L-Arkitettura Afrikana għall-Paċi u s-Sigurtà: jeħtieġ li l-appoġġ li jingħata mill-UE jiġi ffukat mill-ġdid

Sommarju eżekuttiv

I

L-Istati membri tal-Unjoni Afrikana (UA) stabbilew l-Arkitettura Afrikana għall-Paċi u s-Sigurtà (APSA) fl-2002 bħala rispons strutturali fuq terminu twil għall-isfidi relatati mal-paċi u s-sigurtà fil-kontinent Afrikan. Permezz tal-APSA, l-Unjoni Afrikana (UA) u l-organizzazzjonijiet subreġjonali li ngħataw mandat (SROs) għandhom aċċess għal għodod li jgħinuhom jipprevienu, jimmaniġġjaw u jirriżolvu l-kunflitti.

II

Fl-awditu tagħna, aħna eżaminajna l-appoġġ tal-UE għall-APSA. Aħna eżaminajna jekk dan l-appoġġ kienx imfassal u mmirat tajjeb, jekk ikkontribwiex għal riżultati sostenibbli, u jekk ġiex implimentat tajjeb. Awditjajna kuntratti b’valur totali ta’ aktar minn EUR 100 miljun, li ġew konklużi mill-Kummissjoni fil-perjodu mill-2014 sal-2016.

III

B’mod ġenerali, aħna kkonkludejna li l-appoġġ tal-UE għall-APSA ftit li xejn kellu effett u kien jeħtieġ li jiġi ffukat mill-ġdid. Għalkemm hemm stabbilit qafas strateġiku ġenerali, aħna sibna li l-appoġġ tal-UE għall-APSA kien ilu ffukat fuq li jikkontribwixxi għall-ispejjeż operazzjonali bażiċi tagħha. Minħabba li l-kontribuzzjoni finanzjarja mill-Unjoni Afrikana għall-APSA hija dgħajfa, din ilha għal ħafna snin dipendenti ħafna fuq l-appoġġ ta’ donaturi. L-UE kkontribwiet finanzjarjament għall-komponenti tal-APSA, iżda l-kwalità tal-kapaċitajiet ta’ dawn il-komponenti tvarja konsiderevolment u għad hemm bosta diffikultajiet.

IV

Aħna sibna li l-UE ma stabbilietx prijoritajiet ċari għall-appoġġ tagħha għall-APSA u l-istrateġija tagħha ma kellhiex viżjoni fit-tul għall-evoluzzjoni ta’ dan l-appoġġ. Matul il-perjodu awditjat, l-UE ma ffukatx biżżejjed fuq it-tranżizzjoni minn appoġġ li jiffoka fuq il-ħlas ta’ salarji għal appoġġ immirat fuq il-bini ta’ kapaċità biex tiżgura s-suċċess fit-tul tal-appoġġ tagħha. L-UE appoġġat il-pjanijiet tal-UA għall-kisba tal-indipendenza finanzjarja sabiex tkun tista’ tassumi ammont dejjem akbar tal-ispejjeż operazzjonali tal-APSA, iżda l-implimentazzjoni tagħhom kienet għadha fi stadju bikri.

V

Aħna sibna wkoll li 6 mill-14-il kuntratt li awditjajna, li prinċipalment kienu jikkonċernaw l-ispejjeż għall-persunal, kienu pproduċew il-maġġoranza tar-riżultati mistennija saż-żmien tal-awditu. Tnejn minnhom għamlu dan parzjalment biss filwaqt li wieħed minnhom ma kien ipproduċa l-ebda riżultat. F’ħames każijiet, id-dewmien fl-implimentazzjoni fisser li ma stajniex nivverifikaw jekk il-kuntratt kienx ipproduċa riżultati jew le. Barra minn hekk, id-dewmien fil-konklużjoni ta’ kuntratti, il-finanzjament retroattiv, u n-nuqqas ta’ informazzjoni dwar ir-riżultati miksuba xekklu t-twassil tal-appoġġ tal-UE. Matul il-perjodu awditjat, l-istrumenti ta’ finanzjament mhux dejjem intużaw b’mod koerenti.

VI

Fuq il-bażi tal-osservazzjonijiet f'dan ir-rapport, il-Qorti tirrakkomanda li:

1. il-Kummissjoni u s-SEAE jħeġġu lill-UA biex tipparteċipa fl-APSA sabiex tikseb l-indipendenza finanzjarja u jiffukaw mill-ġdid l-appoġġ tal-UE biex ma jibqax iffukat fuq l-ispejjeż operazzjonali iżda jiffoka fuq miżuri tal-bini ta’ kapaċità, u
2. il-Kummissjoni taċċerta li l-interventi jkunu konsistentement ibbażati fuq ir-riżultati, tnaqqas id-dewmien fil-konklużjoni ta’ kuntratti u l-finanzjament retroattiv, ittejjeb il-monitoraġġ u tagħmel użu koerenti mill-istrumenti ta’ finanzjament.

Introduzzjoni

L-APSA

01

L-Arkitettura Afrikana għall-Paċi u s-Sigurtà (APSA) hija sett ta’ istituzzjonijiet, leġiżlazzjoni u proċeduri mfassla biex jindirizzaw il-prevenzjoni ta’ kunflitti u biex jippromwovu l-paċi u s-sigurtà fil-kontinent Afrikan. L-Att Kostituttiv tal-Unjoni Afrikana¹ jistabbilixxi l-bażi legali għall-APSA. Il-Protokoll Relatat mal-Istabbiliment tal-Kunsill tal-Paċi u s-Sigurtà tal-Unjoni Afrikana, adottat mill-Istati membri tal-UA fl-2002, jiddefinixxi l-istruttura, l-objettivi u l-prinċipji tal-APSA. Għaxar organizzazzjonijiet subreġjonali Afrikani (SROs), li l-Istati membri rispettivi tagħhom tawhom mandat biex jaġixxu fil-qasam tal-paċi u s-sigurtà, għandhom ukoll rwol fl-APSA. Tmienja minnhom huma Komunitajiet Ekonomiċi Reġjonali (RECs), u tnejn minnhom huma Mekkaniżmi Reġjonali għall-prevenzjoni, il-ġestjoni u r-riżoluzzjoni ta’ kunflitti (RMs)². Il-kooperazzjoni bejn dawn l-organizzazzjonijiet u l-UA taħt l-APSA hija suġġetta għall-prinċipji tas-sussidjarjetà u l-komplementarjetà³.

02

Fil-qalba tal-APSA hemm il-Kunsill tal-Paċi u s-Sigurtà, stabbilit mill-Istati membri tal-UA bħala organu deċiżjonali permanenti għall-prevenzjoni, il-ġestjoni u r-riżoluzzjoni ta’ kunflitti. Huwa jingħata appoġġ mill-Kummissjoni tal-Unjoni Afrikana, Grupp ta’ Esperti, Sistema Kontinentali ta' Twissija Bikrija, Forza Afrikana ta' Intervent fil-Pront u Fond għall-Paċi⁴, (il-Figura 1).

03

L-APSA għandha l-għan li tipprovdi qafas u għodod biex l-UA u l-SROs ikollhom rwol attiv fil-prevenzjoni u r-riżoluzzjoni ta’ kunflitti fl-Afrika, li jirriżultaw minn kawżi differenti (il-Kaxxa 1).

04

L-UA u l-SROs intervienew taħt il-qafas tal-APSA fi 28 mis-67 kunflitt vjolenti (42 %) li seħħew fl-Afrika matul l-2016. L-interventi ħadu l-għamla ta’ diplomazija, medjazzjoni u operazzjonijiet ta’ appoġġ għall-paċi, jew ta’ taħlita tat-tlieta li huma. L-evalwazzjonijiet ta’ dawn it-28 intervent indikaw li 21 minnhom irnexxielhom jipprevienu jew inaqqsu l-kunflitti, tal-inqas parzjalment⁷ (il-Kaxxa 2).

05

L-Istati membri tal-UA ħolqu l-Fond Afrikan għall-Paċi biex jiġbru riżorsi finanzjarji għall-missjonijiet ta’ appoġġ għall-paċi tal-UA u għall-attivitajiet operazzjonali tal-paċi u s-sigurtà⁸. Il-finanzjament kellu jiġi prinċipalment mill-baġit tal-UA, bil-possibbiltà ta’ aktar finanzjament fl-għamla ta’ kontribuzzjonijiet volontarji minn sorsi oħra. Madankollu, inqas minn nofs l-Istati Afrikani ħallsu l-kontribuzzjonijiet tagħhom għall-baġit tal-UA kompletament u fil-ħin⁹, li rriżulta f’defiċit ta’ 33 % fil-baġit matul il-perjodu mill-2011 sal-2015¹⁰. B’riżultat ta’ dan, id-donaturi jiffinanzjaw il-biċċa l-kbira mill-baġit tal-UA¹¹ (54 % fl-2017¹²).

06

Barra minn hekk, proporzjon żgħir biss mill-baġit tal-UA jitħallas fil-Fond Afrikan għall-Paċi. L-Istati membri tal-UA qablu li sal-2014 iżidu l-finanzjament tal-Fond Afrikan għall-Paċi għal 12 % tal-baġit regolari tal-UA. Madankollu, fl-2016, l-ammont imħallas kien jikkorrispondi għal 7 % tal-baġit regolari (jiġifieri inqas minn EUR 6 miljun)¹³.

07

L-UA u l-SROs iggwidaw l-iżvilupp tal-APSA permezz ta’ pjanijiet direzzjonali. Huma adottaw il-pjan direzzjonali attwali tal-APSA li jkopri l-perjodu mill-2016 sal-2020, f’Diċembru 2015. Dan il-pjan għandu ħames prijoritajiet strateġiċi: prevenzjoni ta’ kunflitti; ġestjoni ta’ kriżijiet u ta’ kunflitti; rikostruzzjoni wara l-kunflitti u bini tal-paċi; kwistjonijiet ta’ sigurtà strateġika¹⁴; u koordinazzjoni u sħubijiet fi ħdan il-qafas tal-APSA.

