Opzjonijiet ġodda għall-finanzjament ta' proġetti tal-iżvilupp rurali: Aktar sempliċi iżda mhux iffukati fuq ir-riżultati

Sommarju eżekuttiv

Opzjonijiet ta’ Spejjeż Simplifikati (SCOs) huma metodu ġdid ta’ rimborż għal ċerti miżuri ta’ żvilupp rurali. Qabel l-2014, il-proġetti taħt dawn il-miżuri kienu jiġu rimborżati fuq il-bażi tal-ispejjeż imġarrba.

L-għoti ta’ appoġġ fuq il-bażi ta’ rimborż tal-ispejjeż imġarrba huwa diffikultuż u suxxettibbli għal żbalji. B’riżultat ta’ dan, kien hemm interess qawwi li jitqiesu metodi aktar sempliċi għall-kalkolu tal-kontribuzzjoni finanzjarja tal-UE għal proġetti u attivitajiet. Issa (fil-perjodu 2014-2020), l-Istati Membri jistgħu jagħżlu minn tliet metodi ġodda (magħrufa bħala SCOs) biex jistabbilixxu l-appoġġ pagabbli:

• skali standard ta' spejjeż għal kull unità;
• somom f'daqqa; u
• finanzjament b'rata fissa.

Dan ir-rapport jippreżenta s-sejbiet tal-awditu li wettaqna tal-SCOs fl-iżvilupp rurali. L-objettiv prinċipali tagħna kien li nivvalutaw jekk l-SCOs jikkontribwux għas-simplifikazzjoni filwaqt li jiżguraw konformità mal-prinċipju tal-ekonomija u jipproduċu riżultati aħjar. Aħna eżaminajna jekk l-SCOs:

• jissimplifikawx l-amministrazzjoni;
• jiżgurawx konformità mal-prinċipju tal-ekonomija; u
• jintużawx b’mod mifrux kif ukoll iżidux il-fokus fuq l-objettivi ta’ politika.

B’mod ġenerali, aħna nikkonkludu li l-użu tal-SCOs jista’ jirriżulta f’simplifikazzjoni u jista’ jnaqqas il-piż amministrattiv, kemm għall-benefiċjarji kif ukoll għall-awtoritajiet tal-Istati Membri. Billi jibbażaw il-pagamenti fuq l-output, l-SCOs ineħħu l-fokus minn fuq il-fatturi iżda ma jżidux il-fokus fuq ir-riżultati.

Aħna sibna li l-SCOs jistgħu jippermettu li jinżamm kontroll fuq l-ispejjeż tal-proġetti tal-iżvilupp rurali, iżda dan iseħħ biss jekk jiġu ssettjati fil-livell korrett u jkunu bbażati fuq metodoloġija ġusta, ekwa u verifikabbli. Madankollu, billi r-rwol tal-Korpi taċ-Ċertifikazzjoni fl-awditjar tal-SCOs mhuwiex speċifikat, dan joħloq riskju li jkun irid jiġi indirizzat.

Aħna osservajna wkoll li l-SCOs il-ġodda għadhom jikkonċernaw biss parti marġinali mill-infiq għall-iżvilupp rurali. Ir-raġunijiet prinċipali għal dan hija n-natura diversa tal-proġetti tal-iżvilupp rurali u l-investiment meħtieġ għall-iżvilupp ta’ metodoloġiji.

Ibbażat fuq dawn is-sejbiet, aħna nagħmlu r-rakkomandazzjonijiet li ġejjin:

• Jenħtieġ li l-Kummissjoni taġġorna l-gwida tagħha dwar l-SCOs biex tkopri l-prinċipji ewlenin għall-iżvilupp tal-metodoloġiji.
• Jenħtieġ li l-Kummissjoni tikkjarifika min għandu r-responsabbiltà li jivverifika l-metodoloġija u l-kalkoli għall-SCOs.
• Biex jiġi ffaċilitat l-użu xieraq tal-SCOs, jenħtieġ li l-Kummissjoni tesplora l-possibbiltajiet għall-iżvilupp ta’ aktar SCOs standard fakultattivi u taġġorna d-definizzjonijiet tagħha tal-kontrolli ewlenin u ta’ dawk anċillari biex ikunu jirriflettu l-użu tal-SCOs.
• Jenħtieġ li l-Kummissjoni teżamina l-potenzjal li r-rimborż ma jibqax wieħed ibbażat fuq l-ispejjeż imġarrba iżda jkun ibbażat fuq ir-riżultati, filwaqt li tieħu inkunsiderazzjoni l-esperjenza li nkisbet sa issa.

Introduzzjoni

Il-politika ta' żvilupp rurali tal-UE

L-għan tal-politika ta' żvilupp rurali tal-UE huwa li tgħin liż-żoni rurali fl-UE biex jindirizzaw firxa wiesgħa ta’ sfidi ekonomiċi, ambjentali u soċjali. Kull sena, l-UE tonfoq madwar EUR 14-il biljun fuq din il-politika permezz tal-baġit tal-Unjoni Ewropea (UE). L-infiq għall-iżvilupp rurali jammonta għal madwar 25 % tal-infiq taħt il-Politika Agrikola Komuni (PAK). Il-kofinanzjament mill-Istati Membri jirrappreżenta EUR 7 biljun aktar fis-sena.

Għal madwar nofs l-infiq fuq l-iżvilupp rurali mill-baġit tal-UE, il-pagament huwa bbażat fuq l-erjas ikkultivati jew fuq l-għadd ta’ annimali. Għall-bqija, l-appoġġ jista’ jkun fil-forma ta’ ammonti fissi jew perċentwali marbuta mal-attivitajiet imwettqa, jew mal-ispejjeż imġarrba mill-benefiċjarju. Il-Kaxxa 1 tippreżenta l-mekkaniżmi involuti.

L-għoti ta’ appoġġ fuq il-bażi ta’ rimborż tal-ispejjeż imġarrba u mħallsa huwa diffikultuż u suxxettibbli għal żbalji. Aħna sibna li l-iżbalji fl-infiq tal-UE huma kkonċentrati f’dan it-tip ta’ appoġġ⁴. B’riżultat ta’ dan, kien hemm interess qawwi f’li jitqiesu metodi aktar sempliċi għall-kalkolu tal-kontribuzzjoni finanzjarja tal-UE għal proġetti u attivitajiet. Issa (mill-2014 ’il quddiem), l-Istati Membri jistgħu jagħżlu minn tliet metodi bħal dawn⁵ (magħrufa bħala opzjonijiet ta’ spejjeż simplifikati – SCOs) biex jistabbilixxu l-appoġġ pagabbli:

• skali standard ta' spejjeż għal kull unità;
• somom f'daqqa; u
• finanzjament b'rata fissa.

Fil-prattika, dan ifisser li l-ammont kollu rimborżat, jew parti minnu, ikun ibbażat fuq (pereżempju): spejjeż standard ikkalkulati skont metodu definit minn qabel, unitajiet ta’ rendiment ta’ proġett, jew perċentwali applikati għal spejjeż oħra⁶ (ara l-Figura 1). Jistgħu jiġu kkombinati tipi differenti ta’ SCOs.

Sors: Il-QEA, ibbażat fuq il-gwida tal-Kummissjoni dwar l-SCOs.

L-SCOs li ġew introdotti fil-perjodu 2014-2020, huma rilevanti biss għall-miżuri fejn il-pagamenti ma jsirux fuq il-bażi ta’ erjas jew ta’ annimali u lanqas għall-miżuri li huma koperti mill-metodi ta’ pagament fiss stabbiliti fir-regolamenti (ara l-paragrafu 2). Il-Figura 2 tippreżenta l-finanzjament għall-iżvilupp rurali ppjanat għall-perjodu 2014-2020, u tindika s-sehem probabbli ta’ miżuri li għalihom ċerti spejjeż jistgħu jitħallsu fuq il-bażi ta’ SCOs. L-użu tal-SCOs għal dawn il-miżuri huwa żvilupp ġdid fil-politika ta’ żvilupp rurali iżda fondi oħrajn⁷ kienu diġà użawhom matul il-perjodu 2007-2013.

NB: Il-figura turi ripartizzjoni approssimattiva, billi l-metodi ta’ pagament fiss huma stabbiliti għal partijiet ta’ wħud mill-miżuri, iżda l-ebda tqassim tal-ammonti bbaġitjati fil-livell tas-sottomiżura mhu disponibbli.

Sors: Il-QEA, ibbażat fuq informazzjoni finanzjarja mill-Kummissjoni (miksuba fl-20 ta’ Novembru 2017).

F’konformità mar-regoli applikabbli⁸, jenħtieġ li l-SCOs jiġu stabbiliti f’wieħed minn dawn il-modi li ġejjin⁹:

• fuq il-bażi ta’ metodu ta’ kalkolu ġust, ekwu u verifikabbli;
• stabbiliti f’konformità mar-regoli applikabbli għall-SCOs f’politiki oħrajn tal-UE għal tip simili ta’ operazzjoni u ta’ benefiċjarju;
• stabbiliti skont l-iskemi ta’ għotja nazzjonali tal-Istat Membru inkwistjoni għal tip simili ta’ operazzjoni u ta’ benefiċjarju;
• fuq il-bażi ta’ rati stabbiliti bir-regolamenti.

L-SCOs mhumiex obbligatorji – l-Istati Membri huma liberi biex jiddeċiedu jekk jużawhomx jew le.

Ambitu u approċċ tal-awditjar

L-awditu tagħna kopra t-tfassil u l-ewwel tliet snin (2015-2017) tal-użu tal-SCOs għall-pagament tal-appoġġ għall-iżvilupp rurali. Il-miżuri kkonċernati huma inklużi fl-Anness I.

L-objettiv prinċipali tagħna kien li nivvalutaw jekk l-SCOs jikkontribwux għas-simplifikazzjoni filwaqt li jiżguraw konformità mal-prinċipju ta’ ekonomija għall-baġit tal-UE, u jekk jinkisbux riżultati aħjar bl-użu tagħhom. Biex inwieġbu din il-mistoqsija prinċipali tal-awditjar, aħna eżaminajna jekk l-SCOs:

• jissimplifikawx l-amministrazzjoni;
• jiżgurawx konformità mal-prinċipju tal-ekonomija; u
• jintużawx b’mod mifrux kif ukoll iżidux il-fokus fuq l-objettivi ta’ politika.

