Nipproteġu l-baġit tal-UE minn infiq irregolari: Il-Kummissjoni għamlet użu dejjem akbar mill-miżuri preventivi u l-korrezzjonijiet finanzjarji fil-qasam tal-Koeżjoni matul il-perjodu 2007-2013

Sommarju eżekuttiv

Dwar il-politika ta’ Koeżjoni

I

Il-politika ta’ Koeżjoni għandha l-għan li tnaqqas id-disparitajiet fl-iżvilupp bejn ir-reġjuni, li tirristruttura żoni industrijali li jkunu sejrin lura u li tħeġġeġ il-kooperazzjoni transkonfinali, transnazzjonali u interreġjonali fl-Unjoni Ewropea. Hija s-sors prinċipali ta’ finanzjament tal-UE għall-investimenti, u tammonta għal madwar 37 % tal-infiq globali mill-baġit tal-UE. Il-fondi allokati għall-politika ta’ Koeżjoni ammontaw għal madwar EUR 230 biljun fil-perjodu ta’ programmazzjoni 2000-2006, EUR 346 biljun fl-2007-2013 u EUR 349 biljun fl-2014-2020.

II

Il-politika ta’ Koeżjoni tinkludi żewġ partijiet prinċipali: il-politika reġjonali u urbana u l-impjiegi u l-affarijiet soċjali. Il-politika reġjonali u urbana tiġi implimentata l-aktar permezz tal-Fond Ewropew għall-Iżvilupp Reġjonali u l-Fond ta’ Koeżjoni. L-impjiegi u l-affarijiet soċjali huma ffinanzjati prinċipalment permezz tal-Fond Soċjali Ewropew.

III

Il-politika ta’ Koeżjoni tiġi implimentata taħt ġestjoni kondiviża, li jfisser li r-responsabbiltà hija kondiviża bejn il-Kummissjoni u l-Istati Membri. Għalkemm il-Kummissjoni tibqa’ responsabbli għall-implimentazzjoni tal-baġit tal-UE, il-ġestjoni u l-kontroll proprji tal-fondi u l-programmi tal-UE huma ddelegati lill-awtoritajiet tal-Istati Membri, li jagħżlu lill-benefiċjarji u jqassmu l-fondi.

IV

Hija r-responsabbiltà tal-Istati Membri biex ikunu dawk tal-ewwel li jaqbdu, jikkoreġu u jipprevienu l-iżbalji. Jekk il-Kummissjoni ssib li xi nefqa irregolari kienet kofinanzjata jew x’aktarx li tkun kofinanzjata, tista’ tintervieni u tikkoreġi n-nefqa li tkun diġà ġiet kofinanzjata jew tista’ tipprevieni li tista’ tiġi kofinanzjata fil-futur.

V

Il-Kummissjoni tista’ tapplika miżuri preventivi u/jew korrezzjonijiet finanzjarji fuq il-bażi ta’ irregolaritajiet jew defiċjenzi serji identifikati mill-awtoritajiet tal-Istati Membri, fuq il-bażi tal-verifikazzjonijiet u l-awditi proprji tagħha, l-investigazzjonijiet tal-OLAF u b’riżultat ta’ awditi li jkunu saru mill-Qorti Ewropea tal-Awdituri.

Kif wettaqna l-awditu tagħna

VI

Aħna vvalutajna jekk il-miżuri preventivi u l-korrezzjonijiet finanzjarji applikati mill-Kummissjoni kinux effettivi fil-protezzjoni tal-baġit tal-UE mill-kofinanzjament ta’ nfiq irregolari fil-qasam tal-Koeżjoni. Iffukajna fuq il-perjodu ta’ programmazzjoni 2007-2013. Barra minn hekk, għamilna wkoll tqabbil mal-perjodu ta’ programmazzjoni 2000-2006 u vvalutajna l-impatt probabbli tal-bidliet fir-regolamenti għall-2014-2020. L-awditu tagħna kien jinkludi:

• rieżami tal-linji gwida, il-pubblikazzjonijiet u r-rapporti rilevanti tal-Kummissjoni, u valutazzjoni tal-proċeduri interni tal-Kummissjoni għall-perjodu 2007-2013;
• analiżi komparattiva tal-miżuri preventivi u l-korrezzjonijiet finanzjarji għall-perjodi 2000-2006 u 2007-2013, u valutazzjoni tal-impatt tal-korrezzjonijiet finanzjarji wara l-għeluq tal-perjodu ta’ programmazzjoni 2000-2006;
• eżami ta’ kampjun ta’ 72 każ individwali li kienu ngħalqu sa tmiem l-2016. Dawn kienu jirrappreżentaw 29 % tal-korrezzjonijiet finanzjarji matul il-perjodu 2007-2013. Ix-xogħol tagħna fuq il-post twettaq minn Jannar 2016 sa Novembru 2016.

X’sibna

VII

B’mod ġenerali, aħna sibna li l-Kummissjoni għamlet użu effettiv mill-miżuri li kien hemm għad-dispożizzjoni tagħha matul il-perjodu ta’ programmazzjoni 2007-2013 biex tipproteġi l-baġit tal-UE minn infiq irregolari.

VIII

Il-korrezzjonijiet finanzjarji għall-perjodu 2000-2006 kienu jammontaw għal EUR 8 616-il miljun jew 3.8 % tal-baġit totali. Għall-perjodu 2007-2013, il-Kummissjoni użat il-miżuri li kien hemm għad-dispożizzjoni tagħha biex tipproteġi l-baġit tal-UE b’mod aktar estensiv.

IX

Għall-perjodu 2007-2013, aħna sibna li l-Kummissjoni imponiet il-miżuri preventivi u l-korrezzjonijiet finanzjarji tagħha b’mod proporzjonat u kkonfermajna li l-miżuri applikati mill-Kummissjoni għall-perjodu 2007-2013 iffukaw fuq dawk l-Istati Membri li kellhom il-programmi l-aktar riskjużi. Sibna wkoll li l-valutazzjoni tad-dgħufijiet u tal-korrezzjonijiet finanzjarji relatati li twettqet mill-Kummissjoni ġiet ikkonfermata fis-sustanza mill-Qorti tal-Ġustizzja tal-Unjoni Ewropea.

X

Il-miżuri korrettivi tal-Kummissjoni jagħmlu pressjoni fuq l-Istati Membri biex jindirizzaw id-dgħufijiet fis-sistemi tagħhom ta’ ġestjoni u kontroll. Madankollu, kemm il-miżuri preventivi kif ukoll il-korrezzjonijiet finanzjarji ġeneralment jittrattaw problemi kumplessi li jieħdu żmien konsiderevoli biex jiġu riżolti. L-interruzzjonijiet u s-sospensjonijiet riżultanti ta’ pagamenti jirrappreżentaw riskju finanzjarju sinifikanti għall-Istati Membri. Għalhekk, matul il-perjodu 2007-2013, il-Kummissjoni mmirat li gradwalment tneħħi l-miżuri biex tiżgura li r-rimborż ikun jista’ jerġa’ jibda jsir malli l-kundizzjonijiet meħtieġa jiġu ssodisfati.

XI

Aħna sibna wkoll li l-Kummissjoni ffaċċjat diffikultajiet fil-monitoraġġ tal-implimentazzjoni tal-korrezzjonijiet finanzjarji. L-informazzjoni pprovduta mill-Istati Membri dwar l-implimentazzjoni fil-perjodu 2007-2013 kienet għadha ma tagħtix lok għal monitoraġġ robust. Sibna evidenza mħallta tal-impatt fit-tul li l-miżuri preventivi u l-korrezzjonijiet finanzjarji kellhom għall-perjodu 2007-2013.

XII

Ir-rappurtar li sar mill-Kummissjoni dwar il-miżuri preventivi u l-korrezzjonijiet finanzjarji jagħmilha diffiċli li tinkiseb stampa ġenerali komprensiva tas-sitwazzjoni, l-aktar minħabba li l-informazzjoni hija ppreżentata f’bosta rapporti u dokumenti. Fl-istess waqt, ebda wieħed mir-rapporti tal-Kummissjoni għall-perjodu 2007-2013 ma jipprovdi stampa ġenerali analitika tal-miżuri preventivi u tal-korrezzjonijiet finanzjarji. Rappreżentanti mill-Parlament Ewropew u mill-Kunsill ukoll qiesu li r-rapporti tal-Kummissjoni ma jipprovdux biżżejjed tqabbil bejn l-Istati Membri u eżempji ta’ “prattika tajba” dwar il-prevenzjoni, id-detezzjoni jew il-korrezzjoni ta’ problemi rikorrenti.

XIII

Id-dispożizzjonijiet regolatorji għall-perjodu 2014-2020 isaħħu sinifikattivament il-pożizzjoni tal-Kummissjoni dwar il-protezzjoni tal-baġit tal-UE minn infiq irregolari b’mod partikolari permezz ta’ korrezzjonijiet finanzjarji netti. Dan huwa dovut prinċipalment għall-fatt li r-rappurtar li sar mill-Istat Membru dwar il-korrezzjonijiet finanzjarji issa huwa integrat fil-pakkett tal-aċċertament annwali u jiġi eżaminat mill-awtoritajiet tal-awditjar rispettivi. Barra minn hekk, id-dispożizzjonijiet legali li ġew introdotti għall-perjodu 2014-2020 jagħtu aktar setgħa lill-Kummissjoni biex tiżgura li l-infiq irregolari ma jibqax jiġi rimborżat mill-baġit tal-UE. Fl-aħħar nett, hemm ċertezza legali akbar għall-Istati Membri minħabba li r-regoli huma stabbiliti bħala regolamenti minflok bħala gwida.

XIV

Aħna nqisu li dawn l-arranġamenti jirrappreżentaw titjib sinifikanti fit-tfassil tas-sistema.

X’nirrakkomandaw

XV

Jenħtieġ li l-Kummissjoni:

• tapplika approċċ strett għall-korrezzjonijiet finanzjarji fl-għeluq tal-perjodu 2007-2013 (minn Marzu 2017) biex tiżgura li l-ammonti totali rimborżati u mill-baġit tal-UE jkunu ħielsa minn livelli materjali ta’ nfiq irregolari.
• toħroġ rapport ad hoc dwar il-korrezzjonijiet finanzjarji u l-istatus tal-għeluq tal-programmi tal-FEŻR/FK u tal-FSE (sa mhux aktar tard minn nofs l-2019) li jkun simili għar-rapport li tħejja fl-2013 għall-perjodu 2000-2006. Jenħtieġ li dan ir-rapport jippreżenta u jqabbel l-informazzjoni kollha dwar il-miżuri preventivi u korrettivi skont il-fond u l-Istat Membru, u li juri l-impatt tal-korrezzjonijiet finanzjarji u r-rata ta’ riskju residwu.
• twaqqaf sistema ta’ monitoraġġ integrata għall-perjodu 2014-2020, li tkun kopri kemm il-miżuri preventivi kif ukoll il-korrezzjonijiet finanzjarji sal-2019.
• tagħmel użu effettiv mid-dispożizzjoni, li ssaħħet sinifikattivament, għall-perjodu 2014-2020 b’effett immedjat u timponi korrezzjonijiet finanzjarji netti kull fejn ikun meħtieġ fuq il-bażi tal-kontrolli proprji tagħha u/jew tal-awditi li nwettqu.

Introduzzjoni

Il-politika ta’ Koeżjoni hija s-sors prinċipali ta’ finanzjament tal-UE għall-investimenti

L-objettivi, il-baġit u l-fondi tal-politika

01

Il-politika ta’ Koeżjoni għandha l-għan li tnaqqas id-disparitajiet fl-iżvilupp bejn ir-reġjuni, li tirristruttura żoni industrijali li jkunu sejrin lura u li tħeġġeġ il-kooperazzjoni transkonfinali, transnazzjonali u interreġjonali fl-Unjoni Ewropea (UE).

02

In-nefqa fil-qasam tal-Koeżjoni tikkostitwixxi madwar 37 % tal-infiq globali mill-baġit tal-UE. Il-fondi allokati għall-politika ta’ Koeżjoni, il-politika prinċipali tal-investiment tal-UE, ammontaw għal madwar EUR 230 biljun fil-perjodu ta’ programmazzjoni 2000-2006, EUR 346 biljun fil-perjodu ta’ programmazzjoni 2007-2013 u madwar EUR 349 biljun fil-perjodu 2014-2020

03

Il-politika ta’ Koeżjoni tinkludi żewġ partijiet prinċipali: il-politika reġjonali u urbana u l-impjiegi u l-affarijiet soċjali. Il-politika reġjonali u urbana tiġi implimentata l-aktar permezz tal-Fond Ewropew għall-Iżvilupp Reġjonali (FEŻR) u l-Fond ta’ Koeżjoni (FK); filwaqt li l-impjiegi u l-affarijiet soċjali huma ffinanzjati prinċipalment permezz tal-Fond Soċjali Ewropew (FSE). Il-FEŻR, l-FK u l-FSE huma rregolati b’regoli komuni, ħlief għal xi eċċezzjonijiet fir-regolament speċifiku ta’ kull fond.

Sistema ta’ ġestjoni u kontroll tal-politika ta’ Koeżjoni

04

Il-politika ta’ Koeżjoni tiġi implimentata taħt ġestjoni kondiviża¹, li jfisser li r-responsabbiltà għall-implimentazzjoni tal-politika u tal-fondi relatati, inklużi l-attivitajiet ta’ kontroll, hija kondiviża bejn il-Kummissjoni u l-Istati Membri. Għalkemm il-Kummissjoni tibqa’ responsabbli għall-implimentazzjoni tal-baġit tal-UE, il-ġestjoni u l-kontroll proprji tal-fondi u l-programmi tal-UE huma ddelegati lill-awtoritajiet tal-Istati Membri.

05

Il-kompiti ta’ dawn l-awtoritajiet huma definiti f’regolamenti settorjali:

1. l-awtoritajiet maniġerjali (li l-kompiti tagħhom jistgħu jiġu ddelegati lil korpi intermedjarji) iwettqu l-ġestjoni ta’ kuljum ta’ proġetti kofinanzjati taħt il-programm operazzjonali (PO) rispettiv,
2. l-awtoritajiet ta’ ċertifikazzjoni jaggregaw id-dikjarazzjonijiet tal-ispejjeż imħejjija mill-benefiċjarji tal-proġetti f’dikjarazzjonijiet tal-infiq u jiddikjarawhom lill-Kummissjoni għar-rimborż, u
3. l-awtoritajiet tal-awditjar jagħmlu awditu indipendenti kull sena tal-ispejjeż iddikjarati lill-Kummissjoni u tal-funzjonament tas-sistema ta’ ġestjoni u kontroll.

06

B’mod partikolari, dawn l-awtoritajiet jagħżlu l-proġetti, u jqassmu u jikkontrollaw il-fondi. L-Istati Membri huma responsabbli wkoll biex jiżguraw li l-infiq soġġett għar-rimborż mill-baġit tal-UE jkun ħieles minn irregolaritajiet permezz tal-prevenzjoni, id-detezzjoni u l-korrezzjoni ta’ irregolaritajiet². Fl-istess waqt, il-Kummissjoni tista’ tieħu azzjonijiet biex tirkupra fondi li jkunu tħallsu indebitament.

07

Il-benefiċjarji tal-proġetti jġarrbu l-infiq u jiddikjarawh f’talbiet għall-pagamenti lill-awtoritajiet maniġerjali (jew lill-korpi intermedjarji). Imbagħad dawn jiġu aggregati u jintbagħtu permezz tal-awtorità ta’ ċertifikazzjoni lill-Kummissjoni. Il-Kummissjoni mbagħad tħallas l-ammont li jkun ugwali għall-parti kofinanzjata tal-infiq iddikjarat, fil-baġit tal-Istat Membru, minn fejn il-fondi jiġu trasferiti lill-benefiċjarji rispettivi (ara l-Figura 1).

08

Il-Kummissjoni tinnegozja u tapprova programmi operazzjonali mal-Istati Membri, tipprovdi gwida u struzzjonijiet lill-awtoritajiet tal-Istati Membri dwar kif għandhom iwettqu l-kompiti tagħhom u twettaq kontrolli fil-livell tal-Istati Membri jew fl-uffiċċju biex tikkontrolla l-implimentazzjoni tal-politika.

09

B’mod ġenerali, kien hemm 618-il PO u 1 119-il proġett tal-FK għall-perjodu ta’ programmazzjoni 2000-2006³, 440 PO għall-perjodu 2007-2013 u 391 PO (FEŻR, FK, FSE jew diversi fondi) għall-perjodu 2014-2020.

Il-miżuri applikati mill-Kummissjoni għall-protezzjoni tal-baġit tal-UE fil-qasam tal-Koeżjoni

10

Il-miżuri applikati mill-Kummissjoni għall-protezzjoni tal-baġit tal-UE għandhom l-għan li jiżguraw li l-infiq regolari biss (jiġifieri l-infiq li jintnefaq skont il-leġiżlazzjoni applikabbli tal-UE u dak nazzjonali/reġjonali) jiġi kofinanzjat mill-baġit tal-UE.

11

Hija r-responsabbiltà tal-Istati Membri biex ikunu dawk tal-ewwel li jaqbdu, jikkoreġu u jipprevienu l-iżbalji⁴. Jekk il-Kummissjoni tiskopri li xi nefqa irregolari kienet kofinanzjata jew x’aktarx li tkun kofinanzjata, tista’ tintervieni u tikkoreġi n-nefqa li tkun diġà ġiet kofinanzjata jew tista’ tipprevieni l-kofinanzjament futur ta’ nefqa irregolari f’dikjarazzjonijiet futuri tal-infiq.

12

Permezz tar-regolamenti għall-2000-2006⁵, kif ukoll dawk għall-perjodi 2007-2013⁶ u 2014-2020⁷, il-Kummissjoni tista’ tapplika miżuri preventivi, jiġifieri interruzzjonijiet u sospensjonijiet ta’ pagamenti, u korrezzjonijiet finanzjarji. Għall-perjodu 2000-2006, ir-regolamenti ma pprevedewx li jiġu inklużi interruzzjonijiet bħala parti mill-miżuri preventivi applikati mill-Kummissjoni. Id-Direttorati Ġenerali għall-Politika Reġjonali u Urbana u għall-Impjiegi, l-Affarijiet Soċjali u l-Inklużjoni huma responsabbli għall-applikazzjoni ta’ dawn il-miżuri korrettivi fil-politika ta’ Koeżjoni.

13

Il-Kummissjoni tista’ tapplika miżuri preventivi u/jew korrezzjonijiet finanzjarji fuq il-bażi ta’ irregolaritajiet jew defiċjenzi serji identifikati mill-awtoritajiet tal-Istati Membri (eż. l-awtorità maniġerjali jew tal-awditjar) jew fuq il-bażi tal-verifikazzjonijiet u l-awditi proprji tagħha. Dan jinkludi wkoll investigazzjonijiet li jsiru mill-OLAF. Jistgħu jkunu wkoll ir-riżultat ta’ awditi li jkunu saru mill-Qorti Ewropea tal-Awdituri (ara l-Anness I).

Miżuri preventivi: interruzzjonijiet u sospensjonijiet ta’ pagamenti

14

Miżuri preventivi jirriżultaw f’differiment tal-pagamenti mill-baġit tal-UE. Dan jagħmel pressjoni addizzjonali fuq l-Istat Membru biex jieħu l-azzjoni korrettiva meħtieġa. It-tipi prinċipali ta’ miżuri preventivi huma interruzzjonijiet u sospensjonijiet (ara l-Kaxxa 1).

