Appoġġ mogħti mill-UE għall-ġlieda kontra t-traffikar tal-bnedmin fl-Asja t’Isfel/ix-Xlokk tal-Asja

Sommarju Eżekuttiv

I

It-traffikar tal-bnedmin huwa reat li jrendi qligħ kbir, huwa ksur gravi tad-drittijiet tal-bniedem u jirrappreżenta theddida globali għas-sigurtà. Filwaqt li l-ġlieda kontra t-traffikar tal-bnedmin tibqa’ r-responsabbiltà tal-Istati Membri, l-UE hija impenjata wkoll li teqirdu u adottat bosta azzjonijiet biex tappoġġa lill-Istati Membri f’dan ir-rigward.

II

Filwaqt li t-traffikar tal-bnedmin huwa problema globali li ebda pajjiż mhuwa kompletament ħieles minnha, l-UE tinsab partikolarment vulnerabbli billi hija destinazzjoni attraenti għal vittmi minn firxa wiesgħa ta’ pajjiżi. L-Asja, ir-reġjun l-aktar ippopolat fid-dinja, huwa reġjun sinifikanti għal vittmi ta’ traffikar transreġjonali. It-traffikar tal-bnedmin ma jistax jiġi iżolat mill-faqar, l-aċċess għall-edukazzjoni u għas-saħħa, id-diskriminazzjoni bbażata fuq is-sess jew l-inġustizzji fuq minoranzi. Huwa aċċettat b’mod ġenerali li l-faqar, id-diskriminazzjoni bbażata fuq is-sess u l-kunflitt huma fost il-kawżi ewlenin l-aktar importanti tat-traffikar.

III

Id-dħul fis-seħħ tat-Trattat ta’ Lisbona rrinforza r-rwol tal-Kummissjoni fil-koordinazzjoni u l-orjentament tar-rispons tal-UE. Fl-2011 ġiet adottata Direttiva, u ftit wara nħarġet strateġija kontra t-traffikar tal-bnedmin (Strateġija THB 2012-2016). Din l-istrateġija hija kkomplementata minn għadd ta’ dokumenti ta’ politika oħra li, meta jittieħdu flimkien, jistipulaw l-approċċ tal-UE għall-ġlieda kontra t-traffikar tal-bnedmin. Għadha ma ġietx ippreżentata strateġija kontra t-traffikar tal-bnedmin għal wara l-2016.

IV

F’dan ir-rapport, aħna neżaminaw l-effettività tal-appoġġ mogħti mill-UE għall-ġlieda kontra t-traffikar tal-bnedmin fl-Asja t’Isfel/ix-Xlokk tal-Asja. L-awditu eżamina kemm l-approċċ tal-UE kien komprensiv f’dan ir-rigward fir-reġjuni msemmija, u jekk il-proġetti tal-UE relatati mat-traffikar tal-bnedmin fl-Asja t’Isfel/ix-Xlokk tal-Asja matul il-perjodu 2009-2015 ikkontribwewx b’mod effettiv għall-ġlieda kontra t-traffikar tal-bnedmin.

V

Il-qerda tat-traffikar tal-bnedmin huwa proċess li neċessarjament jieħu fit-tul. Dan jirrikjedi li jiġu indirizzati għadd ta’ kawżi ewlenin (eż. inugwaljanza bejn is-sessi, faqar, drittijiet tal-minoranzi, edukazzjoni u saħħa) u li l-attivitajiet ta’ netwerks kriminali jiġu sfaxxati. It-traffikar tal-bnedmin huwa, min-natura tiegħu, reat klandestin li rarament ikun hemm data statistika suffiċjenti u kumparabbli dwaru. Minħabba dan il-kuntest kumpless, il-ħafna prijoritajiet mifruxa u r-riżorsi limitati, aħna sibna li l-UE kienet parzjalment effettiva fl-appoġġ li tat għall-ġlieda kontra t-traffikar tal-bnedmin fl-Asja t’Isfel/ix-Xlokk tal-Asja.

VI

Il-qafas ta’ politika tal-UE f’dak li jirrigwarda t-traffikar tal-bnedmin jipprevedi approċċ komprensiv għall-indirizzar tat-traffikar tal-bnedmin, għalkemm xi aspetti għadhom mhumiex żviluppati għalkollox jew mhumiex rilevanti għall-Asja t’Isfel/ix-Xlokk tal-Asja. Il-Kummissjoni u s-SEAE jużaw varjetà ta’ għodod fil-ġlieda kontra t-traffikar tal-bnedmin, kemm direttament kif ukoll indirettament: djalogi dwar id-drittijiet tal-bniedem huma partikolarment utli; għodod oħra jinkludu djalogi bilaterali u appoġġ għal fora reġjonali (jiġifieri ASEAN u ASEM fl-Asja). Sa issa għadhom ma nħolqux sħubiji ġodda, bejn l-UE u xi wieħed mill-pajjiżi fl-Asja t’Isfel/ix-Xlokk tal-Asja, li huma ddedikati għall-ġlieda kontra t-traffikar tal-bnedmin.

VII

Minkejja dgħufijiet speċifiċi, il-biċċa l-kbira mill-proġetti eżaminati fl-Asja t’Isfel/ix-Xlokk tal-Asja taw xi riżultati pożittivi fil-ġlieda kontra t-traffikar tal-bnedmin, għalkemm is-sostenibbiltà kienet problematika. Mill-2009 ‘l hawn, kien hemm titjib ġenerali fil-ġlieda kontra t-traffikar tal-bnedmin, għalkemm hemm differenzi sinifikanti bejn il-pajjiżi u huwa diffiċli li tinstab konnessjoni bejn l-iżvilupp ġenerali u r-riżultati li nkisbu minn azzjonijiet speċifiċi tal-UE. Il-qafas għall-għażla tal-proġetti ma ffaċilitax l-użu ta’ approċċ komprensiv u t-tfassil tal-proġetti kellu xi dgħufijiet, b’mod partikolari fil-formulazzjoni tal-objettivi u l-indikaturi. Barra minn hekk, l-implimentazzjoni ġiet imxekkla minn limitazzjonijiet lokali u minn dewmien.

VIII

Fuq il-bażi ta’ dan l-awditu, aħna nirrakkomandaw li jenħtieġ li l-Kummissjoni, f’koordinazzjoni mas-SEAE:

• Tkompli tiżviluppa l-qafas strateġiku kontra t-traffikar tal-bnedmin, billi tagħmlu aktar rilevanti għall-Asja t’Isfel/ix-Xlokk tal-Asja
• Tottimizza l-impatt tal-proġetti billi tintegrahom f’qafas komprensiv.

Introduzzjoni

Informazzjoni ta’ sfond: Traffikar tal-bnedmin

01

It-traffikar tal-bnedmin huwa reat serju u huwa ksur gravi tad-drittijiet tal-bniedem. Il-vittmi jiġu sfruttati kemm f’pajjiżhom stess kif ukoll barra minn pajjiżhom, għall-benefiċċju tat-traffikanti. Ebda pajjiż mhuwa kompletament ħieles minn dan il-fenomenu, kemm bħala pajjiż ta’ oriġini, pajjiż ta’ tranżitu u/jew pajjiż ta’ destinazzjoni għall-vittmi. It-traffikar tal-bnedmin sar theddida globali għas-sigurtà, kif jidher mill-valutazzjonijiet li saru mill-UE, min-NU u mill-Istati Uniti¹.

02

Hemm kunsens ġenerali dwar il-ħtieġa li jinqered it-traffikar tal-bnedmin. Sa issa, 170 pajjiż² irratifikaw il-Protokoll għall-Prevenzjoni, Soppressjoni u Punizzjoni tat-Traffikar ta’ Persuni, Speċjalment ta’ Nisa u Tfal, li jissupplementa l-Konvenzjoni tan-Nazzjonijiet Uniti Kontra l-Kriminalità Organizzata Transnazzjonali, li ġiet adottata fis-sena 2000 (il-Protokoll ta’ Palermo). Il-Protokoll ta’ Palermo kien l-ewwel strument internazzjonali li huwa legalment vinkolanti u li fih definizzjoni maqbula tat-traffikar tal-bnedmin.

03

It-traffikar tal-bnedmin jinvolvi r-reklutaġġ, it-trasport, it-trasferiment, il-kenn jew l-akkoljenza ta’ persuni permezz tal-użu tal-forza, ta’ frodi, jew ta’ ġegħil għall-fini ta’ sfruttament³. It-traffikar tal-bnedmin għandu dimensjoni qawwija relatata mal-ġeneru (jiġifieri l-biċċa l-kbira mill-vittmi huma nisa u bniet). Din trid titqies meta jitfasslu miżuri ta’ appoġġ. Ix-xogħol furzat u l-isfruttament sesswali huma t-tipi ta’ sfruttament l-aktar prevalenti madwar id-dinja. Tipi oħra ta’ sfruttament tal-bnedmin huma t-tħaddim tat-tfal, it-tneħħija tal-organi u ż-żwieġ furzat.

04

Bħal reati oħra, it-traffikar tal-bnedmin huwa attività klandestina li ma tistax tiġi osservata u mkejla faċilment. Meta jkun transkonfinali, it-traffikar spiss iseħħ minn pajjiżi inqas żviluppati għal dawk aktar żviluppati. Il-maġġoranza tal-vittmi jiġu ttraffikati ġewwa l-limiti ta’ pajjiżhom (42 %) jew tar-reġjuni tagħhom (36 %), u spiss kemm il-vittmi kif ukoll it-traffikanti jkunu ġejjin mill-istess post, jitkellmu l-istess lingwa jew ikollhom l-istess sfond etniku. It-traffikar tal-bnedmin ma jistax jiġi iżolat mill-faqar, l-aċċess għall-edukazzjoni u għas-saħħa, id-diskriminazzjoni bbażata fuq is-sess jew l-inġustizzji fuq minoranzi. Huwa aċċettat b’mod ġenerali li l-faqar, id-diskriminazzjoni bbażata fuq is-sess u l-kunflitt huma fost il-kawżi ewlenin l-aktar importanti tal-problema.

05

It-traffikar tal-bnedmin ġie ffaċilitat mill-globalizzazzjoni ekonomika. L-aċċess wiesa’ għas-suq ta’ ħaddiema irħas u prodotti rħas jimmultiplika l-opportunitajiet tat-traffikanti biex jibbenefikaw mill-isfruttament ta’ vittmi vulnerabbli. Għalhekk, il-globalizzazzjoni żiedet il-probabbiltà li l-konsumaturi ta’ oġġetti u servizzi jkunu indirettament konnessi mat-traffikar tal-bnedmin, pereżempju mat-tifel jew tifla li qed jiġu sfurzati jħitu l-blalen tal-futbol, mal-migrant imġiegħel jaħdem bħala sajjied f’kundizzjonijiet ta’ skjavitù, u maż-żagħżugħ jew żagħżugħa li jaħarbu mid-dar u jisfaw vittmi ta’ traffikar għal skopijiet sesswali viċin destinazzjoni turistika.