Biex tinkiseb stampa ġenerali dwar l-użu tal-SCOs, aħna eżaminajna l-118-il Programm tal-Iżvilupp Rurali (PŻR) u għażilna 20¹⁰ minnhom għal analiżi dokumentarja¹¹. Aħna għażilna dawn is-sitt PŻR li ġejjin għal żjara ta’ awditjar: il-Fjandri (il-Belġju), id-Danimarka, is-Sassonja (il-Ġermanja), il-Gżejjer Kanarji (Spanja), Languedoc-Roussillon (Franza) u l-Iżvezja. Matul iż-żjarat tal-awditjar tagħna, aħna qabbilna l-proċeduri tal-Istati Membri u l-gwida għall-benefiċjarji qabel u wara l-introduzzjoni tal-SCOs. Aħna qabbilna wkoll il-fajls tal-proġetti u, f’żewġ Stati Membri¹², żorna lill-benefiċjarji finali.

Biex jiġu mifhuma r-regoli applikabbli u r-rwol tal-Kummissjoni, aħna eżaminajna l-qafas legali, il-gwida tal-Kummissjoni għall-Istati Membri, u l-proċeduri u l-listi ta’ kontroll interni tal-Kummissjoni. Fil-Kummissjoni, aħna wettaqna intervisti, eżaminajna l-korrispondenza mal-Istati Membri, u attendejna avvenimenti fejn il-Kummissjoni pprovdiet informazzjoni dwar l-SCOs lill-Istati Membri.

L-użu ta’ opzjonijiet ta’ spejjeż simplifikati (SCOs) issimplifika l-amministrazzjoni

Dawn jagħmluha aktar faċli għall-benefiċjarji biex jippreżentaw talbiet għall-pagament…

Ir-riċeviment ta’ għajnuna għal proġetti tal-iżvilupp rurali huwa proċess magħmul minn żewġ stadji. L-ewwel, l-applikanti jibagħtu l-applikazzjonijiet għall-appoġġ lill-awtoritajiet rilevanti, li jivverifikaw u japprovaw proġetti fuq il-bażi ta’ kriterji ta’ eliġibbiltà u ta’ għażla. Wara l-ikkompletar tal-proġett, il-benefiċjarji jippreżentaw it-talbiet għall-pagament, li l-Aġenzija tal-Pagamenti tivverifika qabel ma tħallas. Dan il-proċess jintwera fil-Figura 3.

Sors: il-QEA.

Meta japplikaw għal appoġġ l-applikanti jkunu jridu jipprovdu diversi dokumenti. Fejn il-baġit tal-UE jkun se jirrimborża parti mill-ispejjeż eliġibbli, ta’ spiss ikun jeħtieġ li huma jipprovdu offerti biex juru li l-ispejjeż mistennija jkunu raġonevoli, u mbagħad jippreżentaw il-fatturi u l-provi tal-pagament flimkien mat-talbiet tagħhom għall-pagament. Għal proġett wieħed tal-perjodu 2007-2013, li aħna eżaminajna fl-Iżvezja, fejn il-benefiċjarju bena maqjel għall-baqar, iż-żewġ talbiet għall-pagament kienu jinkludu 134 fattura u prova ta’ pagament. Dan ir-rekwiżit japplika wkoll għall-ispejjeż indiretti (ara l-Kaxxa 2).

Aħna eżaminajna l-applikazzjonijiet għall-appoġġ u t-talbiet għall-pagament għal proġetti tal-perjodu 2014-2020 li tħallsu permezz ta’ SCOs u qabbilniehom ma’ proġetti tal-perjodu 2007-2013 (meta l-SCOs ma ntużawx) sabiex nivvalutaw jekk il-proċeduri għall-applikazzjoni u għat-talbiet sarux aktar faċli. Fis-sitt Stati Membri kollha li saritilhom żjara, aħna sibna li l-benefiċjarji ta’ proġetti bbażati fuq SCOs la għandhom bżonn jippreżentaw offerti mal-applikazzjonijiet tagħhom u lanqas fatturi jew provi ta’ pagament mat-talbiet tagħhom għall-pagament. It-Tabella 1 tipprovdi eżempji ta’ dokumenti ġustifikattivi mehmuża mal-applikazzjonijiet għall-appoġġ u mat-talbiet għall-pagament matul il-perjodu 2007-2013 (rimborż ibbażat fuq l-ispejjeż imġarrba) u matul il-perjodu 2014-2020 (rimborż ibbażat fuq SCOs).

NB: It-tabbella tinkludi biss id-dokumenti ġustifikattivi li huma affettwati mill-użu ta’ SCOs.

Sors: Il-QEA, ibbażat fuq dokumentazzjoni mill-Istati Membri.

Kif jidher fit-Tabella 1, l-użu frekwenti ta’ SCOs ifisser li l-benefiċjarji jkollhom inqas dokumenti x’jippreżentaw. Fil-Kaxxa 3, qed nagħtu eżempju ta’ dan.

Kaxxa 3

Rata fissa għall-ispejjeż soċjali fl-Iżvezja

Il-Bord Żvediż tal-Agrikoltura, b’kooperazzjoni mal-Kunsill Żvediż dwar il-Fond Soċjali Ewropew u l-Aġenzija Żvediża għall-Ekonomija u t-Tkabbir Reġjonali, żviluppa rata komuni għall-ispejjeż tas-sigurtà soċjali. Fl-Iżvezja, ħafna mill-proġetti jinkludu salarji u għaldaqstant anke spejjeż soċjali. Dawn l-ispejjeż ivarjaw skont it-tip ta’ kuntratt u l-età; u jistgħu jinvolvu bosta fatturi maħruġa minn diversi organizzazzjonijiet kif ukoll kalkoli li normalment ikunu kumplessi. Preċedentement, ħafna benefiċjarji żgħar ma applikawx għal dawn l-ispejjeż minħabba li qisuhom ikkumplikati wisq.

L-istampa turi d-dokumenti ppreżentati minn benefiċjarju għal talba waħda għall-pagament fil-perjodu 2007-2013 meta l-ispejjeż soċjali ma kinux isiru abbażi ta’ rata fissa.

… u filwaqt li l-awtoritajiet jiffaċċjaw ammont ta’ xogħol jew spejjeż addizzjonali fit-tħejjija tal-metodoloġija …

Jekk jużaw l-SCOs, l-Awtoritajiet Maniġerjali jridu¹³ jiżviluppaw metodoloġija u jikkalkolaw il-livelli ta’ pagament (ara l-paragrafu 45 għal stampa ġenerali tal-korpi involuti fil-livell tal-Istati Membri). Dan huwa xogħol addizzjonali li mhuwiex meħtieġ meta l-għotjiet jitħallsu fuq il-bażi tal-ispejjeż imġarrba. Biex nivvalutaw jekk il-ħin jew l-ispejjeż meħtieġa għat-tħejjija tal-metodoloġija u l-kalkoli humiex proporzjonati mal-ħin li ġie ffrankat fil-perjodu kollu, aħna intervistajna lill-awtoritajiet tal-Istati Membri li żorna u eżaminajna d-dokumentazzjoni tagħhom dwar il-metodoloġija u l-kalkoli. Il-Kaxxa 4 tinkludi eżempju tal-ammont ta’ xogħol involut fl-iżvilupp tal-metodoloġija.

Matul l-analiżi dokumentarja li wettaqna, aħna staqsejna lill-awtoritajiet responsabbli mill-20 PŻR magħżula dwar ir-raġunijiet prinċipali tagħhom għalfejn ma jagħmlux użu aktar estensiv mill-SCOs. L-aktar spjegazzjoni frekwenti li tawna kienet li dan huwa dovut għall-varjetà kbira ta’ proġetti u ta’ benefiċjari appoġġati. Sitta¹⁴ mill-20 awtorità responsabbli semmew il-piż amministrattiv u l-ħin li jittieħed fit-tfassil tal-metodoloġiji.

Tlieta mis-sitt Awtoritajiet Maniġerjali li saritilhom żjara għażlu li jesternalizzaw dan il-kompitu għal tal-inqas xi wħud mill-SCOs tagħhom peress li la kellhom ir-riżorsi u lanqas l-għarfien espert disponibbli internament: id-Danimarka, Languedoc-Roussillon u l-Iżvezja. Minkejja l-ammont ta’ xogħol jew l-ispiża addizzjonali meħtieġa għall-iżvilupp tal-SCOs, l-Awtoritajiet Maniġerjali fl-Istati Membri li saritilhom żjara kienu favur li jinvestu fl-iżvilupp tal-metodoloġija għall-SCOs, minħabba s-simplifikazzjoni u l-iffrankar ta’ ħin (mistennija) fil-livell tal-amministrazzjoni u tal-benefiċjarji matul l-implimentazzjoni.

Il-leġiżlatur jista’ jinkludi fir-regolamenti r-rati u l-ammonti li għandhom jintużaw għall-SCOs. Jekk dawn l-SCOs ikunu lesti biex jintużaw mill-awtoritajiet tal-Istati Membri mingħajr ma jkun meħtieġ li titħejja xi metodoloġija jew isiru kalkoli, dawn jissejħu SCOs standard. Ara l-Kaxxa 5 għal eżempji ta’ SCOs standard li attwalment huma disponibbli għall-appoġġ għall-iżvilupp rurali¹⁵.

Għall-SCOs standard previsti fir-Regolament, bħall-kumpens b’rata fissa għall-ispejjeż indiretti, l-Awtoritajiet Maniġerjali mhumiex meħtieġa jiġġustifikaw il-perċentwal użat. Dan huwa partikolarment vantaġġuż għall-awtoritajiet tal-Istati Membri minħabba li ma jkollhomx għalfejn iħejju metodoloġija, iżda xorta waħda jkunu jistgħu jibbenefikaw minn proċedura ssimplifikata għall-applikazzjoni u għall-pagament.

