X’inhi l-Unjoni Ewropea?
L-Unjoni Ewropea (UE) hija unjoni ekonomika u politika unika bejn 27 pajjiż Ewropew. Dawn jaħdmu flimkien biex itejbu l-ħajja tan-nies fl-Ewropa u anke lil hinn minnha.
L-UE ilha taħdem għall-paċi, għall-prosperità u għall-benesseri taċ-ċittadini tagħha għal aktar minn 60 sena. Minn sitt pajjiżi fundaturi — jew Stati Membri — fis-snin ħamsin, kibret f’unjoni ta’ 27 Stat Membru b’popolazzjoni ta’ kważi 450 miljun persuna.
Dak li beda bħala proġett ekonomiku biex jgħin jgħolli l-istandards tal-għejxien fl-Ewropa ta’ wara l-gwerra, wassal għall-ħolqien tal-akbar żona b’suq uniku fid-dinja, fejn in-nies, il-prodotti, is-servizzi u l-flus jistgħu jimxu minn pajjiż għal ieħor b’mod liberu. Matul is-snin, l-UE wessgħet il-kamp ta’ applikazzjoni tagħha għal oqsma fejn il-kooperazzjoni bejn il-pajjiżi twassal għal riżultati aħjar. L-Istati Membri jemmnu li, billi jaħdmu flimkien, huma aktar b’saħħithom u jinsabu f’pożizzjoni aħjar biex jindirizzaw l-isfidi l-kbar tal-lum, bħat-tibdil fil-klima u t-trasformazzjoni diġitali tas-soċjetà tagħna, theddid ewlieni għas-saħħa u s-sigurtà bħall-pandemija tal-COVID-19 u l-gwerra ta’ aggressjoni mir-Russja fl-Ukrajna.
Din il-gwida fiha ħafna informazzjoni utli dwar l-UE u dwar dak li tagħmel l-UE, kif ukoll suġġerimenti dwar minn fejn tista’ tikseb aktar informazzjoni.
L-UE hija magħmula minn 27 pajjiż b’popolazzjoni kkombinata ta’ 448.4 miljun persuna. Għandha 24 lingwa uffiċjali u 347 miljun persuna jużaw l-ewro f’20 pajjiż differenti. Il-bandiera tal-UE għandha sfond blu b’ċirku ta’ 12-il stilla safra fiċ-ċentru. Il-motto tal-UE huwa “Magħqudin fid-diversità”. Jum l-Ewropa huwa d-9 ta’ Mejju.
Unjoni ta’ valuri
Minkejja li l-Ewropej jitkellmu b’lingwi differenti u għandhom tradizzjonijiet differenti, huma jikkondividu l-istess sett ta’ valuri li fuqhom twaqqfet l-UE. Dawn huma r-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem.
Dawn il-valuri huma stabbiliti fit-trattati tal-UE u fil-Karta tad-Drittijiet Fundamentali tal-Unjoni Ewropea, li tiġbor flimkien id-drittijiet personali, ċiviċi, politiċi, ekonomiċi u soċjali kollha li jgawdu n-nies fl-UE.
Fl-2022, 13.7 miljun persuna fl-UE kienu ċittadini ta’ Stat Membru differenti minn dak li kienu qed jgħixu fih.
Jekk int ċittadin ta’ wieħed mis-27 Stat Membru li jiffurmaw l-UE, inti wkoll ċittadin tal-UE. Dan jagħtik drittijiet addizzjonali importanti, bħal-libertà li tiċċaqlaq, tgħix, taħdem u tistudja fi kwalunkwe Stat Membru u d-dritt li tivvota u li toħroġ bħala kandidat fl-elezzjonijiet lokali u dawk tal-Ewropa, anke meta tkun qed tgħix fi Stat Membru ieħor. Għandek ukoll id-dritt li tressaq petizzjoni quddiem il-Parlament Ewropew, li tirrikorri għall-Ombudsman Ewropew u li tikteb lil kwalunkwe istituzzjoni tal-UE f’waħda mill-24 lingwa uffiċjali tal-UE.
Minbarra li tipproteġi d-drittijiet taċ-ċittadini u tan-nies tagħha li jgħixu fl-Unjoni Ewropea, l-UE tippromwovi wkoll id-drittijiet tal-bniedem u l-elezzjonijiet ġusti madwar id-dinja. Kull sena, il-Parlament Ewropew jagħti l-Premju Sakharov lil individwu jew lil organizzazzjoni li tiġġieled għad-drittijiet tal-bniedem u għal-libertajiet fundamentali.
L-għajxien fl-UE jġib miegħu xi drittijiet u benefiċċji importanti, bħal dawn li ġejjin.
Jien protett(a) kontra d-diskriminazzjoni fil-forom kollha tagħha, inkluż is-sess, ir-razza, ir-reliġjon, l-oriġini etnika jew soċjali, id-diżabbiltà, l-età jew l-orjentazzjoni sesswali.
Għandi d-dritt li d-data personali tiegħi tiġi protetta.
Nista’ nixtri online u nixtri minn kwalunkwe Stat Membru b’rasi mistrieħa, grazzi għall-protezzjoni tal-konsumatur b’saħħitha tal-UE.
Saħħti hija protetta permezz tal-istandards ambjentali stretti tal-UE, bħar-regoli dwar il-kwalità tal-arja u tal-ilma.
Skopri aktar dwar id-drittijiet tiegħek
Daqqa t’għajn lejn l-UE
Bis-saħħa tas-suq komuni, il-persuni, l-oġġetti, is-servizzi u l-flus jistgħu jimxu minn pajjiż għal ieħor b’mod liberu fis-27 Stat Membru kważi bl-istess libertà daqslikieku f’pajjiż wieħed.
Tlieta u għoxrin Stat Membru tal-UE u erba’ pajjiżi mhux tal-UE — l-Iżlanda, il-Liechtenstein, in-Norveġja u l-Iżvizzera — jappartjenu għaż-żona Schengen. Dan ifisser li ma għandekx għalfejn turi l-passaport tiegħek meta taqsam il-fruntieri bejn dawn il-pajjiżi.
Il-mappa turi l-Istati Membri tal-Unjoni Ewropea fl-Ewropa kontinentali kif ukoll ir-reġjuni ekstra-Ewropej ta’ Franza (il-Guyana Franċiża, Guadeloupe, Martinique, Mayotte, Réunion u Saint Martin), in-Netherlands (Sint Maarten) il-Portugall (Madeira u l-Azores) u Spanja (il-Gżejjer Kanarji). Turi wkoll il-pajjiżi kandidati (l-Albanija, il-Bożnija-Ħerzegovina, il-Moldova, il-Montenegro, il-Maċedonja ta’ Fuq, is-Serbja, it-Turkija, l-Ukrajna) u l-pajjiżi kandidati potenzjali (il-Kosovo, il-Georgia).