L-appoġġ tal-UE għall-APSA

08

L-UE identifikat il-paċi u s-sigurtà fil-kontinent Afrikan bħala waħda mill-prijoritajiiet tagħha u ddefiniet il-prinċipji fundamentali tal-approċċ tagħha fl-1996¹⁵. Hija tenniet dawn il-prinċipji u l-interess proprju tagħha li tiffoka fuq il-paċi u s-sigurtà fil-kontinent Afrikan f’bosta strateġiji ta’ livell għoli dwar il-prevenzjoni ta’ kunflitti u s-sigurtà¹⁶, l-aktar reċenti fl-Istrateġija Globali tal-UE tal-2016¹⁷. Fl-2007, l-UA u l-UE niedew l-Istrateġija Konġunta Afrika-UE (JAES) bħala qafas għall-kooperazzjoni u d-djalogu ta’ politika, u enfasizzaw l-importanza tal-paċi u s-sigurtà għaż-żewġ unjonijiet. Minn dak iż-żmien ’il hawn, il-prijorità tal-pjanijiet ta’ azzjoni tal-JAES kienet li l-APSA ssir operazzjonali.

09

L-UE tipprovdi l-appoġġ finanzjarju tagħha għall-iżvilupp tal-APSA permezz tal-Fond Ewropew għall-Iżvilupp (FEŻ)¹⁸. Il-mezz prinċipali għat-twassil tal-appoġġ mill-FEŻ huwa permezz tal-Faċilità għall-Paċi fl-Afrika (FPA), stabbilita mill-UE fl-2003¹⁹, kif ukoll permezz tal-Programmi Indikattivi Reġjonali (RIPs)²⁰. Fil-perjodu tal-FEŻ mill-2014 sal-2020, hemm tliet RIPs fl-Afrika, li jkopru l-Afrika tal-Punent, l-Afrika Ċentrali u r-reġjuni tal-Afrika tal-Lvant/in-Nofsinhar tal-Afrika/l-Oċean Indjan. L-ammont allokat għall-paċi u s-sigurtà kemm taħt l-FPA kif ukoll taħt ir-RIPs, bejn wieħed u ieħor irdoppja mill-perjodu preċedenti għal dak attwali (il-Figura 2). Il-maġġoranza tal-fondi (madwar 80 %) intużaw biex jiffinanzjaw operazzjonijiet ta’ appoġġ għall-paċi, bħall-Missjoni tal-Unjoni Afrikana fis-Somalja.

10

Madwar 14 % tal-finanzjament kumplessiv għall-paċi u s-sigurtà taħt l-FPA u r-RIPs għall-2014 sal-2020, li jammonta għal medja ta’ EUR 50 miljun fis-sena, ġie allokat għall-implimentazzjoni tal-APSA. Din hija żieda ta’ 150 % meta mqabbel mal-perjodu ta’ programmazzjoni preċedenti. Skont l-istima tal-UE, l-appoġġ li jingħata lill-APSA, notevolment bit-tisħiħ tal-kapaċità tal-UA u tal-SROs għall-prevenzjoni u r-riżoluzzjoni ta’ kunflitti fuq il-kontinent, jista’ jnaqqas il-ħtieġa għall-finanzjament ta’ operazzjonijiet ta’ appoġġ għall-paċi li huma għaljin u jlaħħqu sa EUR 720 miljun²¹ fis-sena. Fl-istess waqt, l-ammont allokat għall-APSA taħt ir-RIPs żdied b'sitt darbiet, li jirrifletti l-fokus akbar tal-UE fuq il-prevenzjoni ta’ kunflitti u l-medjazzjoni fil-livell subreġjonali (il-Figura 3).

Ambitu u approċċ tal-awditjar

11

Fl-awditu tagħna, aħna eżaminajna jekk l-UE kinitx ipprovdiet appoġġ effettiv għall-APSA. Biex nagħmlu dan, aħna fittixna li nwieġbu tliet sottomistoqsijiet.

1. L-appoġġ tal-UE għall-APSA ġie mfassal u mmirat tajjeb?
2. L-appoġġ tal-UE għall-APSA kkontribwixxa għall-kisba ta’ riżultati sostenibbli?
3. L-appoġġ tal-UE għall-APSA ġie implimentat tajjeb?

12

L-awditu kopra l-infiq mill-FEŻ li sar permezz tal-Faċilità għall-Paċi fl-Afrika (FPA) u l-Programmi Indikattivi Reġjonali (RIPs). Aħna eżaminajna l-appoġġ tal-UE mill-2014 ’il quddiem u nirreferu għall-evalwazzjonijiet u l-valutazzjonijiet ta’ attivitajiet preċedenti fejn dawn huma disponibbli u rilevanti. Awditjajna l-14-il kuntratt li ġew konklużi mill-Kummissjoni fil-perjodu mill-2014 sal-2016, u li kellhom valur totali ta’ EUR 102.5 miljun. Disgħa minnhom ġew iffinanzjati mill-Faċilità għall-Paċi fl-Afrika, erbgħa taħt ir-RIP għall-Afrika tal-Punent u wieħed taħt ir-RIP għall-Afrika Ċentrali²². L-akbar kuntratti ġew iffirmati mal-UA, pereżempju, l-arranġamenti ta’ finanzjament konġunt għall-iffinanzjar tas-salarji fid-Dipartiment tal-Paċi u s-Sigurtà tal-Kummissjoni tal-UA u l-Uffiċċji ta’ Kollegament tal-UA. Ġew iffirmati kuntratti oħra ma’ organizzazzjonijiet reġjonali, bħall-Komunità Ekonomika tal-Istati tal-Afrika tal-Punent (ECOWAS) u l-Komunità Ekonomika tal-Istati tal-Afrika Ċentrali (ECCAS). L-Anness I jipprovdi ripartizzjoni tal-finanzjament ipprovdut għal kull waħda mill-organizzazzjonijiet li ngħataw appoġġ.

13

Aħna eskludejna l-operazzjonijiet ta’ appoġġ għall-paċi mill-awditu tagħna għax dan l-infiq jirrigwarda prinċipalment ir-rimborżi ta’ allowances imħallsa lit-truppi u mhux l-appoġġ għall-APSA. Aħna ma awditjajniex l-istrumenti l-oħra tal-UE li jiffinanzjaw il-paċi u s-sigurtà fl-Afrika għax matul il-perjodu awditjat l-ebda waħda mill-attivitajiet tagħhom ma kienet tirrigwarda l-APSA direttament.

14

Aħna wettaqna x-xogħol tal-awditjar tagħna bejn Jannar u Novembru 2017. Ġbarna l-evidenza billi eżaminajna d-dokumentazzjoni u billi wettaqna intervisti mas-Servizz Ewropew għall-Azzjoni Esterna, mal-Kummissjoni, u ma’ partijiet ikkonċernati rilevanti, bħal donaturi oħra u l-benefiċjarji tal-appoġġ tal-UE (l-UA u l-SROs). Aħna żorna l-Kummissjoni tal-Unjoni Afrikana, l-ECOWAS u l-ECCAS.

Osservazzjonijiet

L-appoġġ tal-UE baqa’ ffukat fuq l-ispejjeż operazzjonali

15

F’din it-taqsima, aħna neżaminaw jekk kienx hemm strateġija ċara li kienet tkopri l-forniment, kemm dak attwali kif ukoll fil-futur, tal-appoġġ tal-UE għall-APSA. Aħna neżaminaw jekk l-appoġġ tal-UE indirizzax il-ħtiġijiet tal-APSA, u kif evolva biex jindirizza l-kwistjonijiet attwali u dawk futuri li tiffaċċja l-APSA.

L-appoġġ tal-UE għall-APSA nħoloq fuq il-bażi ta’ qafas strateġiku

16

L-UE vvalutat is-sitwazzjoni tal-paċi u s-sigurtà fuq il-kontinent Afrikan u żviluppat approċċ li fforma l-bażi għall-appoġġ tagħha. Filwaqt li għarfet ir-rwol importanti fil-qasam tal-paċi u s-sigurtà kemm tal-Unjoni Afrikana (UA) kif ukoll tal-Organizzazzjonijiet Subreġjonali Afrikani (SROs), l-UE involviet lilha nfisha maż-żewġ livelli. Peress li feġġ theddid ġdid għall-paċi u s-sigurtà, l-UE rrevediet u aġġornat l-istrateġiji tagħha (il-paragrafu 8).

17

F’konformità ma’ dan il-qafas strateġiku, l-UE pprovdiet appoġġ politiku u finanzjarju lill-UA, u lill-SROs, inkluż għall-iżvilupp tal-APSA. L-UE appoġġat it-tħejjija ta’ pjanijiet direzzjonali suċċessivi mill-UA u mill-SROs, li kienu jinkludu pjanijiet għall-implimentazzjoni tal-APSA²³. L-Unjoni Ewropea appoġġat ukoll il-valutazzjonijet regolari tal-APSA. Dan ifisser li l-APSA bbenefikat minn feedback regolari (fl-għamla ta’ valutazzjonijiet tal-APSA) u minn gwida għal aktar żvilupp (fl-għamla ta’ pjanijiet direzzjonali tal-APSA). Il-pjanijiet direzzjonali pprovdew ukoll qafas għall-koordinazzjoni tad-donaturi. Madankollu, valutazzjoni tal-FPA li saret fl-2017 indikat li kien hemm ċerti dgħufijiet fl-aħħar pjan direzzjonali tal-APSA. Dan jitqies li huwa kumpless wisq biex jintuża u li ma għandux perspettiva globali, kif ukoll li l-Kummissjoni tal-UA għadha ma ħaditx verament is-sjieda tiegħu²⁴.

