgħu jżommu wasslu għal każijiet ta' kumpens sproporzjonat

44 L-għan tal-miżura tad-distillazzjoni f'każ ta' kriżi kien li tgħin fit-titjib tas-sitwazzjoni ekonomika tal-produtturi tal-inbid²⁷. Kemm il-produtturi tal-inbid kif ukoll id-distillaturi jistgħu jibbenefikaw mill-appoġġ tal-UE taħt il-miżura. In-nefqa eliġibbli kienet tinkludi l-ispiża tal-inbid fornut lid-distillaturi, l-ispejjeż tat-trasport u l-ispejjeż tad-distillazzjoni. Skont ir-regoli, l-Istati Membri kellhom jistabbilixxu l-ammont ta' appoġġ lill-benefiċjarji abbażi ta' kriterji oġġettivi u non-diskriminatorji.

45 Franza, ir-Rumanija u Spanja għażlu d-distilleriji bħala benefiċjarji. Madankollu, il-benefiċjarji distillaturi fixklu l-kapaċità tal-awtoritajiet nazzjonali li jiffokaw fuq il-produtturi tal-inbid fl-akbar diffikultà peress li l-awtoritajiet ma kellhom l-ebda kontroll fuq liema mill-produtturi rċevew il-fondi. Il-Greċja għażlet li tagħmel lill-produtturi tal-inbid il-benefiċjarji ta' dan l-appoġġ (ara l-Kaxxa 2).

Sors: Il-gazzetta tal-liġi nazzjonali Griega, Nru 2764 u 3275.

46 Meta d-distilleriji jkunu l-benefiċjarji, huma obbligati jistabbilixxu kuntratti ta' provvista mal-produtturi tal-inbid. Huma jħallsu lill-produtturi tal-inbid biex l-inbid ikun distillat u jirċievu kumpens skont il-kwantità ta' nbid distillat. Skont ir-regoli nazzjonali, id-distilleriji jista' jkollhom xi diskrezzjoni rigward l-ammont ta' appoġġ miżmum għall-ispejjeż tal-ipproċessar tagħhom u l-prezz tax-xiri tal-inbid.

47 L-Anness III jistabbilixxi kif ġie allokat l-appoġġ bejn id-distilleriji u l-produtturi tal-inbid. L-ogħla perċentwal ta' appoġġ mill-UE miżmum mid-distilleriji kien fir-Rumanija, li ammonta għal medja ta' 15 % tal-appoġġ tal-UE. It-Tabella 6 turi li l-UE pprovdiet lid-distilleriji Franċiżi, Rumeni u Spanjoli b'appoġġ finanzjarju kkombinat sa EUR 22 miljun għall-ispejjeż tal-ipproċessar tad-distillazzjoni tagħhom u, f'xi każijiet, l-ispejjeż tat-trasport tal-inbid.

48 Taħt il-miżura ta' distillazzjoni f'każ ta' kriżi, id-distilleriji fi Franza, fi Spanja u fir-Rumanija:

• ħallsu għall-materja prima (inbid) u ġew rimborżati 100 % mill-fondi tal-UE;
• irċevew aktar appoġġ għall-ipproċessar tal-inbid f'alkoħol u kumpens għall-ispejjeż tat-trasport imġarrba;
• irċevew il-qligħ mill-bejgħ tal-alkoħol li rriżulta għall-użu industrijali.

49 Il-Figura 6 turi kif distillerija waħda fir-Rumanija bbenefikat b'mod sproporzjonat taħt il-miżura ta' distillazzjoni f'każ ta' kriżi. Fl-2020, din id-distillerija żammet EUR 37/ettolitru għall-ispejjeż tal-ipproċessar u t-trasport. B'paragun, id-distilleriji Franċiżi u Spanjoli setgħu jżommu massimu ta' EUR 5/ettolitru għal dawn l-ispejjeż.