06

Dawn il-fatturi jispjegaw l-attenzjoni li l-midja tagħti lill-problema tat-traffikar tal-bnedmin madwar id-dinja. Fl-2016, il-Premju Pulitzer għas-Servizz Pubbliku ngħata lil grupp ta’ ġurnalisti li wettqu investigazzjoni internazzjonali dwar l-industrija tas-sajd fix-Xlokk tal-Asja, investigazzjoni li wasslet għall-ħelsien ta’ aktar minn 2000 skjav. Il-frott tal-baħar li huma qabdu seta’ jiġi ttraċċat għas-supermarkets u għall-fornituri ta’ ikel għall-annimali f’pajjiżi żviluppati.

07

Tabilħaqq, it-traffikar tal-bnedmin huwa reat li jrendi qligħ kbir. L-Uffiċċju Ewropew tal-Pulizija (Europol) jistma li r-rikavat annwali mit-traffikar tal-bnedmin huwa aktar minn EUR 29 biljun⁴. Filwaqt li n-nuqqas ta’ statistika affidabbli jagħmilha diffiċli biex jiġi aċċertat il-kobor tat-traffikar tal-bnedmin, huwa stmat li 46 miljun persuna jinsabu maqbuda f’sitwazzjonijiet ta’ skjavitù modern⁵.

08

Huwa stmat li żewġ terzi mill-għadd totali ta’ persuni li qed jgħixu fl-iskjavitù modern ġejjin mill-Asja, ir-reġjun l-aktar ippopolat fid-dinja. L-Asja hija wkoll reġjun ta’ oriġini sinifikanti għal vittmi ta’ traffikar transreġjonali⁶. Il-kxif mill-midja ta’ sitwazzjonijiet ta’ traffikar tal-bnedmin ġibed l-attenzjoni għall-ġlieda ta’ gvernijiet nazzjonali, organizzazzjonijiet internazzjonali, is-soċjetà ċivili u donaturi kontra t-traffikar tal-bnedmin fir-reġjun.

09

L-indirizzar tat-traffikar tal-bnedmin huwa sforz li jieħu fit-tul. Dan jirrikjedi bidliet fl-attitudnijiet, l-applikazzjoni tal-istat tad-dritt u soċjetà ċivili b’saħħitha. Is-sostenibbiltà ta’ proġetti xprunati mid-drittijiet umani dejjem tkun ta’ sfida billi spiss tkun teħtieġ l-appoġġ kontinwu tad-donaturi u t-trawwim ta’ impenn nazzjonali biex ikomplu jinżammu r-riżultati li jkunu nkisbu. Barra minn hekk, il-flussi u l-prattiki tat-traffikar tal-bnedmin huma dinamiċi u jistgħu jiġu adattati għal inizjattivi relatati mal-infurzar tal-liġi. Bħalma normalment jiġri għal kwistjonijiet oħra li jirrigwardaw id-drittijiet tal-bniedem, huwa biss fit-terminu twil li jkun possibbli li jiġi vvalutat jekk l-azzjonijiet li jiġu implimentati jkunux ikkontribwew għall-qerda tiegħu.

Ir-rwol tal-UE u l-atturi fil-ġlieda kontra t-traffikar tal-bnedmin lil hinn mill-fruntieri tal-UE

10

Fl-2009 ġie introdott qafas strateġiku tal-UE għall-ġlieda kontra t-traffikar tal-bnedmin f’pajjiżi terzi, meta l-Kunsill adotta d-Dokument Orjentat lejn l-Azzjoni dwar it-tisħiħ tad-dimensjoni esterna tal-UE kontra t-traffikar tal-bnedmin⁷. Dan id-dokument appella għal azzjoni kkoordinata mill-UE u l-Istati Membri, biex jipprevienu u jiġġieldu kontra t-traffikar tal-bnedmin fi sħubija ma’ pajjiżi terzi, reġjuni u organizzazzjonijiet fil-livell internazzjonali. Dan l-approċċ kien ikkonfermat mill-programm pluriennali usà rigward l-oqsma ta’ libertà, sigurtà u ġustizzja għall-2010-2014 (“il-programm ta’ Stokkolma”)⁸.

11

It-Trattat ta’ Lisbona estenda l-metodu tal-UE għal oqsma li preċedentement kienu jaqgħu taħt il-pilastru ta’ kooperazzjoni tal-pulizija u dik ġudizzjarja⁹, bidla li żiedet ir-rwol tal-Kummissjoni fil-ġlieda kontra t-traffikar tal-bnedmin. Id-Direttiva 2011/36/UE dwar il-prevenzjoni u l-ġlieda kontra t-traffikar tal-bnedmin u l-protezzjoni tal-vittmi tiegħu¹⁰ (id-Direttiva) tirrepeti l-appell għal approċċ komprensiv tal-UE li jikkombina d-dimensjonijiet interni u esterni. Id-Direttiva tappella lill-Istati Membri sabiex jiffaċilitaw ix-xogħol tal-Koordinatur ta’ Kontra t-Traffikar biex jikkontribwixxu għal “strateġija koordinata u konsolidata tal-Unjoni”.

12

Fl-2012, il-Kummissjoni adottat l-Istrateġija tal-UE 2012-2016 Għall-Qerda tat-Traffikar tal-Bnedmin (l-Istrateġija THB). Din stabbiliet il-qafas kumplessiv ta’ politika u identifikat ħames prijoritajiet li huwa meħtieġ li l-UE tiffoka fuqhom: il-protezzjoni tal-vittmi, il-prevenzjoni tal-isfruttament ta’ persuni vulnerabbli, il-prosekuzzjoni tat-traffikanti, it-tisħiħ tal-koordinazzjoni u tal-kooperazzjoni, u l-kondiviżjoni tal-għarfien. L-Istrateġija THB kienet tinkludi 40 azzjoni li kellhom jiġu implimentati mill-istituzzjonijiet tal-UE u mill-Istati Membri. L-istrateġija kontra t-traffikar tal-bnedmin għal wara l-2016 għadha trid tiġi ppreżentata (is-sitwazzjoni f’April 2017).

13

Ma hemm ebda strument ta’ finanzjament mill-UE li huwa mmirat speċifikament lejn it-traffikar tal-bnedmin. Dak ifisser li l-finanzjament huwa pprovdut minn firxa wiesgħa ta’ strumenti, minn programmi xprunati mis-sigurtà għal strumenti purament ta’ żvilupp. Kull strument għandu bażi legali differenti; filwaqt li xi strumenti jinkludu t-trattament tat-traffikar tal-bnedmin bħala objettiv speċifiku, xi oħrajn jirreferu għal problemi usà bħall-ġlieda kontra l-kriminalità organizzata, l-applikazzjoni tal-istat tad-dritt jew il-migrazzjoni illegali.

14

Kumplessivament, dan ifisser li huwa diffiċli li tinħareġ data komprensiva dwar il-finanzjament kumplessiv mogħti mill-UE biex jiġi indirizzat it-traffikar tal-bnedmin¹¹. Rapport tal-Kummissjoni fl-2016 dwar il-progress li sar fil-ġlieda kontra t-traffikar tal-bnedmin¹² josserva li, bejn l-2011 u l-2013, id-Direttorat Ġenerali għall-Kooperazzjoni Internazzjonali u l-Iżvilupp (DĠ DEVCO) iffinanzja 53 proġett b’ammont ta’ bejn wieħed u ieħor EUR 37 miljun. Ir-rapport ma jipprovdix informazzjoni dwar il-proġetti li huma mmaniġġjati mid-Direttorat Ġenerali għall-Viċinat u n-Negozjati għat-Tkabbir (DĠ NEAR) jew mis-Servizz tal-Istrumenti tal-Politika Barranija, u lanqas ma jipprovdi informazzjoni dwar jekk il-finanzjament li huwa mmaniġġjat mid-Direttorat Ġenerali għall-Migrazzjoni u l-Affarijiet Interni bbenefikax pajjiżi terzi.

15

Rigward l-Asja t’Isfel/ix-Xlokk tal-Asja, id-DĠ DEVCO huwa d-dipartiment prinċipali li huwa responsabbli għall-ġestjoni tal-assistenza għall-iżvilupp. L-istrumenti l-aktar importanti li jintużaw mid-DĠ DEVCO bħala appoġġ għal proġetti relatati mat-traffikar tal-bnedmin huma l-Istrument tal-Kooperazzjoni għall-Iżvilupp (DCI) u l-Istrument Ewropew għad-Demokrazija u għad-Drittijiet tal-Bniedem (EIDHR).

Ambitu u approċċ tal-awditjar

16

Ir-rispons tal-UE għat-traffikar tal-bnedmin tista’ tieħu ħafna forom, eż. assistenza finanzjarja, djalogu ta’ politika jew azzjonijiet multilaterali¹³. Għalhekk, l-UE għandha l-opportunità li tuża firxa sħiħa ta’ għodod, strumenti u riżorsi biex l-azzjoni esterna tagħha fil-ġlieda kontra t-traffikar tal-bnedmin tkun aktar konsistenti, aktar effettiva u aktar strateġika. Dan jissejjaħ l-approċċ komprensiv tal-UE, li jindirizza wkoll ir-responsabbiltà kondiviża tal-istituzzjonijiet tal-UE u tal-Istati Membri¹⁴.

17

Aħna ddeċidejna li niffukaw l-awditu fuq ir-reġjuni tal-Asja t’Isfel u tax-Xlokk tal-Asja minħabba l-firxa estensiva ta’ traffikar tal-bnedmin f’dawn ir-reġjuni u l-prijoritajiet li esprima l-Kunsill. L-Indiċi Globali tal-Iskjavitù 2016 sab li hemm kważi 46 miljun vittma tat-traffikar tal-bnedmin madwar id-dinja, kważi żewġ terzi fl-Asja/mill-Asja; l-Asja t’Isfel u x-Xlokk tal-Asja¹⁵ flimkien jinkludu għadd relattivament kbir ta’ pajjiżi li ġew identifikati mill-Kunsill bħala prijoritajiet fit-traffikar tal-bnedmin.

18

L-awditu eżamina jekk l-appoġġ mogħti mill-UE għall-ġlieda kontra t-traffikar tal-bnedmin fl-Asja t’Isfel/ix-Xlokk tal-Asja kienx effettiv. Għall-iskop ta’ din il-valutazzjoni, l-awditu wieġeb is-sottomistoqsijiet li ġejjin:

1. L-UE kellha approċċ komprensiv għat-traffikar tal-bnedmin fl-Asja t’Isfel/ix-Xlokk tal-Asja?
2. Il-proġetti tal-UE kkontribwew b’mod effettiv għall-indirizzar tat-traffikar tal-bnedmin fl-Asja t’Isfel/ix-Xlokk tal-Asja?