18

L-UE stabbiliet mekkaniżmi għal djalogu politiku kemm fil-livell tal-UA kif ukoll fil-livell reġjonali. Matul laqgħat regolari mal-UA fi ħdan il-qafas tal-JAES, li ġiet stabbilita fl-2007, seħħ djalogu politiku u djalogu ta’ politika dwar il-kwistjonijiet tal-paċi u s-sigurtà, inkluż dwar l-implimentazzjoni tal-APSA. Madankollu, kien hemm nuqqas ta’ ċarezza bejn l-UA u d-diversi SROs rigward l-istrateġija għar-ripartizzjoni tar-responsabbiltajiet bejniethom, notevolment dwar il-kwistjoni tas-sussidjarjetà (il-paragrafu 34).

19

Il-mekkaniżmi li l-UE stabbiliet għad-djalogu mal-organizzazzjonijiet reġjonali ma ffunzjonawx daqstant tajjeb. Fil-każ tal-ECOWAS, pereżempju, il-laqgħat fil-livell ministerjali kienu irregolari (seħħew fl-2017 iżda, minkejja l-isforzi, mhux fl-2016). F’każijiet oħra, id-djalogu ta' politika kien ikkumplikat (pereżempju minħabba n-nuqqas ta’ riformi istituzzjonali, minħabba l-avvanz bil-mod ħafna tal-integrazzjoni reġjonali, jew minħabba r-rispons bil-mod min-naħa tal-kontropartijiet fir-rigward ta’ proposti u mistoqsijiet). Id-djalogu kien jeħtieġ jiġi mtejjeb, intensifikat u kkonsolidat, pereżempju fir-rigward tal-istrateġiji subreġjonali tal-UE għas-Saħel u għall-Golf tal-Guinea. Xi kultant id-djalogu kien diffiċli għax l-organizzazzjonijiet ma kellhomx biżżejjed kapaċità amministrattiva, pereżempju fil-każ tal-ECCAS.

Il-finanzjament għall-APSA jiddependi fuq il-kontribuzzjonijiet tad-donaturi

20

Id-defiċit fil-kontribuzzjonijiet mill-Istati membri tal-UA għall-baġit tal-Unjoni Afrikana (il-paragrafu 5) u għall-Fond għall-Paċi (il-paragrafu 6) irriżulta biex l-APSA tkun sottofinanzjata. Din il-kwistjoni ġiet enfasizzata fl-aħħar Pjan Direzzjonali tal-APSA fejn intqal li minkejja li ttieħdu bosta deċiżjonijiet mill-Assemblea tal-Kapijiet ta’ Stat u ta’ Gvern tal-UA u/jew li saru bosta dispożizzjonijet fl-istabbiliment tal-KPS, għad hemm nuqqas ta’ kontribuzzjoni finanzjarja mill-AUC u mir-RECs/RMs għall-APSA u din għadha dipendenti ħafna fuq id-donaturi²⁵. Barra minn hekk, l-esperti enfasizzaw li ma tistax isseħħ is-sjieda Afrikana tal-aġenda tal-kontinent għall-paċi u s-sigurtà qabel ma din l-aġenda ssir finanzjarjament awtonoma²⁶.

21

Filwaqt li rrikonoxxew il-problemi assoċjati mad-dipendenza fuq id-donaturi, l-Istati membri tal-UA ddeċidew, f’Lulju 2016, dwar mekkaniżmu ġdid għall-finanzjament tal-baġit operazzjonali tal-UA u tal-Fond għall-Paċi²⁷. L-UE appoġġat din l-inizjattiva, li tikkonsisti fl-obbligu li titħallas imposta ta’ 0.2 % fuq l-importazzjonijiet eliġibbli kollha fl-Afrika, mill-2017 ’il quddiem. Sa Jannar 2018, 14-il Stat membru kienu bdew jiġbru l-imposta²⁸, il-Fond għall-Paċi kien beda jopera, u kellu struttura ta’ governanza. F’Ġunju 2017, l-UA stiednet lill-UE biex tingħaqad mal-bord tal-Fond għall-Paċi.

22

Fiż-żmien tal-awditu, kien għadu kmieni wisq biex tiġi vvalutata l-effettività tal-arranġamenti l-ġodda. Barra minn hekk, l-imposta ma tindirizzax id-diffikultajiet ta’ finanzjament li jaffettwaw lill-SROs, li min-naħa tagħhom huma ffinanzjati taħt mekkaniżmi separati, bħal pereżempju d-diffikultà tad-defiċit sostanzjali fil-finanzjament li tiffaċċja l-ECCAS²⁹. Apparti dan, xi Stati Afrikani jistgħu jsibu li jkunu jridu jieħdu deċiżjoni dwar jekk għandhomx jużaw il-fondi limitati tagħhom biex jiffinanzjaw l-UA jew l-SROs³⁰.

L-UE ffinanzjat l-ispejjeż operazzjonali mingħajr ma ħejjiet pjan għall-iffukar mill-ġdid tal-appoġġ

23

Matul il-perjodu awditjat, il-biċċa l-kbira tal-finanzjament mill-UE għall-APSA ntuża biex ikopri l-ispejjeż operazzjonali bħall-ispejjeż relatati mal-persunal (il-Figura 4). Matul l-ewwel snin tal-appoġġ tagħha (mill-2010), l-UE ġġustifikat il-finanzjament tal-ispejjeż operazzjonali billi aċċennat l-importanza li l-istruttura l-ġdida ssir operazzjonali. Madankollu, wara kważi seba’ snin, il-fokus tal-appoġġ tal-UE baqa’ fuq il-forniment ta’ appoġġ għall-ispejjeż operazzjonali bażiċi. Dan jista’ jwassal għal riskju li l-APSA ssir dipendenti fuq l-appoġġ mid-donaturi, peress li aktar ma jkun twil il-perjodu li fih tingħata l-għajnuna, u aktar ma jkun kbir il-proporzjon ta’ finanzjament ipprovdut mid-donaturi, aktar ma tikber id-dipendenza ta’ proġett fuq tali għajnuna³¹.

24

Aħna stennejna li l-UE tkun ħejjiet pjan fuq terminu twil biex turi kif l-appoġġ tagħha kellu jevolvi matul iż-żmien u kif eventwalment kellu jintemm gradwalment. Ma sibna l-ebda evidenza li l-UE kienet għamlet dan. Lanqas ma kienet laħqet qbil mal-UA u mal-SROs dwar kif kienet se tadatta gradwalment l-ammont ta’ appoġġ li kienet qed tipprovdi u kif kellha tirrialloka l-fondi biex tiżdied il-bini ta’ kapaċità (pereżempju prevenzjoni ta’ kunflitti, rispons effettiv u rikostruzzjoni wara l-kunflitti) u lejn miżuri strateġiċi ta’ appoġġ (bħal riformi organizzazzjonali u operazzjonali, titjib tas-sistemi, forniment ta’ għarfien espert u ta’ taħriġ speċifiku, eċċ), sabiex jiġu żviluppati kapaċitajiet fuq terminu twil.

25

L-UE ma kinitx għamlet kundizzjonijiet għall-forniment tal-appoġġ tagħha, pereżempju li l-UA jew l-SROs kellhom ikomplu jiffinanzjaw inizjattivi li preċedentement kienu appoġġati mill-UE. F’kuntratt partikolari fejn tali dispożizzjoni kienet inkluża fil-ftehim ta’ finanzjament, l-SRO kkonċernata ma rrispettatx il-ftehim u ma komplietx tiffinanzja hi l-postijiet ta’ impjiegi li preċedentement kienu ffinanzjati taħt il-FEŻ (il-Kaxxa 3).

26

Aħna stennejna wkoll li l-kuntratti jkunu jinkludu dispożizzjonijiet kemm għat-tnaqqis fil-finanzjament kumplessiv kif ukoll għar-riorjentament tiegħu minn appoġġ għal persunal operazzjonali lejn il-finanzjament ta’ persunal speċjalizzat. Li kieku l-UA u l-SROs jieħdu f’idejhom l-ispejjeż operazzjonali ta’ kuljum³², l-UE tkun tista’ mbagħad tiffoka fuq li żżid il-valur billi tiffinanzja l-persunal li jkun imħarreġ f’ħiliet speċjalizzati, bħall-prevenzjoni u r-riżoluzzjoni ta’ kunflitti. Fil-biċċa l-kbira tal-kuntratti li awditjajna dan ma kienx il-każ. Madankollu, il-Kaxxa 4 turi eżempju fejn dan l-approċċ irnexxa.

L-allokazzjoni tal-appoġġ tal-UE ma ngħatatx biżżejjed prijorità

27

Billi kienet konxja tar-riskju għaċ-ċittadini tal-UE minħabba l-kunflitti fl-Afrika (it-terroriżmu vjolenti, id-disponibbiltà ta’ armi ta’ qerda massiva, u l-kriminalità organizzata), l-UE bdiet torjenta l-appoġġ tagħha lejn il-prevenzjoni ta’ tali kunflitti, u lejn ir-riżoluzzjoni tagħha ladarba jseħħu³⁵. F’konformità mad-Dikjarazzjoni ta’ Pariġi dwar l-Effikaċja tal-Għajnuna³⁶ u l-prinċipji stipulati fil-JAES, l-UE rnexxielha, b’mod ġenerali, tipprovdi appoġġ għall-APSA f’konformità mal-ħtiġijiet li esprimew l-UA u l-SROs fil-pjan direzzjonali tal-APSA. Madankollu, il-ħtiġijiet iddefiniti kienu ġenerali ħafna u l-prijoritajiet la kienu speċifiċi u lanqas ċari.