50 Il-produtturi tal-inbid Franċiżi u Griegi rċevew prezz stabbilit mir-regoli nazzjonali skont it-tip ta' nbid irtirat mis-suq għad-distillazzjoni. Il-leġiżlazzjoni Franċiża stabbiliet kemm il-prezz tal-inbid li għandu jitħallas lill-produtturi tal-inbid permezz tad-distilleriji kif ukoll il-kumpens li għandu jitħallas lid-distilleriji għall-ispejjeż tal-ipproċessar u tat-trasport. Il-produtturi tal-inbid fi Spanja u r-Rumanija (fl-2020 biss) irċevew ammont ikkuntrattat mad-distilleriji. F'dawn iż-żewġ Stati Membri, sibna każijiet fejn distilleriji ftehmu fuq prezzijiet differenti mal-produtturi tal-inbid biex l-istess tip ta' nbid ikun distillat.

51 Pereżempju fir-Rumanija, skont id-data pprovduta mill-awtoritajiet nazzjonali, distillerija waħda ħallset produttur wieħed tal-inbid 11 % inqas minn ieħor għall-kunsinna tal-istess tip ta' nbid għad-distillazzjoni. B'riżultat ta' dan, mhux il-produtturi kollha tal-inbid ġew ittrattati b'mod ugwali fir-rigward tal-appoġġ li rċevew meta rtiraw l-inbid tagħhom mis-suq. Dan jikkostitwixxi diskriminazzjoni bejn il-produtturi tal-inbid fi Stat Membru u nuqqas ta' konformità mar-regoli²⁸, li jiddikjaraw li l-Istati Membri għandhom jistabbilixxu l-ammont ta' appoġġ għall-benefiċjarji abbażi ta' kriterji oġġettivi u mhux diskriminatorji.

52 Ir-Rumanija pprovdiet appoġġ għad-distillazzjoni f'każ ta' kriżi permezz ta' żewġ sejħiet (l-ewwel fażi fl-2020 u t-tieni waħda fl-2021). Din irrettifikat il-kwistjoni għat-tieni fażi ta' distillazzjoni, u fl-2021 il produttur tal-inbid ġew trattati bl-istess mod.

Il-prezzijiet tal-inbid għad-distillazzjoni ma rriflettewx is-sitwazzjoni ta' kriżi fil-każijiet kollha

53 It-Tabella 7 tqabbel il-prezzijiet fl-Istati Membri li awditjajna għax-xiri tal-inbid għad-distillazzjoni f'każ ta' kriżi, imħallsa jew lid-distilleriji jew lill-produtturi tal-inbid. Għall-inbejjed tad-DOP (denominazzjoni ta' oriġini protetta) u tal-IĠP (indikazzjoni ġeografika protetta) u għall-inbejjed l-oħra, ir-Rumanija offriet l-ogħla prezz mill-Istati Membri awditjati (għal "inbejjed oħra", dan kien biss il-każ matul l-ewwel fażi).

54 L-awtoritajiet Rumeni stabbilixxew il-prezz tal-inbid għad-distillazzjoni bbażat fuq il-medja ponderata fuq ħames snin tal-Eurostat (2015-2019), jiġifieri EUR 93/ettolitru għall-inbejjed tad-DOP u tal-IĠP u EUR 73/ettolitru għal inbejjed oħra matul l-ewwel fażi tal-miżuri ta' distillazzjoni ta' kriżi. Dawn il-prezzijiet jirrappreżentaw rispettivament 92 % u 93 % tal-medja ponderata fuq ħames snin. Franza, għall-inbejjed mhux tad-DOP/IĠP, stabbilixxiet prezz ta' EUR 68/ettolitru, li jirrappreżenta 98 % tal-prezz tal-inbid ibbażat fuq il-medja ponderata fuq ħames snin tal-Eurostat (2015-2019). Dawn il-prezzijiet ma rriflettewx is-sitwazzjoni ta' kriżi, li fiha l-prezzijiet huma normalment aktar baxxi milli f'suq mhux imfixkel. Il-prezzijiet Rumeni u Franċiżi kienu l-ogħla fost l-Istati Membri li analizzajna. Il-prezzijiet tax-xiri tal-inbid mill-Istati Membri l-oħra awditjati (Tabella 7) kienu ferm inqas mill-medja ponderata tal-prezzijiet tal-bejgħ (data tal-Eurostat²⁹).