… huma jiffrankaw il-ħin matul il-kontrolli amministrattivi

Il-persunal tal-awtoritajiet rilevanti huwa meħtieġ iwettaq kontrolli amministrattivi fuq l-applikazzjonijiet għall-appoġġ u t-talbiet għall-pagament. Aħna investigajna kif dawn il-kontrolli jinbidlu meta l-pagamenti jsiru bl-użu tal-SCOs, billi eżaminajna l-leġiżlazzjoni rilevanti¹⁶, il-proċeduri tal-Istati Membri u l-kontrolli mwettqa kemm għal proġetti li tħallsu bl-użu tal-SCOs kif ukoll għal dawk li tħallsu mingħajr l-użu tagħhom. Fit-Tabella 2 jingħataw eżempji ta’ dan.

NB: It-tabella tinkludi biss il-kontrolli amministrattivi affettwati mill-użu tal-SCOs.

Sors: il-QEA.

Il-persunal tal-Aġenzija tal-Pagamenti fis-sitt Stati Membri li saritilhom żjara qalilna li l-kontroll tar-raġonevolezza tal-ispejjeż¹⁷ kien jieħu ħafna ħin, b’mod partikolari fil-każijiet fejn kienu meħtieġa li jsiru kjarifiki jew fejn l-offerti ma kinux ta’ kwalità suffiċjenti. Fl-istadju tat-talba għall-pagament, l-Aġenziji tal-Pagamenti jiffrankaw il-ħin billi ma jwettqux kontrolli tal-fatturi jew tal-provi tal-pagamenti meta dawn ikunu bbażati fuq SCOs.

Qabel ma jsir pagament, il-persunal tal-Aġenzija tal-Pagamenti jivverifika l-konformità mal-kundizzjonijiet għall-għoti tal-appoġġ. Dawn iqabblu l-operazzjoni kompluta mal-operazzjoni li għaliha jkun ingħata l-appoġġ, u normalment jagħmlu żjara biex jivverifikaw li l-operazzjoni tkun fil-fatt kompluta¹⁸. Dawn il-kontrolli ma jinbidlux meta jintużaw SCOs.

Għal pagamenti bbażati fuq spejjeż għal kull unità, il-persunal tal-Aġenzija tal-Pagamenti jkun meħtieġ li jivverifika l-kwantitajiet. L-Istati Membri jistgħu jiddeċiedu huma stess kif jagħmlu dan. Ħafna minnhom jirrikorru għal żjarat lill-benefiċjarji biex jivverifikaw il-kwantitajiet u biex jiżguraw li l-operazzjoni li ġiet ikkompletata tkun konformi mad-deċiżjoni tal-għajnuna. Għal operazzjonijiet li ma tkunx saritilhom żjara, l-Istati Membri jkunu jridu jsibu mezzi oħra biex jivverifikaw il-kwantitajiet involuti u li l-operazzjoni tkun ġenwina. L-Aġenzija tal-Pagamenti tal-Gżejjer Kanarji, pereżempju, tuża reġistri ta’ vetturi agrikoli biex tivverifika s-sjieda, u d-Danimarka tuża immaġnijiet bis-satellita biex tivverifika l-eżistenza ta’ faċilitajiet għall-ħżin tad-demel.

Meta jintużaw rati fissi, l-ispejjeż eliġibbli jiġu kkalkulati bħala perċentwal ta’ kategoriji oħra ta’ spejjeż eliġibbli. Is-sitt¹⁹ PŻR kollha magħżula għal żjara tal-awditjar jużaw rati fissi għall-ispejjeż indiretti, u l-awtoritajiet tal-Istati Membri semmew dan bħala eżempju tajjeb ta’ simplifikazzjoni. Eżempju ta’ dan jingħata fil-Kaxxa 6.

Kaxxa 6

Eżempju ta’ dokumentazzjoni għal spejjeż indiretti

Fil-Fjandri, aħna qabbilna t-talbiet għall-pagament, inkluża d-dokumentazzjoni ġustifikattiva, ta’ qabel u wara l-introduzzjoni tar-rata fissa. Għal tal-ewwel, aħna sibna entrata waħda ta’ EUR 12 li għaliha kien hemm disa’ dokumenti ġustifikattivi.

Meta jintużaw rati fissi, il-benefiċjarji mhumiex meħtieġa jippreżentaw dawn id-dokumenti u l-awtoritajiet tal-Istati Membri ma għandhomx bżonn jivverifikawhom.

L-awtoritajiet fis-Sassonja qalulna li l-ħin meħud għall-kontroll tat-talbiet għall-pagament naqas b’mill-inqas 50 % minħabba li hemm inqas kontrolli fuq l-ispejjeż indiretti. Fil-perjodu preċedenti, il-verifikazzjoni ta’ kull fattura matul il-kontrolli fuq l-ispejjeż indiretti kienet tieħu mill-inqas 10 minuti. Jekk benefiċjarju jkun iddikjara l-ispejjeż tal-kera għal sena, l-amministratur ikollu jivverifika 12-il fattura u 12-il prova ta’ pagament, li jieħu madwar 120 minuta. Issa, l-amministratur huwa meħtieġ li jivverifika biss li l-kalkolu tal-15 % spejjeż indiretti huwa korrett u li l-ebda spiża indiretta ma tkun inkluża fil-lista ta’ fatturi ddikjarati għal spejjeż diretti, li jieħu madwar 10-15-il minuta.

L-awtoritajiet Żvediżi stmaw li l-kontrolli fuq l-ispejjeż indiretti bbażati fuq l-ispejjeż imġarrba kienu qed jieħdu minn tlieta sa ħames sigħat għal kull talba għall-pagament, meta mqabbla ma’ madwar 50 minuta jekk tintuża rata fissa.

L-awditu tagħna juri li l-użu tal-SCOs jista’ jwassal għal simplifikazzjoni u ffrankar ta’ ħin, prinċipalment għall-benefiċjarji iżda wkoll għall-awtoritajiet rilevanti. Madankollu, l-investiment bil-quddiem meħtieġ biex l-Awtorità Maniġerjali tkun tista’ tiżviluppa metodoloġija għall-SCOs irid ikun proporzjonat għall-ħin li l-awtoritajiet u l-benefiċjarji jistgħu jistennew li jiffrankaw jekk japplikaw l-SCOs. Din hija waħda mir-raġunijiet għalfejn l-SCOs ma tantx qed jintużaw fil-politika ta' żvilupp rurali, kif se jiġi diskuss hawn taħt fil-paragrafi 48 sa 50, 55 sa 56.

Użu tajjeb ta’ SCOs jista’ jgħin biex tiġi kkontrollata l-ispiża ta’ proġetti tal-iżvilupp rurali

Għal proġetti ffinanzjati fuq il-bażi ta’ rimborż tal-ispejjeż imġarrba, l-awtoritajiet nazzjonali huma meħtieġa li, fl-istadju tal-approvazzjoni jivverifikaw jekk l-ispejjeż mistennija jkunux raġonevoli. Ir-rapporti tad-DĠ AGRI u tal-QEA ġibdu l-attenzjoni għal nuqqasijiet f’dawn il-kontrolli (ara l-Kaxxa 7).

Meta jintużaw l-SCOs, dawn il-kontrolli jitqiesu li jkunu koperti jekk tkun ġiet żviluppata metodoloġija soda. L-użu effettiv tal-SCOs jippermetti li jinżamm kontroll fuq l-ispejjeż tal-proġetti tal-iżvilupp rurali. Biex dan jinkiseb jeħtieġ li l-SCOs jiġu ssettjati fil-livell korrett, ikunu bbażati fuq metodoloġija soda, u jiġu riveduti b'mod regolari u aġġornati meta jkun meħtieġ. Żbalji fil-kalkoli jfisser li l-proġetti kollha li jużaw ir-rati jkunu milquta mill-istess żball.

Aħna sibna eżempji tajbin ta’ metodoloġija u ta’ kalkoli …

Aħna ridna neżaminaw il-metodoloġiji żviluppati mill-Istati Membri li żorna. Aħna osservajna li l-biċċa l-kbira tal-miżuri li ngħataw appoġġ mill-FAEŻR matul il-perjodu 2014-2020 huma simili għal dawk li ġew appoġġati fil-perjodu 2007-2013²³. Għalhekk, ħafna mill-Istati Membri għandhom aċċess għal data storika dwar l-ispejjeż li effettivament iġġarrbu u tħallsu għall-operazzjonijiet fil-perjodu preċedenti. Fil-Kaxxa 8 jingħata eżempju ta’ spejjeż għal kull unità bbażati fuq data storika.

Inġenerali, l-Istati Membri li jużaw l-SCOs ma għandhomx il-mezzi biex ikomplu jimmonitorjaw l-ispejjeż reali. Dan għaliex meta l-Aġenziji tal-Pagamenti jeqilbu għal pagamenti bbażati fuq l-SCOs, huma ma jibqgħux jiġbru informazzjoni dwar l-ispejjeż reali. Għalhekk, jista’ ma jkollhomx data rilevanti disponibbli biex jaġġornaw il-kalkoli tagħhom. Minħabba dan fis-Sassonja (il-Ġermanja), l-awtoritajiet kienu involvew lil konsulenti biex jiżviluppaw metodoloġiji ġodda bbażati fuq data ta’ esperti esterni biex jaġġornaw l-SCOs tagħhom meta d-data storika ma tkunx disponibbli aktar.

… iżda f’xi każijiet id-data ta’ bażi ma kinitx disponibbli …

Biex jiġi vvalutat jekk metodoloġija tkunx ġusta u ekwa, din trid tkun verifikabbli. Jeħtieġ li l-awdituri jkollhom aċċess għad-data li fuqha jkun ibbażat il-kalkolu tal-SCOs għaż-żmien kollu li fih tintuża l-SCO²⁴. Aħna għażilna elementi individwali tal-kalkoli u ttraċċajniehom lura għad-data sors biex neżaminaw il-verifikabbiltà.

Il-metodoloġija deskritta fil-Kaxxa 8 (ara l-paragrafu 31) tipprovdi eżempju fejn aħna nistgħu faċilment nittraċċaw lura l-elementi magħżula għad-data ta’ bażi. Madankollu, aħna sibna problemi relatati mal-verifikabbiltà ta’ xi wħud mill-metodoloġiji żviluppati għall-ispejjeż għal kull unità. L-awdituri tad-DĠ AGRI rrappurtaw sejbiet simili dwar il-verifikabbiltà f’żewġ awditi²⁵ mis-sitta li wettqu sa issa dwar l-SCOs.