28

Is-SEAE u l-Kummissjoni ma fasslux prijoritajiet speċifiċi ta’ finanzjament mill-UE u ma żviluppawx linji gwida għall-allokazzjoni ta’ riżorsi għad-diversi komponenti tal-APSA. Madankollu, il-Kummissjoni u s-SEAE eżaminaw il-proposti ta’ finanzjament li ntbagħtu mill-UA u mill-SROs, u l-Kumitat Politiku u ta’ Sigurtà tal-Kunsill tal-UE vvaluta x-xerqien politiku tal-għoti ta’ finanzjament. L-Anness II juri l-eżempju tal-proċedura għat-teħid tad-deċiżjonijiet fir-rigward tal-Faċilità għall-Paċi fl-Afrika.

29

Aħna analizzajna l-14-il kuntratt awditjat biex naraw kif irriflettew il-prijoritajiet stabbiliti għall-APSA. Sibna li fi tmien każijiet, minħabba l-mod li bih il-fondi ġew ippreżentati fil-baġits tal-kuntratti, ma kienx possibbli li jkun magħruf kemm ġew allokati flus għal kull wieħed mill-pilastri jew mill-prijoritajiet tal-APSA. Sibna wkoll li l-kuntratti individwali kellhom ambitu wiesa’ f’dak li jirrigwarda liema kellhom ikunu l-prijoritajiet fil-mira: 11 mill-14-il kuntratt kellhom tal-inqas 4 mill-5 prijoritajiet strateġiċi tal-APSA fil-mira (l-Anness III).

Riskji assoċjati mal-allokazzjoni ta’ aktar fondi għall-organizzazzjonijiet reġjonali

30

Fil-perjodu ta' programmazzjoni l-aktar reċenti, l-UE ddeċidiet li tgħaddi proporzjon akbar ta’ finanzjament totali għall-APSA permezz tar-RIPs (il-paragrafu 10). L-għan kien li l-SROs jingħataw rwol akbar fit-teħid tad-deċiżjonijiet, f’konformità mal-prinċipju tas-sussidjarjetà. Dan jippermetti wkoll li l-SROs jaħdmu direttament mal-UE, u b’hekk jiġi evitat dewmien assoċjat mal-koordinazzjoni tal-finanzjament mill-UA għall-programm ta’ appoġġ għall-APSA. Aħna sibna li hemm riskji assoċjati ma’ din il-bidla.

1. Fiż-żmien tal-awditu tagħna, l-SROs ma kellhomx biżżejjed membri tal-persunal bil-ħiliet meħtieġa biex jimmaniġġjaw il-finanzjament addizzjonali b’mod effettiv.
2. Il-qafas istituzzjonali reġjonali huwa kumpless ferm. Hemm 10 SROs b’mandat fil-qasam tal-paċi u s-sigurtà li għandhom sħubijat li jikkoinċidu. Bħala medja, l-Istati membri tal-UA huma membri ta’ mill-inqas żewġ SROs u xi Stati huma anki membri ta’ erbgħa. Minħabba n-nuqqas ta’ ċarezza xi Stati Afrikani ma jkunux lesti li jimpenjaw lilhom infushom fl-SROs tagħhom, u dan jirriżulta f’dgħufijiet fil-kapaċità. L-istrateġija tal-Kummissjoni tal-UE biex tindirizza dan il-qafas reġjonali kumpless kienet li tappoġġa RIP konġunt f’kull reġjun; attwalment l-UE tiffinanzja l-SROs taħt tliet RIPs.
3. Mill-10 SROs b’mandat fil-paċi u s-sigurtà, 4 mhumiex koperti minn RIP u 2 minn dawn l-4 se jkomplu jirċievu finanzjament taħt l-FPA. Barra minn hekk, il-Fond Fiduċjarju ta’ Emerġenza tal-UE għall-Afrika jiffinanzja miżuri tal-bini ta’ kapaċità għal SRO partikolari (l-Awtorità Intergovernattiva għall-Iżvilupp) u għal organizzazzjonijiet maħluqa barra mill-qafas tal-APSA (pereżempju, il-G5 tas-Saħel³⁷). Dan jista’ jxekkel il-koerenza tal-approċċ għall-finanzjament adottat mill-UE.
4. jekk ir-rwol tal-UA jitnaqqas, hemm ir-riskju li l-koerenza u l-koordinazzjoni kumplessivi tal-appoġġ tal-UE għall-APSA jiddgħajjef.
5. minkejja ż-żieda sinifikanti fl-ammonti allokati għall-miżuri tal-paċi u s-sigurtà taħt ir-RIPs, l-għadd ta’ persunal li jaħdem fid-delegazzjonijiet reġjonali rilevanti tal-UE ma żdiedx kif meħtieġ. Pereżempju, ma kienx hemm esperti militari fost il-persunal tad-delegazzjonijiet fl-ECOWAS u fl-ECCAS, li jfisser li dawn id-delegazzjonijiet kienu qed jibbażaw fuq l-għarfien espert militari disponibbli fl-ambaxxati tal-Istati Membri tal-UE.

Minkejja l-appoġġ tal-UE, l-APSA tiffaċċja bosta sfidi u l-operat tagħha jiddependi fuq il-kontinwazzjoni tal-appoġġ estern

31

F’din it-taqsima, aħna neżaminaw jekk l-appoġġ tal-UE kkontribwiex għall-kisba ta’ r-riżultati. Aħna naraw kemm il-kuntratti ffinanzjati mill-UE rriżultaw fil-forniment ta’ appoġġ skont l-objettivi stabbiliti għal dawk il-kuntratti. Neżaminaw ukoll l-isfidi li jiffaċċjaw id-diversi komponenti tal-APSA. Fl-aħħar nett, aħna nivvalutaw jekk is-SEAE u l-Kummissjoni identifikawx u indirizzawx ir-riskji għas-sostenibbiltà tar-riżultati tal-appoġġ tal-UE.

Nofs il-kuntratti kienu pproduċew riżultati fiż-żmien tal-awditu

32

Aħna awditjajna 14-il kuntratt relatati mal-appoġġ tal-UE. Sitta minnhom, li prinċipalment kienu jikkonċernaw l-ispejjeż għall-persunal, kienu fil-biċċa l-kbira pproduċew ir-riżultati kumplessivi mistennija minnhom saż-żmien tal-awditu. Madankollu, ma kellniex informazzjoni suffiċjenti biex niddeċiedu jekk kull output individwali kienx inkiseb (il-paragrafi 59 u 60). Żewġ kuntratti oħra kienu pproduċew parzjalment l-outputs mistennija filwaqt li kuntratt wieħed ma kienx ipproduċa l-outputs mistennija. F’ħames każijiet, id-dewmien fl-implimentazzjoni fisser li ma stajniex nivvalutaw jekk il-kuntratt kienx kiseb l-outputs mistennija jew le (il-paragrafu 53 u l-Anness IV).

L-APSA tiffaċċja bosta sfidi

33

Il-partijiet ikkonċernati u d-donaturi għandhom aspettattivi għolja fir-rigward tal-APSA. Valutazzjonijiet li twettqu³⁸ kkonkludew li l-UA u l-SROs għandhom rwol importanti fl-indirizzar ta’ kunflitti fl-Afrika. L-APSA għandha l-potenzjal li ssir qafas effettiv għall-paċi u s-sigurtà fl-Afrika, għalkemm hija tiffaċċja ħafna sfidi diffiċli u teħtieġ li tiżviluppa aktar il-kapaċitajiet, l-istrumenti u l-operazzjonijiet kumplessivi tagħha.

34

L-isfidi għall-APSA jinkludu dawn li ġejjin:

1. jeħtieġ li l-kapacità finanzjarja u istituzzjonali tal-korpi ewlenin involuti (l-UA u l-SROs) teħtieġ tiġi msaħħa;
2. jeħtieġ li jittieħdu passi speċifiċi biex jingħeleb in-nuqqas ta’ rieda politika għall-indirizzar ta’ ċerti kwistjonijiet u kriżijiet³⁹;
3. ma hemm stabbilit l-ebda mekkaniżmu biex jiġi żgurat li d-deċiżjonijiet ikunu infurzati;
4. hemm il-ħtieġa għal kooperazzjoni aħjar bejn il-korpi u l-istituzzjonijiet differenti;
5. jeħtieġ li r-relazzjoni bejn l-UA u l-SROs tkun ikkjarifikata, partikolarment fir-rigward tas-sussidjarjetà⁴⁰;
6. jeħtieġ li jkun hemm koordinazzjoni aħjar ma’ inizjattivi komplementari bħall-Arkitettura tal-Governanza Afrikana⁴¹.

35

Il-Fond Afrikan għall-Paċi ma kopriex l-ispejjeż tal-operat tal-APSA kif kien ippjanat (il-paragrafi 5 u 6). Għalhekk, il-biċċa l-kbira tal-appoġġ tal-UE ffinanzja l-ispejjeż operazzjonali tal-APSA. Il-paragrafi 36 sa 47 jippreżentaw l-isfidi għall-operat tal-komponenti tal-APSA u l-kontribuzzjoni tal-appoġġ tal-UE.

Kunsill tal-Paċi u s-Sigurtà

36

Il-Kunsill tal-Paċi u s-Sigurtà (KPS) huwa stabbilit fir-rwol tiegħu bħala l-organu deċiżjonali prinċipali tal-APSA u ħa pożizzjonijiet dwar kwistjonijiet ewlenin billi kkundanna l-kolpi ta’ Stat u billi impona sanzjonijiet. Huwa kkontribwixxa wkoll għar-riżoluzzjoni ta’ kunflitti, pereżempju fil-Burundi, fil-Mali u fis-Somalja⁴².