L-Awstrija ssieħbet fl-UE fl-1995; għandha popolazzjoni ta’ 9.1 miljun persuna u tuża l-ewro. Il-Belġju ssieħeb fl-UE fl-1958; għandu popolazzjoni ta’ 11.8 miljun persuna u juża l-ewro. Il-Bulgarija ssieħbet fl-UE fl-2007; għandha popolazzjoni ta’ 6.4 miljun persuna u tuża l-lev; mhijiex parti miż-żona Schengen. Il-Kroazja ssieħbet fl-UE fl-2013; għandha popolazzjoni ta’ 3.9 miljun persuna u tuża l-ewro. Ċipru ssieħeb fl-UE fl-2004; għandu popolazzjoni ta’ 0.9 miljun persuna u juża l-ewro; mhux parti miż-żona Schengen. Iċ-Ċekja ssieħbet fl-UE fl-2004; għandha popolazzjoni ta’ 10.8 miljun persuna u tuża l-krona. Id-Danimarka ssieħbet fl-UE fl-1973; għandha popolazzjoni ta’ 5.9 miljun persuna u tuża l-krona. L-Estonja ssieħbet fl-UE fl-2004; għandha popolazzjoni ta’ 1.4 miljun persuna u tuża l-ewro. Il-Finlandja ssieħbet fl-UE fl-1995; għandha popolazzjoni ta’ 5.6 miljun persuna u tuża l-ewro. Franza ssieħbet fl-UE fl-1958; għandha popolazzjoni ta’ 68.1 miljun persuna u tuża l-ewro. Il-Ġermanja ssieħbet fl-UE fl-1958; għandha popolazzjoni ta’ 84.4 miljun persuna u tuża l-ewro. Il-Greċja ssieħbet fl-UE fl-1981; għandha popolazzjoni ta’ 10.4 miljun persuna u tuża l-ewro. L-Ungerija ssieħbet fl-UE fl-2004; għandha popolazzjoni ta’ 9.6 miljun persuna u tuża l-forint. L-Irlanda ssieħbet fl-UE fl-1973; għandha popolazzjoni ta’ 5.2 miljun persuna u tuża l-ewro; mhijiex parti miż-żona Schengen. L-Italja ssieħbet fl-UE fl-1958; għandha popolazzjoni ta’ 58.9 miljun persuna u tuża l-ewro. Il-Latvja ssieħbet fl-UE fl-2004; għandha popolazzjoni ta’ 1.9 miljun persuna u tuża l-ewro. Il-Litwanja ssieħbet fl-UE fl-2004; għandha popolazzjoni ta’ 2.9 miljun persuna u tuża l-ewro. Il-Lussemburgu ssieħeb fl-UE fl-1958; għandu popolazzjoni ta’ 0.7 miljun persuna u juża l-ewro. Malta ssieħbet fl-UE fl-2004; għandha popolazzjoni ta’ 0.5 miljun persuna u tuża l-ewro. In-Netherlands issieħbu fl-UE fl-1958; għandhom popolazzjoni ta’ 17.8 miljun persuna u jużaw l-ewro. Il-Polonja ssieħbet fl-UE fl-2004; għandha popolazzjoni ta’ 36.8 miljun persuna u tuża ż-zloty. Il-Portugall issieħeb fl-UE fl-1986; għandu popolazzjoni ta’ 10.5 miljun persuna u juża l-ewro. Ir-Rumanija ssieħbet fl-UE fl-2007; għandha popolazzjoni ta’ 19.1 miljun persuna u tuża l-leu; mhijiex parti miż-żona Schengen. Is-Slovakkja ssieħbet fl-UE fl-2004; għandha popolazzjoni ta’ 5.4 miljun persuna u tuża l-ewro. Is-Slovenja ssieħbet fl-UE fl-2004; għandha popolazzjoni ta’ 2.1 miljun persuna u tuża l-ewro. Spanja ssieħbet fl-UE fl-1986; għandha popolazzjoni ta’ 48.1 miljun persuna u tuża l-ewro. L-Iżvezja ssieħbet fl-UE fl-1995; għandha popolazzjoni ta’ 10.5 miljun persuna u tuża l-krona.
X’qed tagħmel l-UE biex tindirizza l-kwistjonijiet Il-kbar li qed inħabbtu wiċċna magħhom illum?
Fi żminijiet reċenti, l-UE ħabbtet wiċċha ma’ sfidi bla preċedent: kriżi finanzjarja u pandemija globali, segwiti mill-gwerra ta’ aggressjoni tar-Russja kontra l-Ukrajna u l-kriżi tal-enerġija li ġabet magħha. Dawn l-avvenimenti storiċi wrew il-bżonn li nkunu kapaċi nirreaġixxu malajr u b’mod determinat għal sitwazzjonijiet ġodda. Fl-istess ħin, l-UE kompliet u saħansitra żiedet l-azzjoni tagħha biex tilħaq l-għanijiet ekoloġiċi u diġitali tagħha.
COVID-19
Il-pandemija tal-coronavirus wasslet għal traġedja umana, lockdowns u tnaqqis fir-ritmu ekonomiku, bir-riżultat li l-UE kif ukoll il-bqija tad-dinja għaddew minn prova serja.
Minbarra li ħadet azzjoni biex trażżan it-tixrid tal-virus permezz ta’ programmi ta’ tilqim, l-UE ħadmet biex tappoġġa s-sistemi tas-saħħa nazzjonali u biex tgħin lill-Ewropa terġa’ tqum fuq saqajha. L-UE kienet waħda mill-kontributuri ewlenin għall-COVAX, l-inizjattiva globali għal aċċess ġust għall-vaċċini kontra l-COVID-19, u qed taħdem mas-sħab internazzjonali tagħha biex tiżgura li d-dinja tkun lesta għal pandemiji futuri.
L-UE introduċiet ukoll sistema komuni ta’ ċertifikati tat-tilqim għenet biex in-nies fl-UE jerġgħu jibdew jivvjaġġaw faċilment. Filwaqt li tibni fuq dan, l-Organizzazzjoni Dinjija tas-Saħħa issa stabbiliet sistema ta’ ċertifikazzjoni globali biex l-ivvjaġġar isir aktar faċli u fl-istess ħin tipproteġi lin-nies. L-Awtorità Ewropea ġdida għat-Tħejjija u għar-Rispons f’Każ ta’ Emerġenza tas-Saħħa se tiżgura li l-UE jkollha l-mediċini u t-tagħmir li teħtieġ meta jseħħ theddid għas-saħħa.
Biex tiżgura rkupru ekonomiku rapidu mill-pandemija, l-UE waqqfet fond għall-Irkupru speċjali ta’ aktar minn EUR 800 biljun, magħruf bħala NextGeneration EU. Permezz ta’ investimenti fi proġetti u inizjattivi li jagħmlu lill-UE aktar ekoloġika u aktar diġitali, il-fond għall-irkupru ifisser li l-UE hija mħejjija aħjar biex tindirizza l-isfidi futuri. Pereżempju, fil-kuntest tal-gwerra ta’ aggressjoni tar-Russja kontra l-Ukrajna u l-kriżi globali tal-enerġija, diġà qed tappoġġa lill-Istati Membri fl-isforzi tagħhom biex jeliminaw gradwalment il-fjuwils fossili Russi u biex jagħmlu tranżizzjoni lejn enerġija nadifa.