Fl-għażla limitata ta’ eżempji li għażilna, il-problemi li sibna kienu relatati ma’ każijiet fejn l-awtoritajiet kienu esternalizzaw il-kalkoli. Fl-Iżvezja, l-Awtorità Maniġerjali ma kellhiex aċċess għad-data li fuqha jkunu bbażati xi wħud mill-kalkoli u minflok serrħet fuq analiżijiet indipendenti. Fid-Danimarka, l-istruttura tal-esternalizzazzjoni kienet tinvolvi tliet livelli ta’ konsulenti u kkumplikat il-proċess ta’ verifikazzjoni, kif inhu spjegat fil-Kaxxa 9.

Kaxxa 9

L-involviment ta’ diversi konsulenti jista’ jikkumplika l-verifikazzjoni

L-awtoritajiet Daniżi esternalizzaw l-iżvilupp tal-SCOs lill-Konsulent A. L-ebda data storika ma kienet disponibbli dwar l-akkomodazzjoni tal-bhejjem. Il-Konsulent A qabbad sottokuntrattur (il-Konsulent B) biex jiddefinixxi l-ispejjeż għal kull unità, u dan, min-naħa tiegħu qabbad lill-Konsulent C biex jikseb id-data. Barra minn hekk, korp indipendenti eżamina l-kalkoli fuq il-bażi tal-għarfien espert proprju tiegħu u s-sorsi tad-data. Il-figura ta’ hawn taħt tagħti stampa ġenerali tal-partijiet involuti fl-iżvilupp tal-ispejjeż għal kull unità għall-akkomodazzjoni tal-bhejjem fid-Danimarka.

Madwar terz tad-data ta’ bażi ma kinitx disponibbli fiż-żmien meta sar l-awditu tagħna. L-awtoritajiet Daniżi infurmawna li kien se jkollhom jiffirmaw kuntratt ġdid mat-tielet konsulent (il-Konsulent C) biex jiksbu d-data ta’ bażi li ssostni l-istimi. L-esternalizzazzjoni u l-użu ta’ data minn diversi konsulenti kkumplikaw il-proċess ta’ verifikazzjoni tal-kalkoli u b’hekk dan ħa ħafna ħin. L-awtoritajiet Daniżi setgħu jevitaw dan kollu billi jitolbu d-data ta’ bażi mill-Konsulent A, li miegħu kienu ffirmaw kuntratt, jew billi jistipulaw fil-kuntratt li l-kalkoli kellhom ikunu verifikabbli.

… jew id-data użata għall-kalkoli ma kinitx iġġustifikata b’mod suffiċjenti

Il-kalkoli jkunu ġusti jekk ikunu bbażati fuq ir-realtà, u jekk is-suppożizzjonijiet u d-data użata għall-metodoloġija jkunu ġġustifikati sew²⁶. Aħna ridna neżaminaw jekk dan kienx il-każ billi vverifikajna l-metodoloġija għall-SCOs magħżula fl-Istati Membri li żorna. Aħna ttestjajna wkoll il-kalkoli billi ttraċċajna lura kampjun ta’ elementi għad-data sors (ara wkoll il-paragrafi 33 sa 35). Fil-biċċa l-kbira tal-każijiet, aħna sibna li l-metodoloġija u l-kalkoli kienu tajbin.

Fi Stat Membru li saritlu żjara, l-awtoritajiet ma setgħux jiġġustifikaw id-data li ntużat. Il-metodoloġija tal-Gżejjer Kanarji għall-ispejjeż għal kull unità u s-somom f’daqqa tgħid li tliet offerti jew fatturi huma biżżejjed biex jiġi stabbilit SCO. L-ammont ta’ data li ntużat fil-kalkoli nfushom tvarja, iżda ħafna drabi, l-awtoritajiet ma setgħux jiġġustifikaw għaliex u kif kienet intgħażlet id-data speċifika użata. Eżempju ta’ dan jingħata fil-Kaxxa 10.

F’każijiet oħra, għall-kalkolu tal-SCOs l-awtoritajiet użaw offerti li mhumiex komparabbli. Fil-Kaxxa 11 jingħata eżempju li juri wkoll li l-użu tal-SCOs mhux dejjem jipprovdi valur miżjud meta mqabbel mar-rimborż tal-ispejjeż imġarrba.

Kaxxa 11

Somma f’daqqa bbażata fuq offerti mhux komparabbli li ma wasslu għal ebda ffrankar

Fil-Gżejjer Kanarji, gruppi ta’ azzjoni lokali li jieħdu sehem f’mill-inqas żewġ fieri jistgħu jirċievu appoġġ permezz ta’ pagament ta’ somma f’daqqa li tkopri t-tariffi ta’ parteċipazzjoni. L-awtoritajiet tal-Gżejjer Kanarji kkalkulaw is-somma f’daqqa bħala l-ispiża medja ta’ ħames avvenimenti mmultiplikata bi tnejn. Il-ħames avvenimenti huma relatati mal-agrikultura u l-bhejjem, l-artiġjanat u r-restawr. Il-benefiċjarji jirċievu l-pagament ta’ somma f’daqqa talli jkunu żaru tnejn minn dawn l-avvenimenti.

Li kieku dawn l-attivitajiet ġew rimborżati fuq il-bażi tal-ispejjeż imġarrba, x’aktarx li l-benefiċjarju kien ikollu jippreżenta żewġ fatturi u provi ta’ pagament biex jissostanzja l-ispejjeż. Probabbilment li, biex jirċievi pagament ta’ somma f’daqqa, kien ikollu wkoll jippreżenta fattura jew ċertifikat ta’ attendenza bħala prova li kien attenda ż-żewġ fieri. F’dan il-każ, l-użu ta’ pagament ta’ somma f’daqqa ftit li xejn naqqas il-volum ta’ dokumenti li l-benefiċjarju kien meħtieġ jippreżenta jew l-għadd ta’ kontrolli li l-Aġenzija tal-Pagamenti kellha twettaq. Lanqas ma għen biex l-ispejjeż tal-proġett jinżammu taħt kontroll, kif turi l-varjazzjoni bejn l-offerti.

It-tneħħija tar-rekwiżit ta’ ċertifikazzjoni indipendenti ġġib sfidi ġodda

Kontroll indipendenti huwa importanti biex jiġi żgurat li l-SCOs ikunu bbażati fuq metodoloġiji ġusti, ekwi u verifikabbli. Kontrolli indipendenti dwar it-tfassil ta’ SCO jistgħu jitwettqu qabel l-implimentazzjoni (“ex ante”) jew matul jew wara l-implimentazzjoni (“ex post”). Aħna ridna niksbu stampa ġenerali tal-kontrolli mwettqa fuq il-metodoloġija relatata mal-SCOs u sibna li, għall-iżvilupp rurali, ir-regoli kienu nbiddlu reċentement.

L-introduzzjoni ta’ SCOs għall-iżvilupp rurali kienet akkumpanjata minn dikjarazzjoni obbligatorja ta’ korp indipendenti²⁸. Din kienet l-unika miżura ta’ kontroll ex ante indipendenti. Bidliet reċenti fil-leġiżlazzjoni²⁹ jfissru li l-miżuri ta’ investiment ma għadhomx koperti minn dawn id-dikjarazzjonijiet. B’riżultat ta’ dan, mill-2018 ’il quddiem mhux se jkun obbligatorju li jitwettqu kontrolli indipendenti fuq il-metodoloġiji u l-kalkoli relatati ma’ SCOs. Madankollu, l-Awtoritajiet Maniġerjali xorta waħda se jkollhom il-possibbiltà li jinvolvu korp indipendenti biex jistabbilixxi jew jeżamina l-metodoloġija u l-kalkoli.

Il-Kummissjoni ma teżaminax il-metodoloġija u l-kalkoli matul l-approvazzjoni tal-PŻR, iżda biss f’xi awditi magħżula …

Il-Kummissjoni teżamina u tapprova l-PŻR³⁰. Il-validazzjoni tal-kalkoli tal-SCOs ma tagħmilx parti mill-proċess ta’ approvazzjoni tal-PŻR.

Il-Kummissjoni twettaq awditi biex tivverifika li l-pagamenti jkunu konformi mal-liġijiet applikabbli³¹. L-awdituri tal-Kummissjoni jeżaminaw il-metodoloġiji u l-kalkoli jekk jagħżlu nfiq li jkun sar bl-użu ta’ SCOs. Fl-2017, il-biċċa l-kbira tal-infiq kopert fl-awditi kien għadu jirrigwarda miżuri mill-perjodu 2007-2013 u kien tħallas fuq il-bażi tal-ispejjeż imġarrba.

Żbalji fil-metodoloġija relatata ma’ SCO jistgħu jaffettwaw il-proġetti kollha li jużaw l-SCO inkwistjoni. Bosta Stati Membri³² esprimew tħassib dwar il-korrezzjonijiet finanzjarji potenzjali u semmew dan bħala ostaklu għall-użu ta’ SCOs Bħal korrezzjonijiet finanzjarji oħrajn imposti mill-awdituri tal-Kummissjoni, l-impatt tagħhom huwa limitat għal 24 xahar ta’ nfiq³³.

Għall-Fond Soċjali Ewropew, il-Kummissjoni tista’, fuq talba ta’ Stat Membru, tivvalida ex ante l-metodoloġija u l-kalkoli relatati ma’ SCOs. Hija tagħmel dan billi tadotta att delegat³⁴, li joħloq ċertezza legali għall-Istat Membru. Billi l-ebda wieħed mill-Fondi Strutturali u ta' Investiment Ewropej l-oħra ma għażel dan il-mekkaniżmu fil-proposta għar-Regolament Omnibus³⁵, dan se jibqa’ limitat għall-Fond Soċjali Ewropew.

… u r-rwol tal-Korpi taċ-Ċertifikazzjoni fl-awditjar tal-SCOs mhuwiex speċifikat

Tliet korpi nazzjonali huma involuti fil-ġestjoni u l-kontroll tal-fondi; ir-responsabbiltajiet tagħhom relatati mal-SCOs huma deskritti fil-Figura 4.

Sors: il-QEA, ibbażat fuq ir-Regolament (UE) Nru 1305/2013.

