Testijiet tal-istress għall-banek fl-UE kollha: inġabar ammont kbir ta’ informazzjoni dwar il-banek, iżda jinħtieġu koordinazzjoni aħjar u fokus akbar fuq ir-riskji

Sommarju eżekuttiv

I

It-test tal-istress fil-livell tal-UE huwa evalwazzjoni tal-impatti li xokk komuni jista’ jkollu fuq il-pożizzjoni finanzjarja ta’ banek Ewropej kbar. Ir-Regolament tal-2010 li stabbilixxa l-Awtorità Bankarja Ewropea (EBA) inkariga lill-EBA bit-tnedija u bil-koordinazzjoni tat-testijiet tal-istress fl-UE kollha, f’kooperazzjoni mal-Bord Ewropew dwar ir-Riskju Sistemiku (BERS).

II

It-testijiet tal-istress ilhom isiru mill-2011, u lkoll twettqu skont l-approċċ minn isfel għal fuq, fejn il-banek ipproduċew ir-riżultati li nkisbu mix-xenarju ta’ xokk fuq il-bażi tal-metodoloġija approvata mill-EBA. Il-verifikazzjoni tal-kwalità tar-riżultati kienet fil-biċċa l-kbira taħt ir-responsabbiltà tal-awtoritajiet kompetenti (AK) rilevanti (l-awtoritajiet nazzjonali jew il-Bank Ċentrali Ewropew). F’ġurisdizzjonijiet oħra b’sistemi finanzjarji kbar, bħall-Istati Uniti, l-awtoritajiet superviżorji jserrħu fuq approċċ minn fuq għal isfel, li jagħtihom livell ferm akbar ta’ kontroll fuq ir-riżultati prodotti mill-banek.

III

Biex jiġi żgurat li l-metodi, il-prattiki u r-riżultati projettati mill-banek ikunu kumparabbli u affidabbli, ir-regolament jiddikjara b’mod speċifiku li l-EBA għandha l-awtorità li titlob informazzjoni direttament mill-banek u mill-AK biex twettaq analiżijiet speċifiċi u spezzjonijiet fuq il-post, bil-parteċipazzjoni tal-EBA f’dawn l-attivitajiet.

IV

Aħna ffukajna fuq it-test tal-istress li l-EBA wettqet fl-UE kollha fl-2018. B’mod partikolari, aħna vvalutajna jekk it-test tal-istress kienx adatt għall-iskop tiegħu, jekk l-EBA kellhiex biżżejjed aċċertament f’dak li jirrigwarda r-robustezza taċ-ċifri kkalkulati mill-banek individwali, u jekk il-pubblikazzjoni tar-riżultati kinitx tippermetti lill-partijiet ikkonċernati biex jikkonkludu jekk is-sistema kinitx reżiljenti.

V

Aħna eżaminajna d-dokumentazzjoni u intervistajna lill-persunal mill-EBA, mill-BERS u mill-Bank Ċentrali Ewropew. Wettaqna wkoll stħarriġiet fost il-banek u l-awtoritajiet kompetenti u żorna żewġ awtoritajiet kompetenti nazzjonali.

VI

B’riżorsi ferm limitati f’dak li jirrigwarda l-persunal u b’ħafna sforzi, l-EBA kkoordinat l-eżerċizzju, li kien jinvolvi ħafna partijiet ikkonċernati u fi ħdan dati ta’ skadenza stretti.

VII

Sibna li - billi d-deċiżjonijiet ewlenin fl-EBA jittieħdu minn rappreżentanti tal-awtoritajiet superviżorji nazzjonali - il-perspettiva tal-UE ma ġietx ikkunsidrata b’mod suffiċjenti fit-tfassil u fl-implimentazzjoni tat-test tal-istress. L-impatt huwa viżibbli fid-diversi fażijiet tal-eżerċizzju tat-test tal-istress.

VIII

Fil-bidu tal-proċess, l-EBA ma speċifikatx ir-riskji u l-livell tas-severità li hija qieset bħala rilevanti għall-proċedura tal-ittestjar tal-istress. Min-naħa tiegħu, il-BERS, li żviluppa x-xenarju tal-istress, irċieva input sostanzjali mill-BĊE, kif ukoll mill-banek ċentrali nazzjonali u mill-awtoritajiet nazzjonali. Aħna sibna li, għaldaqstant, l-EBA kellha nuqqas ta’ kontroll fuq ċerti stadji importanti tal-proċess u, b’hekk:

• riskji sistemiċi importanti kienu suġġetti għal livell baxx ta’ stress, jew għall-ebda stress;
• ix-xokk ma ġiex skattat minn avvenimenti li seħħew fi ħdan is-sistema finanzjarja tal-UE, iżda minn tnaqqis fir-ritmu ekonomiku;
• l-intensità tax-xokkijiet ekonomiċi kienet tvarja b’mod sinifikanti minn pajjiż għall-ieħor, u spiss fejn l-ekonomija kienet aktar dgħajfa u s-sistema finanzjarja kienet aktar vulnerabbli din l-intensità kienet inqas qawwija. Ma ġiex żgurat livell minimu ta’ severità għall-ġenerazzjoni tal-istress.

IX

It-tieni nett, għalkemm l-EBA hija inkarigata, skont ir-regolament, milli tiżgura l-affidabbiltà u l-kumparabbiltà tal-metodi, il-prattiki u r-riżultati, hija eżerċitat awtorità biss f’dak li jirrigwarda t-tnedija, il-provvista tal-metodoloġija għall-attivitajiet relatati mat-test tal-istress u l-koordinazzjoni ġenerali ta’ dawn l-attivitajiet. Hija ddeċidiet li sserraħ kompletament fuq l-awtoritajiet kompetenti għall-verifikazzjoni tal-mod kif il-banek jimplimentaw il-metodoloġija u jistmaw l-impatti tal-istress. L-EBA ma użatx is-setgħat ikkonferiti lilha mir-regolament biex tikkontesta l-kontroll tal-kwalità mwettaq mill-awtoritajiet kompetenti. Fil-fatt, l-EBA attwalment ma għandhiex ir-riżorsi li teħtieġ biex teżerċita sorveljanza sħiħa. Għalhekk, hija ma talbitx analiżijiet speċifiċi, u lanqas ma ħadet sehem f’xi spezzjoni fuq il-post, u - ħlief għad-definizzjoni tal-metodoloġija - ftit li xejn twettqu attivitajiet oħra biex jiġu żgurati l-kumparabbiltà u l-affidabbiltà tar-riżultati. Il-manwal tal-EBA li jiddeskrivi l-aċċertament tal-kwalità li għandu jitwettaq mill-awtoritajiet kompetenti ma kienx vinkolanti, u b’hekk l-awtoritajiet kompetenti kellhom livell għoli ta’ diskrezzjoni.

X

It-tielet nett, il-pubblikazzjonijiet tal-EBA wrew livell ta’ trasparenza li huwa bla preċedent billi ammont kbir ta’ data dwar il-banek sar aċċessibbli. Madankollu, fir-rapporti tagħha ma kienx hemm l-informazzjoni l-aktar kritika, jiġifieri r-rekwiżiti kapitali għal kull bank u l-ammont ta’ banek li ma jissodisfawx dawn ir-rekwiżiti kieku jkunu taħt stress. Barra minn hekk, filwaqt li l-intensità tal-istress/tax-xokkijiet varjat b’mod sinifikanti bejn il-pajjiżi, ir-rapport tal-EBA ma spjegax li l-impatti baxxi (tnaqqis kapitali żgħir) li jirriżultaw mill-istress fuq il-banek f’ċerti pajjiżi ma kinux neċessarjament dovuti għas-sitwazzjoni tajba tal-banek, iżda għal livell baxx ta’ stress.

XI

Fid-dawl ta’ din is-sitwazzjoni, u biex l-EBA tkun tista’ tilħaq l-objettiv tagħha li taqbad (l-akkumulazzjoni ta’) vulnerabbiltajiet sistemiċi, aħna nagħmlu r-rakkomandazzjonijiet li ġejjin biex jiġi żgurat li t-test tal-istress ikun eżerċizzju aktar sinifikattiv:

1. Jenħtieġ li l-EBA tuża s-setgħat legali tagħha biex issaħħaħ il-kontroll tagħha fuq il-proċess tat-test tal-istress.
2. Jenħtieġ li l-EBA tiżviluppa approċċ minn fuq għal isfel għat-testijiet tal-istress biex jikkomplementa l-approċċ minn isfel għal fuq użat attwalment.
3. Jenħtieġ li l-għażla tal-banek għat-test tal-istress ma tkunx ibbażata biss fuq id-daqs, iżda anki fuq ir-riskju u r-rilevanza sistemika, u jkun tajjeb li tiżgura kopertura ġeografika xierqa.
4. Jenħtieġ li l-EBA tiżgura li t-test tal-istress jilħaq l-għan tiegħu li jivvaluta r-reżiljenza bi tqabbil mal-iżviluppi negattivi fis-suq. B’mod partikolari, hija trid tvarja x-xenarji tal-istress minn eżerċizzju għal ieħor, tieħu kont tar-riskji li jirriżultaw mis-sistema finanzjarja tal-UE, u tiżgura livell minimu ta’ stress.
5. Jenħtieġ li l-EBA tippubblika r-rekwiżiti kapitali minimi speċifiċi għall-banek, u tippreżenta r-riżultati b’mod li jippermetti lill-utenti jqiegħduhom f’perspettiva.
6. Jenħtieġ li l-EBA titlob ir-riżorsi addizzjonali meħtieġa biex twettaq bis-sħiħ ir-rwol tagħha kif speċifikat fir-regolament.
7. Jenħtieġ li l-Kummissjoni Ewropea tindirizza x-xerqien tal-istruttura ta’ governanza tal-EBA fir-reviżjoni li jmiss tar-Regolament dwar l-EBA.

Introduzzjoni

Ittestjar tal-istress għall-banek

01

Test tal-istress huwa evalwazzjoni tal-pożizzjoni finazjarja ta’ bank meta dan ikun jinsab taħt pressjoni qawwija. L-idea bażika ta’ dan it-test hija li jikseb projezzjoni ta’ dak li jiġri fil-parametri prinċipali tal-vijabbiltà ta’ bank fil-każ ta’ xokk negattiv kbir wieħed jew aktar. Dawn ix-xokkijiet jistgħu jiġu skattati minn (i) avvenimenti li jolqtu s-suq kollu bħal reċessjoni qawwija, kollass tas-suq tal-istokks, jew telf ta’ fiduċja fil-banek; (ii) avvenimenti “idjosinkratiċi”, jiġifieri xokk li huwa speċifiku għall-banek u mhux bilfors ikun korrelatat mas-sitwazzjoni ekonomika ġenerali; jew (iii) kombinament tat-tnejn.

02

Oriġinarjament, l-ittestjar tal-istress kien għodda li l-banek infushom kienu jużaw bħala parti mill-ġestjoni interna tagħhom tar-riskji, iżda aktar tard beda jintuża wkoll mill-awtoritajiet superviżorji. B’mod ġenerali, dan l-ittestjar tal-istress kien ta’ natura mikroprudenzjali, billi kien jiffoka fuq ir-reżiljenza ta’ istituzzjonijiet individwali, ix-xenarji ma kinux jassumu l-effetti konsegwenzjali fis-sistema kollha, u l-proċess kien jiffoka prinċipalment fuq il-protezzjoni tal-investituri u tad-depożitanti.

03

Il-kriżi finanzjarja ġibdet l-attenzjoni għad-dgħjufijiet fil-prattiki tal-ittestjar tal-istress mikroprudenzjali. Skont ir-“Rapport de Larosière” tal-2009, l-ittestjar tal-istress wisq ta’ sikwit kien ibbażat fuq suppożizzjonijiet ħfief jew saħansitra żbaljati¹. Wara l-kriżi finanzjarja, dawk li jfasslu l-politiki rrikonoxxew il-ħtieġa li jiffokaw ukoll fuq ix-xokkijiet sistemiċi li jaffettwaw is-sistema finanzjarja kollha fl-istess ħin. Dan jinvolvi l-użu ta’ xokkijiet ekonomiċi u finanzjarji, l-eżaminar tal-effetti konsegwenzjali, u l-impatt tax-xokkijiet fuq is-sistema finanzjarja kollha.

Il-mandat tal-EBA u atturi oħra involuti

04

L-EBA, li ġiet stabbilita fl-2010, ingħatat l-awtorità, f’kooperazzjoni mal-Bord Ewropew dwar ir-Riskju Sistemiku² (BERS), sabiex tniedi u tikkoordina t-testijiet tal-istress fl-Unjoni kollha. Ir-Regolament dwar l-EBA jistipula wkoll li l-EBA trid tiżgura “il-kumparabbiltà u l-affidabbiltà tal-metodi, il-prattiki u r-riżultati”³.

05

Dawn it-testijiet tal-istress għandhom l-għan li jimponu xokk komuni u konsistenti fuq sehem kbir ta’ banek Ewropej biex tiġi vvalutata r-reżiljenza tas-sistema finanzjarja tal-UE fl-intier tagħha. Biex isir dan, jiġi żviluppat xenarju bażi (l-aħjar stima tal-kundizzjonijiet makroekonomiċi futuri) u xenarju (stress) avvers (stima ferm aktar negattiva).

06

L-EBA nediet u kkoordinat it-testijiet tal-istress fl-UE kollha fl-2011, fl-2014, fl-2016 u fl-2018. B’mod ġenerali, approċċ ta’ ttestjar tal-istress jista’ jkun minn fuq għal isfel jew minn isfel għal fuq. F’approċċ minn fuq għal isfel, hija l-awtorità superviżorja li tiġġenera x-xenarju avvers u tikkalkula l-impatti fuq il-banek, bħal fil-każ pereżempju tar-Renju Unit, l-Istati Uniti u l-Ġappun. Kmieni fil-proċess, l-EBA għażlet approċċ minn isfel għal fuq, fejn l-awtorità superviżorja tiġġenera x-xenarju iżda l-banek jipproduċu stimi tal-impatti li jirriżultaw minn xokkijiet fuq il-parametri finanzjarji prinċipali tagħhom. L-għażla ta’ approċċ minn fuq għal isfel ġiet diskussa mill-EBA f’bosta okkażjonijiet – l-aħħar darba kienet f’Diċembru 2016 – iżda din ġiet irrifjutata mill-maġġoranza l-kbira tal-membri tal-Bord tas-Superviżuri tagħha.

07

Ir-rwoli tad-diversi partijiet ikkonċernati (ara l-Anness I) jistgħu jiġu deskritti kif ġej, billi jintuża l-kuntest tat-test tal-istress li twettaq fl-2018:

• l-EBA ħejjiet il-metodoloġija u, bħala gwida mhux vinkolanti ġenerali, manwal dwar l-aċċertament tal-kwalità, imbagħad ġabret ir-riżultati mill-banek wara li ġew suġġetti għal proċess ta’ aċċertament tal-kwalità mill-awtoritajiet superviżorji rilevanti (l-awtoritajiet kompetenti, jew “AK”), wettqet kontrolli numeriċi u tal-plawżibbiltà, u ppubblikat ir-riżultati;
• il-Bord Ġenerali tal-BERS⁴ approva x-xenarju avvers. Ix-xenarju avvers kien ġie żviluppat u diskuss minn qabel mit-Task Force tal-BERS dwar l-Ittestjar tal-Istress u mill-Kumitat Tekniku Konsultattiv tal-BERS, rispettivament⁵. It-Task Force serrħet ħafna fuq ir-riżorsi tal-BĊE (ara l-Anness I);
• il-BĊE u l-banek ċentrali nazzjonali pprovdew il-projezzjonijiet makroekonomiċi li servew bħala x-xenarju bażi;
• l-awtoritajiet kompetenti (il-BĊE għall-banek li jinsabu fiż-żona tal-euro u l-awtoritajiet nazzjonali għall-banek li mhumiex fiż-żona tal-euro) kienu responsabbli għall-aċċertament tal-kwalità tal-projezzjonijiet tal-banek dwar l-impatti tal-istress. Minħabba r-riżorsi limitati u l-governanza kumplessa tagħha, l-EBA ma setgħetx teżerċita s-setgħat ikkonferiti lilha mir-Regolament dwar l-EBA⁶.

08

L-istruttura ta’ governanza tal-EBA kienet ibbażata fuq l-involviment konsiderevoli tal-awtoritajiet nazzjonali. Il-Bord tas-Superviżuri tagħha jinkludi rappreżentanti tal-awtoritajiet superviżorji nazzjonali. Taħt il-qafas legali attwali, ir-rappreżentanti jagħżlu wkoll kandidat biex jassumi r-rwol ta’ President. Madankollu, il-Parlament jista’ joġġezzjona għal din l-għażla. Għalkemm ir-regolament iddikjara li l-membri tal-Bord tas-Superviżuri għandhom “jaġixxu b’mod indipendenti u oġġettiv fl-interess uniku tal-Unjoni kollha kemm hi”⁷, il-ħatra tagħhom mhix suġġetta għal approvazzjoni mill-korpi tal-UE; dawn jibqgħu uffiċjali tal-awtoritajiet kompetenti u jistgħu jiġu sostitwiti fi kwalunkwe waqt.

09

Dan jista’ jwassal għal tensjonijiet peress li l-membri tal-Bord tas-Superviżuri jistgħu purament jiddefendu l-interessi nazzjonali mingħajr ma jqisu biżżejjed l-interess ġenerali Ewropew. Fl-2014, il-Kummissjoni kienet diġà rrikonoxxiet⁸ li minħabba dawn it-tensjonijiet xi kultant ma jistgħux jittieħdu deċiżjonijiet, b’mod partikolari fil-qasam ta’ konverġenza regolatorja u superviżorja, jew jiġu promossi deċiżjonijiet li jservu aktar l-interessi nazzjonali aktar milli l-interessi aktar ġenerali tal-UE. Għaldaqstant, fl-2017, hija ppreżentat proposta biex jiġu emendati r-regolamenti tal-Awtoritajiet Superviżorji Ewropej (inkluża l-EBA)⁹ li fost l-oħrajn jittrattaw kwistjonijiet relatati mal-finanzjament u l-governanza. B’mod partikolari, wieħed mill-għanijiet kien li jiġi żgurat li t-teħid ta’ deċiżjonijiet ikun aktar orjentat lejn l-UE milli hu fil-preżent. B’mod partikolari, il-Kummissjoni pproponiet li l-EBA għandu jkollha bord eżekuttiv b’membri full-time, li jintgħażlu minn lista qasira mfassla mill-Kummissjoni u jinħatru mill-Kunsill, u li ma jkollhomx drittijiet tal-vot fil-Bord. Madankollu, il-koleġiżlaturi ma kinux laħqu qbil dwar din il-proposta. Minkejja dan, bl-intenzjoni li jsir titjib fil-governanza tal-Awtorità Superviżorja Ewropea permezz ta’ mezzi oħra, il-ftehim politiku tal-21 ta’ Marzu 2019 isaħħaħ il-pożizzjoni tal-President.

Approċċ tal-awditjar

10

Meta jitqies li kien hemm xi kritika rigward it-testijiet tal-istress li l-EBA għamlet fil-passat, aħna ddeċidejna li nwettqu awditu tat-test tal-istress li twettaq fl-2018, filwaqt li ħadna kont ukoll ta’ aspetti ta’ dak li twettaq fl-2016. L-awditu kellu l-għan li jivvaluta jekk il-governanza u l-implimentazzjoni tat-testijiet tal-istress tal-EBA kinux biżżejjed biex jipprovdu tweġiba ċara dwar jekk is-sistema finanzjarja tal-UE hijiex reżiljenti. Għal dan l-għan, aħna għamilna dawn il-mistoqsijiet:

1. It-test tal-istress kien adatt għall-iskop tiegħu?
2. L-EBA kellha aċċertament li l-kalkoli tal-banek kienu korretti?
3. Il-pubblikazzjoni tar-riżultati ppermettiet lill-partijiet ikkonċernati jivvalutaw ir-reżiljenza tas-sistema?

11

Il-kriterji tal-awditjar inkisbu mill-istrumenti legali rilevanti, mill-istandards internazzjonali stabbiliti mill-Bank għall-Ħlasijiet Internazzjonali (BĦI) u mill-EBA nfisha, kif ukoll mill-aħjar prattiki ta’ awtoritajiet oħra inkarigati mit-twettiq tal-ittestjar tal-istress bħall-Bank tal-Ingilterra u r-Riżerva Federali tal-Istati Uniti. Aktar dettalji dwar il-kriterji huma pprovduti fid-diversi taqsimiet ta’ dan ir-rapport.

12

L-evidenza għall-awditjar inġabret fuq il-bażi ta’:

1. reviżjoni ta’ dokumentazzjoni rilevanti mill-EBA, mill-BERS u mill-BĊE;
2. stħarriġ online tal-persunal mill-awtoritajiet kompetenti u mill-banek sorveljati;
3. żjarat fl-awtoritajiet kompetenti;
4. intervisti mal-persunal tal-EBA, tal-BERS u tal-BĊE.

13

L-awditu mistenni jikkontribwixxi għad-dibattitu dwar il-benefiċċji u l-ispejjeż tal-eżerċizzji tat-test tal-istress kif ukoll il-vantaġġi u l-iżvantaġġi tal-approċċi metodoloġiċi differenti.