37

Madankollu, il-KPS jiffaċċja diversi sfidi u bosta problemi jkomplu jaffettwaw ix-xogħol tiegħu. Pereżempju, l-Assemblea tal-Kapijiet ta’ Stat tal-Unjoni Afrikana ta’ spiss ma osservatx il-prinċipji stipulati fil-Protokoll tal-KPS għall-valutazzjoni tal-konformità ta’ kandidati prospettivi tal-KPS mal-kriterji stabbiliti. Pajjiżi li kisbu notorjetà talli b’mod miftuħ ma rrispettawx id-deċiżjonijiet tal-UA jew talli wrew imġiba mhux kostituzzjonali, ġew inklużi fil-Kunsill. Dan illimita l-kwalità u l-effettività tad-deċiżjonijiet tal-KPS. Il-KPS esperjenza wkoll problemi minħabba l-importanza li ngħatat għall-unanimità fit-teħid tad-deċiżjonijiet. Dan huwa aggravat bin-nuqqas ta’ rieda politika ta’ xi Stati biex jieħdu pożizzjoni dwar kwistjonijiet li ma jqisux li huma fl-interess tagħhom, jew jekk ma jkunux jixtiequ jikkonfrontaw b’mod miftuħ Stat membru ieħor⁴³.

Kummissjoni tal-Unjoni Afrikana

38

Il-Kummissjoni tal-UA timplimenta d-deċiżjonijiet tal-KPS u d-Dipartiment tal-Paċi u tas-Sigurtà (DPS) tagħha jappoġġa l-pilastri l-oħra tal-APSA kif ukoll programmi oħra tal-paċi u tas-sigurtà, bħad-demarkazzjoni tal-fruntieri, u l-istrateġija dwar armi ħfief u ta’ kalibru żgħir. Id-DPS jikkoordina wkoll ir-relazzjonijiet bejn l-UA u l-SROs dwar kwistjonijiet tal-paċi u s-sigurtà.

39

Id-DPS għandu rwol importanti fl-operat tal-APSA, iżda minħabba li l-finanzjament mill-UA ma kienx adegwat, żewġ terzi tal-postijiet ta’ impjieg tiegħu baqgħu battala. Fl-2010, l-UE, l-UA u sħab internazzjonali oħra indirizzaw din il-problema billi waqqfu mekkaniżmu komuni ta’ finanzjament imsejjaħ “Arranġament ta’ Finanzjament Konġunt” (JFA)⁴⁴. Dan kopra l-ispejjeż għas-salarji ta’ 172 membru addizzjonali tal-persunal li kienu impjegati “għal terminu qasir” fid-DPS (il-Figura 5). Għalkemm mhux il-postijiet ta’ impjieg kollha mtlew, il-membri addizzjonali tal-persunal ippermettew li d-DPS ikompli jiffunzjona⁴⁵.

Figura 5

Postijiet ta’ impjieg u postijiet battala fid-Dipartiment tal-Paċi u s-Sigurtà fi ħdan il-Kummissjoni tal-UA

Tip ta’ kuntratt	Postijiet mimlija	Postijiet battala	Total	Rimarki
Baġit regolari tal-UA	25	42	67	Il-proċess ta’ reklutaġġ għall-postijiet ewlenin inbeda fir-raba’ trimestru tal-2016
Terminu qasir (JFA)	137	35	172	Qed isir ir-reklutaġġ għal 12-il post
Issekondar	12		12	Stima, Marzu 2017
Total	174	77	251

Sors: Minuti tal-11-il laqgħa tal-Kumitat ta' Tmexxija dwar l-Arranġament ta’ Finanzjament Konġunt għall-appoġġ tal-impjieg ta’ membri tal-persunal tal-AUC li jaħdmu fil-Programm tal-Paċi u s-Sigurtà, April 2017, kif ukoll stampa ġenerali tal-persunal tad-DPS, Lulju 2016.

40

Id-DPS għandu għadd limitat ta’ membri tal-persunal “professjonali” li jindirizzaw il-kwistjonijiet fundamentali tal-paċi u s-sigurtà tal-kontinent Afrikan. Il-Figura 6 turi t-tip ta’ membri tal-persunal irreklutati u kif dawn ġew iffinanzjati fl-2016. Il-kompitu prinċipali tal-persunal huwa li jwettqu l-pjan direzzjonali ġenerali tal-APSA għall-2016-2020, dokument li jispeċifika 5 prijoritajiet strateġiċi, 32 objettiv speċifiku u 116-il output. L-ammont inadegwat ta’ riżorsi allokati u r-reklutaġġ ta’ persunal “għal terminu qasir” (il-paragrafu 57) jagħmlu dan il-kompitu wieħed diffiċli.

Figura 6

Sors ta’ finanzjament għall-postijiet ta’ impjieg fid-Dipartiment tal-Paċi u s-Sigurtà fi ħdan il-Kummissjoni tal-UA

Distribuzzjoni tal-postijiet ta’ impjieg tal-persunal skont l-uffiċċju / l-unità	JFA		Baġit Regolari tal-UA		Total
	Servizzi Ġenerali	Professjonali	Servizzi Ġenerali	Professjonali
Uffiċċju tal-Kummissarju	2	2	1	2	7
Uffiċċju tad-Direttur inklużi l-Uffiċċji ta’ Kollegament tal-UA għar-RECs/RMs	9	10	3	1	23
Diviżjoni tal-Prevenzjoni ta’ Kunflitti u ta’ Twissija Bikrija	6	15	7	6	34
Diviżjoni tal-Ġestjoni ta’ Kriżijiet u tar-Rikostruzzjoni Wara l-Kunflitti	4	8	1	18	31
Diviżjoni tal-Operazzjonijiet ta’ Appoġġ għall-Paċi	3	32	6	12	53
Diviżjoni tad-Difiża u s-Sigurtà	2	6	1	3	12
Segretarjat tal-KPS	2	6	1	2	11
Tim tal-Ġestjoni tal-Proġetti	2	9	1	2	14
Diviżjoni tal-Finanzjament tal-Paċi u s-Sigurtà	10	14	-	-	24
Oħrajn (Reġistru, Riżorsi Umani, Awditjar Intern, eċċ)	20	10	M/A - japplika għal dipartimenti oħra
Total	60	112	21	46	239

Sors: Minuti tal-11-il laqgħa tal-Kumitat ta' Tmexxija dwar l-Arranġament ta’ Finanzjament Konġunt għall-appoġġ tal-impjieg ta’ membri tal-persunal tal-AUC li jaħdmu fil-Programm tal-Paċi u s-Sigurtà, April 2017, kif ukoll stampa ġenerali tal-persunal tad-DPS, Lulju 2016.

41

L-UE u d-donaturi l-oħra jgħaddu wkoll flus b’mod konġunt permezz tal-Kummissjoni tal-UA għall-appoġġ ta’ netwerk ta’ Uffiċċji ta’ Kollegament tal-UA li joperaw f’14-il pajjiż fl-Afrika li qegħdin f’sitwazzjoni ta’ kunflitt jew li għadhom kif għaddew minn sitwazzjoni ta’ kunflitt. Il-kontribuzzjoni annwali mill-UE għall-finanzjament tal-Uffiċċji ta’ Kollegament tal-UA tammonta għal bejn wieħed u ieħor EUR 3.5 miljun (madwar 25 % tal-baġit annwali). In-netwerk għandu bejn wieħed u ieħor 200 membru tal-persunal, u l-proporzjon ta’ persunal ta’ appoġġ imqabbel mal-persunal operazzjonali huwa għoli (madwar 70:30). Il-KPS jistabbilixxi l-mandati tal-Uffiċċji ta’ Kollegament, li jvarjaw mill-monitoraġġ ta’ kriżijiet emerġenti, id-diplomazija preventiva u l-ġestjoni ta’ kriżijiet għar-rikostruzzjoni wara l-kunflitti. L-uffiċċji jirrappreżentaw l-UA fuq il-post u għandhom rwol primarjament politiku⁴⁶.

42

Evalwazzjoni reċenti ffinanzjata mill-UE⁴⁷ ġibdet l-attenzjoni għar-rwol kostruttiv u sinifikanti tal-Uffiċċji ta’ Kollegament tal-UA f’sitwazzjonijiet ta’ kriżi fil-Mali, fir-Repubblika Ċentru-Afrikana, fis-Sudan, fis-Sudan t’Isfel, f’Comoros, fil-Guinea-Bissau u f’Madagascar. Madankollu, hija osservat ukoll li l-insuffiċenzja tal-fondi u l-problemi relatati mal-persunal irriżultaw f’ineffiċjenzi operazzjonali. L-evalwazzjoni sabet li l-impatt tal-Uffiċċji ta’ Kollegament kien ivarja, iżda li x-xogħol tagħhom kien għamel kontribut raġonevoli għall-paċi u s-sigurtà. B’mod simili, rapport reċenti mill-Fondazzjoni għall-Paċi Dinjija ikkonkluda li l-Uffiċċji ta’ Kollegament kienu importanti u jenħtieġ li jkomplu jiġu appoġġati⁴⁸.

Grupp ta’ Esperti

43

Il-Protokoll tal-KPS waqqaf il-Grupp ta’ Esperti bħala organu konsultattiv magħmul minn ħames personalitajiet Afrikani rispettati. Ir-rwol tiegħu huwa li jaħdem għall-prevenzjoni ta’ kunflitti, pereżempju, permezz tal-organizzazzjoni ta’ sessjonijiet ta’ ħidma u rtiri ta’ livell għoli. Ir-rwol tal-Grupp kiber biex jinkludi missjonijiet preelettorali u xogħol ta’ medjazzjoni⁴⁹. Minkejja li l-ammont ta’ xogħol qed jiżdied, ir-riżorsi tal-Grupp ma żdiedux. Pereżempju, is-segretarjat tal-Grupp għandu biss analist politiku wieħed, li s-salarju tiegħu jitħallas mill-UE taħt il-JFA. Il-Grupp iltaqa’ wkoll ma’ problemi ta’ koordinazzjoni mal-KPS u ma’ korpi oħra inkarigati mill-prevenzjoni u r-riżoluzzjoni ta’ kunflitti.