15

L-interruzzjonijiet tal-pagamenti ġew introdotti fir-regolament għall-2007-2013 (ara l-Anness II). Il-vantaġġ prinċipali tal-interruzzjonijiet huwa li jistgħu jiġu applikati minnufih mingħajr proċedura amministrattiva twila jekk il-Kummissjoni jkollha evidenza li tissuġġerixxi li hemm defiċjenzi sinifikanti¹². Madankollu, biex tiġi applikata sospensjoni, irid jiġi stabbilit li jkun hemm defiċjenza serja u dan jirriżulta biex ikun hemm proċedura itwal qabel (ara l-Kaxxa 1).

16

Jekk ma jkunx hemm talba għall-pagament li tkun pendenti (jiġifieri ma jkunx hemm skadenza ta’ pagament x’tiġi interrotta), il-Kummissjoni tista’ wkoll toħroġ twissija. Il-Kummissjoni twissi lill-Istat Membru li jekk ġiet ippreżentata applikazzjoni għal pagament, l-iskadenza tal-pagament tiegħu tiġi interrotta. Madankollu, din il-proċedura mhijiex stipulata fir-regolamenti.

17

Is-sospensjonijiet jiġu applikati permezz ta’ deċiżjoni legalment vinkolanti tal-Kummissjoni li tiġi indirizzata lill-Istat Membru kkonċernat. Il-miżuri preventivi l-oħrajn kollha (twissija, interruzzjoni, presospensjoni) jieħdu l-forma ta’ ittra ffirmata minn Direttur Ġenerali tal-Kummissjoni (li jaġixxi fil-kapaċità tiegħu bħala Uffiċjal Awtorizzanti b’Delega) u indirizzata lill-awtoritajiet tal-Istat Membru.

Korrezzjonijiet finanzjarji applikati mill-Kummissjoni

18

Fejn defiċjenzi serji fis-sistemi ta’ ġestjoni u kontroll tal-Istat Membru jkunu wasslu għal żbalji sistemiċi, jew fejn il-Kummissjoni tkun identifikat irregolarità individwali, il-Kummissjoni tista’ wkoll tapplika korrezzjonijiet finanzjarji (ara l-Anness I)¹³. L-għan tal-korrezzjonijiet finanzjarji huwa li terġa’ tinkiseb sitwazzjoni fejn l-infiq kollu ddikjarat għall-kofinanzjament mill-FEŻR, mill-FK jew mill-FSE, u rimborżat mill-Kummissjoni, jkun konformi mar-regoli applikabbli¹⁴.

19

Matul il-perjodi ta’ programmazzjoni 2000-2006 u 2007-2013, l-Istati Membri setgħu jissostitwixxu nfiq irregolari bi nfiq ġdid jekk ikunu ħadu l-azzjonijiet korrettivi meħtieġa u applikaw il-korrezzjoni finanzjarja relatata (korrezzjoni finanzjarja kkonfermata)¹⁵. Din il-possibbiltà hija stipulata wkoll għall-perjodu ta’ programmazzjoni 2014-2020¹⁶. Kemm dan seħħ fil-prattika kien jiddependi, madankollu, mill-kapaċità tal-Istat Membru biex jiddikjara nfiq addizzjonali (regolari). Jekk l-Istat Membru ma kellux infiq addizzjonali bħal dan x’jiddikjara, il-korrezzjoni finanzjarja rriżultat f’korrezzjoni netta (telf ta’ finanzjament). Għall-kuntrarju, kull deċiżjoni ta’ korrezzjoni finanzjarja li ttieħdet mill-Kummissjoni dejjem kellha impatt dirett u nett fuq l-Istat Membru: dan kellu jħallas l-ammont lura u l-pakkett tiegħu tnaqqas (jiġifieri l-Istat Membru seta’ jonfoq inqas flus matul il-perjodu ta’ programmazzjoni).

20

Il-Kummissjoni ma tindirizzax il-korrezzjonijiet finanzjarji lill-benefiċjarji direttament, iżda lill-awtoritajiet tal-Istati Membri li jimmaniġġjaw lill-PO. F’każ li korrezzjoni finanzjarja tkun relatata ma’ proġetti individwali implimentati minn benefiċjarji, huma l-awtoritajiet tal-Istat Membru li jridu jgħaddu l-korrezzjoni finanzjarja lill-benefiċjarju.

21

L-Anness III jipprovdi stampa ġenerali tax-xenarji differenti li jirrigwardaw l-impatt tal-korrezzjonijiet finanzjarji fuq l-Istati Membri sa tmiem il-perjodu ta’ programmazzjoni 2007-2013.

Determinazzjoni tal-ammont ta’ korrezzjonijiet finanzjarji

22

Il-Kummissjoni tista’ tiddetermina l-ammont ta’ korrezzjoni finanzjarja b’modi differenti (ara l-Kaxxa 2).

23

Jekk diġà tkun saret talba għal rimborż mill-baġit tal-UE, rigward l-infiq irregolari li jkun twassal għall-korrezzjoni finanzjarja, il-korrezzjoni finanzjarja tikkoreġi l-passat (korrezzjoni finanzjarja ex post). Madankollu, jekk rigward l-infiq irregolari ma tkunx għadha saret talba għal rimborż mill-baġit tal-UE, il-korrezzjoni finanzjarja tkun tindirizza l-futur (korrezzjoni finanzjarja ex ante). Din tal-aħħar tfisser li meta jiddikjaraw l-infiq lill-Kummissjoni, l-Istati Membri jnaqqsu diġà l-korrezzjoni finanzjarja mill-infiq eliġibbli. Il-korrezzjonijiet finanzjarji ex ante u ex post jistgħu jseħħu fl-istess waqt u fl-istess każ, biex b’hekk jiġi żgurat li ssir il-korrezzjoni tal-passat u tal-futur.

24

L-Anness I jiddeskrivi l-proċess li jwassal għal miżura preventiva u/jew korrezzjoni finanzjarja u r-riżoluzzjoni tagħha.

Ebda miżura preventiva jew korrezzjoni finanzjarja għan-nuqqas ta’ kisba suffiċjenti tar-riżultati

25

Matul il-perjodi ta’ programmazzjoni 2000-2006 u 2007-2013, ma kien hemm ebda dispożizzjoni legali li kienet tippermetti lill-Kummissjoni tibda proċeduri ta’ sospensjoni u timponi korrezzjonijiet finanzjarji fil-każ ta’ nuqqas ta’ kisba suffiċjenti tar-riżultati fil-livell ta’ programm jew ta’ assi prijoritarju. Kien hemm ukoll possibbiltajiet limitati biex dan isir fil-livell ta’ proġetti individwali. Aħna kkritikajna din id-defiċjenza fir-regolamenti f’bosta rapporti¹⁸.

Rkupru ta’ ammonti mħallsa indebitament mill-Istati Membri

26

Taħt ġestjoni kondiviża, l-Istati Membri huma responsabbli għad-detezzjoni, il-korrezzjoni u l-prevenzjoni ta’ żbalji biex b’hekk infiq regolari biss jiġi rimborżat mill-baġit tal-UE. L-Istati Membri huma meħtieġa wkoll jirkupraw ammonti mħallsa indebitament (mill-baġit tal-UE) mingħand il-benefiċjarji¹⁹. Madankollu, dan ma jkunx possibbli jekk:

1. l-iżball ma sarx mill-benefiċjarju, iżda jirrigwarda problemi marbuta mal-funzjonament tas-sistema ta’ ġestjoni u kontroll (eż. problemi relatati mal-għażla tal-operazzjonijiet li jridu jiġu kofinanzjati); jew
2. l-ammont ma jistax jiġi rkuprat mingħand il-benefiċjarju (eż. il-benefiċjarju falla).

F’dawn il-każijiet, il-baġit tal-Istat Membru jrid iġorr il-piż finanzjarju tal-korrezzjonijiet finanzjarji dment li dan ma jistax jiġi kondiviż mal-baġit tal-UE.

27

Skont l-informazzjoni pprovduta mill-Istati Membri lill-Kummissjoni sa tmiem l-2015, l-ammont iffinanzjat pubblikament (mill-UE u fil-livell nazzjonali) li ma jistax jiġi rkuprat mingħand il-benefiċjarji huwa ta’ EUR 57 miljun (li jikkorrispondi għall-infiq eliġibbli (privat u pubbliku) totali li jammonta għal EUR 115-il miljun) għall-PO kollha għall-perjodu 2007-2013 kollu kemm hu²⁰.

28

Barra minn hekk, meta ammont imħallas indebitament jiġi rkuprat minn korp pubbliku li jkun qed jaġixxi bħala benefiċjarju, il-korrezzjoni finanzjarja xorta waħda titħallas de facto minn baġit pubbliku nazzjonali, reġjonali jew lokali.

Il-korrezzjonijiet finanzjarji huma element ewlieni biex jiġi stabbilit ir-riskju residwu għall-pagamenti li jsiru mill-baġit tal-UE fil-qasam tal-Koeżjoni

29

Mis-sena 2000 ‘il hawn, inżdiedu rekwiżiti regolatorji speċifiċi biex jirrinfurzaw ir-responsabbiltà tal-Istati Membri għad-detezzjoni, il-korrezzjoni u l-prevenzjoni ta’ żbalji, u s-sistemi ta’ ġestjoni u kontroll tal-PO ġew mibdula kif meħtieġ.

Rati ta’ żball annwali għal kull programm, għal kampjun rappreżentattiv ta’ operazzjonijiet ivvalidati mill-Kummissjoni

30

Għall-perjodu 2000-2006, awtoritajiet nazzjonali dedikati kellhom jiċċekkjaw 5 % tal-infiq eliġibbli qabel l-istralċ tal-PO, filwaqt li ħadu inkunsiderazzjoni l-valutazzjoni proprja tagħhom tar-riskji li irregolaritajiet setgħu jseħħu u filwaqt li mmiraw biex ikun hemm kopertura rappreżentattiva tal-infiq tal-PO²¹. L-Istati Membri kellhom ukoll jirrappurtaw fuq bażi annwali dwar l-ammonti li kienu qegħdin jistennew irkupru²². Madankollu ma kienx hemm rekwiżit biex kull sena tiġi kkalkulata rata ta’ żball kumplessiv jew biex tinħareġ opinjoni tal-awditjar annwali.

31

Għall-perjodu 2007-2013, ir-regolament introduċa lill-awtoritajiet tal-awditjar tal-Istati Membri li għandhom joħorġu rapport annwali ta’ kontroll (RAK) flimkien ma’ opinjoni tal-awditjar dwar il-legalità u r-regolarità tat-tranżazzjonijiet sottostanti²³. Ir-RAK kien jinkludi rata ta’ żball ibbażata fuq kampjun rappreżentattiv ta’ awditi ta’ operazzjonijiet, li ġie ċċekkjat, jiġifieri vvalidat mill-Kummissjoni.

Il-kalkolu, li jsir mill-Kummissjoni, tar-rata ta’ riskju residwu kumulattiv

32

L-Istati Membri jipprovdu wkoll informazzjoni aktar estensiva lill-Kummissjoni dwar il-korrezzjonijiet finanzjarji li jkunu saru matul is-sena, li mbagħad tintuża mill-Kummissjoni biex tikkalkula rata ta’ riskju residwu kumulattiv²⁴. Mill-2012 ’il hawn, fir-rapporti annwali tal-attività tagħha (RAA), il-Kummissjoni tikkalkula u tippubblika indikatur imsejjaħ riskju residwu kumulattiv (CRR). Is-CRR hija l-istima, imwettqa mill-Kummissjoni, tal-parti li jkun fadal tal-infiq li ma tkunx legali u regolari u li tkun tħallset għal kull PO (jew għal grupp ta’ PO) matul il-perjodu ta’ programmazzjoni. Is-CRR tiġi aġġornata kull sena. Mill-ewwel kalkolu tagħhom fl-2012, is-CRRs kumplessivi għall-FEŻR/FK u għall-FSE għall-perjodu 2007-2013 kienu taħt is-soll ta’ materjalità ta’ 2 %²⁵ (ara l-Figura 2).

33

Meta tikkalkola s-CRR, il-Kummissjoni tieħu inkonsiderazzjoni r-rati ta’ żball annwali rrappurtati mill-awtoritajiet tal-awditjar tal-Istati Membri kif ivvalidati mill-Kummissjoni. Barra minn hekk, hija tuża wkoll il-korrezzjonijiet finanzjarji kollha implimentati sa mill-bidu tal-perjodu ta’ programmazzjoni fil-livell tal-Istati Membri (permezz ta’ rtirar u rkupri kif irrappurtati mill-Istati Membri) u fil-livell tal-UE (permezz ta’ deċiżjonijiet formali tal-Kummissjoni)²⁶.

Ir-rapport speċjali preċedenti mill-Qorti Ewropea tal-Awdituri dwar il-miżuri applikati mill-Kummissjoni għall-protezzjoni tal-baġit tal-UE

34

Fl-2012, f’rapport speċjali preċedenti, aħna vvalutajna l-miżuri applikati mill-Kummissjoni għall-protezzjoni tal-baġit tal-UE għall-perjodu ta’ programmazzjoni 2000-2006. L-awditu tagħna wera li l-Kummissjoni ġeneralment ħadet azzjoni xierqa meta ġew identifikati n-nuqqasijiet, iżda li l-proċess kien twil u kiseb gradi differenti ta’ aċċertament li d-defiċjenzi fis-sistemi nazzjonali ta’ ġestjoni u kontroll kienu ġew indirizzati b’mod adegwat bħala riżultat tal-azzjonijiet korrettivi tagħha²⁷.

Ambitu u approċċ tal-awditjar

35

Permezz ta’ dan l-awditu, aħna vvalutajna jekk il-miżuri preventivi u l-korrezzjonijiet finanzjarji applikati mill-Kummissjoni fil-qasam tal-Koeżjoni humiex effettivi biex tipproteġi l-baġit tal-UE mill-kofinanzjament ta’ nfiq irregolari.

36

L-awditu tagħna ffoka fuq il-perjodu ta’ programmazzjoni 2007-2013; iżda għamilna tqabbil ukoll tal-miżuri preventivi u l-korrezzjonijiet finanzjarji applikati mill-Kummissjoni matul dan il-perjodu ma’ dawk tal-perjodu ta’ programmazzjoni 2000-2006. Aħna vvalutajna wkoll l-impatt probabbli tal-bidliet rilevanti li saru fir-regolamenti għall-perjodu ta’ programmazzjoni 2014-2020.

37

B’mod partikolari aħna eżaminajna jekk:

1. il-korrezzjonijiet finanzjarji tal-Kummissjoni kellhomx impatt nett suffiċjenti għall-programmi tal-FEŻR u tal-FSE matul il-perjodu 2000-2006;
2. il-Kummissjoni għamlitx użu effettiv mill-miżuri preventivi u l-korrezzjonijiet finanzjarji matul il-perjodu 2007-2013 kif previst fir-regolamenti;
3. il-Kummissjoni għamlitx użu effettiv mit-tagħlimiet li kienet ħadet meta fasslet l-arranġamenti għall-2014-2020 sabiex tipproteġi aħjar il-baġit tal-UE fil-qasam tal-Koeżjoni.

38

Ix-xogħol tal-awditjar tagħna kien jikkonsisti:

• f’rieżami tal-leġiżlazzjoni rilevanti tal-UE u tal-linji gwida tal-Kummissjoni (kemm interni kif ukoll dawk indirizzati lill-Istati Membri) għall-perjodi 2000-2006, 2007-2013 u 2014-2020;
• rieżami tal-pubblikazzjonijiet u rapporti differenti tal-Kummissjoni relatati mal-miżuri għall-protezzjoni tal-baġit tal-UE (bħar-rapporti annwali tal-attività, il-kontijiet annwali u l-Komunikazzjoni dwar il-protezzjoni tal-baġit tal-UE) għall-perjodu 2007-2013;
• analiżi komparattiva tad-distribuzzjoni fuq bosta snin ta’ miżuri preventivi u korrezzjonijiet finanzjarji applikati mill-Kummissjoni fil-perjodi 2000-2006 u 2007-2013, u valutazzjoni tal-impatt tal-korrezzjonijiet finanzjarji fuq l-infiq totali għall-programmi wara l-għeluq fil-perjodu ta’ programmazzjoni 2000-2006;
• rieżami tas-sentenzi kollha tal-Qorti tal-Ġustizzja tal-Unjoni Ewropea (QtĠ) dwar id-deċiżjonijiet ta’ korrezzjoni finanzjarja li ttieħdu mill-Kummissjoni fil-perjodi 1994-1999 u 2000-2006 li ġew ikkontestati quddiem il-QtĠ;
• valutazzjoni tal-proċeduri interni tal-Kummissjoni għall-perjodu 2007-2013 u verifikazzjoni ta’ kif dawn jaħdmu fil-prattika permezz ta’ analiżi fl-uffiċċju. Din kienet tinkludi analiżi tas-sorsi differenti ta’ informazzjoni miżmuma mill-Kummissjoni, u validazzjoni u rikostruzzjoni tar-rendikont tal-entrati għall-każijiet speċifiċi eżaminati;
• eżami ta’ kampjun ta’ 72 każ individwali li kienu ngħalqu sa tmiem l-2016, li kienu relatati ma’ 20 programm operazzjonali tal-FEŻR/FK u tal-FSE għall-perjodu 2007-2013. Għal dawn l-20 PO aħna eżaminajna l-miżuri preventivi u l-korrezzjonijiet finanzjarji kollha. Dawn il-programmi jkopru madwar 21 % tal-baġit totali u ntgħażlu b’mod aleatorju. It-72 każ eżaminati jirrappreżentaw madwar 29 % tal-korrezzjonijiet finanzjarji kollha għal dak il-perjodu;
• tqabbil tar-riskju tal-programmi għal kull Stat Membru u l-livell ta’ korrezzjonijiet finanzjarji, kif ukoll analiżi tar-rati ta’ żball ivvalidati mill-Kummissjoni u l-miżuri preventivi u l-korrezzjonijiet finanzjarji li twettqu matul il-perjodu 2007-2013; u
• intervisti ma’ membri tal-Kumitat għall-Kontroll tal-Baġit tal-Parlament Ewropew u tal-Kumitat għall-Iżvilupp Reġjonali, u ma’ rappreżentanti tal-Istati Membri tal-Grupp ta’ Ħidma dwar l-Azzjonijiet Strutturali tal-Kunsill tal-Unjoni Ewropea.

39

L-awditu jkopri l-perjodu sal-31 ta’ Diċembru 2015 dment li ma jkunx indikat mod ieħor. Ix-xogħol tal-awditjar fuq il-post twettaq minn Jannar 2016 sa Novembru 2016. L-eżami li wettaqna tal-miżuri preventivi u tal-korrezzjonijiet finanzjarji kien ibbażat fuq żbalji li ġew aċċettati mill-Istati Membri. Dment li ma jkunx indikat mod ieħor, iċ-ċifri ppreżentati f’dan ir-rapport jirreferu għal korrezzjonijiet finanzjarji ex post li ġew imposti mill-Kummissjoni u aċċettati mill-Istati Membri.