19

Aħna identifikajna u eżaminajna l-proġetti kollha relatati mat-traffikar tal-bnedmin li ġew implimentati fl-Asja t’Isfel/ix-Xlokk tal-Asja matul il-perjodu 2009-2015 (ara l-Anness I), b’finanzjament totali ta’ EUR 31 miljun. L-2009 kienet is-sena meta l-UE adottat l-ewwel qafas strateġiku tagħha għall-ġlieda kontra t-traffikar tal-bnedmin f’pajjiżi terzi (id-Dokument Orjentat lejn l-Azzjoni, ara l-paragrafu 10). Il-Kummissjoni pprovditilna lista ta’ proġetti relatati mat-traffikar tal-bnedmin fl-Asja t’Isfel/ix-Xlokk tal-Asja (22 proġett b’total ta’ EUR 13-il miljun) li kkomplementajna bi proġetti addizzjonali f’dawn ir-reġjuni li għandhom relazzjoni ċara mat-traffikar tal-bnedmin (13-il proġett addizzjonali b’total ta’ EUR 18-il miljun). Il-35 proġett koprew 10 mid-19-il pajjiż f’dawn ir-reġjuni¹⁶.

20

Ix-xogħol tal-awditjar tagħna kien jikkonsisti f’analiżi fl-uffiċċju ta’ dokumentazzjoni tal-Kummissjoni u tas-Servizz Ewropew għall-Azzjoni Esterna (SEAE), intervisti ma’ persunal mill-Kummissjoni u mis-SEAE, u żjara tal-awditjar fit-Tajlandja li hija ċ-ċentru prinċipali tal-attività tan-NU fl-Asja u fil-Paċifiku. L-objettiv tal-missjoni kien li niġbru aktar informazzjoni u nintervistaw lill-persunal tad-delegazzjoni tal-UE, rappreżentanti tal-awtoritajiet nazzjonali, benefiċjarji, donaturi oħra u organizzazzjonijiet tas-soċjetà ċivili. Il-missjoni serviet ukoll biex isiru laqgħat mar-rappreżentanti tal-kwartieri reġjonali tal-aġenziji rilevanti tan-NU.

Osservazzjonijiet

Fil-biċċa l-kbira, il-qafas ta’ politika tal-UE f’dak li jirrigwarda t-traffikar tal-bnedmin jipprevedi approċċ komprensiv għall-indirizzar tat-traffikar tal-bnedmin, għalkemm xi aspetti għadhom mhumiex żviluppati għalkollox

Il-qafas ta’ politika tal-UE f’dak li jirrigwarda t-traffikar tal-bnedmin huwa stipulat f’għadd ta’ dokumenti interkonnessi

21

F’din it-taqsima, aħna neżaminaw jekk l-UE bbażatx l-istrateġija tagħha fuq data rilevanti u affidabbli dwar it-traffikar tal-bnedmin; jekk issettjatx miri, kif ukoll prijoritajiet ċari u rilevanti li jkopru aspetti kriminali u aspetti ta’ drittijiet tal-bniedem; u jekk indirizzatx it-traffikar tal-bnedmin bħala prijorità fl-istrateġiji nazzjonali dwar id-drittijiet tal-bniedem.

L-Istrateġija THB hija dokument ta’ livell għoli li jipprovdi gwida limitata dwar id-dimensjoni esterna tal-ġlieda kontra t-traffikar tal-bnedmin

22

It-tħejjija tal-istrateġija kontra t-traffikar tal-bnedmin ma kienx fiha data statistika suffiċjenti u kumparabbli. Minbarra d-diffikultajiet inerenti biex tinkiseb data dwar kwalunkwe attività kriminali¹⁷, ma hemm ebda kondiviżjoni ta’ informazzjoni ma’ pajjiżi fl-Asja t’Isfel/ix-Xlokk tal-Asja dwar it-traffikar tal-bnedmin.

23

L-Istrateġija THB tinkludi 40 azzjoni, maqsumin bejn il-5 prijoritajiet (il-protezzjoni tal-vittmi, il-prevenzjoni, il-prosekuzzjoni tat-traffikanti, it-tisħiħ tal-koordinazzjoni u tal-kooperazzjoni, u l-kondiviżjoni tal-għarfien). Waħda biss mill-40 azzjoni tittratta d-dimensjoni esterna tal-ġlieda kontra t-traffikar tal-bnedmin. Sa April 2017, il-Kummissjoni kienet għadha ma ppubblikatx evalwazzjoni komprensiva tar-riżultati li nkisbu taħt l-Istrateġija THB; u lanqas ma ppreżentat qafas ta’ politika kontra t-traffikar għal wara l-2016¹⁸.

24

L-Istrateġija THB ma kinitx tinkludi objettivi u miri speċifiċi, li kienu jkunu utli għat-tħejjija ta’ azzjonijiet iffukati fuq il-post għall-evalwazzjoni tar-riżultati miksuba. L-Istrateġija THB ddikjarat ukoll li “lista ta’ pajjiżi u reġjuni terzi prijoritarji għal sħubijiet futuri għandha tiġi żviluppata. Fl-2013 fil-pajjiżi u reġjuni terzi prijoritarji jistgħu jiġu kkunsidrati mekkaniżmi ta’ kooperazzjoni f’delegazzjonijiet tal-UE dwar it-traffikar tal-bnedmin sabiex tissaħħaħ il-kooperazzjoni, jinħolqu s-sħubijiet u titjieb il-koordinazzjoni u l-koerenza”.

25

F’Diċembru 2012, il-Kunsill qabel dwar lista bħal din ta’ reġjuni u pajjiżi prijoritarji, ibbażata fuq proposta mill-Kummissjoni¹⁹. Meta jitqies il-finanzjament limitat involut, aħna sibna li l-prijoritizzazzjoni ġeografika ma kinitx speċifika biżżejjed biex tiggwida l-azzjoni, billi l-biċċa l-kbira mill-pajjiżi fil-fażi ta’ żvilupp ġew inklużi jew individwalment jew inkella bħala parti minn reġjun ġeografiku. Barra minn hekk, ma sar ebda segwitu tar-riżultati li nkisbu b’dan l-approċċ. Dan lanqas ma kien jinkludi aġġornamenti regolari jew konferma dwar jekk il-prijoritajiet ġeografiċi kinux għadhom rilevanti. Rigward l-Asja t’Isfel/ix-Xlokk tal-Asja, il-prijoritajiet ġeografiċi jinkludu l-Vjetnam, ir-reġjun tar-Rotta tal-ħarir²⁰ (b’mod partikolari l-Indja) u l-pajjiżi tax-Xlokk tal-Asja (b’mod partikolari t-Tajlandja, il-Laos, il-Kambodja u l-Filippini).

L-Istrateġija THB hija kkomplementata minn dokumenti oħra ta’ politika

26

It-traffikar tal-bnedmin huwa fenomenu kumpless li jista’ jiġi indirizzat minn angoli differenti. Rigward il-perspettiva ta’ drittijiet tal-bniedem, xi dokumenti rilevanti biex jikkomplementaw l-approċċ tal-UE għat-traffikar tal-bnedmin huma l-Aġenda Ewropea dwar il-Migrazzjoni; l-Aġenda Ewropea dwar is-Sigurtà; il-Pjan ta’ Azzjoni tal-UE kontra t-Traffikar tal-Migranti 2015-2020; il-Pjan ta’ Azzjoni dwar id-Drittijiet tal-Bniedem u d-Demokrazija 2015-2019; il-qafas il-ġdid għall-attivitajiet tal-UE dwar l-ugwaljanza bejn is-sessi u t-tisħiħ tal-pożizzjoni tan-nisa fir-relazzjonijiet esterni tal-UE għall-2016-2020, u l-Involviment Strateġiku tal-UE għall-Ugwaljanza bejn is-Sessi 2016-2019.

27

L-UE hija impenjata li tippromwovi d-drittijiet tal-bniedem fl-oqsma kollha tal-azzjoni esterna tagħha, mingħajr eċċezzjoni²¹. Meta taħdem ma’ sħab bilaterali, il-mekkaniżmu preferut tal-UE huwa li tiżviluppa approċċi mfasslin apposta li jiġu riflessi fi strateġij lokali tal-pajjiż dwar id-drittijiet tal-bniedem²². Dawn l-istrateġiji huma maħsuba biex jiġu integrati mill-UE u mill-Istati Membri, iservu bħala bażi għad-djalogu dwar id-drittijiet tal-bniedem u jingħataw segwitu regolari mid-delegazzjonijiet u mill-amministrazzjoni ċentrali tal-UE f’rapporti u analiżijiet annwali tal-progress.

28

L-UE żviluppat strateġiji dwar id-drittijiet tal-bniedem għall-pajjiżi kollha li huma koperti mill-awditu. L-Istati Membri kkontribwew b’mod attiv għal dawn l-istrateġiji, mill-istadju tat-tħejjija sa dak tal-approvazzjoni. L-involviment tal-Istati Membri kien jinkludi rappreżentanti għall-Grupp ta’ Ħidma tal-Kunsill dwar l-Asja u l-Oċeanja (COASI) u għall-Grupp ta’ Ħidma dwar id-Drittijiet tal-Bniedem (COHOM), li huma l-gruppi ta’ ħidma responsabbli biex jittrattaw kwistjonijiet relatati mal-Asja jew mad-drittijiet tal-bniedem inġenerali²³. Il-parteċipazzjoni taż-żewġ gruppi ta’ ħidma ssalvagwardjat il-konsistenza reġjonali u tematika.

29

Kwistjonijiet dwar it-traffikar tal-bnedmin ġeneralment jiġu inklużi fl-istrateġiji dwar id-drittijiet tal-bniedem bil-mod li s-SEAE jqis bħala l-aktar xieraq u aċċettabbli għall-UE u għall-pajjiż kontroparti, biex jiġi żgurat bilanċ effiċjenti bejn il-kwistjonijiet dwar it-traffikar tal-bnedmin u kwistjonijiet prijoritarji oħra. L-istrateġiji dwar id-drittijiet tal-bniedem li aħna eżaminajna kienu jindirizzaw b’mod adegwat il-kwistjonijiet rilevanti dwar it-traffikar tal-bnedmin, fit-taqsimiet li jittrattaw in-nisa, it-tfal jew id-drittijiet tal-minoranzi.

30

Rigward il-ġlieda kontra t-traffikar tal-bnedmin bħala reat, din il-perspettiva ġiet indirizzata primarjament mir-rapport tal-UE tal-2013 dwar il-Valutazzjoni tat-Theddid Gravi tal-Kriminalità Organizzata, li identifika t-traffikar tal-bnedmin bħala theddida ewlenija għall-UE (valutazzjoni li ġiet ikkonfermata fl-2017²⁴). Dan wassal għall-approvazzjoni, mill-Kunsill, ta’ Pjan Strateġiku Pluriennali li huwa speċifiku għat-traffikar tal-bnedmin, kif ukoll għal Pjanijiet annwali ta’ Azzjoni Operazzjonali. Dawn id-dokumenti jindirizzaw il-perspettiva kriminali tat-traffikar tal-bnedmin, li mhijiex koperta mill-Istrateġija THB. Huma jiffukaw fuq l-aspett tal-infurzar tal-liġi fil-ġlieda kontra t-traffikar tal-bnedmin fl-Ewropa, u għalhekk jinkludu għadd limitat ta’ azzjonijiet f’pajjiżi terzi. Ebda waħda minn dawn l-azzjonijiet ma hija relatata ma’ pajjiżi fl-Asja t’Isfel/ix-Xlokk tal-Asja.