55 Distillerija fir-Rumanija kienet ukoll produttur tal-inbid. Il-fabbrika tal-inbid "ikkunsinnat" l-inbid lid-distillerija tagħha stess (75 % skont il-valur tal-inbid li ddistillat fl-2020) bi prezz sa EUR 101 għal kull ettolitru. Dan qabeż il-prezz ta' EUR 94 għal kull ettolitru stabbilit mill-awtoritajiet Rumeni.

Il-ħżin f'każ ta' kriżi seta' kien aktar effiċjenti mid-distillazzjoni tal-kriżi

56 Id-distillazzjoni f'każ ta' kriżi kienet miżura temporanja, li ppermettiet li l-inbid jiġi rtirat b'mod definittiv mis-suq u għenet biex is-suq tal-inbid jerġa' jiġi bbilanċjat. Għall-kuntrarju ta' prodotti agrikoli oħra, l-inbid seta' jinħażen, u dan kieku kien itaffi l-effetti tal-ħsad fqir sussegwenti fl-2021. Il-miżura ta' distillazzjoni f'każ ta' kriżi kienet tiswa ħafna aktar mill-ħżin privat fejn l-infrastruttura tal-ħżin kienet diġà teżisti.

57 Pereżempju, skont l-awtoritajiet Franċiżi, id-distillazzjoni f'każ ta' kriżi swiet EUR 208 miljun (li minnhom EUR 127 miljun ta' finanzjament mill-UE) għal 2.6 miljun ettolitru distillati, filwaqt li l-ħżin privat sewa EUR 52 miljun (li minnhom EUR 13-il miljun ta' finanzjament mill-UE) għal 5.5 miljun ettolitru.

Konklużjonijiet u rakkomandazzjonijiet

58 Aħna kkonkludejna li r-rispons tal-Kummissjoni għat-theddida li nħolqot lill-ktajjen tal-provvista agrikoli mill-pandemija tal-COVID-19 kien ġeneralment xieraq. Sibna li l-Kummissjoni rreaġixxiet malajr u l-miżuri tagħha għenu biex jillimitaw it-tfixkil fil-provvista ta' prodotti agrikoli. Madankollu, l-appoġġ dirett tal-UE ma kienx immirat biżżejjed.

59 L-awtoritajiet fil-ħames stati membri awditjati qiesu li l-linji gwida proposti mill-Kummissjoni biex jiġi żgurat fluss kontinwu ta' merkanzija fl-UE kienu gwida effettiva għall-ġestjoni tal-qsim tal-fruntieri matul il-pandemija tal-COVID-19 (il-paragrafi 12 sa 18). Il-miżura 21 kienet mod rapidu biex jiġu allokati mill-ġdid fondi mhux użati tal-FAEŻR biex jingħata appoġġ temporanju eċċezzjonali lis-settur agroalimentari. Erbatax-il Stat Membru użaw il-miżura u aħna sibna li dawn kienu jikkorrelataw mal-Istati Membri bl-ogħla ammont ta' fondi mhux impenjati fl-aħħar tal-2019 (il-paragrafi 19 sa 21).

60 L-appoġġ ta' għajnuna mill-Istat mogħti mill-Istati Membri lil setturi magħżula kien ferm aktar sinifikanti f'termini monetarji mill-finanzjament tal-UE. Il-livelli ta' għajnuna mill-Istat varjaw ħafna bejn l-Istati Membri, li setgħu ħolqu distorsjoni tal-kompetizzjoni. F'xi każijiet sibna eżempji ta' koinċidenza bejn l-appoġġ tal-UE u l-għajnuna mill-Istat li tista' twassal għal kumpens żejjed (il-paragrafi 22 sa 29).