It-total ta’ €2018 biljun huwa magħmul mill-baġit tal-UE għal seba’ snin (€1211-il biljun) flimkien ma’ €807 biljun minn NextGenerationEU, il-pakkett ta’ rkupru għall-COVID-19.
Il-gwerra ta’ aggressjoni tar-Russja kontra l-Ukrajna
Wara l-invażjoni tal-Ukrajna mir-Russja fi Frar 2022, l-UE tat rispons malajr b’appoġġ għall-Ukrajna u l-poplu tagħha. Dan kien jinkludi għajnuna umanitarja, assistenza ta’ emerġenza, appoġġ finanzjarju u operazzjonali, assistenza u appoġġ militari fil-fruntiera tal-UE u fil-Moldova.
Bħala parti mill-assistenza umanitarja tagħha, l-UE ilha tipprovdi ikel, kenn u għajnuna medika lill-persuni affettwati mill-kunflitt. Ħadet ukoll il-miżura eċċezzjonali li tagħti protezzjoni temporanja lil miljuni ta’ persuni li qed jaħarbu mill-Ukrajna, u pprovditilhom aċċess għal akkomodazzjoni, skejjel, kura tas-saħħa u impjiegi fl-UE. L-assistenza finanzjarja tal-UE għenet biex tiġi stabbilizzata l-ekonomija tal-Ukrajna, tiġi restawrata l-infrastruttura u jittejbu l-kapaċitajiet ta’ difiża u sigurtà.
L-UE kienet ukoll minn ta’ quddiem fil-kundanna internazzjonali kontra l-gwerra ta’ aggressjoni tar-Russja kontra l-Ukrajna u imponiet sanzjonijiet ħorox kontra r-Russja u dawk kompliċi fil-gwerra. Dawn il-miżuri għandhom l-għan li jiżolaw lir-Russja ekonomikament u jillimitaw il-kapaċità tagħha għal aggressjoni militari.
L-UE, flimkien mal-Istati Membri u l-istituzzjonijiet finanzjarji tagħha, immobilizzat aktar minn EUR 50 biljun f’appoġġ ġenerali għall-Ukrajna.
Skopri aktar dwar l-appoġġ tal-UE provdut lill-Ukrajna.
L-indirizzar tal-kriżi tal-enerġija
Il-gwerra ta’ aggressjoni tar-Russja fixklet bil-kbir is-sistema tal-enerġija tad-dinja billi kkawżat żidiet fil-prezzijiet u inċertezza fuq il-provvista tal-gass, u aggravat sitwazzjoni diġà diffiċli fis-suq tal-enerġija wara l-pandemija.
X’qed tagħmel l-UE biex tindirizza dan?
It-tneħħija gradwali tal-fjuwils fossili Russi.
L-aċċellerazzjoni tal-produzzjoni tal-enerġija rinnovabbli (l-idroġenu, ir-riħ, l-enerġija solari), li hija parti importanti mill-impenn tagħha li ssir newtrali għall-klima sal-2050.
Tnaqqis fil-kontijiet għaċ-ċittadini u n-negozji.
Tnaqqis fid-domanda għall-enerġija.
Żieda fil-ħażna tal-gass għax-xitwa.
Tippermetti lill-Istati Membri jixtru l-enerġija flimkien biex jiksbu prezzijiet aħjar.
Tisħiħ tar-regoli biex jiġi żgurat li kull Stat Membru jirċievi għajnuna f’każ ta’ emerġenza.
Investiment fl-infrastruttura sabiex l-Istati Membri kollha jkollhom mill-inqas żewġ sorsi ta’ provvista tal-gass.
Skopri aktar dwar il-ħidma tal-UE biex tiżgura enerġija sikura, nadifa u affordabbli.
Tibdil fil-klima
Il-Patt Ekoloġiku Ewropew huwa l-istrateġija tal-UE biex tinħoloq ekonomija Ewropea moderna u kompetittiva. L-għan tiegħu hu li jagħmel l-Ewropa l-ewwel kontinent newtrali għall-klima sal-2050, u f’dak il-punt ma nibqgħux nipproduċu aktar gassijiet serra milli jistgħu jassorbu l-ekosistemi tagħna b’mod naturali.
Bħala l-ewwel stadju importanti f’din it-triq ambizzjuża, l-UE stabbiliet mira ġdida li tnaqqas l-emissjonijiet netti tagħha ta’ gassijiet serra b’mill-inqas 55 % sal-2030, meta mqabbla mal-livelli tal-1990. L-oqsma kollha tas-soċjetà u tal-ekonomija se jkollhom rwol x’jaqdu, mill-industrija, l-enerġija u t-trasport, sal-produzzjoni tal-ikel, l-agrikoltura u l-kostruzzjoni. Se jingħata appoġġ finanzjarju għar-reġjuni, l-industriji u l-ħaddiema li jħabbtu wiċċhom mal-akbar sfidi. F’Lulju 2021, il-Kummissjoni Ewropea pproponiet pakkett ta’ miżuri biex tiżgura li l-UE tilħaq l-objettivi tagħha skont il-Patt Ekoloġiku Ewropew.
Mill-inqas 30 % tal-infiq tal-UE bejn l-2021 u l-2027 se jmur għall-indirizzar tat-tibdil fil-klima u l-effetti tiegħu.
Xi tfisser għalik?
Il-benefiċċji tal-mira li jitnaqqsu l-emissjonijiet netti ta’ gassijiet serra b’mill-inqas 55 % sal-2030, meta mqabbla mal-livelli tal-1990.
- Mill-inqas 42.5 % ta’ enerġija rinnovabbli fit-taħlita tal-enerġija tal-UE sal-2030.
- Foresti Ewropej protetti u restawrati; tliet biljun siġra addizzjonali mħawla sal-2030.
- Trasport pubbliku aktar nadif u karburanti aktar sostenibbli.
- Miljun impjieg ekoloġiku addizzjonali fl-UE sal-2030.
- Mill-inqas 55 % inqas imwiet minħabba t-tniġġis tal-arja sal-2030.
- Tranżizzjoni ġusta, ibbażata fuq is-solidarjetà Ewropea.
- Miljun punt tal-iċċarġjar elettriku madwar l-UE sal-2025.
- Ekonomija tal-UE modernizzata u reżiljenti.
Ilkoll nistgħu nagħtu s-sehem tagħna, nistgħu nnaqqsu kemm naħlu ikel u nirriċiklaw aktar, nużaw rota minflok karozza, jew nistgħu saħansitra nħawlu siġra. Jekk tixtieq tinvolvi ruħek, ħares ftit lejn il-patt klimatiku Ewropew, li jlaqqa’ lin-nies u lill-organizzazzjonijiet flimkien biex jaqsmu informazzjoni dwar l-azzjoni klimatika. Għinna noħolqu Ewropa aktar ekoloġika!
Natura 2000 huwa l-akbar network tad-dinja ta’ żoni protetti, li jissalvagwardja eluf ta’ postijiet ta’ kenn għall-ispeċijiet u l-ħabitats l-aktar prezzjużi u mhedda tal-Ewropa.
© LIFE06 NAT/E/000209/Aixa SOPEÑA.