Il-qafas ta’ politika tal-UE huwa appoġġat minn varjetà ta’ għodod: Id-djalogu dwar id-drittijiet tal-bniedem huwa partikolarment utli, filwaqt li għodod oħra jistgħu jintużaw aktar fil-ġlieda kontra t-traffikar tal-bnedmin fl-Asja t’Isfel/ix-Xlokk tal-Asja

31

F’din it-taqsima, aħna neżaminaw jekk l-użu ta’ diversi għodod (inklużi l-programmazzjoni, il-koordinazzjoni u d-djalogu dwar id-drittijiet tal-bniedem) iffaċilitawx it-twettiq ta’ azzjoni komprensiva. Aħna nivvalutaw ukoll jekk ġewx konklużi sħubiji relatati mat-traffikar tal-bnedmin, ma’ pajjiżi terzi, reġjuni u organizzazzjonijiet internazzjonali fl-Asja t’Isfel/ix-Xlokk tal-Asja.

L-UE pprovdiet assistenza finanzjarja għall-ġlieda kontra t-traffikar tal-bnedmin fl-Asja t’Isfel/ix-Xlokk tal-Asja, iżda l-programmazzjoni ma kinitx tinkludi loġika u direzzjoni ġenerali u ma ntużax il-potenzjal kollu tagħha

32

Għad ma hemm ebda strument ta’ finanzjament mill-UE li huwa mmirat speċifikament lejn it-traffikar tal-bnedmin. Dan ifisser li l-istrumenti eżistenti jridu jintużaw b’mod ikkoordinat biex jiffinanzjaw attivitajiet f’dan il-qasam. Il-proġetti awditjati ġew iffinanzjati permezz tal-Istrument tal-Kooperazzjoni għall-Żvilupp (DCI) u tal-Istrument Ewropew għad-Demokrazija u għad-Drittijiet tal-Bniedem (EIDHR), li jistgħu jintużaw biex jiffinanzjaw attivitajiet marbutin mad-dimensjoni tad-drittijiet tal-bniedem f’dak li jirrigwarda t-traffikar tal-bnedmin fl-Asja t’Isfel/ix-Xlokk tal-Asja. Attwalment, il-Kummissjoni qed teżamina dawn l-istrumenti ta’ finanzjament estern (l-evalwazzjonijiet ta’ nofs it-terminu tad-DCI u tal-EIDHR), u hija mistennija tiffinalizza l-eżamnar tagħha f’nofs l-2017.

33

Il-Kummissjoni, is-SEAE u l-Istati Membri jipparteċipaw fid-definizzjoni ta’ strateġiji ta’ għajnuna, prijoritajiet u allokazzjonijiet ta’ strumenti finanzjarji permezz tal-proċess ta’ programmazzjoni. Il-pajjiżi kollha eżaminati inkludew mill-inqas dokument ta’ strateġija wieħed li ġie adottat wara l-Istrateġija THB. Id-dokumenti ta’ programmazzjoni għall-10 pajjiżi koperti mill-awditu ma jinkludux referenzi għall-Istrateġija THB jew għall-prijoritajiet ġeografiċi tal-Kunsill.

34

Barra minn hekk, ma hemmx data komprensiva dwar l-appoġġ finanzjarju li l-UE pprovdiet għall-ġlieda kontra t-traffikar tal-bnedmin fil-perjodu 2009-2015²⁵. Il-Kummissjoni żżomm database ta’ proġetti relatati mat-traffikar tal-bnedmin (id-database tas-sit web iddedikat għall-ġlieda kontra t-traffikar). Madankollu, aħna sibna li d-database ma kinitx kompluta bħala sors ta’ informazzjoni dwar il-finanzjament. Għaldaqstant, hija ma tistax tagħti appoġġ effiċjenti lil dawk li jieħdu d-deċiżjonijiet u lill-prattikanti rilevanti fl-issettjar ta’ prijoritajiet u ta’ azzjonijiet direzzjonali. Dan huwa dovut għan-nuqqas ta’ kriterji ċari li jiddefinixxu x’jikkostitwixxi azzjoni rilevanti għat-traffikar tal-bnedmin (ara l-Anness III)²⁶. Dan ifisser li ma nistgħux nivvalutaw jekk id-distribuzzjoni ta’ fondi bejn ir-reġjuni tikkonformax mal-prijoritajiet tal-Kunsill.

35

Il-biċċa l-kbira mill-appoġġ finanzjarju tal-UE għall-ġlieda kontra t-traffikar tal-bnedmin fl-Asja t’Isfel/ix-Xlokk tal-Asja jsir permezz ta’ għotjiet mill-UE (ara l-paragrafu 46). Fl-2014, il-Kummissjoni tat struzzjonijiet formali lid-delegazzjonijiet tal-UE biex iżidu d-daqs minimu tal-għotjiet għal sejħiet nazzjonali għal proposti, sabiex inaqqsu l-għadd ta’ kuntratti²⁷. Il-Kummissjoni tistenna li l-ħidma ma’ NGOs akbar u aktar professjonali tiżgura ġestjoni aħjar u tfassil aħjar. Madankollu, din id-deċiżjoni ma tirrikonoxxix bis-sħiħ li l-għadd ta’ NGOs li huma attivi fil-ġlieda kontra t-traffikar tal-bnedmin ivarja minn pajjiż għall-ieħor u li f’xi pajjiżi jista’ jkun diffiċli li jiġu ffurmati gruppi bl-esperjenza neċessarja.

Id-djalogu dwar id-drittijiet tal-bniedem wera li huwa għodda utli fl-indirizzar tat-traffikar tal-bnedmin

36

Strumenti ta’ assistenza għall-iżvilupp jistgħu jindirizzaw it-traffikar tal-bnedmin mill-perspettiva ta’ drittijiet tal-bniedem. Wieħed mill-għodod l-aktar importanti tal-UE għall-promozzjoni tad-drittijiet tal-bniedem huwa d-djalogi regolari ma’ pajjiżi sħab. Dawn id-djalogi huma għodod diplomatiċi li jiffaċilitaw id-diskussjoni dwar kwistjonijiet sensittivi li jirrigwardaw id-drittijiet tal-bniedem. L-effettività tad-djalogu dwar id-drittijiet tal-bniedem tinsab fil-kapaċità tiegħu li jalimenta oqsma ta’ politika oħra, bħall-kooperazzjoni għall-iżvilupp u l-kummerċ, u djalogi ta’ politika ta’ livell ogħla.

37

Id-djalogu ta’ politika jista’ jiġi ffaċilitat b’appoġġ konkret permezz ta’ strumenti ta’ assistenza teknika: l-istrument ta’ Assistenza Teknika u Skambju ta’ Informazzjoni u l-Faċilità ta’ Appoġġ għad-Djalogu ta’ Politika.

38

L-UE jkollha djalogi dwar id-drittijiet tal-bniedem ma’ aktar minn 40 pajjiż, inklużi l-10 pajjiżi fl-Asja t’Isfel/ix-Xlokk tal-Asja li huma koperti minn dan l-awditu. Dawn id-djalogi jiġu stabbiliti skont il-Linji Gwida tal-UE għad-Djalogi dwar id-Drittijiet tal-Bniedem, li jagħtu rwol importanti lid-delegazzjonijiet tal-UE fil-fażijiet ta’ tħejjija, ta’ implimentazzjoni u ta’ komunikazzjoni. Għall-10 pajjiżi li huma koperti mill-awditu, sar djalogu dwar id-drittijiet tal-bniedem f’intervalli regolari, li ta opportunitajiet lill-UE biex tqajjem kwistjonijiet rilevanti relatati mat-traffikar tal-bnedmin. Ir-rappurtar intern dwar id-diskussjonijiet li jsiru matul id-djalogu dwar id-drittijiet tal-bniedem jintuża mis-SEAE bħala referenza għall-programmazzjoni tal-EIDHR.

39

Qabel kull djalogu, il-pożizzjoni tal-UE tiġi stabbilita mid-dipartimenti tas-SEAE li huma responsabbli għar-reġjun rispettiv u għad-drittijiet tal-bniedem. Dan spiss ikun jeħtieġ li s-suġġetti jiġu pprijoritizzati. Għall-10 pajjiżi kollha, kien hemm mill-inqas djalogu wieħed li kien jinkludi mill-inqas aspett wieħed relatat mat-traffikar tal-bnedmin. Aħna sibna li l-parteċipazzjoni tad-dipartimenti rilevanti inkarigati mid-drittijiet tal-bniedem fil-kwartieri ġenerali tas-SEAE ffaċilitat il-konsistenza bejn l-inizjattivi multilaterali kontra t-traffikar tal-bnedmin u l-objettivi strateġiċi tal-UE relatati mad-drittjiet tal-bniedem, għall-pajjiżi fl-Asja t’Isfel/ix-Xlokk tal-Asja.

L-UE appoġġat l-inizjattivi reġjonali fl-ogħla livell, iżda għadha daħlitx fi sħubiji ddedikati għall-ġlieda kontra t-traffikar tal-bnedmin ma’ ebda wieħed mill-pajjiżi fl-Asja t’Isfel/ix-Xlokk tal-Asja

40

Waħda mis-sħab ewlenin tal-UE fir-reġjun hija l-Assoċjazzjoni tan-Nazzjonijiet tax-Xlokk tal-Asja (ASEAN), li l-Kunsill iqis bħala “kontributur ewlieni għall-istabbiltà fir-reġjun Asja-Paċifiku”²⁸. F’dan il-kuntest, l-UE preċedentement appoġġat l-iżvilupp ta’ mekkaniżmu tal-ASEAN favur id-drittijiet tal-bniedem kif ukoll l-istabbiliment tal-Kummissjoni Intergovernattiva tal-ASEAN għad-Drittijiet tal-Bniedem. Fis-27 Summit tal-ASEAN fl-2015²⁹, ġiet approvata Konvenzjoni tal-ASEAN Kontra t-Traffikar ta’ Persuni, Speċjalment ta’ Nisa u Tfal, li hija legalment vinkolanti. Wara r-ratifika mill-minimu ta’ sitt pajjiżi³⁰, il-Konvenzjoni daħlet fis-seħħ f’Marzu 2017.