Osservazzjonijiet

It-test tal-istress imwettaq mill-EBA kien jippreżenta xi nuqqasijiet fil-valutazzjoni tar-reżiljenza għar-riskji sistemiċi

14

Is-sistema tal-ittestjar tal-istress fl-UE kollha hija mfassla¹⁰ biex tivvaluta r-reżiljenza tal-istituzzjonijiet finanzjarji tal-UE għal żviluppi negattivi fis-suq, u biex tevalwa l-potenzjal l r-riskju sistemiku jiżdied f’sitwazzjonijiet ta’ stress. Ir-Regolament dwar l-EBA jiddefinixxi l-iżviluppi negattivi fis-suq bħala tendenzi mikroprudenzjali, riskji potenzjali u vulnerabbiltajiet¹¹.

15

L-ittestjar tal-istress huwa intenzjonat li jidentifika lil dawk l-istituzzjonijiet li huma stess jistgħu jirrappreżentaw riskju sistemiku, b’mod partikolari fi żminijiet ta’ stress, u jiżgura li dawn ir-riskji jiġu mmitigati¹². Il-Bord tas-Superviżuri tal-EBA huwa inkarigat mid-deċiżjoni dwar liema banek għandhom ikunu suġġetti għat-test tal-istress. Il-parametri referenzjarji rilevanti għall-ittestjar tal-istress jiġu stabbiliti mill-Kumitat ta’ Basel dwar is-Superviżjoni Bankarja¹³ u mill-EBA nfisha¹⁴. Dawn jikkonkludu li t-testijiet tal-istress għandu jkollhom objettivi artikolati b’mod ċar u definiti b’mod formali, u li t-tfassil tax-xenarju għandu jkun allinjat magħhom. It-test tal-istress għandu jkun ibbażat fuq xenarju li jkun sever biżżejjed, iżda plawżibbli.

16

Għaldaqstant, aħna eżaminajna jekk:

1. il-kampjun tal-banek parteċipanti kienx xieraq għall-fini tal-eżerċizzju;
2. ir-riskji identifikati kinux xierqa għall-fini tal-eżerċizzju; u
3. l-istress impost kienx qawwi biżżejjed għall-valutazzjoni tar-reżiljenza.

Ċerti banek riskjużi ġew esklużi mit-test tal-istress

17

L-EBA kellha l-objettiv li tikseb kopertura wiesgħa tal-assi bankarji tal-UE u li tinkludi wkoll lill-banek l-aktar importanti. Għalhekk, fil-kampjun tagħha, hija inkludiet biss lil dawk il-banek li l-assi konsolidati tagħhom jammontaw għal mill-inqas EUR 30 biljun.

18

L-għadd ta’ banek parteċipanti naqas mill-ewwel ċiklu tat-testijiet tal-istress. Fl-2011, ipparteċipaw 90 bank f’21 pajjiż, filwaqt li sal-2018 dan l-ammont kien naqas għal 48 bank fi 15-il pajjiż: 9 pajjiżi fejn il-BĊE huwa l-awtorità superviżorja prinċipali¹⁵ u 6 pajjiżi fejn il-BĊE mhuwiex l-awtorità superviżorja prinċipali¹⁶.

19

Mhux il-banek kollha li qabżu s-soll ta’ EUR 30 biljun ġew inklużi fil-kampjun finali: l-aktar importanti fosthom ġew inklużi sakemm il-kampjun kien ikopri madwar 70 % tal-banek li jinsabu fiż-żona tal-euro f’termini tal-assi konsolidati totali, kif ukoll madwar 70 % tal-banek li mhumiex fiż-żona tal-euro. Dan kien ifisser li s-soll reali għall-banek li jinsabu fiż-żona tal-euro kien ta’ EUR 100 biljun, li wassal għall-esklużjoni ta’ xi pajjiżi li kellhom sistemi bankarji aktar dgħajfa.

20

Aħna sibna wkoll li l-Bord tas-Superviżuri eventwalment eskluda seba’ banek b’assi ta’ aktar minn EUR 30 biljun, billi kienu għaddejjin minn ristrutturar¹⁷ jew minn fużjoni ma’ bank ieħor, jew l-assi konsolidati tagħhom kienu naqsu taħt is-soll minimu saż-żmien li fih ġie adottat il-kampjun. Madankollu, il-banek li jinsabu għaddejjin minn ristrutturar u li rċevew għajnuna mill-Istat huma fost l-aktar vulnerabbli. Fl-aħħar nett, fost il-banek esklużi kien hemm dawk li fihom eventwalment feġġew nuqqasijiet fil-kapital.

21

Aħna ma sibna l-ebda evidenza li l-Bord tas-Superviżuri tal-EBA kien iddiskuta l-vantaġġi u l-iżvantaġġi tal-użu ta’ kriterji addizzjonali bbażati fuq ir-riskju għall-għażla tal-banek. Id-deċiżjoni tal-EBA li tuża d-daqs bħala l-uniku kriterju kellha żvantaġġi bħal:

• l-ebda wieħed minn dawk il-banek li kellhom sehem għoli ta’ self improduttiv (NPLs), ibbażati f’ħames pajjiżi, ma ġew inklużi, u lanqas il-banek bi skopertura għolja għal dejn sovran domestiku u dejn pubbliku ieħor¹⁸;
• l-informazzjoni dwar il-banek evalwati mis-swieq b’rata ferm inqas mill-ekwità ta’ portafoll tagħhom, ma ntużatx fil-proċess tal-għażla.

L-importanza ta’ ċerti riskji sistemiċi rilevanti ma ġietx riflessa b’mod xieraq fix-xenarju avvers

22

F’konformità mar-Regolament dwar l-EBA, din tal-aħħar hija obbligata tniedi u tikkoordina l-eżerċizzju tat-test tal-istress fl-UE kollha f’kooperazzjoni mal-BERS. Madankollu, ma hemm l-ebda arranġament formali għar-rwoli rispettivi tal-partijiet. Matul is-snin, ġiet żviluppata prattika fejn l-EBA titlob lill-BERS biex iħejji x-xenarju avvers bl-għajnuna ta’ diversi kumitati, li fihom jipparteċipaw ir-rappreżentanti tal-EBA (ara l-Figura 1 tal-Anness I).

23

Ix-xenarju avvers tal-2018 ġie żviluppat mit-Task Force tal-BERS dwar l-Ittestjar tal-Istress, li kienet magħmula mill-persunal tas-Segretarjat tal-BERS u mill-Membri tal-BERS¹⁹, u kienet tinkludi input mill-BĊE. It-Task Force kienet ippreseduta minn rappreżentant tal-BĊE (id-deputat Direttur Ġenerali mid-Direttorat għall-Politika Makroprudenzjali u l-Istabbiltà Finanzjarja) u serrħet ħafna fuq ir-riżorsi tal-BĊE (persunal, mudelli u data). Hija għamlet użu estensiv minn dawn ir-riżorsi tal-BĊE²⁰ għall-ikkalibrar tal-mudelli li pproduċew il-varjabbli li l-banek kienu obbligati jużaw għall-kalkoli tagħhom.

24

Meta jitqies li l-għan tat-test tal-istress huwa li jevalwa kif ir-riskju sistemiku jiżdied f’sitwazzjoni ta’ stress (ara l-paragrafu 14), il-punt tat-tluq għall-iżvilupp ta’ xenarju tat-test tal-istress għandu jkun l-identifikazzjoni tar-riskji l-aktar importanti, kemm f’dak li jirrigwarda n-natura sistemika kif ukoll ir-rilevanza tagħhom. Wara għandu jiġi applikat livell sinifikattiv ta’ stress għall-fatturi ewlenin tar-riskju.

25

Għaldaqstant, aħna eżaminajna jekk:

1. kinux ġew identifikati r-riskji sistemiċi l-aktar importanti;
2. dawn ir-riskji kinux il-fatturi ewlenin tal-istress li ġie applikat.

Mhux ir-riskji sistemiċi kollha ttieħdu inkunsiderazzjoni

26

Il-Bord tas-Superviżuri tal-EBA ma kkomunikax b’mod formali lill-BERS il-fehmiet tiegħu dwar ir-riskji li għandhom jiġu suġġetti għal stress (jiġifieri li għandhom iservu bħala skattatur) fil-bidu tal-proċess, kemm jekk ikunu riskji li jirriżultaw mis-settur finanzjarju tal-UE, riskji speċifiċi għall-pajjiż, kif ukoll riskji li joriġinaw minn banek individwali jew minn gruppi ta’ banek li jistgħu jagħmlu ħsara serja lis-sistema finanzjarja. Minkejja li hemm xi trikkib fil-kompożizzjoni tal-membri tal-kumitati li fasslu x-xenarju avvers, ir-riskji kienu ġew approvati biss mill-Bord tal-EBA lejn it-tmiem tal-proċess (Diċembru 2017).

27

B’hekk, l-identifikazzjoni tar-riskji tħalliet prinċipalment għad-diskrezzjoni tal-BERS, b’segwitu għal diskussjoni fi ħdan il-kumitati kostitwenti, inkluża t-Task Force tiegħu dwar l-Ittestjar tal-Istress. Il-mandat ta’ din it-Task Force jiddikjara b’mod espliċitu li hija għandha tirrifletti dwar kif ir-riskji sistemiċi – inklużi dawk li jaffettwaw setturi speċifiċi jew xi pajjiżi – jistgħu jiġu identifikati, u li l-approċċ adottat għandu jkollu l-għan li joħloq livell suffiċjenti ta’ stress fuq il-banek.

28

Il-BERS iwettaq eżerċizzju ta’ valutazzjoni tar-riskju b’mod regolari. Dan l-eżerċizzju jintuża wkoll għall-fini tat-test tal-istress. Fatturi oħra tal-input għat-test tal-istress kienu (i) ir-riżultat ta’ stħarriġ minn isfel għal fuq (BUS) tal-membri tal-BERS (prinċipalment awtoritajiet makroprudenzjali); (ii) l-input dirett mill-membri tal-BERS; (iii) id-diskussjonijiet u l-preżentazzjonijiet fi ħdan il-gruppi ta’ esperti tal-BERS; (iv) sensiela ta’ data inkluża fit-tabella operattiva tar-riskji tal-BERS²¹; u (v) l-analiżi interna tal-BĊE.

29

Fl-istħarriġ minn isfel għal fuq, li huwa wieħed mill-fatturi tal-input għall-valutazzjoni tar-riskju, l-awtoritajiet makroprudenzjali jintalbu biex, fuq bażi trimestrali, jidentifikaw u jikklassifikaw għadd ta’ riskji għall-istabbiltà finanzjarja li huma pertinenti għall-ekonomiji proprji tagħhom u għall-UE. Madankollu, l-eżitu tal-istħarriġ kellu nuqqasijiet li jista’ jkollhom impatt fuq il-proċess ta’ identifikazzjoni u ta’ aggregazzjoni tar-riskju u għandhom il-potenzjal li jinfluwenzawh, pereżempju:

• l-awtoritajiet makroprudenzjali huma sistematikament aktar pożittivi fil-valutazzjoni tal-pajjiżi proprji tagħhom milli f’dawk tas-sitwazzjoni fl-UE fl-intier tagħha. Dan jista’ jwassal għal ponderazzjoni baxxa tar-riskji li jirriżultaw minn pajjiż wieħed jew minn subsett ta’ pajjiżi;
• hemm varjazzjoni konsiderevoli fit-ton u fil-kontenut tal-valutazzjonijiet kwalitattivi mwettqa mill-awtoritajiet makroprudenzjali. F’termini ta’ kontenut, xi wħud mill-awtoritajiet jenfasizzaw l-aspetti negattivi fit-tweġibiet tagħhom, filwaqt li oħrajn jisħqu l-oppost.

30

Il-Bord Ġenerali tal-BERS għażel erba’ riskji bħala l-fatturi ewlenin tax-xenarju avvers kif spjegat fin-narrattiva tax-xenarju (ara l-Anness II). Minkejja li r-riskji li jirriżultaw mill-kwalità tal-assi fis-settur bankarju, eż. problemi relatati ma’ self improduttiv, ġew ikklassifikati bħala importanti fl-istħarriġ minn isfel għal fuq, dawn ma ġewx inklużi bħala riskju jew xokk prinċipali fix-xenarju avvers²², għalkemm is-self improduttiv kien il-kawża tal-biċċa l-kbira mis-salvataġġi ta’ banek wara l-kriżi finanzjarja (għal aktar dettalji ara wkoll il-paragrafu 37 f).

31

Ir-riskji ta’ likwidità għall-banek infushom ma kinux fi ħdan l-ambitu tal-eżerċizzju, billi dan kien iffukat fuq is-solvenza tal-banek. Il-kwistjoni tal-kopertura tar-riskji ta’ likwidità ġiet diskussa l-aħħar mill-Bord tas-Superviżuri tal-EBA fl-2011²³. Bi tqabbil ma’ dan, l-FMI, li wkoll iwettaq testijiet tal-istress biex jivvaluta r-reżiljenza tas-sistema bankarja taż-żona tal-euro, uża approċċ imsejjes fuq żewġ stadji li jinvolvi l-ittestjar kemm tal-likwidità kif ukoll tas-solvenza.

32

Il-BERS ma identifikax ir-riskji li jistgħu jirriżultaw minn banek individwali jew minn gruppi ta’ banek, minkejja li kellu mandat ċar²⁴ biex jidentifika wkoll ir-riskji li istituzzjonijiet individwali joħolqu għas-sistema finanzjarja. Minflok, il-proċess ta’ identifikazzjoni tar-riskji involva l-analiżi tal-aggregati fil-livell nazzjonali, taż-żona tal-euro jew tal-UE.

33

L-EBA tippubblika regolarment tabella operattiva tar-riskji²⁵, li tikkonsisti fl-identifikazzjoni u fil-monitoraġġ tar-riskji sistemiċi. Għal kull riskju, it-tabella operattiva tal-EBA tiddeskrivi l-fatturi ewlenin tar-riskju u l-livell ta’ riskju, jiġifieri l-probabbiltà li dawn il-fatturi jimmaterjalizzaw u l-impatt probabbli tagħhom fuq il-banek, inklużi xejriet statistiċi mingħajr kummenti. Madankollu, dawn l-indikaturi tat-tabella operattiva ma kellhomx rwol espliċitu fl-iżvilupp tat-test tal-istress, u l-EBA ma talbitx li dawn jintużaw bħala input ewlieni.

L-istress impost irriżulta minn tnaqqis fir-ritmu ekonomiku aktar milli minn xokk li oriġina mis-settur finanzjarju tal-UE

34

Fuq il-bażi tar-riskji identifikati, ix-xenarju avvers innifsu għandu jiddetermina l-intensità tax-xokkijiet, il-kanali ta’ trażmissjoni u l-perjodu ta’ żmien li matulu l-fatturi tal-istress jistgħu jaffettwaw il-banek²⁶. Madankollu, ma kien hemm l-ebda diskussjoni jew deċiżjoni formali mill-Bord tas-Superviżuri tal-EBA dwar it-tip ta’ xokkijiet li għandhom jiġu imposti fuq il-banek qabel il-proċess ta’ identifikazzjoni tar-riskju. Dan tħalla għad-diskrezzjoni tal-BERS. Kien biss lejn tmiem il-proċess li l-President tat-Task Force ppreżenta x-xenarju u r-riskji li jimmotivawh lill-Bord tas-Superviżuri tal-EBA.

35

L-approċċ magħżul mill-BERS fl-2018, bħal fil-każ tat-testijiet tal-istress preċedenti, kien sekwenza ta’ avvenimenti makroekonomiċi u finanzjarji avversi, b’impatt fuq varjabbli bħall-PDG, il-qgħad, il-prezzijiet tad-djar u r-rati tal-imgħax li jimmaterjalizzaw fuq perjodu ta’ tliet snin. Ix-xenarju bażi jikkorrispondi għall-projezzjonijiet makroekonomiċi l-aktar attwali magħmula għall-UE mill-persunal tal-Eurosistema u tal-BĊE²⁷, u x-xenarju avvers jikkonsisti f’serje ta’ devjazzjonijiet mix-xenarju bażi matul l-istess perjodu u għall-istess parametri prinċipali.

36

It-test tal-istress tal-EBA vvaluta l-vulnerabbiltà tas-sistema u tal-banek għal stress makrofinanzjarju konġunt (tnaqqis fir-ritmu ekonomiku) aktar milli għal xokk finanzjarju qawwi, li mbagħad jiġġenera ċertu livell ta’ stress. Madankollu, skont Dokument ta’ Ħidma tal-2009 mill-Bank għall-Ħlasijiet Internazzjonali, l-evidenza empirika ma tikkonfermax is-suppożizzjoni impliċita tat-testijiet tal-istress makro tal-passat, jiġifieri li xokk makroekonomiku qawwi jikkawża l-kollass ta’ sistema finanzjarja fraġli²⁸.

37

L-għażla ta’ xenarju ta’ tnaqqis fir-ritmu ekonomiku ma kinitx tirrifletti l-importanza ta’ ċerti riskji, inkluża d-distribuzzjoni mhux ugwali tagħhom fost il-pajjiżi. Barra minn hekk, l-għażla ta’ dan it-tip ta’ xenarju fejn ir-riskji finanzjarji jiġu enfasizzati b’mod impliċitu tagħmilha impossibbli li jiġu stabbiliti sensittivitajiet għal riskji sistemiċi speċifiċi. Fi kliem ieħor, ix-xenarju ma kienx ibbażat fuq xokk finanzjarju skattat minn fallimenti ta’ istituzzjonijiet finanzjarji kbar jew minn riskji sistemiċi identifikati fit-tabella operattiva tar-riskji tal-EBA (ara l-paragrafu 33), bħal:

• żieda qawwija fir-rati tal-banek ċentrali jew fil-firxiet tal-kreditu għal bonds sovrani ta’ ċerti Stati Membri, li min-naħa tagħha tista’ tkompli talimenta kriżi tad-dejn sovran;
• l-istokkijiet għoljin li jifdal ta’ NPL, fid-dawl li jistgħu jiżdiedu l-impedimenti għat-tnaqqis tal-NPL u r-riskju minn livelli elevati ta’ dejn.

38

Barra minn hekk, it-tnaqqis fir-ritmu ġie skattat minn avvenimenti barra mit-territorju tal-UE. La x-xenarju avvers tal-2018 u lanqas wieħed mix-xenarji avversi preċedenti ma użaw avveniment jew riskju fi ħdan l-UE bħala skattatur tax-xenarju. Barra minn hekk, anqas ma ġew ikkunsidrati avveniment jew riskju mis-settur bankarju²⁹ bħala skattaturi tax-xenarju, minkejja l-fatt li l-istħarriġ minn isfel għal fuq (ara l-Anness II) indika li tnejn mill-erba’ riskji l-aktar importanti joriġinaw mis-settur bankarju. L-effetti ta’ amplifikazzjoni (eż. il-bejgħ imraħħas ħafna ta’ portafolli, il-falliment ta’ bank li affettwa l-firxiet tal-kreditu ta’ oħrajn) u l-livell ta’ problemi ta’ legat, li jvarja minn pajjiż għal ieħor, ma ġewx inklużi fix-xenarju, għalkemm sa ċertu punt dan inkiseb permezz ta’ fatturi indiretti fix-xenarju varjabbli (eż. żieda fir-rati tal-imgħax).

Ix-xenarju avvers tal-2018 ma kienx jiżgura severità minima għall-pajjiżi kollha u kien inqas sever mill-kriżi finanzjarja

39

Fit-tfassil tax-xenarju tal-2018, it-Task Force rilevanti tal-BERS ħadet kont tal-kritika minn eżerċizzju preċedenti, bħall-fatt li x-xenarju (i) ma kienx biżżejjed projettat fil-futur jew (ii) kien inqas rilevanti għal xi wħud mill-pajjiżi, u s-severità applikata ma kinitx ugwali.

40

La l-EBA u lanqas il-BERS ma ċċaraw ex ante dak li huma jqisu bħala “severità”. Għalkemm it-Task Force għamlet tqabbil fil-livell tal-Istati Membri, il-fokus prinċipali ta’ dan it-tqabbil tas-severità, kemm internament fil-BERS kif ukoll fil-pubblikazzjonijiet, kien jikkonċerna s-severità fil-livell aggregat tal-UE u taż-żona tal-euro. Dan seħħ għad-detriment ta’ fokus fuq il-perkors tal-parametri fil-livell tal-Istati Membri, fejn ħafna mill-vulnerabbiltajiet jistgħu jkunu sinifikanti.

41

Għalhekk, aħna eżaminajna l-proċess għall-iżvilupp tax-xenarju (inklużi l-aspetti tal-immudellar) u l-perkors propost għal għadd ta’ parametri.

42

Aħna sibna li l-banek ċentrali nazzjonali u l-awtoritajiet superviżorji kienu involuti ħafna fit-tfassil tax-xenarju avvers permezz tal-preżenza tagħhom fit-Task Force u fil-Bord Ġenerali tal-BERS. Pereżempju, ħafna mill-outputs tal-immudellar kienu xprunati minn dawk li huma magħrufa bħala elastiċitajiet tal-mudell bażiku (BMEs) li huma pprovduti mill-banek ċentrali nazzjonali bħala parti mill-proċess regolari ta’ previżjonijiet tal-BĊE.

43

Rwol daqshekk prominenti għall-awtoritajiet nazzjonali, kif ukoll il-kapaċità limitata tal-EBA biex tikkontrolla l-proċess, ma ppermettewx li jinkiseb xenarju avvers, imparzjali u oġġettiv li jkun jieħu kont dovut tal-vulnerabbiltajiet tal-banek u tal-pajjiżi b’mod li jkun konsistenti fl-UE kollha. B’riżultat tad-diskussjonijiet fi ħdan l-istrutturi tal-BERS, ittieħdu għadd ta’ deċiżjonijiet ad hoc rigward ix-xenarju avvers (ara l-Kaxxa 1).

