Rapport Speċjali

Nru11 2017

Il-Fond fiduċjarju Bêkou tal-UE għar-Repubblika Ċentru-Afrikana: bidu promettenti minkejja xi nuqqasijiet

Dwar ir-rapport: Il-Fond fiduċjarju Bêkou tal-UE għar-Repubblika Ċentru-Afrikana, li huwa l-ewwel fond fiduċjarju mmaniġġjat mill-Kummissjoni Ewropea, tnieda fl-2014, biex jipprovdi għajnuna lil wieħed mill-pajjiżi l-anqas żviluppati fid-dinja. Aħna eżaminajna jekk l-istabbiliment tal-fond kienx iġġustifikat, kif ukoll kif kien ġie mmaniġġjat u jekk kienx laħaq l-objettivi tiegħu sa żmien l-awditu. Minkejja xi nuqqasijiet, aħna nikkonkludu li d-deċiżjoni li jitwaqqaf il-fond kienet adatta fiċ-ċirkustanzi. Il-ġestjoni tal-fond għadha ma laħqitx il-potenzjal sħiħ tagħha fi tliet aspetti: il-koordinazzjoni fost il-partijiet interessati, it-trasparenza, il-veloċità u l-kosteffettività tal-proċeduri, u l-mekkaniżmi ta’ monitoraġġ u ta’ evalwazzjoni. Iżda, b’mod ġenerali, il-fond kien kiseb riżultati pożittivi sa żmien l-awditu. Ir-rakkomandazzjonijiet tagħna għandhom jgħinu biex isir titjib fit-tfassil u l-ġestjoni ta’ dan il-fond u ta’ fondi fiduċjarji oħra tal-UE.

Din il-pubblikazzjoni hija disponibbli wkoll f’23 lingwa u fil-formati li ġejjin:

PDF

Werrej
Sommarju eżekuttiv
Introduzzjoni
Ambitu u approċċ tal-awditjar
Osservazzjonijiet
Konklużjonjiet u rakkomandazzjonijiet
Annessi
Risposti tal-Kummissjoni
Akronimi u abbrevjazzjonijiet
Noti finali
Tim tal-awditjar
Kuntatt

Sommarju eżekuttiv

Fond fiduċjarju huwa fond li ġie stabbilit għal skop speċifiku ta’ żvilupp b’kontribuzzjonijiet finanzjarji minn donatur wieħed jew aktar, li ta’ spiss jitwaqqaf b’rispons għal kriżijiet bħal diżastri naturali jew kunflitti. Mill-2013 ‘il hawn, il-Kummissjoni Ewropea kellha l-possibbiltà li twaqqaf “fondi fiduċjarji tal-Unjoni għal azzjonijiet esterni” biex jintużaw għal azzjonijiet ta’ emerġenza, ta’ wara l-emerġenza jew azzjonijiet tematiċi.

Il-Fond fiduċjarju Bêkou tal-UE għar-Repubblika Ċentru-Afrikana, li huwa l-ewwel fond fiduċjarju tal-UE mmaniġġjat mill-Kummissjoni Ewropea, tnieda f’Lulju 2014. Id-donaturi tiegħu huma l-Unjoni Ewropea, Franza, il-Ġermanja, in-Netherlands, l-Italja u l-Iżvizzera, li pprovdew total ta’ EUR 146 miljun biex jappoġġaw il-ħruġ tal-pajjiż mill-kriżi u r-rikostruzzjoni tiegħu.

III

Għal ħafna deċennji, ir-Repubblika Ċentru-Afrikana esperjenzat governanza fqira, livell għoli ta’ faqar u kunflitti. Hija waħda mill-ifqar pajjiżi u minn dawk l-anqas żviluppati fid-dinja, u fl-2016 ġiet ikklassifikata fl-aħħar post fl-Indiċi tal-Iżvilupp tal-Bniedem maħruġ mill-UNDP.

Dan l-awditu kien jikkonċerna l-ewwel esperjenza li l-Kummissjoni Ewropea kellha tal-fond fiduċjarju proprju tagħha. Aħna eżaminajna jekk l-istabbiliment tiegħu kienx iġġustifikat, jekk kienx qed jiġi mmaniġġjat tajjeb u jekk kienx laħaq l-objettivi tiegħu sa żmien l-awditu.

Aħna nikkonkludu li għalkemm la kien hemm valutazzjoni strutturata formalment tal-għażla tal-istrument ta’ finanzjament u lanqas analiżi komprensiva tal-ħtiġijiet, kemm l-għażla li jitwaqqaf il-Fond fiduċjarju Bêkou, kif ukoll it-tfassil tiegħu, kienu adatti fiċ-ċirkustanzi.

Il-ġestjoni tal-Fond fiduċjarju Bêkou għadha ma laħqitx il-potenzjal sħiħ tagħha, fi tliet aspetti: il-Fond fiduċjarju Bêkou kellu influwenza limitata fuq il-koordinazzjoni fost il-partijiet interessati; il-proċeduri jistgħu jkunu aktar trasparenti, rapidi u kosteffettivi; barra minn hekk, il-mekkaniżmi ta’ monitoraġġ u ta’ evalwazzjoni għadhom mhumiex żviluppati għalkollox.

VII

B’mod ġenerali, il-Fond fiduċjarju Bêkou kien kiseb riżultati pożittivi sa żmien l-awditu. Huwa attira l-għajnuna, iżda ma attirax wisq donaturi addizzjonali, u l-biċċa l-kbira mill-proġetti tiegħu taw l-outputs li kienu mistennija minnhom. Il-fond jipprovdi viżibbiltà akbar lill-UE.

VIII

Aħna nagħmlu għadd ta’ rakkomandazzjonijiet biex ngħinu lill-Kummissjoni ttejjeb it-tfassil u l-ġestjoni tal-Fond fiduċjarju Bêkou fil-futur u, b’mod aktar ġenerali, tal-fondi fiduċjarji tal-UE. Aħna nirrakkomandaw li l-Kummissjoni:

tiżviluppa gwida ulterjuri għall-għażla tal-mezz ta’ għajnuna u għall-analiżijiet tal-ħtiġijiet li tiddefinixxi l-ambiti ta’ intervent tal-fondi fiduċjarji,
ittejjeb il-koordinazzjoni mid-donaturi, il-proċeduri tal-għażla u l-kejl tal-prestazzjoni, kif ukoll tottimizza l-ispejjeż amministrattivi.

Introduzzjoni

Fondi fiduċjarji tal-UE: għodda ġdida għall-għajnuna għall-iżvilupp

Fond fiduċjarju huwa fond li ġie stabbilit għal skop speċifiku ta’ żvilupp, b’kontribuzzjonijiet finanzjarji minn donatur wieħed jew aktar u li ġeneralment jiġi amministrat minn organizzazzjoni internazzjonali bħall-Bank Dinji jew in-Nazzjonijiet Uniti. Il-fondi fiduċjarji ilhom li saru popolari mis-snin 90, u qed jintużaw dejjem aktar bħala strument ta’ finanzjament għall-kooperazzjoni internazzjonali. Dawn il-fondi spiss jitwaqqfu b’rispons għal kriżijiet bħal diżastri naturali jew kunflitti.

Mill-2013 ‘il hawn, kien hemm il-possibbiltà li jitwaqqfu “fondi fiduċjarji tal-Unjoni għal azzjonijiet esterni” biex jintużaw għal azzjonijiet ta’ emerġenza, ta’ wara l-emerġenza jew azzjonijiet tematiċi, permezz ta’ ftehim li ġie konkluż bejn il-Kummissjoni Ewropea u donaturi oħra¹. Għal kull fond fiduċjarju jiġi stabbilit bord ippresedut mill-Kummissjoni biex jipprovdi rappreżentanza kemm għad-donaturi, kif ukoll għall-Istati Membri nonkontributuri u biex jiddeċiedi kif il-fondi għandhom jintużaw.

Il-Fond fiduċjarju Bêkou² tal-UE għar-Repubblika Ċentru-Afrikana (RĊA) tnieda f’Lulju 2014 biex jappoġġa l-ħruġ tal-pajjiż mill-kriżi u r-rikostruzzjoni tiegħu. Huwa l-ewwel minn erba’ fondi fiduċjarji li sa issa huma mmaniġġjati mill-Kummissjoni Ewropea³. L-erba’ donaturi inizjali kienu l-Unjoni Ewropea (UE), Franza, il-Ġermanja u n-Netherlands, filwaqt li l-Italja u l-Iżvizzera saru sħab fl-2015. Sa tmiem l-2016, l-impenji li saru għall-Fond fiduċjarju Bêkou ammontaw għal total ta’ EUR 146 miljun, li madwar tliet kwarti minnhom joriġinaw mill-baġit tal-UE u mill-Fond Ewropew għall-Iżvilupp. Minn dan l-ammont, EUR 86 miljun kienu ġew riċevuti sa tmiem l-2016.

L-objettiv prinċipali tiegħu, kif stipulat fil-Ftehim Kostituttiv, huwa li jipprovdi għajnuna mmirata u konsistenti għar-reżiljenza ta’ gruppi vulnerabbli u appoġġ għall-aspetti kollha tal-ħruġ tar-Repubblika Ċentru-Afrikana mill-kriżi, u tar-rikostruzzjoni tagħha, li jikkoordina l-azzjonijiet matul it-terminu qasir, it-terminu medju u t-terminu twil u li jgħin lill-pajjiżi ġirien jaffrontaw il-konsegwenzi tal-kriżi⁴.

Ir-Repubblika Ċentru-Afrikana: pajjiż fi kriżi

Ir-RĊA hija waħda mill-ifqar pajjiżi u u minn dawk l-anqas żviluppati fid-dinja, u fl-2016 ġiet ikklassifikata fl-aħħar post fl-Indiċi tal-Iżvilupp tal-Bniedem maħruġ mill-UNDP. Dan minkejja li għandha depożiti minerali sinifikanti kif ukoll riżorsi oħra, bħal riżervi tal-uranju, żejt grezz, deheb, djamanti, kobalt, injam u enerġija idroelettrika. Il-popolazzjoni tagħha ta’ 4.5 miljun persuna hija mifruxa fuq territorju vast ta’ 623 000 km² (bejn wieħed u ieħor id-daqs ta’ Franza u tal-Belġju flimkien). Minn meta kisbet l-indipendenza fl-1960, ir-RĊA esperjenzat kunflitti, governanza fqira, livell għoli ta’ faqar u inugwaljanza, kif ukoll nuqqas ta’ investiment mis-settur privat. Is-sitwazzjoni li l-biċċa l-kbira mill-poplu tar-RĊA qed jiffaċċja issa hija waħda prekarja, b’aktar minn nofs il-popolazzjoni fi ħtieġa ta’ għajnuna umanitarja. Madwar 450 000 persuna huma spostati f’pajjiżhom u għadd simili ta’ persuni ħarbu lejn pajjiżi ġirien.

Wara li seħħ ċiklu ta’ vjolenza li waqqa’ l-gvern preċedenti, ġie stabbilit gvern ta’ tranżizzjoni mill-2014 sal-bidu tal-2016. F’Marzu 2016, inħatru President u gvern ġdid wara li saru elezzjonijiet demokratiċi. F’Ottubru 2016, l-awtoritajiet tar-RĊA u d-donaturi ppubblikaw Pjan Nazzjonali ta’ Rkupru u ta’ Bini tal-Paċi li jkopri ħames snin.

Sal-2014, ir-RĊA kienet meqjusa bħala “orfni tal-għajnuna”⁵, minħabba l-appoġġ limitat li kienet tirċievi mill-komunità internazzjonali tad-donaturi. Imbagħad, l-għajnuna lill-pajjiż żdiedet b’mod sinifikanti. Madankollu, minħabba li l-kunflitti għadhom għaddejjin, il-popolazzjoni għadha fi ħtieġa kbira ħafna ta’ għajnuna umanitarja⁶.

L-UE ilha sieħba tar-RĊA għal aktar minn 30 sena u għadha waħda mis-sħab prinċipali tal-pajjiż fil-qasam tal-iżvilupp. Bejn l-2013 u l-2016, l-UE kkontribwiet aktar minn EUR 500 miljun biex tassisti lill-pajjiż⁷. L-UE adottat ”approċċ komprensiv”⁸, li jinkludi l-għoti ta’ assistenza permezz tal-Fond fiduċjarju Bêkou, għajnuna tradizzjonali għall-iżvilupp, tliet missjonijiet u operazzjonijiet militari tal-Politika ta’ Sigurtà u ta’ Difiża Komuni, rispons għall-kriżijiet ċivili u għajnuna umanitarja.

L-aġenziji tan-Nazzjonijiet Uniti (NU) u Franza huma wkoll involuti b’mod sinifikanti fir-RĊA. L-Anness II jelenka seba’ fondi fiduċjarji tan-NU li joperaw fir-RĊA. Varjetà ta’ sħab oħra, bħall-Bank Afrikan tal-Iżvilupp, il-Bank Dinji u pajjiżi oħra tal-UE, jagħtu wkoll għajnuna lill-pajjiż.

Ambitu u approċċ tal-awditjar

Dan l-awditu tal-prestazzjoni eżamina l-ewwel esperjenza li l-Kummissjoni Ewropea kellha fl-użu tal-fond fiduċjarju proprju tagħha bħala mezz ta’ għajnuna. Aħna eżaminajna jekk l-istabbiliment tal-fond kienx iġġustifikat, jekk kienx qed jiġi mmaniġġjat tajjeb u jekk kienx laħaq l-objettivi tiegħu sa żmien l-awditu.

L-awditu ffoka fuq il-fond mill-bidu tiegħu fl-2014 sa tmiem l-2016. Aħna eżaminajna l-11-il proġett kollha tiegħu u l-31 kuntratt rispettivi tagħhom li ġew iffinanzjati (ara l-Anness I). Aħna analizzajna diversi dokumenti dwar l-istabbiliment tal-fond u t-tfassil tal-proġetti, il-proċeduri għall-għażla tal-organizzazzjonijiet inkarigati mill-implimentazzjoni kif ukoll il-monitoraġġ u l-evalwazzjoni tal-proġetti (rapporti intermedji u rapporti ta’ evalwazzjoni esterna). Aħna wettaqna wkoll żjarat fuq il-post fir-RĊA u fil-kwartieri ġenerali ta’ tlieta mid-donaturi għall-fond. B’hekk stajna nwettqu intervisti ma’ diversi partijiet interessati u nżuru tliet proġetti.

Osservazzjonijiet

Għalkemm ibbażati fuq analiżi limitata, kemm id-deċiżjoni li jitwaqqaf il-Fond fiduċjarju Bêkou kif ukoll it-tfassil tiegħu, kienu adatti fiċ-ċirkustanzi

Din it-taqsima tagħti ħarsa ġenerali fil-qosor lejn il-kuntest tal-pajjiż fiż-żmien meta nħoloq il-Fond fiduċjarju Bêkou, u mbagħad tanalizza t-tfassil tal-fond minn żewġ perspettivi: l-għażla ta’ fond fiduċjarju bħala l-istrument ta’ finanzjament u l-ambitu ta’ intervent tal-Fond fiduċjarju Bêkou.

Il-Fond fiduċjarju Bêkou kien rispons rapidu għall-kuntest diffiċli tal-pajjiż

Is-sitwazzjoni fir-Repubblika Ċentru-Afrikana fl-2014 kienet ikkaratterizzata mill-konsegwenzi ta’ kriżi kbira tal-politika u tas-sigurtà li eskalat fl-2012. Dan ikkawża kriżi umanitarja u reċessjoni ekonomika, it-tnejn li huma f’livelli mingħajr preċedent. F’Diċembru 2013, in-Nazzjonijiet Uniti ddikjarat li l-pajjiż kien jinsab fl-hekk imsejħa kriżi ta’ emerġenza tat-tielet livell⁹. Is-sitwazzjoni kienet ikkaratterizzata minn “contiguum”¹⁰ ta’ problemi fuq il-livell umanitarju u ta’ żvilupp, kif ukoll mill-fraġilità tal-awtoritajiet tal-istat u li ma kinux kapaċi jissodisfaw il-ħtiġijiet tal-popolazzjoni.

**Tifel miexi ħdejn ajruplan abbandunat f’dak li kien il-kamp ta’ M’Poko għal persuni spostati f’pajjiżhom, u li jinsab ħdejn l-ajruport ta’ Bangui.**
© L-Assoċjazzjoni tas-Salib l-Aħmar fi Franza.

Dan il-kuntest ikkawża wkoll restrizzjonijiet sinifikanti fit-twassil ta’ għajnuna mill-UE: in-nuqqas ta’ gvern elett demokratikament f’dak iż-żmien kien ifisser li l-Kummissjoni ma setgħetx tadotta programm indikattiv nazzjonali (PIN)¹¹ għall-għajnuna pprovduta fl-allokazzjoni nazzjonali tar-RĊA għall-11-il Fond Ewropew għall-Iżvilupp (FEŻ).

Għalhekk, il-ħolqien tal-Fond fiduċjarju Bêkou għar-RĊA kien rispons rapidu għall-ħtieġa għal strument ikkoordinat biex jikkollega l-assistenza inizjali, ir-riabilitazzjoni u l-iżvilupp. Il-prinċipji ġustifikattivi għall-għażla ta’ strument ta’ għajnuna, bħal dan, ġew diskussi kemm fil-livell politiku kif ukoll f’dak tekniku fi ħdan il-Kummissjoni Ewropea, ma’ firxa wiesgħa ta’ donaturi kif ukoll mal-gvern ta’ tranżizzjoni tar-RĊA matul l-ewwel nofs tal-2014. Dawn id-dikussjonijiet wasslu għal kunsens, b’mod partikolari, dwar il-ħtieġa ta’ mezzi differenti għat-twassil tal-għajnuna, għall-integrazzjoni tal-approċċi umanitarji u ta’ żvilupp, u għal bidla lil hinn mill-koordinazzjoni tal-għajnuna u lejn l-aggregazzjoni tar-riżorsi. Din l-analiżi komuni ffurmat il-bażi għall-ħolqien tal-Fond fiduċjarju Bêkou.

Il-fond inħoloq f’perjodu ta’ żmien qasir ħafna, bid-diskussjonijiet inizjali li nbdew fil-bidu tal-2014 u l-iffirmar tal-Ftehim Kostituttiv tiegħut mill-Kummissjoni, Franza, il-Ġermanja u n-Netherlands li seħħ f’Lulju 2014.

Il-Kummissjoni ma ħejjietx analiżi strutturata formalment tal-għażla tal-istrument ta’ finanzjament

Ir-Regolament Finanzjarju jistipula għadd ta’ kundizzjonijiet li jridu jiġu ssodisfati sabiex jiġi stabbilit fond fiduċjarju tal-UE: (i) valur miżjud għall-intervent tal-Unjoni, jiġifieri l-objettivi tal-fond fiduċjarju jistgħu jintlaħqu aħjar fil-livell tal-UE milli f’dak nazzjonali;, (ii) viżibbiltà politika u vantaġġi maniġerjali, (iii) il-fondi fiduċjarji ma għandhomx jinħolqu jekk sempliċiment jiddupplikaw mezzi oħra eżistenti ta’ finanzjament jew strumenti simili mingħajr ma jipprovdu addizzjonalità.