41

Il-Proċess ta’ Bali huwa inizjattiva biex jiġu indirizzati problemi speċifiċi marbutin mal-faċilitazzjoni ta’ dħul klandestin u t-traffikar tal-bnedmin u mal-migrazzjoni irregolari fir-reġjun. Dan jitmexxa mill-Indoneżja u mill-Awstralja u għandu aktar minn 48 membru, inklużi l-Kummissarju Għoli tan-Nazzjonijiet Uniti għar-Rifuġjati, l-Organizzazzjoni Internazzjonali għall-Migrazzjoni (IOM) u l-UNODC. Il-Kummissjoni u 12-il Stat Membru tal-UE jipparteċipaw bħala osservaturi. Għalkemm il-Proċess ta’ Bali ffoka prinċipalment fuq problemi ta’ migrazzjoni (huwa għandu roster ta’ esperti dwar il-migrazzjoni, iżda ebda roster ta’ esperti dwar it-traffikar tal-bnedmin), huwa stabbilixxa Grupp ta’ Ħidma dwar it-Traffikar tal-Bnedmin li ltaqa’ għall-ewwel darba f’Marzu 2015.

42

In-nuqqas ta’ komunità b’saħħitha ta’ esperti dwar il-ġlieda kontra t-traffikar tal-bnedmin affettwat il-promozzjoni tal-kondiviżjoni tal-għarfien. Il-Kummissjoni ħejjiet lista ta’ punti fokali ddedikati għat-traffikar tal-bnedmin³¹, iżda din ma kinitx kompleta (l-Indoneżja, il-Myanmar, in-Nepal, il-Pakistan u t-Tajlandja ma kinux inklużi). Dawn il-punti fokali ngħataw biss taħriġ inizjali u pakketti ta’ informazzjoni. Id-delegazzjonijiet tal-UE għamlu użu mill-istrutturi eżistenti tal-punti fokali ddedikati għad-drittijiet tal-bniedem. Filwaqt li dan kien jagħmel sens mill-perspettiva tal-effiċjenza, dan fisser li l-għarfien espert dwar it-traffikar tal-bnedmin li ġie żviluppat kien inqas speċjalizzat.

43

Il-pajjiżi kollha fl-Asja t’Isfel/ix-Xlokk tal-Asja huma parti għall-Protokoll ta’ Palermo (ara l-paragrafu 2), bl-eċċezzjoni tal-Bangladesh, il-Bhutan, il-Laos u n-Nepal³². L-Istrateġija THB tappella għall-użu ta’ sħubiji biex jiġi miġġieled it-traffikar tal-bnedmin lil hinn mill-fruntieri tal-UE. L-UE għandha relazzjonijiet u sħubiji li ilhom stabbiliti għal żmien twil mal-fora tal-ASEAN u tal-Laqgħa Asja-Ewropa (ASEM), minbarra djalogi bilaterali. L-UE tuża dawn il-fora bħala strutturi għall-ġlieda kontra t-traffikar tal-bnedmin. Sa issa għadhom ma nħolqux sħubiji ġodda, bejn l-UE u xi wieħed mill-pajjiżi fl-Asja t’Isfel/ix-Xlokk tal-Asja, li huma ddedikati għall-ġlieda kontra t-traffikar tal-bnedmin.

Minkejja d-dgħufijiet identifikati, il-biċċa l-kbira mill-proġetti relatati mat-traffikar tal-bnedmin taw riżultati pożittivi, għalkemm is-sostenibbiltà kienet problematika

Il-qafas għall-għażla tal-proġetti ma ffaċilitax l-użu ta’ approċċ komprensiv u t-tfassil tal-proġetti kellu xi dgħufijiet, b’mod partikolari fil-formulazzjoni tal-objettivi u l-indikaturi

44

F’din it-taqsima, aħna neżaminaw jekk il-proġetti kinux konsistenti mal-prijoritajiet u l-azzjonijiet strateġiċi tal-politika tal-UE, jekk il-proġetti kellhomx objettivi u indikaturi adegwati³³ u jekk id-dgħufijiet fit-tfassil ġewx indirizzati mill-Kummissjoni fil-ħin.

Il-proġetti kienu konsistenti mal-Istrateġija THB ġenerali, iżda ġew ittrattati bħala eżerċizzji ta’ darba

45

Aħna sibna li l-35 proġett kollha li huma relatati mat-traffikar tal-bnedmin, u li aħna eżaminajna, kienu konsistenti mal-Istrateġija THB (approvata fl-2012); mal-istrateġiji rilevanti tal-UE, kemm l-istrateġija għall-pajjiż kif ukoll l-istrateġija tal-pajjiż dwar id-drittijiet tal-bniedem; u mad-dokumenti ta’ programmazzjoni għal strumenti ta’ għajnuna speċifiċi. Il-proġetti kienu fil-biċċa l-kbira ffukati fuq aspetti tad-drittijiet tal-bniedem u enfasizzaw, b’mod konsistenti, id-drittijiet u l-benessri tan-nisa u t-tfal.

46

Il-proġetti ntgħażlu primarjament permezz ta’ sejħiet għal proposti (32 minn 35 proġett). Il-proposti ġew evalwati u tqabblu ma’ proposti oħra li ntbagħtu b’rispons għall-istess sejħa għal proposti. Il-mekkaniżmu ta’ tqabbil kellu l-għan li tintgħażel l-aħjar proposta għal proġett f’kull sejħa, iżda ma qiesx is-sinerġiji u l-interazzjoni possibbli ma’ proġetti jew għodod oħra.

47

Billi l-proġetti ntgħażlu permezz ta’ sejħiet, kull għażla kienet eżerċizzju ta’ darba fejn il-Kummissjoni kellha opportunità limitata (f’termini ta’ żmien u ta’ gwida³⁴) biex tiżgura li l-portafoll tagħha ta’ proġetti kien jindirizza l-ħames prijoritajiet kollha li huma msemmija fl-Istrateġija THB (ara l-paragrafu 22). Aħna sibna li ebda wieħed mill-proġetti fil-kampjun ma kkonċentra primarjament fuq il-prosekuzzjoni jew il-kondiviżjoni tal-għarfien, filwaqt li l-maġġoranza kkonċentraw fuq il-prevenzjoni u/jew il-protezzjoni (31 proġett b’kollox). Proġett wieħed biss ³⁵ indirizza l-komponent kriminali tat-traffikar tal-bnedmin, inklużi attivitajiet biex tingħata aktar setgħa lill-uffiċjali tal-infurzar tal-liġi biex jiġġieldu r-reati tat-traffikar tal-bnedmin billi jaqbdu u jisfaxxaw in-netwerks kriminali.

Ħafna proġetti kellhom objettivi u/jew indikaturi dgħajfin

48

Ħafna proġetti (23) kellhom problemi fir-rigward tad-definizzjoni tal-objettivi u/jew l-indikaturi tagħhom³⁶. L-objettivi spiss ma kinux speċifiċi biżżejjed jew ma setgħux jitkejlu biżżejjed (14-il proġett u 8 proġetti rispettivament). L-indikaturi kienu partikolarment dgħajfin f’termini ta’ robustezza, kredibbiltà u faċilità ta’ użu, u kultant ġew ikkwantifikati b’mod li ma kienx pertinenti.

49

Għalkemm għal 21 proġett kien ippjanat li jsiru studji ta’ referenza, l-effettività u l-valur miżjud ta’ dawn l-istudji kienu mħallta. F’żewġ każijiet, il-valuri ta’ referenza ma kinux utli għas-sistema ta’ monitoraġġ intern jew għat-titjib tal-logframe ta’ intervent minħabba li nkisbu tard wisq, ma kinux iddettaljati biżżejjed jew ma kinux allinjati kompletament mal-indikaturi tal-proġetti³⁸. Madankollu, għal erba’ proġetti (Bangladesh1, Bangladesh3, Nepal2 u Nepal3), il-valuri ta’ referenza kienu lesti fil-bidu tal-proġett u servew bħala punt tat-tluq utli għall-monitoraġġ u l-evalwazzjoni tar-riżultati tal-proġetti.

Xi dgħufijiet fit-tfassil tal-proġetti ma ġewx ikkoreġuti fil-ħin mill-Kummissjoni, b’mod partikolari qabel ma ġie ffirmat il-kuntratt tal-għotja

50

Ir-riskji u t-tagħlimiet meħuda ġew riflessi fit-tfassil tal-biċċa l-kbira mill-proġetti, iżda kien għal seba’ proġetti biss li ġew ivvalutati xenarji dwar il-probabbiltà ta’ riskju (jiġifieri l-probabbiltà li jseħħu riskji u l-impatt tagħhom jekk iseħħu)³⁹. Għal bosta proġetti, id-dgħufijiet fil-logframe ġew osservati mill-evalwaturi⁴⁰ fl-istadju tal-proposta, iżda ma ttiħdux inkunsiderazzjoni kompletament meta l-proġett ġie implimentat.

1. Fil-każ tal-proġett Indonesia1, wieħed mill-evalwaturi tal-proposta sħiħa ġibed l-attenzjoni għal indikaturi dgħajfin, iżda dan ma kienx rifless fir-rapport ta’ evalwazzjoni u l-indikaturi ma ġewx modifikati.
2. L-evalwaturi tal-proġett Philippines2 osservaw li l-formulazzjoni tal-objettivi speċifiċi kienet dgħajfa (sempliċiment pletora ta’ attivitajiet, simili ħafna għar-riżultati mistennija); madankollu, dan ma ġiex indirizzat qabel ma ġie ffirmat il-kuntratt tal-għotja.
3. L-evalwatur tal-proġett Nepal3 osserva li ma kien hemm ebda stħarriġ ta’ referenza jew valutazzjoni komparattiva, u li l-logframe kien imissu jitfassal mill-ġdid b’indikaturi kwantitattivi adegwati. F’dan il-każ, l-istħarriġ ta’ referenza sar bħala attività tal-proġett u l-logframe ġie rivedut qabel it-tieni rapport interim; madankollu, xi wħud mill-indikaturi baqgħu mhux kwantifikabbli u suġġettivi⁴¹.

51

F’każ wieħed (il-proġett Bangladesh5), id-delegazzjoni tal-UE indirizzat il-logframe dgħajjef waqt li l-proġett kien qed jiġi implimentat, u talbet lill-benefiċjarju jikkoreġih. Madankollu, il-bidliet saru biss sitt xhur wara li l-proġett intemm f’April 2016; li jfisser li l-intervent tad-delegazzjoni sar tard wisq (id-durata tal-proġett kienet ta’ tliet snin).

52

Ir-riżultati mistennija tal-biċċa l-kbira mill-proġetti kienu relattivament realistiċi fl-istadju tat-tfassil⁴². Madankollu, kien hemm eċċezzjonijiet:

1. Fil-proġett Bangladesh1, matul id-diskussjonijiet mal-Kummissjoni dwar l-estensjoni tal-proġett, deher ċar li t-tfassil tal-proġett kien ambizzjuż wisq, speċjalment fir-rigward tal-użu ta’ database. Billi l-proġett twettaq f’żoni remoti, in-nuqqas ta’ elettriku u l-problemi bil-konnettività tal-Internet kienu ostakli importanti għall-implimentazzjoni b’suċċess tal-attivitajiet tal-proġett, fatt li ma ngħatax biżżejjed importanza fl-istadju tat-tfassil tal-proġett.
2. Bosta attivitajiet li kienu inklużi fil-proġett India1 u li mbagħad ġew ikkanċellati kienu ambizzjużi żżejjed fl-istadju tat-tfassil: il-proġett kellu l-intenzjoni li jeżamina xi emendi legali li kienu mistennija u li kienu diġà ġew posposti ripetutament (mill-2004), iżda dawn ma ġewx adottati matul l-implimentazzjoni tal-proġett (2011-2014).