44

Minbarra l-banek ċentrali nazzjonali, il-BĊE wkoll kien involut ħafna fl-iżvilupp tax-xenarju, b’mod partikolari d-Direttorati relatati mal-politika monetarja tiegħu aktar milli dawk relatati mal-funzjoni superviżorja tiegħu. B’riżultat ta’ dan, minn naħa l-BERS ma kkunsidrax il-konsegwenzi possibbli ta’ deċiżjonijiet futuri dwar il-politika monetarja bħala skattatur tax-xenarju avvers³⁰. Min-naħa l-oħra, huwa assuma li l-politika monetarja tkun (i) tillimita ż-żieda tar-rati tal-imgħax fit-tul fl-UE taħt ix-xenarju avvers u (ii) tipprevjeni twessigħ sostanzjali tal-firxiet tal-kreditu għad-dejn sovran³¹ (jiġifieri d-differenza fir-rendiment bejn il-bonds maħruġa minn diversi gvernijiet nazzjonali). Dan it-twessigħ seħħ matul il-kriżi tad-dejn Ewropea. Għalhekk, ir-rata tal-imgħax relattivament baxxa tiżdied fix-xenarju avvers.

45

Kumplessivament, il-pajjiżi kienu suġġetti għal livelli ta’ xokk differenti ħafna u, b’hekk, il-banek kienu esposti għal diversi livelli ta’ xokk skont l-iskopertura ġeografika tagħhom. Pereżempju, f’dak li jirrigwarda l-PDG, l-Iżvezja kienet suġġetta għall-akbar xokk f’termini assoluti, li kien aktar mid-doppju meta mqabbel ma’ dak tal-Italja (ara l-preżentazzjoni grafika għall-pajjiżi kollha fil-Figura 4 aktar ’il quddiem f’dan ir-rapport).

46

Biex nivvalutaw is-severità tal-eżerċizzju tal-2018, aħna analizzajna x-xenarju għal firxa ta’ dimensjonijiet, billi wettaqna valutazzjoni komparattiva ta’ aspetti tax-xenarju bi tqabbil mat-testijiet tal-istress li l-EBA wettqet preċedentement, l-avvenimenti storiċi (il-kriżi finanzjarja tal-2008), u x-xenarju/i użat(i) minn awtoritajiet oħra inkarigati mit-twettiq tal-ittestjar tal-istress kif deskritt fil-paragrafi li ġejjin.

47

Kif diġà ssemma fil-paragrafu 35, ix-xenarju avvers ġie ddefinit bi tqabbil max-xenarju bażi tul il-perjodu ta’ previżjoni u, fil-komunikazzjoni tagħha, l-EBA ddikjarat li t-test tal-istress li twettaq fl-2018 kien l-aktar wieħed sever meta mqabbel ma’ dawk li saru preċedentement f’termini tad-devjazzjoni għall-varjabbli tal-PDG (devjazzjoni ta’ 8.3 %). Madankollu, it-tnaqqis assolut bejn il-punt tat-tluq (PDG tal-2017) u dak finali tax-xenarju avvers huwa l-aktar rilevanti (ara l-Glossarju). Fi kliem ieħor, anki devjazzjoni kbira tista’ tfisser stress baxx ħafna jekk ix-xenarju bażi jkun b’saħħtu u jiġi rivedut ’il fuq, hekk kif kien il-każ.

48

Fil-fatt, ix-xenarju avvers tal-2018 ġie essenzjalment iffinalizzat fi tmiem Novembru 2017. Madankollu, f’Diċembru 2017, ġie ikkompletat xenarju bażi ġdid u x-xenarju avvers kellu jkun marbut miegħu. Billi x-xenarju bażi kien sar aktar pożittiv, għal ħafna pajjiżi, il-livelli assoluti ta’ stress meta mqabbla mal-punt tat-tluq kienu aktar baxxi. Għalhekk, l-EBA fittxet li tiżgura li jiġu imposti livelli minimi ta’ stress (ara l-Kaxxa 1). Dan seħħ aktar tard u kien jikkostitwixxi ħafna tibdil kważi viċin il-fażi tat-tmiem tal-proċess.

49

Bi tqabbil mat-testijiet tal-istress tal-EBA li twettqu fl-2014 u fl-2016, ix-xenarju avvers tal-2018 kien aktar sever, pereżempju għall-PDG u taż-żona tal-euro u l-qgħad f’termini ta’ devjazzjoni mix-xenarju bażi. Madankollu, fid-dawl tal-projezzjonijiet favorevoli għax-xenarju bażi, f’termini assoluti, is-sitwazzjoni kienet differenti:

• għall-PDG taż-żona tal-euro, l-eżerċizzju tal-2018 deher aktar b'saħħtu, għalkemm bi ftit biss. Madankollu, għall-biċċa l-kbira mill-Istati Membri dan ma kienx il-każ (ara t-Tabella 1). It-tnaqqis assolut kien akbar fl-2018 – meta mqabbel mal-eżerċizzji preċedenti – f’diversi ekonomiji kbar, li ħafna minnhom fil-verità marru pjuttost tajjeb matul l-aħħar reċessjoni. Għal Stati Membri oħra, li matul l-aħħar reċessjoni batew ħafna, it-tnaqqis assolut fix-xenarju kien relattivament ftit. Din id-distribuzzjoni speċifika tal-impatti avversi fuq il-PDG fost l-Istati Membri ma ġietx spjegata tajjeb;
• għall-qgħad, l-eżerċizzju tal-2018 kien kemxejn aktar ħafif, minħabba li x-xenarju bażi għall-qgħad kien ferm aktar pożittiv fl-eżerċizzju tal-2018.

50

Jekk jiġi eżaminat mill-perspettiva ta’ ekonomiji u varjabbli individwali, l-istress impost jippreżenta livell ta’ severità li mhux dejjem ikun konsistenti. It-tnaqqis assolut fil-PDG mhuwiex sever daqs dak tal-kriżi finanzjarja u tal-perjodu ta’ warajha għal biċċa l-kbira mill-Istati Membri, u ż-żieda fil-qgħad hija konsiderevolment inqas severa, f’xi wħud mill-każijiet b’marġni kbir ħafna (ara l-Kaxxa 2).

51

Il-parametri referenzjarji esterni l-aktar rilevanti għall-eżerċizzju tal-EBA huma l-eżerċizzju tal-ittestjar tal-istress imwettaq mill-Bank tal-Ingilterra, dak imwettaq mir-Riżerva Federali tal-Istati Uniti, kif ukoll dak imwettaq mill-FMI għaż-żona tal-euro. Il-livell ta’ severità tax-xenarju avvers tal-EBA għall-2018 kien ugwali jew aktar minn oħrajn f’termini ta’ PDG, iżda kien aktar dgħajjef minn oħrajn f’dak li jirrigwarda l-qgħad, ir-rati tal-imgħax fit-tul, il-firxiet tal-kreditu u l-prezzijiet tal-proprjetà immobbli (ara l-Kaxxa 3 għal eżempji).

52

Il-parametri referenzjarji internazzjonali rilevanti jissuġġerixxu li t-testijiet tal-istress jistgħu jinvolvu xenarju avvers wieħed jew aktar³². Il-minuti tal-laqgħat tal-Bord tas-Superviżuri tal-EBA ma jirreferux għal xi diskussjoni jew deċiżjoni dwar jekk għandux jintuża xenarju wieħed jew aktar. It-testijiet kollha tal-istress li l-EBA wettqet mill-2011 ’l hawn saru b’xenarju avvers wieħed. Bi tqabbil ma’ dan, il-prattika tar-Riżerva Federali tal-Istati Uniti u tal-Bank tal-Ingilterra hija li jiġu ġġenerati żewġ xenarji. Barra minn hekk, fit-test tal-istress reċenti tiegħu għaż-żona tal-euro, l-FMI kkomplementa x-xenarju makrofinanzjarju tiegħu b’firxa ta’ testijiet tas-sensittività³³.

Il-kalkoli li jitwettqu mill-banek għadhom, sa ċertu punt, kaxxa sewda għall-EBA

53

L-EBA żviluppat metodoloġija li tiddefinixxi kif il-banek iridu jikkalkulaw l-impatti tal-istress li jirriżulta mix-xenarju bażi u minn dak avvers.

54

Il-metodoloġija tinvolvi l-użu ta’ limiti massimi u ta’ limiti minimi biex jiġi żgurat livell ta’ konservatiżmu fil-qasam tas-superviżjoni, b’mod partikolari biex il-banek ma jkunux jistgħu jibbenefikaw mill-istress impost f’ċerti każijiet. Pereżempju, l-introjtu mill-imgħax minn self improduttiv, kif projettat mill-banek, huwa suġġett għal limitu massimu biex jiġi evitat li jkun ottimist iżżejjed.

55

Peress li huma l-banek li jikkalkulawhom, ir-riżultati huma suġġetti għal proċess ta’ aċċertament tal-kwalità.

56

Aħna eżaminajna jekk:

1. il-metodoloġija kinitx xierqa;
2. l-EBA kinitx kisbet biżżejjed aċċertament f’dak li jirrigwarda r-robustezza tal-kalkoli li jitwettqu mill-banek.

L-għażliet li saru kellhom impatt fuq il-plawżibbiltà tar-riżultati

57

Il-metodoloġija tiġi adottata mill-Bord tas-Superviżuri tal-EBA. Huwa jista’ jagħti wkoll eżenzjonijiet għall-metodoloġija. Għalkemm dawn l-eżenzjonijiet jikkonċernaw banek individwali, ma hemm l-ebda mekkaniżmu li jiżgura li l-membri li jistgħu jivvutaw u li jkollhom kunflitt potenzjali ta’ interess ma jipparteċipawx fil-votazzjoni. Eżenzjoni ta’ dan it-tip seħħet fl-eżerċizzju tal-2016 meta l-Bord approva devjazzjoni mill-metodoloġija (għall-benefiċċju ta’ bank wieħed importanti, minkejja t-tħassib tal-persunal tal-EBA). Fit-test tal-istress li twettaq fl-2018 ma kienx hemm eżenzjonijiet bħal din.

58

B’mod ġenerali, aħna sibna li l-metodoloġija tal-EBA kienet komprensiva ħafna. Madankollu, għal ċerti aspetti, din ma kinitx dettaljata biżżejjed f'termini ta’ restrizzjonijiet u gwida, bħal pereżempju għall-qasam tar-riskju ta’ kreditu (partijiet ta’ krediti mhux garantiti, xiri ta’ salvataġġ finanzjarju u trattament ta’ kollateral mhux ipotekarju).

59

Fl-applikazzjoni tal-metodoloġija, il-banek iridu jikkonkretizzaw ix-xenarju bażi u dak avvers (jiġifieri l-parametri makroekonomiċi) f’parametri tar-riskju. Spiss, dan isir permezz ta’ mudelli³⁴. Dawn il-kalkoli bbażati fuq mudell jirriżultaw f’tibdil fil-karta tal-bilanċ, fir-rapport tal-introjtu, kif ukoll fl-assi mwieżna għar-riskju (u konsegwentement fir-rekwiżiti kapitali³⁵). Il-Kaxxa 4 tipprovdi illustrazzjoni, f’termini simplifikati ħafna, tar-riskju ta’ kreditu.

60

Għall-banek li kienu qed jużaw il-mudelli tagħhom stess, il-preċiżjoni ta’ dawn il-mudelli hija kruċjali għall-kredibbiltà tar-riżultati tat-test tal-istress. Madankollu, peress li huma ġew żviluppati mill-banek infushom, dawn il-mudelli jistgħu jkunu preġudikati³⁶, u dan juri li jeħtieġ isir aċċertament rigoruż tal-kwalità.

61

Meta l-banek ma jkollhomx mudelli xierqa biex jistmaw il-parametri tar-riskju ta’ kreditu (jiġifieri PDs u LDGs, ara l-Figura 3), huma mistennija jibbażaw fuq il-parametri referenzjarji tar-riskju ta’ kreditu ġġenerati mill-BĊE. Dawn il-parametri referenzjarji ġew immudellati mid-Direttorat tal-BĊE għall-Politika Makroprudenzjali u l-Istabbiltà Finanzjarja (DĠ MF), direttorat fi ħdan il-funzjoni monetarja tal-BĊE.

62

Minbarra l-inċertezza li tirriżulta mill-mudell, aħna identifikajna wkoll nuqqasijiet f’xi wħud mis-suppożizzjonijiet użati.

63

Jeħtieġ li l-parametri referenzjarji jkunu jikkonsistu f’koeffiċjent jew f’sett ta’ koeffiċjenti għal kull parametru tar-riskju (PD, LDG, eċċ.) li jkejjel ir-rispons ta’ kull riskju għall-varjabbli makroekonomiċi individwali. Il-metodoloġija li ntużat għall-ħolqien tal-parametri referenzjarji kif ukoll il-parametri nfushom (inklużi l-koeffiċjenti) ġew diskussi mal-awtoritajiet kompetenti nazzjonali. Il-parametri referenzjarji ġew approvati mill-Bord tas-Superviżuri tal-EBA³⁷. Madankollu, il-BĊE la jiddivulga b’mod preċiż dawn il-koeffiċjenti lill-banek ikkonċernati, u lanqas ma jippubblikahom. Minflok, jiġi ġġenerat riżultat għal kull tip ta’ portafoll għal kull pajjiż fuq il-bażi tal-varjabbli makroekonomiċi fix-xenarji bażi u dawk avversi, u huwa biss dan l-eżitu li jiġi kkomunikat lill-banek. Kumplessivament, dan naqqas it-trasparenza³⁸, u wassal lill-banek biex, fl-istħarriġ tagħna, jikkumentaw li l-ġenerazzjoni tal-parametri referenzjarji għar-riskju ta’ kreditu kienet proċess tat-tip “kaxxa sewda”.

64

L-approċċ minn isfel għal fuq kien limitat minħabba li ġew imposti għadd ta’ limiti massimi u limiti minimi (ara l-paragrafu 54). L-EBA wettqet xi valutazzjonijiet ad hoc (li kienu jinkludu wkoll id-data tal-banek) biex tistma l-impatt kemm ta’ dawn il-limiti massimi kif ukoll tal-limiti minimi fuq ir-riżultati tal-banek. Madankollu, minħabba r-riżorsi limitati tagħha, l-EBA ma setgħetx tipproduċi stampa ġenerali komprensiva tal-impatt ta’ dawn il-limiti massimi u ta’ dawk minimi fuq ir-riżultati.

65

Biex il-banek ikunu jistgħu jagħmlu l-projezzjonijiet tagħhom, iridu jsiru suppożizzjonijiet. Xi wħud minn dawn is-suppożizzjonijiet jiġu imposti mill-metodoloġija; oħrajn jistgħu jsiru mill-banek infushom. Għażla metodoloġika ewlenija kienet li x-xogħol isir bis-suppożizzjoni ta’ karta tal-bilanċ statika minflok waħda dinamika, speċifikament b’mudell kummerċjali li jibqa’ l-istess matul il-perjodu kollu tal-projezzjoni, li jfisser li l-assi u l-obbligazzjonijiet li jimmaturaw jiġu sostitwiti minn entrati b’karatteristiċi simili fil-projezzjonijiet tal-banek.

66

Is-suppożizzjoni ta’ karta tal-bilanċ statika tippreżenta żvantaġġi:

• il-banek affettwati b’mod qawwi f’sitwazzjoni ta’ stress huwa probabbli li jitilfu opportunitajiet kummerċjali u l-aċċess għall-finanzjament (b’mod partikolari finanzjament tal-operaturi jew interbankarju). Madankollu, dan ma jistax jiġi rifless fil-kalkoli li jitwettqu mill-banek;
• sa ċertu punt, il-banek ikunu jistgħu jikkumpensaw għall-effetti negattivi tax-xenarju avvers billi jużaw għażliet ta’ rkupru³⁹ bħall-bejgħ ta’ assi. Madankollu, is-suppożizzjoni ta’ karta tal-bilanċ statika ma tippermettix lill-banek jipprojettaw dawn l-azzjonijiet fix-xenarju avvers. Filwaqt li aħna nirrikonoxxu li l-EBA/AK ikollhom jivvalutaw il-kredibbiltà u l-fattibbiltà ta’ dawn l-azzjonijiet, aħna nosservaw li t-test tal-istress imwettaq mill-Bank tal-Ingilterra fl-2018 kien jinkludi l-użu ta’ azzjonijiet “strateġiċi” ta’ ġestjoni li bank jista’ realment jieħu f’xenarju ta’ stress. Il-fatt li dan l-aspett ma jiġix ikkunsidrat ixekkel il-valutazzjoni tar-reżiljenza reali ta’ bank li jkun taħt pressjoni f’sitwazzjoni ta’ stress.

L-EBA għandha għarfien limitat f’dak li jirrigwarda r-robustezza tal-kalkoli li jitwettqu mill-banek

67

L-EBA għandha l-bażi legali⁴⁰ biex tkun direttament involuta fil-kontroll tal-kwalità tal-mudelli u tar-riżultati pprovduti mill-banek. B’mod speċifiku, hija għandha s-setgħa li (i) titlob informazzjoni direttament mingħand il-banek; (ii) tirrikjedi li l-AK iwettqu analiżijiet speċifiċi; (iii) titlob lill-AK iwettqu spezzjonijiet fuq il-post; u (iv) titlob lill-AK biex jirrikjedu li l-banek biex jawditjaw b’mod indipendenti l-informazzjoni rilevanti.

68

Madankollu, minħabba l-istruttura ta’ governanza attwali u r-riżorsi limitati, l-EBA serrħet kompletament ⁴¹fuq l-awtoritajiet kompetenti biex iwettqu l-aċċertament tal-kwalità. Għall-eżerċizzju tal-2011 biss, l-aċċertament tal-kwalità twettaq direttament mill-persunal tal-EBA, assistit minn tim ta’ esperti nazzjonali u tal-BĊE/BERS.

69

L-EBA pproduċiet mudelli standard li l-banek kellhom jimlew bid-data kollha meħtieġa (sa 900 000 punt ta’ data għall-banek l-aktar importanti). Hija pprovdiet ukoll il-gwida relatata mal-mudell.

70

Il-banek kellhom jippreżentaw il-mudelli kkompletati lill-AK, li min-naħa tagħhom kellhom iwettqu l-kontrolli biex jiżguraw il-kwalità tad-data. Sussegwentement, l-AK kellhom jippreżentaw il-mudelli lill-EBA.

71

Wara li aċċettat il-fajls, l-EBA wettqet kontrolli awtomatizzati fuq il-kwalità tad-data tal-mudelli ppreżentati. Kull problema identifikata waqt il-kontrolli tal-kwalità tad-data ntbagħtet lill-awtoritajiet kompetenti għall-approvazzjoni.

72

Għalhekk, aħna eżaminajna jekk:

1. l-EBA kinitx kisbet biżżejjed aċċertament dwar il-kontrolli tal-kwalità mwettqa mill-awtoritajiet kompetenti;
2. il-kontrolli proprji tal-EBA kinux jiżguraw il-kwalità tar-riżultati pprovduti mill-banek.

L-EBA kellha informazzjoni limitata dwar il-kontrolli tal-kwalità li twettqu fil-livell tal-awtoritajiet kompetenti

73

F’dak li jirrigwarda l-kontrolli tal-kwalità li kellhom jitwettqu mill-awtoritajiet kompetenti, in-nota dwar il-metodoloġija kienet tagħmel referenza għal ċerti azzjonijiet li l-awtoritajiet kompetenti kellhom jieħdu (jiġifieri huma kienu mitluba “jeżaminaw”, “jeżiġu”, “jikkontestaw”, eċċ.). In-nota dwar il-metodoloġija kienet dokument vinkolanti. Min-naħa l-oħra, l-EBA pproduċiet manwal speċifiku għall-aċċertament tal-kwalità. Hija pprovdiet linji gwida lill-awtoritajiet kompetenti għall-eżaminar tal-kalkoli li jitwettqu mill-banek u għall-kontestazzjoni tar-riżultati ppreżentati mill-banek. Il-manwal ġie approvat mill-Bord tas-Superviżuri bħala dokument mhux vinkolanti, u b’hekk l-AK ingħataw setgħa konsiderevoli ta’ diskrezzjoni.

74

L-AK kienu mistennija jitolbu lill-banek biex jipprovdulhom nota ta’ spjegazzjoni jew dokumenti oħra f’format li jrid jiġi ddefinit mill-awtoritajiet kompetenti, inkluża l-informazzjoni kwalitattiva elenkata fl-Anness III tan-nota metodoloġika. Din in-nota ta’ spjegazzjoni kienet mistennija li tintuża fil-proċess ta’ aċċertament tal-kwalità mill-AK biex tgħinhom iwettqu analiżi sinifikattiva tad-data ppreżentata. Il-kwalità u l-livell ta’ dettall ta’ dawn in-noti kienu jvarjaw minn AK għal oħra⁴².