Osservazzjonijiet

Il-korrezzjonijiet finanzjarji diġà rriżultaw f’korrezzjonijiet netti għal għadd ta’ programmi tal-FEŻR u tal-FSE kif ukoll għal proġetti tal-FK matul il-perjodu 2000-2006

Il-korrezzjonijiet finanzjarji għall-perjodu 2000-2006 kienu jammontaw għal EUR 8 616-il miljun jew 3.8 % tal-baġit totali għall-FEŻR, l-FK u l-FSE

40

Fil-valutazzjoni tagħna tal-effettività tal-Kummissjoni biex tipproteġi l-baġit tal-UE minn infiq irregolari, aħna ħarisna l-ewwel lejn il-perjodu ta’ programmazzjoni 2000-2006. Għal dan il-perjodu stajna nivvalutaw l-impatt totali tal-korrezzjonijiet finanzjarji fuq l-Istati Membri peress li kważi l-PO kollha kienu ngħalqu sa tmiem l-2015²⁸.

41

Aħna sibna li l-Kummissjoni imponiet total ta’ EUR 8 616-il miljun f’korrezzjonijiet finanzjarji matul il-perjodu 2000-2006. Dan kien jikkorrispondi għal 3.8 % tal-pakkett totali tal-baġit (it-Tabella 1).

42

Skont il-Kummissjoni, f’għeluq il-perjodu ta’ programmazzjoni 2000-2006 l-PO kollha kienu ngħalqu b’korrezzjonijiet finanzjarji suffiċjenti imposti biex jiġi żgurat li ebda nefqa irregolari materjali ma kienet tħallset mill-baġit tal-UE.

Tabella 1

Iċ-ċifri prinċipali għall-implimentazzjoni tal-miżuri applikati mill-Kummissjoni għall-protezzjoni tal-baġit tal-UE fil-qasam tal-Koeżjoni

	2000-2006				2007-2013
	FEŻR	FK	FSE	TOTAL	FEŻR/FK	FSE	TOTAL
Pakkett allokat (miljun EUR)	129 607	30 215	68 521	228 344	269 879	76 617	346 496
Korrezzjonijiet finanzjarji kkonfermati/deċiżi (miljun EUR)	5 794	832	1 990	8 616	2 317	1 009	3 326
Korrezzjonijiet finanzjarji kkonfermati/deċiżi /pakkett allokat (%)	4.5 %	2.8 %	2.9 %	3.8 %	0.9 %	1.3 %	1.0 %
Ammont interrott (miljun EUR)					23 364	5 082	28 446
Ammont interrott / pakkett allokat (%)					9 %	7 %	8 %
Għadd totali ta’ PO	379		239	618	322	118	440
Għadd ta’ PO sospiżi	45		11	56	32	32	64
Għadd ta’ PO sospiżi / Għadd totali ta’ PO (%)	12 %		5 %	9 %	10 %	27 %	15 %
Għadd totali ta’ proġetti		1 119		1 119
Għadd ta’ proġetti sospiżi		2		2
Proġetti sospiżi / Għadd totali ta’ proġetti (%)		0 %		0 %

Sors: Il-Qorti Ewropea tal-Awdituri, ibbażat fuq informazzjoni pprovduta mill-Kummissjoni.

43

Madankollu, il-Kummissjoni ma ppubblikatx indikatur għall-qasam ta’ politika kollu, simili għas-CRR għall-perjodu ta’ programmazzjoni 2007-2013, biex tivvaluta jekk l-impatt tal-korrezzjonijiet ta’ hawn fuq ġabx ir-rata ta’ riskju residwu għall-qasam ta’ politika taħt is-soll ta’ materjalità ta’ 2 %.

44

Fil-kuntest tal-awditi tagħna tal-konformità, aħna eżaminajna l-pagament tal-għeluq tal-programmi li sar lil 12-il PO tal-FEŻR jew tal-FSE u lil 15-il proġett tal-FK (b’kollox 101 proġett). Mill-101 proġett, 20 kienu affettwati minn żbalji li kellhom impatt finanzjarju, li f’mill-inqas 13 minnhom il-Kummissjoni applikat korrezzjonijiet finanzjarji wara li l-proċedura ta’ għeluq tal-programmi kienet ġiet finalizzata mill-Istat Membru. Dan juri li l-Kummissjoni trid tibqa’ viġilanti meta teżamina d-dikjarazzjoni tal-għeluq tal-programmi ppreżentata mill-Istati Membri.

45

It-Tabella 1 tiġbor fil-qosor l-analiżi tagħna tal-miżuri applikati mill-Kummissjoni għall-protezzjoni tal-baġit tal-UE fil-politika ta’ Koeżjoni għall-perjodi ta’ programmazzjoni 2000-2006 u 2007-2013.

Il-korrezzjonijiet finanzjarji netti għall-perjodu 2000-2006 jirrappreżentaw ammont globali ta’ EUR 2 423 miljun (jew 1.1 % tal-baġit totali)

46

Il-korrezzjonijiet finanzjarji netti joriġinaw kemm minn deċiżjonijiet tal-Kummissjoni, li awtomatikament ikunu netti, kif ukoll minn korrezzjonijiet finanzjarji kkonfermati li jistgħu jsiru netti jekk l-Istati Membri ma jintroduċux infiq ġdid.

47

Il-korrezzjonijiet finanzjarji ġew deċiżi mill-Kummissjoni f’seba’ Stati Membri għall-FEŻR (il-Belġju, il-Greċja, Spanja, Franza, il-Ġermanja, l-Italja u r-Renju Unit), sitt Stati Membri għall-FK (Spanja, il-Greċja, l-Irlanda, il-Litwanja, il-Portugall u s-Slovakkja) u Stat Membru wieħed għall-FSE (Franza). Il-korrezzjonijiet li ġew deċiżi mill-Kummissjoni jammontaw għal EUR 1 037 miljun jew madwar 0.5 % tal-baġit totali tal-FEŻR, tal-FK, u tal-FSE (ara l-Figura 3).

48

Għal dak li jirrigwarda l-korrezzjonijiet finanzjarji kkonfermati aħna sibna li, għall-FEŻR, 5 mill-25 Stat Membru (l-Irlanda, il-Latvja, il-Litwanja, il-Lussemburgu u l-Ungerija) setgħu jissostitwixxu bi nfiq ġdid l-ammont kollu tal-korrezzjoni finanzjarja kkonfermata (indikat bl-aħdar fil-Figura 4). Dan kien il-każ ukoll għall-FSE f’5 mill-25 Stat Membru (l-Irlanda, il-Latvja, il-Litwanja, il-Portugall u s-Slovakkja), u għall-FK f’4 minn 16-il Stat Membru (il-Latvja, il-Litwanja, l-Ungerija u s-Slovenja) (indikat bl-aħdar fil-Figuri 5 u 6). Flimkien, dawn l-Istati Membri rrappreżentaw 3 % tal-baġit tal-FEŻR, 10 % tal-baġit tal-FSE u 10 % tal-baġit tal-FK. Dawn l-Istati Membri setgħu jiddikjaraw biżżejjed infiq addizzjonali biex jikkumpensaw għall-effett tal-korrezzjonijiet finanzjarji kkonfermati, u għalhekk il-korrezzjonijiet finanzjarji kkonfermati ma kellhom ebda impatt fuq l-użu tal-pakkett tal-baġit tagħhom.

49

Fil-każ ta’ 17-il Stat Membru għall-FEŻR, 16-il Stat Membru għall-FSE u 10 Stati Membri għall-FK, il-korrezzjonijiet finanzjarji kkonfermati kellhom impatt fuq l-użu tal-pakkett allokat tal-baġit (indikat bl-aħmar fil-Figuri 4, 5 u 6). Flimkien, dawn l-Istati Membri rrappreżentaw 96 % tal-baġit tal-FEŻR, 88 % tal-baġit tal-FSE u 89 % tal-finanzjament mill-FK.

50

Dawn l-Istati Membri ma setgħux jużaw is-sostituzzjoni bis-sħiħ, u b’hekk il-korrezzjoni finanzjarja kkonfermata saret korrezzjoni finanzjarja netta, għall-inqas parzjalment. Aħna kkalkolajna li din il-korrezzjoni finanzjarja netta tammonta għal EUR 1 386 miljun. Dan jikkorrispondi għal madwar 0.6 % tal-baġit totali tal-FEŻR, tal-FK u tal-FSE għall-25 Stat Membru kollha.

51

Għall-FEŻR kien hemm tliet Stati Membri (Ċipru, Malta u s-Slovenja), għall-FSE kien hemm erbgħa (ir-Repubblika Ċeka, Ċipru, Malta u l-Finlandja) u għall-FK kien hemm tnejn (Ċipru u Malta) fejn ebda korrezzjoni finanzjarja kkonfermata ma ġiet applikata fil-perjodu ta’ programmazzjoni 2000-2006.

Il-valutazzjoni tad-dgħufijiet u tal-korrezzjonijiet finanzjarji li twettqet mill-Kummissjoni ġiet ikkonfermata fis-sustanza mill-Qorti tal-Ġustizzja tal-Unjoni Ewropea

52

Meta l-Kummissjoni tinforza sospensjonijiet jew korrezzjonijiet finanzjarji permezz ta’ deċiżjoni tal-Kummissjoni, l-Istat Membru huwa intitolat li jikkontesta din id-deċiżjoni quddiem il-Qorti tal-Ġustizzja (QtĠ). Għalhekk aħna rajna jekk id-deċiżjonijiet tal-Kummissjoni għall-perjodi ta’ programmazzjoni preċedenti ġewx ikkonfermati fis-sustanza mill-QtĠ.

Tabella 2

Deċiżjonijiet tal-Kummissjoni dwar il-korrezzjonijiet finanzjarji (perjodi ta’ programmazzjoni 1994-1999 u 2000-2006)

Perjodu ta’ programmazzjoni	Stat Membru	Deċiżjonijiet ta’ korrezzjoni finanzjarja			Għadd ta’ każijiet li ġew ikkontestati quddiem il-QtĠ	Status		Sentenza (għall-każijiet magħluqa)
		DĠ REGIO	DĠ EMPL	Total		Magħluq	Miftuħ	Deċiżjoni tal-Kummissjoni
								ikkonfermata	annullata
1994-1999	Il-Belġju	1	3	4
	Il-Ġermanja	16	1	17	11	11		10	1
	L-Irlanda	5	1	6
	Il-Greċja	7		7	2	2		2
	Spanja	14	2	16	5	5		1	4
	Franza	4	4	8
	L-Italja	7		7	4	4		4
	Il-Lussemburgu		5	5
	In-Netherlands	3		3	1	1		1
	L-Awstrija	3		3
	Il-Portugall	5		5	2	2		1	1
	Il-Finlandja	1	1	2
	Ir-Renju Unit	7	2	9
	Interreġ1	4		4	1	1		1
Subtotal għall-1994-1999:		77	19	96	26	26	0	20	6
2000-2006	Il-Belġju	1		1
	Il-Ġermanja	1		1
	L-Irlanda	1		1
	Il-Greċja	2		2
	Spanja	21		21	11	8	3	6	2
	Franza	1	2	3	1	1		1
	L-Italja	3	1	4	2	1	1	1
	Il-Litwanja	1		1
	Il-Portugall	4		4	1	1			1
	Is-Slovakkja	1		1
	Ir-Renju Unit	1		1
	Interreġ1	1		1
Subtotal għall-2000-2006:		38	3	41	15	11	4	8	3
TOTAL:		115	22	137	41	37	4	28	9
		137				41		37

1 Il-programmi interreġjonali jiġu implimentati minn aktar minn Stat Membru wieħed.

Sors: Informazzjoni pprovduta mill-Kummissjoni.

53

Sa tmiem l-2015, minn total ta’ 137 deċiżjoni ta’ korrezzjoni finanzjarja, tressqu 41 każ quddiem il-QtĠ relatati mal-perjodi 2000-2006 u 1994-1999 (ara t-Tabella 2). Mill-41 każ, ingħalqu 37 sa tmiem l-2016.

54

Madwar nofs il-każijiet tal-QtĠ koperti mill-analiżi tagħna jirrigwardaw problemi marbuta ma’ nuqqas ta’ konformità mar-regoli tal-akkwist pubbliku. Xi problemi oħrajn jinkludu l-preżentazzjoni tal-ispejjeż li ġġarrbu barra l-perjodu ta’ eliġibbiltà, it-trasferiment ta’ fondi bejn il-programmi operazzjonali, u l-identifikazzjoni ta’ dgħufijiet fil-proċeduri ta’ ġestjoni u kontroll.

55

F’9 mis-37 każ magħluq, il-QtĠ annullat id-deċiżjoni ta’ korrezzjoni finanzjarja li kienet ittieħdet mill-Kummissjoni. Fid-disa’ każijiet kollha, l-annullament kien dovut għal problemi proċedurali mingħajr ebda konklużjoni dwar is-sustanza tal-każ. Tlieta mill-erba’ każijiet miftuħa bl-istess problemi qegħdin taħt appell. Fil-każijiet l-oħrajn kollha, id-deċiżjoni tal-Kummissjoni ġiet ikkonfermata mill-QtĠ kemm fuq il-forma kif ukoll fuq is-sustanza.

56

Dan jagħti x’jifhem li l-Kummissjoni ġeneralment għamlet interpretazzjonijiet robusti tal-artikoli li jirregolaw l-applikazzjoni ta’ korrezzjonijiet finanzjarji, u kienet applikat korrezzjonijiet finanzjarji proporzjonati matul il-perjodi 1994-1999 u 2000-2006.

57

Sa issa ma kienx hemm deċiżjonijiet tal-Kummissjoni dwar korrezzjoni finanzjarja għall-perjodu ta’ programmazzjoni 2007-2013. Kien hemm biss każ wieħed fejn Stat Membru kkontesta deċiżjoni tal-Kummissjoni relatata ma’ sospensjoni ta’ pagament għall-perjodu 2007-2013, iżda dan il-każ għadu għaddej u b’hekk mhuwiex kopert mill-analiżi tagħna.

Il-Kummissjoni tagħmel użu dejjem akbar mill-miżuri preventivi u l-korrezzjonijiet finanzjarji matul il-perjodu 2007-2013

58

Għall-perjodu 2007-2013 mhuwiex possibbli li ssir valutazzjoni finali f’dan l-istadju peress li l-proċess ta’ għeluq għall-PO tal-FEŻR/FK u tal-FSE ser jinbeda biss fl-2017. Għalhekk aħna ħarisna lejn il-mod kif il-Kummissjoni għamlet użu mid-dispożizzjonijiet regolatorji li kienu disponibbli matul dan il-perjodu għall-protezzjoni tal-baġit tal-UE minn infiq irregolari. Fejn xieraq, għamilna wkoll tqabbil mal-perjodu 2000-2006.

Matul il-perjodu 2007-2013 il-Kummissjoni użat il-miżuri li kien hemm għad-dispożizzjoni tagħha biex tipproteġi l-baġit tal-UE b’mod aktar estensiv milli kienet għamlet fil-passat

59

Jenħtieġ li l-Kummissjoni tagħmel użu mill-miżuri għall-protezzjoni tal-baġit tal-UE, li hemm stipulati fir-regolamenti, malli dgħufijiet konsiderevoli jinqabdu fis-sistema ta’ ġestjoni u kontroll u dawn jistgħu jwasslu biex l-Istati Membri jagħmlu talbiet ta’ nfiq irregolari. Dan huwa meħtieġ biex b’hekk l-Istati Membri jkunu jistgħu jtejbu s-sistemi tagħhom u jevitaw li jagħmlu talbiet ta’ nfiq irregolari addizzjonali mill-baġit tal-UE. Għalhekk aħna qabbilna l-użu li għamlet il-Kummissjoni mill-miżuri preventivi u l-korrezzjonijiet finanzjarji, għall-perjodu 2007-2013, ma’ dak għall-perjodu preċedenti.

60

Għall-perjodu 2007-2013, kienu ġew imposti korrezzjonijiet finanzjarji ta’ madwar EUR 3 326 miljun sa tmiem l-2015 (ara t-Tabella 1). Dan jikkorrispondi għal 1.0 % tal-pakkett totali tal-baġit. Barra minn hekk, kienu ġew interrotti pagamenti ta’ madwar EUR 28 446 miljun (8 % tal-pakkett totali allokat).

Il-miżuri preventivi ġew applikati aktar kmieni u b’mod aktar estensiv fil-perjodu ta’ programmazzjoni 2007-2013 milli fil-perjodu preċedenti

61

L-analiżi tagħna turi li l-Kummissjoni bdiet tuża miżuri preventivi fl-2010, jiġifieri r-raba’ sena tal-perjodu ta’ programmazzjoni 2007-2013. Dan kien sentejn aktar kmieni milli għall-perjodu ta’ programmazzjoni 2000-2006 u ħames snin qabel ma ntemm il-perjodu ta’ eliġibbiltà (ara l-Figura 7 u t-Tabella 1).

62

Barra minn hekk, il-miżuri preventivi koprew sehem akbar tal-PO aktar kmieni u l-Kummissjoni imponiet ukoll miżuri aktar serji aktar kmieni. Pereżempju, għall-perjodu 2000-2006, is-sospensjonijiet ta’ pagamenti ġew applikati għall-ewwel PO fl-2007 (it-tmien sena tal-perjodu 2000-2006). Għall-perjodu 2007-2013, dan kien diġà l-każ fl-2010 (ir-raba’ sena tal-perjodu 2007-2013). Barra minn hekk, filwaqt li għall-perjodu ta’ programmazzjoni preċedenti madwar 20 % tal-PO kollha b’sospensjoni ta’ pagament kienu ġew sospiżi fis-sena 2007 (it-tmien sena tal-perjodu), għall-perjodu 2007-2013 dan kien il-każ għal 68 % ta’ PO bħal dawn.

63

Din l-applikazzjoni aktar bikrija, aktar komprensiva u aktar stretta, ta’ miżuri preventivi mill-Kummissjoni tagħti lok għal titjib aktar f’waqtu għal għadd akbar ta’ sistemi ta’ ġestjoni u ta’ kontroll, u żżid ukoll l-inċentivi għall-Istati Membri biex jagħmlu t-titjib meħtieġ.

Żieda relattiva fil-korrezzjonijiet finanzjarji matul il-perjodu 2007-2013 meta mqabbel mal-livell ta’ nfiq irregolari li nqabad

64

L-analiżi tagħna turi wkoll li, fil-perjodu 2007-2013, il-livell ta’ korrezzjonijiet finanzjarji u r-rata ta’ implimentazzjoni tal-korrezzjonijiet finanzjarji imposti kienu simili għal dawk osservati matul il-perjodu preċedenti 2000-2006 (ara l-Figura 8). Madankollu, jeħtieġ li l-livelli ta’ korrezzjonijiet finanzjarji fiż-żewġ perjodi jitpoġġew f’perspettiva u jridu jitqabblu mal-livell sottostanti ta’ nfiq irregolari. L-awditi li wettaqna mill-2009 ‘l hawn urew li l-livell ta’ żball għall-perjodu 2007-2013 huwa sinifikattivament aktar baxx minn dak għall-perjodu ta’ programmazzjoni 2000-2006²⁹. Dan ifisser li kien hemm infiq sinifikattivament aktar irregolari matul l-2000-2006 milli matul il-perjodu 2007-2013. Min-naħa l-oħra, dan jimplika li l-livell ta’ korrezzjonijiet finanzjarji żdied f’termini relattivi.