61 Il-miżura 21 ma ffukatx fuq iż-żewġ s-setturi kif ukoll il-benefiċjarji li l-aktar għandhom bżonn ta' appoġġ. Mill-14-il Stat Membru li użaw il-miżura 21, ħamsa kellhom klawsoli speċifiċi li rabtu l-appoġġ ma' telf finanzjarju meta mqabbel mas-sena ta' qabel il-pandemija. Id-disa' Stati Membri l-oħra appoġġaw setturi agrikoli speċifiċi, iżda ma rabtux l-appoġġ mat-telf finanzjarju. Dan ma kienx rikjest mill-qafas legali. L-għoti ta’ appoġġ lil settur milqut fl-intier tiegħu, mingħajr ma jiġu mmirati l-benefiċjarji l-aktar fil-bżonn, jirriskja li jappoġġa bdiewa li ma kinux ġew milquta mill-kriżi (il-paragrafu 32 sa 36). Il-Kummissjoni għamlet disponibbli wkoll għajnuna għall-ħżin privat iżda l-użu kien baxx (il-paragrafi 37 sa 39).

62 Id-distillazzjoni f'każ ta' kriżi tal-inbid wasslet għall-irtirar permanenti ta' kwantitajiet tal-inbid mis-suq u għenet biex jerġa' jinkiseb il-bilanċ fis-suq tal-inbid. Madankollu, aħna sibna differenzi sinifikanti fl-appoġġ tal-Istati Membri għas-settur tal-inbid, inklużi regoli mhux ċari dwar l-ammont ta' appoġġ li d-distillaturi setgħu jżommu u l-prezzijiet għad-distillazzjoni li ma kinux jirriflettu s-sitwazzjoni ta' kriżi (il-paragrafi 40 sa 57).

Rakkomandazzjoni – Tipproponi regoli ċari u tikkondividi prattika tajba biex ittejjeb l-immirar tal-miżuri taħt il-PAK

Jenħtieġ li l-Kummissjoni:

1. f’proposti leġiżlattivi rigward miżuri għal kriżijiet futuri, tinkludi regoli ċari biex tipprovdi appoġġ fuq il-bażi ta’ kriterji oġġettivi u mhux diskriminatorji, u
2. biex tkun ippreparata għal kriżijiet futuri, tikkondividi tagħlimiet meħuda u prattika tajba mal-Istati Membri, bl-għan li timmira s-setturi u l-benefiċjarji l-aktar fil-bżonn.

Data mmirata għall-implimentazzjoni:

1. f’każ ta’ kriżijiet futuri
2. 2024

Dan ir-Rapport ġie adottat mill-Awla I, immexxija mis-Sa Joëlle Elvinger, Membru tal-Qorti tal-Awdituri, fil-Lussemburgu fil-laqgħa tagħha tal-1 ta’ Marzu 2023.

Annessi

Anness I – Lista ta' miżuri adottati

Linji gwida għall-moviment liberu tal-merkanzija u l-ħaddiema agrikoli

• Korsiji Ħodor biex l-ikel jibqa' għaddej madwar l-Ewropa
• Il-ħaddiema staġjonali kkwalifikati bħala "ħaddiema kritiċi" biex jappoġġaw is-settur tal-ikel

Miżuri ta' flessibbiltà tal-PAK

• Estensjoni tal-iskadenza għall-applikazzjonijiet għall-ħlas tal-PAK
• Tnaqqis tal-kontrolli fiżiċi fuq il-post u flessibbiltà għar-rekwiżiti ta' żmien

Anness II – Il-miżuri tas-sigurtà tal-ikel b'rispons għall-COVID-19 u l-gwerra fl-Ukrajna