Il-Korpi taċ-Ċertifikazzjoni Indipendenti joħorġu opinjoni annwali li tkopri l-kontijiet annwali tal-Aġenziji tal-Pagamenti, il-funzjonament tas-sistema ta’ kontroll intern, u l-legalità u r-regolarità tal-infiq³⁶. Il-linji gwida tal-Kummissjoni³⁷ għall-Korpi taċ-Ċertifikazzjoni ma jsemmux l-SCOs³⁸.

Biex ikun żgurat li jinżamm kontroll fuq l-ispejjeż, huwa importanti li l-SCOs jiġu ssettjati fil-livell korrett. Il-problemi li sibna bil-kalkoli juru li jeħtieġ li jsir kontroll indipendenti.

L-SCOs il-ġodda kienu jkopru parti żgħira tal-infiq totali fuq l-iżvilupp rurali

Fiż-żmien meta wettaqna l-awditu, il-Kummissjoni ma kellhiex stampa ġenerali tal-proporzjon ta’ nfiq li huwa kopert mill-SCOs. L-għażla tagħna ta’ PŻR kienet tinkludi dawk bl-ogħla użu apparenti ta’ SCOs³⁹, madankollu, aħna ma sibna l-ebda eżempju fejn miżura sħiħa ġiet implimentata permezz ta’ SCOs.

Kull miżura ta’ żvilupp rurali hija maqsuma f’diversi sottomiżuri, li min-naħa tagħhom ikopru ħafna tipi differenti ta’ proġetti. Mill-analiżi dokumentarja li wettaqna ta’ 20 PŻR, aħna sibna li l-użu tal-SCOs kien limitat għal ċerti tipi ta’ proġetti jew infiq. Ara l-Figura 5 għal eżempju ta’ dan.

Sors: il-QEA, ibbażat fuq PŻR ta’ Languedoc-Roussillon.

Meta parti biss ta’ sottomiżura jew ta’ tip speċifiku ta’ spejjeż jiġu rimborżati permezz ta’ SCOs, mhuwiex possibbli li jiġu traċċati l-ammonti involuti. L-ibbaġitjar fi ħdan PŻR iwassal biss sal-miżuri, u ġeneralment l-Istati Membri jimmonitorjaw biss il-pagamenti li jsiru għal kull proġett (jiġifieri mhux għal kull tip ta’ nefqa). Madankollu, biex jintwera l-impatt tal-SCOs fuq PŻR partikolari (Walloon), li fih hemm żewġ miżuri li jużaw l-SCOs, fil-Figura 6 jingħata l-proporzjon tal-baġit għal dawn iż-żewġ miżuri dovut għall-SCOs. Għal dawn iż-żewġ miżuri, il-programm juża rata fissa ta’ 14 % għall-ispejjeż indiretti.

Sors: Il-QEA, ibbażat fuq dokumentazzjoni tal-Kummissjoni.

Il-miżuri li għalihom jintużaw l-SCOs fl-20 PŻR magħżula għall-analiżi dokumentarja tagħna huma inklużi fl-Anness I. L-SCOs li jintużaw l-aktar ta’ spiss huma dawk standard (ara l-paragrafu 19); il-biċċa l-kbira tal-20 PŻR jużaw rati fissi għall-ispejjeż indiretti. Il-Figura 7 turi kif normalment jintużaw it-tipi differenti ta’ SCOs.

Sors: il-QEA, ibbażat fuq analiżi dokumentarja ta’ 20 PŻR.

L-ispejjeż għal kull unità jintużaw l-aktar għall-ispejjeż għall-persunal⁴⁰, l-ispejjeż tal-ivvjaġġar jew l-allowances għall-akkomodazzjoni⁴¹. Għal proġetti sħaħ, l-ispejjeż għal kull unità jintużaw l-aktar għal investimenti f’assi fiżiċi⁴². Il-Figura 8 turi t-tipi ta’ SCOs li ntużaw fis-sitt PŻR magħżula għal żjara tal-awditjar.

NB: L-SCOs jintużaw biss għal tipi speċifiċi ta’ proġetti jew kategoriji ta’ spejjeż, u qatt ma jintużaw għal miżura sħiħa. Il-figura turi l-għadd ta’ sottomiżuri li japplikaw kull tip ta’ SCO fil-PŻR magħżula. Jistgħu jintużaw tipi differenti ta’ SCOs għall-istess sottomiżura. Għaldaqstant, il-figura ma tagħtix indikazzjoni tal-infiq totali li jkun sar bl-użu tal-SCOs iżda turi biss it-tipi ta’ SCOs ippreferuti.

Sors: Il-QEA, ibbażat fuq dokumentazzjoni tal-Istati Membri.

L-SCOs ma ngħatawx prijorità fit-tħejjija tal-PŻR għall-perjodu 2014-2020 iżda l-Kummissjoni tħeġġeġ l-użu tagħhom

Il-Parlament u l-Kunsill approvaw ir-regoli għall-perjodu 2014-2020 f’Diċembru 2013⁴³. L-erba’ DĠ⁴⁴ responsabbli mill-Fondi Strutturali u ta' Investiment Ewropej ħejjew dokument ta’ gwida komuni⁴⁵ (il-gwida tal-Kummissjoni dwar l-SCOs), u ppubblikaw id-dokument finali f’Settembru 2014. Il-Figura 9 turi l-kronoloġija tat-tħejjija tal-PŻR għall-perjodu 2014-2020.

Sors: il-QEA.

L-erba’ DĠ li jimmaniġġaw il-Fondi Strutturali u ta' Investiment Ewropej ikkummissjonaw studju dwar l-SCOs, li attwalment jinsab għaddej. L-istudju jiġbor informazzjoni, permezz ta’ stħarriġ, dwar il-miżuri u t-tipi ta’ SCOs li jintużaw għal kull wieħed mill-fondi, l-ammonti involuti u l-proġetti implimentati bl-użu tal-SCOs, kif ukoll il-benefiċċji relatati mal-użu tal-SCOs. Il-Kummissjoni għandha l-għan li tuża din l-informazzjoni meta tkun qed tiżviluppa l-qafas tal-iżvilupp rurali għall-perjodu li jmiss (wara l-2020).

Il-varjetà kbira ta’ miżuri u ta’ benefiċjarji tagħmel l-użu tal-SCOs diffikultuż, iżda dawn jistgħu jintużaw għal firxa wiesgħa ta’ investimenti

Għall-perjodu 2014-2020, it-28 Stat Membru stabbilew 118-il PŻR differenti, li minnhom 20 programm nazzjonali kienu uniċi filwaqt li 8 Stati Membri għażlu programmi reġjonali⁴⁶. Skont il-kundizzjonijiet ekonomiċi, naturali jew strutturali speċifiċi, il-PŻR jistgħu jinkludu sa 20 miżura li jikkontribwixxu għall-kisba tal-prijoritajiet tal-UE għall-iżvilupp rurali⁴⁷.

L-użu tal-SCOs jagħmel l-aktar sens meta jkun hemm ċertu ammont ta’ operazzjonijiet jew ta’ tipi ta’ nfiq simili. L-awtoritajiet responsabbli għall-20 PŻR magħżula għall-analiżi dokumentarja tagħna semmew li d-diversità fit-tipi ta’ operazzjonijiet u ta’ benefiċjarji hija r-raġuni prinċipali għaliex għażlu li ma jużawx l-SCOs b’mod aktar estensiv. Il-miżuri li ngħataw appoġġ mill-Fond Agrikolu Ewropew għall-Iżvilupp Rurali (FAEŻR) huma maqsumin f’sottomiżuri. B’kollox hemm 49 sottomiżura differenti li għalihom jistgħu jintużaw l-SCOs (elenkati fl-Anness I). Ħafna tipi differenti ta’ proġetti u/jew ta’ nfiq jistgħu jingħataw appoġġ taħt kull sottomiżura.

Minkejja d-diversità tal-proġetti u t-tipi ta’ nfiq fil-politika ta’ żvilupp rurali, aħna sibna eżempji fejn l-SCOs kienu ġew żviluppati għal firxa wiesgħa ta’ investimenti. Pereżempju, il-PŻR tal-Gżejjer Kanarji jinkludi spejjeż għal kull unità għal tmien kategoriji ta’ investimenti f’azjendi agrikoli, ara l-Kaxxa 12.

Madankollu, meta l-ammont ta’ proġetti jkun limitat għal ċertu tip ta’ investiment, l-SCOs ma jipprovdu l-ebda valur miżjud. Pereżempju, l-awtoritajiet tal-Gżejjer Kanarji żviluppaw l-ispiża għal kull unità għax-xiri ta’ kollettur taċ-ċpar. Din l-ispiża għal kull unità hija bbażata fuq offerta waħda li saret mill-uniku fornitur disponibbli. Fiż-żmien meta wettaqna l-awditu, proġett wieħed biss kien jinkludi x-xiri ta’ kollettur taċ-ċpar. Is-somom f’daqqa huma l-opzjoni li tintuża l-inqas għall-proġetti tal-iżvilupp rurali. Tlieta mis-sitt Stati Membri li żorna⁴⁸ indikaw li huma għażlu li ma jużawx l-opzjoni ta’ somom f’daqqa minħabba li kienu tal-fehma li dawn huma aktar riskjużi. Sabiex jirċievi pagament fil-forma ta’ somma f’daqqa, benefiċjarju jrid jissodisfa l-kundizzjonijiet kollha – mhuwiex possibbli li jsiru pagamenti parzjali.

L-Istati Membri għandhom ukoll il-possibbiltà li jikkombinaw tipi differenti ta’ SCOs għal tip wieħed ta’ proġett, għalhekk, huma jistgħu jillimitaw is-somom f’daqqa għal attivitajiet li għalihom iridu jkunu ġew issodisfati l-kundizzjonijiet kollha sabiex jinkisbu r-riżultati mixtieqa. Pereżempju, il-PŻR tal-Gżejjer Kanarji jinkludi t-tliet tipi ta’ SCOs – spejjeż għal kull unità, somom f’daqqa u rati fissi – għal proġetti li jingħataw appoġġ taħt il-miżura ta’ kooperazzjoni u l-miżura ta’ appoġġ għall-iżvilupp lokali Leader (ara l-Kaxxa 13). Il-possibbiltà li jiġu kkombinati tipi differenti ta’ SCOs tipprovdi flessibbiltà fil-mod ta’ kif jistgħu jintużaw l-SCOs.