L-implimentazzjoni tal-proġetti kienet imxekkla minn limitazzjonijiet lokali u minn dewmien

53

F’din it-taqsima aħna neżaminaw, fost affarijiet oħra, jekk il-Kummissjoni mmonitorjatx il-proġetti b’mod adegwat u jekk irreaġietx għal bidliet mhux mistennija b’mod f’waqtu, kif ukoll jekk il-proġetti ġewx implimentati skont il-pjan (iż-żmien, il-baġit u l-attivitajiet).

Il-Kummissjoni mmonitorjat il-proġetti b’mod adegwat, iżda l-implimentazzjoni kienet affettwata minn sjieda limitata fil-livell nazzjonali, minn bidliet fis-sekwenza ta’ attivitajiet mis-sħab, u minn dewmien

54

Aħna sibna li l-proġetti ġew immonitorjati b’mod adegwat mill-Kummissjoni, li wettqet żjarat fuq il-post għal 26 proġett u “monitoraġġ orjentat lejn ir-riżultati”⁴³ għal 4 proġetti. B’mod ġenerali, il-Kummissjoni ħadet azzjoni korrettiva f’waqtha biex tappoġġa l-implimentazzjoni mingħajr xkiel tal-proġetti⁴⁴. Madankollu, aħna sibna li l-valutazzjoni kontinwa tas-sostenibbiltà għal 14-il proġett kienet dgħajfa (ara l-paragrafu 66), minkejja li, għall-inqas f’xi każijiet, dan kien diġà jidher ċar fl-istadju tat-tfassil.

55

Sa Lulju 2016, kienu ġew ikkompletati 27 mill-35 proġett. Madankollu, il-perjodu ta’ implimentazzjoni għal 10 proġetti⁴⁵ ġie estiż b’bejn 3 xhur u 12-il xahar. Nofs l-estensjonijiet kienu relatati ma’ fatturi esterni bħal approvazzjonijiet tardivi mill-awtoritajiet, inkwiet politiku u problemi ta’ sigurtà; in-nofs l-ieħor kienu dovut għal limitazzjonijiet interni tal-proġetti relatati mal-kapaċità tas-sħab.

56

Tmien proġetti kienu suġġetti għal bidla fl-ordni loġika tal-attivitajiet tagħhom. Dawn il-bidliet affettwaw l-eżekuzzjoni ta’ attivitajiet relatati, li jfisser li ma kienx possibbli li jiġi sfruttat il-potenzjal sħiħ għal sinerġiji. Aħna sibna li l-istudji ta’ referenza u l-valutazzjonijiet ma kinux disponibbli meta kienu meħtieġa, l-attivitajiet ta’ taħriġ saru tard wisq u l-prijoritizzazzjoni tal-attivitajiet relatati ma kinitx ideali.

57

F’10 mill-każijiet⁴⁶ li eżaminajna, xi attivitajiet importanti ma kinux twettqu kif kien ippjanat. Dan kien dovut għal nuqqas ta’ impenn, jew mill-gvern (ħames każijiet), jew mis-sieħeb inkarigat mill-implimentazzjoni (erba’ każijiet), jew mit-tnejn li huma (każ wieħed), ara l-Kaxxa 3.

L-implimentazzjoni tal-baġit kienet imxekkla mill-kapaċità limitata tas-sħab lokali

58

Aħna sibna seba’ każijiet fejn l-infiq kien sinifikattivament insuffiċjenti u ħames każijiet oħra fejn il-proġetti kellhom jiġu estiżi biex il-baġit għalihom ikun jista’ jintuża⁴⁷. Il-kuntratti tal-għotja jissettjaw il-kontribuzzjoni massima mill-UE u l-infiq insuffiċjenti mhuwiex neċessarjament negattiv, speċjalment jekk ir-riżultati kollha mistennija jinkisbu. Madankollu, meta l-baġit ta’ proposta magħżula jkun ġie stmat b’mod sinifikattivament eċċessiv, u dan ma jiġix ikkoreġut qabel jitfassal kuntratt, il-Kummissjoni ma tkunx tista’ tieħu vantaġġ sħiħ mis-sejħa għal proposti (u mill-fondi disponibbli) biex tappoġġa proġetti oħra. F’xi każijiet, aħna sibna li l-proposta inizjali tas-sħab ma kinitx realistika (ambizzjuża wisq/stmata b’mod eċċessiv) meta mqabbla mal-kapaċità tagħhom. Pereżempju:

1. Għal wieħed mill-proġetti (Regional1) intuża biss 65 % mill-baġit oriġinali. Is-sieħeb ewlieni inkarigat mill-implimentazzjoni qabel li ħafna mil-linji baġitarji inizjalment ġew stmati b’mod eċċessiv (b’mod partikolari għall-infiq relatat ma’ tagħmir u mal-kampanja ta’ sensibilizzazzjoni)⁴⁸.
2. Kważi nofs il-valur tal-kuntratt tal-proġett India3 ma kienx intuża sad-data ta’ tmiem oriġinali tal-proġett, parzjalment minħabba li attivitajiet ta’ għajnuna għall-vittmi fuq terminu twil kienu koperti minn finanzjament mill-Istat li huwa potenzjalment aktar attraenti (aktar fit-tul, aktar iffukat).
3. Il-proġett Regional2 ħtieġ żewġ estensjonijiet ta’ żmien (minn 36 xahar sa 48 xahar) biex juża 90 % tal-kontribuzzjoni ppjanata mill-UE⁴⁹.

Il-proġetti taw xi riżultati pożittivi fil-ġlieda kontra t-traffikar tal-bnedmin, għalkemm is-sostenibbiltà kienet problematika

59

F’din it-taqsima, aħna neżaminaw: jekk l-ouputs ippjanati twasslux/jitwasslux f’waqthom u fi ħdan il-baġit; jekk il-proġetti kkontribwewx b’mod pożittiv għall-qerda tat-traffikar tal-bnedmin; u jekk ir-riżultati tal-proġetti humiex sostenibbli.

Il-proġetti taw xi riżultati pożittivi fil-qasam tat-traffikar tal-bnedmin, iżda huwa diffiċli li tinstab konnessjoni bejnhom u t-titjib ġenerali fil-ġlieda kontra t-traffikar tal-bnedmin li seħħ fir-reġjun

60

Mill-2009 ‘l hawn, kien hemm titjib ġenerali fil-ġlieda kontra t-traffikar tal-bnedmin fir-reġjuni li huma koperti mill-awditu, għalkemm hemm differenzi sinifikanti bejn il-pajjiżi, bi tnejn minnhom biss li jissodisfaw l-aħjar standards kompletament. Skont id-data mir-rapport “Trafficking in Persons” (Traffikar tal-Bnedmin) tal-Istati Uniti (ara t-Tabella 1), il-pajjiżi li tejbu s-sitwazzjoni huma l-Bangladesh, il-Kambodja, l-Indja, il-Filippini u l-Pakistan; erba’ pajjiżi baqgħu ma bidlux is-sitwazzjoni (l-Indoneżja, in-Nepal, il-Myanmar u l-Vjetnam); u kien f’pajjiż wieħed biss (it-Tajlandja) li s-sitwazzjoni ddeterjorat fil-perjodu kopert mill-awditu.

Tabella 1

L-isforzi tal-pajjiżi fil-kampjun biex jiġġieldu t-traffikar tal-bnedmin, ibbażat fuq ir-rapport “Trafficking in Persons” (Traffikar tal-Bnedmin) (TIP) maħruġ mill-Istati Uniti

Pajjiż	2009		2010		2011		2012		2013		2014		2015		2016
Il-Kambodja	2WL		2		2		2		2WL		2WL		2WL		2
L-Indoneżja	2		2		2		2		2		2		2		2
In-Nepal	2		2		2		2		2		2		2		2
Il-Myanmar	3		3		3		2WL		2WL		2WL		2WL		3
It-Tajlandja	2		2WL		2WL		2WL		2WL		3		3		2WL
Il-Vjetnam	2		2WL		2WL		2		2		2		2		2
L-Indja	2WL		2WL		2		2		2		2		2		2
Il-Filippini	2WL		2WL		2		2		2		2		2		1
Il-Pakistan	2WL		2		2		2		2		1		1		1
Il-Bangladesh	2WL		2WL		2WL		2		2		2		2		2

Nota: Ir-rapport “Trafficking in Persons” (Traffikar tal-Bnedmin) maħruġ mill-Istati Uniti (ir-rapport US TIP) iqiegħed lill-pajjiżi f’erba’ kategoriji: Livell 1 (jissodisfaw l-istandards kompletament), Livell 2 (ma jissodisfawx l-istandards kompletament iżda qed isiru sforzi sinifikanti), Livell 2 Lista’ ta’ Sorveljanza (2WL, l-istess bħal-Livell 2 iżda l-impatt huwa aggravat minħabba l-għadd ta’ vittmi, in-nuqqas ta’ forniment ta’ evidenza li l-isforzi qed jiżdiedu, jew in-nuqqas ta’ rispett tal-impenji) u Livell 3 (ma jissodisfawx l-istandards).

Sors: Ir-rapport “Trafficking in Persons” (Traffikar tal-Bnedmin) maħruġ mid-Dipartiment tal-Istat, l-Istati Uniti, 2016.

61

Aħna sibna li għall-proġetti kollha eżaminati, stajna nidentifikaw xi riżultati pożittivi fil-qasam tat-traffikar tal-bnedmin li jikkontribwixxu għall-ġlieda kontra dan it-traffikar. Aħna sibna wkoll li l-appoġġ mogħti mill-UE, b’mod partikolari l-finanzjament immirat taħt l-EIDHR, għen biex jissaħħu l-NGOs li huma bbażati fil-komunitajiet, u huma ddedikati għall-ġlieda kontra t-traffikar tal-bnedmin. Minkejja dan, dawn ir-riżultati ma jistgħux jintrabtu mal-progress globali fil-ġlieda kontra t-traffikar tal-bnedmin fir-reġjuni kkonċernati. Barra minn hekk, huwa diffiċli li jiġi identifikat l-impatt ta’ inizjattivi xprunati mid-drittijiet tal-bniedem, billi dawn jappoġġaw bidliet fuq terminu twil li, min-natura tagħhom, spiss ma jkunux jistgħu jitkejlu faċilment.