75

L-EBA qieset li ma kinitx f’pożizzjoni li tikkontesta jew timmonitorja sistematikament ix-xogħol tal-awtoritajiet kompetenti. Aħna sibna li l-EBA ma kellhiex informazzjoni dettaljata dwar il-profondità jew il-firxa tal-kontrolli mwettqa mill-awtoritajiet kompetenti, b’mod partikolari dwar:

• jekk l-awtoritajiet kompetenti kinux ivvalutaw il-funzjonament tal-mudelli użati mill-banek għall-ittestjar tal-istress bi tqabbil mal-istandards minimi f’termini ta’ solidità u ta’ rispons ekonometriċi tal-parametri tar-riskju. Fil-fatt, skont l-istħarriġ tagħna tal-awtoritajiet kompetenti u l-intervisti li twettqu, l-awtoritajiet superviżorji ma wettqux kontrolli fuq il-post approfonditi ta’ dawn il-mudelli. Il-mudelli ġew ikkontestati biss mill-awtoritajiet superviżorji meta huma sabu li ċ-ċifri kienu implawżibbli;
• kemm ir-riżultati kienu influwenzati mill-applikazzjoni ta’ limitazzjonijiet (limiti kemm massimi kif ukoll minimi), jiġifieri kemm ir-riżultati kienu jkunu differenti, b’mod pożittiv jew negattiv, fin-nuqqas ta’ limitazzjonijiet. La l-EBA u lanqas l-awtoritajiet kompetenti ma ġabru sistematikament informazzjoni bħal din;
• kemm ir-riżultati kienu influwenzati minn data oħra, bħall-parametri referenzjarji tal-BĊE għar-riskju ta’ kreditu. Barra minn hekk, hija ma kellhiex informazzjoni dwar jekk kinux intużaw il-parametri referenzjarji minħabba d-dgħufija/in-nuqqasijiet tal-mudelli interni tal-banek jew minħabba li ċ-ċifri tal-parametri referenzjarji kienu aktar favorevoli mill-kalkoli proprji tal-banek. L-AK għandhom id-diskrezzjoni li jiddeċiedu jekk jużawx jew le l-parametri referenzjarji tal-BĊE għar-riskju ta’ kreditu meta jivvalutaw li ċ-ċifri tal-banek ikunu ottimisti żżejjed, jew meta jqisu li l-mudelli proprji tal-banek mhumiex xierqa.

76

Il-manwal dwar l-aċċertament tal-kwalità kien issuġġerixxa li l-AK iwettqu awtovalutazzjoni tal-applikazzjoni tagħhom tal-manwal. Madankollu, l-ebda AK fil-fatt ma pprovdiet valutazzjoni ta’ dan it-tip lill-EBA.

Il-kontrolli proprji tal-EBA mhumiex suffiċjenti

77

L-EBA kellha ammont limitat ta’ persunal – madwar seba’ ekwivalenti għall-full time – biex jimmaniġġja l-eżerċizzju tal-2018. Hija wettqet kontrolli awtomatizzati fuq id-data ppreżentata mill-awtoritajiet kompetenti. Dawn kienu jinkludu (i) kontrolli numeriċi (sinjali żbaljati, is-subtotali ma jridux jaqbżu t-totali, eċċ.); (ii) verifikazzjoni li l-limitazzjonijiet tal-metodoloġija ġew applikati b’mod korrett; u (iii) kontrolli statistiċi tal-plawżibbiltà. Hija kkomunikat ir-riżultati ta’ dawn il-kontrolli lill-awtoritajiet kompetenti, li kienu responsabbli għas-segwitu.

78

Għall-kontrolli tal-plawżibbiltà, sar tqabbil bejn id-data varja pprovduta mill-banek. Id-data li ddevjat mid-distribuzzjoni normali tqieset bħala li tista’ tippreżenta problema ta’ kwalità (anomaliji).

79

Għal dawn il-kontrolli, il-banek kollha tqiesu fl-istess basket. Id-daqs żgħir tal-kampjun kien ifisser li ma setgħux jinħolqu gruppi ta’ pari (fil-forma ta’ banek bl-istess skopertura ġeografika u livelli ta’ stress relatati, banek bl-istess mudelli kummerċjali jew banek bl-istess livell ta’ solidità finanzjarja). Għalhekk, l-identifikazzjoni ta’ anomaliji min-naħa tal-EBA kellha użu limitat ħafna għall-verifikazzjoni tar-riżultati, billi hemm ħafna spjegazzjonijiet validi għall-anomaliji. Fil-fatt, l-analiżi tal-anomaliji biss tista’ saħansitra tipprevjeni l-kunsiderazzjoni ta’ każijiet aktar kritiċi, jiġifieri banek li kellhom jitqiesu bħala anomaliji, iżda ma kinux.

80

Minkejja r-rwol tagħha bħala koordinatur, l-EBA ma ġietx infurmata sistematikament – u lanqas ma kellha r-riżorsi biex titlob informazzjoni sistematikament – dwar l-attivitajiet superviżorji tal-awtoritajiet kompetenti (bħall-punteġġi SREP⁴³ għal kull bank), li tkun rilevanti biex tiġi ġġudikata l-validità tar-riżultati tat-test tal-istress.

81

L-EBA kellha informazzjoni limitata dwar kemm l-AK kienu taw segwitu għall-problemi relatati mal-kwalità li hija kienet ġibdet l-attenzjoni għalihom. Fejn l-EBA qajmet tħassib dwar il-konservatiżmu tar-riżultati, hija ddependiet fuq ir-rieda tajba tal-awtoritajiet kompetenti għal dak li jirrigwarda r-rispons. Fil-fatt, il-kwalità tal-feedback għall-eżerċizzju tal-2018 kienet tvarja b’mod sinifikanti minn AK għal oħra. Fejn l-EBA rċeviet spjegazzjonijiet, hija ma kellhiex il-ħin jew ir-riżorsi biex tikkontestahom b’mod approfondit; fejn hija ma rċeviet l-ebda spjegazzjoni, f’ħafna mill-każijiet hija ma tatx segwitu, fuq is-suppożizzjoni li l-AK rilevanti kellha raġunijiet validi biex ma tipprovdix osservazzjonijiet oħra.

82

Kien hemm ftit każijiet ta’ nuqqasijiet fil-kapital li feġġew fil-banek hekk kif l-EBA ppubblikat ir-riżultati tat-test tal-istress. In-nuqqasijiet feġġew f’kundizzjonijiet ekonomiċi u finanzjarji normali (jiġifieri mhux taħt xenarju ta’ stress). Il-proporzjon CET 1⁴⁴ taħt ix-xenarju bażi ma kienx jirrifletti dawn is-sitwazzjonijiet. Fil-prattika, l-EBA serrħet fuq id-data tal-punt tat-tluq ipprovduta mill-banek.

83

B’hekk, billi l-EBA serrħet fuq l-awtoritajiet kompetenti għall-aċċertament tal-kwalità, hija kellha rwol limitat f’dan il-proċess. Il-Bord tas-Superviżuri qatt ma ddeċieda li jagħmel użu mis-setgħat tiegħu kif ikkonferiti mir-Regolament dwar l-EBA, b’mod partikolari s-setgħat biex jirrikjedu li l-awtoritajiet kompetenti jwettqu analiżijiet speċifiċi jew spezzjonijiet fuq il-post (ara l-paragrafi 67-68).

Pubblikazzjonijiet maħruġin mill-EBA u mill-awtoritajiet kompetenti wrew livell ta’ kwalità li jvarja

84

Ir-riżultati u d-data ewlenija rilevanti tal-eżerċizzju tat-test tal-istress li twettaq fil-livell tal-UE ġew ippubblikati f’Novembru 2018. B’mod partikolari, l-impatt tat-test tal-istress jintwera mill-varjazzjoni fil-kapital CET 1 u fil-proporzjon tal-lieva finanzjarja⁴⁵. Is-sit web tal-EBA jipprovdi dokumenti li janalizzaw ir-riżultati u jagħti wkoll aċċess għal database bl-informazzjoni miġbura mill-banek matul il-proċedura.

85

Minbarra l-EBA, anki xi wħud mill-AK u mill-banek parteċipanti ppubblikaw ir-riżultati tat-test tal-istress imwettaq mill-EBA.

86

Għalhekk, aħna eżaminajna:

1. ir-rilevanza tal-pubblikazzjonijiet tal-EBA;
2. il-preċiżjoni tal-komunikazzjoni mill-awtoritajiet kompetenti u mill-banek.

L-EBA ppubblikat ammont kbir ta’ data, iżda ċerta informazzjoni essenzjali hija nieqsa

87

Il-kwantità tal-informazzjoni ppubblikata mill-EBA tmur ferm lil hinn mill-informazzjoni ppubblikata minn awtoritajiet oħra għat-testijiet tal-istress proprji tagħhom. Din tirriżulta fi trasparenza akbar, b’mod partikolari għall-awtoritajiet superviżorji, għall-analisti bankarji, u għal qarrejja esperti oħra.

88

Sabiex nivvalutaw il-valur informattiv tad-data ppubblikata mill-EBA, aħna eżaminajna jekk l-informazzjoni li hija ppubblikat kinitx tipprovdi tweġibiet għall-mistoqsijiet li ġejjin:

1. X’kienu l-fatturi ewlenin li wasslu għar-riżultati?
2. Ir-riżultati huma komparabbli?
3. Huwa ċar jekk il-banek u s-sistema finanzjarja tal-UE humiex reżiljenti għall-istress?

Informazzjoni dwar il-fatturi ewlenin

89

Fil-livell aggregat, ir-rapport tal-EBA janalizza l-fatturi ewlenin tal-impatt skont it-tip ta’ riskju (riskju ta’ kreditu, riskju tas-suq, riskju operazzjonali) u l-impatti fuq l-entrati prinċipali tal-karta tal-bilanċ. Barra minn hekk, jinkludi deskrizzjoni aktar dettaljata tal-impatt ta’ tipi speċifiċi ta’ riskju u tas-suppożizzjonijiet metodoloġiċi (eż. huwa jiddikjara li t-telf tar-riskju ta’ kreditu huwa l-kontributur ewlieni għall-impatt tal-istress).

90

Ir-rapport tal-EBA dwar ir-riżultati ma fihx l-informazzjoni importanti li ġejja:

• Sa liema punt it-telf ta’ kreditu, li huwa, bil-bosta, l-akbar fattur ewlieni li jwassal għal riżultati negattivi, kien immotivat minn inadempjenzi ġodda jew mnn stokk antik ta’ assi inadempjenti⁴⁶.
• Sa liema punt il-metodoloġija tal-EBA li tinkludi s-suppożizzjonijiet u l-limitazzjonijiet tagħha (ara l-paragrafu 64) jew l-użu tal-parametri referenzjarji tal-BĊE għar-riskju ta’ kreditu (ara l-paragrafi 60-63) kellhom impatt fuq ir-riżultati. Attwalment, l-EBA stess għadha ma evalwatx dawn l-aspetti.

Tqabbil tar-riżultati

91

Ir-rapport tal-EBA jirreferi għall-fatt li hemm varjazzjonijiet kbar bejn il-banek. Fil-fatt, ir-riżultati għall-banek individwali ma jistgħux jitqabblu faċilment minħabba għadd ta’ raġunijiet, pereżempju:

• is-suppożizzjoni ta’ karta tal-bilanċ statika (ara l-paragrafi 65-66) u elementi preskrittivi oħra (ara l-paragrafu 64) tal-metodoloġija għandhom diversi impatti fuq il-banek individwali;
• ir-riżultati tal-banek (jiġifieri l-varjazzjoni fil-proporzjon tal-kapital CET 1) huma affettwati mill-approċċ li huma jużaw biex jikkalkulaw ir-rekwiżiti kapitali regolatorji, jiġifieri dan jaffettwa d-denominatur tal-proporzjon⁴⁷ (ara l-paragrafu 59);
• kull bank jikkonkretizza l-parametri tax-xenarju bażi u ta’ dak avvers bil-mod proprju tiegħu (prinċipalment permezz ta’ mudelli mfassla apposta) (ara l-paragrafi 59-60);
• l-AK ma kellhomx approċċ omoġenu għall-aċċertament tal-kwalità (ara l-paragrafi 73-83).

92

Kif ġie rikonoxxut fil-paragrafu 87, l-EBA tippubblika firxa wiesgħa ta’ informazzjoni utli li altrimenti ma tkunx disponibbli. Madankollu, ir-rapport tal-EBA ma pprovdiex ċerti spjegazzjonijiet li jgħinu lill-qarrej sabiex iċ-ċifri jitqiegħdu f’perspettiva. Pereżempju, huwa ma ppreżentax analiżi tal-banek għal kull pajjiż⁴⁸ li tqabbel ir-riżultati tal-banek mas-severità relattiva tax-xenarju avvers għall-pajjiżhom. Eżempju, hemm nuqqas ta’ spjegazzjoni dwar:

• kemm il-livelli ta’ stress varjaw minn pajjiż għal ieħor;
• kemm il-livelli ta’ stress varjaw mill-kriżi finanzjarja (tqabbil simili kien twettaq mill-Bank tal-Ingilterra);
• l-approċċ użat minn kull bank għall-kalkolu tar-rekwiżiti kapitali tiegħu u kif dan affettwa r-riżultati⁴⁹.

93

Il-Kaxxa 5 tipprovdi eżempji ta’ analiżijiet li aħna wettaqna biex ir-riżultati tal-2018 jitqiegħdu f’perspettiva. Madankollu, din l-informazzjoni u l-implikazzjonijiet għar-reżiljenza ma ġewx inklużi fil-pubblikazzjonijiet tal-EBA.

Reżiljenza tal-banek u tas-sistema finanzjarja

94

Għal kull bank, ir-rapport tal-EBA jippreżenta l-evoluzzjoni ta’ bosta proporzjonijiet tal-kapital (bħall-kapital CET 1 u l-proporzjon tal-lieva finanzjarja), jiġifieri huwa jipprovdi l-valur għall-2017, il-valur wara l-istress (fl-2020) u d-differenza bejn dawn it-tnejn. Il-fatt li r-rapport tal-2018 għall-ewwel darba organizza l-banek skont id-daqs tal-proporzjon tal-kapital CET 1 jikkostitwixxi titjib meta mqabbel mal-passat.

95

Ir-rapport tal-EBA ma fihx informazzjoni kruċjali meħtieġa biex wieħed jieħu idea tar-reżiljenza ta’ bank, jiġifieri biex jifhem jekk bank ikunx qed jirrispetta jew le r-rekwiżiti kapitali tiegħu f’kundizzjonijiet avversi: ir-rekwiżiti kapitali għal kull wieħed mill-banek (jiġifieri l-Pilastru 1, il-Pilastru 2 u r-rekwiżiti ta’ bafer kombinat).

96

Filwaqt li l-persunal tal-EBA kien ippropona l-pubblikazzjoni tar-rekwiżiti kapitali, il-Bord tas-Superviżuri kien irrifjuta din il-proposta. Madankollu, fl-opinjoni tagħha tal-2015, l-EBA rrakkomandat bil-qawwi il-pubblikazzjoni tar-rekwiżiti ta’ fondi proprji. Hija indikat ukoll li d-Direttiva dwar l-Abbuż tas-Suq⁵⁰ tirrikjedi li l-istituzzjonijiet li għandhom titoli kkummerċjati pubblikament iridu jippubblikaw ir-rekwiżiti kapitali⁵¹. L-ex President tal-Bord tas-Superviżuri tal-EBA ddikjara pubblikament bosta drabi li l-AK għandhom jippubblikaw din l-informazzjoni. Bi tqabbil ma’ dan, il-Bank tal-Ingilterra jinkludi din l-informazzjoni fil-pubblikazzjoni tar-riżultati tat-test tal-istress li huwa jwettaq⁵². Il-prassi f’dan il-qasam tvarja minn AK għal oħra (li għandhom l-awtorità li jippubblikaw dawn ir-rekwiżiti) u minn bank għal ieħor (li jistgħu jippubblikawhom fuq inizjattiva proprja tagħhom).

97

Billi l-EBA ma ppubblikatx ir-rekwiżiti kapitali tal-banek, il-qarrejja huma obbligati li jiksbu din l-informazzjoni minn sorsi pubbliċi oħra, li spiss jiddivulgaw id-data b’mod inkonsistenti u f’diversi forom. F’dak li jirrigwarda t-test tal-istress li twettaq fl-2016, aħna fittixna din l-informazzjoni għal kampjun ta’ tmien banek, u sibna li dawn mhux biss ma rrispettawx ir-rekwiżiti ta’ bafer kombinat iżda anki dawk kapitali minimi (jiġifieri l-Pilastru 1 u l-Pilastru 2). Ir-rapport tal-EBA għall-eżerċizzju tal-2016 ma qal xejn dwar din l-informazzjoni importanti.

98

Għall-2018, fuq il-bażi tal-informazzjoni għad-dispożizzjoni tal-EBA, aħna kkonkludejna li l-banek kollha kienu rrispettaw ir-rekwiżiti minimi (il-Pilastru 1 u l-Pilastru 2 fuq bażi ta’ CET 1). Madankollu, erba’ banek ma rrispettawx is-soll imsemmi fl-Artikolu 27.1 tad-Direttiva dwar l-Irkupru u r-Riżoluzzjoni tal-Banek⁵³ (ir-rekwiżiti ta’ fondi proprji biż-żieda ta’ 1.5 punti perċentwali), u dan jista’ jiskatta miżuri ta’ intervent bikri. Aħna identifikajna wkoll disa’ banek li ma rrispettawx ir-rekwiżiti ta’ bafer kombinat tagħhom.

99

Barra minn hekk, il-fatt li għadd ta’ banek kienu f’riskju li ma jirrispettawx is-soll ta’ 3 % għall-proporzjon tal-lieva finanzjarja f’każ ta’ tnaqqis fir-ritmu ekonomiku huwa sors ta’ tħassib li kien jistħoqqlu aktar attenzjoni minn sempliċement linja waħda fir-rapport ta’ 60 paġna tal-EBA⁵⁴.

100

B’kont meħud tal-fatt li t-test tal-istress juża suppożizzjoni ta’ karta tal-bilanċ statika, dan ifisser li l-EBA ma tiġborx informazzjoni dwar l-azzjonijiet ta’ ġestjoni li l-banek jistgħu jieħdu, b’mod partikolari l-għażliet li għandhom f’dak li jirrigwarda l-irkupru u, għalhekk, mhix f’pożizzjoni li tippubblika din l-informazzjoni. Mingħajr din l-informazzjoni addizzjonali, il-kapaċità tal-banek li jimmitigaw l-impatti negattivi tax-xenarju avvers – u b’hekk ir-reżiljenza tagħhom – ma tistax tiġi vvalutata⁵⁵.

101

Ix-xenarji avversi jinbidlu minn eżerċizzju għal ieħor, f’termini kemm ta’ severità kif ukoll tar-riskji koperti. Dan jagħmilha diffiċli li jiġi vvalutat jekk kienx hemm titjib fir-reżiljenza tal-banek jew inkella jekk dawn marrux għall-agħar matul iż-żmien.

102

Fl-2016, il-konklużjoni ġenerali tal-EBA kienet li s-sistema bankarja fl-UE kienet reżiljenti. L-EBA ma għamlitx l-istess dikjarazzjoni espliċita fi-rapport tagħha tal-2018, iżda għadd ta’ AK stqarru li r-riżultati wrew li l-banek taħt is-superviżjoni tagħhom huma reżiljenti. Barra minn hekk, mhux il-banek individwali kollha jew is-sistemi finanzjarji fil-pajjiżi kollha jinsabu f’pożizzjoni tajba:

• tqabbil mal-kriżi finanzjarja tal-2008 jkun juri jekk il-banek tal-UE humiex mgħammra aħjar minn 10 snin ilu biex jiffaċċjaw stress daqshekk sever. Madankollu, kif diġà ġie spjegat, ix-xenarju avvers kien inqas sever mill-kriżi finanzjarja;
• f’dak li jirrigwarda l-banek individwali, kien hemm każijiet ta’ nuqqas ta’ rispett jew kważi tar-rekwiżiti minimi regolatorji (ara l-paragrafi 97-98), u ma twettqet l-ebda analiżi għas-sistema fl-intier tagħha (inklużi effetti ta’ amplifikazzjoni, mudelli komuni, eċċ.);
• hemm ftit eżempji ta’ banek li, ftit wara l-pubblikazzjoni tar-riżultati ta’ test tal-istress, iffaċċjaw nuqqasijiet sinifikanti fil-kapital.

103

Fl-aħħar nett, aħna nosservaw li l-ex kap tal-Bord Superviżorju tal-BĊE enfasizzat ripetutament li fit-twettiq tal-analiżi rigoruża tal-karta tal-bilanċ flimkien ma’ test tal-istress, il-BĊE arrikixxa sostanzjalment l-għarfien li kellu tas-sitwazzjoni finanzjarja attwali tal-banek⁵⁶. Wara li kkunsidrat it-test tal-istress li twettaq fl-2018, hija osservat li dan kien jinvolvi ħafna spejjeż għall-awtoritajiet tas-superviżjoni finanzjarja u li ma pprovdiex biżżejjed għarfien ġdid⁵⁷.

104

Andrea Enria, li dak iż-żmien kien il-President tal-EBA, enfasizza r-rwol pożittiv li l-pressjoni sinifikanti tas-superviżjoni, ikkoordinata mill-EBA, kellha permezz ta’ bosta testijiet tal-istress u ta’ eżerċizzji ta’ rikapitalizzazzjoni⁵⁸ fit-tisħiħ tal-proporzjonijiet tal-kapital tal-banek u li d-divulgazzjoni dettaljata tar-riżultati kienet irrinfurzat ukoll id-dixxiplina fis-suq u kkontribwiet biex terġa’ tinbena l-fiduċja⁵⁹. Iżda huwa ddikjara wkoll li⁶⁰, irrispettivament mill-ammont ta’ data li huma jippubblikaw il-valur informattiv tar-riżultati huwa limitat minħabba d-diżakkoppjament tar-riżultati tat-test tal-istress u l-azzjonijiet superviżorji, kif ukoll minħabba l-inkonsistenza bejn it-trasparenza ta’ dawn ir-riżultati u l-opaċità ta’ dawn l-azzjonijiet.