L-impatt finali tal-korrezzjonijiet finanzjarji għall-perjodu 2007-2013 jista’ jiġi ddeterminat biss fl-għeluq

65

L-impatt finali li l-korrezzjonijiet finanzjarji kkonfermati kellhom fuq il-PO tal-perjodu 2007-2013 (jiġifieri jekk il-korrezzjonijiet finanzjarji wasslux għal telf ta’ fondi) jista’ jiġi vvalutat biss ladarba t-talba għall-pagament finali tkun ġiet ippreżentata mill-Istat Membru u vvalutata mill-Kummissjoni. Għal dak li jirrigwarda l-perjodu ta’ programmazzjoni 2007-2013, il-preżentazzjoni ta’ talbiet għall-pagament finali trid issir sal-31 ta’ Marzu 2017³⁰, jiġifieri għadu kmieni wisq biex, fiż-żmien tat-tfassil ta’ dan ir-rapport, jiġi vvalutat l-impatt li l-korrezzjonijiet finanzjarji għall-perjodu ta’ programmazzjoni 2007-2013 kellhom fuq l-Istati Membri.

66

L-Anness IV jipprovdi informazzjoni aktar dettaljata, għal kull Stat Membru, li hija relatata mal-implimentazzjoni sa tmiem l-2015 tal-miżuri applikati mill-Kummissjoni għall-perjodu 2007-2013.

Il-Kummissjoni applikat il-miżuri preventivi u l-korrezzjonijiet finanzjarji tagħha b’mod proporzjonat fil-perjodu 2007-2013

Il-miżuri applikati mill-Kummissjoni fil-perjodu 2007-2013 iffokaw fuq l-Istati Membri li kellhom il-programmi l-aktar riskjużi

67

Il-Kummissjoni ilha, mill-perjodu ta’ programmazzjoni 2007-2013, tikkalkola l-“ammont f’riskju” għal kull programm. Imbagħad, dawn l-ammonti jiġu aggregati fil-livell tal-Istati Membri u ppubblikati fir-RAA. Dawn l-indikaturi jippreżentaw ir-riskju tal-programmi għas-sena partikolari u juru l-ammont potenzjali ta’ nfiq mhux eliġibbli li huwa kofinanzjat għal kull programm jew Stat Membru fuq il-bażi tal-informazzjoni disponibbli għall-Kummissjoni.

68

Billi huwa mistenni li l-miżuri applikati mill-Kummissjoni jaffettwaw l-aktar lill-programmi l-aktar riskjużi, x’aktarx li jkun hemm korrelazzjoni bejn id-distribuzzjoni tal-ammont f’riskju u d-distribuzzjoni tal-korrezzjonijiet finanzjarji li ġew imposti mill-Kummissjoni. Għalhekk, aħna analizzajna jekk korrelazzjoni bħal din teżistix.

Indikatur tar-riskji tal-programmi skont l-Istat Membru, korrelatat mal-korrezzjonijiet finanzjarji kkonfermati/deċiżi

69

Id-differenza bejn l-“ammont f’riskju” u l-korrezzjonijiet finanzjarji applikati mill-Kummissjoni u mill-Istat Membru hija r-riskju residwu kumulattiv (CRR) (ara l-paragrafi 32 sa 33). Meta tivvaluta l-PO, il-Kummissjoni tirrikjedi li l-korrezzjonijiet finanzjarji li jiġu imposti mill-Istati Membri u mill-Kummissjoni jkunu għoljin biżżejjed biex jiġi żgurat li dan l-indikatur ikun taħt soll ta’ materjalità ta’ 2 %³¹.

70

Il-Figura 9 turi l-livell ta’ riskju tal-programmi skont l-Istat Membru kif indikat mill-ammont f’riskju kkalkulat mill-Kummissjoni u l-livell ta’ korrezzjonijiet finanzjarji imposti minnha għal kull Stat Membru għall-perjodu 2007-2013. L-analiżi tal-korrelazzjoni turi wkoll il-linja ta’ tendenza (ir-relazzjoni kumplessiva għall-Istati Membri bejn ir-riskju tal-programmi u l-korrezzjonijiet finanzjarji li ġew imposti mill-Kummissjoni) kif ukoll il-linja ta’ 45° (punti fejn il-korrezzjonijiet finanzjarji jkunu daqs il-livell ta’ riskju tal-programmi).

71

L-analiżi tagħna tal-korrelazzjoni turi li l-linja ta’ tendenza hija taħt il-linja ta’ 45° (ara l-Figura 9). Dan jindika li l-korrezzjonijiet finanzjarji li ġew imposti mill-Kummissjoni huma, b’mod ġenerali, f’livell aktar baxx mill-ammont f’riskju. Dan jista’ jiġi spjegat minħabba żewġ fatturi:

• ir-riskju li nfiq mhux eliġibbli jiġi kofinanzjat (ammont f’riskju) huwa parzjalment indirizzat permezz tal-korrezzjonijiet finanzjarji li jkunu diġà ġew imposti b’riżultat tal-kontrolli tal-Istati Membri, mingħajr ma l-problema tasal għand il-Kummissjoni; u
• il-Kummissjoni tirrikjedi li l-korrezzjonijiet finanzjarji jġibu s-CRR taħt is-soll ta’ materjalità ta’ 2 % (u mhux għal żero).

72

Il-parti l-kbira tal-Istati Membru huma qrib il-linja ta’ tendenza. Dan jindika li l-livell ta’ korrezzjonijiet finanzjarji imposti mill-Kummissjoni ġeneralment huwa korrelatat mal-valutazzjoni tal-ammont f’riskju li titwettaq mill-Kummissjoni³².

73

Fejn l-Istati Membri jkunu sinifikattivament ’il fuq mil-linja ta’ tendenza, il-livell ta’ korrezzjonijiet finanzjarji huwa ogħla mill-ammont potenzjali f’riskju indikat għall-programmi tal-Istati Membri. Dan huwa l-każ, pereżempju għas-Slovakkja, għar-Rumanija u għall-Irlanda.

74

Fejn l-Istati Membri jkunu sinifikattivament taħt il-linja ta’ tendenza, il-livell ta’ korrezzjonijiet finanzjarji li ġew imposti mill-Kummissjoni huwa aktar baxx mill-ammont potenzjali f’riskju indikat għall-programmi tal-Istati Membri. Dan huwa l-każ pereżempju għal Franza u għal Spanja, li t-tnejn li huma applikaw korrezzjonijiet finanzjarji fuq l-inizjattiva proprja tagħhom. Billi għamlu dan, huma evitaw li l-Kummissjoni timponi korrezzjonijiet finanzjarji addizzjonali fuqhom.

75

Ir-relazzjoni bejn il-livell ta’ korrezzjoni finanzjarja u l-ammont f’riskju tiġi influwenzata wkoll mill-każijiet li għadhom għaddejjin. Il-każijiet li għadhom ma laħqux l-istadju finali tal-proċedura huma inklużi fl-ammont f’riskju, filwaqt li l-korrezzjonijiet finanzjarji futuri li possibbilment jirriżultaw minn dawn il-każijiet għadhom mhumiex riflessi fin-numri. Dan huwa partikolarment il-każ għal Spanja fejn 20 programm operazzjonali kienu taħt sospensjoni u, għal 7 programmi oħrajn, it-talbiet għall-pagamenti ġew interrotti minn tmiem l-2015 (li jirrappreżentaw 70 % tal-miżuri preventivi kollha li għadhom għaddejjin).

Il-proċeduri interni tal-Kummissjoni għall-perjodu 2007-2013 għandhom l-għan li jiżguraw trattament armonizzat tal-każijiet bejn il-programmi u l-Istati Membri

76

Jenħtieġ li l-Kummissjoni tiżgura li jkun hemm trattament armonizzat tal-każijiet bejn il-programmi u l-Istati Membri, u li l-miżuri preventivi u l-korrezzjonijiet finanzjarji jiġu implimentati qabel ma jerġgħu jinbdew il-pagamenti. Għalhekk, aħna analizzajna l-proċeduri interni tal-Kummissjoni għall-imponiment ta’ miżuri preventivi u korrezzjonijiet finanzjarji, għall-aċċettazzjoni tal-miżuri preventivi u l-korrezzjonijiet finanzjarji bħala implimentati, u vverifikajna kif dawn il-proċeduri jaħdmu fil-prattika.

Id-deċiżjonijiet dwar l-interruzzjonijiet u s-sospensjonijiet tal-pagamenti u dwar il-korrezzjonijiet finanzjarji jiġu diskussi u jintlaħaq qbil dwarhom mill-kumitati ta’ maniġment ta’ livell għoli.

77

Għall-perjodu ta’ programmazzjoni 2007-2013, id-Direttorat Ġenerali għall-Politika Reġjonali u Urbana u d-Direttorat Ġenerali tal-Impjiegi, l-Affarijiet Soċjali u l-Inklużjoni waqqfu l-Kumitati proprji tagħhom għall-Interruzzjonijiet, is-Sospensjonijiet u l-Korrezzjonijiet Finanzjarji (ISFCC). Dawn il-kumitati jipprovdu forum fi ħdan kull direttorat ġenerali biex jiddiskutu kwistjonijiet u jieħdu deċiżjonijiet relatati ma’ twissijiet, interruzzjonijiet, sospensjonijiet u korrezzjonijiet finanzjarji (ara wkoll l-Anness I). Iż-żewġ kumitati jiltaqgħu fuq bażi regolari u jikkonsistu fid-direttur ġenerali, id-deputat(i) direttur(i) ġenerali, id-diretturi rilevanti u r-rappreżentanti tal-unitajiet legali.

78

Il-laqgħat tal-ISFCC żguraw li kien hemm stampa ġenerali u diskussjoni aħjar tal-każijiet u l-proċeduri kollha relatati mal-miżuri preventivi u l-korrezzjonijiet finanzjarji fi ħdan id-Direttorat Ġenerali, biex jgħinu fl-armonizzazzjoni tat-trattament tal-każijiet u jinfurmaw lill-maniġment ta’ livell għoli dwar il-problemi li kienu għadhom għaddejjin.

Il-ġestjoni u s-segwitu tal-miżuri preventivi u tal-korrezzjonijiet finanzjarji kienu jirrikjedu impenn sinifikanti f’termini ta’ riżorsi ta’ ħin u ta’ persunal

79

Sabiex jitneħħew il-miżuri preventivi u jitkomplew il-pagamenti, ġeneralment l-awtoritajiet tal-Istati Membri jridu jipproponu miżuri li jkunu mmirati lejn il-korrezzjoni tas-sistemi biex b’hekk jipprevienu l-okkorrenza ta’ żbalji fil-futur. Dawn jissejħu pjanijiet ta’ azzjoni ta’ rimedju (ara l-Anness I). Fil-kampjun tagħna ta’ 20 programm, il-Kummissjoni talbet biex jitwaqqaf pjan ta’ azzjoni ta’ rimedju f’44 mit-72 każ eżaminati (ara l-paragrafu 38).

80

Imbagħad l-Istati Membri jridu jinfurmaw lill-Kummissjoni li jkun ġie implimentat pjan ta’ azzjoni ta’ rimedju. Il-Kummissjoni għandha bosta modi ta’ kif tivvaluta jekk il-kundizzjonijiet għat-tneħħija tal-miżuri preventivi jkunux ġew issodisfati:

1. l-ewwel nett, il-Kummissjoni sistematikament tirrieżamina l-informazzjoni li tintbagħat mill-awtoritajiet tal-Istati Membri (ġeneralment mill-awtoritajiet maniġerjali tal-PO kkonċernati).
2. it-tieni nett, il-Kummissjoni tista’ wkoll tistaqsi lill-awtorità tal-awditjar biex tikkonferma l-informazzjoni pprovduta mill-awtorità maniġerjali. Minn dawn l-44, intalbet validazzjoni mill-awtorità tal-awditjar f’31 każ għal 18-il programm mill-20 li kien hemm. F’dawn il-każijiet, il-Kummissjoni kisbet aċċertament addizzjonali rigward l-adegwatezza tal-azzjonijiet proposti mill-awtoritajiet tal-Istati Membri.
3. it-tielet nett, il-Kummissjoni tista’ twettaq is-segwitu proprju tagħha tal-każijiet fl-Istati Membri. Il-każijiet għall-awditi ta’ segwitu jintgħażlu fuq bażi ta’ riskju: fejn il-Kummissjoni ma tkunx tista’ toqgħod fuq ix-xogħol tal-awtorità tal-awditjar jew fejn tkun meħtieġa informazzjoni addizzjonali. B’mod globali, il-Kummissjoni wettqet 62 awditu ta’ segwitu tal-pjanijiet ta’ azzjoni relatati ma’ 70 PO fil-perjodu ta’ programmazzjoni 2007-2013.

81

Il-ġestjoni u s-segwitu tal-miżuri preventivi u tal-korrezzjonijiet finanzjarji kienu jirrikjedu impenn sinifikanti f’termini ta’ riżorsi ta’ ħin u ta’ persunal mid-Direttorati Ġenerali. Li jinżammu pagamenti kbar, mill-baġit tal-UE, milli jitħallsu lill-Istati Membri huwa wkoll politikament sensittiv u l-Kummissjoni hija f’kuntatt mill-qrib mal-Istati Membri biex tiżgura li l-kundizzjonijiet għat-tneħħija tal-miżuri jkunu stabbiliti. Ċerti każijiet jiġu diskussi wkoll bejn il-ministri u l-kapijiet tal-Istat u d-Diretturi Ġenerali u l-Kummissarji.

Il-miżuri korrettivi applikati mill-Kummissjoni jagħmlu pressjoni fuq l-Istati Membri biex jindirizzaw id-dgħufijiet fis-sistemi tagħhom ta’ ġestjoni u kontroll

Il-miżuri preventivi u l-korrezzjonijiet finanzjarji ġeneralment jittrattaw problemi kumplessi li jieħdu żmien konsiderevoli biex jiġu riżolti

82

Jenħtieġ li l-proċeduri tal-Kummissjoni relatati mal-miżuri preventivi u mal-korrezzjonijiet finanzjarji jkunu rapidi kemm jista’ jkun, filwaqt li jittieħed kont tal-kumplessità tal-problemi. Għalhekk aħna analizzajna t-72 każ fil-kampjun tagħna biex niddeterminaw id-durata totali u t-tul ta’ żmien tal-fażijiet differenti tal-proċeduri.

83

Il-proċeduri tal-Kummissjoni ma jdumux daqs kemm idum l-imblokkar tal-pagament (ara l-paragrafu 93). Il-proċedura tal-Kummissjoni tibda bl-event skattatur u ddum jew sakemm il-miżura preventiva titneħħa jew inkella sakemm il-korrezzjoni finanzjarja tiġi implimentata. Għalhekk hija itwal mill-imblokkar tal-pagament li jibda mal-ewwel miżura preventiva u jdum sakemm titneħħa l-miżura preventiva (ara l-Anness I).

Il-proċeduri li rriżultaw f’korrezzjonijiet finanzjarji ħadu sa 21 xahar fil-perjodu 2007-2013

84

Il-Figura 10 tippreżenta r-riżultati tal-analiżi li wettaqna tal-każijiet fil-kampjun tagħna f’dak li jirrigwarda l-ħin li ttieħed biex jitwettqu l-miżuri preventivi u l-proċeduri ta’ korrrezzjoni finanzjarja. It-tul medju ta’ żmien tal-proċeduri mill-event skattatur sakemm tneħħiet il-miżura preventiva jew ġiet implimentata l-korrezzjoni finanzjarja kien ivarja minn 10 xhur sa 21 xahar. L-itwal kien meta kienu involuti kemm miżuri preventivi kif ukoll korrezzjonijiet finanzjarji, u l-iqsar kien meta kien hemm biss miżuri preventivi.

Il-parti l-kbira tal-proċeduri li rriżultaw f’miżuri preventivi ngħataw bidu b’segwitu għall-awditi proprji tal-Istat Membru u jieħdu nofs il-ħin

85

Skont il-Kummissjoni, żewġ terzi tal-miżuri preventivi ngħataw bidu b’segwitu għar-riżultati tal-awditi nazzjonali³³. Dan huwa l-każ ukoll għal 12 mis-16-il każ fil-kampjun tagħna. Id-durata ta’ dawn il-proċeduri hija sinifikattivament iqsar: ma hemmx għalfejn jitqatta’ ħin biex jiġi stabbilit x’inhuma l-problemi; il-ħin jitqatta’ biex jinstabu modi kif jiġu riżolti.

86

Il-parti l-kbira tal-korrezzjonijiet finanzjarji li jifdal jingħataw bidu b’segwitu għall-awditi tal-Kummissjoni. Fil-kampjun tagħna, 17-il każ mit-28 każ li kienu jinvolvu biss korrezzjonijiet finanzjarji, u 13-il każ mit-28 każ imħallta, ngħataw bidu b’segwitu għall-awditi li twettqu mill-Kummissjoni. Dawn il-każijiet idumu ħafna aktar biex jiġu riżolti, partikolarment jekk il-Kummissjoni timponi korrezzjonijiet finanzjarji. Waħda mir-raġunijiet għall-proċeduri fit-tul li jinvolvu korrezzjonijiet finanzjarji hija li dawn normalment jirrigwardaw problemi kumplessi, u inizjalment l-Istati Membri kważi dejjem jikkontestaw is-sejbiet tal-Kummissjoni. Sabiex jiġi stabbilit żball, il-problemi misjuba jridu jgħaddu minn proċedura fejn il-fatti jiġu ċċarati bejn l-Istat Membru u l-Kummissjoni, u dan jieħu ż-żmien.

87

Ir-regolament jispeċifika skadenzi għar-risposti li jingħataw mill-Istati Membri għat-talbiet tal-Kummissjoni għal informazzjoni. Madankollu, f’34 % tal-każijiet li kkampjunajna, il-Kummissjoni ma aċċettatx l-ewwel risposta tal-Istat Membru li fiha kienu stipulati l-azzjonijiet dettaljati li ħa l-Istat Membru biex jindirizza n-nuqqasijiet, billi l-Istat Membru ma pprovdiex informazzjoni suffiċjenti lill-Kummissjoni, la f’termini ta’ volum u lanqas ta’ kwalità. Dan ifisser li f’dawn il-każijiet ir-risposta pprovduta mill-Istat Membru hija tali li l-proċeduri jkunu jridu jiġu ripetuti.

88

Aħna eżaminajna wkoll jekk raġuni oħra għall-proċedura twila tistax tkun li l-Kummissjoni ma tifformulax ir-rekwiżiti tagħha b’mod speċifiku biżżejjed. Madankollu, l-analiżi tagħna wriet li f’9 każijiet minn 10, it-talbiet tal-Kummissjoni kienu speċifiċi biżżejjed biex l-Istat Membru jieħu l-azzjonijiet meħtieġa.

89

Barra minn hekk, meta l-korrezzjonijiet finanzjarji jiġu stabbiliti, jenħtieġ iż-żmien biex jiġi ddeterminat il-livell xieraq ta’ korrezzjoni ladarba l-iżball ikun ġie aċċettat mill-Istat Membru. F’ħafna każijiet il-Kummissjoni taqbel mal-Istat Membru kkonċernat li jenħtieġ li jitwettqu kontrolli addizzjonali biex is-serjetà tal-iżbalji u l-korrezzjoni xierqa jiġu stabbiliti.

L-interruzzjonijiet u s-sospensjonijiet ta’ pagamenti jirrappreżentaw riskju finanzjarju sinifikanti għall-Istati Membri

90

Huwa mistenni li l-azzjonijiet tal-Kummissjoni jagħmlu s-sistema ta’ ġestjoni u kontroll tal-PO aktar effettiva f’dak li jirrigwarda l-prevenzjoni, id-detezzjoni u l-korrezzjoni tal-iżbalji. Dan it-titjib normalment isir aktar malajr jekk ikun hemm spiża finanzjarja assoċjata man-nuqqas ta’ azzjoni rapida. Għalhekk, aħna vvalutajna l-impatt tal-miżuri preventivi fil-livell tal-Istati Membri u f’dak tal-Kummissjoni.