62

Il-proġett Indonesia1 huwa eżempju tajjeb ta’ kif l-appoġġ mogħti mill-UE jista’ jikkontribwixxi għal bidla fuq terminu twil fl-attitudnijiet u fl-impenn lokali. Dan il-proġett serva biex jikkonsolida koalizzjoni emerġenti ta’ NGOs lokali li huma attivi fil-ġlieda kontra t-traffikar tal-bnedmin, billi bena l-kapaċità tal-koalizzjoni kif ukoll tejjeb il-viżibbiltà u l-influwenza internazzjonali tagħha. B’riżultat ta’ dan, il-koalizzjoni setgħet tipprovdi input rilevanti fir-rigward tal-isfidi relatati mat-traffikar tal-bnedmin fil-kuntest tal-eżaminar perjodiku, immexxi min-NU, tar-rekord tad-drittijiet tal-bniedem fl-Indoneżja⁵⁰.

63

Bl-istess mod, il-proġetti Cambodia2 u Cambodia3 ġew implimentati minn koalizzjoni ta’ NGOs nazzjonali. Huma kkontribwew għal żieda fil-viżibbiltà, il-kapaċità u l-influwenza tal-koalizzjoni, bir-riżultat li l-koalizzjoni u l-membri tagħha tejbu l-ħiliet tagħhom fil-ġestjoni ta’ proġetti u rnexxielhom ikomplu jirċievu l-appoġġ tad-donaturi għal xi wħud mill-attivitajiet tagħhom.

64

Kif ġie deskritt hawn fuq (ara l-paragrafu 47), l-għażla tal-proġetti permezz ta’ sejħiet għal proposti illimitat il-possibbiltajiet tal-Kummissjoni li tintegra l-proġetti f’approċċ komprensiv. Minkejja dan, aħna identifikajna proġett wieħed li rnexxielu jorbot l-assistenza għall-iżvilupp ma’ għodod ta’ politika oħra tal-UE (ara l-Kaxxa 4). Donaturi oħra qegħdin ukoll jindirizzaw it-traffikar tal-bnedmin billi jadottaw approċċ komprensiv li jinkorpora tipi differenti ta’ appoġġ⁵¹.

Is-sostenibbiltà tar-riżultati tal-proġetti ma ġietx żgurata sistematikament

65

Aħna stajna nivvalutaw il-prospetti ta’ sostenibbiltà ta’ 25 proġett⁵³. Għall-10 proġetti li jifdal, jew il-proġett kien għadu għaddej, jew inkella r-rapport finali kien għadu ma ġiex approvat jew ma kienx iddettaljat biżżejjed. Aħna sibna li s-sostenibbiltà tista’ tiġi ddimostrata għal 11-il proġett. Għall-14-il proġett li jifdal, huwa probabbli li s-sostenibbiltà tiġi affettwata mill-insuffiċjenza ta’ kontribuzzjonijiet ulterjuri mid-donaturi (8 proġetti) u minn impenn insuffiċjenti mis-sħab jew mill-gvern (6 proġetti).

66

Għall-14-il proġett fejn is-sostenibbiltà ma kinitx ċerta, aħna sibna li l-fatturi sottostanti li jaffettwaw is-sostenibbiltà setgħu ġew indirizzati aħjar fl-istadju tat-tfassil. B’mod partikolari, il-proġetti ma kinux jinkludu strateġija ta’ ħruġ għat-trażmissjoni tal-prattiki tal-proġetti u tar-riżultati miksuba, kif inhu rrakkomandat mil-Linji Gwida tal-Kummissjoni dwar il-Ġestjoni taċ-Ċiklu ta’ Proġett⁵⁴, u fatturi eżoġeni/theddid ma ġewx immitigati biżżejjed u allura komplew jippersistu matul il-fażi ta’ implimentazzjoni. Il-valutazzjoni kontinwata tas-sostenibbiltà li saret mill-Kummissjoni kienet imxekkla wkoll minn dokumentazzjoni insuffiċjenti dwar l-impatt tal-bidliet matul l-implimentazzjoni.

67

Aħna fil-fatt sibna eżempju ta’ proġett sostenibbli, li juri l-benefiċċji li jirriżultaw meta l-problemi ta’ sostenibbiltà jiġu indirizzati kmieni fil-fażi ta’ tfassil (ara l-Kaxxa 6).

Konklużjonijiet u rakkomandazzjonijiet

68

L-awditu eżamina l-effettività tal-appoġġ mogħti mill-UE għall-ġlieda kontra t-traffikar tal-bnedmin fl-Asja t’Isfel/ix-Xlokk tal-Asja. Il-qerda tat-traffikar tal-bnedmin huwa proċess li neċessarjament jieħu fit-tul. Dan jirrikjedi l-indirizzar ta’ għadd ta’ kawżi ewlenin (eż. inugwaljanza bejn is-sessi, nuqqas ta’ drittijiet tal-minoranzi, edukazzjoni u saħħa) u li l-attivitajiet ta’ netwerks kriminali jiġu sfaxxati. It-traffikar tal-bnedmin huwa, min-natura tiegħu, reat klandestin li rarament ikun hemm data statistika suffiċjenti u kumparabbli dwaru. Minħabba dan il-kuntest kumpless, il-ħafna prijoritajiet mifruxa u r-riżorsi limitati, aħna sibna li l-UE kienet parzjalment effettiva fl-appoġġ li tat għall-ġlieda kontra t-traffikar tal-bnedmin fl-Asja t’Isfel/ix-Xlokk tal-Asja.

69

Fil-biċċa l-kbira, il-qafas ta’ politika tal-UE f’dak li jirrigwarda t-traffikar tal-bnedmin jipprevedi approċċ komprensiv għall-indirizzar tat-traffikar tal-bnedmin, għalkemm xi aspetti għadhom mhumiex żviluppati għalkollox. L-Istrateġija THB (2012-2016) kienet dokument ta’ livell għoli li kien jipprovdi gwida limitata dwar id-dimensjoni esterna tal-ġlieda kontra t-traffikar tal-bnedmin. Sa April 2017, il-Kummissjoni kienet għadha ma ppubblikatx evalwazzjoni komprensiva tar-riżultati li nkisbu taħt l-Istrateġija THB; u lanqas ma ppreżentat qafas ta’ politika kontra t-traffikar għal wara l-2016.

70

L-Istrateġija THB hija kkomplementata minn dokumenti ta’ politika oħra li flimkien jindirizzaw l-aspetti prinċipali tat-traffikar tal-bnedmin. Il-Kummissjoni u s-SEAE jużaw varjetà ta’ għodod fil-ġlieda kontra t-traffikar tal-bnedmin, kemm direttament kif ukoll indirettament: id-djalogi dwar id-drittijiet tal-bniedem huma partikolarment utli; għodod oħra jinkludu djalogi bilaterali u appoġġ għal fora reġjonali (jiġifieri ASEAN u ASEM fl-Asja). Sa issa għadhom ma nħolqux sħubiji ġodda, bejn l-UE u xi wieħed mill-pajjiżi fl-Asja t’Isfel/ix-Xlokk tal-Asja, li huma ddedikati għall-ġlieda kontra t-traffikar tal-bnedmin (ara l-paragrafi 22 sa 43).

Rakkomandazzjoni 1 – Żvilupp ulterjuri tal-qafas strateġiku kontra t-traffikar tal-bnedmin, billi tiżdied ir-rilevanza tiegħu għall-Asja t’Isfel/ix-Xlokk tal-Asja

Jenħtieġ li l-Kummissjoni, f’koordinazzjoni mas-SEAE u filwaqt li tqis l-implikazzjonijiet tal-analiżi ta’ nofs it-terminu dwar l-istrumenti ta’ finanzjament estern, tiżviluppa aktar il-qafas strateġiku kontra t-traffikar tal-bnedmin, b’mod partikolari billi:

• tipproponi lill-Kunsill lista aġġornata ta’ prijoritajiet, li tkun ibbażata fuq ir-riżultati li nkisbu sa issa, il-firxa tat-traffikar tal-bnedmin f’pajjiżi/reġjuni individwali, u l-prijoritajiet għall-politiki tematiċi;
• tiżgura li jkun hemm data suffiċjenti u kumparabbli dwar attivitajiet appoġġati kontra t-traffikar tal-bnedmin, li titqiegħed għad-dispożizzjoni ta’ dawk li jieħdu d-deċiżjonijiet u ta’ prattikanti;
• tiżviluppa objettivi u miri ċari għall-ġlieda kontra t-traffikar tal-bnedmin, u b’hekk tiffaċilita t-tfassil ta’ azzjonijiet rilevanti, koerenti u komprensivi fil-pajjiżi/reġjuni prijoritarji maqbula. Jenħtieġ li l-objettivi jiġu kkonkretizzati fi gwida operazzjonali aktar iddettaljata li tkun ċara biżżejjed biex tagħti direzzjoni lill-attivitajiet fuq il-post, eż. billi tuża oqfsa tal-pajjiżi, strateġiji tal-pajjiżi, eżerċizzji ta’ programmazzjoni u rapporti ta’ ġestjoni eżistenti li jkunu rilevanti;
• tidentifika u sussegwentement tevalwa u tirrapporta dwar liema objettivi l-aħjar li jintlaħqu permezz ta’ proġetti, permezz tal-użu ta’ għodod oħra (eż. djalogu dwar id-drittijiet tal-bniedem, strumenti ta’ assistenza teknika, sħubiji ddedikati kontra t-traffikar tal-bnedmin eċċ.), jew permezz ta’ kombinament ta’ bosta għodod.

Data fil-mira: Nofs l-2018

71

Minkejja dgħufijiet speċifiċi, il-proġetti li ġew eżaminati fl-Asja t’Isfel/ix-Xlokk tal-Asja taw xi riżultati pożittivi fil-ġlieda kontra t-traffikar tal-bnedmin. Madankollu, l-impatt ta’ dawn ir-riżultati seta’ kien akbar li kieku kien ġie adottat approċċ komprensiv, li jippermetti interazzjoni akbar u aktar sinerġiji bejn il-proġetti u għodod oħra li huma rilevanti għat-traffikar tal-bnedmin. Madwar żewġ terzi tal-proġetti fil-kampjun kellhom dgħufijiet fir-rigward tal-formulazzjoni tal-objettivi u/jew l-indikaturi, u xi dgħufijiet fit-tfassil ma ġewx indirizzati fil-ħin, b’mod partikolari qabel ma ġie ffirmat il-kuntratt tal-għotja (ara l-paragrafi 45 sa 52).