Anness III – Distribuzzjoni tal-appoġġ tal-UE għad-distillazzjoni f'każ ta' kriżi (2020)

Akronimi u abbrevjazzjonijiet

DĠ AGRI: Id-Direttorat Ġenerali għall-Agrikoltura u l-Iżvilupp Rurali

DĠ MOVE: Id-Direttorat Ġenerali għall-Mobilità u t-Trasport

FAEG: Il-Fond Agrikolu Ewropew ta' Garanzija

FAEŻR: Il-Fond Agrikolu Ewropew għall-Iżvilupp Rurali

NTCPN: Network Nazzjonali tal-Punti ta' Kuntatt għat-Trasport

PAK: politika agrikola komuni

PDO: Denominazzjoni protetta ta' oriġini

PGI: Indikazzjoni ġeografika protetta

PŻR: Programm tal-iżvilupp rurali

SMEs: Intrapriżi żgħar u medji

Risposti tal-Kummissjoni:

https://www.eca.europa.eu/mt/Pages/DocItem.aspx?did=63733

Kronoloġija

https://www.eca.europa.eu/mt/Pages/DocItem.aspx?did=63733

Tim tal-QEA

Dan ir-Rapport Speċjali tal-QEA dwar l-iżgurar tal-ktajjen tal-provvista tal-prodotti agrikoli matul il-COVID-19 ġie adottat mill-Awla I, Użu Sostenibbli tar-riżorsi naturali, li hija mmexxija minnJoëlle Elvinger, Membru tal-QEA. Il-kompitu tmexxa minn Joëlle Elvinger, Membru tal-QEA, li ngħatat appoġġ minn Ildiko Preiss, Kap tal-Kabinett u Paolo Pesce, Attaché tal-Uffiċċju Privat; Paul Stafford, Maniġer Prinċipali; Aris Konstantinidis, Kap tal-Kompitu; Celine Ollier, Awditur Anzjan, Lorenzo Pirelli, Awditu Anzjan, Lenka Hill, Awditur, Xavier Ignasi Farrero Gonzalez, Awditur, Marika Meisenzahl, Awditur u Pedro Ferrao Batarda Marinheiro, Trainee. Judita Frangež ipprovdiet appoġġ segretarjali.

Mix-xellug għal-lemin: Joëlle Elvinger, Paul Stafford, Celine Ollier, Paolo Pesce, Aris Konstantinidis, Xavier Ignasi Farrero Gonzalez, Lenka Hill, Ildiko Preiss u Judita Frangež.

Noti finali

¹ Il-politika agrikola komuni f'daqqa t'għajn.

² C(2020) 499 final: Proposta għal Rakkomandazzjoni tal-Kunsill dwar approċċ ikkoordinat għar-restrizzjoni tal-moviment liberu b'reazzjoni għall-pandemija tal-COVID-19.

³ Preliminary impacts of the COVID-19 pandemic on European agriculture: a sector-based analysis of food systems and market resilience, p.31-35.

⁴ Supporting the agriculture and food sectors amid Coronavirus, European Commission.

⁵ Ibid

⁶ 2020/C 86 I/01, Linji gwida għal miżuri ta' ġestjoni tal-fruntieri biex tiġi protetta s-saħħa u tiġi żgurata d-disponibbiltà tal-oġġetti.

⁷ 2020/C 235 I/01, Linji Gwida dwar il-ħaddiema staġjonali fl-UE fil-kuntest tat-tifqigħa tal-COVID-19.

⁸ C(2020) 1897 final: Komunikazzjoni tal-Kummissjoni dwar l-implimentazzjoni tal-Korsiji Ħodor skont il-Linji Gwida għall-miżuri ta' ġestjoni tal-fruntieri biex tiġi protetta s-saħħa u tiġi żgurata d-disponibbiltà tal-oġġetti u tas-servizzi essenzjali.

⁹ Sett tad-data pprovdut mid-DĠ MOVE, ibbażat fuq l-applikazzjoni Galileo.