Il-linċi Iberiku m’għadux fil-periklu tal-estinzjoni fi Spanja u fil-Portugall bis-saħħa tal-isforzi li għamlu bosta nies, inkluż ix-xogħol ta’ proġetti ffinanzjati mill-programm LIFE tal-UE. L-irkupru ta’ din l-ispeċi huwa waħda mill-aqwa stejjer ta’ suċċess tal-Ewropa fejn tidħol il-konservazzjoni tal-annimali.
L-UE ffinanzjat il-konverżjoni ta’ żewġ bastimenti tal-passiġġieri u tal-merkanzija biex minflok b’żejt tqil jaħdmu b’batteriji elettriċi aktar ekoloġiċi. Dawn joperaw fuq ir-rotta attiva bejn Helsingør (id-Danimarka) u Helsingborg (l-Iżvezja). Il-bastimenti kkonvertiti jgħinu biex tittejjeb il-kwalità tal-arja f’dawn iż-żoni b’popolazzjoni densa.
Nisfruttaw kemm nifilħu t-trasformazzjoni diġitali
Fis-soċjetà tal-lum, hemm bżonn li lkoll inkunu nifhmu fit-teknoloġija diġitali, kemm jekk biex nużaw servizzi bankarji online u nixtru mid-dar, u kemm biex nużaw it-teknoloġija fl-impjiegi tagħna. Biex iżżomm lil kulħadd aġġornat, u biex tiżgura li l-Ewropa tkun minn ta’ quddiem nett fejn tidħol it-teknoloġija, l-UE qiegħda tinvesti f’kollox, mill-ħiliet diġitali u s-supercomputing, sal-konnettività b’veloċità għolja u ċibersigurtà aħjar.
L-UE qed taħdem biex tiżgura li d-dinja online tkun sikura u ġusta kemm għan-nies kif ukoll għan-negozji. Bis-saħħa tar-regoli tal-UE, illum għandna aktar kontroll fuq id-data personali tagħna u fuq kif jużaha ħaddieħor.
Skopri aktar dwar ir-regoli tal-UE għal ambjent diġitali aktar sikur.
Ngħinu lin-nies isibu xogħol
Il-Fond Soċjali Ewropew Plus jgħin lin-nies isibu impjieg (jew impjieg aħjar), fosthom dawk li jħabbtu wiċċhom ma’ xi żvantaġġi. Kull sena, il-fond jgħin lil madwar 10 miljun persuna ssib impjieg jew tkompli ssaħħaħ il-ħiliet li jkollha.
L-UE qed tgħin liż-żgħażagħ jidħlu fis-suq tax-xogħol. Pereżempju, l-iskema ta’ garanzija għaż-żgħażagħ għandha l-għan li tiżgura li kwalunkwe persuna taħt it-30 sena tirċievi offerta ta’ impjieg, edukazzjoni, apprendistat jew taħriġ ta’ kwalità tajba fi żmien 4 xhur minn meta tisfa qiegħda jew minn meta titlaq mill-edukazzjoni.
Il-volontarjat huwa mod tajjeb ħafna kif tikkontribwixxi għall-komunitajiet lokali f’pajjiżek jew barra minnu, filwaqt li tiżviluppa ħiliet ġodda u tagħmel il-ħbieb. Il-Korp Ewropew ta’ Solidarjetà jagħti liż-żgħażagħ l-opportunità li jagħmlu l-volontarjat jew li jaħdmu fi proġetti f’pajjiżhom stess jew barra minn pajjiżhom. L-Inizjattiva Voluntiera tal-Għajnuna tal-UE toffri lil dawk li għandhom ’il fuq minn 18-il sena l-opportunità jipparteċipaw fi proġetti umanitarji madwar id-dinja.
Insaħħu l-ġlieda kontra l-kanċer
L-UE hija ddeterminata li twettaq bidliet kbar f’dak li għandu x’jaqsam mal-kanċer. B’finanzjament ta’ EUR 4 biljun, il-pjan tal-Ewropa kontra l-kanċer ifassal approċċ ġdid tal-UE għall-prevenzjoni, it-trattament u l-kura tal-kanċer. Il-finanzjament mill-UE diġà wassal għal riċerka rivoluzzjonarja, mill-immudellar 3D tat-tumuri għall-identifikazzjoni tal-kanċer min-nifs ta’ dak li jkun.
Unjoni ta’ ugwaljanza
L-UE qed tibni Ewropa ta’ ugwaljanza. Dan ifisser li n-nisa u l-irġiel għandhom jingħataw paga ugwali għal xogħol ugwali, li l-persuni b’diżabbiltà jkunu jistgħu jipparteċipaw b’mod ugwali fl-aspetti kollha tal-ħajja, u li r-razziżmu ma jkunx ittollerat. Ifisser li n-nies ma għandhomx jiġu esklużi jew emarġinati , u li n-nies għandu jkollhom il-libertà li jħobbu lil min iridu.
Il-migranti u ċ-ċittadini tal-UE li għandhom sfond ta’ migrazzjoni jaqdu rwol ewlieni fis-soċjetà Ewropea, inkluż bħala ħaddiema essenzjali. L-UE qed taħdem biex tiżgura li kulħadd ikun jista’ jipparteċipa bis-sħiħ fis-soċjetà billi tiffoka fuq affarijiet bħal aċċess aħjar għall-edukazzjoni, l-impjiegi, il-kura tas-saħħa u l-akkomodazzjoni.
Sir af aktar dwar il-prijoritajiet tal-Kummissjoni Ewropea.
Nipproteġu n-nies
Is-sikurezza u s-sigurtà tan-nies fl-Ewropa, kemm fid-dinja fiżika kif ukoll f’dik diġitali, huma prijorità ewlenija għall-UE. Hija taħdem kuljum biex tindirizza t-theddid bħat-terroriżmu, il-kriminalità organizzata, il-kummerċ tad-droga illegali u t-traffikar tal-bnedmin.
Il-kriżi tal-COVID-19 u l-gwerra ta’ aggressjoni tar-Russja kontra l-Ukrajna enfasizzaw ukoll it-theddid u l-isfidi li d-diżinformazzjoni toħloq għas-soċjetajiet tagħna. L-UE qed taħdem ma’ kumpaniji tal-midja soċjali u ma’ pjattaformi online biex tillimita t-tixrid ta’ informazzjoni qarrieqa u ta’ aħbarijiet foloz fl-Ewropa. L-Osservatorju Ewropew tal-Media Diġitali jappoġġa l-ħidma ta’ verifikaturi indipendenti tal-fatti u għandu l-għan li jsir iċ-ċentru Ewropew għall-ġlieda kontra d-diżinformazzjoni online.
L-Ewropa tfisser kultura
X’għandhom komuni dawn il-films kollha li rebħu Oscar: Slumdog Millionaire, Son of Saul, The Father u Another Round? Kollha kemm huma ngħataw appoġġ mit-taqsima MEDIA tal-programm Ewropa Kreattiva tal-UE.
Il-belt tiegħek hija l-Kapitali Ewropea tal-Kultura li jmiss? Dan it-titlu preġjat ingħata lil aktar minn 50 belt madwar l-UE. Huwa jitfa’ dawl fuq l-artisti lokali u fuq il-ġid kulturali uniku ta’ kull belt.