Pagamenti interrotti jew sospiżi għal sehem sinifikanti ta’ programmi għal bejn tlieta u disa’ xhur

91

Sa tmiem l-2015, il-Kummissjoni interrompiet l-iskadenza ta’ pagamenti għall-ammont li jikkorrispondi għal 10 % tal-pagamenti kollha li saru għall-FEŻR/FK u għall-FSE³⁴. Inħarġu deċiżjonijiet ta’ sospensjoni għal 15 % tal-programmi kollha. Barra minn hekk, il-pagamenti lill-programmi jew lil parti mill-programmi għall-perjodu 2007-2013 twaqqfu minħabba interruzzjonijiet u/jew sospensjonijiet għal aktar minn tmien xhur bħala medja. Kien hemm biss ħames Stati Membri (il-Kroazja, Ċipru, id-Danimarka, il-Finlandja u l-Irlanda) fejn ebda PO ma ġie interrott jew sospiż.

92

Għall-maġġoranza l-kbira tal-Istati Membri, il-perjodu medju meta l-Kummissjoni żammet il-ħlas ta’ pagamenti lil mill-inqas wieħed mill-programmi tagħhom, minħabba interruzzjonijiet u/jew sospensjonijiet, kien bejn tlieta u disa’ xhur. Aħna kkalkulajna medjan globali ta’ 146 jum għall-imblokkar tal-pagamenti. Fl-Italja u fi Spanja, madankollu, it-tul medju ta’ żmien kien ta’ kważi sena (ara t-Tabella 3).

Tabella 3

Tabella tar-relazzjoni bejn il-pagamenti dovuti u l-iskadenzi (ageing table), skont l-Istat Membru, li turi t-tul medju ta’ żmien tal-imblokkar tal-pagamenti lill-PO fil-perjodu ta’ programmazzjoni 2007-2013

	<3 xhur	3-6 xhur	6-9 xhur	>9 xhur
Stati Membri	L-Estonja Il-Greċja Il-Litwanja Il-Polonja L-Iżvezja	Franza Il-Latvja Il-Lussemburgu Malta In-Netherlands Il-Portugall Ir-Rumanija Is-Slovenja Ir-Renju Unit Kooperazzjoni transkonfinali	Il-Belġju Il-Bulgarija Ir-Repubblika Ċeka Il-Ġermanja L-Ungerija L-Awstrija Is-Slovakkja	Spanja L-Italja
TOTAL	5	10	7	2

Nota: It-tabella turi medja tal-imblokkar tal-pagamenti għal kull PO u għal kull Stat Membru. Ma tfissirx li l-PO kollha għal Stat Membru partikolari ġew imblokkati, jew li l-imblokkar kollu seħħ fl-istess ħin.

Sors: Il-Qorti Ewropea tal-Awdituri, ibbażat fuq informazzjoni pprovduta mill-Kummissjoni.

Il-miżuri preventivi jagħtu inċentiv ukoll lill-Istati Membri biex itejbu s-sistemi tagħhom

93

Bis-suppożizzjoni li kien hemm ritmu uniformi ta’ pagament u jekk tittieħed l-infiq kollu fit-28 Stat Membru f’daqqa, għall-perjodu ta’ programmazzjoni 2007-2013 il-Kummissjoni ħallset medja ta’ EUR 110 miljun kuljum mill-FEŻR, mill-FK u mill-FSE³⁵. Dan juri l-impatt monetarju potenzjali li jkun hemm meta jiddewmu l-pagamenti mill-baġit tal-UE lill-Istati Membri, u b’mod partikolari lil dawk il-pajjiżi li jirċievu l-parti l-kbira tal-infiq fil-qasam tal-Koeżjoni.

94

Meta skadenza ta’ pagament għal talba għall-pagament tiġi interrotta jew il-pagamenti interim jew partijiet minnhom jiġu sospiżi, l-Istati Membri ma jiġux rimborżati mill-Kummissjoni anki jekk jippreżentaw talbiet għall-pagamenti. Matul dan il-perjodu, l-Istati Membri jridu jiffinanzjaw il-proġetti permezz tal-baġits proprji tagħhom, jew inkella l-pagamenti lill-proġetti jitwaqqfu.

95

Dan ma jfissirx bilfors li l-Istat Membru jkun tilef il-fondi tal-UE, billi l-Kummissjoni ser tħallas l-infiq li jkun ġie akkumulat matul il-perjodu ta’ imblokkar ladarba l-miżura preventiva titneħħa. Madankollu, jekk l-Istat Membru ikun jeħtieġ jiffinanzja l-proġetti mill-baġit nazzjonali, xorta waħda x’aktarx li jinħolqu problemi ta’ fluss tal-flus minħabba li jonqos il-volum ta’ flus deħlin. Is-sitwazzjoni tista’ tmur għall-agħar jekk il-volum ta’ proġetti li jridu jiġu ffinanzjati jkun sinifikanti u/jew jekk ir-raġunijiet għall-interruzzjoni jew għas-sospensjoni jkunu kumplessi, bir-riżultat li jsiru azzjonijiet korrettivi li jieħdu fit-tul. Barra minn hekk, lejn tmiem il-perjodu ta’ programmazzjoni jiżdied ir-riskju li l-infiq imblokkat jista’ fil-fatt jintilef.

96

Inċertezza dwar sejħiet għall-pagamenti tista’ twassal ukoll għal diffikultajiet għall-Kummissjoni fil-ġestjoni baġitarja tagħha. Minn naħa, jista’ jkun li l-Kummissjoni ma tkunx tista’ tuża l-approprjazzjonijiet ta’ pagament allokati. Min-naħa l-oħra, jekk jitneħħew bosta interruzzjonijiet jew sospensjonijiet ta’ pagamenti simultanjament, jista’ jkollha problemi biex tissodisfa l-obbligi ta’ ħlas kollha tagħha, jiġifieri tkun tiffaċċja problema ta’ fluss tal-flus. Barra minn hekk, il-Kummissjoni tista’ tiffaċċja diffikultajiet fl-ippjanar tal-pagamenti u fit-tfassil tal-baġit. Aħna eżaminajna jekk, biex jiġu evitati inċertezzi bħal dawn, jistax ikun hemm riskju li imblokkar tal-pagament ikun tneħħa qabel tmiem is-sena sabiex tiġi evitata sitwazzjoni fejn l-Istat Membru jitlef il-fondi. Madankollu, dan ma kien il-każ għal ebda wieħed mill-każijiet eżaminati.

Tneħħija gradwali tal-miżuri mill-Kummissjoni biex tiżgura li l-infiq jista’ jiġi rimborżat mill-aktar fis possibbli

97

L-imblokkar tal-pagamenti normalment jaffettwa jew lill-programm kollu jew inkella parti minnu (eż. prijorità jew bosta miżuri). Dan jista’ jwassal ukoll għaż-żamma ta’ pagamenti ta’ nfiq relatat ma’ proġetti li jistgħu ma jkunux affettwati mill-problemi li jagħtu bidu għall-miżuri preventivi iżda li għalihom hemm nuqqas ta’ aċċertament, sakemm tiġi riċevuta r-risposta tal-Istat Membru, dwar il-legalità u r-regolarità tal-infiq.

98

Waqt ir-reviżjoni tagħna tal-fajls, aħna sibna bosta każijiet fejn il-Kummissjoni, ibbażat fuq l-informazzjoni pprovduta mill-Istati Membri biex tiżola l-problemi, applikat approċċ proporzjonat u gradwalment neħħiet il-miżuri preventivi tagħha biex b’hekk ir-rimborż tal-infiq mill-baġit tal-UE seta’ jerġa’ jibda mill-aktar fis possibbli għall-parti tal-programm li ma kinitx affettwata min-nuqqasijiet li inizjalment wasslu għall-interruzzjoni jew is-sospensjoni (il-Kaxxa 3). Matul il-perjodu ta’ programmazzjoni 2014-2020, il-Kummissjoni hija meħtieġa li ssegwi dan l-approċċ proporzjonat³⁶.

Il-Kummissjoni kellha diffikultajiet biex timmonitorja l-implimentazzjoni mill-Istati Membri tal-korrezzjonijiet finanzjarji, u biex tivvaluta l-effetti fit-tul tal-miżuri korrettivi applikati mill-Kummissjoni

L-informazzjoni pprovduta mill-Istati Membri dwar l-implimentazzjoni tagħhom ta’ korrezzjonijiet finanzjarji għall-perjodu 2007-2013 ma kinitx tagħti lok għal monitoraġġ robust

Jenħtieġ li l-Kummissjoni tiżgura li l-korrezzjonijiet finanzjarji imposti ġew implimentati bis-sħiħ mill-Istati Membri fil-każijiet kollha

99

Għall-perjodu 2007-2013, il-Kummissjoni toqgħod fuq ċertifikati jew ittri mibgħuta mill-awtoritajiet ta’ ċertifikazzjoni biex tkun ċerta li, mit-talba tiegħu għall-pagament, l-Istat Membru jkun naqqas l-ammont ta’ korrezzjoni finanzjarja li jkun intlaħaq qbil dwaru, biex b’hekk il-pagament interim sussegwenti jkun jista’ jiġi awtorizzat. Il-format u l-kontenut ta’ dawn id-dokumenti mhumiex irregolati minn xi regoli jew linji gwida; fihom informazzjoni li l-awtorità ta’ ċertifikazzjoni partikolari tkun tqis rilevanti. F’xi wħud mill-każijiet eżaminati, l-informazzjoni li l-Kummissjoni rċeviet ma kinitx biżżejjed biex din tkun tista’ tiċċekkja l-eżekuzzjoni tal-korrezzjonijiet finanzjarji.

100

Barra minn hekk, ir-regolamenti għall-2007-2013 ma jirrikjedux li l-awtoritajiet tal-awditjar jiċċekkjaw il-kontenut ta’ dawn iċ-ċertifikati u li jivvalutaw jekk il-korrezzjonijiet finanzjarji imposti tnaqqsux bis-sħiħ. Sa issa, il-Kummissjoni lanqas ma talbithom biex jagħmlu dan sistematikament. B’hekk, il-Kummissjoni ma kellhiex konferma indipendenti ta’ kif il-korrezzjonijiet finanzjarji ġew implimentati fil-prattika. Dan kien partikolarment il-każ fis-snin bikrin tal-perjodu ta’ programmazzjoni.

Il-Kummissjoni identifikat nuqqasijiet fir-rappurtar li sar mill-Istati Membri dwar l-ammonti rtirati u dawk irkuprati matul il-perjodu 2007-2013

101

Fil-perjodu ta’ programmazzjoni 2007-2013, l-Istati Membri kienu meħtieġa jibagħtu dikjarazzjoni lill-Kummissjoni kull sena fejn jidentifikaw l-ammonti rtirati, rkuprati, li jridu jiġu rkuprati u dawk irrekuperabbli³⁷. Dan ir-rapport ikopri l-korrezzjonijiet finanzjarji imposti mill-Kummissjoni u dawk imposti mill-Istati Membri nfushom. Fl-2010, il-Parlament Ewropew u l-Kunsill talbu lill-Kummissjoni tipprovdi informazzjoni dwar il-kapaċità korrettiva tal-Istati Membri għall-perjodu ta’ programmazzjoni 2007-2013³⁸.

102

Bejn l-2011 u l-2015 il-Kummissjoni wettqet 47 awditu dwar irkupri li kienu jkopru 19-il Stat Membru u 113-il PO li ntgħażlu fuq il-bażi tar-riskju. Għal 72 minn dawn il-113-il PO, il-Kummissjoni qabdet nuqqasijiet importanti.

103

L-analiżi tagħna tar-rapporti kollha relatati ma’ dawn l-awditi wriet li n-nuqqasijiet kienu relatati b’mod partikolari ma’

1. il-ġestjoni tal-irregolaritajiet mill-awtoritajiet nazzjonali (60 %). F’bosta Stati Membri, tqiesu twal wisq il-perjodi ta’ żmien minn meta tinqabad irregolarità sa meta din tiġi rreġistrata fis-sistema ta’ informazzjoni dwar il-ġestjoni, u/jew minn meta irregolarità tiġi rreġistrata sa meta tittieħed id-deċiżjoni ta’ rtirar jew irkupru tal-ammonti relatati;
2. il-kompletezza u l-korrettezza tar-rapporti skont l-Artikolu 20 li ġew ippreżentati mill-Istati Membri (40 %). F’dawn il-każijiet l-Istati Membri jew ma rrappurtawx l-ammonti rilevanti kollha ta’ rtirar, irkupri, irkupri pendenti u ammonti irrekuperabbli, jew inkella rrappurtaw ammonti li qatt ma kienu ġew iċċertifikati u ddikjarati lill-Kummissjoni jew li ma kinux relatati ma’ irregolaritajiet, iżda ma’ żbalji amministrattivi/klerikali jew ma’ proġetti li ma baqgħux (jew qatt ma kienu) parti mill-PO; u
3. proċeduri ta’ rkupru mhux adegwati (15 %). Ġew osservati każijiet fejn ammonti irregolari ma ġewx irkuprati mingħand il-benefiċjarji, jew l-awtorità ta’ ċertifikazzjoni ma żguratx li jsir segwitu xieraq tal-miżuri ta’ rkupru li ttieħdu mill-awtorità maniġerjali.

104

Aħna nosservaw li d-Direttorat Ġenerali għall-Politika Reġjonali u Urbana u d-Direttorat Ġenerali tal-Impjiegi, l-Affarijiet Soċjali u l-Inklużjoni japplikaw metodoloġiji simili biex jagħtu kont ta’ data inaffidabbli dwar korrezzjonijiet finanzjarji li jkunu ġew irrappurtati mill-Istati Membri. B’mod globali, għall-2015, il-Kummissjoni tistma li madwar 9 % tal-ammonti rrappurtati għall-FEŻR/FK u 4 % irrappurtati għall-FSE huma inaffidabbli.

105

B’mod globali, l-awditi tal-Kummissjoni indikaw li jeħtieġ li jsir titjib sinifikanti mill-Istati Membri biex itejbu r-rappurtar tagħhom dwar l-ammonti rtirati, rkuprati, li jridu jiġu rkuprati u dawk irrekuperabbli matul il-perjodu 2007-2013. Ix-xogħol proprju tagħna jindika li r-rappurtar li sar mill-Istati Membri dwar il-korrezzjonijiet finanzarji mhuwiex affidabbli biżżejjed³⁹. Madankollu dan ir-riskju ser jiġi mitigat fil-perjodu ta’ programmazzjoni 2014-2020 (ara l-paragrafi 124 sa 126).

Evidenza mħallta dwar l-impatt fit-tul li l-miżuri preventivi u l-korrezzjonijiet finanzjarji kellhom fuq il-livell ta’ żball ta’ programm matul il-perjodu 2007-2013

106

Ir-rati ta’ żball irrappurtati mill-awtoritajiet tal-awditjar fl-Istati Membri għal kull PO (jew għal grupp ta’ PO) u vvalidati kull sena mill-Kummissjoni jistgħu jitqiesu bħala indikatur ta’ kemm is-sistemi ta’ ġestjoni u kontroll, tal-Istati Membri, huma effettivi għall-prevenzjoni u d-detezzjoni tal-iżbalji. Jekk dawn is-sistemi jaħdmu b’mod effettiv, ikun mistenni li l-livell ta’ nfiq irregolari jkun taħt il-materjalità. Dawn ir-rati ta’ żball ivvalidati huma rrappurtati fir-rapporti annwali tal-attività tad-Direttorati Ġenerali, u huma element ewlieni fil-valutazzjoni tas-sistemi ta’ ġestjoni u kontroll li tkun twettqet mill-Kummissjoni.

107

Jekk il-miżuri preventivi u l-korrezzjonijiet finanzjarji applikati mill-Kummissjoni huma effettivi, ikun mistenni li, inġenerali, ir-rati ta’ żball ivvalidati għal PO (jew għal grupp ta’ PO) jonqsu fit-terminu twil wara l-azzjoni tal-Kummissjoni.

108

Għalhekk, għall-20 PO li ntgħażlu, aħna eżaminajna r-relazzjoni bejn l-evoluzzjoni tar-rati ta’ żball ivvalidati u l-miżuri preventivi u l-korrezzjonijiet finanzjarji kkonfermati li ġew applikati mill-Kummissjoni (ara t-Tabella 4).

109

L-analiżi tagħna wriet li l-miżuri preventivi u l-korrezzjonijiet finanzjarji għandhom impatt fit-tul imħallat fuq il-livelli ta’ żball ta’ PO (jew ta’ grupp ta’ PO). Abbażi tal-analiżi tagħna, aħna ġbarna l-PO eżaminati fi tliet kategoriji:

1. għal madwar terz tal-programmi, il-PO (jew grupp ta’ PO) kellhom rati ta’ żball ivvalidati li kienu taħt il-livell ta’ materjalità ta’ 2 % tal-Kummissjoni (7 minn 20);
2. għal kull wieħed minn ħames PO, il-livell ta’ żball kien sinifikattivament aktar baxx minn qabel ma l-Kummissjoni ħadet azzjoni (4 minn 20); u
3. għal kważi nofs il-programmi, ma kien hemm ebda evidenza li l-azzjonijiet tal-Kummissjoni kienu rriżultaw fi tnaqqis fir-rati ta’ żball ivvalidati (9 minn 20).

Tabella 4

L-impatt li l-azzjoni tal-Kummissjoni kellha fuq ir-rati ta’ żball tal-programmi fis-snin sussegwenti

Kategorija	Għadd ta’ PO
1. Għadd ta’ PO li ma jirrappreżentaw ebda riskju partikolari billi l-aktar rata ta’ żball reċenti < 2 %	7
2. Ir-rata ta’ żball turi tendenza ċara ta’ tnaqqis wara li nbdew miżuri preventivi u/jew korrezzjonijiet finanzjarji	4
3. Ir-rata ta’ żball żdiedet/varjat minkejja li nbdew miżuri preventivi u/jew korrezzjonijiet finanzjarji	9
Total	20

Sors: Il-Qorti Ewropea tal-Awdituri, ibbażat fuq informazzjoni pprovduta mill-Kummissjoni.

110

Mill-perspettiva tagħna, madankollu, ir-rati ta’ żball ivvalidati mhumiex indikatur perfett ta’ kemm il-miżuri preventivi u l-korrezzjonijiet finanzjarji applikati mill-Kummissjoni kienu effettivi fit-tul, b’mod partikolari peress li jirrigwardaw il-PO kollu (jew il-grupp ta’ PO). Billi r-regoli għall-implimentazzjoni (eż. ir-regoli ta’ eliġibbiltà, ir-regoli tal-akkwist pubbliku, ir-regoli dwar l-għajnuna mill-Istat) huma pjuttost kumplessi, jistgħu jseħħu tipi differenti ta’ żbalji fi ħdan PO. Barra minn hekk, il-miżuri applikati mill-Kummissjoni normalment jindirizzaw prijoritajiet jew korpi intermedjarji speċifiċi, gruppi ta’ proġetti jew ċerti sejħiet għal proposti fi ħdan PO. Fl-aħħar nett, il-miżuri jindirizzaw tipi partikolari ta’ żbalji (eż. kriterji tal-għażla restrittivi li jkunu speċifiċi, jew problemi bil-metodu ta’ għażla ta’ proġetti li jridu jiġu kofinanzjati). Għalhekk, f’ħafna każijiet, il-miżuri applikati mill-Kummissjoni jikkoreġu/jipprevienu żbalji relatati ma’ parti minn PO u huma relatati ma’ ċerti tipi speċifiċi ta’ żbalji.