Il-komunikazzjoni ta’ ċerti awtoritajiet kompetenti u banek turi stampa pożittiva żżejjed

105

Qabel il-pubblikazzjoni, il-Bord tas-Superviżuri kien approva protokoll għall-komunikazzjoni tat-test tal-istress fl-UE kollha, li tfassal biex jippromwovi l-koordinazzjoni, il-konsistenza u l-koerenza fil-komunikazzjoni esterna. Dan il-protokoll jiffoka fuq l-interazzjoni mal-awtoritajiet kompetenti u l-komunikazzjoni esterna tagħhom, u jistabbilixxi standards minimi għall-pubblikazzjonijiet mill-awtoritajiet kompetenti u mill-banek.

106

Minkejja dan, l-istqarrijiet għall-istampa relatati mat-test tal-istress, li ġew ippubblikati mill-awtoritajiet kompetenti u mill-banek parteċipanti, ivarjaw f’termini kemm ta’ kwantità kif ukoll ta’ sustanza. Fil-komunikazzjoni tiegħu, il-BĊE rrefera għar-rapport tal-EBA. Madankollu, aħna identifikajna każijiet, inkluż fiż-żona tal-euro, fejn l-awtoritajiet kompetenti nazzjonali jew il-banek urew stampa pożittiva tar-reżiljenza ta’ bank jew tas-sistema finanzjarja fil-livell tal-pajjiż, minkejja li kien hemm nuqqas ta’ rispett tar-rekwiżiti kapitali minimi regolatorji fix-xenarju avvers (ara l-Kaxxa 6). Dan juri li l-EBA ma għandhiex is-setgħa li tippreskrivi dak li l-awtoritajiet kompetenti individwali u l-banek parteċipanti jippubblikaw. Dan huwa importanti ħafna billi l-AK kollha huma mitluba jikkondividu l-abbozz tal-materjal ta’ komunikazzjoni tagħhom mal-membri tal-persunal tal-EBA qabel il-pubblikazzjoni.

Konklużjonjiet u rakkomandazzjonijiet

107

Skont ir-Regolament tagħha tal-2010, l-EBA għandha l-kompitu, f’kooperazzjoni mal-BERS, li tniedi u tikkoordina t-testijiet tal-istress fl-Unjoni kollha. Biex jiżgura “il-kumparabbiltà u l-affidabbiltà tal-metodi, il-prattiki u r-riżultati”, ir-regolament ta wkoll lill-EBA l-awtorità li titlob l-informazzjoni direttament mingħand l-istituzzjonijiet finanzjarji, u titlob lill-awtoritajiet kompetenti biex iwettqu analiżijiet speċifiċi u spezzjonijiet fuq il-post, kif ukoll biex jipparteċipaw f’dawn l-attivitajiet (ara l-paragrafi 04, 07 u 67).

108

Fil-prattika, l-EBA ddeċidiet li tillimita r-rwol tagħha għat-tnedija tal-attivitajiet relatati mat-test tal-istress, għall-provvediment ta’ metodoloġija u għall-koordinazzjoni ġenerali ta’ dawn l-attivitajiet, mingħajr ma għamlet sforzi ġenwini biex tiżgura l-affidabbiltà u l-kumparabbiltà tar-riżultati prodotti mill-banek skont l-approċċ minn isfel għal fuq (ara l-paragrafi 67-68 u 73-76).

109

Il-manwal tal-EBA li jiddeskrivi l-azzjonijiet ta’ aċċertament tal-kwalità li għandhom jitwettqu mill-awtoritajiet kompetenti ma kienx vinkolanti. Fil-fatt, huwa kellu ftit jew xejn għarfien dwar il-kontenut tal-kontrolli mwettqa mill-awtoritajiet kompetenti u dwar il-mudelli użati mill-banek. B’mod partikolari, f’konformità mal-interpretazzjoni tagħha dwar il-mandat, l-EBA ma talbitx li jitwettqu analiżijiet speċifiċi jew li tipparteċipa f’xi spezzjoni fuq il-post, u lanqas ma twettqu attivitajiet oħra li jiżguraw il-kumparabbiltà u l-affidabbiltà tar-riżultati (ara l-paragrafi 73-83).

Rakkomandazzjoni 1 – Jeħtieġ li l-EBA tirrinforza l-kontroll tagħha fuq il-proċess tat-test tal-istress 

Sabiex tiżgura li r-riżultati ppubblikati jkunu sinifikattivi, kumparabbli u affidabbli, jenħtieġ li l-EBA:

1. Tuża s-setgħat legali tagħha biex tikseb l-informazzjoni kollha li hija tqis meħtieġa mingħand l-awtoritajiet kompetenti u, fejn rilevanti, tipparteċipa fiż-żjarat fuq il-post imwettqa minnhom biex tikseb aċċertament dwar (i) l-affidabbiltà tal-metodi u tal-mudelli użati mill-banek u (ii) ir-riżultati tal-banek. Jenħtieġ li l-għażla tal-banek suġġetti għal sorveljanza speċifika mill-EBA tkun ibbażata fuq ir-riskji.
2. Tipprovdi gwida ċara u vinkolanti għall-awtoritajiet kompetenti u tiżviluppa l-proċeduri ta’ aċċertament tal-kwalità proprji tagħha skont din.
3. F’każijiet debitament ġustifikati, tirrifjuta r-riżultati tat-test tal-istress, jiġifieri f’każijiet fejn l-awtoritajiet kompetenti u l-banek ma jsegwux il-gwida tagħha, u fejn il-kontrolli tal-kwalità tagħha juru li r-riżultati mhumiex sodisfaċenti.
4. Titlob mingħand l-awtoritajiet baġitarji r-riżorsi li hija teħtieġ biex twettaq bis-sħiħ l-obbligi tagħha kif speċifikat fir-Regolament dwar l-EBA.

Data mmirata għall-implimentazzjoni: It-test tal-istress tal-2022

Rakkomandazzjoni 2 – Tiġi kkomplementata l-proċedura minn isfel għal fuq attwali b’elementi minn fuq għal isfel

Jenħtieġ li l-EBA tittestja r-reżiljenza tal-istituzzjonijiet finanzjarji għal żviluppi negattivi fis-suq billi tintroduċi approċċ minn fuq għal isfel biex jikkomplementa l-approċċ minn isfel għal fuq attwali. Dan ikun jiżgura konsistenza akbar u aktar kontroll fuq il-proċess, filwaqt li fl-istess ħin jipprovdi parametru referenzjarju għat-testijiet tal-istress imwettqa mill-awtoritajiet kompetenti u mill-istituzzjonijiet finanzjarji individwali. L-għażla tal-istituzzjonijiet finanzjarji suġġetti għal kwalunkwe wieħed minn dawn l-approċċi tista’ tvarja.

Data mmirata għall-implimentazzjoni: It-test tal-istress tal-2022

110

Il-punt tat-tluq tal-EBA għall-għażla tal-banek kien l-ammont ta’ assi, iżda mbagħad l-EBA ħadet deċiżjoni ad hoc biex teskludi ċerti banek (ara l-paragrafi 19-20). Barra minn hekk, l-EBA ma kkunsidratx ir-riskju sistemiku li l-banek jistgħu jirrappreżentaw għas-sistema finanzjarja. B’riżultat ta’ dan, mhux il-banek vulnerabbli kollha ġew inklużi. Xi wħud mill-banek li ma ġewx inklużi ġew ristrutturati reċentement, kienu minn pajjiżi fejn il-banek għandhom skopertura konsiderevoli għall-bonds sovrani proprji tagħhom, jew għandhom konċentrazzjoni għolja ta’ self improduttiv (ara l-paragrafu 21).

Rakkomandazzjoni 3 – Il-banek jintgħażlu fuq il-bażi tar-riskju aktar milli fuq id-daqs biss

Sabiex jiġi żgurat li l-kampjun tal-banek parteċipanti jkun ikopri r-riskji li hija tkun identifikat bħala rilevanti għall-eżerċizzju, jenħtieġ li l-EBA tespandi l-kopertura ġeografika u, mal-kriterju tad-daqs, iżżid kriterji bbażati fuq ir-riskju għall-għażla tal-banek li għandhom jiġu suġġetti għat-test tal-istress.

Data mmirata għall-implimentazzjoni: It-test tal-istress tal-2022

111

Aħna sibna li l-eżerċizzju tal-EBA ttestja r-reżiljenza tal-banek għal tnaqqis fir-ritmu ekonomiku aktar milli għal xokk li jirriżulta primarjament minn fallimenti fis-sistema finanzjarja, għalkemm kien proprju dan it-tip ta’ xokk li kien il-fattur prinċipali li skatta l-aħħar reċessjoni kbira (ara l-paragrafi 35-36).

112

Barra minn hekk, aħna sibna li riskji sistemiċi sinifikanti – u ċerti pajjiżi u varjabbli – kienu suġġetti għal livell baxx ta’ stress, jew saħansitra għall-ebda stress. Għalkemm l-istress għandu jkun “sever iżda plawżibbli”, la l-EBA u lanqas il-BERS ma stabbilew miżuri ex ante tas-severità għall-proċess. Għal għadd ta’ varjabbli u għal għadd ta’ Stati Membri, l-istress impost mix-xenarju avvers kien ferm inqas minn dak imġarrab matul il-kriżi finanzjarja (ara l-paragrafi 37-52, u l-Kaxxa 2).

Rakkomandazzjoni 4 – Jiġu introdotti xenarji ta’ stress alternattivi

Biex tiżgura li l-istress ikun sever biżżejjed għall-evalwazzjoni tal-potenzjal għal żieda fir-riskju sistemiku f’sitwazzjoni ta’ stress, u biex tivvaluta r-reżiljenza tal-bank għal vulnerabbiltajiet sistemiċi fl-UE, jenħtieġ li l-EBA:

1. Tagħmel il-proċess ta’ identifikazzjoni u aggregazzjoni tar-riskju aktar orjentat lejn l-UE billi:

• Tieħu kont dovut tar-riskji li jkunu ġejjin mill-UE u li jistgħu jiskattaw avveniment avvers b’implikazzjonijiet għas-sistema finanzjarja.
• Tirrikjedi li r-riskji identifikati fit-tabella operattiva tar-riskji tal-EBA jkunu l-input ewlieni għall-immudellar tax-xenarju avvers.

2. Tipprova tipi differenti ta’ xenarji minn eżerċizzju għal ieħor (bħall-istressjar ta’ riskji differenti), u tikkunsidra li żżid xokkijiet addizzjonali, aktar speċifiċi għall-pajjiż, jew analiżijiet tas-sensittività.

3. Tindika l-livell ta’ severità globali li hija qed tfittex għall-parametri ewlenin, u tiddefinixxi kriterji għall-valutazzjoni tal-livelli minimi ta’ severità f’termini assoluti għall-pajjiżi kollha.

Data mmirata għall-implimentazzjoni: It-test tal-istress tal-2020

113

Ir-rwol dominanti li għandhom l-awtoritajiet superviżorji u makroprudenzjali nazzjonali fit-tfassil tat-test tal-istress ma ppermettiex li jiġu żgurati xenarji kumparabbli u imparzjali għall-Istati Membri (ara l-paragrafi 29, 42, 43 u l-Kaxxa 1), billi l-perspettiva ġenerali tal-UE ma ġietx ikkunsidrata b’mod suffiċjenti.

Rakkomandazzjoni 5 – Tiġi adottata struttura ta’ governanza li tiżgura li l-interessi tal-UE jiġu debitament ikkunsidrati

F’Settembru 2017, il-Kummissjoni Ewropea ppreżentat serje ta’ proposti biex twitti t-triq għal integrazzjoni finanzjarja ulterjuri u għal unjoni sħiħa tas-swieq kapitali, li inkludew dispożizzjonijiet dwar il-governanza u l-finanzajment tal-awtoritajiet superviżorji Ewropej, fosthom l-EBA. Madankollu, il-ftehim politiku li ntlaħaq f’Marzu 2019 bejn il-Kunsill u l-Parlament Ewropew ma jipprevedix dan it-tibdil importanti.

Jenħtieġ li l-Kummissjoni, fil-kuntest tar-reviżjoni ta’ tliet snin li jmiss tar-Regolament dwar l-EBA, tindirizza x-xerqien tal-istruttura ta’ governanza tal-EBA.

Data mmirata għall-implimentazzjoni: ir-reviżjoni li jmiss fl-2022

114

L-EBA ppubblikat firxa wiesgħa ta’ data dwar ir-riżultati tat-testijiet tal-istress, b’hekk żiedet it-trasparenza (ara l-paragrafi 84 u 87). Madankollu, ir-rekwiżiti kapitali tal-Pilastru 2, u għaldaqstant ir-rekwiżiti kapitali kumplessivi ma ġewx ippubblikati. B’hekk, l-informazzjoni l-aktar kruċjali għall-fehim tal-implikazzjonijiet tat-testijiet tal-istress ma kinitx disponibbli (ara l-paragrafi 94-99).

115

Ir-rapport tal-EBA ma jagħmilx rabta bejn ir-riżultati u x-xenarju avvers. Barra minn hekk, huwa ma fihx informazzjoni importanti dwar il-fatturi ewlenin li wasslu għar-riżultati tal-banek, li tkun tista’ tqiegħedhom f’perspettiva (ara l-paragrafi 90, 92-93 u l-Kaxxa 5).

116

Il-prattiki attwali tal-banek u tal-awtoritajiet kompetenti f’dak li jirrigwarda l-pubblikazzjoni ta’ rekwiżiti kapitali addizzjonali jvarjaw iżda f’ħafna Stati Membri din id-data hija disponibbli għall-pubbliku (ara l-paragrafu 96).

117

F’bosta każijiet, l-awtoritajiet nazzjonali (prinċipalment il-banek ċentrali) u l-banek ippubblikaw stampa preġudikata tal-impatt tal-istress fuq il-pożizzjoni finanzjarja tal-banek (ara l-paragrafu 106 u l-Kaxxa 6).

Rakkomandazzjoni 6 – Jiżdied il-valur informattiv tal-pubblikazzjonijiet

Sabiex il-qarrejja tal-pubblikazzjoni tal-EBA jkunu jistgħu jifhmu l-implikazzjonijiet tad-data li tiġi ppubblikata, jenħtieġ li l-EBA:

1. Tinkludi rekwiżiti kapitali minimi speċifiċi għall-istituzzjonijiet tal-banek fl-informazzjoni li hija tippubblika, u tippreżenta r-riżultati b’mod li jippermetti lill-utenti jqiegħdu r-riżultati f’perspettiva (eż. ir-raggruppament ta’ riżultati skont il-pajjiż, skont il-livell ta’ stress li l-banek kienu esposti għalih, u skont it-tip u d-daqs tal-bank).
2. Tagħmel dikjarazzjonijiet ċari dwar ir-reżiljenza tas-sistema finanzjarja tal-UE fl-intier tagħha bi tqabbil mat-test tal-istress preċedenti, u tindika b’mod ċar il-fatturi li għandhom l-akbar impatt fuq ir-reżiljenza.

Data mmirata għall-implimentazzjoni: It-test tal-istress tal-2022

Dan ir-Rapport ġie adottat mill-Awla IV, immexxija mis-Sur Neven MATES, Membru tal-Qorti tal-Awdituri, fil-Lussemburgu fil-laqgħa tagħha tal-4 ta’ Ġunju 2019.

Annessi

Anness I

L-istruttura ta’ governanza u r-rwoli tal-atturi fit-test tal-istress

L-istruttura ta’ governanza tal-EBA

L-EBA hija aġenzija regolatorja tal-UE.

Bord tas-Superviżuri: Dan huwa magħmul mill-President tal-EBA u mill-kapijiet tal-awtoritajiet nazzjonali għas-superviżjoni bankarja tat-28 Stat Membru tal-Unjoni Ewropea. Il-Bord jieħu d-deċiżjonijiet kollha dwar il-politika tal-EBA, u jadotta l-abbozzi ta’ standards tekniċi, il-linji gwida, l-opinjonijiet u r-rapporti. Huwa jieħu wkoll id-deċiżjoni finali dwar il-baġit tal-EBA.

Bord Maniġerjali: Dan huwa magħmul mill-President tal-EBA u minn sitt membri li jiġu eletti mill-Bord tas-Superviżuri. Huwa jieħu deċiżjonijiet dwar kwistjonijiet operazzjonali tal-EBA u huwa responsabbli għall-implimentazzjoni tal-programm ta’ ħidma tal-EBA. Ir-rwol tiegħu huwa li jiżgura li l-EBA taqdi l-missjoni tagħha u twettaq il-kompiti assenjati lilha skont ir-regolament tagħha.

L-istruttura ta’ governanza tal-BERS u l-gruppi ta’ ħidma

Il-BERS huwa korp indipendenti tal-UE.

BĠ (Bord Ġenerali): Il-Bord Ġenerali, ippresedut mill-President tal-BĊE, huwa l-korp tal-BERS inkarigat mit-teħid ta’ deċiżjonijiet. Huwa għandu l-mandat li jidentifika u jipprijoritizza r-riskji sistemiċi u, fejn ikun meħtieġ, joħroġ rakkomandazzjonijiet u twissijiet. Il-President u l-Viċi President tal-Bank Ċentrali Ewropew (BĊE), il-Gvernaturi tal-banek ċentrali nazzjonali tal-Istati Membri, membru wieħed tal-Kummissjoni Ewropea, il-Presidenti tal-EBA, tal-EIOPA u tal-ESMA, il-President u żewġ Viċi Presidenti tal-Kumitat Konsultattiv Xjentifiku (ASC) u l-President tal-Kumitat Konsultattiv Tekniku (ATC) huma l-membri tal-Bord Ġenerali bi drittijiet tal-vot. Il-membri li ma jistgħux jivvutaw huma r-rappreżentanti ta’ livell għoli ta’ awtoritajiet kompetenti nazzjonali, il-President tal-Kumitat Ekonomiku u Finanzjarju, il-gvernaturi tal-banek ċentrali nazzjonali jew ir-rappreżentanti għoljin mill-Iżlanda, min-Norveġja u mil-Liechtenstein.

Ix-xenarji tat-test tal-istress jitħejjew u jiġu diskussi fil-livell tekniku, qabel ma jiġu approvati mill-Bord Ġenerali.

ATC (Kumitat Konsultattiv Tekniku): L-ATC jipprovdi pariri u assistenza dwar kwistjonijiet li huma rilevanti għall-ħidma tal-BERS. Il-kompożizzjoni tal-membri tal-ATC tirrifletti kompletament dik tal-Bord Ġenerali u tinkludi rappreżentanti mill-banek ċentrali nazzjonali, mill-awtoritajiet superviżorji nazzjonali, mit-tliet ASE, mill-Kummissjoni Ewropea (KE), mill-ASC u mill-Istati Membri taż-ŻEE li mhumiex fl-UE. Ix-xenarji tat-test tal-istress jitħejjew u jiġu diskussi mill-ATC.

TFST (Task Force dwar l-Ittestjar tal-Istress): It-TFST ġiet stabbilita taħt l-awspiċji tal-ATC; hija tikkoordina mal-istrutturi xierqa tal-ASE u tiddependi ħafna fuq l-appoġġ tekniku u ta’ mmudellar tal-BĊE. Hija tħejji l-abbozzi tax-xenarji li jiġu diskussi mill-ATC u li wara jiġu ppreżentati biex jiġu diskussi u approvati mill-Bord Ġenerali. Għal din ir-raġuni, il-President jibgħat rapport lill-ATC, lill-Kumitat tat-Tmexxija u lill-Bord Ġenerali. It-TFST hija magħmula minn esperti mill-banek ċentrali u mill-awtoritajiet kompetenti nazzjonali, kif ukoll mill-BĊE, mill-EIOPA, mill-EBA, mill-ESMA u mill-Kummissjoni Ewropea.

L-atturi u r-rwoli tagħhom fit-test tal-istress

Ir-rwoli tad-diversi atturi fit-test tal-istress fil-livell tal-UE jintwerew fil-Figura 1.

Anness II

Ir-riskji identifikati fl-istħarriġ minn isfel għal fuq u r-riskji magħżula mill-Bord Ġenerali tal-BERS

01

It-Tabella 1 tqabbel l-erba’ riskji identifikati li fl-istħarriġ minn isfel għal fuq irċevew l-ogħla punteġġi (ara l-paragrafu 29) mal-erba’ riskji li eventwalment intgħażlu mill-Bord Ġenerali tal-BERS biex jimmotivaw ix-xenarju kif spjegat fin-narrattiva.

02

L-ewwel tliet riskji magħżula mill-Bord Ġenerali tal-BERS fil-biċċa l-kbira jikkorrispondu għal tlieta mir-riskji prinċipali identifikati mill-istħarriġ minn isfel għal fuq.

03

B’kuntrast ma’ dan, ġie inkluż ir-raba’ riskju fin-narrattiva (riskji ta’ likwidità fis-settur finanzjarju mhux bankarju), għalkemm ir-riskji predefiniti relatati miegħu ngħataw prijorità relattivament baxxa fl-istħarriġ minn isfel għal fuq⁶¹.

Anness III

Il-varjabbli ewlenin tax-xenarju avvers tal-EBA għall-2018 meta mqabbel mal-kriżi finanzjarja

Noti finali

¹ Ir-Rapport tal-Grupp ta’ Livell Għoli dwar is-Superviżjoni Finanzjarja fl-UE (Rapport de Larosière), 2009, il-paragrafu 14.

² Il-Bord Ewropew dwar ir-Riskju Sistemiku (BERS) twaqqaf bħala korp indipendenti permezz tar-Regolament (UE) Nru 1092/2010 tal-Parlament Ewropew u tal-Kunsill tal-24 ta’ Novembru 2010 biex jissorvelja s-sistema finanzjarja tal-Unjoni Ewropea (UE) u jipprevjeni u jimmitiga r-riskju sistemiku, (ĠU L 331, 15.12.2010, p. 1).