L-impenji tal-UE li saru fil-Forums ta’ Livell Għoli dwar l-Effikaċja tal-Għajnuna (ara l-Kaxxa 1) u li jinsabu fil-linji gwida tad-DĠ DEVCO dwar il-fondi fiduċjarji tal-UE jindikaw li l-fondi fiduċjarji ma għandhomx isiru għodda standard ta’ implimentazzjoni.

Kaxxa 1

Il-Forums ta’ Livell Għoli dwar l-Effikaċja tal-Għajnuna jirrikjedu awtodixxiplina fir-rigward tal-ħolqien ta’ mezzi ġodda ta’ għajnuna

L-isforz kontinwu biex jiġi mmodernizzat it-twassil tal-għajnuna kien ikkaratterizzat minn erba’ avvenimenti: il-Forums ta’ Livell Għoli dwar l-Effikaċja tal-Għajnuna li saru f’Ruma (2003), f’Pariġi (2005), f’Akkra (2008) u f’Busan (2011). Dawn l-avvenimenti, li sa issa jinvolvu aktar minn 100 pajjiż, wasslu għall-formulazzjoni ta’ prinċipji għal għajnuna effettiva.

Impenn partikolari li sar wara l-forum tal-2008 f’Akkra kien li d-donaturi jiżguraw li l-mezzi eżistenti għat-twassil ta’ għajnuna jintużaw u, jekk meħtieġ, jissaħħew qabel ma jinħolqu mezzi ġodda separati li jkollhom ir-riskju li jikkawżaw frammentazzjoni ulterjuri u jikkomplikaw il-koordinazzjoni fil-livell tal-pajjiżi¹². B’segwitu għal diskussjonijiet madwar mejda, id-donaturi ġew mistiedna biex “jaħsbuha darbtejn” qabel ma jistabbilixxu fondi ġodda, u biex japplikaw test ċar għall-valur miżjud¹³. Fil-forum tal-2011 li sar f’Busan, l-UE kkonfermat mill-ġdid l-impenn li kien sar f’Akkra għal awtodixxiplina biex tiġi evitata l-proliferazzjoni ulterjuri ta’ fondi¹⁴.

Kemm in-Nazzjonijiet Uniti kif ukoll il-Bank Dinji stabbilew proċeduri għall-ġustifikazzjoni tal-għażla ta’ fond fiduċjarju bħala mezz ta’ għajnuna. Pereżempju, l-Uffiċċju tal-Fond Fiduċjarju b’Ħafna Sħab, tan-NU, li jassisti lin-NU fl-amministrazzjoni ta’ mekkaniżmi aggregati ta’ finanzjament, ippubblika manwali li jipprovdu gwida dwar it-twaqqif ta’ fondi fiduċjarji. Huma jirrakkomandaw li jitwettaq studju ta’ prefattibbiltà u li jiġu analizzati l-funzjonijiet u l-valur miżjud ta’ fond bħal dan¹⁵.

Attwalment, il-Kummissjoni tenniet biss ir-rekwiżiti tar-Regolament Finanzjarju fil-linji gwida li huma disponibbli. Hija għadha ma żviluppatx mod kif dawn għandhom jiġu applikati sabiex tkun tista’ titwettaq malajr valutazzjoni strutturata tal-vantaġġi kumparattivi ta’ fondi fiduċjarji meta mqabbla ma’ għodod oħrajn. Filwaqt li l-Kummissjoni fil-fatt organizzat serje ta’ diskussjonijiet (ara l-paragrafu 15), ma saret l-ebda analiżi strutturata formalment, u bbażata fuq ir-rekwiżiti stabbiliti fir-Regolament Finanzjarju, qabel ma twaqqaf il-Fond fiduċjarju Bêkou.

Ma saret l-ebda analiżi komprensiva tal-ħtiġijiet biex jintwera liema lakuni l-Fond fiduċjarju Bêkou għandu jimla

L-analiżijiet tal-ħtiġijiet huma pass importanti fit-tfassil tal-ambitu ta’ intervent tal-għajnuna għall-iżvilupp, peress li dawn jgħinu biex jiġu identifikati l-ħtiġijiet u biex l-għajnuna tiġi pprijoritizzata. Huma jgħinu wkoll biex jiġi żgurat li strument ġdid ta’ finanzjament ma jiddupplikax strumenti eżistenti, u jistgħu jservu bħala bażi għat-tfassil ta’ għajnuna li twassal għal diviżjoni tax-xogħol ma’ donaturi oħra.

Filwaqt li diversi dokumenti interni tal-Kummissjoni li tħejjew qabel it-twaqqif tal-Fond fiduċjarju Bêkou rrikonoxxew il-fatt li r-RĊA kienet teħtieġ assistenza, l-analiżi tal-ħtiġijiet ma kinitx kompleta. Dan għaliex ma kellhiex l-elementi li ġejjin: valutazzjoni tal-ħtiġijiet kumplessivi tar-RĊA, rendikont tal-ħtiġijiet indirizzati minn strumenti eżistenti għall-għajnuna u, għaldaqstant, analiżi tal-lakuni fit-twassil ta’ għajnuna li għandhom jiġu koperti, valutazzjoni tar-riżorsi finanzjarji meħtieġa u prijoritizzazzjoni tal-għajnuna.

L-objettiv prinċipali tal-Fond fiduċjarju Bêkou, kif stipulat fil-Ftehim Kostituttiv, huwa li jipprovdi għajnuna mmirata u konsistenti għar-reżiljenza ta’ gruppi vulnerabbli u appoġġ għall-aspetti kollha tal-ħruġ tar-Repubblika Ċentru-Afrikana mill-kriżi, u tar-rikostruzzjoni tagħha, li jikkoordina l-azzjonijiet matul it-terminu qasir, it-terminu medju u t-terminu twil u li jgħin lill-pajjiżi ġirien jaffrontaw il-konsegwenzi tal-kriżi¹⁶. Għalhekk, dan l-objettiv huwa fformulat f’termini wesgħin. Analiżi komprensiva tal-ħtiġijiet setgħet serviet bħala bażi għall-formulazzjoni ta’ objettivi f’aktar dettall (ara wkoll il-paragrafu 50). Barra minn hekk, din setgħet uriet b’mod aktar ċar kif u għalfejn l-attivitajiet tal-fond huma rilevanti għall-objettivi, u liema huma l-lakuni speċifiċi li l-fond jimla.

Fil-livell strateġiku, il-Kummissjoni żgurat li l-Fond fiduċjarju Bêkou ma jiddupplikax mezzi oħra eżistenti ta’ finanzjament. Mill-2014 sal-2016, l-allokazzjoni nazzjonali tal-FEŻ għar-RĊA ffinanzjat għadd limitat ta’ attivitajiet, li kienu jikkonċentraw fuq oqsma li mhumiex dawk koperti mill-Fond fiduċjarju Bêkou, bħall-edukazzjoni jew il-politiki nazzjonali tas-saħħa¹⁷. Għalkemm mill-inqas seba’ fondi fiduċjarji tan-NU joperaw fir-RĊA, sitta għandhom ambitu tematiku li jidher ċar li huwa differenti mill-Fond fiduċjarju Bêkou. L-unika eċċezzjoni hija l-Fond fiduċjarju b’ħafna sħab Ezingo tan-NU, li jiffoka wkoll fuq l-istabbilizzazzjoni u l-irkupru tar-RĊA. Madankollu, dan il-fond huma ferm differenti mill-Fond fiduċjarju Bêkou f’termini tal-volum ta’ għajnuna / il-livell ta’ attività tiegħu, it-tip ta’ proġetti ffinanzjati u r-riċevituri tal-għajnuna tiegħu¹⁸.

Fil-livell tal-proġetti, il-Fond fiduċjarju Bêkou kien jindirizza ħtiġijiet simili għal dawk indirizzati minn appoġġ li ngħata qabel mill-UE. Fil-fatt, ċerti proġetti jipprovdu kontinwità ma’ proġetti li qabel kienu ffinanzjati minn strumenti oħra ta’ għajnuna tal-UE (ara l-Kaxxa 2). Madankollu, huma introduċew approċċ differenti u attivitajiet addizzjonali ta’ tisħiħ tar-reżiljenza. Xi wħud mill-proġetti l-oħra huma innovattivi u differenti mit-tipi ta’ proġetti li qabel qew iffinanzjati fir-RĊA. Eżempju ta’ dan huwa l-proġett tal-irkupru ekonomiku, li jipprovdi mikrofinanzjament lil negozji lokali żgħar.

Kaxxa 2

Eżempji ta’ proġetti tal-Fond fiduċjarju Bêkou li jindirizzaw ħtiġijiet simili għal proġetti ffinanzjati wkoll minn għajnuna mill-UE

Xi wħud mill-proġetti tal-Fond fiduċjarju Bêkou ħadu taħthom attivitajiet appoġġati minn strumenti oħra ta’ għajnuna tal-UE. Xi eżempji huma elenkati hawn taħt:

Żewġ proġetti tad-DĠ ECHO li saru mal-NGOs fis-settur tas-saħħa, ġew sostitwiti minn proġetti tal-Fond fiduċjarju Bêkou li saru mal-istess NGOs. Dawn iż-żewġ NGOs taw appoġġ lil 25 ċentru lokali tas-saħħa biex jgħinuhom jagħtu servizzi primarji tas-saħħa aħjar. Id-DĠ ECHO, l-UNICEF u l-Fond Umanitarju tan-NU taw ukoll għajnuna lil waħda minn dawn l-NGOs għal attivitajiet fis-settur tas-saħħa.
Fl-2014, l-istrument tal-UE li jikkontribwixxi għall-Istabbiltà u l-Paċi ffinanzja xogħol li kien jirrikjedi ħafna ħaddiema (travaux à haute intensité de main d’oeuvre) fit-tielet u fil-ħames distrett ta’ Bangui, b’mod simili għall-proġett ta’ riabilitazzjoni urbana tal-Fond fiduċjarju Bêkou. Dan l-approċċ jinvolvi r-reklutaġġ ta’ nies tal-post biex iwettqu attivitajiet bażiċi ta’ riabilitazzjoni urbana. L-għan huwa li l-infrastruttura terġa’ tiġi stabbilita, filwaqt li fl-istess ħin jiġi ġġenerat dħul għall-gruppi l-aktar vulnerabbli.
Proġett dwar is-sigurtà alimentari tnieda taħt l-10 FEŻ fl-2014, iżda sussegwentement ġie kkanċellat. L-għan tiegħu kien li jiffinanzja lill-Organizzazzjoni tal-Ikel u l-Agrikoltura tan-Nazzjonijiet Uniti biex topera programmi ta’ tisħiħ tar-reżiljenza (caisses de resilience) tal-komunità, tippromwovi djalogu interkomunitarju f’rotot ta’ mergħat nomadiċi u tippromwovi s-sigurtà alimentari fiż-żoni ta’ madwar Bangui, b’mod simili għall-proġett dwar is-sigurtà alimentari tal-Fond fiduċjarju Bêkou. Ħames kuntratti li ilhom li ilhom li ġew iffirmati mill-2014 ma’ din l-organizzazzjoni u mal-NGOs taħt l-Istrument tal-Kooperazzjoni għall-Iżvilupp tal-UE, kienu jirrigwardaw attivitajiet simili (appoġġ għal dawk li jkabbru l-ifrat, djalogu interkomunitarju, reżiljenza alimentari).
Proġett partikolari tal-Fond fiduċjarju Bêkou kellu l-għan li jipproteġi l-ekosistemi tal-annimali fil-Grigal u fix-Xlokk tar-RĊA. Dan kien ġie ppreċedut minn proġett taħt l-10 FEŻ li kien wettaq attivitajiet simili fil-Grigal tal-pajjiż.

Il-komunità tad-donaturi u l-pajjiżi li qed jiżviluppaw iddeskrivew is-sħubija bejn id-donaturi bħala importanti fil-kuntesti tal-fraġilità u tal-kriżi¹⁹. Qabel il-pubblikazzjoni tal-Pjan Nazzjonali ta’ Rkupru u ta’ Bini tal-Paċi f’Ottubru 2016, ma kienx hemm qafas strateġiku komuni fost id-donaturi tar-RĊA. Inizjattivi li għadhom għaddejjin fuq il-bażi ta’ dan il-pjan nazzjonali ta’ rkupru jistgħu jwasslu għad-definizzjoni ta’ diviżjoni tax-xogħol aktar ċara matul l-2017 (ara l-Kaxxa 3).

Kaxxa 3

Il-Pjan Nazzjonali ta’ Rkupru u ta’ Bini tal-Paċi għall-2017-2021: bażi għal diviżjoni tax-xogħol fil-futur

Strateġija nazzjonali ġdida għar-RĊA, l-hekk imsejjaħ Pjan Nazzjonali ta’ Rkupru u ta’ Bini tal-Paċi għall-2017-2021, tfasslet mill-gvern tar-RĊA b’appoġġ mill-UE, min-Nazzjonijiet Uniti, milll-Grupp tal-Bank Dinji, u ġiet ippubblikata f’Ottubru 2016. Din tipproponi tliet pilastri prijoritarji: (i) il-promozzjoni tal-paċi, is-sigurtà, u r-rikonċiljazzjoni; (ii) it-tiġdid tal-kuntratt soċjali bejn l-istat u l-popolazzjoni; (iii) l-iffaċilitar tal-irkupru tal-ekonomija u tas-settur produttiv²⁰. Il-pjan huwa ripartit fi 11-il objettiv strateġiku, bi ħtiġijiet totali stmati li jammontaw USD 3.2 biljun²¹.

Potenzjalment, il-Fond fiduċjarju Bêkou se jiffinanzja azzjonijiet fit-tliet pilastri kollha tal-Pjan Nazzjonali ta’ Rkupru u ta’ Bini tal-Paċi. Kif diġà ġie ddikjarat fil-paragrafu 14, meta nħoloq il-fond, l-għajnuna mill-FEŻ kienet imxekkla min-nuqqas ta’ programm indikattiv nazzjonali (PIN) għar-RĊA. Id-DĠ DEVCO jinsab fil-proċess li jfassal PIN taħt il-11-il FEŻ. L-ammont totali huwa ta’ EUR 382 miljun, fejn EUR 208 miljun huma fondi ġodda. Il-PIN jista’ jinkludi wkoll interventi taħt it-tliet pilastri kollha. Porzjoni mill-fondi tal-PIN se jiġi ttrasferit għall-Fond fiduċjarju Bêkou. B’kollox, 31 donatur għar-RĊA biħsiebhom jiffinanzjaw mill-inqas pilastru wieħed tal-Pjan Nazzjonali ta’ Rkupru u ta’ Bini tal-Paċi. Sa Marzu 2017, id-diviżjoni tax-xogħol bejn il-Fond fiduċjarju Bêkou, strumenti oħra tal-UE u donaturi oħra għall-implimentazzjoni ta’ dan il-pjan ma kinitx ġiet iddeterminata fid-dettall.

Il-ġestjoni tal-Fond fiduċjarju Bêkou għadha ma laħqitx il-potenzjal kollu tagħha

Aħna eżaminajna l-ġestjoni tal-Fond fiduċjarju Bêkou minn tliet perspettivi: il-koordinazzjoni ma’ donaturi oħra u mal-awtoritajiet tar-RĊA; it-trasparenza u l-veloċità tal-proċeduri tiegħu u l-kosteffettività tat-twassil tal-għajnuna; u l-mekkaniżmi ta’ monitoraġġ u ta’ evalwazzjoni tiegħu.

Il-Fond fiduċjarju Bêkou kellu influwenza limitata fuq il-koordinazzjoni fost il-partijiet interessati

L-esperjenza wriet li, f’sitwazzjonijiet ta’ emerġenza u ta’ wara l-emerġenza, ir-rispons tal-komunità internazzjonali jista’ jsir diżorganizzat u frammentat minħabba d-dgħufija tal-amministrazzjonijiet lokali flimkien ma’ żieda f’daqqa fl-għadd ta’ donaturi. Dan ma jippermettix li jingħata kontribut effettiv u sostenibbli għar-rikostruzzjoni ta’ pajjiż. Il-fondi fiduċjarji tal-UE tfasslu speċifikament għal sitwazzjonijiet bħal dawn. Fond fiduċjarju jista’ jipprovdi soluzzjoni xierqa, peress li huwa mistenni li jaġixxi kollettivament f’isem l-UE u d-donaturi tiegħu²².

Minħabba l-multipliċità ta’ donaturi u operaturi fir-RĊA, il-koordinazzjoni hija importanti. Il-fondi fiduċjarji jistgħu jkunu wkoll pjattaforma utli għat-titjib tal-koordinazzjoni ma’ proġetti ffinanzjati indipendentement mill-fond. Dan japplika prinċipalment għall-koordinazzjoni fost id-donaturi tal-fond iżda potenzjalment jista’ japplika wkoll għall-koordinazzjoni fuq skala usa’ ma’ donaturi oħra. Il-Fond fiduċjarju Bêkou kien mistenni li jkun mekkaniżmu ta’ koordinazzjoni li jippermetti lill-komunità internazzjonali tikkontribwixxi b’mod ikkoordinat għall-istabbilizzazzjoni tar-RĊA²³. Fil-każ tal-Fond fiduċjarju Bêkou, l-intenzjoni kienet li dan imur lil hinn mill-koordinazzjoni bejn l-Istati Membri u li jistabbilixxi organizzazzjoni konġunta reali²⁴, b’ideat bħall-aggregazzjoni kemm ta’ riżorsi kif ukoll tal-kapaċità ta’ analiżi, identifikazzjoni u implimentazzjoni ta’ proġetti, missjonijiet konġunti, unità speċifika b’persunal li jikkoordina donaturi u li jikkollega ma’ sħab, jew gruppi ta’ ħidma tematiċi komuni.

Ftit li xejn hemm evidenza li l-ħolqien tal-Fond fiduċjarju Bêkou għen biex jikkonsolida l-attività tad-donaturi fir-RĊA skont il-modalitajiet deskritti fil-paragrafu 29, la immedjatament wara li nħoloq u lanqas fil-frattemp (ara l-Kaxxa 4). Mill-2014 ‘il hawn, l-attività tad-donaturi barra mill-fond baqgħet f’livell simili jew saħansitra żdiedet f’xi każijiet (ara wkoll il-paragrafi 55 sa 61 għall-involviment ta’ donaturi oħra). Il-ġestjoni tal-fond identifikat il-frammentazzjoni tal-istrumenti ta’ għajnuna u tal-atturi fir-RĊA bħala sfida kbira.