72

Il-Kummissjoni mmonitorjat il-proġetti b’mod adegwat, iżda l-implimentazzjoni ġiet affettwata minn sjieda nazzjonali limitata u minn dgħufijiet fil-kapaċità tas-sħab u fl-implimentazzjoni ta’ attivitajiet minnhom. Hemm titjib ġenerali fil-ġlieda kontra t-traffikar tal-bnedmin fl-Asja t’Isfel/ix-Xlokk tal-Asja, iżda huwa diffiċli li tinstab konnessjoni bejn dan it-titjib u azzjonijiet speċifiċi tal-UE (kemm f’termini ta’ allokazzjoni ta’ fondi kif ukoll ta’ riżultati miksuba). Għalkemm kien għadu kmieni wisq biex tiġi vvalutata s-sostenibbiltà tar-riżultati kollha tal-proġetti, aħna osservajna li s-sostenibbiltà tagħhom ma ġietx żgurata sistematikament (14-il proġett minn 25) (ara l-paragrafi 54 sa 67).

Rakkomandazzjoni 2 – Ottimizzazzjoni tal-impatt tal-proġetti billi dawn jiġu integrati f’qafas komprensiv

Jenħtieġ li l-Kummissjoni, matul it-tħejjija ta’ sejħiet għal proposti u l-proċedura tal-għażla u tal-għoti, timmira li tappoġġa l-proġetti li l-aktar huma probabbli li jikkontribwixxu għall-objettivi tal-ġlieda kontra t-traffikar tal-bnedmin fir-reġjun/il-pajjiż prijoritarju rilevanti, billi:

• tinkludi kriterji tal-għażla li jappoġġaw approċċ komprensiv fir-reġjun/fil-pajjiż, kopertura adegwata tal-prijoritajiet iddefiniti kollha, u l-possibbiltà li jinkisbu interazzjoni u sinerġiji bejn il-proġetti u għodod oħra;
• tivvaluta t-tip u d-daqs tal-għotjiet li jaqblu l-aktar mas-saħħa u l-kapaċità tas-soċjetà ċivili fil-pajjiż;
• tiżgura li t-tfassil tal-proġetti magħżula jinkludi objettivi SMART u indikaturi RACER, u li r-riżultati mistennija jkunu realistiċi f’termini ta’ żmien, baġit u kapaċità tas-sħab;
• tagħmel aktar enfasi fuq is-sostenibbiltà tar-riżultati mistennija mill-proġetti, minn stadju bikri u tul iċ-ċiklu intier tal-ħajja tal-proġetti, eż. billi tinkludi l-iżvilupp ta’ strateġiji ta’ ħruġ li jieħdu inkunsiderazzjoni sorsi alternattivi ta’ finanzjament u billi tħeġġeġ sjieda nazzjonali wara li l-proġetti jkunu kkompletati.

Data fil-mira: Bidu tal-2018

Dan ir-Rapport ġie adottat mill-Awla III, immexxija mis-Sur Karel PINXTEN, Membru tal-Qorti tal-Awdituri, fil-Lussemburgu fil-laqgħa tagħha tat-2 ta’ Mejju 2017.

Akronimi u Abbrevjazzjonijiet

ASEAN: Assoċjazzjoni tan-Nazzjonijiet tax-Xlokk tal-Asja

ASEM: Laqgħa Asja-Ewropa

DCI: Strument tal-Kooperazzjoni għall-Iżvilupp

DĠ DEVCO: Direttorat Ġenerali għall-Kooperazzjoni Internazzjonali u l-Iżvilupp

DĠ NEAR: Direttorat Ġenerali għall-Viċinat u n-Negozjati għat-Tkabbir

DOA: Dokument Orjentat lejn l-Azzjoni

EIDHR: Strument Ewropew għad-Demokrazija u għad-Drittijiet tal-Bniedem

EUROPOL: Uffiċċju Ewropew tal-Pulizija

FRONTEX: Aġenzija Ewropea għall-Ġestjoni ta’ Kooperazzjoni Operazzjonali fil-Fruntieri Esterni tal-Istati Membri tal-Unjoni Ewropea

Id-Direttiva: Id-Direttiva 2011/36/UE tal-Parlament Ewropew u tal-Kunsill tal-5 ta’ April 2011 dwar il-prevenzjoni u l-ġlieda kontra t-traffikar tal-bnedmin u l-protezzjoni tal-vittmi tiegħu, u li tissostitwixxi d-Deċiżjoni Qafas tal-Kunsill 2002/629/ĠAI (ĠU L 101, 15.4.2011, p. 1).

ILO: Organizzazzjoni Internazzjonali tax-Xogħol

Protokoll ta’ Palermo: Protokoll għall-Prevenzjoni, Soppressjoni u Punizzjoni tat-Traffikar ta’ Persuni, Speċjalment ta’ Nisa u Tfal, li jissupplementa l-Konvenzjoni tan-Nazzjonijiet Uniti Kontra l-Kriminalità Organizzata Transnazzjonali

SEAE: Servizz Ewropew għall-Azzjoni Esterna

Strateġija THB: Strateġija tal-UE 2012 Għall-Qerda tat-Traffikar tal-Bnedmin

UNODC: Uffiċċju tan-Nazzjonijiet Uniti kontra d-Droga u l-Kriminalità

Glossarju

Dimensjoni esterna: Politiki u azzjonijiet interni tal-UE jistgħu jkollhom impatti sinifikanti lil hinn mill-fruntieri tal-UE, bl-istess mod li avvenimenti esterni jistgħu jaffetwaw ukoll id-dinamika interna tal-UE. Id-”dimensjoni esterna tal-politiki interni” ġeneralment tirreferi għal sitwazzjonijiet fejn l-aspetti esterni tal-politiki interni tal-UE jkollhom dimensjoni ta’ politika barranija u politika ta’ sigurtà li dejjem tkun qed tikber.

Aspetti esterni ta’ ġustizzja u affarijiet interni fil-livell globali jikkontribwixxu għall-ħolqien ta’ żona ta’ libertà, sigurtà u ġustizzja fi ħdan l-UE. Pereżempju, stat tad-dritt dgħajjef f’pajjiż terz jista’ jipprovdi opportunitajiet biex it-traffikanti li huma attivi fl-Ewropa jwettqu ħasil tar-rikavat minn attività kriminali, u dan jagħmilha aktar diffiċli biex ir-reati tagħhom jiġu investigati. Għalhekk, il-promozzjoni tal-istat tad-dritt f’pajjiż terz jista’ jkollha impatt pożittiv madwar l-UE kollha.

Logframe: Logframe (li jissejjaħ ukoll matriċi logframe) huwa għodda għall-ġestjoni ta’ proġetti li tipprovdi mod sistematiku u loġiku biex jiġu ssettjati l-objettivi kumplessivi u speċifiċi ta’ proġett u biex jiġu ddefiniti l-attivitajiet tiegħu. Logframe jippreżenta r-relazzjonijiet kawżali bejn il-livelli differenti ta’ objettivi, jipprovdi indikaturi biex jiġi ċċekkjat jekk dawk l-objettivi jkunux intlaħqu, u jidentifika s-suppożizzjonijiet li jsiru.

Mainstream: Terminu li jintuża biex jirreferi għall-integrazzjoni (jew “mainstreaming”) ta’ xi prinċipji/kunsiderazzjonijiet fil-politiki u l-fażijiet differenti tal-programm tal-UE u fiċ-ċiklu tal-proġetti. Fil-qasam tad-drittijiet tal-bniedem, dan jirriferi għal proċess li permezz tiegħu id-drittijiet tal-bniedem jagħtu sura lil politiki, programmi, proġetti u interventi oħra.

Programmazzjoni: Proċess deċiżjonali essenzjali li s-SEAE u l-Kummissjoni jużaw biex jiddefinixxu strateġiji, prijoritajiet u allokazzjonijiet ta’ għajnuna.

Studju ta’ referenza: Studju ta’ referenza jipprovdi informazzjoni dettaljata dwar sitwazzjoni partikolari qabel jibda proġett. Huwa għodda siewja biex titqabbel is-sitwazzjoni qabel u wara li proġett jiġi implimentat, u biex jiġu vvalutati fatturi oħra li jistgħu jinfluwenzaw il-bidliet li jiġu osservati matul il-perjodu ta’ implimentazzjoni.

Tim tal-awditjar

Ir-rapporti speċjali tal-QEA jippreżentaw ir-riżultati tal-awditi tal-prestazzjoni u tal-konformità tagħha f’dak li jirrigwarda oqsma baġitarji jew suġġetti ta’ ġestjoni speċifiċi. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta’ introjtu jew ta’ nfiq involut, l-iżviluppi li jkunu għad iridu jseħħu u l-interess politiku u pubbliku.

Dan l-awditu tal-prestazzjoni twettaq mill-Awla III – immexxija mill-Membru tal-QEA Karel Pinxten – li hija responsabbli għall-awditjar tal-oqsma ta’ nfiq ta’ azzjonijiet esterni, sigurtà u ġustizzja.  L-awditu tmexxa mill-Membru tal-QEA Bettina Jakobsen. Fit-tħejjija tar-rapport, hija ngħatat appoġġ mill-Kap tal-kabinett tagħha, Katja Mattfolk; Beatrix Lesiewicz, Maniġer prinċipali; Francisco Javier de Miguel Rodriguez, Kap tal-kompitu; Kim Hublé, Alina Milasiute u Alexandre Tan, Awdituri, u Kim Storup, Attaché.

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).

Appoġġ mogħti mill-UE għall-ġlieda kontra t-traffikar tal-bnedmin fl-Asja t’Isfel/ix-Xlokk tal-Asja
(skont l-Artikolu 287(4), it-tieni subparagrafu, TFUE)

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2017

PDF	978-92-872-7469-4	1977-5741	10.2865/6721	QJAB17009MTN
HTML	978-92-872-7486-1	1977-5741	10.2865/975876	QJAB17009MTQ

© L-Unjoni Ewropea, 2017

Ir-riproduzzjoni hija awtorizzata, dment li s-sors jiġi rikonoxxut.

Għal kull użu jew riproduzzjoni tal-Mappa 1, irid jintalab il-permess direttament mingħand id-detentur tad-drittijiet tal-awtur.

KIF GĦANDEK TAGĦMEL BIEX TIKSEB IL-PUBBLIKAZZJONIJIET TAL-UE

Pubblikazzjonijiet bla ħlas:

• kopja waħda:
  • permezz tal-EU Bookshop (http://bookshop.europa.eu);
• iżjed minn kopja waħda jew posters/mapep:
  • mir-rappreżentanzi tal-Unjoni Ewropea (http://ec.europa.eu/represent_mt.htm),
  • mid-delegazzjonijiet f'pajjiżi li mhumiex fl-UE (http://eeas.europa.eu/delegations/index_mt.htm),
  • billi tikkuntatja s-servizz Europe Direct (http://europa.eu/europedirect/index_mt.htm)
  • jew ċempel 00 800 6 7 8 9 10 11 (numru tat-telefown bla ħlas minn kullimkien fl-UE) (*).

(*) L-informazzjoni mogħtija hija b’xejn, kif ukoll it-telefonati ġeneralment huma b’xejn (għalkemm xi operaturi, kabini tat-telefown jew lukandi jistgħu jitolbu ħlas).

Pubblikazzjonijiet bi ħlas:

• permezz tal-EU Bookshop (http://bookshop.europa.eu).