Esplora l-arti u l-kultura tal-Ewropa mill-kumdità ta’ darek! Il-pjattaforma diġitali Europeana tagħti aċċess għal aktar minn 58 miljun oġġett minn kollezzjonijiet ta’ aktar minn 4 000 istituzzjoni kulturali.
L-UE fid-dinja
L-UE taħdem id f’id mal-ġirien tagħha u ma’ pajjiżi madwar id-dinja biex tibni sħubijiet ġodda u tippromwovi l-valuri u l-interessi tagħha. Permezz ta’ sforzi konġunti f’oqsma bħad-diġitalizzazzjoni, il-klima, l-enerġija, it-trasport, is-saħħa u l-edukazzjoni, l-UE tistinka biex tindirizza l-isfidi globali u toħloq komunità globali aktar konnessa u prospera.
L-UE tagħmel ukoll ftehimiet kummerċjali ma’ pajjiżi oħrajn, l-aktar reċentement ma’ New Zealand. Dawn il-ftehimiet jespandu l-kummerċ li jappoġġa l-ekonomija tal-UE u li joħloq l-impjiegi.
Flimkien, l-UE u l-Istati Membri tagħha huma l-akbar donatur ta’ għajnuna għall-iżvilupp fid-dinja. Fl-2021, huma pprovdew EUR 71.6 biljun jew 41 % tal-assistenza totali (l-aktar data reċenti disponibbli). Flimkien jikkontribwixxu wkoll għal aktar minn nofs l-għajnuna globali kollha għall-edukazzjoni f’aktar minn 100 pajjiż fid-dinja.
Skopri aktar dwar l-istrateġija tal-UE biex tgħaqqad id-dinja.
X’inhuma wħud mill-affarijiet li tagħmel l-UE għalija?
Tista’ tgħix u taħdem fi Stat Membru ieħor tal-UE. Agħti titwila lejn il-portal tal-EURES għall-pożizzjonijiet tax-xogħol vakanti u pariri prattiċi.
Tista’ tirtira fi kwalunkwe Stat Membru (flimkien mal-Iżlanda, il-Liechtenstein, in-Norveġja jew l-Iżvizzera) u tirċievi l-pensjoni tal-istat tiegħek hemmhekk.
Tista’ tistudja jew tagħmel kors ta’ taħriġ fi Stat Membru ieħor. Aktar minn 10 miljun persuna ħadu sehem fil-programm Erasmus mindu beda fl-1987.
L-UE neħħiet it-tariffi tar-roaming fl-2017: issa huwa irħas biex iżżomm kuntatt mal-ħbieb u mal-familja int u tivvjaġġa madwar l-UE. L-abbonamenti diġitali li jkollok jivvjaġġaw miegħek ukoll!
Jekk timrad waqt li tkun qed iżżur Stat Membru ieħor, il-Karta Ewropea tal-Assigurazzjoni tas-Saħħa tiżgura li tista’ tikseb kura tas-saħħa pprovduta mill-istat. Tiġi ttrattat(a) bl-istess kundizzjonijiet u bl-istess rati bħall-persuni assigurati f’dak il-pajjiż.
Tista’ taqbad mal-internet b’xejn bil-hotspots WiFi4EU, li jinsabu f’żoni pubbliċi f’eluf ta’ komunitajiet lokali madwar l-UE. Fittex dan is-simbolu:
Tista’ tuża munita waħda — l-euro — f’20 Stat Membru.
Tista’ ddur madwar l-UE b’moħħok mistrieħ. Meta tivvjaġġa bl-ajru, bil-ferrovija, bil-vapur, b’tal-linja jew bil-coach, tkun protett(a) b’sett sħiħ ta’ drittijiet tal-passiġġieri.
Il-ġugarelli jridu jissodisfaw regoli stretti ta’ sikurezza qabel ma jkunu jistgħu jinbiegħu fl-UE.
Ir-regoli tal-UE jagħmluha possibbli li tikkanċella jew li tirritorna prodott li tkun xtrajt online fi żmien 14-il jum bla ma jkollok tagħti raġuni.
In-nies fl-UE jibbenefikaw minn uħud mill-aktar standards stretti tad-dinja għal ikel sikur u tajjeb għas-saħħa.
Flus sa EUR 100 000 imfaddlin il-bank dejjem jiġu protetti.
Sir af aktar dwar dak li l-UE tagħmel għalik.
X’qed tagħmel l-UE biex ittejjeb L-affarijiet fejn ngħix jien?
Bejn l-2021 u l-2027, l-UE tippjana li tinvesti ’l fuq minn EUR 378 biljun fir-reġjuni tagħha. B’investiment mill-Istati Membri miżjud mat-total, dan se jilħaq EUR 550 biljun.
L-UE tinvesti lokalment fil-bliet u fir-reġjuni biex tagħti spinta lill-impjiegi u lill-ekonomija u ttejjeb il-kwalità tal-ħajja. Hija għandha l-għan li tagħmel differenza f’ħames oqsma ewlenin:
L-immodernizzar tat-trasport u tal-enerġija sabiex jiġi miġġieled it-tibdil fil-klima.
Tgħin lin-nies biex isibu xogħol u jirċievu edukazzjoni, jew tgħin biex tinkludihom fis-soċjetà;
In-negozji żgħar u ta’ daqs medju.
Ir-riċerka u l-innovazzjoni.
Il-protezzjoni u t-titjib tal-ambjent.
Ninvestu fin-nies u fil-postijiet
Ħares waħda madwarek u ma ddumx ma tilmaħ skola, pont, sptar jew proġett ieħor li bbenefika mill-finanzjament mill-UE. Eluf ta’ proġetti rċevew appoġġ mill-programmi reġjonali tal-UE matul is-snin. Hawn taħt hawn biss ftit eżempji ta’ proġetti li, jew issa jew minn hawn u ftit ieħor, jagħmlu differenza fil-ħajja tan-nies madwar l-UE.
Titjib fl-istandards tal-kura tas-saħħa fil-Polonja
L-akbar sptar pubbliku f’Toruń ġie ttrasformat f’waħda mill-faċilitajiet mediċi ewlenin tal-Polonja, bis-saħħa ta’ rinnovazzjoni appoġġata mill-UE ta’ EUR 52.7 miljun. Kura tas-saħħa ċentralizzata u ta’ kwalità għolja tfisser li l-pazjenti issa jdumu jistennew inqas għat-trattament.
Konnessjonijiet tat-toroq aħjar fil-Greċja
Ir-residenti, it-turisti u n-negozji fil-Greċja kollha se jibbenefikaw minn sezzjoni ġdida importanti tal-awtostrada. Finanzjament mill-UE b’valur ta’ EUR 255 miljun qed jappoġġa l-kostruzzjoni tal-konnessjoni nieqsa bejn Lamia u Xyniada. Din se tgħaqqad ir-reġjuni tal-Greċja Ċentrali u tat-Tessalija tal-Punent man-network ewlieni tal-awtostrada.