Kaxxa 4

Xi donaturi żiedu l-attività tagħhom barra mill-fond mill-2014 ‘il hawn

Il-Ġermanja qed iżżid l-attività bilaterali tagħha fir-RĊA. Fl-2016, il-Ministeru Federali għall-Kooperazzjoni Ekonomika u l-Iżvilupp għażel ir-RĊA bħala wieħed mill-pajjiżi sħab bilaterali tiegħu. Il-bank Ġermaniż tal-iżvilupp Kreditanstalt für Wiederaufbau reċentement beda proġett fis-settur tas-saħħa b’valur ta’ EUR 11-il miljun.

F’Ottubru 2016, l-Italja fetħet l-uffiċċju proprju tagħha ta’ kooperazzjoni għall-iżvilupp f’Bangui.

Id-DĠ DEVCO se jerġa’ jibda l-għoti tal-għajnuna mill-FEŻ fuq il-bażi ta’ PIN.

Minbarra d-donaturi tal-Fond fiduċjarju Bêkou, il-Bank Dinji qed jippjana wkoll li jwaqqaf il-fond fiduċjarju proprju tiegħu għar-RĊA.

Il-mekkaniżmi ta’ koordinazzjoni għall-għajnuna għall-iżvilupp fir-RĊA ma kinux qed jiffunzjonaw sa tmiem l-2016. Ir-raggruppamenti umanitarji, immexxija minn organizzazzjonijiet tan-NU u minn NGOs internazzjonali, huma ddedikati għall-għajnuna umanitarja. Fl-2014, il-gvern ta’ tranżizzjoni tar-RĊA kien ħoloq strutturi rilevanti ta’ koordinazzjoni għall-għajnuna għall-iżvilupp, iżda dawn qatt ma bdew joperaw. L-awtoritajiet tar-RĊA u l-komunità tad-donaturi jinsabu fil-proċess li jwaqqfu qafas istituzzjonali għall-implimentazzjoni tal-għajnuna għall-iżvilupp taħt il-Pjan Nazzjonali ta’ Rkupru u ta’ Bini tal-Paċi, li ġie adottat f’Ottubru 2016²⁵. Dan il-qafas se jkun jinkludi mekkaniżmu ta’ koordinazzjoni tal-għajnuna li jassenja rwol deċiżjonali lill-Fond fiduċjarju Ezingo tan-NU u lil fond fiduċjarju tal-Bank Dinji li jista’ jinħoloq fil-futur, kif ukoll rwol konsultattiv biss lill-Fond fiduċjarju Bêkou.

Il-Fond fiduċjarju Bêkou ma għandux proċeduri ddefiniti biex jiżgura l-koordinazzjoni sistematika tal-proġetti tiegħu ma’ dawk ta’ donaturi oħra għall-fond. Il-fond ħoloq mekkaniżmi ta’ koordinazzjoni fil-forma tal-istrutturi ta’ governanza proprji tiegħu (il-bord tal-fond fiduċjarju u l-kumitat operazzjonali). Minkejja li wieħed mir-rwoli tal-kumitat huwa li jadotta l-proġetti, huwa ma ffaċilitax id-diskussjonijiet li saru dwar il-koordinazzjoni ma’ proġetti oħra ffinanzjati mid-donaturi għall-Fond fiduċjarju Bêkou. Id-dokumenti ta’ programmazzjoni ma jitħejjewx sistematikament b’kont meħud tal-istampa sħiħa tal-proġetti l-oħra fl-istess qasam.

Anke mingħajr mekkaniżmi formali, ir-rappreżentant tal-Fond fiduċjarju Bêkou f’Bangui rnexxielu, permezz ta’ prattika tajba, jiżgura xi livell ta’ koordinazzjoni fuq il-bażi ta’ proġetti individwali (ara l-Kaxxa 5). Madankollu, hemm lok biex il-Fond fiduċjarju Bêkou jipprovdi koordinazzjoni aktar sistematika, kemm internament fost id-donaturi tiegħu kif ukoll, potenzjalment, esternament fi ħdan il-komunità internazzjonali.

Kaxxa 5

Tliet eżempji ta’ prattika tajba li juru l-koordinazzjoni ta’ proġetti mid-donaturi

Inħolqu sinerġiji bejn il-proġett tal-Fond fiduċjarju Bêkou dwar l-irkupru ekonomiku u żewġ proġetti ffinanzjati mill-aġenzija għall-iżvilupp ta’ Stat Membru tal-UE. Minkejja li ftit li xejn kien hemm koordinazzjoni fl-istadju tat-tfassil tal-proġett, seħħet xi koordinazzjoni wara t-tnedija tal-proġett fl-2016. Bosta laqgħat ġew organizzati bejn l-aġenzija, ir-rappreżentant tal-Fond fiduċjarju Bêkou f’Bangui, u l-organizzazzjonijiet inkarigati mill-implimentazzjoni, biex jiddiskutu modi ta’ kif jinħolqu sinerġiji bejn it-tliet proġetti.

F’Ottubru 2016, ir-rappreżentant tal-Fond fiduċjarju Bêkou f’Bangui laqqa’ d-donaturi u l-awtoritajiet tar-RĊA f’sessjoni ta’ ħidma dwar is-sigurtà alimentari. Ibbażat fuq din is-sessjoni ta’ ħidma, it-tim tal-Fond fiduċjarju Bêkou nieda sejħa għal espressjonijiet ta’ interess, li ħadet inkunsiderazzjoni l-eżitu ta’ dawn id-diskussjonijiet.

Assistenza teknika ġiet iffinanzjata taħt il-proġett dwar is-saħħa sabiex isiru laqgħat ta’ koordinazzjoni ta’ kull xahar bejn is-sitt NGOs li joperaw fil-faċilitajiet tas-saħħa fir-RĊA kollha. Għalkemm ma kienx intenzjonat inizjalment, din il-koordinazzjoni xi drabi estendiet lil hinn mill-operaturi tal-Fond fiduċjarju Bêkou, u dan għen biex jiġu mmonitorjati każijiet potenzjali ta’ duplikazzjoni ma’ donaturi oħra. Dan wassal ukoll biex l-NGOs jarmonizzaw il-metodu ta’ xogħol tagħhom.

**Il-proġett dwar is-sigurtà alimentari jimmira għall-iżvilupp sostenibbli tas-sigurtà alimentari u nutrizzjonali.**
© L-Assoċjazzjoni tas-Salib l-Aħmar fi Franza.

Hem xi evidenza li l-Fond fiduċjarju Bêkou jaġixxi f’koordinazzjoni mal-awtoritajiet tar-RĊA (ara l-Kaxxa 5 għal eżempju). Il-gvern tar-RĊA biħsiebu jespandi r-rwol tiegħu fil-ġestjoni futura tal-fond, billi jikkontribwixxi b’mod aktar sistematiku għat-tfassil, l-implimentazzjoni u l-monitoraġġ tal-proġetti tiegħu.

Il-proċeduri jistgħu jkunu aktar trasparenti, aktar rapidi u aktar kosteffettivi

Ir-Regolament Finanzjarju²⁶ jistipula li huwa meħtieġ li l-fondi fiduċjarji jiġu implementati skont il-prinċipji tat-trasparenza. Il-Ftehim Kostituttiv jipprevedi l-użu ta’ proċeduri flessibbli biex jiġi żgurat li l-Fond fiduċjarju Bêkou jkun risponsiv u li l-għajnuna tkun tista’ tiġi organizzata malajr. Ir-Regolament Finanzjarju jistipula wkoll li massimu ta’ 5 % tal-ammonti aggregati f’fond fiduċjarju jistgħu jintużaw sabiex jiġu koperti l-ispejjeż tal-Kummissjoni relatati mal-ġestjoni. Aħna eżaminajna t-trasparenza u l-veloċità tal-proċeduri tal-għażla u l-kosteffettività tal-Fond fiduċjarju Bêkou meta mqabbel ma mezzi oħra ta’ għajnuna.

Trasparenza tal-proċeduri tal-għażla

Il-proċeduri applikati mill-Fond fiduċjarju Bêkou fl-għażla tal-organizzazzjonijiet inkarigati mill-implimentazzjoni ta’ proġetti ma ġewx ifformalizzati fil-linji gwida dwar il-fondi fiduċjarji tal-UE. Il-proċeduri li ġew segwiti kienu bbażati fuq dawk preskritti fid-dokument “Procurement and Grants for European Union External Actions – A Practical Guide” (Akkwist u Għotjiet għall-Azzjonijiet Esterni tal-Unjoni Ewropea – Gwida Prattika) (PRAG)²⁷, b’xi eċċezzjonijiet addizzjonali.

Minbarra għadd limitat ta’ kuntratti ta’ servizzi, il-Fond fiduċjarju Bêkou uża 3 metodi differenti għall-għażla tal-organizzazzjonijiet inkarigati mill-implimentazzjoni tal-proġetti: 4 ftehimiet ta’ kooperazzjoni ddelegata, 10 għotjiet diretti u 12-il għotja wara sejħa ristretta għal espressjonijiet ta’ interess²⁸. Id-definizzjonijiet ta’ kull wieħed minnhom, u l-vantaġġi u l-iżvantaġġi korrispondenti tagħhom, jinstabu fit-Tabella 1.

Tabella 1

Definizzjoni u vantaġġi u żvantaġġi prinċipali tal-proċeduri tal-għażla użati mill-Fond fiduċjarju Bêkou għall-għotjiet
Tip	Ftehimiet ta’ kooperazzjoni ddelegata	Għotjiet Diretti	Għotjiet wara sejħa ristretta għal espressjonijiet ta’ interess taħt il-Fond fiduċjarju Bêkou
Definizzjoni	Fejn il-Kummissjoni tafda l-ġestjoni tal-fondi lil korp iddelegat minn Stat Membru (jew lil donatur ieħor minn pajjiż terz).	Fejn organizzazzjoni tintgħażel mingħajr rikors għal kompetizzjoni.	Fejn għadd ta’ organizzazzjonijiet magħżula minn qabel jiġu mitluba jħejju proposta.
Vantaġġi	Proċedura rapida Livell għoli ta’ kompetenza disponibbli	Proċedura rapida Livell għoli ta’ kompetenza disponibbli	Aktar trasparenti miż-żewġ proċeduri l-oħra Iffukata fuq esperti rinomati fis-suġġett
Żvantaġġi	Trasparenza limitata minħabba nuqqas ta’ pubbliċità Saff addizzjonali ta’ proċeduri amministrattivi Possibbiltà ta’ Kunflitti ta’ interess	Trasparenza limitata minħabba nuqqas ta’ pubbliċità Tirrestrinġi l-aċċess li organizzazzjonijiet aktar ġodda jkollhom għall-finanzjament	Tirrestrinġi l-aċċess li organizzazzjonijiet aktar ġodda jkollhom għall-finanzjament

Sors: Il-PRAG.

Il-proċeduri effettivi tal-għażla li għandhom jiġu applikati mill-Fond fiduċjarju Bêkou u l-grad ta’ flessibbiltà awtorizzata mill-PRAG ma ġewx iddefiniti. Konsegwentement, il-mod ta’ kif l-organizzazzjonijiet inkarigati mill-implimentazzjoni ntgħażlu ma kienx trasparenti għalkollox.

L-użu ta’ ftehimiet ta’ kooperazzjoni ddelegata jissemma fl-Artikolu 10 tal-Ftehim Kostituttiv, li jiddikjara li dawn għandhom ikunu l-għażla ppreferuta kull fejn il-kooperazzjoni ddelegata toffri rispons xieraq f’termini tal-ispiża, l-effettività u l-viżibbiltà Ewropea tal-azzjonijiet iffinanzjati mill-Fond. Madankollu, filwaqt li l-organizzazzjonijiet magħżula kienu esperti fl-oqsma inkwistjoni, ma tħejjiet l-ebda ġustifikazzjoni għall-użu ta’ dawn l-organizzazzjonijiet, b’mod partikolari fi żmien l-approvazzjoni tagħhom. Barra minn hekk, il-possibbiltà ta’ kunflitti ta’ interess tirriżulta minħabba l-preżenza ta’ xi wħud minn dawn l-organizzazzjonijiet fuq il-kumitat operazzjonali tal-fond, fejn il-proġetti u, f’dawn il-każijiet, l-organizzazzjonijiet inkarigati mill-implimentazzjoni, jintgħażlu²⁹.

Ħamsa mill-għotjiet diretti kienu t-tieni fażi ta’ xogħol preċedenti. L-oħrajn ingħataw wara li sar eżaminar tal-organizzazzjonijiet li kienu diġà preżenti fir-RĊA u tal-kapaċitajiet rispettivi tagħhom. Dan jista’ jinftiehem fid-dawl tal-kundizzjonijiet diffiċli fuq il-post fiż-żmien meta saru dawn l-għotjiet. Madankollu, aħna identifikajna każ partikolari fejn, minħabba li kien hemm aktar minn organizzazzjoni waħda li kienet kapaċi twettaq ix-xogħol, setgħet ġiet applikata proċedura aktar kompetittiva³⁰.

Għal kull waħda mis-sejħiet ristretti għal espressjonijiet ta’ interess ġiet applikata proċedura tal-għażla li kienet adattata għaliha, filwaqt li ttieħdu xi elementi mill-PRAG, iżda bl-appikazzjoni ta’ diversi proċeduri aktar flessibbli fi stadji differenti. B’riżultat ta’ dan, mhuwiex ċar kif l-organizzazzjonijiet inkarigati mill-implimentazzjoni ġew magħżula.

Veloċità tal-proċeduri tal-għażla

Id-dispożizzjonijiet ta’ flessibbiltà li huma applikabbli għall-Fond fiduċjarju Bêkou jistgħu jipprovdu opportunitajiet biex jiġi ffrankat il-ħin, meta mqabbel mal-approċċi aktar tradizzjonali applikati fil-Kummissjoni. L-istruttura u l-proċess deċiżjonali applikati, flimkien maż-żmien relattivament qasir ta’ kemm ilu jeżisti l-fond, jillimitaw il-possibbiltà li jsir tqabbil ta’ sinifikat mal-proċeduri stabbiliti għal għajnuna oħra mill-UE. Minkejja dan, aħna identifikajna xi każijiet fejn seta’ jiġi ffrankat il-ħin fl-għażla tal-organizzazjonijiet inkarigati mill-implimentazzjoni.

Eżempju wieħed fejn il-Fond fiduċjarju Bêkou seta’ ffranka ħin addizzjonali matul il-proċedura tal-għażla kien meta kienu qed isiru diskussjonijiet mal-organizzazzjonijiet dwar il-kontenut tal-proġetti. Għat-tliet tipi kollha ta’ proċedura użati, it-tul u l-għadd ta’ diskussjonijiet li saru setgħu tnaqqsu. F’14 mis-26 għotja, id-diskussjonijiet dwar il-kontenut tal-proġetti damu aktar minn 100 jum. Iż-żmien medju li ttieħed kien ta’ 148 jum, filwaqt li l-itwal żmien kien ta’ 503³¹ ijiem u l-iqsar ta’ 18-il³² jum. Filwaqt li d-diskussjonijiet li segwew is-sejħiet ristretti għal espressjonijiet ta’ interess ħadu medja ta’ 50 jum, dawk għall-ftehimiet ta’ kooperazzjoni ddelegata u l-għotjiet diretti ħadu medja ta’ 197 u 245 jum rispettivament. Li kieku d-diskussjonijiet saru b’mod differenti, il-ftehimiet kienu jkunu jistgħu jiġu ffinalizzati qabel. Pereżempju, xi wħud mill-kwistjonijiet reġgħu ġew ittrattati minn membri differenti tal-persunal tal-Kummissjoni, bir-riżultat li kien hemm volum kbir ta’ skambji bejn iż-żewġ partijiet. Kollegament aħjar bejn il-membri tal-persunal tal-Kummissjoni qabel ma saru dawn l-iskambji seta’ qassar iż-żmien għal dawn id-diskussjonijiet.

F’ħames każijiet, b’riżultat tad-diskussjonijiet estensivi, kien ukoll meħtieġ li l-infiq jiġi approvat retroattivament³³. Dan kellu impatt negattiv fuq l-implimentazzjoni ta’ dawn il-proġetti fl-istadji bikrija tagħhom, peress li n-nuqqas ta’ ftehim iffirmat kien jinvolvi inċertezzi legali għall-organizzazzjonijiet inkarigati mill-implimentazzjoni.

Kosteffettività tat-twassil tal-għajnuna

L-organizzazzjonijiet tan-NU, il-Bank Dinji u l-Bank Afrikan tal-Iżvilupp kollha jimponu tariffi differenti għall-ġestjoni ta’ fondi fiduċjarji. L-ebda wieħed minnhom ma jipprevedi perċentwal ta’ inqas mill-5 % preskritt għall-Fond fiduċjarju Bêkou³⁴. Għal għajnuna esterna oħra tal-UE taħt il-FEŻ u taħt il-baġit ġenerali, jiġu imposti wkoll rati kumplessivi ta’ aktar minn 5 %.

It-tariffi tal-ġestjoni għall-Fond fiduċjarju Bêkou jeskludu s-salarju għall-Maniġer u l-ispejjeż tal-back-office. Dan ifisser li l-ispejjeż totali mġarrba għall-ġestjoni tal-fond huma ogħla minn dawk li ġew irrappurtati fil-kontijiet tal-fond. L-ispejjeż kollha għall-ġestjoni tal-Fond fiduċjarju Bêkou ma ġewx ikkalkulati. Dawn il-problemi ġew ikkonfermati permezz ta’ awditu intern li sar mill-Kummissjoni.

Bħal fil-każ tal-għajnuna kollha għall-iżvilupp, l-ispiża totali għat-twassil tal-għajnuna hija aktar minn sempliċiment it-tariffa tal-ġestjoni. Barra mit-tariffa tal-Fond fiduċjarju Bêkou, l-organizzazzjonijiet internazzjonali u l-NGOs li jiġu kkuntrattati jimponu t-tariffi amministrattivi proprji tagħhom. Dawn ġeneralment ikunu perċentwal tal-valur tal-kuntratti, b’massimu ta’ 7 %. Madankollu, huma jistgħu jiddelegaw ukoll kompiti fl-implimentazzjoni tal-kuntratti lil organizzazzjonijiet oħra, biex b’hekk iżidu saffi addizzjonali ta’ spejjeż amministrattivi. Il-ftehimiet ta’ kooperazzjoni ddelegati huma soluzzjoni partikolarment għalja, peress li dawn awtomatikament joħolqu saff addizzjonali ta’ spejjeż relatati mal-ġestjoni (ara t-Tabella 1 hawn fuq). Il-benefiċċji tal-użu ta’ dan it-tip ta’ finanzjament għandu dejjem jintiżnu bi tqabbil mal-ispejjeż addizzjonali.