Meta jintroduċu l-SCOs, l-awtoritajiet ta’ Stat Membru jistgħu jibbenefikaw mill-metodoloġiji jew mir-rati li diġà ġew żviluppati għal skemi nazzjonali jew għal skemi tal-UE. Aħna sibna bosta PŻR⁴⁹ li jużaw l-allowances tal-ivvjaġġar jew l-ispejjeż għal kull unità fil-każ tal-ispejjeż għall-persunal li jinħarġu mis-sistemi nazzjonali. Madankollu, fuq il-bażi tal-analiżi dokumentarja li wettaqna ta’ 20 PŻR, sibna li, meta jiġu biex jiżviluppaw l-SCOs tagħhom, l-awtoritajiet tal-Istati Membri rarament jużaw l-esperjenza miksuba f’oqsma oħra ta’ politika. Aħna sibna żewġ eżempji biss ta’ dan (ara l-Kaxxa 14).

L-awtoritajiet tal-Istati Membri huma mħassba dwar l-awditi tal-Kummissjoni

Matul iż-żjarat tal-awditjar li wettaqna, bosta awtoritajiet tal-Istati Membri semmew li kellhom dubji dwar il-mod kif il-Kummissjoni teżamina l-SCOs, u xi wħud qalu li dan huwa ta’ ostaklu għall-użu tal-SCOs⁵¹. Matul iż-żjarat li jwettaq fl-Istati Membri, il-persunal tal-Kummissjoni jivverifika s-sistemi ta’ ġestjoni u kontroll tal-Istati Membri bl-użu ta’ lista ta’ kontrolli ewlenin u ta’ kontrolli anċillari⁵². Aħna eżaminajna l-approċċ tal-awditjar tad-DĠ AGRI u sibna li d-definizzjonijiet tagħhom ta’ dawn il-kontrolli ma kinux ġew aġġornati mal-introduzzjoni tal-SCOs. L-aġġornament tad-definizzjonijiet li l-Kummissjoni tuża għall-kontrolli ewlenin u għall-kontrolli anċillari biex jittieħed kont tal-SCOs huwa mod ta’ kif it-tħassib tal-Istati Membri jista’ jiġi indirizzat. Il-kontrolli rilevanti għall-SCOs huma ppreżentati fil-Figura 10.

Sors: il-QEA, ibbażat fuq intervisti u dokumentazzjoni tal-Kummissjoni.

F’dan il-kuntest, aħna żviluppajna lista ta’ rekwiżiti komuni ta’ aċċertament u ta’ prinċipji komuni tal-prestazzjoni fl-Anness II.1 u II.2.

Minkejja l-isfidi msemmija hawn fuq, l-awtoritajiet ta’ ħamsa mis-sitt Stati Membri li saritilhom żjara jipprevedu li fil-futur se jużaw l-SCOs b’mod aktar estensiv. Pereżempju, fl-ewwel PŻR tagħha għall-perjodu 2014-2020, l-Iżvezja riedet tuża aktar l-opzjoni ta’ somom f’daqqa iżda kienet limitata milli tagħmel dan minħabba d-dispożizzjoni (li issa tneħħiet) li l-SCOs iridu jiġu approvati ex ante⁵³.

Bidliet reċenti fil-leġiżlazzjoni jistgħu jħeġġu użu akbar tal-SCOs fl-iżvilupp rurali

F’Settembru 2016, il-Kummissjoni pproponiet bidliet⁵⁴ f’bosta dispożizzjonijiet li jaffettwaw l-implimentazzjoni tal-politika ta’ żvilupp rurali. F’Ottubru 2017, il-Kunsill u l-Parlament qablu li, b’effett mill-2018, titneħħa dispożizzjoni speċifika għall-iżvilupp rurali⁵⁵ li kienet tillimita l-użu tal-SCOs.

Il-bidliet maqbula jarmonizzaw aktar ir-regoli bejn il-Fondi Strutturali u ta' Investiment Ewropej u jżidu l-possibbiltajiet għall-użu tal-SCOs. It-tneħħija taċ-ċertifikazzjoni ex ante tal-metodoloġija u l-kalkoli għall-FAEŻR tista’ tiffaċilita użu aktar estensiv tal-SCOs. Iċ-ċertifikazzjoni ex ante kienet tfisser li l-SCOs kien ikollhom jiġu stabbiliti fi stadju aktar bikri fil-każ tal-FAEŻR milli, pereżempju, fil-każ tal-Fond Soċjali Ewropew. Għal dan tal-aħħar, huwa biżżejjed li l-SCOs jiġu stabbiliti sa mhux aktar tard mid-data ta’ meta tingħata l-għajnuna, kif issa huwa wkoll il-każ għall-FAEŻR. Il-Kunsill u l-Parlament għadhom qed jiddiskutu aktar proposti li jistgħu jaffettwaw l-użu tal-SCOs għall-FAEŻR; dawn jingħataw fil-qosor fil-Kaxxa 15. Jekk jiġu adottati, dawn il-bidliet addizzjonali se jżidu l-użu tal-SCOs.

Il-possibbiltà li l-SCOs ikunu bbażati fuq abbozz ta’ baġit għal proġett tfisser li dawn l-opzjonijiet jistgħu jiġu stabbiliti għal operazzjoni individwali waqt li tkun qed tiġi vvalutata l-applikazzjoni għal appoġġ. L-awtoritajiet Żvediżi u Finlandiżi infurmawna li huma kienu diġà biħsiebhom jużaw somom f’daqqa bbażati fuq abbozz ta’ baġit għal bosta miżuri sakemm il-Kummissjoni infurmathom li dan ma kienx possibbli għall-FAEŻR⁵⁶.

L-SCOs ma ġewx assoċjati ma’ fokus akbar fuq ir-riżultati

L-SCOs jittrasferixxu l-fokus minn fuq il-fatturi għal fuq l-output iżda ma jirriżultawx f’fokus akbar fuq ir-riżultati.

Waħda mir-raġunijiet mogħtija għall-promozzjoni ta’ użu aktar estensiv tal-SCOs hija l-potenzjal li permezz tagħhom jiżdied il-fokus fuq l-output u r-riżultati. Il-gwida tal-Kummissjoni dwar l-SCOs tinkludi bosta referenzi dwar dan⁵⁷. Għall-PŻR magħżula għal żjara tal-awditjar, aħna eżaminajna proġetti individwali biex nivverifikaw li l-awtoritajiet tal-Istati Membri kienu ffukaw il-verifikazzjonijiet tagħhom fuq l-output jew ir-riżultati u mhux fuq il-fatturi, u jekk l-eliġibbiltà tal-pagamenti li saru permezz ta’ SCOs kinitx ġiet determinata fuq il-bażi tal-kisba tal-output jew tar-riżultati ppjanati. Aħna qabbilna wkoll il-pagamenti li saru permezz ta’ SCOs kif ukoll dawk li saru mingħajr l-użu tagħhom.

Aħna sibna eżempji ta’ output u ta’ riżultati ta’ proġetti li jikkontribwixxu għall-ilħuq tal-objettivi ta’ miżura (ara l-Kaxxa 16 għal wieħed minnhom), iżda ma kien hemm l-ebda indikazzjoni li r-riżultati li nkisbu kienu aħjar minn li kieku l-pagament sar permezz ta’ rimborż tal-ispejjeż imġarrba.

Kaxxa 16

Pagamenti bbażati fuq l-output fis-Sassonja

Il-PŻR tas-Sassonja jiffinanzja l-bini ta’ ħitan tal-ġebel naturali fuq il-bażi ta’ spejjeż għal kull unità. Il-ħitan tal-ġebel naturali huma intenzjonati li jikkontribwixxu għar-restawr, il-preżervazzjoni u t-titjib tal-bijodiversità ta’ vinji li jkunu jinstabu fuq telgħet weqfin u fuq għoljiet. Il-pagamenti huma bbażati fuq metri kwadri ta’ ħajt mibni.

© MINISTERU GĦALL-AMBJENT U L-AGRIKOLTURA TAL-ISTAT TAS-SASSONJA

Il-benefiċjarji ma jistgħux japplikaw għall-għajnuna qabel ma jkunu rċevew valutazzjoni tal-valur ambjentali minn espert fil-qasam tal-protezzjoni tan-natura. Wara l-ikkompletar tal-proġett, il-benefiċjarji jikklejmjaw l-għadd ta’ unitajiet (m²) li jkunu saru. L-awtoritajiet tas-Sassonja jżuru lill-benefiċjarji biex jivverifikaw il-kwantitajiet ikklejmjati. Huma spjegaw li dan, flimkien mal-valutazzjoni tal-espert fil-qasam tal-protezzjoni tan-natura, jippermettilhom li jiżguraw li l-output tal-proġett jikkontribwixxi għall-ilħuq tar-riżultati mixtieqa.

L-SCOs jistgħu jiġu differenzjati fuq il-bażi tar-riżultati mixtieqa, dment li dawn ikunu jirriflettu l-ispejjeż u li jiġi żgurat it-trattament ugwali tal-benefiċjarji. Din hija waħda mill-bosta possibbiltajiet li jeżistu biex jinkiseb fokus akbar fuq ir-riżultati (possibbiltajiet oħra jinkludu l-użu ta’ kriterji tal-għażla u l-varjazzjoni tal-“intensità tal-għajnuna”, jiġifieri l-perċentwal tal-proġett li jingħata appoġġ mill-FAEŻR). Aħna ma sibna l-ebda eżempju fejn dan kien sar fil-prattika.

Il-Kummissjoni timmonitorja l-implimentazzjoni tal-politika ta’ żvilupp rurali permezz tas-Sistema Komuni ta' Monitoraġġ u Evalwazzjoni (CMES). Is-CMES tistabbilixxi l-indikaturi⁵⁸ fil-livell tal-UE: biex l-evalwazzjoni tal-politika tkun ta’ sinifikat, ir-rappurtar li jsir mill-Istati Membri jrid ikun komparabbli. L-indikaturi huma intenzjonati li jirriflettu l-objettivi ta’ politika, għalhekk, aħna ppruvajna naraw jekk hemmx rabta bejn dawn l-indikaturi u l-pagamenti, kif qed nuru permezz tal-eżempju fittizju li jidher fil-Figura 11.