Għawm sostenibbli fil-Belġju
Rinnovazzjoni ta’ pixxina fil-Vrije Universiteit Brussel (l-Università Libera ta’ Brussell) qed tiġbed ħafna attenzjoni għas-sostenibbiltà tagħha. Il-faċilità l-ġdida tuża 60 % inqas enerġija u tarmi 500 tunnellata ta’ CO2 inqas fis-sena meta mqabbla mal-pixxina l-qadima, u hija miftuħa għal għawwiema minn barra l-Università. Il-proġett irċieva ftit aktar minn EUR 2 miljun f’finanzjament mill-UE.
Bliet u reġjuni aktar ekoloġiċi
Provvista tal-enerġija aktar affidabbli u effiċjenti fiċ-Ċekja, 21 ferrovija elettrika ġdida biex jittejjeb in-network ferrovjarju fil-Kroazja u miżuri biex tiżdied is-sikurezza kontra l-għargħar fl-Ungerija huma fost 14-il proġett ekoloġiku li se jkunu ta’ benefiċċju għaċ-ċittadini tal-UE. Aktar minn EUR 1.4 biljun ta’ fondi mill-UE qed jiġu investiti f’seba’ Stati Membri f’oqsma bħall-ambjent, is-saħħa, it-trasport u l-enerġija.
Broadband b’veloċità għolja tgħaqqad lir-Rumanija rurali
Il-proġett RO-Net appoġġat mill-UE għaqqad 400 000 persuna, aktar minn 8 500 negozju u kważi 3 000 istituzzjoni pubblika f’żoni rurali remoti tar-Rumanija mal-broadband. Madwar 665 villaġġ u belt issa għandhom aċċess għall-kura tas-saħħa, l-edukazzjoni u x-xiri online. In-nies jistgħu jbigħu wkoll prodotti minn unitajiet domestiċi u azjendi agrikoli lokali online.
Postijiet għal-logħob ekoloġiċi f’Pariġi
Btieħi tal-iskejjel tal-konkrit f’Pariġi qed jinbidlu fi gżejjer friski u ekoloġiċi li kapaċi jaħżnu l-ilma u jnaqqsu s-sħana. Bl-appoġġ ta’ kważi EUR 5 miljun f’finanzjament mill-UE, il-proġett OASIS qed jgħin biex jipproteġi lir-residenti ta’ Pariġi mill-effetti tat-tibdil fil-klima, filwaqt li joħloq spazji fejn it-tfal jistgħu jieħdu gost.
Sir af dwar proġetti fir-reġjun tiegħek li rċevew finanzjament mill-UE.
Kif nista’ nirċievi l-għajnuna bil-finanzjament? Riċerkatur, bidwi, imprenditur jew artist? Sir af dwar min huwa eliġibbli għall-finanzjament.
Il-Pijunieri tal-UE
Minn ġellieda ta’ reżistenza u mexxejja politiċi, attriċi famuża madwar id-dinja, sir af aktar dwar in-nisa u l-irġiel li ispiraw il-ħolqien tal-Ewropa li ngħixu fiha llum.
Avvenimenti sinifikanti tal-UE
1950
9 ta’ Mejju
Id-Dikjarazzjoni ta’ Schuman. Il-Ministru għall-Affarijiet Barranin ta’ Franza Robert Schuman jipproponi li l-produzzjoni tal-faħam u tal-azzar tinġabar flimkien sabiex l-ebda pajjiż ma jkun jista’ joħloq l-armi u jdur kontra pajjiż ieħor.
Robert Schuman jiffirma t-Trattat ta’ Pariġi li jistabbilixxi l-Komunità Ewropea tal-Faħam u l-Azzar, Pariġi, Franza, it-18 ta’ April 1951.
1952
23 ta’ Lulju
Tiġi stabbilita l-Komunità Ewropea tal-Faħam u l-Azzar.
1957
25 ta’ Marzu
Jiġu ffirmati t-Trattati ta’ Ruma minn sitt Stati Membri — il-Belġju, il-Ġermanja, Franza, l-Italja, il-Lussemburgu u n-Netherlands. Dawn joħolqu suq komuni, il-Komunità Ekonomika Ewropea, mill-1 ta’ Jannar 1958.
1962
30 ta’ Lulju
Titnieda l-politika agrikola komuni, li tgħin biex jiġu ssalvagwardjati l-provvisti tal-ikel u jiġu appoġġati l-bdiewa u ż-żoni rurali.
1968
1 ta’ Lulju
Jiġu eliminati d-dazji doganali bejn is-sitt Stati Membri.
1979
7–10 ta’ Ġunju
Għall-ewwel darba, iċ-ċittadini Ewropej jistgħu jivvutaw għal min jirrappreżentahom fil-Parlament Ewropew.
1987
15 ta’ Ġunju
Jitnieda l-programm ta’ skambju tal-istudenti Erasmus.
Il-waqgħa tal-Ħajt ta’ Berlin, il-Ġermanja, il-11 ta’ Novembru 1989.
1989
Il-kollass tal-komuniżmu iwassal għal mewġa ta’ bidla favur id-demokrazija fl-Ewropa Ċentrali u tal-Lvant.
1993
1 ta’ Jannar
Jitnieda s-suq uniku, fejn in-nies, il-prodotti, is-servizzi u l-flus jistgħu jiċċirkolaw b’mod liberu.
1 ta’ Novembru
Tinħoloq l-Unjoni Ewropea.
1995
26 ta’ Marzu
Il-Ftehim ta’ Schengen ineħħi l-kontrolli fuq il-fruntieri bejn ċerti Stati Membri. Issa hemm tlieta u għoxrin minnhom li jibbenefikaw minn dan il-vantaġġ.
2002
1 ta’ Jannar
Jidhru għall-ewwel darba l-karti u l-muniti tal-Euro, li llum il-ġurnata jintużaw f’20 Stat Membru.
2012
1 ta’ April
Titnieda l-inizjattiva taċ-ċittadini Ewropej.
10 ta’ Diċembru
L-UE tingħata l-Premju Nobel għall-Paċi.
2015
12 ta’ Diċembru
Total ta’ 195 pajjiż, inklużi l-Istati Membri kollha tal-UE, jadottaw il-Ftehim ta’ Pariġi dwar it-tibdil fil-klima.
Konferenza tan-NU dwar it-Tibdil fil-Klima (COP21), Pariġi, Franza, l-1 ta’ Diċembru 2015.
2017
15 ta’ Ġunju
Jispiċċaw it-tariffi tar-roaming.
2020
Jannar
Il-COVID-19 tilħaq l-Ewropa, u dan jagħti bidu għall-akbar rispons għall-emerġenza tas-saħħa pubblika li qatt kien hemm fl-istorja tal-UE.
2021
9 ta’ Mejju
Titnieda l-Konferenza dwar il-Futur tal-Ewropa, li tagħti liċ-ċittadini tal-UE l-opportunità li jsawru l-futur komuni tagħhom.
2022
L-UE u s-sħab internazzjonali tagħha jikkundannaw il-gwerra ta’ aggressjoni tar-Russja kontra l-Ukrajna u joffru assistenza politika, finanzjarja u umanitarja b’saħħitha lill-Ukrajna.
Kif taħdem l-Unjoni Ewropea?