L-Artikolu 3.8 tal-Ftehim Kostituttiv jipprevedi li l-persunal kollu tal-Fond fiduċjarju Bêkou, se jkun eventwalment ibbażat f’Bangui. Attwalment, rappreżentant wieħed biss tal-fond huwa bbażat f’Bangui, filwaqt li fl-2016 seba’ membri tal-persunal kienu bbażati fi Brussell. L-għadd ta’ espatrijati bbażati fid-delegazzjoni tal-UE huwa limitat minħabba s-sitwazzjoni attwali tas-sigurtà. Aktar ma s-sitwazzjoni fir-RĊA tittejjeb, aktar ma huwa mistenni li dan l-ammont jiżdied. Sa issa għadu ma sarx kalkolu biex jiġi ddeterminat jekk it-trasferiment komplet tal-persunal lejn ir-RĊA jistax jinkiseb fi ħdan il-limitu massimu ta’ 5 % (ara l-paragrafu 36)³⁵.

Il-mekkaniżmi ta’ monitoraġġ u ta’ evalwazzjoni għadhom mhumiex żviluppati għalkollox

Il-mekkaniżmi ta’ monitoraġġ u ta’ evalwazzjoni huma importanti sabiex tkun tista’ tiġi vvalutata l-prestazzjoni tal-fond u sabiex jiġu adottati miżuri korrettivi meta jkun meħtieġ. Peress li l-Fond fiduċjarju Bêkou kien l-ewwel fond fiduċjarju tal-UE li kien immaniġġjat mill-Kummissjoni Ewropea, huwa jista’ jipprovdi tagħlimiet siewja għall-użu futur ta’ dan il-mezz ta’ għajnuna.

Il-Fond fiduċjarju Bêkou ma għandux qafas għall-kejl tal-prestazzjoni tiegħu fil-livell tal-fondi, peress li ma ddefinixxa l-ebda katina komprensiva ta’ riżultati għall-objettiv kumplessiv tiegħu, ta’ deskrizzjoni tar-riżultati mistennija (outputs, eżiti, impatt), u tal-indikaturi korrispondenti³⁶. Pereżempju, filwaqt li l-Ftehim Kostituttiv u dokumenti oħra jagħtu indikazzjoni ta’ x’jista’ jkun mistenni minnu (isaħħaħ ir-reżiljenza, itejjeb il-koordinazzjoni, iwassal l-għajnuna aktar malajr, jimmobilizza massa kruċjali ta’ finanzjament, jipprovdi viżibbiltà politika), dawn l-elementi ma ġewx żviluppati f’objettivi SMART³⁷.

Sa tmiem l-2016, ma kien hemm l-ebda proċess sistematiku stabbilit għall-identifikazzjoni tat-tagħlimiet meħuda mill-esperjenza tal-Fond fiduċjarju Bêkou li jkunu jistgħu jgħinu lill-Kummissjoni ttejjeb it-tfassil u l-ġestjoni tal-fondi fiduċjarji. Madankollu, twettqu bosta azzjonijiet li huma rilevanti għal eżerċizzju bħal dan. Azzjonijiet ta’ dan it-tip jinkludu l-pubblikazzjoni ta’ diversi artikli dwar il-Fond fiduċjarju Bêkou, l-organizzazzjoni ta’ konferenzi, sessjonijiet ta’ ħidma u laqgħat, b’mod partikolari ma’ rappreżentanti tal-fondi fiduċjarji tal-UE, u preżentazzjonijiet.

Fil-livell tal-proġetti, l-objettivi, ir-riżultati u l-attivitajiet huma ddefiniti. Madankollu, 2 mill-11-il proġett ma għandhomx indikaturi, u għal 8 proġetti, l-indikaturi huma vagi jew ma għandhomx miri. Kwistjonijiet simili nstabu fil-livell tal-kuntratti: xi objettivi huma biss parzjalment SMART, u l-indikaturi, xi drabi, mhumiex ċari jew ma għandhomx miri korrispondenti (ara l-Anness III għad-dettalji).

B’mod ġenerali, minkejja ċ-ċirkustanzi diffiċli, il-Fond fiduċjarju Bêkou kien kiseb riżultati pożittivi sa żmien l-awditu

Aħna eżaminajna r-riżultati miksuba mill-fond minn tliet perspettivi: l-għajnuna li attira, l-outputs li pproduċew il-proġetti tiegħu u l-viżibbiltà li ġġenera għall-UE. Dawn huma xi wħud mill-vantaġġi mistennija tal-Fond fiduċjarju Bêkou

Il-Fond fiduċjarju Bêkou attira l-għajnuna, iżda ma attirax wisq donaturi addizzjonali

Il-Fond fiduċjarju Bêkou kien mistenni jħeġġeġ lil donaturi ġodda biex jipprovdu għajnuna għar-RĊA u jipprovdi għajnuna addizzjonali. Oriġinarjament meqjusa bħala “orfni tal-għajnuna”, ir-RĊA bbenefikat minn għajnuna ta’ madwar USD 250 miljun kull sena fil-perjodu ta’ qabel il-kriżi tal-2012/2013 (ara l-Figura 1). Fl-2014, din l-għajnuna laħqet l-ogħla livell ta’ USD 610 miljun³⁸.

Figura 1

Ammont totali tal-għajnuna għar-RĊA, 2006-2015 (f’miljun USD)

L-għajnuna għall-iżvilupp meħtieġa biex jiġi implimentat il-Pjan Nazzjonali ta’ Rkupru u ta’ Bini tal-Paċi tammonta għal bejn wieħed u ieħor USD 3.2 biljun fuq ħames snin (2017-2021). Fil-konferenza tad-donaturi ta’ Novembru 2016, id-donaturi impenjaw lilhom infushom li jagħtu aktar minn USD 2 biljun lir-RĊA f’għajnuna għall-iżvilupp, biex b’hekk ikopru parti sostanzjali ta’ dawn il-ħtiġijiet.

Il-Fond fiduċjarju Bêkou attira l-għajnuna, b’impenji totali li ammontaw għal EUR 146 miljun sa tmiem l-2016 (ara l-Figura 2). Dan l-ammont huwa aktar mill-EUR 25 miljun li attira l-Fond fiduċjarju Ezingo tan-NU (ara l-Anness II) u kumparabbli mal-allokazzjoni bilaterali taħt il-11-il FEŻ, li huwa mistenni li jammonta għal EUR 208 miljun³⁹.

MT-CH01-PH25-1 — Figura 2

Impenji għall-Fond fiduċjarju Bêkou

Tliet kwarti tar-riżorsi tal-fond joriġinaw mill-baġit tal-UE u mill-FEŻ. Aktar minn terz ta’ din il-kontribuzzjoni huwa għajnuna addizzjonali għar-RĊA b’żieda għal dak li preċedentement kien ġie impenjat lill-pajjiż taħt mezzi oħra ta’ finanzjament mill-UE.

Franza, il-Ġermanja, l-Italja, in-Netherlands u l-Iżvizzera diġà taw għajnuna lir-RĊA qabel ma ġie stabbilit il-Fond fiduċjarju Bêkou, iżda qabel l-2014 dawn l-ammonti kienu kumparattivament baxxi. Mill-2014 ‘il quddiem, l-għajnuna ngħatat permezz tal-fond kif ukoll permezz ta’ mezzi oħra ta’ għajnuna (ara l-Kaxxa 4 għal aktar dettalji dwar l-attività tad-donaturi fir-RĊA).

Il-Parlament Ewropew stieden darbtejn lill-Istati Membri biex iżidu l-kontribuzzjonijiet tagħhom għall-Fond fiduċjarju Bêkou. Fl-2016, matul il-kwittanza tal-baġit tal-Fondi Ewropej għall-Iżvilupp għall-2014, huwa appella biex l-”Istati Membri jsiru aktar involuti sabiex jiżguraw li dan il-fond isir operattiv b’mod sħiħ”⁴⁰.

Xi Stati Membri jkomplu jappoġġaw il-fondi fiduċjarji tan-NU, kif kienu għamlu qabel il-Fond fiduċjarju Bêkou (ara l-Anness II). Il-Fond Umanitarju tan-NU għar-RĊA għandu 11-il donatur, inklużi l-Belġju, id-Danimarka, il-Ġermanja, l-Irlanda, il-Lussemburgu, in-Netherlands, l-Iżvezja, l-Iżvizzera u r-Renju Unit. Franza u n-Netherlands huma wkoll donaturi għall-Fond fiduċjarju Ezingo tan-NU.

Il-biċċa l-kbira mill-proġetti taw l-outputs li kienu mistennija minnhom f’kuntest diffiċli

L-implimentazzjoni ta’ 20 minn 31 kuntratt relatati mal-11-il proġett kienet fi stadju avvanzat biżżejjed biex stajna nivvalutaw il-prestazzjoni, tal-inqas parzjalment. Filwaqt li l-valutazzjoni li wettaqna kienet suġġetta għal xi limitazzjonijiet⁴¹, aħna nqisu li l-biċċa l-kbira mill-proġetti taw l-outputs li kienu mistennija minnhom.

Tliet kuntratti (żewġ studji u kuntratt ta’ assistenza teknika) taw l-outputs li kienu mistennija minnhom kompletament. Għal 11-il kuntratt, il-biċċa l-kbira mill-outputs inkisbu (ara l-Kaxxa 6 għal eżempju). Sitt kuntratti li għadhom għaddejjin kienu għadhom ma kisbux l-outputs tagħhom sa tmiem l-2016, u hemm riskju li dawn għandhom mnejn ma jinkisbux sa tmiem il-proġett (ara l-paragrafu 65 għad-dettalji). L-Anness III jagħti valutazzjoni aktar dettaljata għal kull kuntratt.

Kaxxa 6

Eżempju ta’ outputs: il-proġett dwar is-saħħa

Sitt NGOs irċevew għajnuna mill-Fond fiduċjarju Bêkou sabiex ikunu jistgħu jgħinu lil 80 faċilità tas-saħħa fir-RĊA kollha biex jipprovdu servizzi tas-saħħa primarja aħjar lill-popolazzjoni lokali.

Din l-għajnuna rriżultat f’madwar 2 miljun konsultazzjoni medika. L-NGOs qabżu l-miri ssettjati għal bosta indikaturi, bħall-għadd ta’ konsultazzjonijiet, l-għadd ta’ twelid assistiti u l-għadd ta’ nisa li saritilhom żjara medika. F’dawn il-faċilitajiet, il-kura tas-saħħa, il-mediċini u t-testijiet fil-laboratorju ġew ipprovduti mingħajr ħlas għat-tfal, għan-nisa tqal u dawk li jreddgħu, u f’emerġenzi ta’ theddid għall-ħajja.

L-attivitajiet ippjanati fil-livell ta’ faċilitajiet tas-saħħa, bħal rinnovament, taħriġ tal-persunal, forniment ta’ mediċini essenzjali u ta’ tagħmir tal-laboratorju, kif ukoll attivitajiet ta’ koordinazzjoni u ta’ sorveljanza distrettwali kienu qed jitwettqu fil-ħin jew b’dewmien minimu. Pereżempju, fi Bria, sitta mit-tmien faċilitajiet tas-saħħa kienu ġew rinovati, filwaqt li f’Vakaga, seba’ faċilitajiet tas-saħħa kienu ġew rinovati u mgħammra.

**L-għoti ta’ servizzi mediċi f’diversi faċilitajiet tas-saħħa madwar il-pajjiż permezz tal-proġett dwar is-saħħa.**
© L-Assoċjazzjoni tas-Salib l-Aħmar fi Franza.

Firxa wiesgħa ta’ fatturi kemm interni kif ukoll esterni kkontribwew għall-każijiet fejn l-objettivi ma ntlaħqux, bl-aktar wieħed importanti jkun il-kuntest ta’ sigurtà diffiċli li fih twettqu l-proġetti (ara l-Anness III).

Filwaqt li nkisbu ħafna outputs tanġibbli, ir-riżultati b’effetti aktar fundamentali u fuq terminu twil tipikament jieħdu aktar żmien biex jinkisbu. Pereżempju, fil-proġett dwar is-sigurtà alimentari, il-kampanji ta’ tilqim tal-bhejjem irnexxew, filwaqt li l-prevenzjoni ta’ kunflitti u t-tfassil mill-ġdid tar-rotot ta’ mergħat nomadiċi jistgħu jkunu jeħtieġu li jitkomplew f’fażi eventwali oħra. Fil-proġett dwar is-saħħa, filwaqt li l-ewwel fażi tal-forniment ta’ servizzi tas-saħħa mis-sitt NGOs irnexxiet, u filwaqt li studju dwar ir-riforma tal-aġenzija nazzjonali għax-xiri ta’ farmaċewtiċi twettaq kif kien ippjanat, l-azzjonijiet għar-riforma tas-servizzi pubbliċi tas-saħħa jeħtieġu aktar żmien.

**“Paillottes” huma għarajjex tradizzjonali tat-tiben użati bħala żoni ċentrali għal-laqgħat fil-komunitajiet.**
© L-Assoċjazzjoni tas-Salib l-Aħmar fi Franza.

Il-fond jipprovdi viżibbiltà akbar lill-UE

Il-Fond fiduċjarju Bêkou kien mistenni jipprovdi viżibbiltà lill-UE, kemm permezz ta’ azzjonijiet imwettqa fil-livell tal-proġetti kif ukoll fil-forma ta’ viżibbiltà politika fil-livell tal-fondi.

Is-sħab tal-proġetti wettqu ħafna attivitajiet fuq il-post. Dawn kienu jinkludu l-produzzjoni ta’ materjal promozzjonali, dokumentarji u artikli akkademiċi, kif ukoll l-organizzazzjoni ta’ sessjonijiet ta’ ħidma nazzjonali dwar ir-riżultati ta’ attivitajiet, ċerimonji u sessjonijiet ta’ taħriġ, xandiriet tar-radju, żjarat mill-ġurnalisti eċċ., f’konformità mal-pjanijiet tagħhom għall-viżibbiltà.

Aktar minn 30 attività relatati mal-viżibbiltà twettqu għall-fond fl-intier tiegħu, li bejn wieħed u ieħor ammontaw għal EUR 191 000. Ir-Rapport Annwali tal-Attività 2015 tal-Fond fiduċjarju Bêkou jinkludi taqsima ddedikata għall-attivitajiet relatati mal-viżibbiltà u jippreżenta l-objettivi prinċipali tal-komunikazzjoni, avvenimenti pubbliċi ġenerali, proġetti, is-sit web “capacity4dev’”⁴² u materjal ta’ komunikazzjoni.

Ġew organizzazti bosta konferenzi li pprovdew viżibbiltà għall-UE (ara l-Kaxxa 7 għal eżempji). Delegazzjonijiet minn aktar minn 80 pajjiż minn madwar id-dinja kollha kienu preżenti f’konferenza li saret f’Novembru 2016 fi Brussell, flimkien ma’ rappreżentanti ta’ livell għoli min-Nazzjonijiet Uniti, mill-Bank Dinji u oħrajn. Din il-konferenza rriżultat f’impenji ta’ EUR 2 biljun.

Kaxxa 7

Il-Fond fiduċjarju Bêkou organizza bosta avvenimenti

It-tim tal-Fond fiduċjarju Bêkou organizza sensiela ta’ sessjonijiet ta’ ħidma, konferenzi, pubblikazzjonijiet, u stqarrijiet għall-istampa, kemm f’Bangui kif ukoll fi Brussell, li ġew koperti tajjeb mill-midja.

Pereżempju, is-sessjoni ta’ ħidma “Reżiljenza u Rkupru, it-Triq għall-Iżvilupp” (Bangui, Ġunju 2016) attirat aktar minn 200 parteċipant minn awtoritajiet nazzjonali, organizzazzjonijiet tas-soċjetà ċivili, donaturi, aġenziji tan-NU, NGOs internazzjonali u l-midja, u pprovdiet stampa ġenerali tas-sitwazzjoni fir-RĊA, l-isfidi li toħloq u l-ħtiġijiet tal-popolazzjoni. Is-sessjoni ta’ ħidma rriżultat fi 12-il rakkomandazzjoni li ġew indirizzati lill-gvern tar-RĊA, lis-sħab tal-proġetti u lid-donaturi fil-pajjiż.

Eżempju ieħor huwa l-konferenza internazzjonali ta’ livell għoli dwar ir-RĊA (Brussell, Mejju 2015), b’aktar minn 300 parteċipant inklużi l-President tar-RĊA, Ministri, Membri tal-Parlament Ewropew, rappreżentanti tan-Nazzjonijiet Uniti u NGOs. Din irriżultat f’impenji finanzjarji ġodda għall-pajjiż u żewġ donaturi ġodda għall-Fond fiduċjarju Bêkou, l-Italja u l-Iżvizzera.

Konklużjonjiet u rakkomandazzjonijiet

Il-Fond fiduċjarju Bêkou nħoloq fil-kuntest diffiċli tal-pajjiż, ikkaratterizzat minn problemi fuq il-livell umanitarju u ta’ żvilupp, kif ukoll mill-fraġilità tal-awtoritajiet tal-istat u li ma kinux kapaċi jissodisfaw il-ħtiġijiet tal-popolazzjoni. Filwaqt li aħna nemmnu li t-tfassil u l-ġestjoni tal-fond jistgħu jittejbu, kif inhu ssuġġerit hawn taħt, sabiex dan ikun jista’ jilħaq il-potenzjal sħiħ tiegħu, aħna nirrikonoxxu l-fatt li l-istabbiliment tal-fond kien xieraq u li huwa rnexxielu jikseb xi riżultati pożittivi.

L-istabbiliment tal-Fond fiduċjarju Bêkou

Il-Fond fiduċjarju Bêkou nħoloq f’perjodu ta’ żmien qasir ħafna. Filwaqt li r-Regolament Finanzjarju jimponi ċerti kundizzjonijiet fuq il-ħolqien ta’ fond fiduċjarju, il-Kummissjoni għadha ma kkonkretizzathomx f’qafas analitiku li jkun jippermettilha twettaq valutazzjoni strutturata formalment tal-vantaġġi kumparattivi ta’ fondi fiduċjarji meta mqabbla ma’ strumenti oħra ta’ finanzjament (ara l-paragrafi 13 sa 20).

L-ambitu ta’ intervent tal-Fond fiduċjarju Bêkou ma kienx ibbażat fuq analiżi komprensiva tal-ħtiġijiet. Analiżi bħal din setgħet uriet b’mod aktar ċar kif u għalfejn l-attivitajiet tal-fond huma rilevanti għall-objettiv tiegħu, u liema huma l-lakuni speċifiċi li l-fond jimla (ara l-paragrafi 21 sa 27).

Rakkomandazzjoni 1 – Tiġi żviluppata gwida ulterjuri għall-għażla tal-mezz ta’ għajnuna u għall-analiżijiet tal-ħtiġijiet li tiddefinixxi l-ambiti ta’ intervent tal-fondi fiduċjarji

Jenħtieġ li l-Kummissjoni tirfina l-linji gwida tagħha dwar il-fondi fiduċjarji tal-UE billi

tiżviluppa qafas analitiku bi prinċipji gwida għat-twettiq ta’ valutazzjoni konċiża u strutturata tal-vantaġġi kumparattivi ta’ fondi fiduċjarji meta mqabbla ma’ mezzi oħra ta’ għajnuna;
tintroduċi metodi għat-twettiq ta’ analiżijiet tal-ħtiġijiet biex jintwera li l-ambitu ta’ intervent ta’ fond fiduċjarju intenzjonat ikun xieraq, u biex jintwera liema huma l-lakuni speċifiċi li l-fond jimla.