Sistema Kontinentali ta’ Twissija Bikrija (CEWS)

44

Is-Sistema Kontinentali ta’ Twissija Bikrija (CEWS) hija sistema għall-ġbir u l-analiżi tad-data sabiex jiġu antiċipati u pprevenuti l-kunflitti. L-UE kkontribwiet appoġġ tekniku u finanzjarju għall-istabbiliment ta’ din is-sistema u tkompli tiffinanzja l-ispejjeż operazzjonali tagħha taħt il-kuntratti, li awditjajna, li jirriżultaw mill-JFA dwar is-Salarji u l-Programmi ta’ Appoġġ għall-APSA (l-Anness IV).

45

Ir-Rapport dwar l-Impatt tal-APSA għall-2015 ikkonkluda li l-CEWS kienet teknikament funzjonali u osserva li kien sar progress sinifikanti fir-rigward tal-kooperazzjoni bejn l-SRO u l-UA dwar twissijiet bikrija⁵⁰. Ċerti fatturi, madankollu, jillimitaw l-effettività tas-sistema.

1. Il-pjan direzzjonali tal-APSA jiġbed l-attenzjoni għall-ħtieġa li jiġu indirizzati d-diversi livelli ta’ funzjonalità tas-sistemi reġjonali ta’ twissija bikrija, kif ukoll li jsir titjib fil-konnessjonijiet bejn is-sistemi ċentrali, reġjonali u dawk nazzjonali⁵¹.
2. Il-Kunsill tal-Paċi u s-Sigurtà enfasizza l-eżistenza ta’ diskrepanza persistenti bejn it-twissija bikrija u r-rispons bikri⁵², u kkonkluda li l-Istati membri tal-UA ħafna drabi jinjoraw is-sinjali ta’ twissija bikrija li jindikaw kriżijiet fil-futur, biex b’hekk idgħajfu l-kapaċità tal-Kunsill fil-prevenzjoni ta’ kunflitti, u dan ħafna drabi jirriżulta f’kunflitti⁵³.

Forza Afrikana ta' Intervent fil-Pront

46

Il-Forza Afrikana ta’ Intervent fil-Pront (ASF) hija forza ta’ riżerva multidixxiplinari mfassla għall-iskjerament rapidu f’żoni ta’ kunflitt mill-Assemblea tal-UA u l-KPS. Hija tinkludi unitajiet militari, tal-pulizija u ċivili⁵⁴. L-appoġġ tal-UE ffinanzja titjib fil-kapaċità tal-Forza Afrikana ta' Intervent fil-Pront u fil-komponenti reġjonali tagħha taħt il-Faċilità għall-Paċi fl-Afrika u r-RIPs. L-appoġġ kopra l-ispejjeż għall-persunal u l-attivitajiet operazzjonali (titjib fl-ippjanar, loġistika, u żvilupp tal-politika u tisħiħ tal-komponenti tal-pulizija u dawk ċivili) kif ukoll l-akkwist ta’ infrastruttura tal-IT (C3IS) (ara l-Anness IV għal-lista ta’ kuntratti). L-UE ffinanzjat ukoll taħriġ mogħti lill-forzi ta’ intervent fil-pront, inkluż appoġġ għall-eżerċizzji fuq il-post (il-Programm ta’ Appoġġ AMANI AFRICA II).

47

L-UA kienet għadha ma skjeratx l-ASF fid-data tal-awditu tagħna. Il-partijiet ikkonċernati li intervistajna esprimew dubji dwar kemm din kienet operazzjonali, filwaqt li ġibdu l-attenzjoni għall-fatt li:

1. is-Sistema ta’ Kmand, ta’ Kontroll, ta’ Komunikazzjoni u ta’ Informazzjoni tal-ASF għadha mhijiex operazzjonali (il-Kaxxa 6);
2. l-ASF ma għandhiex il-kapaċità li tiskjera l-unitajiet rapidament minħabba limitazzjonijiet loġistiċi bħall-kapaċità strateġika ta’ trasport bl-ajru insuffiċjenti;
3. il-problemi lingwistiċi u kulturali għandhom il-potenzjal li jnaqqsu l-effettività tal-iskjerament f’diversi reġjuni.

Theddid għas-sostenibbiltà tar-riżultati

48

Ir-riskji prinċipali għas-sostenibbiltà tar-riżultati miksuba fil-bini ta’ kapaċità tal-APSA ġejjin mill-kapaċità finanzjarja, istituzzjonali u operazzjonali dgħajfa tal-UA u tal-SROs, u min-nuqqas ta’ impenn politiku minn għadd ta’ Stati membri tal-UA (il-paragrafu 34).

49

Ir-riformi li kienu ppjanati biex jindirizzaw id-dgħufijiet fl-oqfsa istituzzjonali tal-Kummissjoni tal-UA⁵⁵, tal-ECOWAS⁵⁶ u tal-ECCAS⁵⁷ ftit li xejn ipproduċew riżultati sa issa. Il-Kummissjoni tal-UE ħeġġet u pprovdiet appoġġ finanzjarju għal tali inizjattivi: pereżempju, ir-riforma istituzzjonali tal-ECOWAS bħalissa qed tiġi appoġġata permezz tal-proġett tal-UE intitulat “Appoġġ għar-Riformi tal-Ġestjoni tal-Finanzi Pubbliċi”, u r-riformi istituzzjonali għall-ECCAS qed ikunu wkoll fil-mira bħala parti minn proġett għall-paċi u l-appoġġ taħt il-FEŻ.

50

Biex tikkoreġi d-dgħufijiet istituzzjonali u operazzjonali tal-Kummissjoni tal-UA u tal-SROs, l-assistenza teknika ffinanzjata mill-UE ħafna drabi ffukat fuq il-ġestjoni ġenerali, għamla ta’ assistenza li għandha impatt fit-tul limitat fuq l-iżvilupp tal-APSA. L-esperti tal-assistenza teknika ħafna drabi aġixxew bħala maniġers tal-proġetti, u b’hekk ipprovdew “soluzzjoni fuq terminu qasir” għad-dgħufijiet interni tal-organizzazzjonijiet ta’ implimentazzjoni. Dan ħafna drabi kellu konsegwenzi sinifikanti: pereżempju, l-ammont tal-għotja li l-UE tat lill-ECOWAS għall-Paċi, is-Sigurtà u l-Istabbiltà kien ta’ EUR 6.7 miljun, filwaqt li l-ispiża tal-assistenza teknika għall-implimentazzjoni tal-għotja kienet tammonta għal EUR 4.9 miljun oħra: 73 % tal-għotja inizjali.

L-implimentazzjoni tal-appoġġ tal-UE ġiet affettwata minn dewmien, użu inkoerenti tal-istrumenti ta’ finanzjament u informazzjoni insuffiċjenti dwar ir-riżultati miksuba

51

F’din it-taqsima, aħna neżaminaw jekk il-Kummissjoni pprovdietx l-appoġġ tal-UE lill-APSA b’mod prevedibbli, koerenti u f’waqtu u jekk il-kuntratti li awditjajna ġewx implimentati kif kien ippjanat. Aħna nivvalutaw il-mekkaniżmi ta’ monitoraġġ u ta’ rappurtar li ġew stabbiliti mill-Kummissjoni, u nivverifikaw jekk dawn ipprovdewx informazzjoni adegwata dwar riżultati miksuba.

Dewmien fil-konklużjoni ta’ kuntratti u l-finanzjament retroattiv xekklu l-implimentazzjoni tal-attivitajiet ippjanati

52

Il-benefiċjarji tal-kuntratti li awditjajna kienu l-UA u l-SROs. L-għan tal-appoġġ kien li jiffinanzja u jħarreġ lill-persunal biex iwettaq kompiti kumplessi relatati mal-paċi u s-sigurtà, u li jiżgura li l-attivitajiet jiġu implimentati b’mod koerenti fil-kontinent kollu. Il-kuntratti, elenkati fl-Anness IV, kellhom l-għan li:

1. isaħħu l-kapaċità tar-riżorsi umani tal-Kummissjoni tal-UA u tal-organizzazzjonijiet subreġjonali (ir-RECs u l-RMs) għall-prevenzjoni u/jew għar-rispons għall-kriżijiet fl-Afrika;
2. jgħinu lill-Uffiċċji ta’ Kollegament tal-UA biex jimmonitorjaw l-implimentazzjoni tal-ftehimiet ta’ paċi, jappoġġaw it-tħejjija u l-monitoraġġ tal-elezzjonijiet, u biex jirrappreżentaw lill-UA f’laqgħat mal-korpi nazzjonali u l-organizzazzjonijiet internazzjonali;
3. jistabbilixxu struttura kontinentali li tippermetti lill-UA timplimenta b’mod rapidu kapaċitajiet ta’ komunikazzjoni, ta’ kmand u ta’ kontroll strateġiċi u operazzjonali bejn l-UA f’Addis Ababa, il-livell reġjonali u l-missjonijiet fuq il-post;
4. jipprovdu lill-Kummissjoni tal-UA u lill-SROs bl-għarfien espert għall-inizjattivi tagħhom fil-qasam tal-paċi u s-sigurtà;
5. jappoġġaw lill-SROs fil-bini tal-kapaċitajiet tagħhom u fl-eżekuzzjoni tal-mandati tagħhom fir-rigward tal-prevenzjoni u r-riżoluzzjoni ta’ kunflitti.

53

Il-puntwalità u l-prevedibbiltà huma essenzjali biex l-appoġġ istituzzjonali jkollu r-riżultati mistennija. Il-fatt li l-kuntratti ma ġewx konklużi fil-ħin wassal għal dewmien fl-implimentazzjoni u fisser li l-finanzjament tal-attivitajiet ma kienx prevedibbli. Mill-14-il kuntratt li awditjajna, 10 ġew iffirmati tard għal waħda jew aktar minn dawn ir-raġunijiet li ġejjin:

1. il-Kummissjoni tal-UA u l-SROs ippreżentaw il-proposti ta’ finanzjament tard jew ippreżentaw proposti ta’ kwalità baxxa;
2. in-negozjati dwar il-baġits, l-attivitajiet u l-ġestjoni finanzjarja tal-kuntratti kienu kkumplikati;
3. is-sistema ta’ informazzjoni tal-Kummissjoni tal-UE kellha problemi tekniċi.