Kulma tagħmel l-UE huwa bbażat fuq trattati li fihom ir-regoli dwar kif taħdem l-UE. Dawn ġew miftiehma b’mod volontarju u demokratiku mill-Istati Membri kollha.
It-trattati tal-UE jispeċifikaw min jista’ jgħaddi l-liġijiet u f’liema oqsma jistgħu jgħadduhom: l-UE, il-gvernijiet nazzjonali jew it-tnejn. L-Istati Membri għandhom ir-responsabbiltà li jieħdu d-deċiżjonijiet u li joħolqu l-liġijiet tagħhom stess f’ċerti oqsma ta’ politika nazzjonali, bħall-industrija, is-saħħa u l-edukazzjoni, filwaqt li l-UE tipprovdi appoġġ.
Għal ħafna oqsma, it-trattati jispeċifikaw li jistgħu jaġixxu kemm l-UE kif ukoll il-gvernijiet nazzjonali. F’dawn il-każijiet, id-deċiżjonijiet dejjem jittieħdu fl-eqreb livell possibbli taċ-ċittadini. Dan ifisser li jekk kwistjoni tkun tista’ tiġi solvuta fil-livell lokali, reġjonali jew nazzjonali, l-UE ma tintervjenix.
L-UE tieħu azzjoni f’dawk l-oqsma fejn l-Istati Membri tagħha jkunu tawha l-awtorizzazzjoni biex taġixxi u fejn ikun jagħmel sens li kulħadd jaġixxi flimkien, bħat-tibdil fil-klima jew meta jsir il-kummerċ madwar id-dinja. Biex jilħqu l-għanijiet tagħhom, l-Istati Membri ħolqu għadd ta’ istituzzjonijiet biex jieħdu deċiżjonijiet fil-livell tal-UE u mbagħad iwettquhom.
Min jagħmel xiex?
Il-Parlament Ewropew, li jinsab fi Strasburgu u fi Brussell, jirrappreżenta l-interessi taċ-ċittadini tal-UE. Flimkien mal-Kunsill tal-Unjoni Ewropea, dan huwa l-korp deċiżjonali ewlieni tal-UE.
Is-705 Membri tal-Parlament Ewropew, magħrufa wkoll bħala MPE, jiġu eletti direttament mill-votanti tal-UE kull ħames snin. L-elezzjoni li jmiss se ssir fl-2024. Kull Stat Membru jeleġġi għadd ta’ membri, b’mod proporzjonali għall-popolazzjoni tiegħu.
Il-MPE ma jpoġġux fi gruppi skont in-nazzjonalità tagħhom, iżda fi gruppi politiċi li jkopru diversi pajjiżi, jew inkella bħala membri indipendenti. Roberta Metsola hija l-President attwali tal-Parlament Ewropew.
Il-Parlament Ewropew huwa magħmul minn 705 Membri. Maqsumin fi gruppi politiċi. Il-gruppi (f’ordni dixxendenti skont l-għadd ta’ membri) huma: Il-Grupp tal-Partit Popolari Ewropew (Demokristjani); Il-Grupp tal-Alleanza Progressiva tas-Soċjalisti u d-Demokratiċi fil-Parlament Ewropew; Il-Grupp Renew Europe; Il-Grupp Identità u Demokrazija; Il-Grupp tal-Ħodor / Alleanza Ħielsa Ewropea; Il-Grupp tal-Konservattivi u r-Riformisti Ewropej; Il-Grupp tax-Xellug fil-Parlament Ewropew – GUE/NGL; Membri mhux affiljati.
Il-Kunsill tal-Unjoni Ewropea, magħruf ukoll bħala l-Kunsill, huwa magħmul mill-ministri tal-gvernijiet tal-Istati Membri. Flimkien mal-Parlament Ewropew, dan huwa l-korp deċiżjonali ewlieni tal-UE. Kull sitt xhur, Stat Membru differenti tal-UE jkollu l-presidenza tal-Kunsill. Biex jiżguraw il-kontinwità, il-presidenzi jaħdmu flimkien mill-qrib fi gruppi ta’ tlieta fuq aġenda komuni matul perjodu ta’ 18-il xahar.
Wieħed ma għandux jitfixklu mal-Kunsill Ewropew, li huwa magħmul mill-mexxejja tal-Istati Membri kollha. Dan jistabbilixxi d-direzzjoni politika u l-prijoritajiet tal-UE. Charles Michel huwa l-President attwali tal-Kunsill Ewropew.
Il-Kummissjoni Ewropea hija s-servizz ċivili tal-UE. Hija għandha d-dritt li tipproponi azzjonijiet u liġijiet ġodda, imbagħad il-Parlament u l-Kunsill jieħdu deċiżjoni dwarhom. Għandha wkoll ir-responsabbiltà li tiżgura li r-regoli tal-UE jiġu applikati kif suppost. Il-Kummissjoni titmexxa mill-President Ursula von der Leyen u mit-tim ta’ kummissarji tagħha — wieħed minn kull Stat Membru.
L-Istati Membri kollha jridu jsegwu r-regoli tal-UE u jilħqu l-miri li jidħlu għalihom; jekk le l-Kummissjoni tista’ tieħu azzjoni kontrihom.
Il-Qorti tal-Ġustizzja tal-Unjoni Ewropea tiżgura li d-dritt tal-Unjoni jiġi infurzat u applikat bl-istess mod f’kull Stat Membru.
Il-Bank Ċentrali Ewropew jieħu ħsieb l-ewro. L-għan ewlieni tiegħu huwa li jżomm il-prezzijiet stabbli fiż-żona tal-ewro.
Min iħallas għall-UE?
Il-flus li tonfoq l-UE (il-baġit tal-UE) jiġu minn diversi sorsi: id-dazji doganali; il-kontribuzzjonijiet ibbażati fuq it-taxxa fuq il-valur miżjud (VAT) miġbura mill-Istati Membri; u kontribuzzjonijiet diretti mill-Istati Membri. Sors ġdid ta’ dħul — imposta fuq l-iskart mill-imballaġġ tal-plastik mhux riċiklat — ġie introdott f’Jannar 2021.
Kemm jekk jikkontribwixxi għal toroq, ferroviji u ajruporti ġodda u aħjar, jew jiżviluppa ż-żoni rurali jew jiffaċilita opportunitajiet ta’ studju barra, il-baġit tal-UE jgħin biex l-affarijiet li huma importanti għan-nies fl-UE jissarrfu f’realtà. Minbarra li qed imexxi t-trasformazzjoni diġitali u l-ġlieda kontra t-tibdil fil-klima, dan jgħin ukoll biex inaqqas id-disparitajiet fi ħdan l-Istati Membri u bejniethom.
Kif nista’ ninvolvi ruħi?
Tixtieq issemma’ leħnek fil-futur tal-Ewropa? Trid tipparteċipa b’mod attiv fil-proċess tat-teħid tad-deċiżjonijiet tagħha? Tista’ tgħin fit-tiswir u fit-titjib tal-UE b’ħafna modi.