111

Il-Kummissjoni għamlet sforzi biex iżżid l-effett tal-miżuri preventivi u tal-korrezzjonijiet finanzjarji tagħha billi estendiet dawn il-miżuri għal programmi oħrajn fejn ġew osservati dgħufijiet simili. Dan wassal għal impatt akbar (ara l-Kaxxa 4).

Ir-rappurtar li sar mill-Kummissjoni dwar il-miżuri preventivi u l-korrezzjonijiet finanzjarji għamilha diffiċli li tinkiseb stampa ġenerali komprensiva u analitika

L-informazzjoni dwar il-miżuri preventivi u l-korrezzjonijiet finanzjarji hija ppreżentata f’bosta rapporti u dokumenti

112

Jenħtieġ li l-Kummissjoni tirrapporta dwar il-miżuri preventivi u l-korrezzjonijiet finanzjarji b’mod komprensiv u koerenti biex tiżgura li l-informazzjoni rilevanti tkun aċċessibbli u faċli biex tinftiehem mill-partijiet interessati. Għalhekk, f’dan il-kuntest aħna rrevedejna l-pubblikazzjonijiet kollha għall-perjodu ta’ programmazzjoni 2007-2013 li fihom informazzjoni relatata mal-miżuri li jipproteġu l-baġit tal-UE.

113

Il-Kummissjoni rrappurtat informazzjoni rigward il-miżuri tagħha għall-protezzjoni tal-baġit tal-UE f’bosta pubblikazzjonijiet. Dawk prinċipali kienu r-rapporti annwali tal-attività tad-direttorati ġenerali operazzjonali, il-kontijiet annwali konsolidati tal-UE, u l-“Komunikazzjoni dwar il-protezzjoni tal-baġit tal-UE” ta’ kull sena. Dawn kienu kkomplementati mir-rapporti ta’ kull tliet xhur dwar il-korrezzjonijiet finanzjarji u mir-“Rapport Annwali dwar il-Ġestjoni u l-Prestazzjoni” (sal-2014 ir-“Rapport annwali ta’ sinteżi dwar il-kisbiet tal-Kummissjoni fir-rigward tal-ġestjoni”) (ara t-Tabella 5).

Tabella 5

Pubblikazzjonijiet tal-Kummissjoni relatati mal-miżuri preventivi u l-korrezzjonijiet finanzarji

Titolu	Lil min	Ippreżentat sa	Kopertura	Kontenut	Ippubblikat mill-
Rapporti annwali tal-attività	Il-Parlament Ewropew u l-Kunsill	31 ta’ Marzu1	qasam ta’ politika speċifiku	Ir-rapport annwali tal-attività jagħti dettalji dwar il-kisbiet u l-inizjattivi li ttieħdu matul is-sena u li kienu previsti fil-pjan ta’ ġestjoni, kif ukoll ir-riżorsi li ntużaw. Huwa jinkludi wkoll informazzjoni dettaljata fil-livell tal-Istati Membri rigward l-attivitajiet ta’ kontroll tal-Kummissjoni u rigward il-miżuri preventivi u l-korrezzjonijiet finanzjarji relatati.	2007
Kontijiet annwali	Il-Parlament Ewropew, il-Kunsill u l-Qorti Ewropea tal-Awdituri	31 ta’ Lulju	il-baġit kollu	Il-kontijiet annwali tal-UE jikkonsistu fid-dikjarazzjonijiet finanzjarji (u n-noti tagħha) u r-rapporti konsolidati dwar l-implimentazzjoni tal-baġit. Huma jinkludu informazzjoni aggregata għal kull-fond dwar il-korrezzjonijiet finanzjarji. Rigward il-miżuri preventivi li ttieħdu sal-2012 (inkl.) l-informazzjoni ġiet ipprovduta għal kull Stat Membru, madankollu mill-2013 ‘il quddiem huma biss iċ-ċifri aggregati għal kull-fond li jiġu ppubblikati. Mill-2015 ‘il hawn, l-informazzjoni dwar il-miżuri preventivi ma għadhiex tiġi rrappurtata fil-kontijiet annwali, iżda biss fil-Komunikazzjoni.	2007
Komunikazzjoni	Il-Parlament Ewropew, il-Kunsill u l-Qorti Ewropea tal-Awdituri	31 ta’ Ottubru2	il-baġit kollu	Il-Komunikazzjoni tiddeskrivi l-funzjonament tal-mekkaniżmi preventivi u korrettivi li ntużaw għall-protezzjoni tal-baġit tal-UE minn infiq illegali jew irregolari, u biex jipprovdu l-aħjar stima taċ-ċifri li jirriżultaw mill-użu tagħhom. Hija tinkludi informazzjoni aggregata dwar il-miżuri preventivi, u tinkludi informazzjoni aggregata kif ukoll informazzjoni fil-livell tal-Istati Membri dwar il-korrezzjonijiet finanzjarji.	2012
Rapport ta’ kull tliet xhur	Il-Parlament Ewropew	Tmiem ta’ kull tliet xhur	qasam ta’ politika speċifiku	Ir-rapporti ta’ kull tliet xhur jipprovdu informazzjoni regolari dwar il-korrezzjonijiet finanzjarji għal kull fond taħt il-politika ta’ koeżjoni.	2008
Rapport ta’ sinteżi3	Il-Parlament Ewropew u l-Kunsill	15 ta’ Ġunju	il-baġit kollu	Ir-rapporti ta’ sinteżi jagħtu dettalji dwar il-kisbiet fir-rigward tal-ġestjoni tas-sena preċedenti bbażati fuq ir-rapporti annwali tal-attività ppreżentati mid-Diretturi Ġenerali differenti.	2007

1 Mis-sena finanzjarja 2015 ‘l hawn, ir-rapporti annwali tal-attività jiġu ppreżentati sat-30 ta’ April.

2 Mis-sena finanzjarja 2015 ‘il hawn, id-dokument tal-Komunikazzjoni huwa ppreżentat bħala parti mill-hekk imsejjaħ “pakkett ta’ rappurtar finanzjarju integrat” flimkien mal-kontijiet annwali konsolidati sal-31 ta’ Lulju.

3 Mis-sena finanzjarja 2015 ‘il hawn, ir-Rapport ta’ Sinteżi huwa parti mir-Rapport Annwali dwar il-Ġestjoni u l-Prestazzjoni.

Sors: Il-Qorti Ewropea tal-Awdituri.

114

Ir-rapporti kollha, ħlief għar-rapporti annwali tal-attività, ġew ikkompilati mid-Direttorat Ġenerali għall-Baġit tal-Kummissjoni, ibbażat fuq l-informazzjoni pprovduta mid-Direttorat Ġenerali għall-Politika Reġjonali u Urbana u d-Direttorat Ġenerali tal-Impjiegi, l-Affarijiet Soċjali u l-Inklużjoni skont l-istruzzjonijiet jew il-linji gwida (għar-rapporti annwali tal-attività tad-Direttorati Ġenerali) maħruġa mid-Direttorat Ġenerali għall-Baġit.

Sa issa, ebda wieħed mir-rapporti tal-Kummissjoni ma pprovda stampa ġenerali analitika tal-miżuri preventivi u tal-korrezzjonijiet finanzjarji għall-perjodu ta’ programmazzjoni 2007-2013

115

L-infiq fil-qasam tal-Koeżjoni huwa bbażat fuq programmazzjoni pluriennali. Għalhekk, aħna nqisu li jenħtieġ li l-Kummissjoni tipprovdi rapport konsolidat lill-Parlament Ewropew u lill-Kunsill li jkun fih informazzjoni ewlenija dwar il-miżuri preventivi u l-korrezzjonijiet finanzjarji relatati mal-perjodu ta’ programmazzjoni sal-lum⁴⁰.

116

Madankollu, l-analiżi tar-rapporti rilevanti elenkati fit-Tabella 5 wriet li, kollettivament, dawn jippreżentaw miżuri preventivi u korrezzjonijiet finanzjarji relatati ma’ għadd ta’ snin. Madankollu, ebda rapport speċifiku li jipprovdi stampa ġenerali analitika ma kien previst għall-perjodu ta’ programmazzjoni fl-intier tiegħu.

117

Fir-rigward tal-perjodu 2000-2006, aħna nosservaw li l-Kummissjoni ħarġet rapport ad hoc dwar il-korrezzjonijiet finanzjarji u l-istatus tal-għeluq tal-programmi tal-FEŻR u tal-FSE u tal-proġetti tal-FK fl-2013. Sa issa, ma hemm ebda rapport bħal dan ippjanat għall-perjodu ta’ programmazzjoni 2007-2013.

Ir-rapporti tal-Kummissjoni ma pprovdewx biżżejjed tqabbil bejn l-Istati Membri u eżempji ta’ “prattika tajba” dwar il-prevenzjoni, id-detezzjoni jew il-korrezzjoni ta’ problemi rikorrenti.

118

Jenħtieġ li r-rapporti tal-Kummissjoni jipprovdu informazzjoni rilevanti li ttejjeb il-fehim tas-sitwazzjoni rigward il-miżuri preventivi u l-korrezzjonijiet finanzjarji, biex b’hekk tkun tista’ tittieħed azzjoni xierqa għat-titjib tas-sistemi ta’ ġestjoni u kontroll. Għalhekk, aħna staqsejna lill-membri tal-Kumitat għall-Kontroll tal-Baġit tal-Parlament Ewropew u tal-Kumitat għall-Iżvilupp Reġjonali u lir-rappreżentanti tal-Istati Membri tal-Grupp ta’ Ħidma dwar l-Azzjonijiet Strutturali tal-Kunsill tal-Unjoni Ewropea dwar il-perċezzjoni li kellhom tal-utilità tar-rapporti disponibbli.

119

Il-parti l-kbira ta’ dawk li intervistajna sabu li l-informazzjoni pprovduta mill-Kummissjoni hija ta’ volum suffiċjenti, jekk mhux iżżejjed. Xi wħud minn dawk li intervistajna, mill-Istati Membri, sabu li r-rapporti annwali tal-attività huma l-aktar sors utli ta’ informazzjoni billi huma fihom informazzjoni li tista’ tintuża bħala punt ta’ riferiment għall-programmi proprji tagħhom bi tqabbil ma’ dawk ta’ Stati Membri oħrajn. Fl-aħħar nett, ftit ħafna minn dawk li intervistajna kienu konxji tar-rapporti ta’ kull tliet xhur.

120

Filwaqt li l-parti l-kbira ta’ dawk li intervistajna qiesu li l-Kummissjoni tikkomunika b’mod ċar is-sistema u l-istruttura tal-miżuri għall-protezzjoni tal-baġit tal-UE, nofshom ikunu jixtiequ li jkollhom aktar informazzjoni dwar l-applikazzjoni effettiva tal-miżuri u l-implikazzjonijiet prattiċi tagħhom. Matul l-intervisti tagħna tqajmu l-kwistjonijiet li ġejjin: spjegazzjonijiet ta’ problemi rikorrenti relatati mad-dikjarazzjoni ta’ nfiq irregolari, il-kawżi ta’ żbalji tipiċi jew ripetittivi u l-“aħjar prattiki” dwar il-prevenzjoni, id-detezzjoni jew il-korrezzjoni tagħhom. Informazzjoni bħal din tkun tgħin lill-Istati Membri jtejbu s-sistemi proprji tagħhom ta’ ġestjoni u kontroll.

Is-sistemi ta’ informazzjoni tal-Kummissjoni ma jipprovdux stampa ġenerali konsolidata tal-miżuri preventivi u tal-korrezzjonijiet finanzjarji

121

Id-Direttorati Ġenerali tal-Kummissjoni jirreġistraw l-informazzjoni meħtieġa għall-monitoraġġ u r-rappurtar dwar il-miżuri preventivi u l-korrezzjonijiet finanzjarji fis-sistema kontabilistika tagħha u fi spreadsheets elettroniċi differenti. Aħna sibna li dawn tal-aħħar kienu jbatu minn diversi nuqqasijiet li għamluha diffiċli biex tinkiseb stampa ġenerali faċli u biex jitwettqu analiżijiet fil-fond:

1. is-sistemi differenti mhumiex integrati u d-data trid tiddaħħal manwalment;
2. ma hemm ebda stampa ġenerali għall-każijiet individwali tal-miżuri kollha li ttieħdu mill-Kummissjoni għall-protezzjoni tal-baġit tal-UE. Minflok, l-informazzjoni għall-miżuri preventivi u dik għall-korrezzjonijiet finanzjarji jinżammu separatament. Billi ma hemm ebda rabta bejn it-tnejn, huwa diffiċli li wieħed jara kif dawn il-każijiet jevolvu mill-event skattatur sat-tneħħija tal-miżuri preventivi jew sal-implimentazzjoni tal-korrezzjonijiet finanzjarji; u
3. id-databases mhux dejjem ikun fihom l-informazzjoni meħtieġa biex issir analiżi komparattiva bejn il-każijiet. Dan ikun jiffaċilita xogħol il-Kumitat ISFCC biex jiġi żgurat li każijiet simili jiġu ttrattati bl-istess mod.

Id-dispożizzjonijiet regolatorji għall-perjodu 2014-2020 saħħew sinifikattivament il-pożizzjoni tal-Kummissjoni fil-protezzjoni tal-baġit tal-UE minn infiq irregolari

122

Meta tistabbilixxi u tfassal is-sistema ta’ miżuri preventivi u ta’ korrezzjonijiet finanzjarji għal perjodu ta’ programmazzjoni ġdid, jenħtieġ li l-Kummissjoni tibni fuq it-tagħlimiet meħuda u timmitiga d-dgħufijiet identifikati matul l-implimentazzjoni tal-programmi f’perjodi preċedenti. Għalhekk, aħna rrevedejna l-leġiżlazzjoni rilevanti tal-UE u qabbilnieha man-nuqqasijiet misjuba, biex nivvalutaw sa liema punt dan sar għall-perjodu ta’ programmazzjoni 2014-2020.

Ir-rappurtar dwar il-korrezzjonijiet finanzjarji ġie integrat fil-pakkett tal-aċċertament annwali u eżaminat mill-awtorità tal-awditjar

123

Għall-perjodu ta’ programmazzjoni 2007-2013, il-Kummissjoni nnifisha identifikat nuqqasijiet relatati mal-korrettezza u l-kompletezza tal-informazzjoni li ġiet ipprovduta fir-rapporti skont l-Artikolu 20, u l-awditi proprji tagħna wkoll identifikaw riskji relatati mal-korrezzjonijiet finanzjarji, rrappurtati mill-Istati Membri, li ntużaw mill-Kummissjoni biex tikkalkula s-CRR (ara l-paragrafi 103 sa 106).

124

Ir-regolamenti għall-perjodu 2014-2020 introduċew eżami u aċċettazzjoni annwali tal-kontijiet mill-Kummissjoni. Kull sena l-Istati Membri jridu jippreżentaw pakkett tal-aċċertament bħala parti mill-proċedura ta’ approvazzjoni annwali għal kull PO (jew għal grupp ta’ PO). Dan il-pakkett jikkonsisti fil-kontijiet annwali, li jinkludu informazzjoni dwar l-ammonti rtirati u rkuprati⁴¹; id-dikjarazzjoni tal-ġestjoni u s-sommarju annwali tal-kontrolli mwettqa. L-awtoritajiet tal-awditjar joħorġu opinjoni tal-awditjar u jipprovdu rapport annwali ta’ kontroll. L-ewwel pakketti tal-aċċertament inħarġu fl-ewwel nofs tal-2016.

125

Għall-kuntrarju tal-perjodi preċedenti, issa jeħtieġ li l-informazzjoni dwar l-ammonti rtirati u rkuprati tiġi rrappurtata fil-kontijiet annwali u inkluża fil-kalkolu li jsir mill-Istat Membru tas-CRR għall-PO (jew għal grupp ta’ PO). Issa, il-kompletezza u l-affidabbiltà ta’ din l-informazzjoni hija soġġetta wkoll għal verifikazzjonijiet mill-awtoritajiet tal-awditjar tal-Istati Membri⁴².

126

Fuq il-bażi ta’ dawn id-dokumenti, il-Kummissjoni hija meħtieġa tagħmel eżami annwali tal-programm operazzjonali, li matulu hija tiddetermina l-ammont tal-infiq eliġibbli għas-sena partikolari. L-Istati Membri se jkunu meħtieġa jikkoreġu l-irregolaritajiet kollha qabel il-proċedura ta’ approvazzjoni annwali (jiġifieri jirtiraw jew jirkupraw l-infiq irregolari bil-possibbiltà li jissostitwuh bi nfiq ġdid). Jekk dan ma jsirx, il-Kummissjoni tista’ tniedi proċedura ta’ korrezzjoni finanzjarja.

Id-dispożizzjonijiet legali li ġew introdotti għall-perjodu 2014-2020 jagħtu aktar setgħa lill-Kummissjoni biex tipproteġi l-baġit tal-UE

Żamma ta’ 10 % mill-pagamenti interim kollha matul il-perjodu 2014-2020

127

Il-qafas leġiżlattiv 2014-2020 stabbilixxa l-istrument ta’ żamma ta’ 10 % mill-pagamenti interim⁴³. Dan ifisser li, matul is-sena kontabilistika, il-Kummissjoni tħallas biss 90 % tal-infiq interim iddikjarat. L-10 % li jifdal jiġi approvat wara l-preżentazzjoni u l-aċċettazzjoni tal-pakkett tal-aċċertament. Din iż-żamma ta’ 10 % mill-Kummissjoni tista’ titqabbel ma’ miżura kundizzjonali ġenerali ta’ prekawzjoni, li tista’ titħallas lill-Istat Membru jekk kollox jinstab li huwa f’postu fl-approvazzjoni annwali.

128

Minħabba l-livelli ta’ żball osservati matul il-perjodu 2007-2013, aħna nqisu li din għandha l-potenzjal li tiżgura protezzjoni aħjar tal-baġit tal-UE peress li toħloq riżerva adegwata għall-Kummissjoni biex tieħu azzjoni korrettiva anke f’sitwazzjoni fejn l-Istat Membru jonqos milli jimplimenta kwalunkwe korrezzjoni finanzjarja.

Huwa possibbli li jsiru korrezzjonijiet finanzjarji netti kull sena jekk jinqabdu dgħufijiet serji li ma jkunux ġew identifikati mill-Istat Membru

129

Għall-perjodu ta’ programmazzjoni 2007-2013, il-kriterji għall-applikazzjoni ta’ korrezzjoni finanzjarja netta kienu jiddependu minn jekk l-Istat Membru aċċettax l-osservazzjoni (jiġifieri l-iżball) u kkonfermax l-impatt relatat (jiġifieri applika l-ammont ta’ korrezzjoni finanzjarja) jew le⁴⁴. Jekk dan ma kienx il-każ, il-Kummissjoni kien ikollha tadotta deċiżjoni ta’ korrezzjoni finanzjarja. Id-deċiżjoni tal-Kummissjoni biss kellha effett nett dirett (ara l-paragrafu 19).

130

Dan l-arranġament ġie sostitwit b’sistema ta’ awtokorrezzjoni, fejn l-Istat Membru jrid japplika l-korrezzjoni finanzjarja minn qabel. Matul il-perjodu ta’ programmazzjoni 2014-2020, jekk fis-sistemi jinstabu defiċjenzi serji li ma jkunux inqabdu mill-Istat Membru fil-kuntest tal-verifikazzjonijiet jew l-awditi tiegħu qabel ma tkun saret l-aċċettazzjoni annwali tal-kontijiet (jew mill-Kummissjoni jew inkella permezz tal-awditi tagħna), il-Kummissjoni tapplika korrezzjoni finanzjarja netta li twassal għat-telf tal-finanzjament għall-Istat Membru⁴⁵.