³ L-Artikolu 32.3(a) tar-Regolament (UE) Nru 1093/2010 tal-Parlament Ewropew u tal-Kunsill li jistabbilixxi Awtorità Superviżorja Ewropea (Awtorità Bankarja Ewropea) (magħruf bħala r-“Regolament dwar l-EBA”), (ĠU L 331, 15.12.2010, p. 12).

⁴ Il-membri tal-BERS jinkludu: il-Kummissjoni Ewropea, il-BĊE, l-EBA, l-EIOPA u l-ESMA, u l-awtoritajiet makroprudenzjali nazzjonali (banek ċentrali u awtoritajiet superviżorji kompetenti).

⁵ It-Task Force tal-BERS dwar l-Ittestjar tal-Istress ġiet stabbilita taħt l-awspiċji tal-Kumitat Tekniku Konsultattiv tal-BERS u tinkludi persunal mis-Segretarjat tal-BERS u mill-Membri tal-BERS, inkluża l-EBA.

⁶ Ir-Regolament Nru 1093/2010, l-Artikolu 32(3a): “Bl-iskop li jsiru l-valutazzjonijiet madwar l-Unjoni kollha tar-reżiljenza tal-istituzzjonijiet finanzjarji taħt dan l-Artikolu, l-Awtorità tista’, b’konformità mal-Artikolu 35 u suġġett għall-kundizzjonijiet stipulati fih, tirrikjedi l-informazzjoni direttament minn dawk l-istituzzjonijiet finanzjarji. Tista’ tirrikjedi wkoll li l-awtoritajiet superviżorji (kompetenti) iwettqu analiżijiet speċifiċi. Tista’ titlob lill-awtoritajiet kompetenti biex iwettqu spezzjonijiet fuq il-post, u tista’ tieħu sehem f’dawn l-ispezzjonijiet fuq il-post b’konformità mal-Artikolu 21 u suġġett għall-kundizzjonijiet stipulati fih, biex tiġi żgurata l-komparabbiltà u l-affidabbiltà tal-metodi, il-prattiki u r-riżultati”.

⁷ L-Artikolu 42 tar-Regolament dwar l-EBA.

⁸ Ir-Rapport tal-Kummissjoni lill-Parlament Ewropew u lill-Kunsill dwar l-operat tal-Awtoritajiet Superviżorji Ewropej (ASE) u s-Sistema Ewropea tas-Superviżjuri Finanzjarji (SESF), COM(2014) 509 final tat-8.8.2014

⁹ COM(2017) 536 final tal-20.9.2017, kif emendat minn COM(2018) 646 final tat-12.9.2018.

¹⁰ L-Artikolu 21(2)(b) tar-Regolament dwar l-EBA.

¹¹ Il-Premessa 43 tar-Regolament dwar l-EBA, u r-“Rapport de Larosière”, il-paragrafu 4.

¹² L-Artikolu 22(2) u l-Artikolu 23 tar-Regolament dwar l-EBA.

¹³ Il-Kumitat ta’ Basel dwar is-Superviżjoni Bankarja, il-Bank għall-Ħlasijiet Internazzjonali, Stress testing principles (Prinċipji tal-ittestjar tal-istress), aġġornat l-aħħar f’Ottubru 2018.

¹⁴ EBA/GL/2018/03 tad-19 ta’ Lulju 2018: Guidelines on the revised common procedures and methodologies for the SREP and supervisory stress testing (Linji gwida dwar il-proċeduri u l-metodoloġiji komuni riveduti għas-SREP u għall-ittestjar tal-istress superviżorju.

¹⁵ L-Awstrija, il-Belġju, il-Ġermanja, Spanja, il-Finlandja, Franza, l-Irlanda, l-Italja u n-Netherlands.

¹⁶ Id-Danimarka, l-Ungerija, in-Norveġja, il-Polonja, l-Iżvezja u r-Renju Unit.

¹⁷ Fl-2011 u fl-2014, il-kampjun tat-test tal-istress kien jinkludi banek li kienu għaddejjin minn ristrutturar.

¹⁸ Skont it-tabella operattiva tar-riskji tal-EBA ta’ Diċembru 2017 li kklassifikat is-sistemi finanzjarji tal-pajjiżi skont il-proporzjonijiet tal-NPLs tagħhom, kien hemm ħames pajjiżi (il-Greċja, Ċipru, il-Portugall, il-Bulgarija u s-Slovenja) li kellhom proporzjonijiet tal-NPLs ta’ madwar 10 %. L-ebda wieħed minn dawn il-ħamsa ma kien inkluż fil-kampjun tat-test tal-istress.

¹⁹ Il-membri tal-BERS jinkludu l-Kummissjoni Ewropea, il-BĊE, l-EBA u l-awtoritajiet makroprudenzjali nazzjonali (banek ċentrali u awtoritajiet superviżorji kompetenti).

²⁰ Persunal mid-Direttorati għall-Politika Makroprudenzjali u l-Istabbiltà Finanzjarja, Internazzjonali u tal-Ekonomija.

²¹ Bil-liġi, il-BERS huwa meħtieġ jipproduċi b’mod regolari tabelli operattivi tar-riskji. Il-BERS ma jivvalutax ir-riskji jew jikkummenta dwarhom, iżda jipprovdi informazzjoni speċifika għall-pajjiż għal żmien speċifiku (jiġifieri ma hemm l-ebda data storika għall-valutazzjoni tat-tibdil).

²² F’dak li jirrigwarda l-kwalità tal-assi, eż. self improduttiv, teżisti biss rabta indiretta bħala fattur għall-introjtu tal-banek u deskrizzjoni ta’ xenarju tat-tip ġenerali b’impatt fuq il-prezzijiet tal-proprjetà immobbli u fuq is-self improduttiv, iżda mhux xenarju mfassal speċifikament biex jaffettwa lil banek b’portafolli dgħajfin.

²³ Fl-2019, il-BĊE wettaq test awtonomu tal-istress fuq il-likwidità.

²⁴ L-Artikolu 22(2) tar-Regolament dwar l-EBA.

²⁵ It-tabella operattiva tar-riskji hija meħtieġa mill-Artikolu 22(2) tar-Regolament dwar l-EBA.

²⁶ Il-Bank għall-Ħlasijiet Internazzjonali, l-Istitut għall-Istabbiltà Finanzjarja, FSI Insights on policy implementation No 12, stress-testing banks – a comparative analysis (Fehim approfondit tal-FSI dwar l-implimentazzjoni ta’ politika Nru 12, ittestjar tal-istress għall-banek – analiżi komparattiva), Novembru 2018.

²⁷ Qabel l-2018, ix-xenarju bażi kien ibbażat fuq projezzjonijiet mill-Kummissjoni Ewropea.

²⁸ Rodrigo Alfaro/Matthias Drehmann, BIS quarterly Review (Reviżjoni Trimestrali tal-BIS), Diċembru 2009, il-paġna 34, kif ukoll Borio, Drehmann, Tsatsaronis, BIS Working Papers No 369 (Dokumenti ta’ Ħidma Nru 369 tal-BIS), p. 8.

²⁹ Bħal riskji relatati mal-kwalità tal-assi fil-portafolli tal-banek jew tħassib rigward il-profittabbiltà tal-banek.

³⁰ Jeħtieġ li jiġi enfasizzat li fir-“Rapport de Larosière” ġie konkluż li, fost oħrajn, il-fatturi sottostanti fundamentali li wasslu għall-kriżi kienu l-ammont sinifikanti ta’ likwidità u l-kundizzjonijiet tar-rati baxxi tal-imgħax relatati li kienu prevalenti fil-livell globali.

³¹ Waħda mis-suppożizzjonijiet ta’ mmudellar kienet li x-xokkijiet relatati mar-rati tal-imgħax jiġu kkalibrati fuq il-bażi tal-perjodu ta’ wara l-2012, għall-kuntrarju tax-xokkijiet ekonomiċi li kienu ġew ikkalibrati fuq il-bażi ta’ perjodu ferm itwal. Ir-raġunament sottostanti kien li mill-2012 l-awtoritajiet monetarji kienu lesti jintervjenu biex fi żminijiet ta’ stress iżommu r-rati f’livell baxx.

³² Il-Kumitat ta’ Basel dwar is-Superviżjoni Bankarja, il-Bank għall-Ħlasijiet Internazzjonali, Stress testing principles (Prinċipji tal-ittestjar tal-istress), li ġie aġġornat l-aħħar f’Ottubru 2018, p. 6.

³³ Ir-Rapport Nru 18/228 tal-FMI dwar il-Pajjiż jiddikjara li firxa wiesgħa ta’ testijiet tas-sensittività saru biex tiġi analizzata r-reżiljenza tas-sistema bankarja taż-żona tal-euro għal bidliet usa’ fil-fatturi ta’ riskju. Test invers tal-istress fuq assi kumplessi opaki vvaluta x-xokk ta’ valwazzjoni derivat minn ipprezzar ħażin meħtieġ biex jiġu eżawriti l-bafers kapitali.

³⁴ Il-banek għandhom diversi possibbiltajiet għall-istabbiliment tar-rekwiżiti kapitali tagħhom. Huma jistgħu jużaw l-hekk imsejjaħ approċċ standardizzat jew inkella l-approċċ IRB (Ibbażat fuq Klassifikazzjonijiet Interni) (fil-livell bażi jew avvanzat). F’dan l-aħħar każ, x’aktarx li jintużaw il-mudelli. Bil-liġi, dawn il-mudelli jridu jiġu approvati mill-awtoritajiet superviżorji tal-banek.

³⁵ Ir-rekwiżiti kapitali huma espressi bħala perċentwal tal-assi mwieżna għar-riskju.

³⁶ Minħabba żbalji fl-iżvilupp, fl-implimentazzjoni u/jew fl-użu ta’ dawn il-mudelli, ir-riskji jistgħu jiġu stmati żżejjed jew b’mod insuffiċjenti, anki konsiderevolment. Dan ġeneralment jissejjaħ “riskju tal-mudell”. Il-banek jistgħu wkoll jikkalibraw il-mudelli biex jimminimizzaw l-impatt tal-istress fuq ir-riżultati tagħhom.

³⁷ Il-metodoloġija użata għall-ġenerazzjoni tal-parametri referenzjarji ġiet ippreżentata wkoll lill-industrija bankarja (il-banek li jinsabu fiż-żona tal-euro biss) fil-kuntest tas-sessjoni ta’ ħidma tal-industrija rigward it-test tal-istress, qabel it-twettiq tat-test.

³⁸ Filwaqt li l-EBA temmen li trasparenza akbar fir-rigward tal-metodoloġija għall-parametri referenzjarji għar-riskju ta’ kreditu tista’ tippermetti li l-banek jimmanipulaw ir-riżultati b’mod aktar faċli, din il-manipulazzjoni tista’ ssir f’kull parti tal-proċess.

³⁹ Dan jista’ jinkludi l-applikazzjoni ta’ miżuri kif stabbiliti fi pjan ta’ rkupru ta’ bank. Il-pjanijiet ta’ rkupru jiddeskrivu l-miżuri li l-banek għandhom jieħdu f’każ li s-sitwazzjoni finanzjarja tagħhom tiddeterjora serjament, u jridu jiġu aġġornati kull sena.

⁴⁰ L-Artikolu 32 (3a) u (3b) tar-Regolament dwar l-EBA.

⁴¹ Ara pereżempju l-manwali tal-EBA dwar l-aċċertament tal-kwalità.

⁴² Pereżempju, l-istħarriġ tagħna wera li l-komprensività tad-data li ġiet ipprovduta lill-awtoritajiet kompetenti f’konformità mal-Anness 3 fl-eżerċizzju tal-2016 kienet tvarja sinifikattivament (id-dokumenti kienu jvarjaw minn 11-il paġna sa 180 paġna).

⁴³ Il-punteġġ SREP globali jvarja mill-Grad 1 (l-ebda riskju ta’ impatt) sal-Grad 4 (riskju għoli).

⁴⁴ Proporzjon CET 1 = kapital CET 1 / ∑ Ammonti tal-Iskopertura għar-Riskju (għar-riskju ta’ kreditu, għar-riskju tas-suq, għar-riskju operazzjonali eċċ.).

⁴⁵ Il-proporzjon ġie introdott wara l-kriżi finanzjarja biex tiġi limitata l-akkumulazzjoni ta’ lieva eċċessiva fis-settur bankarju (huwa ma jiħux kont tar-riskji bankarji). Dan jikkorrispondi għal: Kapital tal-Grad 1/somma tal-valuri tal-iskopertura tal-assi u tal-entrati li ma jidhrux fil-karta tal-bilanċ.

⁴⁶ L-aħħar aspett huwa partikolarment rilevanti, billi t-telf jista’ jkun ġej mill-fatt li l-metodoloġija tal-EBA hija aktar stretta mill-kontabbiltà ta’ bank. Jekk dan ikun il-każ, it-telf ta’ kreditu fit-test tal-istress ikun jenfasizza s-sottoproviżjonament attwali aktar milli t-telf addizzjonali futur f’xenarju avvers.

⁴⁷ Pereżempju, ir-rekwiżiti kapitali għar-riskju ta’ kreditu jibqgħu fil-biċċa l-kbira l-istess għall-banek (dawk l-inqas sofistikati) li jużaw l-approċċ standardizzat, iżda jiżdiedu għall-banek li jużaw l-approċċ IRB ta’ fondazzjoni peress li tiżdied il-probabbiltà ta’ inadempjenza. Madankollu, huma biss ir-rekwiżiti kapitali tal-banek (l-aktar sofistikati) li jużaw l-approċċ IRB avvanzat li fil-biċċa l-kbira jkunu jirriflettu x-xenarju avvers.

⁴⁸ Pereżempju, għall-kuntrarju tar-rapport tal-2016, ir-rapport tal-2018 jinkludi tabella waħda li tqabbel, f’forma aggregata, il-proporzjonijiet tal-kapital CET 1 tranżizzjonali u inklussivi (fully loaded) skont il-ġurisdizzjoni, iżda ma jipprovdix ripartizzjoni għall-pajjiżi li jinsabu fiż-żona tal-euro (jidhru biss sitt pajjiżi, iż-żona tal-euro u l-UE). Għandu jiġi osservat li fl-2016, id-data għal kull pajjiż ġiet eskluża mill-pubblikazzjoni finali fuq talba tal-BĊE, fir-rwol tiegħu bħala awtorità kompetenti.

⁴⁹ Ir-rapport tal-EBA (p. 22) sempliċiment iddikjara li fit-tqabbil tar-riżultati inklussivi u tranżizzjonali speċifiċi għall-banek, l-evoluzzjoni fil-proporzjonijiet tal-kapital tal-banek u l-impatt, kemm bl-arranġamenti tranżizzjonali kif ukoll mingħajrhom, ivarjaw minn bank għal ieħor. Huwa ma jipprovdix spjegazzjoni dwar kif il-banek ibbenefikaw minn dawn id-diversi arranġamenti, għalkemm din l-informazzjoni hija viżibbli fl-għodod interattivi online.

⁵⁰ Id-Direttiva 2003/6/KE tal-Parlament Ewropew u tal-Kunsill tat-28 ta’ Jannar 2003 dwar insider dealing u manipulazzjoni tas-suq (abbuż tas-suq), (ĠU L 96, 12.4.2003, p. 16).

⁵¹ Opinjoni tal-EBA dwar l-interazzjoni tal-Pilastru 1, il-Pilastru 2, ir-rekwiżiti ta’ bafer kombinat u r-restrizzjonijiet fuq id-distribuzzjonijiet, 16.12.2015, il-paragrafi 10-13, 15. https://www.eba.europa.eu/documents/10180/983359/EBA-Op-2015-24+Opinion+on+MDA.pdf.

⁵² Stress testing the UK banking system: 2017 results, both on an aggregate and a bank-by-bank basis (Ittestjar tal-istress tas-sistema bankarja fir-Renju Unit: riżultati tal-2017, kemm fuq bażi aggregata kif ukoll fuq bażi speċifika għall-banek), p. 10.

⁵³ Id-Direttiva 2014/59/UE tal-Parlament Ewropew u tal-Kunsill, (ĠU L 173, 12.6.2014, p. 190).

⁵⁴ Christian Stiefmueller, Banks stress-tests 2018: Trying too hard to reassure (Testijiet tal-istress għall-banek 2018: Sforzi żejda biex nipprovdu assigurazzjoni), Finance Watch, 7 ta’ Novembru 2018.

⁵⁵ Il-valutazzjoni tal-kredibbiltà u tal-fattibbiltà ta’ dawn l-għażliet ta’ rkupru hija parti minn superviżjoni kontinwa.

⁵⁶ Diskors minn Danièle Nouy, A year of the SSM – résumé and outlook (Sena tal-MSU – sintesi u prospettiva), fil-European Supervisor Education Initiative Conference 2015, Praga, Ottubru 2015.

⁵⁷ Handelsblatt, “EZB fordert Banken-Stresstest 2.0” ta’ A Kröner u J Deters, 27.11.2018.

⁵⁸ Diskors minn Andrea Enria, li dak iż-żmien kien il-President tal-Awtorità Bankarja Ewropea, mogħti fid-Danmarks Nationalbank, 14.06.2017.

⁵⁹ Osservazzjonijiet introduttorji minn Andrea Enria, mogħtija fil-Kollokju EBA-FMI f’Londra, 1.3.2017.

⁶⁰ Diskors minn Andrea Enria, li dak iż-żmien kien il-President tal-Awtorità Bankarja Ewropea, mogħti fil-Bank Nazzjonali tar-Rumanija, 15.11.2018.

⁶¹ B’mod partikolari, “skarsezzi ta’ likwidità fis-swieq”, “skemi tal-pensjoni”, u “fondi ta’ investiment u istituzzjonijiet finanzjarji oħra”.

Risposti tal-Kummissjoni

Introduzzjoni

09

Il-Kummissjoni kienet irrikonoxxiet ir-riskji li l-korp tat-teħid tad-deċiżjonijiet tal-ASE jkun influwenzat mill-interessi nazzjonali u ma jqisx biżżejjed l-interess ġenerali Ewropew. Għaldaqstant, fl-2017 il-Kummissjoni ressqet proposta biex jiġu emendati r-regolamenti tal-Awtoritajiet Superviżorji Ewropej (inkluża l-EBA) li jittrattaw, fost oħrajn, ma’ kwistjonijiet ta’ finanzjament u governanza. B’mod partikolari, wieħed mill-għanijiet kien li jiġi żgurat li t-teħid ta’ deċiżjonijiet ikun aktar orjentat lejn l-UE milli fil-preżent. B’mod partikolari, il-Kummissjoni pproponiet li jenħtieġ li l-EBA jkollha bord eżekuttiv b’membri full-time, abbażi ta’ lista qasira mfassla mill-Kummissjoni, u maħtura mill-Kunsill, li ma jkollux drittijiet tal-vot fuq il-bord.

Madankollu, il-koleġiżlaturi ma setgħux jilħqu ftehim dwar din is-soluzzjoni u l-proposta għal tali bidliet tneħħiet bl-aħħar ftehim politiku tal-21 ta’ Marzu 2019. Madankollu, bl-intenzjoni li tissaħħaħ il-governanza tal-Awtoritajiet Superviżorji Ewropej b’mezzi oħra, il-ftehim politiku tal-21 ta’ Marzu 2019 isaħħaħ il-pożizzjoni tal-President. B’mod partikolari, mid-dħul fis-seħħ ta’ dawn id-dispożizzjonijiet modifikati, il-President għandu jinħatar mill-Kunsill, wara konferma mill-Parlament Ewropew, abbażi ta’ lista qasira ta’ kandidati kwalifikati mħejjija mill-Bord tas-Superviżuri bl-assistenza tal-Kummissjoni. Il-President se jkollu wkoll is-setgħa li jivvutaw fil-korp ewlieni ta’ deċiżjoni tal-Bord tas-Superviżuri u d-dritt espliċitu li jressqu abbozzi ta’ deċiżjonijiet għall-adozzjoni.

Konklużjonijiet u rakkomandazzjonijiet

Rakkomandazzjoni 5: Jenħtieġ li l-istruttura ta’ governanza tiżgura li l-interessi tal-UE jitqiesu kif xieraq.

Il-Kummissjoni taċċetta r-rakkomandazzjoni u taqbel li jenħtieġ li l-istruttura ta’ governanza tal-Awtorità Bankarja Ewropea (u l-Awtoritajiet Superviżorji Ewropej l-oħra) tiżgura li l-interessi tal-UE jitqiesu kif xieraq.

Kif meħtieġ mill-Artikolu 81 tar-Regolament 1093/2010 (u f’konformità mal-ftehim politiku tal-21 ta’ Marzu 2019 bejn il-koleġiżlaturi), sal-2022 il-Kummissjoni se terġa’ teżamina l-operat tal-EBA. Dan ir-rieżami se jqis ukoll il-governanza tal-EBA. Abbażi tal-eżitu ta’ dak ir-rieżami, il-Kummissjoni se tiddetermina jekk ikunx iġġustifikat aktar titjib fil-governanza tal-EBA.

Risposti tal-EBA

Kummenti ġenerali

L-EBA tilqa’ r-rapport tal-QEA u tirrikonoxxi l-isforzi li saru mill-QEA biex tipprovdi għarfien siewi biex ittejjeb l-effiċjenza tat-test tal-istress fl-UE kollha fil-futur.

Mill-2011 ’l hawn, l-EBA wettqet erba’ eżerċizzji tat-test tal-istress. It-tħabbir tat-test tal-istress iffaċilita livell konsiderevoli ta’ azzjoni preventiva. L-eżerċizzji tal-EBA għenu biex tissaħħaħ b’mod sinifikanti l-pożizzjoni kapitali tal-banek Ewropej, l-identifikazzjoni xierqa ta’ self improduttiv u l-azzjoni kontinwa biex jitnaqqsu u tejbu b’mod sinifikanti l-fehim tas-suq tas-sistema bankarja tal-UE.