Eluf ta’ Ewropej diġà wrew it-tamiet u l-aspettattivi tagħhom għas-snin li ġejjin permezz tal-Konferenza dwar il-Futur tal-Ewropa — l-akbar eżerċizzju ta’ konsultazzjoni li qatt sar fl-UE. Waħda mill-karatteristiċi ewlenin tal-konferenza kienet sensiela ta’ dibattiti mmexxija miċ-ċittadini, li issa qed isiru parti regolari mill-ħajja demokratika fl-UE.
Panels taċ-ċittadini Ewropej
- 150 ċittadin magħżula b’mod aleatorju mis-27 Stat Membru
- minn sfondi differenti (ġeneru, età, edukazzjoni, introjtu differenti, minn żoni urbani/rurali)
- 1/3 żgħażagħ (16–25 sena)
Sir af aktar dwar il-panels taċ-ċittadini Ewropej.
Tista’ ssemma’ leħnek ukoll billi tivvota fl-elezzjonijiet Ewropej kull ħames snin.
Tgħallem dwar l-elezzjonijiet Ewropej li jmiss.
Il-MPE tiegħek jirrappreżenta l-interessi tiegħek u dawk tal-belt jew ir-reġjun tiegħek fl-Ewropa u jivvota f’ismek dwar liġijiet li jiġu applikati madwar l-UE.
Sir af liema MPE jirrappreżentaw lil pajjiżek.
Qatt ħsibt jekk hemmx liġi tal-UE li tista’ tkun aħjar? Jekk iva, tista’ tgħin biex ir-regoli tal-UE jsiru adattati għall-futur billi tagħti suġġerimenti dwar kif il-liġijiet eżistenti jistgħu jiġu ssimplifikati u mmodernizzati. Tista’ wkoll taqsam ħsibijietek dwar politiki ġodda. Tista’ tikkontribwixxi fi kwalunkwe waħda mill-24 lingwa uffiċjali tal-UE.
Semma’ leħnek dwar il-kwistjonijiet li huma importanti għalik.
Permezz tal-inizjattiva taċ-ċittadini Ewropej, tista’ titlob lill-Kummissjoni tipproponi liġi ġdida. L-ewwel trid tiġbor appoġġ għall-kawża tiegħek. Kif inizjattiva tilħaq miljun firma, il-Kummissjoni tiddeċiedi x’azzjoni tieħu. S’issa kien hemm disa’ inizjattivi taċ-ċittadini li laħqu l-għadd ta’ firem meħtieġ.
L-ewwel inizjattiva taċ-ċittadini Ewropej ta’ suċċess, “Right2Water”, wasslet għal regoli ġodda biex jiġu żgurati s-sikurezza u l-kwalità tal-ilma tax-xorb, kif ukoll aċċess aktar faċli għalih għal gruppi vulnerabbli.
Inizjattiva aktar reċenti, ‘End the Cage Age’, dalwaqt se twassal għal proposta biex jiġu eliminati gradwalment il-gaġeġ għal għadd ta’ annimal tar-razzett.
Fejn nista’ nsib iktar informazzjoni?
Hemm mijiet ta’ ċentri ta’ informazzjoni tal-Europe Direct madwar l-Unjoni Ewropea kollha. Tista’ ssib l-indirizz tal-eqreb ċentru tiegħek hawnhekk: https://europa.eu/european-union/contact/meet-us_mt
Tista’ tikkuntattja lill-Europe Direct:
— fuq in-numru tat-telefon bla ħlas: 00 800 6 7 8 9 10 11 (ċerti operaturi jistgħu jimponu ħlas għal dawn it-telefonati),
— fuq dan in-numru standard: +32 22999696, jew
— bl-email fuq: https://europa.eu/european-union/contact_mt
L-informazzjoni dwar l-Unjoni Ewropea bil-lingwi uffiċjali kollha tal-UE hija disponibbli fuq is-sit web Europa fuq: https://europa.eu.
Tista’ tniżżel jew tordna pubblikazzjonijiet tal-UE minn: https://op.europa.eu/mt/publications.
Jistgħu jinkisbu diversi kopji ta’ pubblikazzjonijiet bla ħlas billi tikkuntattja lil Europe Direct jew liċ-ċentru tad-dokumentazzjoni lokali tiegħek:
https://european-union.europa.eu/contact-eu/meet-us_mt. Għall-għajnuna u pariri għaċ-ċittadini u n-negozji tal-UE, żur Your Europe: https://europa.eu/youreurope/index.htm
Għal materjal edukattiv, logħob u kwiżżijiet, żur ir-Rokna tat-Tagħlim: https://europa.eu/learning-corner/home_mt
Skopri l-Portal taż-Żgħażagħ: https://europa.eu/youth/EU_mt
Il-Kummissjoni Ewropea f’pajjiżek: https://ec.europa.eu/info/about-european-commission/contact/representations-member-states_mt
Il-Parlament Ewropew f’pajjiżek: https://www.europarl.europa.eu/at-your-service/mt/stay-informed/liaison-offices-in-your-country
In-Network taċ-Ċentri Ewropej tal-Konsumaturi: https://ec.europa.eu/info/live-work-travel-eu/consumer-rights-and-complaints/resolve-your-consumer-complaint/european-consumer-centres-network-ecc-net_mt
facebook.com/EuropeanCommission
instagram.com/europeancommission
facebook.com/europeanparliament
| ISBN 978-92-68-07139-7 | doi:10.2775/126853 | NA-05-22-433-MT-C | |
| ISBN 978-92-76-60531-7 | doi:10.2775/145443 | NA-05-22-433-MT-N | |
| HTML | ISBN 978-92-76-60536-2 | doi:10.2775/1353 | NA-05-22-433-MT-Q |
Gwida qasira għall-UE
Il-Kummissjoni Ewropea
Id-Direttorat Ġenerali għall-Komunikazzjoni
Is-Servizz Editorjali u l-Outreach fil-Mira
1049 Brussell
IL-BELĠJU
Kuntatt: COMM-A2@ec.europa.eu
Dan id-dokument ma jistax jitqies li jikkostitwixxi pożizzjoni uffiċjali tal-Kummissjoni Ewropea.
Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2023
© L-Unjoni Ewropea, 2023
Il-politika tal-użu mill-ġdid tad-dokumenti tal-Kummissjoni Ewropea hija bbażata fuq id-Deċiżjoni tal-Kummissjoni 2011/833/UE tat-12 ta’ Diċembru 2011 dwar l-użu mill-ġdid ta’ dokumenti tal-Kummissjoni (ĠU L 330, 14.12.2011, p. 39). Għajr jekk ikun indikat mod ieħor, l-użu mill-ġdid ta’ dan id-dokument huwa awtorizzat bil-liċenzja Creative Commons Attribution 4.0 International (CC-BY 4.0) (https://creativecommons.org/licenses/by/4.0/). Dan ifisser li l-użu mill-ġdid huwa permess kemm-il darba jingħata kreditu xieraq u jiġu indikati t-tibdiliet kollha.
Għal kull użu jew riproduzzjoni ta’ elementi li mhumiex proprjetà tal-Unjoni Ewropea, jista’ jkun hemm bżonn li jintalab permess direttament mid-detenturi tad-drittijiet rispettivi.
Ir-ritratti kollha huma © L-Unjoni Ewropea, ħlief jekk jingħad mod ieħor.