54

Barra minn hekk, 8 minn dawn l-10 kuntratti ntużaw biex jiffinanzjaw attivitajiet b’mod retroattiv⁵⁸. Tlieta minnhom ġew iffirmati ġranet biss qabel ma l-attivitajiet iffinanzjati kellhom jiġu kkompletati. Aħna sibna li d-dewmien fl-iffirmar ta’ kuntratti, flimkien mad-dgħufijiet interni eżistenti fl-UA u fl-SROs, kellu impatt negattiv fuq l-implimentazzjoni tal-attivitajiet għal 6 mill-14-il kuntratt (l-Anness IV). Il-Kaxxa 5 tippreżenta l-impatt negattiv tad-dewmien fil-konklużjoni ta’ kuntratti u tal-finanzjament retroattiv fuq żewġ Programmi ta’ Appoġġ għall-APSA.

55

Il-Kaxxa 6 turi eżempju tad-dewmien fix-xiri ta’ sistema ta’ informazzjoni għall-Forza Afrikana ta' Intervent fil-Pront. F’dan il-każ, id-dgħufijiet interni tal-UA aggravaw id-dewmien ikkawżat mill-iffirmar tardiv tal-kuntratt.

L-istrumenti ta' finanzjament mhux dejjem intużaw b’mod koerenti

56

La l-Kummissjoni Ewropea u lanqas is-SEAE ma kienu analizzaw l-iżvantaġġi komparattivi tal-istrumenti kollha li kellhom għad-dispożizzjoni tagħhom fil-qasam tal-paċi u s-sigurtà (il-paragrafu 9). Aħna sibna li l-istrumenti mhux dejjem intużaw b’mod koerenti. L-FPA hija adattata ferm għall-ħtiġijiet ta’ finanzjament fuq terminu qasir, peress li ċ-ċikli tagħha ta’ finanzjament idumu minn sentejn sa tliet snin. Għall-kuntrarju, ir-RIPs li għandhom ċiklu ta’ finanzjament ta’ seba’ snin huma aktar adattati għall-ħtiġijiet ta’ finanzjament fuq terminu twil.

57

Aħna sibna każijiet fejn kuntratti tal-FPA fuq terminu qasir kienu qed jintużaw biex jiffinanzjaw postijiet ta’ impjieg fuq terminu twil, pereżempju, taħt il-Kuntratti dwar is-Salarji li jirriżultaw mill-JFA (il-paragrafu 39). F’dan il-każ, l-użu ta’ kuntratti suċċessivi ta’ minn sena sa sentejn, dgħajjef il-ġestjoni tar-riżorsi umani u fisser li l-għadd u t-tip ta’ postijiet ta’ impjieg kellhom jiġu nnegozjati mill-ġdid kważi kull sena. Dan ikkontribwixxa għal dewmien fil-konklużjoni ta’ kuntratti (il-paragrafu 53) u għal nuqqas ta’ sigurtà fl-impjieg, li wassal għat-telf ta’ persunal bl-esperjenza. F’każijiet oħra, ir-RIPs kienu ntużaw biex jindirizzaw ħtiġijiet fuq terminu qasir, li għalihom huma inqas adattati.

58

Il-Kummissjoni Ewropea u s-SEAE ma stabbilewx qafas ta’ koordinazzjoni li jkopri l-istrumenti kollha tagħhom fil-qasam tal-paċi u s-sigurtà. Madankollu, mill-2015 ’l hawn, huma ħadu passi biex jiżguraw li l-FPA u r-RIPs jikkomplementaw lil xulxin b’mod aktar effettiv, partikolarment billi:

1. ikkjarifikaw il-mod li bih il-postijiet ta’ impjieg fi ħdan l-SROs jiġu ffinanzjati. Għal dan l-għan, huma ddeċidew li jenħtieġ li l-ispejjeż għall-persunal mhux militari tal-organizzazzjonijiet reġjonali appoġġati mill-UE jiġu trasferiti mill-FPA għar-RIPs. Madankollu, din id-deċiżjoni ttieħdet wara li r-RIPs kienu ġew adottati, li għamilha aktar diffiċli biex tiġi implimentata. Finalment, it-trasferiment ġie pospost għal Jannar 2018;
2. involvew id-delegazzjonijiet reġjonali tal-UE fl-eżaminar tal-pjanijiet ta’ ħidma reġjonali relatati mal-Programm ta’ Appoġġ għall-APSA li huma ffinanzjati taħt l-FPA, biex jiżguraw li dawn ikunu jikkomplementaw il-programmi ffinanzjati mir-RIPs;
3. mill-2017 ’l hawn, inkludew id-delegazzjonijiet reġjonali tal-UE fil-kumitat ta' tmexxija tal-Programm ta’ Appoġġ għall-APSA.

Ġew stabbiliti mekkaniżmi ta’ monitoraġġ u ta’ rappurtar iżda dawn ma pprovdewx informazzjoni suffiċjenti dwar ir-riżultati

59

Il-Kummissjoni kienet stabbiliet mekkaniżmi ta’ monitoraġġ u ta’ rappurtar għall-kuntratti kollha li awditjajna. Dawn kienu jinkludu l-preżentazzjoni perjodika ta’ rapporti deskrittivi u finanzjarji (fil-biċċa l-kbira kull sitt xhur), laqgħat regolari tal-kumitat ta' tmexxija, u awditi esterni indipendenti tal-infiq. Fil-prattika, il-mekkaniżmi ta’ monitoraġġ tal-Kummissjoni kienu affettwati minn dgħufijiet u ma pprovdewx informazzjoni suffiċjenti dwar ir-riżultati. Fil-kuntratti li awtitjajna sibna l-eżempji li ġejjin:

1. l-outputs ippjanati ma kinux speċifiċi jew ma setgħux jitkejlu f’6 mill-14-il kuntratt. Pereżempju, id-dipartimenti jew l-istrumenti appoġġati kienu mistennija li jkollhom “kapaċità mtejba”, “rwol imsaħħaħ”, jew li jsiru “kompletament operazzjonali”. F’xi wħud minn dawn il-każijiet, l-attivitajiet sottostanti ma kinux jirrelataw direttament mal-outputs;
2. xi wħud mill-indikaturi mfassla għal 12 mill-kuntratti, minflok ma stabbilew l-outputs li kellhom jinkisbu, elenkaw inputs u attivitajiet, u b’hekk kellhom użu limitat għall-iskopijiet ta’ monitoraġġ. F’każijiet oħra, il-linji bażi u l-miri meħtieġa għall-kejl tal-progress, kienu neqsin;
3. fi tliet każijiet, il-fatt li l-kuntratti ġew iffirmati fl-aħħar ġranet tal-perjodi ta’ implimentazzjoni tagħhom fisser li l-finanzjament retroattiv elimina r-rilevanza tad-dispożizzjonijiet ta’ monitoraġġ fil-prattika;
4. ir-rapporti mħejjija mill-UA u l-SROs ħafna drabi waslu tard. Għal sitt kuntratti, dawn ir-rapporti ma kinux jinkludu biżżejjed dettalji dwar l-outputs u l-indikaturi fil-kuntratti.

60

B’mod ġenerali, il-membri tal-persunal tal-UE li intervistajna kellhom stampa ġenerali tajba tal-implimentazzjoni tal-kuntratti, għalkemm dan l-għarfien mhux dejjem ġie inkluż fir-rapporti. Għall-kuntratti awditjati, il-Kummissjoni tal-UE kienet għadha ma wettqitx missjonijiet ta’ “Monitoraġġ Orjentat lejn ir-Riżultati (MOR)”⁵⁹. Evalwazzjoni esterna kienet twettqet fir-rigward ta’ kuntratt wieħed biss. Dan fisser li d-disponibbiltà limitata ta’ informazzjoni dwar ir-riżultati mingħand l-UA u l-SROs ma ġietx ikkumpensata minn sorsi oħra.

Konklużjonijiet u rakkomandazzjonijiet

61

L-Istati membri tal-UA waqqfu l-APSA bħala rispons strutturali fuq terminu twil għall-isfidi relatati mal-paċi u s-sigurtà fuq il-kontinent Afrikan. Permezz tal-APSA, l-UA u l-SROs li ngħataw mandat għandhom aċċess għal għodod li jgħinuhom jipprevienu, jimmaniġġjaw u jirriżolvu l-kunflitti. L-UE pprovdiet appoġġ għall-APSA permezz tal-Fond Ewropew għall-Iżvilupp. Aħna awditjajna l-appoġġ li ngħata mill-UE matul it-tliet snin mill-2014 sal-2016 u sibna li ftit li xejn kellu effett u kien jeħtieġ li jiġi ffukat mill-ġdid.

62

L-UE ma stabbilietx prijoritajiet ċari għall-appoġġ tagħha u l-istrateġija tagħha ma kellhiex viżjoni fit-tul għall-evoluzzjoni ta’ dan l-appoġġ. Pereżempju, matul il-perjodu awditjat, hija ma ffukatx biżżejjed fuq it-tranżizzjoni minn appoġġ li jiffoka fuq il-ħlas ta’ salarji għal appoġġ immirat fuq il-bini ta’ kapaċità biex tiżgura s-suċċess fit-tul tal-appoġġ tagħha. Id-defiċit fil-kontribuzzjonijiet mill-Istati membri tal-UA għall-baġit tal-Unjoni Afrikana u għall-Fond għall-Paċi ħalla lill-APSA dipendenti ferm fuq l-appoġġ mid-donaturi, inkluża l-UE. L-UE appoġġat il-pjanijiet li l-UA fformalizzat fid-deċiżjoni tagħha tal-2016 biex l-APSA tikseb indipendenza finanzjarja, iżda l-implimentazzjoni ta’ dawn il-pjanijiet kienet għadha fi stadju bikri (il-paragrafi 16 sa 30).