Filwaqt li l-valutazzjoni superviżorja bank b’bank tibqa’ taħt ir-responsabbiltà tas-superviżuri nazzjonali, l-EBA tibbaża l-analiżi tagħha fuq għodod statistiċi li jippermettu li r-riżultati tal-banek stess jitqabblu mal-oħrajn. Filwaqt li wettqet kampjun transkonfinali kbir ta’ banek u ġabret l-informazzjoni li qabel kienet disponibbli biss f’livell nazzjonali, l-EBA stabbilixxiet l-ewwel bażi ta’ data komprensiva ta’ dan it-tip fl-Ewropa.

B’mod simili għall-Istati Uniti, ir-riżultati tal-istress madwar l-UE kollha huma żvelati fuq bażi ta’ bank b’bank, iżda l-granularità tal-informazzjoni pprovduta fl-UE kienet mingħajr preċedent, kif rikonoxxut mir-rapport tal-QEA. Dan jirrappreżenta benefiċċju addizzjonali f’komunità superviżorja frammentata bħal fl-UE. Iċ-ċifri żvelati jikkomplementaw ir-riżultati, u jintużaw minn parteċipanti fis-suq biex iwettqu t-testijiet tal-istress jew analiżi ġenerali tagħhom stess.

L-eżerċizzju jinvolvi ħafna atturi u jsir taħt skadenzi stretti. Dan iwassal neċessarjament għal sfidi fl-istruttura tal-governanza, li huwa diffiċli fi kwalunkwe test tal-istress iżda b’mod partikolari f’kuntest mifrux mar-reġjun kollu. Ir-rwol tal-EBA bħala koordinatur, żviluppatur u gwardjan tal-metodoloġija jeħtieġ li jiġi rrikonċiljat ma’ qafas legali li fih l-EBA għandha rwol limitat fl-iżgurar tal-kwalità tar-riżultati tal-banek u r-riżorsi skarsi.

Kif jindika r-rapport, l-istabbiliment tal-UE jeħtieġ sforz addizzjonali biex tiġi żgurata l-konsistenza fost il-banek li jappartjenu għal ġurisdizzjonijiet differenti, u soġġett għal regoli u prattiki superviżorji mhux armonizzati b’mod sħiħ. L-EBA hija impenjata li tikkunsidra r-rakkomandazzjonijiet tal-QEA bħala parti mid-diskussjoni li għaddejja dwar bidliet possibbli fuq perjodu itwal fit-test tal-istress madwar l-UE kollha.

L-EBA kkollaborat mal-BERS u mal-BĊE rigward dawn it-tweġibiet fejn rilevanti.

Kummenti dettaljati

Sommarju Eżekuttiv

VII

L-EBA ma tikkummentax dwar il-governanza tagħha stess lil hinn minn dak li ġie ppubblikat fl-“Opinjoni tal-Awtorità Bankarja Ewropea dwar il-konsultazzjoni pubblika dwar l-operat tal-Awtoritajiet Superviżorji Ewropej”.

VIII

Il-kostitwenza tal-Bord tas-Superviżuri tal-EBA u l-Bord Ġenerali u s-sottogruppi tal-BERS hija f’ħafna każijiet l-istess u għalhekk il-kollaborazzjoni bejn dawn iż-żewġ organizzazzjonijiet isseħħ matul il-proċess kollu.

IX

Ir-rwol tal-EBA jirrifletti l-governanza u r-riżorsi tagħha. Dan l-aspett huwa kruċjali f’ħafna deċiżjonijiet dwar it-twaqqif u l-implimentazzjoni tal-eżerċizzju.

Id-diviżjoni tal-kompiti attwalment implimentata relatata mat-testijiet tal-istress bejn l-EBA u l-AK fejn l-AK għandhom ir-responsabbiltà sħiħa għall-assigurazzjoni tal-kwalità hija mod prudenti u effiċjenti biex jitwettaq l-eżerċizzju, meta wieħed iqis l-istabbiliment legali attwali, il-governanza u r-riżorsi. L-EBA tilqa’ il-kollaborazzjoni mill-qrib u b’suċċess mal-AK, inkluż is-Superviżjoni Bankarja tal-BĊE, li saret dwar l-ittestjar tal-istress matul l-aħħar snin li rriżultat f’approċċ ta’ ttestjar tal-istress aktar b’saħħtu u aktar kredibbli

X

L-EBA tixtieq tenfasizza li din l-osservazzjoni jeħtieġ li tinqara flimkien mad-dibattitu dwar l-iżvelar tal-Pilastru 2 fost l-AK. Qabel l- emendi riċenti ħafna għal-leġiżlazzjoni tar-rekwiżiti kapitali, l-obbligu li jiġu ppubblikati l-livelli tar-rekwiżiti tal-Pilastru 2 tal-banek ma kienx espliċitu. Dan se jinbidel bl-emendi fil-leġiżlazzjoni tar-rekwiżiti kapitali (ir-regolament 575/2013 u d-Direttiva 2013/36/UE) (ara l-Art. Artikolu 447: Divulgazzjoni tal-metriċi ewlenin), li se jidħol fis-seħħ f’Lulju 2019.

Ir-rapport tal-EBA huwa rapport fattwali, iżda l-EBA enfasizzat li r-riżultati għandhom jinqraw flimkien max-xenarju makro.

Introduzzjoni

07

Ir-rwol tal-EBA jirrifletti l-mandat legali tagħha, li ma jagħtix lill-EBA xi responsabbiltajiet speċifiċi ta’ assigurazzjoni tal-kwalità, flimkien ma’ riżorsi limitati.

Osservazzjonijiet

14

F’din it-taqsima, it-test tal-istress madwar l-UE kollha kien kruċjali għall-identifikazzjoni ta’ oqsma ta’ vulnerabbiltajiet u skatta miżuri għar-rikapitalizzazzjoni tas-settur bankarju tal-UE. Id-divulgazzjoni bla preċedent ta’ skoperturi tal-banek tejbet ukoll id-dixxiplina tas-suq. Madankollu, bħal kull test tal-istress, l-eżerċizzju madwar l-UE kollha ma għandux l-ambizzjoni li jkopri r-riskji kollha possibbli. L-EBA dejjem kienet ċara fl-ispjegazzjoni u l-komunikazzjoni ta’ din il-limitazzjoni fir-rapporti tagħha.

20

Il-banek li qed jiġu ristrutturati huma esklużi mill-kampjun minħabba li l-valutazzjoni ta’ “il-valutazzjonijiet tal-vijabbiltà tad-DĠ COMP fil-kuntest tal-proċeduri ta’ għajnuna mill-Istat” titwettaq regolarment mill-Kummissjoni Ewropea stess. Barra minn hekk, is-suppożizzjoni statika tal-karta tal-bilanċ tkun subottimali għall-banek li jkunu qed jiġu ristrutturati, b’mod partikolari meta d-diżingranaġġ ikun parti mill-kundizzjonijiet biex wieħed jirċievi l-għajnuna mill-Istat.

21

L-EBA tixtieq tinnota li l-iskop tat-test tal-istress huwa li jipprovdi fehma li tħares ’il quddiem dwar ir-riskji potenzjali għall-banek. Għalhekk, il-punt tat-tluq għandu jkun għażla newtrali ta’ banek, mingħajr kwalunkwe twemmin a priori. Inkella, jista’ jkun hemm preġudizzju fl-għażla mas-superviżuri li jagħżlu banek “aktar dgħajfa” biss skont indikaturi tar-riskju li jħarsu lura u jħallu barra banek b’vulnerabbiltajiet potenzjali, iżda li għadhom mhumiex magħrufa.

Il-biċċa l-kbira tal-banek mill-pajjiżi msemmija fl-ewwel inċiż iffurmaw parti minn kampjun taħt stress mill-BĊE. Rapport ta’ dan it-test tal-istress ġie ppubblikat fi Frar 2019 u żvela r-riżultati f’format aggregat (bl-eċċezzjoni tal-Greċja fejn ġiet ippubblikata d-data tal-bank b’bank).

22

F’din it-taqsima, l-EBA tinnota li t-test tal-istress tagħha juża xenarju avvers wieħed u, għalhekk, ma jistax ikopri r-riskji sistemiċi kollha, iżda jiffoka fuq dawk l-aktar importanti. L-inklużjoni ta’ xenarju addizzjonali jagħmel l-eżerċizzju aktar ta’ piż u, għalhekk, il-kostijiet, il-benefiċċji u l-implikazzjonijiet tar-riżorsi jkollhom jiġu vvalutati.

26-33

F’din it-taqsima, l-EBA tinnota li, bħal kwalunkwe test tal-istress, l-eżerċizzju madwar l-UE kollha ma għandux l-ambizzjoni li jkopri r-riskji kollha possibbli. L-EBA dejjem kienet ċara fl-ispjegazzjoni u l-komunikazzjoni ta’ din il-limitazzjoni fir-rapporti tagħha.

27

Filwaqt li l-proċess mhuwiex dokumentat, l-EBA taħdem b’mod regolari fuq il-valutazzjoni tar-riskju, inkluża t-Tabella Operattiva tar-Riskji tal-EBA, tgħin lill-persunal tal-EBA biex jiżviluppa l-fehmiet tiegħu dwar ix-xenarju. Barra minn hekk, fil-paragrafu li jmiss tal-QEA, il-kontribut tal-membri tal-BERS għall-valutazzjoni tar-riskju tal-BERS huwa rikonoxxut, li jinkludi wkoll l-EBA.

30

It-test tal-istress tal-EBA huwa analiżi tax-xenarju, fejn il-varjabbli makroekonomiċi huma enfasizzati skont narrattiva ta’ riskju (input) u varjabbli speċifiċi għall-bank (output) taħt stress huma mbagħad stmati mill-banek, f’konformità mal-metodoloġija komuni. Għalhekk, żieda sinifikanti ta’ self improduttiv hija r-riżultat, mhux il-punt tat-tluq tal-eżerċizzju, u tabilħaqq, id-dispożizzjonijiet għal żieda fir-riskju ta’ kreditu fit-test tal-istress. Ta’ min jinnota wkoll li x-xenarju makrofinanzjarju negattiv għat-test tal-istress tal-2018 fis-settur bankarju madwar l-UE kollha jgħid li “B’mod ġenerali, iż-żieda fir-riskju ta’ kreditu tal-mutwatarju tirriżulta f’banek li jiffaċċjaw livelli ogħla ta’ self improduttiv u żieda konkomitanti fl-introjtu mill-imgħax mitluf”.

Barra minn hekk, il-BERS jixtieq jirrimarka li r-riskji identifikati mill-Bord Ġenerali għandhom it-tendenza li jinkludu terminoloġija aktar granulari użata fi ħdan l-istħarriġ kontroġerarkiku, b’tali mod li r-riskji relatati mal-kwalità tal-assi jaqgħu taħt ir-Riskju 2 fl-Anness II ta’ dan ir-rapport.

31

Għalkemm din is-sentenza hija korretta, hija ma tirrikonoxxix li test ta’ stress ta’ likwidità u test ta’ stress ta’ solvenza huma metodoloġikament differenti. F’dan ir-rigward, it-test tal-istress madwar l-UE kollha huwa eżerċizzju ta’ solvenza u mhux test tal-likwidità filwaqt li r-riskju tal-likwidità għandu jitqies f’modi oħra bħall-proporzjon tal-kopertura tal-likwidità u l-proporzjon ta’ ffinanzjar stabbli nett. Test ta’ stress ta’ likwidità jeħtieġ eżerċizzju differenti bħal dak li l-BĊE qed iwettaq fl-2019) u, peress li l-orizzonti taż-żmien huma differenti, test ta’ stress ta’ likwidità ftit li xejn jista’ jiġi inkluż fit-test tal-istress attwali madwar l-UE kollha minħabba: i) l-orizzont taż-żmien tiegħu ; ii) is-suppożizzjoni tal-karta tal-bilanċ statika u iii) divulgazzjoni dettaljata ta’ riżultati bank b’bank.

32

Il-valutazzjoni tar-riskju tal-BERS tinkludi analiżijiet ta’ data individwali fil-livell tal-banek minn diversi sorsi kull meta jitqies xieraq, f’konformità mal-mandat tiegħu. Il-BERS huwa fdat bis-superviżjoni makroprudenzjali tas-sistema finanzjarja tal-UE u l-prevenzjoni u l-mitigazzjoni tar-riskju sistemiku, u mhux bis-superviżjoni prudenzjali tal-banek.

33

It-tabella operattiva tar-riskji tal-EBA tintuża bħala sors ta’ informazzjoni li tgħin lill-persunal tal-EBA biex jiżviluppaw il-ħsibijiet tagħhom dwar ix-xenarju tal-BERS. Barra minn hekk, kif imsemmi hawn fuq, huwa rikonoxxut il-kontribut tal-membri tal-BERS għall-eżerċizzju ta’ valutazzjoni tar-riskju, li jinkludi wkoll l-EBA.

34

It-test tal-istress tal-EBA huwa analiżi tax-xenarju, fejn il-varjabbli makroekonomiċi huma enfasizzati skont narrattiva tar-riskju (input) u l-varjabbli speċifiċi tal-bank (output) taħt stress huma mbagħad stmati mill-banek, f’konformità mal-metodoloġija komuni.

Kif imsemmi hawn fuq, in-narrattiva tax-xenarju huwa sforz konġunt tal-EBA u l-BERS. Is-sħubija tal-Bord tas-Superviżuri tal-EBA (u s-sottostrutturi) u l-Bord Ġenerali tal-BERS (u s-sottostrutturi) fil-parti l-kbira qed jirkbu fuq xulxin u għalhekk l-istess AK huma rappreżentati fiż-żewġ organizzazzjonijiet li jfisser ukoll li qed isiru skambji ta’ fehmiet u diskussjonijiet dwar id-disinn tax-xenarju mal-atturi kollha involuti matul il-proċess kollu.

36

Ix-xenarju kien jinkludi xokkijiet kemm mis-settur reali kif ukoll minn dak finanzjarju.

37

Huwa importanti li jiġu differenzjati l-iskattaturi tax-xenarju u l-interazzjoni tagħhom ma’ riskji u vulnerabilitajiet oħra, li madankollu huma riflessi fin-narrattiva u fil-kalibrazzjoni tax-xenarju. Barra minn hekk, il-BERS jenfasizza li t-theddid għall-istabbiltà finanzjarja li jissottolinja x-xenarju negattiv ma jirrappreżentax xi konsegwenzi mhux intenzjonati tad-deċiżjonijiet futuri tal-politika monetarja.

38

Ir-riskji skattati fl-UE għandhom rwol importanti ta’ amplifikazzjoni f’dan ix-xenarju. Ċirku vizzjuż bejn il-profittabbiltà dgħajfa tal-banek u t-tkabbir nominali baxx flimkien mat-tħassib dwar is-sostenibbiltà tad-dejn pubbliku u privat huma msemmija b’mod espliċitu fin-narrattiva u għandhom rwol ewlieni fil-kalibrazzjoni tax-xokkijiet. Id-disinn tax-xenarju jiżgura li dawk il-banek li huma esposti b’mod eċċessiv għal dawn ir-riskji jiġu identifikati mill-eżerċizzju, inkluża l-possibbiltà ta’ fallimenti tal-banek jekk l-evidenza tappoġġjaha. Barra minn hekk, meta jitqiesu l-implikazzjonijiet usa’ tal-effetti ta’ amplifikazzjoni, dawn normalment imorru lil hinn mill-ambitu mikroprudenzjali tat-test tal-istress tal-EBA.

43

Il-BĊE u l-BERS isibu li d-dikjarazzjoni tal-QEA li l-involviment tal-awtoritajiet nazzjonali fil-proċess ma wassalx għal xenarju oġġettiv u ma jipprovdix deskrizzjoni sħiħa tal-proċess ta’ żvilupp tax-xenarju.

Kaxxa 1

Il-BERS u l-BĊE jinnotaw li, fir-rigward tal-osservazzjonijiet tal-QEA dwar l-użu ta’ severità addizzjonali, kwalunkwe mudell ibbażat fuq data storika għandu l-limitazzjonijiet u li l-ġudizzju ta’ dawk li jfasslu l-politika huwa input fil-proċess globali. Saru ħafna diskussjonijiet fil-proċess kollu u l-AK kellhom fehmiet differenti dwar is-severità xierqa għal pajjiżhom iżda dawn il-fehmiet u d-diskussjonijiet ma wasslux awtomatikament għal azzjonijiet. Kull deċiżjoni ttieħdet b’mod trasparenti b’kollaborazzjoni mat-task force kollha.

45

B’referenza għall-osservazzjoni tal-QEA li l-pajjiżi kienu soġġetti għal livelli ta’ xokk differenti ħafna, ta’ min jinnota li ntwera li l-varjazzjoni tax-xokkijiet minn pajjiż għall-ieħor issegwi min-narrattiva — ara Bianchi (2019), The role of country factors in the 2018 EBA stress test”, No. 1/FS/19, Central Bank of Ireland. (Ir-rwol tal-fatturi tal-pajjiż fit-test tal-istress tal-EBA tal-2018”, Nru 1/FS/19, il-Bank Ċentrali tal-Irlanda.)

Fl-Iżvezja, ix-xokk kbir fil-prezzijiet tad-djar, li rrifletta vulnerabbiltajiet tal-proprjetà immobbli f’dan il-pajjiż, jispjega s-severità ġenerali tax-xenarju.

Kaxxa 3

Ix-xenarji tat-test tal-istress tal-Istati Uniti u dawk madwar l-UE kollha huma differenti minn dak tal-Bank of England, billi jindikaw inflazzjoni baxxa matul il-perjodu kollu ta’ tliet snin aktar milli żieda qawwija fil-livell tal-prezzijiet kif hija preżunta għar-Renju Unit. Barra minn hekk, hemm differenzi bejn l-applikazzjoni ta’ xokk fuq ir-rati tal-imgħax fit-tul. Ix-xenarju tat-test tal-istress madwar l-UE kollha jassumi żieda relattivament ħafifa f’rati ta’ imgħax ta’ 10 snin, filwaqt li x-xenarju tal-Bank of England jissimula żieda għolja. Min-naħa l-oħra, ix-xenarju Komprensiv ta’ Rieżami u Analiżi tal-Kapital jassumi tnaqqis fir-rati fit-tul.

Ix-xokk tar-rata tal-qgħad fit-test tal-istress negattiv madwar l-UE kollha huwa aktar baxx meta mqabbel max-xenarji l-oħra kollha tat-test tal-istress, madankollu, il-livell finali tal-qgħad għall-UE huwa l-ogħla fost it-testijiet tal-istress oħrajn.

58

Il-metodoloġija ma tistax tispjega kull każ individwali. It-titjib potenzjali għandu jipprovdi dettalji biżżejjed mingħajr ma jikkomplika wisq il-metodoloġija.

60

Filwaqt li huwa minnu li l-mudelli jista’ jkollhom nuqqasijiet, l-eżerċizzju kontroġerarkiku huwa kkumplimentat minn:

1. Limitazzjonijiet inklużi fil-metodoloġija
2. Il-proċess tal-assigurazzjoni tal-kwalità (u l-manwali tal-assigurazzjoni tal-kwalità);
3. Statistika deskrittiva;
4. Punti ta’ riferiment tar-riskju ta’ kreditu;
5. Sett wiesa’ ta’ għodod biex tiġi żgurata l-komparabbiltà fir-riżultati.

62

Is-suppożizzjonijiet meħuda huma bbażati fuq is-sejbiet tal-letteratura ekonomika relatata, jew fuq metodoloġiji ta’ ttestjar tal-istress tal-ogħla livell.

63

Il-koeffiċjenti preċiżi mhumiex kondiviżi mal-banek biex tiġi żgurata l-effettività tat-Test tal-Istress madwar l-UE kollha. Fuq kollox, għandu jiġi nnotat li l-provvediment ta’ trasparenza sħiħa dwar il-punti ta’ riferiment u l-mudelli sfidanti tal-EBA/BĊE jegħleb l-għan li jitwettaq test tal-istress (ristrett) kontroġerarkiku peress li wieħed mill-objettivi ewlenin tiegħu hu li jgħin biex irawwem il-ġestjoni tar-riskju u l-kapaċità ta’ mmudellar tal-banek. F’eżerċizzju kontroġerarkiku l-istituzzjonijiet parteċipanti għandhom jiffukaw fuq l-iżvilupp ta’ mudelli ġodda jew fuq it-titjib ta’ mudelli eżistenti aktar milli jippruvaw jantiċipaw l-aspettattivi tas-superviżuri. Barra minn hekk, jekk il-banek jiġu pprovduti s-sett sħiħ tal-elastiċitajiet sottostanti tal-punti ta’ riferiment tal-EBA/BĊE jagħmilha faċli wisq għalihom biex ifasslu l-projezzjonijiet tat-testijiet tal-istress u d-dokumentazzjoni mudell meħtieġa tagħhom b’mod li jagħmilha prattikament impossibbli għall-AK li jisfidaw kif xieraq ir-riżultati tal-banek.

66

Is-suppożizzjoni tal-karta tal-bilanċ statika sservi l-għan li jiġi analizzat l-impatt tat-test tal-istress taħt suppożizzjoni ceteris paribus. L-azzjonijiet maniġerjali mitiganti possibbli huma kkunsidrati bħala parti mill-SREP. It-tibdil ta’ dan l-approċċ ikun jeħtieġ b'mod sinifikanti aktar riżorsi għall-assigurazzjoni tal-kwalità u għall-valutazzjoni tal-kredibbiltà tal-azzjonijiet ta’ ġestjoni.