131

Din is-sistema għandha l-għan li tagħti aktar inċentiv lill-Istati Membri, u b’mod partikolari lill-awtoritajiet tal-awditjar tagħhom, biex jiżguraw li l-fondi tal-UE jintnefqu b’mod legali u regolari u li l-korrezzjonijiet finanzjarji meħtieġa kollha jkunu ġew applikati fil-livell nazzjonali biex il-baġit tal-UE jkun protett minn infiq irregolari. Din hija prinċipalment ir-responsabbiltà tal-awtoritajiet maniġerjali. Madankollu, l-awtoritajiet tal-awditjar jaġixxu bħala l-aħħar linja ta’ difiża biex jevitaw li parti mill-pakketti nazzjonali tintilef diġà waqt l-implimentazzjoni tal-programmi. Barra minn hekk, il-korrezzjonijiet finanzjarji ser jiġu applikati fuq bażi annwali u jkunu marbutin b’mod ċar mar-rilaxx tal-pagament interim sussegwenti. Tqabbil bejn l-arranġamenti għall-perjodi 2007-2013 u 2014-2020 huwa pprovdut fl-Anness V.

132

Aħna osservajna wkoll li l-proċeduri li rriżultaw f’korrezzjonijiet finanzjarji matul il-perjodu 2007-2013 ħadu żmien twil biex jiġu riżolti (ara l-paragrafu 87). Problemi simili ġew identifikati għall-perjodu ta’ programmazzjoni 2000-2006 f’wieħed mir-rapporti speċjali preċedenti tal-Qorti⁴⁶.

133

Aħna nqisu li d-durata ta’ dawn il-proċeduri ser titqassar sinifikattivament permezz tar-rekwiżit li jingħalqu l-kontijiet u li l-pakkett tal-aċċertament jiġi ppreżentat sa skadenza stabbilita (il-15 ta’ Frar tas-sena ta’ wara). Dan ser jagħti inċentiv lill-Istati Membri biex jirrimedjaw il-problemi aktar malajr sabiex ikunu jistgħu jinkludu l-infiq relatat fil-kontijiet, u x’aktarx li jikkontribwixxi għal tħaffif sinifikanti tal-proċess meta mqabbel mal-perjodu 2007-2013.

Is-sospensjonijiet ta’ pagamenti u l-korrezzjonijiet finanzjarji fl-għeluq tal-programmi huma possibbli wkoll jekk ma jintlaħqux il-miri tal-prestazzjoni

134

Matul il-perjodu ta’ programmazzjoni 2014-2020, ser ikun possibbli wkoll li jinbdew proċeduri ta’ sospensjoni u li jiġu imposti korrezzjonijiet finanzjarji jekk l-indikaturi tal-prestazzjoni stabbiliti ma jintlaħqux. Madankollu, din il-prestazzjoni insuffiċjenti trid tkun dovuta għal dgħufijiet fl-implimentazzjoni identifikati b’mod ċar, u l-Kummissjoni hija meħtieġa li tikkomunika dawn id-dgħufijiet lill-Istat Membru⁴⁷. Jekk l-Istat Membru naqas milli jieħu azzjoni korrettiva biex jindirizza dawk id-dgħufijiet, il-Kummissjoni tista’ tissospendi l-pagamenti lill-Istat Membru. Fi tmiem il-perjodu ta’ programmazzjoni, jekk l-Istat Membru xorta jkun naqas milli jieħu azzjoni korrettiva biex jindirizza d-dgħufijiet, il-Kummissjoni tista’ tapplika korrezzjonijiet finanzjarji.

135

Aħna nqisu li dan huwa l-ewwel pass lejn l-indirizzar tal-kritika li ilna nagħmlu li ma hemmx dispożizzjonijiet legali adegwati li jimponu korrezzjonijiet finanzjarji għall-prestazzjoni insuffiċjenti matul il-perjodu ta’ programmazzjoni 2007-2013 (ara l-paragrafu 25). Madankollu xorta għad ma hemm ebda inċentiv finanzjarju reali jew sanzjoni finanzjarja reali fil-qafas 2014-2020 relatata mar-riżultati miksuba bil-finanzjament mill-UE⁴⁸.

Ġew introdotti miżuri marbuta ma’ kwistjonijiet ta’ governanza ekonomika tajba, iżda huwa diffiċli li dawn jiġu applikati fil-prattika

136

Barra minn hekk, fil-perjodu ta’ programmazzjoni 2014-2020, il-Kummissjoni tista’ tapplika wkoll sospensjonijiet għal problemi relatati ma’ kwistjonijiet aktar ġenerali ta’ governanza ekonomika tajba⁴⁹. B’mod partikolari, il-Kummissjoni tista’ tipproponi li l-Kunsill jissospendi l-pagamenti jew l-impenji jekk l-Istat Membru ma jkunx ħa l-azzjoni xierqa biex jemenda l-Ftehim ta’ Sħubija tiegħu⁵⁰ jew jekk l-Istat Membru ma jkunx ħa azzjoni effettiva biex jikkoreġi d-defiċit eċċessiv tiegħu.

137

Madankollu, f’sitwazzjonijiet marbutin mal-governanza ekonomika, id-deċiżjoni ta’ sospensjoni ta’ pagamenti mhijiex kollha kemm hi f’idejn il-Kummissjoni. Il-Kummissjoni trid iżżomm lill-Parlament Ewropew (PE) informat kull meta sitwazzjoni bħal din titfaċċa, u trid tidħol fi djalogu strutturat mal-PE jekk tintalab tagħmel dan. Wara dan, il-Kummissjoni trid tagħmel proposta lill-Kunsill biex tissospendi l-pagament, u l-Kunsill imbagħad jieħu d-deċiżjoni tiegħu f’att ta’ implimentazzjoni. Fil-każ ta’ sospensjonijiet marbuta ma’ governanza ekonomika, il-livelli massimi ta’ sospensjoni bħala perċentwal tal-pagamenti jew tal-impenji huma wkoll stabbiliti fir-regolament.

138

Il-Kummissjoni kkunsidrat li tipproponi għall-ewwel darba sospensjonijiet ta’ pagamenti marbuta ma’ kwistjonijiet ta’ governanza ekonomika (u b’mod partikolari d-defiċit eċċessiv) fil-każ ta’ Spanja u l-Portugall fl-2016⁵¹. F’Novembru 2016, il-Kummissjoni ddeċidiet li ma tipproponix sospensjoni fil-każijiet ta’ hawn fuq, fid-dawl tas-sitwazzjoni ekonomika u fiskali diffikultuża. Minflok, il-Kummissjoni rrakkomandat li l-Portugall iġib fi tmiemu d-defiċit eċċessiv tiegħu sal-2016 u li Spanja tagħmel dan sal-2018. Fuq din il-bażi jista’ jkun diffiċli li din id-dispożizzjoni tiġi applikata fil-prattika matul il-perjodu ta’ programmazzjoni 2014-2020.

Ċertezza legali akbar minħabba l-issettjar ta’ regoli bħala regolamenti aktar milli bħala gwida

139

Matul il-perjodu 2014-2020, ir-regoli applikabbli għall-korrezzjonijiet finanzjarji għandhom forma ġuridika differenti (u, b’riżultat ta’ dan, valur ġuridiku korrispondenti aktar strett). Pereżempju,

1. il-metodu għad-determinazzjoni tal-korrezzjonijiet finanzjarji u r-rati indikattivi tal-korrezzjonijiet li għandhom jiġu applikati għall-iżbalji relatati mal-akkwist pubbliku ilhom mill-perjodu ta’ programmazzjoni 2000-2006 stipulati f’linji gwida tal-Kummissjoni⁵². Dawn il-linji gwida jiddeskrivu l-metodu użat mill-Kummissjoni fil-każijiet rilevanti u l-użu tagħhom kien irrakkomandat lill-Istati Membri. L-aġġornament tal-2013 ta’ dawn ir-regoli li jridu jintużaw mill-Kummissjoni nħareġ bħala Deċiżjoni tal-Kummissjoni⁵³;
2. Il-metodoloġija tal-Kummissjoni għall-applikazzjoni ta’ korrezzjonijiet b’rati fissi għall-perjodu ta’ programmazzjoni 2007-2013 ġiet stabbilita f’Deċiżjoni tal-Kummissjoni tal-2011⁵⁴. Regoli simili għall-perjodu ta’ programmazzjoni 2014-2020 kienu inklużi f’Regolament ta’ Delega tal-Kummissjoni⁵⁵.

140

Dan iqiegħed lill-Kummissjoni f’pożizzjoni aktar b’saħħitha biex tinforza dawk id-dispożizzjonijiet u biex tiżgura approċċ aktar konsistenti bejn l-Istati Membri matul il-perjodu 2014-2020. L-istipular tar-regoli applikabli bħala Regolament jew bħala Deċiżjoni tal-Kummissjoni aktar milli bħala gwida jħalli wkoll inqas diskrezzjoni lill-Kummissjoni meta din tiddeċiedi dwar il-livell ta’ korrezzjoni, u b’hekk iżid iċ-ċertezza legali għall-Istati Membri.

Konklużjonijiet u rakkomandazzjonijiet

141

B’mod ġenerali, sa tmiem l-2015 (jiġifieri qabel għeluq il-perjodu ta’ programmazzjoni 2007-2013) il-Kummissjoni għamlet użu effettiv mill-miżuri li kien hemm għad-dispożizzjoni tagħha għall-perjodu ta’ programmazzjoni 2007-2013 biex tipproteġi l-baġit tal-UE minn infiq irregolari.

142

L-awditu tagħna wera li l-korrezzjonijiet finanzjarji għall-perjodu 2000-2006 kienu jammontaw għal EUR 8 616-il miljun jew 3.8 % tal-baġit totali tal-FEŻR, tal-FK u tal-FSE. Fl-għeluq kien hemm korrezzjonijiet finanzjarji netti għal għadd ta’ programmi tal-FEŻR u tal-FSE u proġetti tal-FK fi 17-il Stat Membru għall-FEŻR, 16-il Stat Membru għall-FSE u 11-il Stat Membru għall-FK. L-ammont globali ta’ dawn il-korrezzjonijiet netti kien ta’ EUR 2 423 miljun (jew 1.1 % tal-baġit totali). Sibna wkoll li l-valutazzjoni tad-dgħufijiet u tal-korrezzjonijiet finanzjarji li twettqet mill-Kummissjoni ġiet ikkonfermata fis-sustanza mill-Qorti Ewropea tal-Ġustizzja. Għalkemm nistennew li s-sitwazzjoni tkun simili għall-perjodu 2007-2013, l-impatt finali tal-korrezzjonijiet finanzjarji jista’ jiġi ddeterminat biss fl-għeluq tal-programmi. Ibbażat fuq l-eżami li wettaqna tal-pagamenti tal-għeluq tal-2000-2006, inqisu wkoll li l-Kummissjoni trid tibqa’ viġilanti meta tiċċekkja d-dikjarazzjoni tal-għeluq ippreżentata mill-Istati Membri.

143

Għall-perjodu 2007-2013 il-Kummissjoni użat is-sospensjoni ta’ pagamenti b’mod aktar estensiv milli kienet għamlet fil-passat u l-interruzzjonijiet tal-pagamenti, li ġew introdotti reċentement, kienu għodda addizzjonali ta’ għajnuna. Minbarra dan, il-miżuri preventivi ġew applikati aktar kmieni milli fil-perjodu preċedenti. F’termini relattivi, aħna nistennew li għall-perjodu 2007-2013 jiġu implimentati aktar korrezzjonijiet finanzjarji milli fil-perjodu preċedenti.

144

Sibna wkoll li l-Kummissjoni imponiet il-miżuri preventivi u l-korrezzjonijiet finanzjarji tagħha b’mod proporzjonat. Il-proċeduri interni tal-Kummissjoni għall-perjodu 2007-2013 kellhom l-għan li jiżguraw trattament armonizzat tal-każijiet bejn il-programmi u l-Istati Membri. L-analiżi tagħna kkonfermat ukoll li l-miżuri applikati mill-Kummissjoni għall-perjodu 2007-2013 iffokaw fuq dawk l-Istati Membri li kellhom il-programmi l-aktar riskjużi.

145

Il-miżuri korrettivi tal-Kummissjoni jagħmlu pressjoni fuq l-Istati Membri biex jindirizzaw id-dgħufijiet fis-sistemi tagħhom ta’ ġestjoni u kontroll. Madankollu, kemm il-miżuri preventivi kif ukoll il-korrezzjonijiet finanzjarji ġeneralment jittrattaw problemi kumplessi li jieħdu żmien konsiderevoli biex jiġu riżolti. L-interruzzjonijiet u s-sospensjonijiet riżultanti ta’ pagamenti jirrappreżentaw riskju finanzjarju sinifikanti għall-Istati Membri. Għalhekk, għall-perjodu 2007-2013, il-Kummissjoni mmirat li gradwalment tneħħi l-miżuri biex tiżgura li r-rimborż tal-infiq ikun jista’ jerġa’ jibda jsir mill-aktar fis possibbli għall-parti tal-programm li ma kinitx affettwata min-nuqqasijiet li inizjalment wasslu għall-interruzzjoni jew is-sospensjoni.

146

Madankollu, sibna wkoll li l-Kummissjoni tiffaċċja diffikultajiet fil-monitoraġġ tal-implimentazzjoni tal-korrezzjonijiet finanzjarji. L-informazzjoni pprovduta mill-Istati Membri dwar l-implimentazzjoni tagħhom ta’ korrezzjonijiet finanzjarji fil-perjodu 2007-2013 għadha ma tagħtix lok għal monitoraġġ robust. Sibna wkoll evidenza mħallta tal-impatt fit-tul li l-miżuri preventivi u l-korrezzjonijiet finanzjarji kellhom fuq il-livelli ta’ żball fil-programmi fil-perjodu 2007-2013.

Rakkomandazzjoni 1

Jenħtieġ li l-Kummissjoni tapplika approċċ strett għall-korrezzjonijiet finanzjarji fl-għeluq tal-perjodu 2007-2013 biex tiżgura li l-ammonti totali rimborżati mill-baġit tal-UE jkunu ħielsa minn livelli materjali ta’ nfiq irregolari.

Data mmirata għall-implimentazzjoni: minn Marzu 2017 (il-bidu tal-eżerċizzju tal-għeluq tal-programmi).

147

Ir-rappurtar li sar milll-Kummissjoni dwar il-miżuri preventivi u l-korrezzjonijiet finanzjarji jagħmilha diffiċli li tinkiseb stampa ġenerali komprensiva u analitika. Dan huwa dovut prinċipalment għall-fatt li l-informazzjoni dwar il-miżuri preventivi u l-korrezzjonijiet finanzjarji hija ppreżentata f’bosta rapporti u dokumenti, fosthom f’wieħed li l-partijiet interessati lanqas biss kienu jafu bih. Fl-istess waqt, ebda wieħed mir-rapporti tal-Kummissjoni ma jipprovdi stampa ġenerali analitika tal-miżuri preventivi u tal-korrezzjonijiet finanzjarji għall-perjodu ta’ programmazzjoni 2007-2013 fl-intier tiegħu. Rappreżentanti mill-Parlament Ewropew u mill-Kunsill ukoll qiesu li r-rapporti tal-Kummissjoni ma jipprovdux biżżejjed tqabbil bejn l-Istati Membri u eżempji ta’ “prattika tajba” dwar il-prevenzjoni, id-detezzjoni jew il-korrezzjoni ta’ problemi rikorrenti.

Rakkomandazzjoni 2

Jenħtieġ li l-Kummissjoni toħroġ rapport ad hoc dwar il-korrezzjonijiet finanzjarji u l-istatus tal-għeluq tal-programmi tal-FEŻR/FK u tal-FSE li jkun simili għar-rapport li tħejja fl-2013 għall-perjodu 2000-2006. Jenħtieġ li dan ir-rapport jippreżenta u jqabbel l-informazzjoni kollha dwar il-miżuri preventivi u korrettivi skont il-fond u l-Istat Membru, u li juri l-impatt tal-korrezzjonijiet finanzjarji u r-rata ta’ riskju residwu.

Data mmirata għall-implimentazzjoni: mhux aktar tard minn nofs l-2019.

148

Aħna osservajna nuqqasijiet fis-sistemi ta’ informazzjoni użati mill-Kummissjoni għall-monitoraġġ u r-rappurtar dwar il-miżuri preventivi u l-korrezzjonijiet finanzjarji għall-programmi tal-perjodu 2007-2013. B’mod partikolari, is-sistemi ta’ informazzjoni mhumiex integrati u ma jipprovdux stampa ġenerali għall-każijiet individwali tal-miżuri preventivi u l-korrezzjonijiet finanzjarji kollha.

Rakkomandazzjoni 3

Għall-perjodu 2014-2020, jenħtieġ li l-Kummissjoni twaqqaf sistema ta’ monitoraġġ integrata li tkun kopri kemm il-miżuri preventivi kif ukoll il-korrezzjonijiet finanzjarji.

Data mmirata għall-implimentazzjoni: l-2019.

149

Id-dispożizzjonijiet regolatorji għall-perjodu 2014-2020 isaħħu sinifikattivament il-pożizzjoni tal-Kummissjoni dwar il-protezzjoni tal-baġit tal-UE minn infiq irregolari. Dan huwa dovut prinċipalment għall-fatt li r-rappurtar li sar mill-Istat Membru dwar il-korrezzjonijiet finanzjarji issa huwa integrat fil-pakkett tal-aċċertament annwali u jiġi eżaminat mill-awtorità tal-awditjar. Barra minn hekk, id-dispożizzjonijiet legali li ġew introdotti għall-perjodu 2014-2020 jagħtu aktar setgħa lill-Kummissjoni biex tiżgura li l-infiq irregolari ma jibqax jiġi rimborżat mill-baġit tal-UE. Fl-aħħar nett, hemm ukoll ċertezza legali akbar għall-Istati Membri minħabba li r-regoli huma stabbiliti bħala regolamenti minflok bħala gwida.

150

B’mod ġenerali, aħna nqisu li dawn l-arranġamenti għall-perjodu 2014-2020 jirrappreżentaw titjib sinifikanti fit-tfassil tas-sistema.

Rakkomandazzjoni 4

Jenħtieġ li l-Kummissjoni tagħmel użu effettiv mid-dispożizzjonijiet, li ssaħħew sinifikattivament, għall-perjodu 2014-2020 u timponi korrezzjonijiet finanzjarji netti kull fejn ikun meħtieġ fuq il-bażi tal-kontrolli proprji tagħha u/jew tal-awditi li jitwettqu mill-Qorti Ewropea tal-Awdituri.

Data mmirata għall-implimentazzjoni: minnufih.

Dan ir-Rapport ġie adottat mill-Awla II, immexxija mis-Sra Iliana IVANOVA, Membru tal-Qorti tal-Awdituri, fil-Lussemburgu fil-laqgħa tagħha tat-8 ta’ Marzu 2017.

Glossarju u abbrevjazzjonijiet

Assi prijoritarju: Waħda mill-prijoritajiet tal-istrateġija fi Programm Operazzjonali li jinkludi grupp ta’ operazzjonijiet li jkunu relatati u li jkollhom għanijiet speċifiċi li jistgħu jitkejlu.