¹⁰ WHO - Coronavirus disease (COVID-19) pandemic.

¹¹ Il-Kummissjoni tħabbar miżuri eċċezzjonali ta' appoġġ għas-settur agroalimentari.

¹² Ir-Regolament (UE) 2020/872.

¹³ Ibid., il-premessa 3.

¹⁴ C(2020)1863 Komunikazzjoni.

¹⁵ C(2020)1863 Komunikazzjoni, p. 3.

¹⁶ TFUE, l-Artikolu 107.

¹⁷ (2020/C 91 I/01): paragrafu 10.

¹⁸ Preliminary impacts of the COVID-19 pandemic on European agriculture: a sector-based analysis of food systems and market resilience, p. 83.

¹⁹ Ibid, p. 27.

²⁰ Real Decreto 508/2020.

²¹ Ir-Regolament (UE) 2020/872, l-Artikolu 39b.

²² Andalusia Rural Development Programme, version 11.1.

²³ Ir-Regolament ta' Implimentazzjoni tal-Kummissjoni (UE) 2020/595.

²⁴ Ir-Regolament ta' Implimentazzjoni tal-Kummissjoni (UE) 2020/591, il-Premessa 11 u l-Artikolu 3(2).

²⁵ Ir-Regolament Delegat tal-Kummissjoni (UE) 2020/592, il-premessa 1.

²⁶ Ibid, Premessi 5-6.

²⁷ Ir-Regolament Delegat tal-Kummissjoni 2020/592.

²⁸ Ir-Regolament Delegat tal-Kummissjoni (UE) Nru 2020/592, l-Artikolu 3.

²⁹ Eurostat statistics-wine.

³⁰ Ir-Regolament (UE) Nru 1303/2013, l-Artikolu 25a(11), l-Artikolu 37(4).

³¹ Ir-Regolament (UE) 2020/872.

³² Ir-Regolament (UE) 2020/531.

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Tel. +352 4398-1
Mistoqsijiet: eca.europa.eu/mt/Pages/ContactForm.aspx
Sit web: eca.europa.eu
Twitter: @EUAuditors

Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (https://europa.eu).

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2023

PDF	ISBN 978-92-847-9755-4	ISSN 1977-5741	doi:10.2865/637650	QJ-AB-23-010-MT-N
HTML	ISBN 978-92-847-9736-3	ISSN 1977-5741	doi:10.2865/997064	QJ-AB-23-010-MT-Q

DRITT TAL-AWTUR

© L-Unjoni Ewropea, 2023

Il-politika tal-Qorti Ewropea tal-Awdituri (QEA) dwar l-użu mill-ġdid hija stabbilita fid-Deċiżjoni Nru 6-2019 tal-QEA dwar il-politika tad-data miftuħa u l-użu mill-ġdid ta’ dokumenti.

Sakemm ma jkunx indikat mod ieħor (eż. f’avviżi individwali dwar id-drittijiet tal-awtur), il-kontenut tad-dokumenti tal-QEA li jkun proprjetà tal-UE huwa liċenzjat taħt il-liċenzja Creative Commons Attribution 4.0 International (CC BY 4.0). Għalhekk, bħala regola ġenerali, l-użu mill-ġdid huwa awtorizzat dment li jingħata kreditu xieraq u li kwalunkwe bidla tiġi indikata. Dawk li jużaw mill-ġdid il-kontenut tad-dokumenti tal-QEA ma jistgħux ibiddlu s-sinifikat jew il-messaġġ oriġinali. Il-QEA ma għandhiex tkun responsabbli għal kwalunkwe konsegwenza relatata mal-użu mill-ġdid.

Irid jinkiseb permess addizzjonali jekk kontenut speċifiku juri individwi privati identifikabbli, eż. f’ritratti li jkun fihom il-membri tal-persunal tal-QEA, jew jekk ikun jinkludi xogħlijiet ta’ parti terza.