Jenħtieġ li din il-gwida titfassal b’tali mod li l-proċess ta’ ħolqien tal-fondi fiduċjarji ma jittawwalx bla meħtieġ u li l-flessibbiltà tal-fondi tagħhom ma tkunx limitata.

Data għall-implimentazzjoni: Ottubru 2018

Il-ġestjoni tal-Fond fiduċjarju Bêkou

Il-Fond fiduċjarju Bêkou kellu influwenza limitata fuq il-koordinazzjoni fost il-partijiet interessati, kemm internament fost id-donaturi tiegħu kif ukoll esternament mal-komunità internazzjonali. Madankollu, anke mingħajr mekkaniżmi formali, ir-rappreżentant tal-Fond fiduċjarju Bêkou f’Bangui rnexxielu, permezz ta’ prattika tajba, jiżgura xi livell ta’ koordinazzjoni fuq il-bażi ta’ proġetti individwali (ara l-paragrafi 29 sa 35).

Minħabba n-nuqqas ta’ dettalji dwar il-proċeduri effettivi tal-għażla applikabbli għall-Fond fiduċjarju Bêkou, il-mod ta’ kif l-organizzazzjonijiet inkarigati mill-implimentazzjoni ntgħażlu mhuwiex trasparenti għalkollox. Tqajmu kunflitti potenzjali ta’ interess fir-rigward ta’ ftehimiet ta’ kooperazzjoni ddelagata. Seta’ jiġi ffrankat ħin addizzjonali waqt id-diskussjonijiet dwar il-kontenut tal-proġetti (ara l-paragrafi 36 sa 44).

B’mod ġenerali, it-tariffa tal-ġestjoni ta’ 5 % imposta mill-Fond fiduċjarju Bêkou hija konformi ma’ mezzi oħra ta’ għajnuna għall-iżvilup, iżda għadhom ma ġewx ikkalkulati l-ispejjeż kollha relatati mal-ġestjoni. Barra minn hekk, bħalma hu l-każ għall-għajnuna kollha għall-iżvilupp, l-ispiża totali għat-twassil tal-għajnuna hija aktar minn sempliċiment it-tariffa tal-ġestjoni tal-fond (ara l-paragrafi 46 sa 49). Aħna nemmnu li huwa importanti li jkunu magħrufa l-ispejjeż kollha relatati mal-użu tal-fond fiduċjarju bħala strument ta’ finanzjament, biex b’hekk fil-futur il-Kummissjoni tkun tista’ tivvaluta jekk dan huwiex strument kosteffettiv, meta mqabbel ma’ modi oħra ta’ twassil tal-għajnuna mill-UE.

Fil-livell tal-fondi, il-Fond fiduċjarju Bêkou ma għandu l-ebda qafas għall-kejl tal-prestazzjoni tiegħu, peress li l-objettivi speċifiċi tiegħu, bl-indikaturi korrispondenti għadhom ma ġewx żviluppati. Dan jagħmilha diffiċli biex il-fond jiġi mmonitorjat u biex ir-riżultati li jikseb jiġu evalwati. Il-Kummissjoni għad ma għandhiex proċess sistematiku biex tidentifika t-tagħlimiet meħuda permezz tal-Fond fiduċjarju Bêkou, li jkunu jistgħu jgħinuha ttejjeb it-tfassil u l-ġestjoni tal-fondi fiduċjarji (ara l-paragrafi 50 sa 53).

Rakkomandazzjoni 2 – Isir titjib fil-koordinazzjoni mid-donaturi, il-proċeduri tal-għażla u l-kejl tal-prestazzjoni, u l-ispejjeż amministrattivi jiġu ottimizzati

Jenħtieġ li l-Kummissjoni

tikkoordina b’mod aktar sistematiku l-għajnuna pprovduta permezz tal-Fond fiduċjarju Bêkou ma’ għajnuna bilaterali oħra pprovduta mid-donaturi tal-fond;
tiżgura li meta jiġu applikati r-regoli u l-proċeduri tal-Kummissjoni biex jintgħażlu l-organizzazzjonijiet inkarigati mill-implimentazzjoni, kull eċċezzjoni li ssir għal dawk ir-regoli tiġi rrappurtata b’mod ċar u tiżgura li jiddaħħlu d-dispożizzjonijiet dwar kif għandhom jiġu evitati l-kunflitti ta’ interess, kif ukoll tesplora modi ta’ kif tista’ tiżdied il-veloċità tal-proċeduri tal-għażla, b’mod partikolari fil-fażi ta’ diskussjonijiet dwar il-kontenut tal-proġetti;
tikkalkula l-ispejjeż kollha relatati mal-ġestjoni tal-Fond fiduċjarju Bêkou u ssib modi kif timmassimizza l-ammont ta’ għajnuna li tingħata lill-benefiċjarji finali;
tissettja objettivi SMART għall-Fond fiduċjarju Bêkou flimkien ma’ indikaturi korrispondenti, sabiex tkun tista’ timmonitorja u turi l-vantaġġi li l-fond jagħti, u tintroduċi proċess ta’ tagħlimiet meħuda fil-linji gwida tagħha dwar il-fondi fiduċjarji tal-UE.

Data għall-implimentazzjoni: Ottubru 2018

Ir-riżultati miksuba mill-Fond fiduċjarju Bêkou

Il-Fond fiduċjarju Bêkou attira l-għajnuna, b’impenji totali li ammontaw għal EUR 146 miljun sa żmien l-awditu. Madankollu, il-biċċa l-kbira mill-fondi joriġinaw mill-baġit tal-UE u mill-Fond Ewropew għall-Iżvilupp. Id-donaturi l-oħra kollha kienu taw għajnuna lir-RĊA qabel ma ġie stabbilit il-fond, iżda qabel l-2014 dawn l-ammonti kienu kumparattivament baxxi (ara l-paragrafi 55 sa 61).

Fil-livell tal-proġetti, minkejja kuntest ta’ sigurtà li ta’ spiss kien diffiċli, 14-il kuntratt minn 20 taw l-outputs kollha li kienu mistennija minnhom, jew il-biċċa l-kbira minn dawn l-outputs (ara l-paragrafi 62 sa 65).

Il-fond jipprovdi viżibbiltà akbar lill-UE. Is-sħab tal-proġetti wettqu attivitajiet fuq il-post li kienu relatati mal-viżibbiltà, u aktar minn 30 attività twettqu b’suċċess għall-fond fl-intier tiegħu (ara l-paragrafi 66 sa 69).

Dan ir-Rapport ġie adottat mill-Awla III, immexxija mis-Sur Karel PINXTEN, Membru tal-Qorti tal-Awdituri, fil-Lussemburgu, fil-laqgħa tagħha tal-20 ta’ Ġunju 2017.

Għall-Qorti tal-Awdituri

Klaus-Heiner LEHNE
President

Annessi

Anness I

Lista ta’ proġetti u kuntratti

Anness II

Lista ta’ seba’ fondi fiduċjarji tan-NU li joperaw fir-RĊA

Sorsi: http://mptf.undp.org, www.unocha.org/cerf mis-16 ta’ Marzu 2017.

Anness III

Evalwazzjoni tal-ilħuq tal-objettivi fir-rigward tal-outputs tal-proġetti permezz ta’ kowds tal-kuluri

Didaskalija: aħdar – inkisbu għalkollox, isfar – fil-biċċa l-kbira nkisbu; oranġjo – fil-biċċa l-kbira (għadhom) ma nkisbux; aħmar – ma bkisbux; griż – mhux ivvalutati, implimentazzjoni mhux avvanzata biżżejjed.

Dettalji: Il-Kuntratt Nru 2: durata estiża b’xahar u nofs; il-Kuntratt Nru 3: durata estiża b’xahar; il-Kuntratt Nru 5: il-kontribuzzjoni mill-UE żdiedet minn EUR 1.7 miljun għal EUR 2.2 miljun; il-Kuntratt Nru 8: il-kontribuzzjoni mill-UE żdiedet minn EUR 47 000 għal EUR 53 000 u d-durata ġiet estiża b’5 xhur; il-Kuntratt Nru 18: id-durata ġiet estiża bi 8 xhur.

Risposta tal-Kummissjoni

Sommarju eżekuttiv

Fir-Repubblika Ċentru-Afrikana (CAR) faqqgħet kriżi ta’ kobor bla preċedent fl-2013/2014 li wasslet għal vjolenza bejn il-komunitajiet, ikkwalifikata minn analisti bħala “ta’ qabel ġenoċidju” fil-karatteristiċi tagħha, u d-dgħufija ta’ funzjonijiet bażiċi tal-istat. Minbarra l-azzjoni umanitarja, kien hemm bżonn kbir ta’ appoġġ kuraġġuż għar-reżiljenza.

III

Il-CAR għaddiet minn kriżijiet rikorrenti. Il-CAR, imdawra bl-art u skartata mill-komunità internazzjonali (“orfni tal-għajnuna”), qed tiffaċċja sfidi strutturali biex tegħleb il-faqar.

Il-Fond Fiduċjarju ta’ Bekou (BTF) huwa l-ewwel Fond Fiduċjarju maħluq mill-UE. Bħala tali, il-kisbiet u l-prestazzjoni tiegħu huma mirfuda minn titjib kontinwu, innovazzjoni u tagħlim. Il-BTF jislet minn lezzjonijiet meħuda minn atturi simili fuq il-bażi ta’ studji eżistenti u valutazzjonijiet ta’ reżiljenza u kooperazzjoni għall-iżvilupp f’sitwazzjonijiet ta’ fraġilità.

L-analiżi mwettqa qabel il-ħolqien tal-BTF ħadet rendikont tal-għadd ta’ studji u analiżi li saru minn imsieħba li huma l-aktar impenjati fil-CAR u f’sitwazzjonijiet ta’ fraġilità.

Il-BTF fetaħ toroq ġodda ta’ kif jiġu kkoordinati l-azzjonijiet immexxija mill-UE u l-Istati Membri tagħha li sa issa ma ġewx sfruttati għalkollox f’dan l-istadju.

Fil-fehma tal-Kummissjoni, meta wieħed jikkunsidra t-tul kollu taċ-ċiklu tal-proġett, il-veloċità ġenerali tal-Bêkou hija ogħla minn dik ta’ strumenti oħra tal-UE f’sitwazzjoni ta’ kriżi. Madankollu, il-Kummissjoni taqbel li hi se tesplora modi biex iżżid il-ħeffa tal-proċeduri tal-għażla lil hinn minn dak li jippermettu bħalissa r-regoli interni filwaqt li jinstab bilanċ tajjeb bejn il-ħeffa u t-trasparenza.

Il-mekkaniżmi ta’ monitoraġġ u evalwazzjoni huma żviluppati fil-livell tal-proġett u se jiġu gradwalment imtejba fil-livell tal-fond.

VIII

Dwar it-tieni punt, il-BTF jagħti l-opportunità lill-membri tiegħu biex ikomplu jikkoordinaw. Rigward il-koordinazzjoni tad-donaturi ġenerali, is-sitwazzjoni evolviet b’mod pożittiv: Il-proċess Resilience et Consolidation de la Paix en Centrafrique (RCPCA) imniedi f’Novembru 2016 wara l-konferenza tad-donaturi fi Brussell issa beda u l-koordinazzjoni tad-donaturi kollha qed issir mill-gvern tal-CAR appoġġat minn “segretarjat permanenti”.

Fir-rigward tal-proċeduri tal-għażla u l-kejl tal-prestazzjoni, il-BTF iġġenera u jibqa’ gradwalment jintroduċi titjib, innovazzjoni u tagħlim.

Fir-rigward tal-ispejjeż amministrattivi, wara rakkomandazzjoni maħruġa mis-Servizz tal-Awditjar Intern tagħha, il-Kummissjoni diġà fasslet pjan ta’ azzjoni biex tindirizza dan il-punt u bħalissa qed timplimenta l-azzjonijiet maħsuba.

Daħla

L-UE, id-donattriċiewlieni umanitarja u għall-iżvilupp, ilha għal żmien twil mingħajr ebda għażla oħra ħlief li tiffinanzja lill-BD jew il-Fondi Fiduċjarji amministrati min-NU sabiex ikun hemm reazzjoni għal kriżijiet naturali jew dawk ikkawżati mill-bniedem. Għalkemm dawn il-fondi fiduċjarji seta’ kellhom valur miżjud, l-UE, hi u tibni fuq it-Trattat ta’ Lisbona, fuq l- “approċċ komprensiv” u fuq “l-Istrateġija Globali tal-UE dwar il-Politika Barranija u ta’ Sigurtà” stabbiliet l-għodda tagħha stess biex ikollha rwol attiv f’tali sitwazzjonijiet, b’mod speċjali fil-CAR, fejn l-UE hija impenjata b’mod qawwi bl-istrumenti disponibbli kollha tagħha mobilizzati.

Ġie miftiehem bejn is-sħab fundaturi tal-BTF, fuq il-bażi tal-analiżi tagħhom tal-ħtiġijiet u l-profil ta’ vulnerabbiltà tal-pajjiż li r-reżiljenza kienet l-aktar qasam mhux iffinanzjat u l-aktar wieħed relevanti għal Kollegament bejn l-Għajnuna, ir-Riabilitazzjoni u l-Iżvilupp (LRRD) sabiex il-CAR titbiegħed mill-kriżi u tersaq lejn l-istabbiltà.

Għal bosta snin, il-CAR kienet orfni tal-għajnuna. Iż-żieda kbira tal-ODA lejn il-CAR bejn l-2015 u l-2016 hi dovuta l-aktar għal żieda f’daqqa tal-ħtiġijiet li rriżultaw mill-kriżi u l-intervent umanitarju sussegwenti ta’ dawn l-inizjattivi. F’dak li għandu x’jaqsam mal-għajnuna programmabbli fuq medda twila ta’ żmien, il-ħtiġijiet tal-pajjiż mhumiex iffinanzjati biżżejjed. Il-BTF huwa katalista għall-impenn tad-donaturi għal perjodu qasir, medju u twil ta’ żmien f’dan ir-rigward.

Osservazzjonijiet

L-UE, sieħba ewlieni u li ilha teżisti għall-iżvilupp tal-CAR, qatt ma għalqet l-operazzjonijiet bilaterali tagħha, anki tul l-agħar fażi tal-kriżi. L-uffiċċju umanitarju tagħha baqa’ miftuħ matul il-kriżi u ġie attribwit baġit ulterjuri biex jissodisfa l-ħtiġijiet urġenti. Sadattant, l-UE nediet operazzjoni militari tal-UE (EUFOR) biex tistabbilizza l-pajjiż. Sabiex tappoġġa lil CAR biex timxi minn stat ta’ wara l-kriżi għal fażi ta’ stabbiltà, kien hemm bżonn ta’ attivitajiet ibbażati fuq reżiljenza b’mod urġenti, għalhekk inħolqot għodda speċifika mfassla biex tidentifika u timplimenta tali proġetti ta’ benefiċċju għall-popolazzjoni u t-tisħiħ tal-kapaċitajiet tal-awtoritajiet pubbliċi.

Il-BTF jopera fuq il-bażi ta’ ġestjoni ċentralizzata minħabba l-ħtieġa li jagħti riżultati mgħaġġla f’perjodu ta’ żmien meta l-gvern ta’ tranżizzjoni ma kienx f’pożizzjoni li jwettaq ir-responsabbiltajiet kollha u l-operazzjonijiet li jirriżultaw minn ġestjoni deċentralizzata.

Il-kunsens bejn l-UE u l-Istati Membri tagħha ħareġ immedjatament fuq i) il-prinċipju li tintervjeni fil-CAR biex issaħħaħ ir-reżiljenza, ii) dwar il-bżonn li timxi lil hinn minn prattiki standard minħabba n-natura speċifika tal-kriżi u l-fraġilità tas-sitwazzjoni.

Kaxxa 1

L-aġenda tal-effikaċja tal-għajnuna wriet il-valur miżjud tagħha f’sitwazzjonijiet “regolari” u hija kruċjali għall-UE. Madankollu, din l-aġenda ma teskludix li d-donaturi milli jindirizzaw l-ħtiġijiet urġenti ta’ pajjiż li għadda minn sitwazzjoni ta’ “qabel ġenoċidju” b’wieħed minn kull ħamsa tal-popolazzjoni soġġett għal ċaqliq sfurzat/migrazzjoni speċjalment meta l-mezzi eżistenti tal-għajnuna ma kinux kapaċi jwasslu r-riżultati mistennija jew mhux kapaċi jiżguraw l-LRRD fil-CAR.

L-UE ma ħasbitiex darbtejn qabel nediet il-BTF b’diversi żjajjar ta’ dik li kienet il-Kummissarju Georgieva għall-CAR fl-2013 u l-2014 u sensiela ta’ workshops dwar l-aħjar metodi biex tiġi indirizzata r-reżistenza/l-isfida tal-LRRD fil-pajjiż peress li l-għajnuna umanitarja ma kinitx biżżejjed u lanqas maħsuba biex iġġib impatt fit-tul.

Il-Kummissjoni, flimkien mal-imsieħba prinċipali impenjati, debitament evalwat il-valur miżjud ta’ Fond Fiduċjarju u r-rilevanza ta’ reżiljenza/tal-approċċ tal-LRRD lejn il-CAR.

Waqt li kienet qed twettaq l-analiżi meħtieġa qabel il-ħolqien tal-BTF, il-Kummissjoni ma kinitx f’pożizzjoni li tagħti bidu għal valutazzjoni/proċess twil li kien jixħet dubju dwar il-ħila tal-UE bħala attur kredibbli, affidabbli u effiċjenti fl-indirizzar ta’ sitwazzjonijiet ta’ emerġenza.

Il-Kummissjoni tixtieq tenfasizza d-differenzi bejn l-użu u l-finijiet tal-BD u n-NU TF u l-għan intiż mil-leġiżlatur meta ġew introdotti l-fondi fiduċjarji tal-UE fir-Regolament Finanzjarju (FR).

L-EUTF Békou huwa “Fond Fiduċjarju ta’ emerġenza”, li fil-ħolqien u l-implimentazzjoni tiegħu jirrikjedi veloċità.

Il-Ġestjoni tal-Fondi Fiduċjarji hija waħda mir-rwoli ewlenin tal-BD. Il-BD jamministra mijiet ta’ TFs, filwaqt li għall-Kummissjoni, din mhijiex l-għodda standard tal-implimentazzjoni.

Peress li l-EUTFs huma fl-istadji bikrin tal-iżvilupp, il-fatt li wieħed joqgħod iqabbel man-NU u TFs tal-BD jista’ ma jkunx totalment rilevanti f’dan il-mument.

Analiżi strutturata u dokumentata mhix rekwiżit tar-Regolament Finanzjarju. L-Art. 187(3) jispeċifika biss li l-Fondi Fiduċjarji jridu jikkonformaw ma’ għadd ta’ kundizzjonijiet. Ma hemm l-ebda talba biex il-mod kif dawn il-kundizzjonijiet jiġu verifikati jiġi formalizzata b’xi mod.