63

Aħna sibna li madwar nofs il-kuntratti ffinanzjati mill-UE kienu pproduċew jew il-biċċa l-kbira jew xi wħud mir-riżultati mistennija fiż-żmien tal-awditu. L-UE appoġġat riformi għat-titjib tal-kapaċità finanzjarja, operazzjonali u istituzzjonali tal-UA u tal-SROs, iżda dawn ir-riformi ftit li xejn taw riżultati sa issa. Il-kapaċità tal-komponenti tal-APSA kienet tvarja konsiderevolment u kellha tiffaċċja l-isfidi ta’ nuqqas ta’ impenn politiku u ta’ finanzjament limitat (il-paragrafi 32 sa 50).

Rakkomandazzjoni 1 L-UA hija mħeġġa tipparteċipa fl-APSA u l-appoġġ li jingħata mill-UE jiġi ffukat mill-ġdid

Jenħtieġ li s-SEAE u l-Kummissjoni jiżviluppaw b’mod konġunt viżjoni ċara u fit-tul tal-appoġġ tal-UE għall-APSA, sabiex:

• inaqqsu progressivament u eventwalment itemmu gradwalment l-appoġġ tal-UE għall-ispejjeż operazzjonali bażiċi tal-APSA biex minflok jappoġġaw programmi għall-bini ta’ kapaċità li jkunu mmirati tajjeb;
• jorbtu l-appoġġ għall-bini ta’ kapaċità tal-APSA ma’ titjib fil-mod li bih l-UA u l-SROs joperaw, u
• jimmonitorjaw mill-qrib l-implimentazzjoni tal-impenn meħud mill-UA biex tikseb l-indipendenza finanzjarja.

Data mmirata għall-implimentazzjoni: tmiem l-2020.

64

Aħna awditjajna l-14-il kuntratt kollha konklużi bejn l-2014 u l-2016 li taħthom l-UE tat appoġġ lill-APSA. Sibna li l-kuntratti mhux dejjem kienu mmaniġġjati b’mod effiċjenti. Minħabba l-fatt li 10 mill-kuntratti ġew iffirmati tard, il-fondi mhux dejjem kienu disponibbli b’mod prevedibbli u f’waqtu. Dan wassal għat-telf ta’ xi persunal bl-esperjenza u rriżulta f’dewmien fl-implimentazzjoni tal-attivitajiet tal-APSA (il-paragrafi 52 sa 55). Aħna sibna wkoll li filwaqt li kien hemm stabbiliti mekkaniżmi ta’ monitoraġġ, dawn ma kinux qed joperaw sew, pereżempju meta l-kuntratti ġew iffinanzjati b’mod retroattiv. Ir-rappurtar ma kienx komplet u ma pprovdiex informazzjoni suffiċjenti dwar ir-riżultati. Matul il-perjodu awditjat, l-istrumenti ta’ finanzjament mhux dejjem intużaw b’mod koerenti. F’dan ir-rigward aħna osservajna li kien sar xi titjib mill-2015 ’l hawn (il-paragrafi 56 sa 60).

Rakkomandazzjoni 2 Jenħtieġ li l-interventi jkunu konsistentement ibbażati fuq ir-riżultati

Jenħtieġ li l-Kummissjoni:

• tkompli tnaqqas id-dewmien fil-konklużjoni ta’ kuntratti, u tevita l-użu tal-finanzjament retroattiv;
• tibbaża l-monitoraġġ u r-rappurtar relatati ma’ kuntratti fuq riżultati speċifiċi u li jistgħu jitkejlu, b’indikaturi li jippermettu l-kejl tal-progress miksub;
• iżżid il-“monitoraġġ orjentat lejn ir-riżultati” tal-programmi għall-bini ta’ kapaċità tal-APSA, u tevalwahom aktar ta’ spiss, u
• twettaq analiżi komparattiva tal-istrumenti ta’ finanzjament disponibbli fil-qasam tal-paċi u s-sigurtà u tużahom b’mod koerenti.

Data mmirata għall-implimentazzjoni: tmiem l-2019.

Dan ir-Rapport ġie adottat mill-Awla III, immexxija mis-Sinjura Bettina JAKOBSEN, Membru tal-Qorti tal-Awdituri, fil-Lussemburgu fil-laqgħa tagħha tas-26 ta’ Ġunju 2018.

Akronimi u abbrevjazzjonijiet

APSA: Arkitettura Afrikana għall-Paċi u s-Sigurtà

AUC: Kummissjoni tal-Unjoni Afrikana

CEWS: Sistema Kontinentali ta’ Twissija Bikrija

DPS: Dipartiment tal-Paċi u s-Sigurtà

ECCAS: Komunità Ekonomika tal-Istati tal-Afrika Ċentrali

ECOWAS: Komunità Ekonomika tal-Istati tal-Afrika tal-Punent

FPA: Faċilità għall-Paċi fl-Afrika

JAES: Strateġija Konġunta Afrika-UE

JFA: Arranġament ta’ Finanzjament Konġunt

KPS: Kunsill tal-Paċi u s-Sigurtà

RIP: Programm Indikattiv Reġjonali

SRO: Organizzazzjoni Subreġjonali

UA: Unjoni Afrikana

Tim tal-awditjar

Ir-rapporti speċjali tal-QEA jippreżentaw ir-riżultati tal-awditi li twettaq ta’ politiki u programmi tal-UE, jew ta’ suġġetti relatati mal-ġestjoni minn oqsma speċifiċi tal-baġit tal-UE. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta’ introjtu jew ta’ nfiq involut, l-iżviluppi li jkunu għad iridu jseħħu u l-interess politiku u pubbliku.

Dan l-awditu tal-prestazzjoni twettaq mill-Awla III tal-Awditjar, Azzjoni esterna/Sigurtà u ġustizzja, li hija mmexxija minn Bettina Jakobsen, Membru tal-QEA. L-awditu tmexxa minn Juhan Parts, Membru tal-QEA, li ngħata appoġġ minn Ken-Marti Vaher, Kap tal-Kabinett u Margus Kurm, Attaché tal-Kabinett; Sabine Hiernaux-Fritsch, Maniġer Prinċipali; Karel Meixner, Kap tal-Kompitu; Alina Milasiute, Dirk Neumeister u Piotr Zych, Awdituri. Torielle Perreur-Lloyd ipprovdiet appoġġ fl-abbozzar.

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Tel. +352 4398-1
Mistoqsijiet: eca.europa.eu/mt/Pages/ContactForm.aspx
Sit web: eca.europa.eu
Twitter: @EUAuditors

Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2018

PDF	ISBN 978-92-847-0389-0	ISSN 1977-5741	doi:10.2865/224922	QJ-AB-18-016-MT-N
HTML	ISBN 978-92-847-0361-6	ISSN 1977-5741	doi:10.2865/1873	QJ-AB-18-016-MT-Q

© L-Unjoni Ewropea, 2018

Għal kull użu jew riproduzzjoni ta’ ritratti jew materjal ieħor li ma jaqax taħt id-drittijiet tal-awtur tal-Unjoni Ewropea, irid jintalab il-permess direttament mingħand id-detenturi tad-drittijiet tal-awtur.

KIF TIKKUNTATTJA LILL-UE

Personalment
Madwar l-Unjoni Ewropea kollha hemm mijiet ta’ ċentri ta’ informazzjoni tal-Europe Direct. Tista’ ssib l-indirizz tal-eqreb ċentru għalik f’dan is-sit: https://europa.eu/european-union/contact_mt

Bit-telefown jew bil-posta elettronika
Europe Direct huwa servizz li jwieġeb il-mistoqsijiet tiegħek dwar l-Unjoni Ewropea. Tista’ tikkuntattja dan is-servizz:

• bit-telefown bla ħlas: 00 800 6 7 8 9 10 11 (ċerti operaturi jafu jimponu ħlas għal dawn it-telefonati),
• fuq dan in-numru standard: +32 22999696, jew
• bil-posta elettronika permezz: https://europa.eu/european-union/contact/write-to-us_mt

KIF ISSIB TAGĦRIF DWAR L-UE

Onlajn
L-informazzjoni dwar l-Unjoni Ewropea bil-lingwi uffiċjali kollha tal-UE hija disponibbli fuq is-sit web Europa fuq: https://europa.eu/european-union/contact_mt

Pubblikazzjonijiet tal-UE
Tista’ tniżżel mill-internet jew tordna l-pubblikazzjonijiet tal-UE, li xi wħud minnhom huma bla ħlas u xi oħrajn bil-ħlas, mill-EU Bookshop fl-indirizz li ġej: https://op.europa.eu/mt/publications. Kopji multipli ta’ pubblikazzjonijiet bla ħlas tista’ tiksibhom billi tikkuntattja lil Europe Direct jew liċ-ċentru tal-informazzjoni lokali tiegħek (ara https://europa.eu/european-union/contact_mt).

Il-liġi tal-UE u dokumenti relatati
Għal aċċess għall-informazzjoni legali tal-UE, inkluż il-liġijiet kollha tal-UE mill-1951 ’l hawn, fil-verżjonijiet lingwistiċi uffiċjali kollha, żur is-sit EUR-Lex hawnhekk: http://eur-lex.europa.eu

Dejta Miftuħa mill-UE
Il-portal tad-Dejta Miftuħa mill-UE (http://data.europa.eu/euodp/mt/home?) jipprovdi aċċess għal settijiet tad-dejta mill-UE. Id-dejta tista’ titniżżel mill-internet u tintuża mill-ġdid bla ħlas, kemm għal skopijiet kummerċjali kif ukoll mhux kummerċjali.