68

L-EBA mhijiex inkarigata mill-assigurazzjoni tal-kwalità iżda pprovdiet xi għodod biex tgħin lill-AK (statistika deskrittiva, rapporti dwar l-assigurazzjoni tal-kwalità). Ara wkoll it-tweġiba tal-EBA dwar is-suġġett ta’ spezzjonijiet fuq il-post.

75

L-EBA taqbel mal-QEA li r-riżorsi limitati ma ppermettewx li tinġabar b’mod sistematiku informazzjoni komprensiva dwar sa liema punt ir-riżultati kienu se jvarjaw b’mod pożittiv jew negattiv fin-nuqqas ta’ restrizzjonijiet. Madankollu, dwar il-funzjonament tal-mudelli ta’ ttestjar tal-istress tal-banek kontra l-istandards minimi, l-EBA pprovdiet l-istatistika deskrittiva lill-AK u rapporti ta’ assigurazzjoni tal-kwalità biex jgħinu lill-AK fil-proċess ta’ garanzija tal-kwalità meta jikkontestaw l-istimi tal-banek taħt it-test tal-istress.

Fir-rigward tal-punti ta’ riferiment tar-riskju ta' kreditu, il-mudell tar-riskju ta’ kreditu inkluż fl-oqsma tal-2018 li għandhom jimtlew mill-banek f’każ li jintużaw punti ta’ riferiment tar-riskju ta’ kreditu, sabiex din l-informazzjoni tkun intalbet lill-banek. Madankollu, l-EBA rrikonoxxiet li l-mod kif il-banek kienu qed jindikaw l-użu ta’ punti ta’ riferiment ġie identifikat bħala inkonsistenti, u għal dik ir-raġuni huma mistennija bidliet fl-eżerċizzju tat-test tal-istress li jmiss. Għandha tiġi pprovduta gwida ulterjuri lill-banek dwar il-kundizzjonijiet li fihom l-użu ta’ punti ta’ riferiment għandu jiġi indikat.

Il-BĊE, fil-funzjoni tiegħu bħala CA, jinnota li hemm għadd kbir ta’ mudelli ta’ ttestjar tal-istress fl-użu fil-livell tal-bank li mhumiex soġġetti għal monitoraġġ superviżorju jew approvazzjoni. Għalhekk, bir-riżorsi u l-ħin disponibbli matul il-proċess ta’ test tal-istress, il-BĊE mhuwiex f’pożizzjoni li sistematikament jissottometti l-mudelli kollha għall-kontroll tal-kwalità. Madankollu, meta ċ-ċifri nstabu li huma implawsibbli, il-mudelli relatati ġew sfidati.

76

L-EBA tixtieq tiġbed l-attenzjoni li anke jekk il-manwal tal-Garanzija tal-Kwalità jissuġġerixxi li l-AK għandhom iwettqu tali awtovalutazzjoni, dan ma jinkludi l-ebda rekwiżit biex din il-valutazzjoni tiġi kondiviża mal-EBA.

79

L-EBA tixtieq tiġbed l-attenzjoni li fejn possibbli (riskju ta’ kreditu u NII), ġie deċiż li tiġi pprovduta statistika skont il-pajjiż tal-kontroparti għall-pajjiżi kollha tal-UE, l-MSU u l-pajjiżi Nordiċi.

82

F’test tal-istress li ma jgħaddix mit-test, l-għan mhuwiex li jiġu identifikati banek li jfallu iżda li jagħrfu liema huma dawk aktar dgħajfa u jistħoqqilhom aktar skrutinju superviżorju. Fil-fatt, il-bank jidher li din is-sentenza qed tirreferi għalih, kellu wieħed mill-ogħla tnaqqis ta’ kapital taħt it-test tal-istress. Barra minn hekk, kwalunkwe verifika tad-data tal-punt tat-tluq titwettaq mill-AK.

83

L-ippjanar, it-tħejjija ta’ spezzjonijiet fuq il-post huwa proċess li normalment ikun ippjanat diversi xhur qabel. F’termini ta’ ħtiġijiet ta’ riżorsi, għandu jiġi enfasizzat li, pereżempju, spezzjoni waħda fuq il-post tista’ tirrikjedi li jsiru aktar minn 50 ġimgħa ta’ xogħol fuq il-post, skont l-ambitu tal-investigazzjoni u l-kumplessità tas-suġġett taħt rieżami.

87

L-EBA tilqa’ b’sodisfazzjon is-sejba dwar it-trasparenza tal-eżerċizzju, li tipprovdi ammont kbir ta’ informazzjoni, u tirrikonoxxi li l-unika informazzjoni nieqsa hija fil-livell tar-rekwiżiti tal-Pilastru 2, li jirrifletti d-dibattitu dwar id-divulgazzjoni tagħha fl-UE.

Ara wkoll il-kumment ta’ hawn taħt dwar il-paragrafu relatat mad-divulgazzjoni tar-rekwiżiti kapitali.

90

Ta’ min jinnota li l-mudell tat-test tal-istress jinkludi informazzjoni dwar il-migrazzjoni bejn l-istadji, sabiex jitqiesu assi ġodda inadempjenti.

91

L-EBA tixtieq tiġbed l-attenzjoni li l-inċiżi kollha f’dan il-paragrafu jenfasizzaw karatteristiċi ċari li huma tipiċi ta’ test tal-istress kontroġerarkiku.

It-tqabbil bejn il-mudelli interni u l-approċċ standardizzat imsemmi fit-tieni inċiż huwa obbligatorju mir-Regolament dwar ir-Rekwiżiti ta’ Kapital u mhux mill-metodoloġija tal-EBA.

92

In-nota f’qiegħ il-paġna ta’ dan il-paragrafu hija fattwalment korretta iżda ma ssemmix li dan it-tqabbil jista’ jidher ukoll fuq livell ta' bank b’bank fl-ispreadsheets uniċi pprovduti.

93

Ir-rapport tal-EBA dwar ir-riżultat tat-test tal-istress huwa sommarju newtrali ħafna tar-riżultati u għandu l-għan li jkun informattiv iżda imparzjali. Filwaqt li hija pprovduta trasparenza sħiħa dwar ir-riżultati u l-iskoperturi sottostanti, is-sentenza titħalla f’idejn l-AK u partijiet ikkonċernati oħra, filwaqt li jitqies ukoll li t-test tal-istress huwa l-punt tat-tluq mhux il-punt tat-tmiem tal-proċess ta’ rieżami superviżorju.

95

L-EBA tixtieq tenfasizza li dan jeħtieġ jinqara flimkien mad-dibattitu dwar id-divulgazzjoni tal-Pilastru 2. Qabel l-aħħar emendi tal-leġiżlazzjoni dwar ir-rekwiżit kapitali, il-pubblikazzjoni tal-livelli tar-rekwiżiti tal-Pilastru 2 tal-banek ma kinitx obbligatorja u kien hemm xi fehmiet differenti dwar il-benefiċċji ta’ din it-trasparenza sħiħa.

Madankollu, l-EBA taqbel li hemm bżonn ta’ xi titjib f’dan il-qasam, speċjalment f’konformità mad-diskors tal-President preċedenti tal-EBA fil-Bank Nazzjonali tar-Rumanija (Novembru 2018).

97-100

Il-Linji Gwida tal-SREP jenfasizzaw ir-rwol importanti li l-azzjonijiet ta’ mitigazzjoni jistgħu potenzjalment jippermettu lill-istituzzjoni tissodisfa bis-sħiħ ir-rekwiżiti kapitali applikabbli tagħha f’perjodu ta’ żmien xieraq. Dan huwa tabilħaqq rikonoxxut f’dan ir-rapport. Peress li t-test tal-istress tal-EBA huwa bbażat fuq suppożizzjoni ta’ karta tal-bilanċ statika, tqabbil sempliċi tal-eżiti tat-test tal-istress u tar-rekwiżiti kapitali jirrikjedi kawtela.

101

L-EBA tixtieq tindika li din is-sentenza tista’ tinftiehem biss bħala li tiffoka fuq il-valutazzjoni tas-sensittività tal-banek għax-xenarju. Ir-reżiljenza tiddependi wkoll mill-punti tat-tluq tal-kapital tal-banek, li jistgħu jitqabblu maż-żmien.

Fil-fatt, it-test tal-istress madwar l-UE kollha kkontribwixxa għal żieda gradwali tal-kapital fil-banek, kif ikkonfermat b’ħarsa lejn l-evoluzzjoni tal-proporzjon tal-punt tat-tluq CET1 tul iż-żmien.

102

L-EBA mhux tgħid li kollox miexi kif suppost u dan lanqas mhuwa implikat fir-rapporti tagħha, iżda dejjem tenfasizza li r-riżultati jeħtieġ li jinqraw flimkien mal-azzjonijiet u s-suppożizzjonijiet ta’ segwitu tagħha, u b’mod speċjali jeħtieġ li jittieħdu bħala punt tat-tluq għal diskussjonijiet mal-AK.

L-EBA ma tivvalutax jekk il-banek attwalment jifilħux il-kriżi finanzjarja tal-2008 u lanqas xi kriżi oħra, peress li huwa biss xenarju li huwa eżattament l-istess bħal dawk li jista’ jagħmel dan.

Konklużjonijiet u rakkomandazzjonijiet

108

Ir-rwol tal-EBA jirrifletti l-mandat legali tagħha, li ma jagħtix lill-EBA xi responsabbiltajiet speċifiċi ta’ garanzija tal-kwalità, flimkien ma’ riżorsi limitati. L-uniku mod biex ikun hemm involviment akbar tal-EBA dwar il-proċess tal-Garanzija tal-Kwalità huwa permezz ta’ aktar riżorsi. Barra minn hekk, għandu jiġi kkunsidrat x’implikazzjoni dan għandu f’termini ta’ spiża tat-test tal-istress u l-possibbiltà ta’ duplikazzjoni max-xogħol li jsir mis-superviżuri (bħall-MSU).

L-EBA tenfasizza li l-komparabbiltà hija pprovduta permezz tal-pubblikazzjoni ta’ data granulari ħafna u tipprovdi spjegazzjonijiet trasparenti dwar id-differenzi li jista’ jkun hemm bejn il-banek. L-EBA tipprovdi wkoll għodod ta’ punt ta’ riferiment lill-AK għall-garanzija tal-kwalità tagħhom.

109

L-EBA taqbel mal-QEA li, irrispettivament mill-mandati legali, dawn l-attivitajiet huma intensivi firr-riżorsi u għal din ir-raġuni ma jistgħux jitwettqu bis-seba’ ekwivalenti ta’ full-time, inklużi esperti fl-istatistika, li bħalissa qed jaħdmu fuq it-test tal-istress. Barra minn hekk, ir-rieżamijiet u l-ispezzjonijiet speċifiċi għandhom jiġu organizzati, akkwistati eċċ, li huwa kważi impossibbli li jsir fiż-żmien tat-test tal-istress, b’mod partikolari bi ftit jew bl-ebda baġit allokat għal dawn il-kompiti.

Rakkomandazzjoni 1 — L-EBA teħtieġ li ttejjeb il-kontroll tagħha fuq il-proċess ta’ testijiet tal-istress

L-EBA taċċetta r-rakkomandazzjoni. Għandu jiġi enfasizzat li s-suċċess tagħha jiddependi minn: i) il-kisba ta’ riżorsi addizzjonali sostanzjali kif indikat diġà u rakkomandat mill-QEA nnifisha; ii) il-governanza hija adatta għall-iskop kif deċiż mill-Kummissjoni abbażi tar-rakkomandazzjoni tal-QEA.

Huwa importanti wkoll li jiġi evitat xogħol doppju bil-kompiti li diġà twettqu mill-AK.

Rakkomandazzjoni 2 — Tikkomplementa l-proċedura kontroġerarkika attwali b’elementi minn fuq għal isfel

L-EBA taċċetta r-rakkomandazzjoni. Għandu jiġi enfasizzat li s-suċċess tagħha jiddependi mill-kisba ta’ riżorsi addizzjonali.

F’dan il-każ ukoll, se jkunu meħtieġa riżorsi u baġit dedikati. It-twaqqif mill-bidu nett ta’ mudell kontroġerarkiku jirrikjedi għarfien espert speċifiku u potenzjalment l-appoġġ ta’ konsulenti, iżda implimentazzjoni gradwali ta’ elementi minn fuq għal isfel tista’ tkun fattibbli bi tħejjija bikrija min-naħa tal-EBA u l-atturi involuti, sabiex dawn l-elementi jiġu implimentati sal-2022.

110

Id-deċiżjonijiet dwar il-kampjun mhumiex arbitrarji iżda bbażati fuq il-kriterji inklużi fil-metodoloġija u l-feedback formali li wasal mill-AK.

L-EBA tixtieq tinnota li, peress li l-iskop tat-test tal-istress huwa li jiġu identifikati banek potenzjalment dgħajfa, l-għażla tal-kampjun għandha tkun newtrali, jiġifieri jista’ jkun hemm banek meqjusin sikuri abbażi ta’ indikaturi tar-riskju li jħarsu lura, iżda sensittivi ħafna għal xokk negattiv.

Rakkomandazzjoni 3 — Għażla ta’ banek abbażi tar-riskju aktar milli ta’ daqs biss

L-EBA taċċetta r-rakkomandazzjoni parzjalment. L-EBA ser tikkunsidra mill-ġdid il-kopertura ġeografika. Madankollu, l-EBA għandha fehma differenti mill-QEA dwar l-użu ta’ kriterji bbażati fuq ir-riskju biex tikkomplementa l-kriterju tad-daqs meta jiġi stabbilit il-kampjun għat-test tal-istress madwar l-UE kollha.

111

L-EBA tinnota li, fiż-żewġ każijiet, l-impatt finali jitkejjel f’termini ta’ deterjorament tal-varjabbli makro u finanzjarji.

Rakkomandazzjoni 4 — L-introduzzjoni ta’ xenarji alternattivi ta’ stress

L-EBA taċċetta parzjalment din ir-rakkomandazzjoni.

Għas-sottorakkomandazzjoni 4.1, peress li r-riskji jistgħu jkunu globali fl-oriġini, l-EBA żżomm id-diskrezzjoni (f’koordinazzjoni mal-BERS) li tagħżel ir-riskji l-aktar rilevanti.

Għas-sottorakkomandazzjoni 4.2, dan iżid il-piż tal-eżerċizzju għall-AK, għall-banek u għall-EBA. Mingħajr riżorsi addizzjonali, xenarji multipli ma jistgħux ikunu ġestibbli fit-test tal-istress madwar l-UE kollha.

L-EBA tinnota wkoll, dwar is-sottorakkomandazzjoni 4.3, li hija tista’ ttejjeb il-kriterji għall-valutazzjoni tas-severità tax-xenarju, iżda ma jkunx possibbli li jiġu kkwantifikati l-livelli ta’ severità ta’ kull parametru li huwa pjuttost ir-riżultat tax-xenarju globali.

Lil hinn mit-tħassib dwar ir-riżorsi, l-implimentazzjoni għat-test tal-istress tal-2020 se tkun ta’ sfida. Skont l-iskeda ta’ żmien tas-soltu tat-test tal-istress, il-BERS ser ikollu biss ftit xhur biex jiddiskuti, jimplimenta u jiddeċiedi dwar dan l-aġġustament sinifikanti fit-tfassil tax-xenarju.

Rakkomandazzjoni 5 — L-istruttura ta’ governanza għandha tiżgura li l-interessi tal-UE jitqiesu kif xieraq

Mhuwiex f’idejn l-EBA li tikkummenta dwar il-governanza tagħha stess u aħna naċċettaw kull determinazzjoni tal-Kummissjoni.

114

Il-Pilastru 2 u għalhekk ir-Rekwiżit Kapitali Ġenerali mhumiex ippubblikati, minħabba dibattitu fost l-AK dwar id-divulgazzjoni tar-rekwiżiti tal-Pilastru 2.

L-EBA għandha l-għan li tagħti rapport kumpatt, fattwali u aċċessibbli li jiġbor fil-qosor ir-riżultati tat-test tal-istress. Ir-rapport jikkomplementa t-tixrid rikk ta’ data li jakkumpanja r-rilaxx tar-riżultati tat-testijiet tal-istress. L-EBA hija lesta li tikkunsidra titjib possibbli għall-arrikkiment ulterjuri tal-valur informattiv tar-rapport.

Rakkomandazzjoni 6 — Jiżdid il-valur informattiv tal-pubblikazzjonijiet

L-EBA taċċetta s-sottorakkomandazzjoni 6.1.

L-EBA taċċetta parzjalment is-sottorakkomandazzjoni 6.2. Hija tinnota li t-test tal-istress huwa l-punt tat-tluq tal-proċess SREP u huwa bbażat fuq is-suppożizzjoni tal-karta tal-bilanċ statika, kwalunkwe dikjarazzjoni dwar ir-reżiljenza tista’ tkun qarrieqa peress li huwa f’idejn l-AK li jipprovdu valutazzjoni tar-reżiljenza fi tmiem il-proċess SREP. L-EBA se żżid il-kontenut ta’ informazzjoni tar-rapport ta’ sinteżi.

Tim tal-awditjar

Ir-rapporti speċjali tal-QEA jippreżentaw ir-riżultati tal-awditi li twettaq ta’ politiki u programmi tal-UE, jew ta’ suġġetti relatati mal-ġestjoni minn oqsma speċifiċi tal-baġit. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta’ introjtu jew ta’ nfiq involut, l-iżviluppi li jkunu għad iridu jseħħu u l-interess politiku u pubbliku.

Dan l-awditu tal-prestazzjoni twettaq mill-Awla IV tal-Awditjar, Regolamentazzjoni tas-swieq u ekonomija kompetittiva, li hija mmexxija minn Neven Mates, Membru tal-QEA. L-awditu tmexxa minn Neven Mates, Membru tal-QEA, li ngħata appoġġ minn George Karakatsanis, Kap tal-Kabinett u Marko Mrkalj, Attaché tal-Kabinett; Marion Colonerus, Maniġer Prinċipali; Mirko Gottmann, Kap tal-Kompitu; Karolina Beneš, Giuseppe Diana, Shane Enrigh, Jörg Genner, Helmut Frank, Athanasios Koustoulidis, Violeta Radu u Julio Cesar Santin Santos, Awdituri.

Mix-xellug għal-lemin: Marion Colonerus, Giuseppe Diana, Mirko Gottmann, Julio Cesar Santin Santos, Neven Mates, Marko Mrkalj, Jörg Genner, Athanasios Koustoulidis, Shane Enright

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Tel. +352 4398-1
Mistoqsijiet: eca.europa.eu/mt/Pages/ContactForm.aspx
Sit web: eca.europa.eu
Twitter: @EUAuditors

Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2019

PDF	ISBN 978-92-847-2190-0	ISSN 1977-5741	doi:10.2865/454071	QJ-AB-19-008-MT-N
HTML	ISBN 978-92-847-2215-0	ISSN 1977-5741	doi:10.2865/84496	QJ-AB-19-008-MT-Q

© L-Unjoni Ewropea, 2019

Għal kull użu jew riproduzzjoni ta’ ritratti jew materjal ieħor li ma jaqax taħt id-drittijiet tal-awtur tal-Unjoni Ewropea, irid jintalab il-permess direttament mingħand id-detenturi tad-drittijiet tal-awtur.

Kif tikkuntattja lill-UE

Personalment
Madwar l-Unjoni Ewropea kollha hemm mijiet ta’ ċentri ta’ informazzjoni tal-Europe Direct. Tista’ ssib l-indirizz tal-eqreb ċentru għalik f'dan is-sit: https://europa.eu/european-union/contact_mt

Bit-telefown jew bil-posta elettronika
Europe Direct huwa servizz li jwieġeb il-mistoqsijiet tiegħek dwar l-Unjoni Ewropea. Tista’ tikkuntattja dan is-servizz:

• bit-telefown bla ħlas: 00 800 6 7 8 9 10 11 (ċerti operaturi jafu jimponu ħlas għal dawn it-telefonati),
• fuq dan in-numru standard: +32 22999696, jew
• bil-posta elettronika permezz: https://europa.eu/european-union/contact_mt

Kif issib tagħrif dwar l-UE

Onlajn
L-informazzjoni dwar l-Unjoni Ewropea bil-lingwi uffiċjali kollha tal-UE hija disponibbli fuq is-sit web Europa fuq: https://europa.eu/european-union/index_mt

Pubblikazzjonijiet tal-UE
Tista’ tniżżel mill-internet jew tordna l-pubblikazzjonijiet tal-UE, li xi wħud minnhom huma bla ħlas u xi oħrajn bil-ħlas, minn: https://publications.europa.eu/mt/publications. Kopji multipli ta’ pubblikazzjonijiet bla ħlas tista’ tiksibhom billi tikkuntattja lil Europe Direct jew liċ-ċentru tal-informazzjoni lokali tiegħek (ara https://europa.eu/european-union/contact_mt).

Il-liġi tal-UE u dokumenti relatati
Għal aċċess għall-informazzjoni legali tal-UE, inkluż il-liġijiet kollha tal-UE mill-1952 ’l hawn, fil-verżjonijiet lingwistiċi uffiċjali kollha, żur is-sit EUR-Lex hawnhekk: http://eur-lex.europa.eu

Dejta Miftuħa mill-UE
Il-portal tad-Dejta Miftuħa mill-UE (http://data.europa.eu/euodp/mt) jipprovdi aċċess għal settijiet tad-dejta mill-UE. Id-dejta tista’ titniżżel mill-internet u tintuża mill-ġdid bla ħlas, kemm għal skopijiet kummerċjali kif ukoll mhux kummerċjali.