Il -Kummissjoni segwiet u rrispettat id-dispożizzjonijiet tal-qafas legali tagħha stess, jiġifieri l-FR. Il-kundizzjonijiet stabbiliti fl-FR huma tradotti fil-Linji Gwida tal-Fondi Fiduċjarji tal-UE ppubblikati fil-Manwal tad-DEVCO.Dawn il-linji gwida ġew abbozzati qabel il-ħolqien tal-ewwel EUTF, u huma maħsuba biex jiġu aġġornati regolarment fuq il-bażi tal-lezzjonijiet meħuda minn Fondi Fiduċjarji li jeżistu bħalissa.

Id-deċiżjoni tal-ħolqien tat-TF tistrieħ fuq l-analiżi tal-kriżi u r-rispons meħtieġ u hija ssostanzjata fid-deċiżjoni li ħolqot il-Fond Fiduċjarju.

Jekk jogħġbok ara t-tweġiba għall-paragrafu 19.

Fl-2014, il-CAR kienet orfni tal-għajnuna u kienet lejn l-aħħar tal-klassifika tal-Indiċi tal-Iżvilupp tal-Bniedem tal-UNDP. Diversi studji u analiżi, inklużi dawk li saru mill-UNDP (speċjalment l-indikaturi tas-saħħa u n-nuqqas ta’ aċċess għal servizzi bażiċi), u l-identifikazzjoni tar-reżiljenza bħala l-aktar qasam mhux iffinanzjat fil-CAR inkwadrat il-mandat tal-BTF madwar l-appoġġ għal servizzi bażiċi, rikonċiljazzjoni (bħala sitwazzjoni ta’ wara l-kriżi), u l-ħolqien ta’ impjiegi (biex tiskoraġġixxi t-tentazzjoni ta’ żgħażagħ biex jingħaqdu ma’ gruppi armati).

Il-Kummissjoni temmen li saret analiżi adegwata matul il-Workshop ta’ Frar 2014.

Barra minn hekk dan il-workshop bena fuq analiżi konġuta tal-kunflitt bejn l-UE u n-NU organizzata ftit jiem qabel.

Barra minn hekk, l-istrateġija nazzjonali Programme d’Urgence et de Relevement Durable (PURD), adottata f’Lulju 2014, li tkopri l-attivitajiet tad-donaturi kollha għall-perjodu 2014–2016 tistabbilixxi valutazzjoni ċara tal-ħtiġijiet.

F’Lulju 2014, b’rabta mal-PURD, ġiet elaborata matriċi tal-ħtiġijiet (settur/tema), bi prijoritizzazzjoni ċara (fuq terminu qasir/medju/fit-tul), u ppreżentat azzjonijiet li għandhom jiġu ffinanzjati li jaqgħu f’LRRD u stabbiliet diviżjoni tax-xogħol bejn l-istrumenti tal-UE u donaturi oħrajn.

B’kunsiderazzjoni tal-limitu qasir ta’ żmien tal-istabbiliment tal-Fond Fiduċjarju Bekou, iddettat mis-sitwazzjoni ta’ kriżi fil-CAR, analiżi bir-reqqa kien ikollha bżonn aktar ħin u riżorsi. Tali analiżi twettqet aktar tard f’koordinazzjoni man-NU, il-BD u l-Gvern tal-CAR u wasslet għall-formulazzjoni ta’ pjan ta’ rilanċ nazzjonali u tal-bini tal-paċi bejn l-2017 u l-2021.

Ir-reżiljenza mhijiex suġġett ġdid fil-kooperazzjoni għall-iżvilupp. Ir-reżiljenza ġiet definita u vvalutata bis-sħiħ mill-KE (ara COM(2012)586 dwar ir-reżiljenza) biex tiġi indirizzata l-lakuna u r-rabta bejn l-azzjoni umanitarja u l-kooperazzjoni għall-iżvilupp. Din il-Komunikazzjoni tibni fuq l-esperjenza mnedija mill-Kummissjoni fis-Saħel bl-inizjattiva tagħha “AGIR” u fil-Qarn tal-Afrika bil-pjan tagħha “SHARE”.

Il-Kummissjoni tirrikonoxxi l-valutazzjoni pożittiva tal-Qorti.

Hija prattika tajba tal-LRRD li xi proġetti umanitarji li preċedentament kienu ffinanzjati mill-Kummissjoni għaddew f’idejn il-BTF. Dan huwa l-każ pereżempju għal proġetti tas-saħħa. Il-loġika prevalenti f’dan il-każ hija li meta jkun hemm titjib fil-kuntest b’xi żoni tal-pajjiż li jkunu qed joħorġu minn sitwazzjoni ta’ kriżi akuta u jersqu lejn l-istabbilità, dak ikun il-mument addattat biex l-għajnuna umanitarja toħroġ minn dawn iż-żoni biex tikkonċentra fuq żoni aktar urġenti/instabbli, fejn il-ħtiġijiet li jissalvaw il-ħajjiet huma aktar akuti. F’dawn il-każijiet il-fatt li l-BTF ħa f’idejh dawn l-inizjattivi jippermetti l-kontinwità tas-servizzi b’opportunità li jintervjeni b’mod aktar strutturat, b’involviment akbar ta’ ministeri rilevanti.

Kaxxa 2 (c)

Il-BTF għandu d-dover li jadatta u jaġġusta l-interventi tiegħu għall-evoluzzjoni tas-sitwazzjoni volatili u li jaħdem fuq il-koordinazzjoni ma’ donaturi oħrajn. Dan huwa preċiżament dak li ġara biż-żewġ eżempji li ġejjin: proġetti previsti permezz ta’ strumenti oħrajn (baġit għas-sigurtà tal-ikel u l-FEŻ għall-Ecofaune) ma setgħux jitnedew bil-karatteristiċi inizjali tagħhom. Ġew ittrasferiti għall-BTF sabiex jiġu implimentati b’komponenti/objettivi aġġustati sabiex jissodisfaw bl-aħjar mod l-aġenda ta’ reżiljenza.

F’dak li għandu x’jaqsam mar-raġuni tal-eżistenza tal-EUTF, il-fondi ma kinux miġbura jew trasferiti lin-NU (FAO), iżda kkuntrattati direttament mas-sħab ta’ implimentazzjoni, u l-UE kienet f’pożizzjoni li tissorvelja l-attivitajiet. Barra minn hekk, fejn l-FAO ħarġet bħala l-uniku sieħeb, il-BTF irnexxielu jinnegozja biss 5 % tat-tariffi amministrattivi minflok 7 %.

Kaxxa 2 (d)

Fir-rigward tal-ECOFAUNE + huwa ħafna aktar minn sempliċi kontinwazzjoni tal-ECOFAUNE-RCA li ġie mniedi fl-2012. L-eks proġett tal-ECOFAUNE kien prinċipalment ibbażat fuq l-attivitajiet transumanzi, filwaqt li l-ECOFAUNE+ il-ġdid ikopri i) l-iżvilupp tat-territorju (“aménagement du territoire”) b’rabta mal-proċess ta’ deċentralizzazzjoni u ii) l-opportunitajiet tal-għajxien (taħriġ vokazzjonali u mikroproġetti). Barra minn hekk, il-kuntest mhux biss inbidel drastikament wara l-2012, iżda l-modalità tal-implimentazzjoni kellha tinbidel minn Devis Programme (DP) għal allokazzjoni.

Il-koordinazzjoni tad-donaturi hija r-responsabbiltà tal-gvern; fil-każ tal-CAR, sa issa ma kien hemm l-ebda qafas ta’ koordinazzjoni minħabba sitwazzjoni prevalenti ta’ kriżi jew ta’ wara l-kriżi.

Il-Valutazzjoni dwar l-Irkupru u l-Bini tal-Paċi (imsemmija RCPCA), li bdiet f’nofs l-2016, u approvata mill-Gvern tal-CAR, issa wasslet għall-ħolqien ta’ Segretarjat inkarigat mill-koordinazzjoni tad-donaturi kollha involuti fil-CAR u mis-segwitu tal-Konferenza. Il-BTF għandu parti attiva f’tali segwitu, l-aktar reċenti matul il-missjoni tiegħu fuq il-post fil-CAR mis-16 sat-23 ta’ Mejju 2017.

Il-BTF se jiffoka prinċipalment fuq il-pilastru 2 (“kuntratt soċjali bejn l-istat u l-popolazzjoni”) permezz tas-saħħa u s-sigurtà alimentari/l-iżvilupp rurali u l-pilastru 3 (ħolqien tal-impjiegi) biex tiġi żgurata sostenibbiltà aħjar. Il-Gvern tal-CAR għandu jkun fil-pożizzjoni prinċipali sa fejn għandu x’jaqsam id-diviżjoni tax-xogħol; madankollu, il-Gvern il-ġdid li ħareġ mill-elezzjonijiet ta’ Marzu 2016 bil-mod il-mod qed jistabbilixxi strutturi xierqa li għandhom biżżejjed kapaċità biex iwettqu dan il-kompitu, iżda dan qed jieħu l-ħin. L-eżistenza stess tal-pjan nazzjonali ta’ rkupru u ta’ bini tal-paċi hija l-aktar bażi importanti għall-allinjament tad-donaturi mal-prijoritajiet tal-CAR. Dawn qed jiġu segwiti mill-UE permezz tal-istrumenti ta’ implimentazzjoni kollha tagħha, inkluż il-BTF.

Il-Kummissjoni tikkonferma li l-ħolqien ta’ fond fiduċjarju f’sitwazzjoni ta’ wara l-kriżi jista’ jipprovdi opportunità eċċellenti għal donaturi li jkunu jixtiequ jgħinu, jaġixxu, b’mod anqas frammentat u aktar koordinat. Il-prerekwiżit għal dan huwa li d-donaturi kollha preżenti fil-pajjiż (u speċjalment fl-Istati Membri tal-UE) jaċċettaw li jużaw il-fond fiduċjarju bħala l-uniku strument (jew għall-inqas dak maġġuri) għat-twassil tal-għajnuna tagħhom.

L-objettiv prinċipali tal-Fond Fiduċjarju, kif iddikjarat fir-Regolament Finanzjarju huwa stabbilit minn ftehim kostituttiv u jaqra kif ġej: “li jipprovdi għajnuna konsistenti, mmirata għar-reżiljenza ta’ gruppi vulnerabbli u l-appoġġ għall-aspetti kollha tal-ħruġ tar-Repubblika Ċentru-Afrikana mill-kriżi u r-rikostruzzjoni, li jikkoordina l-azzjonijiet fuq terminu ta’ żmien qasir, medju u fit-tul u biex jgħin lill-pajjiżi ġirien ilaħħqu mal-konsegwenzi tal-kriżi”.

Il-koordinazzjoni bejn id-donaturi hija inerenti għall-istruttura governattiva tal-EUTF u parti mill-objettiv tal-EUTF biex inaqqas il-frammentazzjoni tal-għajnuna. Dan l-objettiv jintlaħaq mill-eżistenza nnifisha tal-EUTF li jagħti lid-donaturi l-oħra l-possibbiltà li jgħaddu l-fondi tagħhom permezz tal-Kummissjoni. Il-Kummissjoni ma tistax timponi fuq donaturi oħra l-użu effettiv ta’ din il-possibbiltà jew le.

Il-Kummissjoni ħolqot il-mezzi għall-SM jew kwalunkwe donatur li jippuljaw il-fondi tagħhom, u b’hekk jiffavorixxu l-koordinazzjoni fuq il-post. Madankollu hija ma tinsabx f’pożizzjoni li timpedixxi lill-Istati Membri jew li xi donaturi oħra milli jniedu, iżommu jew jiddeċiedu dwar l-attivitajiet tagħhom fil-CAR.

Kaxxa 4

Il-PIN jiffoka fuq żewġ setturi li mhumiex koperti mill-BTF (appoġġ tal-baġit u governanza). Madankollu, settur 3, reżiljenza rurali u ħolqien tal-impjiegi, se jiġi implimentat permezz tal-BTF speċifikament għal skopijiet ta’ koerenza u biex jibbenefika minn esperjenza mibnija fuq il-bażi tal-proġetti kontinwi tal-BTF fil-qasam tas-sigurtà tal-ikel.

S’issa l-Bank Dinji għadu ma ħoloqx it-TF tiegħu stess. Dak li hemm ippjanat, probabbilment se jiffoka fuq l-infrastruttura, mhux koperta mill-BTF.

Il-BTF għandu l-proċess tat-teħid ta’ deċiżjonijiet u governanza tiegħu stess imsejjes fuq il-ftehim kostituttiv tiegħu. Għalhekk, ġie deċiż li din il-governanza ma tiġix distorta billi l-qafas ikkoordinat ta’ teħid ta’ deċiżjonijiet ikun obbligatorju għall-BTF.

Waqt il-laqgħat tal-Kumitat Operattiv, jintalab aġġornament mill-parteċipanti kollha dwar proġetti potenzjali ġodda sabiex jiffaċilitaw koordinazzjoni tajba bejn il-membri tal-Fond Fiduċjarju. Din l-opportunità għal koordinazzjoni msaħħa iżda mhux minn dejjem ġiet sfruttata.

Kaxxa 5

Fi Frar 2016, il-BTF organizza workshop dwar is-Saħħa immirat sabiex jislet minn lezzjonijiet mill-Fażi I u fit-tfassil tal-Fażi 2. Il-workshop issejjaħ mill-BTF u l-Ministeru tas-Saħħa, bil-parteċipazzjoni tad-donaturi u l-imsieħba l-oħra kollha tal-implimentazzjoni.

Dan it-tip ta’ koordinazzjoni ad hoc qabel l-adozzjoni tal-proġetti kollha hija l-modus operandi tal-BTF.

Il-konsultazzjonijiet huma kontinwi dwar l-aħjar mod biex jiġi żgurat rwol aktar wiesa’ tal-BTF għall-gvern tal-CAR.

Fil-fatt, l-istrument kien imfassal b’mod speċjali biex jorganizza l-għajnuna b’mod aktar mgħaġġel u barra minn hekk kien jitħalla juża proċeduri ta’ għażla flessibbli. Dawn il-proċeduri flessibbli tal-għażla huma l-istess bħal dawk applikati fi strumenti oħra tal-UE taħt sitwazzjoni ta’ kriżi. Għalhekk, il-veloċità hi mistennija li tkun simili f’kull wieħed minnhom.

L-unika proċedura li ġiet ifformalizzata bħala tali la fil-PRAG u lanqas fil-linji gwida dwar l-istrumenti tal-UE hija s-Sejħa għal espressjoni ta’ interess (CEI) speċifika għall-BTF. Madankollu, din il-proċedura tirriżulta direttament mil-linji gwida interni tal-Kummissjoni dwar kriżijiet, li tistieden Awtorità Kontraenti biex tikkunsidra l-għażliet kollha disponibbli sabiex “jiżdied” il-livell ta’ kompetizzjoni — meta mqabbla ma’ għotja diretta/proċeduri nnegozjati. Pereżempju, awtorità Kontraenti hija mħeġġa biex tistieden aktar minn kandidat wieħed għal proċedura nnegozjata jew għotja diretta.

Il-Kummissjoni tixtieq tenfasizza li meta wieħed iqabbel il-vantaġġi/żvantaġġi tat-tliet proċeduri, għandu jiġi kkunsidrat li dawn it-tliet proċeduri huma għażla tal-proċeduri magħrufa li huma effettivi f’sitwazzjonijiet ta’ kriżi.

Għalhekk, il-vantaġġi/żvantaġġi rispettivi tagħhom għandhom jitqiesu wkoll meta mqabbla mal-proċeduri l-oħra tad-DEVCO li, kif rikonoxxut mil-linji gwida dwar il-kriżi, ma jipprovdux biżżejjed flessibbiltà biex jiġu implimentati azzjonijiet speċifiċi f’sitwazzjoni ta’ kriżi jew każijiet ta’ instabbiltà strutturali fit-tul.

Il-proċeduri huma jew proċeduri standard li jistgħu jinstabu fi-PRAG jew, għas-CEI speċifika għall-BTF, proċedura misluta mil-linji gwida ta’ kriżi (li tikkonsisti fi proċedura ta’ għoti dirett preċeduta minn konsultazzjoni ikbar, bil-għan li żżid it-trasparenza u l-kompetizzjoni).

Għas-CEI speċifika għall-BTF, tiġi żgurata t-trasparenza permezz ta’ nota ta’ spjegazzjoni li tiċċara l-passi differenti għall-għażla.

Ladarba l-proċedura tal-għażla hija determinata u tintgħażel il-modalità tal-organizzazzjoni(jiet) implimentattivi (jiġifieri jew definita fil-PRAG/Companion, jew definita fid-dokument ta’ proċedura nnifsu), il-Kummissjoni tqis lilha nnfisha konformi mar-rekwiżit ta’ trasparenza FR, fejn fl-istess ħin użat id-dispożizzjonijiet ta’ flessibilità tal-ftehim Kostituttiv.

Il-Kummissjoni temmen li l-ġustifikazzjonijiet kienu jeżistu iżda ma ġewx formalizzati.

Dan hu każ wieħed li jirrigwarda Genre I li jeħtieġ li jingħata kuntest.

Fl-2014, id-Delegazzjoni tal-UE identifikat żewġ NGOs bħala l-unika NGOs internazzjonali li jaħdmu fil-qasam tal-ugwaljanza bejn is-sessi fil-CAR — b’mod partikolari f’dak li jirrigwarda attivitajiet li jiġġeneraw id-dħul. It-tnejn ġew avviċinati f’tentattiv li jinġiebu flimkien biex jaħdmu f’konsorzju. Matul in-negozjar waħda mill-NGOs irtirat mid-diskussjonijiet għaliex qieset li l-azzjoni ta’ EUR 1,5 miljun kienet limitat wisq għal konsorzju.

Fl-2016, NGOs internazzjonali ġodda ġew involuti fil-CAR. Ġiet organizzata CEI għal GENRE II biex tikkunsidra l-parteċipazzjoni possibbli ta’ sħab ġodda u biex tkopri l-komponent il-ġdid “volet politique” li ma kienx jeżisti f’GENRE I.

Il-Kummissjoni temmen li huwa evidenti kif ġew magħżula l-organizzazzjonijiet implimentattivi.

Kif imsemmi skont il-paragrafu 38, ħlief għal numru limitat ta’ kuntratti ta’ servizz, il-BTF uża tliet metodi differenti biex jagħżel l-organizzazzjonijiet li jimplimentaw il-proġetti. Il-mod li bih jintgħażlu l-organizzazzjoni(jiet) ta’ implimentazzjoni huwa jew definit fir-regoli PRAG/regoli interni oħra tal-Kummissjoni jew fid-dokument ta’ proċedura nnifsu — ara l-paragrafu 37).

Għalhekk il-Kummissjoni irrispettat ir-rekwiżit ta’ trasparenza FR, fejn fl-istess ħin użat id-dispożizzjonijiet ta’ flessibilità tal-ftehim Kostituttiv.