Awtorità maniġerjali: Awtorità maniġerjali hija awtorità pubblika nazzjonali, reġjonali jew lokali (jew kwalunkwe korp pubbliku jew privat ieħor), li tkun ġiet innominata minn Stat Membru biex timmaniġġja programm operazzjonali. Il-kompiti tagħha jinkludu l-għażla ta’ proġetti għall-finanzjament, il-monitoraġġ ta’ kif il-proġetti jiġu implimentati u r-rappurtar lill-Kummissjoni dwar l-aspetti finanzjarji u r-riżultati miksuba. L-awtorità maniġerjali hija wkoll il-korp li jimponi korrezzjonijiet finanzjarji fuq il-benefiċjarji wara awditi li jkunu twettqu mill-Kummissjoni, mill-Qorti Ewropea tal-Awdituri (QEA) jew minn kwalunkwe awtorità fl-Istat Membru.

Awtorità ta’ ċertifikazzjoni: L-awtoritajiet ta’ ċertifikazzjoni jwettqu kontrolli tal-ewwel livell fuq l-infiq iddikjarat mill-awtoritajiet maniġerjali u jiċċertifikaw li dan l-infiq huwa legali u regolari.

Awtorità tal-awditjar: L-awtoritajiet tal-awditjar jipprovdu aċċertament lill-Kummissjoni rigward il-funzjonament effettiv tas-sistemi ta’ ġestjoni u tal-kontrolli interni għal PO (u, b’konsegwenza ta’ dan, il-legalità u r-regolarità tal-infiq iċċertifikat). Dawn iridu jkunu jiffunzjonaw b’mod indipendenti mill-korpi li jimmaniġġjaw il-fondi. Awtorità tal-awditjar tirrapporta s-sejbiet tal-awditi tas-sistemi tagħha u tal-awditi tal-operazzjonijiet lill-awtoritajiet maniġerjali u ta’ ċertifikazzjoni għall-PO kkonċernat. Darba fis-sena, jirrappurtaw il-ħidma annwali tagħhom fir-rapport annwali ta’ kontroll lill-Kummissjoni. Jekk l-awtorità tal-awditjar tqis li l-awtorità maniġerjali ma ħaditx azzjoni korrettiva xierqa, trid tiġbed l-attenzjoni tal-Kummissjoni dwar il-kwistjoni.

Diżimpenn: Att li permezz tiegħu impenn preċedenti (jew parti minnu) jiġi kanċellat.

Event skattatur: Irregolaritajiet jew defiċjenzi serji identifikati mill-awtoritajiet tal-Istat Membru, mill-Kummissjoni jew mill-QEA waqt li jkunu qegħdin jagħmlu l-verifikazzjonijiet tagħhom u li jagħtu bidu għal miżuri preventivi u korrezzjonijiet finanzjarji.

Fond Ewropew għall-Iżvilupp Reġjonali (FEŻR): Il-Fond Ewropew għall-Iżvilupp Reġjonali għandu l-għan li jirrinforza l-koeżjoni ekonomika u soċjali fi ħdan l-Unjoni Ewropea billi jirrimedja l-iżbilanċi reġjonali prinċipali permezz ta’ appoġġ finanzjarju għall-ħolqien ta’ infrastrutturi u permezz ta’ investimenti produttivi li joħolqu l-impjiegi, prinċipalment għan-negozji.

Fond Soċjali Ewropew (FSE): Il-Fond Soċjali Ewropew għandu l-għan li jsaħħaħ il-koeżjoni ekonomika u soċjali fi ħdan l-Unjoni Ewropea billi jtejjeb l-impjieg u l-opportunitajiet ta’ impjiegi (prinċipalment permezz ta’ miżuri ta’ taħriġ), filwaqt li jħeġġeġ livell għoli ta’ impjieg u l-ħolqien ta’ aktar impjiegi u impjiegi aħjar.

Fond ta’ Koeżjoni (FK): Il-Fond ta’ Koeżjoni għandu l-għan li jsaħħaħ il-koeżjoni ekonomika u soċjali fi ħdan l-Unjoni Ewropea billi jiffinanzja proġetti tal-ambjent u tat-trasport fl-Istati Membri li għandhom PNG per capita ta’ inqas minn 90 % tal-medja tal-UE.

Impenn: Wegħda legali biex jiġu pprovduti finanzi, soġġett għal ċerti kundizzjonijiet. L-UE tidħol għall-impenn li tirrimborża s-sehem tagħha tal-ispejjeż ta’ proġett iffinanzjat mill-UE meta l-proġett ikun ikkompletat. L-impenji tal-lum huma l-pagamenti ta’ għada. Il-pagamenti tal-lum huma l-impenji tal-bieraħ.

Interruzzjoni: Il-Kummissjoni tista’ tinterrompi l-iskadenza tal-pagament ta’ dikjarazzjoni tal-infiq partikolari għal massimu ta’ sitt xhur (ara l-Artikolu 91 tar-Regolament 1083/2006) jekk l-evidenza tissuġġerixxi defiċjenza sinifikanti fil-funzjonament tas-sistemi ta’ ġestjoni u kontroll tal-Istati Membri jew jekk nefqa irregolari mhux ikkoreġuta tkun ċertifikata f’dikjarazzjoni tan-nefqa.

Jekk il-Kummissjoni ssib, ibbażat fuq il-ħidma proprja tagħha jew tal-informazzjoni rrappurtata mill-awtoritajiet tal-awditjar, li Stat Membru jkun naqas milli jirrimedja nuqqasijiet serji fis-sistemi ta’ ġestjoni u kontroll u/jew milli jikkoreġi nefqa irregolari li kienet ġiet iddikjarata u ċertifikata, tista’ tinterrompi jew tissospendi l-pagamenti. Jekk l-Istat Membru ma jirrimedjax nuqqasijiet li jkunu nqabdu fis-sistemi jew ma jirtirax in-nefqa irregolari (li tista’ tiġi sostitwita b’nefqa li tkun eliġibbli), il-Kummissjoni nnifisha tista’ tapplika korrezzjonijiet finanzjarji, li jwasslu għal tnaqqis nett fil-finanzjament mill-UE għall-PO.

Irregolarità: Irregolarità huwa att li ma jikkonformax mar-regoli tal-UE u li għandu impatt potenzjalment negattiv fuq l-interessi finanzjarji tal-UE, iżda li jista’ jkun ir-riżultat ta’ żbalji ġenwini magħmula jew mill-benefiċjarji li jitolbu fondi jew mill-awtoritajiet inkarigati mit-twettiq tal-pagamenti. Jekk irregolarità ssir b’mod volontarju, tkun tikkostitwixxi frodi.

Irtirar: L-Istat Membru jirtira n-nefqa irregolari mill-programm minnufih meta tinqabad l-irregolarità, billi jnaqqasha mid-dikjarazzjoni tal-infiq li jmiss u b’hekk jirrilaxxa fondi tal-UE għal operazzjonijiet oħrajn. Wieħed mill-modi kif tiġi implimentata korrezzjoni finanzjarja (ara wkoll irkupru).

Każ: Il-perkors sħiħ ta’ eventi li jorbot il-miżuri preventivi u l-korrezzjonijiet finanzjarji mal-istess event skattatur.

Korp intermedjarju: Korp intermedjarju huwa kwalunkwe korp jew servizz pubbliku jew privat li jaġixxi taħt ir-responsabilità ta’ awtorità maniġerjali, jew li jwettaq dmirijiet għan-nom ta’ awtorità bħal din, fir-rigward tal-benefiċjarji li jimplimentaw l-operazzjonijiet.

Korrezzjoni finanzjarja (KF): L-għan tal-korrezzjonijiet finanzjarji huwa li jipproteġu l-baġit tal-UE mill-piż ta’ nfiq żbaljat jew irregolari. Għall-infiq taħt ġestjoni kondiviża, il-kompitu tal-irkupru ta’ pagamenti li jkunu saru b’mod skorrett huwa primarjament ir-responsabbiltà tal-Istat Membru.

Il-korrezzjonijiet finanzjarji jistgħu jiġu implimentati mill-Istat Membru billi jnaqqas l-infiq irregolari mit-talba tal-Istat Membru għall-pagament, bil-pagament ta’ ordni ta’ rkupru maħruġa mill-Kummissjoni, jew b’diżimpenn. It-tnaqqis jista’ jieħu żewġ forom: irtirar jew irkupru mill-benefiċjarji.

Korrezzjoni finanzjarja: ex ante jew ex post: Korrezzjonijiet finanzjarji ex ante jsiru qabel jiġi ddikjarat l-infiq irregolari lill-Kummissjoni.

Korrezzjonijiet finanzjarji ex post isiru wara li jiġi ddikjarat l-infiq irregolari lill-Kummissjoni.

Korrezzjoni finanzjarja: ikkonfermata, deċiża jew implimentata: Korrezzjoni finanzjarja “ikkonfermata” tkun ġiet aċċettata mill-Istat Membru kkonċernat.

Korrezzjoni finanzjarja “deċiża” tkun ġiet adottata permezz ta’ deċiżjoni tal-Kummissjoni u dejjem tkun korrezzjoni netta, fejn l-Istat Membru jkun meħtieġ jirrimborża fondi irregolari lill-baġit tal-UE, u dan iwassal għal tnaqqis definittiv tal-pakkett allokat lill-Istat Membru kkonċernat.

Korrezzjoni finanzjarja “implimentata” ladarba kkonfermata jew deċiża tkun ikkoreġiet l-irregolarità osservata (jiġifieri rtirata jew irkuprata).

Kumitat għall-Interruzzjonijiet, is-Sospensjonijiet u l-Korrezzjonijiet Finanzjarji (Interruptions, Suspensions and Financial Corrections Committee - ISFCC): Kumitat intern speċifiku, li jipprovdi forum fi ħdan id-Direttorati Ġenerali tal-Kummissjoni biex jiġu diskussi kwistjonijiet u jittieħdu deċiżjonijiet relatati ma’ twissijiet, interruzzjonijiet, sospensjonijiet u korrezzjonijiet finanzjarji

Miżura preventiva: Il-miżuri preventivi, li jinsabu għad-dispożizzjoni tal-Kummissjoni biex tipproteġi l-baġit tal-UE meta tkun konxja ta’ defiċjenzi potenzjali, jinkludu sospensjonijiet u interruzzjonijiet ta’ pagamenti mill-baġit tal-UE lill-PO.

Miżuri għall-protezzjoni tal-baġit tal-UE: Il-miżuri għall-protezzjoni tal-baġit tal-UE jinkludu miżuri preventivi (interruzzjoni, sospensjonijiet) u korrezzjonijiet finanzjarji (li jkollhom impatt monetarju). Dawn il-miżuri huma kkumplementati minn pjanijiet ta’ azzjoni miftiehma bejn il-Kummissjoni u l-Istat Membru.

Pakkett allokat: Il-pakkett allokat huwa l-ammont totali assenjat lil Stat Membru jew lil Programm Operazzjonali f’perjodu ta’ programmazzjoni, li huwa l-massimu teoretiku li jista’ jitħallas.

Perjodu ta’ programmazzjoni: Il-qafas pluriennali li fih l-infiq tal-FEŻR, tal-FSE u tal-FK jiġi ppjanat u implimentat.

Pjan ta’ azzjoni: Il-pjanijiet ta’ azzjoni huma dokumenti mfassla mill-Istati Membri wara li ġew identifikati irregolaritajiet sistemiċi jew defiċjenzi serji fis-sistemi tal-Istati Membri. Huma jiddeskrivu l-azzjonijiet ta’ rimedju li bihom jiġu indirizzati dawn l-irregolaritajiet u/jew defiċjenzi fis-sistemi.

Programm operazzjonali (PO): PO jistipula l-prijoritajiet u l-objettivi speċifiċi ta’ Stat Membru u jiddeskrivi kif il-finanzjament (kofinanzjament mill-UE u kofinanzjament pubbliku nazzjonali u privat) ser jintuża matul perjodu partikolari (attwalment seba’ snin) għall-finanzjament ta’ proġetti. Il-proġetti f’PO jridu jikkontribwixxu għal ċertu għadd ta’ objettivi. Il-finanzjament tal-PO jista’ jiġi mill-FEŻR, mill-FK u/jew mill-FSE. Il-PO jitħejja mill-Istat Membru u jrid jiġi approvat mill-Kummissjoni qabel ikun jista’ jsir kwalunkwe pagament mill-baġit tal-UE. Il-PO jistgħu jiġu modifikati biss matul il-perjodu ta’ programmazzjoni jekk iż-żewġ partijiet jaqblu.

Rapport annwali tal-attività (RAA): Ir-rapporti annwali tal-attività jindikaw ir-riżultati tal-operazzjonijiet b’referenza, fost oħrajn, għall-objettivi stabbiliti, ir-riskji assoċjati u l-forma ta’ kontroll intern. Mill-eżerċizzju tal-baġit tal-2001 ‘il hawn fil-każ tal-Kummissjoni u mill-2003 ‘l hawn fil-każ tal-istituzzjonijiet kollha tal-Unjoni Ewropea (UE), l-”uffiċjal awtorizzanti b’delega” jrid jippreżenta RAA lill-istituzzjoni tiegħu dwar it-twettiq ta’ dmirijietu, flimkien ma’ informazzjoni dwar il-finanzi u l-ġestjoni.

Rapport skont l-Artikolu 20: Dikjarazzjoni annwali dwar l-ammonti rtirati, l-irkupri, l-irkupri pendenti u l-ammonti li ma jistgħux jiġu rkuprati taħt id-dispożizzjonijiet tal-Artikolu 20(2) tar-Regolament (KE) Nru 1828/2006 għall-programmi tal-2007-2013. Din tirrifletti l-kapaċità korrettiva globali tas-sistema ta’ ġestjoni u kontroll għal kull programm, aggregata fil-livell tal-assi ta’ prijorità, irrispettivament mis-sors tal-korrezzjoni.

Rata ta’ żball ipproġettata: L-istima li ssir minn awtorità tal-awditjar, tal-parti tal-infiq annwali għal kull PO (jew għal grupp ta’ PO) li ma tkunx legali u regolari. Din ir-rata għandha tiġi stabbilita fuq il-bażi ta’ approċċ ta’ kampjunar statistiku. Ir-rati ta’ żball ipproġettati jridu jirrappreżentaw l-infiq mġarrab għall-PO (jew għal grupp ta’ PO). Dan jista’ jkun il-każ ukoll għal rati ta’ żball stabbiliti fuq il-bażi ta’ metodi speċifiċi ta’ kampjunar mhux statistiku (b’mod partikolari għall-popolazzjonijiet żgħar), dment li jkunu jirrappreżentaw il-popolazzjoni fl-intier tagħha.

Rata ta’ riskju residwu kumulattiv (CRR): Stima tal-parti tal-infiq iddikjarata, għal kull programm matul il-perjodu ta’ programmazzjoni kollu kemm hu, li ma tkunx legali u regolari. Is-CRR tieħu kont tal-korrezzjonijiet finanzjarji kollha implimentati minn mindu jibda l-perjodu u l-infiq totali ddikjarat fl-għeluq tal-programm.

Rkupru: L-Istat Membru jħalli l-infiq fil-programm sakemm l-ammont imħallas indebitament jiġi rkuprat mingħand il-benefiċjarju u jnaqqsu mit-talba għall-pagament li jmiss ladarba l-irkupru jkun ġie effettwat. Wieħed mill-modi kif tiġi implimentata korrezzjoni finanzjarja (ara wkoll irtirar).

Sistema ta’ ġestjoni u kontroll: Is-sistema ta’ ġestjoni u kontroll hija struttura li timplimenta u twettaq l-attivitajiet ta’ kontroll ta’ programm operazzjonali. Fil-politika ta’ Koeżjoni din tikkonsisti fl-awtorità maniġerjali (u l-korpi intermedjarji), l-awtorità ta’ ċertifikazzjoni u l-awtorità tal-awditjar fil-livell tal-Istat Membru u l-Kummissjoni.

Sospensjoni: Il-Kummissjoni tista’ tissospendi l-pagament interim kollu jew parti minnu (ara l-Artikolu 92 tar-Regolament Nru 1083/2006) jekk teżisti defiċjenza sinifikanti fil-funzjonament tas-sistema ta’ ġestjoni u kontroll tal-Istat Membru jew nefqa irregolari mhux ikkoreġuta li tkun ġiet ċertifikata f’dikjarazzjoni tal-infiq jew ksur gravi mill-Istat Membru tal-obbligi tiegħu ta’ ġestjoni u kontroll.

Tim tal-awditjar

Ir-rapporti speċjali tal-QEA jippreżentaw ir-riżultati tal-awditi tal-prestazzjoni u tal-konformità tagħha f’dak li jirrigwarda oqsma baġitarji jew suġġetti ta’ ġestjoni speċifiċi. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta’ introjtu jew ta’ nfiq involut, l-iżviluppi li jkunu għad iridu jseħħu u l-interess politiku u pubbliku.

Dan l-awditu tal-prestazzjoni twettaq mill-Awla II tal-Awditjar — immexxija minn Iliana Ivanova, Membru tal-QEA — li tispeċjalizza fl-oqsma ta’ nfiq ta’ investiment għall-koeżjoni, it-tkabbir u l-inklużjoni. L-awditu tmexxa mill-Membru Relatur Henri Grethen, b’appoġġ minn Ildikó Preiss, Kap tal-Kompitu u Attaché tal-Kabinett; Niels-Erik Brokopp, Maniġer Prinċipali; Marcel Bode, Nicholas Edwards, Johan Adriaan Lok u Ágota Marczinkó, Awdituri.

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Tel. +352 4398-1
Mistoqsijiet: eca.europa.eu/mt/Pages/ContactForm.aspx
Sit web: eca.europa.eu
Twitter: @EUAuditors

Nipproteġu l-baġit tal-UE minn infiq irregolari: Il-Kummissjoni għamlet użu dejjem akbar mill-miżuri preventivi u l-korrezzjonijiet finanzjarji fil-qasam tal-Koeżjoni matul il-perjodu 2007-2013
(skont l-Artikolu 287(4), it-tieni subparagrafu, TFUE)

Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2017

PDF	978-92-872-7224-9	1977-5741	10.2865/5084	QJAB17005MTN
HTML	978-92-872-7725-1	1977-5741	10.2865/46177	QJAB17005MTQ

© L-Unjoni Ewropea, 2017

Ir-riproduzzjoni hija awtorizzata kemm-il darba jissemma s-sors oriġinali.

KIF GĦANDEK TAGĦMEL BIEX TIKSEB IL-PUBBLIKAZZJONIJIET TAL-UE

Pubblikazzjonijiet bla ħlas:

• kopja waħda:
  • permezz tal-EU Bookshop (http://bookshop.europa.eu);
• iżjed minn kopja waħda jew posters/mapep:
  • mir-rappreżentanzi tal-Unjoni Ewropea (http://ec.europa.eu/represent_mt.htm),
  • mid-delegazzjonijiet f'pajjiżi li mhumiex fl-UE (http://eeas.europa.eu/delegations/index_mt.htm),
  • billi tikkuntatja s-servizz Europe Direct (http://europa.eu/europedirect/index_mt.htm)
  • jew ċempel 00 800 6 7 8 9 10 11 (numru tat-telefown bla ħlas minn kullimkien fl-UE) (*).

(*) L-informazzjoni mogħtija hija b’xejn, kif ukoll it-telefonati ġeneralment huma b’xejn (għalkemm xi operaturi, kabini tat-telefown jew lukandi jistgħu jitolbu ħlas).

Pubblikazzjonijiet bi ħlas:

• permezz tal-EU Bookshop (http://bookshop.europa.eu).