Sors: il-QEA.

Fil-biċċa l-kbira tal-każijiet, aħna ma stajniex nistabbilixxu rabta diretta bejn il-pagamenti għall-proġetti magħżula u l-indikaturi. Fir-realtà, l-indikaturi tas-CMES, stabbiliti fil-livell tal-UE, ma jimmonitorjawx l-implimentazzjoni tal-politika ta’ żvilupp rurali fil-livell tal-proġetti, u għaldaqstant, mhuwiex fattibbli li l-pagamenti li jsiru permezz ta’ SCOs ikunu bbażati fuqhom. Madankollu, sabiex isir monitoraġġ tar-riżultati tal-politika, l-operazzjonijiet iffinanzjati taħt il-FAEŻR iridu jkunu marbutin b’mod ċar ma’ wieħed mill-objettivi tiegħu. It-titjib tar-rabta bejn il-pagamenti u l-objettivi għal proġetti individwali jista’ jikkontribwixxi biex jinkiseb fokus akbar fuq l-ilħuq tal-objettivi.

Il-Kummissjoni pproponiet li ssir bidla lejn pagamenti bbażati fuq ir-riżultati

Il-proposti reċenti għal bidliet fil-qafas legali⁵⁹ jintroduċu wkoll, minbarra aktar possibbiltajiet għall-użu tal-SCOs, il-possibbiltà ta’ pagamenti bbażati fuq ir-riżultati. B’mod speċifiku, il-Kummissjoni pproponiet li l-Artikolu 67 tar-Regolament (UE) Nru 1303/2013 tal-Parlament Ewropew u tal-Kunsill jinkludi l-possibbiltà ta’ finanzjament li ma jkunx marbut mal-ispejjeż għall-operazzjoni rilevanti iżda minflok ikun ibbażat fuq l-issodisfar tal-kundizzjonijiet relatati mal-progress fl-implimentazzjoni jew l-ilħuq tal-objettivi tal-programm.

Konklużjonjiet u rakkomandazzjonijiet

L-użu tal-SCOs għandu bosta vantaġġi potenzjali. Il-piż amministrattiv jista’ jitnaqqas billi ma jkunx meħtieġ li kull euro jiġi traċċat għad-dokumentazzjoni ta’ sostenn individwali. Il-benefiċjarji jipprovdu inqas dokumenti, u għaldaqstant, l-awtoritajiet tal-Istati Membri jkollhom inqas dokumenti x’jivverifikaw.

Billi jibbażaw il-pagamenti fuq l-output, l-SCOs ineħħu l-fokus minn fuq il-fatturi iżda ma jżidux il-fokus fuq ir-riżultati. L-SCOs jippermettu li jinżamm kontroll fuq l-ispejjeż tal-proġetti tal-iżvilupp rurali, iżda dan ikun possibbli biss jekk huma jkunu bbażati fuq metodoloġija ġusta, ekwa u verifikabbli. Il-pagamenti ppjanati li jkunu bbażati fuq ir-riżultati għandhom il-potenzjal li jżidu l-enfasi fuq il-prestazzjoni u jiġġeneraw fokus akbar fuq l-ilħuq tal-objettivi.

L-awditu tagħna juri trasferiment u tnaqqis kumplessiv tal-piż amministrattiv. Filwaqt li l-Awtoritajiet Maniġerjali jinvestu (ħin jew flus) minn qabel fil-metodoloġija u fil-kalkoli, il-membri tal-persunal jiffrankaw il-ħin meta jiġu biex jivverifikaw l-applikazzjonijiet għall-appoġġ u t-talbiet għall-pagament u l-benefiċjarji jkollhom inqas dokumenti x’jippreżentaw (ara l-paragrafi 13 sa 18, 21 sa 22, 26).

Jekk l-SCOs jintużaw b’mod effettiv huma jippermettu li jinżamm kontroll fuq l-ispejjeż tal-proġetti tal-iżvilupp rurali. Madankollu, biex jiġi żgurat li l-ispejjeż ikunu raġonevoli jeħtieġ li tiġi applikata metodoloġija soda sabiex il-livelli tal-finanzjament jiġu ssettjati fil-livell korrett (ara l-paragrafi 33 sa 38).

Għalkemm ma hemm l-ebda rekwiżit legali biex isir aġġornament tal-metodoloġija jew tal-kalkoli, minħabba l-prinċipju ta’ ġestjoni finanzjarja tajba, jenħtieġ li l-kalkoli jiġu aġġornati biex l-SCOs ikunu jirriflettu r-realtà.

Rakkomandazzjoni 1

Jenħtieġ li l-Kummissjoni taġġorna l-gwida tagħha dwar l-SCOs biex tkopri l-prinċipji ewlenin għall-iżvilupp tal-metodoloġiji. Din tkun trid tinkludi:

• ir-rekwiżiti minimi dwar id-data;
• il-varjazzjoni aċċettabbli fil-prezzijiet użati; u
• il-kunsiderazzjoni ta’ settijiet tad-data li jkun fihom valuri estremi u data volatili.

Data mmirata għall-implimentazzjoni: l-2018.

Il-Kummissjoni ma tivvalutax il-metodoloġija jew il-kalkoli relatati mal-SCOs meta tagħti l-approvazzjoni tagħha għall-PŻR. L-awditi li jwettqu l-awdituri tad-DĠ Agri jkopru l-SCOs jekk huma jagħżlu pagamenti li jkunu saru permezz ta’ SCOs, iżda l-awdituri ma jagħżlux sistematikament l-Istati Membri jew il-PŻR li jagħmlu użu mill-SCOs. Il-Korpi taċ-Ċertifikazzjoni huma korpi funzjonalment indipendenti iżda r-rwol tagħhom fl-awditjar tal-SCOs mhuwiex speċifikat. Dan iwassal għal riskju li l-SCOs ma jiġux eżaminati minn korp indipendenti (ara l-paragrafi 40 sa 47). F’dan il-kuntest, ir-rekwiżiti u l-prinċipji inklużi fl-Anness II.1 u II.2 jistgħu jkunu rilevanti għall-korpi li jagħmlu użu mill-SCOs u li jivverifikawhom, inklużi l-Korpi taċ-Ċertifikazzjoni (ara l-paragrafu 62).

Rakkomandazzjoni 2

Jenħtieġ li l-Kummissjoni tikkjarifika min għandu jkollu r-responsabbiltà li jivverifika l-metodoloġija u l-kalkolu tal-SCOs.

B’mod speċifiku, jenħtieġ li l-Kummissjoni, b’kont meħud tar-rekwiżiti ta’ aċċertament stabbiliti fl-Anness II.1, tikkjarifika r-rwol tal-Korpi taċ-Ċertifikazzjoni u, fil-gwida tagħha għalihom tinkludi referenza speċifika għall-awditjar tal-SCOs u tas-sistemi ta’ kontroll intern relatati.

Data mmirata għall-implimentazzjoni: l-2018.

L-awditu tagħna juri li l-SCOs jibqgħu parti marġinali mill-infiq għall-iżvilupp rurali. L-aktar raġuni sinifikanti għal dan hija d-diffikultà biex jiġu stabbiliti miżuri relatati mal-ispejjeż għal firxa wiesgħa u diversa ta’ proġetti, attivitajiet u benefiċjarji. Dan jikkontribwixxi għall-investiment sinifikanti meħtieġ biex tiġi żviluppata metodoloġija għall-SCOs. L-iżvilupp ta’ SCOs huwa utli biss meta jkun hemm ħafna proġetti li jkunu simili jew li jkollhom infiq simili. L-SCOs mhumiex adatti għat-tipi kollha ta’ operazzjonijiet u ta’ nfiq iżda xorta jistgħu jintużaw aktar ta’ spiss u b’mod aħjar (ara l-paragrafi 16 sa 17, 48 sa 51). Filwaqt li r-regolamenti jippermettu l-użu ta’ metodoloġiji u ta’ rati għal SCOs żviluppati f’oqsma oħra ta' politika, aħna sibna li huwa rari li l-Istati Membri jieħdu vantaġġ min din il-possibbiltà.

Il-leġiżlatur jista’ jinkludi fir-regolamenti r-rati u l-ammonti li għandhom jintużaw għall-SCOs. Dawn l-SCOs standard għandhom vantaġġ partikolari, billi l-awtoritajiet tal-Istati Membri ma jkollhomx għalfejn jistabbilixxu xi metodoloġija jew kalkolu (ara l-paragrafi 19 sa 20). Madankollu, huwa importanti li dawn ir-rati jkollhom bażi soda, u jkunu kkoordinati b’mod xieraq mal-ispejjeż iffinanzjati fuq il-bażi ta’ fatturi u ta’ dokumentazzjoni oħra.

Rakkomandazzjoni 3

Biex jiġi ffaċilitat l-użu xieraq tal-SCOs, jenħtieġ li l-Kummissjoni

• tesplora l-possibbiltajiet biex tkompli tiżviluppa SCOs standard li jkollhom bażi soda; u
• taġġorna d-definizzjonijiet tagħha ta’ kontrolli ewlenin u kontrolli anċillari biex jiġi rifless l-użu li jsir mill-SCOs.

Data mmirata għall-implimentazzjoni: l-2018.

Għalkemm il-Kummissjoni tippromwovi l-fokus akbar li jkun hemm fuq l-output u r-riżultati bħala waħda mir-raġunijiet għalfejn għandhom jintużaw l-SCOs, aħna ma sibniex li l-fokus fuq ir-riżultati żdied. L-SCOs jittrasferixxu l-fokus minn fuq il-fatturi għal fuq l-output, iżda aħna ma sibna l-ebda indikazzjoni li nkisbu riżultati aħjar meta l-SCOs intużaw għall-pagamenti meta mqabbel ma’ rimborż tal-ispejjeż imġarrba.

Il-pagamenti l-ġodda bbażati fuq ir-riżultati, li ġew introdotti fil-proposta Omnibus tal-Kummissjoni, joffru l-possibbiltà li jsiru pagamenti li mhumiex marbuta mal-ispejjeż. Is-suċċess tagħhom se jkun jiddependi mill-gwida tal-Kummissjoni u mir-rieda tal-Istati Membri li jadottaw din il-forma ġdida ta’ finanzjament.