Id-dispożizzjonijiet ta’ flessibbiltà ippermettew li jiġi ffrankat il-ħin meta mqabbel ma’ approċċi aktar tradizzjonali. Il-ħeffa tal-proċeduri tal-għażla f’Bêkou jistgħu ikunu simili biss għal mekkaniżmi ta’ twassil ta’ għajnuna oħra tal-UE taħt sitwazzjoni ta’ kriżi peress li dawn ikunu ġejjin mill-istess regoli. Biex ikunu aktar veloċi, il-Fondi Fiduċjarji tal-UE għandhom jitħallew jimplimentaw proċeduri ta’ kriżijiet bl-aktar manjiera simplifikata filwaqt li jinżamm bilanċ bejn il-ħeffa u t-trasparenza.

Il-Kummissjoni temmen li n-numru ta’ jiem diskussi ma hix prova li d-diskussjonijiet setgħu kienu iqsar. Pereżempju, il-503 jum jirreferu għall-Irkupru Ekonomiku li huwa l-aktar proġett innovattiv u kumpless tal-BTF kif ukoll dak li l-anqas li għandu bżonn eżekuzzjoni rapida.

It-tennija rrapurtata tad-diskussjonijiet trid titqiegħed fil-perspettiva. Fl-istadji bikrin tal-BTF, ir-rotazzjoni tal-persunal kienet relattivament għolja. B’riżultat ta’ dan, xi kwistjonijiet setgħu ġew trattati f’aktar minn okkażjoni waħda.

Kienet mistennija r-retroattività fi proġetti tas-saħħa, miftiehma mal-imsieħba implimentattivi u inkwadrata. Inżammet sabiex tippermetti diskussjonijiet ewlenin li huma bbażati fuq ir-riżultati minflok dawk li huma bbażata fuq il-ħin. Ir-riżultati skont il-paragrafi 78–79 jidhru li jivvalidaw din id-deċiżjoni.

L-għażla tar-retroattività trid tiġi mqabbla ma’ alternattivi oħra disponibbli, jiġifieri l-ebda azzjoni ta’ xejn. Il-Kummissjoni qieset li kien aħjar li tiġi evitata l-lakuna f’attivitajiet li jirrikorru għar-retroattività aktar milli tiġi interrotta l-azzjoni.

L-istess japplika għall-aħħar każ ta’ retroattività, li għalih kienet antiċipata r-retroattività bi qbil mal-imsieħba implimentattivi u debitament inkwadrata.

Il-Kummissjoni tikkonferma li dan il-perċentwal huwa baxx meta mqabbla mat-tariffi tal-ġestjoni ta’ organizzazzjonijiet/strumenti oħra. Għalhekk huwa kruċjali li jiġi ppreservat bħala l-minimu meħtieġ biex jiġu żgurati l-kompiti u l-obbligi TF, speċjalment għall-fatt li t-TF hu aktar minn sempliċi ġestjoni tal-proġett.

Din hija wkoll prattika standard fl-operazzjonijiet tan-NU TF, fejn l-ispejjeż tal-persunal u dawk uffiċjali huma spejjeż diretti li ġejjin minbarra t-tariffi għall-immaniġġjar ta’ 7-8 %.

L-ispejjeż imġarrba huma rreġistrati fil-kontijiet annwali tal-BTF. Dawn il-kontijiet annwali huma ppreparati skont l-Istandards Internazzjonali tal-Kontabbiltà għas-Settur Pubbliku (IPSAS) u mmeritaw opinjoni ta’ awditjar estern bla kwalifiki mill-ħolqien tal-fond fiduċjarju.

Ir-rakkomandazzjonijiet tas-Servizz tal-Awditjar Intern tal-Kummissjoni, li fuqhom huma bbażati l-osservazzjonijiet tal-Qorti tal-Awdituri, qegħdin fil-proċess li jiġu implimentati.

Il-ġestjoni diretta għandha tinvolvi wkoll spiża peress li l-kompiti għandhom jiġu ġestiti mill-persunal tat-TF li jirrikjedi riżorsi suffiċjenti. Il-baġit tal-ispejjeż tal-persunal tat-TF jiddependi fuq żewġ fatturi ewlenin: 1) il-kontribuzzjonijiet totali u 2) il-perċentwal ta’ ħlasijiet amministrattivi. Dan il-perċentwal ġie stabbilit fil-ftehim Kostituttiv għal 5 % għall-kontribuzzjonijiet kollha meta jitqies id-daqs żgħir tat-TF ta’ Bekou u t-trasferiment possibbli tiegħu għall-CAR (l-ispiża tal-persunal fid-delegazzjonijiet huwa ogħla milli huwa fi Brussell).

Fir-rigward tal-ispejjeż ta’ kooperazzjoni ddelegata, dan il-kumment mhuwiex speċifiku għall-BTF iżda kumment ġenerali applikabbli għall-modalitajiet tal-ġestjoni tal-kooperazzjoni għall-iżvilupp. Rigward it-tabella 1 imsemmija fil-paragrafu 48, jekk jogħġbok ara l-kummenti tagħna taħt il-paragrafu 38.

Sabiex jiġi kkalkolat jekk trasferiment sħiħ ta’ persunal fil-CAR jistax jinkiseb, l-elementi li ġejjin huma meħtieġa:

Mument meta s-sitwazzjoni tas-sigurtà tippermetti dan it-trasferiment;
Il-livell ta’ kontribuzzjonijiet f’dik id-data sabiex jiġi kkalkulat l-ammont disponibbli ta’ tariffi tal-immaniġġjar;
Il-perċentwali ta’ tariffi tal-immaniġġjar permessi mill-kontribuzzjonijiet (limitu massimu amministrattiv li għad irid jiġi miftiehem mad-DĠ BUDG).

Din il-kwistjoni ser tiġi riveduta ladarba mill-anqas l-ewwel element ikun ġie riżolt.

Il-Kummissjoni tqis li l-BTF introduċa mekkaniżmi ta’ monitoraġġ fil-livell tal-proġetti. Id-DEVCO diġà qabel mal-IAS biex jistabbilixxu l-qafas ta’ prestazzjoni ewlieni għat-TFs filwaqt wieħed iżomm f’moħħu li dan huwa proċess gradwali. Id-DEVCO se jevalwa dan l-aspett importanti ladarba tkun inkisbet aktar esperjenza.

Mill-awditu sal-lum, id-DĠ DEVCO nieda żewġ inizjattivi ġodda:

it-twaqqif ta’ kumitat ta’ tmexxija EUTF ippresedut mid-Direttur Ġenerali tad-DĠ DEVCO li jinvolvi Diretturi u kull TF maniġer biex jindirizza materji ta’ interess komuni u jikkondividi lezzjonijiet meħuda f’kull aspett (governanza, proċess ta’ teħid ta’ deċiżjonijiet…) Dan il-kumitat ta’ tmexxija EUTF diġà ltaqa’ darbtejn sa mill-ħolqien tiegħu f’Marzu 2017;
ir-rendikont tal-esperjenza akkumulata s’issa u r-reviżjoni tal-linji gwida u l-mudelli DEVCO.

Barra minn hekk fl-2015 bdew laqgħat regolari ta’ timijiet inkarigati minn kwistjonijiet ta’ finanzi u ta’ kuntrattar fid-diversi TFs. Dawn kienu interrotti matul l-2016 bit-tluq mill-persunal tal-finanzi fit-TFs l-oħra. Dawn il-laqgħat komplew fi April 2017.

Ma ġiet stabbilita l-ebda mira għall-indikaturi fejn ma kienet teżisti l-ebda linja bażi jew l-ebda waħda affidabbli. Madankollu, dan ma waqqafx lill-BTF milli jaċċetta rakkomandazzjonijiet fit-tfassil ta’ proġetti bħal Santé II u meta jinnegozja kuntratti individwali.

Din il-quċċata fil-finanzjament li ntlaħqet fis-sena 2014 għandha tkun attribwita għall-finanzjament umanitarju. Il-finanzjament tal-iżvilupp kien modest meta mqabbel mal-2014.

Id-dokument RCPCA jenfasizza żewġ settijiet ta’ orizzonti, sa tliet snin u sa ħames snin, bi ħtiġijiet finanzjarji korrispondenti ta’ USD 1.6 biljun u USD 3.2 biljun rispettivament. Il-konferenza ta’ Brussell wegħdet madwar USD 2.3 biljun għalhekk altru milli se jkopri l-ewwel 3 snin tal-ħtiġijiet tal-RCPCA.

‘L-akkomunament tar-riżorsi’ hija waħda mill-benefiċċji li jġibu TFs, inkluż għall-fondi tal-UE minn sorsi differenti.

Il-Kummissjoni temmen li l-kontribuzzjoni Ġermaniża fil-CAR hi ġdida u addizzjonali fil-qasam tal-kooperazzjoni għall-iżvilupp. Il-kontribuzzjoni Franċiża żdiedet ukoll kemm ġewwa kif ukoll barra mill-BTF.

Fil-ħidma preliminari fuq it-TFs futuri huwa previst li dawn mhumiex maħsuba biex iwaqqfu d-donaturi milli jappoġġjaw l-azzjoni lil hinn mill-EUTF.

Is-sekwenzjar tal-attivitajiet fl-istess programm huwa wkoll karatteristika speċifika tal-BTF. Dan jippermetti l-indirizzar b’ritmu differenti ta’ diversi kwistjonijiet marbuta fl-istess settur/qasam.

Fir-rigward tas-Saħħa, il-BTF u d-Delegazzjoni tal-UE f’Bangui involvew ruħhom fi djalogu fi ħdan il-Ministeru tas-Saħħa dwar is-sistema tal-akkwist tal-mediċina u mhux is-sistema kollha tas-saħħa. Id-diskussjonijiet huma kontinwi imma f’dan l-istadju ma kienx hemm ftehim fuq l-ebda soluzzjoni.

Kaxxa 7

Dan it-tip ta’ workshop jipprovdi l-opportunità biex it-tip ta’ attivitajiet LRRD jiġu kkoordinati aħjar.

Konklużjonijiet u rakkomandazzjonijiet

Il-Kummissjoni, flimkien mal-imsieħba prinċipali impenjati, evalwat il-valur miżjud tal-Fond Fiduċjarju u r-rilevanza ta’ reżiljenza/tal-approċċ tal-LRRD lejn il-CAR.

Fil-fatt, il-Kummissjoni segwiet u rrispettat id-dispożizzjonijiet tal-qafas legali tagħha stess, jiġifieri l-FR.

Rakkomandazzjoni 1 - Tiġi żviluppata aktar gwida għall-għażla tal-vettura tal-għajnuna, u għal analiżi tal-ħtiġijiet biex jiġu definiti l-ambiti tal-intervent tal-fondi fiduċjarji

Il-Kummissjoni taċċetta r-rakkomandazzjoni li se tiġi implimentata kif ġej:

Il-Kummissjoni żviluppat il-linji gwida tal-fond fiduċjarju li jinkludu taqsima dwar il-kondizzjonijiet biex jiġi stabbilit fond fiduċjarju.

Il-Kummissjoni hija lesta li tirrevedi l-kamp ta’ applikazzjoni tal-linji gwida sabiex jinkludu deskrizzjoni aktar dettaljata tal-kriterji stabbiliti fl-FR biex jevalwaw il-kundizzjonijiet li jistabbilixxu fondi fiduċjarji tal-UE.

F’dan ir-rigward il-Kummissjoni tqis li l-valutazzjoni tal-kundizzjonijiet għall-istabbiliment ta’ EUTF se tindirizza l-kwistjoni ta’ vantaġġi komparattivi ta’ vetturi oħra ta’ għajnuna.

Il-Kummissjoni tqis li l-linji gwida ma jistgħux ikunu wisq preskrittivi partikolarment f’dak li għandu x’jaqsam mal-fondi fiduċjarji ta’ emerġenza.

Il-BTF stabbilixxa eżerċizzji ta’ koordinazzjoni ad hoc li jassoċjaw il-partijiet interessati kollha relevanti, skont is-settur (saħħa, sigurtà tal-ikel, eċċ.). Madankollu, id-deċiżjoni ta’ kull donatur li jżomm programmi bilaterali hija parti mill-għażla sovrana tiegħu.

Il-Kummissjoni għandha fehma differenti.

Il-proċeduri huma jew proċeduri standard li jistgħu jinstabu fil-PRAG jew, għas-CEI li ġet applikata l-BTF, proċedura msejsa fuq il-linji gwida ta’ kriżi (proċedura ta’ għoti dirett preċeduta minn konsultazzjoni akbar b’mod preċiż biex iżżid it-trasparenza u l-kompetizzjoni).

Għas-CEI bl-applikazzjoni tal-BTF, tiġi żgurata t-trasparenza permezz ta’ nota ta’ spjegazzjoni għal kull proġett li jiċċara l-passi differenti għall-għażla.

Wara li tiddefinixxi l-proċedura tal-għażla wżata u, fejn ma tkunx definita fil-PRAG/Companion, fid-dokument ta’ proċedura nnifsu dwar kif jintgħażlu l-organizzazzjoni(jiet) ta’ implimentazzjoni, il-Kummissjoni tqis li hi tikkonforma mar-rekwiżit ta’ trasparenza FR, filwaqt li tagħmel użu fl-istess ħin tad-dispożizzjonijiet ta’ flessibilità tal-ftehim Kostituttiv.

Fir-rigward tal-veloċità, il-Kummissjoni tqis li n-numru ta’ jiem diskussi ma hix prova li d-diskussjonijiet setgħu kienu iqsar (ara l-paragrafu 44).

L-istima tal-ispejjeż kompleti li tinkludi fost l-oħrajn, l-ispejjeż tal-ġestjoni tal-organizzazzjonijiet implimentattivi mhux tal-UE, mhijiex prattika standard ta’ donaturi ewlenin bħan-NU jew il-Bank Dinji. Tali spejjeż smati kompleti mhumiex komparabbli mal-ispejjeż ta’ strumenti oħra u donaturi oħra (jiġifieri tan-NU jew il-BD), u jkunu inkonsistenti mal-ispejjeż ikkunsidrati fil-kontijiet annwali tal-Fond Fiduċjarju, li jsegwi l-istandards internazzjonali tal-kontabbiltà għas-settur pubbliku (ara t-tweġiba għall-paragrafu 37).

Għalkemm il-qafas ta’ prestazzjoni ġenerali għall-BTF ma jeżistix, il-maġġoranza tal-proġetti taw ir-riżultati mistennija tagħhom kollha jew il-biċċa l-kbira tagħhom (ara l-paragrafu 78).

Barra minn hekk, minflok jinħoloq qafas tal-prestazzjoni speċifiku għall-BTF, il-Kummissjoni tippreferi tistrieħ fuq il-qafas ta’ prestazzjoni standard tad-DEVCO.

Rakkomandazzjoni 2 - Titjib tal-koordinazzjoni tad-donaturi, tal-proċeduri tal-għażla u tal-kejl tal-prestazzjoni, u t-titjib tal-ispejjeż amministrattivi

Il-Kummissjoni taċċetta din ir-rakkomandazzjoni, iżda tenfasizza li atturi oħra għandhom rwol fis-segwitu ta’ dan.

Dwar l-ewwel punt, il-BTF diġà jikkoordina l-attivitajiet tiegħu ma’ donaturi u atturi rilevanti oħra. Madankollu, il-Kummissjoni taqbel li l-koordinazzjoni tista’ tkun formalizzata aħjar u li l-opportunitajiet ta’ koordinazzjoni għandhom jiġu sfruttati mill-parteċipanti kollha tal-BTF.

Dwar it-tieni punt, il-Kummissjoni tapplika r-regoli u l-proċeduri standard tagħha kif ukoll ir-regoli interni li jippermettu lill-maniġers tal-EUTF għal deroga minn dawn ir-regoli standard f’ċerti kundizzjonijiet (linji gwida interni dwar il-kriżi u l-linji gwida tal-EUTF). Pereżempju l-linji gwida dwar is-sitwazzjonijiet ta’ kriżi jirrikonoxxu r-restrizzjonijiet u l-limiti biex jiġu kkuntrattati u implimentati proġetti f’sitwazzjoni ta’ kriżi, li jippermetti l-użu ta’ “proċeduri flessibbli” meta sitwazzjoni ta’ kriżi tkun ġiet iddikjarata fil-pajjiż.

Dwar it-tielet punt, il-Kummissjoni taqbel li hi se tesplora modi biex iżżid il-ħeffa tal-proċeduri tal-għażla lil hinn minn dak li jippermettu bħalissa r-regoli interni filwaqt li jinstab bilanċ tajjeb bejn il-ħeffa u t-trasparenza.

Wara rakkomandazzjoni simili maħruġa mis-Servizz tal-Awditjar Intern tagħha, il-Kummissjoni diġà fasslet pjan ta’ azzjoni biex tindirizza din ir-rakkomandazzjoni u bħalissa qed timplimenta azzjonijiet maħsuba.

Meta wieħed iqis il-limiti minħabba raġunijiet ta’ sigurtà u l-lezzjonijiet meħuda minn sitwazzjonijiet ta’ kriżi riflessi fil-linji gwida tal-kriżijiet, il-Kummissjoni tqis li l-BTF diġà jimmassimizza l-ammont ta’ għajnuna li jmur għand il-benefiċjarji finali. Kull meta jkun possibbli, il-BTF diġà qed jistinka biex jitnaqqsu l-ispejjeż tal-implimentazzjoni kif kien il-każ diġà għall-kuntratt FAO fejn ġew innegozjati t-tariffi ta’ ġestjoni ta’ 5 % minflok ta’ 7 %.

Il-Kummissjoni tqis li l-BTF introduċa mekkaniżmi ta’ monitoraġġ fil-livell tal-proġett u wera l-vantaġġi f’termini ta’ veloċità notevoli, u gradwalment dawn se taġġornahom sal-livell ta’ fond.

Akronimi u abbrevjazzjonijiet

DĠ DEVCO: Direttorat Ġenerali għall-Kooperazzjoni Internazzjonali u l-Iżvilupp

DĠ ECHO: Direttorat Ġenerali għall-Protezzjoni Ċivili u l-Operazzjonijiet tal-Għajnuna Umanitarja Ewropej

FAO: Organizzazzjoni tal-Ikel u l-Agrikoltura tan-Nazzjonijiet Uniti

FEŻ: Fond Ewropew għall-Iżvilupp

FMI: Fond Monetarju Internazzjonali

MPE: Membru tal-Parlament Ewropew

NGO: Organizzazzjoni Nongovernattiva

NU: Nazzjonijiet Uniti

OECD: Organizzazzjoni għall-Kooperazzjoni u l-Iżvilupp Ekonomiċi

PIN: Programm Indikattiv Nazzjonali

PRAG: Akkwist u Għotjiet għall-Azzjonijiet Esterni tal-Unjoni Ewropea – Gwida Prattika

RĊA: Ir-Repubblika Ċentru-Afrikana

SMART: speċifiċi, li jistgħu jitkejlu, li jistgħu jintlaħqu, rilevanti u bi skadenza

UNDP: Programm ta’ Żvilupp tan-Nazzjonijiet Uniti

UNICEF: Fond tan-Nazzjonijiet Uniti għat-Tfal

Noti finali

¹L-Artikolu 187 tar-Regolament Finanzjarju (ir-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002 (ĠU L 298, 26.10.2012, p. 1)) jipprovdi l-qafas legali għat-twaqqif ta’ fondi fiduċjarji tal-Unjoni għal azzjonijiet esterni.