Fejn ikun inkiseb tali permess, dan għandu jikkanċella u jissostitwixxi l-permess ġenerali msemmi hawn fuq u għandu jindika b’mod ċar kwalunkwe restrizzjoni dwar l-użu.

Biex tuża jew tirriproduċi kontenut li ma jkunx proprjetà tal-UE, jista’ jkun meħtieġ li titlob il-permess direttament mingħand id-detenturi tad-drittijiet tal-awtur.

Figuri 5, 6 u t-Tabella Anness II – Ikoni: Dawn il-figuri tfasslu bl-użu ta’ riżorsi minn Flaticon.com. © Freepik Company S.L. Id-drittijiet kollha huma riżervati.

Software jew dokumenti li jkunu koperti mid-drittijiet ta’ proprjetà industrijali, bħal privattivi, trademarks, disinji rreġistrati, logos u ismijiet, huma esklużi mill-politika tal-QEA dwar l-użu mill-ġdid.

Il-familja ta’ siti web istituzzjonali tal-Unjoni Ewropea, fi ħdan id-dominju europa.eu, tipprovdi links għal siti ta’ partijiet terzi. Peress li l-QEA ma għandha l-ebda kontroll fuq dawn, inti mħeġġeġ tirrieżamina l-politiki tagħhom dwar il-privatezza u dwar id-drittijiet tal-awtur.

Użu tal-logo tal-QEA

Ma jistax isir użu mil-logo tal-QEA mingħajr ma jinkiseb il-kunsens tagħha minn qabel.

KIF TIKKUNTATTJA LILL-UE

Personalment
Madwar l-Unjoni Ewropea kollha hemm mijiet ta’ ċentri tal-Europe Direct. Tista’ ssib l-­indirizz tal-eqreb ċentru għalik online (european-union.europa.eu/contact-eu/meet-us_mt).

Bit-telefown jew bil-miktub
Europe Direct huwa servizz li jwieġeb il-mistoqsijiet tiegħek dwar l-Unjoni Ewropea. Tista’ tikkuntattja lil dan is-servizz:

• bit-telefown bla ħlas: 00 800 6 7 8 9 10 11 (ċerti operaturi jafu jimponu ħlas għal dawn it-telefonati),
• fuq dan in-numru standard: +32 22999696,
• permezz ta’ din il-formola:european-union.europa.eu/contact-eu/write-us_mt.

KIF ISSIB TAGĦRIF DWAR L-UE

Online
L-informazzjoni dwar l-Unjoni Ewropea bil-lingwi uffiċjali kollha tal-UE hija disponibbli fuq is-sit web Europa (european-union.europa.eu).

Pubblikazzjonijiet tal-UE
Tista’ tara jew tordna l-pubblikazzjonijiet tal-UE minn op.europa.eu/mt/publications. Kopji multipli ta’ pubblikazzjonijiet bla ħlas tista’ tiksibhom billi tikkuntattja lil Europe Direct jew liċ-ċentru tad-dokumentazzjoni lokali tiegħek (european-union.europa.eu/contact-eu/meet-us_mt).

Il-liġi tal-UE u dokumenti relatati
Għal aċċess għall-informazzjoni legali tal-UE, inkluż il-liġijiet kollha tal-UE mill-1951 ’l hawn, fil-verżjonijiet lingwistiċi uffiċjali kollha, żur is-sit EUR-Lex (eur-lex.europa.eu).

Data miftuħa tal-UE
Il-portal data.europa.eu jagħti aċċess għal settijiet tad-data miftuħa mill-istituzzjonijiet, il-korpi u l-aġenziji tal-UE. Dawn jistgħu jitniżżlu u jerġgħu jintużaw mingħajr ħlas, għal skopijiet kummerċjali u mhux kummerċjali. Il-portal jagħti aċċess ukoll għal għadd kbir ta’ settijiet tad-data mill-pajjiżi Ewropej.