Rakkomandazzjoni 4

Jenħtieġ li l-Kummissjoni teżamina l-potenzjal li ma tibqax tibbaża r-rimborż fuq l-ispejjeż imġarrba iżda fuq ir-riżultati. Biex tagħmel dan, jenħtieġ li il-Kummissjoni tieħu kont tal-esperjenza miksuba mill-introduzzjoni tal-SCOs.

Data mmirata għall-implimentazzjoni: l-2018.

Dan ir-Rapport Speċjali ġie adottat mill-Awla I, immexxija mis-Sur Phil WYNN OWEN, Membru tal-Qorti tal-Awdituri, fil-Lussemburgu fil-laqgħa tagħha tas-7 ta’ Marzu 2018.

Għall-Qorti tal-Awdituri

Klaus-Heiner LEHNE
President

Glossarju

Fondi Strutturali u ta' Investiment Ewropej: Ħames strumenti ta’ nfiq tal-UE stabbiliti għal perjodu baġitarju ta’ seba’ snin: il-Fond Ewropew għall-Iżvilupp Reġjonali (FEŻR), il-Fond Soċjali Ewropew (FSE), il-Fond ta’ Koeżjoni (FK), il-Fond Agrikolu Ewropew għall-Iżvilupp Rurali (FAEŻR) u l-Fond Ewropew għall-Affarijiet Marittimi u s-Sajd (FEMS).

Ġestjoni kondiviża: Metodu ta' implimentazzjoni tal-baġit tal-UE fejn il-Kummissjoni tiddelega kompiti ta' implimentazzjoni lill-Istati Membri, filwaqt li żżomm ir-responsabbiltà finali.

Kalkolu (fil-kuntest tal-SCOs): Id-determinazzjoni matematika li tistabbilixxi l-ammont/ir-rata tal-SCO.

Korrezzjonijiet finanzjarji: Tnaqqis fl-ammonti li l-Kummissjoni tirrimborża lill-Istati Membri għal attivitajiet imwettqa fl-ambitu ta’ ġestjoni kondiviża, biex jittieħed kont ta’ dgħufijiet tas-sistema, il-pagamenti żbaljati jew li jsiru tard,u nuqqasijiet oħrajn.

Metodoloġija (fil-kuntest tal-SCOs): Il-metodu użat għall-kalkolu tal-SCO.

Miżura: Skema ta' għajnuna għall-implimentazzjoni ta' politika. Miżura tiddefinixxi r-regoli, bħall-kriterji ta’ eliġibbiltà u ta’ għażla, għall-proġetti li jistgħu jiġu ffinanzjati.

Operazzjoni: Proġett, grupp ta’ proġetti jew azzjoni oħra magħżula skont il-kriterji stabbiliti għall-programm tal-iżvilupp rurali, u implimentati minn benefiċjarju wieħed jew aktar bil-ħsieb li jinkisbu l-objettivi tal-programm.

Opzjonijiet ta' Spejjeż Simplifikati (SCO): It-tliet tipi ta’ finanzjament definiti fl-Artikolu 67(b), (c) u (d) tar-Regolament (UE) Nru 1303/2013¹: skali standard ta' spejjeż għal kull unità, somom f’daqqa u finanzjament b’rata fissa.

Politika ta' żvilupp rurali: Waħda mill-pilastri tal-Politika Agrikola Komuni, ikkofinanzjata mill-FAEŻR. L-għan tal-politika huwa li ttejjeb il-kampanja u s-sitwazzjoni għall-persuni li jgħixu hemm, billi ssaħħaħ il-kompetittività tas-setturi tal-agrikoltura u tal-forestrija, ittejjeb l-ambjent u l-kwalità tal-ħajja fiż-żoni rurali u tħeġġeġ id-diversifikazzjoni tal-ekonomija rurali.

Programm tal-iżvilupp rurali (PŻR): Dokument ta' programmazzjoni mħejji minn Stat Membru u approvat mill-Kummissjoni biex jintuża fl-ippjanar u fil-monitoraġġ tal-implimentazzjoni tal-politika ta' żvilupp rurali tal-UE fil-livell reġjonali jew nazzjonali.

Rata fissa: Waħda mill-opzjonijiet ta’ spejjeż simplifikati. Kategoriji speċifiċi ta’ spejjeż eliġibbli li jkunu identifikati b’mod ċar minn qabel. Dawn jiġu kkalkolati bl-applikazzjoni ta’ perċentwal stabbilit minn qabel għal kategorija waħda jew għal diversi kategoriji oħra ta’ spejjeż eliġibbli.

SCOs standard: SCOs stabbiliti f’regolament. L-hekk imsejħa SCOs standard jistgħu jintużaw minnufih mill-awtoritajiet tal-Istati Membri mingħajr ma jkun meħtieġ li l-ammonti jew ir-rati użati jiġu sostanzjati permezz ta’ metodoloġija jew kalkolu.

Sistema Komuni ta' Monitoraġġ u Evalwazzjoni (CMES): Sistema mfassla b’kooperazzjoni bejn il-Kummissjoni u l-Istati Membri biex jitkejlu l-progress u l-kisbiet tal-politika ta’ żvilupp rurali, u biex issir valutazzjoni tal-impatt, l-effettività, l-effiċjenza u r-rilevanza tal-appoġġ għall-iżvilupp rurali.

Skali standard ta' spejjeż għal kull unità: Waħda mill-opzjonijiet ta’ spejjeż simplifikati. Prezzijiet standard stabbiliti minn qabel għal kwantitajiet definiti. L-infiq eliġibbli jiġi kkalkulat bil-multiplikazzjoni tal-ispiża standard mal-attivitajiet, l-input, l-outputs jew ir-riżultati kwantifikati.

Somom f’daqqa: Waħda mill-opzjonijiet ta’ spejjeż simplifikati. Somma f’daqqa hija pagament sħiħ ta’ għotja (ikkalkulata minn qabel) għal proġett, ladarba l-attivitajiet u/jew l-outputs miftiehma jkunu ġew ikkompletati.

Tim tal-awditjar

Ir-rapporti speċjali tal-QEA jippreżentaw ir-riżultati tal-awditi tal-prestazzjoni u tal-konformità tagħha f'dak li jirrigwarda oqsma baġitarji jew suġġetti ta’ ġestjoni speċifiċi. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta’ introjtu jew ta’ nfiq involut, l-iżviluppi li jkunu għad iridu jseħħu u l-interess politiku u pubbliku.

Dan l-awditu tal-prestazzjoni twettaq mill-Awla I tal-Awditjar, Użu sostenibbli tar-riżorsi naturali, li hija mmexxija minn Phil Wynn Owen, Membru tal-QEA. L-awditu tmexxa minn João Figueiredo, Membru tal-QEA, li ngħata appoġġ minn Paula Betencourt, Attaché tal-Kabinett; Robert Markus, Maniġer Prinċipali; Charlotta Törneling, Kap tal-Kompitu; Ioan-Alexandru Ilie, Liia Laanes, Päivi Piki u Raluca-Elena Sandu, Awdituri. Michael Pyper ipprovda appoġġ lingwistiku filwaqt li Annette Zimmerman ipprovdiet appoġġ segretarjali.

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Tel. +352 4398-1
Mistoqsijiet: eca.europa.eu/mt/Pages/ContactForm.aspx
Sit web: eca.europa.eu
Twitter: @EUAuditors

Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2018

© L-Unjoni Ewropea, 2018

Għal kull użu jew riproduzzjoni ta’ ritratti jew materjal ieħor li ma jaqax taħt id-drittijiet tal-awtur tal-Unjoni Ewropea, irid jintalab il-permess direttament mingħand id-detenturi tad-drittijiet tal-awtur.

KIF TIKKUNTATTJA LILL-UE

Personalment
Madwar l-Unjoni Ewropea kollha hemm mijiet ta’ ċentri ta’ informazzjoni tal-Europe Direct. Tista’ ssib l-indirizz tal-eqreb ċentru għalik f’dan is-sit: https://europa.eu/european-union/contact_mt

Bit-telefown jew bil-posta elettronika
Europe Direct huwa servizz li jwieġeb il-mistoqsijiet tiegħek dwar l-Unjoni Ewropea. Tista’ tikkuntattja dan is-servizz:

• bit-telefown bla ħlas: 00 800 6 7 8 9 10 11 (ċerti operaturi jafu jimponu ħlas għal dawn it-telefonati),
• fuq dan in-numru standard: +32 22999696, jew
• bil-posta elettronika permezz: https://europa.eu/european-union/contact_mt

KIF ISSIB TAGĦRIF DWAR L-UE

Onlajn
L-informazzjoni dwar l-Unjoni Ewropea bil-lingwi uffiċjali kollha tal-UE hija disponibbli fuq is-sit web Europa fuq: https://europa.eu/european-union/contact_mt

Pubblikazzjonijiet tal-UE
Tista’ tniżżel mill-internet jew tordna l-pubblikazzjonijiet tal-UE, li xi wħud minnhom huma bla ħlas u xi oħrajn bil-ħlas, mill-EU Bookshop fl-indirizz li ġej: https://op.europa.eu/mt/publications. Kopji multipli ta’ pubblikazzjonijiet bla ħlas tista’ tiksibhom billi tikkuntattja lil Europe Direct jew liċ-ċentru tal-informazzjoni lokali tiegħek (ara https://europa.eu/european-union/contact_mt).

Il-liġi tal-UE u dokumenti relatati
Għal aċċess għall-informazzjoni legali tal-UE, inkluż il-liġijiet kollha tal-UE mill-1951 ’l hawn, fil-verżjonijiet lingwistiċi uffiċjali kollha, żur is-sit EUR-Lex hawnhekk: http://eur-lex.europa.eu

Dejta Miftuħa mill-UE
Il-portal tad-Dejta Miftuħa mill-UE (http://data.europa.eu/euodp) jipprovdi aċċess għal settijiet tad-dejta mill-UE. Id-dejta tista’ titniżżel mill-internet u tintuża mill-ġdid bla ħlas, kemm għal skopijiet kummerċjali kif ukoll mhux kummerċjali.