²Bêkou tfisser “tama” fil-lingwa Sango.

³Il-fondi l-oħra huma: (a) il-Fond fiduċjarju Madad li ġie stabbilit f’Diċembru 2014 b’rispons għall-kriżi Sirjana; (b) il-Fond fiduċjarju ta’ emerġenza għall-migrazzjoni fl-Afrika li tnieda fl-2015; u (c) il-Fond fiduċjarju għall-Kolombja li ġie stabbilit fl-2016 biex jappoġġa l-proċess ta’ wara l-kunflitti.

⁴Ftehim li jistabbilixxi l-fond fiduċjarju tal-Unjoni Ewropea għar-Repubblika Ċentru-Afrikana, “Il-Fond fiduċjarju Bêkou tal-UE”, l-Artikolu 2 – Objettivi tal-fond fiduċjarju.

⁵Il-fornituri tal-kooperazzjoni għall-iżvilupp jiddeċiedu individwalment liema pajjiżi se jassistu u sa liema punt sa jagħtuhom assistenza. Dan jista’ jirriżulta fi żbilanċi li jistgħu jfixklu l-effettività tal-għajnuna permezz ta’ frammentazzjoni tal-għajnuna kif ukoll akkumulazzjoni ta’ fornituri f’xi pajjiżi – hekk imsejħa “preferuti” – u lakuni fl-għoti tal-għajnuna f’oħrajn – komunement magħrufa bħala “orfni” (http://www.oecd.org/dac/aid-architecture/fragmentation-orphans.htm)

⁶L-uffiċċju umanitarju tan-NU rrapporta li sa Marzu 2017 kienu waslu biss 5 % tal-USD 400 miljun f’għajnuna umanitarja meħtieġa għar-RĊA, li wassal biex jiġu ddistribwiti nofs ir-razzjonijiet.

⁷Skeda Informattiva tal-Kummissjoni Ewropea: “The European Union’s comprehensive approach in the Central African Republic (2013–2016)” (L-approċċ komprensiv tal-Unjoni Ewropea fir-Repubblika Ċentru-Afrikana (2013–2016)), Brussell, 11.11.2016.

⁸It-Trattat ta’ Lisbona jitlob li jkun hemm koerenza bejn l-oqsma differenti tal-azzjoni esterna tal-UE u l-politiki l-oħra tagħha. Wara d-dħul fis-seħħ tat-Trattat u l-kuntest istituzzjonali ġdid li ħoloq, l-UE – billi tuża l-firxa sħiħa ta’ strumenti u riżorsi tagħha – żiedet kemm il-potenzjal tagħha kif ukoll l-ambizzjoni tagħha sabiex l-azzjoni esterna tagħha tkun aktar konsistenti, effettiva u strateġika (JOIN(2013) 30 final tal-11.12.2013 “L-approċċ komprensiv tal-UE rigward il-konflitti u l-kriżijiet esterni”).

⁹Din hija l-klassifikazzjoni tas-sistema globali ta’ għajnuna umanitarja fir-rigward tar-rispons għall-kriżijiet umanitarji fuq skala kbira li jkunu l-aktar gravi.

¹⁰Inizjalment, l-għajnuna kienet ippjanata li sseħħ f’sekwenza lineari jew “continuum”: ir-riabilitazzjoni ssegwi l-fażi ta’ assistenza inizjali, li sussegwentement tiġi segwita minn kooperazzjoni klassika għall-iżvilupp. Madankollu, l-esperjenza mis-snin 90 uriet li meta l-assistenza inizjali, ir-riabilitazzjoni u l-iżvilupp jiġu ttrattati separatament, il-proċessi konsekuttivi ma jirnexxilhomx jirrispondu għall-kumplessità ta’ ħafna sitwazzjonijiet ta’ kriżi. Meta dawn, minflok, jiġu ttrattati bħala “contiguum” (jiġifieri bħala proċessi interkonnessi konkorrenti) ikun rikonoxxut li dawn is-sitwazzjonijiet jistgħu fil-fatt jirrikjedu l-użu simultanju ta’ strumenti differenti (ara t-tgħarrif ta’ politika tal-Parlament Ewropew “Linking relief, rehabilitation and development: Towards more effective aid” (Kollegament bejn l-assistenza inizjali, ir-riabilitazzjoni u l-iżvilupp: Lejn għajnuna aktar effettiva), pp. 4-5).

¹¹Il-programmi indikattivi nazzjonali jirrappreżentaw pass importanti fil-programmazzjoni tal-għajnuna mill-UE taħt il-FEŻ. Huma jiddefinixxu l-istrateġija u l-prijoritajiet għall-għajnuna mill-UE u jitħejjew f’kooperazzjoni mill-qrib mal-pajjiż sieħeb. Għalhekk, jeħtieġ li l-UE jkollha gvern nazzjonali bħala l-kontroparti tagħha sabiex tadotta PIN. F’dak iż-żmien, ir-RĊA kellha gvern ta’ tranżizzjoni li ma kienx ġie leġittimizzat permezz ta’ elezzjoni demokratika.

¹²Il-punt 19 tal-Accra Agenda for Action (Aġenda ta’ Akkra għall-Azzjoni), it-Tielet Forum ta’ Livell Għoli dwar l-Effikaċja tal-Għajnuna, 2008.

¹³Roundtable 9, Aid architecture, Summary (Diskussjoni Nru 9 madwar mejda, Arkitettura tal-għajnuna, Sommarju), it-Tielet Forum ta’ Livell Għoli dwar l-Effikaċja tal-Għajnuna, 2008, p. 7.

¹⁴EU Common Position for the Fourth High Level Forum on Aid Effectiveness (Pożizzjoni Komuni tal-UE għar-Raba’ Forum ta’ Livell Għoli dwar l-Effikaċja tal-Għajnuna), 2011, il-punt 28, p. 6.

¹⁵Il-manwal jelenka sitt funzjonijiet possibbli bil-valur miżjud korrispondenti tagħhom: koerenza (mili ta’ lakuni), konsolidament (tnaqqis ta’ frammentazzjoni), speċjalizzat jew tematiku, ġestjoni tar-riskju, tisħiħ tas-sistemi nazzjonali, u innovazzjoni. (L-MPTFO: Designing pooled funds for performance (Tfassil ta’ fondi aggregati għall-prestazzjoni), Manwal imħejji mill-MPTFO, 2015; ara b’mod partikolari t-Tabella 2, p. vii, u t-Tabella 3, p. 6.)

¹⁶Ftehim li jistabbilixxi l-fond fiduċjarju tal-Unjoni Ewropea għar-Repubblika Ċentru-Afrikana, “Il-Fond fiduċjarju Bêkou tal-UE”, l-Artikolu 2 – Objettivi tal-fond fiduċjarju.

¹⁷B’differenza mill-proġetti tal-Fond fiduċjarju Bêkou, li prinċipalment ipprovdew assistenza fil-livell ta’ faċilitajiet individwali tas-saħħa. Il-politiki nazzjonali tas-saħħa jiġu ddeterminati fil-livell tal-Ministeru tas-Saħħa.

¹⁸Il-Fond fiduċjarju Ezingo tan-NU jimmaniġġja USD 25 miljun. Huwa jagħti għajnuna kemm lill-aġenziji tan-NU kif ukoll lill-awtoritajiet tal-istat fil-forma ta’ appoġġ baġitarju.

¹⁹Ara b’mod partikolari l-Principles for Good International Engagement in Fragile States and Situations (Prinċipji għal Involviment Internazzjonali Tajjeb fi Stati u f’Sitwazzjonijiet Fraġli) tal-OECD, li ġew approvati mill-ministri u mil-kapijiet tal-aġenziji fil-Forum ta’ Livell Għoli tal-Kumitat ta’ Għajnuna għall-Iżvilupp tal-2007, li jiddikjaraw li huwa importanti li jkun hemm qbil dwar il-mekkaniżmi prattiċi ta’ koordinazzjoni bejn l-atturi internazzjonali, anke jekk ma jkunx hemm tmexxija b’saħħitha tal-gvern.

²⁰Ir-Repubblika Ċentru-Afrikana: Il-Pjan Nazzjonali ta’ Rkupru u ta’ Bini tal-Paċi għall-2017-2021 (RCPCA), li nkiteb mill-persunal tar-RĊA, b’appoġġ mill-UE, min-Nazzjonijiet Uniti, u mill-Grupp tal-Bank Dinji,, p 26-41.

²¹Ibid, it-Tabella 0.1, l-Anness 2.

²²Ftehim Kostituttiv, il-Premessi 4-6.

²³Ftehim Kostituttiv, il-Premessi 3, 5.

²⁴http://ec.europa.eu/europeaid/bekou-trust-fund-introduction_en

²⁵Ir-Repubblika Ċentru-Afrikana: Il-Pjan Nazzjonali ta’ Rkupru u ta’ Bini tal-Paċi għall-2017-2021, li nkiteb mill-persunal tar-RĊA, b’appoġġ mill-UE, min-Nazzjonijiet Uniti, u mill-Grupp tal-Bank Dinji, il-Kapitolu V, il-Figura 5.2, p. 45.

²⁶L-Artikolu 187 tar-Regolament Finanzjarju.

²⁷Il-Gwida Prattika tispjega l-proċeduri ta’ kkuntrattar applikabbli għall-azzjonijiet esterni tal-UE li huma ffinanzjati mill-baġit ġenerali tal-UE u mill-Fond Ewropew għall-Iżvilupp. Il-Gwida Prattika tintuża mid-Direttorati Ġenerali u mis-Servizzi tal-Kummissjoni li huma inkarigati mill-istrumenti użati għall-finanzjament u l-implimentazzjoni ta’ azzjonijiet esterni.

²⁸B’kollox, aħna awditjajna l-proċeduri tal-għażla għal 26 kuntratt. Tlieta mill-ħames kuntratti l-oħra kienu relatati ma’ servizzi (il-kuntratti Nru 7, Nru 8 u Nru 29) u t-tnejn l-oħra kienu għotjiet fil-programm Saħħa II (il-kuntratti Nru 12 u Nru 14), fejn il-proċeduri tal-għażla kienu għadhom għaddejjin fi tmiem l-2016.

²⁹Kunflitti ta’ interess jistgħu jirriżultaw peress li huwa l-kumitat operazzjonali li inizjalment jagħżel il-proġetti għal finanzjament: dawn il-proġetti jistgħu jingħataw lil organizzazzjonijiet li jkollhom membri tal-persunal tagħhom fuq il-kumitat operazzjonali.

³⁰Dan jirreferi għall-Kuntratt Nru 15.

³¹Dan jirreferi għall-Kuntratt Nru 31.

³²Dan jirreferi għall-Kuntratt Nru 3.

³³Il-Kuntratti Nru 9, Nru 10, Nru 11, Nru 13 u Nru 30; ikun meħtieġ ukoll għall-Kuntratti Nru 12 u Nru 14.

³⁴L-organizzazzjonijiet tan-NU għandhom id-dritt jirkupraw l-ispiża indiretta tal-appoġġ għall-programmi b’rata ta’ 7 % tal-ammont aggregat f’fond fiduċjarju, flimkien ma tariffa amministrattiva ta’ 1 %. Il-Bank Dinji jimponi tariffi standard jew tariffi mfassla apposta, b’tariffa standard minima ta’ 5 %. Il-Bank Afrikan tal-Iżvilupp attwalment jimponi tariffa minima ta’ 5 %.

³⁵L-ispejjeż imġarrba għall-installazzjoni ta’ aġenti f’delegazzjoni huma ogħla mill-ispejjeż li jiġġarrbu li kieku dawn jaħdmu fi Brussell.

³⁶Il-Fond fiduċjarju Bêkou huwa ffinanzjat mill-FEŻ u minn diversi strumenti tal-baġit tal-UE (ara l-Figura 2). Dawn tal-aħħar għandhom oqfsa ta’ monitoraġġ, rappurtar u evalwazzjoni (l-hekk imsejħa “oqfsa MORE”), li huma magħmulin minn objettivi, indikaturi, stadji importanti u miri kemm ġenerali kif ukoll speċifiċi. L-obbligi ta’ rappurtar jinkludu, b’mod partikolari, ir-rapport annwali lill-Parlament Ewropew u lill-Kunsill dwar l-implimentazzjoni tal-istrumenti tal-UE għall-finanzjament tal-azzjonijiet esterni. Attwalment, ir-rabta bejn dan ir-rappurtar tar-riżultati u dak tar-riżultati tal-Fond fiduċjarju Bêkou hija limitata.

³⁷Skont l-Artikolu 30 tar-Regolament Finanzjarju, objettivi speċifiċi, li jistgħu jitkejlu, li jistgħu jintlaħqu, rilevanti u bi skadenza (SMART) iridu jkunu stabbiliti għas-setturi kollha tal-attività koperta mill-baġit.

³⁸Tliet kwarti ta’ dan l-ammont kienu jikkonsistu f’għajnuna umanitarja, li għandha l-għan li tipprovdi assistenza inizjali ta’ emerġenza. L-għajnuna għall-iżvilupp għandha objettiv li huwa aktar strutturali u fuq terminu twil.

³⁹L-ammont totali tal-PIN huwa ta’ EUR 382 miljun, fejn EUR 208 miljun huma fondi ġodda.

⁴⁰Il-Parlament Ewropew “Rapport tat-12.4.2016 dwar il-kwittanza tal-baġit tal-Fondi Ewropej għall-Iżvilupp”, A8-0137/2016, il-punt 38. Riżoluzzjoni tal-2015 tappella lill-Istati Membri, kif ukoll lil donaturi oħra, biex iżidu l-kontribuzzjonijiet tagħhom għall-Fond Fiduċjarju Bêkou (Riżoluzzjoni tal-PE tat-8.10.2015, 2015/2874(RSP), il-punt 23).

⁴¹Ara l-paragrafu 53 dwar id-dgħufijiet li ġew innutati fid-definizzjoni ta’ objettivi u indikaturi. L-analiżi li wettaqna għal dan il-kapitolu kienet prinċipalment ibbażata fuq analiżi fl-uffiċċju tal-evidenza disponibbli, peress li aħna stajna nżuru biss tliet proġetti fuq il-post. Aħna użajna evidenza minn tliet sorsi: rapporti ta’ evalwazzjoni esterni, rapporti intermedji mħejjija mill-kuntratturi u tabella ta’ monitoraġġ tal-indikaturi kuntrattwali mħejjija mill-Fond fiduċjarju Bêkou.

⁴²https://europa.eu/capacity4dev/

Avveniment	Data
Adozzjoni tal-APM / Bidu tal-awditu	4.10.2016
L-abbozz tar-rapport jintbagħat uffiċjalment lill-Kummissjoni (jew lil parti awditjata oħra)	5.5.2017
Adozzjoni tar-rapport finali wara l-proċedura kontradittorja	20.6.2017
Ir-risposti uffiċjali tal-Kummissjoni (jew ta’ parti awditjata oħra) riċevuti bil-lingwi kollha	12.7.2017

Tim tal-awditjar

Ir-rapporti speċjali tal-QEA jippreżentaw ir-riżultati tal-awditi tagħha f’dak li jirrigwarda l-politiki u l-programmi tal-UE jew suġġetti ta’ ġestjoni relatati ma’ oqsma baġitarji speċifiċi. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta’ introjtu jew ta’ nfiq involut, l-iżviluppi li jkunu għad iridu jseħħu u l-interess politiku u pubbliku.

Dan l-awditu tal-prestazzjoni twettaq mill-Awla III – immexxija minn Karel Pinxten, Membru tal-QEA – li hija responsabbli għall-awditjar tal-oqsma ta’ nfiq ta’ azzjoni esterna, sigurtà u ġustizzja. L-awditu tmexxa minn Bettina Jakobsen, Membru tal-QEA, b’appoġġ minn Katja Mattfolk, Kap tal-kabinett; Kim Storup, Attaché tal-kabinett; Beatrix Lesiewicz, Maniġer prinċipali; Laura Gores, Kap tal-kompitu. It-tim tal-awditjar kien magħmul minn Nóirín O’Grady u Florin Alexandru Farcas.

*Mix-xellug għal-lemin:* Beatrix Lesiewicz, Laura Gores, Katja Mattfolk, Bettina Jakobsen, Kim Storup, Nóirín O’Grady, Florin Alexandru Farcas.

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Il-Fond fiduċjarju Bêkou tal-UE għar-Repubblika Ċentru-Afrikana: bidu promettenti minkejja xi nuqqasijiet
(skont l-Artikolu 287(4), it-tieni subparagrafu, TFUE)

Ħafna informazzjoni addizzjonali dwar l-Unjoni Ewropea hija disponibbli fuq l-Internet. Jista’ jsir aċċess għaliha permezz tas-server Europa (http://europa.eu).

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2017

PDF	ISBN 978-92-872-7848-7	ISSN 1977-5741	doi:10.2865/971092	QJ-AB-17-011-MT-N
HTML	ISBN 978-92-872-7821-0	ISSN 1977-5741	doi:10.2865/820401	QJ-AB-17-011-MT-Q

Għal kull użu jew riproduzzjoni ta’ ritratti jew materjal ieħor li ma jaqax taħt id-drittijiet tal-awtur tal-Unjoni Ewropea, irid jintalab il-permess direttament mingħand id-detenturi tad-drittijiet tal-awtur.

KIF GĦANDEK TAGĦMEL BIEX TIKSEB IL-PUBBLIKAZZJONIJIET TAL-UE

Pubblikazzjonijiet bla ħlas:

kopja waħda:
- permezz tal-EU Bookshop (http://bookshop.europa.eu);
iżjed minn kopja waħda jew posters/mapep:
- mir-rappreżentanzi tal-Unjoni Ewropea (http://ec.europa.eu/represent_mt.htm),
- mid-delegazzjonijiet f’pajjiżi li mhumiex fl-UE (http://eeas.europa.eu/delegations/index_mt.htm),
- billi tikkuntatja s-servizz Europe Direct (http://europa.eu/europedirect/index_mt.htm)
- jew ċempel 00 800 6 7 8 9 10 11 (numru tat-telefown bla ħlas minn kullimkien fl-UE) (*).

(*) L-informazzjoni mogħtija hija b’xejn, kif ukoll it-telefonati ġeneralment huma b’xejn (għalkemm xi operaturi, kabini tat-telefown jew lukandi jistgħu jitolbu ħlas).

Pubblikazzjonijiet bi ħlas:

permezz tal-EU Bookshop (http://bookshop.europa.eu).